སྙིགས་དུས་ཀྱི་སྤྲུལ་མིང་པ་པདྨ་དོན་ལྡན་རྩལ་དུ་འབོད་པའི་རྣམ་ཐར་གསོལ་འདེབས་ཉུང་ངུར་བསྡུས་པ་དད་པའི་འཁྲི་ཤིང་།
༄༅། སྙིགས་དུས་ཀྱི་སྤྲུལ་མིང་པ་པདྨ་དོན་ལྡན་རྩལ་དུ་འབོད་པའི་རྣམ་ཐར་གསོལ་འདེབས་ཉུང་ངུར་བསྡུས་པ་དད་པའི་འཁྲི་ཤིང་བཞུགས། ན་མོ་གུ་རུ་པིནྡྷ་ནིརྨཱ་ཀ་སརྦ་སིདྡྷི་ཕ་ལ་ཧཱུྃ། སྙིང་དབུས་དད་བརྒྱའི་པདྨོ་བཞད་པ་ནས། །རང་རིག་གཟུགས་སྐུར་ཤར་བའི་བླ་མ་རྗེ། །མོས་པའི་ཞིང་འདིར་བརྩེ་ཆེན་ཐུགས་རྗེ་ཡིས། །བྱིན་རླབས་ཆར་རྒྱུན་འབེབ་བཞིན་གཤེགས་སུ་གསོལ། །ཆོས་སྐུ་སྤྲོས་པ་ཀུན་བྲལ་ཀུན་ཏུ་བཟང་། །ལོངས་སྐུ་མཚན་དཔེའི་དཔལ་འབར་རིགས་ཀྱི་བདག །སྤྲུལ་སྐུ་འགྲོ་དོན་མཐར་ཕྱིན་ཨོ་རྒྱན་རྗེ། །དབྱེར་མེད་སྐུ་གསུམ་ཀུན་འདུས་བླ་མ་ལ། །ལུས་རྡུལ་གྲངས་སྙེད་ཕྱག་འཚལ་མཆོད་སྤྲིན་འབུལ། །སྡིག་སྒྲིབ་ཉེས་ཚོགས་སྟོབས་བཞིས་བཤགས་ཤིང་སྡོམ། །དགེ་ཚོགས་ཀུན་ལ་ཡི་རང་ཐེག་གསུམ་ཆོས། །འགྲོ་བའི་དོན་དུ་གསུང་བསྐུལ་སེམས་ཅན་ཀུན། །མ་གྲོལ་བར་དུ་བཞུགས་གསོལ་དུས་གསུམ་གྱི། །རྣམ་དཀར་མ་གྱུར་བྱང་ཆེན་རྒྱུ་རུ་བསྔོ། །རྒྱལ་བ་ཀུན་དང་ཁྱད་པར་པད་འབྱུང་སོགས། །ལྷག་ལྷ་དུ་མས་ཚེ་རབས་ཐམས་ཅད་དུ། །རྗེས་བཟུང་རྡོ་རྗེ་འཆང་དབང་སྤྲུལ་པའི་སྐུ། །པདྨ་དོན་ལྡན་རྩལ་ལ་གསོལ་བ་འདེབས། །ཕྱི་ལྟར་ཐོས་པས་རྒྱུད་གྲོལ་དགེ་སློང་མཆོག །ནང་ལྟར་བྱང་ཆུབ་སེམས་དཔའ་རྒྱལ་བའི་སྲས། །གསང་བ་སྣང་བཞི་མངོན་གྱུར་རིག་པ་འཛིན། །ལུང་རྟོགས་བསྟན་པ་འཛིན་ལ་གསོལ་བ་འདེབས། །འཇིག་རྟེན་བསླུ་བྲིད་གྲགས་སྙན་བསྟོད་སྨད་སོགས། །ཆོས་བརྒྱད་འཆིང་བ་རྨི་ལམ་ལྟར་གཟིགས་ནས། །འདོད་ཡོན་ཞེན་མེད་སྒྱུ་མ་རང་གྲོལ་བའི། །རྣལ་འབྱོར་དབང་ཕྱུག་ཆེན་པོར་གསོལ་བ་འདེབས། །མགོན་ཁྱོད་བསྐལ་མང་གོང་ནས་སངས་རྒྱས་ཀྱང་། །ཞིང་འདིར་གདུལ་བྱའི་སྣང་ངོར་ཐ་མལ་གཟུགས། །ལུས་རྒྱའི་སྦུབས་ནས་གདོད་མའི་མགོན་པོའི་ཞལ། །མངོན་གྱུར་རྒྱལ་བའི་སྲས་པོར་གསོལ་བ་འདེབས། །ཅིར་སྣང་སྐྱེ་འགག་གནས་གསུམ་བྲལ་བའི་དོན། །ཇི་བཞིན་རིག་པས་སྐྱོན་ཡོན་མཐའ་ལས་འདས། །བསླུ་མེད་སྒྱུ་འབྲས་དགེ་ལ་ཉེར་བརྩོན་ནས། །མི་མཆོག་དམ་པར་གྱུར་དེར་གསོལ་བ་འདེབས། །ཁྱོད་ནི་མཐོང་ངམ་བསྟོད་སྨད་ལེགས་བཤད་སོགས། །མོས་པས་ཡིད་ལ་དྲན་པ་ཙམ་གྱིས་ཀྱང་། །གནས་སྐབས་ཀུན་ཏུ་ཕན་བདེའི་གཞིར་འགྱུར་བའི། །འབྲེལ་ཚད་དོན་ལྡན་ཆེན་པོར་གསོལ་བ་འདེབས། །ཁྱད་པར་ཟབ་ཆོས་པད་འབྱུང་གསང་གསུམ་གྱི། །ཡོན་ཏན་རྗེས་བཟུང་གསོལ་འདེབས་བརྩོན་པའི་འབྲས། །བསླུ་མེད་ལམ་གྱི་འབྲས་བུ་མངོན་གྱུར་པའི། །མཁས་བཙུན་བཟང་པོར་གྲགས་ལ་གསོལ་བ་འདེབས། །སྔོན་ཚེ་བསྐལ་པ་གྲངས་མེད་གོང་རོལ་ནས། །བྱང་ཆུབ་སེམས་ཀྱི་ས་བོན་བཏབ་པའི་འབྲས། །གང་དུ་སྐྱེས་ཀྱང་སྙིང་རྗེ་ཚད་མེད་ཀྱིས། །རྒྱལ་བའི་མྱུ་གུར་གྱུར་དེར་གསོལ་བ་འདེབས། །རྒྱལ་བསྟན་རྩ་བ་ཕ་རོལ་ཕྱིན་དྲུག་ལས། །དགེ་བའི་བཤེས་གཉེན་བརྟེན་ལ་ཉེར་བརྩོན་དང་། །སྲིད་ལ་འཇིགས་པ་མེད་པའི་བརྟུལ་ཞུགས་ཀྱིས། །སྐལ་བ་བཟང་པོར་གྱུར་ལ་གསོལ་བ་འདེབས། །ཚེ་རབས་དུ་མར་དམ་པའི་མགོན་རྣམས་ཀྱིས། །རྗེས་བཟུང་སྨིན་གྲོལ་གདམས་པ་ཐོབ་པ་ལས། །བསྟན་དང་འགྲོ་བའི་དཔལ་མགོན་དམ་པ་རུ། །དུས་གསུམ་ཀུན་ཏུ་གྱུར་དེར་གསོལ་བ་འདེབས། །དེ་ལྟར་མགོན་པོ་ཁྱོད་ལ་རྩེ་གཅིག་ཏུ། །རྩ་གསུམ་ཀུན་འདུས་ངོ་བོར་མོས་པ་ཡིས། །མི་ཕྱེད་དད་པས་གསོལ་བ་འདེབས་ལགས་ན། །ཚད་མེད་ཐུགས་རྗེས་བྱིན་རླབས་སྩལ་དུ་གསོལ། །བདག་ནི་དེང་ནས་ཚེ་རབས་ཐམས་ཅད་དུ། །མི་ཁོམ་སྲིད་པའི་དུཿཁ་ལས་ཐར་ནས། །དལ་བའི་རྟེན་ལ་འབྱོར་བ་བཅུ་ཚང་ཞིང་། །རྒྱལ་བའི་བསྟན་ལ་རབ་ཏུ་བྱུང་བར་ཤོག །དེ་ཡང་ཚུལ་ཁྲིམས་གཙང་མའི་ས་གཞི་ལ། །ཞི་ལྷག་ཏིང་ངེ་འཛིན་གྱི་མྱུ་གུ་སྨིན། །ཤེས་རབ་གསུམ་གྱི་འབྲས་བུ་གཡུར་ཟ་བའི། །དོན་གཉིས་བསམ་པ་ལྷུན་གྱིས་འགྲུབ་པར་ཤོག །གནས་སྐབས་སུ་ཡང་ནད་གདོན་བར་ཆད་དང་། །དམ་ཆོས་སྒྲུབ་པའི་འགལ་རྐྱེན་ཀུན་ཞི་ནས། །ཚེ་བསོད་དཔལ་འབྱོར་ལུང་རྟོགས་ཡོན་ཏན་སོགས། །ཡར་ངོའི་ཟླ་ལྟར་འཕེལ་ཞིང་རྒྱས་པར་ཤོག །ཚད་མེད་བྱང་ཆུབ་སེམས་ཀྱི་ལྕགས་ཀྱུ་ཡིས། །ལྷ་འདྲེ་མི་གསུམ་ཟས་ནོར་ལོངས་སྤྱོད་སོགས། །སྣང་སྲིད་དབང་འདུས་བདུད་བཞིའི་གཡུལ་ངོ་ལས། །རྣམ་པར་རྒྱལ་བའི་དཔའ་བོ་མྱུར་ཐོབ་ཤོག །རིགས་ཀུན་བདག་ཉིད་བླ་མས་རྗེས་བཟུང་ཞིང་། །རིགས་བརྒྱའི་ཁྱབ་བདག་ཡི་དམ་ལྷ་དང་འཕྲད། །རིག་འཛིན་མཁའ་འགྲོའི་ཚོགས་ཀྱིས་མདུན་བསུས་ནས། །མཁའ་སྤྱོད་གནས་སུ་ཟུང་འཇུག་སྐུ་ཐོབ་ཤོག །དེར་ཡང་མཆོག་དམན་བར་བའི་འགྲོ་ཁམས་སུ། །གང་འདུལ་གཟུགས་ཀྱིས་དམ་ཆོས་སྟོན་པ་དང་། །ཕན་བདེའི་འབྱུང་གནས་རྒྱལ་བསྟན་འཛིན་པ་སོགས། །རང་གཞན་དོན་གཉིས་འབད་མེད་ལྷུན་གྲུབ་ཤོག །ཅེས་པ་འདི་ཡང་བླ་མ་ལ་དད་པ་དང་ལྡན་པའི་སློབ་མ་འགས་བསྐུལ་ངོར། ཆོས་སྨྲ་བའི་བཙུན་གཟུགས་པདྨ་དོན་ལྡན་བཟང་པོས་སྨྲས་པ་འདི་བཞིན་གསོལ་འདེབས་ལ་བརྩོན་ན་དངོས་གྲུབ་འབྱུང་བ་ཡིད་ཆེས་པའི་གནས་སུ་ཟུངས་ཤིག །དགེའོ།།