སྨན་བཙུན་མའི་ཤོ་མོ་ཅུང་ཟད་རྒྱས་སུ་བཏང་བ་ཐེ་ཚོམ་མུན་སེལ།

དག་སྣང་མཚོ་རྒྱལ་དགོངས་པའི་གསང་མཛོད་ལས༔ སྨན་བཙུན་མའི་ཤོ་མོ་ཅུང་ཟད་རྒྱས་སུ་བཏང་བ་ཐེ་ཚོམ་མུན་སེལ་བཞུགས།

ན་མོ་གུ་རུ་པདྨ་ཀ་ར་ཡེ། དེ་ཡང་རང་གཞུང་ལས། མཎྜལ་སྟེང་དུ་དུང་ཤོ་བསྒྲིལ༔ འདོད་དོན་གསལ་བར་སྨྲོས་ཤིག་ཅེས༔ བདེན་པ་བརྡར་ནས་ཤོ་མིག་བརྟགས༔ ཞེས་གསུངས་པས། དང་པོ་བདེན་བརྡར་ལ། སྐྱབས་སེམས་སྔོན་དུ་འགྲོ་དགོས་ཏེ། ན་མོ། ཕྱོགས་བཅུ་དུས་གསུམ་སངས་རྒྱས་དམ་པའི་ཆོས། །འཕགས་པའི་དགེ་འདུན་རྩ་གསུམ་བསྲུང་མ་ལ། །སྙིང་ནས་སྐྱབས་མཆི་རྟེན་འབྲེལ་བརྟགས་འབྲས་ཀྱིས། །གང་འབྲེལ་སངས་རྒྱས་ཐོབ་ཕྱིར་སེམས་བསྐྱེད་དོ། །ཅེས་ལན་གསུམ་དང་། ན་མོ། སྐྱབས་གནས་བསླུ་མེད་རྫོགས་སངས་རྒྱས། །བདེན་པ་གཉིས་བསྡུས་དམ་པའི་ཆོས། །རིག་གྲོལ་གཉིས་ལྡན་དགེ་འདུན་སྡེ། །དཀོན་མཆོག་གསུམ་གྱིས་མོ་ཕོབ་ཅིག །བྱིན་རླབས་འདོད་འབྱུང་བླ་མ་དང་། །དངོས་གྲུབ་གཉིས་སྩོལ་ཡི་དམ་ལྷ། །ལེགས་ཉེས་སྟངས་འཛིན་མཁའ་འགྲོའི་ཚོགས། །རྟེན་འབྲེལ་མོ་འདི་གསལ་བར་སྟོན། །ཁྱད་པར་གངས་ཅན་བོད་ཁམས་གཙོས། །ཁམས་གསུམ་འགྲོ་བའི་སྐྱབས་གཅིག་པུ། །གུ་རུ་པདྨ་འབྱུང་གནས་དང་། །མཁར་ཆེན་མཁའ་འགྲོ་མཚོ་རྒྱལ་སོགས། །རིག་འཛིན་རྗེ་འབངས་ཉེར་ལྔ་དང་། །མཆོག་གཉིས་གླིང་པ་བཅུ་གཅིག་སོགས། །ཟབ་གཏེར་མཛོད་འཛིན་ཐམས་ཅད་ཀྱིས། །རྟེན་འབྲེལ་མོ་འདིའི་རྣོ་རྟགས་སྟོན། །ཡང་དགོས་རྣལ་འབྱོར་བདག་ཅག་གི། །སློབ་དཔོན་རྒྱུད་ཀྱི་བསྲུང་མ་དང་། །ཕ་མྱེས་རྒྱུད་ཀྱི་ལྷ་སྲུང་དང་། །ལོ་ཟླ་ཞག་དང་དུས་ཚོད་ལྷ། །རྟེན་འབྲེལ་མོ་ལ་དབང་བ་རྣམས། །དེ་རིང་མོ་འདིའི་རྨུ་གབ་སོལ། །ད་ལྟ་མོ་འདིའི་གསལ་ཆ་སྟོན། །གངས་ཅན་བོད་ཀྱི་ཟོ་དོར་ཆེ། །རྒྱལ་དབང་པདྨ་ཐོད་ཕྲེང་དང་། །མི་ལ་བཞད་པ་རྡོ་རྗེ་རྩལ། །ཀུན་མཁྱེན་ཡབ་སྲས་བརྒྱུད་བཅས་ཀྱི། །བཀའ་ཉན་སྨན་བཙུན་ཀུན་བཟང་མོ། །ཇོ་མོ་བཀྲ་ཤིས་ཚེ་རིང་མས། །དེ་རིང་མོ་འདིའི་གསལ་ཆ་སྟོན། །པྲ་ལྷ་མཐིང་གི་ཞལ་བཟང་མ། །དབུལ་སེལ་ཅོད་པཎ་མགྲིན་བཟང་མ། །ཕྱུགས་སྤེལ་མི་གཡོ་གླང་བཟང་མ། །སྲིད་སྤེལ་གཏའ་དཀར་འགྲོ་བཟང་མ། །འཇིག་རྟེན་མིག་བསྒྱུར་ཌཀྐིའི་ཚོགས། །དེ་རིང་མོ་འདིའི་རྨུ་གབ་སོལ། །ད་ལྟ་མོ་འདིའི་གསལ་ཆ་སྟོན། །བདག་ལ་འགོ་བའི་ལྷ་ལྔ་དང་། །སྐྱོབས་པའི་ལྷ་དགུ་ཐམས་ཅད་ཀྱིས། །དེ་རིང་མོ་འདིའི་གསལ་ཆ་སྟོན། །དྲིས་ལན་ཐེ་ཚོམ་མུན་པ་སོལ། །ལེགས་ཉེས་སྣང་བའི་སྒྲོན་མེ་སྦོར། །བདག་གིས་བརྟགས་པར་བྱ་བའི་དོན། །སྦྱིན་བདག་ཆྒཻ་ཞེས་པ་འདིའི། །གཞི་ཡི་ཆུས་སྲིད་བརྟན་མི་བརྟན། །བཟའ་མི་བྱེ་བྲལ་འོང་མི་འོང་། །གཅེས་ཕྲུག་བྱིས་པ་སོས་མི་སོས། །འབྱུང་འཁྲུགས་ནད་པ་འཚོ་མི་འཚོ། །སྒོ་ཡི་ནོར་ཕྱུགས་འཕེལ་མི་འཕེལ། །ཚེ་ཡི་དམུ་ཐག་སྲ་མི་སྲ། །སྲོག་གི་ཀ་བ་བརྟན་མི་བརྟན། །གཏན་ཆུས་ལྷ་ཆོས་འགྲུབ་མི་འགྲུབ། །དེ་རིང་སྒྲིབ་མེད་གསལ་བར་སྟོན། །ཅེས་བརྗོད་ཅིང་སྔགས་བཟླ་དགོས་ཏེ། ཨོཾ་བཛྲ་ཏྲག་རཀྨོ་པྲ་མོ་ཧ༔ ཙིཏྟ་ཧྲཱིང་ཛཿ ལེགས་ཉེས་གསལ་བར་ཕོབ་ཅིག༔ ཅེས་བདུན་ཙམ་དང་། གཞན་ཡང་ཡེ་དྷརྨ་ལན་གསུམ་བརྗོད་ནས་མིག་བཙུམ་ནས་དུང་ཤོ་མཎྚལ་སྟེང་དུ་ལྟོས་མེད་དུ་འཕང་ལ། ཤོ་མིག་བརྟགས་པ་ནི། ༈ ལྔ་བབ་ཇོ་མོ་ཚེ་རིང་མ༔ གཙོ་འཁོར་འཛོམས་པའི་གཞི་ཕྱྭ་ལ༔ བདེ་སྐྱིད་ཕུན་སུམ་ཚོགས་པར་འགྱུར༔ ཞེས་པས། ཁྱིམ་ཀྱི་མི། སྒོ་ཡི་ནོར། བར་གྱི་རྒྱུ་རྫས། རྨོས་པའི་ལོ་ཏོག་ཐམས་ཅད་ལ་རེ་ཞིག་བཟང་བ་འདྲ་ཡང་། མོ་འདི་འདྲ་ཧ་ཅང་བཟང་ཤས་ཆེ་བས་ཁྱག་དཀའ། སྐུ་རིམ་འབུམ་རྒྱས་འབྲིང་བསྡུས་གསུམ་ཚར་རེ། ཐུབ་པའམ་ཨོ་རྒྱན་སྐྱེས་རབས་རི་མོར་འབྲི་བ། རང་གི་ལྷ་བསྲུང་ལ་གསོལ་མཆོད་དམ་པོ་དགོས། མགྲོན་ཕྱྭ་ཅུང་ཟད་ཕྱི་དལ་ངོ་༔ ཞེས་མགྲོན་པོ་ཞྭ་མགོ་མཐོང་ཙམ་དུ་མ་སླེབ་ན་ཕྱི་དལ་ཆེ་ཡང་འགྱོད་པ་མེད། ནད་ཕྱྭ་མྱུར་དུ་མ་སོས་ན༔ རིམ་གྲོ་ཆེན་པོས་བླུས་ཙམ་ཡིན༔ ཞེས་པས་ནད་པ་ལ་ནད་གཞི་ཆེན་པོ་ཞིག་མེད་ན་མྱུར་དུ་སོས་པར་འགྱུར་བའམ། མྱུར་དུ་མ་སོས་ན་རིམ་གྲོ་ཆེན་པོ་ཞིག་གིས་ཕན་པ་ཙམ་ཡིན་པས། རྒྱལ་བའི་བཀའ་འགྱུར་ཆེན་མོ་གསུང་སྒྲོགས། ཚེ་དཔག་མེད་སྟོང་སྐུ། ཚེ་སྒྲུབ་ཚད་ལྡན། འཆི་བསླུ། ཚེ་ཐར་སྲོག་བླུ་ལོ་གྲངས་ཙམ། ཆུ་གཏོར་འབུམ། ལན་ཆགས་སྟོང་འཇལ་སོགས་གལ་ཆེ། དེ་མིན་གང་ལ་བཏབ་ཀྱང་བཟང་༔ ཞེས་པས། ནོར་ཕྱྭ་ལ་གོད་ངོ་ཆེན་པོ་མེད་ཀྱང་ཕུགས་མི་བརྟན་པ་འདྲ་བས། བསམ་ལྷུན་ཁྲི། གསེར་འོད་ས་བཅུ་མ་ཚར་བཅུ་གསུམ། བརྒྱ་བཞི། གཡང་སྒྲུབ་དགོས། ལོ་ཏོག་ལ་སྤྲིན་ཆེན་མདོ་ཅི་མང་དང་། འདོད་ཡོན་ཟས་བསྔོ་བརྒྱ་རྩ། བསྐོར་བ་སྟོང་དང་། མ་ཎི་འུར་འདོན་སྦྲེལ་ན་ལེགས། རྟ་སར་རྟ་གཟུངས་སྟོང་། རྟ་གླུད་བཏང་། རྟ་བསང་དམ་པོ་དགོས། བྱིས་པ་ཆུང་ངུ་འཚོའམ་ཞེ་ན། ཚེ་མདོ་སྟོང་། མཚན་སྤུང་ཚར་བརྒྱ། གླུད་ཅི་མང་བྱས་ན་མི་སྐྱོན། ཆོས་ཕྱྭར་སྟོན་འཁོར་དབུ་འཕང་མཐོ༔ ཞེས་གནས་བསྟན་ཕྱག་མཆོད་སྟོང་། བསམ་པ་མྱུར་འགྲུབ་མ་སྟོང་། སྒྲོལ་མའི་ཕྱག་འཚལ་ཉེར་གཅིག་ཁྲི། མཎྚལ་བཞི་ཆོག་བྱས་ན་ནམ་ལངས་ཏེ་ཉི་མ་ཤར་བ་དང་འདྲའོ།། ༈ བཞི་བབ་གླང་བཟང་མ་ཡིན་ཏེ༔ གཞི་ཕྱྭར་ཕྱོགས་བཞི་ནད་དགྲ་ལྡང་༔ ལ་འུར་རིམ་གྲོ་བཟློག་པར་འབད༔ ཞེས་གསུངས་པས། དགྲ་ངོ་ཆེ་བས་རིམ་གྲོ་མགོན་པོ་སྟོང་ཚར། བསྒྱུར་བཞི་བཟློག་བརྒྱད། མི་ནག་ཕྱོགས་བཞི། རྒྱལ་མཚན་རྩེ་མོ་སྟོང་འདོན། འཕགས་མ་འོད་ཟེར་ཅན་གྱི་གཟུངས་ཀྱི་དར་མདུང་ཅི་ནུས། དེའི་བསྙེན་པ་འབུམ། མདོ་བཟློག་ཚར་ལྔ་བརྒྱ། གདུགས་དཀར་བཟློག་པ་ཅི་མང་མྱུར་བར་འགྲུབ་ན་མི་སྐྱོན། དེ་མིན་འགྱོད་པ་ཡོད། མགྲོན་ཕྱྭ་འགྱོད་པ་དང་བཅས་འོང་༔ ཞེས་ཐག་ཉེར་ཕྱིན་ན་དཀའ་ཚེགས་ངོ་དང་། ཐག་རིང་དུ་ཕྱིན་ན་དགྲ་རྐུན་ནམ་ལྷུང་བརྡབ་ངོ་ཡིན་པས། སྒྲོལ་མ་ཅི་མང་དགོས། ནད་པར་འདུ་བ་རྣམ་བཞི་བསྡོངས༔ སྨན་རྒྱལ་ལ་སོགས་རིམ་གྲོ་དང་༔ རྟེན་བཞེངས་སྤོང་དག་ལུས་མིང་བརྗེ༔ ཞེས་པས་སྨན་ལྷའི་ཆོ་ག་སྟོང་། འཆི་བསླུ། སྨན་ལྷ་སྟོང་སྐུ། འབུམ་འུར་འདོན། ལན་ཆགས་ཁྲི་འཇལ། ཚེ་ཐར་ལོ་གྲངས། ལུས་སེར་མོའི་གོས་གྱོན། མིང་བརྗེ། རྒྱུ་རྫས་མཆོད་སྦྱིན་ཅི་ནུས་བྱས་ནས་སྨན་པ་བཟང་པོ་བསྟེན་ན་མི་སྐྱོན་ཙམ་འོང་། ཆོས་ཕྱྭར་ཆོས་ཕུགས་རླུང་གིས་ཁྱེར༔ ཞེས་འདུག་པས། ཁྱོད་ཀྱི་བློ་སྣ་མང་བས། དཔེར་ན་བྱ་སྒྲོ་རླུང་གིས་ཁྱེར་བ་དང་འདྲ། སྐབས་རེར་ལེགས་ཀྱང་སྐབས་རེར་མི་ལེགས། རིམ་གྲོ་འདུག་གམ་ཞེ་ན། དགེ་བའི་གྲོགས་པོ་བསྟེན་ནས་སྐྱབས་སྡོམ་བསྐྱར་ནས་ཞུས་ཏེ་སྐྱབས་འགྲོ་འབུམ་ཕྲག་བསགས། ཨོ་རྒྱན་སྐུ་སྤར་འབུམ་མམ་ཐ་ནའང་ཁྲི་ཚོ། བསམ་ལྷུན་ཆེ་ཆུང་འབུམ། བཟང་སྤྱོད་སྨོན་ལམ་སྟོང་བསྒྲུབ་ན་ཆོས་ཚུགས་མ་ཤོར་ཙམ་འོང་ལས་ཆེ། ༈ གསུམ་བབ་གཡང་ལྷ་གཏད་དཀར་མ༔ གཞི་ཕྱྭ་གཡང་འབོད་གཡང་རྟེན་འཛུགས༔ རྒྱལ་བའི་གསུང་རབ་བཞེངས་དང་སྒྲོགས༔ ཞེས་པས་གཡང་ཆགས་ཀྱང་། བསེ་རག་འཁོར་བར་འདུག་པས་ཉ་སྦྱིན། གྲོག་སྦྱིན། དགུན་དུས་བྱ་བྱིའུ་ལ་སྦྱིན་གཏོང་། ལན་ཆགས་སྟོང་འཇལ། ཆུ་གཏོར་འབུམ། དེ་རྣམས་སྔོན་དུ་སོང་ནས་ནོར་རྒྱུན་མའི་གཡང་སྒྲུབ་ཚད་ལྡན། འབུམ་རྒྱས་འབྲིང་བསྡུས་གསུམ་འབྲི་ཀློག བུམ་གཏེར་དགོས། མགྲོན་ཕྱྭར་ཟས་ནོར་རྙེད་དེ་འོང་༔ ཞེས་མགྲོན་པོ་ནི་ཞག་གཉིས་ཚུན་ཟས་དཀར་གསུམ་དང་། ཤ་ཆང་སོགས་དང་། ནོར་སྤུ་རྟགས་ཅན་ནམ་རིན་པོ་ཆེའི་རིགས་རྙེད་དེ་འོང་ངོ་།། ནད་ཕྱྭར་འོད་ཅན་གཡང་ཆགས་རྫས༔ དེ་རྗེས་རྒྱལ་བསེན་འབྲང་ཞེས་བཤད༔ ཞེས་པས་ནད་ཕྱྭ་ནི་གདོན་གྱིས་སྣ་ཁྲིད་བྱས་པ་ཡིན། རྫས་དར་གོས་སམ་རིན་པོ་ཆེའི་རིགས། ཡང་ན་ཕྱུག་པོའི་ལག་ནས་བྱུང་བའི་རྫས་ཀྱིས་གདོན། ཕྱོགས་ནི་ཤར་རམ་ནུབ་ནས་འོང་བ་ཤུགས་ཆེ་བས། རིམ་གྲོ་ལ་བཛྲ་གུ་རུའི་ཡོན་འབྱོར་བ་དང་བསྟུན་པ། སྨན་ལྷ་སྟོང་རྩ། འདྲེ་མོ་རྫ་མདོས། རྒྱལ་མདོས་སམ་མི་ནུས་ན་རྒྱལ་གསོལ་ཕྱོགས་བཞི་བྱས་ནས་ངག་འདོན་སིདྡྷི་གལ་ཆེ། བྱིས་པའི་སྲོག་ཕྱྭར་སྒྲོལ་མ་འབུམ། ཕུར་བ་རྫ་འཛབ་བམ་སྲི་མནན་བགྱིས་ན་མི་སྐྱོན། ནོར་ཕྱྭར་གསེར་འོད་བརྒྱ་ཚར། ཆུ་གཏོར་འབུམ། མ་ཎིའི་ཇོ་དར་དང་མཆོད་རྟེན་ཆ་བརྒྱད། ལན་ཆགས་ཅི་མང་དགོས་འདུག