ལུང་བསྟན་སྙིགས་མའི་འགྲོ་སྐྱོབ་བཞུགས།
༄༅། ལུང་བསྟན་སྙིགས་མའི་འགྲོ་སྐྱོབ་བཞུགས། དུས་ངན་སྙིགས་མའི་འགྲོ་བ་སྐྱོབ་པའི་ལྷ། །ཨོ་རྒྱན་སློབ་དཔོན་པདྨ་འབྱུང་གནས་དང་། །བྱམས་མགོན་སྙིང་རྗེའི་མངའ་བདག་སྤྱན་རས་གཟིགས། །འཇིགས་བརྒྱད་ཀུན་སྐྱོབས་རྗེ་བཙུན་སྒྲོལ་མ་མཁྱེན། །དུས་ངན་སྙིགས་མའི་འགྲོ་ལ་སྡུག་བསྔལ་ཆེ། །སྡུག་བསྔལ་རྒྱུ་ནི་རང་གི་མི་དགེས་བསྐྲུན། །མི་དགེའི་རྩ་བ་བདག་ཏུ་འཛིན་ལས་བྱུང་། །བདག་ཏུ་བཟུང་བས་ཆགས་སྡང་རྨོངས་གསུམ་འཁྲིགས། །ཆགས་པའི་དབང་གིས་གཞན་ནོར་རྐུ་ཞིང་འཕྲོག །བཙུན་པའི་སྡེ་རྣམས་ལོག་གཡེམ་ཚངས་སྤྱོད་ཉམས། །ཞེ་སྡང་དབང་གིས་འཁྲུགས་རྩོད་གཞན་སྲོག་གཅོད། །མནར་སེམས་ལྡན་པས་སྲུང་མ་དྲག་པོར་བསྐུལ། །གཏི་མུག་སྟོབས་ཀྱིས་དམ་པ་གཞན་རྣམས་ཀྱི། །སྐྱོན་ནས་བརྗོད་ཅིང་རང་ཉིད་བཟང་པོར་བརྩི། །བླང་དོར་གནས་ལ་བལྟ་བའི་འདྲེན་བྱེད་ལོང་། །དེ་ཡི་རྐྱེན་གྱིས་ལྷ་འདྲེ་མི་གསུམ་འཁྲུགས། །གཞན་ནོར་ཕྲོག་པས་ཡུལ་ཁམས་མུ་གེ་འབྱུང་། །ལོ་ཉེས་སད་སེར་ཕྱུག་གོད་མི་འདོད་འབྱུང་། །མི་ཡི་མདོག་ཉམས་སྣོད་ཀྱི་ཕྱྭ་གཡང་རྒུད། །མི་མིན་བསེ་རག་རྒབ་འདྲེས་ལུང་པ་གང་། །དེ་དག་ཕན་ཐབས་རིམ་གྲོ་འདི་དག་དགོས། །ཁྲིམས་ལྡན་བཙུན་པ་རྣམས་ཀྱིས་གསོ་སྦྱོང་དང་། །སྔགས་པའི་སྡེ་རྣམས་དམ་སྐོང་ཚོགས་བསྐང་དང་། །གསང་སྔགས་ཡི་གེ་བརྒྱ་པ་རྒྱུན་དུ་ཟློས། །ཡུལ་ཁམས་རྣམས་སུ་ཆུ་གཏོར་འབུམ་དང་ཁྲི། །ཞི་ཁྲོ་དང་འབྲེལ་གནས་སྟོང་ཟས་བསྔོ་སོགས། །སྡིག་དང་མ་འདྲེས་རྣམ་དཀར་ཡང་དག་སྒྲུབས། །སྔགས་སྡེ་འཁྲུགས་དང་གཞན་སྲོག་བཅད་པའི་མཐུས། །མི་རྣམས་ཚེ་ཐུང་རིམས་ནད་སྣ་ཚོགས་འབྱུང་། །སྔགས་པ་རྣམས་ཀྱིས་རྟེན་གསུམ་ཁྱད་འཕགས་དྲུང་། །དབང་བླངས་དམ་སྡོམ་བསྲུང་ཞིང་བསྙེན་སྒྲུབ་འབད། །བརྒྱུད་གསུམ་བླ་མའི་ངོ་བོ་ཨོ་རྒྱན་རྗེའི། །བསྙེན་བསྒྲུབ་གཞུང་བསྲིང་སིདྡྷི་ཁྲི་དང་འབུམ། །བྱེ་བ་ལ་སོགས་སྨྲ་བཅད་དབྱངས་དང་བཅས། །ཐེ་ཚོམ་མེད་པར་སྒྲུབ་དང་ཐོག་བབས་ཀྱི། །རྐྱེན་ངན་བར་ཆད་སེལ་ལ་སོམ་ཉི་བྲལ། །ཚེ་ཐར་སྲོག་བསླུ་རི་རྒྱ་རྔོན་རྒྱ་སྡོམས། །ཚེ་གཟུངས་སིདྡྷི་བསམ་ལྷུན་ཇོ་དར་ཚུགས། །ཅི་ལྟར་ནུས་པ་དེ་བཞིན་ཕན་པར་ངེས། །གཏི་མུག་སྟོབས་ཀྱིས་མཐོ་རིས་གནས་སྤོངས་ཤིང་། །བླང་དོར་མི་ཤེས་ངན་འགྲོར་རྒྱུན་དུ་འཁྱམས། །དེ་དག་རིམ་གྲོར་ཐོས་བསམ་སྒོམ་གསུམ་དགོས། །ཐོས་དོན་རང་གི་རྒྱུད་ལ་འབྱོར་བའི་མཐུས། །བསམ་པ་གོམ་པས་རྟག་ཏུ་འཆི་བ་དྲན། །དེ་ཡི་སྟོབས་ཀྱིས་མི་དགེ་སྡིག་ལ་འཛེམས། །དགེ་བ་བསྒྲུབ་པས་ཚེ་འདིར་བཀྲ་ཤིས་ཤིང་། །ནད་མེད་ལོ་ལེགས་ཚེ་རིང་འབྱོར་བ་འཕེལ། །ཕྱི་མ་མཐོ་རིས་ཉམས་དགའ་བདེ་ཞིང་འཚོ། །ཁྱད་པར་ཐོས་བསམ་དབེན་པའི་གནས་སུ་སྒོམ། །སྟོང་ཉིད་སྙིང་རྗེ་ཟུང་འཇུག་བྱང་ཆུབ་སེམས། །རབ་འབྱམས་རྒྱལ་དང་རྒྱལ་སྲས་གཤེགས་པའི་ཤུལ། །འདི་ལ་བརྩོན་པའི་གང་ཟག་དམ་པ་དེ། །གང་དུ་གནས་པའི་ཡུལ་དེར་བཀྲ་ཤིས་པས། །དེ་འདྲའི་སྐྱེས་མཆོག་རྣམས་ལ་བསྙེན་བཀུར་ཞུས། །ཨོ་རྒྱན་རྗེ་དང་འཕགས་པ་སྤྱན་རས་གཟིགས། །རྗེ་བཙུན་སྒྲོལ་མ་འདི་གསུམ་སྙིགས་དུས་ཀྱི། །སྡུག་བསྔལ་སྐྱོབ་ཕྱིར་རྒྱལ་ཀུན་ཐུགས་ལས་སྤྲུལ། །སངས་རྒྱས་གཞན་ལས་ལྷག་པར་ཐུགས་རྗེ་མྱུར། །འདི་རྣམས་སྐུ་བཞེངས་སིདྡྷི་མ་ཎི་དང་། །སྒྲོལ་བསྟོད་ཁས་ལེན་དགེ་བསྐུལ་དམ་བཅའ་རེམ། །འདི་ནི་ཆོས་མེད་སྤྲང་པོ་དགེ་སྦྱོང་གཟུགས། །སྙོམ་ལས་མཁན་པོ་རྒྱ་སྤྲུལ་སྨྱོན་པ་ཡི། །རང་སེམས་གཉུག་མ་སྤྲོས་བྲལ་མཁའ་དབྱིངས་སུ། །རྟེན་འབྱུང་བདེན་མེད་རྫུན་རིས་རི་མོ་ཤར། །རོ་སྙོམས་ངང་ནས་ཐོལ་བྱུང་ཐོག་མེད་སྨྲས། །དུས་གསུམ་འགྲོ་རྣམས་དགེ་བའི་རྒྱུར་གྱུར་ཅིག །འདི་མི་གཅིག་ཁོ་ནས་མི་འཛིན་པར་ཐམས་ཅད་ལ་དགེ་བསྐུལ་རེམ་རེམ།།