འཁྲུལ་སྣང་ཡེ་ཤེས་སུ་འཆར་བྱེད་བླ་མའི་རྣལ་འབྱོར།
ཁྲིད་ཀྱི་སྔོན་འགྲོས་གསལ་འདེབ་པ།
ཐུན་གྱི་དངོས་གཞིར་ཉམས་སུ་ལེན་པ།
བླ་མ་ཇི་ལྟར་བསྐྱེད་པའི་རྣལ་འབྱོར།
བཞི་བ་འཁྲུལ་སྣང་ཡེ་ཤེས་སུ་འཆར་བར་བྱེད་པའི་ཐབས་ཟབ་ལམ་བླ་མའི་རྣལ་འབྱོར་གྱི་ཁྲིད་རིམ་ལ་དོན་གཉིས། ཁྲིད་ཀྱི་སྔོན་འགྲོས་གསལ་འདེབ་པ་དང་། ཐུན་གྱི་སྔོན་འགྲོས་བློ་སྦྱོང་བ་དང་གཉིས། དང་པོ་ལ་དོན་རྣམ་པ་གཉིས། ཐུན་གྱི་དངོས་གཞིར་ཉམས་སུ་ལེན་པ་དང་། ཐུན་མཚམས་སུ་ཇི་ལྟར་བྱ་བའོ། །དང་པོ་ཐུན་གྱི་དངོས་གཞི་ལ་གསུམ། བླ་མ་ཇི་ལྟར་བསྐྱེད་པའི་རྣལ་འབྱོར་དང་གཅིག མོས་གུས་གསོལ་འདེབས་ཀྱི་རྣལ་འབྱོར་དང་གཉིས། དབང་ལེན་ཅིང་ཐུགས་ཡིད་བསྲེ་བའི་རྣལ་འབྱོར་དང་གསུམ་མོ། །དང་པོ་རང་བྱུང་རང་གནས་ཀྱི་ཡེ་ཤེས་རྩོལ་མེད་བཙན་ཐབས་སུ་རྟོགས་པའི་སྒོ་ཁྱད་པར་གྱི་ལམ་འདིར་ཡ་མཚན་སྐྱེས་པས་ན། ཨེ་མ་ཧོ་ཞེས་བརྗོད་དེ་ཇི་སྐད་དུ། བླ་མ་མེད་པའི་གོང་རོལ་ན། །སངས་རྒྱས་བྱ་བའི་མིང་ཡང་མེད། །བསྐལ་པ་སྟོང་གི་སངས་རྒྱས་ཀྱང་། །བླ་མ་དག་ལ་བརྟེན་ནས་འབྱུང་། །ཞེས་དུས་གསུམ་གྱི་བདེ་བར་གཤེགས་སོ་ཅོག་ཐམས་ཅད་ཀྱི་རང་རང་གི་ཐོག་མའི་བདག་པོའི་རྐྱེན་དམ་པ་བླ་མ་ཉིད་ཡིན་པར་བསྟན་པ་དང་། ཁྱད་པར་ཐེག་པའི་སྡེ་སྣོད་ཕལ་བོ་ཆེའི་སྡོང་པོ་བཀོད་པའི་ལེའུ་ལས་དགེ་བའི་བཤེས་གཉེན་བསྟེན་པའི་ཕན་ཡོན་ཤིན་ཏུ་གསུངས་པར་མཛད་པ་དང་། དགེ་བའི་བཤེས་གཉེན་བླ་མ་ལ་མ་བརྟེན་ན་གངས་ཀྱི་རིའི་ངོས་ལ་ལག་རྡུམ་གྱིས་འཛེག་མི་ནུས་པ་དང་། མཉན་པ་མེད་པ་ཆུ་བོ་ལས་སྒྲོལ་མི་ཤེས་པ་དང་། དེད་དཔོན་མེད་ན་གསེར་གླིང་དུ་བསྒྲོད་མི་ཐུབ་པ་ལྟར། ཐར་བའི་ལམ་གྱི་ས་མཁན་བླ་མ་མ་བསྟེན་པར་རང་དགར་རང་སྟོབས་ཀྱིས་ཆོས་ཀྱི་དེ་ཉིད་མི་རྟོགས་པས་དེས་ན་བླ་མ་བསྟེན་པ་གལ་ཆེའོ། །བླ་མ་བསྟེན་ཚུལ་ཡང། བཟུང་ན་མ་བཏང་བ། འཇུས་ན་མ་ཤོར་བ་ཞེས་གསུངས་པ་ལྟར་དེང་སང་གི་དུས་འདིར་ཕྱོགས་གང་ཞིག་ན་སྙན་གྲགས་ཆེ་བ་ཅན་དང་། འབྱོར་སྟོབས་ཆེ་བ་ཅན་དང་། ཁྱབ་རྒྱ་ཆེ་བ་ཅན་ལྟ་བུའི་འཇིག་རྟེན་མཐུན་འཇུག་གི་སྤོམ་ཡོར་ལ་བསྟེན་སོ་མི་བྱེད་པར། ཡོན་ཏན་མཛོད་ལས། དང་པོ་བླ་མ་བརྟགས་ལ་མཁས་པ་དང་། །བར་དུ་བླ་མ་བསྟེན་ལ་མཁས་པ་དང་། །ཐ་མར་དགོངས་སྤྱོད་བསླབ་ལ་མཁས་པ་ཡི། །སྐྱེས་བུ་དེ་ནི་མོས་གུས་ཁོ་ནས་གྲོལ། །ཅེས་གསུངས་པས་བྱང་ཆུབ་སེམས་དཔའ་རྟག་ཏུ་ངུས་འཕགས་པ་ཆོས་འཕགས་བསྟེན་པ་དང་། རྗེ་བཙུན་མི་ལས་མར་བ་ལོ་ཙཱ་བསྟེན་པ་དང་། མར་བ་ཆོས་ཀྱི་བློ་གྲོས་ཀྱིས་པཎ་ཆེན་ན་རོ་པ་བསྟེན་པ་དང་། ཀུན་མཁྱེན་ཆོས་རྗེས་རིག་འཛིན་ཀུ་མ་རཱ་ཛ་བསྟེན་པ་དང་། གྲུབ་ཆེན་རིན་པོ་ཆེས་རིག་འཛིན་མཁྱེན་བརྩེའི་འོད་ཟེར་བསྟེན་པ་དང་། གཞན་བླ་མ་བསྟེན་ཚུལ་མདོ་དང་རྒྱུད་སྡེ་བསྟན་བཅོས་དང་། ཞལ་རྒྱུན་རྣམས་ནས་གསུངས་པ་བཞིན་འཆུག་མེད་དུ་བྱས་པའི་སྒོ་ནས་རབ་སྒྲུབ་པས་མཉེས་པ། འབྲིང་ཟང་ཟིང་གིས་མཉེས་པ། ཐ་མ་ཞབས་ཏོག་གིས་མཉེས་པ་དང་གསུམ་དུ་བཤད་པའི་ནང་ཚན་འདིར་རབ་བསྒྲུབ་པས་མཉེས་བྱེད་ཀྱི་ཚུལ་དེའི་དབང་དུ་བྱས་ཏེ་བྱིན་རླབས་བླ་མའི་རྣལ་འབྱོར་ཉམས་སུ་ལེན་པའི་རིམ་པ་ལ། དང་པོ་སྐུ་བསྐྱེད་པའི་རྣལ་འབྱོར་ནི་འདི་ལྟ་སྟེ། རང་གི་སྣང་བས་གར་ཁྱབ་ཐམས་ཅད་གཟུང་འཛིན་གཉིས་བསྡུས་ཀྱི་ངོ་བོ་ཆོས་ཉིད་སྐྱེ་བ་མེད་པར་རྣམ་པར་དག་པ་ལས། གདངས་རྩལ་འགག་པ་མེད་པ་ལྷུན་གྲུབ་ཏུ་ཤར་བ་བདེ་ཆེན་ས་ལ་སྤྱོད་པའི་ཞིང་ཁམས། རྔ་ཡབ་ཟངས་མདོག་དཔལ་གྱི་རི་བོའི་རྩེ་མོར་པདྨ་འོད་ཀྱི་ཕོ་བྲང་ཆེན་པོ་ཐོག་སོ་སུམ་བརྩེགས་ཚད་དང་མཚན་ཉིད་ཐམས་ཅད་ཡོངས་སུ་རྫོགས་པ། ཕྱི་ནང་ཟང་ཐལ་སྒྲིབ་གཡོག་དང་བྲལ་བ་ཡེ་ཤེས་རིན་པོ་ཆེ་ལས་གྲུབ་པའི་གཞལ་མེད་ཁང་། བརྡ་དོན་རྟགས་གསུམ་གྱི་བཀོད་པས་ཁྱད་པར་དུ་འཕགས་པ། རིའི་རྩ་བ་རྒྱ་མཚོ་ཆེན་པོ་ཀླུ་རྒྱལ་འཇོག་པོའི་ཁང་སྟེང་དུ་ཟུག་པ། ཆུ་མཚམས་ཡན་ཆད་བརྟན་ཅིང་བརྗིད་པའི་བྲག་རི་ཟངས་ཀྱི་མདོག་ལྟ་བུ་དཔང་དུ་ལྷུན་མཐོ་བར་བརྩེགས་པའི་བར་མཚམས་ཀུན་ཏུ་ནེའུ་གསེང་མེ་ཏོག་གི་དྲྭ་བས་ཁེབས་པའི་སྤང་རི་ལྷུན་སྡུག་པ། ངོས་ཐམས་ཅད་ན་བཟའ་ཤིང་གི་ལྗོན་པ་རྣམ་པ་སྣ་ཚོགས་པའི་མེ་ཏོག་གི་འདབ་མ་ཕང་ཕུང་རྒྱས་པས་མགོ་ལྕོག་ཤིང་ཞིམ་མངར་གྱི་འབྲས་བུ་གཡུར་དུད་པ། ལྗོན་ཤིང་འགའ་ཞིག་གི་ལོ་མ་དང་འདབ་མ་བླ་རེ་ལྟ་བུར་བྲེས་པའི་འོག་དང་། བྲག་རིའི་ཕུག་པ་ལྟ་ན་སྡུག་པའི་ནང་དག་ན་བདེན་ཚིག་ལ་དབང་བའི་དྲང་སྲོང་དང་། ཏིང་ངེ་འཛིན་གྱི་ཡོན་ཏན་ལ་རྩེན་པའི་རིག་པ་འཛིན་པ་དུ་མས་གང་བ། སྐད་སྙན་པར་སྒྲོག་ཅིང་འཕུར་ལྡིང་གི་རོལ་རྩེད་བར་སྣང་ལ་འཕྱོ་བའི་སྤྲུལ་པའི་བྱ་རིགས་མང་པོ་དང་རྐང་དྲུག་གིས་གླུ་གར་བསྒྱུར་བ། རེག་བྱ་འཇམ་ཞིང་དལ་བར་གཡོ་བའི་དྲི་ཡི་བཞོན་པ་དང་འགྲོགས་པའི་བསུང་ངད་མི་ཟད་པར་འཐུལ་བ། དེ་ལྟར་རྟེན་ཟངས་མདོག་དཔལ་གྱི་རི་བོའི་སྟེང་། བརྟེན་པ་བདེ་ཆེན་པདྨ་འོད་ཀྱི་གཞལ་ཡས་ཁང་ཡངས་ཤིང་རྒྱ་ཆེ་བར་གྱུར་པ། ཕྱི་ནང་ཀུན་ཏུ་འཇའ་ཚོན་ཡིད་འཕྲོག་པའི་ཐིག་ལེ་གུར་ཁང་ཟེར་ཐག་སྤྲོ་བ་དང་སྡུད་པ་དུ་མས་འཁྲིགས་པའི་དབུས་ཀྱི་ལྟེ་བའི་ཆར། རང་གི་གཞི་ལུས་གདོས་བཅས་རྣམ་སྨིན་ཤ་ཁྲག་གིས་མཚོན་པའི་ཐ་མལ་གྱི་དངོས་པོ་འདི་ཉིད་ཐོལ་སྐྱེས་སུ་གནས་འགྱུར་ཏེ་ངོ་བོ་སྟོང་གསལ་གཉིས་མེད་ཀུན་ཁྱབ་ཀྱི་ཆོས་ཉིད་མཚན་མའི་མཐའ་ལས་འདས་པའི་རང་མདངས། རྣམ་པ་འགག་མེད་ཡེ་ཤེས་ཀྱི་ཌཀྐཱི་མ་རྡོ་རྗེ་ཕག་མོ་སྐུ་མདོག་པདྨ་རཱ་ག་ལྟར་དམར་མོ། དར་དམར་གྱི་གུར་ཕུབ་པ་ལྟ་བུ་འོད་ཀྱི་ཕུང་པོ། སྒྲིབ་མེད་དྭངས་གསལ་གྱི་རང་བཞིན། ཕྱག་གཡས་པས་རྡོ་རྗེའི་ཡུ་བ་བྱས་པའི་གྲི་གུག་ནམ་མཁར་ཕྱར་བ། གཡོན་པས་ཐོད་པ་ཁྲག་གིས་གང་བ་ལྦུ་ཕྲེང་གི་རྣམ་པར་ཁོལ་བ་ཐུགས་ཀར་བརྟེན་ནས་འཛིན་པ། ཞལ་ཁྲོ་འཛུམ་ཆགས་པའི་ཉམས་ཅན་སྤྱན་གསུམ་གྱེན་དུ་གཟིགས་པ། མཆེ་བའི་མྱུ་གུ་གཙིག་པའི་ཚེམས་ཀྱི་ཕྲེང་དཀར་བཞད་ཚུལ་དུ་བསྟར་བ། རྣ་ལྟག་གཡས་སུ་ཕག་ཞལ་མཐིང་ནག་མཆེ་བ་བཞི་གཟེང་བའི་ཞལ་ནས་ངུར་བའི་སྒྲས་ཁམས་གསུམ་གྱི་སྐྱེ་འགྲོ་མ་ལུས་པ་གཏི་མུག་མ་རིག་པའི་གཉིད་ལས་སློང་བཞིན་སོ་སོའི་འཁྲུལ་སྣང་དབང་དུ་སྡུད་པ། ཐབས་ཡབ་ཀྱི་ངོ་བོ་རྣམ་པ་ཧེ་རུ་ཀའི་ཕྱག་མཚན་ཁ་ཊཱཾ་ཀར་བྱིན་གྱིས་རླབས་པ། དེ་ཡང་ཡུ་བ་ཆུ་ཤིང་ནག་པོ་མཉེན་ལ་ལྕུག་པ་ཟུར་བརྒྱད་པ། མར་གྱི་རྟིང་པ་ལ་གསེར་རྡོར་རྩེ་ལྔའི་ཏོག་གིས་སྤྲས་པ། ཡར་གྱི་རྩེ་མོར་རིམ་པ་བཞིན་འོག་ཏུ་ཐོད་རློན། བར་དུ་མགོ་བོ་རྙིད་པ། སྟེང་དུ་ཐོད་པ་སྐམ་པོ་སྟེ་སུམ་བརྩེགས་བརྒྱུས་པ། དེའི་སྟེང་གསེར་གྱི་བུམ་མགུལ་པད་ཕོར་མཛེས་པ། དར་སྣ་ལྔའི་ཆུན་པོ་དང་གསེར་གྱི་གཡེར་ཁ། དངུལ་གྱི་དྲིལ་ཆུང་སྤུད་པ། པད་ཕོར་ལས་སྐྱེས་པའི་ཁ་ཊཱཾ་ཀ་ཡར་རྩེ་རྭ་གསུམ་པ་ལྕགས་ལུང་གསུམ་གསུམ་རེ་དགུ་ཡིས་བརྒྱན་པ་ཅན་མཆན་ཁུང་གཡོན་དུ་བརྟེན་པར་བཅུག་པ། སྐུ་ལ་རིགས་ལྔའི་ཕྱག་མཚན་རྫོགས་པའི་རུས་པའི་རྒྱན་དྲུག་གི་ཕྲེང་བ་དྲྭ་བ་དང་དྲྭ་ཕྱེད་ཀྱི་ཚུལ་དུ་སྤྲས་པའི་གཤམ་དུ་གསེར་དངུལ་གྱི་དྲིལ་བུ་ཆུང་བུས་སྒྲ་སྙན་སལ་སིལ་དུ་འཁྲོལ་བས་སྤུད་པ། སྐུ་སྟོད་ལ་དར་དཔྱང་མཐིང་དམར་དང་། སྐུ་ཤ་འཁྲིལ་བག་ཆགས་པ། ཡན་ལག་གི་ཤ་ཚུགས་རགས་པ། གདན་པདྨ་དང་ཉི་མའི་གདན་ལ་ཞབས་གཉིས་གཡས་བསྐུམ་ཉམས་དང་། གཡོན་བརྐྱང་པའི་འདོར་ཐབས་ཀྱིས་ཁྲོ་མོའི་ཆས་ཀུན་རྫོགས་པ། ཕྱི་རོལ་དུ་སྐུ་ལས་སྐྱེས་པའི་ཡེ་ཤེས་ཀྱི་མེ་རི་མེ་དཔུང་འབར་བའི་ཀློང་ན་བཞུགས་པའི་བཀྲག་མདངས་ཀྱི་གཟི་འོད་ཡེ་ཤེས་འོད་ལྔ་འཁྲིགས་པའི་ཟེར་འཕྲོ་བ། དེའི་སྤྱི་བོར་ཁྲུ་གང་ཙམ་གྱི་ཐད་དུ་གདན་ཐབས་བདེ་བའི་ཆ་དང་ཤེས་རབ་དབྱིངས་ཀྱི་ངོ་བོ་མཉམ་པར་ཞུགས་པའི་རྟགས་སུ་པདྨ་འདབ་མ་སྟོང་ཕྲག་ཁ་དོག་སྣ་ཚོགས་པའི་སྟེང་ཉི་མ་དང་ཟླ་བའི་གདན་ལ། ཕྱོགས་བཅུ་དུས་གསུམ་གྱི་སྐྱབས་གནས་ཕྱི་ནང་གསང་གསུམ་ཀུན་འདུས་པའི་བདག་ཉིད་དུ་གྱུར་པ། སྒོས་སུ་བདག་ཉིད་ལ་སོ་བྱང་སྔགས་གསུམ་གྱི་སྡོམ་པ་འབོགས་པ་དང་། ཁྱད་པར་དུ་དབང་བསྐུར། རྒྱུད་བཤད། མན་ངག་བསྩལ་བའི་བཀའ་དྲིན་ཐོབ་པའི་རྩ་བར་གྱུར་བའི་བླ་མ་རྗེ་ཨོ་རྒྱན་ལུང་རིག་གླིང་པའམ་རང་གི་བླ་མ་གང་ཡིན་པ་དེ་ཉིད། རྣམ་པ་སློབ་དཔོན་གུ་རུ་རིན་པོ་ཆེ་པདྨ་ཐོད་ཕྲེང་རྩལ་སྐུ་མདོག་གཞོན་ཚུལ་ཅན་དུང་ལ་ཕོ་ཚོས་བསྐུས་པ་ལྟར་དཀར་ལ་དམར་བའི་མདངས་དང་ལྡན་ཞིང་སྤྱན་གཉིས་ཐད་གར་འབྲུ་ཚུགས་ཟིམ་བུས་ཁྲོ་འཛུམ་རྒྱས་པའི་ཞལ་རས་མཛེས་པ། ཕྱག་གཡས་པས་གསེར་གྱི་རྡོ་རྗེ་རྩེ་ལྔ་བ་ཐུགས་ཀར་གཏོད་ཅིང་། ཕྱག་གཡོན་པས་བདེ་སྐྱོང་གི་ཐོད་པ་དུམ་བུ་གཅིག་པ་ཛ་གད་ཀྱི་ཉིང་ཁུས་བཀང་བ། དེའི་ནང་ཟག་མེད་ཀྱི་བདུད་རྩིའི་བཅུད་གཏམས་པའི་ཚེའི་བུམ་པ་རྒྱན་ལྡན་དང་བཅས་ལྟེ་བའི་ཐད་ཁར་མཉམ་བཞག་གིས་བརྟེན་པ། དཔལ་ཡང་དག་ཧེ་རུ་ཀའི་རྩ་བའི་ཕྱག་མཚན་འབྲལ་སྤང་གི་དམ་ཚིག་ཏུ་ཁ་ཊཱཾ་ཀ་གྲུ་མོ་གཡོན་དུ་བརྟེན་པ། སྐུ་ལ་ནང་དུ་རྡོ་རྗེའི་གསང་གོས་དཀར་པོ། དེའི་སྟེང་འདུང་མ་དམར་པོ། དེའི་སྟེང་དུ་ཕོད་ཁ་མཐིང་ཁ། སྐུ་སྨད་དུ་མཐང་གོས། སྐུ་སྟོད་ལ་ཆོས་གོས་དམར་སེར་གསེར་མདོག་གི་གླེགས་བུའམ་ཚལ་བུ་ཅན། དེ་དག་གི་ཕྱིའི་སྟེང་གོས་ཟ་འོག་དམར་པོའི་བེར་རམ་ཕྱམ་ཙེ་ལྷབ་ལྷུབ་དུ་གསོལ་བ། དབུ་ལ་པདྨ་ཁ་འབུས་པ་ལྟ་བུའི་གཙུག་ཞྭ་འདབ་མ་ལྔ་ལྡན། ཉི་ཟླ། རྡོ་རྗེ། རྒོད་སྒྲོའི་ལྡེམ་འཕྲུ་དང་བཅས་པ་ཅན་གསོལ་བ། རིན་པོ་ཆེའི་སྙན་ཆ་དང་མགུལ་རྒྱན་གྱིས་མཛེས་པར་སྤྲས་པ། ཞབས་