ཁྲིད་ཀྱི་སྔོན་འགྲོས་གསལ་འདེབས་པ།
སྐྱབས་ཡུལ་གསལ་གདབ་པ།
ཆོས་ལམ་དུ་འགྲོ་བའི་ཐབས་ལ་གསུམ། ཐར་བའི་ཕན་ཡོན་བསྟན་པ། ལམ་གྱི་གཞི་རྟེན་སྐྱབས་སུ་འགྲོ་བ། ལམ་གྱི་ངོ་བོ་ཐེག་ཆེན་བྱང་ཆུབ་མཆོག་ཏུ་སེམས་བསྐྱེད་པ་དང་གསུམ། དང་པོ་ནི་གོང་དུ་སོང་། གཉིས་པ་ལ་གཉིས། ཁྲིད་ཀྱི་སྔོན་འགྲོས་གསལ་འདེབས་པ་དང་། ཐུན་གྱི་སྔོན་འགྲོས་བློ་སྦྱོང་བ་དང་གཉིས། དང་པོ་ནི་སྐྱབས་ཡུལ་གསལ་གདབ་པའི་རིམ་པ་སྟེ། ཨེ་མ་ཧོ་ཞེས་ངོ་མཚར་བའི་ཚིག་གིས་ཐོག་དྲངས་ནས་ས་ཕྱོགས་ཐམས་ཅད་དག་པ་རབ་འབྱམས་བདེ་བ་ཅན་གྱི་ཞིང་ཁམས་ལྟ་བུ་སྣོད་བཅུད་ཀྱི་བཀོད་པ་ཤིན་ཏུ་ངོ་མཚར་བའི་རང་བཞིན་ས་གཞི་དང་། ལྗོན་ཤིང་པདྨོ་དང་། ཆུ་ཀླུང་ལ་སོགས་པས་རྣམ་པར་བརྒྱན་པ། དོན་ལ་འཕགས་པའི་ཟག་མེད་ཀྱི་དགེ་རྩ་རྨད་དུ་བྱུང་བ་ལས་བྱུང་བའི་རང་སྣང་ཡེ་ཤེས་ཀྱི་རོལ་པ་རྣམ་པར་དག་པའི་ཞིང་ཁམས་ཕྱོགས་ཀུན་ཏུ་མཐའ་ཡས་པས་ས་ཁྱོན་ཆེ་ཆུང་གི་རྒྱ་ཆད་དང་། ཤར་ལྷོ་ལ་སོགས་པའི་ངེས་བཟུང་གི་ཕྱོགས་ལྷུང་ལ་སོགས་དངོས་པོ་མཐར་འཛིན་གྱི་ཡུལ་ཀུན་དང་བྲལ་བ། ཆོས་ཀྱི་དབྱིངས་འབྱམས་ཀླས་པར་གྱུར་པའི་དབུས་སུ་རང་གི་མདུན་གྱི་ནམ་མཁར་རིན་པོ་ཆེ་རྣམ་པ་དུ་མ་ལས་གྲུབ་པའི་དཔག་བསམ་གྱི་ལྗོན་པའི་ཤིང་ཕྱོགས་བཞི་དབུས་དང་ལྔར་གྱེས་པའི་ཡལ་ག་ལྔ་བ། དབྱིབས་མི་འདྲ་བ་མང་པོའི་ལོ་མ་དང་། རྣམ་པ་སྣ་ཚོགས་པའི་འདབ་མ་དང་། ཁ་དོག་སྣ་ཚོགས་པའི་མེ་ཏོག་གི་རྒྱན་དང་། ལྷ་དང་མི་ཡི་ཁ་དོག་དུ་མ་དང་། དྲི་རབ་ཏུ་ཞིམ་པོ་དང་ལྡན་པའི་བསུང་ངད་ལྡང་ཞིང་། རྒུན་འབྲུམ་སྟར་ག་སེའུ་འབྲུ་ཁམ་བུ་རྣམས་ཀྱིས་མཚོན་སྣུམ་ཞིང་མངར་བའི་རོ་དང་ལྡན་པའི་འབྲས་བུ་ལ་སོགས་རིན་པོ་ཆེའི་ལྗོན་ཤིང་གི་བཀོད་པ་མ་ཚང་བ་མེད་པས་ཕུན་སུམ་ཚོགས་པ། དེའི་དབུས་སུ་ཡོད་པའི་ཡལ་ག་དཔང་མཐོན་པོར་རྒྱས་པའི་རྩེ་མོར་སེང་གེ་དཀར་མོ་བརྒྱད་ཀྱིས་བཏེགས་པའི་རིན་པོ་ཆེ་མཛོད་མིག་བདུན་ལྡན་གྱི་ཁྲི་སྣ་ཚོགས་པདྨ་འདབ་མ་སྟོང་ལྡན་ཟེའུ་འབྲུ་དང་བཅས་པའི་སྟེང་། ཉི་མ་དང་ཟླ་བའི་དཀྱིལ་འཁོར་སྟེང་འོག་རིམ་པར་བརྩེགས་པའི་སྟེང་ངོ་བོ་རང་གི་རྩ་བའི་བླ་མ་ཨོ་རྒྱན་ལུང་རིག་གླིང་པ་དངོས་ཀྱི་སྐུ་གསུང་ཐུགས་དང་དབྱེར་མེད་པ། རྣམ་པ་རྒྱལ་བ་ཀུན་གྱི་གསུང་གི་རྡོ་རྗེ་སློབ་དཔོན་ཆེན་པོ་ཨོ་རྒྱན་མཚོ་སྐྱེས་རྡོ་རྗེ་ཞལ་གཅིག་ཕྱག་གཉིས་པ། གདུལ་བྱ་གཞན་སྣང་དུ་བསྟན་པ་སྤྲུལ་སྐུའི་ཆ་ལུགས་ཅན། སྐུ་མདོག་དཀར་ལ་དམར་བའི་མདངས་ཆགས་པ་ཅུང་ཟད་ཁྲོ་འཛུམ་ཞི་བའི་ཉམས་ཅན། རྣམ་སྨིན་དང་ཚེ་དབང་། ལྷུན་གྲུབ་དང་ཕྱག་ཆེན་བཞིའི་སྤང་རྟོགས་ཀྱི་ཡེ་ཤེས་རྩལ་རྫོགས་པ། སྐུ་ལ་མཚན་བཟང་དང་དཔེ་བྱད་ཀྱི་ཡོན་ཏན་མ་ཚང་བ་མེད་པས་བརྒྱན་པ་གསལ་རྫོགས་སུ་བསྒོམ། དེའི་མཐའ་སྐོར་དུ་རྒྱལ་བ་དགོངས་བརྒྱུད། རིག་འཛིན་བརྡ་བརྒྱུད། གང་ཟག་སྙན་བརྒྱུད་དེ་བརྒྱུད་པ་གསུམ་གྱི་རིག་འཛིན་བླ་མ་མ་ལུས་ཤིང་ལུས་པ་མེད་པ་རྒྱ་མཚོ་སྤྲིན་གྱི་ཕུང་པོ་ལྟར་ལྷན་ཅིག་ཏུ་ཚོགས་པ་དང་བཅས་པ་ཁྲོམ་ཚོགས་སུ་བཞུགས་པར་མོས། མདུན་དུ་ཡལ་ག་མཛེས་ཤིང་ཡིད་དུ་འོང་བའི་རྩེར་ཡི་དམ་ལྷག་པའི་ལྷ་ཞི་བ་དང་ཁྲོ་བོ། ལོངས་སྤྱོད་རྫོགས་སྐུའི་རྣམ་པ་ཅན་འདི་ལྟར་ཀྲི་ཡ་ཨུ་པ་ཡོ་ག་བླ་མེད་དེ་རྒྱུད་སྡེ་བཞིའམ། ཕྱི་རྒྱུད་ཀྲི་ཡོག་སྡེ་གསུམ་དང་། ནང་རྒྱུད་མ་ཧཱ། ཨ་ནུ། ཨ་ཏི་སྟེ་རྣལ་འབྱོར་བླ་མེད་སྡེ་གསུམ་སྟེ་དྲུག་གི་ལྷ་ཚོགས་མ་ཚང་བ་མེད་པ་རྣམས་དང་། གཡས་ཀྱི་ཡལ་ག་ཀུན་ནས་རྒྱས་པའི་རྩེར། བསྟན་པའི་བདག་པོ་སངས་རྒྱས་ཤཀྱཱ་ཐུབ་པ་ལ། མར་མེ་མཛད་དང་། བྱམས་པ་མགོན་པོ། གཞན་ཡང་ཕྱོགས་བཅུའི་སངས་རྒྱས་དང་བྱང་ཆུབ་སེམས་དཔའི་འཁོར་ཚོགས་གྲངས་མེད་པས་བསྐོར་བ་དང་། གཡོན་དུ་ཡལ་ག་ལྷུན་འཐུག་པོར་སྤུང་པའི་རྩེ་མོར་སློབ་པའི་ལམ་ཟུང་བཞིའི་རྒྱུན་དུ་ཞུགས་པ་གནས་པ་གཉིས། ལན་ཅིག་ཕྱིར་འོང་ཞུགས་པ་གནས་པ་གཉིས། ཕྱིར་མི་འོང་ཞུགས་པ་གནས་པ་གཉིས། དགྲ་བཅོམ་ཞུགས་པ་དང་། དེའི་འབྲས་བུར་གནས་པ་བརྒྱད་ཀྱི་ཉན་ཐོས་དང་རང་རྒྱལ་དགྲ་བཅོམ་པའི་དགེ་སློང་རྣམས་ངུར་སྨྲིག་གདིང་བའི་གདན་ལ་བཞུགས་པ་དང་། ཐེག་པ་ཆེན་པོའི་བྱང་ཆུབ་སེམས་དཔའི་དགེ་འདུན་གྱི་སྡེ་རྣམས་མེ་ཏོག་གི་ཚལ་བཀྲ་བ་ལྟར་བཞུགས་པ་དང་། རྒྱབ་ཏུ་རིན་པོ་ཆེའི་ལྗོན་ཤིང་དྲྭ་མིག་གི་རྣམ་པར་འཁྱིལ་བའི་ནང་ཁོངས་སུ་ལུང་གསུང་རབ་ཡན་ལག་བཅུ་གཉིས་ཀྱི་དམ་པའི་ཆོས་དཀོན་མཆོག རྣམ་པ་ཡི་གེ་གླེགས་བམ་པུསྟི་ཀའི་ཚུལ་དུ་མེར་ཁྲིག་གེར་གོ་མཚམས་མེད་པར་གཏམས་པ་དང་། དེ་དག་གི་མཐའ་སྐོར་ཀུན་ཏུ་ཡུལ་ཉེར་བཞི། གནས་སོ་གཉིས། དུར་ཁྲོད་བརྒྱད་དེ་མདོར་ན་གནས་གསུམ་གྱི་དཔའ་བོ་དང་མཁའ་འགྲོ་མ་རྣམས་དང་ལེགས་ཉེས་ཀྱི་སྟངས་གཅོད་པའི་ཆོས་སྐྱོང་ཕོ་རྒྱུད་མོ་རྒྱུད། མདོར་ན་ཡེ་ཤེས་དང་འཇིག་རྟེན་གྱི་དམ་ཅན་མ་ལུས་པ་རྣམས་དཔེར་ན་ནམ་མཁའ་ལ་སྤྲིན་གྱི་ཕུང་པོ་འཁྲིགས་པ་བཞིན་མངོན་སུམ་དུ་དགྱེས་པའི་ཞལ་གྱིས་ཕྱོགས། འཛུམ་པའི་སྤྱན་གྱིས་གཟིགས། བརྩེ་བའི་ཐུགས་ཀྱིས་དགོངས་ཏེ་བདག་གཞན་རྣམས་ཀྱི་སྐྱབས་དང་སྐྱོབས་པ། མགོན་དང་དཔུང་གཉེན་དམ་པར་བཞུགས་པར་གསལ་བཏབ་སྟེ་དམིགས་པ་ནི་སྐྱབས་ཡུལ་ཚོགས་ཞིང་གསལ་གདབ་པའི་རིམ་པ་ཡིན་ནོ།།
