གཡུ་ཁོག་བླ་མ་བྱ་བྲལ་ཆོས་དབྱིངས་རང་གྲོལ་གྱི་གསོལ་འདེབས།
༈ རང་གི་སྤྱི་བོར་སྐྱབས་གནས་ཀུན་འདུས་ཀྱི་ངོ་བོ་གུ་རུ་རིན་པོ་ཆེ་གསལ་བཏབ་ལ་རང་གཞན་ཐམས་ཅད་དུས་འདི་ནས་བྱང་ཆུབ་སྙིང་པོའི་བར་དུ་སྐྱབས་གནས་ཀུན་འདུས་ཀྱི་ངོ་བོ་གུ་རུ་རིན་པོ་ཆེ་ཁྱེད་ལ་སྐྱབས་སུ་མཆིའོ་སྙམ་པས་མོས་གུས་གདུང་ཤུགས་དྲག་པོས་གསོལ་བ་སྙིང་ཁུ ང་རུས་པའི་གཏིང་ནས་བཏབ། དེ་ནས་སེམས་ཅན་ཐམས་ཅད་རྣམ་གྲོལ་གཏན་གྱི་བདེ་བ་ལ་འགོད་པའི་སླད་དུ་བདག་གིས་རྫོགས་པའི་སངས་རྒྱས་ཀྱི་གོ་འཕང་རིན་པོ་ཆེ་ཐོབ་པར་བྱ། དེའི་ཆེད་དུ་ལམ་ཟབ་མོའི་རིམ་པ་བསྒོམ་པར་བྱའོ་སྙམ་དུ་སེམས་བསྐྱེད། བླ་མ་མཁྱེན་ནོ། །བླ་མ་མཁྱེན་ནོ། །དུས་གསུམ་སངས་རྒྱས་ཐམས་ཅད་ཀྱི་ངོ་བོ་མཚུངས་མེད་དྲིན་ཆེན་གྱི་བླ་མ་རིན་པོ་ཆེ་ཁྱེད་མཁྱེན་ནོ། །སངས་རྒྱས་ཀུན་འདུས་རྩ་བའི་བླ་མ་མཁྱེན། །བླ་མའི་བྱིན་རླབས་སེམས་ལ་འཇུག་པར་ཤོག དམ་ཆོས་ཀུན་འདུས་རྩ་བའི་བླ་མ་མཁྱེན། །བླ་མའི་བྱིན་རླབས་སེམས་ལ་འཇུག་པར་ཤོག །དགེ་འདུན་ཀུན་འདུས་རྩ་བའི་བླ་མ་མཁྱེན། །བླ་མའི་བྱིན་རླབས་སེམས་ལ་འཇུག་པར་ཤོག །རྩ་གསུམ་ཀུན་འདུས་རྩ་བའི་བླ་མ་མཁྱེན། །བླ་མའི་བྱིན་རླབས་སེམས་ལ་འཇུག་པར་ཤོག །སྐུ་གསུམ་ཀུན་འདུས་རྩ་བའི་བླ་མ་མཁྱེན། །བླ་མའི་བྱིན་རླབས་སེམས་ལ་འཇུག་པར་ཤོག །ཕ་བླ་མའི་སྐུ་ལ་གསོལ་བ་འདེབས། །བུའི་ལུས་ལ་སྐུ་ཡི་བྱིན་གྱིས་རློབས། །ཕ་བླ་མའི་གསུང་ལ་གསོལ་བ་འདེབས། །བུའི་ངག་ལ་གསུང་གི་བྱིན་གྱིས་རློབས། །ཕ་བླའི་ཐུགས་ལ་གསོལ་བ་འདེབས། །བུའི་ཡིད་ལ་ཐུགས་ཀྱིས་བྱིན་གྱིས་རློབས། །ཕ་བླ་མའི་སྐུ་གསུང་ཐུགས་མཆོག་དང་། བུའི་ལུས་ངག་ཡིད་གསུམ་དབྱེར་མེད་ཤོག ཨ་ཨ་ཨ། ཞེས་བརྗོད་ནས་ཐུགས་ཡིད་དབྱེར་མེད་དུ་བསྲེས་ནས་མཉམ་པར་འཇོག་ལ། སླར་ཡང་ཐུན་བསྡུ་བ་ནི། མགོན་པོ་ཁྱོད་ལས་སྐྱབས་གཞན་མ་མཆིས་པས། །འདི་ཕྱི་བར་དོ་གསུམ་དུ་ཐུགས་རྗེས་ཟུངས། །བདག་སོགས་འགྲོ་བའི་བློ་སྣ་ཆོས་ལ་སྒྱུར། །ཐར་བའི་ལམ་སྣ་ཟིན་པར་བྱིན་གྱིས་རློབས། །ཆོས་དབྱིངས་རང་གྲོལ་གྱིས་སོ། ༈ །བླ་མ་དཀོན་མཆོག་གསུམ་པོ་ཁྱེད་མཁྱེན་ནོ། །ཁམས་གསུམ་སེམས་ཅན་ཐམས་ཅད་ཀྱི་ལུས་ཀྱི་ན་ཚ་སེམས་ཀྱི་སྡུག་བསྔལ་ཐམས་ཅད་བདག་ལ་སྨིན་པར་གྱུར་ཅིག བདག་གི་དུས་གསུམ་དུ་བསགས་པའི་དགེ་བ་ཐམས་ཅད་སེམས་ཅན་ཐམས་ཅད་ལ་སྨིན་ནས་སངས་རྒྱས་ཀྱི་གོ་འཕང་ཐོབ་པར་ཤོག་ཅིག ཆོས་དབྱིངས་རང་གྲོལ་གྱིས་སོ། །