རྒྱལ་སྲས་གཞན་ཕན་མཐའ་ཡས་ལ་བསྟོད་པ་སྐྱེ་བ་ལྔ་བའི་དུང་དཀར་སྒྲ་སྙན།
༈ རྒྱལ་སྲས་གཞན་ཕན་མཐའ་ཡས་ལ་བསྟོད་པ་སྐྱེ་བ་ལྔ་བའི་དུང་དཀར་སྒྲ་སྙན་ཞེས་བྱ་བ་བཞུགས།
ཀ་མ་ཤཱི་ལས་ལྟ་ངན་ཚར་བཅད་བཞིན། །ཁ་ལྟ་སྟོང་སྐད་ལོག་ཆོས་སུན་འབྱིན་ཕྱིར། །ག་དར་སྤྱོད་གཙང་འདུལ་ཁྲིམས་ལྷུར་མཛད་པའི། །ང་ཡི་བླ་མ་རྒྱལ་བའི་སྲས་པོར་བསྟོད། །ཅ་ཅོའི་ཚིག་མིན་གཞ༵ན་ཕ༵ན་ཁོ་ན་གཉེར། །ཆ་ཙམ་གཞལ་དཀའི་མཐ༵འ་ཡ༵ས་རྒྱུད་དོན་རྟོགས། །ཇ་ཧོང་ངུར་སྨྲིག་འདུས་སྡེའི་སྲོག་ཤིང་མཆོག །ཉ་ཏོག་རྒྱལ་མཚན་ཟིལ་གྱིས་གནོན་ལ་བསྟོད། །ཏ་ཐཱ་ག་ཏའི་བདེན་གསུང་དཔང་བཞག་ནས། །ཐ་དག་འགྲོ་ལ་ཡང་དག་ལམ་བཟང་སྟོན། །ད་ལྟ་ཐུབ་དབང་མཛད་པའི་ངོ་མཚར་ཅན། །ན་རཀ་སྐྱབས་གཅིག་འགྲོ་བའི་མགོན་པོར་བསྟོད། །པ་ཏྲ་སྤོས་རྒྱ་ཇི་བཞིན་རྒྱ་སོག་གིས། །ཕ་རོལ་མཐའ་ནས་བསྐོར་བའི་གངས་ལྗོངས་འདིར། །བ་དན་གྲགས་དཀར་གཡོ་བའི་རྡོ་གྲུབ་རྗེས། །མ་ཡི་བུ་བཞིན་སྲས་ཀྱི་ཐུ་བོར་བསྟོད། །རྩ་ཐིག་རླུང་སོགས་བསྐྱེད་རྫོགས་མཐར་ཕྱིན་ནས། །ཚ་གྲང་དཀའ་བ་མ་སྤྱད་གྲུབ་མཆོག་བརྙེས། །ཛ་ཡའི་དགོངས་དོན་མདོ་རྒྱུད་སྨིན་གྲོལ་ལུང་། །ཝ་ཆུའི་རྒྱུན་ལྟར་གདུལ་བྱར་སྩོལ་ལ་བསྟོད། །ཞྭ་སེར་གྲུབ་མཐས་སྙེམས་ཀུན་སྤ་བཀོང་ཞིང་། །ཟ་ཆོག་དམར་མཆོད་སྡིག་པའི་སྲོལ་ངན་བཅད། །འ་འེ་དབྱངས་རོལ་ཙམ་མིན་འཆད་རྩོད་རྩོམ། །ཡ་མཚན་མཁས་པའི་རྣམ་ཐར་སྐྱོང་ལ་བསྟོད། །རྭ་རྨིག་ཅན་གྱི་དུད་འགྲོ་གསོག་མིན་ཀྱང་། །ལ་ལུང་མཁས་གྲུབ་གདམས་པའི་ནོར་གྱིས་ཕྱུག །ཤ་ཆང་ཟས་ཀྱིས་འཁོར་མང་བསྡུས་མིན་ཀྱང་། །ས་གསུམ་སྐལ་བཟང་འདུན་པ་གཅིག་པུར་བསྟོད། །ཧ་ལ་དུག་ལྔ་སྤང་བསྒྱུར་ལམ་དུ་འཁྱེར། །ཨ་ཏིའི་ལམ་སྟེགས་སྡོམ་པ་གསུམ་གྱི་གཞུང་། །འཛམ་གླིང་མཛེས་རྒྱན་ཀླུ་དབང་བཞེད་སྲོལ་བཞིན། །འཕྱུག་མེད་རྒྱལ་བསྟན་རྩ་ལག་ཁྱོད་ལ་བསྟོད། །མཉམ་མེད་རྒྱལ་བསྟན་རིན་པོ་ཆེར། །ཚུལ་བཞིན་བྱ་བ་བྱེད་མཁས་པའི། །རྒྱལ་སྲས་གཞན་ཕན་མཐའ་ཡས་ལ། །དོན་བསྟོད་རྒྱ་སྤྲུལ་མིང་གིས་སོ།། ཤུ་བྷཾ།