དཔལ་གསང་བའི་སྙིང་པོའི་ཟིན་བྲིས་གསང་བའི་སྒོ་བརྒྱ་འབྱེད་པའི་ལྡེའུ་མིག །

སྔ་འགྱུར་གྱི་ཆེ་བ་དྲུག་ནི། རོང་ཟོམ་པ་ཆོས་ཀྱི་བཟང་པོས། དང་པོ་སྤྱན་འདྲེན་པ་པོ་ཡོན་བདག་གི་ཆེ་བ། སྔ་འགྱུར་བའི་ཡོན་བདག་འཕགས་པ་རིགས་གསུམ་མགོན་པོའི་རྣམ་འཕྲུལ་ཆོས་རྒྱལ་མེས་དབོན་རྣམ་གསུམ་ཡིན་པས་ཕྱི་འགྱུར་གྱི་ཡོན་བདག་དང་མི་འདྲ། གཉིས་པ་གང་དུ་བསྒྱུར་བའི་གནས་ཕྱག་བཞེས་གཙུག་ལག་ཁང་གི་ཆེ་བ། སྔོན་སྤྲུལ་པའི་གཙུག་ལག་ཁང་བསམ་ཡས་སོགས་ཆོས་འཁོར་སྟོད་སྨད་ཡིན་པས་ད་ལྟའི་གྲོང་དགོན་ཕག་ཕུག་དང་མི་འདྲ། གསུམ་པ་སྒྲ་བསྒྱུར་ལོ་ཙཱ་བའི་ཆེ་བ། སྔོན་སྒྲ་བསྒྱུར་བཻ་རོ་ཙཱ་ན་སྐ་ཅོག་ཞང་གསུམ། རྨ་གཉགས། གནུབས་སོགས་སྤྲུལ་པའི་ལོ་ཙཱ་བས་བསྒྱུར་བའི་ཆོས་ཡིན། ད་ལྟ་བརྡ་སྤྲོད་གཞུང་དུམ་རེ་ཤེས་པ་ལ་ལོ་ཙཱར་བཏགས། དབྱར་མང་ཡུལ་དུ་བསྡད། དགུན་བལ་ཡུལ་དུ་ཡུག་རེ་ཕྱིན་ནས་བསྒྱུར་བ་དང་མི་འདྲ། བཞི་པ་པཎྜི་ཏའི་ཆེ་བ། སྔོན་ཞི་བ་འཚོ། སངས་རྒྱས་གསང་བ། པད་འབྱུང་། བི་མ་ལ་སོགས་སངས་རྒྱས་དང་ས་ཆེན་པོ་ལ་བཞུགས་པའི་བྱང་འཕགས་རྣམ་ཀྱིས་སྤྱན་དྲངས་པའི་ཆོས་ཡིན། ད་ལྟ་གསེར་འདོད་དུ་འཁྱམས་པ་རྣམས་དང་མི་འདྲ། ལྔ་པ་ཕྱག་རྟེན་མེ་ཏོག་གི་ཆེ་བ། སྔར་གསེར་ཤ་བའི་རླིད་བུ་དང་བྲེ་ལ་གཞལ་ནས་ཞུས་པའི་ཆོས་ཡིན། ད་ལྟ་མཆན་ནས་གསེར་ཞོ་རེ་གཉིས་བཏོན་ནས་ཞུས་པ་དང་མི་འདྲ། དྲུག་པ་བསྒྱུར་བྱ་ཆོས་ཀྱི་ཆེ་བ། སྔོན་འཕགས་ཡུལ་དུ་སངས་རྒྱས་ཀྱི་བསྟན་པ་གྲ་མ་ཉམས་དུས་བསྒྱུར་བར་མ་ཟད། འཕགས་ཡུལ་ན་མེད་པའི་རྒྱུད་བྱང་ཆུབ་སེམས་དཔའ་དང་གྲུབ་པ་དང་རིག་འཛིན་དང་མཁའ་འགྲོ་མ་རྣམས་ཀྱིས་བཟུང་སྟེ་དག་པའི་ཞིང་ན་བཞུགས་པ་དང་། འཛམ་གླིང་གི་བྱེ་བྲག་ཨོ་རྒྱན་དང་སིང་ག་ལ་ཡི་གླིང་སོགས་ནས་སློབ་དཔོན་པདྨ་དང་བི་མ་ལ་སོགས་གྲུབ་པའི་ཁྱུ་མཆོག་རྣམས་ཀྱིས་རྫུ་འཕྲུལ་གྱི་བཀོད་པས་བླངས་ནས་བསྒྱུར་བ་ཡིན། འགྱུར་ཡང་སྔོན་གྱི་ལོ་ཙཱ་བ་རྣམས་སྤྲུལ་པའི་སྐུ་ཡིན་པས་དོན་ཇི་ལྟ་བ་བཞིན་དུ་གཏན་ལ་འབེབས་པས་གོ་སླ་ཞིང་བྱིངས་འཇལ་བ་ལ་རླབས་ཆེ། ཕྱིས་ཀྱི་ལོ་ཙཱ་བ་རྣམས་ཀྱིས་དོན་བསྒྱུར་མ་ནུས་པར་རྒྱ་དཔེའི་གོ་རིམ་ལྟར་སྒྲ་བསྒྱུར་བྱས་པས་ཚིག་གྲིམ་ལ་གོ་དཀའ། བྱིངས་མཇལ་བ་ལ་རླབས་ཆུང་བས་མི་འདྲ་བ་ཡིན་གསུངས། ༈ ཕ་རྒྱུད་ཀྱི་ཕ་རྒྱུད་སོགས་གསུམ་ཀའི་སྐབས་སུ་རིག་པ་འོད་གསལ་བྱང་ཆུབ་ཀྱི་སེམས་ཉིད་ལྷ་སྐུར་འཆར་བ་ལ་སློབ་པར་ཁྱད་མེད་ཀྱང་། གཙོ་བོར་རྡུལ་ཚོན་དང་རས་བྲིས་སོགས་ཕྱི་དཀྱིལ་ལ་བརྟེན་ནས་བདག་སྲས་དང་གཞན་སྲས་རྡོ་རྗེའི་ཆོ་ག་གསུམ་བསྐྱེད་དང་བཞི་བསྐྱེད་སོགས་བསྐྱེད་ཆོག་ཤིན་ཏུ་རྒྱས་པའི་རྣམ་བཞག་སྟོན་པ་མ་ཧཱའི་མ་ཧཱ་སྟེ་འདུས་པ་ལྟ་བུའོ། །ཕྱི་དཀྱིལ་ལ་བརྟེན་ནས་ལྷའི་རྣལ་འབྱོར་བསྒོམ་པ་ཡོད་ཀྱང་གཙོ་བོར་རང་གི་རྡོ་རྗེ་ལུས་ཀྱི་གྲོང་ཁྱེར་གདོད་ནས་རྒྱལ་བའི་དཀྱིལ་འཁོར་ཆེན་པོར་གནས་པ་ཉིད་ངོ་ཤེས་པའི་སྐད་ཅིག་དྲན་རྫོགས་ལྟ་བུར་ལྷར་གསལ་བ་རྩལ་དུ་བཏོན་པའི་རྒྱུད་དེ་མ་ཧཱའི་ཨ་ནུའམ་ཕ་རྒྱུད་ཀྱི་མ་རྒྱུད་ཅེས་བྱའོ། །འདིའི་མཚན་གཞི་ནི་མཁའ་འགྲོ་བདེ་ཆེན་རྒྱལ་མོ་དང་འཁོར་ལོ་བདེ་མཆོག་ལྟ་བུ་སྟེ། རྗེ་ཡབ་སྲས་ཀྱིས་ཕ་མ་གཉིས་ཀྱི་ཟླས་ཕྱེ་བའི་མ་རྒྱུད་ཀྱི་མཚན་གཞིར་བདེ་མཆོག་ཡིན་ཀྱང་། རང་ལུགས་རིག་འཛིན་གོང་མས་ཕ་རྒྱུད་མ་རྒྱུད་གཉིས་ལས་ཕ་རྒྱུད་ཀྱི་ཕྱོགས་སུ་དྲངས་ནས་ཕ་རྒྱུད་ཀྱི་མ་རྒྱུད་ཅེས་བཞེད་ལ། མ་རྒྱུད་ཀྱི་མཚན་གཞིར་མདོ་ཚོགས་ཆེན་འདུས་པ་ལྟ་བུ་འཇོགཕྱི་དཀྱིལ་སོགས་ཀྱང་ཡོད་མོད། གཙོ་བོར་རང་རིག་པའི་ཡེ་ཤེས་སྐྱེ་བ་མེད་པ་བདེན་པ་དབྱེར་མེད་ཀྱི་རང་བཞིན་ཉིད་ལྷའི་འཁོར་ལོ་སྒོམ་པའི་ཚུལ་རྩལ་དུ་འདོན་པ་མ་ཧཱའི་ཨ་ཏ྄ིི་སྟེ་ཕ་རྒྱུད་ཀྱི་གཉིས་མེད་ཀྱི་རྒྱུད་ཅེས་བྱའོ། །འདི་མ་ཧཱ་སྐོར་གསུམ་དུ་ཕྱེ་བའི་ཨ་ཏི་ཡིན་གྱི། སྤྱིར་མ་ཧཱ་ཨ་ནུ་ཨ་ཏི་ཞེས་པའི་ཨ་ཏི་མ་ཡིན་ཏེ་དེ་ཡིན་ན་བསྐྱེད་རྫོགས་རིམ་འཇུག་གི་སྤྲོས་པ་ལ་མི་ལྟོས་ཀྱང་། འདིར་རིམ་གཉིས་རིམ་ཅན་དུ་འཇུག་པའི་ཕྱོགས་སྟེ། རྒྱུད་གསང་བའི་སྙིང་པོ་ལྟ་བུའོ། །འདི་ཉིད་གཉིས་མེད་ཀྱི་རྒྱུད་དུ་འཇོག་པའི་གཉིས་མེད་ནི། སྐོར་སྔ་མ་གཉིས་ཀྱི་འཇོག་བྱེད་གཉིས་རྩལ་འདོན་དུ་མེད་པ་ལ་གོ་དགོས། ཕ་རྒྱུད་ཀྱི་མ་རྒྱུད་ཅེས་པའི་མའམ་ཤེས་རབ་ཀྱི་ལྡོག་པ་ནི། རང་གི་ཤེས་རབ་ཀྱི་གཤིས་རྒྱལ་བའི་དཀྱིལ་འཁོར་དུ་གཏན་ལ་དབབ་པའི་ཆ་སྟེ། དམིགས་རྣམ་ཐམས་ཅད་བསྡུས་ནས་སྟོང་ཉིད་བསྒོམ་པ་ལ་ཤེས་རབ་ཅེས་ཟེར་བ་ལྟ་བུའོ། །ཕ་རྒྱུད་ཀྱི་ཕ་རྒྱུད་ཅེས་པའི་ཕའམ་ཐབས་ཀྱི་ལྡོག་པ་ནི། སྣང་ཆ་ལྷའི་འཁོར་ལོ་སྤྲོས་པའི་རྣམ་གྲངས་ཤིན་ཏུ་རྒྱས་པ་ལ་བྱ་སྟེ། སྦྱིན་སོགས་རྒྱ་ཆེ་བའི་ཉམས་ལེན་རྣམ་གྲངས་ཤིན་ཏུ་མང་བ་ལ་ཐབས་ཞེས་ཟེར་བ་ལྟ་བུའོ། །མ་ཧཱའི་ཨ་ཏིའི་ཆེད་དུ་བྱ་བའི་གདུལ་བྱ་ནི། མ་ཧཱའི་མ་ཧཱ་སོགས་ཀྱི་གདུལ་བྱ་ལས་ཆེས་དབང་པོ་རྣོ་བས། རིམ་གཉིས་ལ་རིམ་ཅན་དུ་འཇུག་པའི་རྩོལ་བཅས་ཀྱི་ཉམས་ལེན་ཡོད་ཀྱང་། བསྐྱེད་རིམ་སྒོམ་ཚུལ་ཁྱད་པར་ཅན་གྱིས་རྒྱུད་མྱུར་དུ་སྨིན་པ་དང་། རྫོགས་རིམ་ཀྱང་དང་པོར་རྩོལ་བས་བསྒྲུབ་པའི་ཆ་ཡོད་ཀྱང་མཐར་རྩོལ་མེད་ཀྱི་ལམ་སྐྱོང་བ་ཞིག་འབྱུང་ཞིང་། དེའི་ཚུལ་གཙོ་བོར་འཆད་པ་ཡིན་པས། དེས་ན་དང་པོར་རྩོལ་བས་རིམ་ཅན་དུ་འཇུག་ཚུལ་མ་ཧཱ་དང་འདྲ་ཞིང་། མཐར་ལམ་རྩོལ་མེད་ཀྱི་སྐྱོང་ཚུལ་རྫོགས་ཆེན་དང་མཐུན་པས་མ་ཧཱའི་ཨ་ཏི་ཞེས་བཞག་པ་ཡིན་གསུངས། གལ་ཏེ་འདི་སྙམ་དུ། བདེ་མཆོག་མ་ཧཱའི་ཨ་ནུར་འཇོག་པ་མི་འཐད་དེ། རྒྱུད་དེའི་འགྲེལ་བ་དང་མན་ངག་རྣམས་སུ་རྡོ་རྗེའི་ཕུང་པོ་རྒྱལ་བའི་དཀྱིལ་འཁོར་དུ་ལྷུན་གྱིས་གྲུབ་ཚུལ་གཏན་ལ་ཕབ་ནས་དེའི་སྟེང་ནས་ལམ་བསྒྲོད་ཚུལ་སོགས་འཆད་དགོས་པ་ལ། མཁས་པ་རྗེ་ཡབ་སྲས་ཀྱིས་མ་གསུངས་བའི་ཕྱིར་ན། མ་ཁྱབ་སྟེ། ཕྱིས་ཀྱི་མཁས་པ་རྣམས་ཀྱིས་རྒྱུད་དེའི་ཉམས་ལེན་འདུས་པ་དང་མཐུན་པར་རིམ་ཅན་དུ་བགྱིད་ཚུལ་བཤད་ཀྱང་། རིག་འཛིན་གོང་མས་གདོད་ནས་རྒྱལ་བའི་དཀྱིལ་འཁོར་ཆེན་པོར་གནས་པ་ལམ་དུ་འཁྱེར་ཚུལ་རྒྱུད་དེའི་དོན་དུ་ཁས་བླངས་བ་དང་འགལ་མི་དགོས་ཏེ། གཉིས་ཀའང་རྒྱུད་དེའི་དགོངས་པར་གནས་པའི་ཕྱིར་ཏེ་དཔེར་ན་ཕྱག་ན་རྡོ་རྗེས་བདེ་མཆོག་སྟོད་འགྲེལ་དུ་དུས་འཁོར་ལྟར་བཤད་པ་དང་། ལྭ་བ་པས་སྦས་རྒྱུད་ལྟར་བཤད་པ་དང་། ཀྱེ་རྡོར་གྱི་རྒྱུད་རྡོ་རྗེ་སྙིང་པོས་དུས་འཁོར་དུ་བཀྲལ་ཞིང་། གྲུབ་ཆེན་མཚོ་སྐྱེས་ཀྱིས་སྦས་རྒྱུད་དུ་བཀྲལ་བ་དང་། འདུས་པའི་རྒྱུད་ཕྱི་མ་ན་རོ་བས་སྒྲོན་གསལ་ལྟར་བཤད་ཀྱང་། དབང་མདོར་བསྟན་ཐད་དུས་འཁོར་ལྟར་བཤད་པ་དང་། འཇམ་དཔལ་སྒྱུ་དྲྭ་རིགས་ལྡན་པད་དཀར་གྱིས་དུས་འཁོར་དུ་བཀྲལ་ཞིང་། པཎ་ཆེན་དྲི་མེད་བཤེས་གཉེན་གྱིས་རྫོགས་ཆེན་དུ་བཀྲལ་བ་སོགས་རྒྱུད་དེ་དང་དེའི་དགོངས་པ་ཡིན་ཆོག་པ་བཞིན་ཏེ། བི་མ་མི་དྲ་སོགས་ནི་སྔགས་བླ་མེད་ཀྱི་འཕགས་ལམ་གྲུབ་པའི་གང་ཟག་ཡིན་དགོས་ལ། དེ་ལྟ་ན་རྒྱུད་དོན་མངོན་ཤེས་ཀྱིས་འཆད་ནུས་པས་ཁྱབ་པའི་ཕྱིར། ཞེས་གསུངས། ༈ ཆེ་བ་བརྒྱད་ཀྱི་སྐབས། རྒྱུད་འདི་ཐེག་པ་ཐམས་ཅད་ཀྱི་ཡང་རྩེ་ཞེས་གསུངས་པ་དང་། རྫོགས་ཆེན་གྱིས་ཡང་རྩེ་མ་ཡིན་པ་གཉིས་མི་འགལ་ཏེ། རྡོ་རྗེ་འཆང་གིས་གསང་བའི་སྙིང་པོའི་ཆེད་དུ་བྱ་བའི་གདུལ་བྱ་དེ་ལ། རྒྱུད་འདིའི་གོང་མར་གྱུར་པའི་རྒྱུད་ཅིག་མེད་པ་ལྟར་སྟོན་གྱི་འདི་གོང་ན་རྫོགས་ཆེན་གྱི་རྒྱུད་ཡོད་ཅེས་སྟོན་མི་རིགས་པའི་ཕྱིར། དེ་འདྲ་དེ་ལ་དེ་ལྟར་སྟོན་རིགས་པའི་གདུལ་བྱ་མ་ཡིན་པའི་ཕྱིར། དཔེར་ན་ཕར་ཕྱིན་ཐེག་པའི་གདུལ་བྱ་དེ་ལ་ཐེག་པ་ཆེན་པོ་གསང་སྔགས་མ་བསྟན་པ་ལྟ་བུ་སྟེ། དེས་ན་དོན་ལ་རྒྱུད་འདིའི་གོང་མར་གྱུར་པའི་རྒྱུད་ཁྱད་པར་ཅན་ཡོད་པ་དང་། གདུལ་བྱ་དེའི་ངོར་རྒྱུད་འདི་ཐེག་པ་ཐམས་ཅད་ཀྱི་ཡང་རྩེར་སོང་བ་གཉིས་མི་འགལ་ལོ། ༈ །རྩ་བཤད་མི་འགལ་ཏེ། ཞེས་པའི་ཐད། ཐོག་མར་བྱུང་ཞིང་འཆད་བྱར་གྱུར་པ་དང་། རྗེས་ལ་བྱུང་ཞིང་འཆད་བྱེད་དུ་གྱུར་པ་གཉིས་ཀ་ཡིན་པ་ཡོད་པར་ཐལ། རྒྱུད་ཕྱི་མ་དེ་དེ་ཡིན་པའི་ཕྱིར་ན་རྣམ་པ་གཅིག་ཏུ་སྐྱོན་མེད་དེ། རྒྱུད་ཕྱི་མ་དེ་བཤད་རྒྱུད་གཞན་གྱི་ཐོག་མར་བྱུང་ཞིང་འཆད་བྱ་ཡིན་པས་རྩ་རྒྱུད་དུ་གཏོགས་ལ། ལེའུ་ཉེར་གཉིས་པོ་ལ་ལྟོས་ན་རྗེས་ལ་བྱུང་ཞིང་འཆད་བྱེད་ཡིན་པའི་ཕྱིར། དེས་ན་ཐོག་མ་ཁོ་ནར་བྱུང་ཞིང་འཆད་བྱ་ཁོ་ནར་གྱུར་པ་རྩ་རྒྱུད་དང་། རྗེས་ཁོ་ནར་བྱུང་ཞིང་འཆད་བྱེད་ཁོ་ནར་གྱུར་པའི་བཤད་རྒྱུད་གཉིས་འགལ་ལ། ཐོག་མར་བྱུང་ཞིང་རྩ་རྒྱུད་ཙམ་དང་། རྗེས་ལ་བྱུང་ཞིང་འཆད་བྱེད་ཀྱི་རྒྱུད་ཡིན་པ་ཙམ་འགལ་མི་དགོས་ཏེ། དཔེར་ན་རྩ་རྒྱུད་ཉིད་ལས། གྲུབ་པའི་ཞག་དང་ཚེས་གྲངས་ནི། །རྒྱུད་ལས་སྨོས་པ་བཞིན་དུའོ། །ཞེས་པ་ཐོག་མར་བྱུང་ཞིང་འཆད་བྱ་ཡིན་ལ། ཞག་ནི་སུམ་ཅུ་ཕྲག་དྲུག་གམ། །ཞེས་སོགས་རྗེས་ལ་བྱུང་ཞིང་འཆད་བྱེད་ཡིན་མོད་ཀྱང་། གཉིས་ཀ་རྩ་རྒྱུད་ཀྱི་གཞུང་ཡིན་པ་བཞིན་ནོ། །ཞེས་གསུངས། ༈ མ་ཧཱའི་ཨ་ཏི་ལས་ཆོས་ཐམས་ཅད་སངས་རྒྱས་པར་བཤད་པ་ལས་ལྷག་ཅིག་རྫོགས་ཆེན་གྱི་སྐབས་སུའང་ཆེར་མེད་པས་དེའི་ཆ་ནས་དཔྱད་ན་ཐེག་པ་ཐམས་ཅད་ཀྱི་ཡང་རྩེ་དང་ལུང་ཐམས་ཅད་ཀྱི་སྤྱི་འགྲེལ་ཞེས་བརྗོད་ན་ལེགས་ལ། ལྟ་བ་དེ་སྐྱོང་ཚུལ་དང་ལམ་གྱི་ཡན་ལག་མི་འདྲ་བའི་སྒོ་ནས་རྒྱུད་སྡེ་ལ་མཆོག་དམན་སོ་སོའི་གདུལ་བྱའི་ངོར་མཆོག་དམན་འཇོག་ཚུལ་ཡོད་ཀྱང་མི་འགལ་ལོ། །སྤྱིར་གསར་རྙིང་གི་སྔགས་ཀྱི་དགོངས་པ་མ་འདྲེས་པར་སོ་སོར་རང་ཐད་རང་ཐད་ནས་འཆད་ཤེས་པ་ཞིག་དང་། དོན་གྱི་གནད་གཅིག་ཏུ་འབབ་པ་དང་། གནས་སྐབས་སྐྱོང་ཚུལ་སོགས་ཐ་དད་པ་ཞིག་གི་སྒོ་ནས་འཆད་ཤེས་པ་འདི་གལ་ཆེ་གསུངས། ༈ ད་ལྟ་གཤིས་སྤང་རྟོགས་རྫོགས་པའི་སངས་རྒྱས་ཡིན་ཀྱང་། སྒྲིབ་བྱེད་འཁྲུལ་བ་མ་བྲལ་བའི་གནས་སྐབས་སུ་སེམས་ཅན་ཞེས་བྱ་ལ། འོན་ཀྱང་སེམས་ཅན་ཡིན་པའི་གནས་སྐབས་ན་ཡང་གཤིས་སངས་རྒྱས་ཡིན་པ་མི་འགལ་ཏེ། ཆུ་གཅིག་ཉིད་རྙོགས་མའི་ཆུ་ཡིན་པ་དང་གཤིས་དངས་པའི་ཆུ་ཡིན་པ་གཉིས་ཀ་དུས་མཉམ་དུ་ཡོད་པ་མི་འགལ་ལ། དྭངས་པའི་ཆུ་དེ་རྙོགས་པ་མིན་ལ། རྙོགས་པའི་ཆུ་དེ་དྭངས་པ་མིན་པ་བཞིན་ནོ། །གཤིས་སངས་རྒྱས་ཡིན་ཀྱང་འགྲོ་བ་དེ་སངས་རྒྱས་ཡིན་མི་དགོས་ཏེ། རང་བཞིན་རྣམ་དག་གི་མྱང་འདས་རྒྱུད་ལྡན་ཡིན་ཡང་མྱང་འདས་རྒྱུད་ལྡན་ཡིན་མི་དགོས་པ་བཞིན་ནོ། །རང་རྒྱུད་ན་སངས་རྒྱས་ཡོད་ན་ཅིའི་ཕྱིར་རང་ལ་མངོན་དུ་མི་འགྱུར་ཞེ་ན། རང་རྒྱུད་ན་ཡོད་ན་མངོན་དུ་གྱུར་མི་དགོས་ལ། མངོན་གྱུར་དུ་མེད་ན་མེད་མི་དགོས་ཏེ། འཕགས་པའི་མཉམ་བཞག་གི་དུས་ཀྱི་བྱང་ཆུབ་ཀྱི་སེམས་ཡོད་ཚུལ་སོགས་བཞིན་ནོ། །གལ་ཏེ་གཤིས་ལ་རྣམ་མཁྱེན་ཡོད་ན་རྣམ་པ་ཐམས་ཅད་ད་ལྟར་མཁྱེན་དགོས་སོ་ཞེ་ན་ནི། ཆབ་རོམ་གཤིས་མཉེན་ཞིང་གཤེར་བའི་ཆུ་ཡིན་ན་ད་ལྟ་མཉེན་ཞིང་གཤེར་བའི་ཆུ་མངོན་གྱུར་ཡིན་དགོས་ཞེས་སྨྲ་བ་དང་འདྲའོ། །འོ་ན་གཤིས་ལུགས་མ་རྟོགས་པའི་སངས་རྒྱས་ཞིག་ཡོད་པར་ཐལ། ཁྱོད་ཀྱིས་གཤིས་སངས་རྒྱས་ཡིན་རུང་གཤིས་མ་རྟོགས་པའི་ཕྱིར་རོ། །ཞེ་ན། སངས་རྒྱས་ཀྱིས་གཤིས་ལུགས་རྟོགས་ཀྱང་གཤིས་ལུགས་མ་རྟོགས་པ་དེ་སེམས་ཅན་ཡིན་པའི་ཕྱིར། སངས་རྒྱས་དང་སེམས་ཅན་གྱི་གཞི་མཐུན་ཡོད་པར་ཐལ་ལོ་ཞེ་ན། སངས་རྒྱས་ནི་གཤིས་ལུགས་མཐར་ཐུག་གི་སྟེང་ནས་འཇོག་ལ། སེམས་ཅན་ནི་འཁྲུལ་བའི་ཀུན་རྟོག་གི་གཞན་དབང་ཅན་འདི་ལ་འཇོག་པས་སྐྱོན་མེད་དོ། །འོ་ན་སྟོང་ཉིད་ལ་གཉིས་སྣང་ནུབ་པའི་ཡེ་ཤེས་འོད་གསལ་གྱི་གཤིས་ལ་རང་ཆས་སུ་ཡོད་དམ་ཞེ་ན། ཡོད་དེ། གཤིས་སངས་རྒྱས་ཡིན་ན་གཤིས་ལ་རྣམ་མཁྱེན་ཡོད་དགོས། དེ་ལྟ་ན་ཇི་ལྟ་བ་མཁྱེན་པའི་ཆོས་སྐུ་ཡོད་དགོས་པའི་ཕྱིར། དེས་ལམ་ཞུགས་དང་ལམ་མ་ཞུགས་དང་། སྐྱེ་འཕགས་ཀྱི་གཞི་མཐུན་ཁེགས་ཚུལ་སོགས་ཀྱང་དེས་ཤེས་ཐུབ། ད་ལྟར་གདུལ་བྱའི་ངོར་གཟུགས་སྐུ་གཉིས་སྣང་ནས་ཕྲིན་ལས་མཛད་པར་ཐལ། གཤིས་དེ་སངས་རྒྱས་ཡིན་པའི་ཕྱིར་ན། མ་ཁྱབ་སྟེ། འོ་ན་ཁྱོད་རང་ལ་ད་ལྟར་བཞུགས་པའི་སངས་རྒྱས་ཀྱིས་དུས་གསུམ་གྱི་འགྲོ་བའི་དོན་བྱེད་པར་ཐལ། སངས་རྒྱས་ཡིན་པའི་ཕྱིར། ཁྱབ་པ་འགྲིགས། འདོད་ན་མ་འོངས་པའི་གདུལ་བྱ་ལ་ད་ལྟར་ཕྲིན་ལས་འཇུག་པའི་སྐབས་ཡིན་པར་ཐལ། དུས་གསུམ་གྱི་འགྲོ་བའི་དོན་བྱེད་པའི་སངས་རྒྱས་ཡིན་པའི་ཕྱིར། འདོད་མི་ནུས་ཏེ། འཇུག་པའི་ཡུལ་གྱི་གདུལ་བྱ་དེ་ད་ལྟར་མ་སྐྱེས་པའི་ཕྱིར་ཏེ། མ་འོངས་པ་ཡིན་པའི་ཕྱིར། དེས་ན་མ་འོངས་པའི་གདུལ་བྱའི་དོན་དུ་འཇུག་པའི་ཕྲིན་ལས་རྫོགས་པར་ཡོད་ཀྱང་ད་ལྟར་མི་འཇུག་པ་མི་འགལ་བ་བཞིན། གཤིས་ལ་འབྲས་ཆོས་ཀྱི་ཡོན་ཏན་ཐམས་ཅད་ཡོད་ཀྱང་ཕྱི་གསལ་དུ་མེད་པས་ད་ལྟ་ཕྲིན་ལས་མ་མཛད་ཀྱང་སྐྱོན་མེད་དེ། ཕྲིན་ལས་མཛད་པ་ལ་མངོན་དུ་གྱུར་དགོས་པའི་ཕྱིར། འོ་ན་སེམས་ཅན་གྱི་རྒྱུད་ལ་འཁྲུལ་བ་སྐྱེ་མི་རིགས་པར་ཐལ། གཤིས་ལ་གཉེན་པོའི་ཡེ་ཤེས་ཡོངས་སུ་རྫོགས་པར་ཡོད་པའི་ཕྱིར་ན་སྐྱོན་མེད་དེ། གཤིས་སུ་ཡོད་ཀྱང་དེ་ཡོད་པ་ཙམ་གྱིས་དེའི་རྒྱུད་ན་གཉེན་པོར་ཡོད་པར་འཇོག་མི་ནུས་ཏེ། རྙོགས་མའི་ཆུའི་གཤིས་དྭངས་པ་ཡིན་པས་གཤིས་དྭངས་པར་འཇོག་ཐུབ་ཀྱང་ཆུ་དེ་དྭངས་པར་འཇོག་མི་ཐུབ་པ་བཞིན་ནོ། །སངས་རྒྱས་ཀྱིས་མ་དག་འཁོར་བའི་སྐྱེད་གཞི་བྱེད་པར་ཐལ། གཤིས་ཀྱི་སངས་རྒྱས་དེས་མ་དག་པའི་འཁྲུལ་གཞི་བྱེད་པའི་ཕྱིར་ཞེ་ན། གཤིས་དེས་འཁོར་བའི་སྣང་བ་བསྐྱེད་པ་མིན་གྱི་གཤིས་དེ་མ་རྟོགས་པའི་དབང་གིས་འཁྲུལ་སྣང་འབྱུང་བ་ཡིན་པའི་ཕྱིར། ཕར་ཕྱིན་ཐེག་པའི་སྐབས་སུ། བསྐལ་ཆེན་གྲངས་མེད་གསུམ་དུ་ལམ་གོམས་དགོས་ཀྱང་། རྫོགས་ཆེན་སོགས་སུ་དེ་མི་དགོས་པར་ཐུན་མོང་གི་ལམ་ལ་བློ་ལེགས་པར་སྦྱངས་ནས་དེ་ནས་རིག་སྟོང་སྣང་ཆ་དང་བཅས་པའི་ཉམས་ལེན་རྩལ་འདོན་བྱས་པས་ཆོག་པ་སོགས་ཀྱང་གཤིས་ན་ལམ་ཐམས་ཅད་ཡོད་པས་སད་བྱེད་ཀྱི་ཐབས་རེ་ལས་གཞན་མི་དགོས་པའི་རྟགས་ཡིན་གསུངས། འོ་ན་སྟོང་གཟུགས་ཀྱི་སྐུ་དེའང་གཤིས་ཀྱི་རྒྱལ་བའི་སྐུའི་ཡོན་ཏན་སད་པ་ཡིན་དགོས་ལ། དེ་ལྟ་ན་སྐུ་དེས་ཤེས་བྱ་ཐམས་ཅད་མཁྱེན་ནམ་ཞེ་ན། མ་ཡིན་ཏེ་ཤེས་བྱ་ཐམས་ཅད་མངོན་དུ་གྱུར་པར་མཁྱེན་པ་ལ་ཡེ་ཤེས་ཀྱི་ནུས་པ་ཅི་ཡོད་རྫོགས་པར་སད་དགོས་ལ། དེ་འདྲའི་སྐུའི་སྣང་བ་དེ་གཞིའི་ཡོན་ཏན་ཆ་ཤས་ཙམ་སྣང་བ་ཡིན་གྱི་སྐུའི་ཡོན་ཏན་རྫོགས་པར་མ་སད་པའི་ཕྱིར་གཤིས་ཀྱི་ཡོན་ཏན་རྫོགས་པར་སད་པ་དང་དྲི་མ་ལྷག་མེད་དུ་ཟད་པ་དུས་མཉམ་མོ། །རྫོགས་པ་ཆེན་པོའི་སྐབས། གཞིའི་རིག་པ་ཉིད་ཆོས་གཟུགས་ཀྱི་སྐུའི་འཆར་གཞི་ཡིན་པས་གཞི་སྣང་སྐུ་དང་ཞིང་ཁམས་ཀྱི་སྣང་བ་ཤར་བ་ཕྱོགས་སུ་བསྡུ་རུང་ཡང་དེའི་སྐབས་དབྱིངས་ནང་གསལ་གྱི་ཡོན་ཏན་རིག་པ་ཕྱི་གསལ་དུ་མ་རྫོགས་པས། གཞི་སྣང་ལ་གཞན་དུ་བཟུང་ནས་འཁྲུལ་བ་ལུག་རྒྱུད་དུ་མཆེད་པ་ཡིན་ནོ། །དེས་ན་གཤིས་ལ་ཡོན་ཏན་ཐམས་ཅད་རྫོགས་པར་ཡོད་ཀྱང་། དེ་ནང་གསལ་དུ་ཡོད་པ་ཡིན་ནོ། །འདིར་ནང་གསལ་ཞེས་པ་ནི། ཡོན་ཏན་དེ་དག་མངོན་དུ་གྱུར་མ་རག་པ་ལྟ་བུ་ལས་མངོན་དུ་མ་གྱུར་པ་ཞིག་ལ་གོ་དགོས། དེ་ཡང་སངས་རྒྱས་ཡིན་ལ་ཡོན་ཏན་མངོན་དུ་མ་གྱུར་བ་ཞིག་མེད་དེ། སངས་རྒྱས་ཡིན་ན་མངོན་གྱུར་དུ་ཡོད་དགོས་པའི་ཕྱིར། དེས་ན་ཡོན་ཏན་མངོན་གྱུར་དུ་མེད་པའི་སྒོ་ནས་ཀྱང་ད་ལྟ་གང་ཟག་དེ་སངས་རྒྱས་ཡིན་མི་དགོས་པར་འགྲུབ་ལ། གཞན་ཡང་། ཇི་ལྟར་མི་དབུལ་ཁྱིམ་ནང་ས་འོག་ན། །ཞེས་སོགས་གསུངས་པ་ལྟར། དབུལ་བོ་དེ་གཏེར་ཡོད་ལུགས་ཀྱི་ངོས་ནས་ཕྱུག་པོ་ཡིན་ཀྱང་། དེ་ལ་ཕྱུག་པོ་མི་ཟེར་ཏེ་དབུལ་བོ་ཡིན་པའི་ཕྱིར་ཏེ། ཕྱུག་དབུལ་གྱི་གཞི་མཐུན་མེད་པའི་ཕྱིར། ཞེས་གསུངས།

༈ རིག་སྟོང་གི་ལྟ་བ་རྟོགས་པ་ལའང་ཞིབ་ཏུ་ཕྱེ་ན། སྟོང་ཉིད་མ་རྟོགས་ལ་རིག་ཆ་མན་ངག་བཞིན་དུ་ལེགས་པར་ངོ་འཕྲོད་པ་ཞིག་དང་། རིག་སྟོང་དབྱེར་མེད་དུ་ངོ་འཕྲོད་ཀྱང་གཤིས་ཀྱི་འདུག་ཚུལ་གྱི་རིག་པ་རྗེན་པར་མ་ཐོན་པས་སྟོང་ཉིད་མངོན་སུམ་དུ་མ་རྟོགས་པ་ཞིག་དང་། ཀུན་རྟོག་གི་ཤུབ་ནས་ཐོན་ཏེ་སྟོང་ཉིད་མངོན་སུམ་དུ་རྟོགས་པའི་འོད་གསལ་མངོན་དུ་གྱུར་ཀྱང་གཤིས་ཀྱི་བཞུགས་ཚུལ་གྱི་ཡོན་ཏན་གྱི་ཆ་གཞན་མངོན་དུ་མ་སད་པའི་སྐབས་སོགས་དུ་མ་དབྱེར་རུང་ལ། འདིར་ནི་གཙོ་བོར་རིག་སྟོང་གཉིས་མེད་དུ་རྟོགས་པ་འབའ་ཞིག་ཡིན་ནོ། །སྤྱིར་རིག་པ་ནི་ཆུའི་གྲང་བ་ལྟ་བུ་དང་། ཀུན་རྟོག་ཐམས་ཅད་གཤིས་ཀྱི་འདུག་ཚུལ་མ་ཡིན་པས་ཆུའི་ཚ་བ་ལྟ་བུ་ཡིན་ལ། དེ་ཡང་སྔ་མ་ནི་གནས་ཚུལ་མཐར་ཐུག་སྟེ། དེ་ལ་སྒྲིབ་བྱེད་མེད་ན་དག་པ་རབ་འབྱམས་ཀྱི་བརྟན་གཡོའི་བཀོད་པ་འཆར་བ་དང་སྒྲིབ་བྱེད་ཀྱིས་འཆར་དུ་མ་བཏུབ་པ་ཡིན་ལ། སྒྲིབ་བྱེད་འདི་དག་དོན་ལ་ཡོད་པ་ཞིག་སྣང་བ་མ་འཁྲུལ་བས་སྣང་བ་མིན་ཀྱང་། དོན་ལ་མེད་པ་ཞིག་སྣང་བ་འཁྲུལ་སྣང་དུ་གྲུབ་པས་དེ་ལྟ་ན་ཀུན་རྟོག་ཡུལ་བཅས་གཤིས་ལ་མ་གྲུབ་པའི་གློ་བུར་བ་ཡིན་པས་ཐེག་པ་འདིར་མེད་སྣང་འཁྲུལ་བ་ཞེས་བྱའོ། ༈ །ཀུན་རྟོག་དང་བདེན་དངོས་གཉིས་ཆར་གྱིས་སྟོང་པའི་གཤིས་ཀྱི་རྣམ་པའི་བཞུགས་ལུགས་འདུས་པ་སོགས་སུ་མ་བསྟན་པར་ལམ་དེའི་འགྲོས་རང་ལུས་ཐབས་ལྡན་ལ་བརྟེན་ནས་ཡེ་ཤེས་ལམ་དུ་བྱེད་པའི་བསྒྲོད་ཚུལ་ཕྱོགས་གཅིག་ཡིན་པས་དང་པོ་ནས་དེ་འདྲའི་རིག་སྟོང་གི་ལྟ་བ་ངོ་སྤྲད་པ་མ་གསུངས་པ་ཡིན་གྱི། དེ་འདྲའི་ཚུལ་གཅིག་མེད་པར་མི་བཞེད་ལ། འདིར་ནི་དང་པོ་ནས་གཤིས་རིག་སྟོང་གི་ལྟ་བའི་ཡིན་ལུགས་དང་པོ་ནས་ངོ་འཕྲོད་དགོས་ཏེ་རྒྱུད་འདིའི་ལམ་གྱི་གཞུང་ཤིང་ལྟ་བུ་ཡིན་པའི་ཕྱིར། ༈ གཞིའི་འོད་གསལ་ཤར་བའི་སྐབས་ཀྱི་གཞི་སྣང་གི་སྣང་བ་དེ་ཡེ་ཤེས་ཉིད་ཀྱི་རང་སྣང་ཡིན་ཀྱང་བློ་དེའི་ངོར་སྣང་ཚུལ་རང་སྣང་དུ་སྣང་མི་ནུས་པར་ཡུལ་ཡུལ་ཅན་རྒྱང་ཆད་པའི་གཉིས་སྣང་ཅན་དུ་འབྲེལ་ཏེ་རང་སྣང་ལ་གཞན་དུ་བཟུང་ནས་རིམ་གྱིས་ཀུན་རྟོག་འཁྲུལ་བ་མཆེད་དེ་ད་ལྟར་གྱི་མ་དག་པའི་སྣང་བ་འདིར་སྣང་སོང་བ་ཡིན། དེའི་གནད་ཀྱིས་ད་ལྟའི་ཡུལ་སྣང་འདི་དག་གི་སྟེང་ན་ཡང་སྔར་གྱི་ཡེ་ཤེས་རང་སྣང་དུ་གྱུར་པའི་གཞི་སྣང་སད་པའི་སྣང་ཆ་རེ་ཡོད་དགོས་པས། ཡུལ་ཅན་ཀུན་རྟོག་ཐམས་ཅད་ཀྱི་གཤིས་འོད་གསལ་གྱིས་ཁྱབ་པ་བཞིན། ཡུལ་སྣང་འདི་དག་ཐམས་ཅད་ལ་ཡང་ཡེ་ཤེས་ཀྱི་སྣང་ཆ་རེ་ཡོད་དགོས་སོ་བྱས་པ་ལ། འདི་སྙམ་དུ། ད་ལྟ་མ་དག་པའི་སྣང་བ་འདི་ལ་དག་པའི་ཡེ་ཤེས་ཀྱི་སྣང་ཆ་རེ་ཡོད་ན། ད་ལྟ་ནས་རྒྱལ་བའི་དཀྱིལ་འཁོར་ཆེན་པོར་འདོད་དགོས་སོ། །ཞེ་ན། ཡེ་ཤེས་ཀྱི་སྣང་ཆ་ལ་ཆོས་ཉིད་བར་དོའི་སྣང་བ་ལྟ་བུ་དག་པའི་སྣང་བ་ཡིན་ཀྱང་ཀུན་རྟོག་ས་བོན་དང་བཅས་པ་གཏན་མ་སྤངས་པའི་སྐབས་ཀྱི་དེ་དང་། དེ་གཏན་ལོག་ཏུ་སོང་བའི་ཁྱད་པར་དུ་བྱས་པའི་འབྲས་བུའི་དུས་ཀྱི་སྣང་ཆ་གཉིས་སོགས་ཡོད་པས། ཡེ་ཤེས་སྣང་ཆ་གང་ཡིན་འབྲས་དུས་ཀྱི་སྣང་ཆ་ཡིན་མི་དགོས་ཏེ། ཡེ་ཤེས་ཀྱི་སྣང་ཆ་དང་དག་པའི་སྣང་བ་ཙམ་དུ་མཉམ་ཡང་ཁྱད་ཐང་ཆེན་པོ་ཡོད། ༈ ཡུལ་ཅན་འོད་གསལ་ལ་སྒྲིབ་བྱེད་ཀྱི་ཀུན་རྟོག་རིམ་གྱིས་ཟད་པ་དང་གཤིས་ཇེ་མངོན་དུ་སོང་བའི་ཚེ། ཡུལ་སྣང་ཡེ་ཤེས་ཀྱི་སྣང་ཆ་ཡང་མངོན་དུ་གྱུར་པའི་འགལ་རྐྱེན་ཟད་པའི་དབང་གིས་ནུས་པ་བརྟས་ནས་གང་སྣང་དག་པའི་འཁོར་ལོར་འཆར་བ་ཞིག་འབྱུང་ངོ་། །དེས་ན་དེ་ལྟར་ཡུལ་སྣང་ལ་ཡོད་པའི་ཡེ་ཤེས་ཀྱི་སྣང་བ་དེ་གཤིས་ཀྱི་རང་སྣང་ཡིན་པས། ཡུལ་སྣང་སད་པ་ནི་ཡུལ་ཅན་ལ་ལྟོས་པ་ཡིན་ཏེ། ཡུལ་ཅན་མ་དག་པའི་དབང་གིས་ཡུལ་དམན་པ་སྣ་ཚོགས་སུ་སྣང་ལ། ཡུལ་ཅན་རྣམ་པར་དག་པ་མཐར་ཐུག་གི་དབང་གིས་རང་སྣང་ལོངས་སྐུའི་བཀོད་པའི་རོལ་མོ་འབྱུང་བ་ཡིན་ནོ། ༈ །འོ་ན་ཀུན་རྟོག་དང་དེའི་གཤིས་འོད་གསལ་གཉིས་ངོ་བོ་གཅིག་ཡིན་ནམ་ཞེ་ན། འོད་གསལ་གཤིས་ཀྱི་འདུག་ཚུལ་དབང་བཙན་པར་བྱས་ན། ཀུན་རྟོག་རྣམས་མེད་སྣང་འཁྲུལ་བ་ཡིན་པས་ངོ་བོ་འདི་ཡིན་ཞེས་བཞག་ཏུ་མེད་དེ། དུང་གི་དཀར་པོ་དང་སེར་སྣང་གཉིས་ངོ་བོ་གཞན་མ་ཡིན་པས་གཅིག་ཅེས་མིང་འདོགས་ཆོག་པ་ལྟར་ཡིན་ནོ། ༈ །ཐོས་གྲོལ་ནི་རྒྱུད་འདིའི་མན་ངག་ཡིན་ཀྱང་། ཟུར་ལུགས་དང་མི་མཐུན་ཏེ། དེ་ལས་ཆོས་ཉིད་བར་དོའི་སྐབས་ཞི་ཁྲོའི་ལྷ་ཚོགས་པྲ་ཕབ་པ་བཞིན་འཆར་བའི་ངོ་སྤྲོད་རྫོགས་ཆེན་ནས་འབྱུང་བ་བཞིན་ཡོད་དོ། །དེས་ན་ཀུན་མཁྱེན་གྱིས་ཨ་ཏིའི་མ་ཧཱར་བཀྲལ་བ་དང་གུ་རུའི་དགོངས་པ་ཡིན་པས་ཐོས་གྲོལ་ཡང་ཕྱོགས་བཅུ་མུན་སེལ་དགོངས་པའི་བབས་མཐུན། ༈ ཏནྟྲ་ཆེན་པོ་སྡེ་བཅོ་བརྒྱད་ནི། དཔལ་འཕྲེང་དམ་པའི་འགྲེལ་བ་སློབ་དཔོན་ཀུ་ཀུ་ར་ཛས་མཛད་པར། སྐུ་གསུང་ཐུགས་ཡོན་ཏན་ཕྲིན་ལས་ལྔའི་གཞི་དང་དེའི་རྩ་བར་གྱུར་པའི་རྒྱུད་སྡེ་ལྔ། སྒྲུབ་པ་ལག་ལེན་དུ་བསྟན་པ་རོལ་པའི་རྒྱུད་ལྔ། སྤྱོད་པའི་ཡན་ལག་ཏུ་འགྲོ་བའི་རྒྱུད་ལྔ། ཆོ་ག་མ་ཚང་བ་ཁ་སྐོང་བར་བྱེད་པ་རྒྱུད་ཕྱི་མ་ལྟ་བུ་གཉིས། དེ་ཐམས་ཅད་ཀྱི་བསྡུས་དོན་ལྟ་བུའི་རྒྱུད་ཆེན་པོ་གཅིག་དང་བཅོ་བརྒྱད་དོ། །ཞེས་གསུངས། དེ་ལྟར་སྨིན་གླིང་ཡབ་སྲས་ཀྱིས་བཞེད་དེ། །དང་པོ་ལ་སྐུའི་རྒྱུད་སངས་རྒྱས་མཉམ་སྦྱོར། གསུང་གི་རྒྱུད་ཟླ་གསང་ཐིག་ལེ། ཐུགས་ཀྱི་རྒྱུད་གསང་བ་འདུས་པ། ཡོན་ཏན་གྱི་རྒྱུད་དཔལ་མཆོག་དང་པོ། ཕྲིན་ལས་ཀྱི་རྒྱུད་ཀརྨ་མཱ་ལེ་དང་ལྔའོ། །གཉིས་པ་ལ། ཧེ་རུ་ཀ་རོལ་པའི་རྒྱུད། རྟ་མཆོག་རོལ་པའི་རྒྱུད། སྙིང་རྗེ་རོལ་པའི་རྒྱུད། བདུད་རྩི་རོལ་པའི་རྒྱུད། ཕུར་པ་བཅུ་གཉིས་པ་འབྱུང་བའི་རྒྱུད་དང་ལྔའོ། །གསུམ་པ་ལ། རི་བོ་བརྩེགས་པ། ཡེ་ཤེས་རྔམ་གློག །དམ་ཚིག་བཀོད་པ། ཏིང་འཛིན་རྩེ་གཅིགགླང་ཆེན་རབ་འབོག་གི་རྒྱུད་དང་ལྔའོ། །བཞི་པ་ལ། རྣམ་སྣང་སྒྱུ་དྲྭ་དང་། འཕགས་པ་ཐབས་ཀྱི་ཞགས་པ་པདྨོའི་ཕྲེང་བའི་དོན་བསྡུས་དང་གཉིས་སོ། །ལྔ་པ་ནི། སྤྱི་རྒྱུད་སྒྱུ་འཕྲུལ་དྲྭ་བའོ། །སྔགས་ཀྱི་སྤྱི་དོན་ལས། ཏནྡྲ་སྡེ་བཅོ་བརྒྱད་དུ་ཕྱེ་བ་ནི། སྐུའི་རྒྱུད་གསུམ། གསུང་གི་རྒྱུད་གསུམ། ཐུགས་ཀྱི་རྒྱུད་གསུམ། ཡོན་ཏན་གྱི་རྒྱུད་གསུམ། ཕྲིན་ལས་ཀྱི་རྒྱུད་གསུམ། སྤྱི་རྒྱུད་གསུམ་སྟེ་བཅོ་བརྒྱད་དོ། །དེ་ལ་སྐུའི་སྐུ་རྒྱུད་གླང་པོ་རབ་འབོག །སྐུའི་གསུང་རྒྱུད་གླང་པོ་ཆུར་འཇུག །སྐུའི་ཐུགས་རྒྱུད་སངས་རྒྱས་མཉམ་སྦྱོར། གསུང་གི་སྐུ་རྒྱུད་རི་བོ་བརྩེགས་པ། གསུང་གི་གསུང་རྒྱུད་པདྨ་དབང་ཆེན། གསུང་གི་ཐུགས་རྒྱུད་ཟླ་གསང་ཐིག་ལེ། ཐུགས་ཀྱི་སྐུ་རྒྱུད་རྩེ་མོ་འདུས་པ། ཐུགས་ཀྱི་གསུང་རྒྱུད་གཅིག་ལས་འཕྲོས་པ། ཐུགས་ཀྱི་ཐུགས་རྒྱུད་གསང་བ་འདུས་པ། ཡོན་ཏན་གྱི་སྐུ་རྒྱུད་སྒྲོན་མེ་འབར་བ། ཡོན་ཏན་གྱི་གསུང་རྒྱུད་བདུད་རྩི་ས་མ་ཡ་འབུམ་སྡེ། ཡོན་ཏན་གྱི་ཐུགས་རྒྱུད་དཔལ་མཆོག་དང་པོ། ཕྲིན་ལས་ཀྱི་སྐུ་རྒྱུད་དཔལ་ཕྲེང་དཀར་མོ། ཕྲིན་ལས་གྱི་གསུང་རྒྱུད་མ་མོ་རྒྱུད་ལུང་། ཕྲིན་ལས་ཀྱི་ཐུགས་རྒྱུད་ཏ་མ་ལ་འབུམ་སྡེ། སྤྱིའི་སྐུ་རྒྱུད་ཐབས་ཞགས། སྤྱིའི་གསུང་རྒྱུད་ས་མ་ཡ་བཀོད་པ། སྤྱིའི་ཐུགས་རྒྱུད་གསང་བ་སྒྱུ་འཕྲུལ་ལོ། །ཞེས་གསུངས། ༈ གསང་འགྲེལ་ཕྱོགས་བཅུའི་མུན་སེལ་ལས། སྒྱུ་འཕྲུལ་སྡེ་བཞིར་བཞེད་དེ། འཁོར་འདས་ཀྱི་ཆོས་ཐམས་ཅད་རང་སྣང་དབྱེར་མེད་དུ་སྟོན་པ་རྡོ་རྗེ་སེམས་དཔའ་སྒྱུ་འཕྲུལ་དྲྭ་བ་དང་། ལས་ཚོགས་རྒྱས་པར་སྟོན་པ་རྣམ་པར་སྣང་མཛད་སྒྱུ་འཕྲུལ་དྲྭ་བ་དང་། རོལ་པ་མངོན་དུ་སྟོན་པ་ལྷ་མོ་སྒྱུ་འཕྲུལ་དྲྭ་བ་དང་། ཐེག་པ་ཀུན་ལ་ཁྱབ་པར་སྟོན་པ་འཇམ་དཔལ་སྒྱུ་འཕྲུལ་དྲྭ་བའོ། །རྡོ་རྗེ་སེམས་དཔའ་སྒྱུ་འཕྲུལ་དྲྭ་བ་ལ་ཡང་བརྒྱད་དེ། སེམས་དང་ཡེ་ཤེས་རང་སྣང་བར་སྟོན་པ་དཔལ་གསང་བའི་སྙིང་པོ་དང་། ཕྲིན་ལས་རྫོགས་པར་སྟོན་པ་བཞི་བཅུ་པ་དང་། དཀྱིལ་འཁོར་རྫོགས་པར་སྟོན་པ་སྒྱུ་འཕྲུལ་བརྒྱད་པ་དང་། དབང་བསྐུར་བ་གསལ་བར་སྟོན་པ་སྒྱུ་འཕྲུལ་བླ་མ་དང་། དམ་ཚིག་མཆོག་ཏུ་སྟོན་པ་སྒྱུ་འཕྲུལ་ལེ་ལག་དང་། ཡོན་ཏན་རྒྱས་པར་སྟོན་པ་སྒྱུ་འཕྲུལ་བརྒྱད་ཅུ་པ་དང་། ལྷའི་སྐུ་མདོག་དང་ཕྱག་མཚན་གསལ་བར་སྟོན་པ་རྡོ་རྗེ་མེ་ལོང་དང་། བསྐྱེད་རིམ་གསལ་བར་སྟོན་པ་རྒྱ་མཚོ་དང་། ཐབས་ལམ་གསལ་བར་སྟོན་པ་ཐལ་བ་དང་སྡེ་བརྒྱད་དོ། །ཞེས་སོ། །ཟུར་ལུགས་པ་ཕལ་ཆེར། སྒྱུ་འཕྲུལ་སྡེ་བརྒྱད་དང་། བཤད་རྒྱུད་སྡེ་བཞིར་དབྱེ་བར་མཛད་དེ། དང་པོ་ནི། འཁོར་འདས་ཀྱི་ཆོས་ཐམས་ཅད་རང་སྣང་དབྱེར་མེད་དུ་སྟོན་པ་རྡོ་རྗེ་སེམས་དཔའ་སྒྱུ་འཕྲུལ་དྲྭ་བ། ལས་ཚོགས་རྒྱས་པར་སྟོན་པ་རྣམ་པར་སྣང་མཛད་སྒྱུ་འཕྲུལ་དྲྭ་བ། སྡེ་སྣོད་ཡོངས་ལ་ཁྱབ་པར་སྟོན་པ་འཇམ་དཔལ་སྒྱུ་འཕྲུལ་དྲྭ་བ། དཀྱིལ་འཁོར་རྒྱས་པར་སྟོན་པ་སྒྱུ་འཕྲུལ་བརྒྱད་པ། ཕྲིན་ལས་རྫོགས་པར་སྟོན་པ་བཞི་བཅུ་པ། དབང་གཙོ་བོར་སྟོན་པ་བླ་མ། ཡོན་ཏན་མཐར་ཕྱིན་པར་སྟོན་པ་བརྒྱད་ཅུ་པ། དམ་ཚིག་མཆོག་ཏུ་སྟོན་པ་ལེ་ལག་དང་བརྒྱད་དོ། །གཉིས་པ་ནི་གྲོལ་ལམ་རིམ་ཅིག་ཆར་དུ་སྟོན་པ་ཡེ་ཤེས་སྙིང་པོ་དང་། རྡོ་རྗེ་མེ་ལོང་དང་། ཐབས་ལམ་རིགས་ཅིག་ཆར་དུ་སྟོན་པ་རྒྱ་མཚོ་དང་ཐལ་རྒྱུད་དོ། ༈ །ཤན་འབྱེད་ལས། གཞན་ཡང་དབུ་མ་དང་མ་འབྲེལ་བའི་རྡོ་རྗེ་ཐེག་པ་རང་ལམ་ཁོ་ན་ཉམས་སུ་བླངས་ཀྱང་ཐར་པ་མི་ཐོབ་ཟེར་བ་ལ་བརྟག་པ། རྡོ་རྗེ་ཐེག་པ་ན་ཐབས་གྲོལ་གྱི་ལམ་གཉིས་ཀ་བཤད་པས། གྲོལ་ལམ་གྱི་བདག་མེད་གཉིས་རྟོགས་དེས་མི་གྲོལ་ན་དབུ་མ་ལའང་མཚུངས་ཏེ། དོན་ལ་ཁྱད་མེད་པའི་ཕྱིར་རོ། །གལ་ཏེ་དེ་དབུ་མའི་ཡིན་ནོ་ཟེར་ན། དབུ་མའི་སྐབས་སུ་གང་ཟག་གི་བདག་མེད་བསྟན་པ་ཉན་ཐོས་ཀྱི་ཡིན་པར་འགྱུར་བས། གང་ཟག་གི་བདག་མེད་མ་རྟོགས་ན་འཁོར་བ་ལས་མི་གྲོལ་བའི་ཕྱིར། ཉན་ཐོས་ཀྱི་གྲུབ་མཐའ་དང་མ་འབྲེལ་ན་དབུ་མ་པའི་ལམ་ལའང་ཐར་བ་མེད་པར་མཚུངས་སོ། །དེས་ན་ཉན་ཐོས་ཀྱི་གྲུབ་མཐའ་སྔོན་སོང་མིན་ན་རྡོ་རྗེའི་ཐེག་པ་ལ་ཐར་ལམ་མེད་སྨྲོས་ཤིགགལ་ཏེ་དབུ་མ་པའི་ལམ་ན་གང་ཟག་གི་བདག་མེད་ཅི་སྨོས། ཆོས་ཀྱི་བདག་མེད་ཀྱང་རྒྱས་པར་བསྟན་པའི་ཕྱིར་ཉན་ཐོས་ཀྱིས་དེར་ལྟོས་མི་དགོས་སྙམ་ན། རྡོ་རྗེ་ཐེག་པ་ནི་བདེ་བ་ཆེན་པོས་ཁྱད་པར་དུ་བྱས་པའི་རྣམ་ཀུན་མཆོག་ལྡན་གྱི་སྟོང་ཉིད་ཁྱད་པར་འཕགས་པ་ཡོད་ན་དབུ་མའི་དེ་ལྟ་ཅི་སྨོས། རྣམ་ཀུན་མཆོག་ལྡན་ཁྱད་པར་བ་ཕུང་པོ་རྣམ་དཔྱད་ཀྱི་སྟོང་ཉིད་ལས་འཕགས་པའི་སྔགས་ཀྱི་ཁྱད་ཆོས་སུ་བཤད་དེ། རིགས་ལྡན་འཇམ་དཔལ་གྲགས་པས་དུས་འཁོར་བསྡུས་རྒྱུད་ལས། སྲིད་གསུམ་ཕྲ་རབ་གཟུགས་མིན་འདིར་ནི་རྣམ་པར་ཤེས་པའོ་དེ་བཞིན་རྣམ་པར་ཤེས་པ་ཉིད་མེད་དེ། །སངས་རྒྱས་ཤེས་རབ་གང་དུའང་གནས་པ་མ་ཡིན་ཞེས་པའི་ཚིག་ནི་སངས་རྒྱས་པ་རྣམས་སྟོན་པར་འགྱུར། །གང་ཞིག་འགྱུར་མེད་དང་བྲལ་མི་རྣམས་ཀྱིས་ནི་སྟོང་པ་ཉིད་དེ་བཟུང་ནས་སྟོང་པར་ལྟ་བྱེད་པ། །དེས་ན་གཙོ་བས་གང་ཞིག་འཕོ་མེད་ལྷན་སྐྱེས་ལུས་ཀྱི་བདེ་བ་དག་ནི་སྔགས་ཀྱི་ཐེག་པར་བསྟན། །ཞེས་དང་། ཕུང་པོ་རྣམ་དཔྱད་སྟོང་པ་ཉིད། །ཆུ་ཤིང་བཞིན་དུ་སྙིང་པོ་མེད། །རྣམ་པ་ཀུན་གྱི་མཆོག་ལྡན་པའི། །སྟོང་ཉིད་དེ་དང་འདྲ་མ་ཡིན། །ཞེས་སོ། །བདེ་བའང་འགྱུར་བདེ་མྱོང་བའི་བདེ་བ་ནི་ལམ་གྱི་རྟེན་ཙམ་ཡིན་གྱི། བདེ་ཆེན་མིན་ཏེ་མི་རྟག་པའི་ཕྱིར་རོ། །ཨིནྡྲ་བྷོ་དྷིས། བདེ་ཆེན་མི་རྟག་མ་ཡིན་ཏེ། །བདེ་བ་ཆེན་པོ་རྟག་ཏུ་རྟག །ཅེས་གསུངས། དེས་ན་ཚོར་བདེ་འགྱུར་བ་ཅན་མིན་ཏེ། ཆོས་ཐམས་ཅད་རང་བཞིན་གྱི་ངོ་བོར་གྱུར་པའི་ཀ་དག་ལྷུན་གྲུབ་དབྱེར་མེད་ཀྱི་རང་བཞིན་ལ། འགྱུར་བའི་ཟུག་རྔུ་ཐམས་ཅད་བྲལ་ཀྱང་རང་གི་ངོ་བོ་འགྱུར་བ་མེད་པའི་ཡེ་ཤེས་འཁོར་བའི་ཟག་བཅས་ཀྱི་བདེ་བ་དང་སྡུག་བསྔལ་ཀུན་གྱིས་མ་གོས་པ་ལ། གང་སྣང་བདེ་བར་འཆར་བ་ལས་ཟུག་རྔུ་སོགས་ཡོང་ཡེ་མེད་པས་བདེ་ཆེན་དང་འདུ་འབྲལ་མེད་པ་ཡིན་ནོ། །ཞེས་སོ། ༈ །ཆེ་བ་བརྒྱད་ནི། ཁོག་གཞུང་གསལ་སྒྲོན་ལས། རང་བཞིན་གསང་བའི་སྙིང་པོ་འདི། །གཞན་ལས་འཕགས་པའི་ཆེ་བ་བརྒྱད། །ཅེས་པ་ལྟར། རྒྱུད་ཐམས་ཅད་གྱི་རྒྱལ་པོ་ཡིན་པས་ངེས་པར་ཆེ་བ་གཟི་ལྡན་གསལ་བའི་ཉི་མ་ལྟ་བུ། ཐེག་པ་ཐམས་ཅད་གྱི་ཡང་རྩེ་ཡིན་པས་ཆེ་བ་དབུས་ཀྱི་རི་བོ་མཆོག་རབ་ལྟ་བུ། བསྟན་པ་ཐམས་ཅད་ཀྱི་འབྱུང་ཁུངས་ཡིན་པས་ཆེ་བ་འབྱུང་བ་ནམ་མཁའ་ལྟ་བུ། ལུང་ཐམས་ཅད་ཀྱི་སྤྱི་འགྲེལ་ཡིན་པས་ཆེ་བ་ནམ་མཁས་སྣང་སྲིད་ཀྱི་གོ་ཕྱེ་བ་ལྟ་བུ། དེ་བཞིན་གཤེགས་པ་ཐམས་ཅད་ཀྱི་དགོངས་པའི་ཞེ་ཕུག་ཡིན་པས་ཆེ་བ་རྒྱལ་པོའི་བཀའ་གསང་ཐོབ་པའི་མི་ལྟ་བུ། འབྲས་བུ་ཐམས་ཅད་ཀྱི་ཐུག་ས་ཡིན་པས་ཆེ་བ་ཡིད་བཞིན་ནོར་བུ་རིན་ཆེན་ལྟ་བུ། དེ་བཞིན་གཤེགས་པ་ཐམས་ཅད་ཀྱི་གཤེགས་ཤུལ་ཡིན་པས་ཆེ་བ་སྟོང་ལམ་གྱི་ཤུལ་ལྟ་བུ། མ་འོངས་པའི་རྣལ་འབྱོར་པ་རྣམས་ཀྱི་ལམ་ཡིན་པས་ཆེ་བ་ཁྲི་ལམ་ལྟ་བུ་སྟེ་བརྒྱད་དོ། །དེ་ལས་དང་པོ་ནི་ཇི་ལྟར་ཉི་མའི་སྣང་བ་ནི་སྣང་བ་ཐམས་ཅད་ཀྱི་རྒྱལ་པོ་ཡིན་པ་བཞིན་དུ་རྒྱུད་འདི་ཉིད་ཀྱང་རྒྱུད་ཐམས་ཅད་ཀྱི་རྒྱལ་པོའོ། །གཉིས་པ་ནི། ཇི་ལྟར་ལྷུན་པོའི་རྩེར་ཕྱིན་ན་རི་ཕྲན་ཐམས་ཅད་མིག་འོག་ཏུ་ཚུད་པ་ལྟར་རྒྱུད་འདིའི་དོན་རྟོགས་ན་ཐེག་པ་ཐམས་ཅད་ཀྱི་དོན་འདིར་འདུས་པའི་ཕྱིར་དེ་ཐམས་ཅད་ཤེས་པར་འགྱུར་རོ། །གསུམ་པ་ནི་ཇི་ལྟར་ནམ་མཁའ་ལས་འབྱུང་བ་བཞི་ཤར་ནས་སྣོད་བཅུད་ཆགས་པ་ལྟར། རྒྱུད་འདིའི་བྱིན་རླབས་ལས་བསྟན་པ་དང་ཐེག་པ་ཐམས་ཅད་འཕྲོས་པ་ཡིན་ནོ། །བཞི་པ་ནི། ཇི་ལྟར་ནམ་མཁས་སྣང་སྲིད་གོ་ཕྱེ་བ་ལྟར། མཚན་ཉིད་དང་རྒྱུད་ཐམས་ཅད་ཀྱི་དོན་དང་འབྲས་བུ་ཐམས་ཅད་འདིར་འདུས་ཤིང་འདིས་སྟོན་པས་ན་ལུང་ཐམས་ཅད་ཀྱི་སྤྱི་འགྲེལ་ཡིན་ནོ། །ལྔ་པ་ནི། ཇི་ལྟར་རྒྱལ་པོའི་བཀའ་གསང་ཐོབ་པའི་མི་ནི་རྒྱལ་པོའི་བློ་གཏད་ས་ཡིན་པས་འབངས་རྣམས་བློན་གཞན་ལ་རག་མི་ལས་པ་བཞིན་དུ། དེ་བཞིན་གཤེགས་པ་ཐམས་ཅད་ཀྱི་ཐུགས་ཀྱི་གསང་བ་དམ་པའི་མཐར་ཐུག་འདི་ལས་མི་འདའ་བས་འདིའི་དོན་རྟོགས་ན་ཐེག་པ་གཞན་ལ་རག་ལས་མི་དགོས་པའོ། །དྲུག་པ་ནི་ཇི་ལྟར་ཡིད་བཞིན་གྱི་ནོར་བུ་རིན་ཆེན་ནི་འདོད་རྒུ་ཐམས་ཅད་སྟེར་བའི་མཆོག་མཐར་ཐུག་ཏུ་གྲུབ་པ་བཞིན་དུ། བསྟན་པ་དང་ཐེག་པ་ཐམས་ཅད་ཀྱི་མཐར་ཐུག་གི་འབྲས་བུ་ནི་རང་བཞིན་གསང་བའི་སྙིང་པོ་འདི་ཁོ་ནར་ཐུག་པའོ། །བདུན་པ་ནི་ཇི་ལྟར་གང་དུ་འགྲོ་བའི་ལམ་པོ་ཆེར་དེར་སླེབས་པ་ཐམས་ཅད་ཀྱིས་ཕྱིན་པ་ལྟར། སྔར་འདས་པའི་སངས་རྒྱས་ཐམས་ཅད་ལམ་འདི་ལ་བརྟེན་ནས་སངས་རྒྱས་པའོ། །བརྒྱད་པ་ནི། ཇི་ལྟར་གནས་དེར་སླར་འགྲོ་འགྱུར་རྣམས་ཀྱང་ལམ་དེ་ལ་འགྲོ་བ་བཞིན་དུ། མ་འོངས་པ་ན་འཚང་རྒྱ་འགྱུར་རྣམས་ཀྱང་ལམ་འདི་ཁོ་ན་ལ་བརྟེན་ནས་འཚང་རྒྱ་བར་འགྱུར་རོ། །སྤྱིར་མ་ཧཱ་ཡོ་གའི་རྒྱུད་རྣམས་རྒྱན་བདུན་གྱི་སྒོ་ནས་འཆད་པ་ཧེ་རུ་ཀ་གལྤོའི་རྒྱུད་ལས་གསུངས་ཏེ། མ་ཧཱ་ཡོ་གའི་རྒྱན་བདུན་ཡང་། གླེང་སློང་བ་དང་སངས་རྒྱས་ཚུལ། །རྒྱས་བཤད་མཐའ་དང་བཤད་པའི་ཚུལ། །དབྱེ་བའི་རྣམ་པ་གང་ཟག་སྣོད། །བདེན་པའི་དགོངས་པས་ཤེས་པར་བྱ། །ཞེས་སོ། །མ་ཧཱ་ཡོ་གའི་རྒྱུད་ལས་ཀྱང་ཁྱད་པར་རྡོ་རྗེ་སེམས་དཔའ་སྒྱུ་འཕྲུལ་དྲྭ་བ་གསང་བའི་སྙིང་པོ་དེ་ཁོ་ན་ཉིད་ངེས་པ་ཞེས་རྒྱུད་ལུང་མན་ངག་དང་མཐུན་པའི་མཚན་ཙམ་གྱི་ངེས་པ་ལས་ཀྱང་བླ་ན་མེད་པའི་རྒྱུད་དོན་རྣམས་ཀྱི་གསང་བ་རྟོགས་པར་འགྱུར་བ་རྒྱུད་ཐམས་ཅད་ཀྱི་རྒྱལ་པོ་འདི་ཉིད་འགྲེལ་ཚུལ་ལ། མན་ངག་ཨ་ཏི་ཡོ་ག་ལྟར་བཀྲལ་བ་དང་། བསྐྱེད་པ་མ་ཧཱ་ཡོ་ག་ལྟར་བཀྲལ་བའི་བཤད་སྲོལ་གཉིས་སུ་འདུ་བ་ཡིན་ནོ། །དེའང་དང་པོ་ནི། སློབ་དཔོན་ཉི་འོད་སེང་གེ་དང་། ཀུན་མཁྱེན་ཀློང་ཆེན་རབ་འབྱམས་སོགས་ཀྱི་དགོངས་པའོ། །ཕྱི་མ་ནི། སྒེག་པའི་རྡོ་རྗེ། སངས་རྒྱས་གསང་བ་སོགས་དང་། ཟུར་པའི་བཀའ་སྲོལ་འཛིན་པ་ཕལ་ཆེ་བའི་དགོངས་པ་ཡིན་ནོ། །ཇི་ལྟར་འཆད་ན། སྔ་རབས་པ་རྣམས་ཀྱིས་མཚོན་དཔེ་དང་སྦྱར་ཏེ་འཆད་ལུགས་གསུམ་ནི། མདའ་ལྟར་རྩེ་མོ་ནས་བཟུང་སྟེ་འཆད་པ་ཞེས་བྱ་བ། ཆོས་ཐམས་ཅད་ཡེ་ནས་སངས་རྒྱས་པ་གཞི་གསང་བའི་སྙིང་པོ། དེ་ཉིད་བསྐྱེད་རྫོགས་གཉིས་སུ་མེད་པས་ཉམས་སུ་ལེན་པ་ལམ་དེ་ཁོ་ན་ཉིད། དེའི་མཐར་ཐུག་སྐུ་གསུམ་ལྷུན་གྱིས་གྲུབ་པ་འབྲས་བུ་གཞི་ཐོག་ཏུ་ངེས་པ་སྟེ་མཚན་གྱི་ནང་དུ་ཆོས་ཐམས་ཅད་གཞི་ལམ་འབྲས་གསུམ་དུ་བསྡུས་ནས་འཆད་པ་དང་། མདུང་ལྟར་རྐེད་པ་ནས་བཟུངས་སྟེ་འཆད་པ་ཞེས་བྱ་བ་ལ། ལེའུ་ལྔ་པར། ཤེས་འཇུག་མཚན་ཉིད་འབྱོར་བའི་གཟུངས། །འབྲས་བུ་སྨིན་བྱེད་རྒྱུ་དང་རྐྱེན། །ནུས་མཐུ་ཅན་དུ་གང་གྱུར་པ། །རིག་འཛིན་རྒྱལ་བའི་ཞིང་དུ་གྲགས། །ཞེས་གསུངས་པས། རྒྱུ་ཤེས་པའི་མཚན་ཉིད་ལྟ་བ། རྐྱེན་འཇུག་པའི་མཚན་ཉིད་ཏིང་ངེ་འཛིན། ལམ་གྱུར་གྱི་འབྲས་བུ་རིག་འཛིན་བཞི་སྟེ་མཚན་ཉིད་གསུམ་དུ་དྲིིལ་ནས་འཆད་པ་དང་། རལ་གྲི་ལྟར་ཡུ་བ་ནས་བཟུང་སྟེ་འཆད་པ་ཞེས་བྱ་བ། རྩ་རྒྱུད་ལེའུ་ཐ་མའི་ཤོ་ལོ་ཀ་གཉིས་ཀྱི་དོན། གཞི་རང་བཞིན་གྱི་སྣང་བ། ལོག་རྟོག་འཁྲུལ་བའི་སྣང་བ། གདུལ་བྱ་ལམ་གྱི་སྣང་བ། འབྲས་བུ་བདེ་གཤེགས་ཀྱི་སྣང་བ་བཞིར་བསྡུས་ནས་འཆད་པ་དང་། བཀའ་སྡེ་ཟུར་པའི་བཤད་སྲོལ་ནི། ཆོས་ལྔའི་སྒོ་ནས་འཆད་དེ། རང་བཞིན་དངོས་པོའི་གནས་ཚུལ། མ་རྟོགས་འཁྲུལ་བའི་སྣང་ཚུལ། ཐམས་ཅད་མཁྱེན་པས་གཟིགས་ཚུལ། བརྩེ་བས་ཐུགས་རྗེ་སྐྱེ་ཚུལ། འགྲོ་དོན་ཇི་ལྟར་མཛད་ཚུལ་དང་ལྔའི་སྒོ་ནས་འཆད་པ་ཡིན་ནོ། །ད་ལྟའི་འཆད་ཚུལ་ནི་བི་མ་ལའི་ཁོག་གཞུང་ལས། རབ་ལ་མཚན་བསྟན་འབྲིང་ལ་ཕྱེ། །ཐ་མ་འབྲུ་གཉེར་བཀྲོལ་བའོ། །ཞེས་གསུངས་ལྟར་རབ་ལ་མཚན་བསྟན་ཞེས་པ་དབང་པོ་ཡང་རབ་ལ་རྒྱུད་ཀྱི་མཚན་བསྟན་ཏེ་བཤད་པ་དང་། འབྲིང་ལ་དབྱེ་ཞེས་པས་དབང་པོ་འབྲིང་རྣམས་ལ་རྒྱུད་ཀྱི་སྤྱི་དོན་རྣམ་པར་དབྱེ་བས་བཤད་པ་དང་། ཐ་མར་འབྲུ་གཉེར་དགྲོལ་བའོ་ཞེས་པས་དབང་པོ་ཐ་མ་རྣམས་ལ་འབྲུ་རེ་རེའི་སྒོ་ནས་བཀྲལ་ཏེ་བཤད་པའོ། །དང་པོ་དབང་པོ་ཡང་རབ་རྣམས་ལ་རྒྱུད་ཀྱི་མཚན་བསྟན་པ་ནི། ཁོག་གཞུང་ལས། རབ་མཚན་ཐ་སྙད་གསུམ་དུ་གྲགས། །སྒྱུ་འཕྲུལ་སྙིང་པོ་ལུང་གི་སྤྱི། །ལག་གི་རྩ་བཞིན་དབུ་ཞབས་རྟོགས། །ཞེས་པས་བསྟན། དེ་ལ། རབ་མཚན་ཐ་སྙད་གསུམ་དུ་གྲགས། །ཞེས་པ་ནི། དབང་པོ་ཡང་རབ་ལ་བསྟན་པའི་མཚན་དེ་ལ་རྣམ་པ་གསུམ་དུ་ཡོད་ཅེས་པའི་དོན་ཡིན། གསུམ་པོ་གང་ཞེ་ན། སྒྱུ་འཕྲུལ་སྙིང་པོ་ལུང་གི་སྤྱི། །ཞེས་པས་བསྟན། སྒྱུ་འཕྲུལ་ཞེས་པས་རྡོ་རྗེ་སེམས་དཔའ་སྒྱུ་འཕྲུལ་དྲྭ་བ་ཞེས་པ་རྒྱུད་དང་མཐུན་པའི་མཚན། སྙིང་པོའི་ཞེས་པས་གསང་བ་སྙིང་པོ་དེ་ཁོ་ན་ཉིད་ངེས་པའོ་ཞེས་པ་མན་ངག་དང་མཐུན་པའི་མཚན། ལུང་གི་སྤྱི་ཞེས་པས་མཚན་ཉིད་དང་རྒྱུད་ཐམས་ཅད་ཀྱི་ལུང་གི་སྤྱི་ཞེས་པ་ལུང་དང་མཐུན་པའི་མཚན་ནོ། །ལག་གི་རྩ་བཞིན་དབུ་ཞབས་རྟོགས། །ཞེས་པས་དབང་རབ་ཀྱིས་མཚན་ཐ་སྙད་གསུམ་པོ་དེ་ལ་བརྟེན་ནས་རྒྱུད་དོན་རྟོགས་ཚུལ་བསྟན་ཏེ། ལག་གི་རྩ་བཞིན་ཞེས་པས་དཔེ་བསྟན། དབུ་ཞབས་རྟོགས་ཞེས་པས་དཔེ་ཅན་བསྟན་ཏེ། དཔེར་ན་སྨན་པ་མཁས་པས་ནད་པའི་ལག་གི་རྩ་ལ་བརྟེན་ནས་ལུས་མགོ་མཇུག་གི་ནད་ཐམས་ཅད་ངོས་ཟིན་པ་བཞིན་དུ། དབང་རབ་དེས་ཀྱང་རྒྱུད་ལུང་མན་ངག་གི་མཚན་གསུམ་ལ་བརྟེན་ནས་རྒྱུད་དབུ་ཞབས་ཀྱི་དོན་ཐམས་ཅད་བདེ་བླག་ཏུ་རྟོགས་པར་འགྱུར་བས་ན་དབུ་ཞབས་རྟོགས་ཞེས་བཤད་པ་ཡིན་གསུངས། དེ་ལྟར་མཚན་གསུམ་གྱི་དང་པོ་རྒྱུད་དང་དཀྱིལ་འཁོར་གྱི་གཙོ་བོ་དང་འཆད་པའི་སྐྱེས་བུ་གསུམ་གྱི་མཚན་ཐུན་མོང་དུ་བསྟན་པ་ནི་རྡོ་རྗེ་སེམས་དཔའ་སྒྱུ་འཕྲུལ་དྲྭ་བ་སྟེ་ཞེས་པ་ལ་མཚན་གྱི་ཟུར་གཉིས་ཏེ། རྡོ་རྗེ་སེམས་དཔའ་བཤད་པ་དང་། སྒྱུ་འཕྲུལ་དྲྭ་བ་བཤད་པའོ། །དང་པོ་རྡོ་རྗེ་སེམས་དཔའ་ལའང་ཟུར་གཉིས་ཏེ། རྡོ་རྗེ་བཤད་པ་དང། སེམས་དཔའ་བཤད་པ་གཉིས། དང་པོ་རྡོ་རྗེ་ཞེས་པའི་དོན་ནི། བཤད་རྒྱུད་མེ་ལོང་ལས། ཐ་དད་མེད་པའི་རང་བཞིན་ཉིད། །རྡོ་རྗེ་ཞེས་ནི་བཤད་པ་ཡིན། །ཞེས་པས་བསྟན་པ་ཡིན། རྡོ་རྗེ་ནི་རང་བཞིན་དབྱེར་མི་ཕྱེད་པའི་ཤེས་རབ་སྟོང་པ་ཉིད་ཡིན་ལ། དེ་ཡང་རྡོ་རྗེ་དེ་རང་བཞིན་གང་དང་དབྱེར་མི་ཕྱེད་ཅེ་ན། ཆོས་ཐམས་ཅད་ཀྱི་རང་བཞིན་སྟོང་པ་ཉིད་དང་དབྱེར་མི་ཕྱེད་པ་ཡིན་ལ། སྟོང་པ་ཉིད་ལ་རྡོ་རྗེ་ཞེས་བྱ་སྟེ། མཉམ་སྦྱོར་ལས། རྡོ་རྗེ་སྟོང་པ་ཉིད་དུ་བཤད། །ཅེས་སོ། །མཚན་གྱི་ཟུར་གཉིས་པ་སེམས་དཔའ་ཞེས་པ་ནི། ཆོས་རྣམས་མ་ལུས་གཉིས་མེད་པའི། །རང་རིག་བྱང་ཆུབ་སེམས་ཉིད་དོ། །ཞེས་པས་བསྟན། དེ་ཡང་སེམས་དཔའ་ཞེས་པ་ས་ཏྭའི་སྒྲ་ལས་དོན་དྲུག་ཙམ་ལ་འཇུག་སྟེ། སེམས་ཅན་དང་། དཔའ་བ་དང་། སྙིང་སྟོབས་ཆེ་བ་དང་། བརྟན་པ་དང་། བསྡུས་པ་དང་། རྟོགས་པ་རྣམ་ལ་འཇུག་པ་ལས། འདིར་བརྟན་བསྡུས་རྟོགས་གསུམ་ལ་འཇུག་པའི་སྐབས་ཡིན་ཏེ། དང་པོ་བརྟན་པའི་དོན་ནི། གོང་གི་ཤེས་རབ་སྟོང་པ་ཉིད་དེའི་སྣང་ཆ་ཐབས་རིག་པ་རང་བྱུང་གི་ཡེ་ཤེས་ཡིན་ལ། དེ་ལྟར་དབྱིངས་དང་ཡེ་ཤེས་དེ་གཉིས་མེ་དང་ཚ་བ་བཞིན་དུ་གདོད་ནས་ཟུང་འཇུག་ཆེན་པོར་བཞུགས་ཤིང་སེམས་ཅན་ནས་སངས་རྒྱས་ཀྱི་བར་དུ་རང་བཞིན་ལ་བཟང་ངན་མེད་ཅིང་། དུས་ཐམས་ཅད་དུ་ངོ་བོ་གཞན་དུ་མི་འགྱུར་བར་གནས་པས་ན་བརྟན་པའི་རྡོ་རྗེ་སེམས་དཔའ་ཞེས་བཤད་པའོ། །གཉིས་པ་བསྡུས་པའི་དོན་ནི། དེ་ཉིད་ཀྱི་ཕྱག་རྒྱས་འཁོར་འདས་ཀྱི་ཆོས་ཐམས་ཅད་ལ་བཏབ་པས་མཉམ་པ་ཉིད་དུ་བསྡུས་ཞེས་པ་ནི། དེ་ཉིད་ཆོས་ཐམས་ཅད་ཀྱི་སྲོག་ཏུ་སོང་བས་དབུས་ན་གནས་ཤིང་སེམས་ཉིད་ཀྱི་ཀློང་དུ་བརྟན་གཡོའི་ཆོས་ཀུན་མཉམ་པ་ཉིད་དུ་བསྡུས་པས་ན་བསྡུས་པའི་རྡོ་རྗེ་སེམས་དཔའ་ཡིན་ནོ། །གསུམ་པ་རྟོགས་པའི་དོན་ནི། རྣམ་གྲོལ་དོན་གཉེར་གྱི་གང་ཟག་གིས་ལམ་ཐབས་གྲོལ་གཉིས་ལ་འབད་པས་སེམས་སངས་རྒྱས་སུ་རྟོགས་པ་དེ་ལ་རྟོགས་པའི་རྡོ་རྗེ་སེམས་དཔའ་འམ་འབྲས་བུའི་རྡོ་རྗེ་སེམས་དཔའ་ཞེས་བསྟན་པ་སྟེ། སྔ་མ་གཉིས་གནས་ཚུལ་ལ་ལྟོས་ནས་བཞག་པ་དང་། ཕྱི་མ་ནི་སྣང་ལུགས་དྲི་བྲལ་གྱི་ཆ་ནས་བཞག་པ་ཡིན་ལ། ལམ་དུས་ཀྱི་རིམ་གཉིས་ཀྱི་རྡོར་སེམས་ཡང་འབྲས་བུའི་རྡོར་སེམས་དང་ཆ་འདྲ་ཙམ་དུ་ཤེས་དགོས་གསུངས། དེས་རྒྱུད་ལ་རྡོ་རྗེ་སེམས་དཔའ་ཞེས་བཏགས་པའི་དོན་སོང་། དཀྱིལ་འཁོར་གྱི་གཙོ་བོ་ལ་རྡོ་རྗེ་སེམས་དཔའ་ཞེས་བཏགས་པའི་དོན་ནི། སེམས་ཉིད་རང་བྱུང་གི་ཡེ་ཤེས་དེ་ཉིད་ཀྱི་ངོ་བོ་མཚན་མེད་སྟོང་པ་ཉིད་ཡིན་ཀྱང་། སེམས་ཅན་གྱི་བློ་ལ་ལྟོས་ནས་རིག་པ་ཉིད་ཡེ་ཤེས་ཀྱི་འཁོར་ལོའི་ཚུལ་དུ་མཚན་མའི་ཕྱག་རྒྱར་མངོན་པར་སྣང་བའོ། །འཆད་པའི་སྐྱེས་བུ་ལ་རྡོ་རྗེ་སེམས་དཔའི་མཚན་བཏགས་པ་ནི། སྤྱིར་རྒྱུད་འཆད་པའི་སྐྱེས་བུ་རིགས་ལྔ་སྟེ། འདིར་སྟོན་པ་ཀུན་ཏུ་བཟང་པོའི་མདུན་ན་བཞུགས་པའི་ཐུགས་ཀྱི་སྒྱུ་འཕྲུལ་འཆད་པའི་སྐྱེས་བུ་རྡོ་རྗེ་མི་བསྐྱོད་པ་ལ་ཡང་དེ་ལྟར་དུ་གྲགས་སོ། །ཟུར་གཉིས་པ་སྒྱུ་འཕྲུལ་དྲྭ་བ་ཞེས་པའི་མཚན་ནི། སྒྱུ་འཕྲུལ་རྡོ་རྗེ་ལས། ཐབས་དང་ཤེས་རབ་འབྲེལ་བའི་དོན། །སྒྱུ་འཕྲུལ་ཞེས་ནི་བཞིར་བཤད་དོ། །ཞེས་པས། དེ་ལ་བཞི་ལས། དང་པོ། རྟོག་ཚོགས་སྒྱུ་འཕྲུལ་དྲྭ་བ་ནི། འབྱུང་བ་ལྔ་ལ་སྒྱུ་མ་དང་། ཕུང་པོ་ལྔ་ལ་འཕྲུལ་བ་དང་། དེ་གཉིས་རྟེན་དང་བརྟེན་པར་འབྲེལ་བ་ལ་དྲྭ་བ་ཞེས་བྱའོ། །གཉིས་པ་ངེས་དོན་སྒྱུ་འཕྲུལ་དྲྭ་བ་ནི། ཤེས་རབ་སྟོང་པ་ཉིད་ལ་སྒྱུ་མ་དང་། དེའི་རང་མདངས་མ་འགགས་པའི་ཐབས་རིག་པ་རང་བྱུང་གི་ཡེ་ཤེས་ལ་འཕྲུལ་བ་དང་། དེ་གཉིས་ངོ་བོ་དབྱེར་མེད་དུ་འབྲེལ་བ་ལ་དྲྭ་བ་ཞེས་བྱའོ། །གསུམ་པ་དྲང་དོན་སྒྱུ་འཕྲུལ་དྲྭ་བ་ནི་ངེས་དོན་སྒྱུ་འཕྲུལ་དྲྭ་བ་དེ་ཉིད་རྟོགས་པའི་ཐབས་སུ་གྱུར་པ་སྟེ། དེའི་མཚོན་བྱེད་ལྷ་ཡབ་ཡུམ་ཟུང་དུ་འཇུག་པ་སྟེ། སྟོང་པ་ཉིད་མཚོན་བྱེད་ལྷ་ཡུམ། རིག་པའི་ཡེ་ཤེས་མཚོན་བྱེད་ལྷ་ཡབ། ཟུང་འཇུག་མཚོན་བྱེད་ལྷ་ཡབ་ཡུམ་འཁྲིལ་སྦྱོར་དུ་བཞུགས་པས་ན། ལྷ་ཡུམ་རྣམས་ནི་སྒྱུ་མ་དང་། ཡབ་རྣམས་ནི་འཕྲུལ་པ་དང་། ཡབ་ཡུམ་ཁ་སྦྱོར་བདེ་བའི་སྐུར་བཞུགས་པ་དྲྭ་བའི་དོན་ནོ། །དེ་ཡང་གང་དྲང་ན་གང་ཟག་མཚན་མའི་བློ་ཅན་དེ་དྲང་། གང་དུ་དྲང་ན་ངེས་དོན་སྒྱུ་འཕྲུལ་དྲྭ་བ་དེ་ལ་དྲང་། ཚུལ་ཇི་ལྟ་བུའི་སྒོ་ནས་དྲང་ན་ལྷ་ཡབ་ཡུམ་ཐབས་ཤེས་ཕན་ཚུན་འཁྲིལ་སྦྱོར་གྱི་ཕྱག་རྒྱའི་བརྡ་དང་རྟགས་ལ་བརྟེན་ནས་དྲང་པ་ཡིན་ནོ། །བཞི་པ་ལྷ་རྟོགས་དབྱེར་མེད་ཀྱི་སྒྱུ་འཕྲུལ་དྲྭ་བ་ནི། རྟོག་ཚོགས་ཀྱི་རང་བཞིན་ལྷར་འཕྲུལ་པ་དང་། ལྷའི་ངོ་བོ་རྟོག་ཚོགས་སུ་སྣང་ཡང་རང་བཞིན་ལྷ་ཡིན་པ་ལས་མ་གཡོས་པའི་ཕྱིར་ན་ལྷ་རྟོག་དབྱེར་མེད་ཅེས་བཤད་དེ། སྒྱུ་མ་ནི་རྟོག་ཚོགས། དེ་ཉིད་རང་རིག་རྟོགས་པའི་ཐབས་ཀྱིས་ལྷར་ཤར་བ་ནི་འཕྲུལ་བ། ལྷ་རྟོག་རང་བཞིན་གཉིས་སུ་མེད་པར་འབྲེལ་བ་ནི་དྲྭ་བའོ། །གཉིས་པ་ཆེ་བ་ལ་མཚན་དུ་བཏགས་པ་ལུང་གི་མཚན་ནི། རྡོ་རྗེ་ལས། སོ་སོར་བསྟན་པ་རྒྱ་མཚོའི་རྒྱུད། །འདིར་སྟོན་འདིས་སྟོན་འདི་ཕྱིར་སྟོན། །དོན་ཀུན་འདི་ལ་ཡོངས་རྫོགས་པས། །ལུང་གི་སྤྱི་ཞེས་བཤད་པ་ཡིན། །ཞེས་པས། འདིར་སྟོན་ཞེས་པ་ནི། སྟོན་པས་གདུལ་བྱ་སོ་སོའི་བློ་དང་འཚམ་པར་བསྟན་པའི་ཆོས་ནི་རྒྱ་མཚོའི་རྒྱུད་དེ། དོན་ཟབ་ཅིང་གཏིང་དཔག་དཀའ་བ་རྒྱ་མཚོ་ལྟ་བུ། ཚིག་རྒྱ་ཆེ་ཞིང་མཐའ་ཡས་པ་དེ་ཐམས་ཅད་ཀྱི་བརྗོད་བྱ་རྒྱུད་ཀྱི་རྒྱལ་པོ་ཆེན་པོ་འདི་ཉིད་ཀྱི་ནང་དུ་རྫོགས་པར་སྟོན་པས་ན། འདིར་སྟོན་ཞེས་བཤད་དོ། །འདིས་སྟོན་ཞེས་པ་ནི། བསྟན་པ་དང་ཐེག་པ་ཐམས་ཅད་ཀྱི་དོན་མ་ལུས་པ་རྒྱུད་ཀྱི་རྒྱལ་པོ་ཆེན་པོ་འདི་ཉིད་ལས་འཕྲོས་ཏེ་སྟོན་པས་ན་འདིས་སྟོན་ཞེས་བཤད་དོ། །འདི་ཕྱིར་སྟོན་ཞེས་པ་ནི། ཐེག་པའི་སྒོ་གང་ནས་ཞུགས་ཀྱང་མཐར་ཐུག་ཐེག་པ་འདི་ལས་མི་འདའ་བས་ཐེག་པ་གཞན་ཐམས་ཅད་འདི་ཉིད་ཀྱི་ལམ་སྟེགས་ཀྱི་ཚུལ་དུ་གསུངས་པ་ཡིན་པས་ལུང་གི་སྤྱི་ཞེས་བཤད་པ་ཡིན་ཏེ། སྒྱུ་འཕྲུལ་རྡོ་རྗེ་ལས། དྲི་མ་མེད་པའི་ལུང་ཉིད་ལས། །ལས་དང་ཡེ་ཤེས་སྤྱི་ཉིད་ཀྱི། །རྫོགས་པའི་རྫོགས་ཕྱིར་ལུང་ཉིད་དོ། །ཞེས་གསུངས་པ་ལྟར་ལས་ཀྱི་ལུང་མཚན་ཉིད་སྡེ་གསུམ། ཡེ་ཤེས་ལྷའི་ལུང་ཕྱི་རྒྱུད་སྡེ་གསུམ། བྱ་བྲལ་རྫོགས་པའི་ལུང་ནང་རྒྱུད་སྡེ་གསུམ་སྟེ། དེ་དག་གི་ལུང་གི་སྤྱིར་གྱུར་པས་ན་ལུང་གི་སྤྱི་ཞེས་བཤད་པ་ཡིན་ནོ། །གསུམ་པ་དོན་རང་གི་ངོ་བོ་ལ་བཏགས་པ་མན་ངག་གི་མཚན་ནི། གླེགས་བམ་གྱི་ཀླད་དུ་བཀོད་པའི་མཚན་ལ། གསང་བ་སྙིང་པོ་དེ་ཁོ་ན་ཉིད་ངེས་པའོ། ༈ །གཞན་ཡང་མཚན་ནང་ལྟར་ཐབས་ལམ་སྟེང་སྒོ་དང་སྦྱར་ཏེ་འཆད་པ་ལ་གཉིས་ལས། དང་པོ་སྙིང་གའི་འཁོར་ལོ་དང་སྦྱར་ཏེ་བཤད་པ་ནི། སྙིང་ག་ཆོས་ཀྱི་འཁོར་ལོ་རྩ་འདབ་བརྒྱད་ཀྱི་དབུས་ན་དྭངས་མ་ཆེན་པོ་ལྔ་དང་། དེའི་དཀྱིལ་ན་ཡེ་ཤེས་ཀྱི་སྙིང་པོའི་ཐིག་ལེ་ཡེ་ནས་གནས་ཀྱང་རང་གསང་ཐབས་ཀྱིས་ཆོད་ནས་མ་མཐོང་བ་ནི་གསང་བ། དེ་ཉིད་ལ་གསང་སྔགས་ཀྱི་ཟབ་གནད་ཐམས་ཅད་འདུས་པས་སྙིང་པོ། ཐབས་ཀྱི་མན་ངག་དང་ལྡན་པའི་སྒོ་ནས་ཉམས་སུ་བླངས་བས་ཡེ་ཤེས་ཀྱི་སྣང་བ་དེ་ཉིད་གསལ་བར་སད་པ་དེ་ཁོ་ན་ཉིད། སྙིང་པོའི་ཐིག་ལེ་དེ་གཞི་ལམ་འབྲས་གསུམ་གྱི་སྲོག་ཏུ་ངེས་པས་ན་ངེས་པའོ། །གཉིས་པ་མཚན་བཞི་དང་འཁོར་ལོ་བཞི་སྦྱར་ཏེ་བཤད་པ་ནི། ལྟེ་བའི་འཁོར་ལོ་རྩ་འདབ་དྲུག་ཅུ་རྩ་བཞིའི་དབུས་ན་དབྱིངས་ཕྱུག་ལྔའི་ཐིག་ལེ་ཡི་གེ་ཨའི་རྣམ་པར་གནས་པ་ནི་གསང་བ། སྙིང་གའི་འཁོར་ལོ་རྩ་འདབ་བརྒྱད་ཀྱི་དྭངས་མ་ལྔའི་དབུས་ན་ཡེ་ཤེས་སྙིང་པོའི་ཐིག་ལེ་བཞུགས་པས་ན་སྙིང་པོ། མགྲིན་པའི་འཁོར་ལོ་རྩ་འདབ་བཅུ་དྲུག་གི་དབུས་ན་མཁའ་འགྲོ་རྔམ་མའི་ཐིག་ལེ་ཨཾ་ཡིག་གི་རྣམ་པར་གནས་པ་ནི་དེ་ཁོ་ན་ཉིད། སྤྱི་བོའི་འཁོར་ལོ་རྩ་འདབ་སོ་གཉིས་ཀྱི་དབུས་ན་ཀུན་ཏུ་བཟང་པོའི་ཐིག་ལེ་ཧཾ་ཡིག་གི་རྣམ་པར་གནས་པ་དེ་ལ་ངེས་པ་ཞེས་བཤད་དོ། །གསང་བ་ལྟར་འོག་སྒོ་དང་སྦྱར་ཏེ་བཤད་པ་ནི། རྩ་གནས་ཀྱི་ཐིག་ལེ་བདེ་བའི་ཡེ་ཤེས་ཀྱི་རོ་དང་བཅས་པ་རང་ཆས་སུ་ཡོད་ཀྱང་མ་ཤེས་པས་གསང་བ། ཐིག་ལེ་དེ་ལ་ཕུང་ཁམས་ཐམས་ཅད་ཀྱི་བཅུད་འདུས་པས་སྙིང་པོ། ཐབས་ལམ་ཟབ་མོས་གནད་དུ་བསྣུན་པས་ལྷན་སྐྱེས་ཀྱི་རང་ཞལ་ཇི་བཞིན་མཐོང་བ་དེ་ཁོ་ན་ཉིད། ཐིག་ལེ་དེ་ཉིད་གཞི་ལམ་འབྲས་བུ་གསུམ་གའི་གནད་སྲོག་ཏུ་ངེས་པ་ལ་ངེས་པ་ཞེས་བཤད་དོ། ༈ །དེ་ཡང་དཔལ་གསང་བ་འདུས་པའི་རྒྱུད་ཅེས་བྱ་བ་ཡང་དག་པར་བརྗོད་པར་བྱ་བ་དོན་གྱི་རྒྱུད་དང་། རྗོད་པར་བྱེད་པ་སྒྲའི་རྒྱུད་གཉིས་སུ་གནས་པ་ལས། དོན་ནི། གསང་བ་འདུས་པ་ཞེས་བྱ་བ་ནི། །སྐུ་གསུང་ཐུགས་ནི་རྣམ་པ་གསུམ། །གསང་བ་ཞེས་ནི་བཤད་པ་ཡིན། །ཚོགས་པ་འདུས་པར་རབ་བརྗོད་དེ། །སངས་རྒྱས་ཐམས་ཅད་མངོན་བརྗོད་བྱེད། །ཅེས་གསུངས་པའི་ཕྱིར། སྐལ་བ་ཅན་མ་ཡིན་པ་དག་ལ་གསང་བར་བྱ་བ་ཉིད་ཀྱི་ཕྱིར། སངས་རྒྱས་རྣམས་ཀྱི་དོན་དམ་པའི་སྐུ་དང་གསུང་དང་ཐུགས་ལ་གསང་བ་ཞེས་བྱ་ལ། དེ་ཡང་ཞིང་ཕྱོགས་གཅིག་པ་དང་། གདུལ་བར་བྱ་བ་ཕྱོགས་གཅིག་པའི་དབང་དུ་བྱས་པའི་སངས་རྒྱས་ཀྱི་མ་ཡིན་པར། སངས་རྒྱས་ཐམས་ཅད་ཚོགས་པའམ་འདུས་པའི་བདག་ཉིད་ཅན་ཟུང་དུ་འཇུག་པའི་སྐུ་ལ་རྡོ་རྗེ་འཆང་ཆེན་པའམ་སངས་རྒྱས་ཐམས་ཅད་ཅེས་བྱའོ། །དེ་ནི་མཐར་ཐུག་པའི་གནས་ཡིན་པའི་ཕྱིར། དེ་རྗོད་པར་བྱེད་པའི་རྒྱུད་ལ་ཡང་རྒྱུད་རྣམས་ཀུན་གྱི་སྤྱི་བོ་ཞེས་བཤད་དོ། །རྡོ་རྗེ་འཆང་ཞེས་བྱ་བ་ཡང་། སྒྲོན་མ་གསལ་བ་ལས། རིགས་ཐམས་ཅད་ཀྱི་བདག་ཉིད། ཐོག་མ་དང་ཐ་མ་མེད་པ། དང་པོའི་སངས་རྒྱས། རིག་པ་ཆེན་པོ་སྐྱེས་བུའི་གཟུགས་ཡེ་ཤེས་ཀྱི་སྐུ། རང་བཞིན་གྱིས་འོད་གསལ་བའི་བདག་ཉིད་ཅན། འཇིག་རྟེན་གསུམ་གྱི་བདག་ཉིད་ཅན། སྐུ་གསུམ་གྱི་བདག་ཉིད་ཅན། ཐེག་པ་གསུམ་གྱི་བདག་ཉིད་ཅན། དུས་གསུམ་གྱི་བདག་ཉིད་ཅན། རྡོ་རྗེ་གསུམ་གྱི་བདག་ཉིད་ཅན། བདེན་པ་གཉིས་ཀྱི་བདག་ཉིད་ཅན། ཞེས་གསུངས་པས་ན། འདུས་པ་ཁ་ཅིག་གིས་རྡོ་རྗེ་འཆང་ཆེན་པོའི་སྐུ་མདོག་དང་ཕྱག་མཚན་ཅི་ཡིན་པ་འཚོལ་ཞིང་། སྐུ་མདོག་དཀར་པོ་ཞལ་གཅིག་ཕྱག་གཉིས་པ་ཡིན་ནོ། །ཞེས་བྱ་བ་ལ་སོགས་པ་སྨྲ་བ་ནི། དེ་ལྟར་བཤད་པའི་སྒྲོན་མ་གསལ་བའི་དོན་ཐུགས་སུ་མ་ཆུད་པ་ལས་ཡིན་པར་སྣང་ལ། འོན་ཀྱང་གཟུགས་རྣམ་པར་སྣང་མཛད་ཅེས་བྱ་བ་ལ་སོགས་པ་དང་འདྲ་བར། བཏགས་པའི་དབང་གིས་དེའི་སྐུ་མདོག་དང་ཕྱག་མཚན་ཅི་ཡིན་པ་འཚོལ་བ་ནི། རིགས་དྲུག་པར་རྣམ་པར་བཞག་པའི་རྡོ་རྗེ་སེམས་དཔའི་སྐུ་མདོག་ལ་སོགས་པ་གང་ཡིན་པ་དེ་ཡིན་པར་ཤེས་པར་བྱའོ། །དེ་ལྟར་སློབ་དཔོན་ཀླུ་སྒྲུབ་སློབ་མར་བཅས་པ་རྣམས་ཀྱིས་ཀྱང་འདུས་པ་ཆོས་ཀྱི་ཕུང་པོ་སྟོང་ཕྲག་བརྒྱད་ཅུ་རྩ་བཞི་པོ་ཐམས་ཅད་ཀྱི་དོན་གྱི་གཙོ་བོ་ཡིན་པར་བཞེད་ལ། དེང་སང་ལ་ལ་དག་རྒྱུད་གཞན་དང་མ་འདྲེས་པའི་རང་དབང་ཅན་ཉི་ཚེ་བ་ཞིག་ཏུ་ཁས་ལེན་པ་ནི་ཐེག་པ་དམན་པ་ལ་མངོན་པར་ཞེན་པའི་བག་ཆགས་ལས་བྱུང་བ་ཡིན་ནོ། །དེ་བཞིན་དུ་དྲི་མ་མེད་པའི་འོད་དུ་ཡང་། དེ་བཞིན་གསོལ་བ་འདེབས་པ་པོ་ནི་དཔལ་འདུས་པར། དེ་ནས་ཕྱག་ན་རྡོ་རྗེ་དེ་བཅོམ་ལྡན་འདས་རྡོ་རྗེ་འཛིན་པས་བྱིན་གྱིས་བརླབ་པར་འགྱུར་བས་འདི་སྐད་ཅེས་གསོལ་ཏོ། །རྒྱུད་ཀྱི་རྒྱལ་པོ་ཆེན་པོ་རྒྱུད་ཐམས་ཅད་ཀྱི་བླ་ན་མེད་པ་སངས་རྒྱས་ཐམས་ཅད་ཀྱི་དཔལ་འདུས་པར་སངས་རྒྱས་ཐམས་ཅད་མངོན་པར་བརྗོད་པ་བཅོམ་ལྡན་འདས་ཀྱིས་བསྟན་དུ་གསོལ། ཞེས་པ་དེ་ལྟ་བུ་ལ་སོགས་པས་ཕྱག་ན་རྡོ་རྗེས་གསོལ་བ་བཏབ་བོ། །ཞེས་གསུངས་པའི་ཕྱིར། དུས་ཀྱི་འཁོར་ལོ་འགྲེལ་བ་དང་བཅས་པ་ཡང་གསང་བ་འདུས་པ་འཆད་བྱེད་དུ་འགྱུར་བ་ཡིན་པར་བཞེད་པ་ཡིན་ནོ། །དཔལ་ཀྱེ་རྡོ་རྗེ་ཡང་། སེམས་ནི་འདུས་པའི་གཟུགས་ཅན་ནོ། །ཞེས་ཀྱེའི་རྡོ་རྗེའི་རྒྱུད་འདུས་པ་ལ་མངོན་དུ་ཕྱོགས་པར་གསུངས་སོ། །སློབ་དཔོན་ནག་པོ་པས་གསང་བའི་དེ་ཁོ་ན་ཉིད་གསལ་བ་ཞེས་བྱ་བའི་གཞུང་བརྩམས་པ་ཡང་གསང་བ་འདུས་པའི་དེ་ཁོ་ན་ཉིད་བདེ་མཆོག་འཁོར་ལོས་གསལ་བར་འཆད་དོ་ཞེས་བཞེད་པ་ཡིན་ནོ། །འདི་བསྟན་པ་སྔ་དར་གྱི་དུས་སུ་ལོ་ཙཱ་བ་ལྕེ་བཀྲ་ཤིས་ཞེས་བྱ་བས་བསྒྱུར་ནས། བླ་མ་རྙིང་མ་བ་དག་གིས་ཏནྟྲ་སྡེ་བཅོ་བརྒྱད་པོའི་གཙོ་བོར་ཡང་འཆད་ཅིང་། བོད་ཀྱི་སློབ་དཔོན་སྔ་མས་འགྲེལ་བ་མཛད་པ་ཡང་ཡོད། ཕྱིས་སུ་ནི་ལོ་ཙཱ་བ་རིན་ཆེན་བཟང་པོ་ལ་སོགས་ཀྱི་རྗེས་སུ་འབྲང་བ་དང་བཅས་པ་རྣམས་སོ། །ཞེས་དེབ་ཐེར་སྔོན་པོ་ལས་གསུངས་སོ། ༈ །ཐེག་ཆེན་གྱི་མདོ་རྣམས་ལས། བདེ་གཤེགས་སྙིང་པོ་སྟོབས་སོགས་ཀྱི་ཡོན་ཏན་ཡེ་ལྡན་དུ་གསུངས་པ་དེ་ངེས་དོན་ཡིན་ཡང་། སེམས་ཅན་ཕལ་པ་ཁྱི་ཕག་སོགས་ཐ་མལ་པའི་རྒྱུད་ན་སྟོབས་བཅུའི་ཡོན་ཏན་མངོན་གྱུར་དུ་ཡོད་པ་ལྟ་ཅི། རྒྱུན་ཞུགས་ཞིག་གི་རྟོགས་པ་ཙམ་དང་། སོ་སྐྱེ་ཕལ་བ་ཞིག་གི་ཤེས་རབ་ཀྱང་མངོན་གྱུར་དུ་ཡོད་པ་བསྒྲུབ་ཏུ་མེད་པས་ཡོན་ཏན་ཡེ་ལྡན་གསུངས་པ་དྲང་དོན་དུ་བྱས་ནས་སངས་རྒྱས་ཀྱི་རྒྱུ་ཙམ་དུ་ཁས་ལེན་པའི་ལུགས་དེ་འཛིན་པ་དང་། སྔགས་ནང་པ་གཞི་འབྲས་དབྱེར་མེད་དུ་བཤད་པ་ལའང་དེའི་ཚུལ་གྱིས་སངས་རྒྱས་ཀྱི་རྒྱུ་ཡོད་པ་ཙམ་ལ་དགོངས་སོ། །ཞེས་དང་། འབྲས་བུ་རྣམ་དག་རིགས་ལྔ་ལ་སོགས་པའི་ལྷའི་རྣམ་པ་ཙམ་ལམ་དུ་བྱེད་ཀྱི། དེ་དང་དེ་དངོས་མ་ཡིན་ཏེ། བསྐྱེད་རིམ་པས་བདག་རྡོ་རྗེ་སེམས་དཔའ་དངོས་ཡིན་པར་མོས་པས་བསྒོམ་དགོས་ཀྱང་། སངས་རྒྱས་ཀྱི་ཡོན་ཏན་ཏིལ་འབྲུ་ཙམ་ཡང་བདག་ལ་མེད་པས་ཕུང་ཁམས་སངས་རྒྱས་དངོས་མ་ཡིན་ནོ་སྙམ་དུ་བསམ་པ་དང་། སྔགས་ཀྱི་རྫོགས་རིམ་གྱི་སྒྱུ་ལུས་དང་། འོད་གསལ་གྱི་སྣང་བ་བསྒོམ་པ་སོགས་ཀྱང་གཞི་དབྱིངས་འདུས་མ་བྱས་ཀྱི་ངོ་བོ་ཉིད་ལམ་དུ་བྱེད་པ་མིན་པར། འདུས་བྱས་སེམས་ཀྱིས་དེ་དང་དེའི་རྣམ་པ་བསྒོམས་པས་སེམས་ཡོངས་སུ་དག་པའི་གནས་སྐབས་ན་སྐད་ཅིག་མའི་སེམས་འགྱུར་བ་ཅན་དེས་ཆོས་ཐམས་ཅད་མཁྱེན་པ་དང་། དེ་རྒྱུན་གྱི་རྟག་པའི་རྡོ་རྗེའི་སྐུ་དང་། དེ་མྱོང་བྱར་གྱུར་པའི་བདེ་བའི་ཚོར་བ་དང་ལྡན་པའི་བདེ་ཆེན་གྱི་སྐུ་དང་། དེའི་ཕྲིན་ལས་སྣ་ཚོགས་མངོན་པར་འདུ་བྱེད་པ་དང་། དེས་ཆོས་ཐམས་ཅད་མཁྱེན་པ་པོ་དང་མཁྱེན་བྱ་གཉིས་སུ་འབྱེད་པའི་སྒོ་ནས་ཤེས་པ་དང་། དེ་འཁོར་བ་ལས་རྣམ་པར་གྲོལ་བ་དང་། རྣམ་གྲོལ་དེ་ལྟ་བུའི་ཡེ་ཤེས་གཟིགས་པ་པོ་ཡིན་ནོ་སྙམ་དུ་འཁོར་བའི་སྐྱོན་གྱིས་དག་པའི་ཕུང་པོ་ལྔ་སྐད་ཅིག་དང་དུ་མའི་ཆོས་ཅན་བདག་ཏུ་མི་འཛིན་ཡང་རྒྱུད་ཐ་དད་དུ་ཕྱེ་བ་ཞིག་གི་གང་ཟག་ཁྱད་པར་ཅན་ཞིག་ལ་སངས་རྒྱས་སུ་འཛིན་པས་ནི། སངས་རྒྱས་ཀྱི་ཡེ་ཤེས་སྐུའི་ཕྱོགས་ཙམ་མ་ཤེས་ཏེ། སངས་རྒྱས་ཞེས་པའི་གང་ཟག་རང་རྒྱུད་པ་ཞིག་ཏུ་རྣམ་པར་བཞག་པའི་གྲུབ་མཐའ་སྙིང་ལ་འཆང་བས་མདོ་སྔགས་ཀྱི་ལམ་གྱི་རྣམ་བཞག་ཐམས་ཅད་དེ་ལྟར་འཆད་ཅིང་སངས་རྒྱས་ཀྱི་ཡེ་ཤེས་ཀྱི་སྐུ་རྣམ་པ་ཐམས་ཅད་པར་འཆར་བ་ལ་སྐྱོན་བརྗོད་པ་ནི་ཐེག་པ་ཆེན་པོའི་དགོངས་དོན་ལ་ཕྱོགས་སུ་མ་ཕྱིན་པ་ཡིན་ནོ། །ཞེས་དང་། དེས་ན་སྟོབས་སོགས་ཀྱི་ཡོན་ཏན་ཡེ་ལྡན། རལ་གྲི་ཚད་ལྡན་ལ་གཅོད་པའི་ཡོན་ཏན། མེ་ལོང་དྭངས་བ་ལ་གཟུགས་བརྙན་སྣང་བའི་ཡོན་ཏན། ནོར་བུ་ལ་འོད་དང་དགོས་འདོད་རྩོལ་བའི་ཡོན་ཏན་ཡེ་ནས་རང་ཆས་ལྷུན་གྲུབ་ཏུ་ཡོད་ཀྱང་རལ་གྲི་ཤུབ་དང་། མེ་ལོང་སྒྲོམ་དུ་ཆུད་པ། ནོར་བུ་ལ་འདམ་གོས་པ་བཞིན་ནོ། །དེའི་སྒྲིབ་པ་བསལ་ན་ཡོན་ཏན་གསར་བསྐྱེད་མིན་ཡང་མངོན་དུ་སྣང་བ་གསར་སྐྱེ་ལྟར་སྣང་ངོ་། །འོ་ན་སེམས་ཅན་རྣམས་ཀྱི་གཞི་དུས་ཀྱི་སེམས་ཀྱི་ཆོས་ཉིད་བདེ་གཤེགས་སྙིང་པོ་དེས། རང་ངོས་ན་ཤེས་བྱ་ཐམས་ཅད་མཁྱེན་བཞིན་ཡོད་དམ་སྙམ་ན་ཡོད་མི་དགོས་ཏེ། མཁྱེན་བཞིན་ཡོད་པ་ཡོན་ཏན་མངོན་དུ་སྣང་བ་དེ་ལ་ཅི་ཡོད། མི་མཁྱེན་ན་ཆོས་ཀུན་མཁྱེན་པའི་ཡོན་ཏན་ཡེ་ལྡན་ཇི་ལྟར་ཡིན་སྙམ་ན། སེམས་ཅན་ཐམས་ཅད་ཀྱི་སེམས་ཀྱི་ཆོས་ཉིད་དེ་ནི་རིག་སྟོང་ཟུང་འཇུག་གདོད་མའི་གནས་ལུགས་ཡིན་པས། དེ་རང་གི་ངོ་བོའི་དབང་དུ་བྱས་ན་མཁྱེན་མི་མཁྱེན་སོགས་ཀྱི་ཐ་སྙད་ཀྱི་སྤྲོས་པ་ཉེ་བར་ཞི་བ་ཡིན་པས་དཔེར་ན་འཕགས་པའི་མཉམ་བཞག་གི་ཡེ་ཤེས་ཀྱི་དོན་ཇི་ལྟ་བ་བཞིན་ཡིན་ཏེ། ཇི་ལྟ་བ་ལས་མ་གཡོས་པའི་ཕྱིར་ན་དེ་ལ་གཉིས་ཆོས་ཀྱི་རྣམ་པ་གང་ཡང་མི་སྣང་ཡང་གང་དུ་མི་འཛིན་པས་དེ་ལྟར་བསམ་དུ་མེད་དོ། །དེའི་ཕྱིར་ཆོས་ཉིད་གཞི་ལས་མ་གཡོས་པའི་དོན་དེ་ལ་བསམས་ན་འཁོར་འདས་གཉིས་ཀ་དེ་ལས་མ་གཡོས་ཤིང་གཉིས་ཆོས་མེད་པས་དེ་ལྟར་ཐ་སྙད་གདགས་པ་མེད་དེ་སྤྲོས་པ་ཞི་བའི་ཕྱིར་རོ། །དེའི་ཕྱིར་རྫོགས་ཆེན་གྱིས་འཁོར་འདས་གང་ཡང་མ་བྱུང་བའི་ཡེ་ཐོག་གཞིའི་གནས་ལུགས་བསྟན་པའང་དེ་དང་འདྲའོ། །འཁོར་འདས་གཉིས་ནི་དེ་ལས་གཞི་སྣང་བསྐྱོད་ནས་འབྱུང་དགོས་པས་གློ་བུར་བ་ཡིན་ནོ། །དེའི་ཕྱིར་སྟོབས་བཅུ་ལ་སོགས་པ་འདི་སངས་རྒྱས་སེམས་ཅན་གཉིས་སུ་འབྱེད་པའི་ཆ་ནས་བཞག་གི་གཉིས་མེད་ལ་དེ་ལྟར་ཕྱེ་བ་མེད་དེ་ཇི་ལྟ་བ་གཉིས་སུ་མེད་པའི་དོན་ཡིན་ནོ། །གཞི་སྣང་ཤར་ནས་གདོད་མའི་གཞི་ལ་མ་གྲོལ་གྱི་བར་དུ་གློ་བུར་གྱི་དྲི་མ་མཐའ་དག་མ་ཟད་ལ། ཟད་པའི་ཚེ་ཇི་ལྟ་བ་ལས་མ་གཡོས་བཞིན་དུ། ཇི་སྙེད་པའི་དོན་ཀུན་མཁྱེན་པའི་ཡོན་ཏན་མངོན་དུ་སྣང་བ་ནི་དག་པ་གཉིས་ལྡན་ལ་ཡོད་ཀྱི། རང་བཞིན་རྣམ་དག་ཙམ་ལ་མེད་ཀྱང་། དེའི་ཡོན་ཏན་ཡེ་ལྡན་དུ་ཁས་ལེན་དགོས་པ་རལ་གྲིའི་དཔེ་སོགས་བཞིན་ནོ། །དེས་ན་གཞིའི་དུས་ན་བདེ་གཤེགས་སྙིང་པོ་ལ་ཡོན་ཏན་མངོན་དུ་ཡོད་རུང་ཙམ་དུ་ཤེས་པར་བྱའོ། །ཇི་ལྟ་བའི་གནས་ལུགས་ཀྱི་དབང་དུ་བྱས་ན་གཉིས་ཆོས་ཡེ་ནས་མེད་པའི་ཕྱིར། དེས་ན་གཉིས་སུ་མ་གཟིགས་པ་དེ་མ་ལུས་པར་མཁྱེན་པ་ཡིན་གྱི་རེ་རེ་ནས་མཁྱེན་པར་བགྲང་དུ་མེད་དོ། །རོང་ཟོམ་པ་སོགས་ཇི་ལྟའི་གནས་ལུགས་དབང་བཙན་དུ་བྱས་ནས་སྟོབས་བཅུ་སོགས་གཞན་སྣང་དུ་བཞེད་པ་སོགས་མཁས་པ་ཐམས་ཅད་ཕྱོགས་རེའི་གཞལ་ཚུལ་ལས་དོན་ལ་མི་འགལ་བར་ཤེས་པར་བྱའོ། །ནོར་བུ་ཡོངས་སུ་དག་ཚེ་རྟོག་པ་མེད་བཞིན་དགོས་འདོད་འབྱུང་བ་དེ་བཞིན་རལ་གྲི་དང་མེ་ལོང་ལ་རྟོག་པ་མེད་ཀྱང་གཅོད་པ་དང་གཟུགས་བརྙན་སྣང་བ་དག་ཀྱང་རང་གི་ངོ་བོའི་ཡོན་ཏན་ཡིན་ཡང་། དེ་ལྟར་སྣང་བ་རང་ལས་གཞན་པའི་ཡུལ་ལ་ལྟོས་དགོས་ཀྱི། རང་ཁོ་ན་ལ་གཅོད་སྣང་དགོས་འདོད་རྩོལ་བའི་ནུས་པ་མངོན་གྱུར་བཞག་མི་ཤེས་པ་བཞིན་ནོ། །ཞེས་སོ། །༡གཞི་རང་བཞིན་རྣམ་དག་འོད་གསལ་བའི་ཆོས་ཉིད་དེ་སངས་རྒྱས་ཡིན་ནམ་ཞེ་ན། རང་བཞིན་རྣམ་དག་གི་སངས་རྒྱས་ཡིན་ཏེ་རང་བཞིན་གནས་ལུགས་ཀྱི་དབང་དུ་བྱས་ན་ཡེ་ནས་དག་ཅིང་ཡོན་ཏན་ལྷུན་གྲུབ་ཡིན་པ་ལས་གསར་དུ་སྐྱེད་འདོན་དུ་མེད་དེ་འདུས་མ་བྱས་ཡིན་པའི་ཕྱིར་སངས་རྒྱས་ཡིན་ཞེས་ཀྱང་བརྗོད། སྣང་ལུགས་ཀྱི་དབང་དུ་བྱས་ན། གཞི་དེ་ཉིད་རྒྱུད་ལྡན་གྱི་གང་ཟག་དེས་ལམ་རྐྱེན་གྱིས་ཟིན་ན་གྲོལ་གཞི་བྱས་ནས་གྲོལ་བ་ཡིན་པས་དག་པ་གཉིས་ལྡན་གྱི་སངས་རྒྱས་ཡིན་ཞེས་བྱའོ། །ཞེས་སོ། །༢སྒྲིབ་གཉིས་བག་ཆགས་དང་བཅས་པ་ཡོངས་སུ་དག་པའི་ཡེ་ཤེས་མཐར་ཐུག་པ་སངས་རྒྱས་ཀྱི་མཚན་ཉིད། ཡེ་ཤེས་དེ་ལ་ཆོས་ཉིད་གཟིགས་པའི་ཆ་ནས་ཇི་ལྟ་བ་མཁྱེན་པའི་ཡེ་ཤེས་ཞེས་དང་། ཆོས་ཅན་མཐའ་དག་གཟིགས་པའི་ཆ་ནས་ཇི་སྙེད་པའི་ཡེ་ཤེས་ཞེས་ལྡོག་ཆས་བཏགས་ཀྱི་ངོ་བོ་ནི་རྣམ་པ་ཐམས་ཅད་མཁྱེན་པའི་ཡེ་ཤེས་ཉག་གཅིག་ལས་ཐ་དད་དུ་མེད་དེ། བདེན་གཉིས་དབྱེར་མེད་ཀྱི་གནས་ལུགས་མཐར་ཐུག་གཟིགས་པའི་ཡེ་ཤེས་ཡིན་ནོ། །དེས་ན་རྣམ་ཤེས་ཚོགས་བརྒྱད་ཆོས་ཅན་དང་། དེའི་རང་བཞིན་ཆོས་ཉིད་ཀྱི་ཡེ་ཤེས་གཉིས་ནི་གཅིག་ཐ་དད་གང་དུའང་ཁས་བླང་བྱ་མིན་པར། དགོངས་འགྲེལ་ལས། འདུ་བྱེད་ཁམས་དང་དོན་དམ་མཚན་ཉིད་ནི། །གཅིག་དང་ཐ་དད་བྲལ་བའི་མཚན་ཉིད་དེ། །གཅིག་དང་ཐ་དད་དུ་ཡང་གང་རྟོག་པ། །དེ་དག་ཚུལ་མིན་ལྟ་ལ་ཞུགས་པ་ཡིན། །ཞེས་གསུངས། དེའི་ཕྱིར་དེ་གཉིས་ཐ་སྙད་དུ་གཅིག་མ་ཡིན་ཏེ་སེམས་རྟོགས་པ་ཙམ་གྱིས་སེམས་ཀྱི་ཆོས་ཉིད་ཡེ་ཤེས་མི་རྟོགས་པ་དང་། ཆོས་ཅན་དང་ཆོས་ཉིད་ཡིན་པ་སོགས་ཀྱི་ཕྱིར་རོ། །དོན་དམ་པར་ཐ་དད་མིན་ཏེ་སེམས་ཀྱི་རང་བཞིན་ཡེ་ཤེས་ཡིན་པས་ཡེ་ཤེས་རྟོགས་དུས་སེམས་ཀྱང་དེ་ལས་ཐ་དད་དུ་མ་དམིགས་པའི་ཕྱིར་དང་། ཡེ་ཤེས་རྟོགས་ཚེ་སེམས་རང་གྲོལ་དུ་འཆར་བ་སོགས་ཀྱི་ཕྱིར་ནའོ། ༈ །སྤྱིར་ངག་ཙམ་ལ་ཡོད་པའི་དགོས་འབྲེལ་ཡན་ལག་བཞི་ནི། རྟོགས་ལྡན་གྱི་ངག་དེས་བསྟན་པར་བྱ་བའི་དོན་ནི་དེའི་བརྗོད་བྱ། ངག་དེ་ལས་རྟོགས་པར་བྱ་བ་ནི་དགོས་པ། རྟོགས་པ་ལས་འབྲས་བུ་གྲུབ་པ་ནི་ཉིང་དགོས། དགོས་པ་ངག་ལས་བྱུང་བ་ནི་འབྲེལ་བའོ། །དཔེར་ན་བུམ་པ་ནི་བརྗོད་བྱ། བུམ་པ་འོན་ཅིག་གི་སྒྲ་ལས་དེ་ཐོས་པ་ནི་དགོས་པ། དེ་ལས་ཆུ་བླངས་ཏེ་བྱ་བ་བྱེད་པ་ནི་ཉིང་དགོས། དེ་དག་གཅིག་ལ་གཅིག་བརྟེན་པ་ནི་འབྲེལ་པ་སྟེ་མེད་ན་མི་འབྱུང་བའི་ཕྱིར་རོ། །རྒྱུད་དོན་ལུས་ལ་ཡོད་པའི་དགོས་འགྲེལ་ཡན་ལག་བཞི་ནི། རྒྱུད་འདིའི་གཞི་ལམ་འབྲས་བུ་གསུམ་ནི་བརྗོད་བྱ། དེའི་མཚོན་པ་མིང་ཚིག་ཡི་གེར་སྣང་བའི་གཞུང་ལེའུ་ཉི་ཤུ་རྩ་གཉིས་ནི་རྗོད་བྱེད། རྗོད་བྱེད་ཚིག་རྒྱུད་ལ་བརྟེན་ནས་བརྗོད་བྱ་དོན་གྱི་རྒྱུད་རྟོགས་པ་ནི་དགོས་པ། རྟོགས་པ་བཞིན་ཉམས་སུ་བླངས་པས་གནས་སྐབས་དང་མཐར་ཐུག་གི་དོན་འགྲུབ་པ་ནི་ཉིང་དགོས། འབྲས་བུ་འགྲུབ་པ་དེ་ཉིད་རྒྱུད་དོན་རྟོགས་པ་ལ་ལྟོས་ཤིང་། རྟོགས་པའང་རྗོད་བྱེད་དང་བརྗོད་བྱ་ལ་བརྟེན་པའམ་ལྟོས་པ་ནི་འབྲེལ་བའོ། །ཚུལ་འདི་ཉིད་མན་ངག་ལྟ་ཕྲེང་དུ་གསུངས་ཏེ། གཞི་རང་བཞིན་གྱི་རྒྱུད་བརྗོད་བྱ། རྐྱེན་འཇུག་པའི་མཚན་ཉིད་དགོས་པ། རྒྱུ་ཤེས་པའི་མཚན་ཉིད་འབྲེལ་བ། དེ་གཉིས་ཀྱིས་མངོན་དུ་གྱུར་པ་འབྲས་བུའི་མཚན་ཉིད་དགོས་པའི་ཡང་དགོས་པའོ། །ཞེས་གསུངས་སོ། །དབྱེ་ན་གསུམ་ལས། གཞི་དཀྱིལ་འཁོར་གསུམ་དུ་ཡེ་ནས་སངས་རྒྱས་པའི་དོན་བརྗོད་བྱ། དེ་སྟོན་པའི་ཚིག་གླེང་གཞི་དང་གླེང་བསླང་བ་ལྟ་བུ་ནི་རྗོད་བྱེད། དེ་ཉིད་སྟོན་པས་གསུངས་པ་བཞིན་འཁོར་གྱིས་རྟོགས་པ་དགོས་པ། དེ་ཉིད་གདུལ་བྱ་འདུལ་བྱེད་གཞན་ལ་བརྟེན་ནས་དོན་འགྲུབ་པ་ཉིང་དགོས། དེ་དག་གཅིག་ལ་གཅིག་བརྟེན་པ་ནི་འབྲེལ་བའོ། །ལམ་དབང་མནོས་ཏེ་བསྐྱེད་རྫོགས་ཡན་ལག་དང་བཅས་པའི་ཐབས་ཤེས་ཟུང་འབྲེལ་ནི་བརྗོད་བྱ། དེ་སྟོན་པའི་ཚིག་ཡི་གེ་སྤྲིན་གྱི་ཚོགས་བསྒྲུབ་པ་ལ་སོགས་པ་རྒྱུད་དོན་དངོས་རྣམས་རྗོད་བྱེད། དེ་ལ་བརྟེན་ནས་རྣལ་འབྱོར་པས་ཆོས་ཐམས་ཅད་ཐབས་ཤེས་ཟུང་འཇུག་ཏུ་རྟོགས་པ་ནི་དགོས་པ། རྟོགས་པ་བཞིན་ཉམས་སུ་བླངས་པས་འབྲས་བུ་གྲུབ་པ་ནི་ཉིང་དགོས། དེ་དག་གཅིག་ལ་གཅིག་བརྟེན་ཅིང་། ཁྱད་པར་དུ། དཀྱིལ་འཁོར་གཟུང་མ་དང་འབྲེལ། གཟུང་མ་དབང་དང་འབྲེལ། དབང་སྒྲུབ་པ་དང་འབྲེལ། སྒྲུབ་པ་འབྲས་བུ་དང་འབྲེལ་བ་ནི་འབྲེལ་བའོ། །འབྲས་བུ་དཀྱིལ་འཁོར་གསུམ་དུ་སངས་རྒྱས་ནས་སྐུ་དང་ཡེ་ཤེས་སུ་ལྷུན་གྱིས་གྲུབ་པ་ནི་བརྗོད་བྱ། དེ་སྟོན་པའི་ཚིག་གླེང་གཞི་གླེང་བསླང་བ་ལྟ་བུ་ནི་རྗོད་བྱེད། སེམས་ཅན་གྱི་དོན་དུ་སྤྲུལ་པ་འཕྲོ་བ་ནི་དགོས་པ། དེ་ལས་འགྲོ་བའི་དོན་གཉིས་འགྲུབ་པ་ནི་ཉིང་དགོས། དེ་དག་གཅིག་ལ་གཅིག་བརྟེན་དུ་བྱུང་བ་ནི་ཐུགས་རྗེ་ཡེ་ཤེས་ཀྱི་འབྲེལ་བ་གྲུབ་པའོ། ༈ །དེ་ཡང་སྒྲར་སྣང་རུང་ཙམ་སྟོན་པ་རིགས་དྲུག་པའི་ཀློང་ན་རང་གསལ་བ་ཉིད། རྒྱལ་བ་རིགས་ལྔ་ལ་སོགས་པའི་ཐུགས་སུ་ཆུད་པར་མཛད་པ་བཞིན། གསང་བདག་ལ་སོགས་པ་གཞན་སྣང་དུ་སྟོན་པའི་སྟོན་པས་སྒྲར་གྲགས་པའི་སྒོ་ནས་གཞན་ལ་སྣང་བར་མཛད་པ་སྟེ། བློ་གྲོས་ཐབས་ལྡན་ལ་སོགས་པས་བརྡར་གྱུར་པའི་ཡི་གེའི་ཚོགས་སུ་བྱས་ནས་རིམ་པར་བརྒྱུད་དེ། ད་ལྟར་ཡང་ཡི་གེའི་ཕྱི་མོ་བརྡར་གྱུར་པའི་ཚུལ་དུ་ཡོད་པ་སོགས་ལས་འཆད་པ་པོའི་བློ་ལ་བརྗོད་བྱའི་དོན་མཚོན་པའི་སྒྲ་སྤྱི་སྣང་ནས་སྒྲར་གྲགས་པའི་ཚུལ་གྱིས་བཤད་པས་ཉན་པ་པོའི་བློ་ལའང་དེ་ལྟར་སྣང་བ་ནི་དེ་བཞིན་གཤེགས་པའི་གསུང་གི་ཆོ་འཕྲུལ་ཡི་གེ་འཁོར་ལོའི་ཆོ་འཕྲུལ་རྨད་དུ་བྱུང་བའོ། །ཐ་སྙད་ཀྱི་དབང་དུ་བྱས་ནས་ཡི་གེས་དོན་སྟོན་པ་ནི། ཡི་གེ་འཇུག་པའི་གནས་བརྒྱད་ལ་བརྟེན་པ་ཡིན་ཏེ། སྒྲ་དང་། སྐད་དང་། མིང་དང་། མཚན་མ་དང་། བརྡ་དང་། ཐ་སྙད་དང་། ཚིག་དང་། དོན་རྣམས་སོ། །དེ་ལ་སྒྲ་ནི་སྤྱིར་ཟིན་མ་ཟིན་སོགས་ཀྱི་དབྱེ་བ་ཡོད་ཀྱང་། འདིར་ཟིན་པའི་སྒྲ་སེམས་ཅན་དུ་སྟོན་ཅིང་ལུང་སྟོན་པའོ། །སྐད་ནི་ལེགས་སྦྱར་ལ་སོགས་པ་ཡུལ་སོ་སོའི་སྐད་དེ། སྤྱིར་ཡུལ་དབུས་ལས་མཐའ་འཁོབ་པའི་སྐད་རྣམས་ཟུར་ཆག་ཏུ་བསྡུ་བར་གསུངས་པ་སོགས་ཡོད་ཀྱང་། བྱེ་བྲག་བོད་ཀྱི་སྐད་ནི། སྒྲ་དག་སྐད་སྙན་སཾ་སྐྲྀ་ཏ་དང་མཚུངས། །ཞེས་མཁས་པས་བསྔགས་པར་མཛད་པའོ། །མིང་ནི། ཆོས་མངོན་པའི་ལུགས་ཀྱི་ཡི་གེ་འདུས་པའི་བདག་ཉིད་ཅན་དང་། བརྡ་སྤྲོད་པའི་ལུགས་ལ། རྣམ་དབྱེའི་མཐའ་ཅན་ནི་ཚིག་གོ །རྣམ་དབྱེ་མེད་པ་ནི་མིང་ངོ་ཞེས་འབྱུང་ཡང་། བོད་སྐད་ལ་དེ་འདྲ་མི་འབྱུང་གཤིས་དོན་གྱི་ངོ་བོ་ཙམ་སྟོན་པའི་སྒྲ་སྟེ་ཀ་བ་བུམ་པ་སོགས་དངོས་མིང་བླ་དྭགས་སོ། །མཚན་མ་ནི། མིང་དེས་དོན་དེ་མཚོན་པར་བྱེད་ཅིང་སྣང་བར་ནུས་པའི་ཆ་སྟེ། བུམ་པ་ཞེས་བརྗོད་པས་ལྟོ་ལྡིར་གྱི་རྣམ་པ་མཚོན་ནུས་པ་ལྟ་བུའོ། །བརྡ་ནི་མིང་དང་མིང་ཅན་འབྲེལ་བར་བྱེད་པ། སྒྲ་དང་དོན་སྤྱིའི་རྣམ་པ་ཅན་ཏེ། དཔེར་མེ་ཞེས་བརྗོད་དུས་དེ་གཉིས་ཀའི་བློ་ལ་ཚ་འབར་གྱི་རྣམ་པ་ཅན་གྱི་དོན་སྤྱི་འཆར་ཞིང་། དེ་ལ་བརྟེན་ནས་དོན་རང་མཚན་གྱི་ཡུལ་ལ་འཇུག་ལྡོག་བྱེད་པའོ། །ཐ་སྙད་ནི་དངོས་ལ་ཐ་སྙད་མེད་ལ། འཇུག་ལྡོག་བྱེད་པའི་ཕྱིར་ནན་གྱིས་བཏགས་ཏེ། གདུང་འདེགས་ཀྱི་ཤིང་ལ་ཀ་བ་ཞེས་བཏགས་ནས་བསྟན་པ་ན། འདི་ཀ་བ་ཡིན་ནོ་སྙམ་པའི་ཤེས་པ་ནི་བཏགས་པའི་ཤེས་པ་དང་། དེ་སླར་ཀ་བ་ཞེས་སྒྲར་བརྗོད་པ་ནི་བརྗོད་པ། དེས་གདུང་འདེགས་སོགས་ཀྱི་བྱ་བ་ལ་འཇུག་པར་བརྩམ་པ་ནི་འཇུག་པ་སྟེ། ཤེས་བརྗོད་འཇུག་གསུམ་ག་སྐྱེ་བར་བྱེད་པའི་གཞི་བརྡ་ལས་ཐོབ་པའི་བློ་དེའོ། །ཚིག་ནི། ཆོས་མངོན་པའི་ལུགས་ཀྱིས་མིང་འདུས་ནས་དོན་གྱི་ཁྱད་པར་བརྗོད་པ་སྟེ། འདུས་བྱས་མི་རྟག་ཅེས་པ་ལྟ་བུའོ། །དོན་ནི་ཆོས་རྣམས་ཀྱི་གནས་ལུགས་ཇི་ལྟར་གནས་པ་ཉིད་དོ། །དེ་ལྟར་སྒྲ་སྐད་སོགས་བརྒྱད་པོ་དེ་དག་ལ་ཡི་གེའི་འཇུག་ཚུལ་ནི། སྒྲ་དོན་འདྲེས་འཛིན་གྱི་བློའི་དབང་གིས་ཏེ། བློ་དེ་སྐྱེ་བ་ལ་ཡང་། བརྡ་བྱེད་པའི་དུས་ན་ཤེས་པ་གཞན་ལས་ཁྱད་པར་དུ་བྱེད་པའི་ཆོས་ལྔ་དང་ལྡན་དགོས་ཏེ། དེ་ཡང་དོན་ལ་དམིགས་པས་དོན་སྤྱིའི་ནུས་པ་སྐྱེད། སྒྲ་ལས་བྱུང་བས་སྒྲ་སྤྱིའི་རྣམ་པ་སྐྱེད། མཐུན་པར་སྣང་བ་དང་ཐུན་མོང་དུ་གྲགས་པ་གཉིས་ཀྱི་ཞེན་པ་སྐྱེ་ཞིང་གཞན་ལ་གོ་བར་བྱེད་ནུས། མངོན་པར་ཞེན་པས་ནི་མིང་དང་མིང་ཅན་འབྲེལ་བར་བྱེད་པ་ཡིན་ནོ། །དེ་ཡང་གདུང་འདེགས་ཀྱི་ཤིང་མཐོང་ན་འདིའི་མིང་ཅི་སྙམ་པ་དང་། ཀ་བ་ཞེས་པའི་སྒྲ་ཐོས་ན་འདི་གང་གི་མིང་ཡིན་སྙམ་པའི་བློ་སྐྱེ་ལ། དེའི་ཚེ་གཞན་གྱིས་བརྡ་སྤྲད་པ་ན་མིང་དང་མིང་ཅན་འབྲེལ་བའི་ཤེས་པ་སྟེ། དེ་མངོན་སུམ་དུ་གྱུར་ནས་ཕྱིས་དེ་དང་འདྲ་བའི་རྣམ་པ་ལ་དེ་ཉིད་དུ་མངོན་པར་ཞེན་པ་སྐྱེ། དེ་ལས་སྒྲ་དོན་འདྲེས་རུང་གི་མངོན་ཞེན་ཁོང་དུ་ཆུད་པར་འགྱུར་ལ། གང་ཟག་བསྟན་བཅོས་ལ་བློ་མ་བྱང་བ་རྣམས་ཡི་གེ་སྟོན་པའི་གཟུགས་ལ་ཡི་གེ་ཉིད་དུ་འཛིན་པ་དང་། སྒྲ་སྤྱིའི་རྣམ་པའང་ཡིག་གཟུགས་ལ་ཞེན་ཅིང་གླེགས་བམ་དུ་བྲིས་པ་ལ་བརྗོད་ཡུལ་དུ་བྱེད་པ་ཡིན། སྨྲ་བ་པོ་དང་ཉན་པ་པོ་བརྡ་ལ་བྱང་བ་དག་ལ་སྒྲ་དོན་འདྲེས་རུང་གི་ཤེས་པ་སྐྱེ་ཚུལ་ནི། སྨྲ་བ་པོས་སྒྲ་དེ་བརྗོད་པ་ན་སྔོན་བརྡ་བྱེད་པའི་དུས་ཀྱི་ཁྱད་ཆོས་ཡན་ལག་ལྔ་ལ་ཚུལ་བཞིན་དུ་འདྲེས་པར་བྱས་པས་ཐ་སྙད་འདོར་ལེན་གྱི་སྐབས་ཚུལ་དེ་འབད་མེད་དུ་འབྱུང་སྟེ། སྨྲ་བ་པོས་སྒྲ་རང་མཚན་པ་བརྗོད་པའི་ཚེ་ཉན་པ་པོའི་ངོར་སྒྲ་ཙམ་གྱི་རྣམ་པ། དེ་ནས་དོན་གྱི་རྣམ་རྟོགདེ་ནས་སྒྲ་དོན་འདྲེས་རུང་གི་བློ། དེ་ལས་སྣང་ཞེན་གྱི་དམིགས་པ། དེ་ནས་མཐུན་པར་སྣང་བའི་ཤེས་པ། དེ་ནས་མངོན་པར་ཞེན་པའམ་ཤེས་པའི་བློ་ཚུལ་བཞིན་སྐྱེ་བ་ཡིན་ནོ། ༈ །གླེང་གཞིའི་སྐབས། ནང་ཐབས་ལམ་སྟེང་སྒོ་དང་སྦྱར་ཏེ་བཤད་རྒྱུད་རྒྱ་མཚོས་བཤད་པ་དང་། གསང་བ་འོག་སྒོ་དང་སྦྱར་ཏེ་བཤད་རྒྱུད་ཐལ་བས་བཤད་པ་གཉིས་ལས། དང་པོ་ལ་ལྔ་ལས། དང་པོ་གནས་ཕུན་སུམ་ཚོགས་པ་ནི། བཤད་རྒྱུད་རྒྱ་མཚོ་ལས། དྷརྨ་ཙཀྲ་ཆོས་ཀྱི་གནས། །འོད་བཞི་ཨེ་སོགས་དབྱིབས་སུ་གནས། །ཞེས་པས་བསྟན་ཏེ། སྙིང་ག་ཆོས་ཀྱི་འཁོར་ལོ་ན་རྩ་འདབ་བརྒྱད་ཡོད་པ་རིགས་བསྡུ་ན་བཞིར་འདུ་སྟེ། མདུན་གྱི་རྩ་གསུམ་པོ་དེས་ཆོས་ཉིད་སྐྱེ་བ་མེད་པར་འཆར་བའི་ལས་བྱེད་པས་ཆོས་ཉིད་ཀྱི་རྩ་ཞེས་བྱ་ལ་དབྱིབས་མདོག་ཀྱང་དཀར་པོ་ཟླུམ་པོའི་རྣམ་པར་གནས། གཡས་ན་གཅིག་སྟེ་ཡེ་ཤེས་འཆར་བའི་ལས་བྱེད་པས་ཡེ་ཤེས་ཀྱི་རྩ་ཞེས་བྱ་ལ་དབྱིབས་མདོག་ཀྱང་གྲུ་བཞི་སེར་པོའི་རྣམ་པར་གནས། གཡོན་ན་གཅིག་སྟེ་ཡོན་ཏན་དང་མངོན་ཤེས་འཆར་བའི་ལས་བྱེད་པས་ཡོན་ཏན་གྱི་རྩ་ཞེས་བྱ་ལ་དབྱིབས་མདོག་ཀྱང་ཟླ་གམ་དམར་པོའི་རྣམ་པར་གནས། རྒྱབ་ན་གསུམ་ཡོད་པས་གཉིད་རྨུགས་དང་བཅས་པའི་ལས་བྱེད་པས་རང་རྒྱུད་ཀྱི་རྩ་ཞེས་བྱ་ལ་དབྱིབས་མདོག་ཀྱང་གྲུ་གསུམ་དམར་ནག་གི་རྣམ་པར་གནས་ཏེ། ཨེ་སོགས་ལས་བཞིའི་དབྱིབས་མདོག་ཅན་ནི་དོན་དམ་འོད་གསལ་གྱི་བཞུགས་གནས་ཡིན་པའི་ཕྱིར་གནས་སོ། །གཉིས་པ་སྟོན་པ་ཕུན་སུམ་ཚོགས་པ་ནི། མི་ཤིགས་ཞེས་པ་ཁམས་མི་ཤིགས་༼ཁམས་དཀར་དམར་གྱི་དྭངས་ཆ་རླུང་མི་ཤིགས་པ་ཡེ་ཤེས་ཀྱི་རླུང་། སེམས་མི་ཤིགས་པ་རང་བྱུང་གི་ཡེ་ཤེས་དེ། ངོ་བོ་དབྱེར་མེད་དུ་བཞུགས་པའོ། །མཆན། ༽ཐིག་ལེ་ཝཾ་དབྱིབས་ཅན། རང་ལ་བདེ་བ་གསལ་བྱེད་དག །ཅེས་པས་བསྟན་ཏེ། སྙིང་ག་ཆོས་ཀྱི་འཁོར་ལོའི་དབུས་ན་དྭངས་མ་ཆེན་པོ་ལྔ་བཞུགས་ཏེ། སའི་དྭངས་མ་རྩ་དར་དཀར་གྱི་སྐུད་པ་ལྟ་བུ་རྟ་རྔ་བཅུ་གཤགས་ཙམ་པ། དེའི་དབུས་ན་ཆུའི་དྭངས་མ་རྒྱ་མཚལ་ལྕོག་ལའི་ཁུ་བ་ལྟ་བུ་དེའི་དབུས་ན་མེའི་དྭངས་མ་མེ་ལོང་ཉི་མ་ལ་བཞག་པའི་ངད་ཙམ་པ། དེའི་དབུས་ན་རླུང་གི་དྭངས་མ་གསེར་ས་འོག་ན་ཡོད་པའི་རླངས་པ་ནམ་མཁའ་ལ་རྒྱུ་བ་ཙམ་པ། དེའི་དབུས་ན་ནམ་མཁའི་དྭངས་མ་བར་སྣང་སང་སེང་གོ་འབྱེད་པའི་རྣམ་པ་ཅན་དུ་གནས་པ་སྟེ། དེ་ལྟར་དྭངས་མ་ལྔ་འདུས་ཀྱི་དབུས་ན་སེམས་ཀྱི་དྭངས་མ་ཡེ་ཤེས་སྙིང་པོའི་ཐིག་ལེ་སྟོང་གསལ་འགག་མེད་ཡི་གེ་ཝཾ་དབྱིབས་ཀྱི་རྣམ་པར་གནས་པ་སྟེ། དེ་ཉིད་མར་མེ་གསལ་བྱེད་གཞན་ལ་ལྟོས་མི་དགོས་པ་ལྟར་རང་གིས་རང་ལ་བདེ་བ་གསལ་བར་སྟོན་པས་ན་སྟོན་པའོ། །གསུམ་པ་འཁོར་ཕུན་སུམ་ཚོགས་པ་ནི། མ་ནུ་ཡིད་སོགས་རྣམ་ཤེས་བཞི། །ཡེ་ཤེས་མྱོང་བས་བསྡུས་པར་བཤད། །ཅེས་པས་བསྟན་ཏེ། མ་ནུའི་སྒྲ་ལས་དྲངས་ན། མ་ན་ཤེས་པ་ལའོ་ཞེས་པས་ཡིད་ལ་སོགས་པའི་རྣམ་ཤེས་ཚོགས་བརྒྱད་པོ་དེ། མདུན་ཆོས་ཉིད་ཀྱི་རྩ་ལ་ཀུན་གཞི། གཡས་ཡེ་ཤེས་ཀྱི་རྩ་ལ་ཡིད། གཡོན་ཡོན་ཏན་གྱི་རྩ་ལ་ཉོན་ཡིད། རྒྱབ་རང་རྒྱུད་ཀྱི་རྩ་ལ་སྒོ་ལྔའི་རྣམ་ཤེས་ཏེ། ཚོགས་བརྒྱད་པོ་དེས་ཡེ་ཤེས་ལྔ་ཉམས་སུ་མྱོང་བའི་ཆ་ནས་འཁོར་ཕུན་སུམ་ཚོགས་པའོ། །བཞི་པ་ཆོས་ཕུན་སུམ་ཚོགས་པ་ནི། ཡེ་ཤེས་ནམ་མཁའི་གཟུགས་སྐྱེས་པ། །པ་ར་མཱརྠ་དོན་ཟབ་མོ། །ཞེས་པས་བསྟན་ཏེ། དེའི་མན་ངག་སྟེང་སྒོའི་ལམ་ཉམས་སུ་བླངས་པ་ལས་བདེ་གསལ་རྣམ་པར་མི་རྟོག་པའི་ཡེ་ཤེས་ནམ་མཁའི་གཟུགས་ཅན་རྒྱུད་ལ་སྐྱེས་པ་ནི། པ་ར་མཱརྠ་ཞེས་པའི་སྒྲ་ལས། དོན་དམ་པའམ་དོན་ཟབ་མོ་ཞེས་གནས་ལུགས་ཀྱི་ཆོས་ཉིད་ཟབ་མོ་ནི་ཆོས་ཕུན་སུམ་ཚོགས་པའོ། །ལྔ་པ་དུས་ཕུན་སུམ་ཚོགས་པ་ནི། བདེ་བའི་དུས་ཉིད་སྔ་ཕྱི་བྲལ། །དུས་གསུམ་ཀུན་གྱི་ངོ་བོར་གནས། །ཞེས་པས་བསྟན་ཏེ། ཡེ་ཤེས་ནམ་མཁའི་གཟུགས་ཅན་རྒྱུད་ལ་སྐྱེས་པ་དེའི་ཚེ་སྔ་ཕྱིར་འཛིན་པའི་རྟོག་པ་ཐམས་ཅད་དང་བྲལ་བས་བསམ་གྱིས་མི་ཁྱབ་པའི་དུས་ཏེ་དུས་ཕུན་སུམ་ཚོགས་པའོ། །གསང་བ་འོག་སྒོ་དང་སྦྱར་ཏེ་བཤད་པ་ལ་ལྔ་ལས། དང་པོ་གནས་ཕུན་སུམ་ཚོགས་པ་ནི། བཤད་རྒྱུད་ཐལ་བ་ལས། འདི་ཞེས་ཉེ་བར་མཚོན་པ་ནི། །ཨེ་སོགས་རྣམ་བཞིའི་དབྱིབས་ཅན་གནས། །ཞེས་པས་བསྟན། ཨེས་མཚོན་པས་ཆོས་འབྱུང་གི་རྣམ་པར་གནས་པའི་ཡུམ་གྱི་བྷ་ག་སྒོ་གྲུ་གསུམ་ཁྱམས་གྲུ་བཞི། སྐྱེ་གནས་ཟླ་གམ། དབྱིངས་ཕྱུག་གི་སྣ་རྩེ་ཟླུམ་པོར་གནས་པ་སྟེ། ཨེ་སོགས་ལས་བཞིའི་དབྱིབས་ཅན་ནི་གསང་བའི་སྟོན་འཁོར་བཞུགས་པའི་གནས་ཡིན་པས་ན་གནས་སོ། །གཉིས་པ་སྟོན་པ་ཕུན་སུམ་ཚོགས་པ་ནི། སྐད་ཅེས་གསལ་བྱེད་ལས་མིང་ཅན། །ཝཾ་ཡིག་ཐིག་ལེར་བཅས་སྟོན་པའོ། །ཞེས་པས་བསྟན། ཡབ་ཀྱི་རྡོ་རྗེ་ནོར་བུའི་དབུར་རྩ་ས་ཡ་ཕྲག་བཅུ་གསུམ་གྱི་བཅུད་འདུས་པའི་ཀུན་རྫོབ་ཡེ་ཤེས་ཀྱི་ཐིག་ལེ་ཝཾ་དབྱིབས་ཀྱིས་རྣམ་པ་ཅན་དུ་གནས་པ་ནི་ཡབ་ཡུམ་གཉིས་ཀའི་རྒྱུད་ལ་བདེ་བ་གསལ་བར་སྟོན་པའི་བདག་ཉིད་ཅན་ཡིན་པས་ན་སྟོན་པའོ། །གསུམ་པ་འཁོར་ཕུན་སུམ་ཚོགས་པ་ནི། མ་ད་མ་ནུ་སྡོམ་བྱེད་ཡིད། །ལུས་ཅན་རྣམ་ཤེས་དེ་དག་ལ། །གསལ་བར་གོ་བས་བཤད་པར་འདོད། །ཅེས་པས་བསྟན། མ་ད་ནི་སྡོམ་བྱེད་དང་མ་ནུ་ནི་ཡིད་དེ་བྱེད་པ་སྡོམས་པའི་ཐབས་དེ་ནི་འདུ་ཤེས་གསུམ་ལྡན་གྱི་མཚན་རྟོག་སྡོམ་པར་བྱེད་པས་གསང་བའི་རྣམ་ཤེས་ཀྱིས་རེག་བདེ་ཉམས་སུ་མྱོང་བར་བྱེད་པས་ན་འཁོར་རོ། །བཞི་པ་ཆོས་ཕུན་སུམ་ཚོགས་པ་ནི། པ་སྒྲ་དོན་དམ་ངེས་པའི་རྒྱུད། །ཡཱ་ན་ཐེག་ཆེན་འདི་ཡིན་ནོ། །ཞེས་པས་བསྟན། ཐབས་ལམ་བདེ་བ་ཆེན་པོའི་ཡེ་ཤེས་ཉམས་སུ་མྱང་བྱ་སེམས་ལྔ་རྫོགས་པའི་དགའ་བ་བཅུ་དྲུག་གི་ཡེ་ཤེས་ནི་རྣམ་ཐར་བཞི་ལྡན་ཏེ། ངོ་བོ་སྟོང་པ་ཉིད་དང་། མཚན་མ་མེད་པ་དང་། སྨོན་པ་མེད་པ་དང་། འོད་གསལ་བའི་རྣམ་པར་ཐར་བ་བཞི་ལྡན་རང་བཞིན་ལྷན་ཅིག་སྐྱེས་པའི་ཡེ་ཤེས་ནི་ཆོས་སོ། །ལྔ་པ་དུས་ཕུན་སུམ་ཚོགས་པ་ནི། དུས་ནི་བསམ་གྱིས་མི་ཁྱབ་དུས། །ཞེས་པས་བསྟན། ཡེ་ཤེས་དེ་ཉམས་སུ་མྱོང་བའི་ཚེ་དུས་འདི་ཞེས་མཚོན་དུ་མེད་པས་ན་བསམ་གྱིས་མི་ཁྱབ་པའི་དུས་སོ། །ཕུན་སུམ་ཚོགས་པ་ལྔའི་སྐད་དོད་དུ་ཨེ་ཝཾ་མཱ་ཡཱ་ཞེས་འབྱུང་ལ། དེ་བོད་སྐད་དུ་བསྒྱུར་ན་འདི་སྐད་བཤད་ཅེས་འབྱུང་ལ། ཨེས་མཚོན་པའི་གནས་དང་། ཝཾ་གིས་མཚོན་པའི་སྟོན་པ་དང་། མཱས་མཚོན་པའི་འཁོར་དང་། ཡཱ་ནི་ཆོས་དང་དུས་གཉིས་ཀ་ལ་འཇུག་སྟེ། ཡཱ་ནི་སྒྲ་ལས་ཐེག་པ་ཆེན་པོ་ཞེས་བསྙད་པས་ཆོས་ཕུན་སུམ་ཚོགས་པ་དང་། ཡཱ་ཡིག་གིས་མཚོན་པའི་དུས་ཏེ་བསམ་གྱིས་མི་ཁྱབ་པའི་དུས་རྣམས་སོ། །གཞི་རང་བཞིན་ལྷུན་གྱིས་གྲུབ་པའི་དཀྱིལ་འཁོར་ཐུགས་རྗེའི་ངང་ལས་འཆར་ཚུལ་བསྟན་པ་ལ་གསུམ་ལས། ཆོས་སྐུའི་སྟོན་པ་ཉིད་དབྱིངས་ལས་མ་གཡོས་པར་ལྷུན་སྡུག་པོ་བཀོད་པའི་ཞིང་དུ་རྡོ་རྗེ་དབྱིངས་ཀྱི་དཀྱིལ་འཁོར་རང་སྣང་བར་ཇི་ལྟར་བཀོད་པའི་ཚུལ། སྟོན་པ་ཉིད་རིགས་ལྔར་བཞེངས་པའི་ཐུགས་རང་བྱུང་གི་ཡེ་ཤེས་གཉིས་སུ་མེད་པའི་ཆོས་ཐམས་ཅད་ཡེ་ནས་སངས་རྒྱས་པར་ཆེད་དུ་བརྗོད་ཅིང་ཐུགས་རྗེ་གཡོ་བའི་ཚུལ། ཐུགས་རྗེ་རང་བཞིན་ཆོས་ཉིད་ངང་ལས་མ་གཡོས་བཞིན་དུ་རྣམ་པས་འཇིག་རྟེན་ན་སྒྲོན་མ་བཀོད་དེ་ཆོས་ཐམས་ཅད་གཏན་ལ་དབབ་པའི་ཚུལ་ལོ། །དང་པོ་ལ་གསུམ་སྟེ། ཕུན་སུམ་ཚོགས་པའི་གླེང་གཞི་མདོར་བསྟན་པ། དེའི་རང་བཞིན་རྒྱས་པར་བཤད་པ། ཡེ་ཤེས་རང་སྣང་བཀོད་པར་དོན་བསྡུ་བའོ། །དང་པོ་ལ་གསུམ་སྟེ། ཕྱི་ལྟར་རྒྱུད་འབྱུང་བ་གླེང་གཞིའི་ཚུལ་དུ་བཤད་པ། ནང་ལྟར་བཀོད་པ་བྱང་ཆུབ་སེམས་སུ་བཤད་པ། གསང་བ་འོད་གསལ་ལྟར་བཤད་པའོ། །དང་པོ་ནི། ཨེ་ཝཾ་མཱ་ཡཱ་ཞེས་པའི་སྒྲས་གོ་བར་བྱ་སྟེ། ཨེ་ཝཾ་ནི་དབྱིངས་ཀྱི་ཡི་གེ་ཡིན་པས་དེ་ལས་ཡི་གེ་ཀུན་འབྱུང་བའི་ཕྱིར་འོག་ནས་འབྱུང་བའི་ཚུལ་འདི་སྐད་ཅེས་པ་སྣང་བར་བྱེད་དོ། །མཱ་ཡཱའི་སྒྲ་ལ། རང་བཞིན། སྒྱུ་མ། བདག་འབྱུང་བ་སོགས་ཡོད་ཀྱང་འདིར་འབྱུང་བ་བཟུང་སྟེ་བཤད་པའི་དུས་ཞེས་པ་ཡིན་ནོ། །དེ་ལ་འདི་སྐད་འོག་གི་རྒྱུད་རྒྱས་པ་རྣམས་ཏེ་ཆོས་ཕུན་སུམ་ཚོགས་པའོ། །བཤད་པའི་ཞེས་རྒྱུད་སྡུད་པ་པོ་ཉིད་སྟོན་པ་ཕུན་སུམ་ཚོགས་པར་ཞལ་གྱི་བཞེས་པ་དང་། འཁོར་ཕུན་སུམ་ཚོགས་པའང་ཤུགས་ལ་བསྟན་པའོ། །དུས་ན་ཞེས་པས་དུས་བཞི་མཉམ་པ་ཉིད་ཀྱི་རང་བཞིན་དུས་ཕུན་སུམ་ཚོགས་པ་བསྟན་ལ། དེ་ལྟར་སྟོན་པ་དང་། ཆོས་དང་། འཁོར་རྣམས་སྣང་བ་དེའི་ཚེ་གནས་ཀྱང་ཡོད་ངེས་པས་འོག་མིན་ཤུགས་ལ་བསྟན་པའོ། །གཉིས་པ་ནི་གནས་ཡུམ་གྱི་གསང་བ་དང་། འཁོར་ལོ་བཞིའི་རྩ་རྣམས་སོ། །སྟོན་པ་ཡབ་ཡུམ་ནི་དྭངས་མ་དཀར་དམར་དང་ཡེ་ཤེས་ཀྱི་རླུང་ངོ་། །འཁོར་དགའ་བ་བཅུ་དྲུག་གི་ཉམས་དང་བཅས་པའོ། །ཆོས་བདེ་སྟོང་གཉིས་མེད་ཀྱི་ཡེ་ཤེས་སོ། །དུས་གཙུག་ཏོར་འཁོར་ལོས་བསྒྱུར་བ་བསམ་གྱིས་མི་ཁྱབ་པའི་དུས་ནའོ། །གསུམ་པ་ནི། གནས་སྙིང་རིན་པོ་ཆེ་ཟུར་བརྒྱད་པའི་དབུས་ན་སྲོག་གི་རྩ་མཐིང་ག །ཤར་ན་ཆུའི་རྩ་དཀར་པོ། ལྷོ་ན་སའི་རྩ་སེར་པོ། ནུབ་ན་མེའི་རྩ་དམར་པོ། བྱང་ན་རླུང་གི་རྩ་ལྗང་གུ་རྣམས་ཀྱི་ནང་ནས་ཀུན་རྫོབ་ཀྱི་ཐིག་ལེ་ཉུངས་འབྲུ་ཙམ་རེ་གནས་སོ། །སྟོན་པ་ནི། རང་བྱུང་གི་ཡེ་ཤེས་འོད་ལྔ་སོ་སོར་མ་འདྲེས་པའི་ཁ་དོག་ལ་ཡེ་ཤེས་ལྔའི་རང་རྩལ་མ་འགགས་པར་བཞུགས་པའོ། །འཁོར་ནི་རྩ་དང་ཐིག་ལེ་དེ་དག་ལས་ལུས་ཀྱི་སྟེང་འོག་ཀུན་ཏུ་ཁྱབ་པའི་རྩ་རྣམས་སོ། །དུས་ནི་གནས་སྐབས་ལུས་དང་དབང་པོའི་རྟེན་འབྲེལ་ཚང་བ་དང་། རང་བཞིན་དུས་གསུམ་འཕོ་འགྱུར་མེད་པའི་དུས་བཞི་མཉམ་པ་ཉིད་ཀྱི་དུས་སོ། །ཆོས་ནི་སྟོང་གསལ་སྤྲོས་པ་དང་བྲལ་བའི་ཡེ་ཤེས་སོ། །རང་བཞིན་རྒྱས་པར་བཤད་པ་སོགས་འགྲེལ་བ་ལས་ཤེས་པར་བྱའོ། ༈ །བྱ་རྒྱུད་ཀྱི་སྐབས་སུ། སྡོམ་གསུམ་རབ་དབྱེ་ལས། བྱ་བའི་རྒྱུད་ལ་བདག་བསྐྱེད་མེད། །བྲིས་སྐུ་བཀོད་ནས་གསོལ་བ་འདེབས། །བདག་བསྐྱེད་བསྒྲུབ་ཐབས་ཡོད་པ་ནི། །རྣལ་འབྱོར་རྒྱུད་ཀྱི་རྗེས་འབྲངས་ནས། །དེ་ཡི་ལུགས་སུ་བྱས་པ་ཡིན། །ཞེས་གསུངས་ཀྱང་། སྤྱིར་བྱ་རྒྱུད་ཙམ་པོ་བ་རྣམས་སུ་ནི་བདག་ཉིད་ལྷར་བསྐྱེད་པ་མེད་ལ། ཁྱད་པར་བ་རྣམས་སུ་ནི་བདག་ཉིད་ལྷར་བསྐྱེད་པ་བཤད་པ་ལ། རྒྱུད་ཀྱི་བཀའ་བསྡུ་བ་པོ་གསང་བདག་དང་མཁའ་འགྲོ་མ་སོགས་ཀྱི་མན་ངག་ལ་བརྟེན་ཏེ་བཀྲལ་བའི་ལུགས་ཟབ་མོ་ཤིན་ཏུ་མང་བའི་ཕྱིར་ན། ལམ་འདིའི་ཤིང་རྟ་ཆེན་པོ་དངོས་གྲུབ་བརྙེས་ཤིང་མཁས་པའི་དབང་པོར་འཛམ་གླིང་ན་ཡོངས་སུ་གྲགས་པ་སློབ་དཔོན་སངས་རྒྱས་གསང་བ་སོགས་ཀྱི་རྗེས་སུ་འབྲང་བ་ནི་ཤིན་ཏུ་རིགས་པ་དང་ལྡན་ཞིང་དངོས་གྲུབ་ཀྱི་ལམ་པོ་ཆེ་ཡིན་པ་ཉིད་དུ་ཤེས་པར་བྱའོ། །དེ་ལ་བྱ་བའི་རྒྱུད་ཀྱི་ཐེག་པ་ལ་ཞུགས་པ་རྣམས་ཀྱི་ལྟ་བ་ནི། དོན་དམ་པར་ཆོས་ཐམས་ཅད་རང་གི་ངོ་བོ་སྐྱེ་འགག་མེད་པ་ལས། ཀུན་རྫོབ་ཏུ་ལྷའི་གཟུགས་ཀྱི་སྐུར་བསྒོམ་ཞིང་ཞེས་བྱང་ཆུབ་ཀྱི་སེམས་དང་དེ་ཉིད་གསུམ་དང་ལྡན་པ་ནི་དངོས་གྲུབ་ཀྱི་སྣོད་དུ་བཤད་དོ། །དེ་ལྟར་རང་ཉིད་ལྷ་སྐུར་སྒོམ་པའི་གསལ་སྣང་ལ་དམིགས་པ་རྩེ་གཅིག་པའི་ཏིང་ངེ་འཛིན་སྟོབས་སུ་གྱུར་པའི་ཚེ་ན་སྔགས་རྣམས་ཉེ་བར་འགྲུབ་བོ། དེ་ལ་ལྷའི་སྙིང་པོ་སྲོག་ལྟ་བུ་ནི་གསང་སྔགས་ཡིན་ལ་སྔགས་དེ་ཡང་བསྒོམ་པ་དང་བཟླས་པ་གཉིས་ཀྱི་ཚུལ་གྱིས་བསྒྲུབ་པ་ཡིན་ནོ། །བསྒོམ་པ་ནི། ལྷའི་ཐུགས་ཀར་ཟླ་བའི་དཀྱིལ་འཁོར་སོགས་ལ་ས་བོན་དང་སྔགས་ཕྲེང་བཀོད་དེ་འཕྲོ་འདུའི་དམིགས་པ་བྱ་བ་སྤྱིར་བཏང་། ཁྱད་པར་མན་ངག་གི་དབང་དུ་བྱས་ན། རྣམ་སྣང་མངོན་བྱང་ལས། ཡི་གེ་དང་ནི་ཡི་གེ་སྦྱར། །དེ་བཞིན་གཞི་ལས་གཞིར་གྱུར་པ། །ཤིན་ཏུ་བསྡམ་པའི་ཡིད་ལ་ནི། །བཟླས་བརྗོད་འབུམ་ཕྲག་གཅིག་བྱའོ། །ཞེས་གསུངས་པའི་ཡི་གེ་དང་ནི་ཞེས་པ་ནི། ཡི་གེ་དང་པོ་བྱང་ཆུབ་ཀྱི་སེམས། ཡི་གེ་གཉིས་པ་སྔགས་ཀྱི་སྒྲ། གཞི་དང་པོ་རང་ལུས་ལྷར་བསྒོམ་པ། གཞི་ཕྱི་མ་མདུན་དུ་བསྒོམ་པའི་ལྷ་ཡེ་ཤེས་པ་སྟེ། བཞི་པོ་དེ་ལ་དམིགས་པའི་སྒོ་ནས་སྔགས་བཟླ་བར་གསུངས་པ་དེ་ཉིད། བསམ་གཏན་ཕྱི་མར། སྒྲ་དང་སེམས་དང་གཞི་ལ་གཞོལ། །གསང་སྔགས་མི་འགྱུར་གཞི་ལ་གནས། །ཡན་ལག་མ་ཉམས་གསང་སྔགས་བཟླས། །ཞེས་པ་ལྟར། སྒྲ་ནི་སྔགས་ཀྱི་ཡི་གེའི་ཕྲེང་བ་འོ། །སེམས་ནི་བྱང་ཆུབ་ཀྱི་སེམས་རྣམ་པར་རྟོག་པ་དང་བྲལ་བ་ཤིན་ཏུ་རྣམ་དག་དྲི་མེད་བརྟན་ཞིང་མི་གཡོ་བ་ཟབ་ཅིང་ཕྲ་བ་མེ་ལོང་ལྟ་བུ་དེ་ཉིད་ཟླ་བའི་དཀྱིལ་འཁོར་གྱི་རྣམ་པར་སྣང་བའོ། །གཞི་ནི་མདུན་དུ་བཞུགས་པ་དེ་བཞིན་གཤེགས་པའི་སྐུ་ལ་དམིགས་པ་རྩེ་གཅིག་ཏུ་གཞོལ་བའོ། །གསང་སྔགས་མི་འགྱུར་ཞེས་པ་ནི་གཞི་བཞི་པོ་གསལ་ཞིང་བརྟན་པར་གྱུར་པ་ལ་བྱའོ། །གཞི་ལ་གནས་ཞེས་པའི་གཞི་ཕྱི་མ་ནི་བདག་གི་གཞི་སྟེ་བདག་ལྷར་གསལ་བ་ལ་དམིགས་པ་རྩེ་གཅིག་ཏུ་གནས་པའོ། །དེ་ལྟར་ཡན་ལག་བཞི་པོ་མ་ཉམས་པའི་ཏིང་ངེ་འཛིན་དང་ལྡན་པའི་སྒོ་ནས་གསང་སྔགས་བཟླ་བར་བྱ་ཞེས་གསུངས་སོ། །དེ་ལ་བཟླས་བརྗོད་ཀྱི་དེ་ཉིད་གསུམ་ནི། དེ་ཉིད་ལས། གསང་སྔགས་མེར་གནས་དངོས་གྲུབ་སྟེར། །སྒྲ་གནས་རྣལ་འབྱོར་སྟེར་བར་དྲན། །སྒྲ་མཐར་ཐར་བ་སྟེར་བ་ཉིད། །འདི་དག་དེ་ཉིད་གསུམ་པོ་ཡིན། །ཞེས་པ་ལྟར། དང་པོ་གསང་སྔགས་མེར་གནས་ཞེས་པ་གང་ཞེ་ན། རང་ཉིད་དང་མདུན་གྱི་ལྷའི་ཐུགས་ཀར་རྣམ་པར་མི་རྟོག་པའི་གཟུགས་ཅན་ཐོགས་རེག་དང་བྲལ་བ་དངས་ཤིང་འོད་གསལ་ལ་དྲི་མ་མེད་པའི་ཟླ་བའི་དཀྱིལ་འཁོར་གྱི་སྟེང་ན། མི་གནོད་ཅིང་ཟུག་རྔུ་མེད་ལ་ཡིད་དུ་འོང་བའི་རང་བཞིན་ཅན། རབ་ཏུ་ཞི་བའི་མེ་ལྕེ་འོད་རབ་ཏུ་བཟང་བར་བསམ་པ་ཡིན་ལ་མེ་ལྕེ་དེ་ཡི་ནང་ན་གནས་པ། དེ་ཉིད་གཉིས་པ་སྒྲར་གནས་ཞེས་པ་ནི། སྔགས་ཀྱི་ཡི་གེའི་ཕྲེང་བ་བརྒྱུད་མར་གནས་པའི་སྒྲ་གདངས་གསལ་ཞིང་ཟུར་ཕྱིན་པ་དྲིལ་བུའི་སྒྲ་ལྟ་བུར་བར་མ་ཆད་དུ་ཡིད་ངོར་སྣང་བ་ལ་སེམས་རྩེ་གཅིག་ཏུ་གནས་ལ་གསལ་སྣང་བརྟན་པ་ནི་གསང་སྔགས་ཀྱི་གཞི་ཞེས་གསུངས་ཏེ་ངག་གི་བཟླས་བརྗོད་མེད་པར་ལྷའི་ངོ་བོ་སྔགས་ཀྱི་སྒྲ་ཡིད་ལ་ཞེན་པར་བསམ་པའོ། །དེ་ཉིད་གསུམ་པ་སྒྲ་མཐའ་ཞེས་པ་ནི། སྒྲར་སྣང་ཡལ་ཞིང་མི་དམིགས་པ་སྟེ་ཡལ་བའི་གནས་ནི་མཐའ་དང་བྲལ་བ་ཆོས་ཀྱི་དབྱིངས་སོ། །ཇི་ལྟར་སྒྲར་སྣང་ཡལ་བར་གཏོང་ན། སྒྲར་སྣང་གི་གནས་ཡིག་འབྲུའི་གཟུགས་ཀྱི་རྣམ་པར་སྣང་བ་གཏད་པ་དང་། སྒྲ་མངོན་དུ་བྱེད་པ་ཡིད་བཟླས་དང་ཤུབ་བཟླས་ཀྱང་བཏང་། རང་བཞིན་ནི་སྒྲར་སྣང་བ་དེ་ཡང་ཡལ་ཏེ་མི་དམིགས་པ་ཞི་བ་གདོད་ནས་མ་སྐྱེས་པའི་དོན་ལ་གནས་པའི་བསམ་གཏན་བྱེད་པ་སྟེ། དེ་ནི་ལྟོས་པ་དང་བཅས་པའམ་རྩོལ་བ་དང་བཅས་པ་ཐམས་ཅད་སྤངས་པ་ཡིན་ནོ། །མདོར་ན་གསང་སྔགས་ཀྱི་གཞི་བཞི་པོ་མི་འགྱུར་བའི་བསམ་གཏན་ནི་ཡན་ལག་མ་ཉམས་པའི་བཟླས་བརྗོད་ཡིན་པས་བཟླས་བརྗོད་གྱི་དེ་ཁོ་ན་ཉིད་ཅེས་བྱ་སྟེ་དེ་ལྟར་བཟླ་དགོས་སོ། །བདག་གི་དེ་ཁོ་ན་ཉིད་ཕུང་ལྔའི་དོན་བློས་རྣམ་པར་མ་ཕྱེ་ཙམ་ནི་བདག་ཡིན་ལ་དེའི་དེ་ཉིད་ནི། ཉན་ཐོས་དང་སྒོ་བསྟུན་ན་ཕུང་པོ་ལྔའི་ཚོགས་འདི་ནི། མུ་སྟེགས་ཅན་གྱིས་ཀུན་ཏུ་བརྟགས་པའི་བདག་དང་བདག་གི་དང་རྟག་པ་དང་ཆད་པ་ལ་སོགས་པར་ཀུན་བརྟགས་པས་སྟོང་པ་ཕུང་པོ་དང་ཁམས་དང་སྐྱེ་མཆེད་ཀྱི་ཆོས་ཙམ་མེད་པར་སྐུར་བ་གདབ་ཏུ་མི་རུང་བ་འདི་ནི་བདག་གི་དེ་ཁོ་ན་ཉིད་དུ་འདོད་པའོ། །རྣལ་འབྱོར་སྤྱོད་པ་དང་སྒོ་བསྟུན་ན། ཕུང་པོ་ལྔའི་ཚོགས་པ་འདིའི་དེ་ཁོ་ན་ཉིད་ནི། བདག་དང་བདག་གིས་སྟོང་པར་མ་ཟད་ཀྱི། ཉན་ཐོས་ཀྱི་གཟུང་བ་དང་འཛིན་པར་ཀུན་ཏུ་བརྟགས་པས་ཀྱང་སྟོང་པ། སེམས་དང་སེམས་ལས་བྱུང་བ་རང་རིག་པ་ཙམ་མེད་པར་སྐུར་བ་གདབ་ཏུ་མི་རུང་སྟེ་གང་གིས་ཀྱང་གཟུང་བ་མ་ཡིན་ཞིང་། གང་ལའང་འཛིན་པར་བྱེད་པ་མ་ཡིན་པ་འདི་ནི། དེའི་དེ་ཁོ་ན་ཉིད་དུ་འདོད་པ་ཡིན་ནོ། །དབུ་མ་དང་སྒོ་བསྟུན་ན། ཕུང་པོའི་ཚོགས་འདིའི་དེ་ཁོ་ན་ཉིད་ནི། རྣལ་འབྱོར་སྤྱོད་པ་པས་རྣམ་པར་མི་རྟོག་པའི་ཡེ་ཤེས་དོན་དམ་པར་ཡོད་པར་བརྟགས་པས་ཀྱང་སྟོང་སྟེ། སྤྲོས་པའི་མཚན་མ་ཐམས་ཅད་ཡོངས་སུ་ཞི་བ་འདི་ནི་དེའི་དེ་ཁོ་ན་ཉིད་དུ་འདོད་པའོ། །དེ་ལྟར་བདག་གི་དེ་ཁོ་ན་ཉིད་ནི་བདག་དང་ཕུང་པོ་རྣམ་རིག་གི་སྤྲོས་པ་ལས་འདས་པ་གཟུང་འཛིན་མེད་ཅིང་མི་གཡོ་བར་རབ་ཏུ་འོད་གསལ་བ་ཉིད་དུ་རང་རིག་པས་གསལ་བར་རྗེས་སུ་མྱོང་བའོ། །དེ་ལྟ་བུའི་དོན་ལ་བློ་བཞག་ནས། རིག་སྔགས་ཀྱི་དེ་ཁོ་ན་ཉིད་ནི་ལྷར་བསྒོམ་པ་སྟེ། དང་པོ་སྟོང་པའི་ལྷ་ནི་བདག་དང་ལྷའི་དེ་ཉིད་རྣམ་པར་མི་རྟོག་པ་ཆོས་ཀྱི་དབྱིངས་སུ་དབྱེར་མེད་པའི་ངེས་ཤེས་སམ་ང་རྒྱལ་དུ་བྱ་བ་སྣང་བ་མེད་པའི་ཏིང་ངེ་འཛིན་ནོ། །དེའི་ངང་ལས་ལྷ་གང་ཡིན་གྱི་སྔགས་ཀྱི་ཡི་གེའི་སྒྲ་གདངས་ཙམ་ནམ་མཁའ་ལས་གྲགས་པར་བསམ་པ་སྒྲའི་ལྷའོ། །གདངས་དེ་ལས་སྔགས་ཀྱི་ཡི་གེའི་གཟུགས་ཀྱི་རྣམ་པར་ནམ་མཁར་སྣང་བ་ཡི་གེའི་ལྷའོ། །དེ་ནས་གཟུགས་ཀྱི་ལྷ་སྐུ་མངོན་དུ་རྫོགས་པའི་ཕྱིར། བདག་གི་དེ་ཁོ་ན་ཉིད་ཟླ་བའི་དཀྱིལ་འཁོར་གྱི་རྣམ་པར་གྱུར་པའི་སྟེང་དུ་ལྷའི་ངོ་བོ་སྔགས་ཀྱི་ཡི་གེ་ནམ་མཁར་གནས་པ་དེ་དག་འདུས་ཏེ་དག་པའི་དངུལ་ཆུ་གསེར་གྱི་ཕྱེ་མར་ཞེན་པ་ལྟར་འདྲེས་པ་ལས། བདག་དང་ལྷ་གཉིས་སུ་མེད་པ་གཅིག་ཏུ་གྱུར་པའི་རང་བཞིན་ལས་འོད་འཕྲོས། འཕགས་པ་མཆོད། སེམས་ཅན་གྱི་སྒྲིབ་པ་སྦྱངས། ཚུར་འདུས་པས་ལྷག་པའི་ལྷ་ཡི་གཟུགས་གང་ཡིན་པ་གསལ་ཞིང་དེ་ཉིད་དུ་ང་རྒྱལ་བྱ་བ་ནི་གཟུགས་ཀྱི་ལྷའོ། །དེ་ནས་མཚན་མ་སྤྱི་གཙུག་སོགས་སུ་ལྷ་གང་ཡིན་པའི་རིགས་ཀྱི་ཕྱག་རྒྱས་བཏབ་པས་བརྟེན་ཞིང་བྱིན་གྱིས་བརླབས་པ་ནི་ཕྱག་རྒྱའི་ལྷའོ། །དེ་ནས་དེ་ལྟ་བུའི་ལྷ་དེའི་སྐུ་དང་ཡན་ལག་གི་ཆ་ཤས་རེ་རེ་ནས་ཀྱང་གསལ་བཏབ་ལ། དེའི་མཚན་མ་ལ་སེམས་བཟུང་ཞིང་འདི་དང་འདི་ལྟ་བུ་ཞེས་བརྟག་ཅིང་རྒྱུན་དུ་ཞེན་པ་ནི་མཚན་མའི་ལྷའོ། །དེ་ནས་བདག་དང་ལྷ་ཐ་དད་མེད་པར་བྱས་ཏེ་སྲོག་རྩོལ་བསྡམ་ནས་བསྒོམས་པའི་མཐར་རྩོལ་བ་མེད་ཅིང་རྟོག་མེད་ངང་གིས་གསལ་བ་ན་ཏིང་ངེ་འཛིན་ལ་གནས་པའོ། །དེ་ལྟར་ནང་གི་སྒོམ་པ་དང་། ཕྱི་ཡི་བྱ་བ་ཁྲུས་དང་གཙང་སྦྲ་བྱེད་ཚུལ་ནི། ཁྲུས་གསུམ་བྱེད་པ་གོས་གསུམ་བརྗེ་བར་གསུངས་པ་ནི། ཕྱི་ཡི་ཁྲུས་ཡན་ལག་ལྔ་ཁྲུས། ནང་གི་ཁྲུས་རྩ་རླུང་དག་པར་བྱེད་པ། གསང་བའི་ཁྲུས་མཚན་རྟོག་དག་པར་བྱེད་པའོ། །ཕྱིའི་གོས་གསར་བ་གྱོན་པ། ནང་གི་གོས་སྡོམ་པ་བསྲུང་བ། གསང་བའི་གོས་ལྷ་བསྒོམ་པའོ། །གྲུབ་པའི་འབྲས་བུ་ནི། དེ་ལྟར་བརྩོན་པས་གནས་སྐབས་སུ་འདོད་གཟུགས་ཀྱི་ལྷ་དང་སྐལ་པ་མཉམ་པའི་རིག་འཛིན་གྱི་ལུས་ལ་སོགས་པ་ཐུན་མོང་གི་གྲུབ་པ་ཅི་རིགས་དང་། མཐར་ཐུག་གི་འབྲས་བུ་རྣམས་འགྲུབ་པའོ། །སྤྱོད་རྒྱུད་ཀྱི་སྐབས་སུ། གཉིས་ཀའི་རྒྱུད་ཀྱི་ཐེག་པ་ལ་ཞུགས་པ་རྣམས་ཀྱི་ལྟ་བ་ནི་དོན་དམ་པར་སྐྱེ་འགག་མེད་པ་ལས་ཀུན་རྫོབ་ཏུ་ལྷའི་གཟུགས་ཀྱི་སྐུ་བསྒོམ་ཞིང་དེ་ཉིད་རྣམ་པ་བཞི་དང་ལྡན་པར་བསྒོམ་པའི་ཏིང་ངེ་འཛིན་ཞེས་བདག་གི་དེ་ཁོ་ན་ཉིད་དང་། ལྷའི་དེ་ཁོ་ན་ཉིད་དང་། ཏིང་ངེ་འཛིན་གྱི་དེ་ཁོ་ན་ཉིད། བཟླས་པའི་དེ་ཁོ་ན་ཉིད་བཞི། དང་པོ་ནི་བདག་དམ་ཚིག་པར་བསྐྱེད་པའོ། །གཉིས་པ་ཡེ་ཤེས་པ་སྤྱན་དྲངས་ནས་སྨིན་ཐད་བཞུགས་པའོ། །གསུམ་པ་ནི་བདག་མདུན་གྱི་ཐུགས་ཀ་ན་ཟླ་བ་དང་ཡིག་འབྲུ་བཀླག་སྔགས་བཀོད་པའོ། །བཞི་པ་ནི་དབུགས་དང་སྤྲད་དེ་ཕར་འགྲོས་ཐུགས་དམ་བསྐུལ། ཚུར་བྱུང་དངོས་གྲུབ་སྩོལ་བའི་དམིགས་པ་དང་བཅས་སྐྱོན་བཅུ་སྤངས་ལ་བཟླས་པའོ། །མཚན་མ་མེད་པའི་རྣལ་འབྱོར་ནི། ཕུང་སོགས་ཀྱི་ཆོས་ཐམས་ཅད་ལ་རྣམ་པར་དཔྱད་པས་སྐྱེ་མེད་དུ་རྟོགས་པ་འཇུག་པའི་སེམས། དེ་མི་རྟོག་པའི་ངོ་བོར་མངོན་དུ་གྱུར་པ་གནས་པའི་སེམས། དེ་ལྟར་མ་རྟོགས་པ་ལ་སྙིང་རྗེ་ཆེན་པོས་རྗེས་སུ་འཇུག་པ་ལྡང་བའི་སེམས་ཏེ། དེ་ལྟར་འཇུག་གནས་ལྡང་གསུམ་གྱིས་ཁྱད་པར་དུ་བྱས་པའི་དོན་དམ་བྱང་ཆུབ་ཀྱི་སེམས་བསྒོམ་པའོ། །གྲུབ་པའི་འབྲས་བུ་ནི། ཐུན་མོང་རྫས་ལུས་ལོངས་སྤྱོད་གསུམ་ཡིན་ལ། རྫས་ནི་རལ་གྲི་མིག་སྨན་ལ་སོགས་པ་བླངས་ནས་བཟླས་བརྗོད་བྱས་པས། རྫས་དེ་འབར་བ་དང་ལག་ཏུ་བླངས་བས་རིག་འཛིན་ལ་སོགས་པ་གྲུབ་ནས་མཁའ་སྤྱོད་དུ་འགྲོ་བ་དང་། ལུས་ཀྱི་ཕུང་པོ་སོགས་ཀྱི་ལུས་རགས་པ་སྦྱངས་ནས་ཕྲ་བ་དང་ཡང་བ་སོགས་ཀྱི་དབང་ཕྱུག་གི་ཡོན་ཏན་བརྒྱད་མངོན་དུ་བྱས་ཏེ། མཁའ་སྤྱོད་དུ་འགྲོ་བ་དང་། ལོངས་སྤྱོད་ནི་མིའི་ལོངས་སྤྱོད་འཁོར་ལོས་སྒྱུར་རྒྱལ་ལྟ་བུ་ནས། མཁའ་སྤྱོད་དུ་འདོད་ལྷ་རྣམས་དང་མཚུངས་པའི་ལོངས་སྤྱོད་དུ་འགྲོ་བའི་བར་རོ། །ཐུན་མོང་མ་ཡིན་པ་འབྱུང་བཞིའི་དཀྱིལ་འཁོར་ལ་བརྟེན་ནས་རླུང་གི་སྦྱོར་བ་བསྒོམས་པ་ལས་རྫུ་འཕྲུལ་དང་མངོན་ཤེས་བསྒྲུབས་ཏེ་རིག་པ་འཛིན་པའི་ནང་དུ་འགྲོ་བ་ལ་སོགས་པའོ། །རྣལ་འབྱོར་རྒྱུད་བཤད་པའི་སྐབས་སུ། དེ་ལ་རྣལ་འབྱོར་ཕྱི་པ་ཐུབ་པའི་རྒྱུད་ཀྱི་ཐེག་པ་ལ་ཞུགས་པ་རྣམས་ཀྱི་ལྟ་བ་ནི། ཀྲི་ཡ་ལྟར་ཕྱིའི་ཡོ་བྱད་ལ་གཙོ་བོར་མི་འཛིན་པར་དོན་དམ་པར་སྐྱེ་འགག་མེད་པའི་རང་བཞིན་སྣང་ཆར་ཤར་བ་ལྷ་དང་ལྷ་མོ་དང་། སྒོམ་པ་ལྟ་བ་དེ་དང་རྣམ་པ་འདྲ་བའི་རྒྱུད་ཡོངས་སུ་དག་པའི་ཏིང་ངེ་འཛིན་གྱིས་འཕགས་པའི་གཟུགས་ཀྱི་སྐུ་ཞེས། དོན་དམ་པའི་ལྷ་དང་། སེམས་པའི་བྱེ་བྲག་གི་ལྷ་གཉིས་ནི། དོན་དམ་པ་དང་ཀུན་རྫོབ་ཀྱི་སྣང་ཆའི་ལྷ་གཉིས་ཡིན་ལ། དེའི་ཆར་གཏོགས་པའི་རྒྱུ་མཐུན་པའི་ལྷར་བསྒོམ་པ་དམ་ཚིག་ཅན་གྱི་སྐྱེ་བོས་བཏགས་པའི་ལྷ་སྟེ། དེ་ལྟར་གོམས་ན་བདེན་གཉིས་ལྷའི་རང་བཞིན་ཡིན་ཚུལ་མངོན་དུ་གྱུར་པར་བྱེད་པ་སྟེ། དེ་ཡང་ཐབས་ཀྱི་རྣལ་འབྱོར་དང་ཤེས་རབ་ཀྱི་རྣལ་འབྱོར་གཉིས་ལས། དང་པོ་སྲིད་པ་བསྐྱེད་པའི་རིམ་པ་ཀུན་ནས་ཉོན་མོངས་པའི་ཕྱོགས་དང་བསྟུན་ནས་བསྒོམ་པ་རྒྱུད་སྡེ་འོག་མ་གསུམ་གྱི་ལུགས་མ་ཡིན་ཀྱང་རྣམ་བྱང་གི་ཕྱོགས་དང་བསྟུན་ནས་མངོན་བྱང་ལྔའི་རིམ་པས་བསྒོམ་པའི་ཚུལ། དང་པོ་རྣམ་པར་མི་རྟོག་པའི་སྟོང་ཉིད་བསྒོམ་པ་དང་། གཉིས་པ་སྟོང་ཉིད་ཀྱི་སྣང་ཆ་ཟླ་བ་ཚེས་པ་ལྟ་བུར་བསམ་པ་དང་། གསུམ་པ་དེ་ཉིད་ཉ་བ་ལྟ་བུར་བསྒོམ་པ་དང་། བཞི་པ་དེའི་སྟེང་དུ་རྡོ་རྗེ་རྩེ་ལྔ་པའི་ཕྱག་མཚན་བསྒོམ་པ་དང་། ལྔ་པ་དེ་ལས་འོད་ཟེར་སྤྲོ་བསྡུ་བྱས་ཏེ་ཡོངས་སུ་གྱུར་པ་ལས་རིགས་ཀྱི་ལྷ་གང་ཡིན་གྱི་སྐུར་བསྒོམ་པའོ། །ཡང་ན་སྟོང་པའི་ངང་ལས། ཞིང་དང་གནས་ཕུན་སུམ་ཚོགས་པ་ལས་གྲུབ་པའི་རྒྱུ་གདན་པད་ཟླ་ལས་མངོན་པར་བྱང་ཆུབ་པ་དང་། ཆོས་ཕུན་སུམ་ཚོགས་པ་འབྱུང་བའི་རྒྱུ་གསུང་ཡིག་འབྲུ་ལས་མངོན་པར་བྱང་ཆུབ་པ་དང་། དུས་ཕུན་སུམ་ཚོགས་པ་རྟག་པ་བསམ་མི་ཁྱབ་པར་གནས་པའི་རྒྱུ་ཐུགས་ཕྱག་མཚན་ལས་མངོན་པར་བྱང་ཆུབ་པ་དང་། འཁོར་དང་སྟོན་པ་ཕུན་སུམ་ཚོགས་པའི་རྒྱུ་སྐུ་ཡོངས་རྫོགས་དཀྱིལ་འཁོར་གྱི་འཁོར་ལོ་དང་བཅས་པ་ལས་མངོན་པར་བྱང་ཆུབ་པ་དང་། སྐུའི་ངོ་བོའམ་ཡེ་ཤེས་ཕུན་སུམ་ཚོགས་པའི་རྒྱུ་ལྷ་ཡེ་ཤེས་སེམས་དཔའ་ལས་མངོན་པར་བྱང་ཆུབ་པ་སྟེ་མངོན་བྱང་ལྔའི་ཚུལ་གྱིས་བསྐྱེད་པའོ། །ཆོ་འཕྲུལ་བཞི་ལས། ཏིང་ངེ་འཛིན་གྱི་ཆོ་འཕྲུལ་ནི། དབུས་སུ་རྣམ་པར་སྣང་མཛད་ལ་ཡུམ་བཞིའི་འཁོར་གྱིས་བསྐོར་བ། ཤར་དུ་མི་བསྐྱོད་པ་ལ་རྡོ་རྗེ་རིགས་བཞིའི་འཁོར་གྱིས་བསྐོར་བ། ལྷོར་རིན་ཆེན་འབྱུང་ལྡན་ལ་རིན་ཆེན་རིགས་ཀྱི་སེམས་དཔའི་འཁོར་གྱིས་བསྐོར་བ། ནུབ་སྣང་བ་མཐའ་ཡས་ལ་རྡོ་རྗེ་ཆོས་སོགས་སེམས་དཔའི་འཁོར་གྱིས་བསྐོར་བ། བྱང་དོན་ཡོད་གྲུབ་པ་ལ་རྡོ་རྗེ་ལས་སོགས་སེམས་དཔའི་འཁོར་གྱིས་བསྐོར་བའོ། །བྱིན་གྱིས་བརླབས་པའི་ཆོ་འཕྲུལ་ནི། ལྷ་རྣམས་སོ་སོའི་སྤྱི་བོར་ཟླ་བ་ལ་གནས་པའི་ༀ་དཀར་པོ། མགྲིན་པར་པདྨ་ལ་གནས་པའི་ཨཱཿདམར་པོ། སྙིང་གར་ཉི་མ་ལ་གནས་པའི་ཧཱུྃ་སྔོན་པོ་སོ་སོའི་འོད་ཟེར་གྱིས་རྒྱལ་བ་རབ་འབྱམས་ཀྱི་ཐུགས་རྒྱུད་བསྐུལ་རྡོ་རྗེ་གསུམ་གྱི་ལྷ་ཚོགས་ནམ་མཁའ་གང་བར་བྱོན། ཡི་གེ་གསུམ་ལ་ཐིམ་པ་ཡོངས་སུ་གྱུར་པ་ལས་སྤྱི་བོར་རྣམ་སྣང་དཀར་པོ་འཁོར་ལོ་འཛིན་པ། མགྲིན་པར་སྣང་མཐའ་དམར་པོ་པདྨ་འཛིན་པ། སྙིང་གར་མི་བསྐྱོད་པ་སྔོན་པོ་རྡོ་རྗེ་འཛིན་པ་རྣམས་ཀྱིས་རྒྱས་བཏབ་པས་དེ་བཞིན་གཤེགས་པ་ཐམས་ཅད་ཀྱི་རྡོ་རྗེ་གསུམ་དང་གཉིས་སུ་མེད་པར་བྱས་པའོ། །དབང་བསྐུར་བའི་ཆོ་འཕྲུལ་ནི། ལྷ་ཚོགས་རྣམས་སོ་སོའི་ཐུགས་ཀའི་ས་བོན་ལས་འོད་ཟེར་འཕྲོས། ཕྱོགས་བཅུའི་རྒྱལ་བ་རབ་འབྱམས་ཐམས་ཅད་དབང་ལྷ་རིགས་ལྔའི་རྣམ་པར་སྤྱན་དྲངས་དབང་བསྐུར་ཆུའི་ལྷག་མ་ཡར་ལུད་པ་ལས་རང་རང་རིགས་ཀྱི་བདག་པོ་གང་ཡིན་གྱིས་དབུ་བརྒྱན་པར་བསྒོམ་པའོ། །མཆོད་པའི་ཆོ་འཕྲུལ་ནི། དེ་དག་ལ་ཕྱག་དང་མཆོད་པ་བསྟོད་པ་རྣམས་བྱ་བའོ། །དེ་ལྟར་བདག་ལྷར་བསྐྱེད་པ་ལ་དབྱིངས་ནས་ཡེ་ཤེས་པ་དགུག་ཅིང་བདག་དང་ལྷ་དོན་ལ་མཉམ་པར་ཤེས་པའི་ངེས་ཤེས་ཀྱིས་ཆུ་ལ་ཆུ་བཞག་པ་བཞིན་དབྱེར་མེད་དུ་བསྟིམས་ནས། སྐུ་ཕྱག་རྒྱ་ཆེན་པོ་སྐུ་དངོས་དང་། དེའི་རྒྱུ་ཡིག་འབྲུ་དང་ཕྱག་མཚན་སོགས་སོ། །གསུང་ཆོས་ཀྱི་ཕྱག་རྒྱ་ལྗགས་ཏེ་རྡོ་རྗེ་རྩེ་ལྔ་སོགས་བསྒོམ་པ། ཐུགས་དམ་རྒྱ་ལ་འཛིན་འཆང་གཉིས་ལས། འཛིན་པ་ཡེ་ཤེས་ལྔ་ཐུགས་སུ་ཆུད་པའི་རྟགས་རྡོ་རྗེ་རྩེ་ལྔ་སོགས་རྣམ་པ་དང་། འཆང་བ་རྡོར་དྲིལ། ཕྲིན་ལས་ལས་རྒྱ་ཐུགས་ཀར་ཟླ་སྟེང་རྡོ་རྗེ་རྒྱ་གྲམ་ལས་འོད་ཟེར་འཕྲོ་འདུས་འཕགས་པ་སྤྱན་དྲངས་པ་འགྲོ་བའི་དོན་བྱེད་པ་སོགས་ཏེ། དེ་དག་གིས་བདག་ཉིད་ཆེན་པོ་རྣམས་ཀྱི་སྐུ་གསུང་ཐུགས་ཕྲིན་ལས་དང་བཅས་པའི་ངང་ཚུལ་ལས་མི་འདའ་ཞིང་བརྩོན་པར་བྱེད་པའམ། དེ་དང་ངོ་བོ་གཅིག་པར་རྒྱས་འདེབས་པའི་ཚུལ་གྱིས་བསྒོམ་པའོ། །གཉིས་པ་ཤེས་རབ་གྱི་རྣལ་འབྱོར་ནི། དོན་དམ་མཚན་མ་མེད་པའི་ཡེ་ཤེས་དང་ཀུན་རྫོབ་རྡོ་རྗེ་དབྱིངས་ཀྱི་ལྷ་སྣང་གཉིས་ཀ་གཉིས་སུ་མེད་པའི་ཡེ་ཤེས་ཀྱི་ངང་ལ་མཉམ་པར་འཇོག་པ་ཡིན་ནོ། །གྲུབ་པའི་འབྲས་བུ་ནི་ཐུན་མོང་དང་མཆོག་གི་དངོས་གྲུབ་འགྲུབ་པར་འདོད་པའོ། །༢བྱ་རྒྱུད་ཀྱི་སྐབས། དོན་དམ་པར་མཐའ་བཞི་དང་བྲལ་བའི་དག་པར་རྟོགས་པས་ཀུན་རྫོབ་ཏུ་དངོས་གྲུབ་གཞན་ལ་རེ་ཞིང་རྩོལ་བའི་ཐབས་སུ་གྱུར་པ་དང་། ལྟ་བ་ནི་བདེན་པ་གཉིས་ཏེ། དོན་དམ་བདེན་པ་ནི། སེམས་ཉིད་དག་པ་སྟོང་གསལ་གྱི་ཡེ་ཤེས་ཡོད་མེད་སྣང་སྟོང་གི་མཐའ་བཞི་དང་བྲལ་བར་འདོད་པ་དང་། ཀུན་རྫོབ་ལ་ཡང་ལོག་གཉིས་ལས། ལོག་པའི་ཀུན་རྫོབ་ནི། དབུ་མ་པ་མན་ཆད་ཀྱིས་ཡང་དག་དང་ལོག་པར་བརྟགས་པའི་ཀུན་རྫོབ་ཐམས་ཅད་ཡིན་ལ། ཡང་དག་ཀུན་རྫོབ་ནི། ཆོས་ཉིད་དེ་ལྟར་རྟོགས་པའི་ཡོན་ཏན་རིགས་གསུམ་སྟེ། ཀུན་རྫོབ་སྣང་བའི་དངོས་པོ་སྤྱན