བླ་མ་རྒྱང་འབོད་ཐུགས་རྒྱུད་བསྐུལ་བའི་ལྕགས་ཀྱུ།
༈ བླ་མ་རྒྱང་འབོད་ཐུགས་རྒྱུད་བསྐུལ་བའི་ལྕགས་ཀྱུ་ནི། བླ་མ་མཁྱེན་ནོ། །བླ་མ་མཁྱེན་ནོ། །འཁོར་འདས་མི་འགྱུར་སྤྲོས་བྲལ་ཆོས་སྐུ་ཡི་ཀློང་ན། །གསལ་མདངས་མ་འགགས་རང་སྣང་ལོངས་སྐུ་ཡི་དཀྱིལ་འཁོར། །ཐུགས་རྗེས་མཁྱེན་བརྩེ་ཕྲིན་ལས་སྤྲུལ་སྐུ་རུ་ཤར་བའི། །སྐུ་གསུམ་ངོ་བོ་གཅིག་འདུས་བླ་མ་དེ་མཁྱེན་ནོ། །ཁྱབ་བྱ་རྒྱུད་སྡེ་བཞི་དྲུག་ཡི་དམ་གྱི་དཀྱིལ་འཁོར། །ཁྱབ་བྱེད་བདེ་ཆེན་ལྷན་སྐྱེས་ཡེ་ཤེས་སུ་འདུས་ཤིང་། །གནས་ཡུལ་མཁའ་འགྲོ་རྒྱ་མཚོའི་འཁོར་ལོ་ཡི་བསྒྱུར་བ། །རྩ་གསུམ་གཅིག་ཏུ་རྫོགས་པའི་བླ་མ་དེ་མཁྱེན་ནོ། །སངས་རྒྱས་ཀུན་འདུས་དབྱེར་མེད་ཡེ་ཤེས་ཀྱི་སྐུ་མཆོག །དམ་ཆོས་ཀུན་གྱི་མདོ་འགགས་བརྗོད་བྲལ་གྱི་གསུང་མཆོག །དགེ་འདུན་ཚོགས་མཆོག་རིག་གྲོལ་གཉིས་ལྡན་གྱི་ཐུགས་མཆོག །དཀོན་མཆོག་ཀུན་འདུས་ངོ་བོ་བླ་མ་དེ་མཁྱེན་ནོ། །འཁོར་བ་ཞེན་ལོག་ངེས་འབྱུང་སོ་ཐར་གྱི་རྩ་བ། །གཞན་ཕན་ཐུགས་རྗེས་འགྲོ་འདྲེན་བྱང་སེམས་ཀྱི་ངོ་བོ། །སྣང་སྲིད་དག་པའི་དཀྱིལ་འཁོར་གསང་སྔགས་ཀྱི་ལྟ་བ། །སྡོམ་གསུམ་ཡོངས་སུ་རྫོགས་པའི་བླ་མ་དེ་མཁྱེན་ནོ། །འཆད་ན་སྐལ་བཟང་སློབ་མའི་སེམས་རྒྱུད་ཀུན་གྲོལ་ནས། །རྩོད་ན་ལོག་རྟོག་ཐེ་ཚོམ་དྲྭ་བ་དེ་གཅོད་ཅིང་། །རྩོམ་ན་ལུང་རིགས་ཚིག་སྦྱོར་མཁས་རྣམས་ཀྱི་དཔལ་སྟེར། །མཁས་ཚུལ་གསུམ་དང་ལྡན་པའི་བླ་མ་དེ་མཁྱེན་ནོ། །གནས་ལྔ་རིག་གནས་ཤེས་བྱ་ཀུན་མཁྱེན་གྱི་མཁས་པ། །སྡོམ་གསུམ་དྲི་མས་མ་གོས་རྣམ་དག་གི་བཙུན་པ། །ཉམས་མྱོང་བྱིན་རླབས་དྲོད་ཐོབ་ཡོན་ཏན་གྱི་བཟང་