སྐྱེ་ཕྲེང་གསོལ་འདེབས་དོན་གཉིས་ཤིང་རྟ།
༄༅།། སྐྱེ་ཕྲེང་གསོལ་འདེབས་དོན་གཉིས་ཤིང་རྟ་བཞུགས། ཨེ་མ་ཧོ། འཁོར་འདས་ཀུན་གྱི་གཞི་ནི་མཉམ་པ་ཉིད། །ལྷུན་གྲུབ་འོད་ལྔའི་སྣང་བ་ཕྱིར་ཤར་ལས། །འགྲོ་ལ་ཕན་བདེའི་བྱེད་པོ་སྐུ་གསུམ་འཕྲུལ། །སྒྱུ་མའི་རོལ་གར་སྟོན་ལ་གསོལ་བ་འདེབས། །སྔོན་ཚེ་རྗེ་བཙུན་སྒྲོལ་མས་ཐུགས་བསྐྱེད་ཚེ། །དེ་ཉིད་གུས་མཆོད་སེམས་མ་མཐིང་འོད་འབར། །བྱང་ཆུབ་བར་དུ་འཕགས་མ་རིགས་བདག་ཏུ། །འགྱུར་ཞེས་ལུང་བསྟན་ཐོབ་དེར་གསོལ་བ་འདེབས། །ཤཱཀ་ཐུབ་འཁོར་གྱུར་འཕགས་མ་ཨུཏྤལ་མདོག །མཚོ་སྐྱེས་བླ་མའི་ཐུགས་ཟིན་མཁར་ཆེན་བཟའ། །དེ་ཡི་དྲལ་པོ་མཁར་ཆུ་དཔལ་དབང་ཕྱུག །སྣ་ཚོགས་སྤྲུལ་པར་སྣང་ལ་གསོལ་བ་འདེབས། །བཞད་པ་རྡོ་རྗེའི་སློབ་མ་གཤེན་རྡོར་མོ། །དུས་གསུམ་མཁྱེན་པའི་བརྒྱུད་འཛིན་ཀརྨ་དཔལ། །ཀུན་དགའ་རྒྱལ་མཚན་བྲན་གྱུར་ཚེ་ཡི་མིང་། །མ་ཏི་བྷ་ཏྲའི་ཐུགས་སྲས་དགེ་ལེགས་དཔལ། །འགྲོ་ཕན་བྱེད་པོར་གྱུར་ལ་གསོལ་བ་འདེབས། །སངས་གླིང་ཆོས་རིགས་མྱུ་གུ་ཡེ་རྡོར་བ། །གཏེར་བདག་གླིང་པའི་ཐུགས་སྲས་རྣམ་པར་རྒྱལ། །ཤར་གཏེར་མངའ་བདག་སུརྱ་ཀིརྟི་ཡི། །བྱིན་ཐོབ་སྤྲུལ་པར་གྲགས་ལ་གསོལ་བ་འདེབས། །ཕྱག་ཆེན་རྣལ་འབྱོར་ཛྙཱ་ན་སེང་ཧར་གྲགས། །ཤེར་ཕྱིན་དགོངས་དོན་མངོན་གྱུར་དཀོན་མཆོག་མཚན། །གྲུབ་དབང་བླ་མའི་ཐུགས་སྲས་སྐལ་བ་བཟང་། །རྒྱལ་བསྟན་རྩ་ལག་འཛིན་ལ་གསོལ་བ་འདེབས། །གཞན་ཡང་དགྲ་བཅོམ་བློ་གྲོས་རྒྱ་མཚོ་དང་། །འཛམ་གླིང་མཁས་པའི་རྒྱན་གྱུར་འཕགས་པ་ལྷ།།འཇམ་དབྱངས་འཁོན་གྱི་རིགས་ལས་ཀླུ་དབང་སོགས། །སྤྲུལ་བསྒྱུར་བསམ་ལས་འདས་ལ་གསོལ་བ་འདེབས། །ལུང༵་གི་ཆོས་ལ་མི་ཕྱེད་དད་པས་ཉན། །རྟོགས་དོན་བྱང་ཆུབ་སེམས་གཉིས་ཅི་ནུས་སྦྱངས། །རིག༵་རྩལ་འཁོར་འདས་གྲུབ་པ་མེད་པར་ཤེས།།ཐར་གླིང༵་དེད་དཔོན་དམ་པ༵ར་གསོལ་བ་འདེབས། །ཀུན་ཁྱབ་སེམས་ཉིད་སྤྲོས་པ་བྲལ་བའི་གདངས། །སྐྱེ་མེད་དབྱིངས་ལས་སྐྱེ་བའི་ཆོ་འཕྲུལ་གྱིས། །གཞན་ཕན་བྱང་ཆུབ་སེམས་དང་མ་བྲལ་བར། །གང་འདུལ་གཟུགས་སྐུར་སྣང་དེར་གསོལ་བ་འདེབས། །དེ་ལྟར་རྩེ་གཅིག་གསོལ་བ་བཏབ་པའི་མཐུས། །འཁོར་བའི་བདེ་སྐྱིད་དུག་སྦྲུལ་ཚང་བཞིན་དུ། །མཐོང་ནས་ངེས་པར་འབྱུང་བས་རྒྱུད་བསྐུལ་ཏེ། །རྣམ་དག་ཁྲིམས་ཀྱི་གཞི་བཟང་འཛིན་པར་ཤོག །ཟས་ནོར་ལོངས་སྤྱོད་གཉེན་དང་འདུ་འཛི་སོགས། །སྙིང་པོ་མེད་པའི་ཚུལ་ལ་ཞེན་ལོག་ནས། །དབེན་པའི་གནས་སུ་ཏིང་འཛིན་རྩེ་གཅིག་ལ། །རབ་ཏུ་བརྩོན་པས་བརྟན་པ་མཆོག་ཐོབ་ཤོག །རྨི་ལམ་ལྟ་བུའི་སྲིད་པར་འཁྱམས་པའི་འགྲོ། །ཐོག་མེད་དུས་ནས་ཕ་མར་ཤེས་པའི་བློས། །གནས་སྐབས་མཐར་ཐུག་སྡུག་བསྔལ་བཙོན་ར་ལས། །འདོན་པའི་སྙིང་སྟོབས་ཕུལ་དུ་ཕྱིན་པར་ཤོག །རླབས་ཆེན་རྒྱལ་བའི་སྲས་ཀྱི་སྤྱོད་པ་མཆོག །ཕར་ཕྱིན་དྲུག་དང་བསྡུ་བའི་དངོས་པོ་བཞིས། །མཐོང་ཐོས་དྲན་རེག་འབྲེལ་ཐོགས་འགྲོ་བ་ཀུན། །ཐར་མཆོག་རིན་ཆེན་གླིང་དུ་ཁྲིད་པར་ཤོག །ཡུན་རིང་དཀའ་སྤྱད་རྒྱུ་འབྲས་ཐེག་པའི་ལམ། །འབད་རྩོལ་ངལ་བས་སྒྲུབ་ལ་མ་ལྟོས་པར། །པད་འབྱུང་བཱི་མའི་དགོངས་གནད་སྙིང་ཐིག་གིས། །ཚེ་འདིར་འཕོ་ཆེན་རྡོ་རྗེའི་སྐུ་ཐོབ་ཤོག །མདོར་ན་རང་རིག་དོན་གྱི་བླ་མ་མཆོག །གཟུགས་སྐུའི་རོལ་པར་ཤར་ལ་ངེས་རྙེད་མཐུས། །བདག་དང་མཁའ་མཉམ་འགྲོ་བ་མ་ལུས་པ། །ཚོམ་བུ་གཅིག་ཏུ་མངོན་པར་འཚང་རྒྱ་ཤོག །དེ་ལྟར་བྱང་ཆུབ་སྙིང་པོ་མ་ཐོབ་བར། །སྐྱེ་བའི་ཕྲེང་བར་ཉེར་འཚེ་ཀུན་ཞི་ཞིང་། །ལྷག་པའི་ལྷ་དང་བླ་མས་རྗེས་བཟུང་ནས། །ཆོས་མཐུན་བསམ་དོན་ཡིད་བཞིན་འགྲུབ་པར་ཤོག །ཅེས་པའང་གསང་ཆེན་ཐེག་པའི་ཉེ་ལམ་ལ་ངེས་པ་རྙེད་པའི་རང་སློབ་ཀརྨའི་མིང་གིས་བསྐུལ་ངོར། གྲུབ་དབང་རྫོགས་ཆེན་བཞི་པ་དང་ ། གསང་སྔགས་གླིང་པ་སོགས་ཀྱིས་དམ་པའི་ སྐྱེས་བུར་ལུང་བསྟན་པ་དང་། རང་ཉིད་ཀྱི་འཁྲུལ་སྣང་དུ་ཤར་བ་བཞིན་རྒྱལ་ཁམས་ཉུལ་བའི་སྤྲང་བཙུན་ལུང་རིག་གླིང་པས་སྨྲས་པའི་དགེ་བས་བླ་མ་སངས་རྒྱས་དངོས་སུ་མཐོང་བའི་རྒྱུར་གྱུར་ཅིག་གུ། དགེའོ། །