རྗེ་ལུང་རིག་གླིང་པ་ཉིད་ཀྱི་གསོལ་འདེབས་དང་སྨོན་ལམ་གྱི་སྐོར་ཐོར་བུ།

༄༅། རྗེ་ལུང་རིག་གླིང་པ་ཉིད་ཀྱི་གསོལ་འདེབས་དང་སྨོན་ལམ་གྱི་སྐོར་ཐོར་བུ་བཞུགས། རྒྱལ་ཀུན་སྤྱི་གཟུགས་པད་འབྱུང་བཱི་མ་དང་། །དབྱེར་མེད་གྲུབ་པའི་དབང་པོ་རྫོགས་ཆེན་པས། །རྗེས་བཟུང་རྣམ་དཀར་ལས་འཕྲོ་ཆོས་དང་མཐུན། །ལུང་རྟོགས་བསྟན་པའི་ཉི་མར་གསོལ་བ་འདེབས། །སྤྲུལ་མིང་པས་སོ།། ༈ ལུ༵ང་རྟོ༵གས་བསྟ༵ན་པ༵འི་མངའ་བདག་རྫོགས་ཆེན་པའི། །ཐུགས་རྗེའི་ཉི༵ན་བྱེ༵ད་བློ་ཡི་པདྨོར་ཤར། །ཚོགས་གཉིས་དཔ༵ལ་ལྡན་བཟ༵ང་པོ༵འི་སྤྱོད་འཆང་བ། །རྣམ་འདྲེན་ལུང་རིག་གླིང་བར་གསོལ་བ་འདེབས།། ༈ སངས་རྒྱས་ཀུན་དངོས་དཔལ་ལྡན་བླ་མ་མཆོག །གསང་ཆེན་བསྟན་པའི་མངའ་བདག་གྲུབ་དབང་རྗེའི། །ཐུགས་བསྐྱེད་སྨོན་ལམ་དག་པས་རྗེས་བཟུང་བ། །ལུང་རྟོགས་བསྟན་པའི་ཉི་མར་གསོལ་བ་འདེབས།། སྤྲུལ་པའི་སྐུ་རང་ཉིད་ཀྱིས་གསུངས་བཞིན་གཞན་ལ་ཕན་པས་བྲིས་པ་དགེ་ལེགས་འཕེལ། ༈ སྔོན་ནས་སྦྱངས་པའི་ལས་འཕྲོ་ཆོས་ལ་སད། །ཟབ་གཏེར་དག་སྣང་སྨིན་གྲོལ་སྐལ་བར་ལྡན། །ལུ༵ང་དང་རི༵ག་པའི་བདག་ཉིད་འགྲོ་བའི་མགོན། །ཐར་གླི༵ང་དེད་དཔོན་དམ་པ༵ར་གསོལ་བ་འདེབས།། ཅེས་པའང་ཆོས་ཀྱི་བདག་པོར་ལུང་ཟིན་རྡོ་རྗེ་འོད་འབར་དུ་འབོད་པའི་བསྐུལ་ངོར། རང་ཉིད་ཀྱིས་ཐོལ་བྱུང་དུ་སྨྲས་པ་ཛ་ཡནྟུ།

༈ རྒྱལ་ཀུན་གསང་གསུམ་ཡེ་ཤེས་སྒྱུ་མའི་གར། །འགྲོ་ལ་ཕན་བདེའི་བྱེད་པོར་ཡོངས་ཤར་བ། །རྒྱལ་སྲས་རིགས་གསུམ་སེམས་དཔས་བྱིན་རླབས་པའི། །རྣམ་འདྲེན་སྤྲུལ་བའི་སྐུ་ལ་གསོལ་བ་འདེབས།། ཅེས་པའང་དབོན་དམ་པ་བསྟན་འཕེལ་ནས་བསྐུལ་ངོར། རྒྱ་སྤྲུལ་མིང་བས་སྨྲས་པའོ།། ༈ སངས་རྒྱས་ཀུན་དངོས་གྲུབ་དབང་རྫོགས་ཆེན་པས། །རྗེས་བཟུང་ལུང་དང་རྟོགས་པའི་བསྟན་པ་ལ། །ལྷག་བསམ་དག་པས་བྱ་བ་བྱེད་བརྩོན་པ། །ལུང་རྟོགས་བསྟན་པའི་ཉི་མར་གསོལ་བ་འདེབས།། ཞེས་པའང་སྒྲུབ་བརྩོན་དམ་པ་ཀུན་དགའ་རྒྱལ་མཚན་པས་བསྐུལ་ངོར། བན་རྒན་སྙོམས་ལས་པ་རྒྱ་སྤྲུལ་བས་སྨྲས་པ་དགེའོ།། ༈ ལུ༵ང་དང་རྟོ༵གས་པའི་ཡོན་ཏན་རྒྱ་མཚོའི་གཏེར། །གྲུབ་དབང་བསྟ༵ན་པ༵འི་ཉི༵ན་བྱེ༵ད་རྫོགས་ཆེན་པས། །དཔ༵ལ་ལྡན་བཟ༵ང་པོ༵་གྲགས་པའི་རྣམ་རོལ་དུ། །དབང་བསྐུར་ལུང་བསྟན་ཐོབ་ལ་གསོལ་བ་འདེབས།། ཅེས་པའང་བན་ཆུང་བསོད་ནམས་མཐུ་སྟོབས་ནས་བསྐུལ་ངོར། རྒྱ་སྤྲུལ་མིང་པས་སྨྲས་པའོ།། ༈ ཀུན་གཟིགས་མཁྱེན་པ་དྲི་བྲལ་འོད་སྟོང་དལ། །རིས་མེད་བསྟན་འགྲོའི་པད་ཚལ་ལ་ཤར་བས། །ཕན་བདེའི་སྣང་བའི་འོད་ཟེར་འབུམ་ཕྲག་གིས། །སྲིད་ཞིའི་རྒུད་མུན་སེལ་མཛད་ལ་ཕྱག་འཚལ།། ཅེས་པ་འདི་རིག་འཛིན་ལུང་རིག་གླིང་པས་སློབ་བུ་ས་ར་ཧི་ཏ་ལ་གསུངས་པ་དགེ་ལེགས་འཕེལ། ༈ ལུ༵ང་གི་ཆོས་ལ་ཅུང་ཟད་ཐོས་ཤིང་སྦྱངས། །རྟོ༵གས་པ་རང་བྱུང་ཡེ་ཤེས་རང་ཞལ་མཐོང་། །བསྟ༵ན་པ༵འི་ཉི༵ན་བྱེ༵ད་དད་གསུམ་དཔལ་དུ་འཆང་། །བཟ༵ང་པོ༵འི་སྤྱོད་འཆང་དམ་པར་གསོལ་བ་འདེབས།། ཅེས་པའང་ཀརྨ་བསྟན་འཕེལ་ངོར། བན་རྒན་རྒྱ་སྤྲུལ་གྱི་ན་བས་སྨྲས་པ་དགེ་ལེགས་འཕེལ།། མངྒ་ལཾ། ༈ ཁྱོད་ཀྱི་གསང་གསུམ་ཡོན་ཏན་རྗེས་དྲན་ནས། །སྙིང་དབུས་དད་པས་རྟག་ཏུ་གསོལ་འདེབས་ན། །ཐུགས་བསྐྱེད་སྨོན་ལམ་དག་པས་རྗེས་སུ་འཛིན། །མཐའ་ཡས་འགྲོ་བའི་མགོན་དུ་བདག་གྱུར་ཅིག། ཅེས་པའང་རང་སློབ་དད་ལྡན་དབོན་དོན་གྲུབ་ཀྱིས་བསྐུལ་ངོར་བན་རྒན་རྒྱ་སྤྲུལ་ནས་འཆོལ་གཏམ་དུ་སྨྲས་པ་དགེ་བར་གྱུར། དགེའོ།། ༈ ལུ༵ང་དང་རྟོ༵གས་པ་མཁའ་ལྟར་རྒྱ་ཆེ་བ། །བསྟ༵ན་པ༵འི་ཉི༵ན་བྱེ༵ད་གྲུབ་དབང་རྫོགས་ཆེན་པས། །དཔ༵ལ་ལྡན་མཁས་བཙུན་བཟ༵ང་པོ༵འི་རྣམ་རོལ་དུ། །ལུང་བསྟན་དབུགས་དབྱུང་ཐུགས་ཀྱིས་བྱིན་རླབས་པའི། །རྣམ་འདྲེན་སྤྲུལ་བའི་སྐུ་ལ་གསོལ་བ་འདེབས། །བདག་རྒྱུད་སྨིན་ཅིང་གྲོལ་བར་བྱིན་གྱིས་རློབས།། ཞེས་པའང་དད་དམ་ལྡན་པའི་བཙུན་པ་ཤྲཱི་བྷ་ཏྲས་བསྐུལ་ངོར། དཀོར་ཟན་སྤྲུལ་མིང་པས་བྲིས་པ་ཛ་ཡནྟུ། ༈ ལུ༵ང་ཆོས་ཐོས་ཤིང་རྟོ༵གས་པས་བདག་རྒྱུད་གྲོལ། །ཟབ་གསང་བསྟ༵ན་པ༵འི་ཉི༵ན་བྱེ༵ད་སྐྱེ་དགུའི་དཔ༵ལ། །ཚངས་སྤྱོད་བཟ༵ང་པོ༵འི་བརྟུལ་ཞུགས་ལྷུར་ལེན་པ། །གསུམ་ལྡན་སྤྲུལ་པའི་སྐུ་ལ་གསོལ་བ་འདེབས། །དྲན་ཤེས་བསྟན་པོས་རྒྱལ་བསྟན་སྒོར་ཞུགས་ནས། །ཕྲ་རགས་ཉེས་ལྟུང་དྲི་མས་མ་གོས་ཤིང་། །ཐུབ་དབང་ཐུགས་ཀྱི་བཅུད་བསྡུས་བྱང་ཆུབ་སེམས། །རང་གཞན་རྒྱུད་ལ་འབྱོང་བར་བྱིན་གྱིས་རློབས།། ལུང་རིག་གླིང་པས་སོ།། ༈ འགྲོ་མགོན་པདྨའི་ཐུགས་རྗེའི་འོད་ཟེར་ལས། །ལུང༵་དང་རིག༵་པའི་རྩལ་ཆེན་རབ་རྫོགས་ནས། །རྣམ་གྲོལ་རིན་ཆེན་གླིང༵་དུ་འགྲོ་བ༵་ཀུན། །སྒྲོལ་བའི་དེད་དཔོན་མཆོག་ལ་གསོལ་བ་འདེབས།། ལུང་རིག་གླིང་བས་སོ།། ༈ སྔོན་སྨོན་བྱང་ཆུབ་སེམས་ཀྱི་ས་བོན་མཆོག །ཡོངས་འཛིན་དགེ་བའི་བཤེས་ཀྱིས་རྗེས་བཟུང་ནས། །ལེགས་བཤད་བདུད་རྩིའི་གསོས་ཀྱིས་རབ་སྨིན་པའི། །རྣམ་འདྲེན་ལུང་རྟོགས་དཔལ་དེར་གསོལ་བ་འདེབས། །ཅེས་པའང་གཞོན་ནུ་བློ་གྲོས་ཡངས་པས་བསྐུལ་ངོར་རྒྱ་སྤྲུལ་བླུན་པོས་སོ། ། ༈ དལ་འབྱོར་རྟེན་ཐོབ་སྨིན་གྲོལ་སྐ༵ལ་བར་ལྡ༵ན། །ལུ༵ང་རི༵ག་ཆོས་ལ་སྤྲོ་བས་ཐོས་བསམ་བྱས། །འགྲོ་ཀུན་ཐར་གླི༵ང་འདྲེན་མཛད་སྤྲུལ་པ༷འི་སྐུ། །བསྟན་པའི་ཉིན་བྱེད་བཟང་པོར་གསོལ་བ་འདེབས། །དེ་ལྟར་གསོལ་བ་བཏབ་པའི་བྱིན་ནུས་ཀྱིས། །བདག་བློ་དམ་པའི་ཆོས་སུ་འགྲོ་བ་དང་། །ཆོས་དོན་ལམ་འགྲོ་འཁྲུལ་སྣང་ཡེ་ཤེས་ཤར། །བཀའ་བརྒྱུད་གོང་མའི་དགོངས་བཞེད་སྐོང་ནུས་ཤོག །ཅེས་པའང་དགེ་སྦྱོང་དམ་པ་པདྨས་བསྐུལ་ངོར། བན་རྒན་གྱི་ན་བ་རྒྱ་སྤྲུལ་པས་སོ།། ༈ པད་འབྱུང་བི་མའི་དངོས་སྤྲུལ་རྫོགས་ཆེན་པ། །བསྟན་པའི་སྲོག་ཤིང་རྒྱལ་བའི་སྲས་པོ་སོགས། །མཚུངས་མེད་དམ་པ་དུ་མས་རྗེས་བཟུང་བ། །ལུང་རྟོགས་བསྟན་པའི་ཉི་མར་གསོལ་བ་འདེབས། །རྒྱལ་ཀུན་བགྲོད་པ་གཅིག་པུའི་ལམ་པོ་ཆེ། །སྨོན་འཇུག་བྱང་ཆུབ་སེམས་ལ་བློ་སྦྱངས་ཏེ། །ས་བཅུའི་ཡོན་ཏན་མ་ལུས་ཡོངས་རྫོགས་ནས། །ཁམས་གསུམ་འགྲོ་བའི་དཔལ་དུ་བདག་འགྱུར་ཤོག། ཅེས་པའང་དད་པ་ལྡན་པའི་བཙུན་པ་ཀུན་དགའ་རྒྱལ་མཚན་ཞེས་པས་བསྐུལ་ངོར། རྒྱ་སྤྲུལ་མིང་ནས་བྲིས་ཏེ་ཕུལ་བ་ཛ་ཡནྟུ། ༈ ཨོཾ་སྭ་སྟི། རྣམ་དག་ལུ༵ང་རི༵ག་འཆི་མེད་ལམ་ཆེན་དུ། །བཤད་དང་སྒྲུབ་པའི་འོད་ཟེར་སྟོང་འབར་བས། །ཐར་གླི༵ང་པདྨོ་བཞད་མཛད་གྲུབ་དབང་རྗེའི། །བྱིན་ཐོབ་རྣམ་འདྲེན་སྤྲུལ་པ༵འི་སྐུ་ལ་འདུད། །འཁོར་བའི་སྐྱོན་མཐོང་ངེས་འབྱུང་ཁྲིམས་དང་ལྡན། །རང་དོན་ཞི་བདེ་མི་གཉེར་གཞན་ཕན་བརྩོན། །མཐའ་བྲལ་ལྟ་བ་རྟོགས་ཤིང་ལྷ་སྔགས་ངང་། །དོན་གཉིས་བསྒྲུབས་ཏེ་དེ་འབྲས་མཐར་ཕྱིན་ཤོག། ཅེས་པའང་ཁམས་གསུམ་འགྲོ་བའི་སྐྱབས་མཆོག་ཐུབ་པའི་དབང་པོའི་སྐུའི་རྒྱལ་ཚབ་ལྷ་ལྡན་ཇོ་བོ་རིན་པོ་ཆེའི་མདུན་དུ་ཚོགས་བསགས་ཡན་ལག་བདུན་གྱི་དང་པོའི་སྒོ་ནས་བརྩོན་པ་ལྷུར་བཞེས་པའི་བླ་མ་དཔོན་སློབ་ཀྱིས་བསྐུལ་ངོར་གྱི་ན་བ་ཆོས་མེད་བཙུན་གཟུགས་རྒྱ་སྤྲུལ་མིང་གིས་སོ།། ༈ ལུ༵ང་ཆོས་ཐོས་པའི་ལུས་རྩལ་རབ་རྫོགས་ཤིང་། །བདག་མེད་རྟོ༵གས་པའི་ཆོས་སྒྲས་རྒོལ་ངན་འཇོམས། །བསྟ༵ན་པ༵འི་ཉི༵ན་བྱེ༵ད་དམ་པས་རྗེས་སུ་བཟུང་། །དཔ༵ལ་ལྡན་བཟ༵ང་པོ༵ར་སྤྱོད་པ་ཁྱོད་ལ་འདུད། །སོ་ཐར་ཁྲིམས་བསྲུང་ངེས་འབྱུང་བློ་དང་ལྡན། །སྨོན་འཇུག་སེམས་བསྐྱེད་ཕར་ཕྱིན་དྲུག་ལ་སྤྱོད། །དབང་བཞིས་རྒྱུད་སྨིན་རིམ་གཉིས་མཐའ་རུ་ཕྱིན། །འགྲོ་དོན་ལྷུན་གྲུབ་རྒྱལ་བའི་དབང་པོར་ཤོག། ཅེས་པའང་བཙུན་ཆུང་ལུང་རྟོགས་ཀྱིས་བསྐུལ་ངོར། མ་ཧཱ་ཙི་ནའི་རིགས་ལས་སོན་པའི་སྤྲུལ་མིང་པས་སོ།། ༈ རྫོགས་སངས་རྒྱས་ལ་ཕྱག་འཚལ་ལོ། །བསོད་ནམས་བསགས་ན་བདེ་བར་འགྱུར། །དེ་ཕྱིར་མིས་ནི་བསོད་ནམས་བྱ། །དེ་ཡང་ཡང་དང་ཡང་དུ་བྱ། །དེ་ཉིད་ལ་ནི་འདུན་པར་བྱ། །བསོད་ནམས་སྟོབས་བཞིན་འགྱུར་བར་ཤོག། ཅེས་པ་འདི་བསོད་ནམས་སྟོབས་ཀྱི་རྟོགས་བརྗོད་ལས་བྱུང་བའི་ཤློ་ཀ་འདོན་སྲོལ་བྱུང་བ་ལ་སྤྲུལ་པའི་སྐུ་ལུང་རིག་གླིང་བས་མགོ་མཇུག་ཏུ་ཚིག་རྐང་ཟུང་གིས་བརྒྱན་ཏེ་འདོན་བདེར་བཀོད་པ་སརྦ་ཛ་ག་ཏཾ། ༈ ཨོཾ་སྭ་སྟི། རྒྱལ་ཀུན་མཁྱེན་པའི་རང་གཟུགས་འཇམ་པའི་དབྱངས། །ཟབ་གཏེར་མངའ་བདག་རྡོ་རྗེ་དྲག་པོ་རྩལ། །དབྱེར་མེད་ཟུང་འཇུག་རང་སེམས་ཆོས་ཀྱི་སྐུ། །རང་ངོ་ཤེས་པའི་ངང་ནས་གསོལ་བ་འདེབས། །མཚན་ལྡན་བླ་མ་ལས་བྱུང་ཐོས་པའི་ཆོས། །ཇི་བཞིན་རྒྱུད་ལ་གོམ་པའི་རྟེན་འབྲེལ་གྱིས། །ཚེ་འདིར་འཇམ་དཔལ་དཔའ་བོའི་སྐུ་འགྲུབ་ནས། །མཁའ་མཉམ་འགྲོ་ཀུན་འདྲེན་པའི་དཔལ་དུ་ཤོག། ཅེས་པའང་སྐལ་ལྡན་དམ་པ་དྷརྨའི་མཚན་ཅན་གྱིས་རྣལ་མར་འདོན་རྒྱུར་རྒྱ་སྤྲུལ་བན་རྒན་གྱི་ན་བས་སྨྲས་པའོ།།