སྐྱབས་རྗེ་གཡུ་ཁོག་བླ་མ་བྱ་བྲལ་ཆོས་དབྱིངས་རང་གྲོལ་མཆོག་གི་རྣམ་པར་ཐར་པ་མདོར་བསྡུས་སུ་བརྗོད་པ་ཕྱི་རབས་དད་པའི་མཆོད་སྤྲིན་ཞེས་བྱ་བ།
དང་པོ་མདོ་ཁམས་གཡུ་ཁོག་ཏུ་སྐུ་འཁྲུངས་ཤིང་ཆོས་སྒོར་འཛུད་པའི་བླ་མ་ཧོར་བླ་གཞན་ཕན་རིན་པོ་ཆེས་རྗེས་སུ་བཟུང་བའི་སྐོར།
གཞི་དབྱིངས་ཀ་དག་གཉིས་ཆོས་ཡོངས་བྲལ་གདོད་མའི་ཆོས་སྐུ་ཀུན་ཏུ་བཟང་། །གཞི་སྣང་ལྷུན་གྲུབ་ཡེ་ཤེས་ལྔ་ལྡན་ལོངས་སྤྱོད་རྫོགས་སྐུ་རྡོ་རྗེ་སེམས། །གཉིས་སུ་མེད་གང་རྫོགས་ཆེན་སྟོན་པ་སྤྲུལ་པའི་སྐུ་མཆོག་དགའ་རབ་སྟེ། །སྐུ་གསུམ་སྟོན་པར་མཉམ་ཉིད་ལྟ་དང་དྭངས་བའི་ཡིད་ཀྱིས་ཕྱག་བགྱིའོ། །འཇམ་དཔལ་རྣམ་སྤྲུལ་མཉྫུ་མི་ཏྲ་དང་། །ལྟ་བ་མཐར་སོན་ཤྲཱི་སེང་ཧའི་ཞབས། །འོད་ལུས་གྲུབ་པ་ཛྙཱ་ན་སུ་ཏྲ་ལ། །གསོལ་བ་འདེབས་སོ་བདག་རྒྱུད་བྱིན་གྱིས་རློབས། །པཎ་གྲུབ་བྱེ་བའི་གཙུག་གི་རྒྱན་མཆོག་འཕོ་ཆེན་སྐུ་བརྙེས་བི་མ་ལ། །དུས་གསུམ་རྒྱལ་བའི་ཕྲིན་ལས་གཅིག་བསྡུས་གསང་ཆེན་སྟོན་པ་པདྨ་འབྱུང་། །རྣམ་སྣང་ལོ་ཙཱ་ཡེ་ཤེས་མཚོ་རྒྱལ་ཚངས་པ་ལྷ་ཡི་མེ་ཏོག་སོགས། །གྲུབ་བརྙེས་ལོ་པཎ་རྗེ་འབངས་ཚོགས་ཀྱིས་བྱིན་བརྒྱུད་རྟོགས་པའི་ཕ་ཕོག་སྩོལ། །གདོད་མའི་མགོན་པོ་ཀློང་ཆེན་རབ་འབྱམས་ཞབས། །ཀུན་མཁྱེན་གཉིས་པ་རིག་འཛིན་འཇིགས་མེད་གླིང་། །ཀུན་བཟང་གཞན་ཕན་རྒྱལ་བའི་མྱུ་གུ་སོགས། །དགོངས་བརྡ་སྙན་བརྒྱུད་བླ་མར་གུས་ཕྱག་འཚལ། །སྙིང་ཐིག་སྲོག་འཛིན་འཇིགས་མེད་ཆོས་ཀྱི་དབང་། །བཀའ་བབ་བདུན་ལྡན་མཁྱེན་བརྩེའི་དབང་པོ་དང་། །བརྒྱུད་སྲོལ་ཀུན་འདུས་དཔའ་བོ་རྡོ་རྗེ་སྟེ། །རྩ་རྒྱུད་བླ་མའི་ཚོགས་ཀྱིས་ཤིས་པ་སྩོལ། །ཆོ༷ས་དབྱིང༷ས་ཀ་དག་སྐྱེ་མེད་ཀློང་ནས་ཆོས་ཟད་དགོངས་པའི་ལྟ་བ་རྫོགས། །ར༷ང་གྲོལ༷་ལྷུན་གྲུབ་ལོངས་སྐུའི་ཞིང་གཟིགས་ཐོད་རྒལ་སྒོམ་པ་ཚད་ལ་ཕེབས། །ཟུང་འཇུག་སྣ་ཚོགས་སྤྲུལ་པའི་སྐུ་ཡིས་བྱར་མེད་སྤྱོད་པ་གོང་དུ་འཕེལ། །ཆོས་ཉིད་མངོན་གཟིགས་བྱ་བྲལ་བླ་མ་སྙིང་དབུས་དད་བརྒྱའི་པདྨོར་བཞུགས། །གང་གི་ཞིང་འདིའི་མཛད་རྣམ་ཕྱོགས་བསྡུས་ཤིག །ཕྱི༷་ར༷བས་ཁྱེད་རྗེས་སློབ་པར་ཁས་འཆེ་བས། །ད༷ད་གསུམ་གུས་པ༷འི་ཡིད་ཀྱིས་མཆོ༷ད་སྤྲིན༷་དུ། །འགོད་ལ་ལྷ་དང་བླ་མས་གནང་བ་སྩོལ། །ཞེས་ཤིས་པར་བརྗོད་པའི་ཚིག་གིས་མདུན་བསུས་ཏེ། འདིར་སྲིད་ཞིའི་ལེགས་ཚོགས་དང་ཕན་བདེ་མ་ལུས་པ་འབྱུང་བའི་གནས་གཅིག་པུ་རྒྱལ་བའི་བསྟན་པ་རིན་པོ་ཆེ་ཉག་གཅིག་ཡིན་ཞིང་། དེ་ཉིད་འཛིན་སྐྱོང་སྤེལ་བའི་བསྟན་འཛིན་སྐྱེས་ཆེན་དུ་མ་དུས་རབས་སོ་སོར་འཕགས་བོད་ཀྱི་ལྗོངས་སུ་ལེགས་པར་བྱོན་ཅིང་གང་ལ་གང་འདུལ་གྱི་མཛད་ཕྲིན་མཁའ་མཐར་ཁྱབ་པ་བརྗོད་ལས་འདས། ཁྱད་པར་བསིལ་ལྡན་བོད་ཀྱི་ལྗོངས་འདིར་རིས་མེད་རྒྱལ་བསྟན་སྐྱོང་བའི་མངའ་བདག་བསམ་བཞིན་བསྟན་འགྲོའི་ཆེད་དུ་བྱོན་པའང་བསམ་གྱིས་མི་ཁྱབ། དེ་ལས་འདིར་སྐབས་སུ་བབས་པ་ཉེ་རབས་སུ་མདོ་ཁམས་སྨད་ཀྱི་ཕྱོགས་འདིར། པཎ་ཆེན་བི་མའི་རྣམ་རོལ། མཁས་གྲུབ་བྱེ་བའི་གཙུག་རྒྱན། ཟབ་གསང་རྫོགས་ཆེན་ཀྱི་རྣལ་འབྱོར་བ་འགྲན་པའི་ཟླ་ཐམས་ཅད་དང་བྲལ་བ་དོན་གྱི་སླད་དུ་མཚན་ནས་སྨོས་ན་༧ སྐྱབས་རྗེ་གཡུ་ཁོག་བླ་མ་བྱ་བྲལ་བ་ཆོས་དབྱིངས་རང་གྲོལ་ཞེས་མཚན་གྱི་རྔ་གསང་སྲིད་པ་གསུམ་ན་ལྷང་ངེར་གྲགས་པ་གང་དེ་ཉིད་ཀྱི་མཛད་རྣམ་རགས་ཙམ་འགོད་པ་ལ། དེ་ཡང་སྐྱབས་རྗེ་དམ་པ་གང་ཉིད་ངེས་པའི་དོན་དུ་གདོད་ནས་རྒྱལ་བ་རྣམས་དང་གཉིས་སུ་མེད་པར་མངོན་པར་བྱང་ཆུབ་ནའང་ཇི་སྐད་དུ། ཇི་ལྟར་གདུལ་བྱ་དག་པ་ཡི། །ཆུ་ཡི་སྣོད་ནི་ཐམས་ཅད་དུ། །བདེ་གཤེགས་ཉི་མའི་གཟུགས་བརྙན་ནི། །དཔག་ཏུ་མེད་པ་ཅིག་ཆར་འཆར། །ཞེས་གསུངས་པ་བཞིན་སྐལ་བ་དང་ལྡན་པའི་གདུལ་བྱ་རྣམས་ཀྱི་ངོར་གང་ལ་གང་འདུལ་གྱི་མཛད་པ་མཐའ་ཡས་པའི་ཚུལ་བསྟན་པ་ཉིད། རྡོ་བླ་བྱང་ཆུབ་རྡོ་རྗེ་དང་དཔའ་བོ་ཆོས་ཀྱི་རྡོ་རྗེ་སོགས་ཀྱི་ཟབ་གཏེར་དུ་མར་གུ་རུ་པདྨའི་ལུང་གིས་བསྔགས་པ་སྟེ། གཡུ་སྒྲའི་སྤྲུལ་པ་མདོ་ཁམས་སྨད་ནས་འབྱུང་། ཆོས་ཀྱི་མིང་ཅན་རྫོགས་ཆེན་རྣལ་འབྱོར་བ། གསང་སྔགས་བསྟན་པའི་བདག་པོ་ཁྱད་པར་འཕགས། རེ་ཞིག་བར་དུ་རྒྱ་འདྲེ་བཟློག་པར་བྱེད། ཞེས་དང་། ཡག་སྒང་དུ་བི་མའི་སྤྲུལ་བ་འབྱུང་། །ཞེས་དང་། རྫོགས་ཆེན་རྣལ་འབྱོར་དྷརྨཱའི་མཚན་ཅན་གྱིས། །འབྲེལ་ཚད་རིག་འཛིན་ཞིང་དུ་འདྲེན་པར་འགྱུར། །ཞེས་སོགས་གདན་ས་དང་སྤྲུལ་གཞི་མཚན་དང་མཛད་པའི་ཆེ་བ་བཅས་འཁྲུལ་བྲལ་བསླུ་མེད་རྡོ་རྗེའི་ལུང་གིས་བསྔགས་ཤིང་གཞན་ཡང་རིག་འཛིན་ནུས་ལྡན་གླིང་པས་གྲུབ་ཆེན་ཤཱ་བ་རི་པ་དང་། པཎ་ཆེན་བི་མ་མི་ཏྲ། ཁམས་གཡུ་སྒྲ་སྙིང་པོ་རྣམས་ཟུང་དུ་འཇུག་པའི་རྣམ་རོལ་ཡིན་པར་ལུང་གིས་བསྔགས་པར་མ་ཟད། རྗེ་ཉིད་ཀྱིས་ཀྱང་གསེར་ཡེ་ཤེས་སེང་གེ་དང་རྡོ་བླ་འཇིགས་མེད་སྐལ་བཟང་སོགས་གོང་མའི་བག་ཆགས་སད་ཚུལ་ཞལ་འཕྲོས་སུ་གསུངས་པ་སོགས་ཀྱིས་བསམ་བཞིན་བསྟན་འགྲོའི་དོན་དུ་སྤྲུལ་པའི་རྣམ་རོལ་གྱིས་ཕེབས་པར་གདོན་མི་ཟ་བའི་ཕྱིར། སྐུའི་འཁྲུངས་རབས་དང་སྐུ་ཚེ་འདིར་ཡང་གསང་བ་གསུམ་གྱི་རྣམ་པར་ཐར་པ་བསམ་གྱིས་མི་ཁྱབ་པ་དག་ནི་རྒྱལ་དང་རྒྱལ་བའི་སྲས་པོ་དག་གི་སྤྱོད་ཡུལ་ཉག་གཅིག་ལས་བདག་ལྟ་བུས་བརྗོད་པར་ག་ལ་ནུས། དེས་ན་འདིར་ཐུན་མོང་གི་ངོར་སྣང་བའི་མཛད་རྣམ་ཉུང་ངུ་ཐོས་འཛིན་གྱི་དགའ་སྟོན་ཏུ་སོན་པ་རྣམས་ཕྱོགས་གཅིག་ཏུ་འགོད་པ་ལ། མདོ་ཁམས་གཡུ་ཁོག་ཏུ་སྐུ་འཁྲུངས་ཤིང་ཆོས་སྒོར་འཛུད་པའི་བླ་མ་ཧོར་བླ་གཞན་ཕན་རིན་པོ་ཆེས་རྗེས་སུ་བཟུང་བའི་སྐོར། རིགས་སད་དེ་གསེར་སྨད་ལྷ་རྩེ་དགོན་དུ་གྱང་ཁང་སྐྱབས་མགོན་རིན་པོ་ཆེ་སོགས་བསྟེན་པའི་སྐོར། ལྕགས་སྐོང་བདུད་འཇོམས་རྡོ་རྗེའི་ལུང་བཞིན་ཚེ་རབས་ལས་ཀྱི་བླ་མ་ཨ་འཛོམ་འབྲུག་པ་རིན་པོ་ཆེ་དང་མཇལ་ནས་གདམས་ཟབ་ནོད་པའི་སྐོར། བླ་མའི་བཀའ་བཞིན་གནས་ངེས་མེད་དུ་གདན་ས་བཙལ་མཐར་གསེར་སྨད་ཡག་སྒང་དུ་གདན་སའི་རྟེན་འབྲེལ་འགྲིགས་ཤིང་བཞུགས་སྒར་བཏབ་པའི་སྐོར། གཏེར་ཆེན་ལས་རབ་གླིང་པ་གསེར་ལྗོངས་སུ་ཆིབས་ཁ་བསྒྱུར་བའི་མཐུན་སྦྱོར་གནང་ཞིང་མཇལ་འཛོམས་ཀྱིས་ཟབ་དགུའི་ཆོས་ཚུལ་གསན་པའི་སྐོར། གདན་སར་སློབ་མ་བསྐྱངས་ཤིང་མཛད་འཕྲིན་མཁའ་མཐར་ཁྱབ་པའི་སྐོར། སྣང་བར་རང་དབང་འབྱོར་བའི་གྲུབ་རྟགས་དང་དུས་གསུམ་ས་ལེར་གཟིགས་པའི་མངོན་ཤེས་མངའ་ཚུལ་གྱི་སྐོར། མཐར་གཟུགས་སྐུའི་བཀོད་པ་ཆོས་དབྱིངས་སུ་བསྡུས་ཚུལ་དང་གསུང་ཆོས་སློབ་ཚོགས་བཅས་ཀྱི་སྐོར་ཏེ་བཀྲ་ཤིས་པའི་གྲངས་ལས་དང་པོ། དེ་ཡང་སྐྱབས་རྗེ་དམ་པ་གང་དུ་སྐུ་འཁྲུངས་པའི་ཡུལ་ནི། བསིལ་ལྡན་གངས་རིའི་ལྗོངས་ཀྱི་མདོ་ཁམས་ཆུ་བཞི་སྒང་དྲུག་གི་ཡ་གྱལ། འབྲི་རྫ་ཟལ་མོ་སྒང་གི་ཉེ་ཞོལ། ཤར་མི་ཉག་རབ་སྒང་གི་གཡོན་ཟུར། རྒྱལ་མོ་ཚ་བ་རོང་དང་ཉེ་བའི་ཆར། སློབ་དཔོན་པདྨ་འབྱུང་གནས། མཁའ་འགྲོ་ཡེ་ཤེས་མཚོ་རྒྱལ། ལོ་ཆེན་བཻ་རོ་ཙ་ན། ལྷ་ལུང་དཔལ་ཀྱི་རྡོ་རྗེ་སོགས་གྲུབ་བརྙེས་རྗེ་འབངས་དུ་མས་རྫུ་འཕྲུལ་གྱི་སྒོ་ནས་ཞབས་ཀྱིས་བཅགས་ཤིང་བྱིན་གྱིས་བརླབས་པའི་གནས། རྒྱལ་རོང་རྒྱལ་མོ་རྔུལ་ཆུའི་དལ་འབབ་ཀྱི་ཆུ་བོས་གཡས་ནས་གཡས་སུ་བསྐོར་བའི་ལྗོངས། བོད་ཡུལ་སྐྱོང་བའི་དགེ་བསྙེན་ཉེར་གཅིག་གི་ཡ་གྱལ། གནས་བདག་དགེ་བསྙེན་ཆེན་པོ་རྡོ་རྗེ་གཡུ་ཁྲོམ་ཡུམ་སྲས་བློན་འཁོར་དང་བཅས་པས་ས་ཕྱོགས་བདག་གིར་མཛད་ཅིང་སྐྱོང་བའི་ཡུལ། གླིང་རྗེ་གེ་སར་རྒྱལ་པོས་བླ་གཡུ་ངོ་མཚར་བ་ཡུལ་ཕྱོགས་འདིའི་སའི་བཅུད་ཡུལ་རྟེན་དུ་གཏེར་དུ་སྦས་པ་དེ་ནས་བཟུང་གཡུ་ཁོག་ཅེས་གྲགས་པའམ་ཡང་ན་ས་ཕྱོགས་གཅན་གཟན་གཡི་དཀར་གྱི་པགས་པ་བསྐྱངས་པ་དང་འདྲ་བས་ན་གཡི་ཁོག་ཅེས་ཀྱང་གྲགས་པའི་གནས་མཆོག་དེར། དཀར་ནག་ཕྱུགས་ཀྱིས་འཚོ་བའི་འབྲོག་སྡེས་ཁྱབ་ཅིང་ཆོས་ལྡན་ཁྲིམས་ཀྱིས་སྐྱོང་བའི་དཔོན་རབས་རྣམས་ཀྱིས་མངའ་འབངས་བདེ་བས་བསྐྱངས། མཁས་ཤིང་གྲུབ་པ་བརྙེས་པའི་བསྟན་འཛིན་སྐྱེས་ཆེན་དུ་མ་བྱོན་ནས་སྔ་ཕྱིར་གཡུ་མཁར་ཐེག་ཆེན་ཆོས་འཁོར་གླིང་སོགས་ཕྱག་བཏབ་ཅིང་བཤད་སྒྲུབ་འཁོར་ལོ་གསུམ་གྱིས་བསྐྱངས་པ་སོགས་ལུགས་གཉིས་ཀྱི་ལེགས་ཚོགས་གོང་དུ་འཕེལ་བའི་གནས་དེའི་ཆར། ཤར་རྒྱལ་མོ་ཚ་བ་རོང་གི་གནས་ཀྱི་གོང་བར་གྲགས་པ་རྗེ་བཙུན་འཕགས་མ་ཉེར་གཅིག་གིས་བྱིན་གྱིས་བརླབས་པའི་གནས་མཆོག་ཆུ་དབར་ཏ་རཱེའི་གནས་ཞེས་བྱིན་རླབས་ཀྱི་ན་བུན་འཐུལ་ཞིང་ལྗོན་ཤིང་དང་ཆུ་མཚོ་མེ་ཏོག་གིས་བརྒྱན་པའི་གནས་མཆོག་དེའི་ཉེ་འགྲམ་དུ་མཚན་དཔེའི་མེ་ཏོག་ཉེ་བར་བཞད་པ་སྟེ། དེ་ཡང་ཡབ་ཁྱི་ཤུལ་བཀྲ་ཚེ་དང་ཡུམ་ཨ་འཛི་བཟའ་བ་ལོ་ཞེས་པ་གཉིས་ལ་སྲས་ལྕམ་སྲིང་མང་དུ་འཁྲུངས་བའི་ནང་ནས་རྗེ་འདི་རབ་བྱུང་བཅོ་ལྔ་པའི་བགྲང་བྱ་དྲུག་པ་ཨང་གི་ར་སྟེ་ཆུ་ཕོ་སྤྲེལ་གྱི་ལོའི་༼ཕྱི་ལོ་༡༨༧༢༽གནམ་ལོ་གསར་དུ་ཚེས་པའི་དུས་ཚེས་བཟང་པོ་ཞིག་ཏུ་ངོ་མཚར་བའི་ལྟས་དང་བཅས་མངལ་གྱི་ཆུ་འཛིན་ལས་གྲོལ། རྗེ་འདིའི་མཆེད་ལྕམ་གཞན་དག་ནི། བླ་མ་སྒྲ་དབྱངས་རྒྱ་མཚོ་། ཁྱི་ཤུལ་མཁན་པོ་ཀུ་ལོ། བླ་མ་ནོར་ལྷུན། འགོ་ཚ་སྤྲུལ་སྐུ་ཐེག་མཆོག་བསྟན་འཛིན། ཀརྨ་སྒྲོན། གནས་སྐྱིད་བཅས་དང་གཞན་སྐུ་མཆེད་ཆུང་བ་གཉིས་ཆུང་དུས་ཆུར་ལྷུང་སྟེ་གཤེགས་པར་གྲགས། རྗེ་འདིི་ཆུང་ངུའི་དུས་མཚན་ལ་པདྨ་རྡོ་རྗེ་ཞེས་ཞུ་ཞིང་ཅུང་ཟད་སྐུ་ནར་སོན་སྐབས་ཕ་མ་གཉིས་ཀྱིས་སྐུ་ཉེ་ཨ་ནེ་རྒན་མོ་ཞིག་ལ་བུ་སྐལ་དུ་བྱིན་སྟབས་ཁོང་ཡང་བྱིས་པ་གཞན་དག་དང་མཉམ་དུ་ཕྱུགས་རྫི་དང་ནུས་ཚོད་ཀྱི་ལས་ཀར་བསྐུལ། དེ་ཡང་དམ་པ་རྣམས་ཀྱི་མཛད་སྤྱོད་ནི་གདུལ་བྱའི་དབང་གིས་མཐའ་གཅིག་ཏུ་མ་ངེས་ཏེ། ཁ་ཅིག་དང་པོ་ནས་སྐྱེས་སྦྱང་གི་རིགས་སད་ཅིང་ཞི་དུལ་གྱི་ཚུལ་དང་། ཡང་ཁ་ཅིག་ནི་དང་པོ་མཛད་སྤྱོད་ཐམས་ཅད་མ་ངེས་པའི་ཚུལ་དུ་སྟོན་པའང་ཡོད་པ་ལས་རྗེ་འདི་ཕྱི་མ་སྟེ། དེ་ཡང་ཅུང་ཟད་སྐུ་ཤེད་རྒྱས་སྐབས་རྒྱུན་དུ་མེ་མདའ་རྒྱབ་ཏུ་ཁུར། རལ་གྲི་སྐེད་ལ་དྲངས། རྟ་རྒྱུག་འབའ་ཞིག་གནང་བ་སོགས་མཛད་སྤྱོད་ཕལ་ཆེར་གཞན་དག་དང་མ་འདྲ་བར་གྲུབ་པའི་མཛད་སྤྱོད་ཁོ་ན་གནང་ཡང་ཡུལ་མི་ཀུན་གྱི་བློར་མ་ཤོང་བས་མ་དད་པ་སྐྱེས་པ་དང་མི་རྒོད་གདུག་རྩུབ་ཅན་ཞིག་ཏུ་ངོས་བཟུང་ཞིང་ཡུལ་མི་ཀུན་ཁོང་ལ་སྐྲག་ཅིང་ཞེད་དགོས་པ་ཞིག་ཏུ་གྱུར་པར་མ་ཟད་ཀུན་གྱིས་ཁོང་ལ་ཨ་འཛིའི་མི་སྨྱོན་ཞེས་ངན་སྨད་བྱེད། སྐབས་ཤིག་དགེ་བཤེས་རྒྱལ་པོ་ཆུ་དབར་ཁོག་ཏུ་ཚ་གཟིམ་དུ་ཕེབས་པ་ལ་ཁོང་གིས་ལམ་འཕྲང་དོག་ས་ཞིག་གི་ངོས་ནས་ཤིང་སྡོང་མང་པོ་བསྒྲིལ་བས་དཔོན་བློན་ཐམས་ཅད་ཀྱི་ཆིབ་རྟ་དང་མཛོ་སོགས་འདྲོ གས་ནས་ས་ལ་དྲུད་ཀྱང་ཉེས་སྐྱོན་མ་བྱུང་བ་དང་། ཡང་གནས་དེར་མཚོ་ནག་ཅེས་ཀླུ་གདུག་རྩུབ་ཅན་གནས་པའི་མཚོ་ཞིག་ཡོད་པ་དེའི་འགྲམ་དུ་ཐ་ན་སྐད་ཅོར་བརྒྱབ་ཀྱང་སེར་བ་འབབ་པའི་མཚོ་དེར་ཁོང་གིས་བྱིས་པ་མང་པོ་ཁྲིད་དེ་རྦབ་རྡོ་མང་དུ་བསྒྲིལ་ཡང་འཁུ་ལྡོག་མ་བྱུང་བ་སོགས་ཡ་མཚན་གྱི་མཛད་པའང་མང་མོད་ཡིད་ཆེས་བྱེད་མཁན་ཆེར་མ་བྱུང་། གཞན་ཡང་ཕྱུགས་རྫི་རྣམས་གྱི་བྲོ་ཆས་འཕྲོག་ནས་གསོལ་ཞིང་ཁོང་རྣམས་ལ་བརྡུང་བརྡེག་དང་གཡོག་ཏུ་བཀོལ་བ་སོགས་མཛད་པ་ཕལ་ཆེར་དེ་དག་གི་ཚེ་གེགས་བར་ཆད་སེལ་བྱེད་དུ་གྱུར་ཚུལ་སོགས་རྗེས་སུ་རྟོགས། དེ་སྐབས་ཏཱ་རེའི་གནས་སུ་ཧོར་བླ་མ་གཞན་ཕན་འོད་ཟེར་ཞེས་གྲུབ་ཆེན་ཨ་ཙར་ས་ལེའི་རྣམ་འཕྲུལ་དུ་གྲགས་པའི་གྲུབ་བརྙེས་གཏེར་ཆེན་དམ་པ་ཞིག་བཞུགས་པ་ཁོང་གིས་དུས་གསུམ་ས་ལེར་གཟིགས་པའི་མངོན་མཁྱེན་གྱིས་ཁོང་ལ་ཀློག་གི་ཕྱི་མོ་བསླབ་པ་སོགས་ཐབས་མཁས་ཀྱི་མཛད་པ་དུ་མས་རྗེས་སུ་བཟུང་ཞིང་། ཐུན་མོང་མ་ཡིན་པའི་བླ་མར་གྱུར་ཏེ་བཀའ་དྲིན་ཆེ་ཚུལ་ཕྱིས་ཀྱི་ཞུ་ཡིག་རྣམས་སུའང་གསལ་ལོ། །དེ་ལྟར་རང་ཡུལ་དུ་མཛད་སྤྱོད་ངེས་མེད་ཀྱིས་དགུང་གྲངས་བཅོ་བརྒྱད་བར་བཞུགས་པ་ཡིན།
གཉིས་པ་རིགས་སད་དེ་གསེར་སྨད་ལྷ་རྩེ་དགོན་དུ་གྱང་ཁང་སྐྱབས་མགོན་རིན་པོ་ཆེ་སོགས་བསྟེན་པའི་སྐོར་ནི།
དེ་ནས་རྗེ་འདི་དགུང་གྲངས་བཅོ་བརྒྱད་ཙམ་ལ་སླེབ་སྐབས་ཤིག་ལ་ཐུགས་རིགས་སད་པའི་རྟགས་སུ་འཁོར་བ་ལ་ཞེན་ལོག་གི་ངེས་འབྱུང་བཅོས་མིན་ཞིག་གིས་ཐུགས་རྒྱུད་བསྐུལ་ནས། ཉིན་ཞིག་གློ་བུར་དུ་ཁོང་ཆ་ལུགས་སྔར་བཞིན་བླ་མ་ཧོར་བླ་རིན་པོ་ཆེ་གཡུ་མཁར་དགོན་ནང་དུ་གསུང་ཆོག་གནང་བཞིན་པའི་ཉེ་སར་ཕེབས་ནས་ཧོར་བླ་གཞན་ཕན་ལ་ཚུར་གཏུག་གསུང་པས། ཧོར་བླའི་ཐུགས་ཅུང་མ་བདེ་བར་ཚུར་ཕེབས་ནས་ཁོང་ལ། ཁྱོད་ཀྱིས་མི་འདྲ་བསད་པ་མིན་ནམ་གསུངས་པར། ཁོང་གིས་ཁྱོད་བླ་མ་གཤིན་པོའི་རྣམ་ཤེས་མཐོང་མཁན་ཞིག་གིས་ངས་མི་བསད་ཡོད་མེད་ཙམ་ཡང་མི་ཤེས་སམ། ང་ཡོང་དོན་གཙོ་བོ་ནི་ང་རང་གྲྭ་ས་ཞིག་ལ་འགྲོ་འདོད་བྱུང་བས་གང་དུ་སོང་ན་དགའ་ཁྱོད་ལ་བློ་ཞིག་འདྲི་སར་འོང་བ་ཡིན་ཞེས་ཞལ་རྩེད་དང་བཅས་ཞུས་པར། ཧོར་བླས་འོ་ན་ཉེས་སྐྱོན་མེད་པར་ང་བློ་བདེ་བྱུང་། ཁྱོད་གྲྭ་སར་གང་དུ་འགྲོ་དགོས་ད་སྟེ་ཞག་བདུན་གྱི་རྗེས་སུ་ཆ་ལུགས་སྒྱུར་ལ་ཤོག་དང་ངས་ཁྱོད་ལ་ལམ་སྟོན་བྱེད་ཆོག་གསུངས། དེ་ནས་ཁོང་ཕར་ཆུ་དབར་ཁོག་ཏུ་ཕེབས་ནས་རང་གི་རྟ་དང་མེ་མདའ་སོགས་མེད་པར་བྱས་ཏེ་འགྲོ་ཆས་བསྒྲིག་ཅིང་ཨ་ལྕོ་བྱ་བྲལ་གྱི་སྤྱོད་པ་དང་དུ་བླངས་ནས་ཚུར་གཡུ་མཁར་དགོན་དུ་ཧོར་བླའི་རྩར་ཕེབས་ནས་བསྒུག ཉིན་ཞིག་དགོན་པའི་འདུ་ཁང་ལ་སྐོར་བར་ཕེབས་སྐབས་དགོན་བྱང་ངོས་ཀྱི་གྲྭ་ཤག་ཞིག་གི་སྟེང་ནས་བླ་མ་ཞིག་གིས་ཡར་ཕེབས་གསུངས། དེར་སྐུ་མདུན་བཅར་བས་ཡི་གེ་ཤེས་སམ་གསུངས། ཅུང་ཟད་ཤེས་ཞུས་པས། འཇམ་དཔལ་མཚན་བརྗོད་ཅིག་གནང་ནས་ལྟོས་གསུངས་འཕྲལ་ཞུ་དག་གཏོང་ཁུལ་གྱིས་ལྗགས་ལུང་གནང་ནས་ཕེབས་ཁར་ཕྲུག་དུམ་ཞིག་སྤྲད་དེ་འདིས་ཞྭ་ཞིག་བཟོས་གསུངས། ཚུར་ལ་ཕེབས་ནས་ཧོར་བླ་ལ་ལོ་རྒྱུས་ཞུས་སྐབས། ཨོ་དེ་ནི་རྒྱ་ལྷ་མོ་ཚེ་རིང་ཞུ་བ་གཡུ་མཁར་དགོན་པའི་བསྟན་བདག་གྲུབ་ཆེན་ཁྱད་འཕགས་ཤིག་ཡིན། ཁྱེད་ཡུལ་མདོ་སྨད་ཀྱི་མགོའི་ཞྭ་ལྟ་བུ་ཞིག་ཏུ་འགྱུར་བའི་རྟེན་འབྲེལ་ཡིན་པས་ཤིན་ཏུ་ལེགས་གསུངས། དེ་ནས་ཉིན་ཤས་ཀྱི་རྗེས་ཧོར་བླས་ཁོང་ལ་ད་ཁྱོད་གནས་སྐབས་གསེར་ལྷ་རྩེ་དགོན་དུ་གྱང་ཁང་སྐྱབས་མགོན་རིན་པོ་ཆེའི་མདུན་དུ་སོང་དང་ངས་ཁོང་ལ་ཁྱོད་ཀྱི་ལོ་རྒྱུས་ངོ་སྤྲོད་ཡི་གེ་ཞིག་སྐུར། ད་རེས་ལྷ་རྩེ་དགོན་པའི་གྲྭ་རྒན་ཞིག་ཀྱང་འགྲོ་རོགས་འདུག་གསུངས། སྐབས་དེར་ལྷ་རྩེ་དགོན་པའི་གྲྭ་རྒན་བསོད་སྙོམས་པ་ཞིག་ཕྱིར་ཕེབས་པ་དང་གཞན་གཡུ་ཁོག་པའི་གྲྭ་རྒན་ཤིས་རྡོར་ཞེས་པ་བཅས་ཁོང་གསུམ་མཉམ་དུ་ལམ་ལ་ཆས། དེར་ལྷ་དགོན་གྱི་བླ་མས་བྲོ་ཆས་ན་བཟའ་སོགས་ཀྱང་ཁོང་ལ་ཁུར་བཅུག་པ་མ་ཟད་བླ་རྒན་ཤིན་ཏུ་བཟེ་རེ་ཆེ་བས་ཁོང་གིས་ལམ་ནས་སྐུ་རྩེད་མང་དུ་མཛད་ཅིང་ཕེབས་པའི་ལོ་རྒྱུས་ཀྱང་ཡོད། རིམ་གྱིས་གཡུ་སྨད་བརྒྱུད་ཕེབས་ལམ་དུ་ཡུལ་མི་ཁ་ཤས་ཀྱིས་གང་དུ་འགྲོ་དྲིས་ཚེ་གྲྭ་སར་འགྲོ་བ་ཡིན་གསུངས། དེར་ཁོང་ཚོས་གྲྭ་སར་འགྲོ་ན་གཡུ་སྟོད་ནས་གྱེན་དུ་ཀཿདཔལ་རྫོགས་གསུམ་ཕྱོགས་སུ་འགྲོ་དགོས་པ་ལ་ཁྱེད་གཡུ་ཆུ་ལག་གཡས་བྱས་ནས་ཐུར་དུ་འགྲོ་བ་ནི་སུ་དང་མི་འདྲ་བ་ཞིག་རེད་ཅེས་འཕྱས་ཀྱང་། ཕྱིས་སུ་ཁོང་གིས་སུ་དང་མི་འདྲ་བ་ཟེར་བ་དེས་ཁོང་ལ་རྟེན་འབྲེལ་ཤིན་ཏུ་ལེགས་པར་གསུངས། དེ་ནས་ཀྱང་ཕེབས་ལམ་དུ་རྒྱ་གསེར་བ རྐོ་བ་ཁ་ཤས་ཀྱིས་ཉ་མང་པོ་བཟུང་ནས་སྐམ་དུ་བཏོན་པའི་སྡུག་བསྔལ་མཐོང་བས་ཁོང་ལ་སྙིང་རྗེ་དྲག་པོ་ཤས་མི་བཟོད་པ་ཐུགས་ལ་འཁྲུངས་ཤིང་སྤྱན་ཆབ་མང་དུ་ཕྱུང་། སྔར་ཐུགས་རྒྱུད་ཅུང་རྩུབ་པའི་ཚུལ་མཛད་ཀྱང་དེ་ནས་བཟུང་སྙིང་རྗེས་རྒྱུད་བརླན་པར་གསུངས། དེ་ལྟར་ཉིན་ཞག་དུ་མའི་དཀའ་སྤྱད་དང་དུ་བཞེས་མཐར་གསེར་སྨད་ལྷ་རྩེ་དགོན་དུ་ཕེབས། དེར་ཉིན་ཤས་སྡོད་གནས་མ་རྙེད་པར་ལུས་སྐབས་ཤིས་རྡོར་ཞེས་པའི་གྲྭ་རྒན་དེས་ཁོ་རང་གི་ངོ་ཤེས་ལྷ་དགོན་གྱི་གྲྭ་རྒན་སྐུ་མཆེད་གཉིས་ལ་སྡོད་གནས་གཡར་གྲོགས་ཞུས་པར། དེ་གཉིས་ཀྱིས་ཁོང་འོག་ཁང་ཞིག་དུ་གནས་ཚང་གཡར་ཙམ་བྱུང་ཞིང་མེ་ཤིང་ཁུར་ནས་གནས་གླ་སྤྲད། སྐབས་དེར་ལྷ་རྩེ་སྐྱབས་མགོན་རིན་པོ་ཆེ་སངས་རྒྱས་དཔལ་ལྡན་མཆོག་ཆུའི་ཕྱར་རི་ཁྲོད་དུ་ཐུགས་དམ་བཅད་རྒྱར་བཞུགས་ཡོད་པས་སྐུ་མདུན་དུ་རང་གར་ཚུད་དཀའ་བར་ཡོད་པས་གནས་ཚང་གྲྭ་རྒན་གཉིས་ཀྱིས་ཁོང་ལ་ཁྱོད་སྐུ་མདུན་དུ་ཚུད་དཀའ་ངེས་གསུངས། དེར་ཉིན་ཞིག་ཁོང་གིས་བླ་མ་གཞན་ཕན་གྱི་ཕྱག་ཡིག་བསྣམས་ནས་རི་ཁྲོད་དུ་ཕེབས་འཕྲལ་ཡུལ་མི་ཁ་ཤས་ལ་ཐུན་མཚམས་མཇལ་ཁ་གནང་བཞིན་པའི་སྐབས་དང་ཁེལ་བས། ཁོང་ཡང་སྐུ་མདུན་དུ་ཚུད་པར་མ་ཟད་བླ་མ་ཧོར་བླའི་ཕྱག་ཡིག་ཕུལ་ཞིང་ལོ་རྒྱུས་ཞུས་ནས་རྗེས་སུ་འཛིན་པར་གསོལ་བ་བཏབ་པས། སྐྱབས་མགོན་རིན་པོ་ཆེས་དགྱེས་བཞིན་བརྩེ་བས་རྗེས་སུ་བཟུང་ཞིང་དེ་འཕྲལ་སྔོན་འགྲོ་ཀུན་བཟང་ཞལ་ལུང་གི་ཆོས་ཁྲིད་དབུ་བཟུང་བ་དང་། རིམ་གྱིས་སྤྱོད་འཇུག་སོགས་ཟབ་ཆོས་ཀྱི་སྒོ་ཕྱེས་ནས་བླ་སློབ་ཐུགས་ཡིད་གཅིག་འདྲེས་སུ་གྱུར། ཁོང་ལ་དཔེ་ཆ་མེད་སྟབས་བླ་མ་སྐུ་དངོས་ཀྱི་ཕྱག་དཔེ་རྣམས་ཀྱང་གཡར་གནང་མཛད། དེ་སྐབས་དགོང་མོ་ཕྱིར་གནས་ཚང་དུ་ལོག་དུས་གནས་ཚང་བླ་རྒན་གཅིག་གིས་སྐུ་མདུན་དུ་ཚུད་དམ་ཞུས་པར། ཚུད་པ་མ་ཟད་ཆོས་ཁྲིད་གནང་ནས་ཕྱག་དཔེ་ཡང་གཡར་སོང་གསུངས་པས་བླ་རྒན་གྱིས་བླ་མའི་ཕྱག་དཔེ་ངོ་ཤེས་ནས་དེ་མ་ཐག་གང་ཟག་ཁྱད་པར་བ་ཞིག་ཡིན་པ་འདྲ་ཞེས་བཞུགས་གནས་ཡར་སྟེང་ཐོག་ཏུ་སྤར། ཡང་དེ་རྗེས་བླ་མས་ཁོང་ཆུའི་ཕྱར་རི་ཁྲོད་དུ་དཀའ་བ་སྤྱད་ནས་བཞུགས་སུ་བཅུག །སྐབས་ཤིག་བླ་མས་རྡོ་ཁོག་ཏུ་ནས་བསོད་ཞིག་ལ་སོང་གསུངས་པ་བཞིན་ཕེབས། དེ་སྐབས་རྡོ་ཀླུང་དལ་འབབ་ཀྱི་རྒྱུན་ལ་བརྒལ་དཀའ་བས་གྲུ་གཟིངས་ལ་ཞུགས་ཏེ་བྱོན་པ་ན་གློ་བུར་དུ་རླུང་འཚུབ་དྲག་པོ་ཞིག་བྱུང་བས་ཆུ་ཆེན་པོའི་རྦ་རླབས་ཀྱིས་བསྐྱོད་དེ་གྲུ་གཟིངས་འཐོར་ལ་ཁད་པ་དང་སྟེང་འོག་བསྒྱུར་ཙམ་མང་པོ་བྱས་སྐབས་ཧོར་བླ་སོགས་བླ་མ་རྣམས་ལ་གསོལ་བ་དྲག་ཏུ་བཏབ་པས་གནོད་བྱེད་ཀྱི་རྐྱེན་ལས་གྲོལ་ཏེ་ཆུ་བོ་ལས་བརྒལ་ཐུབ་པ་བྱུང་ངོ་། །དེ་ནས་རྡོའི་དགྲ་བླ་ཟེར་བའི་ས་རོང་རྩུབ་པའི་འཕྲང་ཆེན་དེར་གྲོགས་མེད་པར་རྗེ་རང་ཉིད་གཅིག་པུར་སྐུ་བསྐྱོད་སྐབས། གཟིག་མ་བུ་གསུམ་གྱིས་ཤིན་ཏུ་ངར་བསྐྱེད་དེ་ཡར་བདའ་མར་བདའ་མང་དུ་བྱས་པས་ཐུགས་བྲེད་སྔངས་ཆེན་པོ་བྱུང་། དེ་འཕྲལ་བླ་མ་ལ་གསོལ་བ་སྙིང་ནས་བཏབ་པས་གཅན་གཟན་གཟིག་གི་འཇིགས་པ་ལས་གྲོལ། དེ་རྗེས་ནས་ཁོང་གི་གཟིམ་ལམ་དུ་ལན་གྲངས་མང་པོར་གཅན་གཟན་དེ་དག་རྨིས་ཏེ་ཐུགས་ལ་སྐྲག་དངངས་དྲག་པོ་བྱུང་བས་རེ་ཞིག་ན་བུད་མེད་ཅིག་གིས་གཅན་གཟན་དེ་དག་ཁྲིད་ནས་སྨྲས་པ། གཅན་གཟན་འདི་དག་ངའི་ཆོ་འཕྲུལ་ཡིན་ཡང་ཚུལ་དེ་ཁྱོད་ཀྱིས་མ་ཤེས་པ་རེད་ཟེར་ཞིང་གཅན་གཟན་རྣམས་བུད་མེད་དེར་ཐིམ་སོང་། བུད་མེད་དེ་ཡང་ཡི་གེ་ཞིག་ཏུ་གྱུར་ནས་མི་སྣང་བར་གྱུར། ཚུལ་དེ་རྣམས་བླ་མ་སྐྱབས་མགོན་རིན་པོ་ཆེ་ལ་ཞུས་པར་ཁོང་གིས་དེ་དག་ལྷོང་ཚད་ཡིན་ཡང་ཁྱོད་ཀྱིས་ད་བར་མ་ཆོད་པ་རེད། ད་ནི་ཆོད་པ་ཡིན་གསུངས། དེ་རྗེས་རྗེ་བཙུན་མི་ལའི་རྣམ་ཐར་དཔེ་ཆ་ཞིག་མཇལ་ཚེ་ཉིན་ཞག་ལྔའི་བར་དུ་སྣང་བ་གཏད་མེད་དུ་སོང་ནས་སྣང་བའི་འཆིང་ཞེན་ལྷོད་ཀྱིས་གྲོལ་བ་བྱུང་། ཡང་ཁོང་གི་ཉམས་སྣང་ལ་ཆོས་རྗེ་དམ་པ་ཧོར་བླ་གཞན་ཕན་འོད་ཟེར་གྱིས་ཞལ་གཟིགས་གནང་སྟེ་རིགས་ལྔའི་ཕྱག་མཚན་ཞིག་ཕྱག་ཏུ་གཏད་ནས། ད་ནི་སྒྲ་བསྒྱུར་མར་པའི་གདན་ས་ལྷོ་གྲོ་བོ་ལུང་དུ་ཕེབས་པའི་དུས་ལ་བབ་པ་ཡིན་ཞེས་ལུང་བསྟན། དེའི་ཚུལ་ལྷ་རྩེ་སྐྱབས་མགོན་རིན་པོ་ཆེར་ཞུས་ཚེ་ལུང་བསྟན་འཁྲུལ་མེད་ཡིན་ཡང་ད་དུང་འགྲོ་མི་དགོས་གསུངས། དེ་རྗེས་ལོ་གཉིས་ཙམ་ནས་སྐྱབས་རྗེའི་སྐུ་ལ་སྙུང་གཞི་དྲག་པོ་བཞེས་པར་ཞབས་པད་བརྟན་པའི་སྐུ་རིམ་བསྒྲུབ་ཆེད་དུ་གཏེར་ཆེན་ཆོས་ཀྱི་རྒྱལ་པོ་མཆོག་སྤྲུལ་རོལ་བའི་རྡོ་རྗེ་ལྕགས་མོ་སྤྲུལ་སྐུ་ལྷ་རྩེ་དགོན་དུ་གདན་ཞུས་ཀྱིས་ཁོང་གི་གཏེར་བྱོན་ལྷ་མཆོག་ཧྱ་གྷྲྀ་ཝ་སྟེ་ལྕགས་མོ་རྟ་གསར་གྱི་བཀའ་རྒྱ་བཀྲོལ་ཏེ་དབང་ལུང་མན་ངག་གི་རྒྱུན་སྤེལ། གཏེར་སྟོན་རང་ཉིད་གོང་གནོན་དུ་བཞུགས་ནས་ཟླ་སྒྲུབ་ཅིག་མཛད་པས། སྐྱབས་རྗེའི་སྐུ་གེགས་བསལ་ཏེ་སྐུ་ཚེ་ཡུན་དུ་བསྲིངས་ཤིང་སྙུང་ལས་གྲོལ། དུས་རྒུད་སོགས་ལའང་ཕན་འབྲས་མངོན་གྱུར་ཐོབ་པ་བྱུང་། སྐབས་དེར་སྐྱབས་རྗེ་མཆོག་སྤྲུལ་ཁོང་ལ་གྲུབ་ཆེན་ནས་བརྒྱུད་པའི་རྫོགས་པ་ཆེན་པོའི་མན་ངག་གི་རྒྱུན་ཁྱད་པར་བ་བཞུགས་པར་སྐུ་མདུན་དུ་བཅར་ཏེ། རྗེ་བཙུན་དམ་པ་ལགས། དེང་དུས་སུ་རྫོགས་པ་ཆེན་པོའི་ཆོས་སྐད་ཙམ་རེ་གླེང་བ་མང་མོད། འོན་ཀྱང་བདག་ལ་ལམ་དེའི་ཡོན་ཏན་གྱི་ཆ་ཕྲ་མོའང་རྒྱུད་ལ་མ་འབྱོར་བས་མགོན་ཉིད་ཀྱིས་རྗེས་སུ་འཛིན་པར་ཞུ་ཞེས་ནན་གྱིས་གསོལ་བ་བཏབ་པ་ན། ཁྱེད་བླ་མ་གཞན་ཕན་ཉིད་ནས་འདིར་མངག་པ་ཡིན་སྐད་ཐོས། གཞན་ཕན་ཁོང་ལ་ང་རང་ཡང་མཇལ་འདོད་ལྷག་པར་ཆེ་ཡང་དེང་སྐབས་སྟབས་མ་འགྲིགས། དེ་སླད་མི་རྒན་ང་ཡི་ཁོང་ནས་ཁྱོད་ལ་རྫོགས་པ་ཆེན་པོ་ཞིག་རྟོགས་པའི་རེ་བ་མེད་ཀྱང་ཁྱོད་རང་ང་དང་ལྷན་དུ་མགོ་ལོག་ཕྱོགས་སུ་ཤོག་དང་ལྟོ་གོས་གཉིས་པོ་ངས་སྦྱར་ཆོག རྡོ་གྲུབ་རིན་པོ་ཆེའི་མདུན་དུ་བཅར་ན་རྫོགས་པ་ཆེན་པོ་རྒྱུད་ལ་འབྱོར་བར་ངེས་སོ་གསུངས། ཚུལ་དེ་ལྷ་རྩེ་སྐྱབས་མགོན་རིན་པོ་ཆེར་ཞུས་ཀྱང་བཀའ་ཡི་གནང་བ་མ་ཐོབ། དེ་ཚེ་མཆོག་སྤྲུལ་རོལ་བའི་རྡོ་རྗེས་ད་ནི་བན་ཆུང་ཁྱོད་ལ་སྐྱབས་མགོན་གྱིས་གནང་བ་མེད་ཀྱང་གྲུབ་རྗེ་ཉིད་ཀྱི་གདམས་ཟབ་བྱིན་རླབས་ཀྱི་བརྒྱུད་པའི་ཕ་ཕོག་བླ་ན་མེད་པ་འདི་ངས་ཁྱོད་ལ་བསྟན་གྱིས་གསུངས་ནས། ཐུགས་རབ་ཏུ་དགྱེས་པ་ཆེན་པོས་ཁྲིད་ཡིག་ཡེ་ཤེས་བླ་མ་ལ་སོགས་པའི་རྫོགས་ཆེན་ཀྱི་མན་ངག་ཅི་རིགས་དང་ཞལ་འཕྲོས་སུ་ཟབ་གནད་མང་པོ་ཞིག་གཅེས་ནོར་དུ་གདམས་ཏེ་རྡོ་གྲུབ་བསྟན་པའི་ཉི་མའི་གདམས་ངག་གི་སྙིང་པོ་དེ་ཀ་རང་ལགས་ཕྱིར་བརྩོན་པས་ཉམས་སུ་ལོངས་ཤིག་གསུངས། ཁོང་གིས་བརྩོན་པ་དྲག་པོས་ཐུགས་ཉམས་སུ་བཞེས་ཚེ་ཞག་བདུན་ཕྲག་གཅིག་གི་མཚམས་སུ་སློབ་དཔོན་གྱིས་སྣང་སྲིད་བླ་མར་ངོ་སྤྲད་པ་སོགས་ཀྱི་ཉམས་སྣང་སྣ་ཚོགས་ཤར་ཞིང་། གཞན་ཡང་གཟུང་འཛིན་ལས་རླུང་གི་རྒྱུ་བ་དབྱིངས་སུ་ནུབ་སྟེ་རྟོག་མེད་ཀྱི་ངང་དུ་འབྱམས་ཀླས་པ་ན། དྲན་མེད་དང་ལུང་མ་བསྟན་དུ་མ་སོང་བར་བུམ་ནང་གི་མར་མེ་བཞིན་འོད་གསལ་ཡེ་ཤེས་ཀྱི་འཆར་སྒོ་འགགས་པ་མེད་པར་གཞོན་ནུ་བུམ་སྐུའི་ཞིང་ཁམས་ཀྱི་བཀོད་པ་མངོན་དུ་གྱུར་པ་ཡིན་ཞེས་གཟུགས་མི་སྣང་བར་སྒྲའི་དབྱངས་ཀྱིས་ལུང་བསྟན་པ་དང་། རིགས་ལྔའི་ཞིང་ཁམས་སོགས་ཀྱི་སྣང་བ་གསལ་ལ་མ་འདྲེས་པར་ཤར་བ་ན། རྒྱན་སྣ་ཚོགས་ཀྱིས་སྤྲས་པའི་བུད་མེད་མཛེས་མ་དུ་མས་རིགས་ལྔའི་ཞིང་སོགས་སོ་སོའི་བརྡ་སྤྲོད་བྱེད་པ་དང་གཞན་རྒྱ་ཡིག་དང་བོད་ཡིག་སོགས་ཡིག་རིགས་སྣ་ཚོགས་ཤར་ཞིང་། ཚེ་རབས་ལས་ཀྱི་བླ་མ་སངས་རྒྱས་ཐོགས་མེད་བྱ་བ་དེ་ད་ལྟ་ཁ་བ་ལ་དེར་བཞུགས་ཡོད་པས་དེ་རུ་སོང་ཞེས་ལུང་བསྟན་པ་སོགས་མཐའ་ཡས་པ་བྱུང་ངོ་། །དེ་ནས་བཟུང་རིག་རྩལ་ཆོས་རབ་རྣམ་འབྱེད་ཀྱི་ཤེས་རབ་ཀློང་ནས་རྡོལ་བས། སྣང་བ་བརྡ་དང་དཔེ་ཆར་ཤར་བའི་རྟགས་སུ་མགྲིན་པ་རྡོ་རྗེའི་གསང་མཛོད་ནས་ངལ་གསོི་མགྲོན་པོའི་རྒྱང་གླུ་སོགས་ལྟ་མགུར་གྱི་རིགས་དང་སྙན་ཞིང་འཇེབས་ལ་སྐབས་དོན་ཁྱད་པར་ཅན་གྱི་འབེལ་རྩོམ་དོ་ཧའི་སྐོར་སོགས་ལྗགས་རྩོམ་ཡང་མང་དུ་གནང་ངོ་། །སྐབས་ཤིག་རྗེ་འདིའིི་ལྟ་མགུར་ལས། ཨ་ཧོ། གྲོང་དགོན་སྤེལ་མ་ཡི་ཁྲོད་ན། །གནས་ཉམས་འཐུག་པོ་ཡི་མལ་དུ། །ཉམས་ཞེན་རོ་མྱོང་ལ་ཆགས་པའི། །ངལ་བ་དོན་མེད་ཀྱི་སྒོམ་ཆེན། །ཨ་འཐས་ཉམས་ཞེན་གྱི་འཆིང་བས། །རང་རྒྱུད་བསྡམས་པ་དེ་ཨེ་གོ །དབང་མེད་བྱེད་པོ་ནི་མ་མཆིས། །ཅུང་ཟད་ཀློད་ན་ནི་བདེའོ། །ཅིར་ཡང་མ་གྲུབ་པའི་ངང་ནས། །དྭངས་གསལ་འགགས་མེད་ཀྱི་ཉམས་ལེན། །ཞང་ཞུང་བོན་པོ་དང་མཐུན་པའི། །ལྟ་དེ་སྤྲོས་ཅན་དུ་འདུག་གོ །བསྒོམ་ཡང་སེམས་འཛིན་གྱི་བསམ་གཏན། །མ་བསྒོམ་འཁྲུལ་འབྱམས་ཀྱི་རང་བཞིན། །དེ་འདྲའི་གནས་འགྱུ་ཡི་ངང་ལ། །མི་ཚེ་ཟད་པ་འདི་ཨེ་གཟིགས། །གཟུགས་མེད་བསམ་གཏན་གྱི་ཁུང་བུར། །སེམས་གནས་དགུང་ལོ་ནི་བགྲེས་ཀྱང་། གནས་དགའ་འགྱུ་སྡུག་གི་ངང་དུ། །ད་དུང་འོ་བརྒྱལ་ཞིག་ཡོད་སྐད། །ལྟ་བའི་བགྲོ་གླེང་རེ་བྱས་ཚེ། འདྲི་ས་གླེང་ས་ཙམ་མེད་པའི། །ཁྱོད་ཀྱི་ལོག་རྟོག་དེ་སྤོངས་དང་། །ང་ཚོས་ཉམས་མགུར་ཞིག་འཐེན་ཡ། །ཞེས་སོགས་དང་གཞན་ཡང་། གསེར་ལྷ༵་རྩེ༵་གསེར་གྱི་མཆོད་རྟེན་ལ། ཕྲ་ཚོམ་གཡུ༵་ཡི་ཏོག་གིས་མཛེས། །རེ་ཞིག་ལ་རྟོག་པའི་དྲྭ་བ་བཤིག་ཞེས་སོགས་གསུངས་པ་དེ་དག་གནས་དེར་ཉམས་ལེན་གནད་དུ་མ་སོང་བའི་བླུན་སྒོམ་མུན་རྡོ་བ་སོགས་ལ་གདམས་པར་གོར་མ་ཆག་ཀྱང་། རྗེ་རིག་འཛིན་བུདྡྷ་ཤྲཱི་ཝན་གྱི་ལྟ་བ་ལ་ཟུར་ཟ་བའི་ཚིག་རེད་ཅེས་བླ་སློབ་ཀྱི་བར་དུ་དབྱེན་བྱས་པ་མ་ཟད་ཐ་ཆད་འགས་ཁོང་ལ་སྦྱར་དུག་ཀྱང་དྲངས་པ་སོགས་ལབ་གླེང་དང་སྤྱོད་ངན་མང་པོ་བྱུང་མོད། ཁོང་ལ་དུག་གིས་མ་གནོད་པ་མ་ཟད་ཁོང་བླ་སློབ་ཐུགས་ཤིན་ཏུ་མཐུན་པོ་ཡིན་སྟབས་ཀྱིས་གླགས་མ་རྙེད་དོ། །དེ་རྗེས་ཡུན་རིང་སོང་མཐར་སྐྱབས་རྗེ་བླ་མས་གདུལ་བྱའི་ངོར་གཟུགས་སྐུའི་བཀོད་པ་བསྡུ་ཚུལ་མཛད་པ་སོགས་རྐྱེན་འགའ་ཞིག་གིས་གནས་དེར་བཞུགས་པའི་སྐབས་མ་མཆིས་པར། མཆེད་གྲོགས་འགའ་དང་ལྷན་དུ་གསེར་སྟོད་ཕྱོགས་སུ་གནས་ངེས་མེད་དུ་རྒྱུ་ཞིང་ཕེབས་སོ། །གཞན་ཡང་འདི་སྐབས་ཡས་མས་སུ་ར་ཧོར་སྐུ་ཆེན་གྱི་མདུན་དུ་དགེ་ཚུལ་གྱི་བསླབ་སྡོམ་ནོད་པ་དང་། སྐུ་ཞབས་བྲག་དཀར་བའི་མདུན་ནས་སྔོན་འགྲོ་སོགས་ཆོས་བཀའ་འགའ་ཞིག་གསན་པའི་ལོ་རྒྱུས་ཀྱང་ཐོས་སོ། །
གསུམ་པ་ལྕགས་སྐོང་བདུད་འཇོམས་རྡོ་རྗེའི་ལུང་བཞིན་ཚེ་རབས་ལས་ཀྱི་བླ་མ་ཨ་འཛོམས་འབྲུག་པ་རིན་པོ་ཆེ་དང་མཇལ་ནས་གདམས་ཟབ་ཀྱིས་ཐུགས་ཀྱི་བུམ་བཟང་གཏམས་པའི་སྐོར་ནི།
དེ་ནས་རིམ་གྱིས་ཁམས་གསུམ་ཆོས་ཀྱི་རྒྱལ་པོ་གཏེར་ཆེན་བདུད་འཇོམས་གླིང་པའི་ཆོས་སྒར་དུ་བྱོན་ཅིང་དེར་ཆོས་འབྲེལ་ཞུས་ནས་བཞུགས། ཉིན་ཞིག་སྣང་སྦྱང་གསུངས་སྐབས་ཁྲིད་དཔོན་ཨ་བོའི་བསོད་རྒན་སྤྲུལ་སྐུས་སེམས་ཐག་ཆོད་ན་འབུ་ནག་སྒོང་སྡེར་གང་མེ་ལ་བསྲེག་ཀྱང་ས་རྡོ་དང་ཁྱད་མེད་ཚུལ་སོགས་གསུངས་པ་ཁོང་གི་ཐུགས་ལ་མ་བབས་པར་ཁོང་ལ་འགྲམ་ལྕག་ཅིག་གཞུས་ནས་ཁྱད་ཨེ་འདུག་ཅེས་ཤེས་པ་ཡོད་མེད་ཀྱིས་ཁྱད་ཤིན་ཏུ་ཆེ་ཚུལ་དགག་བཞག་གནང་བ་སོགས་གཏེར་ཆེན་གྱིས་གསན་ནས་མདུན་དུ་ཤོག་གསུངས། ཕེབས་པས་ཁྱེད་ཀྱིས་ངའི་ཁྲིད་དཔོན་ལ་ཤག་འགྱེད་བྱེད་པའི་སྤོབས་པ་ཅི་ཡོད་སོགས་བཀའ་བཀྱོན་གནང་བས་ལོ་རྒྱུས་ཞིབ་པར་ཞུས་སྐབས་ཐུགས་དགྱེས་པས་དེ་རྗེས་ནས་སྐུ་མདུན་དུ་སྣང་སྦྱང་རྒྱས་པར་ཞུས་ཤིང་སྣང་སྦྱང་གི་ཟིན་བྲིས་ཀྱང་གནང་བ་མ་ཟད། ཁོང་སྣང་སྦྱང་ལ་མཁས་ཚུལ་དུས་ཕྱིས་གཏེར་ཆེན་སྐུ་སྲས་རྡོར་དགྲས་རང་གི་དངོས་སློབ་ཤ་བའི་ཨ་ཏི་དང་། དོམ་ཚང་གཏེར་སྟོན་ཚེ་དབང་མགོན་པོ་སོགས་ཀྱང་གཡུ་ཁོག་བླ་མའི་སྐུ་མདུན་སྣང་སྦྱང་ཞུ་བར་ཆེད་མངགས་མཛད་པ་ཡིན་ནོ། །དེ་ལྟར་ལྕགས་སྐོང་སྒར་དུ་བཞུགས་སྐབས་ཉིན་ཞིག་གཏེར་ཆེན་བདུད་འཇོམས་རིན་པོ་ཆེས་ཁོང་ལ་ཁྱོད་ཀྱི་ཚེ་རབས་ལས་ཀྱི་བླ་མ་ཨ་འཛོམས་འབྲུག་རྒན་འགྲོ་འདུལ་དཔའ་བོ་རྡོ་རྗེ་རེད་འདུག་པས་ད་ལྟ་ཉིད་དུ་ཁྲོམ་ཁོག་ཏུ་སོང་ཞེས་ལུང་བསྟན་དབུག་དབྱུང་གནང་བས། དེ་སྐབས་ཁོང་གི་ཞབས་ཕྱི་སྒོ་སྤུས་ཡོན་ཏན་དང་ལུང་ནང་བླ་མ་བསོད་ནམས་ཕུན་ཚོགས་སོགས་གྲྭ་འཁོར་བཅས་བཤུལ་རིང་ལམ་གྱི་སྐུ་ངལ་ཁྱད་དུ་བསད་ནས་ཕེབས་མཐར་རིམ་གྱིས་སྐྱབས་རྗེ་འཁོར་ལོའི་མགོན་པོ་ཨ་འཛོམས་འབྲུག་པ་རིན་པོ་ཆེ་འགྲོ་འདུལ་དཔའ་བོ་རྡོ་རྗེའི་གདན་སར་ཕེབས། རྡོ་རྗེ་འཆང་དངོས་འབྲུག་པ་རིན་པོ་ཆེའི་ཞབས་པད་ལ་བདེ་ཆེན་འཁོར་ལོའི་ཅོད་པན་གྱིས་གཏུག་ནས་སྒོ་གསུམ་ལྟོས་མེད་དུ་ཕུལ་ཞིང་རྗེས་སུ་འཛིན་པར་གསོལ་བ་རྩེ་གཅིག་ཏུ་བཏབ་པ་ན། བླ་མ་རིན་པོ་ཆེས་ཀྱང་མཇལ་ཙམ་ཉིད་ནས་གཞན་ལས་ལྷག་པའི་ཚུལ་གྱིས་དགྱེས་བརྩེས་རྗེས་སུ་བཟུང་ཞིང་། སྐལ་བཟང་ལས་ཅན་གྱི་འཁོར་ཚོགས་རྒྱ་མཚོ་ལྟ་བུ་ལ་ཁམས་དང་དབང་པོ་བསམ་པ་དང་མཐུན་པའི་ཟབ་རྒྱས་ཀྱི་ཆོས་སྦྱིན་མི་ཟད་པའི་གཏེར་ཆེན་གྱི་སྒོ་ཡངས་པོར་ཕྱེ་བའི་ཆོས་གྲྭ་དེར། ཁོང་ལ་ཡང་གདུལ་བྱ་རྗེས་འཛིན་གྱི་ཐབས་ལ་དགོངས་ཏེ་དང་པོ་ཐུན་མོང་སྔོན་འགྲོ་ནས་གཞི་བཙུགས་ཏེ་ལམ་གྱི་འཇུག་རིམ་་ཆགས་སུ་རིམ་གྱིས་བསྩལ་ཞིང་། ཁྱད་པར་དཔལ་གདོད་མའི་མགོན་པོ་ནས་སྔ་འགྱུར་སློབ་དཔོན་པདྨ་ཀཱ་ར་སོགས་ལ་བརྒྱུད་དེ་རིམ་པར་བཀའ་བབས་བདུན་གྱི་མངའ་བདག་པདྨ་འོད་གསལ་མདོ་སྔགས་གླིང་པའམ་འཇམ་དབྱངས་མཁྱེན་བརྩེའི་དབང་པོ་དང་། རྒྱལ་སྲས་སེམས་དཔའ་ཆེན་པོ་འཇིགས་མེད་ཆོས་ཀྱི་དབང་པོ་སོགས་ལ་བརྒྱུད་པ་བཅས་ཤིན་ཏུ་གསང་བའི་མན་ངག་འདི་ཡིན་ནོ་ཞེས། ལེ་ལོ་ཅན་འབད་མེད་དུ་གྲོལ་བ་ཀ་དག་ཁྲེགས་ཆོད་ཀྱི་གདམས་པ་དང་། བརྩོན་འགྲུས་ཅན་འབད་བཅས་སུ་གྲོལ་བ་འོད་གསལ་ཐོད་རྒལ་གྱི་སྙན་བརྒྱུད་མན་ངག་ལག་ལེན་བཅས་འདི་ནི་ཐེག་མཆོག་རྒྱལ་པོའི་མན་ངག་སྟེ། སྐལ་ལྡན་ཚེ་འདིར་གྲོལ་བའི་གདམས་པ་རྡོ་རྗེ་ཐེག་པའི་ལམ་གྱི་རྩེ་མོ་ཡང་གསང་བླ་ན་མེད་པ་སྟེ་དབྱིངས་ཀྱི་མཁའ་འགྲོ་འབུམ་གྱི་ཐུགས་མཛོད། གྲུབ་བརྙེས་རིག་འཛིན་སྟོང་གི་དགོངས་པའི་ཞེ་ཕུག རྟོགས་ལྡན་རྒན་པོ་ཡོངས་ཀྱི་ཉེ་ལམ་ཟེར་བ་འདི་ག་ཡིན་གསུངས་ནས། སྔ་ཕྱིར་ལྕེ་བཙུན་སྙིང་ཐིག་དང་དགོངས་པ་ཟང་ཐལ། ཁྱད་པར་སྙིང་ཐིག་གོང་འོག་གི་སྨིན་གྲོལ་དང་ལྗགས་ལུང་། རྩ་རླུང་གཏུམ་མོ། བཅུད་ལེན་སོགས་གདམས་ཟབ་མང་པོ་བུམ་པ་གང་བྱོའི་ཚུལ་གྱིས་གཅེས་ནོར་དུ་རྫོགས་པར་ཉམས་ཁྲིད་དུ་བསྩལ། གཞན་ཡང་བཀའ་གཏེར་གསར་རྙིང་གི་ཆོས་བཀའ་དང་དབང་ལུང་དུ་མ་ཡང་གསན་ནས་གནས་དེར་ཁྲིད་སྦྱང་དང་བཅུད་ལེན་ལ་བཞུགས་པ་སོགས་དཀའ་བ་བརྒྱ་ཕྲག་གིས་སྦྱང་བརྩོན་ཡུན་རིང་གནང་བས། མཁས་དང་གྲུབ་པའི་གོ་འཕང་མཐོན་པོར་རྩོད་མེད་དུ་གཤེགས་པས་ཨ་འཛོམས་འབྲུག་པ་རྡོ་རྗེ་འཆང་གི་རྟོགས་པ་དོན་གྱི་རྒྱལ་ཚབ་ཏུ་གྱུར་ནས། བླ་མས་ཁོང་ལ་བྱ་བྲལ་ཆོས་དབྱིངས་རང་གྲོལ་ཞེས་དོན་ལྡན་གྱི་མཚན་གྱི་ཅོད་པན་དཔྱང་བ་མ་ཟད། ཁོང་དང་གོ་འཇོ་མཁར་སྤྲུལ་པདྨ་ཤེས་རབ་བཟང་པོ་གཉིས་ལ་བཤད་པའི་བཀའ་བབས་དང་། ངོར་རྟོགས་ལྡན་ཤཀྱཱ་ཤྲཱི་དང་། སྨུག་སེང་སྤྲུལ་སྐུ་འཇིགས་མེད་ཆོས་ཀྱི་བློ་གྲོས་གཉིས་ལ་སྒྲུབ་པའི་བཀའ་བབས་ཏེ་ཐུགས་སྲས་ཀ་ཆེན་བཞི་ཞེས་ཡོངས་སུ་གྲགས་པ་བྱུང་། ཆོས་སྒར་དེར་བཞུགས་སྐབས་ཉིན་ཞིག་བླ་མས་ཁོང་གི་སྲས་མོ་འཆི་མེད་ཁྱོད་ཀྱི་ཡུམ་སྐལ་རེད་འདུག་པས་ཐབས་ཤེས་འབྲེལ་ན་ལེགས་ཚུལ་གསུངས་ཀྱང་། ཁོང་གིས་བླ་མ་ལ་གཞན་ནི་ཁྱེད་ཀྱིས་ཅི་གསུང་དང་དུ་ལེན་ཡང་བུད་མེད་འདི་བདག་ལ་དགོས་པ་མི་འདུག་པས་དེ་ལྟར་མི་དགོས་པའི་དགོངས་ཁྲོལ་ཡང་ཡང་ཞུས། ཕྱིས་སུ་ཡང་ཁོང་རྟེན་རབ་བྱུང་ཡིན་མོད་ཆ་ལུགས་ལྕང་ལོ་དང་་གཟན་དཀར་སོགས་སྔགས་ཆས་ལྟ་བུར་བཞུགས་པ་ནི་བླ་མ་རིན་པོ་ཆེའི་བཀའ་གསུང་དང་མི་འགལ་བའི་ཆེད་དུ་ཡིན་གསུངས། དེ་ལྟར་ཨ་འཛོམས་འབྲུག་པ་རིན་པོ་ཆེའི་མདུན་དུ་བགྲང་བྱ་དུ་མར་ཟབ་རྒྱས་ཆོས་མཛོད་དུ་མར་གསན་བསྒོམ་ཟུང་དུ་འབྲེལ་ནས་རྟོགས་པ་ནམ་མཁའ་དང་མཉམ་པ་ཡིན་ནོ།།
