རྫོགས་ཆེན་ཉམས་སུ་ལེན་ཚུལ་གནད་བསྡུས།
རྫོགས་པ་ཆེན་པོའི་ལམ་ཉམས་སུ་ལེན་ཚུལ། སྤྱིར་འོད་གསལ་རྫོགས་པ་ཆེན་པོའི་ལམ་ཉམས་སུ་ལེན་པ་ལ། སྔོན་འགྲོ་དངོས་གཞི་རྗེས་གསུམ་ཡོད་པ་ལས། དང་པོ་སྔོན་འགྲོ་སེམས་ཀྱི་ཁང་བུ་བཤིག་པའི་མན་ངག །དེ་ལ་རྩད་བཅད་པ། མཚང་བཙལ་བ། བྱུང་གནས་འགྲོ་གསུམ་ལ་བརྟག་པ་དང་གསུམ་ཡོད་པ་ལས། དང་པོ་རྩད་བཅད་པ་ནི། རྐུན་པོ་ངོས་འཛིན་ལྟ་བུའི་མན་ངག་ཁམས་གསུམ་འཁོར་བའི་འཁོར་རྩ་ངོས་ཟིན་དགོས་པ་ཡིན། འདིའི་སྐབས་སུ་དེང་སང་གི་ཁྲིད་མཁན་ཕལ་ཆེར་གྱིས་སློབ་བུ་རྣམས་ལ་ཁྱོད་ཀྱི་ལུས་ངག་ཡིད་གསུམ་གཙོ་གང་ཆེ་དཔྱོད་ཀྱིས་ཟེར། དེས་ཀྱང་ཁ་ཁ་རྒྱུག་མཆུ་མཆུ་རྒྱུག་ཙམ་གྱིས་ཁོས་ཅིག་བསམ་འདུག་གི ཐོག་མར་འཁྲུལ་མཁན་སོགས་སེམས་ཡིན་པས་སེམས་གཙོ་ཆེ་ཟེར། ཡང་དེ་ལ་ཁྱོད་ཀྱི་སེམས་ལ་ཁ་དོག་དང་དབྱིབས་གཟུགས་སོགས་ཡོད་མེད་དང་བྱུང་གནས་འགྲོ་གསུམ་ལ་རྟོག་དཔྱོད་གྱིས་དང་ཟེར། དེས་ཀྱང་ཅི་ཡང་མེད་གི་ཟེར་བ་ཙམ་ན་ཁྱོད་ཤེས་ཡོད་གི་ད་མ་བཅོས་པར་ཞོག་ལ་ཨ་གཏད་སོགས་སུ་ལྟོས་ནས་བསྒོམ་ཟེར་ན འང་། དེ་འདྲ་འཆད་པ་ལ་ཕྱི་སྒོ་ཕྱི་ནས་བསྡམ། ནང་སྒོ་ནང་ནས་བསྡམས་ཏེ་གསང་རྒྱ་དམ་པོར་བྱེད་མི་དགོས། དེ་ཕྱག་རྫོགས་དབུ་གསུམ་གང་གི་ཡང་ལུགས་མ་རེད། དེ་ལྟ་བུ་ཞིག་ཇོ་རྒན་མ་ཞིག་གིས་ཀྱང་ཤེས་ནུས་པས་དེ་ཙམ་སྟོན་པའི་ཆེད་རྡོ་རྗེ་འཆང་བྱོན་ཡང་མི་དགོས་པས་སྲོལ་ངན་དེ་ཕྱིན་ཆད་སྣུབ་ཐུབ་དགོས་གསུངས། རང་ལུགས་ལ་གང་ཟག་གི་བདག་འཛིན་འཁོར་རྩར་བཞེད་པས་བློ་ཕྱིན་ཅི་ལོག་གི་ངོར་ཕུང་པོ་ལྔའམ་ལུས་ངག་ཡིད་གསུམ་ལ་བདག་གམ་ངར་སྣང་ངོ་། །དེ་ལ་བདག་ཏུ་འཛིན་པའམ་ངར་འཛིན་པར་བྱེད་པས་དེ་ཉིད་དགག་བྱའི་སྣང་ཚུལ་ངེས་པ་ཟེར་བ་ཡིན་པས་གང་ཟག་གི་བདག་འཛིན་འཁོར་རྩར་བཞེད་པ་ཡིན། ཆོས་ཀྱི་བདག་འཛིན་ཤེས་སྒྲིབ་ཡིན་པར་འདོད་དོ། །རྒྱལ་ཚབ་བྱམས་པས། འཁོར་གསུམ་རྣམ་པར་རྟོག་པ་གང་། །དེ་ནི་ཤེས་བྱའི་སྒྲིབ་པར་འདོད། །ཅེས་གསུངས་པ་དེ་མདོ་ནས་སྔགས་ཀྱི་བར་དུ་དེ་ལྟར་ཁས་ལེན་པ་ལས། གཞན་དུ་སྒྱུར་མི་དགོས། གཞན་གྱི་ལྷན་པོ་རྒྱབ་མི་དགོས་གཞན་དང་བསྲེ་མི་དགོས་བསྲེ་ན་མི་འགྲིགས། ཇི་ལྟར་མི་འགྲིགས་ན། ཕྱི་རབས་པ་དག་གིས་དགག་བྱ་ལ་བདེན་གྲུབ་སྦྱར་ནས་དེ་ཉིད་དགག་བྱ་ངེས་པར་བཞེད་ནས་བདེན་འཛིན་ཉོན་སྒྲིབ་ཏུ་འདོད་པས་ཆོས་ཀྱི་བདག་འཛིན་ཡང་འཁོར་རྩར་བཞེད་པས་གང་ཟག་གཅིག་གིས་བློ་ངོར་འཁོར་རྩར་འདོད་ཚུལ་མི་འདྲ་བ་གཉིས་བཟུང་མི་བདེ་བས་མི་འགྲིགས། གཞན་ཡང་རང་ལུགས་ལ་ཉན་རང་གིས་ཆོས་ཀྱི་བདག་མེད་ཡོངས་སུ་རྫོགས་པར་མ་རྟོགས་པར་འདོད་པ་དང་། གཞན་གྱིས་ཉན་རང་གིས་ཆོས་ཀྱི་བདག་མེད་རྫོགས་པར་རྟོགས་པར་འདོད་པ་སོགས་ཡིན་པས་དེ་གཉིས་བསྲེ་ན་མི་འགྲིགས་པས། དཔེར་ན་གྲོ་མ་དང་མར་ཁུ་བསྲེས་པ་ལྟ་བུའི་གཅིག་ལ་གཅིག་གིས་ཕན་ཐོག་པ་གཅིག་གྲོགས་གཅིག་གིས་བྱེད་པ་ཞིག་ཡིན་ན་བསྲེ་ཆོག་པ་ལ་དེ་མིན་པས་བསྲེ་མི་དགོས། དཔེར་ན་རང་ལུགས་ལ་ངེས་ཤེས་གཏིང་ནས་སྐྱེ། ཕུ་ཐག་ནང་ནས་ཆོད་པར་བྱེད་པ་གལ་ཆེ། གཞན་ལུགས་ལ་ཡང་དེང་ནས་བྱང་ཆུབ་སྙིང་པོའི་བར་དུ་དད་པ་དག་སྣང་བྱེད་པ་གལ་ཆེ་བས་དེ་ནི་སྐྱེ་བོ་ཡ་རབས་ཀྱི་ལུགས་ཡིན་གསུངས། སྤྱིར་བོད་འདིར་གྲུབ་མཐའ་ཉི་ཚེ་ཞིག་དང་བདུན་ཡོད་པས་དེ་དག་ཐམས་ཅད་ལ་རང་རང་གི་ལམ་ནས་རྣམ་གྲོལ་བྱང་ཆུབ་སྒྲུབ་པའི་ལམ་ཚང་ལ་མ་ནོར་བ་རེ་ཡོད་པ་ཡིན་པས་དེ་རྣམས་ཕན་ཚུན་བསྲེ་མི་དགོས་གསུངས། ༈ གཉིས་པ་མཚང་བཙལ་བ་ནི། བདག་འཛིན་དེས་ཇི་ལྟར་འཛིན་ན་རིལ་པོ་གཅིག་བདེན་དུ་འཛིན། དེ་ཉིད་ལྡོག་བྱེད་ག ཅིག་གི་གཉེན་པོ་དུ་མ་ཡིན་པས་ཕུང་པོ་ལྔ་དང་། དེ་ཡང་གཟུགས་ཀྱི་ཕུང་པོ་ལྟ་བུ་ལ་མཚོན་ན་རྡུལ་ཕྲན་ཆ་མེད་དུ་བཤིག་ན་གཅིག་ཡིན་པ་དང་འགལ་ལ། བདེན་པའི་གཉེན་པོ་རྫུན་པ་དང་མི་རྟག་པ་ཡིན་པས་སྐད་ཅིག་སྐད་ཅིག་གིས་འགྱུར་བའི་བདག་ཉིད་ཅན་དེ་ཕྲ་བ་ཆོས་ཉིད་ཀྱི་མི་རྟག་པ་དང་། རགས་པ་རྒྱུན་གྱི་མི་རྟག་པ་ཡིན་པས་རྒྱུ་རྐྱེན་རྟེན་འབྲེལ་ཙམ་ལས་བདེན་པར་གྲུབ་པ་མེད་པའི་ཕྱིར་ན་དེ་ལྟར་རྟོགས་ཚེ་བདག་འཛིན་རང་ལོག་ཏུ་འགྲོ་བས་གང་ཟག་གི་བདག་མེད་རྟོགས་པ་རེད། ལུས་ངག་ཡིད་གསུམ་གཙོ་གང་ཆེ་བརྟགས་པའི་སྐབས་འདིར་སེམས་གཙོ་ཆེ་བར་འདོད་ཀྱང་། ཞིབ་པར་བརྟགས་ན་ལུས་ཀྱང་གཙོ་ཆེ་སྟེ། སངས་རྒྱས་ཀྱི་བསྟན་པའི་སྒོར་འཇུག་པ་ལ་སོར་བྱང་སྔགས་གསུམ་མིན་པའི་སྒོར་འཇུག་ཚུལ་མེད་པས་དེས་ན་དང་པོར་སོ་སོར་ཐར་པའི་སྡོམ་པ་རྒྱུད་ལ་སྐྱེ་བ་ལ་གླིང་གསུམ་གྱི་སྐྱེས་པ་བུད་མེད་དང་། དེའི་ནང་ནས་ཀྱང་འཛམ་བུའི་གླིང་གི་ལུས་རྟེན་ཁྱད་པར་ཅན་དགོས་ཏེ། གཞན་ལྷ་དང་། ཀླུ་དང་། ནམ་མཁའ་ལྡིང་སོགས་ལ་མི་སྐྱེ། སངས་རྒྱས་དངོས་སུ་བྱོན་ཀྱང་ཕན་པའི་ཐབས་མེད། ལྷ་དང་ཀླུ་ལ་སོགས་པ་ལ་བྱང་སེམས་ཀྱི་སྡོམ་པ་ཙམ་སྐྱེ་བ་ཡོད་ཀྱང་སེམས་ཁོ་ནས་མི་ཡོང་། ལུས་ངག་ཡིད་གསུམ་ཚོགས་དགོས། སྔགས་བླ་མེད་ཀྱི་སྒོར་འཇུག་པ་ལ་ཁམས་དྲུག་ལྡན་གྱི་མིའི་ལུས་རྟེན་ཞིག་མིན་ན་དབང་བཞིའི་སྣོད་དུ་མི་རུང་སྟེ་མཚུངས་ལྡན་གྱི་རྒྱུ་མེད་པའི་ཕྱིར། དེ་བཞིན་ཏུ་དལ་འབྱོར་བཅོ་བརྒྱད་ཚང་བ་ལ་ཡང་ལུས་གཙོ་ཆེ་སྟེ་དཔེར་ན་བྱིས་པ་བཙས་མ་ཐག་པ་ཞིག་ལ་མིག་དང་རྣ་བ་གཉིས་ཀ་མེད་ན་མཐོང་ཐོས་གང་ཡང་མེད་པས་ཆོས་དང་འཇིག་རྟེན་གཉིས་ཀྱི་བྱ་བ་ཅུང་ཟད་ཙམ་ཡང་བསྒྲུབ་མི་ཤེས་པས་ལུས་ཀྱང་གཙོ་ཆེ་སྟེ། དེ་བཞིན་དུ་ངག་ཀྱང་གཙོ་ཆེ་བར་གསུངས་ཏེ་སྤང་བླང་གི་གནས་སྟོན་པ་ལ་ངག་མཚན་ཉིད་ཚང་བ་སྨྲ་ཤེས་ཤིང་བརྡ་འཕྲོད་པ་ཞིག་ངེས་པར་དགོས་ཏེ། དེ་མེད་ན་དུད་འགྲོའི་སྒྲ་སྐད་ཙམ་གྱིས་མི་ཕན། ལུས་ངག་ཡིད་གསུམ་ལ་བརྟེན་ནས་འབྱུང་སྟེ། ལུས་ཀྱི་བྲང་དང་མིད་པ་ལྕེ་དང་སོ་རྐན་སོགས་ལ་བརྟེན་ཏེ་སེམས་ཀྱིས་ཀུན་ནས་བསླང་ཏེ་རླུང་གི་རྟ་ལ་ངག་ཡི་གེའི་ཕྲེང་བ་ལ་བརྟེན་པ་ཚིག་དོན་ཐམས་ཅད་འབྱུང་བས་ངག་གཙོ་ཆེ། སེམས་རྣམ་ཤེས་ཚོགས་བརྒྱད་དང་འཁོར་སེམས་བྱུང་ལྔ་བཅུ་དང་བཅས་པ་དེ་མེད་ན་རོ་རེད། ཐོག་མར་འཁོར་བར་སྐྱེ་བ་པོ་སེམས་རེད། ལུས་ངག་གཉིས་འདོར་ལེན་བྱེད་འགྲོ་ནི་རེད། བདག་འཛིན་མ་རིག་འཁྲུལ་བའི་དབང་གིས་སྣང་། སྣང་བ་ལྟར་དུ་ཞེན། ཞེན་པ་ལྟར་དུ་ཨ་འཐས་བདེན་འཛིན་གྱིས་བདག་དང་བདག་གིར་འཛིན་པའམ་ང་དང་ང་ཡི་བར་འཛིན་པ་སོགས་འབྱུང་བ་ཡིན་པས་ཕྱུགས་དང་ཕྱུགས་རྫི་ལྟ་བུའི་ཚུལ་གྱིས་བདག་གིར་འཛིན་པའམ་ང་ཡི་བར་འཛིན་ནི་རེད། སྤྱིར་འཁོར་བ་ཡ་མཐའ་ཐུག་མེད། སྐྱེ་བ་ཡ་མཐའ་ཐུག་མེད། འཁྲུལ་བ་ཡ་མཐའ་ཐུག་མེད་ནས་ཐ་མ་དེ་རིང་ད་ལྟ་ལ་མ་ཐུག་གི་བར་དུ་སྲིད་པ་འཁོར་བ་འདིར་འཁྱམ་ནི་རེད། དེའི་གནས་སྐབས་ནའང་འཁྱམས་པ་པོའི་གང་ཟག་དེ་ལ་མ་དག་འཁོར་བའི་གནས་ན་ལུས་ངག་ཡིད་གསུམ་མི་ཚང་བའི་སེམས་ཞིག་མེད། གང་དུ་འཁྱམས་པའི་གནས་དེ་ལ་རིགས་དྲུག་འཁོར་བའི་གནས་རིས་དྲུག་ཡོད་པས་ལུས་ཀྱང་ཐ་དད་དོ། །འདོད་ཁམས་ཀྱི་ལུས་ནི་གདོས་བཅས་ཤ་ཁྲག་གི་ལུས། གཟུགས་ཁམས་རྣམས་སུ་དྭངས་མ་འོད་ཀྱི་ལུས། གཟུགས་མེད་ན་ཏིང་ངེ་འཛིན་ཡིད་རིག་གི་ལུས་ཡོད་པར་ཐེག་ཆེན་པའི་བཞེད་པ་ལྟར་ལུས་ངག་ཡིད་གསུམ་ཚོགས་པ་ལ་བརྟེན་ནས་ལས་བསགས། ལས་ཀྱི་དབང་གིས་ཁམས་གསུམ་འཁོར་བར་སྐྱེ་ནི་རེད་མ་གཏོགས་ལས་མ་བསགས་པར་སེམས་རྐྱང་བ་འཁོར་བར་སྐྱེ་བ་མི་སྲིད་དོ། །དཔེར་ན་ལས་མ་བསགས་པར་སེམས་ཁོ་ན་སྔུན་ནས་ཉ་ལྕགས་ཀྱུས་འདྲེན་པ་ལྟ་བུ་ཁྲིད་འོང་མཁན་ཞིག་དང་། རྗེས་ནས་ཤ་བ་ཁྱིས་དེད་པ་ལྟ་བུའི་འདེད་འོང་མཁན་གཏན་ནས་ཡོད་པ་མིན། ལས་འབའ་ཞིག་གིས་བྱེད་པ་ཡིན་ཏེ། འཇིག་རྟེན་ལས་ཀྱིས་བྱས་ཤིང་ལས་ཀྱིས་སྤྲུལ། །ལས་ནི་ཀུན་བྱེད་རི་མོ་མཁན་དང་མཚུངས། །ཞེས་ཟག་བཅས་ཀྱི་ལས་དེ་ལ་དགེ་མི་དགེ་མི་གཡོ་བའི་ལས་དང་གསུམ་ཡོད། དེ་གང་བསྒྲུབ་ཀྱང་ལུས་ངག་ཡིད་གསུམ་ཚོགས་པ་ལ་བརྟེན་དགོས། སེམས་རྐྱང་བས་མི་འགྲུབ། དག་པ་སངས་རྒྱས་ཀྱི་ཞིང་ན་སྐུ་གསུང་ཐུགས་གསུམ་མི་ཚང་བའི་ཐུགས་རྐྱང་བ་ཞིག་མི་སྲིད་པས་དེ་ལྟར་ལུས་ངག་ཡིད་གསུམ་སྒྱེད་པུ་སུམ་ཚུགས་ལྟ་བུ་ཡིན་པས་གཙོ་གང་ཆེ་ངོས་ཟིན་དཀའ་ནའང་མདོ་ནས་སྔགས་ཀྱི་བར་དུ་སེམས་འདི་གཙོ་ཆེ་བར་གསུངས་ཡོད་པས་དཔྱད་སྒོ་ཙམ་ཞིག་བཏོད་ནས་ད་རང་རང་གིས་བརྟགས་ཤིང་དཔྱད་ནས་ལུང་རིགས་མན་ངག་རྣམས་དང་མི་འགལ་བ་ཞིག་ངེས་ཤེས་གཏིང་ནས་འདྲོང་བ་ཞིག་མ་སྐྱེས་ན་རྣམ་པ་མི་དག་ནི་རེད་གསུངས།
༈ གསུམ་པ་བྱུང་གནས་འགྲོ་གསུམ་ལ་བརྟགས་པ་ནི། ཁྲེགས་ཆོད་ཡེ་བབ་སོར་བཞག་དང་དེའི་ཡང་ཡིག་སོགས་སྔོན་བྱོན་གྱི་རིག་འཛིན་བརྒྱུད་པའི་གསུང་སྲོལ་མང་པོ་ཡོད་ཀྱང་། སྐབས་འདིར་རྡོ་གྲུབ་རིན་པོ་ཆེའི་ཞལ་ནས་ཉག་བླ་རིན་པོ་ཆེ་ལ་གསུངས་པ་ལྟར་འཆད་པ་ལ། ཆོས་ཐམས་ཅད་ཡུལ་དང་ཡུལ་ཅན་གཉིས་སུ་བསྡུ་ནི་རེད། དཔེར་ན་ཤེས་བྱའི་ཆོས་ཐམས་ཅད་བདེན་པ་གཉིས་སུ་བསྡུས་ནས་བསྟན་པ་ལྟར་ཡུལ་ཐམས་ཅད་བྱུང་ས་གནས་ས་འགྲོ་ས་གསུམ་དུ་བསྡུས། ཡུམ་ཅན་ཐམས་ཅད་བྱུང་མཁན་གནས་མཁན་འགྲོ་མཁན་གསུམ་དུ་བསྡུས་པ་ཡིན་ལ། དང་པོ་བྱུང་ས་བརྟགས་པའི་ཚེ་གཞི་ཞིག་ལ་སྦྱར་དགོས་པས། དཔེར་ན་མདུན་གྱི་ཀ་བ་ལྟ་བུ་ད མིགས་ཚེ། ཀ་འཛིན་མིག་ཤེས་ཀྱིས་སྐད་ཅིག་དང་པོ་ཀ་བའོ་སྙམ་པའི་ཚེ་ངའི་ཤེས་པ་འདི་ཀ་བ་ལས་བྱུང་བ་ཡིན་ནམ་མིན་སྙམ་ནས། དེའི་ཚེ་ཡུལ་ཅན་ལ་མི་དཔྱོད་པར་ཡུལ་ལ་དཔྱད་ནས་ཀ་བ་རང་གི་ངོ་བོ་ཡེ་ནས་སྟོང་བཞིན་དུ་སྣང་ཆ་མ་འགགས་པར་སྣང་བ་དང་། སྣང་བཞིན་དུ་ངོ་བོ་ཡེ་སྟོང་སྤྲོས་པ་དང་བྲལ་བའི་བདག་ཉིད་དུ་གནས་པ་ཡིན་ཏེ། སྣང་བའི་སྣང་ཚུགས་མ་ཤོར་བཞིན་དུ་སྟོང་། སྟོང་པའི་སྟོང་ཚུགས་མ་ཤོར་བཞིན་སྣང་བའི་སྣང་སྟོང་ཟུང་འཇུག་གི་བདག་ཉིད་དུ་ངེས་དགོས། གཞན