འཇིགས་མེད་རང་གྲོལ་ལ་བསྩལ་བའི་ལུང་བྱང་།
༈ འཇིགས་མེད་རང་གྲོལ་ལ་བསྩལ་བའི་ལུང་བྱང་། ཞིང་རབ་འབྱམས་ཀྱི་རྒྱལ་བའི་སྤྱི་གཟུགས་མཆོག །མགོན་ཨོ་རྒྱན་གྱི་སློབ་དཔོན་པདྨ་རྒྱལ། །གང་མི་གཟུགས་ཀྱི་རྫོགས་སྤྲུལ་བཞི་པ་ཡི། །ཞབས་ཉིན་བྱེད་དབང་བདག་ཡིད་པདྨོར་རོལ། །གང་སྔོན་ལས་འབྲེལ་གྱི་སྨོན་ལམ་ཆར་རྒྱུན་དང་། །སྲས་བཅས་རྒྱལ་བ་ཡི་ཐུགས་བསྐྱེད་འོད་སྟོང་དལ། །ཟུང་འཇུག་སྤྲུལ་པ་ཡི་འཇའ་ཚོན་ཤར་བ་ལ། །རྩོག་གྲིབ་སྐྱི་སེར་གྱིས་མ་ཕོག་ངོ་མཚར་རྨད། །སྐྱེ་སྔོན་དམ་པ་ཡི་བྱིན་ཐོབ་འཇི༵གས་པ་མེ༵ད། །འཁོར་བ་ར༵ང་གྲོ༵ལ་དང་དབྱེར་མེད་ནིརྨ་ཀཿ ཉི་གྲགས་སློབ་འབངས་པ་ཆོས་དབྱིངས་དྲི་མ་མེད། །རིན་ཆེན་རྣམ་གསུམ་གྱི་རྡོ་རྗེ་རོལ་བའི་གར། །སྤྱན་རས་གཟིགས་དབང་གི་རྣམ་སྤྲུལ་ཡིན་པར་ངེས། །རེ་ཞིག་སྨེ་བརྩེགས་ཀྱི་དབང་ཁྲུས་ཅི་མང་དང་། །ཡིག་རིགས་སློབ་གཉེར་སོགས་གཡེལ་མེད་བརྩོན་གྱུར་ན། །གསེར་ཉིད་ས་འོག་ནས་རང་འོད་ལྡང་བ་ལྟར། །དམ་པའི་རྣམ་འགྱུར་ཞིག་གསལ་བར་ཁོ་བོས་སྨྲས། །