སྔོན་འགྲོའི་ཞལ་རྒྱུན་ཟིན་བྲིས་སུ་བཀོད་པ་མདོར་བསྡུས།

སྔོན་འགྲོའི་ཞལ་རྒྱུན་ཟིན་བྲིས་སུ་བཀོད་པ་མདོར་བསྡུས་ཞེས་བྱ་བ་བཞུགས་སོ། །

དམ་པའི་ཆོས་བསྒྲུབ་པའི་ཐོག་མར་རང་རྒྱུད་ཀྱི་ཀུན་སློང་ལ་བརྟགས་པ་གལ་ཆེ་ཞེས་ཡང་ཡང་གསུངས། ཀུན་སློང་དེ་ལ་དགེ་བའི་ཀུན་སློང་དང་། མི་དགེ་བའི་ཀུན་སློང་། ལུང་མ་བསྟན་གྱི་ཀུན་སློང་དང་གསུམ་དཔལ་སྤྲུལ་རིན་པོ་ཆེ་སོགས་དམ་པ་དུ་མས་གསུངས་ནི་རེད། མི་དགེ་བའི་ཀུན་སློང་ནི་འཇིག་རྟེན་ཆོས་བརྒྱད་ཀྱི་བློ་དང་མ་བྲལ་བ་ཞིག་ཡིན་པས་དེས་ཀུན་ནས་བསླང་བའི་ལུས་ངག་གི་ལས་ནི་ལྟར་སྣང་ཙམ་ལ། འཇིགས་སྐྱོབས་དང་། ལེགས་སྨོན་སོགས་དགེ་བ་ལྟ་བུ་རེ་ཡིན་ན་ཡང་དམ་པའི་ཆོས་ཡང་དག་པའི་ཕྱོགས་ཙམ་ལ་མི་འགྲོ་བས་དུག་ཅན་གྱི་ཟས་བཞིན་ནམ་ཡང་སྤང་དགོས། ལུང་མ་བསྟན་གྱི་ཀུན་སློང་ནི་དགེ་སེམས་སྡིག་སེམས་གང་གིས་ཀྱང་མ་བསྒྱུར་བས་གང་དུའང་ལུང་མ་བསྟན་པ་བསྒྲུབ་བྱ་བསྒོམ་བྱ་ཞིག་ཡིན་པར་ཤེས་ཙམ་གྱིས་ཆོས་དེ་ལ་འཇུག་འདོད་ཀྱི་བློ་དེ་ཡིན་པས། དཔེར་ན་མིའི་ལད་མོ་མི་རྒོད་ཀྱིས་བྱེད་པ་ལྟ་བུ། མི་རྗེས་སུ་ཁྱི་ཞེན་པ་ལྟ་བུ། བྱིས་པས་མེ་ཏོག་འཐུ་བ་ལྟ་བུ། མདའ་སྟོང་འཕེན་བྱེད་པ་ལྟ་བུའི་ངང་ལ་དགེ་བ་རྒྱ་ཆེན་པོ་ཇི་ལྟར་བྱས་ཀྱང་ངལ་བ་འབྲས་མེད་མ་གཏོགས་རྒྱུད་ལ་ཐར་བའི་ས་བོན་ཙམ་ཡང་མེད་པར་རྫ་དཔལ་སྤྲུལ་རིན་པོ་ཆེས་གསུངས། གང་ཟག་དབང་བཙན་དུ་བྱས། ཆོས་དབང་བཙན་དུ་བྱས་ན་ཐར་བའི་ས་བོན་ཙམ་ཡོད་སྲིད་གསུངས། བླ་མ་ལུང་རྟོགས་ཚང་གིས་ཐར་བའི་ས་བོན་ཙམ་ཞིག་ཨེ་མི་ཡོད་གསུངས། དེས་ན་ལུང་མ་བསྟན་གྱི་ཀུན་སློང་དེ་བཅོས་པ་གལ་ཆེ། དགེ་བའི་ཀུན་སློང་དེ་ལ་ཡང་རང་དོན་སྒྲུབ་པའི་ཀུན་སློང་དང་། གཞན་དོན་བསྒྲུབ་པའི་ཀུན་སློང་གཉིས་ལས། རང་དོན་བསྒྲུབ་པའི་ཀུན་སློང་དེ་ཡང་རང་འདོད་ཡིད་བྱེད་ཀྱི་བློ་དང་མ་བྲལ་བའི་ཕྱིར་ན། དེ་ཡང་གཞན་དོན་བསྒྲུབ་པའི་དགེ་བའི་ཀུན་སློང་ཡང་དག་པ་ཞིག་གིས་རྩིས་ཟིན་པ་ཞིག་དགོས། དེ་ནས་བླ་མ་མཁྱེན་གསུམ་ནི། ཆོས་སྐུའི་བླ་མ་དྲི་མེད་འོད་ཟེར་ཞེས་སོགས་སྐུ་གསུམ་དང་སྦྱར་ཏེ་བཤད་ཚུལ་དང་། ལྟ་སྒོམ་སྤྱོད་གསུམ་དང་སྦྱར་ཏེ་བཤད་ཚུལ་སོགས་མང་པོ་ཡོད་ཀྱང་། འདིར་སྐུ་ཞོག་བྲག་དཀར་ཆེན་པོའི་ཀུན་མཁྱེན་འཇི གས་མེད་གླིང་པའི་སློབ་མ་སྣང་གཅོད་པ། དེའི་སློབ་མ་འབའ་ཕུག་སྤྲུལ་སྐུ། དེའི་སློབ་མ་སྐུ་ཞོག་བྲག་དཀར། དེའི་ཞལ་སྔ་ནས་བཀའ་དྲིན་མཚུངས་མེད་བླ་མ་རིན་པོ་ཆེས་གསན། མཆན། ཞལ་རྒྱུན་ལྟར་ན་སོ་བྱང་སྔགས་གསུམ་དང་སྦྱར་ཏེ་གསུངས་པས། བླ་མ་མཁྱེན་དང་པོའི་དུས་སུ་འཁོར་བའི་གནས་འདིའི་མཐོ་དམན་གང་དུ་སྐྱེས་ཀྱང་སྡུག་བསྔལ་གྱི་རང་བཞིན་ལས་མ་འདས་པར་ཤེས་ནས་འཁོར་བ་འདི་ལས་ཐར་བའི་ཐབས་ཤིག་བླ་མ་དཀོན་མཆོག་གསུམ་པོ་ཁྱེད་མ་འཆུག་སྙམ་ནས་ངེས་འབྱུང་གི་བསམ་པ་དང་འབྲེལ་ཏེ་གསོལ་འདེབས་ཀྱི་ཚུལ་དུ་འབོད་དགོས། གཉིས་པའི་སྐབས་སུ་ཁམས་གསུམ་འཁོར་བ་ན་གནས་པའི་སེམས་ཅན་ཐམས་ཅད་རང་གི་ཕ་མར་མ་གྱུར་བ་གཅིག་ཀྱང་མེད་པས་ཕ་མ་དེ་དག་ཐམས་ཅད་འཁོར་བ་སྡུག་བསྔལ་གྱི་རྒྱ་མཚོ་ལས་བསྒྲལ་ནས་རྣམ་མཁྱེན་སངས་རྒྱས་ཀྱི་གོ་འཕང་ཐོབ་པ་ཞིག་བླ་མ་དཀོན་མཆོག་གསུམ་པོ་ཁྱེད་ཤེས་སྙམ་ནས་བྱང་ཆུབ་ཀྱི་སེམས་དང་འབྲེལ་ཏེ་འབོད་དགོས་སོ། །གསུམ་པའི་སྐབས་སུ་ཕྱི་ནང་སྣོད་བཅུད་ཀྱིས་བསྡུས་པའི་ཆོས་ཐམས་ཅད་གནས་ཚུལ་ལ་ཡེ་ནས་རྒྱལ་བའི་སྐུ་གསུང་ཐུགས་ཀྱི་དཀྱིལ་འཁོར་ལས་མ་འདས་པར་ཤེས་ནས་དེ་ལྟར་དུ་རང་གཞན་སེམས་ཅན་ཐམས་ཅད་ཀྱིས་རྟོགས་པ་ཞིག་བླ་མ་དཀོན་མཆོག་གསུམ་པོས་བྱིན་གྱིས་རློབས་ཤིག་ཅེས་སྣང་སྲིད་རྣམ་དག་གི་ལྟ་བ་དང་འབྲེལ་ཏེ་གསོལ་བ་འདེབས་དགོས། ཡང་ན་འཁོར་བར་ཞེན་ལོག་གི་ངེས་འབྱུང་དེ་ཉིད་རང་གཞན་སེམས་ཅན་ཐམས་ཅད་ཀྱི་རྒྱུད་ལ་སྐྱེ་བར་བྱིན་གྱིས་རློབས་ཤིག དེ་བཞིན་དུ་གཞན་ཕན་དོན་གཉེར་བྱང་ཆུབ་ཀྱི་སེམས་རིན་པོ་ཆེ་དེ་ཉིད་རང་གཞན་སེམས་ཅན་ཐམས་ཅད་ཀྱི་རྒྱུད་ལ་སྐྱེ་བར་བྱིན་གྱིས་རློབས་ཤིག སྣང་སྲིད་རྣམ་དག་གི་དག་སྣང་དེ་ཉིད་རང་གཞན་སོགས་སེམས་ཅན་ཐམས་ཅད་ཀྱི་རྒྱུད་ལ་སྐྱེ་བར་བྱིན་གྱིས་རློབས་ཤིག་སྙམ་ནའང་ཆོག་གསུངས།

༈ དལ་འབྱོར་རྙེད་དཀའི་སྐབས་སུ་དོན་ཆེན་གཏན་གྱི་འདུན་མ་མི་བསྒྲུབ་པར་དོན་མེད་ཆུད་ཟོས་སུ་གྱུར་བའི་བློ་སྣ་དེ་ལྡོག་བྱ། དལ་བརྒྱད་འབྱོར་བཅུ་ཚང་བའི་མི་ལུས་ཞིག་རྒྱུ་དཔེ་གྲངས་གསུམ་གྱི་སྒོ་ནས་རྙེད་པར་དཀའ་ཚུལ། རྙེད་ན་དོན་ཆེ་བ་སོགས་སྒོམ་པར་བྱེད་པ་ནི་ལྡོག་བྱེད་ཀྱི་ཐབས་སམ་མན་ངག ཡུལ་གཅིག་ལ་དམིགས་ནས་རྣམ་པ་འཛིན་སྟངས་དངོས་འགལ་དུ་སོང་བའི་སྒོ་ནས་ལྡོག་པའི་ཚུལ། ཚད་ནི་སྤྱན་སྔ་བ་ལྟ་བུའོ། །མདོར་ན་དལ་འབྱོར་གྱི་ལུས་རྟེན་ཆུད་ཟོས་སུ་མི་གཏོང་བར་སྙིང་པོ་ཞིག་ལེན་དགོས་པ་ཡིན། སྙིང་པོ་ལེན་པ་ནི་སངས་རྒྱས་ཀྱི་གོ་འཕང་བསྒྲུབ་པ་ཡིན། སངས་རྒྱས་དེ་ལ་ཆོས་གཟུགས་གཉིས་ཀྱི་བསྒྲུབ་གཞི་ཚང་བ་ཞིག་དགོས། དེ་ནི་ཕར་ཕྱིན་ཐེག་པ་ལྟར་ན་སྦྱིན་སོགས་ཐབས་ཀྱི་ཆ་ལྔ་པོས་གཟུགས་སྐུའི་བསྒྲུབ་གཞི། ཤེས་རབ་ཀྱིས་ཆོས་སྐུའི་བསྒྲུབ་གཞི་བྱེད། སྔགས་བླ་མེད་སྤྱི་ན་བསྐྱེད་རིམ་སྒྱུ་ལུས་སོགས་ཀྱིས་གཟུགས་སྐུའི་བསྒྲུབ་གཞི། སྟོང་བཞིའི་དྲང་བའི་འོད་གསལ། དགའ་བཞིས་དྲང་བའི་ཡེ་ཤེས་སོགས་ཀྱིས་ཆོས་སྐུའི་བསྒྲུབ་གཞི་བྱེད། འོད་གསལ་རྫོགས་ཆེན་ལྟར་ན་གཞི་ཁྲེགས་ཆོད་ཀྱིས་ཆོས་སྐུ་ལམ་དུ་བྱེད། ལམ་ལྷུན་གྲུབ་ཐོད་རྒལ་གྱིས་གཟུགས་སྐུ་ལམ་དུ་བྱེད་པ་ཡིན་གསུངས།

༈ འཆི་བ་མི་རྟག་སྐབས། རྟག་འཛིན་གྱི་བློ་ངན་དེ་ལྡོག་བྱ། ཕྱི་སྣོད་ནང་བཅུད་སོགས་རགས་པ་རྒྱུན་གྱིས་འགྱུར་བ་དང་། ཕྲ་བ་ཆོས་ཉིད་ཀྱི་ཚུལ་ལ་བསམ་པ་ནི་ལྡོག་བྱེད། ཚད་ནི་དགེ་བཤེས་ཁ་རག་པ་ལྟ་བུའོ། །མདོར་ན་སྐྱེ་འཆིའི་བར་ལག་འགྱེལ་ཏེ་ཞིང་འཆི་མེད་གཉུག་མའི་བཙན་ས་མ་ཟིན་བར་བསྒོམ་དགོས་གསུངས་སོ། །དེ་ནི་རྗེ་མི་ལས། ང་འཆི་བས་འཇིགས་ནས་རི་ལ་ཕྱིན་སོགས་གསུངས་པ་ལྟར། སྐྱེ་འཆིའི་མཚན་འཛིན་གྱི་རྟོག་པ་ལས་འདས་པ་སྐྱེ་འཆི་བགྲེས་རྒུད་ཐམས་ཅད་དང་བྲལ་བ་གཞི་བདེ་བར་གཤེགས་པའི་སྙིང་པོ་མངོན་དུ་གྱུར་པ་ལ་གསུངས།

༈ ལས་རྒྱུ་འབྲས་སྐབས། སྡིག་པ་མི་དགེ་བའི་བློ་ལྡོག་བྱ། ལས་མ་བྱས་པ་དང་མི་འཕྲད། བྱས་པ་རྣམས་ཆུད་མི་ཟ་གསུངས་པ་ལྟར་རྒྱུ་འབྲས་བསླུ་བ་མེད་པ་དང་། དེ་རེ་རེ་ལའང་བྱེད་པ་རྒྱུ་མཐུན། མྱོང་བ་རྒྱུ་མཐུན། རྣམ་སྨིན་སོགས་མྱོང་ཚུལ་ལ་བསམ་ཏེ་ལས་རྒྱུ་འབྲས་བསླུ་མེད་དུ་བསྒོམ་པ་ནི་ལྡོག་བྱེད། ཚད་ནི་མི་ལ་རས་པ་ལྟ་བུ། མདོར་ན་ཀུན་འབྱུང་ལམ་བདེན་དུ་མ་ཤར་བར་བསྒོམ་དགོས་གསུངས།

༈ འཁོར་བའི་སྡུག་བསྔལ་སྐབས། སྲིད་པའི་དཔལ་འབྱོར་འདི་ཇི་ལྟར་སྐྱིད་ཀྱང་ངོམས་པའམ། ཚིམ་པ་མེད་ཅིང་། ཇི་ལྟར་སྡུག་ཀྱང་སྐྱོ་བའམ་སུན་པ་མེད་པའི་བློ་དེ་ལྡོག་བྱ། སྲིད་རྩེ་ནས་མནར་མེད་ཀྱི་བར་དུ་འཁོར་བའི་གནས་གང་དུ་སྐྱེས་ཀྱང་སྡུག་བསྔལ་གྱི་རང་བཞིན་ལས་མ་འདས་པར་བསྒོམ་པ་ནི་ལྡོག་བྱེད་ཀྱི་མན་ངག །ཚད་ནི་གླང་རི་ཐང་པ་ལྟ་བུའོ། །མདོར་ན་སྡུག་བསྔལ་གྱི་བདེན་པ་སྣོད་བཅུད་གཉིས་པོ་འགོག་བདེན་སྐུ་དང་ཡེ་ཤེས་དག་པ་རབ་འབྱམས་སུ་

