སྔོན་འགྲོའི་སྐབས་ཀྱི་ཞལ་རྒྱུན་ཟིན་བྲིས་ཐོར་བུ།
ཉེ་བརྒྱུད་ནི་ཞབས་དྲུང་རིན་པོ་ཆེ་ཚང་གི་གུ་རུ་རིན་པོ་ཆེའི་ཞལ་ལན་གསུམ་མཇལ་བའི་ཉེ་བརྒྱུད་ཀྱི་དབང་དུ་བཏང་ན་གུ་རུ་རིན་པོ་ཆེ་ནས་ཞབས་དྲུང་ལ་བརྒྱུད། དེས་ཨ་འཛོམ་དང་ཉག་བླ་སོགས་ལ་བརྒྱུད། དེ་གཉིས་ནས་ཁོང་ལ་བརྒྱུད་ནི་ཡིན་གསུངས། ཡང་ན་ཀློང་རམ་དང་འཇིགས་གླིང་གཉིས་ཀྱི་སྤྲུལ་སྐུ་ཞབས་དྲུང་ཡིན་པས་དེ་གཉིས་ཀྱི་ཉེ་བརྒྱུད་ཡང་ཞབས་དྲུང་རིན་པོ་ཆེ་ལ་ཡོད་གསུངས། ཀུན་སློང་ལ་མི་དགེ་བའི་ཀུན་སློང་དང་། ལུང་མ་བསྟན་གྱི་ཀུན་སློང་གཉིས་སྤང་བྱ་ཡིན། ཐེག་ཆེན་སྐབས་འདིར་རང་དོན་བསྒྲུབ་པའི་ཀུན་སློང་ཡང་སྤང་བྱ་ཡིན། དགེ་བའི་ཀུན་སློང་ནི་བྱང་ཆུབ་སེམས་ཀྱིས་ཟིན་པའི་སྒོ་ནས་བསྒྲུབ་དགོས་གསུངས། ཐོག་མར་དགེ་བ་སྐྱབས་འགྲོ་སེམས་བསྐྱེད། བར་དུ་དགེ་བ་ཐུགས་ཡིད་དབྱེར་མེད། ཐ་མར་དགེ་བ་བསྔོ་བ་དང་སྨོན་ལམ་སྟེ་དམ་པ་གསུམ་གྱིས་རྩིས་ཟིན་པའི་དགེ་བ་ཁོང་ཁྲོས་མི་འཇོམས་ལོག་ལྟས་མི་གཅོད་གསུངས། ནུབ་མོ་ཉལ་བའི་དུས་གཟུགས་སྣང་སྐུ། སྒྲ་གྲགས་གསུང་། དྲན་རྟོག་ཐུགས་ཏེ་ཕྱི་ནང་སྣོད་བཅུད་ཟངས་མདོག་དཔལ་རིར་གསལ་བ་དང་རང་རྣལ་འབྱོར་མར་གསལ་བའི་ངང་ནས་ཉལ། སྤྱི་བོའི་བླ་མ་དབུ་མའི་ལམ་ནས་རང་གི་སྙིང་པདྨ་འདབ་བཞི་གསལ་བའི་ནང་དུ་བྱོན། དེའི་འོད་ཟེར་གྱིས་ཕྱི་སྣོད་ནས་སྙིང་གི་བླ་མའི་བར་བསྡུ་རིམ་བྱས་ལ་གྲིམ་ལྷོད་རན་པའི་ངང་ནས་ཐུགས་ཡིད་དབྱེར་མེད་བསྲེས་ལ་གཉིད་ལོག་གསུངས། ཐོ་རང་ལྡང་བའི་དུས་ལ་བབས་པ་ན་ཟངས་མདོག་དཔལ་རི་ནས་ཨོ་རྒྱན་རིན་པོ་ཆེ་འཁོར་དཔའ་བོ་མཁའ་འགྲོ་སོགས་ཀྱིས་