ཆར་ཆོད་བསྐལ་མེའི་ཕྲེང་བ།
དག་སྣང་མཚོ་རྒྱལ་དགོངས་པའི་གསང་མཛོད་ལས༔ ཆར་ཆོད་བསྐལ་མེའི་ཕྲེང་བ་བཞུགས༔ མ་ཧཱ་གུ་རུ་པདྨ་སིདྡྷི་ཧཱུྃ༔ མ་འོངས་བསྐལ་པའི་ཐ་མ་ལ༔ དབྱར་སྟོན་མི་སྙོམ་ལོ་ཏོག་རུལ༔ དགུན་དཔྱིད་མི་ཕྱུགས་སྡུག་ལ་གཏད༔ དེ་དག་རྒྱུ་རྐྱེན་མི་དགེའི་ལས༔ བག་མེད་ཁྱད་པར་རི་དྭགས་རིགས༔ ཁྱི་དང་རྙི་མཚོན་སྣ་ཚོགས་ཀྱིས༔ གསོད་ཅིང་མཚོ་གཉན་རྫས་ངན་གྱིས༔ མནོལ་རྩོག་མི་གཙང་གྲིབ་ཀྱིས་ཕོག༔ ཡུལ་བདག་ལྷ་སྲིན་འཁྲུག་ཅིང་གཡོ༔ དེ་དག་སེལ་བའི་ཐབས་མང་ཡང་༔ གཙོ་བོ་སེམས་བསྐྱེད་ལྡན་པ་ཡིས༔ བསང་བརྔན་ཆུ་སྦྱིན་རི་རྒྱ་སྡོམས༔ སྔགས་སྲུང་བསྙེན་བསྒྲུབ་ཚོགས་བསྐང་འབད༔ ས་མ་ཡཱ༔ ཁྱད་པར་རྫས་ལ་མི་ལྟོས་པའི༔ སྔགས་དང་དམིགས་པས་ཆར་གཅོད་པའི༔ གདམས་ཟབ་སྐལ་ལྡན་སྙིང་ལ་ཕུར༔ ࿑ རང་ཉིད་སྔགས་སྲུང་རལ་གཅིག་མ༔ མཐིང་ནག་སྤྱན་གཅིག་བསྐལ་མེ་འབར༔ སྡེ་བརྒྱད་ནག་ཕྱོགས་བསྲེགས་ཤིང་བསྐྲད༔ དཀར་ཕྱོགས་ལྷ་ཀླུ་ལས་ལ་བཀོལ༔ རང་ཉིད་གར་གནས་ཡུལ་སྐྱོང་དེས༔ ཅི་བཅོལ་ལས་བྱེད་ཁས་བླངས་བསམ༔ རྩ་སྔགས་གཤམ་དུ་སྔགས་འདི་བཏགས༔ ཨ་ཡ་མ་དུ་རུ་ཙ་ཤ་ན་ས་མ་ཡཱ་མ་ར་ཡ་ཕཊ༔ བྷུ་མི་པ་ཏི་ལོ་ཀ་པ་ལ་ཆར་ཆོད༔ རཾ་རཾ་ཡཾ་ཡཾ་ཛྭ་ལ་ཛྭ་ལ༔ མེ་གྷ་ཤིག་ཤིག༔ གཏོར་གཏོར༔ ཅེས་པ་བརྒྱ་རྩ་སྨྲ་བཅད་བཟླ༔ སླར་ཡང་དམིགས་པ་འདི་བཞིན་བྱ༔ མདུན་གྱི་ནམ་མཁར་ཨོ་རྒྱན་རྗེ༔ སྐུ་མདོག་དམར་ནག་བསྐལ་མེ་འབར༔ རྡོ་རྗེ་ལྕགས་ཕུར་འདོར་སྟབས་བསྒྲད༔ ཆར་བདག་ཀླུ་དང་ས་བདག་ཀུན༔ ཞབས་ཀྱི་འོག་ཏུ་མནན་ནས་ཀྱང་༔ སྤྲིན་དང་ཆར་ཆུ་གཏོར་ཞིང་སྐམ༔ ཇི་ལྟར་འདོད་པ་དེ་སྲིད་དུ༔ མཁའ་དབྱིངས་རབ་ཏུ་དངས་པ་ལ༔ ཉི་མའི་འོད་སྟོང་འབར་བར་བསམ༔ ཚིག་བདུན་གསོལ་འདེབས་བརྒྱ་ཕྲག་གཅིག༔ སིདྡྷིའི་གཤམ་དུ་སྔགས་འདི་གདགས༔ ཆར་བདག་ནོན་ནོན༔ ཆར་སྤྲིན་གཏོར་གཏོར༔ མཐར་ནི་སྡེ་བརྒྱད་བཤོས་བུས་བརྔན༔ བདག་མདུན་ལྷར་སྣང་སྟོང་པར་བསྡུ༔ སྟོང་ཉིད་རང་གདངས་སྙིང་རྗེར་ཤར༔ གནོད་བྱེད་སྡེ་བརྒྱད་གནོད་པའི་ཡུལ༔ ཀུན་ཀྱང་བྱང་ཆུབ་སྙིང་པོ་ལ༔ འགོད་འདོད་བློ་དང་མ་བྲལ་བས༔ ཐུན་མཚམས་ཆོས་སྤྱོད་ཆགས་མེད་བྱ༔ དགེ་བ་མཁའ་ཁྱབ་འགྲོ་ལ་བསྔོ༔ ཕན་འདོད་ལྷག་བསམ་ཅན་ལ་སྤེལ༔ ལོག་ལྟ་ཅན་ལ་ཨ་ཐཾ་རྒྱ༔ ས་མ་ཡཱ༔ སྐལ་ལྡན་ལུང་རིག་གླིང་པའི་དག་སྣང་གི་ཆོས་སྡེ་ལས་བྱུང་བའོ༔