སྔོན་འགྲོའི་མན་ངག་དང་འབྲེལ་བའི་ཞལ་གདམས་ཉུང་ངུ་།
༈ སྔོན་འགྲོའི་མན་ངག་དང་འབྲེལ་བའི་ཞལ་གདམས་ཉུང་ངུ་བཞུགས། ཨོཾ་སྭ་སྟི། རྒྱལ་བས་ཆོས་ཕུང་ཇི་སྙེད་གསུངས་པ་ཀུན། །ཐམས་ཅད་འགྲོ་བའི་བདག་འཛིན་གཅོད་པའི་ཕྱིར། །ཉོན་མོངས་སྤོངས་དང་བདག་མེད་རྟོགས་པར་དགོངས། །དེ་ཀུན་ཡིད་ལ་སོམས་ཤིག་སྐལ་ལྡན་ཀྱེ། །སྲིད་གསུམ་སྣོད་བཅུད་ཆོས་ཀུན་མི་རྟག་སྟེ། །སྔར་སྐྱེས་ཤི་དང་ད་ལྟའི་འགྲོ་རྣམས་དང་། །ཕྱིན་ཆད་སྐྱེས་འགྱུར་རྣམས་ཀྱང་འཆི་ངེས་པས། །རྟག་འཛིན་བློ་སྣ་སྟུངས་ལ་དམ་ཆོས་སྒྲུབས། །ཆོས་ཀུན་ཐོག་མར་སྐྱབས་སུ་འགྲོ་བ་དང་། །གཞན་དོན་རྫོགས་བྱང་ཐོབ་ཕྱིར་སེམས་བསྐྱེད་ནས། །གཉེན་པོ་སྟོབས་བཞིས་རང་རྒྱུད་སྡིག་པ་སྦྱོངས། །ཚེགས་ཆུང་དོན་ཆེ་མཎྜལ་རྒྱུན་དུ་ཕུལ། །རང་གི་བླ་མ་པདྨ་འབྱུང་གནས་དང་། །དབྱེར་མེད་སྤྱི་བོའི་གཙུག་ཏུ་རབ་སྒོམས་ལ། །བྱིན་རླབས་རྒྱུད་བསྐུལ་གསོལ་འདེབས་ལེའུ་བདུན་མས། །ཉིན་མཚན་དུས་དྲུག་རྟག་ཏུ་གསོལ་བ་ཐོབ། །རྗེས་སུ་རང་དང་བླ་མ་ཐུགས་ཡིད་བསྲེས། །རང་སེམས་བསལ་བཞག་འགྲོ་འོང་མེད་པ་ཡི། །རང་ངོ་བསྐྱངས་ཏེ་དོན་དམ་མཉམ་པར་ཞོག །དགེ་བས་གཞན་དོན་བདེ་ཆེན་ཞིང་ཁམས་སུ། །ཚེ་དཔག་མེད་པའི་གོ་འཕང་ཕྱིར་བསྔོས་ཤིག །