ཤར་ནས་སྡུག་བསྔལ་ཅི་ཙམ་བྱུང་ཡང་སྡུག་བསྔལ་གྱི་མིང་ཙམ་མེད་པར་གང་སྣང་ཐམས་ཅད་བདེ་བ་ཆེན་པོའི་ཡེ་ཤེས་ཀྱི་རང་བཞིན་དུ་སད་དེ་་དཔེར་ན་བླ་མ་ཞང་རིན་པོ་ཆེ་ལྟ་བུ་ཞིག་མ་བྱུང་གི་བར་དུ་བསྒོམ་དགོས། སྔོན་བྱོན་གྱི་དམ་པ་གོང་མ་ཞིག་ཡིན་ན་འཁོར་བའི་ཕུན་ཚོགས་ཡིད་སྨོན་གྱི་གནས་ཅི་ཙམ་མཐོང་ཡང་དཔེར་ན་དྭ་ཕྲུག་མས་མཐོང་བ་ལྟར་ཐུགས་སྐྱོ་ལྷུང་ངེ་འགྲོ་ཞིང་། སྲིད་པའི་དཔལ་འབྱོར་རྣམས་རྩྭ་རྩེའི་ཟིལ་བ་ལྟར་འཇིག་པའི་ཆོས་ཅན། སྦྲུལ་གྱི་པགས་པ་ལྟར་འདོར་བའི་ཆོས་ཅན། སྒྱུ་མའི་གྲོང་ཁྱེར་ལྟར་འཇིག་ལ་ཁད་པ། ཆུ་ཡི་ལྦུ་བ་ལྟར་སྙིང་པོ་མེད་པ། རྨི་ལམ་གྱི་ལོངས་སྤྱོད་ལྟར་སད་ལ་ཁད་པ་ཞིག་ཏུ་གཟིགས་ནི་རེད་གསུངས། མདོར་ན་སང་ཉིན་ནམ་ལང་པ་དང་། ང་ཚེ་ཕྱི་མའི་ཡུལ་དུ་འགྲོ་བ་གཉིས་ལས་གང་སྔ་སྙམ་པ་དང་། དོ་དགོང་ཉི་མ་ནུབ་པ་དང་ང་ཕྱི་མའི་ཡུལ་ལ་འགྲོ་བ་གཉིས་གང་སྔ་སྙམ་པ་དང་། དེར་མ་ཟད་དབུགས་ཕྱི་ནང་དུ་རྒྱུ་འགྲུལ་བྱེད་པའི་བར་ལའང་ཚེ་ཕྱི་མའི་ཡུལ་དུ་འགྲོ་མི་དགོས་པའི་གདེང་མེད་དོ་བསམ་ནས་ཡིད་སྐྱོོ་ལྷུང་ངེ་། སྣང་བ་འཇིགས་ཟིང་ངེ་བའི་ངང་ནས་དམ་པའི་ཆོས་ཁས་ཆུང་རེ་ཅི་ནས་ཀྱང་ཨེ་འགྲུབ་བལྟ་དགོས་གསུངས།

༈ དེ་ནས་དེ་ཙམ་གྱིས་ཀྱང་མི་ཆོག་པར་སྐྱབས་སུ་འགྲོ་དགོས། ཕྱི་པ་ནང་པ་སྐྱབས་འགྲོའི་ཁྱད་གསུངས་པ་ལྟར། སྐྱབས་འགྲོ་ཞིག་མེད་ན་སྐྱབས་བྲལ་མགོན་མེད་ཀྱི་སེམས་ཅན་ཞིག་ཡིན་པས་སྐྱབས་འགྲོ་ཞིག་ངེས་པར་གལ་ཆེ། དེ་ལ་སྐྱབས་སུ་འགྲོ་བའི་ཡུལ། དུས། གང་ཟག སྐྱབས་སུ་འགྲོ་བའི་ཚུལ་དང་བཞི་ཡོད་པ་ལས། དང་པོ་སྐྱབས་སུ་འགྲོ་བའི་ཡུལ་ནི་སྐྱབས་གནས་ཀུན་འདུས་ཀྱི་ངོ་བོ་གུ་རུ་རིན་པོ་ཆེ་དེ་ཉིད་སྤྱི་བོར་བཞུགས་ཡོད་སྙམ་ནས་གསལ་བཏབ་པ་དེ་ཡིན། དེ་ཡང་སྤྱིར་ཀུན་མཁྱེན་ཀློང་ཆེན་པས། ཕྱི་སྤྲུལ་སྐུ་ལྟར་བསྒྲུབ་པ། ནང་ལོངས་སྐུ་ལྟར་བསྒྲུབ་པ། གསང་བ་ཆོས་སྐུ་ལྟར་བསྒྲུབ་པ། ཡང་གསང་ཡེ་ཤེས་ལྟར་བསྒྲུབ་པ་དང་། རིག་འཛིན་འཇིགས་མེད་གླིང་པས་ཕྱི་སྒྲུབ་བླ་མའི་རྣལ་འབྱོར། ནང་སྒྲུབ་རིག་འཛིན་འདུས་པ། གསང་སྒྲུབ་ཐུགས་རྗེ་ཆེན་པོ་སྡུག་བསྔལ་རང་གྲོལ། ཡང་གསང་ཐིག་ལེ་རྒྱ་ཅན་ནམ་ཡེ་ཤེས་བླ་མ་ལྟར་བསྒྲུབ་ཚུལ་དང་བཞི་རེར་གསུངས་ཀྱང་། འདིར་སྐྱབས་ཡུལ་གསལ་སླ་བའི་ཕྱིར་དང་རྟོགས་པའི་ཡེ་ཤེས་རང་རྒྱུད་ལ་མྱུར་ཏུ་སྐྱེ་བར་འདོད་པས་ཀུན་འདུས་ནོར་བུའི་ལུགས་སུ་བསྒོམ་དགོས་གསུངས་པ་ལྟར་བྱེད་པ་ལ་མཚན་དཔེ་ཞལ་ཕྱག་སོགས་བསྐྱེད་རིམ་ལྟར་གསལ་མི་དགོས་ཏེ། གང་ཞིག་མོས་པ་ཡིད་བྱེད་པ། །དེ་ཡི་མདུན་ན་ཐུབ་པ་བཞུགས། གསུངས་པ་ལྟར་ཡིན་ཞིང་ཁྱད་པར་གུ་རུ་རིན་པོ་ཆེ་ཉིད་ཀྱི་ཞལ་ནས། ང་ཉིད་གང་ཟག་སུས་དྲན་ན། ལུས་ལ་བཟང་ངན་ན་སོ་ལ་རྒན་གཞོན། ལུས་ལ་ཕོ་མོ་མེད་པར་དྲན་པ་པོའི་མདུན་གྱི་ནམ་མཁར་བཞུགས་ཡོད་གསུངས་པ་དེ་ཤེས་དགོས། སྤྱི་བོའི་གཙུག་ན་རིགས་བདག་གི་ཚུལ་དང་། མདུན་མཁའ་ན་བཞུགས་པ་གཉིས་གང་ལྟར་བསྒོམས་ཀྱང་འགལ་བ་མེད་ཚུལ་གྲུབ་ཆེན་རིན་པོ་ཆེས་གསུངས། སྔ་འགྱུར་རྙིང་མའི་བླ་མ་ཟེར་བ་གཙོ་བོ་གུ་རུ་རིན་པོ་ཆེ་ཡིན་ཚུལ་ཞབས་དྲུང་རིན་པོ་ཆེས་གསུངས། དེས་ན་ཡ་ཀི་རྡོ་རྗེ་འཆང་ནས་ད་ལྟའི་རང་ལ་ཡི་གེ་སློབ་པའི་སློབ་དཔོན་ཡན་ཆད་ཀྱི་དགོངས་བརྡ་སྙན་བརྒྱུད་ཀྱི་བླ་མ། རྒྱུད་སྡེ་བཞི་དྲུག་གི་ཡི་དམ། གནས་ཡུལ་ཞིང་སྐྱེས་ཀྱི་མཁའ་འགྲོ། ཆོས་སྐུའི་ཞིང་ན་བཞུགས་པའི་ཆོས་སྐུའི་སངས་རྒྱས། ལོངས་སྐུའི་ཞིང་ན་བཞུགས་པའི་ལོངས་སྐུའི་སངས་རྒྱས། སྤྲུལ་སྐུའི་ཞིང་ན་བཞུགས་པའི་སྤྲུལ་སྐུའི་སངས་རྒྱས་དང་། ལུང་རྟོགས་ཀྱི་བསྡུས་པའི་དམ་ཆོས། ཐེག་དམན་ཉན་རང་གི་དགེ་འདུན་ཉན་ཐོས་ཟུང་བཞི་ཡ་བརྒྱད། ཐེག་ཆེན་བྱང་ཆུབ་སེམས་དཔའི་དགེ་འདུན་ཚོགས་སྦྱོར་ནས་རྒྱུན་མཐའི་བར་དུ་བཞུགས་པ་དང་། དེར་མ་ཟད་སྔགས་ཀྱི་དགེ་འདུན་ཆོས་སྐྱོང་བའི་སྲུང་མ་རྣམས་ཀྱང་དགེ་འདུན་གྱི་ཁོངས་སུ་བསྡུས། ཁྱད་པར་རྡོ་རྗེ་སྤུན་གྲོགས་རྣམས་ལ་བརྩེ་གདུང་ཡིད་ལ་མ་བྱས་པར་ཉིན་ཞག་གིས་བར་ཆོད་ན་དམྱལ་བར་འགྲོ་དགོས་གསུངས་པའི་ཕྱིར་ན་སྐྱབས་སུ་དྲན་པ་གལ་ཆེ། དམ་ཆོས་ཚིག་བཞི་གཅིག་སྔ་ཕྱི་བྱས་ནས་ཞུས་ན་ཕུ་བོ་དང་ནུ་བོ་ལྟ་བུའི་འདུ་ཤེས། མཉམ་དུ་ཞུས་ན་མཚེ་མ་ལྟ་བུ། དཀྱིལ་འཁོར་གཅིག་ཅིང་བླ་མ་ཐ་དད་ན་མ་གཅིག་པའི་བུ་སྤུན་གྱི་འདུ་ཤེས། དཀྱིལ་འཁོར་ཐ་དད་ཅིང་བླ་མ་གཅིག་ཡིན་ན་ཕ་གཅིག་པ་ལྟ་བུའི་འདུ་ཤེས། དཀྱིལ་འཁོར་བླ་མ་གཉིས་ཀ་གཅིག་ཡིན་ན་ཕ་མ་གཅིག་པའི་བུའི་འདུ་ཤེས་དགོས། མཆེད་གྲོགས་རྣམས་ནི་འགྲོགས་ཡུན་རིང་བ་བྱང་ཆུབ་སྙིང་པོའི་བར། འགྲོགས་བདེ་བ་གོས་དང་སྐ་རགས་ལྟ་བུ། མར་མེ་དང་མེ་ལྕེ་ལྟ་བུ་ཞིག་ཡིན་པར་ཤེས་དགོས་གསུངས། ཚིགས་བཅད་གཅིག་གི་དོན་ཉན་པ༴སོགས་གསུངས་པ་ལྟར་ཆོས་ཚིག་གཅིག་སྟོན་པའི་སློབ་དཔོན་ཡན་ཆད་བླ་མར་འཛིན་དགོས། དེར་མ་ཟད་ཇོ་བོ་བཀའ་གདམས་པ་རྣམས་ཀྱི་ལུགས་ལྟར་ན་རང་ལ་དགེ་སེམས་ཉག་མ་ཞིག་སྐྱེ་བའི་རྐྱེན་ཁྱི་དང་བུད་མེད་ཀྱིས་བྱས་ན། ས་དང་རྡོ་ཡིས་བྱས་ན་སྣང་བ་བརྡ་ཡི་བླ་མ་ཡིན་པས་དེ་ཡང་སྐྱབས་གནས་སུ་འདུས་པར་ཤེས་དགོས། མདོར་ན་ཕྱི་རོལ་རྟགས་ཀྱི་བླ་མའམ་མཚོན་བྱེད་དཔེ་ཡི་བླ་མ་དེ་ལ་བརྟེན་ནས་མཚོན་བྱ་དོན་གྱི་བླ་མའམ་རང་རིག་དོན་གྱི་བླ་མ་གཉུག་མའི་ཡེ་ཤེས་དེ་ཉིད་སད་དགོས་པ་ཡིན། དེ་ལྟར་སྐྱབས་གནས་ཀུན་འདུས་ཀྱི་ངོ་བོ་གུ་རུ་རིན་པོ་ཆེ་དེ་ཉིད་སྤྱི་བོར་མངོན་སུམ་དུ་བཞུགས་ཡོད་བསམ་པ་ནི་སྐྱབས་སུ་འགྲོ་བའི་ཡུལ། དུས་འདི་ནས་བཟུང་སྟེ་ནམ་ཞིག་ན་ཕྱི་བྱང་ཆུབ་ཀྱི་ཤིང་དྲུང་དུ་མཉམ་པར་བཞག །ནང་ཁམས་བདེ་བར་གཤེགས་པའི་སྙིང་པོ་མངོན་དུ་མ་གྱུར་བར་སྐྱབས་སུ་འགྲོ་བའི་དུས་ཡིན་གསུངས། རང་གཞན་སེམས་ཅན་ཐམས་ཅད་སྐྱབས་སུ་འགྲོ་བའི་གང་ཟག སྐྱབས་སུ་འགྲོ་བའི་ཚུལ་ནི་འཁོར་བའི་གནས་འདི་མེ་ཡི་འོབ། དུག་སྦྲུལ་གྱི་ཚང་། ཁབ་ཀྱི་རྩེ། སྲིན་མོའི་གླིང་ལྟར་བདེ་བའི་གོ་སྐབས་སྤུ་ཙམ་ཡང་མེད་པར་ཤེས་ནས་སྡུག་བསྔལ་རྒྱུ་འབྲས་གཉིས་ལས་ཐར་འདོད་ཀྱི་ངེས་འབྱུང་གི་བསམ་པ་ཞིག་དགོས། སྡུག་བསྔལ་འདི་ལས་སྐྱོབས་པའི་ནུས་པ་ཞིག་བླ་མ་དཀོན་མཆོག་གསུམ་པོ་མ་གཏོགས་བརྩེ་བའི་ཕ། བྱམས་པའི་མ། གཅེས་པའི་བུ། མཛའ་བའི་གྲོགས། གཞན་ཡང་རི་ཡི་ལྷ། ཤིང་གི་ལྷ། འཇིག་རྟེན་ན་མཐུ་བོ་ཆེ་ཚངས་པ་དང་བརྒྱ་བྱིན་སོགས་གང་ལའང་མེད་པར་ཤེས་ནས་སྐྱབས་སུ་འགྲོ་དགོས། དེའི་སྟེང་དུ་བྱང་སེམས་ལྟར་ན་རང་འདོད་ཡིད་བྱེད་ཀྱི་བློ་དང་། སྔགས་ལྟར་ན་ཐ་མལ་མ་དག་པའི་སྣང་ཞེན་ལས་ཀྱང་སྐྱོབ་དགོས། རྒྱུ་མཚན་དེས་ན་བླ་མ་དཀོན་མཆོག་གསུམ་ལ་མཁྱེན་པའི་ཡེ་ཤེས། བརྩེ་བའི་ཐུགས་རྗེ། སྐྱོབ་པའི་ནུས་མཐུ་ཚད་མེད་པར་ཤེས་ནས། གནས་གང་དུ་བསྡད། གྲོགས་སུ་དང་འགྲོགས་ཀྱང་། མཐོ་རུ་གཏོང་ངམ། དམའ་རུ་གཏོང་ངམ། སྐྱིད་ན་སྡུག་ན། ལེགས་ན་ཉེས་ན་བླ་མ་དཀོན་མཆོག་གསུམ་པོ་ཁྱེད་ལས་རེ་ས་སྐྱབས་གནས་མེད་སྙམ་པའི་ཡིད་ཁྱེད་ཤེས་ཀྱི་དད་པ་བརྟན་པོ་ཞིག་ཡོད་པ་ནི་སྐྱབས་སུ་འགྲོ་བའི་ཚུལ་ཡིན་ཏེ། ཇོ་བོ་རྗེས་སྐྱབས་འགྲོའི་ངོ་བོ་ཨི་ཐི་བ་ཞེས་ཡིད་ཆེས་པའི་དད་པ་ཞིག་གལ་ཆེ་གསུངས། སྤྱིར་ཆོས་ཐམས་ཅད་ཀྱི་སྒོ་དབྱེ་བ་སྐྱབས་འགྲོ། སྐྱབས་འགྲོའི་སྒོ་དབྱེ་བ་དད་པ་ཡིན་པས་དད་པ་བརྟན་པོ་གལ་ཆེ་ཚུལ་ནི། ཀུན་མཁྱེན་འཇིགས་མེད་གླིང་པས་བློ་བླ་མར་གཏོད་པ་སྐྱབས་འགྲོ་ཡི་མཐར་ཐུག། ཞེས་གསུངས་སོ། །

༈ དེ་ནས་ཐེག་པ་ཆེ་ཆུང་སེམས་བསྐྱེད་ཁྱད་གསུངས་པ་ལྟར་སེམས་བསྐྱེད་མེད་ན་ཐེག་དམན་དུ་འགྱུར་བའི་ཕྱིར་ན་སེམས་བསྐྱེད་དགོས། ཀུན་རྫོབ་སེམས་བསྐྱེད་ལ་བརྟེན་ནས་དོན་དམ་སེམས་བསྐྱེད་སྐྱེ་དགོས། དོན་དམ་བྱང་ཆུབ་ཀྱི་སེམས་ནི་བདེ་གཤེགས་སྙིང་པོ་ཡིན་ཏེ། དོན་དམ་ཞེས་པ་ཆོས་ཀྱི་དབྱིངས་དང་སེམས་ཞེས་པ་འོད་གསལ་བའི་ཡེ་ཤེས་ལ་གོ་དགོས། འདིར་སྨོན་སེམས་ནི་སེམས་ཅན་ཐམས་ཅད་རྣམ་གྲོལ་གཏན་གྱི་བདེ་བ་ལ་འགོད་པའི་སླད་དུ་བདག་གིས་རྫོགས་པའི་སངས་རྒྱས་ཀྱི་གོ་འཕང་རིན་པོ་ཆེ་འཐོབ་པར་བྱ་བསམ་པའི་རྒྱལ་པོ་ལྟ་བུའི་སེམས་བསྐྱེད་དེ་ཡིན། སྤྱིར་སེམས་བསྐྱེད་ལ་གཙོར་འདོན་བྱེད་ཚུལ། གསར་རྙིང་སོགས་་ཀྱི་བཞེད་པ་མི་འདྲ་བ་མང་ཡང་དོན་ལ་རང་དོན་ཡིད་བྱེད་ཀྱི་བློ་དང་མ་འདྲེས་ན་སེམས་བསྐྱེད་མཆོག་ཡིན་གསུངས། དེའི་ཆེད་དུ་ལམ་ཟབ་མོ་ལ་འཇུག་པ་ནི་འཇུག་པ་སེམས་བསྐྱེད་ཡིན། དེ་ལྟར་སྐྱབས་ཡུལ་དེ་དག་གི་མདུན་ནས་སེམས་བསྐྱེད་པ་སོགས་ནི་ཐོག་མར་དགེ་བ་སྐྱབས་འགྲོ་དང་སེམས་བསྐྱེད་ཞེས་པ་ཡིན་གསུངས།

༈ དེ་ནས་བླ་མའི་གནས་གསུམ་ལས་རྒྱལ་བའི་སྐུ་གསུང་ཐུགས་ཀྱི་ངོ་བོ་ༀ་དཀར་ཨཱཿདམར་ཧཱུྃ་མཐིང་གསུམ་ལས་འོད་ཟེར་དཀར་དམར་མཐིང་གསུམ་འཕྲོས་པ་རང་གི་གནས་གསུམ་དུ་ཐིམ་པས་སྒོ་གསུམ་གྱི་སྒྲིབ་པ་དག་ཅིང་བུམ་གསང་ཤེར་གསུམ་གྱི་དབང་ཐོབ། མཐར་བླ་མ་ཉིད་འོད་དུ་ཞུ་ནས་ལུས་ངག་ཡིད་གསུམ་ལ་ཐིམ་པས་སྒོ་གསུམ་ཆ་མཉམ་གྱི་སྒྲིབ་པ་དག་ཅིང་དབང་བཞི་པ་ཚིག་དབང་རིན་པོ་ཆེ་ཐོབ་པར་བསམ་པ་ནི་དབང་བཞི་ལེན་པ་དང་བླ་མ་འོད་ཞུ་ཡིན་གསུངས། དེ་ལྟར་བླ་མའི་ཐུགས་དང་རང་སེམས་ཡེ་ནས་དབྱེར་མེད་ཡིན་སྙམ་པའི་ཐུགས་ཡིད་དབྱེར་མེད་བསྲེ། ཐུགས་ཡིད་དབྱེར་མེད་བསྲེས་པས་བྱིན་རླབས་འཇུག །དགེ་སྡིག་གཏོང་ལེན་བྱས་པས་སྡིག་སྒྲིབ་འདག་གསུངས་པ་ལྟར། བླ་མ་དཀོན་མཆོག་གསུམ་གྱི་ཡོན་ཏན། རྒྱལ་བ་གོང་མའི་རྣམ་ཐར་རེ་དྲན་པའི་སྟོབས་ཀྱིས་དད་པ་ལེགས་པོ་རེ་སྐྱེ་ནའང་། དེ་ཚེ་ཐུགས་ཡིད་དབྱེར་མེད་འདྲེས་པའི་ལྟ་བས་དྲངས་པའི་ངང་ལ་མཉམ་པར་བཞག་ན་

དེའི་རང་དུས་དེ་ན་དུས་གསུམ་ཡིད་ཀྱི་འཁྲུལ་རྟོག་ཐམས་ཅད་བསེ་ལུ ང་ལྕགས་ཀྱི་རྒྱ་མདུད་བཞིན་དུ་འཐོར། བྱིང་རྨུག་གཉིད་གསུམ། ཉམས་ཞེན་གྱི་ཤུན་པ། བཟོ་བཅོས་ཀྱི་གོས། གཟུངས་འཛིན་ཀྱི་དྲི་མ། ཕྱི་ནང་གི་གཏད་སོ། །འཁྲུལ་བའི་འཁོར་ལོ་ཐམས་ཅད་སྤྲིན་ཆེན་ནམ་མཁར་དེངས་པ་བཞིན་དུ་དེངས། ཆོས་དང་གང་ཟག་གི་བདག་འཛིན་ཐམས་ཅད་སྣང་བའི་མདུན་ན་མུན་པ་འདུག་ལོང་མེད་པ་བཞིན་རང་གྲོལ་རང་ཞིག་ལ་སོང་བ་དཔེར་ན་སྦྲུལ་གྱི་མདུད་པ་རང་ཞིག་ཏུ་འགྲོ། སྒོ་ལྔ་ཆ་མཉམ་དུ་བཞག་ན་ཡུལ་ལྔ་པོ་འགག་མེད་དུ་ཚུར་ཤར་བ་ཡིན། དེ་ལྟ་བུའི་མཉམ་བཞག་དེ་དག་པ་ནམ་མཁའ་ལྟ་བུ། སངས་བ་མེ་ཏོག་ལྟ་བུ། དྭངས་པ་རྒྱ་མཚོ་ལྟ་བུ་རང་བབས་ཀྱི་བསམ་གཏན་དེ་ལྟ་བུ་ཞིག་ཤར་ཚེ་ཕར་ལ་བློ་ཡིས་མ་བསྒོམ། ཚུར་ལ་དྲན་པས་མ་བཅིངས། ཐོལ་སྐྱེལ་རྦད་ཆོད། དྲན་པས་རྗེས་སླེབ། གཉེན་པོས་འབུར་འཇོམས། གནས་པའི་ངང་སྐྱོང་སོགས་མ་དགོས་པར། ལྟ་བ་ཡན་ཐུབ། བསྒོམ་པ་ཡེང་ཐུབ། སྤྱོད་པ་རྐྱེན་ཐུབ། འབྲས་བུའི་གོལ་ས་ཐུབ། རང་ངོ་འཕྲོད་པ་ལྟ་བ། ངང་ལ་གནས་པ་བསྒོམ་པ། གང་ཤར་རང་གྲོལ་གྱི་སྤྱོད་པ་ཞེས་ལྟ་སྒོམ་སྤྱོད་གསུམ་གནད་གཅིག་ཏུ་འདུས་པ་ཡིན། ལྟ་བའི་གནས་དག །སྒོམ་པའི་རྨང་ཞིག། སྤྱོད་པའི་ལ་དོར། དེ་དུས་འདོད་ཡོན་ལྔ་སོགས་ཡུལ་གང་སྣང་ཡང་མི་ཞེན་པ་སྦྱིན་པའི་ཕར་ཕྱིན། དུས་གསུམ་ཡིད་ཀྱི་འཁྲུལ་བའི་དྲི་མས་མ་གོས་པ་ཚུལ་ཁྲིམས། ཟབ་མོའི་དོན་ལ་མི་སྐྲག་པ་བཟོད་པ་སོགས་ཕར་ཕྱིན་དྲུག་དང་། དྲན་པ་ཉེར་བཞག་བཞི་དང་། ཡང་དག་སྤོང་བཞི་སོགས་དཀར་ཆོས་ཀྱི་ཡོན་ཏན་ཐམས་ཅད་ངམ་ངམ་ལྷུན་གྱིས་གྲུབ། ཡེ་ཤེས་གསལ་ཡང་མི་འཛིན་པས་གཟུགས་ཁམས་ལས་གྲོལ། ཐུགས་རྗེས་རིག་ཀྱང་མི་འཕྲོ་བ་འདོད་ཁམས་ལས་གྲོལ། ངོ་བོ་མི་རྟོག་ཀྱང་ཡེ་ཤེས་ཀྱི་གསལ་ཆ་མ་འགག་པས་གཟུགས་མེད་ཁམས་ལས་གྲོལ། ལྡོག་ཆས་དབྱེ་ན་སྟོང་པ་ནམ་མཁའ་ལྟ་བུ། གསལ་བ་ཉི་ཟླ་ལྟ་བུ། རིག་ཆ་མིག་འབྲས་བཞིན་དུ་ཧྲིག་གེ་བའི་བདག་ཉིད་དུ་བཞུགས་པ་སྐུ་གསུམ་གྱི་ཉམས་ཟེར་ཏེ། སྐུ་གསུམ་ཉམས་ནི་ནམ་མཁའི་མཐའ་དང་མཉམ་ཞེས་གསུངས་པ་དང་། རྒྱ་གྲོལ་སྣང་བ་ནམ་ལང་ཉི་ཤར་འདྲ། །ཆོས་སྐུའི་སྣང་བ་ཡིན་ནོ་ཨེ་མ་ཧོ། །ཞེས་གསུངས་པ་ལྟར་ལགས། སྲིད་གསུམ་ཀ་དག་གི་ལྟ་བ། ཁམས་གསུམ་ཡོངས་སྒྲོོལ་གྱི་བསྒོམ་པ། ཕྱོགས་ལས་རྣམ་རྒྱལ་གྱི་སྤྱོད་པ། སྐུ་གསུམ་ལྷུན་གྲུབ་ཀྱི་འབྲས་བུ། དེ་ལས་མི་འདའ་བའི་དམ་ཚིག་སོགས་ཀྱང་ཡིན། དེར་མ་ཟད་བསྐང་རྫས་རྡུལ་ཚོན་གྱི་ཐིག་ལེ། འགུལ་བསྐྱོད་ཡེ་ཤེས་ཀྱི་ཕྱག་རྒྱ་སོགས་གང་སྣང་ཅི་སྤྱོད་ཐམས་ཅད་ཡེ་ཤེས་ཀྱི་རོལ་བ། ཆོས་ཉིད་ལ་ཆོས་ཉིད་རོལ། ཟས་ཟོས་ཀྱང་འགག་མེད་དུ་མྱོང་། ཞེན་མེད་དུ་རོལ། རྟེན་མེད་དུ་གྲོལ་བས་ཚོགས་ཆེན་ཡེ་རྫོགས་ཀྱི་དགོངས་པ་སྟེ། དེ་ལྟ་བུའི་དགོངས་པ་དཀོན་མཆོག་གསུམ་གྱི་སྣང་བ་དང་མ་བྲལ་བ་ཞིག་ཡིན་ན་གེགས་དང་གོལ་ས་གཏན་ནས་མེད་གསུངས། དེ་མིན་གཞན་དུ་གནས་ན་དྭངས་ཆ་མེད་ན་ཞི་གནས་ཀྱི་སྙིགས་མ། གསལ་ན་ལྷོད་ཆ་མེད་ན་གསལ་འཛིན་གྱི་འཆིང་བ། འགྱུ་ན་གྲོལ་ཆ་མེད་ན་འཁྲུལ་བའི་རྗེས་བསྙེགས་ཡིན་པས་གཟབ་དགོས། བཟང་རྟོག་ཤར་ཡང་མཐའ་གྲོལ་ཀློང་ཡངས། ངན་རྟོག་ཤར་ཡང་རང་ཤར་རང་གྲོལ་ཞེས། གྲོལ་རྒྱུ་དེ་ལ་བཟང་རྟོག་ངན་རྟོག་བར་མ་དོའི་རྟོག་པ་གསུམ་ལས། བཟང་རྟོག་གྲོལ་ཞེས་པ་ནི་དགེ་སེམས་རྣམས་ཀྱི་སྟེང་ན་བདག་འཛིན་རློམ་སེམས་ང་རྒྱལ་སོགས་མཚན་འཛིན་གྱི་རྟོག་པ་ཐམས་ཅད་དྭངས་སེ་ལྷོད་སེ་འགྲོ་བ་ལ་ཟེར་བ་ཡིན། དེ་ལྟར་མ་ཤེས་པར་བཟང་རྟོག་དགེ་སེམས་ཀྱི་ཆ་ཐམས་ཅད་མེད་འགྲོ་དགོས་པ་ཞིག་ལ་གཏན་ནས་བཟུང་མི་རུང་ངོ་། །འཁོར་བར་ཞེན་ལོག་གི་ངེས་འབྱུང་། གཞན་ཕན་དོན་གཉེར་གྱི་བྱང་སེམས། སྣང་སྲིད་རྣམ་དག་གི་དག་སྣང་། བཀའ་དྲིན་ཅན་གྱི་བླ་མ་ལ་མོས་གུས། ཡོན་ཏན་ཅན་ལ་དད་པ་སོགས་དགེ་སེམས་རྣམས་ནི་འདི་ནས་ཇི་སྲིད་བྱང་ཆུབ་སྙིང་པོའི་བར་དུ་འགྲོ་དགོས་ངེས་པ་ཅན་ཡིན་ཞེས་ཡང་ནས་ཡང་དུ་གསུངས། ངན་རྟོག་ནི། ཆགས་སྡང་རྨོང་གསུམ་གྱི་རྟོག་པ་ཐམས་ཅད་ཡིན། བར་མའི་རྟོག་པ་ནི། ས་བསམ་རྡོ་བསམ་ལྟ་བུའི་ཕན་མེད་གནོད་མེད་བར་མའི་རྟོག་པ་ཐམས་ཅད་ཡིན། དེ་རྣམས་མཉམ་བཞག་ལྟ་བའི་ཀློང་དུ་གྲོལ་ནས་འོད་གསལ་རིག་པའི་རང་རྩལ་དུ་གྲོལ་བ་ཞིག་དགོས། རྟོགས་མ་རྟོགས་རྐྱེན་དང་བསྲེས། གོམས་མ་གོམས་མཚན་མོའི་གཉིད་ལ་དྲིས་གསུངས་པ་བཞིན་གྲོལ་དཀའ་ཚུལ་མང་དུ་གསུངས་ཀྱང་མ་བྲིས། མདོར་ན་གྲོལ་ཟེར་རྒྱུ་བོ་ཕྱི་སྣང་བ་མ་སྤང་སྣང་ཐོག་ནས་གྲོལ་བ་བྱེའུ་ཆུང་ཁྲས་ཁྱེར་བ་ལྟ་བུ། ནང་འགྱུ་བ་མ་སྤང་འགྱུ་ཐོག་ནས་གྲོལ་བ་ཆུ་ལ་རི་མོ་བྲིས་པ་ལྟ་བུ་ཞིག་དགོས་གསུངས། དེ་ནི་བར་དུ་དགེ་བ་དངོས་གཞི་ཐུགས་ཡིད་དབྱེར་མེད་ཡིན་ནོ་གསུངས། ༈ མཐར་ཏིང་ངེ་འཛིན་གྱི་རྒྱ་མ་རལ་གོང་། བྱིང་རྨུག་གཉིད་གསུམ་དང་འཁྲུལ་བའི་དབང་དུ་མ་ཤོར་གོང་དུ་བསྔོ་བ་བྱེད་པ་གལ་ཆེ་བས་ན། བསྔོ་བའི་དཔང་པོ་རྒྱལ་བ་སྲས་བཅས་ཀྱི་མདུན་དུ། བསྔོ་རྒྱུའི་དགེ་རྩ་བདག་གིས་དུས་གསུམ་དུ་སྒོ་གསུམ་གྱིས་བསགས་པ་དང་། གཞན་ལ་བྱེད་དུ་བཅུག་པ་དང་བྱས་པ་ལ་རྗེས་སུ་ཡི་རང་བའི་དགེ་རྩ་སོགས་རང་གཞན་ཐམས་ཅད་ཀྱིས་དུས་གསུམ་དུ་བསགས་པའི་དགེ་བའི་རྩ་བ་ཐམས་ཅད་གཅིག་ཏུ་བློ་ཡིས་བསྡོམ་ནས་དཔེར་ན་མིག་ཅན་གྱིས་གཟུགས་མཐོང་བ་བཞིན་དུ་མངོན་སུམ་དང་འདྲ་བ་ཞིག་དམིགས། བསྔོ་ཡུལ་སེམས་ཅན་ཐམས་ཅད་མཐའ་གཉིས་ལ་མི་གནས་པ་རྫོགས་པའི་སངས་རྒྱས་ཀྱི་གོ་འཕང་ཐོབ་པའི་ཆེད་དུ། རྒྱལ་བ་སྲས་དང་བཅས་པས་ཇི་ལྟར་བསྔོས་པ་དེ་བཞིན་དུ་བདག་གིས་ཀྱང་བསྔོ་བར་བྱ་ཞེས་དཔག་ཆེན་གྱིས་མདའ་འཕང་བ་བཞིན་དུ་བློ་ཐེ་ཚོམ་མེད་པ་ཞིག་དགོས། དེ་ནི་བསྔོ་བ་རྗེས་མཐུན་པ་ཙམ་ཡིན། འཁོར་གསུམ་དམིགས་མེད་ཀྱི་བསྔོ་བའི་དོད་ཀྱང་ཐུབ། དམིགས་མེད་མཚན་ཉིད་པ་ནི་འཕགས་པ་ལ་འཇོག་དགོས། དེ་ལྟར་སྦྱོར་དངོས་རྗེས་གསུམ་དང་བཅས་པའི་ཐུན་ཡུན་ཐུང་ལ་གྲངས་མང་བ་ཞིག་གལ་ཆེ་བས་ཉིན་རེ་ལ་ལན་དྲུག་ཅུ་རེ་ལྔའམ། ཡང་ཏིག་ནག་པོ་གསེར་གྱི་འབྲུ་གཅིག་ལས་གསུངས་པ་ལྟར་བརྒྱ་དང་ཉེར་ལྔ་ཙམ་རེ་མི་ཆག་པར་འགྲོ་དགོས། ལས་དང་པོ་བས་ཡུན་ཐུང་ལ་གྲངས་མང་བ་བྱེད་དགོས་ཚུལ། ཨོ་རྒྱན་རིན་པོ་ཆེས། ཡུན་ཐུང་གྲངས་མང་ཁང་སྟོང་ཐིགས་པ་བཞིན། །ཞེས་པ་ལྟར་ཡིན། དེ་ཡང་དགྲ་འདུལ་གཉེན་སྐྱོང་། ཞིང་ལས་སོ་ནམ། ཕྱུག་གི་འཚོ་སྐྱོང་། དཀོར་ཁ་གྲོང་ཆོག