གཉིས་སག་ལྷྭམ་འཇའ་ཚོན་རིས་མནབས་པ། འཁོར་ལོས་བསྒྱུར་བའི་རོལ་སྟབས་ཀྱིས་བརྗིད་ཆགས་པར་འོད་དང་འོད་ཟེར་མུ་མཐའ་མེད་པར་སྤྲོ་བའི་དབུས་ན་བཞུགས་པའོ། །སྐུའི་གཡས་སུ་ཆོས་རྒྱལ་ཁྲི་སྲོང་ལྡེའུ་བཙན་ཚངས་པ་ལྷའི་མེ་ཏོག་ཞི་མ་ཁྲོའི་ཉམས་ཅན། སྐུ་ལ་ནང་དུ་གསང་གོས་དཀར་པོ་དང་ལའུ་དམར་པོ། ཟ་འོག་གི་གོས་སེར་པོ་འཕེལ་ཁ་ཆེ་བ་དང་རྒྱ་བེར་དམར་སྨུག་གསོལ་བ། ཞལ་རས་རྒྱས་པ་སྨ་ར་དང་ཨག་ཚོམ་འཁྱིལ་ཆགས་པ། དབུ་ལ་དར་གྱི་ལ་ཐོད་དང་སྙན་ཆ་སྤྲས་པ། ཕྱག་གཉིས་མཉམ་བཞག་གི་རྒྱས་གསེར་འཁོར་རྩིབས་བཞི་བསླང་སྟེ་འཛིན་པ། ཞབས་གཉིས་ལྷམ་མནབས་པས་རྒྱལ་པོ་རོལ་སྟབས་སུ་དར་ཟབ་ཀྱི་གབ་ཙེ་སུམ་བརྩེགས་ཀྱི་གདན་ལ་འགྱིང་བག་དང་ལྡན་པས་བཞུགས་པའོ། །སྐུའི་གཡོན་དུ་འབངས་ལོ་ཆེན་བཻ་རོ་ཙ་ན་གངས་ཅན་གྱི་མིག་གཅིག་པུ་རབ་ཏུ་བྱུང་བའི་ཆ་ལུགས་ཅན། ཆོས་གོས་རྣམ་གསུམ་གསོལ་ཞིང་ཕྱག་གཉིས་གཡས་ཆོས་འཆད་དང་། གཡོན་མཉམ་བཞག་གིས་གླེགས་བམ་བསྣམས་པ་སྟ་ཟུར་གཡས་སུ་སྒྲོམ་བུ་པུསྟིས་བཀང་བ་བརྟེན་པ། དབུ་ལ་པཎ་ཞུ་གསོལ་བ། ཞབས་གཉིས་རྗེན་པར་ངུར་སྨྲིག་འདིང་བ་ལ་ཕྱེད་པའི་སྟབས་སུ་བཞུགས་པའོ། །སྐུའི་མདུན་དུ་གྲོགས་ཡེ་ཤེས་མཚོ་རྒྱལ་བོད་མོའི་ཆས་དང་། ཞི་འཛུམ་ཆགས་པའི་ཚུལ་ཅན། དབུ་རྒྱན་སྙན་ཆ། མགུལ་རྒྱན་དང་ཆས་ཕྲེང་། འོག་པགས་དང་དར་གྱི་རྩེ་གོས་སྣ་ཚོགས་སྐུ་ལ་སྤྲས་པ། ཕྱག་གཉིས་གདུ་བུ་སོར་རྒྱན་དང་བཅས་པས་བདེ་སྐྱོང་གི་སྣོད་མཚན་ཉིད་དང་ལྡན་པར་མ་དཱ་ན་བསྐྱིལ་བ་གུ་རུ་རིན་པོ་ཆེར་འདྲེན་ཐབས་སུ་བསྣམ་པ། ཞབས་གཉིས་རྟ་བབ་ཀྱི་སྐྱིལ་མོས་ཟ་འོག་གི་གདན་ལ་རོལ་པའོ། །རྒྱབ་ཏུ་ཟབ་ཆོས་ཡང་ཟབ་པདྨའི་ཐུགས་ཐིག་གི་དགོངས་གཏེར་མུ་མཐའ་མེད་པར་སྩོལ་ཞིང་སྨོན་ལམ་གཏད་རྒྱ་དང་། བཀའ་བབ་ལུང་བསྟན་གྱིས་དབུགས་དབྱུང་ཞིང་མངའ་གསོལ་ཏེ་བྱིན་རླབས་མངོན་སུམ་གྱི་བདག་པོ། གྲུབ་ཆེན་རིན་པོ་ཆེ་འཇིགས་མེད་ཕྲིན་ལས་འོད་ཟེར་ཅུང་ཟད་བགྲེས་ཉམས་དང་རབ་བྱུང་གི་ཚུལ་ཅན། སྐུ་ལ་ནང་དུ་འགག་གོས་དང་། དེའི་ཕྱི་རྔུལ་གཟན་དང་ཤམ་ཐབས་གསོལ་བ། དབུ་ལ་པད་ཞྭ་དང་ཕྱག་གཉིས་ཆོས་འཆད་ཀྱི་ཕྱག་རྒྱ་ཐུགས་ཀར་མཛད་པ། ཞབས་གཉིས་རྡོ་རྗེའི་སྐྱིལ་ཀྲུང་གིས་བཟང་གོས་ཀྱི་སྟན་ནང་ཚངས་ཅན། སྟེགས་ཁེབ་ལ་པར་ཏགས་ཁྲ་བོའི་གྲུམ་རྩེའི་གདན་ལ་བརྗིད་ཆགས་པར་བཞུགས་པའོ། །མཐའ་སྐོར་དུ་འཇའ་ཚོན་འོད་ལྔའི་དྲྭ་བ་མིག་མང་རིས་སུ་འཁྲིགས་པའི་ཀློང་དུ་སྐུའི་རིག་འཛིན་འཇམ་དཔལ་བཤེས་གཉེན། གསུང་གི་རིག་འཛིན་ཀླུ་སྒྲུབ་སྙིང་པོ། ཐུགས་ཀྱི་རིག་འཛིན་ཧཱུྃ་ཀ་ར། ཡོན་ཏན་གྱི་རིག་འཛིན་དྲི་མེད་བཤེས་གཉེན། ཕྲིན་ལས་ཀྱི་རིག་འཛིན་འོད་གསལ་གླང་པོ། མ་མོའི་རིག་འཛིན་ནོར་ལེགས་སྦྱིན། དྲག་སྔགས་ཀྱི་རིག་འཛིན་ཞི་བའི་སྙིང་པོ། མཆོད་བསྟོད་ཀྱི་རིག་འཛིན་གསང་བ་སྦས་པ་སྟེ་བརྒྱད་ཀ་རབ་ཏུ་བྱུང་བའི་ཆ་ལུགས་ཅན། གཡས་ཐམས་ཅད་ཀྱིས་བདེ་གཤེགས་སྒོས་བཀའ་རང་རང་གི་རྩ་བའི་ཕྱག་མཚན་ལ་གཡོན་པ་རྣམས་མཉམ་བཞག་མཛད་དེ་ཞབས་གཉིས་ཕྱེད་སྐྱིལ་ཅན་བཞི་དང་། བརྟུལ་ཞུགས་ཀྱི་སྐྱིལ་སྟབས་བཞིས་བཞུགས་ཏེ་པད་ཟླའི་གདན་ལ་རོལ་བའོ། །ཕྱི་རོལ་དུ་བོད་ཀྱི་གྲུབ་ཆེན་རྗེ་འབངས་ཉི་ཤུ་རྩ་ལྔ་རང་རང་རབ་བྱུང་དང་སྔགས་པའི་ཆ་ལུགས་སོ་སོར་མ་འདྲེས་ཐ་དད་དུ་བཞུགས་པའོ། །ཚོགས་ཞིང་གི་སྤྱི་བོར་སྟེང་གི་ནམ་མཁའ་ལ་དབུས་སུ་སངས་རྒྱས་ཐམས་ཅད་ཀྱི་མེས་པོ། ཡེ་གདོད་མའི་མགོན་པོ་ཀུན་ཏུ་བཟང་པོ་འོད་མི་འགྱུར་བ། སྟོན་པ་རྒྱལ་བ་རིགས་ལྔ། རིགས་བརྒྱའི་ཁྱབ་བདག་རྡོ་རྗེ་སེམས་དཔའ་སྟེ་རྒྱལ་བ་དགོངས་པའི་བརྒྱུད་པ། རིག་འཛིན་པྲ་ཧེ་བཛྲ། མཉྫུ་ཤྲི་མི་ཏྲ། དཔལ་གྱི་སེང་གེ། ཡེ་ཤེས་མདོ། དྲི་མེད་བཤེས་གཉེན་གྱིས་མཚོན་རིག་འཛིན་བརྡའ་ཡི་བརྒྱུད་པ། སློབ་དཔོན་ཆེན་པོ་པདྨ་ཀཱ་ར། ཆོས་ཀྱི་སྒྲོན་མེ་རྣམ་པར་སྣང་མཛད་ཞབས། གསང་ཆེན་བཀའི་སྡུད་པོ་ཛྙ་ན་ས་ག་ར། ཆོས་ཀྱི་འཁོར་ལོས་བསྒྱུར་མཛད་པྲ་ཧ་མ་དེ་ཝ་པུཥྤེ་སོགས་གང་ཟག་སྙན་ཁུང་བརྒྱུད་པའི་བླ་མའི་ཚོགས་ཁྲོམ་ཆེན་པོ་འདུས་པ་ལྟར་གོ་མཚམས་མེད་པར་བཞུགས་པ་དང་། བར་མཚམས་ཐམས་ཅད་དུ་གནས་གསུམ་གྱི་དཔའ་བོ་དང་མཁའ་འགྲོ་མ་རྣམས་དང་། མགོན་པོ་ཕོ་རྒྱུད། ལྷ་མོ་མོ་རྒྱུད་ལ་སོགས་རྡོ་རྗེ་ཆོས་སྐྱོང་བའི་བསྲུང་མ་རྒྱ་མཚོ་དང་། ཚོགས་ཞིང་རྗེ་བཙུན་བླ་མའི་སྟེང་འོག་ཕྱོགས་མཚམས་མ་ལུས་པར་གསང་སྔགས། རིག་སྔགས། གཟུངས་སྔགས་ཀྱིས་བསྡུས་པའི་རྒྱུད་སྡེ་བཞིའམ་དཀའ་ཐུབ་རིག་བྱེད་དང་། དབང་བསྒྱུར་ཐབས་ཀྱི་དགོངས་པས་ཕྱེ་བའི་རྒྱུད་སྡེ་དྲུག་གི་ལྷ་ཚོགས་དངོས་གྲུབ་ཀྱི་རྩ་བར་གྱུར་པ་མ་ལུས་ཤིང་ལུས་པ་མེད་པ། དཔེར་ན་ནམ་མཁའ་ལ་སྤྲིན་གྱི་ཕུང་པོ་འཁྲིགས་པ་བཞིན་དུ་བསྒོམ་པས་ཐ་མལ་གྱི་སྣང་བ་རང་འགགས་སུ་འགྲོ་ནུས་པ་སྣང་སྲིད་དག་པ་རབ་འབྱམས་སུ་ཤར་བས་གསལ་སྟོང་འཛིན་ཞེན་མེད་པ་རང་བྱུང་ལྷུན་གྲུབ་ཆེན་པོར་བསྒོམ་མོ། །དེ་ཡན་ཆད་ཀྱིས་ཇི་ལྟར་བསྐྱེད་པའི་རིམ་པ་སོང་།
མོས་གུས་གསོལ་འདེབས་ཀྱི་རྣལ་འབྱོར།
གཉིས་པ་མོས་གུས་གསོལ་འདེབས་ཀྱི་རིམ་པ་ནི། ཚེ་འདིར་འོད་གསལ་རྫོགས་པ་ཆེན་པོའི་ལམ་ནས་མཆོག་གི་དངོས་གྲུབ་ཐོབ་པའི་ཉེ་ལམ་ཐུན་མོང་མ་ཡིན་པར་ངོ་མཚར་བས་ན། ཨེ་མ་ཧོ་ཞེས་བརྗོད་དེ། འཇིག་རྟེན་པའི་བློར་སྣང་བའི་གནས་རིས་མཆོག་དམན་གྱིས་བཟང་ངན་དུ་བཟུང་བའི་ཕྱོགས་ལྷུང་ལྟར་མེད་པ་དང་། མཚན་མའི་རྟོག་པའི་འོག་ཏུ་མ་གྱུར་པས་འོག་མིན་སྲིད་ཞིའི་ཁམས་ཀུན་དང་མཉམ་པའི་ཆོས་ཀྱི་དབྱིངས་སྐྱེ་འགག་གནས་དམིགས་འགྲོ་འོང་གིས་མཚོན་མཐའ་བརྒྱད་ཀྱི་སྤྲོས་པ་དང་བྲལ་བའི་རང་སྣང་དོན་གྱི་ཕོ་བྲང་ནས། རང་བཞིན་དག་པ་གཉིས་ལྡན་ངོ་བོ་ཆོས་སྐུ་ཀུན་དུ་བཟང་པོ་དང་། འཁོར་རྒྱལ་ཚབ་རིགས་ལྔའི་སྐྱེས་བུ། རིགས་ཆུང་གི་སེམས་དཔའ་དང་སེམས་མ། སྟོན་འཁོར་དགོངས་པ་དབྱེར་མེད་ཉི་མ་དང་འོད་ཟེར་གྱི་ཚུལ་དུ་རང་ཤར་བ་ཉིད་ལས་མི་གཞན་པའི་ཡེ་ཤེས་ཀྱི་འཁོར་ཚོགས། རྒྱལ་སྲས་སེམས་དཔའ་དང་འཇོམས་བྱེད་ཁྲོ་བོ་སྟེ་སངས་རྒྱས་རང་སྣང་གིས་བྱིན་རླབས་དགོངས་བརྒྱུད་རྟོགས་པ་མངོན་གྱུར་གྱི་བླ་མ་རྣམས་ལ་ལྟ་བ་ཞལ་མཇལ་གྱི་ངང་ནས་གསོལ་བ་འདེབས་སོ། །དེའི་བྱིན་རླབས་མངོན་སུམ་རང་གནས་ཀྱི་ཡེ་ཤེས་ངོ་རང་ཐོག་ཏུ་འཕྲོད། ཐག་གཅིག་ཐོག་ཏུ་བཅད། གདེང་གྲོལ་ཐོག་ཏུ་བཅའ་བའི་ངོ་བོ་ཀ་དག་གདོད་མའི་གནས་ལུགས་རང་ངོ་རྗེན་པ་ད་ལྟ་ཉིད་དུ་རྟོགས་པར་བྱིན་གྱིས་རློབས་ཤིག་པའོ། །མངོན་པར་དགའ་བ་དང་། དཔལ་ལྡན་བརྩེགས་པ་ལ་སོགས་གནས། ཕྱེད་སྤྲུལ་ལོངས་སྤྱོད་རྫོགས་པས་བསྡུས་པའི་སྟོན་པ། གསང་སྔགས་ཀྱི་རྒྱུད་དོན་མཐར་ཐུག་པ་སྟེ་ཆོས། གཞི་རྫོགས་འཕོ་འགྱུར་མེད་པའི་ངང་གི་དུས། རྒྱལ་སྲས་རིགས་གསུམ་སེམས་དཔའ་ལ་སོགས་འཁོར་ཏེ་ངེས་པ་ལྔ་དང་ལྡན་པའི་ངོ་བོ། རྣམ་པ་འགག་མེད་རང་བཞིན་ཡེ་ཤེས་ཀྱི་རོལ་རྩལ་ལྷུན་གྱིས་གྲུབ་པ་རྩོལ་མེད་ཕྱིར་གསལ་དུ་མཆེད་པའི་སྣང་བ། དག་པ་རབ་འབྱམས་ངོ་བོ་ཉིད་ཀྱིས་སྟོང་ཞིང་བདག་མེད་པས་འདུས་མ་བྱས་པ་རྒྱུ་རྐྱེན་ལས་འདས་པའི་ཕོ་བྲང་ཉིད་ནས། དག་ས་གསུམ་ལ་གནས་པའི་སེམས་དཔའ་ཆེན་པོ་རྣམས་ཀྱི་ངོར་སྣང་བས་ན་ངོ་བོ་སངས་རྒྱས་རང་སྣང་གི་ཡེ་ཤེས་ལས་ཅུང་ཟད་མ་གཡོས་ཀྱང་། བྱད་དབྱིབས་དང་མེ་ལོང་དངས་པའི་དཔེ་བཞིན་བློ་གྲོས་མཆོག་གྱུར་གྱིས་སེམས་ཅན་གཞན་རྒྱུད་ལ་བརྡ་དང་བརྡ་ཐབས་ལྟར་སྐུའི་བཀོད་པ་མཚན་དཔེ་ཁྱད་པར་བའི་རྣམ་པར་ཤར་བ། ལོངས་སྤྱོད་རྫོགས་པའི་སྐུ་རྡོ་རྗེ་མི་བསྐྱོད་པ་ལ་སོགས་རིགས་ལྔའི་སངས་རྒྱས་ལ་སོགས་པའི་ཐུན་མོང་མ་ཡིན་པའི་སྟོན་པ་འདི་ལྟ་སྟེ། གསུང་གིས་ཆོས་མི་སྨྲ་ན་ཡང་སྐུ་མཇལ་བ་ཙམ་གྱིས་དགོངས་པའི་ཁྱད་པར་བརྡའི་སྒོ་ནས་སྟོན་པར་མཛད་པའི་བརྡ་བརྒྱུད་ཀྱི་བླ་མ་གྲུབ་པ་མཆོག་བརྙེས་པ་རྣམས་ལ་གསོལ་བ་འདེབས་སོ། །རིག་པ་རང་བྱུང་གི་ཡེ་ཤེས་ཐབས་ཀྱི་རྟེན་འབྲེལ་ཙམ་གྱིས་མངོན་སུམ་བཅར་ཕོག་ཏུ་རྟོགས་བྱེད་ལྷུན་གྲུབ་སྣང་བ་བཞིའི་ཡེ་ཤེས་གོང་ནས་གོང་འཕེལ་དུ་འཆར་བར་བྱིན་གྱིས་རློབས་ཤིག་པའོ། །རྩོད་པའི་དུས་འདིར་ཐེག་མཆོག་གསང་བ་སྔགས་ཀྱི་གདུལ་ཞིང་། ལས་འཕྲོ་དང་སྐལ་བ་བཟང་པོ་དང་ལྡན་པའི་སེམས་ཅན། རྣམ་དཀར་བསོད་ནམས་དགེ་བའི་བློ་རང་ངོས་ནས་རྐྱེན་ལ་རགས་མ་ལས་པར་སྣང་བར་ནུས་པ། གངས་ཅན་བོད་ཀྱི་ས་ཡི་ལྟེ་བ་དབུས་གཙང་དག་པའི་ཞིང་ཁམས་ཆོས་འཁོར་རྣམ་གསུམ་གོས་ཀྱི་ཚུལ་ལ་སྒྲུབ་གནས་རྣམ་གསུམ་གོང་བ་ལྟ་བུར་འབྲེལ་བས་མཚོན་ཏེ་མ་ངེས་ཐ་དད་ཀྱི་གནས་ཆེན་པོ་སྔོན་བྱོན་མཁས་གྲུབ་ཀྱི་རིག་འཛིན་འགྲོ་བ་འདུལ་བའི་སྐྱེས་བུ་སྤྲུལ་བའི་སྐུ་དུ་མས་ཞབས་ཀྱིས་བཅགས་པའི་གཙུག་ལག་ཁང་བསམ་ཡས་དབུ་རྩེ་རིམ་གསུམ་གཙོ་བོར་གྱུར་པ་དང་། ཁྲ་འབྲུག་བྱམས་པ་གླིང་། ར་ས་འཕྲུལ་སྣང་། ཡེར་བ་ཟླ་བ་ཕུག་སོགས་དག་ཞིང་རང་དབང་ཅན་གྱི་ཕོ་བྲང་ནས་སྔོན་བསྟན་པ་དར་ཞིང་རྒྱས་པར་བྱེད་པའི་བདག་པོའི་རྐྱེན་སློབ་དཔོན་གུ་རུ་རིན་པོ་ཆེ་པདྨ་འབྱུང་གནས། གྲུབ་ཆེན་རྗེ་འབངས་ཉེར་ལྔ་ལ་སོགས་སྨིན་གྲོལ་གདམས་ངག་གི་ཆོས་བཀའ་ཞལ་ནས་སྙན་དུ་བརྒྱུད་པའི་རྩ་བ་དང་བརྒྱུད་པར་བཅས་པའི་བླ་མ་རྣམས་ལ་དངས་འདོད་ཡིད་ཆེས་ཀྱི་དད་པ་རྩེ་གཅིག་པས་གསོལ་བ་འདེབས་སོ། །སེམས་བསྐྱེད་ཀྱི་སྨོན་ལམ་རྣམ་པར་དག་པས་མཚམས་སྦྱར་ནས་ཕྱོགས་མེད་ཀྱི་འགྲོ་བའི་དོན་འབད་རྩོལ་མི་དགོས་བཞིན་འབྱུང་ནུས་པར་བྱིན་གྱིས་རློབས་ཤིག་པའོ། །གཞན་ཡང་བརྒྱུད་པ་རིམ་པ་གསུམ་པོ་དེ་དག་གི་རྒྱུན་བར་མ་ཆད་པར་དམ་སེལ་གྱི་སླད་མ་ཞུགས། གདམས་ངག་གི་སྣ་ཁ་མ་ལོག