ཆོས་བདག་སློབ་བུ་ཞིག་ལ་བསྩལ་བའི་ལུང་བྱང་།

༈ ཆོས་བདག་སློབ་བུ་ཞིག་ལ་བསྩལ་བའི་ལུང་བྱང་། ཆོས་བདག་ལུང་བསྟན་ནོར་བུའི་བང་མཛོད་ལས། དཔལ་གྱི་མཆོད་གནས་མ་ཡི་སྤྲུལ་པ་ནི༔ རིགས་བཟང་བློ་གསལ་རྒྱུད་དུལ་ཤེས་རབ་ཆེ༔ འབྲུག་གམ་སྦྲུལ་གྱི་ལོ་པ་སྙིང་སྨེ་ཅན༔ གསལ་ལམ་གྲགས་པའི་མིང་ཅན་སྐྱེས་བུ་དེ༔ ཕྱི་སྒྲུབ་ཐུགས་ཆེན་ཟླ་བ་སྤྲིན་བྲལ་དང༔ ནང་སྒྲུབ་དབང་ཆེན་སྣང་སྲིད་ཟིལ་གནོན་གྱི༔ ཆོས་ཀྱི་བདག་པོ་ཡིན་པས་ཉམས་བླང་ན༔ རང་གཞན་དོན་གཉིས་འགྲུབ་པར་སོམ་ཉི་བྲལ༔ ས་མ་ཡཱ༔ གུ་ཧྱ༔