་གྱིས་ཀ་བ་རང་གི་ངོ་བོས་མི་སྟོང་ཀ་བ་བདེན་གྲུབ་ཀྱིས་སྟོང་པར་འདོད། དེས་ན་བདེན་གྲུབ་ཤེས་བྱ་ལ་མི་སྲིད་པ་དང་། དོན་དམ་དཔྱོད་པའི་ངོར་མི་སྟོང་བ་གཉིས་སྣང་སྟོང་ཟུང་འཇུག་དང་། ཐབས་ཐབས་བྱུང་དང་། ཆོས་ཉིད་ཆོས་ཅན་དུ་འབྲེལ་བ་མེད་དོ། །བདེན་གྲུབ་ཤེས་བྱ་ལ་མི་སྲིད་པས། དེས་སྟོང་པའི་སྟོང་ཉིད་ཀྱང་མི་སྲིད་དེ། རྟ་བ་ལང་གིས་སྟོང་ཟེར་བ་ལྟ་བུ་ཡིན། གལ་ཏེ་སྲིད་ན་ཡང་སྣང་སྟོང་ཟུང་འཇུག་མི་རུང་སྟེ། ངོ་བོ་ཐ་དད་འདོད་པའི་སྣང་སྟོང་ཟུང་འཇུག་སྐུད་པ་དཀར་ནག་སྦྲེལ་བ་བཞིན་དུ་མི་སྲིད་པའི་ཕྱིར་རོ། །སྤྱིར་མདོ་ལངྐར་གཤེགས་པ་ན། སྟོང་ཉིད་ཐ་ཤལ་བ་ཞིག་དང་བདུན་གསུངས་ཡོད་པས་གཅིག་གཅིག་གིས་སྟོང་པ་དང་། མོ་གཤམ་བུས་སྟོང་པ་དང་། རི་བོང་རྭས་སྟོང་། དབུལ་བོ་ནོར་གྱིས་སྟོང་བ་སོགས་སྟོང་ཉིད་ཐ་ཤལ་བ་ཡིན་པས། འདི་ལྟ་བུ་ནི་ཐར་འདོད་ཀྱི་སྐྱེས་བུས་ཉམས་སུ་ལེན་བྱའམ་བསྒོམ་བྱ་མིན་ནོ། །ཀ་བ་དོན་དཔྱོད་ཀྱི་ངོར་མི་སྟོང་པར་བདེན་གྲུབ་ཀྱིས་སྟོང་པར་འདོད་པས་ནི། བདེན་གྲུབ་སོགས་ཞིག་སྣང་སྐྱེ་ཡོད་ཀྱང་མ་སྟོང་བར་ཀ་བ་བདེན་གྲུབ་རྟག་བརྟན་ཐེར་ཟུག་གི་རྣམ་པར་ཡོད་གི་གསུངས་སོ། །བླ་མ་རྒྱ་སྡེ་བས། ཀ་བ་རང་གི་ངོ་བོས་སྟོང་པར་བཞེད་ཀྱང་སྟོང་ཉིད་སྤྲོས་བྲལ་ཡིན་པར་བཞེད་པས་སྣང་ཆ་སྤངས་པའི་སྟོང་ཆ་དེ་སྤྲོས་བྲལ་ཡིན་པར་གོ་རྒྱུ་མེད། དེས་རྗེས་འབྲང་རྣམས་ཀྱིས་མི་ཕམ་ལ་སྣང་སྟོང་ཟུང་འཇུག་ནམ་དུ་ཡང་ཡོད་དགོས་ན་འཕགས་པའི་མཉམ་བཞག་ཡེ་ཤེས་ཀྱི་ངོར་ཀ་བ་སྐྱ་ཤིང་གི་རྣམ་པར་ཡོད་དགོས་སོ་ཟེར་ན་ཡང་། དངོས་སུ་དེ་ལ་ལན་གསུངས་མེད་ཀྱང་རང་ལུགས་འདོད་ཚུལ་གྱིས་ཁེགས་པ་ཡིན་གསུངས། ཡུལ་ཅན་ལ་དཔྱད་ཚེ་མིག་ཤེས་ལྟ་བུ་ལ་མཚོན་ན་ཡུལ་གསལ་ཞིང་རིག་པའི་ཆ་དེ་འོད་གསལ་གཉུག་མའི་ཡེ་ཤེས་ཀྱི་འབྲས་རྟགས་ཕྱི་ལ་ཤར་བ་ཡིན་པས། གསལ་ཞིང་རིག་པ་ཤེས་པའི་མཚན་ཉིད་གསུངས་པ་ཡིན་ཏེ། མ་གོ་བ་གོ། མ་ཤེས་པ་ཤེས། མ་རྟོགས་པ་རྟོགས་པར་བྱེད་པ་ཟེར་ནི་རེད་མ་གཏོགས་༼མར་མེ་ལྟ་བུ་༽གསལ་དཀར་བཞག་ནི་འདྲ་འདྲ་ཞིག་ཡོད་ནི་མ་རེད། དབྱིངས་སྤྲོས་བྲལ་སྟོང་ཆེན་གྱི་འབྲས་རྟགས་ཕྱི་ལ་ཤར་བས་ངོ་བོ་ཡེ་སྟོང་སྤྲོས་པ་དང་བྲལ་བ། དབྱིངས་ཡེ་ཟུང་འཇུག་གི་ཆ་ནས་ཤར་བའི་འབྲས་རྟགས་སུ་དེ་གཉིས་ཟུང་འཇུག་དབྱེར་མེད་ཀྱི་བདག་ཉིད་ཅན་ཡིན་པས་འདི་ནི་སེང་གེ་དཀར་