ཞལ་གདམས་མན་ངག་ཀུན་འདུས།
༈ ཞལ་གདམས་མན་ངག་ཀུན་འདུས་བཞུགས། རྒྱལ་ཀུན་མཁྱེན་བརྩེའི་ནུས་མཐུ་ཆ་མཉམ་པ། །གངས་ཅན་འགྲོ་ལ་བཀའ་དྲིན་རྨད་བྱུང་བའི། །མཚོ་སྐྱེས་རྡོ་རྗེའི་ཞལ་སྐྱིན་དམ་པའི་མཆོག །གྲུབ་དབང་རྫོགས་ཆེན་བླ་མར་སྙིང་ནས་འདུད། །ཐུབ་གསུང་ཟབ་རྒྱས་ཆོས་ཀྱི་ཆུ་ཀླུང་ཀུན། །ཁྱོད་ཐུགས་མཁྱེན་པའི་རྒྱ་མཚོར་རོ་གཅིག་ཀྱང་། །མཁས་པའི་མི་ལ་དྲན་གསོ་ཇི་བཞིན་དུ། །སྤྱི་བརྟོལ་བསྐྱེད་དེ་གསུང་ལན་ཉུང་ངུར་ཞུ། །སྔོན་བསགས་བསོད་ནམས་ལྡན་པ་དམ་པའི་རིགས། །ལུགས་ཟུང་ཆོས་ལ་མཁྱེན་པའི་སྤྱན་རས་རྒྱས། །མཁའ་ལྟར་ཡངས་པས་རྐྱེན་ངན་གང་ཡང་བཟོད། །ཁྱོད་འདྲའི་རྣམ་འདྲེན་ནོར་བུའི་རྒྱལ་དང་མཚུངས། །འོན་ཀྱང་རང་རེ་དམ་སེལ་མེད་པ་དང་། །ཆུང་ནས་འདྲིས་ཤིང་ཁ་སེམས་མཐུན་པའི་ཕྱིར། །གཡོ་སྒྱུའི་ཚིག་གིས་ཟོལ་བསྟོད་མི་བྱ་བར། །ཐད་ཀའི་གཏམ་གྱི་གླེང་མོ་འདི་བཞིན་ཐལ། །མང་ཡང་ཆོས་ཀྱི་རྣམ་གྲངས་སྐར་ཚོགས་འདྲ། །འདི་ཡི་ཕ་མཐའ་ཆོད་པ་བརྒྱ་ལམ་ཙམ། །དགོས་དགོས་འཇིག་རྟེན་བྱ་བ་ཆུ་རླབས་འདྲ། །འདི་ཀུན་ཕུན་སུམ་ཚོགས་པ་ཨུ་དུམ་ཝར། །མཛེས་མཛེས་གཞོན་པའི་ལང་ཚོ་ནམ་མཁའི་འཇའ། །འདི་ལ་སྙིང་པོ་འདོད་པ་བྱིས་པའི་བློ། །བདེན་བདེན་སྒྱུ་མའི་ནོར་རྫས་བུང་བའི་རྩི། །ཅི་ཙམ་གཅེས་པར་བཟུང་ཡང་ཤུལ་དུ་ལུས། །འཁྲུལ་སྣང་ཚེ་འདིའི་ཆེ་མཐོ་སྙན་གྲགས་སོགས། །འབད་པས་བསྒྲུབ་ཀྱང་ཕན་མེད་རྨི་ལམ་ནོར། །འཇིགས་འཇིགས་འཆི་བདག་སྲིན་མོའི་སྡང་མིག་གིས། །ས་གསུམ་སྐྱེ་བོ་ཟིལ་གྱིས་གནོན་ལ་དགོངས། །འུ་ཅག་ཚེ་འདིའི་ལྷག་མ་ཅུང་ཟད་ཅིག །འདུག་གམ་འདུག་ན་སྙིང་པོའི་ལྷ་ཆོས་ལ། །ཞེ་བཅད་དམ་བཅའ་བརྟན་པོ་མི་བྱེད་པར། །རྣམ་གཡེང་ལོག་འཚོའི་དབང་དུ་སོང་འདི་ནོར། །ད་ནི་སྔོན་ཆད་ཐོས་པའི་ཆོས་རྣམས་ཀུན། །ཚིག་གི་རྗེས་སུ་ཤོར་བས་ན་ཡམ་ཡིན། །མང་མང་ཆོས་དོན་བསམ་པའི་རྣམ་རྟོག་ཀུན། །འདི་ཡིན་གཏད་སོ་མེད་དེ་ཁྲམ་པའི་གཏམ། །འཁོར་འདས་ཆོས་ཀུན་ཡེ་ནས་སྟོང་པ་ལ། །རྟོག་པས་བཟང་ངན་གཉིས་སུ་བཅོས་འདི་མཚར། །སྤྱོད་པའི་རྣམ་གྲངས་ཆོས་དང་མཐུན་དགོས་ཀྱང་། །ཤེས་བཞིན་དཀར་ནག་ཁྲ་བོར་བྱེད་འདི་ཅི། །ལྟ་བ་བློ་འདས་སྤྲོས་དང་བྲལ་ཟེར་ཡང་། །གོ་ཡུལ་ཡིད་དཔྱོད་འཁྲུལ་བས་བཅིང་འདི་ཅི། །སྒོམ་པ་ཡེང་འཁྲུལ་གཉིས་ལས་འདས་དགོས་ཀྱང་། །བློ་ཡིས་བཅོས་ཏེ་སྤང་གཉེན་བྱེད་འདི་ཅི། །འབྲས་བུ་ཡེ་ནས་རང་ལས་གཞན་མེད་ཀྱང་། །ད་གཟོད་བཟང་པོ་གསར་དུ་བསྒྲུབ་འདི་ཅི། །རང་བཞིན་རྫོགས་པ་ཆེན་པོའི་གསང་ཚིག་ལ། །གོ་ཡུལ་སྟོང་ལྟའི་དབང་དུ་ཤོར་བ་འཁྲུལ། །ཆོས་རྣམས་རང་བཞིན་སྟོང་ཉིད་རོ་གཅིག་ཕྱིར། །བདག་མེད་ཆོས་ཀྱི་སྙིང་པོ་ཉམས་ལེན་ཞུ། །ཚུལ་འཆོས་བཅོས་མའི་ཀུན་སྤྱོད་འདིས་བསླུས་པས། །ཟོལ་མེད་དམ་པའི་རྣམ་ཐར་རྗེས་སུ་སྐྱོངས། །བདེན་འཛིན་ཤོམ་རའི་བློ་རྒྱ་འདི་བསྐྱུངས་ལ། །གང་བབས་ཐད་ཀའི་རྟོག་པ་རང་སར་ཀློད། །ད་ལྟ་འཆི་བའི་ལ་ཆེན་བརྒལ་ན་ཡང་། །མི་འཇིགས་ལྟ་བའི་གདེངས་ཀྱི་སྐྱེལ་མ་དགོས། །ལོག་འཚོའི་རྙེད་པ་སྤྲིན་ལྟར་འདུས་ན་ཡང་། །སྣང་བས་མི་འཆིང་ཞེན་པ་གཏིང་ནས་ཆོད། །གང་བྱུང་རང་གཞན་ཚོགས་གཉིས་བསགས་པའི་ཕྱིར། །མཆོད་སྦྱིན་ཕྱོགས་སུ་གཏོང་བའི་གཏེར་སྒོ་ཕྱེས། །གཞན་སྐྱོན་མཐོང་བ་རང་སྣང་མ་དག་པས། །གང་སྣང་ལྷ་དང་བླ་མའི་ལམ་ཁྱེར་མཛོད། །སྒྲ་གྲགས་བཟང་ངན་བྲག་ཆའི་རྗེས་འགྲོ་བས། །སྙན་གྲགས་སྒྲུབ་པའི་བློ་ངན་གཏིང་ནས་ཕྱུངས། །འཁོར་སློབ་སྣ་ཚོགས་ལོག་སྒྲུབ་སྔོན་གྱི་ལས། །ཅི་མི་སྙམ་པའི་བཟོད་པས་ལས་སྒྲིབ་སྦྱོངས། །གནས་ཁང་བཀོད་ལེགས་ཁང་ཁྱིམ་ལྟ་བུ་ལ། །ཞེན་པ་གཏིང་ཕྱུངས་དག་པའི་ཞིང་ཁམས་སྦྱོངས། །གཉེན་གྲོགས་འདུས་ཚོགས་དོན་མཐུན་མགྲོན་པོ་ལྟར། །བློ་གཏད་མི་འདུག་བླ་མར་མོས་གུས་རེམ། །ལོངས་སྤྱོད་འབྱོར་བ་སྟོན་ཀའི་སྤྲིན་འདྲ་བས། །ཅི་འགྱུར་མི་ཤེས་འཕགས་པའི་ནོར་བདུན་སོགས། །མི་གཙང་རང་ལུས་ནམ་འདོར་ཆ་མེད་པས། །མཚན་དཔེའི་བདག་ཉིད་སྐུ་ཡི་ལམ་ཁྱེར་མཛོད། །ཅི་སྨྲས་ཚིག་ཀུན་སྐྱེ་འགགས་མཐའ་བྲལ་ཕྱིར། །སྨྲ་བཅད་ངང་ནས་གྲགས་སྟོང་བཟླས་པར་འབུངས། །ཡིད་ཀྱི་དྲན་རྟོག་ཕྲ་ཞིང་ཟབ་པའི་ཕྱིར། །སྟོང་གསལ་འགག་མེད་རྒྱལ་བའི་ཐུགས་སུ་སྦྱོངས།།