ཚོང་ཁེ་སོ་ནམ་སོགས་རྣམ་གཡེང་ཁོ་ནས་ཉི་མ་ནམ་ཚ་ཟད་ཡོད་པ་ཞིག་མི་བྱེད་པར། མཐོ་ལ་ཁ། དམའ་ལུང་ཁུང་། ཉི་མ་ཉིན་ཕྱེད། ཟླ་བ་མཚན་ཕྱེད། གནས་གང་དུ་བསྡད། གྲོགས་སུ་དང་འགྲོགས། ལས་ཅི་བྱེད་སོགས་དུས་ནམ་དུ་ཡང་། བླ་མ་དང་གཉིས་སུ་མེད་པའི་སྐྱབས་གནས་ཀུན་འདུས་ཀྱི་ངོ་བོ་གུ་རུ་རིན་པོ་ཆེ་དེ་ཉིད། སྤྱི་བོའི་གཙུག་ཏུ་བསྒོམ་ཞིང་དབང་བཞི་བླང་། སྙིང་གི་དབུས་སུ་བསྒོམ་ཞིང་ཐུགས་ཡིད་དབྱེར་མེད་བསྲེས་ཏེ་བསམ་རྒྱུ་བླ་མ་ལས་མེད་པ། བློ་སྣ་བླ་མས་འཕྲོག་པ། གང་སྣང་བླ་མར་ཤར་བ་ཞིག་མ་བྱུང་གི་བར་དུ་བསྒོམ་ནུས་ན་ཕྱི་མར་སྲིད་པ་བར་དོའི་སྐབས་སུ་བླ་མ་དངོས་སུ་དེར་བྱོན་ནས་དབང་བསྐུར་ཞིང་ངོ་སྤྲོད། ཡི་དམ་གྱིས་གེགས་བསལ། མཁའ་འགྲོས་བར་ཆད་ལས་བསྐྱབས་ཏེ་གྲོལ་བར་ཐེག་མཆོག་མཛོད་ལས་གསུངས། མདོར་ན་ད་རེས་དལ་འབྱོར་གྱི་མི་ལུས་ཐོབ། མཚན་ལྡན་གྱི་བླ་མ་མཇལ། དམ་པའི་ཆོས་དང་འཕྲད། གདམས་ངག་གི་བདུད་རྩི་ཐོབ། སངས་རྒྱས་ལས་ཀྱང་འཕྲད་པར་དཀའ་བ་སྔགས་རྡོ་རྗེའི་ཐེག་པར་འཕྲད་ཡོད་པའི་དུས་འདིར། པདྨ་ཅན་གྱི་མཚོ་ལ་ངང་པ་ཞུགས་པ་དང་། དྲི་ཞིམ་པདྨོའི་ཚལ་དུ་བུང་བ་རྒྱུ་བ་བཞིན་དུ་དགའ་སྤྲོ་དང་བཅས་ཏེ་གདམས་པ་འདིར་འཇུག་རིགས་སོ་ཞེས་གསུངས་སོ།།

༈སྔོན་འགྲོ་སེམས་ཀྱི་ཁང་བུ་བཤིགས་པ་དེ་ལ། རྟོག་པ་རྩད་བཅད་པ། སེམས་ཀྱི་མཚང་བཙལ་བ། བྱུང་གནས་འགྲོ་གསུམ་ལ་བརྟག་པ་གསུམ་ལས། དང་པོ་ནི། འཁོར་རྩ་དངོས་ངོས་བཟུང་བ་དཔེར་ན་རྐུན་པོ་ངོས་འཛིན་ལྟ་བུའི་གདམས་པ་ཡིན་ཏེ། འཁོར་བ་ཡ་མཐའ་ཐུག་མེད། དེ་བཞིན་དུ་སེམས་ཅན་ཡ་མཐའ་ཐུག་མེད། འཁྲུལ་བ་ཡ་མཐའ་ཐུག་པ་མེད་པ་ཞིག་ནས་ཉི་མ་དེ་རིང་གི་བར་དུ་འཁོར་བའི་གནས་འདིར་རྫ་མཁན་གྱི་འཕང་ལོ་བཞིན་དུ། སྔུན་ན་ཁྲིད་མཁན་དང་རྒྱབ་ན་འདེད་མཁན་མེད་པར་དབང་མེད་དུ་འཁྱམས་པའི་རྒྱུའི་གཙོ་བོ་སེམས་ཡིན་པའི་རྩ་གདར་ལེགས་པར་ཆོད་པ་དེ་ཡིན། མཚང་བཙལ་བ་ནི་དེ་ཉིད་གཏན་ལ་འབེབས་བྱེད་ཀྱི་རིགས་པ་ཡིན་ལ། གསུམ་པ་ནི། བྱུང་ས་། གནས་ས། འགྲོ་ས་སྟེ་ཡུལ་གསུམ་དང་། བྱུང་མཁན། གནས་མཁན། འགྲོ་མཁན་སྟེ་ཡུལ་ཅན་གསུམ་པོ་དབུ་མའི་གཏན་ཚིགས་ལྟར་རམ། རྡུལ་ཕྲན་བསགས་གཏོར་གྱི་རིགས་པས་དཔྱད་དེ་གཏན་ལ་ཕབ་ཚེ། ཡུལ་དང་ཡུལ་ཅན་ཐམས་ཅད་སྣང་བཞིན་དུ་སྟོང་ལ། སྟོང་བཞིན་དུ་སྣང་བའི་སྣང་སྟོང་ཟུང་འཇུག་གི་ངེས་ཤེས་ཡང་དག་པ་སྐྱེས་ཚེ། ངེས་ཤེས་དེའི་ངང་དུ་མཉམ་པར་བཞག་ན་དབུ་མའི་ལྟ་བ་ལས་ཁྱད་ཆོས་ཡོད་ཚུལ་རྡོ་གྲུབ་ཆེན་རིན་པོ་ཆེས་ཉག་རོང་གཏེར་སྟོན་ལ་གསུངས་པ་ཡིན་ལ། དེ་ནི་མཐའ་བཞིའི་འཛིན་སྟངས་མེད་པའི་རྟགས་སུ་ངོ་བོའི་དབྱིངས་ལས་ཤར་ཆ་འགགས་མེད་དུ་ཤར་བ་དང་། ལྟ་བ་ཡང་དག་པས་རང་རྒྱུད་ལ་ཁྱབ་པའི་འབྲས་རྟགས་སུ་གང་ཤར་ཐམས་ཅད་བག་ཆགས་བསོགས་ལོང་མེད་པར་གྲོལ་བ་ཡིན་གསུངས། ཞེས་དེ་ལྟར་ཤ་ཟིན་སྤུ་ཟིན་གྱིས་ཚིག་ཟིན་དུ་བྲིས་པ་ལགས་་སོ། །