བཞི་པ་བླ་མའི་བཀའ་བཞིན་གནས་ངེས་མེད་དུ་གདན་ས་བཙལ་བའི་མཐར་གསེར་སྨད་ཡག་སྒང་དུ་གདན་སའི་རྟེན་འབྲེལ་འགྲིགས་ཤིང་བཞུགས་སྒར་བཏབ་པའི་སྐོར་ནི།
དེར་འབྲུག་པ་རྡོ་རྗེ་འཆང་གི་མདུན་ནས་བགྲང་བྱ་མང་དུ་བཞུགས་མཐར་གསན་སྦྱང་མཐའ་རུ་ཕྱིན་ནས་མཁས་གྲུབ་ཆེན་པོའི་རྒྱལ་སར་གཤེགས་སྐབས། འབྲུག་པ་རིན་པོ་ཆེས་ད་ནི་གཞན་དོན་གདུལ་བྱ་སྐྱོང་བའི་དུས་ལ་བབས་སོ་ཞེས་བཀའ་གསུང་བསྩལ་ཞིང་། དཔོན་སློབ་ཚེ་རབས་ཀུན་ཏུ་འབྲལ་བ་མེད་པའི་ཐུགས་བསྐྱེད་དང་སྨོན་ལམ་བཅས་ཞལ་གྱེས་ནས་སྨྱོ་ཤུལ་ལྗོན་པ་ལུང་དུ་གནས་མཇལ་དུ་ཕེབས་ཤིང་། དེར་བླ་མ་ལུང་རྟོགས་རིན་པོ་ཆེ་མཇལ་བ་ལ་འདི་ལྟར་ཞུས། ང་ལ་ཨ་འཛོམས་རིན་པོ་ཆེས་གཞན་དོན་གདུལ་བྱ་སྐྱོང་བའི་དུས་ལ་བབས་གསུངས་ཀྱང་མཁས་པའི་ཡོན་ཏན་ཅི་ཡང་མི་བདོག་པས་ཐབས་ཅི་ཡོད་ལགས་ཞུས་པར། སྨྱོ་ཤུལ་བླ་མ་ལུང་རྟོགས་ཀྱི་ཞལ་ནས། སྐྱོན་མེད་དེ་ལྟར་མཛོད་དང་བན་རྒན་ངས་ཤེས་ཚད་ཀྱང་ཁྱོད་ལ་སྦྱིན་ཞེས་བྱིན་རླབས་གནང་བས་ཆོས་གང་ལ་ཡང་ཆགས་ཐོགས་མི་མངའ་བའི་གཟུངས་སྤོབས་ཀྱི་བློ་གྲོས་ཐོབ་པར་ཡང་གསུངས། རིམ་གྱིས་ཉག་རོང་ཕྱོགས་སུ་གནས་ངེས་མེད་དུ་ཕེབས་ནས་འགྲོ་དོན་བསྐྱངས་ཀྱང་གདན་ས་སོགས་ཀྱི་རྟེན་འབྲེལ་དང་འགྲོ་དོན་ཆེར་མ་རྒྱས། འདི་སྐབས་རྒྱ་ནག་ཕྱོགས་སུ་གནས་སྐོར་ལ་ཕེབས་ཚུལ་ཞིག་ཀྱང་འདུག །དེ་ནས་ཕྱིར་སྐུ་འཁྲུངས་ཡུལ་གཡུ་ཁོག་ཕྱོགས་སུ་ཕེབས། འོན་ཀྱང་སྐབས་དེར་གཡུ་ཁོག་བ་དང་ལི་ཁོག་མ་སྡེ་འཁྲུགས་ཀྱི་རྐྱེན་ལས་གཡུ་ཁོག་དཔོན་རྣམས་གྲོངས་པས་དཔོན་མེད་སྡེ་འཐོར་ལྟ་བུར་ཡོད་སྟབས། ཚུལ་བཞིན་གདན་ཞུ་སྣེ་ལེན་སོགས་མེད་པ་མ་ཟད། གཡུ་མཁར་དགོན་དུ་ཕེབས་སྐབས་སུས་ཀྱང་ངོ་མ་ཤེས། དེར་དགོན་གྱི་སྤྱི་ཁང་དུ་གནས་ཚང་ཞིག་གཡར་རོགས་གསུངས་ཀྱང་མ་གཡར། ཆུ་དབར་ཁོག་ཏུ་ཁྱུག་ཙམ་ཕེབས་ནས་སླར་གསེར་རྟའི་ཕྱོགས་སུ་ཕེབས། རིམ་གྱིས་གསེར་སྨད་སྦོ་མདའི་སར་ཕེབས་སྐབས། སྡེ་དཔོན་གླ་རི་ཨོ་རྒྱན་ཚེ་བརྟན་དང་མཆོད་ཡོན་ཉི་ཟླ་ཟུང་འབྲེལ་གྱིས་སྔ་འགྱུར་རྒུ་གདོང་དགོན་གྱི་ཆོས་གཞི་དང་ལྷ་སྡེ་བཅས་གྲྭ་འབུལ་བྱས་པས་རྟེན་འབྲེལ་ལེགས་ཕྱོགས་སུ་འགྲིགས། ཆོས་དགོན་དེར་ལོ་ཤས་རིང་བཞུགས་ཀྱང་སྔར་གྱི་ས་དཔྱད་ཉམས་པ་སོགས་ཀྱིས་རྐྱེན་ལས་གདུལ་བྱ་དང་ཕྲིན་ལས་ཆེར་མ་རྒྱས་པར། སླར་ཨ་འཛོམས་འབྲུག་པ་རིན་པོ་ཆེར་བརྟག་ཞུས་དང་གདན་ས་གང་དུ་ཡོད་ལུང་བསྟན་གྱི་ཞུ་ཡིག་བཅས་སྐུ་འཁོར་ཁ་ཤས་མངགས་པར་གསུང་ལན་དུ། ཁྱེད་ཀྱི་གདན་ས་དེ་རི་ཤ་བའི་སྒྲོ་བ་ལྟ་བུའམ་རི་བོ་དུང་དཀར་གཡས་འཁྱིལ་ལྟ་བུའི་ལྟེ་བ་ན་ཡོད་ཅེས་ལུང་བསྟན་གནང་འདུག་པ། ཕྱོགས་ཀུན་ཏུ་བཙལ་ནས་ཡག་སྒང་གི་རི་རྩར་ཕེབས་སྐབས་སྦྱིན་བདག་རྒད་པོ་ཞིག་གིས་ལམ་ཁ་ནས་གདན་ནག་པོ་ཞིག་བཏིང་ཞིང་དེར་བཞུགས་རོགས་ཞུས། སྦྱིན་བདག་ལ་ཁྱོད་ཀྱི་མིང་ལ་ཅི་ཟེར་གསུངས་པས་ངའི་མིང་ལ་ཕྲིན་ལས་དར་རྒྱས་ཟེར་ལགས་ཞུས་པ་དང་ཞོ་མདོང་མོ་གང་དྲངས་པས། གདན་ནག་པོ་ནི་ཆོས་ཉིད་མི་འགྱུར་བའི་བརྡ་སྟེ་གནས་འདིའི་ཉེ་འཁོར་ཞིག་ལ་བཞུགས་གདན་འཇག་པའི་རྟེན་འབྲེལ་དང་། ཕྲིན་ལས་དར་རྒྱས་ཞེས་པས་དེར་གདུལ་བྱ་ཕྲིན་ལས་རྒྱས་ངེས་དང་། ཞོ་བཀྲ་ཤིས་པའི་རྫས་ཡིན་པ་སོགས་རྟེན་འབྲེལ་ཧ་ཅང་ལེགས་གསུངས། དེར་སེང་ཆེན་རྒྱལ་པོའི་གནས་སུ་གྲགས་པའི་ཡག་ཡེ་དེའུ་ལེ་གཉན་པོ་ཞེས་པའི་རི་བོ་དུང་དཀར་གཡས་འཁྱིལ་གྱི་དབྱིབས་སུ་གནས་པ་དེ་གདན་སར་གཟིགས་ནས་གྲྭ་འཁོར་བཅས་རི་དེའི་མགུལ་དུ་ཕེབས་སྐབས། རི་མགུལ་གྱི་ཕྱིས་ཀྱི་གདན་སའི་ས་མིག་དེར་ཐབ་རྡོ་སུམ་ཚིགས་དང་མེ་ཤིང་ཁུར་པོ་ཞིག་བཅས་བཞག་འདུག་པས། བླ་སློབ་ཐམས་ཅད་རྟེན་འབྲེལ་འགྲིགས་པའི་ཐུགས་དགྱེས་ཚོར་ཆེན་པོའི་ངང་གནས་དེར་བསང་དང་གསེར་སྐྱེམས་སོགས་ཀྱིས་མཆོད་སྐབས། ནམ་མཁའ་འཇའ་འོད་ཀྱིས་གང་བའི་གསེབ་ནས་ཆོས་སྐུ་འོད་དཔག་མེད། ལོངས་སྐུ་ཐུགས་རྗེ་ཆེན་པོ། སྤྲུལ་སྐུ་པདྨ་འབྱུང་གནས་འཁོར་རྗེ་འབངས་དང་སྔ་འགྱུར་ཀུན་མཁྱེན་ཡབ་སྲས་སོགས་ཀྱིས་ཞལ་མངོན་སུམ་གཟིགས་ནས་ལུང་བསྟན་དང་དབུག་དབྱུང་སོགས་གནང་བ་རྗེ་ཉིད་ཀྱིས་མངོན་སུམ་དུ་གཟིགས། གཞན་ཡེ་ཤེས་དང་ཐེག་མཆོག ཡོན་ཏན་སོགས་གྲྭ་འཁོར་རྣམས་ཀྱིས་འཇའ་འོད་དང་། ནམ་མཁའ་ནས་བྱ་རྒོད་མང་པོས་ལྡིང་སྐོར་དང་རི་ཐོད་དུ་བྱ་རྒོད་མང་པོས་སྐོར་བ་བྱེད་པ་སོགས་རྟགས་ཡ་མཚན་ཅན་མང་དུ་བྱུང་བ་མཐོང་བས་ཀུན་ཀྱང་དད་པའི་བ་སྤུ་གཡོ་ཞིང་དགའ་བའི་སྤྱན་ཆབ་ཀྱང་བབས། སྐབས་དེར་རྗེ་ཉིད་ཀྱིས་གྲྭ་འཁོར་ཁ་ཤས་ལ་ཁྱེད་ཅག་རི་འདིའི་གཡས་གཡོན་དུ་ཆུ་ཡོད་མེད་བལྟ་རུ་སོང་གསུངས། དེ་འཕྲལ་གྲྭ་བ་ཁ་ཤས་བལྟ་རུ་འགྲོ་སྐབས་རི་དེའི་གཡས་ངོས་སུ་ཆུ་མིག་ཞིག་གསར་དུ་རྡོལ་ནས་ཆུ་ཡར་འཕྱུར་བཞིན་རྩྭ་དང་ས་རྡུལ་སོགས་ཀྱང་འཕྱག་བཞིན་པ་མཐོང་བ་དེ་ནི་ཕྱིས་སུ་རྨ་བྱ་ཆུ་མིག་ཞེས་པ་དེ་ཡིན། དེར་དཔོན་གཡོག་རྣམས་ཀྱིས་སྔར་གྱི་ཐབ་སྟེང་ནས་གསོལ་ཇ་བསྐོལ་ཞིང་ཐེངས་དང་པོར་གསོལ་ཇ་བཞེས། དེ་ནས་ཁོང་གིས་སློབ་མ་རྣམས་ལ་ད་ཁྱེད་རྣམས་ཕྱོགས་ཕྱོགས་སུ་སོང་ལ་ཤ་ཆང་སོགས་ཚོགས་རྫས་རེ་སློང་དང་གནས་སྟོན་ཚོགས་འཁོར་ཞིག་བྱེད་གསུངས་པས། གྲྭ་སློབ་རྣམས་ཕྱོགས་སོ་སོར་བསོད་སྙོམ་དུ་ཕེབས་ནས་ཕྱིར་ཉིན་མཉམ་དུ་འཛོམས་སྐབས། ཤ་ཐམས་ཅད་ཕྱོགས་གཅིག་བསྡོམས་པས་ཤ་ཁོག་ཆ་ཚང་བ་ཞིག་དང་། གཞན་ཡང་འོ་ཞོ་མར་ཐུད་སོགས་བཟའ་བཏུང་གི་རིགས་མང་དུ་རྙེད་འདུག་པས་རྟེན་འབྲེལ་ཧ་ཅང་ལེགས་གསུངས། དེར་ཉིན་ཤས་གནས་སྟོན་ཚོགས་ཀྱི་འཁོར་ལོའི་དགའ་སྟོན་ལ་ལོངས་སུ་སྤྱོད་པའི་སྐབས། ཚོགས་ཀྱི་ལྷག་མ་ཡང་རྒོད་ཐང་དཀར་བཞིས་ཁྱེར་བའི་ལོ་རྒྱུས་ངོ་མཚར་བ་བྱུང་། དེ་ནས་ལོ་དེ་གར་གཟིམ་ཁང་བཀོད་ལེགས་ཤིག་སྔར་གྱི་ཐབ་ཤུལ་མ་ནོར་བར་ཐབ་ཀ་ཁེལ་བ་བཅས་བསྐྲུན་པ་མ་ཟད། ཆོས་ར་དང་དེ་ནས་རིམ་གྱིས་འདུ་ཁང་དང་གྲྭ་འཁོར་རྣམས་སོ་སོས་ས་ཁང་དང་གད་ཕུག་སོགས་བཞུགས་གནས་འཛོམས་པར་བྱས་ཤིང་། ཟབ་གསང་ཆོས་ཀྱི་འཁོར་ལོ་རྒྱུན་མ་ཆད་པར་བསྐོར་བས་གདུལ་བྱ་ཕྲིན་ལས་དབྱར་མཚོ་ལྟར་འཕེལ་བ་བྱུང་ངོ་། བཞུགས་སྒར་བཏབ་པའི་རྗེས་སུ་ཡང་གཡུ་ཁོག་ཏུ་ཐེངས་འགའ་ཕེབས་པ་མ་ཟད་ཕྱིས་དཔོན་བླ་དགེ་འདུན་རྒྱ་མཚོས་གཡུ་ཁོག་ཏུ་ལུགས་གཉིས་སྐྱོང་སྐབས། དཔོན་བླས་ཁོང་མ་འདས་བར་དུ་གཡུ་ཁོག་དུ་བཞུགས་དགོས་པའི་བཀའ་བཞིན་བྱ་བྲལ་རིན་པོ་ཆེ་གཡུ་དགོན་དུ་ཡུན་རིང་ཙམ་བཞུགས་ནས་དཔོན་བླ་འདས་རྗེས་སླར་གསེར་ཡག་སྒང་རི་ཁྲོད་དུ་ཕྱིར་ཕེབས་ནས་སྐལ་བཟང་ལས་ཅན་གྱི་གདུལ་བྱའི་ཚོགས་ལ་ཟབ་གསང་ཆོས་ཀྱི་བདུད་རྩི་ངོམས་མེད་དུ་་བ་ཡིན་ནོ། །
ལྔ་པ་གཏེར་ཆེན་ལས་རབ་གླིང་པ་གསེར་ལྗོངས་སུ་ཆིབས་ཁ་བསྒྱུར་བའི་མཐུན་སྦྱོར་གནང་ཞིང་མཇལ་འཛོམས་ཀྱིས་ཟབ་ཆོས་ཀྱི་གདམས་པ་ནོད་པའི་སྐོར་ནི།
སྐབས་དེ་ཙམ་ན་གཏེར་ཆེན་ལས་རབ་གླིང་པའམ་ཉག་བླ་བསོད་རྒྱལ་རིན་པོ་ཆེ་ཉག་ཁོག་ཏུ་མི་བཞུགས་པར་ཨ་མདོ་རེབ་ཀོང་ཕྱོགས་སུ་ཕེབས་རྒྱུ་རེད་ཅེས་གསན་པས། ཁོང་གིས་དེ་མ་ཐག་གླ་རི་ཨོ་རྒྱན་ཚེ་བརྟན་སོགས་གསེར་སྨད་ཕྱོགས་ཀྱི་བླ་དཔོན་རྣམས་ལ་ཁྱེད་རྣམས་ཀྱིས་ཉག་བླ་བསོད་རྒྱལ་རིན་པོ་ཆེ་གསེར་རྟའི་ཕྱོགས་སུ་གདན་འདྲེན་ཞུ་ཐུབ་ན། མ་འོངས་པར་ས་ཕྱོགས་འདི་ཆོས་ཀྱི་གདུལ་ཞིང་ཆེན་པོ་ཞིག་ཏུ་འགྱུར་ངེས་པ་ཡིན། ཅེས་གསུངས་པས་དེ་འཕྲལ་བླ་དཔོན་རྣམས་ཉག་བླའི་མདུན་གདན་འདྲེན་དུ་འགྲོ་སྐབས། བླ་མ་ཉག་བླས་ཁོང་ལ་སྒར་བ་མང་བས་གསེར་རྟའི་ཕྱོགས་ནས་འཚོ་བ་སོགས་རྙེད་དཀའ་རྒྱུ་རེད་གསུངས་ཀྱང་། གཡུ་ཁོག་བླ་མའི་གསུང་བསྐུལ་དང་དེར་ཡོད་བླ་དཔོན་རྣམས་ཀྱི་རེ་ཞུ་ལ་བརྟེན། མཐར་ཁོང་གསེར་ཁོག་ཏུ་ཆིབ་བསྒྱུར་གནང་བར་ཞལ་གྱིས་བཞེས་ནས་གསེར་ཁོག་ཏུ་ཕེབས། བྱ་བྲལ་རིན་པོ་ཆེས་གདན་ཞུས་ཀྱིས་ཁོང་རྣམ་གཉིས་ཞལ་རས་མཉམ་འཛོམས་བྱུང་ཞིང་གཡུ་ཁོག་བླ་མས་ཁྱེད་ང་ལ་མན་ངག་སྒོ་སྐྱེལ་གྱི་ཚུལ་དུ་ཕེབས་པ་ངོ་མཚར་ཆེ་གསུངས་ནས་ཞབས་སྤྱི་བོར་བླངས་ཏེ་རིགས་ཀྱི་བདག་པོར་བསྟེན། གཏེར་སྟོན་རིན་པོ་ཆེ་རྒྱུན་དུ་དེ་ཕྱོགས་སུ་བཞུགས་པའི་བཀའ་གྲོས་མཛད་པ་སོགས་ཐུགས་ཡིད་གཅིག་འདྲེས་སུ་གྱུར། དེ་ནས་བླ་མ་ཉག་བླས་གསེར་སྨད་དུ་ཉག་སྒར་ཞེས་པ་གསར་འདེབས་མཛད་ཅིང་བྱ་བྲལ་རིན་པོ་ཆེས་བླ་མ་ཉག་བླ་ལ་ཁྱེད་སྦོ་མདའ་ཡར་མར་གྱི་ཁོང་གི་སྦྱིན་བདག་ལྷ་སྡེ་རྣམས་ཀྱི་དུད་ཁྱིམ་རེ་རེ་བཞིན་ཕེབས་གནང་མཛད་ནས་ཚེ་འགུག གཡང་འབོད། གསུར་རེ་བཅས་གསུང་རྒྱུ་བདག་གི་རེ་བ་ཡིན། སྦྱིན་བདག་ཚོས་འབྱོར་ཚོད་དང་བསྟུན་ནས་སོ་སོས་ཁྱེད་ལ་འབྲེལ་འཇོག་རེ་བྱེད་དགོས་པར་འདུག ངས་ཁྱེད་ལ་ཞབས་ཕྱི་བྱེད་ཆོག་ཅེས་དང་། སྦྱིན་བདག་རྣམས་ལ་ད་རེས་གསེར་གྱི་ཕ་བོང་སྒོ་འགྲིལ་ཡིན་པས་སོ་སོས་འབྱོར་ཚོད་དང་བསྟུན་པའི་འབྲེལ་འཇོག་རེ་བྱས་ན་འདི་ཕྱི་གཉིས་ཕན་ཡིན་གསུངས་ཤིང་། དེ་ནས་ཉག་བླ་རིན་པོ་ཆེ་ལ་གཡུ་ཁོག་བླ་མས་ཞབས་ཕྱི་བྱས་ནས་ཉེ་སྐོར་ཐམས་ཅད་ལ་ནས་བསོད་ཀྱི་ཚུལ་དུ་བྱོན་ཅིང་སྦྱིན་བདག་ཚོས་ཀྱང་སྣེ་ལེན་གཟབ་རྒྱས་བྱས། ཉིན་ཞིག་སྦྱིན་བདག་ཞིག་གི་ཁང་པའི་ཕྱི་ནས་ཡར་སུམ་ཐོག་ལ་སྐས་རིང་ཞིག་བརྒྱུད་ནས་ཉག་བླ་སྔོན་དང་གཡུ་ཁོག་བླ་མ་རྗེས་ནས་ཡར་ཕེབས་སྐབས། གཡུ་ཁོག་བླ་མས་ཞལ་མཚར་གྱི་ཚུལ་དུ། སྐས་རིང་འདི་ལ་་ཡུན་རེ་རིང་། །དཀོར་ལ་སྐྱོ་བ་སྐྱེ་བར་ཤོག །ཅེས་གསུངས་མ་ཐག་ཉག་བླས་ཡར་ཕེབས་མཚམས་བཞག་ནས་ཅི་འདྲའི་གདམས་ངག་ཟབ་མོ་ཞིག་རེད་གསུངས་འཕྲལ་ནས་བསོད་ཀྱི་འཕྲོ་བཞག་ནས་མ་ཕེབས་པར་གྲགས། སླར་གཡུ་ཁོག་བླ་མ་གྲྭ་འཁོར་བཅས་ཉག་སྒར་དུ་ཆེད་ཕེབས་ཀྱིས་ཡུན་རིང་བཞུགས་ནས། ཁོང་ལ་བླ་མ་ཉག་བླས་ཉིན་མོར་སྒྱུ་འཕྲུལ་སྤྱི་དོན་མཛོད་ཀྱི་ལྡེ་མིག་དང་། མཚན་མོར་གསང་སྙིང་སྤྱི་དོན་འོད་གསལ་སྙིང་པོ་གཉིས་རེས་མོས་སུ་ལྗགས་ཁྲིད་གནང་ཞིང་རྗེ་འདིའི་ཞལ་རྒྱུན་སོགས་ཟིན་བྲིས་གནང་བ་རྣམས་དེང་སང་མཇལ་དུ་ཡོད་པ་རྣམས་གསུང་འབུམ་དུ་བཀོད་པ་ལྟར་ལགས། གཞན་གསང་འགྲེལ་ཕྱོགས་བཅུ་མུན་སེལ་དང་། དགོངས་རྒྱན་ཞལ་ལུང་སོགས་སྒྱུ་འཕྲུལ་གྱི་བཤད་པ་རྒྱ་ཆེར་གསན་པ་དང་། རྫོགས་ཆེན་སེམས་ཕྱོགས་གཙོ་བོར་གྱུར་པའི་མན་ངག་དང་། ལྟ་ཁྲིད། ཐོད་རྒལ་སོགས་ཀྱི་བཤད་པ་བཅས་ཤིན་ཏུ་གསང་བའི་མན་ངག་རྣམས་གཅེས་ནོར་དུ་གདམས་པ་སོགས་ཀྱིས་མཚོན། སྨིན་གྲོལ་གྱི་རིགས་རྒྱ་ཆེར་གསན་ཏེ་ཐུགས་ཉམས་སུ་བཞེས་པ་སོགས་ཕན་ཚུན་ཐུགས་ཡིད་གཅིག་འདྲེས་ཀྱིས་བླ་མ་ཉག་བླས་གསེར་ལྗོངས་འཛིན་མའི་ཁྱོན་དེར་བསྟན་འགྲོའི་དོན་ཆེན་འགྱེད་པའི་ཐོག་མའི་རྟེན་འབྲེལ་ཡང་འགྲིགས་པ་ཡིན་ནོ། །
