ལུང་རིག་གླིང་པ་ཉིད་ལ་དགོངས་གཏེར་ཇི་ལྟར་བབས་ཚུལ།
༄༅། ལུང་རིག་གླིང་པ་ཉིད་ལ་དགོངས་གཏེར་ཇི་ལྟར་བབས་ཚུལ། ཟབ་ཆོས་པདྨ་དྲག་ཁྲོས་ཀྱི་ལུང་བྱང་ལས། རྡོ་རྗེ་མཁའ་འགྲོས་བྱིན་གྱིས་བརླབས་པའི་བུ༔ བྱའམ་ཁྱི་ཡི་ལོ་པ་གསང་སྨེ་ཅན༔ རྒྱལ་གྱི་མིང་ཅན་མདོ་ཁམས་སྨད་ནས་འབྱུང༔ ཅེས་དང་། གྲུབ་དབང་རྫོགས་ཆེན་བཞི་པའི་ལུང་བསྟན་ལས། སློབ་དཔོན་པད་འབྱུང་སློབ་མ་རྗེ་འབངས་གྲལ༔ ཉེར་ལྔའི་ནང་ཚན་དཔལ་གྱི་དབང་ཕྱུག་མཚན༔ རྡོ་རྗེ་ཕུར་པའི་གྲུབ་ཐོབ་སྟོབས་ནུས་ཅན༔ འཁོན་ཆེན་ཀླུ་ཡི་དབང་པོ་ཉི་མ་གྲགས༔ སྤྲུལ་པའི་ཆ་ཤས་ལུས་སྨིན་ཚུལ་ཁྲིམས་བསྲུང༔ སེམས་སྨིན་རིག་པའི་ཡེ་ཤེས་སྒྲོན་མེ་སྦར༔ མ་རིག་མུན་པའི་སྨག་རུམ་བསལ་བར་བྱས༔ ཅེས་དགོངས་གཏེར་གསལ་བར་འགྱུར་བའི་ལུང་བྱང་དང་། ཡང་། བྱི་བའི་ཚངས་ཁང་ཀུ་ཤ་སྔོ་ལྗང་སྟེང༔ ཆུ་ཤེལ་ནོར་བུ་དེ་ལ་མཇལ་བས་ལྟོས༔ ཅེས་བདག་ལོ་གྲངས་བཞི་བཅུར་སླེབས་པ་བྱི་བའི་དབྱར་དུས་སུ་ཞི་བ་བསིལ་བ་སྲིད་པའི་ཚ་གདུང་སེལ་ནུས་པ་ཟབ་ཆོས་འདི་དག་དང་ཕྲད་པ་དང་། ཆོས་བདག་སློབ་མ་དང་སྦྱིན་བདག་གི་ལུང་བྱང་ཡང་། དགེ་ལེགས་འདོད་འཇོ་ཙན་ཏན་ལྗོན་པའི་ཁྲོད༔ དྲི་བསུང་མེ་ཏོག་དམར་ལ་བུང་བ་འདུ༔ ཅེས་སོགས་རྡོ་རྗེའི་ལུང་གིས་ཇི་ལྟར་བསྔགས་པ་ལྟར། རང་ལོ་ཉེར་ལྔ་རྫོགས་མཚམས་འདག་སྦྱར་ལ་ཞུགས་ནས་བསམ་པ་ལྷུན་གྲུབ་མ་འབུམ་ཕྲག་དང་། ཚིག་བདུན་གསོལ་འདེབས་འབུམ་ཕྲག་བདུན་གྱི་གྲངས་བསོག་པའི་གླང་ཟླའི་ཚེས་བཅུའི་ཐོ་རངས་ཁར་ཨོ་རྒྱན་ཆེན་པོ་དང་། མཁའ་འགྲོ་མཚོ་རྒྱལ་ཡབ་ཡུམ་ལ་གདུང་ཤུགས་མཆི་མ་འཁྲིགས་པ་ལྟ་བུའི་སྒོ་ནས་གསོལ་འདེབས་དྲག་པོ་བྱས་པ་ལྟ་བུའི་རྐྱེན་ལས་ཐ་མལ་གྱི་སྣང་བ་འདི་དག་རང་འགགས་སུ་སོང་ནས་ཡིད་ཤེས་ཀྱི་ངོར་ཟངས་མདོག་དཔལ་རིར་མཁའ་འགྲོ་དང་རིག་འཛིན་རྒྱ་མཚོའི་གཙོ་བོ་ཨོ་རྒྱན་ཆེན་པོ་དང་། མཁར་ཆེན་བཟའ་ཡབ་ཡུམ་བཞུགས་པའི་རྒྱལ་ཐེབས་སུ་པཎ་ཆེན་དྲི་མེད་བཤེས་གཉེན་དང་། ལག་ལེན་གྱི་མཆོད་དཔོན་གཉགས་ཛྙཱ་ན་ཀུ་མ་རས་མཛད་ནས་རྡོ་རྗེ་ཕུར་པའི་སྒྲུབ་ཆེན་དང་འབྲེལ་བར་ཞག་བདུན་ཕྲག་གསུམ་དུ་བསྡད་པའི་སྣང་བ་ཤར་རྗེས་དབང་ལེན་པའི་སྐབས་སུ་གུ་རུའི་གསུང་གིས་ཁྱོད་ཟབ་ཆོས་ཀྱི་གདམས་པ་བརྒྱ་རྩ་ལ་དབང་ན་ཡང་དམ་གྲིབ་ཀྱི་དབང་གིས་ཉུང་ངུ་ཙམ་ལས་ཕབ་པར་དཀའ་ཞེས་བཀའ་གནང་ཞིང་བྷནྡྷ་ནས་བདུད་རྩི་དཀར་དམར་མཐིང་གསུམ་ཞིག་བླུད་པའི་སྣང་བ་དང་། ཤོག་དྲིལ་སེར་པོ་དང་དམར་པོ་དཀར་པོ་གསུམ་བསྩལ་བ་ཁོང་དུ་ཟོས་པས་པོ་ཏི་བརྒྱ་ཕྲག་ཏུ་ལོང་པ་ཙམ་ལ་ཡང་ཐོགས་པ་མེད་པའི་ཤེས་རབ་ཅན་དུ་གྱུར་ནའང་རྟེན་འབྲེལ་འཕྱུགས་པས་མ་ཕབ་ཤིང་། ཅུང་ཟད་ཡོད་པའང་བྱིན་ཟའི་ཀློང་དུ་ཕུལ་ཡང་ལོ་གྲངས་སོ་དགུ་པ་ཕག་གི་ལོར་སྔར་གྱི་དམ་ཚིག་ཉམས་པའི་རྒྱུ་དང་འཕྲལ་རྐྱེན་འབྱུང་པོའི་ཁ་རླངས་ལས་ཞ་གྲུམ་གྱི་སྡུག་བསྔལ་གྱིས་གདུང་བའི་སྐབས་སུ། ནུབ་གཅིག་ཉིང་འཁྲུལ་གྱི་སྣང་བར་དར་དཀར་པོའི་གུར་དབུས་སུ་སྟག་ལྤགས་ཀྱིས་བཀབ་པའི་ཁྲིའུར་སྐྱབས་རྗེ་གྲུབ་དབང་ཀུན་བཟང་གཞན་ཕན་དང་དངོས་སུ་མཇལ་ཞིང་རིགས་བཞིའི་མཁའ་འགྲོས་འཁོན་སྦྱངས་ཁྲུས་དང་དར་སྣ་ལྔ་བསྩལ་ཞིང་བླ་མ་དམ་པས་ཟབ་ཆོས་ཀྱི་ཁ་བྱང་མཚོ་རྒྱལ་དགོངས་པའི་གསང་མཛོད་དང་། ལུང་བསྟན་དངས་ཤེལ་མེ་ལོང་། ཆོས་བདག་ལུང་བསྟན་ནོར་བུའི་བང་མཛོད་སོགས་ཤོག་དྲིལ་གྱི་ཚུལ་དུ་གནང་ནས་སླར་བླ་མ་ཉིད་ཨོ་རྒྱན་དང་། འཁོར་རྣམས་རྒྱ་བོད་ཀྱི་པཎ་གྲུབ་ཕལ་ཆེར་དུ་གནས་འགྱུར་ནས་རྟ་མཆོག་ཡང་གསང་ཁྲོས་པ་ལྟ་བུའི་དབང་བསྐུར་བའི་ཉམས་ཤར་འདུག་པ་སླར་སྐལ་བ་དང་ལྡན་པའི་གང་ཟག་གསལ་བྱེད་ཐོག་མའི་མིང་ཅན་གྱིས་ལྐོག་གྱུར་མངོན་དུ་རིག་པ་ལྟ་བུར་ད་ལམ་ཉིད་དགོངས་གཏེར་ལ་དབང་བ་ངེས་པར་ཅིས་ཀྱང་ཡི་གེར་འབེབས་དགོས་ཞེས་རྨ་བྱའི་སྒྲོ་ཕོད་བཅས་བསྐུལ་བ་ལས་ཐོག་མར་སྒྲོལ་མའི་ལས་བྱང་རྡོ་རྗེའི་གོ་ཆ་དང་། ཐུགས་རྗེ་ཆེན་པོའི་ལས་བྱང་ཟླ་གཞོན་སྤྲིན་བྲལ་རྣམས་རིམ་གྱིས་བྲིས་ནས་ཟླ་བ་བཅུ་དྲུག་བར་དུ་རང་ཉམས་སུ་བླངས་བ་ལ་དེ་སྐབས་སུ་དག་སྣང་མང་དུ་ཤར་བ་ལ་ཡིད་ཆེས་པའི་གནས་སུ་ངེས་པ་རྙེད་པའི་གདམས་པ་ཟབ་མོ་ལགས།