གསུང་ཆོས་བཀའ་བསྡུ་དང་དཔར་དུ་སྐྲུན་པའི་གསལ་བཤད།
དེ་ཡང་གསང་ཆེན་བསྟན་པ་རྒྱ་མཚོའི་མངའ་བདག་༧སྐྱབས་རྗེ་གཡུ་ཁོག་བླ་མ་བྱ་བྲལ་ཆོས་དབྱིངས་རང་གྲོལ་རིན་པོ་ཆེ་མཆོག་ནི་དུས་རབས་ཉི་ཤུ་པའི་དུས་འགོར་གངས་ལྗོངས་མདོ་ཁམས་ཀྱི་ཕྱོགས་སུ་ཐེག་དགུའི་ཡང་རྩེ་ཟབ་གསང་རྫོགས་པ་ཆེན་པོའི་བསྟན་པ་འཛིན་སྐྱོང་སྤེལ་བ་ལ་འགྲན་པའི་ཟླ་ཐམས་ཅད་དང་བྲལ་བའི་སྐྱེས་མཆོག་དམ་པ་ཞིག་ཡིན། དམ་པ་མཆོག་དེས་སྐུ་ཚེ་ཧྲིལ་པོར་སྐལ་བཟང་ལས་ཅན་གྱི་གདུལ་བྱ་རྣམས་ཟག་ཕུང་འོད་སྐུར་གྲོལ་བའི་གདམས་ཟབ་མང་དུ་བསྩལ། དེ་དག་ལས་རྗེ་གང་གིས་ཕྱི་རབས་གདུལ་བྱའི་སྐལ་བར་བཞག་པའི་གསུང་རྩོམ་དངོས་དང་སློབ་བུ་རྣམས་ཀྱིས་ཟིན་བྲིས་སུ་བགྱིས་པ་སོགས་མང་དུ་མཆིས་མོད། དུས་འགྱུར་སོགས་ཀྱི་དབང་གིས་ཐམས་ཅད་ཕྱོགས་གཅིག་ཏུ་བསྡུ་བ་མ་བྱུང་། དེར་བརྟེན་རྗེ་གང་གི་ཞལ་གསུང་བདུད་རྩིའི་ཟེགས་མ་རེ་རེའང་འཐོར་བར་ཕངས་པས་གུས་ཕྲན་པས་ཉེ་བའི་ལོ་ཤས་རིང་ཕྱོགས་བསྐྱོད་ཀྱིས་དམ་པ་གང་གི་གསུང་ཆོས་རྣམས་ཀྱི་བཀའ་བསྡུའི་བྱ་བ་ལ་ཉེ་བར་བརྩོན་པས་ཐེངས་འདིར་པོད་གསུམ་ཙམ་བསྡུ་ཐུབ་པ་བྱུང་། དེ་ཡང་ཀུན་བཏུས་སོགས་སྔོན་འགྲོའི་སྐོར་རྣམས་ༀ་པོད་དུ་བསྡུས་པ་དང་། ཡེ་ཤེས་བླ་མ་དང་ལྕེ་བཙུན་སྙིང་ཐིག་གི་ཟིན་བྲིས་སོགས་དངོས་གཞིའི་སྐོར་རྣམས་ཨཱ༔པོད་དུ་བསྡུས། གསང་སྙིང་སྐོར་གྱི་ཟིན་བྲིས་རྣམས་དང་། ཞལ་གདམས་སོགས་གསུང་ཐོར་བུའི་སྐོར་རྣམས་རྒྱབ་ཆོས་ཀྱི་ཚུལ་དུ་ཧཱུྃ་པོད་དུ་བསྡུས་ཡོད། དེ་དག་ཀྱང་སློབ་མ་རྣམས་ཀྱིས་ཟིན་བྲིས་གནང་བ་ལས་དཔེར་ན། སྔོན་འགྲོ་བསྡུས་པ་རྣམས་དང་རུ་ཤན་གྱི་སྐོར། དེ་བཞིན་ཀུན་གཞི་དང་ཆོས་སྐུའི་ཤན་འབྱེད། སེམས་དང་ཡེ་ཤེས་ཀྱི་ཤན་འབྱེད། ཐོད་རྒལ་གྱི་འཕགས་ཆོས་བདུན་སོགས་ཕལ་ཆེར་ཕྱོགས་འདྲ་རྣམས་ཀྱང་ཚིག་གི་རྒྱས་བསྡུས་དང་རྣམ་འགྱུར་ཅུང་ཟད་རེ་མི་འདྲ་བས་རྗེ་གང་གི་གསུང་གི་ཟུར་ཙམ་ཡང་ཉམས་པར་ཕང་པས་ཟློས་མིན་ལ་མ་ལྟོས་པར་ཆ་ཚང་སོ་སོར་བཀོད་ཡོད། དེ་ལས་སྔོན་འགྲོ་ཀུན་བཟང་ཞལ་ལུང་། ཡེ་ཤེས་བླ་མ། ལྕེ་བཙུན་སྙིང་ཐིག