ཟབ་ཆོས་པདྨ་དྲག་ཁྲོས་ཀྱི་ཆར་འབེབས་ལ་ཉེ་བར་མཁོ་བའི་ཟུར་འགེབས་སྤྲིན་གྱི་བླ་བྲེ།
༄༅། ཟབ་ཆོས་པདྨ་དྲག་ཁྲོས་ཀྱི་ཆར་འབེབས་ལ་ཉེ་བར་མཁོ་བའི་ཟུར་འགེབས་སྤྲིན་གྱི་བླ་བྲེ་ཞེས་བྱ་བ། རིགས་ཀུན་བདག་ཉིད་བླ་མ་དང་། །རིགས་བརྒྱ་རིགས་ལྔ་རིགས་གཅིག་སོགས། །ཀུན་གྱི་རྣམ་རོལ་རྗེ་བཙུན་མར། །བཏུད་དེ་ཆར་འབེབས་འདོད་གསོལ་འདྲི། །དེ་ཡང་ཡི་དམ་གང་བརྟེན་གྱི། །རྩ་སྔགས་དང་ནི་རང་རང་གི། །ཆར་འབེབས་སྔགས་རྣམས་དག་པར་བཟླ། །མཆོད་བསྟོད་རྒྱས་བསྡུས་སྔོན་སོང་ནས། །སླར་ཡང་མདུན་གྱི་ནམ་མཁའ་ལ། །ཨོ་རྒྱན་པདྨ་ཐོད་ཕྲེང་རྩལ། །གཡས་ཕྱོགས་ཡི་དམ་ལྷ་ཚོགས་དང་། །གཡོན་ཕྱོགས་མཁའ་འགྲོ་རྒྱ་མཚོས་བསྐོར། །དེ་མཐར་ཆོས་སྐྱོང་སྲུང་མ་རྣམས། །སྐུ་ལས་འོད་ཟེར་རབ་འཕྲོས་པས། །སྐུ་གསུམ་ཞིང་བཞུགས་སངས་རྒྱས་དང་། །བྱང་སེམས་ཉན་རང་ཐུགས་རྒྱུད་བསྐུལ། །ཀུན་ཀྱང་འཛམ་གླིང་སེམས་ཅན་ལ། །ཐུགས་བརྩེའི་ཆར་ཆེན་འབེབས་པ་དང་། །ལོ་འབྲས་སྨིན་ལ་རབ་དགོངས་ནས། །རྒྱ་མཚོའི་ཀླུ་ཡི་ཚོགས་རྣམས་ལ། །དྲང་སྲོང་བསླུ་མེད་བདེན་པའི་བཀས། །འཛམ་གླིང་ལ་སོགས་སེམས་ཅན་ལ། །ཚ་བའིགདུང་བ་སེལ་ཕྱིར་དུ། །ཆར་གྱི་རྒྱུན་ཆེན་ཕོབ་ཅིག་ཅེས། །བཀའ་ནན་ཕྲིན་ལས་བསྒྲུབ་པར་བསམ། །དེ་ཚེ་འདོད་གསོལ་འདི་སྐད་བརྗོད། །ཨེ་མ་ཧོ། །ཡེ་ཐོག་ཀུན་བཟང་གདོད་མའི་རྒྱལ་བ་ནི། །མ་བཅོས་ལྷུན་གྲུབ་འཁོར་འདས་ཀུན་གྱི་གཞི། །སྙན་གསན་དབབ་དང་བསྐུལ་དུ་མི་འཚལ་ཡང་། །ཡིད་བཞིན་ནོར་དང་དཔག་བསམ་ལྗོན་ཤིང་བཞིན། །དམིགས་མེད་སྙིང་རྗེ་ཆེན་པོའི་ངང་ཉིད་ལས། །སྡུག་བསྔལ་ཚ་གདུང་སེལ་བའི་ཆར་སྤྲིན་གྱིས། །སྐུ་བཞིའི་ལོ་འབྲས་སྨིན་པར་མཛད་དུ་གསོལ། །དུག་ལྔ་མ་སྤང་གནས་སུ་དག་པ་ལས། །རང་བྱུང་ཡེ་ཤེས་ལྔ་ཡི་སྐུར་སྨིན་པ། །མཚན་དཔེའི་བདག་ཉིད་རིགས་ལྔ་ཡབ་དང་ཡུམ། །བདེ་སྟོང་དབྱེར་མེད་མཁྱེན་བརྩེའི་ཆར་སྤྲིན་གྱིས། །ས་བཅུའི་ལོ་འབྲས་སྨིན་པར་མཛད་དུ་གསོལ། །གདུལ་བྱའི་སེམས་ཉིད་དག་པའི་མེ་ལོང་ལ། །གང་འདུལ་སྤྲུལ་པའི་སྐུར་སྣང་རྫོགས་སངས་རྒྱས། །སྐལ་བཟང་འདྲེན་པ་སྟོང་རྩ་རྣམ་བཞིའི་འཁོར། །འགྲོ་དོན་ཚད་མེད་ཐུགས་རྗེའི་ཆར་སྤྲིན་གྱིས། །ཕན་བདེའི་མྱུ་གུ་སྨིན་པར་མཛད་དུ་གསོལ། །ཁྱད་པར་མཐའ་ཡས་རྒྱལ་བ་ཐམས་ཅད་ཀྱི། །སྐུ་གསུང་ཐུགས་ཀྱི་གསང་བའི་མཛོད་འཛིན་པ། །བྱང་ཆུབ་སེམས་དཔའ་རིགས་གསུམ་མགོནཔོ་ཡི། །ཚད་མེད་ཐུགས་བསྐྱེད་སྨོན་ལམ་བདེན་པའི་མཐུས། །འཛམ་བུའི་གླིང་འདིར་ཆར་གྱི་རྒྱུན་ཕབ་ནས། །འབྲུ་བཅུད་རྩི་སྨན་རྒྱས་པར་མཛད་དུ་གསོལ། །ཡང་དགོས་རྩོད་ལྡན་སྙིགས་མའི་སྐྱབས་གཅིག་པུ། །རྒྱ་མཚོར་སྐུ་འཁྲུངས་ཨོ་རྒྱན་ཐོད་ཕྲེང་རྩལ། །གསང་སྔགས་བཀའ་གཏེར་བསྟན་པའི་མངའ་བདག་རྗེ། །ལྷ་སྲིན་སྡེ་བརྒྱད་དྲེགས་པའི་རྒྱུད་བསྐུལ་ཏེ། །མི་བཟོད་ཚ་བའི་འཇིགས་པ་སྐྱོབས་ཕྱིར་དུ། །ཡིད་འོང་སྤྲིན་ལས་ཆར་ཆེན་འབེབ་པ་དང་། །རྩི་ཤིང་ལོ་འབྲས་སྨིན་པར་མཛད་དུ་གསོལ། །བསྐལ་མང་གོང་ནས་འཁོར་བ་མ་སྟོང་བར། །འགྲོ་ཀུན་འཇིགས་པའི་ཚོགས་ལས་སྐྱོབས་པའི་ཕྱིར། །ལྷ་མོའི་གཟུགས་ཀྱིས་གཞན་དོན་མཐར་ཕྱིན་པ། །རྗེ་བཙུན་འཕགས་མ་སྒྲོལ་མཛད་མྱུར་དཔའ་མོ། །གློག་ལྟར་མྱུར་བའི་ཐུགས་རྗེའི་ཆར་ཆེན་གྱིས། །ཉམས་ཐག་སེམས་ཅན་ཚ་གདུང་སེལ་བ་དང་། །བདེ་སྐྱིད་ལོ་འབྲས་སྨིན་པར་མཛད་དུ་གསོལ། །ཞི་བས་མི་འདུལ་གདུག་ཅན་རུ་ཏྲའི་ངོར། །ཁྲོ་གཏུམ་གར་དགུའི་ཉམས་ལྡན་དཔལ་ཆེན་པོ། །སྒྲུབ་སྡེ་བརྒྱད་སོགས་ཡི་དམ་ལྷག་པའི་ལྷ། །མཆོག་ཐུན་དངོས་གྲུབ་འདོད་དགུའི་དཔལ་སྟེར་བའི། །གསང་གསུམ་མི་ཟད་རྒྱན་གྱི་འཁོར་ལོ་ལས། །ཕན་བདེའི་ཆར་ཆེན་འབེབ་པར་མཛད་པ་དང་། །དབུལ་སེལ་ལོ་འབྲས་སྨིན་པར་མཛད་དུ་གསོལ། །གནས་མཆོག་སོ་གཉིས་ཡུལ་ཆེན་ཉེར་བཞི་ཡི། །གནས་ཀྱི་མངའ་བདག་ཌཱཀྐི་སྡེ་ལྔ་དང་། །དཔའ་བོ་མཁའ་འགྲོ་ཤ་ཟ་ཤུགས་འགྲོ་སོགས། །ལེགས་ཉེས་ལྟང་འཛིན་དམ་ཚིག་རྗེས་གཅོད་པའི། །བཀའ་འཁོར་མ་མོ་མཁའ་འགྲོའི་རྒྱུད་བསྐུལ་ནས། །འཛམ་བུའི་གླིང་འདིར་ཆར་གྱི་རྒྱུན་ཆེན་ཕོབས། །རྩི་ཤིང་ལོ་འབྲས་གཡུར་དུ་ཟ་བར་མཛོད། །བདག་གི་ཚེ་རབས་སྔོན་ནས་ད་ལྟའི་བར། །ལས་ཀྱིས་འབྲེལ་བའི་བསྲུང་མ་དམ་ཚིག་ཅན། །མགོན་པོ་ཕོ་རྒྱུད་ལྷ་མོ་མོ་རྒྱུད་དང་། །གཟའ་དང་དམ་ཅན་ཆོས་རྒྱལ་བཙན་རྒོད་སོགས། །འགོ་ཞིང་སྡོང་གྲོགས་བྱེད་པ་ཐམས་ཅད་དང་། །ཁྱད་པར་གནོད་སྦྱིན་ཆེན་པོ་ཡང་ལེ་བེར། །བཙན་རྒོད་སྤུན་བདུན་སྤྲུལ་དང་ཡང་སྤྲུལ་བཅས། །མྱུར་མགྱོགས་མཐུ་སྟོབས་ནུས་པའི་རྩལ་ཕྱུངས་ལ། །རྩི་ཤིང་ནགས་ཚལ་སྐམ་པའི་ཆར་ཆོད་མཁན། །གཟུགས་ཅན་གཟུགས་མེད་འབྱུང་པོའི་འཚེ་བ་བཟློག །ཕན་བདེའི་ལོ་འབྲས་སྨིན་པའི་ཆར་རྒྱུན་ཕོབས། །ཚངས་པ་བརྒྱ་བྱིན་ལྷ་ཡི་ཚོགས་རྣམས་དང་། །ཐག་བཟང་རིས་སོགས་ལྷ་མིན་རིགས་རྣམས་དང་། །ཁྱད་པར་དགའ་བོ་འཇོག་པོ་ཉེ་དགའ་བོ། །རྒྱལ་རིགས་རྗེས་རིགས་དམངས་རིགས་བྲམ་ཟེའི་རིགས། །གདོལ་བ་ལ་སོགས་ཀླུ་རིགས་བསམ་ཡས་པས། །དཀོན་མཆོག་གསུམ་གྱི་བཀའ་ལས་མི་འདའ་བར། །ཚ་བའི་གདུང་སེལ་སྤྲིན་གྱི་གུར་ཕུབ་ཏེ། །ཡིད་འོང་བསིལ་བའི་ཆར་ཆེན་འབེབ་པར་མཛོད། །བཀྲེས་སྐོམ་ནད་སེལ་སྨན་འབྲས་རྒྱས་པར་མཛོད། །ཅེས་བརྗོད་ཀླུ་ཆེན་བརྒྱད་པོ་སོགས། །ཀུན་གྱིས་ཆུ་ཡི་རྐྱལ་བ་ཐོགས། །མཁའ་ལ་སྤྲིན་གྱི་རྟ་ཞོན་ནས། །གང་དམིགས་ཡུལ་དེར་གྲུ་ཆར་ཕབ། །ལོ་འབྲས་ཕུན་སུམ་ཚོགས་པར་བསམ། །ཡི་དམ་གང་ཡིན་སྔགས་ཤམ་དུ། །ཨོཾ་ནཱ་ག་ག་ལ་ཧཱུྃ། ནཱ་ག་ལི་ལེ། ནཱ་ག་རཱ་ཛ། ཆར་ཕོབས་མེ་གྷ་བསྡུས་བསྡུས། མ་ཧཱ་པ་ཎི་སྭཱ་ཧཱཿ ཤགས་ཤགས་དྲག་ཏུ་ཕོབསཿ ཅེས་བརྗོད་སྐབས་སུ་ཀླུ་གཏོར་འབུལ། །སྦྱོར་བ་སེམས་བསྐྱེད་ཀྱིས་དྲང་ནས། །དངོས་གཞི་སྟོང་དང་སྙིང་རྗེའི་ངང་། །རྗེས་ལ་དགེ་བ་གཞན་དོན་བསྔོ། །ཆོ་གའི་རྗེས་ཆོག་རང་གཞུང་བཞིན། །ཆད་ལྷག་མེད་པ་གལ་ཆེའོ། །ཅེས་པ་འདི་ཡང་མཚུངས་མེད་སྤྲུལ་པའི་སྐུའི་བཀའ་བཞིན་ཆོས་གཟུགས་འདུ་ཤེས་གསུམ་པ་ཙི་ནའི་སྤྲུལ་མིང་པས་གང་ཤར་སྙིང་པོར་དྲིལ་ཏེ་བརྗོད་པ་དགེའོ།།