རོལ་མོའི་སྒྲས་ཨ་ཀྵ་ལྔ་བཅུ་བཅས་འཇའ་འོད་དར་ཁྱིམ་གྱི་ལམ་ནས་བྱོན་ཏེ་གཉིད་ལས་སད་པར་བསམ་གསུངས། དེ་ནས་སྙིང་གའི་བླ་མ་སྤྱི་བོ་བདེ་ཆེན་གྱི་འཁོར་ལོར་ཡར་བྱོན། མདུན་གྱི་ཨོ་རྒྱན་ཆེན་པོ་ཡང་དེ་དང་དབྱེར་མེད་དུ་གྱུར་ནས་བཞུགས་པར་མོས་དགོས་གསུངས། བླ་མ་མཁྱེན་དང་པོ་ནི་འཁོར་བར་ཞེན་ལོག་གི་ངེས་འབྱུང་རང་རྒྱུད་ལ་སྐྱེ་བའི་ཕྱིར་དང་། གཉིས་པ་གཞན་ཕན་དོན་གཉེར་གྱི་བྱང་སེམས་རྒྱུད་ལ་སྐྱེ་བའི་ཕྱིར་དང་། གསུམ་པ་སྣང་སྲིད་རྣམ་དག་གི་དག་སྣང་རྒྱུད་ལ་སྐྱེ་བའི་ཕྱིར་གསོལ་བ་བཏབ་ནི་ཡིན་གསུངས། དགེ་བའི་དམིགས་རྣམ་མི་བརྗེད་པའི་དྲན་པ། སྒོ་གསུམ་ལ་བྱ་ར་བྱེད་པའི་ཤེས་བཞིན། བླང་དོར་གྱ་ི གནས་ལ་གཟོབ་པ་ལྷུར་ལེན་པ་བག་ཡོད་གསུངས། ངག་བྱིན་རླབས་བྱས་ནས་སྔགས་འདོན་ན་ལྷག་ཆད་ཀྱི་ཉེས་པ་མི་འབྱུང་གསུངས། དལ་འབྱོར་རྙེད་དཀའི་སྐབས། དོན་ཆེན་གཏན་གྱི་འདུན་མ་མི་བསྒྲུབས་པར་དོན་མེད་ཆུད་ཟོས་བྱེད་པའི་བློ་ངན་དེ་ལྡོག་བྱ་ཡིན། ལྡོག་བྱེད་ཀྱི་ཐབས་གཉེན་པོ་ནི་དལ་བརྒྱད་འབྱོར་བཅུ་སོགས་དལ་འབྱོར་གྱི་ཆོས་སུམ་ཅུ་རྩ་བཞི་ཡིན་གསུངས། འཆི་བ་མི་རྟག་སྐབས། རང་ཐང་མྱུར་དུ་མི་འཆི་སྙམ་པའི་རྟག་འཛིན་གྱི་བློ་ངན་དེ་ལྡོག་བྱ་ཡིན། ལྡོག་བྱེད་ཀྱི་ཐབས་གཉེན་པོ་ནི། ནམ་འཆི་ཆ་མེད་སོགས་ཡིན་གསུངས། ལས་རྒྱུ་འབྲས་སྐབས། དགེ་སྡིག་བླང་དོར་ཚུལ་བཞིན་བྱེད་མི་ནུས་པའི་བློ་ངན་དེ་ལྡོག་བྱ་ཡིན་གསུངས། ལྡོག་བྱེད་ཀྱི་ཐབས་གཉེན་པོ་ནི། རང་བྱས་རང་ལ་སྨིན་པར་ངེས་པའང་། རྒྱུ་འབྲས་བླང་དོར་གཞུང་བཞིན་བྱེད་པ་དེ་ཡིན་གསུངས། འཁོར་བའི་ཉེས་དམིགས་སྐབས། འཁོར་བའི་བདེ་བ་ལ་ཅི་ཙམ་སྤྱད་ཀྱང་ངོམས་པ་མེད་པར་འཁོར་བའི་སྡུག་བསྔལ་ཅི་ཙམ་མྱོང་ཡང་སྐྱོ་བ་མེད་པའི་བློ་ངན་དེ་ལྡོག་བྱ་ཡིན། ལྡོག་བྱེད་ཀྱི་ཐབས་གཉེན་པོ་ནི། ཁམས་གསུམ་འཁོར་བ་སྡུག་བསྔལ་གྱི་རང་བཞིན་དུ་ཤེས་ནས་དེ་ལས་ཐར་འདོད་ཀྱི་ངེས་འབྱུང་བསྒོམ་པ་དེ་ཡིན་གསུངས། བློ་ལྡོག་བཞི་ཀ་ལ་ལྡོག་བྱ། ལྡོག་བྱེད། ལྡོག་ཚུལ། ལྡོག་ཚད་དང་བཞི་རེ་ཡོད་གསུངས། ༈ སྐྱབས་འགྲོའི་སྐབས། ཆོས་སྐུ་ཀུན་ཏུ་བཟང་པོ་ནས་ད་ལྟའི་རྩ་བའི་བླ་མའི་བར་དེ་མཆོག་གསུམ་ཀུན་འདུས། རྩ་གསུམ་ཀུན་འདུས། སྐུ་གསུམ་ཀུན་འདུས། བརྒྱུད་གསུམ་ཀུན་འདུས། གནས་གསུམ་གྱི་དཔའ་བོ་མཁའ་འགྲོ་ཀུན་འདུས་ཏེ་མདོར་ན་སྐྱབས་གནས་ཇི་སྙེད་ཡོད་པ་དེ་དག་ཐམས་ཅད་དང་ཁྱད་པར་རྡོ་རྗེའི་སྤུན་གྲོགས་ཐམས་ཅད་ལ་བརྩེ་གདུང་ཡིད་ལ་མི་བྱེད་པར་ཉིན་ཞག་གི་མཐའ་འདས་ན་ལྟུང་བ་འབྱུང་ནི་རེད། དེས་ན་སྤུན་གྲོགས་ཐམས་ཅད་གུ་རུ་རིན་པོ་ཆེ་ལ་འདུས་པར་མོས་ནས་སྤྱི་བོའི་གཙུག་ཏུ་བསྒོམ་ན་ཉེས་པ་ཁེག་གསུངས། མདོར་ན་གུ་རུ་རིན་པོ་ཆེ་མིག་གི་ཕྱེ་བཙུམ། ལག་པའི་བསྐྱང་བསྐུམ། རྐང་པའི་འདེགས་འཇོག་སྟེ་དུས་རྒྱུན་དུ་སྐྱབས་གནས་ཀུན་འདུས་གུ་རུ་རིན་པོ་ཆེ་བརྗེད་མི་ཉན་གསུངས། སྐྱབས་ཡུལ་དེའི་དྲུང་དུ་མེ་ཏོག་རྡོག་མ་གཅིག་མཐོང་ན་བླ་མ་དཀོན་མཆོག་གསུམ་པོར་མཆོད། ཅེས་པས་སྐྱབས་ཡུལ་གསལ་གདབ། སེམས་བསྐྱེད་རང་གཞན་སེམས་ཅན་ཐམས་ཅད་དཀོན་མཆོག་གསུམ་གྱི་སྐྱབས་འོག་ཏུ་ཚུད་པར་ཤོག་ཅིག་ཅེས་པས་བསྔོ་བ་དང་སྨོན་ལམ་བཞི་ག་ཚང་ནི་ཡིན་གསུངས། འཇིགས་མེད་གླིང་པས། བློ་བླ་མར་གཏོད་པ་སྐྱབས་འགྲོའི་མཐར