ཁ་བྱང་གསལ་བ་སྙིང་པོའི་ལྡེ་མིག
དམ་ཆོས་ཡང་ཟབ་པདྨའི་ཐུགས་བཅུད་ལས༔ ཁ་བྱང་གསལ་བ་སྙིང་པོའི་ལྡེ་མིག་བཞུགས༔
རང་བྱུང་ཤེས་རབ་ཕ་རོལ་ཕྱིན༔ སྟོང་ཉིད་དབྱིངས་ཀྱི་ཡུམ་ལ་འདུད༔ བདག་ཉིད་ཆེན་པོ་ཨོ་རྒྱན་རྗེ༔ ལས་དང་སྨོན་ལམ་མཐུ་བཙན་པས༔ རང་བྱུང་པདྨའི་སྡོང་པོ་ལ༔ སྐྱེ་མེད་དབྱིངས་ནས་གཟུགས་སྐུར་སྤྲུལ༔ འཕགས་ཡུལ་སྟོན་པའི་བསྟན་པ་བསྐྱངས༔ གདོང་དམར་བོད་ཀྱི་ཡུལ་དུའང༔ སྤྱན་དྲངས་གདུལ་བྱ་དུས་བབ་ཚེ༔ ལྷ་འདྲེ་བཏུལ་ཞིང་གཙུག་ལག་བརྩིགས༔ སྐལ་ལྡན་རྡུལ་གྱི་གྲངས་མཉམ་པ༔ རིག་པ་འཛིན་པའི་ས་ལ་བཞག༔ ཁྱད་པར་ལྷ་མོ་དབྱངས་ཅན་མ༔ གདུལ་བྱའི་དབང་གིས་བུད་མེད་ཚུལ༔ གཟུངས་མ་ཡེ་ཤེས་མཚོ་རྒྱལ་གྱིས༔ ཐུགས་དམ་ཕུར་པའི་ཆོས་ལ་མཛད༔ ཡུམ་ཆེན་འཁོར་ལོ་རྒྱས་འདེབས་མ༔ འཇིགས་བརྒྱད་སྐྱོབས་ཕྱིར་རྗེ་བཙུན་མཆོག༔ ལྷ་མོ་སྒྲོལ་མའི་སྒྲུབ་ཐབས་གཅིག༔ དགོས་ཞེས་ཡང་ཡང་བསྐུལ་ངོ་རུ༔ སྔོན་ཚེ་གྲུ་འཛིན་རི་བོའི་རྩེར༔ བླ་མ་སྣང་བ་མཐའ་ཡས་དང༔ འཕགས་པ་སྤྱན་རས་གཟིགས་དབང་ལ༔ འཕགས་མ་ཕྱི་ནང་གསང་གསུམ་གྱི༔ མན་ངག་བྱེ་བ་མང་དུ་ཞུས༔ དེ་དག་ཀུན་གྱི་ཡང་སྙིང་མཆོག༔ སེང་ལྡིང་ནགས་ཀྱི་སྒྲོལ་མ་ཡི༔ སྒྲུབ་པ་མར་གྱི་ཉིང་ཁུ་བཞིན༔ བཅུད་དུ་བསྡུས་པའི་མན་ངག་འདི༔ རིན་ཆེན་སྲོག་གི་དྭངས་མ་ཡིན༔ འོན་ཀྱང་བསམ་ཡས་དབུ་རྩེ་རུ༔ ཆོས་རྒྱལ་ལ་སོགས་རྗེ་འབངས་ལྔ༔ མཚོ་རྒྱལ་ལ་སོགས་གཟུངས་མ་ལྔ༔ བཻ་རོ་ལ་སོགས་ལོ་ཙཱ་ལྔ༔ གཞན་ཡང་ཆོས་བློན་རྡོ་རྗེ་དཔལཿ ཕལ་པའི་གང་ཟག་ཉེར་ལྔར་བཅས༔ ཀུན་གྱིས་ཡང་ཟབ་གདམས་པ་གཅིག༔ དགོས་ཞེས་གསེར་གཡུའི་མཎྚལ་དང༔ སྒོ་གསུམ་བཏུད་ནས་གསོལ་བཏབ་ཚེ༔ ཐུགས་རྗེ་ཆེ་ལྡན་བདག་ཉིད་ཀྱིས༔ འཇིགས་སྐྱོབས་ཐར་བའི་ལམ་སྟོན་པའི༔ གདམས་ཟབ་འདི་ཉིད་ལེགས་པར་བསྟན༔ ས་མ་ཡཱ༔ དེའང་དག་སྣང་ཟབ་མོའི་ཆོས༔ གཏེར་རིགས་ཕལ་དང་མི་འདྲ་བས༔ དབྱིངས་རིག་སྟོང་གསལ་སྒྲོམ་དུ་སྦས༔ སྨོན་ལམ་ལས་འཕྲོ་དུས་བབ་ཚེ༔ མཚོ་རྒྱལ་སྤྲུལ་པའི་གང་ཟག་དང༔ གདམས་པ་འདི་ཉིད་འཕྲད་པར་ཤོག༔ ཅེས་པའི་སྨོན་ལམ་རྒྱས་བཏབ་ཚེ༔ ཇོ་མོ་མཁར་ཆེན་མཚོ་རྒྱལ་གྱིས༔ རིན་ཆེན་དངུལ་གྱི་མཎྜལ་ལ༔ གཡེར་གཡུ་སྤུང་པའི་ཚོམ་བུ་བཀོད༔ དར་ཟབ་སྣ་ལྔའི་ཡོན་དང་བཅས༔ གུས་པས་ཕྱག་འཚལ་འདི་སྐད་ཞུས༔ ཨེ་མ་དུས་གསུམ་རྒྱལ་བའི་སྲས༔ ཚད་མེད་མཁྱེན་བརྩེ་ནུས་པའི་བདག༔ ཉིད་ཀྱི་ཐུགས་བཅུད་རྗེ་བཙུན་མའི༔ སྒྲུབ་ཐབས་དབང་དང་མན་ངག་བཅས༔ ཡང་ཟབ་ཆོས་ཚན་ཉི་ཤུ་ལྔ༔ དགོངས་པའི་གཏེར་དུ་རྒྱས་བཏབ་ནས༔ བདག་ཉིད་སྤྲུལ་པའི་གང་ཟག་དང༔ འཕྲད་པའི་སྨོན་ལམ་བསླུ་མེད་པས༔ དབུགས་དབྱུང་གཏད་རྒྱ་མཛད་པ་ཡི༔ བཀའ་དྲིན་ཐུགས་རྗེ་བརྗོད་ལས་འདས༔ དེ་ཚེ་དུས་དང་གནས་དང་གྲོགས༔ སྐལ་ལྡན་ཆོས་ཀྱི་བདག་པོ་དང༔ བརྒྱུད་འཛིན་སློབ་མ་ཇི་ལྟར་འབྱུང༔ གཤེ་སྐུར་ལོག་ལྟས་སྨོད་དམ་བསྔགས༔ འགྲོ་ལ་ཕན་པ་ཇི་ལྟར་འབྱུང༔ གསང་རྒྱ་དགོས་སམ་ཁྱབ་བརྡལ་སྟོན༔ ཐམས་ཅད་མཁྱེན་པས་གསུང་དུ་གསོལ༔ བདག་གི་ཡིད་ལ་ངེས་པའི་གཟུངས༔ མི་བརྗེད་དྲན་པས་རྒྱས་བཏབ་ནས༔ གུ་རུའི་སྨོན་ལམ་ཐུགས་རྗེའི་མཐུས༔ དུས་ལ་བབས་ཚེ་གསལ་བར་ཤོག༔ དེ་སྐད་ཞུས་ཚེ་བདག་ཉིད་ཀྱི༔ དུས་གསུམ་མཁྱེན་པའི་མངོན་ཤེས་ཀྱིས༔ ཇི་ལྟར་གསལ་བཞིན་ལེགས་པར་བསྟན༔ ས་མ་ཡཱ༔ རྒྱ་རྒྱ་རྒྱ༔ ཡང་ཟབ་འཕགས་མའི་སྒྲུབ་སྐོར་འདི༔ སྟོན་པའི་གང་ཟག་མཚོ་རྒྱལ་མས༔ སྤྲུལ་བསྒྱུར་སྣ་ཚོགས་མཛད་པ་ཡི༔ གཟུགས་ལ་ངེས་མེད་ཚུལ་སྟོན་ཀྱང༔ རྟོག་གེའི་ཚུལ་ལམ་ཡང་ན་བླུན༔ འཕྱུགས་མེད་བདག་ཉིད་ཨོ་རྒྱན་རྗེར༔ ཡིད་ཆེས་ངེས་ཤེས་ལྡན་པ་དང༔ རྗེ་བཙུན་སྒྲོལ་མའི་མཚན་ཙམ་ལ༔ མཆི་མ་འཁྲིགས་པའི་མོས་གུས་ལྡན༔ དེ་ཡང་རྟེན་འབྲེལ་རབ་འབྲིང་ཐ༔ རབ་ནི་རྒྱལ་རིགས་ལོངས་སྤྱོད་ལྡན༔ བགྲང་བྱ་བཅུ་དགུ་ཉི་ཤུའི་མཚམས༔ དངོས་གཏེར་ཟབ་མོའི་ཁ་བྱང་འདོན༔ མེ་བྱའི་ལོ་པ་དབང་པོ་དྭངས༔ དྲི་མེད་བཤེས་གཉེན་སྤྲུལ་པ་ཡིན༔ རྗེས་བཟུང་རྟེན་འབྲེལ་ཕུན་སུམ་ཚོགས༔ སྔགས་བཙུན་འགྲོ་དོན་ཕ་མཐའ་ཡས༔ འབྲིང་ནི་དབུས་གཙང་སྔགས་པའི་རིགས༔ ཉེར་ལྔར་ས་གཏེར་མང་དུ་འདོན༔ མཚོ་རྒྱལ་དངོས་ཀྱིས་རྗེས་བཟུང་ནས༔ ཕུར་པའི་གཏེར་ཐོན་གྲུབ་པ་བརྙེས༔ ཐ་མ་རྒྱལ་མོ་རོང་གི་སར༔ གདོལ་བའི་རིགས་ལས་མེ་ཡི་ཁམས༔ བྱའམ་ཁྱི་ཡི་ལོ་པ་འབྱུང༔ རྟོག་པ་གང་ཤར་ཚིག་སྨྲ་བ༔ གཡོ་མེད་བྱིས་པའི་ངང་ཚུལ་ཅན༔ རྗེ་འབངས་སྤྲུལ་པའི་ཡོངས་འཛིན་གྱིས༔ རྗེས་བཟུང་བླ་མའི་གསུང་བཅགས་པའི༔ རྐྱེན་དེས་ཡན་ལག་སྐྱོན་དང་ལྡན༔ ཚད་མེད་སྙིང་རྗེ་ཐོལ་བྱུང་དང༔ མོས་གུས་ཤུགས་འབྱུང་སྤྱོད་པ་སྐྱོངས༔ དེ་ཉིད་བཅུ་གསུམ་བགྲང་བྱ་རུ༔ པདྨ་བདག་གིས་རྗེས་བཟུང་ཞིང༔ འཕགས་མས་ཐུགས་རྗེས་བསྐྱངས་པའི་རྟགས༔ དངོས་ཉམས་རྨི་ལམ་དུ་མ་འབྱུང༔ ཉེར་ལྔར་མཁའ་འགྲོས་དབུགས་དབྱུང་ཞིང༔ བདུད་མོས་ཚེ་ལ་བར་ཆད་བརྩམས༔ སོ་བདུན་ཟབ་ཆོས་འདི་ཉིད་ཀྱི༔ སྒྲུབ་ཐབས་དགོངས་པའི་གཏེར་རྡོལ་ཡང༔ ལོག་སྨོན་བདུད་སྤྲུལ་གང་ཟག་འགས༔ རྟེན་འབྲེལ་གནད་ཀྱི་སྒོ་མོ་འགག༔ ཞེ་གཅིག་མཚོ་རྒྱལ་སྤྲུལ་པ་ཡིས༔ གཏེར་བཏོན་གདམས་དང་རྗེ་བཙུན་མའི༔ རྣམ་རོལ་མཐོང་དང་གདམས་པ་ཐོབ༔ ལས་ཅན་སྐྱེས་བུས་བསྐུལ་བ་ལས༔ ལེགས་པའི་རྟེན་འབྲེལ་འགྲིགས་ཀྱང་སྲིད༔ དུས་ནི་བཞི་བཅུའི་མར་འགྲིབ་ལ༔ མི་རྣམས་ཐེ་ཚོམ་ལོག་ལྟས་བསླད༔ དད་དང་ངེས་འབྱུང་བསྙེན་སྒྲུབ་གཡེལ༔ སྡིག་པའི་ལས་སྤྱོད་ལྷ་ཀླུ་འཁྲུགས༔ མི་ནད་ཕྱུགས་ནད་མཚོན་འཁྲུགས་དར༔ དེ་ཚེ་དེ་དག་བཟློག་པའི་ཐབས༔ འདི་ལས་ལྷག་པ་གང་ཡང་མེད༔ གནས་ནི་ཚོང་འདུས་ཆེན་པོའམ༔ རྒྱལ་པོའི་ཕོ་བྲང་ཉེ་བའི་ཕྱོགས༔ མི་དང་མི་མིན་སྣ་ཚོགས་འཚོགས༔ དེ་འདྲའི་གནས་སུ་མན་ངག་སྟོན༔ གྲོགས་ཀྱི་མཆོག་ནི་ཆོས་འདི་སྤེལ༔ བསྔགས་ཤིང་རྗེས་སུ་ཡི་རང་བྱེད༔ ཁྱད་པར་རིགས་གསུམ་སེམས་དཔའ་དང༔ དབྱེར་མེད་ཆོས་རྒྱལ་རྣམ་སྣང་མཛད༔ ཀླུ་དབང་ཐུགས་མཆོག་ནམ་སྙིང་ཞབས༔ ཤིང་རྟ་ཆེན་པོ་ན་གརྫུ༔ རིམ་བཞིན་ཤར་ལྷོ་ནུབ་བྱང་དབུས༔ རྡོ་རྗེའི་མིང་ཅན་བཞི་འབྱུང་བ༔ ཤར་ནས་སྟག་ཡོས་མདོག་སྨུག་སྒེག༔ ལྷོ་ནས་འབྲུག་ལོ་དམར་མདངས་དྭངས༔ ནུབ་ནས་བྱི་བ་ས་ཡི་ཁམས༔ བྱང་ནས་ཞི་ཚུལ་ཁྲིམས་ལྡན་དཀར༔ བྱའམ་ཁྱི་ལོ་ཆུ་ཁམས་པ༔ དབུས་ནས་མཁའ་གྲུབ་བྱང་ཆུབ་སེམས༔ རྟ་ཡི་ལོ་པ་པདྨའི་མིང༔ གདུགས་ཀྱི་ཚུལ་དུ་ངེས་པར་འབྱུང༔ ཕྱོགས་བཞིར་ཆོས་འདིར་མོས་པའི་བུ༔ ད་ལྟའི་རྗེ་འབངས་ཆོས་བློན་ལྔ༔ མོས་གུས་སྙིང་སྟོབས་དད་ལྡན་པས༔ མ་འོངས་དྷརྨ་དབང་དང་ཚེ༔ གསལ་བྱེད་ཐོག་མའི་མིང་འཛིན་པ༔ རྟེན་འབྲེལ་བཟང་པོས་མཚམས་སྦྱོར་འགྱུར༔ གཞན་ཡང་ལས་ཅན་སྐྱེས་བུ་བརྒྱད༔ རིགས་དང་གྲུབ་དང་སྔགས་དང་ཚེ༔ གསལ་དང་བསྟན་པ་དགའ་དང་བཟང༔ མ་ངེས་ཕྱོགས་ནས་འབྱུང་བར་འགྱུར༔ ཟབ་གཏེར་གྲོགས་ཀྱི་དབྱེ་བ་ལ༔ བདེ་ཆེན་གཉུག་མའི་ཡེ་ཤེས་དོན༔ སྟོན་མཛད་གཟུངས་མ་ལྔ་འབྱུང་སྟེ༔ དེ་ཡང་ནུས་འབྱིན་ས་ལེ་དང༔ དམར་རྒྱན་འབྲོམ་བཟའ་ཕོ་གྱོང་བཟའ༔ གཞན་ཡང་རྒྱལ་རིགས་བྱང་ཆུབ་སྨན༔ མ་ངེས་སྤྲུལ་པས་ལེགས་ཚོགས་སྤེལ༔ དེ་དག་འདྲ་མིན་འདྲར་སྟོན་པའི༔ ཤ་ཟ་སྨན་མོས་ཉེས་ཚོགས་བསྐྱེད༔ དེ་ཕྱིར་རབ་བྱུང་ཚངས་པར་སྤྱོད༔ བརྟུལ་ཞུགས་མཆོག་དེར་འབད་པ་ན༔ གེགས་ཞི་བསམ་རྒུའི་འདོད་དོན་འབྱུང༔ བརྒྱུད་འཛིན་སློབ་མ་འགའ་འབྱུང་ཡང༔ ལས་ལྡན་གང་ཟག་བརྒྱད་གསུམ་ལས༔ ལྔ་ཡིས་གཞན་ལ་ཕན་པ་དང༔ ཆོས་ལ་བརྩོན་ནུས་བསྟན་པ་འཛིན༔ འབྲེལ་ཐོག་ཕོ་མོ་སུམ་འབུམ་དང༔ ཡང་ཟབ་དང་འབྲེལ་ལྔ་བརྒྱར་ལྷག༔ ཕལ་ཆེར་གནས་སྐབས་སྐྱོན་ལས་གྲོལ༔ འགའ་ཞིག་ཐར་བའི་ལམ་སྣ་ཟིན༔ སྔོན་གྱི་སྨོན་ལམ་མཐུ་བཙན་པས༔ སྐལ་ལྡན་དེ་དང་སུ་འབྲེལ་བ༔ སྐྱེ་བ་བདུན་ནམ་ཉེར་གཅིག་ན༔ མཚོ་རྒྱལ་ཁྱོད་ཀྱིས་དབུགས་དབྱུང་ནས༔ པདྨ་ང་ཡིས་རྗེས་སུ་འཛིན༔ ས་མ་ཡཱ༔ རྒྱ༔ རྒྱ༔ རྒྱ༔ ཡང་ཅིག་ཉོན་དང་ཤེས་རབ་མ༔ མི་བརྗེད་གཟུངས་ཐོབ་མཁར་ཆེན་བཟའ༔ མ་འོངས་དད་ལྡན་སྐྱེས་བུ་དེ༔ ཉི་ཤུ་རྩ་ལྔའི་ལོ་གྲངས་བར༔ གཞན་གྱིས་སྡང་ཞིང་གཤེ་སྐུར་འདེབས༔ ཁྱད་པར་ཆོས་ལ་གནག་པ་ཡི༔ རྗེ་ཡི་བོན་བློན་ཕལ་མོ་ཆེ༔ འགའ་ཞིག་བཙུན་པར་བརྫུས་ནས་སུ༔ ཉམས་ཆགས་སྐུར་འདེབས་མི་ཁ་སློང༔ དགའ་བའི་མིང་ཅན་འཁྲུགས་གཞི་བྱེད༔ དེ་སོགས་མི་བདེ་སྤེལ་ན་ཡང༔ སྤང་ལས་རྡོལ་བའི་ཤ་མོང་བཞིན༔ ཤེས་རབ་མྱུར་ཞིང་ཡོན་ཏན་ཚོགས༔ ཉི་ཤར་དབྱུག་པས་ཁོག་མི་སྲིད༔ ཉེར་བདུན་ཕན་ཆད་ད་ལྟའི་དུས༔ མོས་གུས་ལྡན་པའི་དགེ་སློང་མཆོག༔ གནུབ་བན་སྤྲུལ་པ་མཚོ་ཡི་མིང༔ དེས་བཀུར་གཞན་ཡང་ཆོས་རྒྱལ་གྱི༔ སྤྲུལ་པས་བླ་མར་བསྔགས་པ་སོགས༔ བཟང་པོའི་གྲགས་པས་འགྲོ་མང་འདུད༔ ཁྱད་པར་གདམས་པ་ཟབ་མོ་འདི༔ ཉམས་སུ་ལེན་པའི་སྐལ་བཟང་དེ༔ གནས་སྐབས་བར་ཆད་རྐྱེན་ལས་གྲོལ༔ དད་ལྡན་ཐར་པའི་གླིང་དུ་འགྲོ༔ སྐལ་མེད་རྣམས་ཀྱང་འཁོར་མཐའ་ཟད༔ གསང་རྒྱ་སྐལ་ལྡན་ཕལ་ཆེར་ལས༔ ཕལ་བ་རྣམ་ལ་ཁྱབ་བརྡལ་དུ༔ བསྒྲགས་ན་ནོར་བུ་ཚོང་དུས་སུ༔ འགྲིམ་པ་སྔ་ན་འགའ་ཡིས་སྨོད༔ བཅུ་དྲུག་ཟླ་བའི་བར་དག་ཏུ༔ ལས་ལྡན་དང་པོ་མཐོང་བ་དེས༔ ཉམས་སུ་ལོངས་ལ་རིམ་གྱིས་སྤེལ༔ མ་འོངས་དུས་ཀྱི་སྐལ་བ་ཅན༔ ལས་འཕྲོ་ལྡན་པ་རྒྱལ་གྱི་མིང༔ ཉིན་བཞིན་པདྨ་ང་ཉིད་ལ༔ དུས་དྲུག་གསོལ་འདེབས་ཆགས་མེད་དང༔ ཚེས་བཅུ་ཉེར་ལྔར་ཚོགས་མཆོད་དང༔ འཕགས་མའི་ཕྱག་འཚལ་གཟུངས་བསྙེན་སྒྲོགས༔ སྲོག་བསླུ་མཆོད་སྦྱིན་ཆེ་ཕྲ་ལ༔ འབད་ན་ཚེ་གེགས་འཕྲང་གྲོལ་བས༔ དྲུག་ཅུའི་མཚམས་བར་འཚོ་ཡང་སྲིད༔ གདུལ་བྱའི་སྣང་བ་མ་དག་པས༔ ལོག་རྟོག་སྐུར་འདེབས་སྨོད་གྱུར་ན༔ ངེས་མེད་ཚེ་ལ་གཟན་པར་འགྱུར༔ དེ་ཕྱིར་རང་གི་སྤྱོད་ལམ་དང༔ ཀུན་སློང་བྱམས་དང་སྙིང་རྗེ་ཡིས༔ མཆོག་དམན་དགའ་བའི་ཐབས་ལ་འབུངས༔ ཆོས་བཞིན་སྤྱོད་པའི་གང་ཟག་དེ༔ བར་ཆད་བདུད་ལས་རྣམ་རྒྱལ་ནས༔ བདག་གཞན་དོན་གཉིས་འགྲུབ་པར་ཤོགཿ ས་མ་ཡཱ༔ རྒྱ་རྒྱ་རྒྱ༔ ཅེས་སྔོན་གྱི་བག་ཆགས་བཟང་པོ་སད་པའི་རྐྱེན་དུ་ལས་ལྡན་སྐྱེས་བུས་བསྐུལ་བ་དང་རྟེན་འབྲེལ་ལེགས་པའི་མཚམས་སྦྱོར་བཅས་སྤྲུལ་མིང་པ་ལུང་རིག་གླིང་པ་རྩལ་གྱིས་དག་པར་ཕབ་པ་དུས་ཀུན་དུ་དགེ་བར་གྱུར་ཅིག །སརྦ་ཛ་ཡནྟུ།