བྱིན་རླབས་ཀྱི་ནུས་པ་མ་ཉམ་པར་གཅིག་ནས་གཅིག་ཏུ་རྒྱུད་སྒྲུབ་ཐབས་དང་འབྲེལ། སྒྲུབ་ཐབས་མན་ངག་དང་འབྲེལ། མན་ངག་ཕྱག་བཞེས་དང་འབྲེལ། ཕྱག་བཞེས་ཆོག་ཁྲིགས་དང་འབྲེལ་བས་ཆོས་ཁུང་བཙུན་པ། ཁྱད་པར་དུ་ཉེ་བརྒྱུད་ཟབ་མོ་གཏེར་གྱི་ཕྱོགས་ལའང་རྒྱ་ཆེ་བ་ས་གཏེར་ལ། མི་འགྱུར་བའི་བྲག གཡང་ཞག་གི་མཚོ། རིན་པོ་ཆེའི་སྒྲོམ་རྣམས་ནས་དངོས་སུ་གསང་གཏེར་དང་ཁྲོམ་གཏེར་གང་ཡང་རུང་བར་སྤྱན་དྲངས་པའི་གཏེར་ཁ། ཟུག་པ་རྩ་བ་ལྟ་བུ། འདྲིལ་བ་སྡོང་པོ་ལྟ་བུ། གྱེས་པ་ཡལ་ག་ལྟ་བུ། མཛེས་པ་མེ་ཏོག་ལྟ་བུ། སྨིན་པ་འབྲས་བུ་ལྟ་བུའི་ཆོས་སྐོར། བྱེ་བྲག་ནང་གསེས་སུ་ཡབ་གཏེར། ཡུམ་གཏེར། གསང་གཏེར། རྫས་གཏེར། ཕྱི་གཏེར། ནང་གཏེར། མ་ནིང་གི་གཏེར། སྨྱོ་གཏེར། ཟབ་གཏེར། ས་གཏེར་ལ་སོགས་རིགས་བཅོ་བརྒྱད་དུ་ཕྱེ་བར་མཛད་པ་དང་། ཟབ་མོ་དགོངས་པའི་གཏེར་ལ་ཐུགས་གཏེར་ཆེན་པོ་ཕྱི་ནང་གསང་གསུམ་དུ་བཞུགས་པ་དང་། དེ་ལས་ཀྱང་དག་སྣང་སྙན་བརྒྱུད་དང་སྔོན་གནས་རྗེས་དྲན་སོགས་མདོར་ན་གཏེར་བྱོན་རེ་རེ་ལ་ཟབ་ཆོས་བླ་རྫོགས་ཐུགས་གསུམ་གྱི་སྒྲུབ་ཐབས་གཞུང་མན་ངག་ལེ་ལག་དང་བཅས་པའི་ཆོས་ཏེ། ཇི་ལྟར་རིག་པའི་སྨིན་བྱེད་ཀྱི་དབང་བསྐུར་བ། ཤེས་རབ་ཀྱི་རྒྱུད་བཤད་པ། མན་ངག་གི་ཁྲིད་འབོགས་པ། ཉམས་ལེན་གྱི་སློབ་བཤད་སྟོན་པའི་སློབ་དཔོན། ཡོན་ཏན་གྱི་ངོས་ནས་སྐལ་བཟང་གི་འདྲེན་པ་སྟོང་དང་རྩ་གཉིས་རྣམས་དང་མཉམ་པ། བཀའ་དྲིན་གྱི་ངོས་ནས་སངས་རྒྱས་སྟོང་ལས་ཀྱང་ལྷག་པའི་ཐུགས་རྗེ་གསུམ་ལྡན་གྱི་བདག་ཉིད་རྩ་བའི་བླ་མ་རིན་པོ་ཆེ་དང་། ཡི་དམ་ལྷག་པའི་ལྷ་ཞི་བ་དང་ཁྲོ་བོ་མ་མོ་མཁའ་འགྲོ་རྣམས་དང་། ཡེ་ཤེས་དང་ལས་ལས་གྲུབ་པའི་ཆོས་སྐྱོང་ལ་སོགས། མདོར་ན་སྐྱབས་གནས་མ་ལུས་ཀུན་འདུས་ཀྱི་ངོ་བོ་གུ་རུ་རིན་པོ་ཆེ་པདྨ་ཐོད་ཕྲེང་རྩལ་དང་དབྱེར་མ་མཆིས་པ་ཚེ་རབས་ཀུན་གྱི་རིགས་ཀྱི་བདག་པོ་ཁྱོད་ཉིད་ཁོ་ན་ལས་བདག་ལ་འདི་ཕྱི་བར་དོ་གང་ལྟར་ཡང་སྐྱབས་དང་དཔུང་གཉེན་དུ་རེ་ས་དང་ལྟོས་སའི་ཡུལ་གཞན་ནས་ཉི་ཚེ་ཙམ་ཡང་མ་མཆིས་པས་གནས་སྐབས་སུ་སྐྱིད་དམ་སྡུག ལེགས་སམ་ཉེས། གང་ཅི་བྱུང་ཡང་ཐེ་ཚོམ་གྱི་སོམ་ཉི་རྡུལ་ཙམ་ཡང་མི་འཆར་བར་སྙིང་ཁོང་རུས་པའི་གཏིང་ནས་ཅི་མཛད་ཁྱེད་མཁྱེན་ནོ་སྙམ་པའི་ཡིད་ཆེས་ཀྱི་གུས་པས་སྒོ་གསུམ་ཆུན་གཅིག་དྲིལ་གྱི་འདུན་པ་རྩེ་གཅིག་པས་ལུས་ཀྱི་བ་སྤུ་གཟེང་བ། མིག་ནས་མཆི་མ་ཐོན་པ། བློ་སྣ་བླ་མས་འཕྲོག་པ། བསམ་རྒྱུ་བླ་མ་ལས་མེད་པ། སྣང་བ་བླ་མར་འཆར་བའི་མོས་གུས་བཟོད་མེད་ཀྱི་གདུང་བས་གསོལ་བ་འདེབས་སོ། །བདག་ལས་ངན་གྱི་ཁུར་གྱིས་ནོན། བག་ཆགས་ཀྱི་སྦུབས་སུ་འཐུམ། སྡུག་བསྔལ་གྱི་འདམ་དུ་བྱིང་བའི་ཚུལ་འདིར་མནོ་བསམ་བགྱིས་ན་རང་ཉིད་འདྲ་བ་སྲིད་ན་མ་མཆིས་པས། རྒྱུ་ཀུན་འབྱུང་ལས་དང་ཉོན་མོངས་པས་རྣམ་པར་བསྐྱེད་པའི་འབྲས་བུ་སྡུག་བསྔལ་གྱིས་གདུང་ཤིང་མནར་བའི་ཉམས་ཐག་པ་བདག་སྐྱེ་བ་ཐམས་ཅད་དུ་ཡང་ཐར་བའི་གོ་སྐབས་མེད་པའི་སྲིད་པའི་ཕུང་པོ་ཅན། ཁམས་གསུམ་གྱི་འཁོར་བའི་རྒྱ་མཚོ་འདུས་བྱས་ཀྱི་རྦ་ཀློང་ཤུགས་དྲག་ཏུ་གཡོ་བ་ལ་མི་འདོད་བཞིན་དུ་སྡུག་བསྔལ་གྱི་རྒྱུ་བསྒྲུབ། བདེ་བ་འདོད་ཀྱང་དེའི་ཚུལ་ལ་ལེགས་པར་འཇུག་མི་ནུས་པར་དབང་མེད་དུ་ནུབ་པ་རྣམས་རྗེ་བཙུན་བླ་མ་ཁྱེད་ཀྱི་བརྩེ་བ་ཆེན་པོའི་ཐུགས་རྗེས་འཇུག་པ་ལྕགས་ཀྱུ་རྣོན་པོ་ལྟ་བུ་ཡིས། གནས་སྐབས་ཕྱི་དུས་སུ་མི་འགྱང་བར་དུས་ད་ལྟ་འདི་ཁོ་ན་ཉིད་དུ་མངོན་སུམ་དུ་དྲང་བར་མཛད་དུ་གསོལ་ཞེས་སྨོན་ལམ་གསོལ་བའོ། །དགེ་སྡིག་བླང་དོར་མི་ཤེས་པ་གཏི་མུག་མ་རིག་པའི་བློ་ཤིན་ཏུ་རྨོངས་པའི་མུན་པ་ཆེན་པོས་བདག་མེད་ཀྱི་དོན་མཐོང་བའི་རང་ཞལ་ལ་ཀུན་ནས་སྒྲིབ་པས་ལམ་ནོར་བ་དང་། ལམ་གོལ་བར་འཕྱན་བཞིན་པའི་ལས་ཉོན་གྱིས་རྣམ་པར་འཐིབ་པའི་ཡིད་གཟུང་འཛིན་གཉིས་རྟོག་གི་ཤེས་པ་འཁོར་བའི་རྩ་བའམ་གཞིར་གྱུར་པ་འདི་བསལ་ཞིང་གྲོལ་བར་བྱེད་པའི་ཐབས་གྲོགས་ཁྱད་པར་ཅན། དགེ་བའི་བཤེས་གཉེན་ཚངས་པ་མཚུངས་པར་སྤྱོད་པ་མང་དུ་ཐོས་པ་ལུང་གི་ཡོན་ཏན་གྱིས་ཕྱུག་པས་གཞན་རྗེས་འཇུག་རྣམས་ཆོས་མིན་བདུད་ཀྱི་ལྟ་སྤྱོད་ལས་མངོན་སུམ་ལྡོག་པར་མཛད་ནུས་པ་ཅན་མཉེས་པ་གསུམ་གྱིས་བསྟེན་ནས། རང་ཉིད་སོ་ཐར་རིས་བདུན་གང་ཡང་རུང་བའི་ཚུལ་ཁྲིམས་ལ་གནས་པས་གཞི་བཟུང་། དུས་ངན་སྙིགས་མའི་རང་རྟགས་ཐོ་ཅོའི་རྩིང་སྤྱོད་རྣམས་ངང་གིས་བཏུལ་ལ་དགེ་བའི་བཤེས་གཉེན་གྱི་དྲུང་དུ། དམ་པའི་ཆོས་བཟང་པོ་བཀའ་དང་བསྟན་བཅོས་ཀྱི་གཞུང་ལུགས་ཡང་དག་པ་རྣམས་ཐོས་པར་བྱེད། ཐོས་པའི་དོན་ནི་རང་སྡེ་གྲུབ་མཐའ་སྨྲ་བ་བཞིའི་ལྟ་གྲུབ་སོ་སོའི་འདོད་པ་ལ་མདོར་བསྡུ་ན། བྱེ་སྨྲ་བས་