བླ་མ་དགོངས་པ་འདུས་པ་ལས་ཆར་ཆོག་ལྷན་ཐབས་སྙན་གསན་དབབ་པ།
བླ་མ་དགོངས་པ་འདུས་པ་ལས་ཆར་ཆོག་ལྷན་ཐབས་སྙན་གསན་དབབ་པ་ནི༔ དང་པོ་འགབ་འདྲེ་བསེ་རག་མནན༔ དེ་ནས་ཆུ་མིག་མགོར་སོང་ལ༔ དུང་འབུད༔ དཀར་གཏོར་བཟུང་ལ༔ རང་ཉིད་ལྷ་ཞི་བ་བསྒོམ་ལ༔ འོ་ཀླུའི་རྒྱལ་པོ་གཙུག་ན་རིན་ཆེན༔ ཀླུ་མོ་ཀུན་ཤེས་འོད་ལྡན༔ ཀླུ་ཕྲུག་ཐ་རེ་འོད་དཀར༔ ཀླུའི་རྒྱལ་པོ་དགའ་བོ་དང་འཇོག་པོ་དང༔ སྟོབས་རྒྱུ༔ རིག་ལྡན་དང༔ ནོར་རྒྱས་ཀྱི་བུ་དང༔ དུང་སྐྱོང་དང༔ པདྨ་དང༔ ཨེ་ལའི་འདབ་མ་ཅན་དང༔ ཆུ་བདག་ཝ་རུ་ན་དང༔ ཀླུའི་རྒྱལ་པོ་རྒྱལ་རིགས་ཀྱི་རྒྱལ་པོ་རྣམས་དང༔ རྗེ་རིགས་ཀྱི་རྒྱལ་པོ་རྣམས་དང༔ རྨང་རིགས་ཀྱི་རྒྱལ་པོ་རྣམས་དང༔ བྲམ་ཟེའི་རིགས་ཀྱི་རྒྱལ་པོ་རྣམས་དང༔ གདོལ་པའི་རིགས་ཀྱི་རྒྱལ་པོ་རྣམས་ཉོན་ཅིག༔ ཁྱེད་རྣམས་ལ་ཕོད་བཙུགས་པར་འོང་བ་མ་ཡིན༔ དོ་བསྡོ་བ་ལ་འོང་བ་མ་ཡིན༔ འགྲན་བཙལ་བ་ལ་འོང་པ་མ་ཡིན༔ གཏད་དང་མནན་པ་འཕང་བ་ལ་འོང་བ་མ་ཡིན༔ ཐུན་དང་ཁྲག་ཟོར་འཕེན་པ་ལ་འོང་བ་མ་ཡིན་ཏེ༔ ངེད་འཛམ་གླིང་དུ་ཐན་པ་ཆེན་པོ་བྱུང་བས༔ ཐུགས་ཞི་བའི་ངང་དུ་ཆར་སློང་དུ་འོང་བ་ཡིན༔ འོ་ཀླུ་རྒྱལ་འཁོར་དང་བཅས་པ་ཁྱོད་ཉོན་ཅིག༔ ཁྱད་པར་འདིར་གནས་པའི་ལྷ་ཀླུ་སྡེ་བརྒྱད་རྣམས་ཉོན་ཅིག༔ འོག་མིན་ཆོས་ཀྱི་དབྱིངས་ཀྱི་ཕོ་བྲང་ནསཿ རྒྱལ་བ་ཀུན་ཏུ་བཟང་པོ་ལ་བཀའ་བརྒྱུད་བླ་མ་རྣམས་ཀྱིས་བཀའི་བསྡུ་བ་པོ་བྱས་པ་ལ༔ འཇིག་རྟེན་གྱི་ཁམས་སུ་ཚིག་པ་ཆེན་པོ་བྱུང་ནས༔ ཁྱོད་ཀླུའི་གྲོང་ཁྱེར་དུ་དགེ་བ་བསྐུལ་བ་ལ༔ ངེད་དཔོན་སློབ་མཆེད་གྲོགས་ཆར་སློང་ལ་འོང་བ་ཡིན་པས༔ ཆར་ཆེན་པོ་ད་ལྟ་ཉིད་དུ་ཕོབ་ཅིག༔ མྱུར་དུ་ཕོབ་ཅིག༔ འོག་མིན་སྟུག་པོ་བཀོད་པའི་ཞིང་ཁམས་ན༔ སངས་རྒྱས་རྣམ་པར་སྣང་མཛད་ལ་རྒྱལ་བ་རིགས་ལྔས་བཀའི་བསྡུ་བ་པོ་བྱས་ནས༔ འཇིག་རྟེན་གྱི་ཁམས་སུ་ཚིག་པ་ཆེན་པོ་བྱུང་ནས༔ ཁྱོད་ཀླུའི་གྲོང་ཁྱེར་དུ་དགེ་བ་བསྐུལ་བ་ལ༔ ངེད་དཔོན་སློབ་མཆེད་གྲོགས་ཆར་སློང་ལ་འོང་བ་ཡིན་པས༔ ཆར་ཆེན་པོ་མྱུར་དུ་ཕོབ་ཅིག༔ དྲག་ཏུ་ཕོབ་ཅིག༔ འོ་བྱ་རྒོད་ཕུང་པོའི་རི་བོ་ནས་བཅོམ་ལྡན་འདས་རྒྱལ་བ་ཤཱཀྱ་ཐུབ་པ་ལ༔ འཁོར་ཉན་ཐོས་མཆེད་བརྒྱད་ཀྱིས་བཀའི་བསྡུ་བ་པོ་བྱས་ནས༔ འཇིག་རྟེན་གྱི་ཁམས་སུ་ཚིག་པ་ཆེན་པོ་བྱུང་ནས༔ ཁྱོད་ཀླུའི་གྲོང་ཁྱེར་དུ་དགེ་བ་བསྐུལ་བ་ལ༔ ངེད་དཔོན་སློབ་མཆེད་གྲོགས་ཆར་སློང་ལ་འོང་བ་ཡིན་པས༔ ཆར་ཆེན་པོ་མྱུར་དུ་ཕོབ་ཅིག༔ ད་ལྟ་ཉིད་དུ་ཕོབ་ཅིག༔ འོ་བྱང་ཕྱོགས་ལྗང་ལོ་ཅན་གྱི་གནས་མཆོག་ནས༔ གསང་བའི་བདག་པོ་ཕྱག་ན་རྡོ་རྗེ་ལ༔ འཁོར་ས་བཅུའི་བྱང་ཆུབ་སེམས་དཔའ་རྣམས་ཀྱིས་བཀའི་བསྡུ་བ་བྱས་ནས༔ འཇིག་རྟེན་གྱི་ཁམས་སུ་ཚིག་པ་ཆེན་པོ་བྱུང་ནས༔ ཁྱོད་ཀླུའི་གྲོང་ཁྱེར་དུ་དགེ་བ་བསྐུལ་བ་ལ༔ ངེད་དཔོན་སློབ་མཆེད་གྲོགས་དགེ་བའི་ཆར་སློང་ལ་འོང་བ་ཡིན་པས༔ ཆར་ཆེན་པོ་ད་ལྟ་ཉིད་དུ་ཕོབ་ཅིག༔ མྱུར་དུ་ཕོབ་ཅིག༔ ནུབ་ཕྱོགས་ཨོ་རྒྱན་གྱི་གནས་མཆོག་ནས༔ སློབ་དཔོན་པདྨ་འབྱུང་གནས་ལ་རིག་འཛིན་གྲུབ་ཐོབ་རྣམས་ཀྱིས་བཀའི་བསྡུ་བ་པོ་བྱས་ནས༔ འཇིག་རྟེན་གྱི་ཁམས་སུ་ཚིག་པ་ཆེན་པོ་བྱུང་ནས༔ ཁྱོད་ཀླུའི་གྲོང་ཁྱེར་དུ་དགེ་བ་བསྐུལ་བ་ལ༔ ངེད་དཔོན་སློབ་མཆེད་གྲོགས་ཆར་སློང་ལ་འོང་བ་ཡིན་པས༔ ཆར་ཆེན་པོ་ད་ལྟ་ཉིད་དུ་ཕོབ་ཅིག༔ དྲག་ཏུ་ཕོབ་ཅིག༔ མྱུར་དུ་ཕོབ་ཅིག༔ གལ་ཏེ་ཆར་མི་འབེབ་ན༔ གནས་འདིར་བྱེ་ཚན་གྱི་འཇིག་པ་དང༔ ཉི་ཚན་གྱི་འཇིག་པ་དང༔ མེ་རིའི་འཇིག་པ་དང༔ རྒྱལ་པོའི་ལས་ཀྱི་འཇིག་པ་དང༔ ཁྲག་འཐུང་ཁྲོ་བོའི་དམག་ཚོགས་དང༔ དུག་ཐུན་དང༔ ཁྲག་ཐུན་དང༔ ཡུངས་ཐུན་དང༔ སྔགས་རྣམས་དང༔ གཏོར་ཟོར་ཁྲག་ཟོར་བིང་ཟོར་རྣམས་དང༔ བྱ་ཁྱུང་གི་འཇིག་པ་དང༔ ཡུངས་དཀར་ཁྲོ་བོའི་འཇིག་པ་ལ་སོགས་གཏོང་བ་ཡིན་པས་དེ་བས་ད་ལྟ་ཉིད་དུ་ཆར་ཕོབ་ཅིག༔ ཆར་ཆེན་པོ་ཕོབ་ཅིག༔ མྱུར་དུ་ཕོབ་ཅིག༔ དྲག་ཏུ་ཕོབ་ཅིག༔ སངས་རྒྱས་རྣམས་ཀྱི་བཀའ་མ་བཅག༔ དམ་མ་འདྲལ་ལ་ཆར་གྱི་ཆུ་རྒྱུན་ཆེན་ཕོབ་ཅིག༔ ཅེས་གང་ཤེས་ཀྱི་བདེན་པ་བདར་བར་བྱའོ། །འབྲས་བུ་ལོ་ཏོག་ལ་ཕན་པར་བྱེད་པའི་ཆར་འབོད་ཀྱི་ལྷན་ཐབས་ལགས་སོ།།