ལུང་རིག་གླིང་པའི་སྐུ་ཚེའི་རྣམ་ཐར་ལུང་བསྟན།
ལུང་རིག་གླིང་པའི་སྐུ་ཚེའི་རྣམ་ཐར་ལུང་བསྟན། ཆོས་བདག་ལུང་བསྟན་ནོར་བུའི་བང་མཛོད་ལས༔ ད་ལྟ་རིགས་དང་ལྡན་པའི་མཚོ་རྒྱལ་ཡུམ༔ གསང་ཆེན་ཆོས་ལ་ཐེ་ཚོམ་མེད་པ་དང༔ བརྫུས་སྐྱེས་པད་འབྱུང་ང་ཉིད་མཉེས་པར་བྱེད༔ དེ་ཕྱིར་གང་དུ་སྐྱེ་བ་དག་མ་དག༔ མཆོག་དམན་ལུས་ནི་སྣ་ཚོགས་བླངས་ན་ཡང༔ པད་འབྱུང་ང་དང་བི་མ་མི་ཏྲ་ཡི༔ སྤྲུལ་པའི་རྗེ་འབངས་འགྲོ་ལ་མི་གནོད་ཅིང༔ མཐོང་ཐོས་དྲན་རེག་གང་ལའང་ཕན་པ་འབྱུང༔ མ་འོངས་རྩུབ་འགྱུར་ལྔ་བརྒྱའི་ཐ་མ་རུ༔ ཁྱོད་ཀྱི་སྤྲུལ་པ་ཉི་ཟེར་རྡུལ་ལྟར་འཁྲིགས༔ ཁྱད་པར་སྐུ་གསུང་ཐུགས་སྤྲུལ་ཉེར་གཅིག་གི༔ གསུང་སྤྲུལ་ཆ་ཤས་མདོ་ཁམས་སྨད་ཀྱི་ཆར༔ གདོལ་བ་གཡུང་པོ་དམན་པའི་རིགས་སུ་སྐྱེས༔ ཉམས་གྲིབ་ཅན་གྱིས་གཟུགས་ཅན་འགའ་ཞིག་དང༔ སྨོན་ལམ་ལོག་པའི་གཟུགས་མེད་འགའ་ཡིས་འཚེ༔ ལོ་བརྒྱད་དུས་སུ་ཚེ་ལ་བར་ཆད་འབྱུང༔ ང་སྤྲུལ་རྣལ་འབྱོར་མ་ངེས་སྤྱོད་པས་སེལ༔ གཞན་ཡང་ད་ལྟའི་ཛྙཱ་ན་ཀུ་མ་ར༔ ཞི་དུལ་ལྕང་ལོ་གོས་དཀར་འཆང་བ་ཞིག༔ བླ་མར་བརྟེན་ལས་གེགས་ཞི་ལེགས་ཚོགས་འཕེལ༔ བཅུ་གསུམ་བགྲང་བྱར་བི་མའི་སྤྲུལ་པ་ཡི༔ གསུང་གིས་དབུགས་དབྱུང་འགྲོ་ཕན་རྟེན་འབྲེལ་འགྲིག༔ པཎ་ཆེན་བཻ་རོའི་སྤྲུལ་པས་རྗེས་བཟུང་ཀྱང༔ ད་ལྟ་ཆོས་ལ་གནག་པའི་བདུད་བློན་འགའི༔ སྤྲུལ་པ་མཆོག་དམན་བཙུན་པའི་གཟུགས་སུ་འོང༔ དེ་དག་རྐྱེན་བྱས་དམ་སེལ་གྲིབ་ཀྱིས་ཕོག༔ འོན་ཀྱང་ཡེ་ཤེས་སྤྱན་ལྡན་པདྨ་ངས༔ སྣ་ཚོགས་ཐབས་ཀྱིས་འཁོན་གྲིབ་བྱང་ཡང་སྲིད༔ མི་མེད་དབེན་པར་སྒྲུབ་ཚུགས་འཛིན་པ་དང༔ དམན་པའི་བརྟུལ་ཞུགས་དང་དུ་བླངས་ནུས་ན༔ གང་འབྲེལ་བདེ་ཆེན་ཞིང་དུ་འདྲེན་ནུས་ཀྱང༔ རྣམ་གཡེང་འཁྲུལ་བ་ཆོས་མེད་དབང་སོང་ན༔ མ་ངེས་འགྲོ་ལ་ཕན་གནོད་ཚོན་རིས་བཀྲ༔ འོན་ཀྱང་ད་ལྟ་སྨོན་ལམ་འབྲེལ་ཆེ་བས༔ པདྨ་ང་དང་ལྷ་སྲས་མུ་རུབ་བཙན༔ དབྱེར་མེད་ཡེ་ཤེས་སྐུ་ཡིས་རྗེས་བཟུང་ནས༔ ཟབ་གནད་དགོངས་པའི་གཏེར་ལ་དབང་ཡང་སྲིད༔ དེ་ཚེ་སྒྲུབ་པའི་དམ་ཚིག་མི་སྤང་གནད༔ ལྟ་བ་བློ་འདས་ཕྱོགས་ལྷུང་བྲལ་བར་ལྟོས༔ རྣམ་རྟོག་གང་ཤར་ཆུ་ཡི་རི་མོ་བཞིན༔ བདེན་མེད་སྒྱུ་མའི་རྫུན་རིས་དབྱིངས་སུ་སྤོར༔ གང་ཤར་རྨི་ལམ་སྒྱུ་མའི་ལམ་དུ་ཁྱེར༔ དུས་དྲུག་པདྨ་ང་ལ་གསོལ་བ་ཐོབ༔ ཡི་དམ་ལྷག་ལྷ་རྗེ་བཙུན་མ་རུ་གྱིས༔ སྨོན་འཇུག་བྱང་ཆུབ་སེམས་ལ་གཞི་བརྟེན་པར༔ གཉེན་དང་གྲོགས་པོར་དམ་ཅན་རྒྱ་མཚོ་ཚོལ༔ སོ་དྲུག་གེགས་ལ་གློ་བུར་འཚུབ་ན་ཡང༔ སྔོན་བརྟེན་བསྲུང་མ་འགའ་ཡིས་སེལ་ཀྱང་སྲིད༔ བཅུ་ཕྲག་བཞི་ཡི་དགུ་མཚམས་ངེས་པར་རྩུབ༔ བཀའ་བརྒྱད་རྣམ་གསུམ་སྐུ་དང་གསུང་རྟེན་བཞེངས༔ ལྷག་པའི་ལྷ་མཆོག་རྗེ་བཙུན་འཕགས་མ་ལ༔ བསྙེན་སྒྲུབ་གསོལ་འདེབས་ཆུ་བོའི་གཞུང་བཞིན་སྐྱོལ༔ དམ་སྐོང་ཡི་གེ་བརྒྱ་པ་འབུམ་ཕྲག་དང༔ གསོད་ངེས་སེམས་ཅན་སྲོག་བསླུ་ཉེའུ་འདོན༔ ཤ་ཁྲག་གཟན་བོར་མཆོད་སྦྱིན་ཆགས་མེད་མཛོད༔ སྤྱོད་པ་གཏད་མེད་དམན་པ་བཅོས་མེད་ཚུལ༔ གོ་ས་མཐོན་པོར་ཆེ་ཚུགས་མ་འགྱིང་བར༔ རྗེ་འབངས་སྤྲུལ་པ་འགའ་ལ་མོས་གུས་གྱིས༔ ཡི་དམ་རྡོ་རྗེ་ཕུར་པའི་ཉམས་ལེན་དང༔ རིས་མེད་བཀའ་གཏེར་ཆོས་ལ་འཆད་ཉན་མཛོད༔ མཁན་སློབ་ཆོས་གསུམ་སྙིང་གི་དཀྱིལ་དུ་སྒོམས༔ རང་གཞན་དགེ་སྦྱོར་མ་ཎིའི་དགེ་བསྐུལ་དང༔ ཁམས་ཀྱི་གནས་ཆེན་འགའ་ལ་ཕྱག་སྐོར་དང༔ རྩ་གསུམ་ཚོགས་བསྐང་དེར་གནས་སྐྱེ་འགྲོ་ལ༔ སྒོ་གསུམ་དགེ་བའི་བསྐུལ་མ་ཡང་ཡང་མཛོད༔ ང་བཞིའི་འཕྲང་ལ་ཀླུ་གོང་སྤྲུལ་པས་འཚེ༔ སྒྲོལ་མའི་སྐུ་སྟོང་གསོལ་འདེབས་འབུམ་ཕྲག་གལ༔ ལོག་ལྟ་ཅན་གྱི་དམ་གྲིབ་མ་ཕོག་ན༔ ཚེ་ལོ་དྲུག་ཅུའི་བར་དུ་འཚོ་ཡང་སྲིད༔ འདི་ནས་སྐྱེ་བ་བདུན་ནམ་བཅུ་དྲུག་ན༔ རྔ་ཡབ་དཔལ་རི་སྤྲུལ་པའི་གྲོང་ཁྱེར་དུ༔ ཕ་བུ་འཕྲད་པའི་རྡོ་རྗེའི་གླུ་གར་དང༔ ཡང་སྲིད་རིག་འཛིན་བར་མ་ཆད་པར་འབྱུང༔ ཞེས་གསུངས་སོ།།