གནད་བྱང་སྙིང་པོའི་དོན་གསལ་ཐུགས་ཀྱི་མེ་ལོང་།
༄༅།། ཤུདྡྷཱལོཀསྶརསྫཡཱམནསྱགུཧྱཀོཥེབྷྱཿ བྻུཏྤནྣགརྦྷསྱཱརྠཱལོཀཙིཏྟསྱཱདརྴབིཧརཏིསྨཿ
༄༅།། ཤུདྡྷཱལོཀསྶརསྫཡཱམནསྱགུཧྱཀོཥེབྷྱ༔ བྻུཏྤནྣགརྦྷསྱཱརྠཱལོཀཙིཏྟསྱཱདརྴབིཧརཏིསྨ༔
དག་སྣང་མཚོ་རྒྱལ་དགོངས་པའི་གསང་མཛོད་ལས༔ གནད་བྱང་སྙིང་པོའི་དོན་གསལ་ཐུགས་ཀྱི་མེ་ལོང་བཞུགས༔
ཨེ་མ་ཧོ༔ ཡོན་ཏན་ཀུན་རྫོགས་རྡོ་རྗེའི་ལུས༔ དུས་གསུམ་མཁྱེན་པའི་སྤྲུལ་པའི་སྐུ༔ རྒྱལ་བའི་གདུང་འཚོབ་པད་འབྱུང་རྗེ༔ ཚེ་རབས་གཏན་གྱི་བླ་མར་འདུད༔ བདག་འདྲ་སྐྱེས་དམན་མཁར་ཆེན་བཟའ༔ སྐྱེ་བ་སྒྲགས་ཀྱི་མདའ་རུ་བཟུང༔ ཡབ་མིང་དྲན་པ་ཡེ་ཤེས་དང༔ ཡུམ་མིང་འབྲོམ་བཟའ་དགེ་འབུམ་ལྕམ༔ དེ་ཡི་བུ་མོ་ཆེ་ཤོས་གྱུར༔ ཆུང་ནས་ངེས་འབྱུང་སྐྱོ་ཤས་དང༔ མི་རྟག་མཆོག་གསུམ་ཡོན་ཏན་དྲན༔ དད་པས་སྤུ་ལོང་གཡོ་བ་བྱུང༔ བཅུ་གསུམ་ལོན་ཚེ་མངའ་བདག་གིས༔ བཙུན་མོར་བཞེས་ཤིང་ཐུགས་བརྩེ་མཛད༔ དགུ་གཉིས་སྟག་གི་ལོ་ཤར་ཚེ༔ གངས་ཅན་ལྗོངས་སུ་གུ་རུ་ཡིས༔ བསམ་ཡས་ས་འདུལ་ལྷ་སྲིན་བཏུལ༔ རྒྱལ་པོར་དབང་བསྐུར་མནྚལ་དུ༔ བདག་དང་ནོར་རྫས་ལྟོས་མེད་ཕུལ༔ ཉེར་ལྔ་ལྕགས་བྱའི་ལོ་ཤར་ཚེ༔ ཟབ་ཆོས་ཕུར་བའི་གདམས་པ་ཡི༔ དབང་རྒྱུད་མན་ངག་ལག་ལེན་གནང༔ དེ་ཚེ་བླ་གཡུ་འོད་འབར་དང༔ ཟ་འོག་གོས་དང་དངུལ་དཀར་གྱི༔ མེ་ལོང་རྒྱང་གསལ་གསེར་གདུབ་སོགས༔ ཁྱད་འཕགས་ནོར་སྣ་བདུན་ཕུལ་ནས༔ ཀྱེ་མ་འགྲོ་བ་ཡོངས་ཀྱི་མགོན༔ བདག་གི་བླ་མ་ཨོ་རྒྱན་རྗེ༔ ཟབ་ཆོས་འཕགས་མའི་ཐུགས་ཐིག་གི༔ ཆ་ལག་ནང་སྒྲུབ་གསང་བའི་མཛོད༔ ཉིད་ཀྱི་ཐུགས་ལ་གབ་པའི་ཆོས༔ བདག་གིས་མ་འོངས་སྐལ་ལྡན་དོན༔ ཐོགས་མེད་སྤེལ་བའི་གནང་བ་སྩོལ༔ ཅེས་ཞུས་གུ་རུས་བཀའ་སྩལ་པ༔ བདག་འདྲ་པདྨ་ཐོད་ཕྲེང་དང༔ ཐུགས་ཀྱི་གཟུངས་མ་མཁར་ཆེན་བཟའ༔ སྣང་དང་སྟོང་པའི་ཆོ་འཕྲུལ་ལས༔ ཡབ་དང་ཡུམ་དུ་སོ་སོར་སྣང༔ དོན་ལ་དབྱེར་མེད་ཐ་མི་དད༔ དེ་ཕྱིར་ཡི་གེའི་སྤྲོས་པ་དང༔ འབྱུང་བའི་ཁམས་ལ་སྦ་མི་དགོས༔ ཁྱོད་ཀྱི་སྤྲུལ་པ་བ་སྤུའི་གྲངས༔ འགའ་ཞིག་དངོས་གཏེར་ངོ་མཚར་སྟོན༔ ཕལ་ཆེར་དག་སྣང་ཐུགས་གཏེར་འབྱིན༔ དུས་བབས་འགྲོ་དོན་ཤུགས་ཀྱིས་འབྱུང༔ དེ་ཕྱིར་མ་བརྗེད་ཡིད་ལ་ཆོངས༔ ས་མ་ཡཱ༔ དེ་ལྟར་གུ་རུའི་བཀའ་ཐོབ་པའི༔ དག་སྣང་ཆོས་སྡེ་བསམ་མི་ཁྱབ༔ མ་འོངས་ང་སྤྲུལ་སྐྱེས་བུ་ནི༔ ཁམས་དབུས་གཙང་སོགས་ཀུན་ཏུ་འབྱུང༔ ཁྱད་པར་མདོ་ཁམས་སྨད་ཕྱོགས་སུ༔ ད་ལྟ་མ་ཧཱ་གུ་རུའི་དྲུང༔ དཀྱིལ་འཁོར་གཅིག་ཏུ་ནང་འདྲེས་མཆེད༔ ལང་གྲོ་དཀོན་མཆོག་འབྱུང་གནས་དང༔ བདག་ཉིད་མཚོ་རྒྱལ་ཕྲིན་ལས་སྤྲུལ༔ གཅིག་བསྡུས་འགྲོ་ཕན་སེམས་དཔའི་རིགས༔ དཔལ་གྱི་མིང་ཅན་རྣལ་འབྱོར་དེར༔ དག་སྣང་ཆོས་ཀྱི་གཏེར་ཁ་རྡོལ༔ ཞེ་གསུམ་མཚོ་རྒྱལ་ང་ཉིད་ཀྱི༔ གསུང་སྤྲུལ་སྔགས་ཀྱི་མིང་ཅན་མཇལ༔ དབུག་དབྱུང་གཟེངས་བསྟོད་བསྔགས་པ་བརྗོད༔ དེ་ཚེ་ཁ་བྱང་གནད་བྱང་གཉིས༔ སོ་སོ་མ་ཡིན་འདི་ཀ་རང༔ སྔོན་ཚེ་འཕགས་མའི་སྤྱན་སྔ་རུ༔ ཐུགས་བསྐྱེད་བུ་མོ་མཐིང་འོད་འབར༔ ད་ལྟ་མཁར་ཆེན་སྭ་ར་ཛ༔ ལང་གྲོ་ལོ་ཙ་ཏྲ་ཡ་བྷ༔ བོད་ཡུལ་གཏེར་ཆེན་བཟང་པོ་གྲགས༔ ཁམས་སུ་རིག་འཛིན་སུརྱ་ཞེས༔ སྣ་ཚོགས་སྤྲུལ་པ་མང་བརྒྱུད་མཐར༔ སྦས་པའི་ཚུལ་ལ་རྟོག་གེའི་གཟུགས༔ རེས་འགའ་བླུན་ནམ་མཁས་པའི་ཤན༔ འབྱེད་དཀའ་དེ་འདྲའི་སྐྱེས་བུ་ཞིག༔ མེ་ཁམས་མཁའ་ལྡིང་ལོ་པ་འབྱུང༔ དེ་ཚེ་ཕན་པའི་གྲོགས་དག་དང༔ གནོད་པའི་བདུད་དང་ཡོངས་འཛིན་དུས༔ གསལ་ཕྱིར་ཐུགས་ཀྱི་མེ་ལོང་བསྟན༔ དང་པོ་ཕན་པའི་ཡོངས་འཛིན་ནི༔ བདུན་ནམ་ཡང་ན་ཉེར་གཅིག་འབྱུང༔ བཅུ་གསུམ་བགྲང་བྱར་སོན་པའི་ཚེ༔ བི་མའི་སྤྲུལ་པས་རང་རིག་སྟོན༔ མཁན་ཆེན་སྤྲུལ་པས་སྡོམ་ཁྲིམས་འབོགས༔ བཱཻ་རོའི་སྤྲུལ་པས་རྗེས་སུ་སྐྱོངས༔ བདུད་སྤྲུལ་བར་ཆད་མ་བརྩམས་ན༔ ཁམས་དབུས་མཁས་པའི་གཙུག་རྒྱན་བྱེད༔ བཅུ་དྲུག་ལོན་ཚེ་བླ་མ་ནི༔ གཉགས་བན་ཛྙཱ་ན་ཀུ་མ་ར༔ ཁྲིམས་ལྡན་དམ་པས་བསྔགས་པ་བརྗོད༔ སོ་དྲུག་དགུ་མིག་འཕྲང་སླེབས་ཚེ༔ བཱཻ་རོའི་སྤྲུལ་པས་རྒྱུད་ལུང་འབོགས༔ ཞེ་གསུམ་མཚོ་རྒྱལ་དངོས་སྤྲུལ་གྱིས༔ རྗེས་བཟུང་ཟབ་མོའི་གཏེར་འགའ་འབྱིན༔ ཞེ་བཞིར་འཕགས་པའི་སྤྲུལ་པ་ཡིས༔ དབང་ཁྲིད་སྒོ་གསུམ་དོན་ལྡན་བྱེད༔ ཞེ་དྲུག་ལྷ་སྲས་སྤྲུལ་པར་མཇལ༔ སྙིང་ཐིག་བསྟན་པའི་བདག་པོར་བསྐོས༔ གཞན་ཡང་རྒྱལ་བའི་བློ་གྲོས་དང༔ མཆོག་དབྱངས་དཔལ་བརྩེགས་ཀླུའི་རྒྱལ་མཚན༔ དེ་སོགས་རིགས་བདག་མང་ཞིག་གིས༔ ཉེས་བཟློག་ཡང་དག་ལེགས་ཚོགས་སྤེལ༔ དེ་ཚེ་ཆོས་འདི་སྤེལ་བའི་སྣོད༔ བློན་ཆེན་སྤྲུལ་པ་ཀ་ཡི་མིང༔ སྤྲེལ་ཆུང་སྤྲུལ་པ་རིག་གྱི་མིང༔ འཕགས་པའི་སྤྲུལ་པ་བཟང་པོའི་མིང༔ རྒྱ་ཚའི་སྤྲུལ་པ་ཕྲིན་ལས་མིང༔ རྣམ་སྣང་སྤྲུལ་པ་རྡོ་རྗེའི་མིང༔ ཨཱ་ཙརྱ་སྤྲུལ་ཕན་པའི་མིང༔ ཆོས་རྒྱལ་སྤྲུལ་པ་རྒྱལ་གྱི་མིང༔ དཔལ་བརྩེགས་སྤྲུལ་པ་ཚེ་ཡི་མིང༔ མཆོག་དབྱངས་སྤྲུལ་པ་རྒྱལ་མཚན་མིང༔ དྲན་པའི་སྤྲུལ་པ་ཨོ་རྒྱན་མིང༔ ལྷ་ལུང་སྤྲུལ་པ་ ཁྱེའུ་ཆུང་རྣམ་རོལ་བློ་ཡི་མིང༔ རྨ་ཐོག་སྤྲུལ་པ་རཏྣའི་མིང༔ དེ་སོགས་སྐལ་ལྡན་རིག་པ་འཛིན༔ ཀུན་ཀྱང་ཆོས་འདིར་ཡིད་ཆེས་ཤིང༔ རྟེན་འབྲེལ་བཟང་པོས་མཚམས་སྦྱོར་འགྱུར༔ འདྲ་མིན་བདུད་སྤྲུལ་གནོད་བྱེད་ནི༔ མང་ཡང་དར་མའི་སྤྲུལ་པ་ཞིག༔ གླང་ལོ་གྲོགས་བྱེད་བདུད་དུ་འགྱུར༔ ཕྲག་ཏོག་ཁྱི་ཡི་ལོ་པ་ཞིག༔ ཀླུ་གོང་སྤྲུལ་ཡིན་དམ་སེལ་བྱེད༔ ཐང་བོན་སྐྱེ་བ་ཞེ་སྡང་སྦྲུལ༔ ངན་སྔགས་དུག་སྦྱོར་ཚེ་ལ་གཟན༔ བདུད་མོ་སྤྲེའུ་རྡོ་རྗེའི་མིང༔ གླགས་ལྟ་ལེགས་པའི་དཔལ་ལ་གནོད༔ དེ་རྣམས་བཟློག་པའི་རིམ་གྲོ་ནི༔ ཚེ་སྒྲུབ་སྲོག་བསླུ་མཆོད་སྦྱིན་དང༔ གདུགས་དཀར་ངག་འདོན་བྱད་འགྲོལ་དང༔ པདྨ་ཡབ་ཡུམ་སྙིང་ལ་སྒོམ༔ གསོལ་འདེབས་སེམས་བསྐྱེད་བློ་སྦྱོང་དང༔ དཔལ་ཆེན་ཕུར་བའི་བསྙེན་སྒྲུབ་གལ༔ ཐུགས་དམ་ཚིག་བདུན་སྙིང་པོར་དྲིལ༔ དེ་དག་གེགས་སེལ་མན་ངག་ཡིན༔ ཡང་ཅིག་གྲོགས་བྱེད་ཤེས་རབ་མ༔ རིགས་ལྔས་བྱིན་གྱིས་བརླབས་པ་ལས༔ ཤར་ནས་སྔགས་སྐྱེས་བཛྲ་མིང༔ མགྲིན་པར་སྨེ་བ་དམར་སྨུག་བརྒྱན༔ སྙིང་ཀར་ཧ་ཡིག་ཊཀྐིའི་བརྡ༔ འབྲོམ་བཟའ་རྒྱལ་རིགས་བྱང་ཆུབ་སྨན༔ དེར་འཕྲད་ཆོས་སྲིད་ལེགས་ཚོགས་འཕེལ༔ དེ་བཞིན་ནུས་འབྱིན་ས་ལེ་སྤྲུལ༔ ཉམས་རྟོགས་རྩལ་རྒྱས་དྲི་མོལ་བྱེད༔ དམར་རྒྱན་འདོད་དགུའི་དཔལ་ཀུན་སྦྱིན༔ རྣ་མཆོག་ལོ་པ་ཁྲོ་ཞིང་སྒེག༔ དགེ་རྒྱས་སྤྲུལ་པ་ཨ་ཡུའི་མིང༔ རོང་ཆེན་བྱང་ཤར་མཚམས་ནས་འོང༔ གཞན་ཡང་ཆོས་འདིའི་བརྒྱུད་འཛིན་ནམ༔ བསྟོད་བསྔགས་རྗེས་སུ་ཡི་རང་བྱེད༔ ཕྱོགས་མཚམས་ནས་འོང་དེ་དག་དང༔ འདྲ་མིན་བདུད་དང་ཤན་འབྱེད་དཀའ༔ དེ་ཕྱིར་རབ་ཏུ་བག་ཡོད་བྱོས༔ ཡང་གཅིག་གྲོགས་བྱེད་ཤྲཱི་པྲཛྙཱི༔ རིགས་ལྔའི་ལུང་བྱང་སྙིང་ལ་སྦོས༔ གུ་རུ་པདྨ་ང་ཉིད་ལ༔ དུས་ཀུན་གསོལ་བ་འདེབས་པའི་ཚིག༔ ཁ་ཞེ་མེད་པར་འདི་བཞིན་མཛོད༔ ཨེ་མ་ཧོ༔ ཆོས་སྐུའི་སྟོན་པ་ཀུན་ཏུ་བཟང༔ ལོངས་སྤྱོད་རྫོགས་སྐུ་རིགས་མཆོག་ལྔ༔ ཐུགས་རྗེ་འགགས་མེད་རིགས་གསུམ་མགོན༔ གཅིག་བསྡུས་ཨོ་རྒྱན་པདྨ་ལ༔ ཁ་ཞེ་མེད་པར་གསོལ་བ་འདེབས༔ ལུས་དང་ལོངས་སྤྱོད་མཆོད་པར་འབུལ༔ ཚེ་རབས་སྐྱེ་བ་ཐམས་ཅད་དུ༔ བརྩེ་ཆེན་ཐུགས་རྗེས་བཟུང་དུ་གསོལ༔ དུས་མིན་འཆི་བའི་ཚེ་འཕྲང་ལས༔ མྱུར་དུ་ཐར་བར་མཛད་དུ་གསོལ༔ ཆོས་མིན་སྡིག་པའི་སྐྱོན་རྣམས་ལས༔ རྣམ་པར་གྲོལ་བར་མཛད་དུ་གསོལ༔ མི་དགེའི་བཤེས་དང་སྡིག་གྲོགས་ལ༔ ནམ་ཡང་འཕྲད་པར་མ་གྱུར་ཅིག༔ རྣམ་མཁྱེན་ཉེ་རྒྱུ་བྱང་ཆུབ་སེམས༔ རྒྱུད་ལ་སྐྱེ་བར་མཛད་དུ་གསོལ༔ ཚེ་རབས་ཀུན་ཏུ་དགེ་བའི་གྲོགས༔ འབྲལ་མེད་རྟག་ཏུ་འགྲོགས་པར་ཤོག༔ སྐྱབས་ཀུན་གཅིག་འདུས་གུ་རུ་རྗེས༔ མཆོག་ཐུན་དངོས་གྲུབ་སྩལ་དུ་གསོལ༔ ཨོཾ་ཨཱ༔ཧཱུྃ་བཛྲ་གུ་རུ་པདྨ་སིདྡྷི་ཧཱུྃ༔ དེ་ལྟར་གསོལ་འདེབས་སྨོན་ཚིག་འདི༔ གཞན་ལ་སྤེལ་ཞིང་རང་ཉམས་ལོངས༔ དུས་བབས་ཆོས་ཡིན་བྱིན་རླབས་མྱུར༔ གཞན་ཡང་མཚོ་རྒྱལ་ང་ཉིད་ལ༔ མོས་པ་ལྡན་པའི་གང་ཟག་གིས༔ རྩེ་གཅིག་གུས་པས་གསོལ་འདེབས་ན༔ སྐྱབས་སུ་གྱུར་བའི་རྩ་བ་གསུམ༔ བདག་དང་དབྱེར་མེད་སྤྱི་བོར་སྒོམས༔ ཡེངས་མེད་ཚིག་འདིས་གསོལ་བ་ཐོབ༔ ཨེ་མ་ཧོ༔ དུས་གསུམ་བཞུགས་པའི་བླ་མ་དང༔ སངས་རྒྱས་བྱང་སེམས་ཡི་དམ་ལྷ༔ གནས་གསུམ་དཔའ་བོ་མཁའ་འགྲོའི་ཚོགས༔ ཀུན་འདུས་ཨོ་རྒྱན་ཆེན་པོ་དང༔ དབྱེར་མེད་རྒྱལ་ཡུམ་མཁར་ཆེན་བཟའ༔ སྐྱབས་མཆོག་ཡེ་ཤེས་མཚོ་རྒྱལ་ལ༔ ཁྱེའུས་མ་ལ་འབོད་པ་ལྟར༔ སྙིང་ནས་གུས་པས་གསོལ་བ་འདེབས༔ བདག་ལ་བརྩེ་བས་ཉེར་དགོངས་ནས༔ འདི་ཕྱི་བར་དོ་ཐམས་ཅད་དུ༔ མ་ཁྱོད་འབྲལ་མེད་འགྲོགས་ནས་ཀྱང༔ ལུང་སྟོན་ཆོས་གསུང་ཉམས་རྟོགས་སྤོར༔ སྣང་བཞིའི་ཡེ་ཤེས་མཐར་ཕྱིན་ནས༔ འཇའ་ལུས་འགྲུབ་པར་བྱིན་གྱིས་རློབས༔ ཇི་སྲིད་འཁོར་བ་མ་སྟོང་བར༔ འགྲོ་དོན་ལྷུན་གྱིས་འགྲུབ་པ་དང༔ སངས་རྒྱས་བསྟན་པའི་གཞི་ཚུགས་ནས༔ བཤད་སྒྲུབ་ཆོས་དང་འབྲལ་མེད་ཤོག༔ ཨོཾ་ཨཱ༔ཧཱུྃ་ཛྙཱ་ན་ཌཀྐཱི་སརྦ་སིདྡྷི་ཕ་ལ་ཧཱུྃ༔ དེ་ལྟར་རྒྱུན་དུ་གསོལ་འདེབས་དང༔ ཚོགས་དང་མེ་མཆོད་མཎྜལ་སོགས༔ དུས་ཆེན་ཉེར་ལྔ་ཆགས་མེད་དང༔ སྲོག་རྩོལ་རླུང་ལ་གནད་བསྣུན་ན༔ ཚེ་འདིར་མཁའ་སྤྱོད་འགྲུབ་པར་འགྱུར༔ ཀྱཻ་ཧོ་མཆོག་དམན་འགྲོ་བ་ཀུན༔ དད་པ་ཆོས་ཀྱི་རྩ་བ་ཡིན༔ འཕོ་འགྱུར་མེད་པར་གཏན་ལ་ཕོབས༔ མོས་གུས་བྱིན་རླབས་མྱུར་འགུགས་ཡིན༔ ཡང་ཡང་སྙིང་གི་དཀྱིལ་ནས་སྒོམས༔ དག་སྣང་གསང་སྔགས་ཉེ་ལམ་ཡིན༔ ཀུན་གྱི་ཡོན་ཏན་དྲན་པ་གཅེས༔ གསོལ་འདེབས་ཐུགས་རྗེའི་རྒྱུད་བསྐུལ་ཡིན༔ ཁ་ཙམ་མིན་པར་དུས་དྲུག་མཛོད༔ འཁོར་བ་རྣམ་རྟོག་བྱེད་ལས་ཡིན༔ འཁྲུལ་བའི་རང་མཚངས་སྟོང་པར་ལྟོས༔ སྡོམ་ཁྲིམས་ཆོས་ཀྱི་གཞི་མ་ཡིན༔ ངོ་ལྐོག་མེད་པའི་སྤང་བླང་མཛོད༔ དམ་ཚིག་རྩ་བ་བླ་མ་ཡིན༔ ཅི་མཛད་ཆོས་སུ་མཐོང་བ་དངཿ བཀའ་བཞིན་སྒྲུབ་ལ་ལྷོད་མེད་མཛོདཿ དངོས་གྲུབ་རྩ་བ་ཡི་དམ་ཡིན༔ བསྙེན་སྒྲུབ་སྒོ་གསུམ་འབད་པས་སྒྲུབ༔ ཕྲིན་ལས་རྩ་བ་ཆོས་སྲུང་ཡིན༔ ཚོགས་དང་གཏོར་མ་འབད་པ་གཅེས༔ དེ་ལྟར་ཉམས་སུ་ལོངས་མཛོད་དང༔ ང་དང་འདུ་འབྲལ་ག་ལ་ཡོད༔ ས་མ་ཡཱ༔ མ་འོངས་ཟབ་ཆོས་དག་སྣང་སྐོར༔ སྤེལ་བའི་དུས་རྟགས་འདི་བཞིན་འབྱུང༔ མི་རྣམས་དུག་ལྔ་འཆོལ་ཉོག་སྤྱོད༔ ཆོས་མཛད་དགུན་གྱི་མེ་ཏོག་བཞིན༔ སྡིག་སྤྱོད་སྐྱེ་བོས་ས་སྟེང་འགེངས༔ སྔགས་ལམ་ཞུགས་རྣམས་དམ་སེལ་གཡོ༔ ཐུབ་པའི་བསྟན་པ་རྟགས་ལ་རེ༔ སྒོམ་སྒྲུབ་ནམ་ལངས་སྐར་ལྟར་ཡལ༔ སྤྱོད་པ་མཛེས་ཆས་འགྲོ་བ་བསླུ༔ ད་ལྟའི་རྗེ་འབངས་སྤྲུལ་པ་འགའ༔ མཐའ་དབུས་ཀུན་ལ་ངེས་མེད་འབྱུང༔ འགྲོ་བ་བསོད་ནམས་མ་བསགས་པས༔ བདུད་དང་སྲིན་པོ་སྐྱབས་སུ་བརྟེན༔ ཡུལ་ཀུན་མི་བདེའི་གྲགས་པས་ཁྱབཿ དེ་འདྲའི་དུས་སུ་སྟོན་མཁན་གྱིས༔ འགྲོ་བ་བདེ་ལ་འགོད་པར་འགྱུར༔ གལ་ཏེ་ལུང་བསྟན་སྐྱེས་བུ་ཡང༔ ཕྱི་བཤོལ་ཐེ་ཚོམ་བདུད་དབང་འགྱུར༔ འཁོར་བའི་བྱ་བས་གཡེངས་གྱུར་ན༔ མ་དང་ཌཱཀྐིའི་བཀའ་ཆད་ཀྱིས༔ ཚེ་ལ་བར་ཆད་འབྱུང་བས་གཟོབས༔ དེའི་ཕྱིར་རབ་ཏུ་འཚོ་ཤེས་ཀྱིས༔ ཆོས་ལ་ཡིད་ཆེས་ངེས་ཤེས་སྐྱེས༔ རྒྱལ་བའི་བཀའ་དང་མི་འགལ་ཞིང༔ དགེ་བཅུའི་སྤྱོད་པ་དང་བླངས་ན༔ མཐུན་རྐྱེན་ལྷ་དང་སྲུང་མས་སྒྲུབ༔ འགལ་རྐྱེན་མ་དང་ཌཱཀྐིས་སེལ༔ ཆོས་འདིར་བརྒྱུད་གསུམ་བླ་མ་དང༔ རྒྱུད་སྡེའི་ལྷ་ཚོགས་བྱིན་རླབས་རྫོགས༔ གནས་གསུམ་ཌཱཀྐིས་སྲུང་མ་བྱེད༔ སྐལ་བ་ལྡན་པའི་གང་ཟག་གིས༔ མཐོང་བ་ཙམ་གྱིས་བར་ཆད་སེལ༔ ཐོས་པས་མི་བརྗེད་གཟུངས་ཐོབ་ཅིང༔ བསྒྲུབ་པས་མཆོག་ཐུན་དངོས་གྲུབ་ཐོབ༔ དུས་མཐའི་སྐལ་ལྡན་སྐྱེས་བུ་དང༔ འཕྲད་ནས་འགྲོ་དོན་མཐའ་ཡས་ཤོག༔ ཅེས་པའང་དུས་མཐའི་དགེ་སྦྱོང་ལུང་རྟོགས་མིང་ལ་དངོས་དང་ཉམས་ཀྱི་སྣང་བར་གུ་རུ་ཡབ་ཡུམ་གྱིས་བྱིན་གྱིས་བརླབས་ཤིང་། རང་གིས་ཀྱང་ཁ་ཞེ་མེད་པར་གསོལ་བ་བཏབ་པའི་མཐུ་ལས་བསླུ་མེད་རྡོ་རྗེའི་གསུང་གི་བརྡ་ཐོགས་མེད་དུ་ཤར་བ་བཞིན་ཐེ་ཚོམ་མེད་པར་བྲིས་པ་དུས་ཀུན་ཏུ་དགེ་ཞིང་བཀྲ་ཤིས་པར་གྱུར་ཅིག །