དམ་ཅན་རྒྱ་མཚོའི་སྐོང་བཤགས་གྲིབ་སེལ་གྱི་དམིགས་པ་དང་བཅས་པ་ཉམས་གྲིབ་དབྱིངས་སུ་བསལ་བའི་དྲི་བཞོན།
༄༅། དམ་ཅན་རྒྱ་མཚོའི་སྐོང་བཤགས་གྲིབ་སེལ་གྱི་དམིགས་པ་དང་བཅས་པ་ཉམས་གྲིབ་དབྱིངས་སུ་བསལ་བའི་དྲི་བཞོན་ཞེས་བྱ་བ། ཨོཾ་ཡེ་ཤེས་ལས་གྲུབ་མངོན་ཤེས་རྫུ་འཕྲུལ་ཅན། །ལེགས་ཉེས་སྟང་འཛིན་དམ་ཚིག་རྗེས་གཅོད་པའི། །ཕྱི་ནང་མཁའ་སྤྱོད་གནས་ཡུལ་དུར་ཁྲོད་ཀྱི། །དཔང་གྱུར་རྡོ་རྗེ་དམ་ཅན་དགོངས་སུ་གསོལ། །ཐུགས་རྗེའི་གདུང་འཚོབ་རྡོ་རྗེའི་རྣལ་འབྱོར་བདག །བླ་མེད་བྱང་ཆུབ་མཆོག་ཏུ་སེམས་བསྐྱེད་ནས། །ཟབ་གསང་རྡོ་རྗེ་སྙིང་པོར་དམ་བླངས་ཏེ། །སྐུ་གསུང་ཐུགས་སུ་སྒྲུབ་པར་དམ་བཅས་བཞིན། །དོན་ལ་གོལ་ཞིང་ལྡོག་སེམས་མ་མཆིས་ཀྱང་། །བག་མེད་ལེ་ལོ་དྲན་ཤེས་མི་ལྡན་པས། །གསང་གསུམ་རྩ་བ་ཡན་ལག་དམ་ཚིག་ལ། །འགལ་ཉམས་འདས་རལ་གང་བྱུང་མཐོལ་ཞིང་བཤགས། །ཆོས་སྐུ་མཁའ་མཉམ་སྤྲོས་དང་བྲལ་བ་ལ། །རྣམ་རྟོག་མཚན་མས་བདག་གཉིས་སོ་སོར་བཟུང་། །ལྟ་སྒོམ་མ་གསལ་ཏིང་འཛིན་གཡེལ་བ་སོགས། །ཆོས་ཉིད་དོན་དང་འགལ་བ་མཐོལ་ལོ་བཤགས། །མཆོད་གཏོར་བཤམས་ཉེས་ཆོ་ག་ལྷག་ཆད་དང་། །སྒོམ་པ་ཡུན་ཐུང་མ་གསལ་བཟླས་གྲངས་ཉུང་། །བརྩེ་གདུང་རྒྱུན་ཆད་ཚོགས་གཏོར་ལོ་ཟླར་འགྱངས། །དམ་རྫས་མ་ཚངས་གཙང་སྦྲ་ཉམས་པ་བཤགས། །དུས་སུ་མ་མཆོད་མ་བསྐང་མ་བཤགས་ཤིང་། །ལས་མཐའ་མ་ལོངས་བསྐུལ་དང་སྦྱོར་སྒྲོལ་ལོག །གསང་སྒོ་འཆོལ་དང་བཀའ་ལས་འདས་པ་སོགས། །བག་མེད་འགལ་འཁྲུལ་ཉམས་ཆགས་ཉེས་ལྟུང་བཤགས། །ཉམས་དང་འགྲོགས་ཤིང་ཉམས་པ་བསྐང་བ་དང་། །ཉམས་ལ་ཆོས་བཤད་ཉམས་དང་ཚོགས་འདྲེས་དང་། །ཉམས་ལ་མི་འཛེམས་ཉམས་ཆགས་ཞིག་རལ་གྱུར། །ཉམས་གྲིབ་སྐྱོན་གྱིས་གོས་རྣམས་མཐོལ་ལོ་བཤགས། །མདོར་ན་སྒོ་གསུམ་ལས་ཉོན་དབང་གྱུར་པས། །དམ་ཅན་རྒྱ་མཚོའི་ཐུགས་དང་འགལ་