ཚོགས་གླུའི་ཀ་ཕྲེང་།
༈ ཚོགས་གླུའི་ཀ་ཕྲེང་བཞུགས།
ཀ་དག་གཉུག་མའི་གནས་ལུགས་རྗེན་པ་རུ་སྟོན་པའི། །ཁ་བ་ཅན་གྱི་སྐྱབས་མགོན་པད་འབྱུང་དེ་དྲན་བྱུང་། །ག་དར་དངས་མའི་མཁའ་ལ་འཇའ་སྤྲིན་གྱི་དབུས་སུ། །ང་ཡི་ཚོགས་གྱི་གཙོ་བོར་བླ་མ་རུ་མཛོད་ཅིག །ཅ་ཅོ་ཐ་མལ་སྒྲ་མིན་ཌཱཀྐི་ཡི་བརྡ་སྐད། །ཆ་ལུགས་བཅོས་མ་མ་ཡིན་ཤུགས་འབྱུང་གི་སྤྱོད་པ། །ཇ་ཆང་དངོས་འཛིན་བྲལ་བའི་བདུད་རྩི་ཡི་ཚོགས་རྫས། །ཉ་གང་ཟླ་བཞིན་འབུལ་ན་དགྱེས་པ་རུ་བཞེས་ཤིག །ཏ་ཐཱ་ག་ཏའི་བསྟན་ཞུགས་འདུས་པ་ཡི་སྤུན་གྲོགས། །ཐ་མལ་སྐྱེ་བོ་འབུམ་གྱིས་འགྲན་ཟླ་དང་བྲལ་ཡང་། །ད་ལྟ་ཉམས་ལེན་གཅིག་དྲིལ་རྫོགས་ཆེན་ལ་ཞུགས་དང་། །ན་རྒ་འཆི་ཡང་འགྱོད་བྲལ་ཐར་ལམ་དེར་ཟིན་ཡོང་། །པ་ར་མི་ཏའི་རིང་ལམ་བསྐལ་མང་ལ་ལྟོས་མིན། །ཕ་རོལ་མིག་འཕྲུལ་ལྟ་བུའི་གསང་ཆེན་གྱི་ཉེ་ལམ། །བ་དྭགས་སྲོག་དང་འབྲེལ་བར་གདན་ཐོག་འདིར་སྒྲུབས་དང་། །མ་འོངས་སྒུག་ཡུན་མི་དགོས་སངས་རྒྱས་དེ་ཐོབ་ཡོང་། །ཙ་རི་ཏྲ་དང་འདྲ་བའི་སྒྲུབ་ཁང་དེ་གཞལ་ཡས། །ཚ་གྲང་དཀའ་སྤྱད་མི་དགོས་རང་སེམས་དེ་ལྷ་སྐུ། །ཛ་ཡ་རྒྱལ་བའི་རྒྱལ་ཚབ་དྲིན་ཆེན་གྱི་བླ་མ། །ཝ་ཆུའི་རྒྱུན་བཞིན་དངོས་གྲུབ་ལག་མཐིལ་དུ་སྩོལ་ཤོག །ཞྭ་བཞིན་པདྨ་ཐོད་ཕྲེང་སྤྱི་བོ་རུ་བསྒོམ་ནས། །ཟ་བྱེད་བདུད་སྡེའི་གཡུལ་འཇོམ་ཡི་དམ་ལྷར་བསྙེན་ན། །འ་འོལ་བར་ཆད་ན་བུན་མཁའ་དབྱིངས་སུ་དེང་འགྲོ། །ཡ་མཚན་གྲུབ་པའི་ཉི་མ་སྙིང་དབུས་ནས་འཆར་ཡོང་། །ར་བ་གངས་རིའི་མངའ་བདག་ཚངས་པ་ཡི་མེ་ཏོག །ལ་ལ་ཙམ་མིན་སྐྱེ་འགྲོ་ཐམས་ཅད་ཀྱི་སྐྱབས་གཅིག །ཤ་ཟ་གདོང་དམར་བོད་ཡུལ་སྲིན་པོ་ཡི་ཚོགས་ཀྱང་། །ས་བཅུ་ལམ་ལྔར་བཀོད་པའི་བཀའ་དྲིན་དེ་དྲན་བྱུང་། །ཧ་ལ་དུག་ལྔའི་ལྕགས་ཁམས་སྲ་མཁྲེགས་ཀྱི་རང་བཞིན། །ཨ་དོན་གསེར་འགྱུར་དངུལ་ཆུའི་སྦྱོར་བ་རུ་ཞུགས་དང་། །ཁམས་གསུམ་ཆོས་ཀྱི་རྒྱལ་པོ་ཨོ་རྒྱན་གྱི་སངས་རྒྱས། །དགྱེས་པའི་ཞལ་བཟང་ཟངས་མདོག་དཔལ་རི་ནས་སྟོན་ཡོང་། །མོས་གུས་མཚོ་ལས་འཁྲུངས་པའི་བྱིན་རླབས་ཀྱི་སྤྲིན་ཕུང་། །འདིར་འདུས་སྐལ་ལྡན་ཚོགས་ཀྱི་ཡིད་མཁའ་ལ་འཁྲིགས་ནས། །གྲུབ་གཉིས་འདོད་པ་འཇོ་བའི་དངོས་གྲུབ་ཀྱི་སྦྲང་ཆར། །བསྟན་འགྲོའི་དཔལ་དུ་འགྱུར་བའི་རྟེན་འབྲེལ་ཞིག་ཞུའོ།།