་ཐུག་གསུངས་ཀྱི་བོ་དེ་སྐྱབས་གནས་མཐར་ཐུག་བླ་མ་གུ་རུ་རིན་པོ་ཆེ་ཁོ་ན་ལ་གཏོད་དགོས་གསུངས། ཁོང་གི་ཞལ་ནས། སྲོག་གཅོད་མི་ཉན་གསུངས་ཀྱི་ཚིག་དེ་ལུང་གི་ཆོས་ཡིན། ཁྱེད་ཅག་གིས་དེའི་དོན་ཉམས་སུ་ལེན་པ་རྟོགས་པའི་ཆོས་ཡིན་གསུངས། དཔལ་སྤྲུལ་ཞལ་ནས། སྲོག་གཅིག་བཅད་ན་དགེ་ཚུལ་སློང་གི་ལྟུང་བ་ཡིན། བྱང་སེམས་ཀྱི་ཕ་མ་བསད་ནི་ཡིན། སྔགས་ཀྱི་སྐབས་རྡོ་རྗེ་སློབ་དཔོན་བསད་ནི་ཡིན། ཉེས་པ་ཤིན་ཏུ་ཆེ་གསུངས། སེམས་ཅན་ཕལ་པས་སྲོག་ཅིག་བཅད་ན་བཤགས་ཡུལ་ཡོད་པས་རྩྭ་ཤིང་སོགས་ལ་མེ་འབར་ན་གཉེན་པོ་ཆུ་ཡོད་པ་དང་འདྲ་གསུངས། སེམས་ཅན་རྣམས་ཀྱི་སྐྱབས་གནས་འཕགས་པའི་དགེ་འདུན་རྣམས་ཡིན། བན་དེ་བླ་མ་སོགས་ཀྱིས་སེམས་ཅན་གྱི་སྲོག་ལ་གནོད་པའི་དམར་ཆོག་སོགས་བྱེད་ན་སེམས་ཅན་རྣམས་ལ་སྐྱབས་གནས་མེད་པས་དཔེར་ན་རྒྱ་མཚོ་ཆེན་པོ་ལ་མེ་འབར་ན་གཉེན་པོ་མེད་པ་དང་འདྲ་གསུངས། སེམས་ངོ་ལྟ་བ་གང་ཞིག་གིས་སྲོག་གཅིག་བཅད་ན་འབུམ་འགྱུར་ཡིན་པས་དེས་བསྒོམ་མི་རུང་། སྲོག་གཏན་ནས་མི་གཅོད་ན་གང་ཟག་དེས་སེམས་ངོ་སྐྱོང་ཆོག་གསུངས། མི་ཕལ་པ་ཞིག་གིས་མི་རྟ་བཅོ་བརྒྱད་བསད་ནི་བས་ཐུ་གསུངས།
༈ སེམས་བསྐྱེད་སྐབས། དམིགས་པ་སེམས་ཅན་ཐམས་ཅད་ལ་དམིགས་ནས་རྣམ་པ་སེམས་ཅན་ཐམས་ཅད་རྒྱུ་དགེ་བ་འབྲས་བུ་བདེ་བ་སྟེ་དགེ་བ་རྒྱུ་འབྲས་གཉིས་དང་ལྡན་འདོད་ཀྱི་བྱམས་པ། དམིགས་པ་སེམས་ཅན་ཐམས་ཅད་ལ་དམིགས་ནས་རྣམ་པ་སེམས་ཅན་ཐམས་ཅད་རྒྱུ་མི་དགེ་བ་འབྲས་བུ་སྡུག་བསྔལ་རྒྱུ་འབྲས་གཉིས་དང་བྲལ་འདོད་ཀྱི་སྙིང་རྗེ་སྟེ་སེམས་བསྐྱེད་ཀྱི་རྩ་བ་སྙིང་རྗེ་ཁོ་ན་ལ་ཐུག་གསུངས། སེམས་ཅན་ཐམས