གཞན་ཕན་བཟང་པོ་ལ་བརྟགས་ལུང་གནང་བ་རིག་རྩལ་ཌཀྐིའི་བརྡ་གླུ།
༄༅། ཆོས་ཀྱི་བདག་པོ་ཧོར་བླ་མ་གཞན་ཕན་བཟང་པོ་ལ་བརྟགས་ལུང་གནང་བ་རིག་རྩལ་ཌཀྐིའི་བརྡ་གླུ་བཞུགས། རྨད་བྱུང་རྒྱལ་བ་ཀུན་གྱི་ཕྲིན་ལས་པ། །རིགས་བརྒྱའི་ཁྱབ་བདག་རྒྱལ་དབང་པདྨ་འབྱུང་། །དབྱེར་མེད་གྲུབ་པའི་དབང་ཕྱུག་བྱང་ཆུབ་གླིང་། །མི་འབྲལ་སྙིང་གི་པདྨོར་གུས་མཆོད་ནས། །དད་དང་དམ་ཚིག་ནོར་བུའི་བང་མཛོད་ལ། །ལོག་སྨོན་བདུད་ཀྱི་རྐུན་པོ་མ་ཞུགས་ཤིང་། །རྣམ་གྲོལ་ཤེས་རབ་མཆོག་གིས་དབང་འབྱོར་བའི། །སྐལ་བཟང་རིག་པའི་མྱུ་གུས་དྲིས་ལན་དུ། །ཚེ་རབས་སྔོན་ནས་འབྲེལ་བའི་ལྷག་པའི་ལྷ། །མཚོ་སྐྱེས་བླ་མ་འཇིགས་སྐྱོབས་རྒྱལ་བའི་ཡུམ། །དབང་ཆེན་དཔའ་བོའི་ཐུགས་རྗེའི་རྗེས་བཟུང་མཐུས། །ལྐོག་གྱུར་ཆོས་རྣམས་ཇི་བཞིན་ཤེས་མིན་ཀྱང་། །ཕྱོགས་ཙམ་མཐོང་བའི་གཏམ་འདི་བདེན་པར་གླེང་། །ཚེ་སྔོན་རྒྱལ་དབང་པདྨས་བྱིན་བརླབས་པའི། །རྣལ་འབྱོར་སྤྱོད་པ་ཡེ་ཤེས་ཌཀྐིའི་གྲོགས། །གང་གི་སྒྱུ་འཕྲུལ་ས་ར་ཧི་ཏ་ཞེས། །དག་སྣང་མཚོ་རྒྱལ་དགོངས་པའི་ཆོས་ཀྱི་བདག །མ་ཧཱ་གུ་རུས་ལུང་གིས་བསྔགས་པ་ཁྱོད། །དགེ་ལེགས་ཡོན་ཏན་དབྱར་གྱི་པདྨོ་འདྲ། །འོན་ཏང་སྙིགས་དུས་བར་ཆད་སད་སེར་བཙའ། །མི་འབྱུང་ངེས་མེད་སྐྱོབས་བྱེད་རིམ་གྲོར་འབུངས། །ཁྱད་པར་ནོར་ལ་གནག་པ་བྱི་བའི་ལོར། །རང་གཞན་འདྲེས་མས་ཟས་ནོར་ཐོབ་ཤ་བྱེད། །དེ་བཟློག་རིམ་གྲོར་ཉ་གྲོག་སྦྱིན་གཏོང་དང་། །བྱ་བྱིའུ་ཡི་དྭགས་འབྱུང་གཏོར་ཆ་གསུམ་གཏོང་། །སྐྱབས་འགྲོ་འབུམ་དང་མར་མེ་ཁྲི་མཆོད་དང་། །མཎྜལ་འབུམ་དང་རྩ་གསུམ་ཚོགས་སྟོང་དང་། །དགེ་འདུན་སྡེ་ལ་རྒྱལ་བཀའ་གསུང་སྒྲོགས་ཕྱིར། །མང་ཇ་ཡོན་འབུལ་གདུགས་ཤེར་བཟློག་པས་སེལ། །རབ་རྔམ་གཤིན་རྗེ་ཆིབས་ཀྱི་གླང་པོ་ཁྲོས། །ཆེ་ཕྲ་མ་ངེས་རྭ་རྩེས་མཚོན་དབལ་སྟོན། །སེལ་བྱེད་འཆི་བདག་ཟིལ་གནོན་ཁྲོ་རྒྱལ་གྱི། །སྒྲུབ་པ་གནད་སྨིན་འཆི་བསླུའི་ལས་མཐའ་ཟབ། །རྡོ་རྗེ་ཕུར་བ་ལྷག་པའི་ལྷ་རུ་ཟུངས། །དབང་ཞུ་བསྙེན་བསྒྲུབ་ལྟོས་བཅས་གེགས་འཕྲེང་སྒྲོལ། །དམར་པོ་རི་བཀྲ་ཞོན་པའི་ཁྲོ་རྒྱལ་གྱིས། །དབང་སྡུད་དབང་གི་ཕྱག་ཆ་ལག་ཏུ་སྟེར། །ཆུ་ཤེལ་ནོར་བུར་འཁྱུད་པའི་རི་དྭགས་ཀྱི། །དགེ་བའི་ཞལ་གྱི་འཛུམ་མདངས་སྟོན་པ་ལ། །གཡོ་ཅན་སྲིན་པོས་ཕྲ་མ་འགྱེད་སྲིད་ན། །དཔལ་ཆེན་བཛྲ་དཔའ་བོ་ཀུ་མ་ར། །རྩེ་གཅིག་སྒྲུབ་པའི་བསྲེག་མནན་འཕང་བས་སེལ། །སྒྲ་བརྒྱ་མཁའ་ནས་སྒྲོགས་པའི་འཁྱོག་འགྲོས་ཅན། །དགའ་བའི་གར་གྱིས་སྙན་པའི་གློག་འཁྱུག་ཀྱང་། །སྙེམས་མེད་རི་སུལ་སྤྲིན་སྦུབས་གབ་མཁས་ན། །ནོར་བུའི་ཕྱྭ་གཡང་སུས་ཀྱང་འགོག་ཏུ་མེད། །སྦྲུལ་གདུག་ལྟ་བུའི་བདུད་སྤྲུལ་འགས་སྨོད་ཀྱང་། །རིམ་གཉིས་བསླབ་གསུམ་དྲི་དང་མ་བྲལ་ན། །སྐལ་བ་ལྡན་པའི་གང་ཟག་མང་པོ་ཞིག །དགེ་བཅུའི་ལམ་གྱི་ཡང་དག་སར་འཁོད་སྲིད། །རྟ་མཆོག་འཚེར་དབྱངས་ཕྱོགས་འགར་བསྒྲགས་པའི་ཚེ། །གསར་རྙིང་གདམས་པའི་བདུད་རྩིའི་བགོ་སྐལ་ལ། །རང་གཞན་ཕལ་ཆེར་དགའ་བས་སྤྱོད་པ་མཐོང་། །འབའ་སྒྲ་ལྡིར་བའི་རྒྱལ་བསེན་ང་རོའི་སྒྲ། །སྙིང་ལ་གཟན་ཡང་བཟློག་བྱེད་རིམ་གྲོ་ནི། །སྐུ་ཡི་རྟེན་དུ་པད་འབྱུང་རྣམ་ཐར་བྲིས། །གསུང་གི་སྙིང་པོ་སིདྡྷི་བྱེ་བ་ཟློས། །ཐུགས་ཀྱི་སྙིང་པོ་ཁྲེགས་ཆོད་ཐོད་རྒལ་སྦྱོང་། །ལྷག་པའི་ལྷ་དང་བསྲུང་མ་དུད་སོལ་མར། །བློ་གཏད་ཁེལ་བས་བསྙེན་སྒྲུབ་གསོལ་མཆོད་འབོད། །བྱང་ཆུབ་སེམས་ལྡན་སྤྲེའུས་གར་བྱེད་ཚེ། །བདེ་སྡུག་འདྲེས་མའི་འཁྲུལ་སྣང་གང་ཤར་ཀུན། །རོ་མཉམ་ལྟ་བའི་གདེངས་ཀྱིས་ཟིལ་མནན་ནས། །མི་མཐུན་གྲོགས་སུ་འགྱུར་བའི་ལྟས་བཟང་ཤར། །དེ་སྐད་ཟོལ་མེད་རིག་རྩལ་ཌཀྐིའི་གླུ། །མཁའ་དབྱིངས་སྟོང་པའི་ངོས་སུ་ཚོན་རིས་བཞིན། །རྒྱུ་ལས་མ་བྱུང་རྐྱེན་གྱིས་བསླད་མིན་ཀྱང་། །ཚུར་མཐོང་སྣང་ངོར་རྟེན་འབྲེལ་འགགས་མེད་པ། །ཀུན་རྒྱུ་དཱ་རི་ཏྲ་བ་ལུང་རིག་མིང་། །རྒན་པོ་བྱིས་པའི་ངང་ཚུལ་ཅན་དེས་སྨྲས།།