གསང་སྙིང་སོགས་ཀྱི་ཟིན་བྲིས་རྣམས་༧སྐྱབས་རྗེ་དམ་པ་སྐུ་དངོས་ཀྱི་ཕྱག་དཔེ་དག་མདུན་འདུག་བླ་མ་འགྱུར་མེད་རྡོ་རྗེ་ལ་ཡོད་པ་སྤྲུལ་ཆོས་མཆོག་རྡོ་རྗེ་ནས་གཡར་གནང་བ་དང་། གཞན་དངོས་གཞིའི་སྐོར་ཕལ་ཆེར་ཞལ་སློབ་མཆོག་གྱུར་འཛི་རོང་བླ་མ་མཆོག་ལྡན་གྱིས་ཟིན་བྲིས་གནང་བའི་ཕྱག་དཔེ་རྣམས་བླ་མ་རྒྱ་ཐར་ལས་མཆེད་རང་གྲོལ་གྱིས་དཔེ་གཅོད་རོགས་བྱས། དེ་བཞིན་མཁན་པོ་ཆོས་གསལ་ཀྱི་ཕྱག་དཔེ་རྣམས་མཁན་པོ་ཤེས་རབ་དང་། རྫི་སྒོའི་བླ་མ་ཀོང་ཚེའི་ཕྱག་དཔེ་སོགས་ཕལ་ཆེར་བླ་མ་བསོད་དར་ཀྱི་འཚོལ་རོགས་སྡུད་བྱས།སྔོན་འགྲོ་ཀུན་བཏུས་དང་། ཞལ་གདམས་སོགས་སྔར་ཤིང་པར་དུ་འཁོད་པ་རྣམས་དང་། གཞན་ཡང་ཨ་མདོ་མགོ་ལོག རྡོ་འཛི་གསེར་གསུམ། གཡུ་རྩང་སོགས་ས་ཕྱོགས་དུ་མ་ནས་རྗེ་གང་གི་དངོས་སློབ་དང་སློབ་རྒྱུད་རྣམས་ཀྱི་ཕྱག་བརྒྱུད་གསུང་ཆོས་དང་ཟིན་བྲིས་འདི་དག་ཕྱོགས་བསྡུས་དང་དག་ཞུས་གང་ནུས་བགྱིས་ཤིང་། མཁན་རིན་པོ་ཆེ་ནོར་བུ་སོགས་སྒར་ན་བཞུགས་པའི་རང་དགོན་མཁན་སློབ་རྣམས་ཀྱིས་ཀྱང་དག་ཞུས་ཕྱག་རོགས་གནང་། དེ་ལྟར་གསུང་ཆོས་འདི་ཕྱོགས་སྡུད་དང་དཔར་དུ་འཁོད་པ་སོགས་ཐོག་མཐའ་བར་གསུམ་དུ་མཁས་དབང་མཆོག་སྤྲུལ་དམ་པ་གཟན་དཀར་རིན་པོ་ཆེས་བཀའ་སློབ་དང་ཐུགས་ཁུར་ཕྱག་རོགས་སོགས་རྒྱ་ཆེར་གནང་བར་སྙིང་ཐག་པ་ནས་བཀའ་དྲིན་དང་ཐུགས་རྗེ་ཆེ་ཞུ་རྒྱུ་མ་ཟད། མཆོག་སྤྲུལ་མཉམ་མེད་རིན་པོ་ཆེས་གསུང་ཆོས་དཔར་དུ་འཁོད་ན་ལེགས་ཚུལ་གྱི་གསུང་གི་གནང་བ་བསྩལ་བར་བཀའ་དྲིན་དང་ཐུགས་རྗེ་ཆེ་ཞུ་རྒྱུ་དང་། གཞན་ཡང་ཕྱག་དཔེ་གཡར་བ་དང་བྲི་བསྡུ་དག་ཞུས་པར་སྐྲུན་སོགས་གང་ཐད་ཕྱག་རོགས་དང་ཐུགས་ཁུར་གནང་བའི་ཆོས་ཀྱི་མཆེད་པོ་དག་ལ་ཡང་བཀའ་དྲིན་ཆེ་ཞུ་རྒྱུ་ཡིན། །མཁན་མིང་ཤེས་བྱ་ཀུན་གཟིགས་དེས།