་ཅད་སྡུག་བསྔལ་རྒྱུ་འབྲས་གཉིས་དང་བྲལ་ན་ཅི་མ་རུང་བསམ་ན་འདུན་པ་དང་འབྲེལ་བ། བྲལ་བ་ཞིག་བདག་གིས་བྱེད་བསམ་ན་དམ་བཅའ་དང་འབྲེལ་བ། སྡུག་བསྔལ་རྒྱུ་འབྲས་གཉིས་དང་བྲལ་བར་བླ་མ་དཀོན་མཆོག་གསུམ་གྱི་བྱིན་གྱིས་རློབས་པར་ཤོག་ཅིག་བསམ་ན་བསྔོ་བ་སྨོན་ལམ་དང་འབྲེལ་ནི་ཡིན་གསུངས། ༈ དད་པའི་སྒོ་ནས་ཐུགས་ཡིད་དབྱེར་མེད་དུ་མཉམ་པར་བཞག་ན་དོན་དམ་སེམས་བསྐྱེད་དང་དངོས་གཞི་དམིགས་མེད་ཀྱི་དོད་ཐུབ་ཡིན་གསུངས། ༈ རྡོར་སེམས་སྐབས། སྐྱབས་གནས་ཀུན་འདུས་ཀྱི་ངོ་བོ་རྩ་བའི་བླ་མ་རྣམ་པ་རྡོ་རྗེ་སེམས་དཔའ་མདུན་གྱི་ནམ་མཁར་གསལ་གདབ། ལྷ་དམ་པ་རིགས་བརྒྱ་སྔགས་ཡི་གེ་བརྒྱ་པའི་རྣམ་པར་ཤར་ནི་ཡིན། སྟོབས་བཞིའི་གནད་དང་ལྡན་པའི་ངང་ནས་བདུད་རྩི་འབེབ་སྦྱོང་དང་ཡིག་བརྒྱ་འདོན་མཐར་བསྡུ་རིམ་བྱས་ནས་མཉམ་པར་བཞག་ན་སྡིག་སྒྲིབ་འདགས་པའི་མཐར་ཐུག་ཡིན། ༈ མཎྜལ་སྐབས། སྐུ་གསུམ་གྱི་ཞིང་ན་མཆོད་པའི་དངོས་པོ་ཇི་སྙེད་ཡོད་པ་དང་། དེའི་སྟེང་དུ་རང་གི་ལུས་ལོངས་སྤྱོད་དུས་གསུམ་དགེ་ཚོགས་དང་བཅས་པ་སྐུ་གསུམ་རྒྱལ་བ་སྲས་དང་བཅས་པ་མཆོད། རང་གཞན་སེམས་ཅན་ཐམས་ཅད་ཀྱི་ཚོགས་གཉིས་རྫོགས་པར་ཤོག་ཅིག་ཅེས་པས་རྒྱུན་ཏུ་ཉམས་ལེན་བྱེད་ཀྱི་ཡིན་གསུངས། ༈ གཅོད་ཀྱི་སྐབས། གཅོད་ཀྱི་ངོ་བོ་སྟོང་ཉིད་སྙིང་རྗེའི་སྙིང་པོ་ཅན་ཡིན། གཅོད་ཡུལ་ནི་ཆོས་ཀྱི་དབྱིངས། དཔེར་ན་ས་གཞི་ལྟ་བུ་ཡིན། གཅོད་བྱེད་བདག་མེད་རྟོགས་པའི་ཤེས་རབ་ཡིན། གཅོད་ཚུལ་ནི་སླར་མི་སྐྱེ་བའི་ཆོས་ཅན་དུ་བྱེད་པ་ཡིན། དེ་ལ་ཐོགས་བཅས་བདུད་འབྱུང་བཞིའི་ས་སྒྲ་དང་གནམ་ལྡང་གི་ཐོག་སོགས་ས་མ་ཐོབ་བར་དུ་མི་ཆོད་གསུངས། ཐོགས་མེད་ཡིད་སྣང་གི་བདུད་ནི་རྣམ་རྟོག་སྔ་མ་རྗེས་གཅོད། ཕྱི་མ་མདུན་བསུ། ད་ལྟ་ཕྱི་ནང་གི་མཚན་འཛིན་གསུམ་པོ་གང་རུང་གི་སྒོ་ནས་འཁྲུལ་ནི་ཡིན། རྣམ་རྟོག་སྔ་མ་བྱ་མ་ལྟ་བུ། རྣམ་རྟོག་ཕྱི་མ་བྱ་མའི་རྗེས་སུ་བུ་འབྲང་བ་ལྟར་དེ་གཉིས་འབྲེལ་ཐག་གི་ཞེན་པའི་དྲྭ་བ་དེ་གཅོད་དགོས་གསུངས། དགའ་བྲོད་བདུད་ནི་ཟབ་མོ་གཅོད་ཀྱི་གདམས་པ་ལ་མ་དགའ་ན་འཇུག་ལུགས་མེད། དགའ་ཞིང་ཞེན་པ་དེ་གཅོད་བྱ་ཡིན། སྙེམས་བྱེད་བདུད་ནི། ཟབ་མོ་གཅོད་ཀྱི་གདམས་པ་ཉམས་སུ་བླང་ནས་ངས་ལྷ་འདྲེའི་འགྲོ་དོན་བྱེད་བསམ་ན། ངས་ཞེས་པའི་ངར་འཛིན་དམ་ཧྲང་ངེ་བ་དེ་བདག་འཛིན་ཡིན་པས་དེ་གཅོད་དགོས་གསུངས། མི་ལྤགས་ཀྱི་གཡང་གཞི་ནི་ས་ཐོབ་འཕགས་པ་མ་གཏོགས་གཡུག་མི་ཉན་གསུངས། སོ་སྐྱེས་རང་ག་མས་གཡུག་ན་སྟེང་ལྷ་འཁྲུགས། བར་གཉན་འཁྲུགས། འོག་ཀླུ་འཁྲུགས་པར་གསུངས། ཆོས་སྐྱོང་མགོན་པོ་སོགས་འབོད་པའི་གྲི་རྐང་ནི་སྐྱེས་པ་གྲིར་ཤི་བ་རྟོག་པ་གཞན་གྱིས་བར་མ་ཆོད་པར་ཞེ་སྡང་གི་ངང་ནས་ཤི་བའི་བརླ་དགོས་གསུངས། དཔའ་བོ་འབོད་པའི་གྲི་རྐང་ནི། བུ་མོ་མཁའ་འགྲོའི་རིགས་ཅན་སྐྱེས་པས་མ་གོས། བནྡྷེ་དམ་ཉམས་ཀྱིས་མ་གོས་པའི་བརླ་དགོས་གསུངས། ལྷ་འདྲེ་འབོད་པའི་གྲི་རྐང་ནི། དགེ་སློང་འདུལ་ཁྲིམས་ཡང་དག་པ་དང་ལྡན་པ་ཐུགས་རྒྱུད་ན་བྱང་ཆུབ་ཀྱི་སེམས་དང་ལྡན་པ་དེའི་བརླ་དགོས་གསུངས། ཡང་ན་གང་ཟག་བྱང་ཆུབ་ཀྱི་སེམས་དང་ལྡན་པ་སེམས་ཅན་སྲོག་ལ་གནོད་འཚེ་ཕྲ་མོ་ཙམ་ཡང་སྤང་བའི་གྲི་རྐང་དགོས་གསུངས། དེའི་སྒྲ་ལྷ་འདྲེས་ཚོར་ན་གནོད་སེམས་ཐམས་ཅད་ཞི་བྱང་ཆུབ་ཀྱི་སེམས་དང་ལྡན་པར་བྱེད་པའི་བྱིན་རླབས་ཅན་ཡིན་གསུངས། ༈ བླ་རྣམ་སྐབས། སྐྱབས་གནས་ཀུན་འདུས་གུ་རུ་རིན་པོ་ཆེ་སྤྱི་བོའི་གཙུག་ཏུ་བསྒོམ། དབང་བཞི་བླང་། སྙིང་གི་དཀྱིལ་དུ་བསྒོམ། ཐུགས་ཡིད་དབྱེར་མེད་བསྲེས་གསུངས། རིག་འཛིན་མཁའ་སྤྱོད་གྲུབ་པའི་ཉེ་ལམ་ནི། འཆི་ཁར་ཕྱི་ནང་སྣོད་བཅུད་ཟངས་མདོག་དཔལ་རིར་གསལ་ཐུབ་ན་རབ། མ་ཐུབ་ན་རང་རྣལ་འབྱོར་མར་གསལ་བ་སྤྱི་བོའི་གུ་རུ་རིན་པོ་ཆེའི་ཐུགས་ཀར་བསྟིམ་ཏེ་ཐུགས་ཡིད་དབྱེར་མེད་དུ་མཉམ་པར་བཞག་ན་ངན་སོང་གསུམ་དུ་མི་འགྲོ་གསུངས། བར་དོའི་སྐབས་ཡང་གུ་རུ་རིན་པོ་ཆེ་བྱོན་ནས་དབང་བསྐུར་གདམས་པ་གནང་། ངོ་སྤྲོད་བཏབ་ནས་གྲོལ་འགྲོ་ནི་རེད་གསུངས། ཐོད་པའི་སྐྲ་རྩེ་ནས་ཆུ་ཐིག་པང་ཐོག་ཏུ་ལྷུང་བའི་ཡུན་ལ་ཐུགས་ཡིད་དབྱེར་མེད་དུ་མཉམ་པར་བཞག་ན་བསྐལ་པ་གཅིག་གི་སྡིག་སྒྲིབ་འདག་གསུངས། རྗེས་སུ་ཡི་རང་གི་དགེ་རྩ་མཉམ་དུ་ཐོབ་མི་ཐོབ་ལ། པཎ་ཆེན་བསོད་གྲགས་ལུགས་ལ་མཉམ་དུ་མི་ཐོབ་པར་གསུངས། འཇམ་དབྱངས་བཞད་པས་མཉམ་དུ་ཐོབ་གསུངས། མི་ཕམ་རིན་པོ་ཆེས་རྗེས་སུ་ཡི་རང་བྱས་ན་དོན་དུ་དགེ་རྩ་རྒྱ་ཆེན་པོ་ཐོབ་གསུངས།
༈ གཏོང་ལེན་སྐབས། མདུན་གྱི་ནམ་མཁར་གུ་རུ་རིན་པོ་ཆེ་གསལ་བཏབ། རང་གཞན་གྱི་དགེ་བ་རྒྱུ་འབྲས་དང་བཅས་པ་འོད་དཀར་གྱི་རྣམ་པར་ཕར་འཕྲོས་སེམས་ཅན་ལ་ཕོག །སེམས་ཅན་གྱི་རྒྱུད་ཀྱི་སྡུག་བསྔལ་རྒྱུ་འབྲས་དང་བཅས་པ་འོད་ནག་གི་རྣམ་པར་ཚུར་འཕྲོས་རང་གི་བདག་འཛིན་ལ་ཐིམ། དེ་རྗེས་སེམས་ཅན་ཐམས་ཅད་སངས་རྒྱས་པར་བསམ། བདག་འཛིན་སྡིག་སྒྲིབ་དང་བཅས་པ་ཆོས་ཀྱི་དབྱིངས་སུ་དག་པར་བསམ་ནས་མཉམ་པར་བཞག་གསུངས། དགེའོ།། །