རྒྱ་སྤྲུལ་མིང་པ་རང་ཉིད་ལ་བརྟག་པ་བགྱིས་ནས་བྲིས་པའི་བརྡ་ལུང་།
༄༅། རྒྱ་སྤྲུལ་མིང་པ་རང་ཉིད་ལ་བརྟག་པ་བགྱིས་ནས་བྲིས་པའི་བརྡ་ལུང་བཞུགས། ཨེ་མ་ཧོ། རྩ་གསུམ་ཡོངས་རྫོགས་པདྨ་ཐོད་ཕྲེང་རྩལ། །འགྲོ་རྣམས་འཁོར་མཚོ་ལས་སྒྲོལ་རྗེ་བཙུན་མའི། །བྱིན་རླབས་སྙིང་གི་པདྨོ་ལ་ཞུགས་ཀྱང་། །ལས་ཉོན་བག་ཆགས་བྱང་ཆུབ་སྙིང་པོའི་བར། །དངོས་དང་གཟུགས་བརྙན་མྱོང་དང་མྱོང་ཚུལ་སྟོན། །དཀར་ནག་རྒྱུ་འབྲས་བདེ་སྡུག་བསླུ་བ་མེད། །རྫོགས་སངས་རྒྱས་ཀྱི་ཕྱག་གིས་མི་ཁེག་ཅིང་། །རང་གི་ལས་དེ་གཞན་གྱིས་མི་མྱོང་ཞེས། །བསླུ་མེད་རྡོ་རྗེའི་ཚིག་གིས་གསུངས་པ་བཞིན། །ལས་ངན་བག་ཆགས་ལུས་ངན་གཟུགས་ཕུང་ལ། །སྨིན་ཏེ་ཟློག་པར་དཀའ་བ་མངོན་སུམ་ཡང་། །ལྷ་དང་བླ་མའི་ལུང་བྱང་ལ་བརྟེན་ནས། །རིམ་གྲོས་བཟློག་པའི་བར་ཆད་འགའ་ཡང་སྣང་། །གཉིས་ནག་མཆེ་བ་ཅན་གྱི་མཇུག་མ་ལ། །སྦྲུལ་ནག་འཁྱིལ་འདྲའི་མི་སྡུག་གཟུགས་སྟོན་པ། །སྒྲིབ་སྦྱང་རིམ་གྲོ་མ་རཱི་ཙྱཻས་ཟིན་ན། །འཚེ་མེད་བདེ་བའི་གོ་སྐབས་འཆར་ཡང་སྲིད། །རྣ་བ་མཛེས་པའི་སྲོག་ཆགས་ལུས་ཆུང་ཡང་། །བདེ་སྡུག་སྣ་ཚོགས་རི་མོའི་ཚོན་ཁྲ་སྡེབ། །མི་མཐུན་བཟློག་བྱེད་གུ་རུ་པདྨ་ཡི། །གསོལ་འདེབས་བར་ཆད་ལམ་སེལ་ཁྲི་ཚོ་དང་། །དེ་ཡི་རྣམ་ཐར་རི་མོ་རྒྱས་བསྡུས་ཀྱི། །མོས་གུས་རྟེན་དུ་བཟུང་ན་ཅུང་ཞིག་དགེ། །འཁྱོགས་འགྲོས་མཁའ་ལ་ལྡིར་བའི་སྒྲ་ངོམ་ཚེ། །གནམ་ནས་འོང་བའི་གནོད་པ་འབྱུང་ཡང་སྲིད། །འཕགས་མ་སྒྲོལ་མའི་སྐུ་སྤར་ཁྲི་ཕྲག་དང་། །དེ་ཡི་ཕྱག་འཚལ་ཉེར་གཅིག་འབུམ་ཕྲག་གལ། །གཞན་ཡང་ནུས་ལྡན་སྔགས་པས་ཡི་དམ་གྱི། །བཟློག་བསྒྱུར་དེ་བཞིན་ཁྲིམས་ལྡན་བཙུན་པ་ཡིས། །གདུགས་ཤེར་བཟློག་པ་རྟེན་འབྲེལ་ཟབ་མོས་སེལ། །མིང་དོན་རྩུབ་པའི་ལྕེ་གཉིས་བརྐྱང་བའི་ཚེ། །རྣལ་འབྱོར་སྲོག་ལ་ངེས་པར་ཧུར་ཐུམ་འོང་། །བཟློག་ཐབས་རིམ་གྲོ་སྲིད་མཐའ་ཙམ་ཡིན་ཡང་། །རྩ་གསུམ་ཚོགས་སྟོང་འཆི་མེད་མགོན་པོ་ཡི། །སྐུ་རྟེན་བཞེངས་དང་དེ་ཡི་བསྙེན་སྒྲུབ་འབད། །གེགས་ཆེན་མིའམ་ནོར་ཕྱུགས་ལ་བབས་ན། །རེ་ཞིག་འཚོ་བའི་རྟེན་འབྲེལ་ཡོད་ཀྱང་སྲིད། །གལ་ཏེ་ལེགས་པའི་ལྟས་བཟང་བྱུང་བ་ན། །ཅང་ཤེས་སྤང་ལ་བརྩེ་བའི་ཉམས་དགའ་བར། །རྒྱལ་བའི་གསུང་རབ་རྒྱས་བསྡུས་འབྲི་ཀློག་དང་། །དམ་སྐོང་ལ་བརྟེན་རྡོ་རྗེ་སེམས་དཔའ་ཡི། །ཡི་གེ་བརྒྱ་བ་བྱེ་བ་གཅིག་གྲུབ་ནས། །ཅི་ཡོད་མཆོད་སྦྱིན་སྤོང་དག་བྱེད་ནུས་ན། །གཡང་དཀར་ཅན་དང་གར་མཁན་སོགས་ལ་བདེ། །འདབ་ཆགས་མཁའ་ལ་ལྡིང་ཚེ་སྲིད་པ་འདིར། །འཚོ་བའི་ཚེ་དང་བསོད་ནམས་སྙན་གྲགས་སོགས། །གོས་ཟད་དུག་པོ་གསར་བར་མི་རུང་བཞིན། །བྱ་ཐབས་བྲལ་བར་མཁའ་འགྲོའི་ལུང་ལས་བྱུང་།། ཅེས་པ་འདི་ཡང་སློབ་བུ་གཞན་ཕན་བཟང་པོས་དྲིས་པའི་ལན་དུ། རང་ཉིད་ལ་བརྟག་པ་བགྱིས་ནས་བྲིས་པ་ཛ་ཡནྟུ།