ཕྲིན་བཅོལ་འཇིགས་བརྒྱད་མེ་ལྕེ་གཞིལ་བའི་ཆར་ཆེན།
༄༅།། བསྟན་སྲུང་ཆོས་སྐྱོང་རྣམས་ཀྱི་བསང་གསོལ་གང་ལའང་སྦྱར་ཆོག་པའི་ཕྲིན་བཅོལ་འཇིགས་བརྒྱད་མེ་ལྕེ་གཞིལ་བའི་ཆར་ཆེན་ཞེས་བྱ་བ་བཞུགས་སོ།། ཨེ་མ་ཧོ། བརྒྱུད་གསུམ་བླ་མའི་ངོ་བོ་ཨོ་རྒྱན་རྗེ། །འཁོར་འདས་དབང་བསྒྱུར་རྟ་མཆོག་ཧེ་རུ་ཀ །འཇིགས་བརྒྱད་གཡུལ་འཇོམས་འཕགས་མ་སྒྲོལ་མ་སོགས། །གནས་གསུམ་མཁའ་འགྲོ་དམ་ཅན་རྒྱ་མཚོའི་ཚོགས། །མི་མངོན་དབྱིངས་ནས་གནས་འདིར་བརྩེར་དགོངས་ལ། །མྱུར་མགྱོགས་ཐུགས་རྗེའི་སྟོབས་ཀྱིས་ཤུགས་ཕྱུང་ནས། །རྒྱལ་ཁམས་སྤྱི་དང་ཆོས་གྲྭ་འདི་ཉིད་ལ། །འཇིགས་བརྒྱད་བར་ཆད་བཟློག་པའི་མཐུ་དཔུང་བསྐྱེད། །ཁྱད་པར་གངས་ཅན་བོད་ཀྱི་ལྗོངས་འདི་རུ། །ཐུབ་བསྟན་གསལ་མཛད་མཁན་སློབ་ཆོས་གསུམ་སོགས། །གྲུབ་བརྙེས་རིག་འཛིན་བརྒྱུད་པའི་ཚོགས་རྣམས་ཀྱིས། །བཀའ་དང་དམ་ལ་བཏགས་པའི་ཆོས་སྐྱོང་སྤྱི། །བྱེ་བྲག་སྙིང་ཐིག་སྙིང་པོའི་སྲུང་མ་མཆོག །སྤྱན་གཅིག་ཁྲག་མཚོར་ཁོལ་བའི་མ་མོ་དང་། །རུ་ཊ་སྡེ་གསུམ་རྩད་གཅོད་དྲེགས་པའི་གཙོ། །མ་ནིང་ལེགས་ལྡན་དཔལ་མགོན་ཚོགས་ཀྱི་བདག །སྐུ་གསུང་ཐུགས་ཡོན་ཕྲིན་ལས་མགོན་པོ་ལྔ། །སྲིད་གསུམ་ལྟེ་བར་རྔུབ་མཛད་ར་ཧུ་ལ། །གསང་བདག་ཐུགས་སྤྲུལ་དམ་ཅན་མགར་བ་ནག །ཡང་དགོས་རྟ་མཆོག་རྒྱལ་པོ་བསྟན་སྲུང་སྐུར། །བསྟན་དགྲའི་གཤེད་དུ་གདུག་ཅན་དྲེགས་པའི་ཚུལ། །ཞིང་བཅུའི་སྲོག་གཤེད་གནོད་སྦྱིན་ཙི་འུ་དམར། །གདུག་ཅན་དྲེགས་པའི་བཙན་འཁོར་རྡུལ་སྙེད་གྲངས། །སྔོན་ཚེ་རྒྱལ་དབང་པདྨ་ཐོད་ཕྲེང་དང་། །བར་དུ་མཆོག་སྤྲུལ་མངའ་རིས་པཎ་ཆེན་སོགས། །གྲུབ་བརྙེས་རིག་འཛིན་བརྒྱུད་པའི་བཀའ་བསྒོས་ལྟར། །དབང་དྲག་ཕྲིན་ལས་རྡོ་རྗེའི་ཐོག་དབལ་གྱིས། །བདུད་སྡེའི་ཀླད་པ་འགེམས་པའི་མཐུ་རྩལ་བསྐྱེད། །འཇིགས་བརྒྱད་བར་ཆད་བཟློག་པའི་སྟོབས་ཤུགས་ཕྱུང་། །ཁྱད་པར་ཁྱོད་ཉིད་སྲུང་མར་རྟག་བརྟེན་ནས། །རེ་ཞིང་ལྟོས་པའི་རྣལ་འབྱོར་བདག་ཉིད་ལ། །བར་ཆད་གླགས་ལྟ་འབྱུང་པོའི་ཕྲུ་མ་ཆོམས། །གཡོ་ཅན་དགྲ་རྐུན་ཤོམ་པའི་དོན་སྙིང་ཕྱུང་། །ཡང་དགོས་ནང་དུ་ཉོན་མོངས་རྒྱུ་རྐྱེན་ལས། །ལྟས་ངན་ཕྱི་རུ་ཤར་བའི་ཆོ་འཕྲུལ་བརྒྱད། །ཞེ་སྡང་མེ་དང་འདོད་ཆགས་ཆུ་བོ་དང་། །ང་རྒྱལ་སེང་གེ་ཕྲག་དོག་དུག་སྦྲུལ་འཇིགས། །སེར་སྣ་ལྕགས་སྒྲོག་ཐེ་ཚོམ་ཤ་ཟའི་གདོན། །ལྟ་ངན་རྐུན་པོ་གཏི་མུག་གཉིས་འཐུང་སོགས། །འཇིགས་པ་བརྒྱད་ཀྱིས་ཉེ་བར་འཚེ་བ་ཀུན། །ད་ལྟ་སྐད་ཅིག་ཟློག་པའི་ཕྲིན་ལས་མཛོད། །སྙིགས་དུས་རྒྱལ་བསེན་འབྱུང་པོས་རྒྱུད་བསྐུལ་ནས། །སྨོན་ལོག་དམ་སྲིའི་རིགས་ཀྱིས་བསྟན་འགྲོ་ལ། །གནོད་ཅིང་འཚེ་བའི་ཚེ་བསོད་སྟོབས་འབྱོར་ཀུན། །བསྟན་སྲུང་དྲེགས་པའི་ཚོགས་ཀྱིས་རྨིང་མེད་ཐོངས། །གནས་ཆེན་རྟེན་གསུམ་འཛོམས་པའི་ཆོས་གྲྭ་ལ། །ཉེ་བར་འཚེ་བའི་མི་དང་མི་མིན་དཔུང་། །ཁ་དཀར་སྙིང་གནག་ལོག་སྦྱོར་ཤོམ་པའི་རིགས། །ཁང་ཧྲུལ་ཐོག་མདས་གཞོམས་བཞིན་རྡུལ་དུ་རློགས། །ཀ་དག་ཟང་ཐལ་དགོངས་པ་མངོན་གྱུར་པའི། །གྲུབ་པའི་དབང་ཕྱུག་པདྨ་རིག་འཛིན་སོགས། །རྫོགས་ཆེན་ཡབ་སྲས་བརྒྱུད་པར་བཅས་པ་ཡིས། །འགྱུར་མེད་རྡོ་རྗེའི་བཀའ་དང་དམ་བཞག་ལྟར། །གསང་ཆེན་སྲུང་མ་སྤྱི་དང་བྱེ་བྲག་གིས། །མེ་ཆུ་ལ་སོགས་འཇིགས་བརྒྱད་བར་ཆད་ཀུན། །མ་ལུས་མིང་གི་ལྷག་མར་ཚར་བཅད་ནས། །བདེ་སྐྱིད་རྫོགས་ལྡན་སྣང་བས་བདག་སོགས་འགྲོ། །རྟག་ཏུ་དགེ་ཞིང་ལེགས་པའི་ཤིས་པ་སྩོལ། །ཅེས་པའང་གསང་ཆེན་བསྟན་པའི་མངའ་བདག་ངེས་ལེགས་བླ་མ་ཁུ་དབོན་གྱིས་བཀའ་ཕེབས་ལྟར། གྲུབ་དབང་རྫོགས་ཆེན་བཞི་བའི་ཞབས་རྡུལ་སྤྱི་བོར་རེག་པའི་རྒྱ་སྤྲུལ་མིང་གྱི་ན་བས་སྨྲས་པ་དུས་གསུམ་ཀུན་ཏུ་བར་ཆད་བདུད་སྡེའི་གཡུལ་ལས་རྣམ་པར་རྒྱལ་ནས་བདེ་སྐྱིད་རྫོགས་ལྡན་གསར་བའི་དགའ་སྟོན་ལ་སྤྱོད་པའི་རྒྱུར་གྱུར་ཅིག་གུ དགེའོ།། དགེའོ།། དགེའོ།།