མོའི་བུ་རྒྱུད་ལྟ་བུ་ཡིན་གསུངས། དེས་ན་རྡོ་གྲུབ་རིན་པོ་ཆེས་དབྱིངས་ཡེ་ཟུང་འཇུག་འདི་ཆོས་ཐམས་ཅད་ཀྱི་དབུས་ན་གནས་ཡོད། སྲོག་ཏུ་ཞུགས་ཡོད། ཕྱག་རྒྱས་བཏབ་ཡོད་གསུངས་པས་ན་ད་ལྟའི་སྣང་བ་འདི་དག་ཐམས་ཅད་བདེ་གཤེགས་སྙིང་པོའམ་གཉུག་མའི་འོད་གསལ་གྱི་བར་ན་གཅིག་གིས་ཀྱང་ཆོད་ཡོད་ནི་མ་རེད་༼ཕྱག་གི་མཛུབ་མོ་བསྒྲེངས་ཏེ་༽འདིའི་འབའ་རི་འབུ་ར་ཀ་སི་ཀོ་སེ་འདི་ཅིག་ཡིན་ནི་རེད་གསུངས་ཏེ་བཞད་སོང་གསུངས་སོ། །རྡོ་གྲུབ་རིན་པོ་ཆེས་སྦྱོར་དངོས་རྗེས་གསུམ་ཞིག་ཚང་དགོས། དེ་ཚང་ནས་ལོ་གསུམ་བར་ཏུ་བྱུང་གནས་འགྲོ་གསུམ་གྱི་ལྟ་བ་འདི་བསྒོམ་ནུས་ན་དངོས་གཞི་ཁྲེགས་ཆོད་སོགས་བསྒོམ་རྒྱུ་མ་བྱུང་བར་ཤི་སོང་ན་བར་དོར་གྲོལ་ཐུབ་གསུངས་ནི་རེད། འདི་ནི་ཤིན་ཏུ་ཡག་སྟེ། འདི་འདྲ་གོ་རྒྱུ་ཞིག་ཡོད་ནི་མ་རེད། གང་ཟག་དེས་བར་དོའི་སྣང་ཆ་ཐམས་ཅད་སྣང་སྟོང་ཟུང་འཇུག་ལ་སོགས་པར་ངེས་པས་མཉམ་བཞག་གི་རང་དུས་དེར་མཐའ་བཞིའི་འཛིན་པ་དང་། རྟག་ཆད་དུ་འཛིན་པ་དང་། ཆོས་དང་བདག་འཛིན་སོགས་གང་ཡང་མི་འཛིན། འདི་ནི་ལམ་ཞུགས་ཀྱང་ཡིན། རྫོགས་པ་ཆེན་པོ་ཡང་ཡིན། མདོར་ན་འཁོར་འདས་ལམ་གསུམ་གྱིས་བསྡུས་པའི་ཆོས་ཐམས་ཅད་དབྱིངས་ཡེ་ཟུང་འཇུག་གམ་སྣང་སྟོང་ཟུང་འཇུག་མིན་པ་གཅིག་ཀྱང་མེད། མ་དག་འཁོར་བའི་གནས་ན་གང་སྣང་གི་ཆོས་ཐམས་ཅད་སྣང་སྟོང་ཟུང་འཇུག་མིན་པ་གཅིག་ཀྱང་མེད། མཐར་ཐུག་འབྲས་བུའི་དུས་ན་གདོད་མའི་སྟོང་ཆེན་གྱི་དབྱིངས་ལས་ཤར་བའི་སྣང་ཆ་ཞིང་སྐུ་སོགས་ཡེ་ཤེས་རང་སྣང་གི་བཀོད་པ་མཐའ་ཡས་པར་སྣང་བ་ཡིན་གསུངས། རྣལ་འབྱོར་ལམ་པའི་གནས་སྐབས་ན་ཆོས་ཐམས་ཅད་ཀྱི་གནས་ལུགས་དབྱིངས་ཡེ་ཟུང་འཇུག་མངོན་སུམ་དུ་རྟོགས་ནས་རྗེས་ཐོབ་དུ་གང་སྣང་སྣང་སྟོང་ཟུང་འཇུག་དུ་བུན་བུན་ཤིག་ཤིག་ཏུ་ཤར་ཐུབ་པ་ཡིན་གསུངས། བླ་མ་ཉག་བླས་རྡོ་གྲུབ་རིན་པོ་ཆེ་ལ་སྐབས་འདིའི་བྱུང་གནས་འགྲོ་གསུམ་གྱི་ལྟ་བ་དང་། དབུ་མའི་ལྟ་བ་གཉིས་ལ་མཐོ་དམན་ཡོད་དམ་མེད་ཞུས་ཚེ། མཐོ་དམན་ལོས་ཡོད། དབུ་མ་མདོ་རེད། དེ་ཡན་ཆད་ན་སྔགས་ཀྱི་རྒྱུད་སྡེ་གསུམ་ཡོད། དེ་ཡན་ན་ཡང་སྔགས་ནང་རྒྱུད་སྡེ་གསུམ་དེའི་ནང་ནས་ཀྱང་ཐེག་དགུའི་ཡང་རྩེ་རྫོགས་པ་ཆེན་པོ་ཨ་ཏི་ཡོ་ག་ཡིན་པས་ཁྱད་ལོས་ཡོད། གཏེར་སྟོན་ཚང་ཁྱད་གཞིའི་སྟེང་ནས་ཁྱད་ཆོས་ཆེན་པོ་ཞིག་འཇོག་རྒྱུ་ཡོད་ནི་རེད་གསུངས། འོ་ན་འཛིན་སྟངས་ཡོད་དགོས་སམ་མི་དགོས་ཞུས་ཚེ་དེ་དགོས་ན་སྔོན་འགྲོ་སེམས་ཀྱི་ཁང་བུ་བཤིག་པ་མ་རེད་བརྩིགས་པ་རེད་གསུངས། བླ༷་མ༷་ལུང་རྟོག༷ས་ཚང་གིས་ནི་འཛིན་སྟངས་ཡོད་དགོས་གསུངས་ནི་ཡིན་ཞུས་ཚེ། འོ་གསུངས་པ་ཡིན་གསུངས། བླ་མ་ཉག་བླས་རིན་པོ་ཆེས་འཛིན་སྟངས་མེད་གསུངས་པ་ཡིན། བླ་མ་ལུང་རྟོགས་ཚང་གིས་ཡོད་དགོས་གསུངས་ནི་ཡིན། བླ་མ་ཚང་ཁྱེད་ཀྱིས་གང་ལྟར་བཞེད་པ་ཡིན་གསུངས་པས། ཁོང་གི་འཛིན་སྟངས་འཇོག་ནི་མིན་ཞུས། དེ་ན་ཁྱད་གཞིའི་སྟེང་གི་ཁྱད་ཆོས་ཇི་ལྟར་ཡོད་ལགས་ཞུས་ཚེ། སྣང་སྟོང་ཟུང་འཇུག་ངེས་པའི་ངེས་ཤེས་མར་མེ་ལྟ་བུའི་སྟེང་ནས་མཉམ་བཞག་ལ་ལྷོད་སེ་བཞག་པའི་དུས་དེར་མཐའ་བཞིའི་འཛིན་སྟངས་གང་ཡང་མེད་པས་དེའི་འབྲས་རྟགས་ལ་ངོ་བོའི་དབྱིངས་ལ་ཤར་ཆ་འགགས་མེད་དུ་འཆར་ཐུབ་པ་འདི་དབུ་མ་ལ་མེད་པའི་ཁྱད་ཆོས་ཡིན། སྤྱིར་ཁྲེགས་ཆོད་ཀྱི་ལམ་ཤར་གྲོལ་དུས་མཉམ་ཡིན་པས། དེ་དུས་ཤེས་རྒྱུད་ལ་བྱུང་གནས་འགྲོ་གསུམ་གྱི་ལྟ་བས་ཁྱབ་ཡོད་པའི་འབྲས་རྟགས་སུ་གཉེན་པོ་གཞན་བསྟེན་མི་དགོས་པར་རང་གྲོལ་དུ་འགྲོ་བ་འདི་དབུ་མ་ལ་མེད་པའི་ཁྱད་ཆོས་ཡིན། སྤྱིར་ཁྲེགས་ཆོད་ཀྱི་ལམ་ཤར་གྲོལ་དུས་མཉམ་ཡིན་པས་འདི་དངོས་གཞིའི་ཤར་གྲོལ་མཚན་ཉིད་པ་མིན་ཡང་ཤར་གྲོལ་གྱི་མགོ་འདི་ནས་རྩོམ་པ་ཡིན་པའི་གནད་ཀྱིས་འདི་ཁྲེགས་ཆོད་ཀྱི་སྔོན་འགྲོར་འགྲོ་བའི་རྒྱུ་མཚན་དེ་ལྟར་ཡིན་གསུངས། གཞན་ཡང་བྱུང་གནས་འགྲོ་གསུམ་བརྟགས་ཚུལ་ནི། གློ་བུར་འཁྲུལ་བའི་སྣང་བ་འདི་ཐོག་མའི་གཞི་དུས་ན་མེད་པས་བྱུང་སའི་གནས་ཀྱིས་སྟོང་། བར་དུ་གནས་ས་ཡང་མེད་དེ་གློ་བུར་གྱི་མགྲོན་པོ་ལྟ་བུ་ཉག་གཅིག་ཡིན་ཏེ། དཔེར་ན་མིག་ནད་ཅན་གྱིས་ནམ་མཁར་སྐྲ་ཤད་མཐོང་བ་དང་། མཁྲིས་ནད་ཅན་གྱིས་དུང་སེར་པོར་སྣང་བ་དང་། ཆུ་ཆབ་རོམ་གྱིས་བསྡམས་པ་བཞིན་དུ་གློ་བུར་གསར་བྱུང་གི་བདག་ཉིད་ཡིན་པས་གནས་པའི་ངོ་བོ་སྟོང་། མཐར་ཕྱིན་འབྲས་དུས་ན་མེད་པས་འགྲོ་སའི་ཡུལ་གྱིས་སྟོང་བ་ཡིན་ནོ། །རོང་ཀློང་མི་ཕམ་སོགས་ཀྱིས་བཞེད་པ་ལྟར། སྣང་བ་ལྷར་བསྒྲུབ་པ་དང་། ཡུལ་ཅན་ཡེ་ཤེས་སུ་བསྒྲུབ་པའི་སྐབས། ཐ་སྙད་ཚད་མ་དེ་ལ་ཚུ་རོལ་མཐོང་བ་ལ་བརྟེན་པའི་ཀུན་ཏུ་ཐ་སྙད་པའི་ཚད་མ་དང་། དག་པའི་གཟིགས་པ་ལ་བརྟེན་པ་ཀུན་ཏུ་ཐ་སྙད་པའི་ཚད་མ་གཉིས་ལས། དང་པོ་དེ་ལ་མངོན་སུམ་ཚད་མ་དང་རྗེས་དཔག་ཚད་མ་སོགས་ཀྱི་ངོར་མ་དག