བསོད་ནམས་ཕུན་ཚོགས་ལ་གནང་བའི་གདམས་པ་དང་འབྲེལ་བའི་ལུང་བྱང་།

༈ བསོད་ནམས་ཕུན་ཚོགས་ལ་གནང་བའི་གདམས་པ་དང་འབྲེལ་བའི་ལུང་བྱང་བཞུགས། རིག་པའི་རྩལ་སྣང་འགགས་མེད་ལུང་བྱང་ལས། །པུཎྱཻ་ལཀྵིཾ་དགེ་བའི་རིགས་སད་པས། །རྫོགས་སངས་རྒྱས་ཀྱི་གོ་འཕང་ཐོབ་པ་ལ། །ཉེ་བའི་ལྟས་བཟང་སྒོ་གསུམ་དགེ་ལ་བརྩོན། །ལྟ་བ་བློ་འདས་ཕྱག་རྒྱ་ཆེན་པོ་དང་། །བསྒོམ་པ་བསལ་བཞག་གཉིས་མེད་རང་ངོ་སྐྱོངས། །སྤྱོད་པ་ཆོས་སྤྱོད་བཅུ་ལ་རྒྱུན་དུ་འབོད། །དེ་ཡང་སྒྱུ་མ་ལྟ་བུའི་ཤེས་རབ་ཀྱིས། །ཟིན་པར་གྱིས་ལ་དངོས་ཞེན་མེད་པ་གལ། །ཁྱད་པར་ལྷ་མཆོག་རྡོ་རྗེ་སེམས་དཔའ་ལ། །རྩེ་གཅིག་སེམས་ཏེ་ཡི་གེ་བརྒྱ་པ་ཟློས། །འབུམ་ཕྲག་བཅུའམ་བདུན་གྱི་གྲངས་ཐེམས་ན། །ལས་ཉོན་བག་ཆགས་ཟླ་བ་སྤྲིན་བྲལ་ལྟར། །འདི་ཕྱིའི་དོན་ཆེན་འགྲུབ་པར་ཐེ་ཚོམ་མེད། །རྒྱ་སྤྲུལ་པས་སྨྲས་པའོ།།