བའི་ལས། །བགྱིས་དང་བགྱིད་རྩལ་ཡི་རང་ལ་སོགས་པ། །ཐམས་ཅད་མ་ལུས་སྙིང་ནས་མཐོལ་ཞིང་བཤགས། །སོ་སོར་ཐར་བ་རིགས་བཞིའི་སྡོམ་པ་དང་། །བྱང་ཆུབ་སེམས་དཔའ་རྣམས་ཀྱི་བསླབ་པ་དང་། །རིག་འཛིན་གསང་བ་སྔགས་ཀྱི་དམ་ཚིག་སོགས། །འགལ་ཞིང་ཉམས་པ་ཐམས་ཅད་མཐོལ་ལོ་བཤགས། །ཚེ་འདིའི་རྐྱེན་དང་ཡུན་གྱི་སྒྲིབ་གྱུར་རྣམས། །རབ་གནོང་འགྱོད་སེམས་དྲག་པོས་མཐོལ་བཤགས་ན། །དམ་ཅན་བསྲུང་མས་བཀའ་ཆད་མི་གཏོང་ཞིང་། །མ་ལྟར་བྱམས་བརྩེའི་ཐུགས་ཀྱིས་ཉེར་དགོངས་ནས། །མཐུ་དབང་བྱིན་རླབས་དངོས་གྲུབ་མ་ལུས་སྩོལ། །ལས་ཉོན་ཤེས་བྱའི་མ་རིག་མུན་པ་སོལ། །མཉམ་ཉིད་རྫོགས་པའི་དོན་རྣམས་སོ་སོར་ཕྱེད། །ཡོན་ཏན་ལྷུན་གྲུབ་གཉིས་མེད་དབྱིངས་འགོད་མཛོད། །དོན་དམ་སྤྲོས་མེད་བརྗོད་ལས་འདས་པ་ལ། །རྣམ་རྟོག་གང་ཡང་དམིགས་པར་མི་འགྱུར་ཏེ། །ཀུན་རྫོབ་སྒྱུ་མ་ཙམ་གྱི་དབང་གིས་ནི། །ཐུགས་དང་འགལ་གྱུར་ནོངས་པ་མ་ལུས་བཤགས། །འཕགས་པ་ལགས་པས་ཁྱེད་ཀྱིས་དང་དུ་བཞེས། །སེམས་ཅན་ལགས་པས་ནོངས་ཤིང་འཁྲུལ་བ་བྱུང་། །སྒྱུ་མ་ལགས་པས་བཤགས་པ་གནང་བར་མཛོད། །ཐབས་ལ་མཁས་པས་ཚངས་པ་སྩལ་དུ་གསོལ། །ཞེས་བརྗོད་མཐར། རང་གི་ཐུགས་ཀའི་ཧཱུྃ་ལས་འོད་ཟེར་འཕྲོས་པས་རྡོ་རྗེ་གསུམ་གྱི་ལྷ་ཚོགས་མཁའ་ཁྱབ་ཏུ་སད་པ་རྣམས་ཀྱི་ཐུགས་རྒྱུད་བསྐུལ། དེ་རྣམས་ཀྱི་གནས་གསུམ་ནས་ཡི་གེ་བརྒྱ་པ་དཀར་དམར་མཐིང་གསུམ་བྱུང་། རང་གི་སྒོ་གསུམ་དང་། བསྟན་སྲུང་དམ་ཅན་རྒྱ་མཚོའི་ཚོགས་རྣམས་ཀྱི་གནས་གསུམ་དུ་ཐིམ་པས། རང་གི་དམ་ཚིག་ཉམས་ཆགས་ཉེས་ལྟུང་སྒྲིབ་པའི་ཚོགས་ཐམས་ཅད་དང་། བསྟན་སྲུང་དམ་ཅན་རྒྱ་མཚོའི་ཚོགས་རྣམས་ཀྱི་སྐུ་གསུང་ཐུགས་ལ་གྲིབ་ཕོག་པ་ཐམས་ཅད་བྱང་ཞིང་དག་པར་གྱུར་བར་བསམ། ཡི་གེ་བརྒྱ་པ་མང་དུ་བཟླའོ།། ཞེས་པ་འདི་ཡང་རྒྱ་སྤྲུལ་མིང་གིས་བྲིས་པའོ།