ཚེས་བཅུའི་དུས་དྲན་གསོལ་འདེབས་བསྡུས་པ།

༄༅། ཚེས་བཅུའི་དུས་དྲན་གསོལ་འདེབས་བསྡུས་པ་བཞུགས། ཨེ་མ་ཧོ། ངོ་མཚར་རྒྱལ་བའི་མཛད་པ་མཐའ་ཡས་ལ། །དབང་བསྒྱུར་བཅུ་གཉིས་ཟླ་བའི་ཚེས་བཅུ་རེར། །སྐུ་བལྟམས་སྲིད་བཟུང་སྤངས་དང་རབ་ཏུ་བྱུང་། །མེར་བསྲེགས་ཆུར་བསྒྱུར་མུ་སྟེགས་ཐོག་གིས་བསྒྲལ། །ཆུ་ལ་བསྐྱུར་བ་མཁར་གཤེགས་དུག་གི་ཟས། །ཟག་མེད་བདུད་རྩིར་བསྒྱུར་ནས་བལ་བོད་ཀྱི། །ལྷ་འདྲེ་དམ་བཏགས་མཐའ་དབུས་གཏེར་གྱིས་བཀང་། །སྲིན་པོའི་ཁ་གནོན་འཛམ་གླིང་བོད་ཡུལ་འདིར། །བཀའ་དྲིན་བསམ་ཡས་པདྨ་འབྱུང་གནས་ལ། །གསོལ་བ་འདེབས་སོ་ནད་གདོན་འཇིགས་བརྒྱད་ཞི། །ཚེ་བསོད་དཔལ་འབྱོར་གོང་འཕེལ་འབྲེལ་ཚད་འགྲོ། །བདེ་ཆེན་ཞིང་དུ་དྲོངས་ཤིག་ཐུགས་རྗེ་ཅན།། ཅེས་པའང་འདུ་ཤེས་གསུམ་པ་རྒྱ་སྤྲུལ་པས་སྨྲས་པ་དགེའོ།།