དྲུག་པ་གསེར་ཡག་སྒང་རི་ཁྲོད་དུ་སློབ་མ་བསྐྱངས་ཤིང་བསྟན་འགྲོའི་དོན་ཆེན་ཕྱོགས་མེད་དུ་རྒྱས་པའི་སྐོར་ནི།
དེ་ལྟ་བུའི་སྐྱབས་རྗེ་འགྲོ་བའི་མགོན་པོ་གང་གིས་གདན་ས་ཡག་སྒང་དུ་འཁོར་སློབ་རྣམས་ལ་ཆོས་སྦྱིན་མི་ཟད་པའི་ཕྲིན་ལས་ཀྱི་སྒོ་འཕར་ཡངས་པོར་ཕྱེས་ནས། གདུལ་བྱ་རྒྱ་མཚོ་ལྟ་བུ་སྨིན་གྲོལ་ལ་བཀོད་པའི་ཚུལ་ལས་བརྩམས་ཏེ་ཅུང་ཟད་བརྗོད་ན། དེ་ཡང་གསང་ཆེན་སྔ་འགྱུར་བའི་བསྟན་པ་རིན་པོ་ཆེ་ནུབ་རིའི་རྩེ་མོར་ཡིབ་ལ་ཉེ་བ་ཐུགས་ཀྱིས་མ་བཟོད་པར། སྙིང་པོའི་བསྟན་པ་ཁོ་ནས་རྒྱལ་བསྟན་གྱི་སྲོག་འཛིན་པར་ཐུགས་ལ་བཅངས་ཏེ། སྐུ་ཚེ་ཧྲིལ་པོར་སྒྲུབ་བརྒྱུད་ཀྱི་བསྟན་པ་ཉིད་ལྷུར་ལེན་པ་གཙོ་བོར་མཛད་དེ། སྤྱིར་སློབ་བུའི་ཁམས་དང་དབང་པོ་བསམ་པའི་བྱེ་བྲག་དང་བསྟུན་ནས་ཁྲིད་གསུང་པ་ཁོ་ན་གཙོ་བོ་མཛད་པས། ངོ་སྤྲོད་གདབ་ཚུལ་སོགས་ཁྲིད་ཁ་འཇོག་སྟངས་མཐའ་གཅིག་ཏུ་མ་ངེས་ཀྱང་། དང་པོའི་ལས་ཅན་ཆོས་སྒོར་གསར་དུ་ཞུགས་པའི་རིགས་ལ་སེམས་ཉིད་ངལ་གསོ་དང་ཀུན་བཟང་བླ་མའི་ཞལ་ལུང་སོགས་ཀློང་སྙིང་སྔོན་འགྲོའི་དམིགས་ཁྲིད་ལྟར་ཕྱག་བཞེས་མ་ཉམས་པར་མཛད་དེ། དེ་ཡང་དལ་འབྱོར་རྙེད་དཀའ་ནས་བཤེས་གཉེན་བསྟེན་པའི་བར་ཐུན་མོང་ཕྱི་ཡི་སྔོན་འགྲོའི་ཁྲིད་རྐང་དྲུག་པོ་རེ་རེ་བཞིན་ཉམས་ཁྲིད་ཞིབ་པར་གནང་སྟེ། བློ་ལྡོག་རྣམ་བཞི་རྒྱུད་ལ་མ་སྐྱེས་ཀྱི་བར་སྒོམས་སུ་འཇུག དེའི་རྗེས་སུ་སྐྱབས་སེམས་ནས་བླ་རྣམ་བར་ནང་གི་ཁྲིད་རྐང་རེ་རེ་བཞིན་ཁྲིད་ཅིང་། འབུམ་ལྔའི་བསགས་སྦྱང་ཀྱང་གནད་དུ་ཁེལ་ངེས་གསོག་ཏུ་འཇུག་ཅིང་བླ་རྣམ་སྐབས་སིདྡྷི་བྱེ་བ་ས་ཡ་སོགས་གྲངས་མང་འཁྱོལ་དུ་འཇུག དེ་ནས་རིམ་གྱིས་དངོས་གཞི་རྣམས་རྟགས་དང་སྦྱར་ཏེ་བྱུང་གནས་འགྲོ་གསུམ་གྱིས་གཞི་བཟུང་ནས། བཞག་ཐབས། ཤན་འབྱེད། ངོ་སྤྲོད། གེགས་སེལ་བོགས་འདོན་བཅས་རྫོགས་པ་ཆེན་པོའི་ལྟ་སྒོམ་སྤྱོད་འབྲས་ཀྱི་རྣམ་བཞག་གདན་ཐོག་གཅིག་ཏུ་ཉམས་སུ་བླངས་ནས། མཐར་ཐུག་ཟུང་འཇུག་གི་གོ་འཕང་མངོན་དུ་བྱེད་པའི་བར་ལམ་གྱི་རིམ་པ་ཚང་ལ་མ་ནོར་བར་འཇུག་རིམ་ལྟར་ཁྲིགས་ཆགས་སུ་ཉམས་ཁྲིད་དུ་གདམས་པ་དེ་ནི་གང་ཟག་སྣང་བ་ཡུལ་གྱི་བློ་ཅན་ནམ་རིམ་གྱིས་པ་རྣམས་སྐྱོང་ཚུལ་ཡིན་ཅིང་། ཡང་གང་ཟག་ཅིག་ཆར་བའི་རིགས་རིག་པ་རང་སྣང་གི་བློ་ཅན་རྣམས་ལ་ཐོག་མ་ནས་འོད་གསལ་བའི་ཡེ་ཤེས་རྗེན་པར་ངོ་སྤྲད་དེ། ལོ་དང་ཟླ་བ་ཙམ་གྱིས་རྟོགས་པ་མངོན་དུ་བྱས་པའང་དུ་མ་ཡོད། གཞན་སློབ་མའི་ཐུགས་རྒྱུད་དང་བསྟུན་ནས་མཁྱེན་རབ་ཀྱི་རྩལ་དང་ལྡན་པའི་རིགས་རྣམས་ལ་སྒྱུ་འཕྲུལ་གསང་བ་སྙིང་པོ་རྩ་འགྲེལ། ཀློང་ཆེན་མཛོད་བདུན། བླ་མ་ཡང་ཏིག རྫོགས་ཆེན་དགོངས་པ་ཟངས་ཐལ། ལྕེ་བཙུན་སྙིང་ཐིག ཁྲིད་ཡིག་ཡེ་ཤེས་བླ་མ། གཉུག་སེམས་སྐོར་གསུམ། ངལ་གསོ་སྐོར་གསུམ། ངེས་ཤེས་སྒྲོན་མེ་སོགས་བླ་མེད་ཀྱི་རྒྱུད་སྡེ་དང་མདོ་ཕྱོགས་དབུ་ཕར་སོགས་ཀྱི་བཤད་པའང་མཛད་པས་མཁས་གྲུབ་གཉིས་ལྡན་གྱི་གསུང་ལས་སྐྱེས་པའི་དངོས་སློབ་མཐའ་ཡས་པ་བྱུང་ངོ་། དེ་ལྟར་དགུང་གྲངས་གཞོན་སྐབས་རྗེ་ཉིད་ཀྱིས་གང་ལ་གང་འདུལ་གྱི་ཟབ་ཆོས་སྐུ་ངལ་འཛེམ་མེད་ཀྱི་ཚུལ་དུ་ཁྲིད་གནང་ཞིང་། སྐུ་ན་སྨིན་སྐབས་སུ་ཐུན་མོང་སྔོན་འགྲོ་དང་སྐྱབས་སེམས་སོགས་ཕལ་ཆེར་དེར་བཞུགས་སློབ་མའི་མཆོག་གྱུར་མཁན་པོ་ཆོས་གསལ་དང་། འཇང་སྒང་དབོན་པོ་སོགས་ལ་གསུང་དུ་འཇུག་ཅིང་སྨིན་ཁྲིད་རྣམས་རྗེ་ཉིད་ཀྱིས་མཛད། གང་ལྟར་གསར་དུ་སླེབ་པ་རྣམས་ལ་སྔོན་འགྲོའི་བློ་སྦྱངས་དང་སྐྱབས་སེམས་སོགས་ཉི་མ་རེ་རེ་བཞིན་ཁྲིད་དུ་འཇུག་ཅིང་རྒྱུད་ངེས་འབྱུང་དང་བྱང་ཆུབ་སེམས་ཀྱིས་སྨིན་ངེས་སུ་མཛད་པ་ལས། དང་པོ་ནས་དངོས་གཞིའི་ཁྲིད་རྣམས་གང་བྱུང་དུ་ཁྲིད་སྲོལ་གཏན་ནས་མེད་པར་མ་ཟད། རྗེ་ཉིད་ཀྱིས་དངོས་གཞིའི་སྨིན་ཁྲིད་རྣམས་སྩོལ་བའི་སྐབས་ཀྱང་། སློབ་བུ་ལྔ་ཡན་ལ་མཉམ་དུ་ཁྲིད་སྲོལ་མེད་ཅིང་དེ་ཡང་ངོ་སྤྲོད་དངོས་ནི་ཁེར་ཁྲིད་ཁོ་ནས་ངོ་སྤྲོད་ཐེབས་ངེས་སུ་མཛད་པས་རྗེ་འདིའི་དངོས་སློབ་ཡིན་ཕྱིན་འཁོར་བ་ལ་གཏིང་ནས་བློ་ལོག་ཅིང་སྐུ་ཚེ་དབེན་རིར་བསྐྱལ་ཏེ་ཉམས་ལེན་མཐའ་རུ་ཕྱིན་པ། ལྷག་པར་དུས་འགྱུར་མུན་ནག་གིས་བརྫི་བར་མ་ནུས་པས་ཚེ་དང་སྒྲུབ་པ་མཉམ་པ་གཅིག་ལས་གཅིག་གིས་བཟང་བ་ལྟ་བུ་ཤ་སྟག་བྱུང་བས། ཕལ་ཆེར་ཚེ་འདིར་གྲོལ་རྟགས་མངོན་དུ་གྱུར་བའམ་འཆི་ཁ་ཚུན་ལ་ལམ་སྣ་མ་ཟིན་པ་གཅིག་ཀྱང་མེད་པ་ལྟ་བུ་བྱུང་བ་ན། རྗེ་འདིའི་བྱིན་རླབས་དང་སློབ་མ་སྐྱོང་བའི་ཐུན་མིན་གྱི་ཁྱད་ཆོས་ཤིག་ཏུ་ངེས་སོ། །ཞེས་དེང་སང་ཀུན་གྱིས་དད་འདུན་གྱི་བསྔགས་བརྗོད་ཀྱི་མེ་ཏོག་འཐོར་བཞིན་པ་འདིའོ། །གཞན་ཡང་བདག་ཉིད་ཆེན་པོ་འདི་ནི་གདུལ་བྱ་སྐྱོང་བའི་ཐབས་ལ་མཁས་པའི་ཚད་དུ་གླེང་བ་སྟེ། ཆོས་ལ་མ་འདྲེས་པའམ། ཡང་ན་ཆོས་ལ་དོན་གཉེར་མེད་པ་དག་ལ་དངོས་རྫས་ཕྲན་ཙམ་རེ་གནང་བའམ། གནའ་དཔེ་དང་གཏམ་རྒྱུད་གླེང་བ་སོགས་སྙན་པར་སྨྲ་བ་ཁོ་ནས་སྣང་བ་ཆོས་ཀྱི་ཕྱོགས་སུ་རིམ་གྱིས་ཁ་དྲངས་བར་མཛད་ཅིང་། ཐ་ན་བྱིས་པ་ཆུང་ངུ་དག་ལའང་ཞལ་རྩེད་དང་མངར་ཆས་ཀྱི་རིགས་སོགས་གནང་སྟེ། བློ་སྣང་དབང་མེད་དུ་འབྲིད་མཁས་པ་དང་། མི་ཆེན་དང་བླ་ཆེན་གྱི་རིགས་སམ་ཡང་ན་ང་རྒྱལ་དང་ཁེངས་སེམས་ཆེ་བའི་རིགས་ལ་མཚང་ནས་སྒོལ་ཏེ་དྲག་པོའི་བཀའ་བཀྱོན་ཀྱིས་ཚར་བཅད། དབུལ་ཕོངས་ཉམས་ཆུང་གི་རིགས་ལ་ཆོས་བསྒྲུབ་པའི་མཐུན་རྐྱེན་སྦྱར་བ་སོགས་གྱིས་རྒྱུན་དུ་བརྩེ་བས་བསྐྱངས། མི་དབང་ས་སྐྱོང་གི་རིགས་ལ་རྒྱལ་ཁྲིམས་ཆོས་དང་མི་འགལ་བར་ཆབ་སྲིད་བདེ་སྐྱིད་ཀྱི་དཔལ་ལ་བཀོད་པ་སོགས་ཐབས་ལ་མཁས་པའི་གཞན་དོན་གྱི་མཛད་པ་ཁོ་ན་ལས་རང་ཆེ་ཐབས་འབའ་ཞིག་དང་། གྲགས་པ་དོན་དུ་གཉེར་ཞིང་ལོག་འཚོའི་དཀོར་མང་སྡུད་པའི་གཡོ་ཐབས་དང་། གཞན་མཐོ་ལ་ཕྲག་དོག་གིས་ཟུར་ཟ་ཞིང་མི་སྙན་པར་གླེང་བ་དང་། མཉམ་པར་འགྲན་གྱིས་དོགས་ནས་ཐབས་སྣ་ཚོགས་ཀྱིས་ཚར་བཅད་དེ་འབངས་སུ་བཀོལ་བ་སོགས་རང་དོན་ཕུགས་བཅུག་གཞན་ཕན་ཁ་རུ་འདོན་པའི་ཆོས་བརྒྱད་ཀྱི་མངོན་ཞེན་ཕྲ་མོས་ཀྱང་། སྐུ་ཚེ་ཧྲིལ་པོར་གོས་པ་མེད་པར་སྔོན་བྱོན་རྒྱལ་བ་གོང་མའི་མཛད་པ་དང་རྗེས་སུ་མཐུན་པར་བསྡུ་བ་རྣམ་པ་བཞི་དང་། ལས་བཞིའི་ཕྲིན་ལས་ལྷུན་གྲུབ་ལ་མངའ་དབང་འབྱོར་བ་ཡིན། དེ་བཞིན་རྒྱུན་དུ་སྐུ་མདུན་ནས་འགྲིག་འདེད་རྒྱུ་དང་། གླིང་སྒྲུང་བཤད་དུ་འཇུག་པ་སོགས་ཀྱང་དུས་ཀྱི་གཡོ་འཁྲུག་བཟློག་པའི་ཐབས་མཁས་ཡིན་པར་གསུངས་པ་སོགས། རྟག་ཏུ་གཞན་ཕན་གྱི་ཕྲིན་ལས་རླབས་པོ་ཆེ་གདུལ་བྱ་ཡོངས་ལ་སྙོམས་པར་འཇུག་པས་ཆེས་ངོ་མཚར་རྨད་དུ་གྱུར་པའི་མཛད་པ་ལ། ལྷར་བཅས་འཇིག་རྟེན་ཀུན་གྱིས་བསྟོད་དབྱངས་མགྲིན་གཅིག་ཏུ་སྒྲོགས་པ་ལགས་སོ། །ཁོང་ནི་རྟོགས་པ་ནམ་མཁའ་དང་མཉམ་པས་བྱ་བྲལ་གྱི་མཚན་དོན་དང་མཐུན་པ་སྟེ། བསྙུང་གནས་བླ་མ་རིན་ཆེན་དར་རྒྱས་ཀྱིས་ཁོང་ལ། ཁྱེད་ལ་ཕྱི་ན་ཁ་ཞོས་མཛོ་མོ་མང་། ནང་ན་རྒྱུ་རྫས་དང་ཐ་ན་མེ་ཤིང་ཡན་ཆད་འདི་འདྲ་མང་བས་ཅིའི་ཕྱིར་ན་བྱ་བྲལ་བ་ཟེར་ཞེས་ཞུས་ཚེ། ཁོང་གིས་ཁྱེད་ཀྱིས་ནོར་བ་རེད། རྒྱུ་མེད་ན་སྤྲང་པོ་ཟེར། བྱ་བྲལ་ཟེར་བ་ནི་ནང་རིག་པའི་ཡེ་ཤེས་ལ་གཟུང་འཛིན་གྱི་བྱ་བ་བྲལ་དགོས་པ་ཡིན། གཞན་བྱ་བྲལ་མཁྱེན་བརྩེའི་དབང་པོ་ཅི་ལ་ཟེར་ཞེས་དོན་གྱི་བྱ་བྲལ་དུ་ཞལ་གྱིས་བཞེས། དེ་བཞིན་རྗེ་འདིི་ཐོས་བསམ་སྒོམ་གསུམ་ཡ་མ་བྲལ་བ་ལ་ཐུགས་དགྱེས་ཤིང་། ཁྱད་པར་འཇམ་མགོན་མི་ཕམ་རིན་པོ་ཆེའི་གཞུང་ལ་ཐུགས་རྩིས་ཧ་ཅང་ཆེ་བར་གནང་བ་སྟེ། སྔར་ཨ་འཛོམ་རིན་པོ་ཆེའི་སྐུ་མདུན་བཞུགས་དུས། འཇམ་མགོན་བླ་མ་མི་ཕམ་རིན་པོ་ཆེ་ཞལ་བཞུགས་སྐབས་ཡིན་སྟབས། བྱ་བྲལ་རིན་པོ་ཆེ་ཁོང་དེར་ཞལ་མཇལ་དང་གསུང་ཆོས་ཞུ་རུ་ཕེབས་འདོད་ཧ་ཅང་ཆེ་བས་བླ་མ་ལ་གནང་བ་ཞུས་ཀྱང་། འབྲུག་པ་རིན་པོ་ཆེས་ངས་ཁྱེད་ལ་བཤད་པ་དེ་ཚོས་ཁྱོད་ཀྱིས་རང་གཞན་གཉིས་ཀྱི་དོན་འགྲུབ་ངེས་པས་དེ་དག་ཉམས་སུ་ལོངས་ཞེས་ཕེབས་པར་མ་གནང་། ཡང་ཁྱོད་ཀྱི་སྐུ་སྔོན་མ་རྡོ་བླ་འཇིགས་སྐལ་ཡང་ཧ་ཅང་མཁས་པས་རྒྱ་ནག་ཏུ་གདན་དྲངས་སྐབས་ཐབས་མ་མཁས་པས་ཁྲིམས་སུ་ཚུད། དེ་བས་ཁྱེད་རང་ལ་ཡང་ཀེག་ཆེ་སྟབས་སྦྱངས་པ་དེ་ཙམ་གྱིས་ཆོག་གསུངས་ནས་མ་གནང་བ་རེད་ཅེས་ཀྱང་ཐོས། གང་ལྟར་འཇམ་མགོན་བླ་མ་སྐུ་དངོས་སུ་མ་མཇལ་ཡང་། ཕྱིས་སུ་ཡེ་ཤེས་ཀྱི་སྐུས་རྗེས་སུ་བཟུང་བར་ངེས་ཏེ། བོད་སྤྲུལ་རིན་པོ་ཆེ་དང་མཉམ་དུ་གཞུང་གི་བགྲོ་གླེང་གནང་སྐབས་ཁོང་གིས་འཇམ་མགོན་བླ་མའི་གསུང་གི་གནད་གསང་མང་པོ་ཞལ་འཕྲོས་སུ་གནང་བས་མི་ཕམ་རིན་པོ་ཆེས་བྱིན་གྱིས་བརླབས་པའི་ཐུགས་སྲས་ཡིན་ངེས་པའི་ཐུགས་ངེས་འཁྲུངས་ཞེས་བོད་སྤྲུལ་མདོ་སྔགས་བསྟན་པའི་ཉི་མས་རྒྱུན་དུ་གསུངས། ཡང་མགོ་ལོག་མཁན་པོ་འཇམ་དོན་ལ་བྱ་བྲལ་རིན་པོ་ཆེས་ཁྱོད་ཀྱིས་མི་ཕམ་ལ་རྒྱུན་དུ་གསོལ་བ་ཐོབ་གསུངས་པས་གསོལ་བ་རྩེ་གཅིག་ཏུ་བཏབ་ཚ། བླ་མ་རང་ཉིད་རེ་རྨིས་པས་ཁོང་རྣམ་གཉིས་ཐུགས་རྒྱུད་གཅིག་པ་འདྲ་ཞེས་མཁན་པོ་འཇམ་དོན་གསུངས། དེ་བཞིན་མི་ཕམ་རིན་པ་ོཆེའི་གསུང་ལ་ཐུགས་གཙིག་ཧ་ཅང་ཆེ་བར་གནང་སྟ། ཁོང་གིས་མཁན་པོ་ཆོས་གསལ་ལ། ཁྱོད་ཀྱིས་