པོ། །དམ་པའི་ཚུལ་གསུམ་རྫོགས་པའི་བླ་མ་དེ་མཁྱེན་ནོ། །རྒྱལ་བཀའ་ལུང་གི་ཆུ་བོ་སྐལ་བཟང་ལ་འགྲིམས་ཤིང་། །དབང་དང་གདམ་ཟབ་སྨིན་གྲོལ་ཚད་མེད་དུ་སྩོལ་ཞིང་། །རྫོགས་རིམ་གནད་འགགས་དམར་ཁྲིད་ལག་མཐིལ་དུ་གཏད་པའི། །བཀའ་དྲིན་མཚུངས་པ་མེད་པའི་བླ་མ་དེ་མཁྱེན་ནོ། །སྙན་སོགས་བསྡུ་དངོས་བཞི་ཡི་ལྕགས་ཀྱུ་ཡིས་དྲངས་ནས། །སྦྱིན་སོགས་ཕར་ཕྱིན་དྲུག་གི་བགོ་སྐལ་ལ་བཀོད་མཐུས། །ཐར་ལམ་སྣང་བ་སྟེར་བའི་འཕགས་ཆེན་གྱི་སྐྱེས་མཆོག །རྒྱལ་བའི་ཕྲིན་ལས་དེད་དཔོན་བླ་མ་དེ་མཁྱེན་ནོ། །ཐུགས་གསུང་ཡིད་བཞིན་ཆུ་གཏེར་གཏིང་ཟབ་ལས་བྱུང་བའི། །རྨད་བྱུང་ཆོས་ཀྱི་གྲུ་ཆར་རིས་མེད་ཀྱི་འགྲོ་ལ། །མཁྱེན་དཔྱོད་ཆུ་འཛིན་ལྕེ་ཡི་བར་མེད་དུ་འགྱེད་པའི། །མཁས་དབང་གདེངས་ཅན་དབང་པོ་བླ་མ་དེ་མཁྱེན་ནོ། །གྲངས་མེད་གསུམ་གྱི་བསྐལ་བར་བརྩོན་འགྲུས་ཀྱིས་འབད་པའི། །ས་བཅུ་ལམ་ལྔ་བྱང་ཕྱོགས་སོ་བདུན་གྱི་ཆོས་ཀུན། །ཡེ་བབས་རིག་པ་རྗེན་པའི་རང་ངོ་ལ་རྫོགས་པའི། །ས་ལམ་གཅིག་རྫོགས་ཐེག་མཆོག་བླ་མ་དེ་མཁྱེན་ནོ། །སྣང་སྲིད་སྣང་སྟོང་ལྷ་སྐུ་བུམ་དབང་གི་ལྟ་བ། །དེ་ཉིད་གསལ་སྟོང་ཟུང་འཇུག་གསང་དབང་གི་ལྟ་བ། །བདེ་སྟོང་དགའ་བཞིའི་ཡེ་ཤེས་ཤེར་དབང་གི་ལྟ་བ། །རིག་སྟོང་ཚིག་དབང་རྫོགས་པའི་བླ་མ་དེ་མཁྱེན་ནོ། །དབེན་གསུམ་རྒྱུ་ལས་འོད་གསལ་གསང་འདུས་ཀྱི་རྣལ་འབྱོར། །བདེ་སྟོང་དགའ་བཞིའི་ཡེ་ཤེས་བདེ་མཆོག་གི་རྣལ་འབྱོར། །གསང་གསུམ་སྦྱོར་བ་དྲུག་ལྡན་དུས་འཁོར་གྱི་རྣལ་འབྱོར། །ཀུན་འདུས་ཨ་ཏིའི་དོན་རྟོགས་བླ་མ་དེ་མཁྱེན་ནོ། །ཀློག་པ་ཐོས་བསམ་འཁོར་ལོས་ཀུན་མཁྱེན་དུ་གྲོལ་ནས། །སྤོངས་པ་བསམ་གཏན་འཁོར་ལོས་བསྙེན་སྒྲུབ་ཀུན་མཐར་ཕྱིན། །སྒྲུབ་པ་ལས་ཀྱི་འཁོར་ལོས་རྒྱལ་བསྟན་གྱི་སྲོག་ཤིང་། །འཁོར་ལོ་གསུམ་ལྡན་ཕྲིན་ལས་བླ་མ་དེ་མཁྱེན་ནོ། །འོད་སྣང་སྟོང་ཁམས་གང་བ་མངོན་སུམ་གྱི་སྣང་བ། །ཚོམ་བུ་སྐུ་ཐུགས་སྨིན་པ་གོང་འཕེལ་གྱི་སྣང་བ། །སྣང་སྲིད་ཆོས་སྐུའི་ཞིང་ཁམས་ཚད་ཕེབས་ཀྱི་སྣང་བ། །ཐམས་ཅད་ཆོས་ཟད་སྣང་བཞིའི་བླ་མ་དེ་མཁྱེན་ནོ། །གདོད་ནས་རྡོ་རྗེ་ཁྲག་འཐུང་ཡང་དག་གི་དཀྱིལ་འཁོར། །དེ་ཉིད་བླ་མར་ཤར་བ་གནུབ་བན་གྱི་སྒྱུ་འཕྲུལ། །ཀུན་གཟུགས་འཇམ་དཔལ་རྡོ་རྗེའི་ཐུགས་སྲས་ཀྱི་ཐུ་བོ། །ཕྱི་ནང་དེ་ཉིད་བཅུད་ལྡན་བླ་མ་དེ་མཁྱེན་ནོ། །རབ་འབྱམས་རྒྱལ་བ་ཐམས་ཅད་གདུལ་བྱ་ལ་བརྩེ་བས། །སྙིགས་མའི་འགྲོ་ངོར་རྡོ་རྗེ་སློབ་དཔོན་དུ་ཤར་ནས། །སྨིན་གྲོལ་ཟབ་རྒྱས་ཆོས་འཁོར་བར་མེད་དུ་བསྐོར་ནས། །བཀའ་དྲིན་འཁོར་ཐབས་མེད་པའི་བླ་མ་དེ་མཁྱེན་ནོ། །བརྡ་དོན་སྤྱི་ཡི་བླ་མའི་རྣལ་འབྱོར་ལ་དད་པས། །རང་རིག་དོན་གྱི་བླ་མའི་བྱིན་གྱི་རླབས་ཤར་བས། སྣང་སྲིད་འཁོར་འདས་མ་ལུས་བླ་མ་ཡི་སྤྲུལ་པ། །རང་སེམས་རྩལ་དུ་ཤར་བའི་དངོས་གྲུབ་ཞིག་ཞུའོ། །དང་པོ་ཕྱི་རུ་བཟུང་ནས་གསོལ་འདེབས་དང་མོས་གུས། །བར་དུ་སེམས་དང་བསྲེས་ནས་ཐུགས་ཡིད་གཉིས་དབྱེར་མེད། །མཐར་ཐུག་དབྱེར་མེད་རོ་གཅིག་སངས་རྒྱས་སུ་གྲོལ་ནས། །འགྲོ་དོན་རྒྱུན་མི་འཆད་པའི་སྨོན་ལམ་དེ་འགྲུབ་ཤོག །ཅེས་བླ་མའི་སྒྲུབ་ཐབས་གསོལ་འདེབས་མོས་གུས་ལ་བརྟེན་ནས་འབྲུག་པ་རིན་པོ་ཆེའི་ཞབས་རྡུལ་སྤྱི་བོར་བླངས་པ་ཆོས་དབྱིངས་རང་གྲོལ་ནས་བྲིས་པ་དགེའོ། །སརྦ་མངྒ་ལཾ།། །།