ཐར་བའི་ཕན་ཡོན།
ཁྲིད་ཀྱི་སྔོན་འགྲོས་གསལ་འདེབས་པ།
ད་ནི་དགེ་བའི་ཕན་ཡོན་མཐོང་ནས་དེ་ལ་འཇུག་འདོད་ཀྱི་བྲོད་པ་བསྐྱེད་པ་ཐར་བའི་ཕན་ཡོན་བསྟན་པ་ལ་གཉིས། ཁྲིད་ཀྱི་སྔོན་འགྲོ་དང་། ཐུན་གྱི་སྔོན་འགྲོ་གཉིས། དང་པོ་ནི། འདི་ལྟར་གཞི་ལུས་ངག་ཡིད་གསུམ་གྱིས་མི་དགེ་བཅུ་སྤོང་གི་ཚུལ་ཁྲིམས་ཟག་བཅས་ཀྱི་དགེ་བ་དེ་ལས་དང་པོ་ལུས་ཀྱི་ལས་སུ་གཞན་གྱི་སྲོག་སྐྱོབ་པ། སྦྱིན་པ་གཏོང་བ། དཀའ་ཐུབ་ཀྱི་སྡོམ་པ་སྲུང་བ་དང་གསུམ། གཉིས་པ་ངག་གི་ལས་སུ་བདེན་པར་སྨྲ་བ། འཁོན་པ་སྡུམ་པ། འཇམ་པོར་སྨྲ་བ། ཆོས་ལྡན་གྱི་གཏམ་སྨྲ་བ་དང་བཞི། ཡིད་ཀྱི་ལས་སུ་ཆོག་ཤེས་ཆེ་བ། ཕན་འདོགས་ཀྱི་བསམ་པ། རྒྱུ་འབྲས་ལ་ཡིད་ཆེས་ཏེ་དཀར་པོ་ལེགས་བྱས་ཀྱི་ལམ་བཅུ་བོ་དང་། གཞན་དུ་ལྷ་སྒོམ་པ། སྔགས་བཟླ་བ། ཏིང་ངེ་འཛིན་ལ་མཉམ་པར་བཞག་པ་སོགས་ཚུལ་བཞིན་དུ་དང་དུ་བླང་ནས་བརྩོན་པས་འབྲས་བུ་ཡང་སྲིད་ཕྱི་མའི་བདེ་དོན་འདོད་པ་ན་སྤྱོད་པའི་གནས་རིས་ཀྱི་བྱེ་བྲག་རྒྱལ་ཆེན་རིགས་བཞི། སུམ་ཅུ་རྩ་གསུམ། འཐབ་བྲལ། དགའ་ལྡན། འཕྲུལ་དགའ། གཞན་འཕྲུལ་དབང་བྱེད་དེ་ལྷ་གནས་དྲུག་དང་། འཛམ་བུའི་གླིང་ལ་སོགས་པ་མི་ཡི་འགྲོ་བ་བདུན་ཏེ་མངོན་མཐོའི་རྟེན་ཅན་དང་། སྔར་གྱི་མི་དགེ་བཅུ་སྤོང་གཞིར་བཞག་ལ་རྒྱུ་མི་གཡོ་བ་སྙོམ་འཇུག་གིས་བསྐྱེད་པའི་འབྲས་བུ་སྐྱེ་བའི་བསམ་གཏན་གྱི་ལྷ་གནས་གཟུགས་ཁམས་གནས་རིས་བཅུ་བདུན་དང་། དེ་ལས་ཀྱང་ཕྲ་བ་ཡིད་ཀྱི་ལས་ཞེན་པའི་ཆ་དང་བཅས་པའི་ཏིང་ངེ་འཛིན་གྱིས་བསྐྱེད་པའི་གཟུགས་མེད་སྐྱེ་མཆེད་མུ་བཞི་ལ་སོགས་སྲིད་པ་ན་གནས་སྐབས་ཀྱི་བདེ་བ་དང་། ཟས་གོས་དང་གནས་ཀྱིས་མཚོན་ལོངས་སྤྱོད་ཀྱི་འབྱོར་བ་གང་ཇི་སྙེད་པ་ཐམས་ཅད་དེ་དག་ཏུ་ཟག་བཅས་ཀྱི་དགེ་བའི་ལས་ཀྱི་འབྲས་བུ་ཡིན་པར་ཡིད་ཆེས་ཀྱིས་འདུལ་བ་ལུང་དང་། དྲན་པ་ཉེར་བཞག ལས་བརྒྱ་བ་ལ་སོགས་པ་ནས་གསུངས་པ་ལ་ངེས་ཤེས་སྐྱེ་ངེས་ཐག་ཆོད་པར་ཉམས་སུ་བླང་ངོ་།།
ཐུན་གྱི་སྔོན་འགྲོས་བློ་སྦྱང་བ།
གཉིས་པ་ཐུན་གྱི་སྔོན་འགྲོ་ནི། བདེ་བའི་སྟན་ལ་ལུས་སེམས་ཁོང་ལྷོད་པ་ལ་སོགས་པ་ཁྲིད་རྐང་སྔ་མ་རྣམས་དང་མཚུངས་པར་བྱས་ལ། བློ་སྦྱོང་གི་ཚུལ་ནི། དེ་ལྟར་འཇིག་རྟེན་ཟག་བཅས་ཀྱི་དགེ་བས་མངོན་མཐོའི་ཡོན་ཏན་ཐོབ་ཚུལ་ལ་ཡིད་ཆེས་པ་འཇིག་རྟེན་པའི་ཡང་དག་པའི་ལྟ་བ་ལ་གུས་པ་གཞིར་བཞག་གི་སྟེང་ད་རེས་རང་རེ་རྟེན་མི་ལུས་རིན་ཆེན་ཐོབ། རྒྱུ་བདེ་གཤེགས་སྙིང་པོ་མཇལ། རྐྱེན་དགེ་བའི་བཤེས་གཉེན་གྱིས་ཟིན་ཏེ་ཐེག་པ་ཆེན་པོ་བླ་ན་མེད་པའི་ཆོས་སྒོར་ལེགས་པར་ཞུགས་པའི་སྐབས་འདིར་ཐོག་མ་མེད་པའི་དུས་ཀྱི་བདག་དོན་ཏུ་ཞེན་པའི་བག་ཆགས་ཀྱི་དངོས་གཉེན་ཐར་བའི་ཕན་ཡོན་ལ་བྱང་ཆུབ་ཆེ་འབྲིང་ཆུང་གསུམ་གྱི་ལམ་འབྲས་བུ་དང་བཅས་པའི་ཐོབ་བྱ་ཐོབ་བྱེད་ལ་ཡིད་ཆེས་མཆོག་ཏུ་བསྐྱེད་ནས། དེ་ལས་ཀྱང་ལྟ་བ་དང་། ཉོན་མོངས་དང་། འཛིན་པའི་ཟག་པ་གསུམ་མེད་པ་ལམ་འཕགས་པའི་ཡེ་ཤེས་རང་རྒྱུད་ལ་མྱུར་དུ་སྐྱེ་བའི་ཉེ་རྒྱུ་གང་ཟག་དང་ཆོས་ཀྱི་བདག་མེད་རྣམས་གཅིག་དང་། ཕྱེད་དང་། གཉིས་རྟོགས་པའི་ལམ་བདེན་པ་བཞི་ལ་འཇུག་ལྡོག་མ་ནོར་བར་བསྒྲུབ་པའི་ཉན་ཐོས་དང་། རང་རྒྱལ་རྣམས་ཀྱི་བྱང་ཆུབ་དང་། དེ་དག་ཐོབ་ཀྱང་གཞན་དོན་མཁའ་ཁྱབ་དུ་འབྱུང་བའི་སངས་རྒྱས་ཀྱི་རྣམ་མཁྱེན་གངས་ཆེན་མཚོ་དང་མཉམ་པའི་གོ་འཕང་ལས་ཆེས་ཆེར་ཉམས་པ་ཞི་བ་ཕྱོགས་གཅིག་ཏུ་ཞེན་པའི་རང་དོན་གོམས་པའི་བློ་མངོན་སུམ་དུ་ལྡོག་ལ་གཞན་དོན་ཁོ་ནར་གཞོལ་བའི་བྱམས་སྙིང་རྗེ་ཁྱད་པར་ཅན་གྱི་བྱང་ཆུབ་ཀྱི་སེམས་རིན་པོ་ཆེས་ཀུན་ནས་བསླང་སྟེ། འབྲས་བུ་མཐའ་གཉིས་ལ་མི་གནས་པའི་མྱང་འདས་བྱང་ཆུབ་ཆེན་པོའི་གོ་འཕང་དམ་པ་ལས་ཉོན་གྱི་ཟུག་རྔུ་བྲལ་བས་ཞི་བ། སྡུག་བསྔལ་གསུམ་གྱི་གདུང་བ་མེད་པས་བདེ་བ། ཐར་བའི་ཡོན་ཏན་རྫོགས་པས་བསིལ་བ། འབྲས་བུ་མི་འགྱུར་བ་ངེས་པར་ལེགས་པའི་རང་བཞིན་ཅན་དེ་ཉིད། ད་ལྟ་རྟེན་འདིར་མངོན་སུམ་དུ་ཐོབ་པའི་ཕྱིར་ཐོབ་བྱེད་ཀྱི་ལམ་མ་ནོར་བ་དགེ་རྩ་ཐབས་ཀྱིས་ཟིན་པ་སྦྱོར་བ་སེམས་བསྐྱེད་དམ་པ། དགེ་རྩ་རྐྱེན་གྱིས་མི་ཤིག་པ་དངོས་གཞི་དམིགས་མེད་དམ་པ། དགེ་རྩ་ཆུད་མི་ཟ་བ་རྗེས་བསྔོ་བ་དམ་པ་གསུམ་གྱིས་ཟིན་ངེས་པར་ཐར་བའི་ལམ་ལ་རང་དོན་དུ་ཞེན་པའི་ལེ་ལོ་སྤང་སྟེ་གཞན་དོན་འབའ་ཞིག་པ་ཡང་དག་པར་བསྒྲུབ་པའི་བརྩོན་འགྲུས་བརྩམས་པར་བྱས་ལ་ཡང་ཡང་དམ་བཅའ་ཞིང་རྗེས་བསྔོ་བ་བྱའོ།། ཁྲིད་རྐང་ལྔ་བ་སོང་།