ཐུན་གྱི་སྔོན་འགྲོས་བློ་སྦྱོངས་བ།
གཉིས་པ་ཐུན་གྱིས་བློ་སྦྱོང་བ་ནི། བདེ་བའི་སྟན་ལ་བག་ཕེབས། སེམས་ཁོང་ལྷོད་དེ་གནས་པ་ལ་སོགས་ཁྲིད་རྐང་སྔ་མ་རྣམས་དང་ཚུལ་མཐུན་པར་བྱས་ལ། བློ་སྦྱོང་དངོས་ནི། དང་པོ་ཚོགས་ཞིང་གི་དམིགས་རྟེན་དུ་བསྒྲུབ་པའི་མཎྜལ་ཚོམ་བུ་ལྔ་པ་རིགས་བསྡུས་པ་སོ་སོར་མཐིང་དཀར་སེར་དམར་ལྗང་གུའི་ཁ་བསྒྱུར་བ་ཅན་ལེགས་པར་གཙོ་འཁོར་གྱི་རྣམ་པར་བཀོད་དེ་སྟེགས་ཀྱི་ཁར་བཞག་པའི་མདུན་ངོས་སུ་ཉེར་སྤྱོད་ཀྱི་མཆོད་པ་ཡང་བཤམས། མཆོད་པའི་མཎྜལ་གོང་དུ་གསལ་འདེབས་སྐབས་སུ་ཁྲིད་པ་ཇི་ལྟ་བ་བཞིན་རྒྱུ་དང་། རྣམ་པ། དམིགས་པ་གསལ་ངེས་སུ་བསྒོམ་ནས། ཚོགས་སོགས་པའི་དགོས་པ་ཡོད་ཕྱིར། ལག་པ་གཡོན་པས་གཏན་པ་ཐོགས་ལ། གཡས་པའི་མཁྲིག་མས་གཏན་པའི་ངོས་ཀྱི་གཡའ་རྡུལ་བྱི་དོར་བྱེད། བ་ལས་བྱུང་བ་ལྔའམ། དྲི་བཟང་གི་ཆུས་བྱུགས། དེ་ནས་ལག་གཡས་པས་རབ་རིན་པོ་ཆེ། འབྲིང་སྨན་སྣ། ཐ་མ་འབྲུ་དངོས་གཙང་གིས་ཚོམ་བུ་བཀོད། དམིགས་པ་དང་མཐུན་པའམ་ཡང་ན་ཞལ་རྒྱུན་དུ་སྤྲུལ་སྐུའི་མཎྜལ་ཚོམ་བུ་བདུན། ལོངས་སྐུའི་མཎྜལ་ཚོམ་བུ་ལྔ། ཆོས་སྐུའི་མཎྜལ་ཚོམ་བུ་གཅིག་གསུངས་པས་དེ་ལྟར་ལག་ལེན་དུ་ཐེབ་པས་ཅི་རིགས་པ་ཕུལ་མཐར་དགེ་བ་བསྔོ་བ་སྤྱི་དང་འདྲ་བའོ། །དེ་ཡན་གྱིས་ཁྲིད་རྐང་དགུ་བ་སོང་གྲུབ།