སོ་སོར་གདམས་པའི་ཀ་ཕྲེང་ཐ་མ།

༈ སོ་སོར་གདམས་པའི་ཀ་ཕྲེང་ཐ་མ་བཞུགས།

ཀ་ཡེ་ལེགས་པར་གསོན་དང་ལས་འབྲེལ་གྱི་ཟླ་གྲོགས། །ཁ་ཏ་ཚིག་གསུམ་ཞུ་ཡི་སྙིང་ནོར་དུ་མཛོད་ཅིག །ག་ལེ་ཕྱི་བཤོལ་མ་མཛད་ལྷ་ཆོས་ཤིག་མཛོད་ལ། །ང་ཅག་དམ་པའི་སྐྱེས་བུའི་བཞུགས་གྲལ་ལ་སྙོགས་ཤིག །ཅ་རེ་ཟུར་མིག་མཛེས་མའི་འཛུམ་མདངས་དེ་ལེགས་ཀྱང་། །ཆ་མེད་བར་དོའི་འཕྲང་ལ་འགྲོགས་དབང་ནི་མི་སྣང་། །ཇ་དར་ལོངས་སྤྱོད་འཛོམ་པ་རྨི་ལམ་གྱི་འབྱོར་བས། །ཉ་མོ་ལྕགས་ཀྱུས་བཟུང་འདྲ་ངན་སོང་ལ་འཕེན་ངེས། །ཏ་ལའི་ནགས་ཚལ་འཐུག་པོའི་འཁོར་བ་ཡི་གྲོང་ཁྱེར། །ཐ་ཆད་སྡིག་པའི་གྲོགས་ཀྱི་སྤྲེའུ་དང་འགྲོགས་ན། །ད་ལྟ་ཕྱི་མར་ཕུང་བའི་ངན་སྤྱོད་ཞིག་འགོས་ནས། །ན་རཀ་ས་བོན་བྱེད་སྙམ་དོགས་ཟིན་ཞིག་མཛད་འཚལ། །པ་སངས་བཞིན་སྡུག་ངོམ་པའི་བཀྲག་མདངས་ལ་ལྟོས་དང་། །ཕ་རིའི་མེ་ཏོག་བཞིན་དུ་སྙིང་པོ་ནི་མི་འདུག །བ་ཐག་སྲོག་དང་བསྡོས་ནས་ཁྱིམ་ཐབས་ལ་འབད་ཀྱང་། །མ་རུང་གཤིན་རྗེས་ཁྲིད་ཚེ་ཕན་མེད་ལ་སོམས་ཤིག །ཙ་ལག་གཉེན་འདུན་མང་ཡང་གཅིག་པུ་རུ་འགྲོ་དགོས། །ཚ་ཞང་གསུར་ལ་རེ་ཚེ་བྱ་སྒྲོ་དང་རླུང་ཁྱེར། །ཛ་ཧཱུྃ་བཾ་ཧོས་བཀུག་ཀྱང་ཤོག་བྱང་གི་གཟུགས་ལ། །ཝ་ལེར་གནས་པར་འདུག་གམ་བསམ་མནོ་ཞིག་ཐོངས་ཤིག །ཞྭ་གོས་རྒྱན་ཆས་སྤུད་ཀྱང་བེམ་སྟོང་ནི་མེར་བསྲེགས། །ཟ་བྱེད་དྲུང་ན་གནས་པའི་རྣམ་ཤེས་ཀྱི་སྟེང་དུ། །འ་འོལ་འཁྲུལ་སྣང་འཇིགས་པའི་སྡུག་བསྔལ་ཞིག་བབ་ཚེ། །ཡ་ང་ཕྲག་དོག་བྱས་ཀྱང་ཕན་མེད་ལ་སོམས་ཤིག །ར་གན་གསེར་དུ་བརྫུ་བའི་བླ་གཟུགས་ཤིག་བྱས་ན། །ལ་ལུང་ཚེ་འདས་ཕོ་མོའི་འདྲེན་སྟོན་ལ་ཕེབས་ནས། །ཤ་ཐུད་དཀོར་རྫས་ཞིམ་ཀྱང་རྣམ་སྨིན་གྱི་རྩུབ་རེག །ས་ཚུགས་མེད་པར་འགྲོ་ཚེ་རང་ཐོག་ལ་སྨིན་ངེས། །ཧ་ལ་དུག་ལྔས་བསྡམས་པའི་སྤྲང་ཆུང་གི་གཏམ་འདི། །ཨ་དོན་སྐྱེ་མེད་སྒོམ་པའི་མཐུན་གྲོགས་ལ་ཤོད་ཅིག།