བཛྲ་མངྒ་ལ་གདམས་པའི་ཀ་ཕྲེང་།
༈ བཛྲ་མངྒ་ལ་གདམས་པའི་ཀ་ཕྲེང་བཞུགས།
ཀ་ཡེ་ལེགས་པར་གསོན་དང་ཙིཏྟའི་ཟླ་གྲོགས། །ཁ་ཞེ་གཉིས་སུ་མེད་པར་བྱང་ཆུབ་འདོད་ན། །ག་དར་རིག་པའི་རང་ཞལ་རྗེན་པར་ལྟོས་དང་། །ང་བདག་འཁྲུལ་བའི་རྫུན་ཕུག་ཞིག་ནས་འདུག་གོ །ཅ་རེ་ཟུར་མིག་མཛེས་མའི་ཟླ་གྲོགས་ལེགས་ཀྱང་། །ཆ་མེད་བར་དོའི་སྐྱབས་གནས་བླ་མར་བསྟེན་དགོས། །ཇ་དར་ལོངས་སྤྱོད་འཛོམས་པའི་སྣང་བ་སྐྱིད་ཀྱང་། །ཉ་ལྟར་སྒྲེན་མོར་འགྲོ་ཚེ་གདམས་ངག་ཡོད་དགོས། །ཏ་ཐཱ་ག་ཏའི་བསྟན་ལ་གུས་འདུན་ཡོད་ཀྱང་། །ཐ་མལ་འཁོར་བའི་ཆོས་ལ་ངེས་འབྱུང་སྐྱེས་དགོས། །ད་ལྟ་གཞོན་ནུའི་དུས་སུ་ཅི་བྱས་ཆོག་ཀྱང་། །ན་རྒ་འཆི་བས་མནར་ཚེ་འགྱོད་མེད་ཅིག་དགོས། །པ་ཏྲའི་རྗེས་སུ་འགྲོ་བའི་གཡོ་སྒྱུར་མཁས་ཀྱང་། །ཕ་རོལ་གཤིན་རྗེའི་དྲུང་དུ་བདེན་རྫུན་འབྱེད་དགོས། །བ་ལང་གསེར་མདོག་ངོམ་པའི་ན་བཟའ་མཛེས་ཀྱང་། །མ་རུང་དུག་ལྔས་གདུང་ཚེ་གཉེན་པོ་བརྟེན་དགོས། །ཙ་མ་ར་ལྟར་ཁེངས་སེམས་མཁའ་དང་མཉམ་ཡང་། །ཚ་གྲང་སྡུག་བསྔལ་སོམས་ལ་བློ་སྦྱོངས་ཞིག་དགོས། །ཛ་ཡ་རྒྱལ་བའི་རྗེས་འཇུག་ཡིན་པར་རློམས་ཀྱང་། །ཝ་འདྲའི་སྐྱེ་བོ་ཕལ་གྱིས་མི་ཁྲེལ་ཙམ་དགོས། །ཞྭ་གོས་ལྷམ་སོགས་མཛེས་པས་སྒེག་མོ་འདར་ཡང་། །ཟ་བྱེད་འཆི་བདག་བྱུང་ཚེ་ངེས་པར་སྐྱུར་དགོས། །འ་འོལ་སྒྱུ་མའི་ཆོས་ལ་རྟག་འཛིན་བྱས་ཀྱང་། །ཡ་མ་བརླ་རུ་འདུག་པས་སྙིང་པོ་ལེན་དགོས། །རྭ་ལྟར་གྱོང་བའི་རང་རྒྱུད་ངན་པར་ཤེས་ཀྱང་། །ལ་ལུང་ཉུལ་བའི་དྲེད་པོར་སོང་བ་གོ་དགོས། །ཤ་ཁྲག་ཕུང་པོ་འཇའ་ལུས་ཐོབ་པར་སྨོན་ཀྱང་། །ས་ལམ་སྦྱང་ནས་འབྱོང་བ་ཡིད་ལ་ངེས་དགོས། །ཧ་ཧ་སྤྲང་པོའི་ངག་ནི་བྱུང་རྒྱལ་ཡིན་ཀྱང་། །ཨ་ཧོ་གྲོགས་པོས་རྟོག་དང་བདེན་པར་ཨེ་འདུག །དགོས་རྒྱུའི་རྒྱུ་མཚན་ཤེས་ཀྱང་རྒྱུད་ལ་མ་འབྱོར། །ནད་པས་སྨན་སྐྱལ་ཐོག་འདྲའི་སྤྲུལ་མིང་དེས་སྨྲས། །མི་ངན་ཚིག་གི་རྦབ་ནི་མཐོ་དམན་ཀུན་ལ། །ཕོག་པ་ཡིན་པས་དེ་དང་ངེས་པར་མཚུངས་མོད། །ལྷག་བསམ་གངས་རིའི་རྒྱུན་ལ་དྲངས་པའི་ཕན་ཚིག །སྨན་ལྟར་ལེགས་པ་འཐུང་དང་སྙིང་པོ་འབྱུང་ངོ་།། ཞེས་བཛྲ་མངྒ་ལ་ཕུལ་ལོ།།