རྟ་སར་འབུམ་ཞལ་ཕྱེ། འཕགས་པ་གསེར་འོད་ཚར་བཅུ་གསུམ། བརྒྱ་བཞི། རྟ་གཟུངས་སྟོང་འདོན་བགྱིས་ན་མི་སྐྱོན། ར་ལུག་སོགས་རྐང་ཕྲན་ཡོད་ན་ངན་པས་ལན་ཆགས་བརྒྱ་འཇལ་ཕྱོགས་བཞི། འབྱུང་བཞིའི་གཏོར་མ་བརྒྱ་རྩ། གཡང་འབོད་བརྒྱ་རྩ་དགོས། ཆོས་ཕྱྭར་ཆོས་པ་ནོར་ཕྱིར་འབྲང་༔ ལོངས་སྤྱོད་ཕུན་སུམ་ཚོགས་པའི་མོ༔ ཞེས་པས་ཆོས་ཕྱྭ་ལ་ཚོང་དང་དཀོར་སོགས་ལོག་འཚོའི་ཕྱིར་འབྲང་ནས་རྣམ་གཡེང་ཆེ་ངོ་ཤར་བས་བསྙུང་གནས་ལོ་གྲངས། མ་ཎི་རྒྱུན་འདོན། སྐྱབས་སྡོམ་དང་སེམས་བསྐྱེད་ཀྱི་བསླབ་བྱ་ལ་འབད་པ་གལ་ཆེ་བས་བརྩོན་འགྲུས་བསྐྱེད་འཚལ། ༈ གཉིས་བབ་མཐིང་གི་ཞལ་བཟང་མ༔ བུད་མེད་དཔལ་ཅན་མོ་ལ་བཟང་༔ ཞེས་པས་ཁྱིམ་ཕྱར་བྱིས་པ་རིགས་བཟང་འོང་ངོ་ཡོད་ཀྱང་གེགས་ཆེ་བས་སངས་རྒྱས་སྟོང་སྐུ། སྐལ་བཟང་བརྒྱ་ཚར། བཀའ་བརྒྱད་སྒྲུབ་པ། སྒྲོལ་མའི་ཕྱག་འཚལ་ཉེར་གཅིག་ཁྲི་འབུམ་བསགས་བཅུག་ན་ལེགས། གཞི་ཕྱྭར་འཕྱོན་མའི་གཏམ་བཞིན་དུ༔ མ་ངེས་བདེ་སྡུག་རེས་མོས་བྱེད༔ ཅེས་བུད་མེད་འཕྱོན་མས་བཟང་ངན་སྤེལ་ཏེ་གཏམ་སྣ་ཚོགས་སྨྲ་བ་བཞིན་བདེ་སྡུག་མ་ངེས་པས། རིགས་གསུམ་མགོན་པོའི་གཟུངས་ལྡན་སཙྪ་འབུམ། བཀའ་བརྒྱད་གྲི་འདུལ། རྒྱལ་པོ་བསོད་ནམས་སྟོབས་ཀྱི་རྟོགས་བརྗོད་ཡི་གེ་དང་གཟུགས་བརྙན། རང་གི་བསྲུང་མའི་གསོལ་ཁ། ཞི་བརྔན་བསང་གསུམ་གལ་ཆེ། མགྲོན་ཕྱྭར་ཐག་ཉེར་སླེབས་པའི་ངོ་༔ ནད་ཕྱྭར་བུད་མེད་འདྲེ་མོས་གནོད༔ ཞག་བདུན་ཚུན་དུ་གེགས་ཆེན་ཡོད༔ པད་འབྱུང་སྒྲོལ་མར་གསོལ་བ་ཐོབ༔ ཞེས་བུད་མེད་ཀྱི་ལག་ནས་ཟས་ཟོས་པའམ། ཡང་ན་མི་མགྲོན་རྗེས་སུ་འདྲེ་འབྲང་བས་གནོད། འདྲེ་མོ་རྫ་མདོས་དང་། བཛྲ་གུ་རུ་དང་མ་ཎི་འུར་འདོན་གྱི་ཡོན། རྣམ་འཇོམས་ཁྲི་ཚར་དང་སྟོང་བཟློག །མ་ཎི་དང་སིདྡྷིའི་ཇོ་དར་ཅི་མང་། མ་ཎི་རྡོ་འབུམ་གྱི་ཡོན་སྤྲད། སྒྲོལ་མ་འབུམ་གྱི་ཀློག་འདོན་དབུ་བཞག་ན་ཞག་བདུན་ཚུན་རྩུབས་ཀྱང་གེགས་ཞི་བ་འདྲ། ཆོས་ཕྱྭར་བུད་མེད་བསླུ་བྲིད་ངོ་༔ ཞེས་ཁྱེད་ཀྱི་ཆོས་ལ་བུད་མེད་ཀྱི་གེགས་ཡོད་པས་བླ་མ་དམ་པ་ལ་བརྟེན་པ་དང་། བསྲུང་སྡོམ་ལ་ནན་ཏན། ཁྲེལ་ཡོད་ཀྱི་སྒོ་ནས་གནས་བསྟན་ཕྱག་མཆོད་དང་ལེའུ་བདུན་པ་རྒྱུན་འདོན་བྱས་ན་ཕན་ནོ།། ནོར་ཕྱུགས་ལ་གཟུངས་འདུས་དང་། ནོར་རྒྱུན་མའི་གཟུངས་ཅི་ནུས་དང་། སཙྪ་དཀར་སེར་དམར་ལྗང་ཁྲི་ཚོ། མར་མེ་ཁྲི་འབུམ། ཐུགས་ཆེན་དང་ཀུན་རིགས། ཐོས་གྲོལ་སོགས་ཀྱི་ཆོ་ག་གནས་འདྲེན་གལ་ཆེ། བྱིས་པའི་སར། སོར་འབྲང་གཟུངས་སོགས་གཟུངས་གྲྭ་ལྔ་ཚར་ཅི་མང་། སྒྲོལ་མ་ཉེར་གཅིག་གི་སྐུ་ཐང་དང་མཎྚལ་བཞི་ཆོག་བརྒྱ་རྩ་སོགས་ལ་འབད་ན་སེམས་འཚེར་དང་བཅས་པའི་ངང་ནས་སྲོག་ཕྱྭར་མི་སྐྱོན། རྟ་སར་རྟ་གཟུངས་སྟོང་། བརྒྱ་བཞི་དམ་ཟབ་དགོས། ༈ གཅིག་བབ་ཅོད་པཎ་མགྲིན་བཟང་མ༔ ཞེས་ཤོ་མིག་སྟེང་འོག་གཉིས་ཡོད་པས་གང་ལ་དཔྱད་ཀྱང་འདྲ། གཞི་ཕྱྭར་ཁྱིམ་གཅིག་མི་གཅིག་སྡོད༔ ཅེས་མི་མང་ཡོད་ཀྱང་ཤི་ཆད་ཀྱི་ངོ་བབ་པ་ཡིན་པས་བཀའ་འགྱུར་ཀློག་འདོན། ཚེ་སྒྲུབ། འཆི་བསླུ་གལ་ཆེ། ཕུགས་སུའང་མི་ལེགས་པས་པད་འབྱུང་སྐྱེས་རབས་རི་མོ། བཀའ་ཐང་རིགས་མི་འདྲ་བ་བསྲེས་པ་ཚར་ལྔ་བརྒྱ། ཚེས་བཅུ་དང་ཉེར་ལྔར་ཚོགས་མཆོད་རྒྱུན་འཛུགས། མར་མེ་རྒྱུན་འབར་སོགས་ལོ་ལྟར་རིམ་གྲོ་ལ་འབད་དགོས་ཟེར། ཡང་། ནང་དུ་རྫས་མེད་སྟོང་པའི་ངོ་༔ ཞེས་མི་ཡོད་ཀྱང་ནོར་རྫས་མེད་ཅིང་ཁྱིམ་སྟོང་དུ་འོང་བའི་ངོ་ཡིན་པས། རིམ་གྲོར། ཉ་གྲོག་གསོ་ཞིང་འབུམ་གསུམ་ཀློག༔ དཀོན་མཆོག་སྐྱབས་འགྲོ་གཡང་ལྷ་སྒྲུབ༔ ཞེས་ཉ་སྦྱིན་ལན་བཅུ་གསུམ། གྲོག་སྦྱིན་བཅུ་གསུམ། འབུམ་བརྒྱ། ཉི་ཁྲི་དང་བརྒྱད་སྟོང་པ་ཚར་ཅི་མང་། སྐྱབས་འགྲོ་འབུམ། རྣམ་སྲས་ཀྱི་གཡང་སྒྲུབ་དང་སྐུ་ཐང་། ལམ་འཕྲང་རྩུབ་རོང་བསལ་བ་དང་། ཟམ་པ་འཛུགས་དགོས། མགྲོན་ཕྱྭར་འགྱོད་མེད་དལ་དུ་སླེབ༔ གོ་སླ། ནད་ཕྱྭར་ཚེ་སྒྲུབ་འཆི་བསླུ་སྒྲུབ༔ ཕྱིའི་ཚེ་སྒྲུབ་གཞན་གྱིས་བསྒྲུབ་དགོས། ནང་གི་ཚེ་སྒྲུབ་རང་གིས་རྩ་གསུམ་ལ་གསོལ་བ་འདེབས་པ་དང་། ཚེ་ལྷའི་སྒྲུབ་པ་ལ་འབད་པ་གལ་ཆེ། གསང་བའི་ཚེ་སྒྲུབ་རོ་སྙོམས་ཀྱི་གདམས་པ་ཟབ་མོ་ལ་འབད་དགོས། ཕྱིའི་འཆི་བསླུ་གཞན་གྱི་སྲོག་སྐྱོབས་པ་དང་། ནང་གི་འཆི་བསླུ་ནད་པ་མང་པོ་ལ་རིམ་གྲོ་བྱང་ཆུབ་སེམས་བསྐྱེད། བདེ་སྡུག་གཏོང་ལེན། གསང་བའི་འཆི་བསླུ་སྐྱེ་འཆི་རང་བཞིན་གྱིས་མ་གྲུབ་པའི་སྟོང་ཉིད་ལ་གདེང་འཆའ་དགོས་སོ།། དེའི་ངང་ནས། སིདྡྷི་མ་ཎི་འུར་འདོན་དགོས༔ ཞེས་སིདྡྷི་དུང་ཕྱུར་རམ། བྱེ་བ། ལོ་གྲངས། མ་ཎིའང་ཅི་མང་གི་ཡོན་དང་འུར་འདོན་དགོས་སོ།། ད་རེས་རིམ་གྲོས་བསླུས་པ་ཙམ༔ ཞེས་པ་ལྟར་དང་། ཆོས་ཕྱྭར་གཅིག་པུར་སྒྲུབ་ཚུགས་ཟིན༔ ཞེས་པ་ལྟར། རི་ཁྲོད་དུ་ཆོས་ཚུགས་ཟིན་པའམ། མིན་ཀྱང་དགེ་བ་བཅུའམ་བསགས་པ་ཆེ་བ་ཞིག་ཏུ་འགྱུར་ངེས་སོ།། ཅེས་པའང་སྤྲུལ་སྐུ་དམ་པའི་བཀའ་བཞིན། ཤོ་མོའི་གཞུང་རང་སོར་བཞག་ཏེ་རིམ་གྲོ་སོགས་ཅུང་ཟད་རྒྱས་སུ་བཏང་བ་དགེ་སྦྱོང་རྒྱ་སྤྲུལ་བས་སུག་བྲིས་བགྱིས་པ་དགེའོ།།