སྐྱབས་སུ་འགྲོ་བ་དངོས།
གཉིས་པ་སྐྱབས་སུ་འགྲོ་བ་དངོས་ནི། སྤྱིར་ནང་པ་སངས་རྒྱས་པའི་ཁྱད་ཆོས་ནི་དཀོན་མཆོག་གསུམ་སྐྱབས་གནས་སུ་འཛིན་པས་བྱེད་པ་ཡིན་ཏེ། དཔལ་ལྡན་ཇོ་བོ་རྗེས། ཕྱི་པ་ནང་པ་སྐྱབས་འགྲོའི་ཁྱད། །དཀོན་མཆོག་སྐྱབས་འཛིན་ནང་པའི་སྲོལ། །ཅེས་གསུངས་པ་དང་། དེ་ལས་ལམ་ལྷག་པའི་བསླབ་པ་རིན་པོ་ཆེ་རྣམ་པ་གསུམ་གྱི་བསྲུང་སྡོམ་གྱི་ཉམས་ལེན་དག་ཀྱང་དཀོན་མཆོག་གསུམ་སྐྱབས་གནས་སུ་གནས་སྐབས་དང་མཐར་ཐུག་གི་བར་དུ་འཛིན་པ་ལ་བརྟེན་ནས་འཇུག་པར་གསུངས་ཏེ། ཇི་སྐད་དུ། སྡོམ་པ་ཀུན་ལ་ཡོད་མོད་ཀྱང་། །སྐྱབས་སུ་མ་སོང་བ་ལ་མེད། །ཅེས་གསུངས་པ་བཞིན་སྐྱབས་སུ་འགྲོ་བ་ལ་རྒྱུའི་དུས་ཀྱི་ཀུན་སློང་ལུང་མ་བསྟན་གྱི་ཆ་རྣམ་པར་སྤང་ནས་སྐྱབས་འགྲོ་མཚན་ཉིད་ཚང་བ་ཅན་དེ་ནང་པའི་གྲུབ་མཐའི་དོན་པོ་ངེས་པ་ཡིན་པས་ན། མཚན་ཉིད་ལ་རྒྱུ་དང་། ངོ་བོ། བྱེད་ལས་གསུམ་ཚང་བ་འཇོག་པ་ཡིན་ཏེ། དང་པོ་རྒྱུ་ཡི་མཚན་ཉིད་ནི། ཡོན་ཏན་རིན་པོ་ཆེའི་མཛོད་ལས། འཇིགས་པ་གསུམ་གྱི་ཆུ་གཏེར་འཁྲུགས་པ་ལས། །སྐྱབས་སུ་འོས་པར་ཡིད་ཆེས་སྲོག་བརྟན་པ། །དཀོན་མཆོག་གསུམ་གྱི་གྲགས་པའི་གདུགས་དཀར་ནི། །བསྟན་ལ་འཇུག་པའི་ཐོག་མ་ཉིད་དུ་འཛིན། །ཅེས་གསུངས་པས་འཇིགས་པ་ལ་གསུམ་སྟེ། སྤྱིར་འཁོར་བ་སྡུག་བསྔལ་གྱི་འཇིགས་པ། སྒོས་རང་དོན་ཡིད་བྱེད་ཀྱི་འཇིགས་པ། ཉིང་དགོས་ཐ་མལ་འཁྲུལ་འཛིན་གྱི་འཇིགས་པ་དང་གསུམ་པོ་ལ་བརྟག་ཅིང་དཔྱད་ན་མྱ་ངན་འབའ་ཞིག་མ་གཏོགས་བདེ་བ་ཅུང་ཟད་ཙམ་ཡང་མེད་པའི་ཚུལ་ཤེས་ཤིང་མཐོང་བར་བྱས་ནས། ཀྱཻ་མ་ཞེས་མྱ་ངན་གྱི་སྨྲེ་སྔགས་བཏོན་ལ། འདི་ལྟར་འཇིགས་པ་གསུམ་པོ་ལས། སྤྱིར་འཁོར་བ་སྡུག་བསྔལ་གྱི