་པའི་སྣང་བ་ལས་དག་པར་སྣང་མི་ནུས་ལ། གཉིས་པ་ནི། འཕགས་པའི་མཉམ་བཞག་ཡེ་ཤེས་ངོར་གཉིས་སྣང་མཐའ་དག་ནུབ་པའི་ཚུལ་གྱིས་ཡུལ་ཡུལ་ཅན་དུ་འཛིན་པའི་གཟུང་འཛིན་སོགས་གཏན་ལོག་ཏུ་སོང་བ་དང་། རྗེས་ཐོབ་ཀྱི་སྐབས་ནའང་སྣང་བ་བདེན་མེད་དུ་འཆར་བ་དང་། ས་བརྒྱད་པའི་གནས་སྐབས་ན་རྗེས་ཐོབ་ཏུ་སྣང་སྲིད་དག་པ་རབ་འབྱམས་ཤར་ཐུབ་པའང་ཡོད། ཁྱད་པར་སངས་རྒྱས་ཀྱིས་དག་པའི་གཟིགས་ངོར་ཆུའི་རྡུལ་ཕྲ་རབ་གཅིག་གི་སྟེང་ན་རྡུལ་སྙེད་ཀྱི་ཞིང་ཁམས་སྟོན་འཁོར་དང་བཅས་པ་བསམ་གྱིས་མི་ཁྱབ་པར་གཟིགས་པ་ནི་གནས་ལུགས་མཐར་ཐུག་གི་གཟིགས་པ་ཚད་མ་ཡིན་པས་ན་ད་ལྟའི་སོ་སྐྱེས་འཁྲུལ་བའི་སྣང་བ་འདི་དག་ཐམས་ཅད་ཚད་མ་ཡང་དག་མིན་པར་རྫུན་པ་བསླུ་བའི་ཆོས་ཅན་ཡིན་པར་མཐར་ཐུག་གི་ཚད་མ་དེ་དག་གིས་རྟོགས་ཐུབ་པར་གསུངས་པའོ། ༈ །རིག་པ་ཡིན་པའི་རྟགས་སུ་རྟོག་པ་རང་རྒྱུད་པ་གཅིག་འཆར་ནི་མ་རེད་གསུངས། ༈ གོལ་ས་ཐམས་ཅད་དང་སེམས་ཀྱི་དྲི་མ་ཙམ་ཡོད་རུང་ནི་མ་རེད་གསུངས། རྣམ་རྟོག་ཐམས་ཅད་རིག་པའི་རྣམ་ལྡན་དུ་འཆར་དགོས་གསུངས། དཔེར་ན་ཉི་མ་ཤར་ན་མུན་པ་འཐིབ་ལོང་མེད་པ་བཞིན་དུ་རིག་པ་ཁོ་རང་ཤར་དུས་རྣམ་རྟོག་ཐམས་ཅད་རིག་པའི་རྣམ་ལྡན་དུ་ཤར་འགྲོ་ནི་རེད་གསུངས། ༈ དྲན་ཤེས་བསྟེན་ཚུལ་ནི། དྲན་པ་རྙེད་ན་སྒོམ་རྙེད། དྲན་པ་སྟོར་ན་བསྒོམ་སྟོར། དྲན་ཤེས་ཞེས་པ་ནི་གོ་བཞིན་ཤེས་བཞིན་པ་དེའི་ངང་ནས་དྲན་ཤེས་བསྟེན་གྱི་རེད་གསུངས། ༈ མཉམ་བཞག་ལ་ལྷོད་ཡོད་དགོས། དེའི་ངང་ནས་རྩལ་གང་ཤར་བག་ཆགས་གསོག་ལོང་མེད་པར་གྲོལ་བས་རྗེས་ཐོབ་ཟེར། སྤྱོད་ལམ་གྱི་སྐབས་རིག་པ་བསྒྲིམ་དགོས་གསུངས་པས་སོ། །མི་ཕམ་པས། མན་ངག་བྱིས་པའི་རྩེད་མོ་འདྲ། །སྒོམ་པ་རི་རྒྱལ་རྒྱ་མཚོ་བཞིན། །ཞེས་གསུངས ། ༈ ཡེ་གཞི་འཕོ་འགྱུར་མེད་པ་གདོད་མའི་ངང༔ བློ་འདས་སྤྲོས་བྲལ་ཀ་དག་བླ་མ་ལ༔ འཁྲུལ་མེད་རང་རིག་ངང་ནས་གསོལ་བ་འདེབས༔ ཚེ་འདིར་སངས་རྒྱས་འགྲུབ་པར་བྱིན་གྱིས་རློབས༔ ཞེས་སོཿ ཡེ་ནས་འཁྲུལ་མེད་རིག་པ་སྟོན་མཛད་པའི༔ གདོད་མའི་མགོན་པོ་ཡེ་སངས་རྒྱས་དེ་ལ༔ བཀའ་དྲིན་དྲན་པའི་ངང་ནས་གསོལ་བ་འདེབས༔ སྣོད་བཅུད་ཆོས་སྐུར་གྲོལ་བར་བྱིན་གྱིས་རློབས༔ རིག་སྟོང་ཆོས་སྐུའི་བླ་མ་ཡིས༔ རིག་པའི་བུ་ཡི་བཞེད་ངོར་བྲིས༔ སྔགས་ཀྱི་སྲུང་མས་བྱ་ར་གྱིས༔ དམ་ཉམས་ལག་ཏུ་མ་ཤོར་བྱོས༔ ས་མ་ཡཱཿ རྒྱ་རྒྱ་རྒྱཿ