ཆོས་དང་མཐུན་པའི་གཏམ་གྱིས་གདམས་པའི་ཀ་ཕྲེང་།
༈ ཆོས་དང་མཐུན་པའི་གཏམ་གྱིས་གདམས་པའི་ཀ་ཕྲེང་བཞུགས་སོ།།
ཀ་དག་གི་དོན་སྟོན་བླ་མ་ལ། །ཁ་ཞེ་གཉིས་མེད་པར་སྙིང་ནས་འདུད། །ག་ལེ་གྱིས་སེམས་འདི་གནད་ལ་ཕོབས། །ང་རང་ཚོ་སྣང་བ་ཨེ་འཁྲུལ་ལྟོས། །ཅ་རེ་ཡི་ལྕགས་ཀྱུ་གཡོ་བ་དེ། །ཆ་ལུགས་ལ་བལྟས་ན་ལྷ་མོ་འདྲ། །ཇ་ཆང་དང་བཟང་དགུས་ལོངས་སྤྱོད་དེ། །ཉ་མོ་དང་ལྕགས་ཀྱུ་འཕྲད་པ་འདྲ། །ཏ་ལེ་རུ་ཤར་བའི་ཉི་མ་བཞིན། །ཐ་མལ་གྱི་ཤེས་པ་འོད་དུ་གསལ། །ད་ལྟ་རུ་ལྷ་ཆོས་མ་བསྒྲུབ་ན། །ན་ཚ་དང་འཆི་བ་ཅིས་ཀྱང་འོང་། །པ་སངས་ལྟར་ཁ་དོག་དཀར་ན་ཡང་། །ཕ་ཝང་ལྟར་སེམས་ལ་ཆོས་མི་དྲན། །བ་ལང་ལྟར་བླུན་པོའི་རྫུ་བག་ཅན། །མ་རྒན་དེ་མགོ་སྐོར་མ་བྱེད་ཨཾ། །ཙ་ར་ར་ཁྲག་གི་མཆི་མ་འབེབས། །ཚ་གྲང་གི་སྡུག་བསྔལ་བཟོད་མི་ནུས། །ཛ་བྷྱོ་ཡི་སྔགས་དེས་མི་ཕན་དུས། །ཝ་སྐྱེས་བཞིན་ངན་འགྲོར་ལྷུང་ད་རེ། །ཞྭ་གོས་དང་ལྷམ་བྲལ་ཤ་གཟུགས་དེས། །ཟ་བྱེད་ཀྱི་གཤིན་རྗེའི་མདུན་ས་རུ། །འ་འོལ་གྱི་རྫུན་ཚིག་སྨྲས་ན་ཡང་། །ཡ་རེ་ཆ་ཕན་པ་མི་འདུག་གོ། །ར་བ་དང་བྲལ་བའི་སྒྱུ་མའི་ནོར། །ལ་ལུང་དུ་འཚོ་སྐྱོང་བྱས་བྱས་ཀྱང་། །ཤ་ཁྲག་དང་བྲལ་བའི་བར་དོ་རུ། །ས་ལམ་གྱི་གེགས་སུ་གྱུར་ལ་ལྟོས། །ཧ་ཧ་ཡི་གད་མོ་ཆེར་འཆོར་བའི། །ཨ་མཚར་དུ་སྨྲས་ལ་དོན་ཀྱང་ཡོད། །ཧ་ལམ་གྱི་ཆོས་དང་མཐུན་པའི་གཏམ། །ཨ་ལ་ལ་གྲོགས་ཀྱིས་དོན་རྟོགས་ཤོག།