རང་དང་མཛའ་བའི་གྲོགས་སྐྱ་སེར་རྣམས་ལ་འབེལ་བའི་གཏམ་གཟུ་བོའི་ལམ་སྟོན།
༈ རང་དང་མཛའ་བའི་གྲོགས་སྐྱ་སེར་རྣམས་ལ་འབེལ་བའི་གཏམ་གཟུ་བོའི་ལམ་སྟོན་ཞེས་བྱ་བ་བཞུགས།
ཀ་དག་རང་རིག་རྟོགས་ན་གཏན་ཆུས་འགྲུབ། །ཁ་དོན་བཟླས་བརྗོད་བརྩོན་ན་ཡ་རབས་སྲོལ། །ག་དར་དམ་སྡོམ་བསྲུང་ན་བཙུན་པའི་མཆོག །ང་རྒྱལ་རང་མཐོང་མ་ཆེ་ཆོས་ཤིག་སྒྲུབས། །ཅ་ཅོའི་ཁ་ཤག་རྩོད་ན་ཚོགས་ངན་འགྲུབ། །ཆ་ལུགས་སྐྱ་ཆས་བྱས་ན་མ་རབས་སྲོལ། །ཇ་ཆང་ཞིམ་ལྟོ་གཉེར་ན་ལྟོག་འགོང་མཆོག །ཉ་མའི་འདོམ་ལ་མ་དགའ་ཆོས་ཤིག་སྒྲུབས། །ཏ་ཐཱ་ག་ཏའི་བསྟན་ཞུགས་ཐར་ལམ་འགྲུབ། །ཐ་ཆད་སྡིག་གྲོགས་སྤངས་ན་དམ་པའི་སྲོལ། །ད་ལྟ་ཀུན་དང་མཐུན་ན་མི་ཡི་མཆོག །ན་གཞོན་རྩེ་དགོད་མ་སྐྱེན་ཆོས་ཤིག་སྒྲུབས། །པ་པཾ་སྡིག་ལ་སྤྲོ་ན་དམྱལ་བ་འགྲུབ། །ཕ་རོལ་སེམས་རྒྱུད་དཀྲུགས་ན་མི་ངན་སྲོལ། །བ་གམ་བྲག་ལ་སྒོམ་ན་ཆོས་པའི་མཆོག །མ་རབས་སྲོལ་ལ་མ་ཞེན་ཆོས་ཤིག་སྒྲུབས། །ཙ་རི་གནས་ཆེན་བསྐོར་ན་དོན་ཆེན་འགྲུབ། །ཚ་གྲང་དཀའ་སྤྱད་ནུས་ན་ཡང་དག་སྲོལ། །ཛ་ཡའི་བཀའ་དང་མཐུན་ན་བླ་མའི་མཆོག །ཝ་ལྟར་གྲོང་ནག་མ་ཉུལ་ཆོས་ཤིག་སྒྲུབས། །ཞྭ་གོས་ལྷམ་གསུམ་འབྱོར་ན་འདུག་ཆུས་འགྲུབ། །ཟ་མ་ཐེབ་ཆགས་མེད་ན་ཁྱིམ་ཆེན་སྲོལ། །འ་འུར་འཛིང་རྩོད་སྤང་ན་གཟའ་ཚང་མཆོག །ཡ་མེད་བུ་ལོན་མ་དགའ་ཆོས་ཤིག་སྒྲུབས། །ར་བ་ནོར་རྫས་བསགས་ན་འབྱོར་ལྡན་འགྲུབ། །ལ་ལུང་གྲོགས་དང་མཐུན་ན་མི་བཟང་སྲོལ། །ཤ་ཆང་ལོག་སེམས་ཚོད་ཟིན་སྐྱ་རྒྱུད་མཆོག །ས་ངན་མི་ལ་མ་ལྟ་ཆོས་ཤིག་སྒྲུབས། །ཧ་ཅང་བཤད་རྒྱུ་མང་ན་ཁ་མཆུ་འགྲུབ། །ཨ་རག་ཆང་རྩིས་ཆེ་ན་མདོ་ཤོར་སྲོལ། །ཧ་ལམ་དམན་ས་བཟུང་ན་བག་ཡོད་མཆོག །ཨ་རོགས་རང་རྩིས་མ་ཆེ་ཆོས་ཤིག་སྒྲུབས། །ཞེས་རང་ལ་བཟང་པོའི་ཡོན་ཏན་སྣ་གཅིག་མེད་པར་སྨྱོན་པ་ལམ་དུ་ཞུགས་པ་ལྟ་བུའི་དཀོར་རྒན་རྒྱ་སྤྲུལ་གྱིས་སྨྲས་པའོ།།