ཀློང་ཆེན་ཀློང་ཆེན་གསུངས་ཀྱང་ཀློང་ཆེན་པའི་གསུང་གི་ལྡེ་མིག་ལྟ་བུ་མི་ཕམ་རིན་པོ་ཆེའི་གསུང་ཡིན་པས་དེ་ལ་ལྟོས་ཞེས་གསུངས་ཤིང་། སྐུ་དངོས་ཀྱིས་རྒྱུན་དུ་ངེས་སྒྲོན་དང་། གསང་སྙིང་སྤྱི་དོན། གཉུག་སེམས་སོགས་ལྗགས་ཁྲིད་གནང་བ་མ་ཟད། ཕྱིས་སུ་ཆོས་སྒར་དུ་ལུང་རྒྱུན་སྤེལ་བའི་མཐུན་རྐྱེན་ཡང་གནང་། དེ་ལྟར་རྗེ་འདི་ཉིད་མདོ་སྔགས་ཀྱི་གཞུང་ལ་ཐུགས་བྱང་ཆུབ་པ་མ་ཟད་ཐུན་མོང་གསོ་རིག་གི་གཞུང་དང་ལག་ལེན་ལའང་བྱང་ཆུབ་པས་རྒྱུན་དུ་གསོ་བ་རིག་པའི་སྐོར་གྱི་ལག་ལེན་དང་གཞུང་ཁྲིད་གནང་བར་བརྟེན། ཁོང་གི་སློབ་མ་ཕལ་ཆེར་གྱིས་སྨན་གྱི་ལག་ལེན་ཤེས་པ་མ་ཟད། མདུན་འདུག་པ་གཡུ་ཁོག་བླ་མ་འགྱུར་མེད་རྡོ་རྗེ་སོགས་སྨན་པ་མཁས་པ་ཡང་མང་དུ་བྱུང་། དེ་ལྟར་རྗེ་འདི་མཁས་ཤིང་གྲུབ་པ་བརྙེས་པའི་མཚན་སྙན་གྱིས་ཕྱོགས་ཀུན་ཁྱབ་པས། སྐབས་དེར་གངས་ལྗོངས་མདོ་སྨད་ཀྱི་ཨ་མདོ་མགོ་ལོག་ཚུན་ཆད་ནས་སྨད་མི་ཉག་རྒྱ་རོང་ཡན་ཆད་ཀྱི་བླ་སྤྲུལ་སྐྱེས་ཆེན་དུ་མ་དང་། དཔོན་རིགས་མི་དྲག་མང་པོ། དེ་བཞིན་ལས་ཅན་གྱི་གདུལ་བྱའི་ཚོགས་གྲངས་མེད་པ་ཞལ་རས་མཇལ་བ་དང་ཟབ་ཆོས་ཞུ་རུ་ལྷགས། སྐབས་དེར་ཁོང་གི་འཁོར་སློབ་ལ་བསླབ་པ་སྦྱིན་པའི་མཁན་པོ། རྒྱུད་སྡེ་འཆད་པའི་མཁས་པ། མཚན་ཉིད་སྟོན་པའི་དགེ་བཤེས་སོགས་མང་དུ་བཞུགས་པ་ལས། རྒྱུན་དུ་ཆོས་སྒར་དེར་བཟོ་གསོ་བ། སྒྲ་ཚད་མ། ནང་དོན་སྡེ་སྣོད་རིན་པོ་ཆེ་གསུམ་གྱི་བཤད་པ་དང་། གཞན་སྐར་རྩིས། བརྡ་སྤྲོད་རིག་པ། ཡི་གེ་བྲིས་གཟུགས་ཡན་ཆད་ཡོན་ཏན་གང་སློབ་པར་འདོད་ཀྱང་རིན་ཆེན་གསེར་གླིང་དུ་ཕྱིན་པ་ལྟར་འདོད་པའི་རེ་བ་ཡིད་བཞིན་དུ་འཇོ་བར་བྱེད་ཅིང་། སྔོན་རྗེས་སུ་མཁས་མང་རྒྱ་མཚོ་ལྟ་བུའི་འབྱུང་གནས་སུ་ཡང་གྱུར་ཏོ། གཞན་ཡང་དེར་ཡོད་འདུས་སྡེ་ཡོངས་ཀྱིས་ཕྱི་སོ་ཐར་གྱི་བསླབ་པས་ཐུགས་རྒྱུད་ལེགས་པར་བསྡམས་ཏེ། འདུལ་བ་གཞི་གསུམ་གྱི་ལག་ལེན་ཕྲ་ཞིབ་ཕྱག་བཞེས་སུ་བསྟར་ཞིང་། ཡར་མར་གྱི་གསོ་སྦྱོང་རྒྱུན་དུ་མཛད་པ་སོགས་ཕྱིི་ལྟར་སྤྱོད་པ་དམ་ཆོས་འདུལ་བ་དང་སྒོ་བསྟུན་པར་བྱེད་པ་དང་། ནང་གསང་སྔགས་ཀྱི་ལྟ་སྒོམ་ཟབ་མོ་ཐུགས་ཉམས་སུ་བཞེས་ཏེ་རིམ་གཉིས་ཀྱི་རྣལ་འབྱོར་ལ་བརྩོན་ཅིང་། ཟླ་བ་བྱུང་ངོ་ཅོག་གི་ཡར་མར་གྱི་ཚེས་བཅུ་ལ་ཚོགས་མཆོད་རྒྱུན་མི་ཆད་པར་འབུལ་བ་དང་། ཁྱད་པར་གསང་བ་རྫོགས་ཆེན་གྱི་དངོས་གཞིའི་ཉམས་ལེན་ཟབ་མོ་ཆུ་བོའི་རྒྱུན་གྱི་ཏིང་ངེ་འཛིན་ལ་བསླབ་པས། མཉམ་བཞག་གི་རྩི་དང་མི་འབྲལ་བར་རྡོ་རྗེ་གསུམ་གྱི་རང་བཞིན་དུ་བལྟས་ཏེ་བསོད་ནམས་ཀྱི་ཚོགས་སྡུད་པར་བྱེད་པ་སོགས། སྔ་འགྱུར་མཁས་གྲུབ་གོང་མའི་མཛད་པའི་སྲོལ་རྒྱུན་ཇི་བཞིན་ཕྱག་ལེན་དུ་འདེབས་པ་ཉིད་རྗེ་འདིའི་ཆོས་སྒར་གྱི་ཁྱད་པར་གྱི་ཕྱག་བཞེས་སུ་མངོན་ཞིང་། སྐབས་དང་སྐབས་སུ་གཞན་ཕན་གྱི་ཕྲིན་ལས་སྤེལ་བ་སོགས་ཆོས་མཐུན་གྱི་མཛད་པ་བཟང་པོའི་ངང་ཚུལ་ལས་ནམ་ཡང་འདའ་བར་མི་བྱེད་པ་སོགས་ཀྱིས་སྐྱེ་བོ་གྲངས་མེད་པ་དད་པའི་ཞིང་ས་ལ་བཀོད་པར་མཛད་དོ། །
བདུན་པ་སྣང་བར་རང་དབང་འབྱོར་བའི་གྲུབ་རྟགས་དང་། དུས་གསུམ་ས་ལེར་གཟིགས་པའི་མངོན་ཤེས་ཐོགས་མེད་མངའ་ཚུལ་གྱི་སྐོར་ནི།
སློབ་མ་རྣམས་ལ་ཁྱད་པར་རྗེ་འདི་ལ་དུས་གསུམ་ས་ལེར་གཟིགས་པའི་མངོན་ཤེས་ཐོགས་མེད་མངའ་བས་གང་གསུང་ཐམས་ཅད་ཕྱིས་སུ་ལུང་བསྟན་པ་ལྟར་གྱུར་ཚུལ་དང་། གཞན་ཡང་གྲུབ་པའི་རྟགས་ཡ་མཚན་ཅན་མང་པོ་དད་པ་དང་དག་སྣང་སྦྱང་བ་ཙམ་ཁོ་ན་མ་ཡིན་པར་ཀུན་ལ་མཐུན་སྣང་དུ་གྲུབ་ཚུལ་སྐོར་གྱི་གསུང་རྒྱུན་ཧ་ཅང་མང་མོད་འདིར་དཔེར་མཚོན་ཙམ་བཀོད་ན། དེ་ཡང་བོད་སྤྲུལ་རིན་པོ་ཆེ་ཁོང་གི་སྐུ་མདུན་ཕེབས་སྐབས། རྗེ་འདིས་དེ་རིང་གང་ཟག་ཁྱད་པར་བ་ཞིག་ཕེབས་ངེས་པས་བསུ་བ་དགོས་ཞེས་བོད་སྤྲུལ་ཕེབས་པ་སྔོན་ནས་མཁྱེན་པར་མ་ཟད། ཞལ་མཇལ་སྐབས་ཀྱང་ཁོང་ལ་རྡོ་བླ་འཇིགས་སྐལ་གྱི་བག་ཆགས་མང འ་ཚུལ་དང་། ཁྱེད་དཔལ་སྤྲུལ་གྱི་ཡང་སྤྲུལ་ཡིན་ཚུལ་སོགས་སྔོན་གནས་རྗེས་དྲན་གྱི་ཚུལ་དུ་གསུངས་ཤིང་གདམས་ཟབ་ཀྱི་སྒྲོ་འདོགས་བཅད་པ་སོགས་སྐྱེ་བའི་ཕྲེང་བ་ཀུན་ཏུ་བླ་སློབ་ཏུ་གྱུར། དེ་བཞིན་སྐྱབས་རྗེ་རྡོ་གྲུབ་བསྟན་པའི་ཉི་མའི་ཡང་སྤྲུལ་ངོས་འཛིན་སྐབས། གྲུབ་ཆེན་པས་རྫོགས་སྤྲུལ་ལྔ་པར་བརྟགས་ཞུས་ཕུལ་བས་ཁོང་གིས་རྡོ་ཁོག་མན་གསེར་ཁོག་ཡན་གྱི་བྱིས་པ་ཡོས་ལོ་བ་རྣམས་ཀྱི་མིང་ཡིག་བསྡུས་ནས་ཁྱེར་ཤོག་གསུངས། གྲུབ་ཆེན་དགོན་གྱི་གྲྭ་འཁོར་ཁ་ཤས་ཀྱིས་གསེར་ཁོག་ནས་མིང་ཡིག་བསྡུ་སྐབས་ཁོང་གི་སྐུ་མདུན་དུ་བཅར་ནས་ལོ་རྒྱུས་ཞུས་པར། བྱ་བྲལ་རིན་པོ་ཆེའི་ཞལ་ནས། ཁོང་གིས་གཟིགས་སྣང་ལ་རིགས་ལྔ་ཞིག་གི་རིགས་གསུམ་ཁ་ཕྱིར་བསྟན་ཅིང་གཉིས་ནང་དུ་འཁོར་བ་གཟིགས་པས་སྐུ་གསུང་ཐུགས་ཡོན་ཏན་ཕྲིན་ལས་ཀྱི་སྤྲུལ་པ་ལྔ་ལས་གཉིས་ཞིང་ཁམས་སུ་བཞུགས་པ་དང་། གསུམ་མི་ཡུལ་དུ་འཁྲུངས་ངེས་པ་འདྲ་བས། ད་ལྟའི་མཆོག་སྤྲུལ་བྱིས་པ་དེའི་མཚན་ཡང་ངེས་པར་དུ་རྫོགས་ཆེན་རིན་པོ་ཆེ་ལ་ཕུལ་དགོས་ཞེས་བཀའ་མངགས་ནན་ཆེར་གནང་བ་ཕྱིས་སུ་རྫོགས་སྤྲུལ་རིན་པོ་ཆེས་ཆགས་ཐོགས་མེད་པའི་མངོན་མཁྱེན་གྱིས་དེ་ཉིད་ཡང་སྤྲུལ་དུ་ངོས་བཟུང་བས་རྗེ་འདིས་སྔར་ནས་དོན་གྱིས་ངོས་འཛིན་གནང་བ་ཡིན་ནོ། །ཡང་གཏེར་ཆེན་ལས་རབ་གླིང་པ་གསེར་ཁོག་ཏུ་ཆིབས་ཁ་བསྒྱུར་རྒྱུའི་ཐུགས་གྲོས་འདོན་སྐབས་ཀྱང་། ཁོང་ས་ཕྱོགས་འདིར་ཕེབས་ཐུབ་ན་སྐུ་ཚེ་འདི་དང་། ཁྱད་པར་སྐུ་རབས་རྗེས་མར་ས་ཕྱོགས་འདི་ནས་བསྟན་འགྲོའི་དོན་ཤིན་ཏུ་རྒྱ་ཆེན་པོ་འགྲུབ་ཚུལ་ནན་གྱིས་གསུངས་པ་མ་ཟད། མཁན་ཆེན་འཇིགས་མེད་ཕུན་ཚོགས་དང་པོ་ཁོང་གི་སྐུ་མདུན་མཇལ་དུ་ཕེབས་སྐབས་ཀྱང་ཐུགས་དགྱེས་པའི་གསུང་གླེང་མཛད་ཅིང་། རྗེས་སུ་མཁན་པོ་ཆོས་གསལ་གྱིས་ཁོང་བླ་མ་ཉག་བླའི་སྤྲུལ་སྐུ་ཡིན་ནམ་ཞུས་ཚེ། དེ་ཡང་ལོས་ཡིན་ཏེ་གང་ལྟར་ཁོང་སྐྱེས་བུ་དམ་པ་ཕྲིན་ལས་ཀྱི་སྒོ་བསམ་གྱིས་མི་ཁྱབ་པ་ཅན་ཞིག་རེད་ཅེས་མཁན་པོ་ཆོས་གསལ་ལ་ཡང་ཡང་གསུངས་པ་མཁན་པོ་ཤེས་རབ་ཀྱི་ཞལ་ལས་ཐོས་པ་དེ་ལྟར་ན་ད་ལྟ་མངོན་དུ་གྱུར་བ་འདི་ག་ལགས། མཁན་ཆེན་བླ་མ་པདྨ་ཆོས་དབྱིངས་ཁྱབ་བརྡལ་ལ་ཡང་ཁྱོད་རྫ་ཆུ་ཁར་བོད་སྤྲུལ་མདུན་སོང་དང་། མ་འོངས་པར་སྔ་འགྱུར་བསྟན་པའི་སྲོག་ཤིང་ཞིག་ཏུ་འགྱུར་ངེས་ཞེས་གསུངས་པ་དུས་ཕྱིས་མངོན་དུ་གྱུར། །དེ་བཞིན་མཁན་ཆེན་བླ་མ་ཟླ་བའི་འོད་ཟེར་རིན་པོ་ཆེས་མ་རྒན་གྱི་མཚན་བྱང་ཁྱེར་ནས་རྗེ་འདིའི་སྐུ་མདུན་དུ་མཇལ་ཁ་ཞུ་རུ་ཕེབས་སྐབས་ཀྱང་། ཁྱོད་ཕ་ཡུལ་དུ་མ་འདུག་པར་རྫ་སྟོད་དུ་བོད་སྤྲུལ་རིན་པོ་ཆེའི་སྐུ་མདུན་སོང་དང་། མ་འོངས་པར་བསྟན་འགྲོའི་དོན་འགྲུབ་ངེས་ཞེས་གསུངས་པ་བཞིན་ཕེབས་ནས་ཕྱིས་འཕགས་བོད་ཀྱི་ཡུལ་ནས་ལུང་བསྟན་མངོན་དུ་གྱུར། ཡང་སྐོར་ཞིག་གསེར་ཡུལ་སྟོད་སྨད་ཀྱི་དགོན་ཁག་མང་པོའི་གྲྭ་བ་སྟོང་ལྷག་ལ་མཉམ་དུ་ཆོས་ཁྲིད་གནང་སྐབས་ཉིན་ཞིག ད་རེས་ངེད་ཅག་འདིར་མཉམ་འཛོམས་བྱུང་བ་ནི་ཤིན་ཏུ་སྐལ་བ་བཟང་། མ་འོངས་པར་དུས་ཚོད་ཀྱི་འཕོ་འགྱུར་མང་བས་འདི་ལྟར་མང་དུ་འཛོམ་རྒྱུ་ལྟ་ཅི། ཐ་ན་གྲྭ་བ་མིག་གིས་མཐོང་བ་ཡང་དཀའ་མོ་ཡིན། དེ་དུས་མི་རྣམས་ཀྱི་བཟང་ངན་སོགས་ཀྱང་འབྱེད་ངེས་པས་ཁྱེད་རྣམ་པས་རྒྱུན་དུ་རང་ཚུགས་འཛིན་རྒྱུ་གལ་ཆེ་ཚུལ་སོགས་འབྱུང་འགྱུར་སྔོན་དུ་གཟིགས་པའི་བསླབ་བྱ་མང་དུ་བསྩལ། རྒྱུན་དུ་ཡང་མདུན་འདུག་རྣམས་ལ་རྩམ་པ་ཆུང་དགོས་ཞེས་གསུངས་ན་ལོ་དེར་སད་སེར་འདྲ་ཡོང་ངེས་པ་དང་། སྒ་སྟན་ཚེམ་དགོས་ཞེས་དགོངས་པ་ཅན་གྱི་གསུང་ཡང་ཡང་བསྩལ་ན་དམག་ཇག་གི་འཁྲུགས་སློང་རེ་འོང་ངེས་པས་གསེར་པའི་ཡུལ་མི་རྣམས་ཀྱིས་ད་ལོ་བླ་མས་གང་གསུངས་ཞེས་འདྲི་ཞིང་དེ་འདྲ་མ་གསུངས་ཚེ་ཀུན་ཀྱང་བློ་བདེ་བར་འདུག་ཅེས་ཐོས། ཡང་འཁྲུངས་ཡུལ་དུ་དང་པོ་ཕེབས་སྐབས་ཆུ་དབར་ཁོག་ཏུ་རྒུ་ཁང་ལ་ཁ་ཞེས་པར་སྐུ་མཚམས་གནང་སྐབས་ཤིག་ལ། དེ་ནས་ཐག་ཅུང་རིང་པའི་མཚོ་སྐམ་ཞེས་པ་ནས་མི་ཞིག་ཤི་བ་མཁྱེན་ཏེ་རྒྱང་འཕོ་མཛད། ཕྱིར་ཉིན་གདན་འདྲེན་ཞུ་མི་ཁ་ཤས་སླེབ་སྐབས། ངས་མདང་སུམ་ནས་རྣམ་ཤེས་སྤར་ཚར་གསུངས་པས། དེར་རྒད་པོ་གླེན་པ་ཞིག་གིས། ཧོ་ཧོ་ཁྱོད་ཀྱི་དེ་མེ་མདའ་འདྲ་ནི་མ་རེད། རོ་ཡོད་སར་མ་སོང་ན་ཕན་ནམ་ཞུས་ཚེ། ཐུགས་ཅུང་ཟད་སྐྱོ་སྟེ་ཨ་ཁ་ཁ། སངས་རྒྱས་བྱང་སེམས་ཀྱི་ཉེ་རིང་མེད་པའི་ཐུགས་རྗེ་ལ་དུས་ངན་གྱི་རྫས་ངན་ཞིག་ལས་ཀྱང་ལྟ་སྟངས་ཆུང་བ་ལ་གསུངས། ཡང་ཕྱིས་ཞིག་དེར་བཞུགས་སྐབས་གློ་བུར་དུ་མདུན་འདུག་ལ་འགྲོ་གསུངས་ནས་ཉིན་མཚན་ལྟོས་མེད་ཀྱིས་ཕེབས་མཐར། སྦོ་མདར་སྦྱིན་བདག་ཕྲིན་ལས་དར་རྒྱས་ཀྱི་ཁྱིམ་དུ་ཕེབས་སྐབས་སྦྱིན་བདག་གྲོངས་མ་ཐག་རེད་འདུག་པས་ངོ་སྤྲོད་དང་འ ཕོ་བ་སོགས་གནང་ནས་ཁྱིམ་མི་རྣམས་ལ་སེམས་གསོ་གནང་། ཡང་མཁན་པོ་ཆོས་གསལ་གཡུ་ཁོག་ཏུ་ཕེབས་སྐབས་སྐུ་མདུན་ནས་གྱེས་ཕྱག་ཞུས་ཏེ་ཅུང་ཙམ་སོང་སྐབས། མདུན་འདུག་ལ་མགྱོགས་པོར་སོང་ལ་ལྟོས་དང་ཁོང་རྣམ་པར་དོན་དག་འདྲ་བྱུང་མ་སོང་ངམ་གསུངས། མདུན་འདུག་བལྟ་རུ་འགྲོ་སྐབས་གདན་ས་དང་ཐག་མི་རིང་བའི་ལ་རྒྱབ་ནས་ཁོང་ཚོའི་རྟ་དྲེལ་རྣམས་འདྲོག་ནས་ཆས་གོས་ཕལ་ཆེར་ས་ལ་གཡུག་པ་སོགས་བྱུང་འདུག་ཀྱང་མི་རྣམས་ལ་སྐྱོན་མེད་པ་མཐོང་། ཉིན་ཞིག་མདུན་འདུག་རྩང་བ་རིག་ཐོ་ལ་ཁྱོད་སྙིང་རྗེ། མ་འོངས་པར་ཁྱོད་གང་དུ་བསྡད་ན་མུ་གེས་མི་འཆི་ཙམ་འོང་། ཁྱོད་གསེར་ཆུ་སྔོན་མོའི་རྒྱུད་ནས་བསྡད་ན་ཁ་མི་སོས། ལི་གཙང་ཆུས་བཞིའི་ས་ནས་ཀྱང་ཁ་སོས་དཀའ། དེ་བས་གཡུ་ཁོག་ཏུ་བག་ཤད་སྐེད་ལ་དྲངས། རྡོ་རྟ་རུམ་དུ་བཅུག་ནས་སོང་ན་མུ་གེས་མི་འཆི་ཙམ་ཨེ་མི་འོང་། སྙིང་རེ་རྗེ་གསུངས་བྱུང་བ་སྐབས་དེར་རིག་ཐོའི་བསམ་པ་ལ། ཨ་ཁ། ང་ལ་བླ་མས་ཅི་འདྲའི་ལྟ་སྟངས་ཆུང་བ་ལ། ང་བན་དེ་རབ་བྱུང་ཞིག་ཐབས་ཅི་ཙམ་སྡུག་ཀྱང་ཐ་ན་ཡང་ཨ་མཆོད་རེ་བྱེད་ས་ལོན་ངེས་པས་པགས་པ་མཉེ་ཅི་ལ་དགོས་སོགས་བསམ་པ་བྱུང་ཡང་། ཕྱིས་དུས་འགྱུར་སྐབས་ལས་དབང་གིས་གཡུ་ཁོག་ཕྱོགས་སུ་སླེབས་ཤིང་མུ་གེའི་ལོ་ལ་དངོས་སུ་རྡོ་རྟ་རུམ་དུ་བཅུག