་འཇིགས་པ་ནི། རྩ་བ་སྐྱེ་འཆི་གཉིས་དང་། དེ་སྐྱེད་པར་བྱེད་པ་དགེ་མི་དགེ་མི་གཡོ་བའི་ལས་དང་བཅས་པ་དང་། ཀུན་ནས་ཉོན་མོངས་པའི་སེམས་དང་སེམས་བྱུང་ཐམས་ཅད་ནི་དཔེར་ན་དགྲ་ལྟ་བུ་སྟེ། ཐར་བའི་ལམ་རང་རྒྱུད་ལ་ཐོབ་པའི་ཐབས་རྣམས་བཅོམ་ཤིང་འཕྲོག་པར་བྱེད་པ་ཡིན། སྒོས་རང་དོན་ཡིད་བྱེད་ཀྱི་འཇིགས་པ་ནི། རང་དོན་ཡིད་བྱེད་ཀྱི་བསམ་པས་གཞན་ཕན་དོན་གཉེར་གྱི་བསམ་པ་དང་། རྒྱུ་བྱམས་སྙིང་རྗེ་དང་བྲལ་བའི་དབང་གིས་གང་ཟག་གི་བདག་མེད་མཐོང་བ་གཙོ་བོར་གྱུར་བའི་སྟོང་པ་ཉིད་འབའ་ཞིག་ལ་གོལ་བས་རྣམ་མཁྱེན་རྫོགས་བྱང་གི་ཡོན་ཏན་ཚད་མེད་པ་ལས་ཉམས་པའི་ཞི་བ་ཕྱོགས་གཅིག་པའི་མྱང་འདས་ནི། དཔེར་ན་གཡང་ས་ཆེན་པོ་ལྟ་བུ་སྟེ་འབྲས་བུ་སངས་རྒྱས་ཀྱི་ཡོན་ཏན་མི་ཟད་པའི་གོ་འཕང་ལས་དུས་ཤིན་ཏུ་རིང་པོའི་བར་དུ་ཕྱིར་ལྡོག་སྟེ་ཉམས་དམའ་བར་གནས་དགོས་པ་ཡིན། ཉིང་དགོས་ཐ་མལ་འཁྲུལ་འཛིན་གྱི་འཇིགས་པ་ནི། གནས་སྐབས་ལམ་གྱི་མི་མཐུན་ཕྱོགས་རྒྱུ་ཆགས་སྡང་རྨོངས་གསུམ་གྱིས་ཀུན་ནས་བསླང་བའི་ཡིད་ལ་གང་སྣང་ཚད་དག་དངོས་པོའི་བདེན་ཞེན་གྱི་འཆིང་བ་དམ་པོས་ཐ་མལ་འཁྲུལ་འཛིན་གྱི་ངན་རྟོག་ལས་ནམ་ཡང་ལྡང་མི་ནུས་པ་ནི། དཔེར་ན་དུག་ལྟ་བུ་སྟེ། རང་རྒྱུད་དགེ་བའི་ལམ་ལ་སྦྱོར་བའི་སྤྱོད་པ་དང་བྲལ་ཞིང་ལུས་ངག་མི་དགེ་བའི་བྱ་བ་ཐ་ཆད་དུ་ལུས་པས་འཕྲལ་ཕུག་ཀུན་ཏུ་ཡོངས་སུ་འཇོམས་པར་བྱེད་པ་ཡིན། དེ་ལྟར་ཤིན་ཏུ་ནས་ཀྱང་རྣམ་པ་བཟོད་པར་དཀའ་ཞིང་མཚན་ཉིད་འཇིགས་པའི་སྐྲག་པ་ཆེན་པོ་སྐྱེས་སུ་རུང་བ་འཁོར་བའི་རྣམ་སྨིན་གྱི་སྡུག་བསྔལ་ལས་ཐར་བར་འདོད་པའི་འདུན་པ་ཤུགས་དྲག་ཏུ་རང་རྒྱུད་ལ་ཡང་ཡང་བསྐྱེད་པ་ནི་སྐྱབས་སུ་འགྲོ་བའི་རྒྱུ་མཚན