ཤེས་བྱ་ཐམས་ཅད་གཞི་ལྔར་བསྡུ་བ་དང་། མདོ་སྡེ་བས་བེམ་ཤེས་གཉིས་སུ་འདོད་པ་དང་། སེམས་ཙམ་པས་མཚན་ཉིད་གསུམ་དུ་གཏན་ལ་ཕེབས་པ་དང་། དབུ་མ་བས་གཏན་ཚིག་ལྔས་བདེན་ཞེན་གཅོད་ཚུལ་དང་། སྔགས་ཕྱི་ནང་གིས་གཞི་ལྟ་བ། ལམ་བསྒོམ་པ། འབྲས་བུ་གྲུབ་པ་གསུམ་གྱིས་བསྡུས་པའི་རྒྱུད་ཀྱི་དངོས་པོ་བཅུ་ལ་སོགས་པ་ལེགས་པར་གསུང་པའི་བཀའ་དང་དགོངས་འགྲེལ་གྱི་བསྟན་བཅོས་དག་ཅི་རིགས་པ་རང་དང་སྐལ་བ་དང་འཚམ་པར་ཐོབ་པར་བྱེད། གང་ཐོབ་པ་རྣམས་ཐོས་པའི་ཡུལ་ཏུ་ལུས་པར་མི་བྱེད་པར་དེ་དག་གི་རྣམ་དབྱེ་དྲང་དོན་དང་ངེས་དོན། དགོངས་དང་ལྡེམ་དགོངས། སྒྲ་ཇི་བཞིན་དང་ཇི་བཞིན་མ་ཡིན་པ་སྟེ་མཐའ་དྲུག་དང་། ཚིག་དོན་དང་སྤྱི་དོན། སྦས་དོན་དང་མཐར་ཐུག་གི་དོན་སྟེ་ཚུལ་བཞིའི་སྒྲོམ་ནས་སྒྲོ་འདོགས་དང་སྐུར་འདེབ་གཉིས་ཀྱི་མཐར་མ་ལྷུང་བར་ཚིག་དོན་མཐའ་དཔྱོད་དང་བཅས་པ་བསམ་པའི་ཤེས་རབ་ཀྱིས་ངེས་པར་བྱ། བསམ་བྱུང་གི་ཤེས་རབ་ཀྱིས་གཞལ་ཞིང་འཇལ་བའི་དོན་རྟོག་གེའི་རིག་པའི་ལམ་དུ་མི་བཞག་པར། རང་རྒྱུད་ལ་དོན་མངོན་དུ་རྟོགས་པ་བསྒོམ་པའི་ཤེས་རབ་ལ་ཞུགས་ཏེ། དེ་ལ་ཞི་གནས་བསྒོམ་པ་དང་། ལྷག་མཐོང་བསྒོམ་པའི་རིམ་པ་གཉིས་ཀྱི་དང་པོ། སེམས་གནས་པའི་ཐབས་དགུའི་མན་ངག་ལ་བརྟེན། འགལ་རྐྱེན་ཉེས་པ་ལྔ་སྤོང་། གཉེན་པོ་འདུ་བྱེད་བརྒྱད་བསྟེན་པས་བྱིས་པ་ཉེར་སྤྱོད་ཀྱི་བསམ་གཏན་འགྲུབ་པར་བྱས་ཏེ། ཁྱད་པར་ངེས་འབྱུང་གི་བསམ་པ། བྱམས་སྙིང་རྗེའི་སེམས་བསྐྱེད། བདག་མེད་གཉིས་རྟོགས་ཀྱི་ཤེས་རབ་རྣམས་གོང་ནས་གོང་འཕེལ་ཏུ་བསྐྱེད་དེ་དོན་རབ་འབྱེད་པའི་བསམ་གཏན་གོམས་པས་ཀུན་རྫོབ་ཀྱི་བདེན་པ་སྣང་ལུགས་སྐྱེ་མེད་དུ་ངེས་པའི་ཡེ་ཤེས། དོན་དམ་གྱི་བདེན་པ་གནས་ལུགས་མངོན་སུམ་དུ་གཟིགས་པའི་ཤེས་རབ་ཀྱིས་ལྷག་མཐོང་གི་ཆོས་ཉིད་རྟོགས་པའི་ཐོས་བསམ་སྒོམ་གསུམ་གྱི་ཤེས་རབ་རིན་པོ་ཆེའི་འོད་ལྟ་བུས་བདག་བློའི་མི་ཤེས་པའི་མུན་པ་ལྷག་མེད་དུ་བསལ་དུ་གསོལ་ཞེས་གསོལ། རང་དང་གཞན་རྒྱུད་མ་རུང་བར་བྱེད་པའི་ཀུན་ནས་མནར་སེམས་ཀྱི་དངོས་པོ་དགུས་བསྐྱེད་པའི་ཞེ་སྡང་གི་ཆོས་ལྔ་རྫོགས་པའི་དབང་གིས་རང་དང་ཕ་རོལ་པོའི་ཤེས་རྒྱུད་འཁྲུགས་པས་དེའི་སྟོབས་ཀྱིས་ཟག་བཅས་ཉེར་ལེན་གྱི་བསོད་ནམས་བྱ་བའི་དངོས་པོ་འདུས་བྱས་པ་རྣམས་འཚིག་ཤིང་བརླག་པའི་མེ་ལྕེ་འབར་བའི་ཁོང་ཁྲོས་ཡིད་གདུང་བ་རྣམས། བསམ་པའི་ཀུན་སློང་གི་དམིགས་རྣམ་ཚད་མེད་པའི་ཡིད་འོང་གི་བྱམས་པའི་ངོ་བོ་བདུད་རྩིའི་ཆུ་རྒྱུན་ལྟ་བུས་གཞིལ་ཏེ་བསལ་དུ་གསོལ། མཛེས་ཤིང་ཡིད་དུ་འོང་བའི་ཡུལ་བུད་མེད་ལྟ་བུ་འདོད་པའི་འདོད་ཆགས་ཀྱི་ཞེན་པས་དེའི་དགའ་བདེའི་རོ་མྱོང་བའི་ལས་མི་གཙང་སྤྱོད་རྣམ་གྲངས་དུ་མར་བགྱིས་པའི་བྱས་ཤིང་བསགས་པའི་སྐྱོན་གྱིས་རང་རྒྱུད་ཆེས་ཆེར་གོས་པའི་ཡིད། ཚུལ་ཁྲིམས་ཀྱི་བསླབ་པ་ཞིག་རལ་ནག་ནོག་དྲི་མས་སྦགས་པ་དེ་ཡུལ་རྐྱེན་གྱིས་མི་འཕྲོག་པའི་ཏིང་ངེ་འཛིན་མི་སྡུག་པའི་འདུ་ཤེས་སུ་སྙོམས་པར་ཞུགས་པའི་ཆུ་རྒྱུན་གྱིས་མ་ལུས་པར་བཀྲུས་ཏེ། ཚུལ་འཆལ་གྱི་གདུང་བ་འཇིག་རྟེན་ན་དམ་པ་རྣམས་ཕལ་བར་བྱེད་པ། ཡོན་ཏན་ཉམས་པར་བྱེད་པ། བཀུར་འོས་དང་བསྟོད་འོས་ཀྱི་གོ་ས་ལས་ལྷུང་བར་བྱེད་པ་དག་རང་ངོ་རང་གིས་ཤེས་ནས་རང་ཐག་རང་གིས་རྦད་ཀྱིས་བཅད་ལ་རང་སྐྱོན་རང་སྟོབས་ཀྱིས་བསལ་དུ་གསོལ་ཞེས། མདོར་ན་ཆགས་སྡང་རྨོངས་གསུམ་གྱི་ལས་ངན་གྱི་ཆ་དག་པར་ངེས་པ་སྨོན་ལམ་དུ་བགྱིས་ཏེ། མཐར་འདི་ལྟར་ཉོན་མོངས་པ་རང་མཚན་ཅན་རྣལ་འབྱོར་བའི་རྟོག་པའི་ངོ་བོ་ལ་མ་གྲུབ་པས། དཔེར་ན་སྨིག་རྒྱུ་ལ་རགས་རྩིགས་མི་དགོས་པ་ལྟར་སྤོང་གཉེན་གྱི་ཚུལ་དུ་བསལ་དུ་མེད་དེ་ཆགས་སྡང་གིས་མཚོན་ཉོན་མོངས་པ་གང་ཤར་བ་ན་ཤར་ཙམ་ཉིད་ནས་རང་བཞིན་མ་གྲུབ་པ་དེ་སྟོང་པའི་གཤིས་ལུགས་ཡིན་པས་ཐད་གར་བཅོས་བསླད་མེད་པར་འཇོག དེའི་ཚེ་ངོ་བོ་སྟོང་པ་ཉིད་དུ་ངེས་པས་ན་དེ་ལ་རྣམ་རྟོག་གི་རྩོལ་སྒྲུབ་ཀྱིས་སྒོམ་དུ་རྡུལ་ཙམ་ཡང་མེད་པ་སྟེ་སྟོང་པ་ཉིད་ལ་ཐོབ་ཤོར་སྤུ་རྩེ་ཙམ་མ་མཆིས་པས་སེམས་ཉིད་ཀྱི་ངོ་བོ་རྣམ་པ་འགྱུ་དྲན་འཛིན་ཞེན་གྱི་རྟོག་པ་ཕྲ་རགས་གང་དང་ཅི་སྐྱེས་ཡང་དང་པོ་འགྲོ་དང་འོང་བའི་རྟེན། བར་དུ་གནས་པའི་གཞི། ཐ་མ་འགག་པའི་ཡུལ་ཐམས་ཅད་ལས་འདས་པ་རང་བྱུང་རིག་པའི་བབ། ཆུ་ལས་ཆུ་བུར་ལྟ་བུ་སྟེ་གཞི་དང་སྤྲོས་པ་གང་གི་ཆ་ཡང་སྔར་ཡོད་ཀྱི་དྲི་མ་རྣམ་རྟོག་ཅེས་བསལ་དུ་ཡང་མེད། སྔར་མེད་ཀྱི་ཡོན་ཏན་ཏིང་ངེ་འཛིན་ཞེས་གསར་བཞག་ཅི་ཡང་མེད་པ་ཡེ་བབས་གཉུག་མའི་གནས་ལུགས། གཤིས་སྐྱེ་མེད་དང་གདངས་འགག་མེད་ཀྱི་ལྟ་བ། བཟང་ངན་གྱི་གཏད་སོ་དང་ཆེད་འཛིན་མེད་པའི་སྒོམ་པ། སྤང་བླང་གི་རྩོལ་སྒྲུབ་བྲལ་བའི་སྤྱོད་པ་སྟེ་དོན་ལ་འཁོར་འདས་མཉམ་ཉིད་དང་སྣང་སྟོང་དབྱེར་མེད་དུ་གྱུར་པའི་རྫོགས་པ་ཆེན་པོ་ལ་སེམས་ཀློང་མན་ངག་གི་ཟླས་ཕྱེ་བའི་ཁྱད་པར། སློབ་དཔོན་པདྨ་དང་པཎ་ཆེན་བཱི་མ་ལའི་གྲུབ་མཐའི་སྲོལ་གངས་ཅན་དུ་དབྱེ་བ་ཉིད་བསྟན་པ་གཞི་བསླང་དུ་མཛད་པ་རྒྱལ་བ་ཀློང་ཆེན་པ་ཀུན་མཁྱེན་ཆོས་ཀྱི་རྒྱལ་པོ་དང་། རིག་འཛིན་ཆེན་པོ་ཀུན་མཁྱེན་འཇིགས་མེད་གླིང་པ་ཡབ་སྲས་བརྒྱུད་འཛིན་དང་བཅས་པའི་དགོངས་དོན་ཟབ་མོ་དྲི་མ་མེད་པ་ཚེ་གཅིག་ལུས་གཅིག་འདིར་མྱུར་དུ་རྟོགས་པར་བྱིན་གྱིས་རློབས་ཤིག་པའོ།།