བག་ཤད་སྐེད་ལ་དྲངས་ནས་འགྲོ་བའི་སྐབས་ཁེལ་བས་སྔར་གྱི་བླ་མའི་གསུང་རྣམས་དྲན་ནས་མཆི་མ་དབང་མེད་དུ་ཤོར་བྱུང་གསུངས། ཡང་གཡུ་ཁོག་པ་རང་བྱུང་མདུན་ན་ཡོད་སྐབས་ཁྱོད་ཀྱིས་མ་འོངས་པར་སྡུག་ཤིན་ཏུ་མྱོང་དགོས་པས་ད་ལྟ་ནས་སྦྱང་དགོས། ཁྱོད་ལ་མགོ་སྔས་འཇོག་དབང་མེད་ཅེས་གསུངས་ནས་དགོང་མོ་མགོ་སྔས་གཏན་ནས་འཇོག་མ་བཅུག གདན་ཡང་སྲབ་མོ་ལས་བཏིང་མ་བཅུག་པ་དེ་སྐབས་ཁོའི་སེམས་ལ་འབབ་པོ་མ་བྱུང་ཡང་། ཕྱིས་དུས་འགྱུར་སྐབས་དེ་བཞིན་མངོན་དུ་གྱུར་ནས་སྡུག་བསྔལ་མང་དུ་མྱང་། སྔས་གདན་གཏན་ནས་མེད་པས་སྔར་གྱི་བླ་མའི་གསུང་ལུང་བསྟན་མངོན་སུམ་དུ་གོ་ཞེས་བཤད། ཡང་ཆུང་ཡོས་ཀྱི་གྲྭ་བ་ཞིག་མཇལ་དུ་འོང་ནས་ཞལ་མཇལ་མ་ཐག་བླ་མས། ཁྱོད་ཤུལ་རྫུམ་བྱེད་མཁན་ལ་ཅི་འདྲ་མི་མཚར། ཞེས་ཡང་ཡང་གསུངས། དེ་དུས་ཅི་གསུང་པ་ཡིན་གོ་བ་མ་ལོན་ཡང་། དུས་འགྱུར་སྐབས་གྲྭ་བ་དེ་རི་ལ་བྲོས་ནས་འགྲོ་སྐབས། ཕྲུག་ཚ་རུ། གཡུ་བྱུར་སོགས་མདོར་ན་རྒྱུ་རྩ་ཆེན་མང་པོ་འཐོར་ཡོད་པ་མཐོང་ཡང་བླ་མའི་གསུང་དྲན་ནས་གཅིག་ཀྱང་མ་ཁྱེར་ཞེས་བཤད། ཡང་གྲྭ་བ་ཞིག་ལ་ཉིན་གཅིག་སྐུ་མདུན་དུ་ཤོག་གསུངས། སྐུ་མདུན་དུ་བཅར་བས་གསུང་བཟང་ངང་ཞོ་མང་དུ་བླུད་མཐར། ཞལ་ནས། དུས་མཐའ་འདིར་ཟོག་གི་རྨིག་ཀོང་ནང་ཉིན་བདུན་བརྒྱག་པའི་ཟས་ཡོད་ཟེར་སྲོལ་ཡོད་པ་དེ་ཙམ་མི་ཤེས་ཀྱང་། ཉིན་ཤས་བརྒྱག་ངེས་ཡོད་པས་ཁྱོད་ཀྱང་དུས་ཚོད་དེ་འདྲ་དང་འཕྲད་ངེས་ཞེས་གསུངས། ཕྱིས་དུས་འགྱུར་དང་མུ་གེ་བྱུང་སྐབས་ཤིག་ལ་གྲྭ་བ་དེ་ཉིན་ཤས་ཁ་ཟས་མ་རྙེད་པར་ཕྱི་རོལ་ཞིག་ཏུ་འགྱེལ་ནས་ཡོད་སྐབས། ཐག་ཉེ་ཞིག་ན་རྨིག་པ་ཞིག་འདུག་པ་དེ་ཉིད་ཚུར་བླངས་ནས་དེའི་ནང་ཟ་རྒྱུ་ཅུང་ཟད་འཚོལ་སྐབས་བླ་མའི་གསུང་དྲན་ནས་མིག་ཆུ་ཤོར་ཞེས་བཤད། ཡང་རྒྱ་ཁོག་གི་གྲྭ་བ་ཞིག་ལ་གལ་ཏེ་མ་འོངས་པར་ཁྱེད་ཀྱིས་མི་འདྲ་གསད་དགོས་བྱུང་ཚེ་སྔོན་ལ་སྡོམ་པ་འབུལ་དགོས་མ་གཏོགས་ཉེས་པ་དེ་བས་ལྕི། སྡོམ་པ་འབུལ་ཚུལ་འདི་ལྟར་ཡིན་སོགས་བསླབ་པ་ཕྱིས་སུ་གྲྭ་བ་དེ་དུས་འགྱུར་གྱི་རྐྱེན་ངན་ནང་དངོས་སུ་དོན་དེ་དང་འཕྲད་པའི་ལོ་རྒྱུས་ཀྱང་ཐོས། ཡང་སྟག་རིང་ངེས་ལེགས་ལ་འཆི་ཁ་ངེད་གཉིས་ཐུག་ངེས་ཞེས་གསུངས་པ། ཕྱིས་སུ་ངེས་ལེགས་འདའ་ཁར་མདང་སུམ་བླ་མ་མཇལ་ནས་ང་ལ་ཤོག་གསུངས་བྱུང་བས་ང་འགྲོ་རན་པ་འདྲ་ཞེས་གསུངས། ཕྱིར་ཉིན་འདས་ཞེས་ཐོས། ཡང་ཉིན་ཞིག་མདུན་འདུག་ལ་མར་མེའི་མེ་ཆེ་འདུག མེ་ལྕེའི་ནང་མེ་འདྲེ་ཡང་ཡོད་ལས་ཆེ་གཟབ་དགོས། ཞེས་སོགས་གསུངས་པ་ཕྱིར་ཉིན་ཉེ་འགྲམ་ནས་རི་མེ་ཤོར་བ་ལ་དགོངས་པ་འདྲ་ཞེས་ཐོས། དེ་བཞིན་གདན་ས་ཡག་སྒང་རི་ཁྲོད་དུ་ཉིན་ཞིག་སྐུ་འཁོར་ཁ་ཤས་བཅས་ཕྱི་རོལ་དུ་བཞུགས་སྐབས། གློ་བུར་དུ་འབྲུག་གྲགས། ཐོག་འཕངས། དེར་ཞབས་ཕྱི་རྣམས་ཀྱིས་ཉེ་སྐོར་ཞིག་ལ་ཐོག་འཕང་སོང་ཞེས་འཚབ་འཚུབ་ཀྱིས་ཕྱོགས་ཀུན་ཏུ་བལྟས་ནས་སླར་ཞིབ་ཏུ་ལྟ་སྐབས། བླ་མའི་ན་བཟའི་སྟེང་ཐོག་ཆུ་འཁྱིལ་འདུག་པ་མཐོང་བས་གཟོད་ཀུན་གྱིས་ཐོག་བླ་མས་བཞེས་པའི་ངོ་མཚར་ལ་དད་པ་ཐོབ། ཡང་ཉིན་ཞིག་ལྷ་རྩེ་ཆུའི་ཕྱར་རི་ཁྲོད་ནས་ཞབས་ཐང་དུ་སྔ་མོ་ནམ་ལངས་སྐབས་ཙམ་ལ་ཕེབས། གཡུའི་སྒེག་སྨད་དུ་ཕེབས་དུས་ཉི་ཤར་ཙམ་རེད་འདུག་ཅེས་ཞལ་འཕྲོས་སུ་གསུངས་པ་ཕལ་བའི་ཉིན་ལམ་ཁ་ཤས་ཡུད་ཙམ་གྱིས་བགྲོད་པའི་ངོ་མཚར་ཡང་བྱུང་། ཡང་ལྷ་རྩེ་རུ་བཞུགས་སྐབས་ཆུའི་ཕྱར་རི་ཁྲོད་ནས་བྲག་གཡང་གཟར་མཐོན་པོ་ཞིག་ནས་ལྷུང་ཚེ། ཁོང་གི་ཐུགས་ལ་ནམ་མཁར་ཡར་འཕགས་ཏེ་མར་བབ་ན་བརྡབ་སྐྱོན་ཤོར་མི་འོང་སྙམ་སྟེ། ཡར་ལྡང་ཚེ་དངོས་སུ་ནམ་མཁར་ཡར་འཕགས་ཤིང་མར་ས་ལ་ཞབས་གཉིས་སྔོན་ལ་རེག་ཅིང་བབས་ཞེས་ཞལ་འཕྲོས་སུ་གསུངས་པ་དང་། ཡང་གནས་དེར་བཞུགས་སྐབས་རོ་ལངས་མངོན་སུམ་བཏུལ་བ་དང་། སྨྱོན་མ་ཞིག་ཀྱང་བཏུལ་རབ་འདུག དེ་དུས་ཉེ་སྐོར་ཞིང་པ་རྣམས་ཀྱིས་སད་བཀག་གནང་བར་ཞུས་སྐབས། དེར་སད་ལྡང་ལ་ཉེ་དུས་ཁོང་གིས་ཆབ་བསང་གནང་བ་ལས་རླངས་པ་མང་དུ་འཕྱུར་ཞིང་སྤྲིན་འཁོར་ནས་སད་མ་བྱུང་བའི་ལོ་རྒྱུས་ཀྱང་ཡོད། ཡང་སྐོར་ཞིག་གསེར་སྟོད་ཕྱོགས་ནས་སྦྱིན་བདག་ཞིག་གིས་ཚེ་འདས་མང་པོའི་མཚན་བྱང་ཁྱེར་འོང་བ་དང་། ཉིན་དེར་བྲག་མགོ་ཕྱོགས་ནས་ཀྱང་མི་ཞིག་གིས་མཚན་བྱང་འགའ་བླ་མར་འབུལ་བར་སླེབས། བླ་མ་སྐུ་མཚམས་དང་ཁེལ་བས་མདུན་དུ་མ་ཚུད་པར། མདུན་འདུག་ལ་དངུལ་སྒོར་བཅས་གཉིས་ཀས་སྤྲད། ཐུན་མཚམས་སྐབས་མདུན་འདུག་གིས་མཚན་བྱང་རྣམས་སོ་སོར་ངོ་སྤྲོད་དང་། དངུལ་སྒོར་བཅས་སྐུ་མདུན་འབུལ་སྐབས། བླ་མས་བཞད་མོ་གནང་བཞིན་དངུལ་སྒོར་རྣམས་ཕན་ཚུན་ནོར་སོང་ཞེས་གསུངས། མདུན་འདུག་གིས་ཞིབ་ཏུ་བསམ་བློ་གཏོང་སྐབས་དངོས་སུ་ནོར་འདུག་ཟེར། རྒྱུན་དུ་སྐུ་མདུན་ལ་མཚན་བྱང་སླེབས་པ་རྣམས་ལ་མ་ཎི་ཚར་རེ་གསུངས་བཞིན་སེ་གོལ་རེ་གནང་ཞིང་འགའ་རེ་མྱུར་དུ་བསྲེག་སྦྱང་མཛད། འགའ་རེ་ལོ་དང་ཟླ་བའི་བར་འཇོག་ཅིང་བླ་མ་ཀོང་ཚེ་སོགས་ལ་རྒྱུན་དུ་གསུར་བསྔོ་རུ་འཇུག ཡང་མདུན་འདུག་ཞིག་གིས་གསོལ་སྨན་འབུལ་སྐབས་དཀར་ཡོལ་སྨན་ཆུ་བཅས་སྐུ་དངོས་ཀྱིས་གཟིམ་ཁང་གི་ཕྱི་རོལ་ཏུ་འཕང་ཡང་ཆུ་ཙམ་ཡང་མ་ཕོས་པར་ཕྱི་རོལ་རྡོ་གཅལ་སྟེང་བཞག་འདུག་པ་མཐོང་ཞེས་ཐོས། ཡང་དགེ་རྩེ་ཟླ་ཁོག་ཕྱོགས་ནས་ཡིན་པའི་གྲྭ་བ་ཁ་ཤས་སྐུ་མདུན་དུ་སླེབས་པའི་ནང་སྤུ་རིས་ཞེས་པ་ཞིག་ཡོད་པ་ལ་ཁྱོད་ཀྱིས་མོན་གླིང་ཞིག་ཕབས་དགོས་གསུངས་པར། དེར་སྤུ་རིས་ནས་ངས་སྒྲུང་དེ་འདྲ་ཕབས་མི་ཤེས་ཀྱང་ང་དང་མཉམ་དུ་བྲིས་པ་དར་རྒྱས་ཟེར་བ། སྒྲུང་དང་སྙན་ངག་ལ་མཁས་པ་ཞིག་ཡོད་པས་ངེད་གཉིས་ཀྱིས་ལྷན་དུ་བྲིས་ན་ཞུས་ཚེ། འོ་ཆོག་གསུངས། སྒྲུང་ཕབས་རྒྱུས་དབུ་བཟུང་ནས་ལྡེབ་རེ་ཟུང་བྲིས་ཚེ་འགགས་ནས་བྲི་རྒྱུ་མ་རྙེད་པས་སྤུ་རིས་གྱིས་ངས་མི་དྲན་གི་དར་རྒྱས་ལ་འབྲི་བཅུག་ན་ཞུས་ཚེ། བླ་མས་དར་རྒྱས་ལ་བཀའ་བཀྱོན་གནང་ཞིང་སྤུ་རིས་ལ། དེ་ནས་འདི་འདྲ་བྱས་པ་ཨེ་མི་ཡིན་ཞེས་ཟུར་ཙམ་རེ་གསུངས་ཚེ་ཁོ་ལ་རང་ཤུགས་ཀྱིས་བབས། དེ་ལྟར་མོན་འདུལ་ཆ་ཚང་བླ་མའི་སྐུ་མདུན་རང་དུ་ཕབས། དེ་ནས་ཕྱིས་སུ་བླ་མ་དང་ཆོས་སྒར་མཐོང་བ་ཙམ་གྱིས་གླིང་སྒྲུང་དུ་མ་རྩོལ་མེད་རང་ཤུགས་ཀྱིས་བབས་པས་བླ་མས་ཁོའི་རྩ་སྒོ་ཕྱེ་བ་ཡིན་པར་གྲགས་ཤིང་། བླ་མས་མོན་དུང་སྐྱོང་གི་སྤྲུལ་བར་གསུངས་ནས་ཁོའི་མཚན་ལ་སྒྲུང་གཏེར་ཉི་མ་རང་ཤར་ཞེས་གནང་ཞིང་། རིམ་གྱིས་ཏ་ཟིག་ནོར་རྫོང་དང་གྲུ་ུགུའི་གོ་རྫོང་། རྟ་རྒྱུག་སོགས་གླིང་སྒྲུང་མང་དུ་ཕབས། རྟ་རྒྱུག་གི་སྒྲུང་ལ་ལྡེབ་དགུ་བཅུ་གོ་དགུ་ལས་མེད་པ་ལ་སྒྲུང་གཏེར་གྱིས་ལྡེབ་བརྒྱ་བྱས་ན་ལེགས་ཀྱང་ངས་ནི་མཇུག་ཏུ་རྩོམ་བྲི་མི་ཤེས་པས་བླ་མ་རིན་པོ་ཆེ་ནས་གནང་བར་ཞུས་ཚ། དེ་འཕྲལ་བླ་མས་ཚིག་བཅད་ཁ་ཤས་གསུངས་པ་མཁན་པོ་ཆོས་གསལ་གྱིས་སམ་ཊའི་ངོར་བྲིས། དེར་མཁན་པོ་ཆོས་གསལ་ལ་དོ་དགོང་ཕར་ཁྱེར་ནས་འགྲིགས་མིན་ལྟོས་གསུངས། ཕྱིར་ཉིན་མཁན་པོ་ཆོས་གསལ་གྱིས་གཞན་ཤིན་ཏུ་ལེགས་མོད་སྒྲུང་གཏེར་ནི་རབ་བྱུང་དུ་འདུག་ན། ཁྱེད་ཀྱི་གསུང་དུ་སྔགས་པ་ལྟ་བུ་ཞིག་གནང་འདུག་པའི་དགོངས་པ་ཅི་ལགས་ཞུས་ཚེ། བླ་མས་རྗེས་སུ་སྔགས་པ་རེད་ཨེ་འགྲོ་ཅི་ཤེས། ཞེས་གསུངས་པ་ཕྱིས་ལུང་བསྟན་ཐོག་ཏུ་བབས། སྒྲུང་གཏེར་གྱིས་བླ་མ་ནི་ལྷ་སྲས་དགྲ་ལྷའི་རྣམ་སྤྲུལ་རེད་ཅེས་གསུངས། སྤྱིར་གནས་དེ་ཡང་གླིང་རྗེ་གེ་སར་རྒྱལ་པོའི་གནས་ཡིན་པར་གྲགས་ཤིང་། གནས་དེ་ན་གེ་སར་གྱི་ཁྲབ་རྨོག་སོགས་གཏེར་དུ་སྦས་ཡོད་པ། རྗེ་ཁོང་དང་། སྒྲུང་གཏེར་གཉིས་ལ་གཏེར་ནས་བཞེས་པའི་ལུང་བསྟན་ཡོད་ཀྱང་སའི་བཅུད་ཡུལ་རྟེན་དུ་དགོངས་ནས་མ་བཞེས་པར་གསུངས། རྒྱུན་དུ་ཡང་སྡེ་བརྒྱད་དང་གཞི་བདག་གིས་སྒྲོམ་བུ་མང་པོ་ཕྱག་ཏུ་ཕུལ་ཡང་། ཐུགས་སྣང་ཐུགས་རྩིས་ཅི་ཡང་མི་མཛད་ཅེས་ཀྱང་ཐོས་སོ། དེ་སོགས་སྣང་བར་རང་དབང་འབྱོར་བའི་གྲུབ་པའི་རྟགས་ཡ་མཚན་ཅན་དང་། དུས་གསུམ་ས་ལེར་གཟིགས་པའི་མངོན་མཁྱེན་སོགས་ཕྱི་ནང་གསང་བའི་ངོ་མཚར་བའི་རྣམ་པར་ཐར་པ་བསམ་གྱིས་མི་ཁྱབ་ཅིང་། དེ་དག་ཀྱང་དད་པ་དང་དག་སྣང་གིས་རང་གི་བླ་མ་ལ་བསྟོད་བསྔ གས་ཙམ་མ་ཡིན་པར། ཕར་ཆེར་དུས་ཕྱིས་ཀུན་གྱིས་མིག་མཐོང་ལག་ཟིན་དུ་བྱུང་བ་ཤ་སྟག་ལས་འདིར་ཐོས་འཛིན་དུ་སོན་པ་ཆ་ཤས་ཤིག་ཕྱི་རབས་དྭངས་བ་སྐྱེད་ཕྱིར་བཀོད་པའོ། །
བརྒྱད་པ་གཟུགས་སྐུའི་བཀོད་པ་ཆོས་དབྱིངས་སུ་བསྡུས་ཚུལ་དང་གསུང་ཆོས་ཞལ་སློབ་བཅས་ཀྱི་སྐོར་ནི།
དེ་ལྟར་བསྟན་འགྲོའི་དོན་ཆེན་ཡུན་རིང་བསྐྱངས་མཐར་ལྕགས་ཡོས་ལོ་༼༡༩༥༡༽བསྙུང་བབ་ལྕི་ཡང་ལྕགས་སྐོང་བླ་མ་རྡོར་དགྲ་ཕེབས་ནས་ཞབས་བརྟན་དང་བརྟན་བཞུགས་ཕུལ་བར་བརྟེན་ལོ་གཅིག་རིང་བསྙུང་གཞི་དྭངས། དེ་ནས་ཕྱིར་ལོ་སླར་ཡང་སྣང་ངོར་ཟླ་ཕྱེད་ལྷག་སྐུ་ཧ་ཅང་བསྙུང་ཚུལ་མཛད། ཉིན་ཞིག་སྐུ་མདུན་དུ་མཁན་པོ་ཆོས་གསལ་དང་། རྒོ་འཛི་གཏེར་ལོ། གཡུ་ཁོག་བླ་མ་བློ་ལྡན། སྐུ་མདུན་པ་འགྱུར་མེད་རྡོ་རྗེ་སོགས་ཡོད་པ་ལ། བླ་མས། ང་ལ་དོན་དུ་ཞིང་ཁམས་ཀྱི་སྣང་བ་ལས་ཅི་ཡང་མི་འདུག་མོད། ངས་བདེ་སྡུག་གཏོང་ལེན་སོགས་ཀྱི་ཆེད་དུ་ན་ཚུལ་བསྟན་པ་ཡིན། ད་ནི་ཡུན་རིང་མི་འདུག་གསུངས། དེར་ཁོང་རྣམས་དང་གྲྭ་འཁོར་ཡོངས་ནས་བརྟན་བཞུགས་མང་དུ་ཕུལ་བ་མ་ཟད། ཡར་མར་གྱི་དགོན་སྡེ་ཁག་ལ་ཞབས་རིམ་མང་དུ་བ སྒྲུབ་རྒྱུ་བཅོལ་ཞིང་བཞུགས་ཞུས་ནན་གྱིས་ཕུལ་ཡང་ཞལ་གྱིས་མ་བཞེས་ཤིང་། རྟེན་ཕལ་ཆེར་ཡང་སོ་སོར་བགོས། མདུན་འཁོར་སོགས་ལ་ཞལ་ཏ་དང་། བསླབ་བྱ་མང་དུ་བསྩལ་ནས་རྗེས་ཀྱི་གདུང་མཆོད་ཇི་ལྟར་བྱ་ཚུལ་སོགས་ཞིབ་པར་མཁན་པོ་ཆོས་གསལ་ལ་ཡི་གེར་འཁོད་བཅུག་སྟེ། སྐུ་ཚེ་དང་མཛད་ཕྲིན་མཐའ་རུ་ཕྱིན་ནས་དགུང་གྲངས་གྱ་གཅིག་བཞེས་པ་བོད་རབ་བྱུང་བཅུ་དྲུག་པའི་བགྲང་བྱ་ཉེར་དྲུག་པ་ནནྡ་ཞེས་པ་དགའ་བ་སྟེ། ཆུ་ཕོ་འབྲུག་གི་ལོའི་༼ཕྱི་ལོ༡༩༥༢༽ ཟླ་བ་དང་པོའི་ཚེས་ཉེར་གཉིས་ལ་སྟོན་པ་ཐུགས་རྗེ་ཅན་སྐུ་ཞི་བར་གཟིམས་པའི་ཚུལ་བཞིན་སེང་གེ་ཉལ་སྟབས་ཀྱི་ཚུལ་དུ་དགོངས་པ་ཆོས་ཉིད་ཞི་བ་ཆེན་པོའི་དབྱིངས་སུ་གཤེགས་སོ། །དེ་ནས་སྐྱབས་རྗེ་གང་གི་ནང་ཐུགས་ཀྱི་སྲས་མཆོག རྡོ་གྲུབ་སྐུ་ཕྲེང་བཞི་པ་ཐུབ་བསྟན་ཕྲིན་ལས་དཔལ་བཟང་མཆོག་གིས་ཐུགས་དམ་ལས་དཀྲོལ་གནང་བ་དང་། རྗེས་ཀྱི་རིམ་པའི་ཐུགས་འགན་གཙོ་བཞེས་གནང་སྟེ། དེར་འདུས་སྐལ་ལྡན་སློབ་ཚོགས་དང་། གཞན་ཡང་ཡུལ་ཕྱོགས་སྟོད་སྨད་བར་གསུམ་ནས་བསྟན་དགོན་གྱི་ཁུར་བཞེས་པའི་དབུ་སྙན་གྱི་གྲགས་པ་འཛིན་པའི་བླ་ཆེན་མཁན་སྤྲུལ་རབ་ཏུ་མང་པོ་གདན་དྲངས་ཏེ་རྒྱུད་སྡེ་དང་། སྒྲུབ་སྡེའི་དཀྱིལ་འཁོར་རབ་འབྱམས་ཀྱི་ཞལ་ཕྱེས་ཏེ་འདས་མཆོད་ཀྱི་རིམ་པ་རྒྱ་ཆེར་ཕུལ། དད་ལྡན་སེར་སྐྱ་ཕོ་མོ་ཀུན་ས་ཡི་རྩི་ཤིང་བཞིན་ཕྱོགས་ཀུན་ནས་འདུས་པ་རྣམས་ཀྱིས་གདུང་མཇལ་དང་མཆོད་འབུལ་སྨོན་ལམ་འདེབས་པ་སོགས་བར་མཚམས་མེད་པར་བྱུང་། དེ་ཚེ་སྐུ་གདུང་ལས་བདུད་རྩི་བབས་པ་དང་། དྲི་བཟང་གི་ན་བུན་ཕྱོགས་ཀུན་འཐུལ་བ་སོགས་རྟགས་ཡ་མཚན་ཅན་མང་དུ་བྱུང་། དེ་ནས་སྐུ་གདུང་རིན་པོ་ཆེ་ཞུགས་ལ་སྦྱང་སྐབས། གདུང་དུད་ཀ་བ་བསླང་བ་ལྟར་ནམ་མཁར་ཟུག་པ་ལ། གནས་ཡུལ་གྱི་དཔའ་བོ་དང་མཁའ་འགྲོ་མ་རྣམས་མཁའ་ལྡིང་གི་ཟོལ་གྱིས་ཕྱག་དང་བསྐོར་བའི་ཚུལ་གྱིས་བྲེལ་ཞིང་། ཕྱིའི་མཁའ་དབྱིངས་ཤིན་ཏུ་དྭངས་པ་ལ་འཇའ་འོད་དང་སྤྲིན་སྲབ་མོའི་གུར་ཕུབ་པ་སོགས་ངོ་མཚར་བའི་ལྟས་མང་པོ་ཀུན་གྱི་མཐུན་སྣང་དུ་གྲུབ་པ་བྱུང་ངོ་། །དེ་ལྟ་བུའི་སྐྱབས་རྗེ་འགྲོ་བའི་མགོན་པོ་གང་དེས་ཟབ་གསང་ཆོས་ཀྱི་བདུད་རྩིས་བསྐྱངས་པའི་ཞལ་སློབ་སྔ་ཕྱིར་བགྲང་ལས་འདས་ཀྱང་ཕྲན་གྱིས་གོ་ཐོས་བྱུང་བ་རྣམས་རགས་ཙམ་བཀོད་ན། རྗེ་གང་གི་གསང་བ་གསུམ་གྱི་བྱིན་རླབས་ཐོབ་ཅིང་དགོངས་པ་དབྱེར་མེད་དུ་གྱུར་པའི་ཐུགས་སྲས་ཡོངས་ཀྱི་ཐུ་བོ་༧སྐྱབས་རྗེ་རྡོ་གྲུབ་རིན་པོ་ཆེ་ཐུབ་བསྟན་ཕྲིན་ལས་དཔལ་བཟང་མཆོག དེ་བཞིན་སྐུ་ཚེའི་སྟོད་ཀྱི་སློབ་མ་ཁྲེགས་ཆོད་ལ་མངའ་བརྙེས་པ་གྲོང་སྟོད་བླ་མ་ཕུར་བ། ཐོད་རྒལ་ལ་མངའ་བརྙེས་པ་རྒུ་ནང་བླ་མ་འཇིགས་མེད་རང་གྲོལ་རྣམ་གཉིས། ཡང་གྲ་ལག་མཁན་པོ་དྲི་མེད་འོད་ཟེར། ཡག་སྐོར་མཁན་པོ་ཆོས་གསལ། འཛི་རོང་བླ་མ་མཆོག་ལྡན། ར་སྐོར་གང་ཤར་རང་གྲོལ། ཙི་མདའ་ཡེ་ཤེས་སྙིང་པོ་སྟེ་ཁྲིད་ཁ་གཅིག་པའི་སློབ་བུ་མཆོག་གྱུར་ལྔ། དེ་བཞིན་རྒྱུན་བཞུགས་དང་ཆོས་འབྲེལ་ཐོབ་པའི་སློབ་མ་ནི། བོད་སྤྲུལ་མདོ་སྔགས་བསྟན་པའི་ཉི་མ། ཀཿཐོག་མཁན་ཆེན་ནུས་ལྡན། ཆུང་ཡོས་མཁན་པོ་ཟླ་འོད། མཁན་ཆེན་འཇིགས་མེད་ཕུན་ཚོགས། བྱ་བྲལ་བླ་མ་ཆོས་དབྱིངས་ཁྱབ་བརྡལ། མཁན་ཆེན་ཟླ་བའི་འོད་ཟེར། བསྙུང་གནས་བླ་མ་རིན་ཆེན་དར་རྒྱས། འཇང་སྒང་དབོན་པོ། དཀྱིལ་སྔོན་བྱམས་སྤྲུལ། རྔ་ཟའི་བླ་མ་ཚུལ་ཁྲིམས་རྡོ་རྗེ། བླ་མ་ཀོང་ཚེ། ལྷ་རྩེ་བླ་མ་བསོ་ལོ་དང་རྒྱལ་མཚན། རིག་འཛིན། རིག་ཐོ། འཛུམ་ལུ། བླ་མ་སྣང་གསལ། ལུང་ནང་བླ་མ་བསོད་ནམས་ཕུན་ཚོགས། སྐྱེ་སྐུ་ཚུལ་ཁྲིམས་རྡོ་རྗེ། མདོ་པ་གདམས་ངག་རྒྱ་མཚོ། བླ་མ་ཆོས་དགའ། བླ་མ་མཁྱེན་ཆུང་། མཁན་པོ་བསོད་ནམས་ཉི་མ། གྲུབ་ཆེན་གླིང་སྤྲུལ། གྲུབ་ཆེན་སྤྲུལ་སྐུ་རྡོར་མཆོག གྱ་ལ་མཁན་པོ། ཡར་ལུང་མཆོག་སྤྲུལ་བསྟན་པའི་ཉི་མ། སྤྲུལ་སྐུ་འཇིགས་མེད་འོད་གསལ། གཡུ་ཐོག་ཀརྨ་བསོད་ནམས། མགོ་ལོག་མཁན་པོ་བསྟན་འཛིན། མཁན་པོ་འཇམ་དོན། འཇིགས་དཔལ། ཨ་ཁྱའི་བླ་མ་ཀར་ཆོས། ཁྲོ་ཤུལ་འབའ་རེ་ལྷག་རྒྱམ། སྨན་པ་ཨོ་རྒྱན། ལྷོ་བའི་ཀོའུ་ཕྲུག ར་སྐོར་རྟོགས་ལྡན་ཁམ་ལོ། མཁན་པོ་ཐུབ་ནོར། སྟག་ལུང་དབོན་པོ་མཁའ་ཀློང་། གཅུང་ཤེས་འོད་ལོ། ཤ་བའི་ཨ་ཏི། ཚེ་ཤེས་རིག་པ། ཚེ་ཤེས་ཏིང་འཛིན། དོམ་ཚང་གཏེར་སྟོན་ཚེ་དབང་མགོན་པོ། གནུབ་ཟུར་སྤྲུལ་སྐུ་པད་ནོར། སྤྲུལ་བློ་གྲོས་དབང་པོ། རྫོང་འགོ་མཁན་པོ་བློ་གྲོས། བླ་མ་རིག་འཛིན་ཉི་མ། མཁན་པོ་ཤེས་རབ། གདུང་ཀུན་གསལ། ཀོ་ཚོང་པད་གྲགས། མ་བླ་ཁྱབ་བདག་འོད་ཟེར། བསྟན་རྒྱས་དབོན་པོ་ཐེག་མཆོག དབོན་པོ་འཇིགས་མེད། ཨ་སྐྱབས་པདྨ་རྡོ་རྗེ། སྒོ་འཛི་གཏེར་ལོ། གནམ་མཚོ་མཁན་པོ་བསྟན་འཛིན། སྒོ་འཛི་རིག་གྲོལ། ཤིང་བཟོ་གར་བདེ། སྒོ་སྤུས་ཡོན་ཏན། སྒོ་སྤུས་ཀུན་འོད། རྡོ་བ་བསྟན་འཛིན། མདོ་མང་མཁན་པོ་ལེགས་བཤད། རྒྱ་རོང་བརྩོན་འགྲུས། རྒྱ་རོང་འཇིགས་མེད་ཡེ་ཤེས། ཁ་རོང་བླ་མ་གདན་གྲོལ། སྤྲུལ་ཨོ་རྒྱན་ཕྲིན་ལས་རྣམ་རྒྱལ། རྒྱ་རོང་རིག་འཛིན་རྡོ་རྗེ། རྒྱ་གདོང་ཤེས་རབ་མེ་འབར། བླ་མ་གནས་ཐར། རྡོ་བ་རང་རིག འཛི་རོང་བླ་མ་མཐོང་གྲོལ། རྫེས་རེ་དྲི་མེད་མཁྱེན་ལྡན། སྨར་རོང་ཤེར་བཟང་། ཁག་རྟ་པད་སྣང་། ལྷ་བཟོ་ཐུབ་གྲགས། འཛི་རོང་རྣམ་དྲུག རྩང་རོང་བླ་མ་ཆོས་སྐྱོང་། རིག་འདུས། གཡུ་ཁོག་ནས་དཔོན་བླ་དགེ་འདུན་རྒྱ་མཚོ། རྒྱ་ཤུལ་ཆོས་དཔལ་རྒྱ་མཚོ། ཆ་ནང་སྤྲུལ་སྐུ་མི་ཕམ། གཡུ་ཁོག་ཀོང་སྤྲུལ་པདྨ་དགྱེས་པ། ཨ་ཚབ་བླ་མ་ཀུན་མཁྱེན། མཁན་པོ་བསོད་སེང་། མཁན་པོ་རི་རྡོར། མཁན་པོ་དོན་ཚེ། བླ་མ་བློ་ལྡན་ཤེས་རབ། བླ་མ་འགྱུར་མེད་རྡོ་རྗེ། བླ་མ་རིག་ཐོ་སོགས་ཕྲན་གྱིས་གོ་ཐོས་བྱུང་བ་ནི་དེ་ཙམ་ལགས་ཤིང་། གཞན་ཡང་སྐབས་དེ་ཙམ་ན་མདོ་ཁམས་སྨད་ཕྱོགས་ཨ་མདོ་མགོ་ལོག་ཚུན་ཆད་ནས། སྨད་རྒྱལ་མོ་ཚ་བ་རོང་ཡན་ཆད་ཀྱི་བླ་སྤྲུལ་མཁན་གསུམ་ཐམས་ཅད། རྗེ་གང་གི་ཞལ་སློབ་ཏུ་མ་གྱུར་པ་མེད་པ་ལྟ་བུར་ངེས་ཕྱིར་འདིར་ཆ་ཚང་འགོད་མ་ཐུབ། དེ་བཞིན་རྗེ་གང་གིས་མ་འོངས་པའི་རྗེས་འཇུག་ལས་དང་སྐལ་བ་དང་ལྡན་པ་རྣམས་ཀྱི་བསོད་ནམས་ཀྱི་བགོ་སྐལ་དུ་བཞག་པའི་རྟོགས་པའི་འདྲ་འབག ཞལ་གསུང་བདུད་རྩིའི་ཟེགས་མ་ཡི་གེར་འཁོད་པ་མཇལ་དུ་ཡོད་པ་རྣམས་འདིར་བཀའ་བསྡུ་བྱས་པ་ༀ་ཨཱཿཧཱུྃ་ཧྲཱིཿ སྟེ་པོད་བཞི་ལས། དང་པོ་སྔོན་འགྲོའི་སྐོར་ༀ་པོད་དུ། རྗེ་ཉིད་ཀྱི་རྒྱུན་གསུང་གནང་བའི་དམ་པ་གསུམ་དང་། སྔོན་འགྲོ་བསྡུས་པ་ཀུན་ལས་བཏུས་པ། འབྲིང་པོ་དཔལ་མགོན་བླ་མའི་ཞལ་ལུང་། སྔོན་འགྲོ་ཀུན་བཟང་བླ་མའི་ཞལ་ལུང་གི་ཉེར་མཁོ་བར་ལྡེབ་ཟིན་བྲིས་བཅས་། གཉིས་པ་དངོས་གཞིའི་སྐོར་ཨཱཿཔོད་ལ། ཁྲིད་ཡིག་ཡེ་ཤེས་བླ་མའི་ཟིན་བྲིས། ལྕེ་བཙུན་ཁྲིད་ཡིག་གི་ཟིན་བྲིས། རྗེ་གང་གི་དངོས་གཞིའི་ཟབ་ཁྲིད་ཀྱི་ཞལ་གསུང་རྣམས་སློབ་བུ་དག་གིས་ཟིན་བྲིས་སུ་བཀོད་པ་རྫོགས་ཆེན་ཁྲིད་རྒྱུན་ཉི་མའི་འཁོར་ལོ། ཚིག་གསུམ་གནད་བརྡེག་གི་མན་ངག་གསེར་གྱི་ཐིག་པ་དང་དེའི་ཞལ་རྒྱུན་ཟིན་བྲིས། འགྲེལ་བ། ཁྲེགས་ཆོད་ཀྱི་མན་ངག་ཁྱབ་བརྡལ་ཉི་མའི་འཁོར་ལོ། བསྒོམ་ཕྱོགས་དྲིས་ལན། གནས་ལུགས་རྡོ་རྗེའི་ཚིག་རྐང་གི་འགྲེལ་བ། དམ་པ་གསུམ་གྱི་གྲངས་བསོག་ཚུལ་བླ་མའི་ཞལ་ལུང་། བདུད་འཇོམས་སྣང་སྦྱང་གི་ཟིན་བྲིས། གཞན་ཡང་རྫོགས་ཆེན་སྐོར་གྱི་ཉམས་སུ་ལེན་ཚུལ་གནད་བསྡུས་མང་པོ་དང་། གསུམ་པ་མདོ་སྔགས་ཀྱི་རྒྱབ་ཆོས་སྐོར་ཧཱུྃ་པོད་ལ། སྟོན་པ་འཚང་རྒྱ་ཚུལ་གྱི་རྣམ་བཞག གསང་སྙིང་བླ་རྒྱུད་ཀྱི་རྣམ་ཐར། གསང་སྙིང་སྤྱི་དོན་མཛོད་སྡེའི་ཟིན་བྲིས། འོད་གསལ་སྙིང་པོའི་ཟིན་བྲིས། བསྐྱེད་རྫོགས་སྐོར་གྱི་མན་ངག་གནད་བསྡུས་འགའ། སྟོང་ཐུན་སེང་གེའི་ང་རོའི་བར་ལྡེབ། དེ་བཞིན་རྗེ་འདིའི་ཞལ་གདམས་དོ་ཧའི་སྐོར་སོགས་དང། ཧྲཱིཿཔོད་དུ། ཕྱིས་ཀྱི་གསར་རྙེད་ཁ་སྐོང་གི་སྐོར་ལ། དུས་བཞི་སངས་རྒྱས་མཉམ་སྦྱོར་དང་དམ་པ་གསུམ་གྱི་གདམས་ཁྲིད། ཐུན་མོང་དང་ཐུན་མིན་གྱི་སྔོན་འགྲོའི་གནད་བསྡུས། བྱ་བྲལ་རིན་པོ་ཆེའི་ཞལ་རྒྱུན་སྔོན་འགྲོའི་གནད་བསྡུས། བླ་མ་རིན་པོ་ཆེས་སྐྱབས་འགྲོ་གསུང་སྐབས་ཞལ་རྒྱུན། ངེས་ཤེས་སྒྲོན་མེའི་ཟིན་བྲིས་ཚན་པ་གཉིས། ཀུན་མཁྱེན་བླ་མའི་ཞལ་ལུང་དྲན་པ་དྲུག་གི་དོན་འགྲེལ་མ་རིག་མུན་སེལ་ཉི་ཟླའི་འོད་སྣང་། རྫོགས་ཆེན་སྙིང་ཐིག་གི་ཁྲིད་འཆད་ཐབས། ཞལ་རྒྱུན་ཟིན་བྲིས། ཞལ་རྒྱུན་གདམས་ཟབ་ཟིན་བྲིས་གནད་གསང་ཡེ་ཤེས་ལག་སྟེར། སེམས་རིག་དབྱེ་བ་རང་གྲོལ་རྟོགས་པའི་གསང་ལམ། ཕྱི་ནང་གསང་གསུམ་གྱི་སྔོན་འགྲོའི་ཟིན་ཐོ་མདོར་བསྡུས། གཞི་ལམ་འབྲས་བུའི་རྣམ་བཞག་སོགས་ཀྱི་ཟིན་བྲིས། སེམས་རིག་གི་ཁྱད་པར་གསུང་ལན་སོགས། རང་བཞིན་རྫོགས་པ་ཆེན་པོའི་མྱོང་ཁྲིད་གནང་སྐབས་ཀྱི་དཔལ་ལྡན་བླ་མའི་ཞལ་རྒྱུན། འོད་གསལ་རྫོགས་པ་ཆེན་པོའི་ལམ་གནད་ལེགས་པར་སྟོན་པའི་ཟིན་བྲིས་ཐོར་བུའི་སྐོར། ནམ་མཁའ་སུམ་ཕྲུག་གི་གནད་བསྡུས་། ཕྱག་རྒྱ་ཆེན་པོ་ཡི་གེ་བཞི་པ། རྫོགས་ཆེན་གསུང་སྒྲོས་སྣ་ཚོགས་ཟིན་བྲིས་སུ་བཀོད་པ་གསུང་གི་འདྲ་འབག་ཆེན་མོ། ཞེན་ལོག་ཡི་གེ་ཉེར་ལྔའི་ཟིན་བྲིས་སོགས་གདུལ་བྱའི་བསོད་ནམས་ཀྱི་སྐལ་བར་བཞུགས་པ་བཅས་སོ། །
སླར་སྨྲས་པ། མཁྱེན་རབ་པ༷དྨ༷་འབུམ་དུ་བརྡལ་བའི་དབུས། །བརྩེ་ཆེན་ཡེ་ཤེས་རྡོ༷་རྗེ༷ས་ཉེར་མཛེས་པའི། །དུས་གསུམ་རྒྱལ་བའི་ཞལ་སྐྱིན་ཆོས་ཀྱི་རྗེ། །སླར་ཡང་སྙིགས་དུས་བསྟན་འགྲོའི་དཔལ་དུ་ཤར། །ངོ་མཚར་ས་ཡི་ཐིག་ལེ་གཡུ་ལྗོངས་ཀྱི། །རྨད་བྱུང་འཕགས་མའི་གནས་མཆོག་དག་ཞིང་དེར། །ཁྱེད་སྐུ་མཚན་དཔེ་ལང་ཚོ་གསར་བའི་གཟུགས། །དེ་ལྟར་པཎ་ཆེན་བི་མའི་རྣམ་སྤྲུལ། གསང་ཆེན་བསྟན་པའི་མངའ་བདག མཁས་ཤིང་གྲུབ་པའི་དབང་ཕྱུག བྱ་བྲལ་རྣལ་འབྱོར་བ་ཆེན་པོ། ༧སྐྱབས་རྗེ་གཡུ་ཁོག་བླ་མ་ཆོས་དབྱིངས་རང་གྲོལ་མཆོག་གི་རྟོགས་བརྗོད་རྣམ་ཐར་ཉུང་ངུའི་ངག་གིས་བརྗོད་པ་འདི་ཡང་རྗེ་གང་གི་གསུང་ཆོས་ཕྱོགས་སྡུད་དང་རྣམ་ཐར་ཅུང་རྒྱས་པ་ཞིག་བྲི་ཐུབ་པའི་རེ་འདུན་ཡུན་རིང་སྙིང་ལ་བཅང་སྟེ་ཕྱོགས་གང་སར་ཕྱིན་ཅིང་། ཁྱད་པར་ཤིང་བྱ་ལོར་ཆེད་དུ་རང་ཡུལ་ནས་རྗེ་གང་ཉིད་སྐུ་འཁྲུངས་བའི་གནས་མཆོག་ཆུ་དབར་ཏཱ་རེའི་གནས་སུ། མདུན་འདུག་པ་བླ་མ་རིག་ཐོའི་མདུན་ཆེད་བསྐྱོད་ཀྱིས་རྣམ་ཐར་སྐོར་བཀའ་འདྲི་མང་ཙམ་ཞུས་འཕྲལ། ཟླ་དེའི་ཚེས་ཉེར་ལྔ་དམར་ཕྱོགས་མཁའ་འགྲོ་འདུ་བའི་དུས་ཆེན་ཉིན་གནས་མཆོག་དེར་ཚོགས་ཀྱི་འཁོར་ལོའི་དགའ་སྟོན་དང་བཅས་རྣམ་བསྡུས་འདི་ཉིད་འ བྲི་བའི་མགོ་བརྩམ་ཞིང་། དེ་ནས་རིམ་གྱིས་གསེར་རྟའི་ཕྱོགས་སུ་བསྐྱོད་ནས་གསུང་ཆོས་དང་། རྣམ་ཐར་སྐོར་ལ་ཞིབ་འཇུག་གིས། མཐར་རྗེ་གང་གི་གདན་ས་དང་། མཐར་སྐུ་ཞི་བར་གཤེགས་པའི་གནས། གསེར་ཡག་སྒང་རི་ཁྲོད་དུ་ཟླ་རྗེས་མའི་ཚེས་ཉེར་ལྔའི་དུས་ཚེས་བཟང་པོར་མཇུག་གྲུབ་ཅིང་། སླར་ལོ་རྗེས་མར་ཡུལ་དབུས་སྨིན་གླིང་བཤད་གྲྭར་འཕྲི་བསྣན་བཅས་དུས་མཐའི་བཙུན་གཟུགས་ཤེས་བྱ་ཀུན་གཟིགས་དེས་རྫོགས་པར་བྲིས་པ་འདིས་ཀྱང་བསྟན་འགྲོའི་དོན་གཉིས་ལྷུན་གྱིས་འགྲུབ་པའི་རྒྱུར་གྱུར་ཅིག །དགེའོ། །དགེའོ། །དགེའོ། །སརྦ་མངྒ་ལཾ། །