་མེད་ན་མི་འབྱུང་བ་ཡིན། སྤྱིར་ཐར་བའི་ལམ་གྱི་ཉེ་རྒྱུ་ངེས་འབྱུང་གི་བསམ་པའི་ངོ་བོའང་འདི་ཉིད་ཡིན་ནོ།། གཉིས་པ་ངོ་བོའི་མཚན་ཉིད་ནི། མགོན་པོ་བྱམས་པས། དམ་པའི་དོན་ཏུ་འགྲོ་བ་ཡི། །སྐྱབས་ནི་སངས་རྒྱས་ཉག་གཅིག་སྟེ། །ཐུབ་པ་ཆོས་ཀྱི་སྐུ་ཅན་ཕྱིར། །ཚོགས་ཀྱང་དེ་ཡི་མཐར་ཐུག་ཕྱིར། །ཞེས་གསུངས་པས། སྐྱབས་ཡུལ་གྱི་ཡོན་ཏན་གཞན་རྒྱུད་ལ་ད་ལྟ་གྲུབ་སྟེ་བྱོན་ཟིན་པ་རྣམས་རྒྱུའི་སྐྱབས་འགྲོའི་ངོ་བོ་དང་། ཡོན་ཏན་དེ་ཉིད་མ་འོངས་པ་ན་རང་རྒྱུད་ལ་འགྲུབ་པར་བྱས་པ་འབྲས་བུའི་སྐྱབས་འགྲོའི་ངོ་བོའོ། །དེ་ལྟར་རྒྱུ་དང་འབྲས་བུ་གཉིས་ཆར་ཡང་ཐར་བ་དམ་པའི་དོན་མི་བསླུ་བའི་གོ་འཕང་དེ་ཉིད་ཤིན་ཏུ་དོན་ཏུ་གཉེར་བས་ལམ་ངེས་པའི་ཚུལ་ཡང་དག་པར་སྐྱབས་སུ་འགྲོ་བ་ན་འབྲས་བུའི་སྐྱབས་ཐོབ་བྱ་བླ་ན་མེད་པ་ནི། དག་པ་གཉིས་ལྡན་གྱི་ཡེ་ཤེས་རྣམ་མཁྱེན་གྱི་སངས་རྒྱས་ཆོས་ཀྱི་སྐུ་ཉག་མ་གཅིག་པུ་ཉིད་ཡིན་ཏེ། སྟོན་པ་ཐུབ་པའི་དབང་པོ་ནི། དེ་ལྟར་ངེས་པའི་དོན་དུ་ཟག་མེད་གྱི་སྡེ་ཚན་མ་ལུས་པའི་ཆོས་ཉིད་མཐར་ཐུག་པའི་སྐུ་བསམ་གྱིས་མི་ཁྱབ་པ་བརྙེས་པའམ་ཐོབ་ཟིན་པའི་ཕྱིར་སངས་རྒྱས་དཀོན་མཆོག་དངོས་དང་། དེའི་ཞལ་ནས་གསུང་པའི་གསུང་རབ་ལུང་གི་ཆོས་དང་། ཐུགས་རྒྱུད་ལ་མངོན་དུ་གྲུབ་པར་མཛད་པ་རྟོགས་པའི་ཆོས་དཀོན་མཆོག་གི་རང་བཞིན་དང་། གདུལ་བྱ་གཞན་ངོར་མཛད་པ་གཟུགས་བརྙན་ལྟར་སྣང་བའི་བདག་པོའི་རྐྱེན་དམ་པ་གཟུགས་སྐུ་མཚན་དང་དཔེ་བྱད་ཀྱི་རྣམ་པར་སྣང་བ་ནི་ཚོགས་དགེ་འདུན་དཀོན་མཆོག་མཐར་ཐུག་པའོ། །དེ་ལྟ་བུའི་ངེས་ཤེས་ཀྱིས་གནས་སྐབས་སུ་སྟོན་པ་དེ་དང་། ལམ་དེ་དང་། གྲོགས་དེ་ཉིད་ལས་གཞན་མི་བསྟེན་པར་དམ་བཅས་ནས་མཐར་ཐུག་ཐོབ་བྱ་གོང་དུ་བཤད་པ་དེ་ཉིད་དུ་མ་གཏོགས་པའི་འབྲས་བུ་གཞན་དོན་དུ་མི་གཉེར་བར་བློ་གཏད་ཁེལ་ངེས་སུ་ཁས་ལེན་པ་ནི་སྐྱབས་འགྲོའི་ངོ་བོ་ཡིན་པ་སྤྱི་དོན་ཙམ་དུ་བཤད་ནས། ད་ནི་སྐྱབས་སུ་འགྲོ་བའི་ཡུལ་དངོས་ནི། གང་ཞིག་གདུལ་བར་བྱ་བའི་སེམས་ཅན་རིགས་ཅན་གསུམ་གྱིས་བསྡུས་པའི་འགྲོ་བ་རྣམས་ལམ་གྱི་རྟེན་ཐར་བ་དང་། ཐར་བའི་འབྲས་བུ་རྣམ་མཁྱེན་བླ་ན་མེད་པའི་གོ་འཕང་དུ་རིམ་པ་བཞིན་གདུལ་བྱ་རང་རང་གི་སྐལ་བའི་བྱེ་བྲག་དང་མཐུན་པར་འདྲེན་པར་མཛད་པའི་ལམ་མཁན་གྱི་དེད་དཔོན་ཕྱི་ལྟར་ན་སངས་རྒྱས་ཆོས་དགེ་འདུན་ཏེ་དཀོན་མཆོག་རིན་པོ་ཆེ་རྣམ་པ་གསུམ་དང་། ནང་ལྟར་ན་བླ་མ་ཡི་དམ་མཁའ་འགྲོ་སྟེ་རྩ་བ་གསུམ་དང་། མཆོག་གསུམ་རྩ་བ་གསུམ་པོ་དེ་དག་གི་བཀའ་སྡོད་ལེགས་ཉེས་ཀྱི་སྟངས་འཛིན་པའི་དམ་ཅན་ཆོས་སྐྱོང་རྣམས་དང་བཅས་ཏེ། མདོར་ན་ཕྱོགས་དང་དུས་ཀྱིས་བསྡུས་པའི་རྒྱལ་བ་རྒྱ་མཚོའི་ཚོགས་མ་ལུས་ཤིང་ལུས་པ་མེད་པ་སྐྱབས་ཡུལ་ཏུ་ངེས་པར་བྱ་བ་ལ། སངས་རྒྱས་སྟོན་པ་སྐུ་གསུམ་གྱི་བདག་ཉིད། ཆོས་ལུང་དང་རྟོགས་པའི་དམ་པའི་ཆོས། དགེ་འདུན་འཕགས་པ་ཕྱིར་མི་ལྡོག་པའི་བདག་ཉིད་ཅན་དང་གསུམ་ཞེས་བྱ་ལ། རྩ་བ་གསུམ་ནི་གོང་དུ་སྐྱབས་ཡུལ་གྱི་ངེས་པའི་སྐབས་བཤད་ཟིན་པ་དེར་འདུ་བས་དེ་དག་ནི་གང་ལ་སྐྱབས་སུ་འགྲོ་བའི་ཡུལ་ཡིན་ནོ།། གང་གིས་ཇི་ལྟར་སྐྱབས་སུ་འགྲོ་བའི་གང་ཟག་ནི། འདི་ལྟ་སྟེ། ངན་སོང་གསུམ་གྱི་སྡུག་བསྔལ་མྱོང་འགྱུར་ལ་བསམ་ནས། ཡང་སྲིད་ཕྱི་མའི་བདེ་བ་ཙམ་དོན་དུ་གཉེར་བ་སྐྱེས་བུ་ཆུང་ངུའི་ཀུན་སློང་། ཁམས་གསུམ་ཆར་གྱི་སྲིད་པ་སྡུག་བསྔལ་གྱི་གནས་རིས་སུ་རྟོགས་ནས་འཁོར་བ་ལས་ངེས་པར་རང་ཉིད་ཁོ་ན་ཐར་བར་འདོད་པ་སྐྱེས་སུ་འབྲིང་གི་ཀུན་སློང་། ནམ་མཁས་གར་ཁྱབ་ཀྱི་སེམས་ཅན་ལ་ཕྱོགས་རིས་མེད་པར་ད་ལྟའི་མ་བཞིན་དུ་ཤེས་ནས་དེ་དག་ཡོངས་སུ་རྫོགས་པ་འཁོར་བ་ལས་སྒྲོལ་བར་འདོད་པས་དཀོན་མཆོག་གསུམ་ལ་སྐྱབས་སུ་འགྲོ་བ་སྐྱེས་བུ་ཆེན་པོའི་ཀུན་སློང་གིས་བློ་བཅོས་པས། དུས་བྱང་ཆུབ་སྙིང་པོ་འཐོབ་ཀྱི་བར་སྐྱབས་སུ་འགྲོ་བར་ཁས་ལེན་པའོ།། གསུམ་པ་བྱེད་ལས་ཀྱི་མཚན་ཉིད་ནི། ཇི་ལྟར་ཁས་ལེན་པའི་དུས་མཚམས་ཀུན་སློང་དང་བཅས་པ་ནི། ཐེག་པ་ཆེན་པོའི་སྐྱབས་སུ་འགྲོ་བའི་ཚུལ་ལོ། །འདིར་སངས་རྒྱས་ལ་ཐར་བ་དང་ཐམས་ཅད་མཁྱེན་པའི་ལམ་སྟོན་པ་པོའི་འདུ་ཤེས། དམ་པའི་ཆོས་ལ་ཐར་བ་དང་ཐམས་ཅད་མཁྱེན་པ་ཐོབ་པར་བྱེད་པའི་ལམ་གྱི་འདུ་ཤེས། འཕགས་པའི་དགེ་འདུན་ལ་ལམ་དེ་ཉིད་ཚུལ་བཞིན་དུ་སྒྲུབ་པའི་གྲོགས་ཀྱི་འདུ་ཤེས། རང་གི་ལུས་ངག་ཡིད་གསུམ་པོ་ལོངས་སྤྱོད་དང་བཅས་པ་བླ་མ་ལ་འབུལ། ཡི་དམ་ལ་བརྟེན། མཁའ་འགྲོ་ཆོས་སྐྱོང་ལ་རྗེས་སུ་བཅོལ་ཏེ་གནས་སྐབས་ཀུན་དུ་ལེགས་ཉེས་སྐྱིད་སྡུག་བཟང་ངན་ཅི་བྱུང་ཡང་། མཆོག་གསུམ་རྩ་གསུམ་དམ་ཅན་དང་བཅས་པ་ཁྱེད་རྣམས་མ་གཏོགས་ཐབས་གཞན་ཕྱུག་པོའི་ནོར། མཁས་པའི་བློ། དཔའ་བོའི་དཔུང་ལ་སོགས་པ་གང་ཡང་མི་འཚོལ་བར་བློ་གཏད་ལིང་སྐྱུར་གྱིས་སྐྱབས་སུ་མཆིའོ། །ཞེས་ཚིག་ཏུ་ཡང་བརྗོད་པར་བྱའོ།། དེ་ལྟར་སྙིང་ཐག་པ་ནས་སྐྱབས་སུ་འགྲོ་ནུས་ན་སྐྱབས་གནས་དཀོན་མཆོག་གི་ཐུགས་རྗེ་ལ་བསླུ་བ་མི་སྲིད་ཅིང་། གདུལ་བའི་དུས་ལ་ཡང་ཡོལ་བ་མི་སྲིད་དེ། ཇི་སྐད་དུ། རྒྱ་མཚོ་ཆུ་སྲིན་རྣམས་ཀྱི་གནས། །དུས་ལས་ཡོལ་བར་འགྱུར་སྲིད་ཀྱི། །གདུལ་བར་བྱ་བའི་སྲས་རྣམས་ལ། །སངས་རྒྱས་དུས་ལས་ཡོལ་བ་མེད། །ཅེས་གསུངས་སོ།།