དབང་ལེན་ཅིང་ཐུགས་ཡིད་བསྲེ་བའི་རྣལ་འབྱོར།
གསུམ་པ་དབང་བླང་ཞིང་ཐུགས་ཡིད་བསྲེ་བ་ནི། དེ་ལྟར་རྩེ་གཅིག་དངས་འདོད་ཡིད་ཆེས་ཀྱི་དད་པའི་ཡིད་ཀྱིས་གསོལ་བ་བཏབ་པའི་རྐྱེན་གྱིས། སྐྱབས་ཀུན་འདུས་པ་དྲིན་ཆེན་བླ་མ་ཐུགས་རྗེ་དང་བྱིན་རླབས་ཚད་མེད་པར་མངའ་བ་དེ་ཉིད་ཀྱིས་དགྱེས་པའི་ཞལ་གྱིས་བདག་ལ་ཕྱོགས། འཛུམ་པའི་སྤྱན་གྱིས་ཉེ་བར་གཟིགས། བརྩེ་བའི་ཐུགས་ཀྱིས་བདག་ལ་རབ་ཏུ་དགོངས་པར་མཛད་ནས་མཐའ་སྐོར་གྱི་བརྒྱུད་པ་གསུམ་ལྡན་གྱི་བླ་མ། རྒྱུད་སྡེ་བཞི་དྲུག་གི་ཡི་དམ། གནས་གསུམ་གྱི་མ་མོ་མཁའ་འགྲོ། ཡེ་ཤེས་འཇིག་རྟེན་གྱི་ཆོས་སྐྱོང་དང་བཅས་པ་ཀུན་མེ་ལོང་ལ་ཧ་བཏབ་པ་བཞིན་མཐའ་ནས་དབུས་སུ་འདུས་ཏེ་ཀུན་འདུས་ནོར་བུའི་ལུགས་སུ་བླ་མ་ལ་ཐིམ། དེ་ནས་བླ་མ་ཉིད་སྐུ་གཟི་བརྗིད་དང་བཀྲག་མདངས་མཆོག་ཏུ་རྒྱས། ཐུགས་སྤང་རྟོགས་ཀྱི་ཡོན་ཏན་ཡེ་ཤེས་ཀྱི་བྱིན་རླབས་གསང་བ་གསུམ་གྱི་ངོ་བོར་དུས་གཅིག་ཏུ་སྨིན་པར་བསམ་མོ། །བླ་མའི་སྐུའི་གནས་སོ་སོ་བཞི་ལས་རིམ་པ་བཞིན་དུ་འཕྲོས་པའི་འོད་ཟེར་དཀར་དམར་མཐིང་ཁ་གསུམ་དང་། ཁ་དོག་ལྔ་ལྡན་གཅིག་དང་ལྷན་དུ་འོག་ནས་བསྟན་པའི་ཡི་གེ་འབྲུ་བཞི་བོ་དང་བཅས་ཉི་ཟེར་གྱི་ཐག་པའམ། སྤོས་རིང་གི་དུད་པ་ལྟ་བུར་འཕྲོས་ཏེ་བདག་ཉིད་གཞི་ལུས་རྡོ་རྗེ་ཕག་མོར་བསྒོམ་པའི་སྤྱི་བོ། མགྲིན་པ། སྙིང་ཀ ལྟེ་བ་དང་བཞི་སོ་སོར་ཐིམ་པ་ཡིས། དང་པོས་ལུས་ཀྱི་ལས་དང་གནས་པ་རྩ་ཡི་སྒྲིབ་པ། ད་ལྟར་གྱི་ཉིན་མོ་སད་པའི་གནས་སྐབས་རྣམ་ཤེས་ཚོགས་དྲུག་གི་བག་ཆགས་མ་ལུས་པ་སྦྱངས། རྡོ་རྗེ་སྐུའི་བྱིན་རླབས་བུམ་པའི་དབང་གི་བཅུད་ཀྱི་ཡོན་ཏན་ཐོབ། ལམ་བསྐྱེད་རིམ་གྱི་རྣལ་འབྱོར་གཞལ་ཡས་ཁང་ལྷ་དང་བཅས་པ་བསྒོམ་པ་ལ་དབང། སྣང་སྟོང་གི་ཡེ་ཤེས་རྒྱུད་ལ་སྐྱེས། མཐར་ཐུག་སངས་རྒྱས་སྤྲུལ་སྐུ་འགྲུབ་པའི་སྐལ་བ་རྒྱུད་ལ་བཞག་གོ །གཉིས་པས་ངག་གི་ལས་དང་གཡོ་བ་རླུང་ལྔའི་སྒྲིབ་པ། རེ་ཞིག་པ་མཚན་མོ་གཉིད་ཚེ་རྨི་ལམ་གྱི་གནས་སྐབས། དབང་ཤེས་རགས་པ་འགག་པའི་ཡིད་ངོར་སྣང་བའི་བག་ཆགས་མ་ལུས་པ་སྦྱང་། རྡོ་རྗེ་གསུང་གི་བྱིན་རླབས་གསང་བའི་ནུས་པ་ཐོབ། ལམ་མཚན་བཅས་ཀྱི་རྣལ་འབྱོར་རང་ལུས་ཐབས་ལྡན་གྱི་ཉམས་ལེན་དང་། བསྙེན་སྒྲུབ་བཟླས་བརྗོད་དང་བཅས་པ་བསྒོམ་པ་ལ་དབང། གསལ་སྟོང་གི་ཡེ་ཤེས་རྒྱུད་ལ་སྐྱེས། མཐར་ཐུག་སངས་རྒྱས་ལོངས་སྐུ་འགྲུབ་པའི་སྐལ་བ་རྒྱུད་ལ་བཞག་གོ །གསུམ་པས་ཡིད་ཀྱི་ལས་དང་བཀོད་པ་རྒྱུའི་ཐིག་ལེའི་སྒྲིབ་པ། གང་དུ་གཉིད་འཐུག་གི་གནས་སྐབས། ཡིད་ཤེས་རླུང་གིས་བསྐྱེད་དེ་རྩ་གནས་ཐ་དད་དུ་ཞུགས་པའི་བག་ཆགས་ཕྲ་བ་མཐའ་དག་སྦྱང་། རྡོ་རྗེ་ཐུགས་ཀྱི་བྱིན་རླབས་ཤེར་དབང་གི་ཉམས་མྱོང་རྒྱུད་ལ་ཐོབ། ལམ་གཞན་ལུས་ཐབས་ལྡན་གྱི་བྱེད་པ་འདྲེན་པ་ལ་དབང་། བདེ་སྟོང་གི་ཡེ་ཤེས་རྒྱུད་ལ་སྐྱེས། མཐར་ཐུག་སངས་རྒྱས་ཆོས་སྐུ་འགྲུབ་པའི་སྐལ་བ་རྒྱུད་ལ་བཞག་གོ །བཞི་པས་སྒོ་གསུམ་ཆ་མཉམ་གྱི་ཀུན་རྟོག་དང་སྙོམ་འཇུག་འཛག་བདེའི་སྲེད་པའི་ཞེན་ཆ་སྦྱང་། དབང་བཞི་བ་དོན་གྱི་ལྷན་ཅིག་སྐྱེས་པ་འོད་གསལ་རིག་པ་རྩལ་གྱི་དབང་ཐོབ། ལམ་ཀ་དག་དང་ཁྲེགས་ཆོད་ཀྱི་གསང་ལམ་བསྒོམ་པ་ལ་དབང་། རིག་སྟོང་གི་ཡེ་ཤེས་རྒྱུད་ལ་སྐྱེས། མཐར་ཐུག་སངས་རྒྱས་མངོན་པར་བྱང་ཆུབ་པ་ཐོབ་པའི་སྐལ་བ་རྒྱུད་ལ་བཞག་གོ །ཞེས་དམིགས་པ་སོ་སོའི་ཉམས་ལེན་དང་སྦྲགས་ལ་ཨོཾ་ཨཱ༔ཧཱུྃ་ཧྲཱིཿཞེས་ཡིག་འབྲུ་བཞི་བོ་འདི་ལྕེ་མཆུའི་ངལ་བ་ལ་རག་མི་ལས་པར་ནང་དུ་རླུང་ཅུང་ཟད་བཟུང་། ལུས་གནད་གཞོག་འཁྲེས་པ་སོགས་སྤང་ལ་ཤིན་ཏུ་དྲང་པོར་བསྲང་ནས། དམིགས་པ་ལ་འདྲིས་གོམས་ཡང་ཡང་བྱེད་པ་ནི་ལམ་དབང་ཐོད་རྒལ་དུ་ལེན་པའི་དགོངས་པ་ཞེས་བྱ་བའོ། །དེ་ལྟར་བཤད་པའི་ཉམས་ལེན་སྙིང་པོར་བྱས་ཏེ་ཡིག་འབྲུ་བཞི་ངག་བཟླས་ལ་ཡིད་མི་གཏོད་པར་དམིགས་པ་ལ་གོམས་འདྲིས་ནན་ཏན་བྱ། དམིགས་བསྒོམ་ཁོ་ན་ལ་འཛིན་པ་ཞུགས་པའི་ཉེར་ལེན་གཏད་སོ་ཅན་འབའ་ཞིག་ཀྱང་དོན་ཆུང་བས། བླ་མ་སངས་རྒྱས་དངོས་མཐོང་གི་མོས་གུས་བཟོད་མེད་དུ་བསྐྱེད་པ་ནི་ཉམས་ལེན་འདིའི་སྙིང་པོ་གཅིག་ཆོག་མར་ངེས་པའོ། །དེ་ལྟར་ཡང་རྗེ་ཕག་མོ་གྲུ་པ་རྡོ་རྗེ་རྒྱལ་པོས། བླ་མ་སྐུ་གསུམ་གྱི་གངས་རི་ལ། །མོས་གུས་ཀྱི་ཉི་མ་མ་ཤར་ན། །བྱིན་རླབས་ཀྱི་ཆུ་རྒྱུན་མི་འབྱུང་བས། །སེམས་མོས་གུས་འདི་ལ་ནན་ཏན་མཛོད། །ཅེས་གསུངས་པ་དང་། གཞན་ཡང་། བླ་མ་སངས་རྒྱས་བླ་མ་ཆོས། །དེ་བཞིན་བླ་མ་དགེ་འདུན་ཏེ། །བླ་མའི་སྐུ་གསུང་ཐུགས་ལ་འདུད། །ཅེས་གསུངས་པས་མཚོན་མདོ་རྒྱུད་བསྟན་བཅོས་ཐམས་ཅད་ནས་གནས་སྐབས་དང་མཐར་ཐུག་ཀུན་གྱི་བྱིན་རླབས་ཀྱི་འཇུག་སྒོ་བླ་མ་ཉིད་དུ་ཡང་ཡང་བསྔགས་པས་ན་དབང་བཞི་ལེན་པའི་ངོ་བོ་མོས་གུས་རྩེ་གཅིག་པས་སློང་ཤིང་བཟུང་བ་གལ་ཆེའོ། །མཐར་ནི་བླ་མ་ཉིད་ཤིན་ཏུ་བདག་ལ་བརྩེ་བས་དགྱེས་བཞིན་པའི་ངང་ནས་འདར་ཕྲི་ལི་ལི་འོད་ཀྱི་གོང་བུ་ཁ་དོག་ལྔ་འདྲེས་ཀྱི་ཐིག་ལེར་མེ་རེ་རེ་གྱུར། འོད་ཕུང་ཉིད་སྤྲིན་དཀར་གྱི་དུམ་བུ་ཆད་པ་ལྟར་ཞུ་ནས། རང་ཉིད་རྡོ་རྗེ་རྣལ་འབྱོར་མར་གསལ་བ་ལ་ལན་ཚྭ་ཆུར་ཞུ་བ་བཞིན་ཐིམ་པས་བླ་མའི་སྐུ་གསུང་ཐུགས་དང་རང་གི་སྒོ་གསུམ་དབྱེར་མེད་དུ་བྱིན་རླབས། ཐུགས་བདེ་གསལ་མི་རྟོག་པའི་ཡེ་ཤེས་ཆོས་ཉིད་བསམ་གྱིས་མི་ཁྱབ་པའི་ངོ་བོ་རང་གི་ཡིད་ཤེས་རིག་པ་རྗེན་སེང་ངེ་བ་དང་དབྱེར་མེད་དུ་འདྲེས་པའི་ངང་མདངས་ཐད་ཀར་སྤུ་མ་བརྗེ་མདོག་མ་བསྒྱུར་བར་ཅི་གནས་སུ་བསྐྱངས། ཅི་ཞིག་ན་སྟོན་འཁོར་གཉིས་དགོངས་པ་རོ་མཉམ་པའི་ཡེ་ཤེས་མཐའ་དབུས་དང་བྲལ་བའི་དགོངས་པ་རང་རིག་སྨྲ་བསམ་བརྗོད་བྲལ་ཆོས་སྐུ་ཡེ་གདོད་མ་ནས་རང་གནས་ཀྱི་གནས་ལུགས། རྒྱུ་རྐྱེན་གྱི་བྱ་རྩོལ་ལས་འདས་པས་ངོ་བོ་མ་བཅོས་ཀ་ནས་དག་པ། རང་བཞིན་གྱི་མཁྱེན་ཆ་གོ་མ་འགག་པར་འོད་གསལ་བའི་ཡེ་ཤེས་ལྷུན་གྱིས་གྲུབ་པ། ཟུང་འཇུག་རང་བབ་གཉུག་མ་ལྷུག་པའི་ངང་གཟོད་མ་ནས་འཕོ་འགྱུར་མེད་པ་ངང་བཞག་ཀུན་བཟང་དགོངས་པའི་ཀློང་དུ་རང་གྲོལ་གྱི་དོན་ཐུགས་ཡིད་གཅིག་འདྲེས་སུ་ལ་བཟླ་བ་ནི། ཨེ་མ་ཧོ་ཞེས་ངོ་མཚར་བར་ཆེད་དུ་བརྗོད་པའོ།།
ཐུན་མཚམས་ཀྱི་བྱ་བ།
གཉིས་པ་ཐུན་མཚམས་ཀྱི་བྱ་བ་ནི། འགྲོ་བའི་ཚེ་ཕྲག་པ་གཡས་ཀྱི་སྟེང་། གདན་པདྨ་དང་ཟླ་བའི་སྟེང་རྩ་བའི་བླ་མ་ཐོད་ཕྲེང་རྩལ་བསྒོམ་ལ་མོས་གུས་བསྐྱེད་དེ་གསོལ་བ་འདེབས། འདུག་པའི་ཚེ་སྤྱི་བོའི་སྟེང་གི་ནམ་མཁར་མདའ་གང་ཙམ་གྱི་གོ་སར་གདན་དང་བཅས་ཏེ་བླ་མ་བསྒོམ་ལ་དབང་བཞི་ལེན། བཟའ་བཏུང་གི་ཚེ་མགྲིན་པའི་དབུས་སུ་བསྒོམ་ལ་བཟའ་བཅའ་ཚོགས་འཁོར་དུ་བྱིན་གྱིས་བརླབས་ལ་འབུལ། ཉལ་བའི་དུས་སྙིང་དབུས་པདྨ་འདབ་བཞི་བའི་ལྟེ་བར་འོད་དུ་ཞུ་སྟེ་ཚོན་གང་ཙམ་དུ་གསལ་བ་ལ་སེམས་འཛིན། གང་སྣང་བ་ཐམས་ཅད་རྔ་ཡབ་དཔལ་གྱི་རི་བོ་དང་། དཔའ་བོ་དང་རྣལ་འབྱོར་མ། སྒྲ་གྲགས་ཚད་བཛྲ་གུ་རུའི་ཛཔ྄་དབྱངས། དྲན་རྟོག་འགྱུ་བ་གང་ཤར་ཐམས་ཅད་རང་གྲོལ་བྱ་ལམ་རྗེས་མེད། རྐྱེན་ངན་གློ་བུར་བ་དང་འཕྲད་ཚེ་འཕྲིག་མི་ཚུད་པ་མི་རྒན་གྱིས་བྱིས་པའི་རྩེད་མོ་ལ་ལབ་ཟླ་བོར་བ་ལྟ་བུ། སྐྱིད་སྣང་དང་དགའ་ཚོར་བྱུང་ཚེ་ཞེན་བློ་མེད་པ་སྨྱོན་པས་བདག་བཟུང་བྲལ་བ་ལྟ་བུ། མདོར་ན་སྤྱོད་ལམ་ཀུན་ཏུ་བློ་སྣ་བླ་མ་ལ་གཏོད་པ་དང་འབྲལ་བ་མེད་པར་བྱའོ།།
ཐུན་གྱི་སྔོན་འགྲོས་བློ་སྦྱོང་བ།
ཐུན་གྱི་སྔོན་འགྲོས་བློ་སྦྱོང་བ་ནི། བདེ་བའི་སྟན་ལ་བག་ཕབ། ལུས་སེམས་ཁོང་ལྷོད། རླུང་རོ་དགུ་ཕྲུག་ཏུ་བསལ་ལ་དབུགས་ཕྱམ་ལ་ཕབ། དྲན་པ་མངོན་དུ་བཞག་ནས་བླ་མའི་རྣལ་འབྱོར་གྱི་ཁྲིད་གཞུང་ནས་བཤད་པ་བཞིན་དོ་གལ་ཆེན་པོས་ཉམས་སུ་བླང་ངོ་། །དེ་ཡང་རྩ་བ་མོས་གུས་དཀར་པོ་ཆིག་ཐུབ་ལ་རག་ལས་པས་བྱིན་རླབས་རྒྱུད་ལ་ཐོབ་པ་ཞིག་བརྩོན་པ་ཤིན་ཏུ་གལ་ཆེའོ། །ལམ་དེ་དག་གི་རྗེས་སུ་བསྔོ་བ་ནི། ཨེ་མ་ཧོ་ཞེས་ཐབས་རྨད་དུ་བྱུང་བའི་བྱེད་ལས་ཀྱི་ཚུལ་ལ་ངོ་མཚར་ནས་བསྔོ་བྱ་བདག་གི་ལུས་ངག་ཡིད་གསུམ་པོའི་སྒོ་ནས་བརྩོན་པའི་དགེ་བའི་ཚོགས། དུས་གསུམ་དུ་བྱས་ཤིང་བསགས་པའི་ལེགས་བྱས་རྣམ་དཀར་མ་ལུས་པ་ཀུན། སྔོ་བྱེད་ཆོས་ཐམས་ཅད་ཀྱི་གནས་ལུགས་མཚན་མའི་རྟོག་པ་མཐའ་དག་དང་བྲལ་བའི་སྟོང་པ་ཉིད་དུ་མཉམ་པར་བཞག་པ་ལས་རང་གདངས་འགག་མེད་སྙིང་རྗེའི་རྣམ་པར་དུང་ངེ་ཤར་བ་སེམས་ཅན་གྱི་ཁམས་ལ་རྗེས་སུ་ཆགས་པས་ཀུན་ནས་བསླང་སྟེ། ལུས་ཅན་སེམས་ཅན་ཐམས་ཅད་ཀྱི་སྡུག་བསྔལ་རྒྱུ་དང་བཅས་པ་ཡོངས་སུ་བྱང་། འབྲས་བུ་གཏན་བདེ་བླ་ན་མེད་པའི་ཕན་པ་རྒྱ་ཆེན་པོ་ངེས་པར་ཐོབ་བྱེད་ཀྱི་རྒྱུའམ་རྩ་བར་ཟག་མེད་ཆོས་ཀྱི་དབྱིངས་སུ་མི་བསྔོ་བའི་ཚུལ་གྱིས་ཆོས་ཉིད་སྐྱེ་བ་མེད་པ་དང་འགག་པ་མེད་པ། བློ་བྲལ་དམ་པའི་ངོ་བོ་རྟོགས་པའི་རྒྱུ་མཐུན་པས་བསྔོ་བའི་ཡུལ་མཐའ་ཡས་པའི་འགྲོ་ཀུན་སངས་རྒྱས་ཐོབ་ཕྱིར་བསྔོའོ། །དེ་ལྟར་བསྔོས་པ་ལས་བྱུང་བའི་མཐུས། མཉམ་ཉིད་སྐུ་གསུམ་གྱི་གོ་འཕང་རིང་པོར་མི་འགྱང་བར་མྱུར་དུ་ཐོབ་པར་ཤོག་ཅིག །