༈ གོལ་ས་གསུམ་ནི། ཀུན་གཞི་ནི་ཤེས་པ་ལུང་མ་བསྟན་ཁ་ཕྱིར་ལྟས་ཀྱི་ཤེས་པ། ངོ་བོ་རྟོག་མེད། རྣམ་པ་དྭངས་གསལ། སྣོད་བཅུད་རྒྱ་ཆེན་པོ་ལ་དམིགས་པ། ཨི་སྣང་ན་སྣང་། ཨི་འཛིན་ན་མི་འཛིན། ཕྱིའི་ཡུལ་ལ་མ་གཏད། ནང་དུ་མ་བསྒོམ། བར་དུ་མ་བཞག འཁྲུལ་ནི་མ་ཡིན། དུབ་ཆ་དང་འཐིབས་ཆ་སོགས་གང་ཡང་མེད་པ་ངོ་བོ་ཀུན་གཞི། རྣམ་པ་ཀུན་གཞིའི་རྣམ་ཤེས། དཔེར་ན་བཙས་མ་ཐག་པའི་བྱིས་པའི་སྣང་བ་བཞིན་དུ། ཡུལ་སྣང་སྒོ་ལྔའི་རྣམ་ཤེས་ཡུལ་ལ་མ་མཆེད་པས་ཀ་བུམ་སོགས་ཀྱི་བྱེ་བྲག་མི་ཤེས་པས་འདི་ཡིན་འདི་མིན་གྱི་སྟངས་མ་བྱེད་པ་ཡིན། ཀློང་ཆེན་པས། མི་ཞིག་དཀའ་བའི་ཤུགས་ཀྱིས་རྟོག་པ་རྒྱུན་འགག་པ་ཀུན་གཞི་ཡིན་གསུངས། ཐ་མལ་པ་རྣམས་དཀའ་བའི་ཤུགས་དང་འཇིགས་སྔངས་དང་དྲན་བརྗེད་ཀྱི་དུས་སུ་ཀུན་གཞི་དེ་ཉིད་རྐྱེན་གྱིས་བསྐྱེད་ནི་རེད། རྣལ་འབྱོར་པས་ལམ་བསྒོམ་པའི་སྟོབས་ཀྱིས་ཀུན་གཞིའི་སྟེང་དུ་ཐོན་ནི་རེད། ལྷག་མཐོང་ཐམས་ཅད་ཀྱི་རྒྱལ་པོ་འོད་གསལ་བའི་རིག་པ་ཡིན་ཏེ། གཞན་དུ་ཆོས་ཐམས་ཅད་བདེན་སྟོང་གི་ཤེས་རབ་དང་འགྱུ་ཆ་ལ་གྲོལ་ཆ་ཡོད་པ་སོགས་ལྷག་མཐོང་ལ་རྣམ་གྲངས་མང་གསུངས། ཅི་ལ་གནས་དང་ཏིང་ངེ་འཛིན་རྐྱེན་མེད་དང་། བདག་མེད་གཉིས་རྟོགས་ཀྱི་སྟོང་ཉིད་དང་། རྫོགས་ཆེན་པས་འོད་གསལ་གྱི་ངང་ལ་གནས་པ་སོགས་ཅི་ཡང་མེད་པས་སོ། །དབང་ཤེས་ལྔའི་ནང་ན་མིག་ཤེས་ལ་ཡིད་ཤེས་ཀྱིས་གྲོགས་བྱས་ནས་ནམ་མཁའ་ལ་གཏད་པས་ཕྱིའི་ནམ་མཁའ་དང་འདྲེས་པའི་ཉམས་འཆར་གསུངས། དེ་ཡང་རིག་པས་ངང་བསྐྱངས་ཀྱང་སྒོམ་ཡུན་རིང་ན་རིག་པའི་ས་ཕུད་ནས་མིག་ཤེས་ལ་ཞེན་ཏེ་ནམ་མཁའ་དང་འདྲེས་པའི་ཉམས་འཆར། རྟགས་ནི་རི་མཐོན་པོའི་རྩེ་དང་ནམ་མཁའ་དྭངས་པ་དང་། ཁང་པའི་སྒོ་དང་སྐར་ཁུང་ཕྱེ་བའི་དུས་སུ་སྔར་ལས་ཀྱང་དྭངས་གསལ་གྱི་རྣམ་པ་འཆར་ནི་རེད། མིག་བཙུམ་པ་དང་། གནམ་ངོ་འཁྲུགས་པ་དང་། མུན་རུབ་ཀྱི་དུས་དང་སྒོ་དང་སྐར་ཁུང་བཅད་དུས་འཐིབ་ཆ་བྱུང་བ་ནི་མིག་ཤེས་ལ་གོལ་བའི་འབྲས་རྟགས་ཡིན། སྟོང་གསུམ་མུན་པར་འཁྲུགས་ཀྱང་ང་མི་འཐིབ། །ཞེས་གསུངས་པའི་དོན་རྨི་ལམ་དང་བར་དོའི་འོད་གསལ་སོགས་གང་དུའང་ཟང་ཐལ་དུ་ཤར་བ་ཡིན་ཏེ། དེ་འདྲའི་ཡུལ་རྐྱེན་གྱི་གོས་པ་མི་སྲིད་གསུངས། གེགས་སེལ་ནི། རི་མཐོན་པོའི་རྩར་དང་། མིག་བཙུམས་པ་དང་། སྔོན་དུ་གྱང་ལོག་གིས་བཅད་ནས་སྒོམ་དགོས་གསུངས། ཡིད་ཤེས་ནི། མངོན་སུམ་རྟགས་ལ་མ་བརྟེན་པར། །རྗེས་དཔག་འབྱུང་བར་མི་སྲིད་དོ། །ཞེས་གསུངས་པས། དབང་ཡུལ་འཕྲད་དུས་དབང་ཤེས་ཀྱི་ཡུལ་མངོན་སུམ་རེད། ཡིད་ཤེས་ཀྱི་ཡུལ་རྗེས་དཔག་ཡིན་ཀྱང་ཡིད་ཤེས་ཀྱི་ཡུལ་རྣམས་རང་ལ་མངོན་སུམ་ཡིན་སྣང་ཤར་ཀྱང་མངོན་སུམ་མ་རེད། རྗེས་དཔག་རེད། རྗེས་དཔག་་གི་ཡུལ་ཤེས་ནི་དེ་ཤེས་རྒྱུད་གཅིག་ཡིན་ནི་གི་ཡིན་གསུངས། ཉམས་བདེ་གསལ་མི་རྟོག་གསུམ་དང་། དེ་གསུམ་གང་ཡང་ཤན་མ་ཕྱེས་པའི་སྟོང་ཧད་ཧད་པོ་དང་བཞི་པོ་འདི་ཡིད་ཤེས་ཀྱི་ཡུལ་མྱང་བྱ་ཡིན། མྱང་བྱ་དེ་རྣམས་འཛིན་མཁན་གྱི་ཡུལ་ཅན་ཡིད་ཤེས་ཡིན་གསུངས། ཉོན་ཡིད་ནི། ཉམས་རྣམས་གང་རུང་ལ་ཆགས་ཤིང་ཞེན་པས་འབྲལ་མི་ཕོད་པ་ལྟ་བུའི་འདོད་ཆགས། རྩུབ་ཉམས་དང་མི་བདེ་བ་སོགས་བྱུང་ན་དེ་ལ་འདོར་བའི་རྣམ་པས་མནར་སེམས་ཅན་ཞེ་སྡང་། འདོར་ལེན་གྱི་རྣམ་པ་མིན་པའི་བར་མའི་རྣམ་པར་རྟོག་པ་གཏི་མུག་གོ། །དེ་ལྟ་བུའི་ཀུན་གཞི་ལུང་མ་བསྟན་དང་། སྒོ་ལྔའི་རྣམ་ཤེས་རྣམས་ལས་མིག་ཤེས་འདི་ཁྱབ་ཆེ་བས་དེ་དང་། ཡིད་བདེ་གསལ་མི་རྟོག་གསུམ་དང་དེ་གསུམ་ཤན་མ་ཕྱེས་པའི་སྟོང་ཧད་ཧད་པོ་དང་བཞི་པོ་འདི་གོལ་ས་ཆེན་པོ་གསུམ་མམ་བཞི་ཡིན། རང་གི་ཉམས་ལེན་དང་གོལ་ས་དེ་རྣམས་ནོར་མི་ནོར་བརྟགས་དཔྱད་ལེགས་པར་བྱེད་པ་ཤིན་ཏུ་གལ་ཆེ། རེས་འོད་གསལ་ལ་མཉམ་པར་བཞག རེས་གོང་གི་གོལ་ས་རྣམས་སེམས་ཐོག་ཏུ་བླངས་ཏེ་བསྒོམ་ཞིང་རེས་མོས་བྱས་ཏེ་བསྒོམ་པས་གོང་གི་གོལ་ས་དེ་རྣམས་དང་འདྲེས་མ་འདྲེས་ཀྱིས་ཤན་ལེགས་པར་འབྱེད་ནུས་པ་ཡིན་ནོ་གསུངས། །དགེའོ།། དགེའོ།། དགེའོ། བཀྲ་ཤིས།།