་གཟིགས། འཇམ་དཔལ། ཕྱག་རྡོར་ཏེ། རིགས་གསུམ་ལྷའི་དཀྱིལ་འཁོར་དུ་སྣང་བར་འདོད་པའོ། །དེ་ཁོ་ན་ཉིད་བཞིར་གསུངས་པའི་བདག་གི་དེ་ཁོ་ཉིད་ནི། གཞི་གནས་ལུགས་ལྟ་བས་གཏན་ལ་འབེབས་པ་སྟེ། སློབ་དཔོན་སངས་རྒྱས་གསང་བས་བདག་གི་དེ་ཁོ་ན་ཉིད་ནི་རིགས་པས་དཔྱད་པའི་སྟོང་པ་ཙམ་ལ་མི་བྱ་ཡི། བདག་གི་དེ་ཁོ་ན་ཉིད་གཉིས་སུ་མེད་པའི་ཡེ་ཤེས་ཀྱི་མཚན་ཉིད་དེ་ཐོན་ན་སངས་རྒྱས་སུ་འགྱུར་བས་དེ་འཛིན་ཞེས་གསུངས་ཏེ། མདོར་ན་རྣམ་པར་ཤེས་པའི་མཚན་ཉིད་ཀྱི་ཆོས་ལས་འདས་ཏེ་སྣང་སྟོང་གཉིས་སུ་མེད་པའི་ཡེ་ཤེས་ཀྱི་བཞུགས་ཚུལ་གཏན་ལ་ཕེབས་ན། བདག་གི་དེ་ཁོ་ཉིད་ཀྱང་དེ་ཡིན་ལ་དོན་དམ་པའི་ལྷ་ཡང་དེར་ཚུལ་གཅིག་སྟེ་ཆོས་ཐམས་ཅད་ཀྱི་གནས་ལུགས་དང་དོན་དམ་བྱང་ཆུབ་ཀྱི་སེམས་ཞེས་ཀྱང་བྱའོ། །ཨུ་པའི་ལྟ་སྒོམ་ཡོ་ག་དང་། སྤྱོད་པ་བྱ་བ་ལྟར་སྤྱོད་པ་སྟེ། རང་ཤར་ལས། ཨུ་པ་ཡ་ནི་འདི་ལྟ་སྟེ། །ལྟ་བ་ཡོ་གར་ལྟ་བ་ལས། །སྤྱོད་པ་ཀྲི་ཡར་སྤྱོད་པའོ། །དེ་ཕྱིར་གཉིས་ཀའི་རྒྱུད་ཅེས་གྲགས། །ཞེས་སོ། །ཡོ་གས་དོན་དམ་མཚན་མ་མེད་པའི་ཆོས་ཉིད་རྟོགས་པའི་ཡེ་ཤེས་ཀྱི་བྱིན་རླབས་ཀུན་རྫོབ་རྡོ་རྗེ་དབྱིངས་ཀྱི་ལྷར་བརྟགས་ཏེ་རྟོག་པ་བཟང་ངན་བླང་དོར་གྱི་རྩོལ་བས་འབྲས་བུ་སྒྲུབ་པར་འདོད་པ་དང་། ལྟ་བ་ནི་བདེན་པ་གཉིས་ཏེ། དོན་དམ་བདེན་པ་ནི་ཆོས་ཐམས་ཅད་སྤྲོས་པའི་མཚན་མ་དང་བྲལ་བའི་རང་བཞིན་འོད་གསལ་བའི་སྟོང་པ་ཉིད་དང་། ཀུན་རྫོབ་ལ་གཉིས་ཀྱི་ལོག་པའི་ཀུན་རྫོབ་སྔར་དང་འདྲ། ཡང་དག་ཀུན་རྫོབ་ནི། ཅི་སྣང་ཐམས་ཅད་ཆོས་ཉིད་རྟོགས་པའི་ཡེ་ཤེས་ཀྱི་བྱིན་རླབས་རྡོ་རྗེ་དབྱིངས་ཀྱི་དཀྱིལ་འཁོར་དུ་སྣང་བའི་ཕྱིར། སྐྱེ་བོའི་སྣང་བ་རང་རྒྱུད་དུ་བརྟག་པ་འདི་མེད་པར་འདོད་དོ། མི་ཚེ་བདུན་ཞེས་པ་ནི། རིག་འཛིན་གྲུབ་ནས་རིང་པོར་འཚོ་བའི་དབང་དུ་བྱས་པ་སྟེ། བྱ་རྒྱུད་རང་ལམ་གྱིས་བསྐལ་ཆེན་བརྒྱད་ནས་འབྲས་བུ་ལ་སྦྱོར་བར་བཤད་པ་དང་མི་འགལ་བར་ཤེས་པར་བྱའོ། །འདིར་བསྟན་པའི་རིག་འཛིན་ནི་འཇིག་རྟེན་ལས་འདས་པའི་ཁོངས་སུ་གཏོགས་པ་སྟེ། རྫས་ལ་བརྟེན་པའི་རིག་འཛིན་ཞེས་ཐུན་མོང་གི་གྲུབ་པ་ཆུང་ངུ་ནི། ལུས་དེ་ཉིད་ཀྱིས་ལྷ་དང་མིའི་གནས་སུ་ཐོགས་མེད་དུ་རྒྱུ་ཞིང་ནམ་མཁའ་ལ་འགྲོ་བ་དང་། རིག་སྔགས་ཀྱིས་སེམས་ཅན་ལ་ཕན་འདོགས་ཤིང་ཚར་གཅོད་པ་སོགས་སོ། །འབྲིང་པོ་འདོད་པའི་རིག་འཛིན་ཞེས། ཚོགས་ལམ་ཆེན་པོ་དེས་དྲོད་ཐོབ་པ་ན་སྤྱོད་པ་སྤྱོད་སྒྲུབ་པའི་ལུས་འདོད་ཁམས་ཀྱི་ལྷ་དང་སྐལ་བ་མཉམ་པ། རིགས་སྔགས་དང་དངོས་གྲུབ་སྣ་ཚོགས་བྱེད་པ་ཚེ་ལ་དབང་བར་གྱུར་རོ། །འདི་ནི་ལུས་ཀྱི་རིག་པ་འཛིན་པ་ཞེས་ལུས་ཕྲ་ཡང་སོགས་ཡོན་ཏན་བརྒྱད་དང་ལྡན་པ་ཡིན་ནོ། །ཆེན་པོ་གཟུགས་ཀྱི་རིག་འཛིན་ཞེས་ལུས་ཚངས་རིས་ནས་འོག་མིན་གྱི་བར་གྱི་གཟུགས་ཁམས་ཀྱི་ལྷ་དང་སྐལ་པ་མཉམ་ཞིང་དབང་ཕྱུག་གི་ཡོན་ཏན་ཤིན་ཏུ་ཕྲ་བས་གོང་དུ་བཤད་པ་ལས་ཁྱད་པར་འཕགས་པ་ཅན་དུ་གྱུར་ཏེ། དེའི་ལུས་འདོད་ཁམས་སུ་མི་འབྱུང་ཡང་སྤྲུལ་པ་སྣ་ཚོགས་པས་འགྲོ་བའི་དོན་མཛད་པ་སྟེ། དེ་ལྟར་ཐུན་མོང་གི་དངོས་གྲུབ་ལ་འདུན་པའི་སྤྱོད་པ་དེས་འཕྲལ་དུ་མཆོག་གི་དངོས་གྲུབ་ཐོབ་པ་མིན་ཀྱང་། ཚེ་ལ་དབང་ཐོབ་པ་ཡིན་པས་རིམ་གྱིས་ལུས་རྟེན་དེ་ལ་བརྟེན་ནས་ལམ་གོང་མར་སྦྱོར་བར་བྱེད་དོ། །མཁའ་སྤྱོད་ཆེན་པོ་ནི་གཞན་ལས་ཤེས་པར་བྱའོ། །མཁའ་སྤྱོད་ཆུང་ངུ་ལ་རྣམ་གྲངས་ཤིན་ཏུ་མང་ཡང་རིགས་བསྡུ་ན་གཟུགས་ཁམས་བཅུ་བདུན། འདོད་ལྷ་རིགས་དྲུགམི་ཡུལ་གྱི་ནམ་མཁར་སྤྱོད་པ་ཕྱོགས་གཅིག་ཏུ་ངེས་པ་རྣམས་སོ། །དེ་ལ་མི་ཡུལ་གྱི་མཁའ་སྤྱོད་ནི། མིའི་ནང་དུ་གནས་ཀྱང་ཡང་དག་པའི་གང་ཟག་རེ་རེ་ཙམ་གྱིས་མཐོང་བ་དང་འཕྲད་པ་སྲིད་ཀྱི། གཞན་ཕལ་བ་རྣམས་ཀྱིས་མཐོང་བར་མི་ནུས་སོ། །ལྷ་ཡུལ་གྱི་མཁའ་སྤྱོད་ནི་འདོད་གཟུགས་གང་དང་གང་དུ་སྤྱོད་ནུས་པ་དེར་དེ་དང་དེའི་ལོངས་སྤྱོད་ལ་སྤྱོད་ཅིང་། དེ་དང་དེའི་ཚེ་ཚད་དང་མཉམ་པའམ་ལྷག་པར་སྤྱོད་པའོ། །ཕྱག་རྒྱ་བཞི་ནི་ལུས་ངག་ཡིད་དང་བྱ་བ་བཞི་ལ་རིམ་པར་སྐུ་ཕྱག་རྒྱ་ཆེན་པོ། གསུང་ཆོས་རྒྱ། ཐུགས་དམ་རྒྱ། ཕྲིན་ལས་ལས་རྒྱ་རྣམས་ཀྱིས་རྒྱས་བཏབ་ནས་བསྒོམ་པའི་ཕྱིར་ཕྱག་རྒྱ་སྟེ། ཀུན་གཞིའི་རྣམ་པར་ཤེས་པའི་འཁྲུལ་བ་གློ་བུར་བ་བསལ་ནས། རང་བཞིན་མེ་ལོང་ལྟ་བུའི་ཡེ་ཤེས་དེ་མངོན་དུ་བྱ་བ་ལ་སྐུ་ཕྱག་རྒྱ་ཆེན་པོའི་རྣལ་འབྱོར། ཉོན་ཡིད་ཀྱི་གློ་བུར་འཁྲུལ་བ་བསལ་ནས་རང་བཞིན་མཉམ་པ་ཉིད་ཀྱི་ཡེ་ཤེས་དེ་མངོན་དུ་བྱ་བ་ལ་ཐུགས་དམ་ཚིག་གི་ཕྱག་རྒྱའི་རྣལ་འབྱོར། ཡིད་ཀྱི་ཤེས་པའི་གློ་བུར་གྱི་འཁྲུལ་བ་བསལ་ནས་རང་བཞིན་སོ་སོར་རྟོག་པའི་ཡེ་ཤེས་དེ་མངོན་དུ་བྱ་བ་གསུང་ཆོས་ཀྱི་ཕྱག་རྒྱའི་རྣལ་འབྱོར། སྒོ་ལྔའི་རྣམ་ཤེས་འཁྲུལ་པ་བསལ་ནས་རང་བཞིན་བྱ་བ་གྲུབ་པའི་ཡེ་ཤེས་དེ་མངོན་དུ་བྱ་བའི་ཕྲིན་ལས་ལས་ཀྱི་ཕྱག་རྒྱའི་རྣལ་འབྱོར། ཆོས་ཀྱི་དབྱིངས་ཀྱི་ཡེ་ཤེས་ནི་དེ་ཐམས་ཅད་ཀྱི་རང་བཞིན་དུ་གནས་པའོ། །

༈ མ་ཧཱ་ཡོ་གའི་སྐབས། ལུས་ཅན་རྣམས་འཆི་བའི་ཚེ་ཐིམ་རིམ་རྫོགས་པའི་མཐར་འཆི་སྲིད་ཆོས་སྐུའི་འོད་གསལ་འཆར་བ་ཡིན་ལ། དེ་ཡང་འཆི་སྲིད་ཀྱི་བག་ཆགས་སྦྱོང་བྱེད་སྟོང་ཆེན་ལ་བསླབ་པ་དང་། འོད་གསལ་དེ་ཉིད་ངོས་མ་ཟིན་པར་བར་དོའི་ཡིད་ལུས་སྒྱུ་མ་ལྟ་བུའི་གནས་སྐབས་ཀྱི་བག་ཆགས་སྦྱོང་བྱེད་སྙིང་རྗེ་སྒྱུ་མ་ལ་བསླབ་པ་དང་། བར་དོར་མ་གྲོལ། བར་མའི་མངལ་དུ་སྐྱེ་བ་བཟུང་ནས་ཕྱིར་བཙས་པའི་བར་གྱི་བག་ཆགས་སྦྱོང་བྱེད་ཕྱག་རྒྱ་གཅིག་པ་ལ་ཕྲ་རགས་གཉིས་ཏེ། གང་དུ་སྐྱེ་བར་འགྱུར་བའི་གནས་ལ་སྲེད་པ་སྐྱེས་པའི་རྐྱེན་གྱིས་དེར་འཇུག་ལ་ཁད་པའི་བར་སྲིད་ཀྱི་གནས་སྐབས་ཀྱི་བག་ཆགས་སྦྱོང་བྱེད་ཕྲ་བ་ཡིག་འབྲུ་ལ་བསླབ་པ་དང་། ཕ་མའི་ཁུ་རྡུལ་གྱི་བར་དུ་ཞུགས་ནས་ཕྱི་རོལ་དབང་པོ་ཡུལ་ལ་སད་པའི་གནས་སྐབས་ཀྱི་བག་ཆགས་སྦྱོང་བྱེད་རགས་པ་ལྷ་སྐུ་ལ་བསླབ་པ་ལ་བསྐྱེད་རིམ་རྣམ་པ་བཞི་དང་། བཙས་ནས་ནར་སོན་པའི་བར་གྱི་བག་ཆགས་སྦྱོང་བྱེད་ཕྱག་རྒྱ་སྤྲོས་བཅས་ལ་བསླབ་པ་ལའང་བཞི་སྟེ། དཀྱིལ་འཁོར་སྤྲོ་བ། ཚོམ་བུ་སྤྲོ་བ། གྲངས་སྤྲོ་བ། ཞལ་ཕྱག་སྤྲོ་བའོ། །ནར་སོན་ནས་རྒན་པོའི་བར་གྱི་བག་ཆགས་སྦྱོང་བྱེད་ཚོམ་བུ་ཚོགས་ཀྱི་སྒྲུབ་པའོ། །དེ་ཡང་ཆོས་ཐམས་ཅད་ཀྱི་གནས་ལུགས་ཅིར་ཡང་མི་དམིགས་པ་འོད་གསལ་སྟོང་ཉིད་ཀྱི་དབྱིངས་སུ་མཉམ་པར་འཇོག་པའི་སྟོང་པ་ཆེན་པོའི་རྣལ་འབྱོར་དང་དྲན་པ་ཉེ་བར་བཞག་པ་བཞི་སྦྲེལ་ནས་བསྒོམས་པས་ཚོགས་ལམ་ཆུང་ངུ་བགྲོད་པ་ན། དེ་ལྟ་བུའི་དོན་མ་རྟོགས་པའི་སེམས་ཅན་ལ་དམིགས་མེད་ཀྱི་སྙིང་རྗེ་ཆེན་པོ་སྒོམ་པ་སྙིང་རྗེ་སྒྱུ་མའི་རྣལ་འབྱོར་སྟེ། དེ་དང་ཡང་དག་པའི་སྤོང་པ་བཞི་སྦྲེལ་ནས་བསྒོམས་པས་ཚོགས་ལམ་འབྲིང་པོ་བསྒྲོད་པ་དང་། སྟོང་ཉིད་སྙིང་རྗེ་དབྱེར་མེད་པའི་རང་སེམས་ཨ་དཀར་པོར་བསྒོམས་ནས་ཡི་གེ་སྤྲོ་བསྡུ་ལ་དམིགས་པ་ཕྲ་བ་ཡིག་འབྲུ་དང་། དེ་ལས་བསྐྱེད་ཆོག་རྒྱས་བསྡུས་ཅི་རིགས་ཀྱིས་རྩ་བའི་ལྷ་ཡབ་ཡུམ་ཟུང་གཅིག་བྱིན་རླབས་ཀྱི་ལྷ་གསུམ་དང་དབུ་རྒྱན་གྱི་ལྷ་ལྔ་ཐུགས་ཀའི་ཡེ་ཤེས་སེམས་དཔའ་སྟེ་ཡན་ལག་གི་ལྷ་དགུ་དང་བཅས་པར་བསྒོམ་པ་རགས་པ་ལྷ་སྐུ་ལ་བསླབ་པ་སྟེ་ཕྱག་རྒྱ་གཅིག་པ་ཕྲ་རགས་ཀྱི་རྣལ་འབྱོར། དེ་ལས་ཀྱང་དཀྱིལ་འཁོར་དང་ཚོམ་བུ་གྲངས་དང་ཞལ་ཕྱག་སོགས་གྲངས་མེད་པའི་བར་དུ་སྤྲོ་བ་ཕྱག་རྒྱ་སྤྲོས་བཅས་ཀྱི་རྣལ་འབྱོར་སྟེ། དེ་ལྟར་ཕྱག་རྒྱ་གཅིག་པ་དང་སྤྲོས་བཅས་ཀྱི་སྐབས་དེ་དག་དང་རྫུ་འཕྲུལ་གྱི་རྐང་པ་བཞི་སྦྲེལ་ནས་བསྒོམས་པས་ཚོགས་ལམ་ཆེན་པོ་མངོན་དུ་བྱེད་པའོ། །སྦྱོར་ལམ་དུ་དྲོད་རྩེ་གཉིས་སུ་དབང་པོ་ལྔ་དང་སྦྲེལ་ཞིང་། བཟོད་པ་དང་ཆོས་མཆོག་གཉིས་སུ་སྟོབས་ལྔ་སྦྲེལ་ནས་སྒོམ་ཞིང་དེའི་ཉེ་རྒྱུར་ཐུན་མོང་དུ་སྤྱོད་པ་སྐྱོང་བར་གྲགས་པ་ཚོམ་བུ་ཚོགས་སྒྲུབ་ཀྱི་རྣལ་འབྱོར་རོ། །མཐོང་ལམ་དུ་བྱང་ཆུབ་ཡན་ལག་བདུན་དང་། སྒོམ་ལམ་དུ་འཕགས་ལམ་ཡན་ལག་བརྒྱད་བསྒོམས་པས་མཐོང་ལམ་ཡན་ཆད་དུ་འོད་གསལ་གྱིསྐུ་ཚེ་དབང་རིག་འཛིན་དང་། སློབ་པའི་ཟུང་འཇུག་ཕྱག་ཆེན་རིག་འཛིན། མི་སློབ་པའི་ཟུང་འཇུག་ལྷུན་གྲུབ་རིག་འཛིན་རྣམས་རིམ་གྱིས་ཐོབ་ནས་ཡི་གེ་འཁོར་ལོ་ཚོགས་ཆེན་གྱི་ས་ལ་འབྲས་ཆོས་ཉེར་ལྔའི་བདག་ཉིད་རྡོ་རྗེ་འཆང་ཆེན་པོའི་གོ་འཕང་འགྲུབ་པའོ། །ལུང་ཨ་ནུ་ཡོ་གའི་ས་བཅུ་དང་རྣལ་འབྱོར་ལྔ་སྦྱོར་ཚུལ་མདོ་ཙམ་བརྗོད་ན། དང་པོ་འགྱུར་བ་མ་ངེས་པའི་ས་དང་། བརྟེན་པ་གཞིའི་ས་གཉིས་ནི་ཚོགས་ལམ་འདུན་པ་སེམས་པའི་རྣལ་འབྱོར་གྱིས་བསྡུས་ཤིང་མོས་སྤྱོད་ཀྱི་ལྷ་སྐུ། འདིས་ཐུན་མོང་གི་དངོས་གྲུབ་སྤྱན་དང་མངོན་ཤེས་ལ་སོགས་པ་འགྲུབ་བོ། །གསུམ་པ་གལ་ཆེན་སྦྱོང་བའི་ས་དང་། བཞི་པ་བསླབ་པ་རྒྱུན་གྱི་ས་དང་། ལྔ་པ་བསོད་ནམས་རྟེན་གྱི་ས་གསུམ་ནི་སྦྱོར་ལམ་རིགས་ཆེན་འབྱེད་པའི་རྣལ་འབྱོར་ཏེ་རླུང་སེམས་ཀྱི་ལྷ་སྐུ་འགྲུབ་བོ། །དེར་ཚོགས་ཀྱི་སྤྱོད་པའི་ཉེར་རྒྱུ་ལ་བརྟེན་པས་འགྱུར་བདེ་རགས་པ་བཅོམ་སྟེ་ཟག་པ་ཐམས་ཅད་ཟད་ན། །དྲུག་པ་བརྟན་པ་ཁྱད་པར་དུ་འགྲོ་བའི་ས་ནི་མཐོང་ལམ་དབུགས་ཆེན་འབྱིན་པའི་རྣལ་འབྱོར་ཏེ་བདེ་སྟོང་འོད་གསལ་གྱི་ལྷ་སྐུ་འགྲུབ་པོ། །མཐོང་ལམ་འོད་གསལ་ལས་ལངས་པའི་རྗེས་ལ་བདུན་པ་དམིགས་པ་འབྲས་བུ་སྐྱེ་བའི་ས་སྒོམ་ལམ་ལུང་ཆེན་ཐོབ་པའི་རྣལ་འབྱོར་ཏེ་ཆོས་ཉིད་རྟོགས་པའི་ཡེ་ཤེས་དང་དག་པ་ལྷ་སྐུའི་སྣང་བ་རྒྱུན་མི་འཆད་པ་སློབ་པའི་ཟུང་འཇུག་གི་སྐུ་འགྲུབ་པོ། །དེ་ནས་བརྒྱད་པ་གནས་པ་མི་འགྱུར་བའི་ས་དང་། དགུ་པ་གདལ་བ་ཆོས་ཉིད་ཀྱི་ས་དང་། བཅུ་པ་རྫོགས་པ་སྤྱིར་ཆུབ་ཀྱི་ས་གསུམ་པོ་མཐར་ལམ་རྩལ་ཆེན་རྫོགས་པའི་རྣལ་འབྱོར་གྱིས་བསྡུས་པ་སྟེ། དེའི་མཐར་མི་སློབ་པའི་ལམ་རྒྱུན་མཐའི་བར་ཆད་མེད་ལམ་ལ་བརྟེན་ནས་འདོད་ཆགས་ཆེན་པོའི་ལམ་གྱིས་འབྲས་བུའི་དབང་བསྐུར་བས་སྣང་གསུམ་འཕོ་བའི་བག་ཆགས་ཕྲ་བ་སྦྱངས་ཏེ་མི་སློབ་པའི་ཟུང་འཇུག་འབྲས་བུའི་ཆོས་ཉེར་ལྔ་པོ་དབྱེར་མེད་ལྷུན་གྲུབ་ཀྱི་ངོ་བོ་སྐུ་བཞི་ཡེ་ཤེས་ལྔའི་བདག་ཉིད་དཔལ་ཀུན་ཏུ་བཟང་པོའི་གོ་འཕང་ལ་མངའ་བརྙེས་པའོ། ༈ །གཞི་རྒྱུད་ནི། མ་ཧཱ་ཡོ་ག་པས་ནི་བདེན་པ་དབྱེར་མེད་ལྷག་པའི་ཆོས་སྐུ་ཆེན་པོའམ། དག་མཉམ་བདེན་པ་དབྱེར་མེད་བློའི་སྤྱོད་ཡུལ་དང་བྲལ་བར་གཏན་ལ་འབེབས་པའོ། །གནས་ཚུལ་ལ་དག་པ་ལྷའི་རང་བཞིན་དུ་གནས་ཀྱང་། སྣང་ཚུལ་ལ་འཁྲུལ་པ་ཅན་ལ་དེ་ལྟར་སྣང་མི་ནུས་པར་འདོད་དེ། ཐ་སྙད་དུ་ཡོངས་སུ་དག་པའི་ལྷ་དང་མ་དག་པའི་འཁོར་བ་གཉིས་སུ་འབྱེད་པའི་ཚུལ་གྱིས་སྣང་བའི་རང་བཞིན་ལྷར་བསྒྲུབ་པའོ། །འདི་ནི་ལས་དང་པོ་པའི་ངོར་ཚད་མས་བསྒྲུབ་པར་བྱ་བ་ཡིན་པའི་ཕྱིར་གཉིས་སྣང་གི་བློ་ཅན་རྟོག་གེ་བའི་རྒོལ་བ་རྣམས་ལ་ཡང་རིག་པའི་སྟོབས་ཀྱིས་སྒྲུབ་ནུས་པ་ཡིན་ནོ། །ཨ་ནུ་ཡོ་ག་པས་ནི་སྣང་ཆའི་ཆ་ཕྱི་རོལ་གྱི་ཆོས་ཐམས་ཅད་ནང་གི་རྩ་རླུང་ཐིག་ལེ་འཕོ་བའི་དབང་གིས་ཡིན་པས་སྣོད་བཅུད་ཀྱི་ཆོས་ཡེ་ནས་དག་པ་ཀུན་ཏུ་བཟང་པོ་རང་བཞིན་ལྷུན་གྱིས་གྲུབ་པའི་དཀྱིལ་འཁོར་དང་། དེའི་སྟོང་ཆ་ནི་ཀུན་ཏུ་བཟང་མོ་ཡེ་ཇི་བཞིན་པའི་དཀྱིལ་འཁོར། དབྱིངས་རིག་དེ་གཉིས་ཀྱང་སོ་སོ་མ་ཡིན་ཐ་མི་དད་དུ་དབྱེར་མེད་པ་ནི་སྲས་བདེ་བ་ཆེན་པོ་བྱང་ཆུབ་སེམས་ཀྱི་དཀྱིལ་འཁོར་ཞེས་བྱ་སྟེ། ཆོས་ཐམས་ཅད་བདེ་བ་ཆེན་པོའི་རང་བཞིན་དུ་གནས་པའི་ཕྱིར་རྒྱ་མཚོ་ལས་རླབས་ལྟར་བདེ་ཆེན་གཅིག་ཉིད་དུ་མའི་རོལ་པར་ཤར་བ་ལ་ཁྱད་མེད་པས། སྐྱེ་བ་རྒྱུའི་སངས་རྒྱས་ལ་སོགས་པའི་ཚུལ་དུ་སེམས་ཅན་ཐམས་ཅད་རང་བཞིན་གྱི་སངས་རྒྱས་སུ་འདོད་པ་ནི་སྣང་སྲིད་ཡེ་སངས་རྒྱས་པ་ལྟ་བུའི་ལུང་ཞེས་བྱ་སྟེ། རྣལ་འབྱོར་ཅན་ལ་ལམ་གྱི་སྟོབས་ལས་དེ་ལྟར་བསླུ་མེད་དུ་གྲུབ་པ་ཡིན་ནོ། །ཨ་ཏི་ཡོ་ག་པས་ནི་སེམས་ཀློང་མན་ངག་གི་རྒྱུད་རྣམས་ལ་བརྟེན་ནས་རང་གི་སེམས་ཉིད་རང་བྱུང་གི་ཡེ་ཤེས་ངོ་བོ་སྟོང་པ་ཉིད་ལ་དམིགས་མཚན་ཐམས་ཅད་ཀ་ནས་དག་ཅིང་། རང་བཞིན་གསལ་བ་ཁྱབ་བརྡལ་ཆེན་པོ་སྐྱེ་འགག་ལས་འདས་པར་ལྷུན་གྱིས་གྲུབ་པ། དེ་ལྟར་ཀ་དག་དང་ལྷུན་གྲུབ་དབྱེར་མེད་པའི་ཆོས་ཉིད་དེའི་རྩལ་ལས་འཁོར་འདས་ཐམས་ཅད་འཆར་བས་ཐུགས་རྗེ་ཀུན་ཁྱབ་ཀྱི་བདག་ཉིད་དུ་བཞུགས་པ་དེ་ཉིད་སངས་རྒྱས་ཐམས་ཅད་ཀྱི་ཡེ་ཤེས་ཀྱི་སྐུ་མཐར་ཐུག་པ་ཡིན་ལ། དེ་ངོས་ཟིན་པའི་ཚེ་ཇི་ལྟར་སྣང་བ་ཐམས་ཅད་དེའི་རྩལ་དུ་ཤར་ཞིང་དོན་གྱི་ངོ་བོ་དེ་དང་གཉིས་སུ་མེད་པའི་ཕྱིར། སྣང་ཚུལ་ལ་སངས་རྒྱས་ཀྱི་སྐུ་དང་ཡེ་ཤེས་སུ་སྣང་ཡང་རུང་། སེམས་ཅན་གྱི་ལས་དང་ཉོན་མོང་པར་སྣང་ཡང་རུང་། དེ་གཉིས་ཀ་ངོ་བོ་ཡེ་ནས་འཁོར་འདས་མིང་མེད་ཀྱི་ཡེ་ཤེས་ཆེན་པོར་རྣམ་པར་དག་པའི་ཕྱིར། དེ་ལྟ་བུའི་ཡེ་ཤེས་ཅན་གྱི་ངོར་ཆོས་ཐམས་ཅད་ཡེ་ནས་རྣམ་པར་དག་ཅིང་རང་གྲོལ་བ་ལས། གནས་སྣང་འབྱེད་པ་དང་། དག་དང་མ་དག་ཅེས་རིས་སུ་ཆད་པ་མེད་པས་ན། ཐ་མལ་གྱི་སྣང་བ་འདི་རྣམས་མདོག་མ་བརྗེས། སྤུ་མ་བསྒྱུར་བར་སངས་རྒྱས་སུ་གནས་པ་ཞེས་བྱ་སྟེ། ཇི་ལྟར་སྣང་བ་དེ་ཉིད་ཡེ་ནས་རྣམ་པར་དག་པ་ཀུན་བཟང་བདེ་བ་ཆེན་པོའི་གནས་ཉིད་ཡིན་གྱི། དེ་ལས་གཞན་ཞིག་ཏུ་དག་པ་ཞེས་བྱ་བ་རྡུལ་ཙམ་མེད་པར་འདོད་དོ། །འདི་ནི་རིག་པ་རང་སྣང་གི་བློ་ཅན་གྱི་ངོར་ཆོས་ཉིད་ཀྱི་སྟོབས་ལས་མངོན་སུམ་དུ་གྲུབ་པའི་ཕྱིར་ལམ་ཐམས་ཅད་ཀྱི་དགོངས་པའི་སྐྱེལ་སོ་ཡིན་ནོ། །ལམ་རྒྱུད་ནི། མ་ཧཱ་ཡོ་ག་པས་སྟོང་པ་ཆེན་པོ་སོགས་བསྐྱེད་པའི་རིམ་པའི་རྣལ་འབྱོར་གཙོ་བོར་བྱས་ཏེ། ཏིང་ངེ་འཛིན་གྱི་རྩལ་རྫོགས་པ་ན་མཚན་བཅས་ཀྱི་རྫོགས་རིམ་དང་དེས་དྲངས་པའི་རྫོགས་པ་ཆེན་པོ་ལ་འཇུག་པར་འགྱུར་རོ། །ཨ་ནུ་ཡོ་ག་པས་ནི་ཞུ་བདེ་འགྱུར་མེད་བསྒྲུབ་པའི་མཚན་བཅས་ཀྱི་རྫོགས་རིམ་ལ་གཙོ་བོར་ལམ་དུ་བྱེད་ཅིང་། སྔགས་ཙམ་བརྗོད་པས་ལྷ་ཡི་འཁོར་ལོ་རྫོགས་པའི་བསྐྱེད་རིམ་དང་ཞུ་བདེ་མཚུངས་ལྡན་གྱི་ལྷ་སྐུ་དང་། རླུང་སེམས་ཙམ་ལས་གྲུབ་པའི་སྒྱུ་མའི་སྐུ་རྣམས་ཀྱི་སྒོ་ནས་སྣང་ཆ་བསྐྱེད་རིམ་གྱི་དོན་ཐུན་མོང་མིན་པ་དང་། བདེ་བའི་ཐབས་ཀྱིས་དྲངས་པའི་དོན་གྱི་ལྷན་སྐྱེས་རྫོགས་པ་ཆེན་པོ་ཉམས་སུ་ལེན་པའང་ཡིན་ནོ། །རྫོགས་པ་ཆེན་པོ་པས་ནི། རིག་པ་ཡེ་ཤེས་ཀྱི་རྩལ་སྣང་ལྷའི་འཁོར་ལོ་ཡེ་ནས་ཡིན་པ་ཉིད་ལ་རྣམ་པ་མ་བསྒྱུར་ཀྱང་ཆོག་སྟེ། ཏིང་ངེ་འཛིན་གྱིས་བསྐྱེད་པ་དང་མཚན་བཅས་ཐབས་ཀྱིས་བསྒྲུབ་པའི་ལྷ་སྐུ་ལ་ཆེད་དུ་མི་རྩོལ་ཡང་། གལ་ཏེ་ལྷའི་རྣམ་པར་བསྒྱུར་འདོད་ན་ཡང་སྐད་ཅིག་དྲན་རྫོགས་ཀྱི་ཚུལ་དུ་ཆུ་ལས་ཉ་ལྡང་བ་ལྟར་རིག་པའི་རྩལ་དེ་ཉིད་དུ་སྣང་བ་ནི་ཡེ་ནས་དམ་ཡེ་དབྱེར་མེད་ལྷུན་གྱིས་གྲུབ་པའི་ལྷ་ཉིད་དུ་གྱུར་པ་ཡིན་ནོ། །མཚན་བཅས་ཀྱི་རྫོགས་རིམ་རླུང་བཅིང་བའི་རིམ་པ་སོགས་ལའང་ཅུང་ཟད་ཀྱང་མི་ལྟོས་ཏེ། བསྐྱེད་རྫོགས་དེ་དག་འདིར་འཇུག་པའི་ལམ་ཡིན་ལ་འབྲས་བུ་ཡེ་ཤེས་ཉིད་ལ་དབང་འབྱོར་བའི་ཚེ་བསྐྱེད་པ་དང་རྫོགས་པའི་རྩོལ་བ་མེད་པར་དེ་ཡི་འབྲས་བུ་ལྷུན་གྱིས་གྲུབ་པའི་ཕྱིར་རོ། །ཡེ་ཤེས་ཀྱི་འོད་རྩའི་ལམ་ནས་རིག་གདངས་རྩོལ་མེད་དུ་ཤར་བའི་ཐོད་རྒལ་གྱི་ཉམས་ལེན་སོགས་ནི་རྡོ་རྗེའི་ལུས་ལ་བརྟེན་པའི་ཐབས་ཁྱད་པར་ཅན་ཡིན་ཀྱང་། མ་དག་ལས་རླུང་གི་བྱེད་པ་བཅིང་བ་སོགས་རྩོལ་བས་དྲངས་པའི་ལམ་འོག་མ་དང་མི་འདྲ་སྟེ། ཡེ་ཤེས་ཆེན་པོ་ཡེ་ནས་གནས་པའི་རང་གདངས་རྩོལ་མེད་ཡིན་པའི་ཕྱིར་རོ། །དེས་ན་ལམ་ཐམས་ཅད་ཀྱི་མཐའ་འདིར་ཐུག་པས་འདི་ནི་ཀུན་གྱི་བླ་མ་དམ་པའོ། །འབྲས་བུའི་རྒྱུད་ནི། རྣམ་གྲངས་སྣ་ཚོགས་ཀྱིས་བསྟན་ཀྱང་དོན་འདྲ་སྟེ་མཐར་ཐུག་རྣམ་པ་ཐམས་ཅད་མཁྱེན་པའི་ཡེ་ཤེས་ཀྱི་སྐུ་ཉིད་དུ་དབྱེ་བ་མེད་དོ། །དེ་ལྟར་རྒྱུད་ལུང་མན་ངག་གི་གཞུང་གསུམ་གྱིས་གཞི་གཏན་ལ་འབེབ་པའི་ལྟ་བ་དང་། ལམ་རྒྱུད་བྱེ་བྲག་ཏུ་བཤད་པ་ནི། ལམ་ཉམས་སུ་ལེན་ཚུལ་དེའི་དབང་གིས་སྤྱོད་པ་ལའང་སྤྲོས་བཅས་ཀྱི་སྤྱོད་པ་ཕྱིའི་རྫས་དང་ཡོ་བྱད་སོགས་ཀྱི་རྩོལ་བ་མང་པོ་བརྟེན་པ་ནི་མ་ཧཱ་ཡོ་ག་པ་ཡིན་ལ། ཕྱིའི་བྱ་བ་གཙོ་བོར་མི་བྱེད་པར་སྤྲོས་མེད་ཀྱི་ཚུལ་དུ་ནང་གི་ཐབས་ཟབ་མོ་ལ་འབད་པས། ཞིང་སྔགས་ལྷན་སྐྱེས་ཀྱི་རྣལ་འབྱོར་མ་རྣམས་དང་ལྷན་ཅིག་འདུ་བ་ཐོབ་པའི་ཉེ་རྒྱུའི་སྤྱོད་པ་གཙོ་བོར་བྱེད་པ་ཨ་ནུ་ཡོ་ག་པ་ཡིན་ཅིང་། ཕྱི་དང་ནང་གི་བྱ་རྩོལ་གནས་གསུམ་ནི། གནས་ཉེར་བཞི། ཡུལ་སོ་གཉིས། དུར་ཁྲོད་ཆེན་པོ་བརྒྱད་དེ་ཞིང་དེ་རྣམས་སུ་དོན་གྱི་འོད་གསལ་ལ་དབང་ཐོབ་པའི་ལྷན་སྐྱེས་མ་དང་། དང་པོ་ནས་དེར་གནས་ཤིང་སྤྱོད་པའི་ཞིང་སྐྱེས་མ་དང་། སྔགས་ཀྱི་སྒོམ་སྤྱོད་གོམས་པའི་སྟོབས་ཀྱིས་གནས་དེ་དག་ཏུ་བགྲོད་ནུས་པའི་སྔགས་སྐྱེས་མའོ། །དེ་དག་གང་ཡང་གཙོ་བོར་མི་བྱེད་པར། ཤིན་ཏུ་སྤྲོས་མེད་ཀྱི་ཚུལ་དུ་རིག་པ་ཡེ་ཤེས་ཉིད་ཀྱི་ངང་ལས་རྩོལ་་མེད་ཤུགས་འབྱུང་གི་སྤྱོད་པ་བྱེད་པ་ནི་ཨ་ཏི་ཡོ་ག་པའི་སྤྱོད་པ་ཡིན་ནོ། །དེ་བཞིན་དུ་སྒོམ་པ་ལའང་མ་ཧཱས་སེམས་གནས་པའི་ཐབས་རིམ་བཞིན་གོམས་པས་ཏིང་ངེ་འཛིན་ཁྱད་པར་ཅན་བསྒྲུབ་པ་དང་། ཨ་ནུའི་རྡོ་རྗེའི་ལུས་ལ་གནད་དུ་བསྣུན་པའི་ཐབས་ཀྱིས་རླུང་སེམས་བཅིངས་ཏེ་ཞི་གནས་ཁྱད་པར་ཅན་མྱུར་དུ་བསྒྲུབ་པ་དང་གཉིས་ནི་རྩོལ་བ་དང་བཅས་པ་ཡིན་ལ། ཨ་ཏིའི་ལུགས་ལ་ནི་རིག་པ་ཡེ་ཤེས་ཉིད་ངོས་ཟིན་པས་རང་བཞིན་ལྷུན་གྱིས་གྲུབ་པའི་བསམ་གཏན་ཙམ་ལས་སེམས་འཛིན་གྱི་རྩོལ་བ་ཅི་ཡང་མི་དགོས་པའོ། །དེ་བཞིན་དུ་དཀྱིལ་འཁོར་ལ་ཡང་བསྐྱེད་རྫོགས་རྫོགས་ཆེན་གསུམ་པོས་རིམ་པ་བཞིན་གཟུགས་བརྙན་དང་ལྷག་ཏིང་གི་དཀྱིལ་འཁོར་གཙོ་བོར་ཉམས་སུ་ལེན་པ་དང་། བདེ་ཆེན་བྱང་ཆུབ་སེམས་ཀྱི་དཀྱིལ་འཁོར་ལ་ཉམས་སུ་ལེན་པ་གཙོ་བོར་བྱེད་པ་དང་། རང་བཞིན་གདོད་མའི་དཀྱིལ་འཁོར་རྩོལ་མེད་དུ་ལམ་དུ་བྱེད་པ་གསུམ་གྱི་ཁྱད་པར་དང་། དབང་ལའང་སྔགས་བླ་མེད་ཐམས་ཅད་དབང་བཞིས་སྨིན་པར་བྱེད་པ་འདྲ་ཡང་། གཟུགས་བརྙན་དང་ཏིང་ངེ་འཛིན་གྱི་དཀྱིལ་འཁོར་དུ་ཕྱི་རོལ་རྫས་ལ་བརྟེན་ཏེ་དབང་ནོད་པ་གཙོ་བོར་བྱེད་པ་དང་། རྡོ་རྗེ་ལུས་ཀྱི་དཀྱིལ་འཁོར་ལས་ཡབ་ཡུམ་མཉམ་པར་སྦྱོར་བའི་བྱང་ཆུབ་སེམས་ཀྱི་དབང་རྫས་ལས་དབང་ནོད་པ་གཙོ་བོར་བྱེད་པ་དང་། རིག་པ་བྱང་ཆུབ་སེམས་ཀྱི་དཀྱིལ་འཁོར་དུ་བསྐུར་ཐོབ་མེད་པའི་ཆོས་ཉིད་ངོ་སྤྲོད་པ་རིག་པ་རྩལ་གྱི་དབང་བསྐུར་བ་གཙོ་བོར་བྱེད་པའི་ཁྱད་པར་དང་། དམ་ཚིག་ལའང་རྩ་བ་དང་ཡན་ལག་གིས་བསྡུས་པའི་བསྲུང་བྱ་དང་། བསྒྲུབ་བྱ་རྣམས་དྲན་ཤེས་ཀྱི་སྒོ་ནས་ཚུལ་བཞིན་བླང་དོར་བརྒྱུད་པ་དང་། དམ་ཚིག་ཐམས་ཅད་ལ་དབང་འབྱོར་བའི་ཕྱིར་བདེ་བ་ཆེན་པོ་སྒྲུབ་པའི་རྟེན་ཀུན་དཱ་ལྟ་བུའི་བྱང་ཆུབ་ཀྱི་སེམས་མི་ཉམས་པའི་ཐབས་དང་མཚན་ཉིད་དང་ལྡན་པའི་ལས་ཀྱི་ཕྱག་རྒྱ་བསྟེན་པ་སོགས་ཀྱི་བྱ་བ་གཙོ་བོར་སྒྲུབ་པ་དང་། ཆོས་ཐམས་ཅད་རང་བྱུང་ཡེ་ཤེས་ཉག་གཅིག་གི་ངང་དུ་ལྷུན་གྱིས་གྲུབ་པར་གནས་པས་བྱ་བ་དང་མི་བྱ་བའི་བསྲུང་མཚམས་མེད་པར་ཕྱལ་བར་གནས་པ་འདའ་ཉམས་ལས་འདས་པའི་ཁྱད་པར་དང་། ཏིང་ངེ་འཛིན་དང་ཤེས་རབ་ནང་གི་ཡོ་བྱད་དང་ཕྱིའི་སྒྲུབ་པ་ཆེན་པོའི་ཡོ་བྱད་དེ་ཕྱི་ནང་གི་ཡོ་བྱད་དང་ལྡན་པའི་སྒོ་ནས་བསྙེན་སྒྲུབ་བྱེད་པ་དང་། རང་ལུས་ཐབས་ལྡན་བསྙེན་པ་དང་གཞན་ལུས་ཐབས་ལྡན་སྒྲུབ་པ་རྗེས་སུ་ཆགས་པའི་བརྟུལ་ཞུགས་ཉིད་གཙོ་བོར་བྱེད་པའི་ཚུལ་གྱིས་ལྷ་བསྒྲུབ་པ་དང་། བསྒྲུབ་བྱ་སྒྲུབ་བྱེད་གཉིས་སུ་མེད་པ་བྱང་ཆུབ་ཀྱི་སེམས་ཤེས་ཤིང་དེ་ལ་གོམས་པ་གདེངས་སུ་གྱུར་པ་ཁོ་ནས་བསྙེན་སྒྲུབ་བྱེད་པའི་ཁྱད་པར་དང་། ཕྱི་དང་ནང་གི་དམ་ཚིག་གི་རྫས་དངོས་སུ་བཤམ་པ་དང་ཡིད་ཀྱིས་སྤྲུལ་པའི་མཆོད་པ་གཙོ་བོར་བྱེད་པ་དང་། གསང་བའི་མཆོད་པ་དྷུ་ཏིའི་དབྱིངས་སུ་རླུང་དང་རྟོག་པ་གསོད་ཅིང་གཉིས་སུ་མེད་པར་སྦྱོར་བའི་བདེ་ཆེན་བྱང་ཆུབ་སེམས་ཀྱི་མཆོད་པ་གཙོ་བོར་བྱེད་པ་དང་། ཡེ་ནས་མཆོད་བྱ་མཆོད་བྱེད་མེད་པར་དེ་ཁོ་ན་ཉིད་མཉམ་པ་ཆེན་པོའི་མཆོད་པ་གཙོ་བོར་བྱེད་པའི་ཁྱད་པར་དང་། རྫས་། སྔགས་ཏིང་ངེ་འཛིན་གྱི་ཐབས་གཙོ་བོར་བྱས་ཏེ་ཕྲིན་ལས་སྒྲུབ་པ་དང་། རླུང་སེམས་ལ་རང་དབང་ཐོབ་པའི་སྲོག་གཟུགས་གྲུབ་པའི་སྒོ་ནས་ལས་སྒྲུབ་པ་དང་། སེམས་ཀྱི་ཆོས་ཉིད་ལ་དབང་འབྱོར་བ་ཉིད་ཀྱིས་རྩལ་སྣང་ལས་རབ་འབྱམས་རྩོལ་མེད་དུ་སྒྲུབ་པ་གསུམ་གྱི་ཁྱད་པར་དང་། ཕྱི་བཅའ་བའི་ཕྱག་རྒྱ་དང་ཏིང་ངེ་འཛིན་གྱི་ལྷ་སྐུའི་ཕྱག་རྒྱ་སྒོམ་པའི་རྩོལ་བ་གཙོ་བོར་བྱེད་པ་དང་། རྡོ་རྗེའི་ལུས་ཉིད་ཀྱི་བསྒུལ་བསྐྱོད་ཕྱག་རྒྱ་འགྲོ་འདུག་གར་དུ་ཤེས་ཤིང་གཟུངས་ཀྱི་ཕྱག་རྒྱ་ལ་བརྟེན་ནས་བདེ་བའི་བརྟུལ་ཞུགས་གྲུབ་པའི་ལམ་གཙོ་བོར་བྱེད་པ་དང་། ཆོས་ཐམས་ཅད་ཡེ་ནས་ཕྱག་རྒྱ་ཆེན་པོའི་དཀྱིལ་འཁོར་དུ་ལྷུན་གྱིས་གྲུབ་པས་རྩོལ་བ་མེད་པར་ཕྱག་རྒྱ་བཞིའི་དོན་དང་ལྡན་པའི་ཁྱད་པར་དང་། བཟླས་བརྗོད་ཀྱི་སྔགས་ཀྱི་རྩོལ་བ་ལ་གཙོ་བོར་བྱེད་པ་དང་། རྡོ་རྗེའི་བཟླས་པ་དང་བུམ་ཅན་སོགས་ཀྱིས་སྲོག་མི་ཤིག་པའི་ཐིག་ལེར་སྒྲུབ་པའི་སྔགས་གཙོ་བོར་བྱེད་པ་དང་། ཆོས་ཉིད་རང་བྱུང་གི་ཡེ་ཤེས་ལ་དབང་འབྱོར་བས་གཞོམ་མེད་རྡོ་རྗེ་ནཱ་དའི་གསུང་དང་ཡེ་ནས་ལྡན་པའི་ཕྱིར་ངག་ཏུ་བརྗོད་པ་མེད་ཀྱང་མི་གསུང་མཉམ་པར་བཞག་པ་སྔགས་ཀྱི་རྒྱལ་པོའི་དོན་དང་ལྡན་ཅིང་། ཚིག་ཏུ་བརྗོད་པ་ཐམས་ཅད་ཀྱང་རྡོ་རྗེའི་གླུ་དང་གསུང་སྔགས་ཀྱི་ངོ་བོར་གྱུར་པའི་ཁྱད་པར་འདི་དག་བསྐྱེད་རྫོགས་རྫོགས་ཆེན་གསུམ་གྱི་གཞུང་གི་དགོངས་པས་བསླབ་པའི་མཐའ་བཅུ་གཅིག་ཉམས་སུ་ལེན་ཚུལ་གྱི་ཁྱད་པར་ཡིན་པས་དོན་གྱི་འགག་བཀྲོལ་བ་ཡིན་ཞེས་གསུངས་སོ། ༈ །ལུང་ལྟར་ན་ཕྲ་བའི་ལུས་ངག་ཡིད་གསུམ་དུ་གྲགས་པ། གཙོ་མོ་གསུམ་དང་འཁོར་ལོ་ལྔ་ལ་སོགས་པའི་རྩ་དང་། སྲོག་སྟེ་རྩ་བ་དང་ཡན་ལག་གི་རླུང་དང་། ཙིཏྟ་ནི་སྙིང་པོ་སྟེ་རྩ་དང་རླུང་ལ་བརྟེན་ནས་སེམས་ཀྱི་རྟེན་དུ་གྱུར་པའི་ཐིག་ལེ་དང་། དེ་གསུམ་གྱི་བྱེད་པ་ལ་བརྟེན་ནས་རགས་པའི་ལུས་ངག་ཡིད་གསུམ་པོ་འདི་དག་ནི། གསང་བའི་གསང་བ་ཆེན་པོ་ཞེས་སྐུ་གསུང་ཐུགས་མི་ཟད་པ་རྒྱན་གྱི་འཁོར་ལོ་ཉིད་དུ་ཡེ་ནས་གནས་པ་སྟེ། འདི་ལྟར་ལུས་རྩ་ཁམས་སྣང་སྟོང་སྐུ་ཡི་རྡོ་རྗེ་ཡིན་ཏེ། འདི་དག་རང་བཞིན་གྱིས་སྣང་སྟོང་གཉུག་མའི་དེ་ཉིད་དུ་གནས་པའི་ཕྱིར། དེ་བཞིན་དུ་ངག་རླུང་ཁམས་གྲགས་སྟོང་གསུང་གི་རྡོ་རྗེ། ཡིད་ཐིག་ལེ་གསལ་སྟོང་ཐུགས་ཀྱི་རྡོ་རྗེར་གནས་ཀྱང་དེ་ལྟར་མི་ཤེས་པའི་སེམས་ཅན་རྣམས་ཀྱི་ངོར་རང་བཞིན་གྱིས་གབ་ཅིང་སྦས་པ་ལྟར་གྱུར་པས་ན་གསང་བའི་གསང་བ་ཞེས་སོ། །དེ་ལྟར་ན་ཕྲ་རགས་ཀྱི་སྒོ་གསུམ་པོ་གཉུག་མའི་གསང་བ་གསུམ་དང་དབྱེར་མེད་པར་བཞུགས་པས་ན། དེ་དག་གི་སྣང་ཆ་བདེ་བ་ཀུན་ཏུ་བཟང་པོ་དང་། སྟོང་ཆ་དབྱིངས་ཀུན་ཏུ་བཟང་མོ་ཉིད་གཉིས་སུ་མེད་པ་སྲས་བདེ་ཆེན་བྱང་ཆུབ་ཀྱི་སེམས་ཡེ་ཤེས་རྡོ་རྗེའམ་རང་བྱུང་གི་ཡེ་ཤེས་གཅིག་ཉིད་ལ་ལྡོག་ཆའི་དབྱེ་བས་ཡེ་ཤེས་ལྔ་ལ་སོགས་པའོ། ༈ །རྒྱལ་སྲས་གཞན་ཕན་མཐའ་ཡས་ཀྱིས། དེ་ཡང་རྒྱུའི་ཐེག་པའི་སྐབས་གྲངས་མེད་གསུམ་མམ་བདུན་སོགས་པར་བསོད་ནམས་དང་ཡེ་ཤེས་ཀྱི་ཚོགས་རྒྱ་མཚོ་ལྟ་བུ་བསགས་ནས་ཚོགས་ཆེན་པོས་མཐར་ཐུག་གི་འབྲས་བུ་ལ་སྦྱོར་བར་གསུངས་པ་གང་ཞིགགསང་སྔགས་བླ་མེད་ཀྱི་རྒྱུད་འདིར་དཀའ་ཚེགས་ཆུང་ངུས་ཚེ་གཅིག་གིས་མཐར་ཐུག་གི་འབྲས་བུ་རྡོ་རྗེ་འཆང་ཆེན་པོའི་གོ་འཕང་དེ་ཉིད་མངོན་དུ་ཐོབ་པའི་རྒྱུ་མཚན་ཡང་ཅི་ཞིག་ཡིན་སྙམ་པ་ལ། འདོད་ཚུལ་མང་ཡང་མདོར་ན་དགེ་མི་དགེ་ལུང་མ་བསྟན་དང་གསུམ་དུ་ཡོད་པ་ལས། མི་དགེ་བའི་ལས་འབྲས་དགེ་བར་བསྒྱུར་བའི་ཐབས་ནི་གསང་སྔགས་ཀྱི་གཞུང་ཁོ་ན་ལས་གཞན་དུ་མ་བཤད་ལ། རྒྱུ་མཚན་འདི་ལ་དགོངས་ནས་ཐབས་ཤེས་ཁྱད་པར་ཅན་གྱིས་མཚན་རྟོག་སྡོམ་པ་ཉིད་སྔགས་སྡོམ་གྱི་ངོ་བོར་བཞག་པ་ཡིན། ཞེས་དང་། ཨོ་རྒྱན་འཇིགས་མེད་ཆོས་ཀྱི་དབང་པོས། འཁོར་བའི་རྒྱུ་འབྲས་ཀུན་འབྱུང་དང་སྡུག་བསྔལ་གྱི་བདེན་པ་གཉིས་དང་། མྱང་འདས་ཀྱི་རྒྱུ་འབྲས་འགོག་པ་དང་ལམ་གྱི་བདེན་པ་གཉིས་པོ་དབྱེར་མེད་པ་ནི་ལྟ་བ་འཁོར་འདས་དབྱེར་མེད་ཅེས་བུམ་དབང་གི་ལྟ་བ་དངོས་ཡིན་ཏེ། དེ་ཡང་སྣང་སྲིད་སྣོད་བཅུད་ཐམས་ཅད་གཞི་གནས་ལྷུན་གྱིས་གྲུབ་པའི་དཀྱིལ་འཁོར་དུ་རྟོགས་པས་སྡུག་བདེན་འཁོར་བའི་སྣོད་བཅུད་འགོག་བདེན་སྐུ་དང་ཡེ་ཤེས་སུ་དབྱེར་མེད་ཅིང་། ཉོན་མོངས་དུག་ལྔ་ཡེ་ཤེས་ལྔའི་རྣམ་རོལ་དུ་འཆར་ཞིང་ཐབས་ཀྱིས་ཟིན་པའི་སྦྱོར་སྒྲོལ་གྱི་དགེ་བའི་རྣམ་པ་ཅན་ལ་ལམ་དུ་བྱེད་པས་ཀུན་འབྱུང་ལས་ཉོན་གཉིས་པོ་ལམ་བདེན་དང་དབྱེར་མེད་དུ་ལྟ་བ་ཡིན་ནོ། །ཞེས་དང་། མཁན་ཆེན་གྱིས་མཛད་པའི་བདེན་བཞིའི་རྣམ་བཤད་ལས། གསང་སྔགས་བླ་ན་མེད་པ་རྡོ་རྗེ་ཐེག་པའི་ལུགས་ལ་ཡང་འཁོར་བ་རྒྱུ་འབྲས་ལས་ལོག་སྟེ། མྱ་ངན་ལས་འདས་པའི་རྒྱུ་འབྲས་ལ་ཞུགས་ནས། རྣམ་མཁྱེན་མངོན་དུ་བྱེད་པ་ཡིན་པས། སྤྱིར་བདེན་བཞི་ལས་མི་འདའ་ཡང་། ཉམས་སུ་ལེན་ལུགས་ལ་ཁྱད་པར་འདི་ཡོད་དེ། སྡུག་བདེན་འཁོར་བའི་སྣོད་བཅུད་འདི་རྣམས་ལ་གནས་ལུགས་དང་སྣང་ལུགས་གཉིས་སུ་ཕྱེ་ནས་གནས་ལུགས་ཀྱི་ངོས་ནས་འཇལ་ན་སྣ་ཚོགས་སུ་སྣང་བ་འདི་རྣམས་ཀྱི་རང་བཞིན་སྤྲོས་བྲལ་རང་བྱུང་གི་ཡེ་ཤེས་སྣང་སྟོང་བདེན་གཉིས་དབྱེར་མེད་ལྷག་པའི་ཆོས་སྐུ་ཆེན་པོར་བཞུགས་པས་གཞི་ལྷུན་གྲུབ་ཀྱི་སངས་རྒྱས་ཞེས་བྱ་སྟེ། དཔེ་འདམ་རྫབ་ཀྱི་ནང་གི་ནོར་བུ་བཞིན་དུ་རང་ངོ་རྣམ་དག་དུ་ཡོད་ཅིང་སྡུག་བདེན་གྱི་རང་བཞིན་འགོག་བདེན་དུ་གནས་པས་འཁོར་འདས་དབྱེར་མེད་ཅེས་བྱའོ། །དེ་ཉིད་གཞི་རྒྱུད་དམ་སྦྱང་གཞི་ཡིན་ནོ། །དེ་ལྟར་རྟོགས་པ་ལ་འཁོར་འདས་དབྱེར་མེད་ཀྱི་ལྟ་བའམ་གྲུབ་མཐའ་ཟེར་བ་ཡིན་ནོ། །སྣང་ལུགས་ཀྱི་ངོས་ནས་འཇལ་ན་སོ་སོའི་སྐྱེ་བོའི་ཐ་མལ་རང་རྒྱུད་དུ་ཞེན་པའི་སྣང་བ་ལ་ཇི་ལྟར་སྣང་བའི་ཕྱི་ནང་གི་དངོས་པོ་འདི་རྣམས་ལ་མ་རྟོགས་འཁྲུལ་བའི་སྣང་བ་ཟེར་ཏེ་སྦྱང་བྱ་ཡིན་ནོ། །དེ་ཉིད་སྡུག་བསྔལ་གྱི་བདེན་པར་བཞག་གོ །ལས་ཉོན་ཀུན་འབྱུང་གི་བདེན་པ་ལ་ཡང་། རང་བཞིན་ཤེས་པས་ལམ་དུ་འགྲོ་ཚུལ་དང་། རང་གར་ཤོར་བས་ཀུན་འབྱུང་དུ་འགྲོ་ཚུལ་གཉིས་ལས། ལམ་དུ་འགྲོ་ཚུལ་ནི་ཉོན་མོངས་གང་སྐྱེས་ཀྱང་དགག་སྒྲུབ་མེད་པར་ཁོ་རང་གི་ཐོག་ཏུ་གློད་ནས་བཞག་པས་རྩལ་གཞི་ཐོག་ཏུ་གྲོལ་བ་ཆབ་རོམ་ཆུར་ཞུ་བའམ། རླབས་རྒྱ་མཚོར་ཐིམ་པ་བཞིན་ཉོན་མོངས་པ་ཁོ་རང་གི་ངོ་བོ་སྤྲོས་བྲལ་གཉུག་མའི་ཡེ་ཤེས་སུ་ལྷང་ངེར་འཆར་། དེ་ཙ་ན་གཉེན་པོ་གཞན་མ་དགོས་པར་ཉོན་མོངས་ཉིད་ཡེ་ཤེས་སུ་ཤར་ནས་ཀུན་འབྱུང་ལམ་བདེན་དུ་སོང་བས་ཉོན་མོངས་པ་ལམ་དུ་བྱེད་པ་ཞེས་བྱའོ། །ལུས་ངག་གི་ལས་རྣམས་ཀྱང་ངོ་བོ་ལུང་མ་བསྟན་ཡིན་ཞིང་། དེ་དགེ་སྡིག་དུ་སྒྱུར་བའི་བྱེད་པ་པོ་སེམས་ཡིན་པས། སེམས་ཉིད་གཟུང་འཛིན་ཨ་འཐས་སུ་མ་ཞེན་པར་གང་ཤར་གྱི་ངོ་བོ་མ་བཅོས་ཆོས་ཉིད་སྟོང་པའི་རང་འགྲོས་ཀྱི་ངང་དུ་གྲོལ་བ་ཤེས་རབ་དང་། སྦྱོར་བ་སེམས་བསྐྱེད་ཁྱད་པར་ཅན་དང་། དངོས་གཞི་ལྷ་སྔགས་ཏིང་ངེ་འཛིན་གྱི་བྱེད་པས་ཐ་མལ་གྱི་སྣང་ཞེན་དག་སྣང་དུ་འཆར་བ། རྗེས་སུ་ཚོགས་གཉིས་རྫོགས་པའི་ཉེ་ལམ་དུ་སོང་བ་ནི་ཐབས་ཏེ། ཐབས་ཤེས་ཁྱད་པར་ཅན་དེ་ལྟ་བུའི་ཟིན་ན་ལས་ཀྱང་ལམ་དུ་འགྲོ་བའོ། །རང་གར་ཤོར་བས་ཀུན་འབྱུང་དུ་འགྲོ་ཚུལ་ནི། ཐབས་ཤེས་ཁྱད་པར་བ་དང་བྲལ་ནས་བསམ་སྦྱོར་གཉིས་ཀ་ཐ་མལ་རང་རྒྱུད་དུ་ཤོར་ན་ལས་བསགས་ནས་འཁོར་བ་མཐའ་མེད་དུ་འཕེན་པས་ཀུན་འབྱུང་གི་བདེན་པར་འགྲོ་བ་ཡིན་ནོ། །དེས་ན་རྡོ་རྗེ་ཐེག་པའི་ལམ་གནད་ཇི་ལྟ་བ་བཞིན་ཤེས་ནས། རྟོགས་གོམས་ཀྱི་གདེངས་དང་ལྡན་ན་སྡུག་བདེན་གྱི་རང་བཞིན་འགོག་བདེན་དུ་ཤེས་ནས། ཀུན་འབྱུང་ལམ་བདེན་དུ་འཁྱེར་ནུས་པས། འཁོར་བ་རྒྱུ་འབྲས་མྱང་འདས་ཀྱི་རྒྱུ་འབྲས་སུ་འགྱུར་ཏེ་སྤང་བྱ་གཉེན་པོར་སོང་ནས་འཁོར་འདས་དབྱེར་མེད་ཀྱི་རྟོགས་པ་མངོན་དུ་འགྱུར་རོ། ༈ །ཨོ་རྒྱན་འཇིགས་མེད་ཆོས་ཀྱི་དབང་པོས། མདོ་སྔགས་ཀྱི་ལྟ་བ་ལ་ཁྱད་པར་མི་འབྱེད་པ་གསར་མའི་ལུགས་ཡིན་ལ། སྔ་འགྱུར་རྙིང་མའི་རིང་ལུགས་ལ་ནི། མདོ་སྔགས་ཀྱི་ལྟ་བ་ལ་ཁྱད་པར་འབྱེད་པ་ཡིན་ཏེ། འདི་ལྟར་ལྟ་བའི་རྣམ་གྲངས་ལ། ཆོས་ཅན་ལྟ་བའི་ལྟ་བ། ཆོས་ཉིད་ལྟ་བའི་ལྟ་བ། རང་རིག་ལྟ་བའི་ལྟ་བ་སྟེ་གསུམ་དུ་ཡོད་པ་ལས་ཆོས་ཉིད་ལྟ་བའི་ངོས་ནས་མདོ་སྔགས་ཀྱི་ལྟ་བ་ལ་ཁྱད་མེད་དེ། སྔགས་ཀྱི་ལྟ་བ་ཡང་ངོ་བོ་སྟོང་པའི་ཆ་ནས་སྤྲོས་པའི་མཚན་མ་ཐམས་ཅད་དང་བྲལ་བའི་སྟོང་ཉིད་དམིགས་བསམ་བརྗོད་པ་ལས་འདས་པའི་ཕྱིར། རྩ་རྒྱུད་ལས། གཅིག་དང་དུ་མ་བྲལ་བ་ཡི། །མཐའ་དང་དབུས་མེད་དེ་བཞིན་ཉིད། །སངས་རྒྱས་ཀྱིས་ཀྱང་མི་གཟིགས་ཏེ། །རང་བྱུང་ཡེ་ཤེས་གནས་མེད་སྣང་། །ཞེས་སོ། །རྒྱུ་མཚན་དེ་ལྟ་བུ་ལ་དགོངས་ནས། ས་སྐྱ་པཎྜི་ཏས་ཀྱང་། ཕ་རོལ་ཕྱིན་པའི་སྤྲོས་བྲལ་ལས། །ལྷག་པའི་ལྟ་བ་ཡོད་གྱུར་ན། །ལྟ་དེ་སྤྲོས་པ་ཅན་དུ་འགྱུར། །ཞེས་གསུངས་སོ། །ཆོས་ཅན་ཀུན་རྫོབ་ལྟ་བའི་ངོས་ནས་མདོ་སྔགས་ཀྱི་ལྟ་བ་ལ་ཁྱད་པར་ཡོད་པ་ཡིན་ཏེ། རྒྱུ་མཚན་ཉིད་ཀྱི་ཐེག་པའི་བླ་མེད་ཟབ་མོ་དབུ་མའི་ཐེག་པ་ལས་ཀུན་རྫོབ་རྟེན་འབྱུང་དུ་སྣང་བའི་ཆོས་འདི་དག་སྒྱུ་མ་དང་རྨི་ལམ་གྱི་སྣང་བ་ལྟར་རང་བཞིན་བདེན་པར་མ་གྲུབ་པ་ཙམ་དུ་ལྟ་བ་ལས། དག་པ་ལྷའི་དཀྱིལ་འཁོར་ཆེན་པོར་ལྟ་བར་མ་བཤད་ཀྱང་། ཐབས་ཀྱི་ཐེག་པ་ཆེན་པོ་སྔགས་བླ་མེད་ཀྱི་སྐབས་འདི་རུ་ནི། སྣོད་བཅུད་ཀྱིས་བསྡུས་པའི་ཆོས་འདི་དག་རང་བཞིན་ལྷ་དང་ལྷ་མོའི་ཚུལ་དུ་རང་ཆས་སུ་བཞུགས་པར་བལྟ་སྟེ། གསང་སྙིང་ལས། རྡོ་རྗེ་ཕུང་པོའི་ཡན་ལག་ནི། །ཞེས་སོགས་དང་། བརྟགས་གཉིས་ལས། སེམས་ཅན་རྣམས་ནི་སངས་རྒྱས་ཏེ། །ཞེས་སོགས་དང་། རྨད་བྱུང་རྒྱལ་པོའི་རྒྱུད་ལས། བདག་དང་མཐའ་ཡས་སེམས་ཅན་རྣམས། །ཞེས་སོགས་སོ། །དེ་ལྟར་རྟེན་ཆོས་ཀུན་རྫོབ་ཀྱི་ངོས་ནས་སྔགས་ཀྱི་ལྟ་བ་མདོ་ལས་འཕགས་པའི་རྒྱུ་མཚན་གྱིས། དེ་ཉིད་ཀྱི་སྣང་གཞི་སྟོང་ཉིད་ཀྱང་སྤྲོས་བྲལ་ཡིན་པ་འདྲ་ཡང་འདིར་དོན་དམ་དཀོར་བདུན་ངོ་བོ་ཉིད་ལྷུན་གྱིས་གྲུབ་པའི་རྣམ་ཀུན་མཆོག་ལྡན་གྱི་སྟོང་ཉིད་ལ་འདོད་པ་ཡིན་ཏེ། ལམ་རིམ་ལས། བླ་མེད་ཐེག་པའི་ནང་ནས་ནི། །དོན་དམ་དུ་ནི་དབྱེར་མེད་ལ། །ཀུན་རྫོབ་དུ་ནི་ཐམས་ཅད་ལ། །དག་དང་མ་དག་གཉིས་ཀར་འཛིན། །ཐབས་ཀྱི་ལྟ་སྤྱོད་ཆེན་པོ་ནི། །རྣམ་པར་བྱང་དང་སྡུག་བསྔལ་དག །ཀུན་རྫོབ་ཏུ་ཡང་དབྱེར་མེད་ལ། །ལྟ་བ་མཐོ་དམན་དེ་ཙམ་མོ། །ཞེས་གསུངས་སོ། །ངེས་ཤེས་སྒྲོན་མེ་ལས། ལ་ལས་དོན་དམ་ཕར་བཅད་ནས། །ཀུན་རྫོབ་ཙམ་གྱི་ངོས་ནས་ནི། །རྒྱུད་སྡེའི་ལྟ་བ་མཐོ་དམན་བྱེད། །དོན་དམ་སྟོང་པས་མ་ཟིན་པའི། །ཀུན་རྫོབ་རང་ཉིད་ལྟ་བ་ཡི། །མཐོ་དམན་བྱེད་ཆོས་སུ་མི་འཐད། །ཅེས་སོ། །སྤྱིར་མདོ་སྔགས་གཉིས་པོ་ལམ་ཉེ་རིང་ཙམ་ལས་འབྲས་བུ་སངས་རྒྱས་ཀྱི་གོ་འཕང་ཐོབ་པ་ལ་ཁྱད་མེད་པར་བཞེད་པ་དང་། གསང་སྔགས་རྡོ་རྗེ་ཐེག་པའི་ལམ་ལ་མ་བརྟེན་པར་མཐར་ཐུག་རྫོགས་པའི་བྱང་ཆུབ་ཀྱི་གོ་འཕང་མངོན་དུ་བྱེད་མི་ནུས་པར་འདོད་པ་དང་། མདོ་ལམ་ནས་རང་ལམ་གྱི་ས་བཅུ་གཅིག་ཀུན་ཏུ་འོད་ཀྱི་སའི་བར་འགྲོ་ནུས་ཀྱང་མདོ་ལམ་གྱི་སངས་རྒྱས་བཏགས་པ་བ་དེས་སྔགས་སུ་བསྟན་པའི་སྐུ་དང་ཡེ་ཤེས་རྒྱ་མཚོའི་བདག་ཉིད་ཟུང་འཇུག་རྡོ་རྗེ་འཆང་གི་གོ་འཕང་མཚན་ཉིད་པ་དེའི་དོད་མི་ཐུབ་པས་མདོ་སྔགས་ཀྱི་སངས་རྒྱས་ལ་ཁྱད་པར་དབྱེ་བའི་ལུགས་དང་གསུམ་ལས། ཕྱི་མ་གཉིས་པོ་འདི་ལེགས་པར་བརྟགས་ན་དགོངས་པའི་གནད་གཅིག་ཏུ་འབབ་པ་ཡིན་ཏེ། བཞེད་པ་སྔ་མས་ཀྱང་མདོ་ལམ་དུ་མི་སློབ་པའི་ལམ་བཅུ་གཅིག་ཀུན་ཏུ་འོད་ཀྱི་ས་སངས་རྒྱས་ཀྱི་གོ་འཕང་མཐར་ཐུག་གི་བསྒྲུབ་བྱར་བསྟན་པར་ནི་བཞེད་དགོས་ལ། མདོ་རང་ལམ་ནས་བཤད་པའི་འབྲས་བུ་དེ་ལམ་དེས་ཐོབ་མི་ནུས་ན་ནི་ལམ་དང་འབྲས་བུ་ཡ་བྲལ་མུ་སྟེགས་བྱེད་ཀྱི་ཐར་ལམ་ལྟར་འགྱུར་བས་མཚན་ཉིད་ཐེག་པ་ལ་སྐུར་བ་མིི་བཟད་པ་བཏབ་པར་འགྱུར་ལ། ཕྱི་མས་ཀྱང་མདོ་ལམ་ནས་བཤད་པའི་སངས་རྒྱས་ཀྱི་གོ་འཕང་དེ་བསྒྲུབས་ཟིན་ནས་སྔགས་ལམ་དུ་ད་གཟོད་ངེས་པར་ཞུགས་ཏེ་ཟུང་འཇུག་རྡོ་རྗེ་འཆང་གི་གོ་འཕང་ཐོབ་པ་ནི་བཞེད་དགོས་ལ། དེ་ལྟར་མ་ཡིན་པ་མདོ་ལམ་གྱི་སངས་རྒྱས་དེ་ཡང་རང་ལམ་གྱི་མཐར་ཐུག་པ་ཡིན་ཞིང་དེ་སྔགས་ལམ་དུ་མི་འཇུག་པར་བཞེད་ན་ནི་མཐར་ཐུག་ཐེག་པ་གཉིས་སུ་འགྱུར་ཞིང་། སྔགས་ཀྱི་ཐེག་པ་ཐེག་པ་གསུམ་དུ་མི་འདུ་བའི་སྐྱོན་དུ་འགྱུར་རོ། །དེས་ན་བཞེད་པ་གཉིས་པོ་མཁས་གྲུབ་དུ་མས་བཞེད་པ་ཡིན་ཞིང་ཁྱད་པར་མདོ་སྔགས་ཀྱི་སངས་རྒྱས་ལ་ཁྱད་འབྱེད་པ་ནི་སྒྱུ་འཕྲུལ་དང་མཚན་བརྗོད་ཀྱི་ལུང་གིས་ཀྱང་བསྒྲུབ་དུ་ཡོད་ལ་འཕགས་ཡུལ་གྱི་སློབ་དཔོན་སངས་རྒྱས་ཡེ་ཤེས་ཞབས་ཀྱིས་རྩལ་དུ་བཏོན་ནས་བཤད་ཅིང་དེ་ལས་གཞན་པའི་ལུང་ཡང་དུ་མ་ཡོད་པས་གནས་སྐབས་ཀྱི་འདོད་པ་གྱི་ན་ཙམ་དུ་བལྟ་བར་ནི་མི་བྱའོ། ༈ །མན་ངག་གསེར་ཞུན་ལས། ཨ་ཏི་ཡོ་ག་ནི་དབང་བཞི་པའི་ཡེ་ཤེས་ཡིན་པས་རྒྱུད་སྡེ་བཞིར་འདོད་པ་ལྟར་ན་ཨ་ཏི་ཡེ་ཤེས་ཡིན་གྱི་ཐེག་པ་རང་རྐྱ་ཞིག་འཇོག་པ་མིན་ཏེ་བསླུ་མེད་ཀྱི་ལམ་གྱི་ཡེ་ཤེས་ཡིན་ནོ། །འོ་ན་གསང་སྔགས་རྙིང་མར་དེ་བརྗོད་བྱར་བྱས་པའི་གཞུང་དོན་མེད་དོ་ཞེ་ན། དེ་རྩལ་དུ་བཏོན་ནས་བཤད་པས་ཐེག་རྩེ་ཤིན་ཏུ་རྣལ་འབྱོར་གྱི་གདུལ་བྱ་ལ་ངེས་པ་སྟེར་ཏེ་སྔགས་བླ་མེད་ཀྱི་མཐར་ཐུག་གི་དོན་རྗེན་པར་སྟོན་པས་སོ། །འོན་ཀྱང་བརྗོད་མེད་ཀྱི་ཡེ་ཤེས་ནི་སེམས་ཀྱི་སྤྱོད་ཡུལ་དང་སྤྲོས་པ་ལས་འདས་པ་ཡིན་པ་ལ། དེ་བརྗོད་བྱའམ་སེམས་ཀྱི་སྤྱོད་ཡུལ་དུ་སྟོན་པ་ནི་རིག་འཛིན་བརྒྱུད་པའི་དགོངས་པའི་ཨ་ཏི་དེ་ནི་མིན་པར་ཤེས་པར་བྱའོ། །འདི་ལྟར་མ་རྟོགས་པར་ཨ་ཏི་ཡེ་ཤེས་ཡིན་གྱི་ཐེག་པ་མིན་ཞེས་༼དཔལ་ལྡན་ས་སྐྱ་པཎ་ཆེན་གྱི་དགོངས་པ་མ་རྟོགས་པར། རྫོགས་ཆེན་ཨ་ཏི་ཡོ་ག་ནི་ཡེ་ཤེས་ཡིན་གྱི་ཐེག་པ་མིན་ཟེར་བ་ཉོན་ཅིགཨ་ཏི་ཡོ་ག་ཡེ་ཤེས་ཡིན་ན། གཞིར་གནས་ཀྱི་ཡེ་ཤེས་ཤིག་ཁས་བླངས་ཟེར་ནས་དེ་ཡིན་ནམ། ལམ་དང་འབྲས་བུ་ཡེ་ཤེས་གང་ཡིན། དང་པོ་མ་ཡིན་པར་གསལ་ཞིང་གལ་ཏེ་འདོད་ནའང་སྟོང་ཉིད་ཐེག་པ་མིན་ཞེས་པ་འདྲ། དེ་བཤད་ཅི་དགོས། གཉིས་པ་ལྟར་ན་ལམ་ཡིན་ན་རྒྱུའི་ཐེག་པ་དང་། འབྲས་བུ་ཡིན་ན་འདིར་འདེགས་པའི་ཐེག་པ་ཡིན་པར་ཁས་བླངས་ནས་ཡེ་ཤེས་ལ་ཐེག་པ་མིན་པ་ཇི་ཞིག་འཇོགདེས་ན་འདི་རྒྱུད་སྡེ་བཞི་དང་དྲུག་ཏུ་འདོད་པའི་ཁྱད་པར་བཤད་པ་ཡིན་པར་སྔར་བཤད་ཟིན་པ་ལྟར་ཤེས་པར་གྱིས་ཤིགཧོ་ཧོ། མཆན། ༽མི་སྨྲ་སྟེ་ཡིན་ན་སློབ་མི་སློབ་ཀྱི་ཡེ་ཤེས་གང་ཡིན་ཀྱང་འབྲས་བུའི་ཐེག་པ་ཡིན་པས་ཚིག་དེ་རང་འགལ་བར་འགྲོའོ། །དེ་ལྟར་ཨ་ཏི་ཚིག་གི་ལམ་ལས་འདས་པ་ཡིན་ཅིང་བློ་འདས་ཀྱི་ཡེ་ཤེས་མཐར་ཐུག་ཡིན་ནའང་ད་ལྟ་ནས་ལམ་དུ་བྱེད་པའི་གཞུང་དང་མི་འགལ་ཏེ། སྟོང་པ་ཉིད་རྟོགས་པའི་ཡེ་ཤེས་མཚན་ཉིད་པ་འཕགས་རྒྱུད་ལ་ཡོད་པ་ཞིག་ནའང་། སོ་སྐྱེས་དེ་ལ་འཇུག་པའི་ཐབས་མེད་པ་ག་ལ་ཡིན། དེ་བཞིན་ཕར་ཕྱིན་ཐེག་པར་བཤད་པའི་མཐའ་བཞི་སྤྲོས་པ་ཐམས་ཅད་དང་བྲལ་བའི་སྟོང་ཉིད་ཀྱི་ངོས་ནས་གཞལ་ན། དེས་མ་ཁྱབ་པའི་ཆོས་ཉིད་མེད་པས། དེ་ལས་ལྷག་པའི་ལྟ་བ་ཞིག་ཡོད་ན་སྤྲོས་པ་ཅན་དུ་འགྱུར་ངེས་པའི་གཏན་ཚིགས་དོན་དུ་གནས་མོད། དབྱིངས་དེ་རྟོགས་པའི་ཡུལ་ཅན་ནམ། ཐབས་བདེ་བ་ཆེན་པོའི་ངོས་ནས་གཞལ་ན་སྔགས་ཀྱི་ལྟ་བ་ཆེས་འཕགས་ཏེ། ཡུལ་གྱི་གནས་ལུགས་དང་ཤིན་ཏུ་ཉེ་བའི་བློ་ཡིན་པས་སོ། །དེས་ན་གནས་ལུགས་རྟོགས་པའི་བློ་དེ་ལྟ་བ་མིན་ན་ཐབས་ཀྱི་སྒོ་ནས་སྔགས་ཀྱི་ཡེ་ཤེས་གནས་ལུགས་ལ་ཤིན་ཏུ་ཉེ་བར་འགྱུར་བའི་ཡེ་ཤེས་མིན་པར་སུས་ཀྱང་ཁས་ལེན་ནུས་ཞེས་གསུངས། ༈ །ཆོས་ཉིད་རྣམ་འབྱེད་ཀྱི་འགྲེལ་བ་ཡེ་ཤེས་སྣང་བ་རྣམ་འབྱེད་ལས། མཚན་ཉིད་ལ་འཇུག་པ་ནི་རྣམ་པ་གསུམ་གྱིས་ཤེས་པར་བྱ་སྟེ། ཆོས་ཉིད་རང་གི་ངོ་བོ་ལ་གནས་པའི་མཚན་ཉིད་དང་། དེ་ལ་སྣང་མེད་དུ་བཞག་པའི་མཚན་ཉིད་དང་། སྣང་བཅས་སུ་བཞག་པའི་མཚན་ཉིད་དོ། །དང་པོ་ཆོས་ཐམས་ཅད་ཀྱི་ཆོས་ཉིད་དེ་བཞིན་ཉིད་ལ་གནས་པ་ཉིད་ལས་ནི། གཟུང་འཛིན་གཉིས་སམ་ཡང་ན་བདེན་པ་གཉིས་སུ་བློས་དབྱེར་མེད་ཅིང་ངག་གིས་མཐའ་འམ་རྣམ་པ་གང་དུའང་བརྗོད་དུ་མེད་པའི་ཆོས་ཉིད་ལ་རབ་ཏུ་གནས་པའི་ཕྱིར་རོ། །དེ་ཡང་མཐར་ཐུག་པ་ནི་བདེན་གཉིས་དབྱེར་མེད་རོ་གཅིག་ཏུ་ཐུགས་སུ་ཆུད་པ་སངས་རྒྱས་ཀྱི་ཡེ་ཤེས་ཀྱིས་དེ་ཇི་ལྟ་བ་བཞིན་དུ་གཟིགས་ལ་སློབ་ལམ་ན་དེ་ཡི་རྗེས་སུ་མཐུན་པ་ཡོད་པའོ། །གཉིས་པ་མི་རྟོག་པའི་ཡེ་ཤེས་སྣང་བ་མེད་པ་ཉིད་ཐོབ་པ་ལས་འདི་ལྟར་རྟོག་མེད་དབང་ཤེས་ལ་གཟུང་འཛིན་གཉིས་སུ་སྣང་བ་དང་གཉིས་སྣང་དེ་ལ་དེར་ཞེན་ནས་རྟོག་པ་དང་བཅས་པའི་ཡིད་ཀྱིས་ཇི་ལྟར་སྣང་བ་དེ་ལ་དེ་དང་དེར་མངོན་པར་བརྗོད་པ་སྟེ། ནང་གི་བརྗོད་པའམ་ཡིད་ཀྱིས་གཟུང་འཛིན་དུ་རྟོག་པ་དང་། མིག་སོགས་ནང་གི་དབང་པོ་དང་། གཟུགས་སོགས་ཕྱི་ཡི་ཡུལ་དང་། མིག་གི་རྣམ་ཤེས་སོགས་རྣམ་པར་རིག་པ་དང་། ཐུན་མོང་སྣོད་ཀྱི་འཇིག་རྟེན་དུ་སྣང་བ་འདི་དག་ཐམས་ཅད་ནས་ཐམས་ཅད་དུ་ནུབ་སྟེ་མེད་པའི་ཕྱིར་དེ་གང་གིས་ཀྱང་ཁྱད་པར་བྱར་མེད་པས་དེ་བཞིན་ཉིད་རོ་གཅིག་ཏུ་སྣང་བ་ནི་སྟོང་པ་ཉིད་ལ་གཉིས་སྣང་ནུབ་པ་ཞེས་བྱའོ། །དེས་ན་བཤད་མ་ཐག་པའི་དོན་དྲུག་བསྟན་པ་འདིས་ནི་རིམ་པ་ལྟར་དབང་པོ་སོགས་ཀྱི་ཤེས་པས་བརྟག་ཏུ་མེད་པ། ངག་གིས་བསྟན་དུ་མེད་པ། ཤེས་པ་སྐྱེ་བའི་གནས་སམ་རྟེན་མེད་པ། ཡུལ་དུ་སྣང་བ་མེད་ཅིང་། ཡུལ་ཅན་རྣམ་པར་རིག་པ་མེད་པ། ཐུན་མོང་གི་རྟེན་སྣོད་ཀྱི་གནས་མེད་པ་ཞེས་བྱ་བ་སྟེ། ཚུལ་འདིས་རྣམ་པར་མི་རྟོག་པའི་ཡེ་ཤེས་ཀྱི་མཚན་ཉིད་བསྟན་པ་ཡིན་ནོ། །དེའི་ཕྱིར་སྣང་བ་དེ་དག་གི་རང་བཞིན་ལས་འདས་པའི་སྣང་བ་མེད་པའི་ཡེ་ཤེས་རང་འོད་གསལ་བ་ནམ་མཁའ་དང་མཉམ་པ་དེ་ལ་རྣམ་པར་མི་རྟོག་པའི་ཡེ་ཤེས་སྣང་བ་མེད་པ་ཞེས་བྱ་ལ། དེ་རང་གི་ངོ་བོ་ནི་རྣམ་པར་ཤེས་པ་ལས་འདས་པའི་ཡེ་ཤེས་ཡིན་ཏེ། འདུས་བྱས་འདུས་མ་བྱས་སོགས་ཀྱི་ཁམས་གང་དུའང་མ་གཏོགས་པའོ། །དེའི་ཕྱིར་དེའི་ངོ་བོ་ལ་སྣང་བ་དེ་དག་གིས་རིས་སུ་བཅད་པ་མེད་པ་སྟེ་ཆོས་ཉིད་དང་གཉིས་སུ་མེད་པར་རང་གསལ་བའོ། །ཇི་ལྟ་བ་རྟོགས་པའི་ཡེ་ཤེས་ཀྱི་ལྡོག་ཆ་ནས་བསྟན་ན་རྟག་ཏུ་འདིའི་ངང་ཚུལ་ལས་མ་གཡོས་བཞིན་དུ་ཇི་སྙེད་པའི་ཡེ་ཤེས་ཀྱི་སྣང་བ་ཐམས་ཅད་མཉམ་ལ་མ་འདྲེས་པར་གཟིགས་པ་འབྱུང་སྟེ་འགལ་མེད་ཟུང་གཅིག་ཏུ་རུང་ངོ་། །དེ་ཅིའི་ཕྱིར་ན་ཆོས་ཉིད་དེ་བཞིན་ཉིད་ཀྱི་ངང་དུ་ཆོས་ཐམས་ཅད་རོ་མཉམ་པ་ལས་མ་གཡོས་བཞིན་དུ་ཆོས་ཅན་ཐམས་ཅད་སྣང་བར་ཟད་ཀྱི་དེ་གཉིས་མི་འགལ་བ་བཞིན་དུ། ཆོས་ཉིད་གཟིགས་པའི་ཡེ་ཤེས་ཀྱི་རང་སྣང་ལ་སྣང་བ་མི་འགོག་པར་ཤར་ཀྱང་དེ་དང་དེར་དམིགས་པ་མེད་པའི་ཆ་ནས་གོང་གི་སྣང་མེད་དུ་བསྟན་པའི་དོན་ཡོངས་སུ་རྫོགས་པ་ཡིན་ཏེ་ཐ་མལ་པའི་རང་བཞིན་ལས་འདས་པའི་ཕྱིར་རོ། །འདི་ཤིན་ཏུ་གལ་ཆེ་བའི་ཟབ་དོན་དེ་འཕྲོས་སུ་བཤད་པའོ། །གསུམ་པ་སྣང་བ་ལས་ནི་ཇི་ལྟར་ན་མཉམ་བཞག་ཏུ་ནི་ཆོས་ཐམས་ཅད་རོ་མཉམ་པར་དེ་བཞིན་ཉིད་ཀྱི་ངོ་བོས་དམིགས་པར་བྱར་མེད་པ་དཔེར་ན་ནམ་མཁའི་དཀྱིལ་ལྟར་མཉམ་པ་ཉིད་དུ་སྣང་བའི་ཕྱིར་རོ། །མཉམ་བཞག་དེ་ལྟ་བུའི་རྗེས་ལས་ཐོབ་པའི་ཡེ་ཤེས་ཀྱིས་ནི་འདུ་བྱེད་པའི་ཆོས་ཐམས་ཅད་ཅི་དང་གང་སྣང་བ་མ་ལུས་པ་སྣང་ཡང་རང་བཞིན་མ་གྲུབ་པའི་སྒྱུ་མ་དང་སྨིག་རྒྱུ་དང་རྨི་ལམ་ལ་སོགས་པ་ལྟར་སྣང་བ་ཡིན་པའི་ཕྱིར་རོ། །མཉམ་རྗེས་མེད་པར་ཟུང་གཅིག་ཏུ་ཆུད་པ་མཐར་ཐུག་པ་ནི་སངས་རྒྱས་ཀྱི་སར་འབྱུང་ཞིང་རྗེས་མཐུན་པ་འཕགས་པའི་ས་དང་། ཆ་འདྲ་བ་སྔགས་ལམ་གྱི་དཔེ་ཡི་ཡེ་ཤེས་རྒྱུད་ལ་སྐྱེས་པ་ན་ཡང་འབྱུང་སྟེ་ཐབས་ཟབ་པའི་ཕྱིར་རོ། །ཚུལ་འདིས་མཐར་ཐུག་སངས་རྒྱས་ཀྱིས་ཇི་ལྟ་ཇི་སྙེད་ཀྱི་ཡེ་ཤེས་རྣམ་པ་གཉིས་པོས་གཟིགས་ཚུལ་དང་སློབ་ལམ་དུ་མཉམ་བཞག་སྣང་བཅས་སྣང་མེད་མི་འགལ་བའི་གནད་ཤེས་དགོས་པས་ཤིན་ཏུ་གལ་ཆེ་བའི་ཕྱིར་འཕྲོས་དོན་དང་བཅས་ཏེ་བཤད་པ་ཡིན་ནོ། །ཞེས་སོ། ༈ །འགའ་ཞིག་གིས་ཀྱང་ཆོས་དབྱིངས་ལ་མཉམ་པར་བཞག་བཞིན་པའི་རང་དུས་ལ་རྟེན་འབྲེལ་གྱི་སྣང་བ་མ་འགགས་ན་སྣང་བཅས་སྣང་མེད་གཉིས་ཀ་ཡིན་པར་བཞེད། སྣང་བཅས་ནི་རྟེན་འབྲེལ་གྱི་སྣང་བ་མ་འགགས་པའོ། །ཀུན་ཏུ་འོད་ཀྱི་ས་ལ་བློ་སྦྱོང་བའི་ཕྱིར་དེ་བཞིན་ཉིད་ཀྱི་ཏིང་ངེ་འཛིན་རྣམ་པར་མི་རྟོག་པ་སྒོམ་པ་དང་། པདྨ་ཅན་གྱི་ས་ལ་གོམས་པར་བྱ་བའི་ཕྱིར་ཀུན་ཏུ་སྣང་བའི་ཏིང་ངེ་འཛིན་ཤེས་རབ་དང་སྙིང་རྗེ་འབྲེལ་བ་དང་། ཡི་གེ་འཁོར་ལོ་ཚོགས་ཆེན་གྱི་ས་ལ་གོམས་པར་བྱ་བའི་ཕྱིར་རྒྱུའི་ཏིང་ངེ་འཛིན་ཡིག་འབྲུ་སྒོམ་པ་སྟེ་ཏིང་ངེ་འཛིན་རྣམ་པ་གསུམ་རིམ་གྱིས་བསྐྱེད་པའོ། །དེ་ཡང་འཆི་བའི་འོད་གསལ་ཆོས་སྐུར་ལམ་དུ་འཁྱེར་བ་སྟོང་པ་ཆེན་པོ། བར་དོའི་རླུང་སེམས་ལོངས་སྐུར་འཁྱེར་བ་སྙིང་རྗེ་སྒྱུ་མ། སྐྱེ་སྲིད་རགས་པ་འཁོར་བཅས་སྤྲུལ་སྐུར་སྦྱོང་བྱེད་ལ། དྲི་ཟ་མངལ་དུ་ཞུགས་པ་ནས་ཕྱིར་བཙས་པའི་བར་དང་མཐུན་པ་ཕྱག་རྒྱ་གཅིག་པ། བཙས་ནས་བུ་ཚ་འཁོར་འདབ་རྒྱས་པའི་བར་དང་མཐུན་པ་ཕྱག་རྒྱ་སྤྲོས་བཅས། ནར་སོན་ནས་བཅད་རིས་དང་ཁས་གྲགས་སྒྲུབ་པ་དང་མཐུན་པ་ཚོམ་བུ་ཚོགས་སྒྲུབ་བོ། །༈ སྟོང་པ་ཆེན་པོ་དེ་བཞིན་ཉིད་ཀྱི་ཏིང་ངེ་འཛིན་གྱིས། དང་པོར་ལྟ་བས་ཐག་བཅད་པས། བསྐྱེད་རྫོགས་རང་རྒྱུད་དུ་མི་ཞེན་པའི་དགོས་པ་ཡོད་ཅིང་། སངས་རྒྱས་པའི་ཚེ་ཆོས་སྐུའི་ངང་ལས་གཟུགས་སྐུ་འཆར་བའི་གཞིར་འགྱུར་བས་དེའི་རྟེན་འབྲེལ་མངོན་དུ་བྱེད་པ་དང་། ལམ་ཡེ་ཤེས་ཀྱི་ཚོགས་རྫོགས་པའི་དགོས་པ་ཡོད་དོ། །ཀུན་སྣང་གི་ཏིང་ངེ་འཛིན་གྱིས་སྟོང་པའི་མཐར་ཞེན་པ་ལས་གྲོལ་ཞིང་། ཐབས་སྙིང་རྗེ་ཆེན་པོས་སྒོམ་པ་ལམ་དུ་བྱེད་པས་བསོད་ནམས་ཀྱི་ཚོགས་རྫོགས་པ་དང་། སངས་རྒྱས་པའི་ཚེ་འོག་མིན་གྱི་ཞིང་ཁམས་རྒྱ་དང་བྲལ་བའི་རང་བཞིན་མངོན་དུ་བྱེད་པའི་དགོས་པ་ཡོད་དོ། །རྒྱུའི་ཏིང་ངེ་འཛིན་ཡི་གེའི་སྤྲིན་ལས་ཕྱག་རྒྱ་གཅིག་པའི་བར་བསྒོམས་པས། ཐབས་དང་ཤེས་རབ་ཟུང་དུ་འབྲེལ་ཞིང་རྟག་ཆད་ཞེན་པའི་མཐའ་ལས་འདས་པས་ལམ་རང་གི་ངོ་བོ་གཉིས་སུ་མེད་པ་དང་། སངས་རྒྱས་པའི་ཚེ་འོག་མིན་གྱི་དཀྱིལ་འཁོར་ལོངས་སྐུ་རང་གི་ངོ་བོ་ལས་མཆེད་པ་ཡོངས་སུ་རྫོགས་པའི་རང་བཞིན་གཙོ་བོ་ལྷུན་གྱིས་གྲུབ་པ་རྟེན་འབྲེལ་མངོན་དུ་བྱེད་པའི་དགོས་པ་ཡོད་དོ། །ཡེ་ཤེས་དྲྭ་བའི་ཏིང་ངེ་འཛིན་གྱིས། དཀྱིལ་འཁོར་གྱི་རྒྱན་དང་བཀོད་པ་དང་། འོད་ཟེར་དང་འཕྲོ་འདུ་དང་། འཁོར་གྱི་རོལ་པ་དཔག་ཏུ་མེད་པ་རྫོགས་ལ། ཕྱག་རྒྱ་སྤྲོས་པའི་ཏིང་ངེ་འཛིན་གྱིས་འོག་མིན་གྱི་ལོངས་སྤྱོད་ཆེན་པོ་སྤྲུལ་པའི་སྐུ་འཕྲོ་གཞི་རྫོགས་པ་དང་། ལམ་ཡེ་ཤེས་དང་སྟོང་པ་ཆེན་པོའི་ཚོགས་གཉིས་ལྷུན་གྱིས་རྫོགས་པའི་དགོས་པ་དམ་པ་འགྲུབ་བོ། །བར་ཆད་མེད་པའི་ཚོགས་བསྒྲུབས་པས་བསྐྱེད་རྫོགས་ཀྱི་ནུས་པ་འབྱིན་ཞིང་རིག་འཛིན་གྱི་སྒྲུབ་པ་ལ་དངོས་སུ་བར་ཆད་མེད་པར་སྦྱོར་བའི་དགོས་པ་ཡོད་དོ། །དེ་དག་རིམ་གྱིས་སྒོམ་པའི་ཚེ་ལམ་གྱི་རྫོགས་ཚུལ་ཡང་། དེ་བཞིན་ཉིད་ནི་ཚོགས་ལམ་ཆུང་ངུ། ཀུན་ཏུ་སྣང་ཚོགས་ལམ་འབྲིང་། རྒྱུའི་ཕྱག་རྒྱ་གཅིག་སྤྲོས་ཚོགས་ལམ་ཆེན་པོ། ཡེ་ཤེས་དྲྭ་བའི་ཕྱག་རྒྱ་རྣམས་སོ། །སྦྱོར་ལམ་དྲོད་དང་། རྩེ་མོ། བར་ཆད་མེད་པ། བཟོད་པ་དང་། ཆོས་མཆོག་ཆེན་པོ་མཐར་ཐུག་པའི་ཡེ་ཤེས་རྫོགས་སོ། །འདི་དག་ལམ་ཟག་པ་དང་བཅས་པ་སྟེ་འཇིག་རྟེན་པའི་ལམ་ཡིན་པའི་ཕྱིར་རོ། ༈ །ཚོགས་ལམ་རྫོགས་པའི་རྟགས་སངས་རྒྱས་མཆོག་གི་སྤྲུལ་སྐུ་མཐོང་བ་ལ་སོགས་པའོ། ༈ །བར་ཆད་མེད་པའི་སྐབས་སུ་རྣམ་སྨིན་རིག་འཛིན་ཐོབ་པའོ། །དེ་བཞིན་ཉིད་ཀྱི་འབྲས་བུ་ནི་དངོས་སུ་དོན་དམ་རྟོགས་པ་དང་། བརྒྱུད་ནས་ཆོས་སྐུ་ཐོབ་པའོ། །ཡེ་ཤེས་སྒྱུ་མའི་འབྲས་བུ་ནི་དངོས་སུ་ཀུན་རྫོབ་ཀྱི་བདེན་པ་རྟོགས་པ་དང་བརྒྱུད་ནས་ལོངས་སྐུ་ཐོབ་པའོ། །ཕྱག་རྒྱ་གཅིག་པའི་འབྲས་བུ་ནི། དངོས་སུ་བདེན་པ་དབྱེར་མེད་རྟོགས་པ་དང་བརྒྱུད་ནས་ཡི་གེ་འཁོར་ལོ་ཚོགས་ཆེན་གྱི་ས་ཐོབ་པའོ། །ཕྱག་རྒྱ་སྤྲོས་བཅས་ལ་དབྱེ་ན་ཞི་ཁྲོ་གཉིས་ལས་རེ་རེ་ལའང་དཀྱིལ་འཁོར་ཚོམ་བུ། གྲངས། ཞལ་ཕྱག་དང་བཞི་ལས། དང་པོ་ཞི་དཀྱིལ་ལ་བསྡུས་འབྲིང་རྒྱས་པའོ། །ཚོམ་བུ་ལ་བསྡུས་འབྲིང་རྒྱས་པའོ། །གྲངས་ལ་དང་པོ་རིགས་གསུམ་སློབ། དེ་ནས་རིགས་ལྔ། དེ་ནས་བཞི་བཅུ་རྩ་གཉིས་ལ། དེ་ནས་སངས་རྒྱས་སྟོང་གི་དཀྱིལ་འཁོར་ལ། དེ་ནས་ཉི་ཁྲི་ཆིག་སྟོང་ལ། དེ་ནས་བསམ་ཡས་ལྷུན་གྲུབ་ལ་སློབ་པ་སྟེ་སྣང་སྲིད་ཐམས་ཅད་ལྷ་ཡི་དཀྱིལ་འཁོར་དུ་གསལ་བར་བསྒོམ་མོ། །ཞལ་ཕྱག་ལ། དང་པོ་ཞལ་གཅིག་ཕྱག་གཉིས་ལ་སློབ་བོ། །དེ་ནས་ཚོམ་བུའི་ལྷ་ཐམས་ཅད་ཞལ་གསུམ་ཕྱག་དྲུག་པར་སློབ་བོ། །གཉིས་པ་ཁྲོ་བོའི་དཀྱིལ་འཁོར་ལ་བཞི་ལས། དང་པོ་དཀྱིལ་འཁོར་ལ་བསྡུས་འབྲིང་རྒྱས་པའོ། །ཚོམ་བུ་ལའང་བསྡུས་འབྲིང་རྒྱས་པའོ། །གྲངས་ལ་དང་པོ་ཁྲོ་བོ་རིགས་ལྔ་ལ་བསླབ། དེ་ནས་བརྒྱ་རྩ་བརྒྱད་ལ་བསླབ། དེ་ལ་བརྟེན་ནས་བྷུདྡྷུ་ཧེ་རུ་ཀ་ཡབ་ཡུམ་ལ་ཡན་ལག་གི་ལྷ་ཐབས་ཀྱི་ཧེ་རུ་ཀ་ལྔ་བཅུ་རྩ་བརྒྱད། དེ་ལ་དབུ་རྒྱན་ལྔ་ལྔ་བྱས་པས། ཡན་ལག་གི་ལྷ་ཉིས་བརྒྱ་དང་དགུ་བཅུ་ལ་བསླབ་པའོ། །དེ་ལས་ཀྱང་སྤྲོས་ན་རྩ་བ་ཧེ་རུ་ཀ་ཡབ་ཡུམ་ལ་ཡན་ལག་གི་ལྷ་ལྔ་བཅུ་རྩ་བརྒྱད་བསྒོམས་ཏེ། ཐབས་ཀྱི་ལྷ་ལྔ་བཅུ་རྩ་བརྒྱད་དེའི་སྙིང་ཁར་ཤེས་རབ་ཀྱི་ལྷ་ཕར་བཞག་པའི་ཐབས་ཀྱི་ལྷ་ལ་སྐུ་གསུང་ཐུགས་ཀྱི་ལྷ་གསུམ་གསུམ་བསྒོམ་པས་བརྒྱ་བདུན་ཅུ་རྩ་བཞི། དེ་ལ་དབུ་རྒྱན་རིགས་ལྔ་ལྔབསྒོམས་པས་སྐུ་གསུང་ཐུགས་ཀྱི་ལྷའི་དབུ་རྒྱན་བརྒྱ་བདུན་ཅུ་ཚན་པ་གསུམ་དང་། ཐབས་ཀྱི་ལྔ་བཅུ་རྩ་བརྒྱད་ལ་ཉིས་བརྒྱ་དགུ་བཅུ་སྟེ། དབུ་རྒྱན་གྱི་ལྷ་ཉིས་སྟོང་དགུ་བཅུའོ། །དེ་ཐམས་ཅད་བསྡོམས་པས་སུམ་སྟོང་ཆིག་བརྒྱ་དང་དགུ་བཅུ་ཡོད་དོ། །ཞལ་ཕྱག་ནི་གཙོ་བོ་དབུ་ཕྱག་གྲངས་མེད་དང་དབུ་དགུ་ཕྱག་བཅོ་བརྒྱད་པ། འཁོར་གྱི་མ་མོ་རྣམས་ཀྱང་ཞལ་གསུམ་ཕྱག་དྲུག་པ་སོགས་རྒྱུད་ནས་མ་བཤད་ཀྱང་བརྒྱུད་པའི་ཕྱག་བཞེས་སུ་རྒྱས་པ་ལ་རིགས་ལྔ་དང་། འབྲིང་པོ་ལ་གཙོ་བོ་ཙམ་ཞལ་གསུམ་ཕྱག་དྲུག་པ་དང་། བསྡུས་པ་ཐམས་ཅད་ཞལ་གཅིག་ཕྱག་གཉིས་པའོ། །འབྲས་བུ་ནི་དངོས་སུ་བར་ཆད་མེད་པ་ལ་སྦྱོར་ལ་བརྒྱུད་ནས་ཡི་གེ་འཁོར་ལོའི་ས་ཐོབ་པའོ། །བར་ཆད་མེད་པའི་ལམ་ཚོགས་སྒྲུབ་ཀྱི་འབྲས་བུ་ནི་དངོས་སུ་མཐོང་ལམ་ལ་སྦྱོར་ལ་བརྒྱུད་ནས་ཡི་གེ་འཁོར་ལོའི་ས་ཐོབ་པའོ། ༈ །རྡོ་གྲུབ་རིན་པོ་ཆེས། རྫོགས་ཆེན་དང་བསྟུན་ནས་བསྐྱེད་རིམ་ཏིང་འཛིན་རྣམ་གསུམ་སྒོམ་དུས། དེ་ཏིང་ཀ་དག་གཞིའི་སྐབས། ཀུན་སྣང་རང་བཞིན་ལྷུན་གྲུབ་གཞི་སྣང་གི་ཡེ་ཤེས། རྒྱུ་ཏིང་ཀ་དག་ལྷུན་གྲུབ་ཟུང་འཇུག་ཐུགས་རྗེའི་རིག་པ་ཤེས་རབ་ཀྱི་ཆ་ཐམས་ཅད་ཐོད་རྒལ་བའི་རྡོ་རྗེ་ལུ་གུ་རྒྱུད་དུ་འོང་རྒྱུ་དེ་རེད། དཀྱིལ་འཁོར་ལྷ་བསྐྱེད་པ་ཤེས་རབ་སྐུར་སྨིན་པའི་ཞིང་སྐུ་ཕོ་བྲང་སོགས་ལ་སྦྱོར་སྙམ། ཤེས་རབ་སྐུར་སྨིན་པ་འདི་ལ་སྤྲུལ་སྐུ་ལོངས་སྐུ་གཉིས་ཀ་ཡོད་པས་སྒྱུ་འཕྲུལ་ལྟར་ལྷ་བསྐྱེད་ཀྱི་ལྷ་སོ་དྲུག་ཆོས་སྐུ་ལོངས་སྐུ་དྲུག་སྤྲུལ་སྐུར་བྱས་ནས་སྒོམ་པ་ལྟ་བུར་ཡང་སྦྱར་བཏུབ་གསུང་། རིམ་ལྔ་ལ། སྤྱིར་སྔོན་འགྲོ་དབེན་པ་གསུམ། དངོས་གཞི་བདེན་པ་གཉིས། འབྲས་བུ་ཟུང་འཇུག་རྣམས་སུ་འདུ་བ་ལས། དང་པོ་ལ། ལུས་དབེན་ངག་དབེན་ཡིད་དབེན་གསུམ། གཉིས་པ་ལ་ཀུན་རྫོབ་སྒྱུ་ལུས་དང་། དོན་དམ་འོད་གསལ་གཉིས། གསུམ་པ་འབྲས་བུ་ཟུང་འཇུག་ནི་འོད་གསལ་དེ་ཡི་ངང་ལས་སྒྱུ་ལུས་ཀྱི་ལྷ་སྐུར་ལྡང་བ་སྣང་སྟོང་ཟུང་དུ་འཇུག་པ་གང་ཡིན་པའོ། །དེ་དག་གི་སྒྲ་བཤད་ནི། ལུས་དབེན་ཆོས་ཅན། ཁྱོད་ལ་ལུས་དབེན་ཞེས་བརྗོད་པའི་རྒྱུ་མཚན་ཡོད་དེ། དབེན་གཞིའི་ལུས་རང་རྒྱུད་ཀྱི་བསྡུས་པའི་ཕུང་ཁམས་སྐྱེ་མཆེད་སོགས་ལ་རྫོགས་རིམ་པའི་བདེ་སྟོང་གི་རྒྱབ་བཏབ་ནས་ཐ་མལ་གྱི་སྣང་ཞེན་ལས་དབེན་པར་བྱས་ཏེ། དག་པ་ལྷའི་རྣམ་པར་ཤར་བའི་རྣལ་འབྱོར་ཡིན་པས་ལུས་དབེན་ཞེས་བརྗོད། ངག་དབེན་ཆོས་ཅན། ཁྱོད་ལ་ངག་དབེན་ཞེས་བརྗོད་པའི་རྒྱུ་མཚན་ཡོད་དེ། ངག་གི་རྩ་བ་ཤིན་ཏུ་ཕྲ་བའི་རླུང་ཐ་མལ་དུ་རྒྱུ་བ་ལས་དབེན་པར་བྱས་ཏེ་རླུང་སྔགས་དབྱེར་མེད་དུ་སྦྱོར་བའི་རྣལ་འབྱོར་ཡིན་པས་ན་ངག་དབེན་ཞེས་བརྗོད། སེམས་དབེན་ཆོས་ཅན། ཁྱོད་ལ་སེམས་དབེན་ཞེས་བརྗོད་པའི་རྒྱུ་མཚན་ཡོད་དེ། འཁོར་འདས་ཀུན་གྱི་རྩ་བ་སེམས་ཀུན་རྟོག་བཞོན་པའི་རླུང་དང་བཅས་པ་ལས་དབེན་པར་བྱས་ཏེ་བདེ་སྟོང་དབྱེར་མི་ཕྱེད་པའི་ངོ་བོར་ཤར་བའི་རྣལ་འབྱོར་ཡིན་པས་ན་སེམས་དབེན་ཞེས་བརྗོད། སྒྱུ་ལུས་ཆོས་ཅན། ཁྱོད་ལ་སྒྱུ་ལུས་ཞེས་བརྗོད་པའི་རྒྱུ་མཚན་ཡོད་དེ། སྒྱུ་མ་ལ་སོགས་པའི་དཔེ་བཅུ་གཉིས་ཀྱིས་མཚོན་པའི་ཤིན་ཏུ་ཕྲ་བའི་རླུང་སེམས་ཙམ་གྱིས་ལྷ་སྐུའམ་ལུས་ཡིན་པས་ན་སྒྱུ་ལུས་ཞེས་བརྗོད། དོན་དམ་འོད་གསལ་ཆོས་ཅན། ཁྱོད་ལ་འོད་གསལ་ཞེས་བརྗོད་པའི་རྒྱུ་མཚན་ཡོད་དེ། ཡུལ་ཅན་ལྷན་སྐྱེས་ཀྱི་བདེ་བས་ཡུལ་དོན་དམ་བདེན་པ་འོད་གསལ་མངོན་དུ་གྱུར་པའི་སྒོ་ནས་ཀུན་རྫོབ་ཀྱི་སྤྲོས་པ་མ་ལུས་པ་ནུབ་པའི་ཡེ་ཤེས་ཡིན་པས་ན་དོན་གྱི་འོད་གསལ་ཞེས་བརྗོད། ༈ ཆོས་དྲུག་ནི། གཏུམ་མོ་བདེ་དྲོད་རང་འབར། སྒྱུ་ལུས་ཆགས་སྡང་རང་གྲོལ། འོད་གསལ་གཏི་མུག་རང་སངས། རྨི་ལམ་ཉིང་འཁྲུལ་རང་དག །འཕོ་བ་མ་བསྒོམ་འཚང་རྒྱ། བར་དོ་རྒྱལ་བ་ལོངས་སྐུ་དང་དྲུག་ཡིན་ཏེ། རྗེ་མར་པ་ལ། དཔལ་ནཱ་རོ་པས། ཕྱི་ནི་སྒྱུ་མ་ལྷ་ཡི་སྐུ། །ནང་ན་རྩ་གསུམ་འཁོར་ལོ་བཞི། །འོག་ན་ཨ་ཤད་ཙཎྚཱ་ལི། །སྟེང་ན་ཧཾ་ཡིག་རྣམ་པ་ཅན། །སྟེང་འོག་རླུང་གི་འཁོར་ལོ་ནི། །སྲོག་རྩོལ་བུམ་ཅན་ཉམས་ལེན་གྱིས། །བར་ན་བདེ་སྟོང་གསལ་བའི་ཉམས། །མིང་ཡང་གཏུམ་མོའི་གདམས་ངག་ཟེར། །རླུང་གནད་དུ་ཆུད་དམ་ལོ་ཙཱ་བ། །ཕྱི་ན་སྣང་བ་སྒྱུ་མ་ཙམ། །ནང་ན་ཉམས་མྱོང་སྨྲ་མ་བཏུབ། །ཉིན་མཚན་སྣང་བ་སྤྲུལ་པའི་སྐུ། །མིང་ཡང་སྒྱུ་ལུས་ཀྱི་གདམས་ངག་ཟེར། །ཞེན་པ་ལོག་གམ་ལོ་ཙཱ་བ། །རྨི་ལམ་ཉམས་ཀྱི་འཁྲུལ་པའི་དུས། །མགྲིན་པར་ༀ་ཡིག་འོད་ཟེར་ཅན། །དྲན་འདུན་བག་ཆགས་ཀྱི་མཚམས་སྦྱོར་ལས། །སྐྱེས་པ་རྨི་ན་ཕོ་འདྲེ་ཟེར། །བུད་མེད་རྨི་ན་མོ་འདྲེ་ཟེར། །བྱོལ་སོང་རྨི་ན་ཀླུ་རུ་འཛིན། །དགའ་བ་རྨི་ན་སེམས་སངས་བསྐྱེད། །མི་དགའ་རྨི་ན་སྙིང་མི་དགའ། །འདྲེ་སེམས་ཀྱི་རྩ་བར་མ་ཤེས་ན། །རྣམ་རྟོག་གི་འདྲེ་ལ་ཟད་པ་མེད། །བཟང་ངན་རང་གྲོལ་སྟོན་པའི་དོན། །མིང་ཡང་རྨི་ལམ་གྱི་གདམས་ངག་ཟེར། །རང་བཞིན་ཤེས་སམ་ལོ་ཙཱ་བ། །གཉིད་དང་རྨི་ལམ་བར་ཞིག་ན། །གཏི་མུག་ཆོས་སྐུའི་ངོ་བོ་ཅན། །བརྗོད་མེད་འོད་གསལ་བདེ་བའི་ཉམས། །རྗེས་ལ་འོད་གསལ་རྒྱ་ཡིས་ཐེབས། །རྨི་ལམ་འོད་གསལ་འཐུག་པོ་ཉིད། །མིང་ཡང་འོད་གསལ་གྱི་གདམས་ངག་ཟེར། །སེམས་སྐྱེ་མེད་དུ་རྟོགས་སམ་ལོ་ཙཱ་བ། །སྒོ་བརྒྱད་འཁོར་བའི་སྐར་ཁུང་ཅན། །སྒོ་གཅིག་ཕྱག་རྒྱ་ཆེན་པོའི་ལམ། །སྒོ་བརྒྱད་བཅད་ནས་སྒོ་གཅིག་འབྱེད། །སེམས་ཀྱི་མདའ་ལ་རླུང་གི་གཞུ། །ཧིཀ་གི་རྒྱུད་ཀྱིས་རབ་བསྐུལ་ནས། །རྣམ་ཤེས་ཚངས་པའི་ལམ་ནས་འཕེན། །མིང་ཡང་འཕོ་བའི་གདམས་ངག་ཟེར། །རླུང་དུས་སུ་ཁེགས་སམ་ལོ་ཙཱ་བ། །རང་ལུས་དུས་ཀྱི་ཚད་ཕེབས་ལ། །གཞན་ལུས་མཚན་ལྡན་དམ་པའི་ཡུལ། །བར་ན་ཡིག་འབྲུ་རླུང་གི་རྟ། །རྟེན་འབྲེལ་རླུང་གི་འཁོར་ལོ་ཡིས། །རང་ལུས་ཁང་སྟོང་བཞིན་དུ་བོར། །གཞན་ལུས་སྤྲུལ་སྐུའི་ངོ་བོ་ཅན། །མིང་ཡང་གྲོང་འཇུག་གི་གདམས་ངག་ཟེར། །རླུང་ལས་སུ་རུང་ངམ་ལོ་ཙཱ་བ། །རྨི་ལམ་དུས་ཀྱི་ཤེས་པ་དེ། །བར་དོའི་སེམས་དང་བསྲེ་དགོས་པས། །ལོངས་སྤྱོད་རྫོགས་སྐུའི་ངོ་བོ་ཅན། །དག་དང་མ་དག་གཟུགས་སྐུ་གཉིས། །བར་དོའི་དུས་སུ་ཟིན་ཡང་འཚལ། །རྨི་ལམ་བར་དོ་བསྲེ་འཕོའི་གནད། །མིང་ཡང་བར་དོའི་གདམས་ངག་ཟེར། །བར་དོ་འབྱོངས་སམ་ལོ་ཙཱ་བ། །ཞེས་པ་ལྟར། དང་པོ་ལམ་གྱི་རྩ་བ་གཏུམ་མོ་ལ་གསུམ་ལས། ལུས་ཀྱི་གཏུམ་མོ་ནི། ལུས་ཀྱི་བྱེད་བཅིངས་ཏེ་ཆོས་བདུན། ངག་གི་བྱེད་བཅིངས་རླུང་ཁ་སྦྱོར། སེམས་ཀྱི་བྱེད་བཅིངས་གཏུམ་མོ་འབར་འཛག་བསྒོམ་པ་སོགས་སོ། །ཉམས་ཀྱི་གཏུམ་མོ་ནི། རླུང་སེམས་དབུ་མར་འདུས་པའི་རྟགས་དུ་བ་སོགས་སྣང་ཞིང་བདེ་སྟོང་གི་ཉམས་སྐྱེ་བའོ། །མཆོག་གི་གཏུམ་མོ་ནི། སྣང་གསུམ་གྱིས་དྲངས་པའི་འོད་གསལ་མངོན་དུ་འགྱུར་པའོ། །གཉིས་པ་ལམ་གྱི་གཞི་མ་སྒྱུ་ལུས་ལའང་མ་དག་པའི་སྒྱུ་ལུས་ནི། ཕྱི་ནང་གི་སྣང་བ་ཐམས་ཅད་སྒྱུ་མ་ལྟར་བསྒོམ་པའོ། །དག་པའི་སྒྱུ་ལུས་ནི། སྣང་བ་ཐམས་ཅད་ལྷ་སྐུ་སྒྱུ་མ་ལྟར་བསྒོམ་པའོ། སྦས་དོན་རླུང་སེམས་ཀྱི་སྒྱུ་ལུས་ནི། རླུང་སེམས་ཙམ་ལས་གྲུབ་པའི་སྒྱུ་མ་ལྟ་བུའི་ལྷ་སྐུའོ། །གསུམ་པ་ལམ་གྱི་དྲོད་ཚད་རྨི་ལམ་ནི། རྨི་ལམ་ངོ་ཤེས་ནས་སྤྲུལ་བསྒྱུར་བྱེད་པ་དང་། དག་མ་དག་གི་ཞིང་ཉུལ་བ་དང་། འོད་གསལ་ལ་འཇུག་ལྡང་བྱས་ཏེ་མཐར་རྨི་ལམ་དབྱིངས་སུ་དག་པའོ། །བཞི་པ་ལམ་གྱི་སྙིང་པོ་འོད་གསལ་ནི། རང་ལུས་དང་གཞན་ལུས་གང་རུང་ལ་བརྟེན་ནས་སྟོང་བཞིའམ་དགའ་བཞིས་དྲངས་པའི་འོད་གསལ་རྒྱུད་ལ་སྐྱེ་བའོ། །ལྔ་པ་ལམ་གྱི་བསུན་མ་བར་དོ་ནི། རབ་འཆི་སྲིད་ཆོས་སྐུའི་འོད་གསལ་ངོས་ཟིན་པ་དང་། འབྲིང་སྲིད་པའི་བར་དོར་སྒྱུ་མའི་ལྷ་སྐུར་ལྡང་བ་དང་། ཐ་མ་མངལ་སྒོ་བཟང་པོ་འདམ་པ་སོགས་སོ། །དྲུག་པ་ལམ་གྱི་བློ་ཆོད་འཕོ་བ་ནི། ཐིམ་རིམ་མགོ་རྩོམ་པའི་དུས་འོད་ཀྱི་གོང་བུས་འཕོ་བ་དང་། སྒྲ་ཡིས་འཕོ་བ་སོགས་ཀྱིས་རྣམ་ཤེས་དག་པའི་ཞིང་དུ་འཕོ་བའོ། ༈ །སྦྱོར་བ་དྲུག་ནི། སྔོན་འགྲོ་ལྟོས་མེད་བཞི་ལྡན་ནམ། དབེན་པ་གསུམ་ལྡན་བྱས་ནས། ཉིན་མོ་སྤྲིན་བྲལ་གྱི་ནམ་མཁའ་འམ་མཚན་མོ་གསེང་མེད་ཀྱི་མུན་པར་བྱེད་བཅིངས་གི་སྒོ་ནས་སྨིན་མཚམས་ཀྱི་ནམ་མཁའ་དང་། རང་སེམས་དབྱེར་མེད་ལྷན་ནེར་བཞག་པས་སྒོ་ལྔའི་ཤེས་པ་ཡུལ་ལ་འཕྲོ་བ་སྡུད་ནས་ལས་རླུང་དབུ་མར་འཇུག་པའི་རྟགས་དུ་བ་སོགས་བཅུ་གསུམ་རྫོགས་པར་མཐོང་བ་སོར་སྡུད་དོ། །སྔར་སོར་སྡུད་ཀྱིས་གྲུབ་པའི་སྟོང་གཟུགས་མངོན་དུ་གྱུར་ནས་ཡུལ་སེམས་གཉིས་སུ་མེད་པའི་མཉམ་བཞག་སྐྱེས་པ་བསམ་གཏན། དེ་ནས་གཡས་གཡོན་དང་སྟེང་འོག་གི་རླུང་གཅིག་ཏུ་བསྲེས་པ་སྲོག་རྩོལ། འཁོར་ལོ་བཞིའི་རླུང་སེམས་ལས་སུ་རུང་སྟེ་གཟུང་འཛིན་དབུ་མར་ཐིམ་པ་འཛིན་པ། དེ་ནས་ལས་དང་ཡེ་ཤེས་ཕྱག་རྒྱ་ཆེན་པོ་གསུམ་གང་རུང་ལ་བརྟེན་ནས་དགའ་བཞིའི་ཉམས་མྱོང་འདྲེན་པ་རྗེས་དྲན། མི་འགྱུར་བའི་བདེ་བ་དང་། རྣམ་ཀུན་མཆོག་ལྡན་གྱི་སྟོང་པ་ཉིད་ཟུང་དུ་འཇུག་པའི་ཉམས་མྱོང་ཁྱད་པར་ཅན་ཏིང་འཛིན། ༈ དེ་ཡང་སྟོང་པ་བཞི་ནི། རྙིང་མ་བ་ལྟར་ན། དང་པོ་རྣམ་ཤེས་སྣང་བ་ལ་ཐིམ་པའི་སྐབས་སུ་ཞེ་སྡང་གི་རྟོག་པ་སོ་གསུམ་འགགས། ཕྱི་རྟགས་སུ་སྟོན་གནམ་ཟླ་འོད་ཀྱིས་བསླད་པ་ལྟར་དཀར་ལམ་པའི་སྣང་བ་དང་། ནང་རྟགས་སུ་གསལ་བའི་ཉམས་མཐའ་དབུས་མེད་པར་འཆར་ཏེ་སྟོང་པ་ཞེས་བྱ། དེ་ནས་སྣང་བ་མཆེད་པ་ལ་ཐིམ་པས་འདོད་ཆགས་ཀྱི་རྟོག་པ་བཞི་བཅུ་འགགས། ཕྱི་རྟགས་སུ་སྟོན་ནམ་ཉི་འོད་ཀྱིས་བསླད་པ་ལྟ་བུའི་དམར་ལམ་པ་དང་། ནང་རྟགས་སུ་བདེ་བ་མུ་མཐའ་མེད་པར་འཆར་ཏེ་སྟོང་པ་ཆེན་པོ་ཞེས་བྱ། དེ་ནས་མཆེད་པ་ཉེར་ཐོབ་ལ་ཐིམ་པས་གཏི་མུག་གི་རྟོག་པ་བདུན་འགགས། ཕྱི་རྟགས་སུ་སྟོན་ནམ་སྨག་གིས་བསླད་པ་ལྟ་བུའི་ནག་ལམ་པ་དང་། ནང་རྟགས་སུ་རྣམ་པར་མི་རྟོག་པའི་ཉམས་མཐའ་དབུས་མེད་པར་འཆར་ཏེ་ཤིན་ཏུ་སྟོང་པ་ཞེས་བྱ། དེ་ནས་ཉེར་ཐོབ་འོད་གསལ་ལ་ཐིམ་པས་སྟོན་གྱི་དུས་སུ་ཐོ་རངས་ཀྱི་ནམ་མཁའ་སླད་བྱེད་ཀྱི་རྐྱེན་གསུམ་དང་བྲལ་བ་ལྟ་བུ་སྟེ་ཐམས་ཅད་སྟོང་པའི་འོད་གསལ་ཞེས་བྱའོ། །གསར་མ་ལྟར་ན་འོད་གསལ་སྣང་བའི་ཡེ་ཤེས་ཆོས་ཅན། ཁྱོད་ལ་སྟོང་པ་ཞེས་བརྗོད་པའི་རྒྱུ་མཚན་ཡོད་དེ། འོད་གསལ་སྣང་བའི་ཡེ་ཤེས་ཀྱི་རང་དུས་སུ་ཀུན་རྟོག་བརྒྱད་ཅུ་དང་དེའི་བཞོན་པར་གྱུར་པའི་ལས་རླུང་དང་བྲལ་བས་ན་སྟོང་པ་ཞེས་བརྗོད། འོད་གསལ་མཆེད་པའི་ཡེ་ཤེས་ཆོས་ཅན། ཁྱོད་ལ་ཤིན་ཏུ་སྟོང་བ་ཞེས་བརྗོད་པའི་རྒྱུ་མཚན་ཡོད་དེ། འོད་གསལ་མཆེད་པའི་ཡེ་ཤེས་ཀྱི་རང་དུས་སུ་སྔ་མ་འོད་གསལ་སྣང་བའི་ཡེ་ཤེས་དང་དེའི་བཞོན་པར་གྱུར་པའི་རླུང་གཉིས་ཀས་སྟོང་པས་ན་ཤིན་ཏུ་སྟོང་པ་ཞེས་བརྗོད། འོད་གསལ་ཉེར་ཐོབ་ཀྱི་ཡེ་ཤེས་ཆོས་ཅན། ཁྱོད་ལ་སྟོང་པ་ཆེན་པོ་ཞེས་བརྗོད་པའི་རྒྱུ་མཚན་ཡོད་དེ། འོད་གསལ་ཉེར་ཐོབ་ཀྱི་ཡེ་ཤེས་ཀྱི་རང་དུས་སུ་སྔ་མ་འོད་གསལ་མཆེད་པའི་ཡེ་ཤེས་དང་དེའི་བཞོན་པར་གྱུར་པའི་རླུང་གཉིས་ཀས་སྟོང་པས་ན་སྟོང་པ་ཆེན་པོ་ཞེས་བརྗོད། བཞི་པ་འོད་གསལ་ཆོས་ཅན། ཁྱོད་ལ་ཐམས་ཅད་སྟོང་པ་ཞེས་བརྗོད་པའི་རྒྱུ་མཚན་ཡོད་དེ། བཞི་པ་འོད་གསལ་གྱི་རང་དུས་སུ་སྔ་མ་ཉེར་ཐོབ་ཀྱི་ཡེ་ཤེས་དང་དེའི་བཞོན་པར་གྱུར་པའི་རླུང་གཉིས་ཀས་སྟོང་པས་ན་ཐམས་ཅད་སྟོང་པ་ཞེས་བརྗོད་དོ། ༈ །དེ་ཡང་ཆོས་ཉིད་ལྟ་བའི་ལྟ་བས་འཁོར་འདས་ཀྱི་ཆོས་ཐམས་ཅད་རང་བཞིན་མཉམ་པ་ཆེན་པོར་གཏན་ལ་དབབ། ཆོས་ཅན་ལྟ་བའི་ལྟ་བས་སྣང་སྲིད་ཀྱི་ཆོས་ཐམས་ཅད་སྐུ་དང་ཡེ་ཤེས་ཀྱི་རང་བཞིན་དག་པ་ཆེན་པོར་གཏན་ལ་དབབ། རང་རིག་ལྟ་བའི་ལྟ་བས་དེ་གཉིས་དབྱེར་མེད་མཚན་ཉིད་བསམ་བརྗོད་དང་བྲལ་བར་མངོན་སུམ་རང་ཐོག་ཏུ་གཏན་ལ་ཕབ་ནས་ཆོས་ཐམས་ཅད་ཡེ་ནས་སངས་རྒྱས་པའི་རང་བཞིན་དུ་ཤེས་པར་བྱ་བ་ནི་རྡོ་རྗེ་རྩེ་མོའི་གྲུབ་མཐའི་གནད་གསང་བ་བླ་ན་མེད་པའོ། །གཞན་ཡང་ཁ་ཅིག་གིས། གསང་སྔགས་ཀྱི་གྲུབ་མཐའ་ནི་ལྟ་བ་དབུ་མ་ལས་ཐབས་ཁྱད་པར་དུ་འཕགས་པ་ཙམ་དུ་འདོད་པ་ནི་མི་རིགས་ཏེ། དབུ་མ་དང་སྔགས་གཉིས་དོན་དམ་སྤྲོས་བྲལ་དང་ཀུན་རྫོབ་སྒྱུ་མ་ཙམ་དུ་མཉམ་པར་ལྟ་བ་མཐུན་ན་ཡང་དེ་ཙམ་གྱིས་སྔགས་ཀྱི་ལྟ་བ་གཏན་ལ་མི་ཕེབས་ཏེ། སྔགས་ཀྱི་ཐུན་མོང་མ་ཡིན་པའི་ལྟ་བ་ནི་བདེན་པ་དབྱེར་མེད་སྣོད་བཅུད་དག་མཉམ་ཆེན་པོར་གཏན་ལ་འབེབས་དགོས་པའི་ཕྱིར། དེ་ཡང་ཆོས་ཉིད་ལྟ་བའི་ངོས་ནས་ཆོས་ཐམས་ཅད་སྤྲོས་བྲལ་དམིགས་བསམ་བརྗོད་འདས་ཆེན་པོར་གཏན་ལ་འབེབས་པའི་ཆ་ནས་མདོ་སྔགས་ཀྱི་ལྟ་བ་ལ་ཁྱད་མེད་ཀྱང་། ཆོས་ཅན་ཀུན་རྫོབ་ལྟ་བའི་ངོས་ནས་ཕུང་ཁམས་སྐྱེ་མཆེད་དག་པ་ལྷ་ཡི་འཁོར་ལོར་མདོ་ནས་བཤད་པ་མེད་ཅིང་སྔགས་བླ་མེད་ནས་བསྟན་པས་ཁྱད་པར་དུ་འབྱེད་པ་སྟེ། དེ་ལྟར་ཀུན་རྫོབ་ཀྱི་ངོས་ནས་སྔགས་ཀྱི་ལྟ་བ་མདོ་ལས་འཕགས་པའི་རྒྱུ་མཚན་གྱིས་དེ་ཉིད་ཀྱི་སྣང་གཞི་སྟོང་ཉིད་ཀྱང་སྤྲོས་བྲལ་ཡིན་པ་ཙམ་དུ་འདྲ་ཡང་། འདིར་དོན་དམ་དཀོར་བདུན་ངོ་བོ་ཉིད་དུ་ལྷུན་གྱིས་གྲུབ་པའི་རྣམ་ཀུན་མཆོག་ལྡན་གྱི་སྟོང་ཉིད་ལ་འདོད་པས་ཁྱད་པར་ཤིན་ཏུ་ཆེའོ། །གལ་ཏེ་ཁྱེད་ཅག་གི་རྒྱུ་རྒྱུད་དེ་རིག་པ་འགྱུར་མེད་ལ་དེ་བཞིན་ཉིད་དུ་བྱེད་པར་འདུག་པས། དེ་འདྲ་དེ་འཁོར་ལོ་ཐ་མའི་ངེས་དོན་གྱི་མདོ་ཟབ་མོ་རྣམས་དང་། དེའི་དགོངས་འགྲེལ་རྒྱུད་བླ་མ་སོགས་ལས་ཀྱང་འབྱུང་བས་རྟོགས་བྱའི་ཡུལ་ལ་ཁྱད་མེད་དམ་ཞེ་ན། རིག་པ་འགྱུར་མེད་ལ་རྒྱུ་རྒྱུད་བྱེད་པ་འཁོར་ལོ་ཐ་མ་ནས་གསུངས་པ་དང་འདྲ་བ་བདེན་མོད་ཀྱི། ད་དུང་དེས་སྔགས་ཀྱི་ཐུན་མོང་མིན་པའི་ལྟ་བ་གཏན་ལ་ཕེབས་པར་མི་འགྱུར་ཏེ། དེ་བཞིན་ཉིད་དེ་བླ་ན་མེད་པའི་རྒྱུད་འདིར་རྒྱུ་རྒྱུད་དུ་འཇོག་པའི་ཚེ་ན་ལྷན་ཅིག་སྐྱེས་པ་མི་འགྱུར་བའི་བདེ་བ་ཆེན་པོའི་རང་བཞིན་དུ་བྱས་པ་ནི་སྔགས་ཀྱི་ཁྱད་ཆོས་སུ་དེ་བཞིན་གཤེགས་པ་སྲས་བཅས་བཞེད་པའི་ཕྱིར་ཏེ། རྡོ་རྗེ་མེ་ལོང་ལས། ལུས་ཅན་སྙིང་ལ་གང་གནས་པ། །རང་བྱུང་ཟག་མེད་ཡེ་ཤེས་གཟུགས། །མི་ཤིགས་ཐིག་ལེ་བདེ་ཆེན་པོ། །ནམ་མཁའ་ལྟ་བུར་ཀུན་ཁྱབ་པ། །མི་གནས་ཆོས་སྐུའི་རང་བཞིན་ཡིན། །ཞེས་དང་། དུས་འཁོར་ལས། དེས་ན་གཙོ་བོས་གང་ཞིག་འཕོ་མེད་ལྷན་སྐྱེས་ལུས་ཀྱི་བདེ་བ་དག་ནི་སྔགས་ཀྱི་ཐེག་པར་བསྟན། །ཞེས་གསུངས། དེ་ཡང་གཉིས་སྣང་འཁོར་བའི་ཆོས་འདི་རྣམས་ཐག་ཁྲའི་སྦྲུལ་ལྟར་མེད་སྣང་གློ་བུར་བ་དང་། དེའི་སྣང་གཞི་གནས་ལུགས་དེ་བཞིན་ཉིད་ཡིན་པའི་གནད་ཀྱིས། རྟོག་ཚོགས་སྐུ་དང་ཡེ་ཤེས་ཀྱི་དཀྱིལ་འཁོར་དུ་དག་པ་ལས་གསུངས་པ། ཕུང་སོགས་སྣང་གཞི་དེ་བཞིན་ཉིད་ཀྱི་རྩལ་གཉུགས་མ་སྟེ། ཤིན་ཏུ་ཕྲ་བའི་ཡེ་ཤེས་ཀྱི་རྩ་དང་། ཡེ་ཤེས་ཀྱི་རླུང་། ཡེ་ཤེས་ཀྱི་ཁམས་ཞེས་སམ། ཡང་ན་ས་ཆུ་གཉིས། མེ་རླུང་གཉིས། མཁའ་སེམས་གཉིས་ཟུང་དུ་འཇུག་པ་རྣམས་རིམ་པར་ཡེ་ནས་སྐུ་གསུམ་རྡོ་རྗེ་གསུམ་གྱི་ངོ་བོར་གཞན་གྱིས་མ་བཙལ་བར་ལྷུན་གྱིས་གྲུབ་པ་དང་། ཁམས་ལྔའི་དྭངས་མ་ཡེ་ཇི་བཞིན་རིགས་ལྔ་དང་། ཡེ་ཤེས་ཀྱི་ཁམས་རིགས་དྲུག་པའི་བདག་ཉིད་དུ་དག་པས་ལྷའི་བདག་ཉིད་དུ་བཞུགས་པ་ཡིན་ནོ་གསུངས། །

༈ གསར་མས་མདོ་སྔགས་གཉིས་ཀ་ལྟ་བས་ནི་མི་འབྱེད་དེ། ཤེས་རབ་ནི་འཕགས་བཞི་བསྐྱེད་པའི་མ་ཡིན་ལ། དེས་ན་མདོ་སྔགས་གཉིས་ཀ་ཐབས་ཀྱི་སྒོ་ནས་འབྱེད་དགོས་ལ། ཐབས་དེ་ལ་མཚན་ཉིད་ཐེག་པ་ནས་རྒྱུ་ཕ་རོལ་ཕྱིན་པ་དྲུག་རྒྱུའི་སྒོ་ནས་ཉམས་སུ་ལེན་ལ། སྔགས་ནས་ད་ལྟ་མ་དག་པའི་གཟུང་རྣམ་འདི་དག་དག་པ་སངས་རྒྱས་ཀྱི་གནས་ལུས་ལོངས་སྤྱོད་མཛད་པ་དང་བཅས་པ་ད་ལྟ་ནས་ལམ་དུ་བྱེད་པ་ཡིན་ཏེ། དེ་ཡང་གནས་འོག་མིན་སྟུག་པོ་བཀོད་པའི་ཞིང་ཁམས། ལུས་ལོངས་སྤྱོད་རྫོགས་པའི་སྐུ་མཚན་དཔེས་བརྒྱན་པ། ལོངས་སྤྱོད་གསལ་ཞིང་དག་པའི་འོད་ཟེར། དགྱེས་དགུར་སྤྱོད་པའི་ལོངས་སྤྱོད། ཁྱད་པར་འཕགས་པའི་གདན་ཁྲི། མཛད་པ་སངས་རྒྱས་ཀྱི་མཛད་པ་ལྟར་འབྲས་བུ་ཡོངས་དག་བཞིའི་སྒོ་ནས་ལམ་དུ་བྱེད་པས་ཁྱད་པར་འཕགས་སོ་ཞེས་ཟེར། རང་ལུགས་ལ། ཐབས་ཀྱིས་ཁྱད་པར་དུ་འཕགས་པ་བཞིན་དུ་ལྟ་བས་ཀྱང་འཕགས་ཏེ། ལྟ་བ་ནི་གཏན་ལ་འབེབ་བྱེད་ཡུལ་ཅན་གྱི་ངོས་ནས་འཇོག་དགོས་པའི་ཕྱིར། དོན་དམ་བདེ་བ་ཆེན་པོ་དང་ཀུན་རྫོབ་སྐུ་དང་ཡེ་ཤེས་སུ་བལྟ་བ་སོགས་ཀྱིས་ཁྱད་པར་འཕགས་སོ། ཞེས་གསུངས། མི་ཕམ་རིན་པོ་ཆེས། སྣང་བ་རང་ག་མ་འདི་རང་བཞིན་སྟོང་ཆེན་གྱི་དབྱིངས་སུ་སྡོམ་ཐུབ་མ་ཐུབ་ཀྱི་བློ་ཁྱད་ལས། སྣང་སྲིད་འདི་གདོད་ནས་དག་པ་རབ་འབྱམས་ཀྱི་འཁོར་ལོར་འདོད་དང་མི་འདོད་འབྱུང་བ་ཡིན་ཏེ། སྣང་བ་འདི་དག་བསལ་ཞིང་སྤངས་ཏེ་ཐག་རིང་བ་ལྟ་བུ་ཞིག་ནས་སྟོང་པ་ཉིད་བཙལ་མི་དགོས་པར། འདི་དག་དང་རང་བྱུང་ལྷན་ཅིག་སྐྱེས་པའི་ཆོས་སྐུ་ཤེས་རབ་ཀྱི་ཕ་རོལ་ཏུ་ཕྱིན་མ་མཐོང་ནས། སྣང་སྲིད་འདི་ལྷུན་གྲུབ་གཞིར་བཞེངས་ཀྱི་དཀྱིལ་འཁོར་དུ་ཁས་བླངས་ན་ཤིན་ཏུ་ཅིའི་མི་འཐད་དེ་སོམ་ཞིག །ཚུལ་འདི་ལྟ་བུ་དབུ་མས་མིང་གིས་བསྟན་ཀྱང་དོན་བདེན་གཉིས་དབྱེར་མེད་ཀྱི་གནས་ལུགས་ལ་གཞོལ་བའི་དབུ་མ་ཆེན་པོ་ཡིན་པས་འདི་ལ་དགོངས་ནས་མདོ་སྔགས་ཀྱི་ལྟ་བ་ལ་ཁྱད་མེད་གསུངས་པ་མ་གོ་ནས། མེད་དགག་གི་རྟོག་པ་ཡོད་འཛིན་གྱི་གཉེན་པོ་བྱེད་ཙམ་ལས་སྔགས་ཀྱི་ལྟ་བ་མ་འཕགས་ཟེར་བ་ནི། གཞི་ལམ་འབྲས་རྒྱུད་ཀྱི་རྣམ་བཞག་སོགས་སྔགས་ལ་སྐུར་བ་གདབ་པའི་ཕུང་ཁྲོལ་ཆེན་པོ་ཡིན་ནོ། །དེ་ལྟར་མཐོང་ན་ངེས་དོན་མཐར་ཐུག་རྫོགས་པ་ཆེན་པོའི་གནད་ཐུན་མིན་ལ་ངེས་ཤེས་སྐྱེ་ཞིང་། ངན་རྟོག་ཐེ་ཚོམ་གྱི་རྩིག་པ་ཐམས་ཅད་ཅིག་ཆར་འཇིག་པར་འགྱུར་བ་གདོན་མི་ཟའོ། །ཞེས་མི་ཕམ་རིན་པོ་ཆེའི་ལྕང་སྐྱའི་ལྟ་མགུར་འགྲེལ་བ་ལས་གསུངས། ༈ །དཔལ་སྤྲུལ་རིན་པོ་ཆེས། རང་རྒྱུད་ཀྱི་དབང་པོ་ལྔ་ནི་རང་གི་ལུས་དང་། གཞན་རྒྱུད་ཀྱི་དབང་པོ་ལྔ་ནི་ཕྱི་ནང་གི་ལུས། ཡུལ་ལྔ་ཕྱིའི་ལུས་ཏེ་ལུས་ལ་བདེན་ཞེན་སྤངས་པས་ལུས་རང་ངོས་ནས་མ་གྲུབ་པར་རྟོགས་པ་ནི་ལུས་དྲན་པ་ཉེར་བཞགཡུལ་དང་དབང་པོ་བདེན་པར་མ་གྲུབ་ཕྱིན་དབང་ཡུལ་ཕྲད་པའི་རེག་པ་ཡང་བདེན་པར་མེད་ལ། དེ་མེད་པས་ཚོར་བ་ཡང་བདེན་པར་དམིགས་སུ་མེད་པ་ནི་ཚོར་བ་དྲན་པ་ཉེར་བཞགསེམས་དང་རིག་པའི་ལ་ཤན་དབྱེ་སྟེ་སེམས་རྟོག་འཁྲུལ་བའི་སྣང་བ་རྫུན་པར་ཤེས་པ་ནི་སེམས་དྲན་པ་ཉེར་བཞགཡུལ་ཅན་གྱི་བློ་འཁྲུལ་བ་ཡིན་ཕྱིར་དེའི་ཡུལ་བདེན་པར་ཡོད་མི་སྲིད་པས་སེམས་འཁྲུལ་སྣང་གི་ཡུལ་དུ་གྱུར་པའི་ཆོས་ཐམས་ཅད་རང་བཞིན་མེད་པར་ཤེས་པ་ནི་ཆོས་དྲན་པ་ཉེར་བཞག་སྟེ་ལྟ་བ་ཤེས་རབ་ཀྱི་རང་བཞིན་སྤྲོས་བྲལ་རྗེན་པར་མཐོང་བའི་ངོ་བོར་འདུས་པ་ཡིན་ནོ། །ངན་རྟོག་མི་དགེ་བའི་ཀུན་སློང་སྐྱེས་ཙམ་ནས་རང་བབ་དགོངས་པའི་ངོ་བོར་རང་གྲོལ་དུ་དག་པ་ནི་མི་དགེ་བའི་ཕྱོགས་སྐྱེས་པ་རྒྱུན་གཅོད་པ། རྟོགས་པ་རང་གནས་ཀྱི་ངང་དང་མ་བྲལ་བས། ཆགས་སྡང་རང་མཚན་པ་སྐྱེ་མི་སྲིད་པ་ནི། མི་དགེ་བའི་ཆོས་མ་སྐྱེས་པ་མི་བསྐྱེད་པ། རྟོགས་པ་གནས་ལུགས་ཀྱི་དོན་རང་ངོ་སྤྲད་པས་ཇི་ལྟ་བ་བཞིན་དུ་རྟོགས་པ་ནི་དགེ་བའི་ཆོས་ཉིད་ཀྱི་གཤིས་ལ་འདུན་པ་ཡིན་པས་ཆོས་མ་སྐྱེས་པ་བསྐྱེད་པ། ངོ་འཕྲོད་པའི་རྟོགས་པ་དེ་ཉིད་ཕྱིས་འབད་རྩོལ་ལ་མ་ལྟོས་པར་རང་ཤུགས་ཀྱིས་འཆར་ཞིང་དེའི་རྩལ་ངེས་འབྱུང་དང་སྙིང་རྗེ་ལ་སོགས་ལམ་གྱི་ཡོན་ཏན་ཐམས་ཅད་རང་ཤུགས་ཀྱིས་འཆར་བ་ནི་དགེ་བའི་ཆོས་སྐྱེས་པ་གོང་དུ་སྤེལ་བ་སྟེ། སྤང་བླང་རྟོག་པའི་འདོར་ལེན་རིག་ངོར་སྤངས་པའི་སྤྱོད་པ་ནི་ཡང་དག་སྤོང་བ་བཞིའོ། །རྩོལ་མེད་ཀྱི་ངང་ལ་གནས་པ་ནི་ཆོས་ཉིད་ཀྱི་གཤིས་ལ་འདུན་པ་ཡིན་པས་འདུན་པའི་རྫུ་འཕྲུལ་གྱི་རྐང་པ། མི་བརྩོན་པའི་བརྩོན་པ་རང་བཞག་གི་ཡེ་ཤེས་ནི་བརྩོན་པའི་རྫུ་འཕྲུལ་གྱི་རྐང་པ། རྟོག་པ་ཐམས་ཅད་དང་བྲལ་བའི་རང་གནས་ཀྱི་བསམ་གཏན་ནི་སེམས་པའི་རྫུ་འཕྲུལ་གྱི་རྐང་པ། ཟང་མ་ཐལ་བྱུང་གི་ཡེ་ཤེས་རིག་པའི་དྭངས་ཆ་དཔྱོད་བྱེད་ཤེས་རབ་ཀྱི་ངོ་བོ་ནི་དཔྱོད་པའི་རྫུ་འཕྲུལ་གྱི་རྐང་པ་སྟེ་རྫུ་འཕྲུལ་གྱི་རྐང་པ་བཞི་ནི་མི་སྒོམ་པའི་སྒོམ་པ་མཉམ་བཞག་རྟོགས་པའི་ཡེ་ཤེས་ཀྱི་ངོ་བོར་རྫོགས་པ་ཡིན་ནོ། །གཤིས་གནས་ལུགས་ཆོས་སྐུའི་དགོངས་པའི་གཤིས་ལ་གཅིག་ཏུ་མོས་པ་ནི་དད་པའི་དབང་པོ། དེའི་ཕྱིར་བློ་བྱས་བཅོས་མའི་བྱ་རྩོལ་ཐམས་ཅད་དང་བྲལ་བའི་བློ་བྲལ་རྟོགས་པའི་ཁོར་ཡུག་ལ་བརྩོན་པ་དང་ལྡན་པ་ནི་བརྩོན་འགྲུས་ཀྱི་དབང་པོ། འདིའི་སྐབས་ཀུན་མཁྱེན་ཆེན་པོས། སྒོམ་པས་དྲན་སྣང་ཡེ་ཤེས་མ་ཡེང་བྱ། །ཞེས་པ་ལྟར། དྲན་སྣང་ཡེ་ཤེས་སུ་སངས་པས་དྲན་བྱ་དང་དྲན་བྱེད་ཐ་དད་པ་མེད་དེ་དྲན་པ་ཡེ་ཤེས་ཀྱི་ངོ་བོར་མཚན་མའི་རྣམ་རྟོག་རང་གྲོལ་དུ་དག་ནས་སྤྲོས་བྲལ་རྗེན་པའི་རིག་ངོར་གནས་པ་ནི་དབང་པོ་ཕྱི་མ་གསུམ་སྟེ། རང་བབས་ཀྱི་དྲན་པ་ནི་དྲན་པའི་དབང་པོ། དེ་ཚེ་ཆོས་ཉིད་འོད་གསལ་ལས་མི་གཡོ་བའི་དགོངས་པ་ནི་ཏིང་ངེ་འཛིན་གྱི་དབང་པོ། ཟང་ཐལ་རིག་པའི་ཡེ་ཤེས་རང་ཤར་དགོངས་པའི་རྩལ་སྣང་དང་བཅས་པ་ནི་ཤེས་རབ་ཀྱི་དབང་པོའོ། །འདིར་བསྒོམས་བྱུང་ཤེས་རབ་ཀྱི་རྩལ་རྒྱས་པ་ནི་དྲོད་སྣང་བ་ཐོབ་པའི་ཡེ་ཤེས། ཐེག་པ་ཐམས་ཅད་ཀྱི་རྩེ་མོ་ཨ་ཏིའི་དགོངས་དོན་རྟོགས་པ་ནི་རྩེ་མོ་སྣང་བ་མཆེད་པའི་ཡེ་ཤེས་ཏེ་སྦྱོར་ལམ་སྔ་མ་གཉིས་པོའང་རིག་ངོར་ཤུགས་ཀྱིས་རྫོགས་པའོ། །ཡང་དག་པའི་ཆོས་ཉིད་ལ་མོས་པ་དང་བྲལ་བ་ནི་དད་པའི་མི་མཐུན་ཕྱོགས། བྱ་བ་ངན་ཞེན་དང་སྙོམ་ལས་སྒྲིབ་པའི་ལེ་ལོ་ནི་བརྩོན་འགྲུས་ཀྱི་མི་མཐུན་ཕྱོགས། ཉམས་ལེན་བརྗེད་འབྱམས་སུ་ཤོར་བའི་བརྗེད་ངས་ནི་དྲན་པའི་མི་མཐུན་ཕྱོགས། ཞི་གནས་ཀྱི་ཏིང་ངེ་འཛིན་ལ་སྒྲིབ་པའི་གཉིད་རྨུགས་རྒོད་འགྱོད་ལ་སོགས་བྱིང་རྒོད་ཀྱི་ཆ་ནི་ཏིང་ངེ་འཛིན་གྱི་མི་མཐུན་ཕྱོགས། ལྷག་མཐོང་རྟོགས་པའི་ཡེ་ཤེས་ལ་སྒྲིབ་པ་ཡང་དག་པའི་གནས་ལུགས་ལ་ཡིན་ནམ་མ་ཡིན་སྙམ་དུ་ཡིད་མི་ཆེས་པའི་ཐེ་ཚོམ་དང་། ཕྱིན་ཅི་ལོག་ཏུ་འཛིན་པའི་ལོག་ལྟ་ལ་སོགས་པ་ནི་ཤེས་རབ་ཀྱི་མི་མཐུན་ཕྱོགས་ཏེ་མི་མཐུན་ཕྱོགས་ཀྱི་རྟོག་པ་དེ་དག་རིག་པ་མ་བཅོས་པའི་ཆོས་སྐུ་རང་ངོ་ཤེས་པའི་སྐད་ཅིག་ཐུག་ཕྲད་ཅེར་གྲོལ་དུ་དག་པ་ནི། སྔར་གྱི་རྣམ་བྱང་བསྐྱེད་པའི་དབང་པོ་ལྔ་པོ་དེ་དག་གི་མི་མཐུན་ཕྱོགས་ཀྱིས་མི་བརྫི་བས་སྟོབས་སུ་གྱུར་པ་ཡིན་པས་སྟོབས་ལྔའོ། །དེ་ཡང་གྲོལ་ལུགས་ཀྱི་གདེངས་མེད་ན། ཞི་གནས་ལ་བརྟེན་ནས་ཉོན་མོངས་དེ་དག་མགོ་མནན་པས་འཕྲལ་དུ་མི་སྐྱེ་བ་ལྟར་སྣང་ཡང་རྐྱེན་དང་འཕྲད་ཚེ་རྟོག་པའི་དུག་རོ་ལྡང་ཞིང་། དེ་ཚེ་གྲོལ་ལུགས་ཀྱི་གདེངས་མེད་པས་ཐ་མལ་པ་དང་ཁྱད་མེད་ལ་རྗེས་དཔག་གི་དཔྱོད་པས་ཉོན་མོངས་པའི་རང་བཞིན་སྟོང་པ་ཉིད་ལ་སོགས་པར་གཏན་ལ་ཕབ་ནས་དཔྱད་ཀྱང་དེས་རྟོག་པ་རང་གྲོལ་དུ་འགྲོ་མི་ནུས་པས་ཉོན་མོངས་པའི་གཉེན་པོ་མི་བྱེད། རང་གྲོལ་གྱི་གནད་ཤེས་ན་ཉོན་མོངས་དང་རྣམ་རྟོག་ཅི་ཙམ་སྐྱེས་ཀྱང་རྟོག་པའི་རྩལ་སྦྱོང་དུ་འགྲོ་བ་ཡིན་པས་ཉོན་མོངས་པ་ལམ་དུ་བྱེད་པའི་གནད་ཀྱང་འདིར་འདུ་ལ། ལམ་གྱི་ཡོན་ཏན་ཐམས་ཅད་སྟོབས་སུ་འགྱུར་བ་ཡང་རང་གྲོལ་གྱི་གནད་ལ་ཐུག་པ་ཡིན་ནོ། །དེའི་ཚེ་ཆོས་སྐུའི་གཤིས་ལ་མི་སྐྲག་པ་ནི་བཟོད་པ་དང་། ཆོས་ཉིད་ཀྱི་རྟོགས་པ་མཆོག་དང་ལྡན་པ་ནི་ཆོས་མཆོག་གི་ཡེ་ཤེས་ཏེ། སྦྱོར་ལམ་ཕྱི་མ་གཉིས་ཀྱང་རང་གྲོལ་དགོངས་པའི་སྐད་ཅིག་མ་ལ་འདུ་བ་ཡིན་ནོ། །ཀུན་མཁྱེན་ཆེན་པོས། ཀློང་གྱུར་དུས་ན་ཡེངས་མེད་ཡེངས་མཁན་མེད། །བརྟན་པ་མཐར་ཕྱིན་ཡེངས་ཡུལ་ཆོས་ཉིད་ངེས། །ཞེས་པ་ལྟར་ཡེང་ཡུལ་ཆོས་ཉིད་དུ་ཤར་ཏེ། ཆོས་ཉིད་ཀུན་ཏུ་འགྲོ་བའི་རང་བཞིན་དུ་རྟོགས་ཚེ་རྩོལ་བྱུང་འདུ་བྱེད་ཀྱི་དྲན་པ་དང་བྲལ་ཏེ་རྩོལ་མེད་རང་ཤར་གྱི་དྲན་པ་ཡང་དག་བྱང་ཆུབ་ཀྱི་ཡན་ལགམཉམ་བཞག་ཏུ་ཤེས་རབ་རང་བྱུང་གི་སྒྲོན་མ་ཀ་དག་དངོས་མཚན་སྤངས་པའི་མངོན་སུམ་གྱི་དགོངས་པ་ཇི་ལྟ་བའི་རང་ངོ་ལ་གནས་ཤིང་། རྗེས་ཐོབ་ཏུ་བསྒོམས་བྱུང་རྟོགས་པའི་ཤེས་རབ་རྩལ་འབར་ཏེ། ཆོས་ཅན་ཇི་སྙེད་པའི་རྣམ་གྲངས་མཁྱེན་པའི་བསྒོམས་བྱུང་གི་ཤེས་རབ་ནི་ཆོས་རབ་རྣམ་འབྱེད་ཡང་དག་བྱང་ཆུབ་ཀྱི་ཡན་ལགངང་གནས་ཆུ་བོ་རྒྱུན་གྱི་བརྩོན་འགྲུས་ཀྱིས་ཆོས་ཉིད་རྟོགས་པ་དང་བརྟན་པར་བྱེད་པ་ནི་བརྩོན་འགྲུས་ཡང་དག་བྱང་ཆུབ་ཀྱི་ཡན་ལགབརྩོན་འགྲུས་དེའི་ལག་རྗེས་སེམས་ལ་ཤར་ནས་སེམས་ངན་རྟོག་གི་འཆིང་བ་ལས་གྲོལ་ཏེ། དགའ་བདེ་རྒྱུན་ཆད་མེད་པའི་ཏིང་ངེ་འཛིན་ལ་གནས་པ་ནི་དགའ་བ་ཡང་དག་བྱང་ཆུབ་ཀྱི་ཡན་ལགངང་གནས་བསམ་གཏན་གྱི་བརྩོན་པའི་ལག་རྗེས་ལུས་ལ་ཤར་ཏེ་ལུས་རང་དབང་དང་བྲལ་བའི་ལས་ཉོན་ལས་གྲོལ་ནས་ཤིན་སྦྱངས་ཀྱི་བདེ་བ་ཁྱད་པར་ཅན་སྐྱེས་ཤིང་། སྐྱེ་ཤིའི་སྡུག་བསྔལ་ལས་གྲོལ་བ་ནི་ཤིན་ཏུ་སྦྱངས་པ་ཡང་དག་བྱང་ཆུབ་ཀྱི་ཡན་ལག་ཡིན་ཏེ། རྒྱུད་བླ་མ་ལས། འཕགས་པས་སྐྱེ་དང་ན་བ་དང་། །རྒ་བའི་སྡུག་བསྔལ་རྩད་ནས་སྤངས། །ཞེས་སོ། །དེ་ལྟ་ན་རྟོགས་པ་ཀློང་དུ་གྱུར་པའི་རྣལ་འབྱོར་པ་ལ་སྐྱེ་རྒ་ན་འཆི་ལྟར་སྣང་བ་ཅི་ཡིན་ཞེ་ན། དེ་ནི་གཞན་སྣང་གདུལ་བྱའི་དབང་གིས་དེ་ལྟར་བསྟན་པ་ཡིན་གྱི་རང་ངོར་སྐྱེ་འཆི་རང་མཚན་པ་མེད་དོ། །མདོ་སྡེ་རྒྱན་ལས། དེ་ཡིས་ཆོས་ཀུན་སྒྱུ་མ་ལྟ་བུ་དང་། །སྐྱེ་བ་སྐྱེད་མོའི་ཚལ་འགྲོ་ལྟར་རྟོགས་ནས། །ཞེས་སོ། །དགོངས་པ་རང་གནས་ཀྱི་བསམ་གཏན་རྟོག་བྲལ་ཟང་ཐལ་གྱི་ཡེ་ཤེས་དང་འདུ་འབྲལ་མེད་པ་ནི་ཏིང་ངེ་འཛིན་ཡང་དག་བྱང་ཆུབ་ཀྱི་ཡན་ལགརོ་མཉམ་བླང་དོར་མེད་པའི་དགོངས་པ་མངོན་དུ་གྱུར་པས་ཡིན་མིན་ཡོད་མེད་བཟང་ངན་ལ་སོགས་གཉིས་ཆོས་ཐམས་ཅད་གཉིས་མེད་རིག་པའི་ཀློང་དུ་རོ་གཅིག་པ་ནི་བཏང་སྙོམས་ཡང་དག་བྱང་ཆུབ་ཀྱི་ཡན་ལག་སྟེ་བྱང་ཆུབ་ཀྱི་ཡན་ལག་བདུན་དགོངས་པའི་རྩལ་ལ་རྫོགས་པའི་མཐོང་ལམ་འཕགས་པའི་ཡེ་ཤེས་ནི། ཆོས་ཉིད་ཀུན་ཏུ་འགྲོ་བའི་རང་བཞིན་རྟོགས་པས་ན་ཀུན་ཁྱབ་ཀྱི་ཡེ་ཤེས་ཡིན་ནོ། །དེ་ནས་ལྟ་བ་མངོན་སུམ་གྱི་ཡེ་ཤེས་རྟོགས་པས་བཟང་ངན་གྱི་རྟོག་པ་ཐམས་ཅད་ཆོས་ཉིད་དུ་གྲོལ་ཏེ་སྨྲ་སྤྱོད་ཡེ་ཤེས་སུ་འཆར་ཞིང་ཡུལ་སྣང་བདེ་ཆེན་དུ་འཆར་བས་ཡེང་ཡུལ་ཆོས་ཉིད་དུ་དག་སྟེ་རྩོལ་མེད་ཀྱི་དྲན་པ་ལ་གནས་པ་ནི་ཁྱབ་གདལ་ཆེན་པོའི་ཏིང་ངེ་འཛིན་ཅེས་བྱ་སྟེ། ཇི་སྐད་དུ། དྲན་པ་རང་གྲོལ་ཐིག་ལེའི་ངང་། །ཁྱབ་གདལ་ནམ་མཁའི་ཁོར་ཡུག་ལ། །དྲན་པས་བཟུང་དང་མ་བཟུང་མེད། །དྲན་པའི་སྒྲོག་བཅིངས་མཐོལ་ལོ་བཤགས། །ཞེས་སོ། །དེ་ལྟར་འཕགས་པའི་ལམ་ཡན་ལག་ཀྱང་རིག་ངོར་རོ་གཅིག་ཏུ་རྫོགས་པ་ཡིན་ཏེ། ལྟ་བ་ཆོས་ཉིད་ཀྱི་གནས་ལུགས་མཐོང་བ་ནི་ཡང་དག་པའི་ལྟ་བ། ལྟ་བ་དེའི་རྩིས་ཟིན་པས་བཟང་ངན་གྱི་རྟོག་པ་ཐམས་ཅད་རང་ངོར་གྲོལ་བ་ནི་ཡང་དག་པའི་རྟོག་པ། དེས་ན་ངག་གི་སྨྲ་བ་ཐམས་ཅད་ཀྱང་ཡེ་ཤེས་ཀྱི་རོལ་པར་འཆར་བ་ནི་ཡང་དག་པའི་ངགསྤྱོད་ལམ་ཐམས་ཅད་ཡེ་ཤེས་ཀྱི་རོལ་པར་ཅིར་སྣང་དགག་སྒྲུབ་མེད་པས་ཅི་བྱེད་གཞན་དོན་དུ་འབྱུང་བ་ནི་ཡང་དག་པའི་ལས་མཐའ། གཟུགས་སྒྲ་དྲི་རོ་རེག་བྱ་ལ་སོགས་པའི་ཕྱི་ཡུལ་ལྔའི་འདོད་ཡོན་ཐམས་ཅད་བདེ་བ་ཆེན་པོའི་ཡེ་ཤེས་ཀྱི་རྣམ་རོལ་དུ་འཆར་བ་ན་ལོག་པའི་འཚོ་བ་འབྱུང་མི་སྲིད་པ་ནི་ཡང་དག་པའི་འཚོ་བ། ལམ་རང་ཤུགས་ཀྱིས་འབྱུང་བས་རང་དོན་ལམ་གྱི་རྩོལ་བ་ངང་གིས་སྐྱེས་ནས་རྩོལ་མེད་ཀྱི་བརྩོན་པ་ཡང་དག་པའི་བརྩོན་འགྲུས། རྩོལ་བ་མེད་བཞིན་དགོངས་པ་ཆོས་ཉིད་ལས་མི་གཡོ་བའི་དྲན་པ་ནི་ཡང་དག་པའི་དྲན་པ། དེའི་ཚེ་དཔའ་བར་འགྲོ་བ་ལ་སོགས་པའི་ཏིང་ངེ་འཛིན་གྱི་སྒོ་བརྒྱ་ཕྲག་ལ་སྙོམས་པར་འཇུག་ཅིང་ལྡང་བ་ནི་ཡང་དག་པའི་ཏིང་ངེ་འཛིན་ཏེ་སྒོམ་ལམ་དུ་འཕགས་ལམ་བརྒྱད་སྒོམ་པའི་དོན་ནོ་ཞེས་གསུངས། ༈ ཚོགས་ལམ་འབྲིང་པོའི་སྐབས་སུ་ཡང་དག་པར་སྤོང་བ་བཞི་གཙོ་བོ་བསྒོམ་པ་སྟེ། མི་དགེ་བའི་ཆོས་མ་སྐྱེས་པ་མི་བསྐྱེད་པ་དང་། མི་དགེ་བའི་ཆོས་ཞིག་རྒྱུད་ལ་སྐྱེས་ན་སྐྱེས་པ་དེ་མྱུར་དུ་གཅོད་པ་དང་། དགེ་བའི་ཆོས་རྣམས་རྒྱུད་ལ་མ་སྐྱེས་པ་བསྐྱེད་པར་བྱེད་པ་དང་། སྐྱེས་པ་རྣམས་གོང་ནས་གོང་དུ་འཕེལ་བར་བྱེད་པ་ལ་བརྩོན་འགྲུས་རྩོམ་པ་སྟེ་བཞིའོ། །ཚོགས་ལམ་ཆེན་པོ་ནི། རྫུ་འཕྲུལ་གྱི་རྐང་པ་བཞི་སྒོམ་པ་སྟེ། འདུན་པའི་རྫུ་འཕྲུལ་གྱི་རྐང་པས་མ་དད་པ་དང་ལོག་པར་ལྟ་བ་ལ་སོགས་པས་སེམས་མི་གཡོ་བར་ཏིང་ངེ་འཛིན་ལ་མོས་ཤིང་དགའ་བས་འཇུག་ཅིང་བསྒོམ་པའོ། །བརྩོན་པའི་རྫུ་འཕྲུལ་གྱི་རྐང་པས་ཏིང་ངེ་འཛིན་གྱི་སྒོ་ལ་མཉམ་པར་འཇོག་པ་ལ་རབ་ཏུ་བརྩོན་པས་དེ་དག་གི་སྐྱོན་དང་གེགས་སེལ་བ་དང་། ཡོན་ཏན་བསྒྲུབ་པ་ལ་རབ་ཏུ་བརྩོན་ཞིང་རྐྱེན་དབང་དུ་མི་གཏོང་བའོ། །སེམས་པའི་རྫུ་འཕྲུལ་གྱི་རྐང་པས་སེམས་རྩེ་གཅིག་ཏུ་གནས་ཤིང་རྣམ་རྟོག་དང་གཞན་དབང་སོགས་ཀྱི་ཆ་གཉིས་སུ་མ་གྱུར་ཅིང་བསམ་གཏན་ཏིང་ངེ་འཛིན་མངོན་དུ་བྱེད་དོ། །དཔྱོད་པའི་རྫུ་འཕྲུལ་གྱི་རྐང་པས་སྤྱོད་ལམ་ཐམས་ཅད་དུ་ཏིང་ངེ་འཛིན་དེའི་རྒྱུན་སྐྱོང་སྟེ། དེ་ཡང་མངོན་པར་ཤེས་པ་ལ་སོགས་པ་ནི་རྫུ་འཕྲུལ་ཡིན་ཏེ་རང་རྒྱུད་ལ་ཐོབ་པར་བྱེད་པའི་ཐབས་ཡིན་ནོ། །འདིར་ཏིང་ངེ་འཛིན་གྱི་རྩལ་དུ་མ་རྣམ་པ་མང་པོར་བརྫུ་ཞིང་འཕྲུལ་པ་ནི་ཏིང་ངེ་འཛིན་ཏེ། དེའི་ཕྱིར་ན་རྐང་པ་ཞེས་བྱའོ། །སྦྱོར་ལམ་ངེས་འབྱེད་ཆ་བཞིའི་སྐབས་སུ་དྲོད་རྩེ་གཉིས་ལ་དབང་པོ་ལྔ་བསྒོམ་པ་ནི། དད་པའི་དབང་པོས་མཐོང་ལམ་གྱི་ཡེ་ཤེས་ལ་ལྷག་པར་མོས་ཤིང་། བརྩོན་འགྲུས་ཀྱི་དབང་པོས་གཡེལ་བ་མེད་པར་མཐོང་ལམ་གྱི་ཡེ་ཤེས་རང་རྒྱུད་ལ་བསྐྱེད་པའི་ཐབས་འབད་པར་བྱའོ། །དྲན་པའི་དབང་པོས་ལྷག་པ་ཚུལ་ཁྲིམས་ཀྱི་བསླབ་པ་མི་ཉམས་པར་བསྲུང་བ་དང་། ཏིང་ངེ་འཛིན་གྱི་དབང་པོས་ལྷག་པ་ཏིང་ངེ་འཛིན་གྱི་བསླབ་པ་ལ་མཉམ་པར་འཇོག །ཤེས་རབ་ཀྱི་དབང་པོས་ལྷག་པ་ཤེས་རབ་ཀྱི་བསླབ་པས་གནས་ལུགས་ཀྱི་ལྟ་བ་རང་རྒྱུད་ལ་བསྐྱེད་དེ་ཉམས་སུ་ལེན་ནོ། །བཟོད་པ་དང་ཆོས་མཆོག་གཉིས་ཀྱི་སྐབས་སུ་གོང་གི་དབང་པོ་ལྔ་པོ་དེ་ཉིད་ཀྱང་རང་རང་གི་སྒྲིབ་པ་དང་བྲལ་བར་ཉམས་སུ་ལེན་ཏེ། དེ་ཡང་མ་དད་པ་དང་། ལེ་ལོ་དང་། བརྗེད་ངེས་དང་། རྣམ་གཡེང་དང་། ཤེས་བཞིན་མ་ཡིན་པའི་བར་ཆད་ཀྱིས་གཏན་ནས་བརྫི་མི་ནུས་པའི་དད་བརྩོན་དྲན་པ་ཏིང་ངེ་འཛིན་ཤེས་རབ་དང་ལྔ་པོ་དེ་དག་སྟོབས་སུ་གྱུར་པའོ། །མཐོང་ལམ་གྱི་སྐབས་སུ་བྱང་ཆུབ་ཀྱི་ཡན་ལག་བདུན་ནི། དྲན་པ་ཡང་དག་བྱང་ཆུབ་ཀྱི་ཡན་ལག་ནི། གནས་ཀྱི་ཡན་ལག་སྟེ། སྔར་ཡང་ཡང་གོམས་པའི་དྲན་པ་དེ་ལས་བདེན་དོན་མངོན་སུམ་མཐོང་བ་སྐྱེ་ཞིང་དེས་སྔར་མ་ཤེས་ཤིང་མ་རྒྱལ་བ་ལས་རྒྱལ་བར་བྱེད་པས་འཁོར་ལོ་རིན་པོ་ཆེ་ལྟ་བུའོ། །ཆོས་རབ་ཏུ་རྣམ་པར་འབྱེད་པ་ཡང་དག་བྱང་ཆུབ་ཀྱི་ཡན་ལག་ནི། རང་བཞིན་གྱི་ཡན་ལག་སྟེ་བདེན་དོན་མཐོང་བའི་ཤེས་རབ་ཀྱི་ངོ་བོ་མཚན་མ་ཐམས་ཅད་འཇོམས་པ་གླང་པོ་རིན་པོ་ཆེ་ལྟ་བུ་མི་མཐུན་ཕྱོགས་གཅོད་པའོ། །བརྩོན་འགྲུས་ཡང་དག་བྱང་ཆུབ་ཀྱི་ཡན་ལག་ནི། ངེས་པར་འབྱུང་བའི་ཡན་ལག་སྟེ། རང་གི་རྟོགས་བྱའི་མངོན་པར་ཤེས་པ་ལ་ངེས་པར་འབྱུང་བའམ་སྦྱོར་བར་བྱེད་པ་རྟ་མཆོག་རིན་པོ་ཆེ་ལྟར་གང་འདོད་དུ་ཕྱིན་པར་བྱེད་པའོ། །དགའ་བ་ཡང་དག་བྱང་ཆུབ་ཀྱི་ཡན་ལག་ནི་ཕན་ཡོན་གྱི་ཡན་ལག་སྟེ་བདེན་དོན་མཐོང་བའི་ཆོས་ཀྱི་སྣང་བ་འཕེལ་བའི་དགའ་བས་ལུས་སེམས་རྒྱས་པར་ཁྱབ་པ་ནོར་བུ་རིན་པོ་ཆེའི་འོད་ཀྱིས་ཁྱབ་པ་བཞིན་ནོ། །ཤིན་ཏུ་སྦྱངས་བ་ཡང་དག་བྱང་ཆུབ་ཀྱི་ཡན་ལག་ནི། ཤིན་སྦྱངས་སོགས་གསུམ་ནི་ཉོན་མོངས་མེད་པའི་ཡན་ལག་ཡིན་ཞིང་། དེ་ཡང་ཤིན་སྦྱངས་ནི་ཉོན་མོངས་མེད་པའི་གནས་ཡིན་ཏེ་ལུས་སེམས་ཤིན་ཏུ་སྦྱངས་བའི་བདེ་བས་ལས་སུ་རུང་བར་བྱས་པ་ནི་ཉོན་མོངས་མེད་པའི་སེམས་ཀྱི་གནས་སུ་གྱུར་པ་སྟེ། དཔེར་ན་བཙུན་མོ་རིན་པོ་ཆེས་རེག་པའི་བདེ་བ་སྟེར་བ་ལྟ་བུའོ། །ཏིང་ངེ་འཛིན་ཡང་དག་བྱང་ཆུབ་ཀྱི་ཡན་ལག་ནི། ཉོན་མོངས་མེད་པའི་གཞི་ཡི་ཡན་ལག་སྟེ་ཉོན་མོངས་པ་མི་སྐྱེ་བར་བྱེད་པ་སེམས་རྩེ་གཅིག་ཏུ་གནས་པ་ཡིན་ལ། དེ་ལས་བསམ་པའི་དོན་ཀུན་འབྱོར་པ་འབྱུང་བས་ཁྱིམ་བདག་རིན་པོ་ཆེ་ལས་ནོར་ཅི་འདོད་འབྱུང་བ་ལྟ་བུའོ། །བཏང་སྙོམས་ཡང་དག་བྱང་ཆུབ་ཀྱི་ཡན་ལག་ནི། ཉོན་མོངས་མེད་པའི་ངོ་བོ་སྟེ་ཆགས་སྡང་སོགས་དང་བྲལ་བའི་རང་བཞིན་དེ་ལས། དུས་ཇི་ལྟར་འདོད་པར་འཕགས་པའི་གནས་པ་ལ་གནས་པར་བྱེད་པས་བློན་པོ་རིན་པོ་ཆེས་དཔུང་གི་ཚོགས་འགྲོ་བ་དང་གནས་པ་དང་ལྡོག་པར་བྱེད་པ་ལྟ་བུའོ། །ཡང་ན་བཏང་སྙོམས་ཞེས་པ་ནི། དེ་ལྟར་བྱང་ཆུབ་སེམས་དཔའ་གང་ཞིག་རྣམས་ལ་གཡས་ནས་ཙན་དན་གྱི་ལྡེ་གུ་བྱུག་པ་དང་གཡོན་ནས་སྟེ་འུའི་ཤ་བཅད་ན་གཉིས་ལ་ཆགས་སྡང་མེད་ཅིང་མཉམ་པའོ། །སྒོམ་ལམ་གྱི་སྐབས་སུ་འཕགས་ལམ་ཡན་ལག་བརྒྱད་ནི། མཐོང་ལམ་རྣམ་པར་མི་རྟོག་པའི་ཡེ་ཤེས་མངོན་དུ་མཐོང་བས་ན་གནས་ལུགས་ཀྱི་ལྟ་བ་ཡང་དག་པར་རྟོགས་པ་ནི་ཡང་དག་པའི་ལྟ་བ། དེའི་མཐུས་ཉོན་མོངས་པ་ཐམས་ཅད་རྒྱུད་ལ་མི་སྐྱེ་ཞིང་རྟོག་པ་ཐམས་ཅད་ཤུགས་ཀྱིས་དགེ་བ་ནི་ཡང་དག་པའི་རྟོག་པ། སེམས་དགེ་བ་ལས་ངག་དང་ལུས་ཀྱི་མི་དགེ་བ་མི་འབྱུང་ཞིང་སྨྲས་ཚད་འགྲོ་ལ་ཕན་པ་ནི་ཡང་དག་པའི་ངགབྱ་བ་བྱེད་པ་གང་བྱས་ཀྱང་གཞན་དོན་དུ་འགྱུར་བ་ཡང་དག་པའི་ལས་ཀྱི་མཐའ་དང་། ལོག་པའི་འཚོ་བ་ལྔས་མ་བསླད་པ་རྟག་པར་ཆོག་ཤེས་པ་ནི་ཡང་དག་པའི་འཚོ་བ་དང་། ལོག་འཚོ་ལྔ་ནི། ཁ་གསག །ཚུལ་འཆོས། གཞོག་སློང་། རྙེད་ཚོལ། ཐོབ་འཇལ་ཏེ་ལྔ་པོ་སྤངས་བར་བྱས་སོ། །གཞན་དོན་དུ་སྐྱོ་ངལ་མེད་པ་གཡེལ་བ་སྤངས་ནས་བརྩོན་པ་ནི་ཡང་དག་པའི་བརྩོན་འགྲུས། རྟག་ཏུ་དྲན་པའི་རྒྱུན་སྐྱོང་བ་ནི་ཡང་དག་པའི་དྲན་པ། བསམ་གཏན་བཞི་ལ་སོགས་པར་མཉམ་པར་འཇོག་ཅིང་ཏིང་ངེ་འཛིན་དུ་མ་ལ་འཇུག་པ་ནི་ཡང་དག་པའི་ཏིང་ངེ་འཛིན་ཏེ་འཕགས་པའི་ལམ་ཡན་ལག་བརྒྱད་དོ། །

༈ སེམས་ཀྱི་ཆོས་ཉིད་རང་བྱུང་གི་ཡེ་ཤེས་རང་བཞིན་གྱིས་འོད་གསལ་བ་དེ་ལ་སྤྲོས་པ་གང་ཡང་མེད་པས། དེ་ལ་གསར་དུ་རྟོགས་མ་རྟོགས་སོགས་གཉིས་ཆོས་ཀྱི་ཐ་སྙད་མེད་དོ། །སེམས་ལ་ནི་རྟོགས་མ་རྟོགས་གཉིས་སུ་ཡོད་དོ། དེའི་ཕྱིར་སེམས་ཀྱི་ཆོས་ཉིད་དེ་ལམ་གྱིས་རྟོགས་བྱ་ཡེ་ནས་གནས་པའི་དེ་བཞིན་ཉིད་ཡིན་ལ། དེ་རྟོགས་བྱེད་ནི་བློ་སྟེ། ཐོས་བསམ་སྒོམ་པའི་ཤེས་རབ་ཡིན་ལ། དེ་ནི་ཉན་པ་སོགས་ཀྱི་རྣམ་རྟོག་མ་འགགས་པའི་སྐབས་ཀྱི་ཡིད་ཡིན་ནོ། །ཡིད་དེས་ཆོས་ཉིད་དེ་ངོ་འཕྲོད་དུས། ཡིད་རང་ཉིད་ཀྱང་ཆོས་ཉིད་དེའི་ངང་དུ་རྟོགས་པ་ལ་གཟུང་འཛིན་ཐ་དད་དུ་མེད་དོ། །དེས་ན་གཞི་ཆོས་ཉིད་ལ་རྟོགས་མ་རྟོགས་ཀྱི་ཐ་སྙད་མེད་ཀྱང་། རྟོགས་མ་རྟོགས་ཀྱི་ཐ་སྙད་འདི་ཆོས་ཉིད་ཀྱི་ངང་ལས་ཤར་བའི་སེམས་ཅན་གྱི་བློ་དེ་ཡི་དབང་ལས་ཡིན་པར་ཤེས་པར་བྱའོ། །དེ་ལ་གྲོལ་ལམ་གྱིས་ཆོས་ཉིད་གཞིའི་འོད་གསལ་ལམ་གནས་ལུགས་ངོ་འཕྲོད་ན་དེའི་རྒྱུན་བསྐྱངས་བས། གོམས་པ་ཆགས་པའི་ཚེ། སྒོ་ལྔའི་རྣམ་ཤེས་ཡིད་ལ་ཐིམ། ཡིད་ཀུན་གཞིའི་རྣམ་ཤེས་དང་། དེ་ཀུན་གཞི། དེ་གཞི་ཆོས་ཉིད་འོད་གསལ་སྟོང་པ་ཉིད་ལ་ཐིམ་ཚེ་ཚོགས་བརྒྱད་ཀྱི་རྣམ་ཤེས་གཏན་ནས་ལོག་སྟེ་མེད་ནའང་། ཆོས་ཉིད་ཀྱི་རིག་གདངས་རང་བྱུང་འོད་གསལ་གྱི་ཤེས་རབ་ཉིད། སྔར་གོམས་པ་དེའི་དབང་གིས་སློང་བྱེད་རྐྱེན་གསུམ་བྲལ་བའི་ནམ་མཁའ་དཔེར་བྱས་པ་ལྟ་བུའི་ནང་གི་མངོན་པར་བྱང་ཆུབ་པ་འོད་གསལ་ངོས་ཟིན་པ་འབྱུང་ངོ་། །ལམ་རྐྱེན་དང་མི་ལྡན་པའི་ཕལ་པ་རྣམས་ལ་འཆི་དུས་དང་གཉིད་འཐུག་གི་དུས་སུ་ཚོགས་བརྒྱད་ལོག་རྗེས་སུ་ཡང་། ཆོས་ཉིད་ཀྱི་སེམས་སམ། གཉུག་སེམས་ལྡོག་པ་མི་སྲིད་དེ་འདུས་མ་བྱས་འཕོ་འགྱུར་མེད་པ་ཡིན་པས། དེ་མེད་པ་མ་ཡིན་ཀྱང་ངོས་མི་ཟིན་ཏེ་དེའི་ཕྱིར་དེ་སྐབས་སེམས་མེད་མུན་པའི་གནས་སྐབས་ཞེས་བཏགས་སོ། །རྣལ་འབྱོར་པས་ཐབས་ཀྱི་ལམ་གྱིས་འོད་གསལ་བའི་སེམས་མངོན་དུ་འགྱུར་ཕྱིར་བསྐྱེད་པའི་རིམ་པ་དང་། རྡོར་བཟླས་སོགས་སྔོན་དུ་བཏང་ནས། རྫོགས་རིམ་སྙིང་གི་ནཱ་ད་ཕྲ་བ་ལ་སེམས་ཟིན་པས་སྨིག་རྒྱུ་ལ་སོགས་པའི་རྣམ་པ་དང་། སྣང་མཆེད་ཐོབ་གསུམ་གྱི་སྐབས་སུ་དཀར་ལམ་དམར་ལམ་ནག་ལམ་གྱི་སྣང་བ་གསུམ་གྱི་མཐར་སྤྲིན་མེད་ནམ་མཁའ་ལྟ་བུའི་ཉམས་སྐྱེས་པ་དེའི་ཚེ། ཡིད་ཕྲ་བ་མ་འགགས་པས་གཞི་ཡི་འོད་གསལ་དངོས་མ་ཡིན་ཡང་དེའི་རྣམ་པ་ཆ་འདྲ་ཙམ་ཡིན་ལ། དེ་ཡང་ཡང་གོམས་པས་རྟོགས་པ་དོན་གྱི་འོད་གསལ་གྱི་བར་དུ་འགྱུར་རོ། །དེར་མ་ཟད་མཚན་མོ་སྙིང་ནང་གི་ཨ་དཀར་པོ་ལ་སེམས་བཟུང་བས། གཉིད་ཀྱི་ཤེས་པ་ནང་དུ་སྡུད་ཚེ་སྣང་བ་གསུམ་གྱི་ཉམས་དང་། ནམ་མཁའ་དག་པ་ལྟ་བུའི་འོད་གསལ་ཆ་འདྲ་འཆར་བ་དང་། ནམ་མཁའ་སུམ་ཕྲུག་སོགས་གདམས་པ་སྣ་ཚོགས་ཀྱི་སྒོ་ནས་ཀྱང་། དྭངས་གསལ་ནམ་མཁའ་འདྲ་བའི་ཉམས་འཆར་ཏེ་དེ་ཀུན་འོད་གསལ་དང་ཆ་འདྲ་ཙམ་དུ་རུང་མོད་ཀྱི། རྟོགས་པ་དོན་གྱི་འོད་གསལ་དངོས་མ་ཡིན་ཏེ་ཉམས་ཡིན་ལ། ཉམས་ཞེས་པ་སེམས་ལ་གནས་ལུགས་འོད་གསལ་དེའི་རྣམ་པ་ཆ་འདྲ་ཤར་བ་སྟེ་དཔེ་ཡི་འོད་གསལ་ཡང་ཟེར་རོ། །ཡེ་ཤེས་ཀྱི་ངོ་བོ་ལ་ཉམས་ཞེས་མི་བྱ་སྟེ། དོན་གྱི་འོད་གསལ་ཞེས་བྱའོ། །དེས་ན་ཡིད་རང་མཚན་པས་བསྒོམ་བྱ་འོད་གསལ་ལམ་སྟོང་ཉིད་ཅེས་གཟུང་འཛིན་དུ་སྒོམ་པ་ཐམས་ཅད། རྣམ་པ་སྟོང་ཉིད་འོད་གསལ་གྱི་ཆ་འདྲ་ཤར་ཀྱང་རི་མོ་བྲིས་པའི་ཟླ་བ་ལྟ་བུ་ཡིན་ལ། རྫོགས་ཆེན་གྱིས་སེམས་ཉིད་ངོ་སྤྲད་པའི་དོན་བཞིན་རང་སེམས་སྐྱེ་མེད་ཀྱི་གནས་ལུགས་ཐད་ཀར་བཟོ་བཅོས་དཔྱད་ར་མི་དགོས་པར་ཐག་ཆོད་ན་དཔེ་ཡི་ཡེ་ཤེས་དངོས་ཡིན་ཏེ་ཆུ་ནང་གི་ཟླ་གཟུགས་ལྟ་བུའོ། །འདི་འདྲའི་སེམས་ཀྱི་གནས་ལུགས་ཕྱག་ཆེན་ནམ་རྫོགས་ཆེན་རྟོགས་པའི་སྒོམ་པ་པོ་རྣམས་ཀྱིས་འདི་རྗེས་དཔག་གིས་རྟོགས་པ་མ་ཡིན་ཏེ། རང་གིས་མངོན་སུམ་དུ་རྟོགས་པ་ཡིན་པས། སྐྱེས་བུ་དམ་པ་མང་པོས་ཀྱང་འདི་སྔགས་ཀྱི་མཐོང་ལམ་ཡིན་ཞེས་གསུངས། ཡོན་ཏན་བརྒྱ་ཕྲག་བཅུ་གཉིས་སོགས་མེད་པ་ནི་ལུས་རྒྱས་སྒྲིབ་པ་སོགས་སུ་འཆད། ཀློང་ཆེན་རབ་འབྱམས་གྱིས་སྔགས་ཀྱི་མཐོང་ལམ་དངོས་མིན་ཡང་ཆོས་ཉིད་དེ་བཞིན་ཉིད་དངོས་སུ་རྟོགས་པ་ཡིན། མཐོང་ལམ་ལ་ཡོན་ཏན་བརྒྱ་ཕྲག་བཅུ་གཉིས་སོགས་ཡོད་དགོས་པས། འདི་རང་རིག་མངོན་སུམ་ཡིན་ཡང་དཔེ་ཡི་ཡེ་ཤེས་སུ་བཞེད། དོན་གྱི་ཡེ་ཤེས་ཟླ་བ་དངོས་མཐོང་ལམ་དུ་བཞེད་དོ། །དེས་ན་རྟོགས་བྱ་དང་རྟོགས་བྱེད་ནོར་བ་དང་། ཚོགས་བརྒྱད་ཀྱི་ནང་ཚན་གྱི་ཡིད་དང་། ཚོགས་བརྒྱད་ལས་འདས་པའི་ཡེ་ཤེས་ཀྱི་རང་རྩལ་དཔྱོད་བྱེད་ཀྱི་ཤེས་རབ་རང་བྱུང་གཉིས། ཆོས་རྣམས་རྣམ་པར་འབྱེད་པའི་མཚན་ཉིད་དུ་མཚུངས་པས། ཡེ་ཤེས་ནི་མ་ཤར་ཞིང་། རྣམ་ཤེས་ལ་རྫོགས་ཆེན་གྱི་དོན་འཚོལ་བ་དག་གིས། རྫོགས་པ་ཆེན་པོའི་བསྟན་བྱ་གཉུག་མའི་སེམས་ཞེས་པ་ཡིད་ཕྲ་བ་ཡིན་ནོ་ཞེས་སྨྲ། དེ་ཤིན་ཏུ་ནོར་ཏེ། གཉུག་སེམས་དང་། བདེ་གཤེགས་སྙིང་པོ་དང་། འོད་གསལ་བའི་སེམས་དང་། དོན་དམ་བྱང་ཆུབ་ཀྱི་སེམས་དང་། རང་བྱུང་གི་ཡེ་ཤེས་དང་། ཆོས་ཀྱི་དབྱིངས་རྣམས་མིང་གི་ལྡོག་པས་ཐ་དད་ཀྱང་། དོན་གྱི་ཐ་མི་དད་པ་ཡིན་ལ་དེ་འདྲའི་གཉུག་མ་འོད་གསལ་བའི་སེམས་འདུས་མ་བྱས་ཀྱི་དབྱིངས་ལས་འཁོར་འདས་གཉིས་སྣང་བ་ཡིན་ཡང་། འོད་གསལ་དེ་ཉིད་དེའི་རྒྱུད་དང་འཁོར་འདས་གཉིས་སུ་གྲུབ་པ་ནི་མ་ཡིན་ནོ། །

༈ མི་ཕམ་རིན་པོ་ཆེས་མཛད་པའི་མཛོད་བདུན་དཀར་ཆག་རིན་ཆེན་མེ་ལོང་ལས། རྫོགས་ཆེན་ཁྲེགས་ཆོད་ཀྱི་ཉམས་ལེན་མཐར་ཕྱིན་པས་མ་དག་པའི་རླུང་སེམས་རང་འགགས་སུ་སོང་ནས་ལུས་རྡུལ་ཕྲན་དུ་དེངས་པ་ཡོད་ལ། འོད་གསལ་ཐོད་རྒལ་གྱི་སྣང་བཞི་མཐར་ཕྱིན་ཚེ། གདོས་བཅས་རགས་ལུས་འདི་འོད་དུ་ཡལ་ཏེ་རིག་པའི་ཡེ་ཤེས་འོད་གསལ་ཤིན་ཏུ་རྣམ་དག་གི་ངང་ལས་རང་ཤར་བའི་ཟུང་འཇུག་གི་ལྷ་སྐུ་ནམ་མཁའ་དང་མཉམ་པ་འགྲུབ་པ་ལ་འཇའ་ལུས་འོད་སྐུ་ཞེས་གསུངས་པ་འདི་རགས་ལུས་འདི་ཉིད་ཉེར་ལེན་གྱི་རྒྱུར་བྱས་ནས་སྒྲུབ་དགོས་པ་གཏན་མིན་ནོ། །རིམ་ལྔར་ཕྲ་བའི་རླུང་སེམས་ལས་སྒྱུ་མའི་སྐུ་སྒྲུབ་པ་འདི་ནི། རྣམ་ཤེས་དང་ཡེ་ཤེས། ལས་རླུང་དང་ཡེ་ཤེས་རླུང་གི་བྱེད་པ་འདྲེས་པ་ལས་སྒྲུབ་པ་ཡིན་པས། འདི་མ་དག་པ་དང་དག་པ་སློབ་པ་དང་མི་སློབ་པའི་ལྷ་སྐུར་རིམ་བཞིན་གནས་འགྱུར་དགོས་པ་ཡིན་ནོ། །སྔགས་ཕྱི་རྒྱུད་རྣམས་ལས་སྔགས་གྲུབ་པའི་མཐུས་འདོད་གཟུགས་ཀྱི་ལྷ་དང་སྐལ་པ་མཉམ་པའི་ལུས་སུ་གྱུར་ནས་མཁའ་སྤྱོད་ཀྱི་རིག་འཛིན་སོགས་གྲུབ་པ་ནི། སྔགས་ཀྱི་ལྷན་ཅིག་བྱེད་རྐྱེན་བྱས་པའི་མཐུས་རགས་ལུས་འདི་ཉིད་དྭངས་མར་གནས་གྱུར་པ་ཡིན་ཏེ། དཔེར་ན་གསེར་འགྱུར་གྱི་རྩིས་ལྕགས་ཉིད་གསེར་དུ་བསྒྱུར་བ་དང་། །བཅུད་ཀྱིས་ལེན་པས་རྒས་ལུས་གཞོན་ནུར་གྱུར་པ་བཞིན་ནོ། །དེས་ན་འདི་གསུམ་ལ་ཕྲ་རགས་དང་དག་མ་དག་གི་ཁྱད་པར་གནམ་ས་ལྟར་ཡོད་པ་ཤེས་ན། འཕགས་སྐོར་རིམ་ལྔའི་སྒྱུ་ལུས་བསྒྲུབ་ཚུལ་ཤེས་པས་རྙིང་མའི་འཇའ་ལུས་ཟེར་བ་བྱེ་མའི་འཆིང་བུ་ལྟར་འཇིག་ཟེར་བ། རྫོགས་ཆེན་གྱི་ཆོས་ལ་རྒྱུས་མེད་པའི་བབ་ཅོལ་གྱི་གཏམ་ཡིན་པའི་མཚངས་མངོན་དུ་རྟོགས་པར་འགྱུར་རོ། །རྫས་དང་སྔགས་དང་ཏིང་ངེ་འཛིན་དང་ལྷ་ཡི་ནུས་པས་རགས་ལུས་དྭངས་མར་སྦྱོང་ནུས་ན། མཚན་བཅས་ཐབས་ཀྱི་རྫོགས་རིམ་ཀུན་གྱི་བླ་མར་གྱུར་པ། མཚན་མ་མེད་པའི་རྫོགས་རིམ་ཨ་ཏིའི་ལམ་གྱིས། ཆོས་ཉིད་གཉུག་མའི་དོན་དང་། རང་བཞིན་འོད་གསལ་གྱི་སྣང་བ་དངོས་ཡུལ་དུ་བྱས་ཤིང་གོམས་པའི་མཐུ་ཡིས་རགས་ལུས་སྦྱོང་ནུས་པ་ལྟ་ཅི་སྨྲོས། དེས་ན་འདི་ལ་ཐེ་ཚོམ་སྐྱེ་བའི་གནས་ཅུང་ཟད་ཀྱང་མེད་དོ། །དེར་མ་ཟད་ཐུན་མོང་གི་ཐེག་པར་བརྟེན་ནས་འབྱུང་བའི་སྣང་བ་དང་རང་བཞིན་མེད་པའི་སྟོང་པ་ཉིད་བདེན་གཉིས་ཟུང་འཇུག་ཏུ་བཤད་པ་ལམ་གྱི་སྙིང་པོ་ཡིན་ལ། སྔགས་བླ་མེད་དུ་རྫོགས་པའི་རིམ་པ་ཟབ་མོའི་ཐབས་ལས་ཤར་བའི་སྒྱུ་ལུས་དང་འོད་གསལ་བའི་བདེན་གཉིས་ཟུང་དུ་འཇུག་པ་འདི་ལམ་གྱི་དངོས་གཞི་ཡིན་ཞིང་། འདི་ནི་རྒྱུ་ཡི་ཐེག་པ་ལས་སྦས་པའང་ཡིན་ནོ། །དེ་ལྟ་བུའི་བདེན་གཉིས་དེ་དག་གི་གནད་མཐར་ཐུག་པ་ནི། ཆོས་ཐམས་ཅད་ཀྱི་གནས་ལུགས་ངོ་བོ་ཀ་ནས་དག་པའི་སྟོང་ཉིད་འོད་གསལ་དང་། རང་བཞིན་ལྷུན་གྲུབ་ཏུ་གསལ་བའི་རང་གདངས་འགག་མེད་གཉིས་ཟུང་དུ་འཇུག་པ་རྫོགས་པ་ཆེན་པོར་ལ་བཟླ་དགོས་པ་ཡིན་པས། ཨ་ཏི་ཡོ་གའི་དགོངས་པ་འདི་དག་མཐར་ཐུག་ངེས་པའི་དོན་ཡིན་ཕྱིར། མདོ་སྔགས་ཐམས་ཅད་ཀྱི་འབྲས་བུ་འདི་རང་ལ་ཐུག་པ་ཤེས་པར་བྱའོ། །ཞེས་གསུངས་སོ། །

༈ གང་ཟག་གི་བློ་རིམ་དང་མཐུན་པར། མ་རྟོགས་པ་འཇིག་རྟེན་ཕྱལ་བ་དང་། རྒྱང་འཕེན་གཉིས། ལོག་པར་རྟོག་པ་ཕྱི་རོལ་མུར་རྟུག་པ་དང་། མི་སྟེགས་གཉིས། ཕྱོགས་ཙམ་རྟོགས་པ་ཉན་ཐོས་དང་། རང་རྒྱལ་བ་གཉིས། ཡང་དག་ཉིད་མ་རྟོགས་པ་ཕ་རོལ་ཏུ་ཕྱིན་པའི་ཚུལ་ལ་གནས་པའི་བྱང་སེམས། འདུལ་བ་བྱ་བའི་རྒྱུད། དགོངས་པ་རྣལ་འབྱོར་གྱི་རྒྱུད། གསང་བ་རྣལ་འབྱོར་ཆེན་པོའི་ཚུལ། སྔགས་ནང་པ་བསྐྱེད་རྫོགས་གཉིས། རང་བཞིན་གསང་བ་རྫོགས་པ་ཆེན་པོའི་ཚུལ་ཏེ། འཇིག་རྟེན་ལས་འདས་མ་འདས་ཀྱི་ལྟ་བ་དང་། ཁྱད་པར་དུ་ཉན་རང་བྱང་སེམས་ཏེ་མཚན་ཉིད་ཀྱི་ཐེག་པ་གསུམ་དང་། བྱ་སྤྱོད་རྣལ་འབྱོར་ཏེ་སྔགས་ཕྱི་པ་གསུམ་དང་། བསྐྱེད་རྫོགས་རྫོགས་ཆེན་ཏེ་ནང་པ་གསུམ་དང་བཅས་པའོ། །ཕྱལ་བ་ནི། འདི་ལྟར་ཕྱི་ནང་གི་ཆོས་འདི་དག་ཐམས་ཅད་གང་འབྱུང་བའི་རྒྱུ་དང་གང་ལས་འབྱུང་བའི་འབྲས་བུ་འདི་དག་ཡོད་པའམ་མེད་པ་དག་ཏུ་ཡང་མ་རྟོགས་ཏེ་རང་གར་གནས་པ་སྟེ་དེ་དག་ནི་རྒྱུ་འབྲས་ལ་ཀུན་ཏུ་རྨོངས་པའི་མ་རིག་པ་དང་མཚུངས་པར་ལྡན་པའོ། །རྒྱང་འཕེན་ནམ་རྒྱང་ཕན་པ་ནི། ཚེ་སྔ་ཕྱི་ཡོད་པའམ་མེད་པ་དག་ཏུ་མ་རྟོགས་ཤིང་ཚེ་གཅིག་ལ་བཙན་ཕྱུག་དང་མཐུ་སྟོབས་སྒྲུབ་པ་ཡི་ཐབས་སྣ་ཚོགས་པ་ལ་འབད་པར་བྱེད་པ་སྟེ། དེ་ཡང་རྣམ་གྲོལ་གྱི་སྒོར་མ་གྱུར་པ་འཇིག་རྟེན་པས་བཤད་པ། འཇིག་རྟེན་གྱི་བྱ་བ་སྒྲུབ་པ་འཚོ་རྩིས་དང་སྲིད་སྐྱོང་དཔྱད་སོགས་དང་། གར་ཤིའི་ངན་སྔགས་དང་མོ་བོན་འདྲེ་མནན་ས་བདག་མཆོད་པ་གཡང་ལེན་སོགས་རང་ངམ་གཞན་ལ་བྱེད་དུ་འཇུག་པ་ལྟ་བུ་འཇིག་རྟེན་པའི་གསང་ཚིག་ལ་བརྟེན་པའོ། །མུར་ཐུག་པ་ནི། ལྟ་ཡུལ་ཤེས་བྱའི་ཆོས་ཐམས་ཅད་ལ་རྒྱུ་དང་འབྲས་བུ་མེད་པ་སྟེ། དེ་ཡང་ཚེ་གཅིག་ལ་སྐྱེས་པའི་ཆོས་ཐམས་ཅད་ཚེ་སྔ་མའི་ལས་ཀྱིས་མ་འཕངས་བར་སྤང་ལ་ཤྭ་མོ་དང་ཆུ་ལ་ཆུ་བུར་བཞིན་གློ་བུར་དུ་སྐྱེས་ལ་མཐའ་མར་མེ་རྒྱུན་ཆད་པ་ལྟར་ཆད་པར་བལྟ་བའོ། །མུ་སྟེགས་པ་ནི་རྟག་པར་སྨྲ་བའོ། །དེ་ཡང་འོད་སྲུང་གིས་ཞུས་པའི་མདོ་ལས། མུར་ཐུག་ནི་ཕྱི་རོལ་པ་ཐུན་མོང་དུ་བཤད་པ་དང་། མུ་སྟེགས་ཀྱང་རྟག་ཆད་དུ་སྨྲ་བའི་ཕྱི་རོལ་པ་སྤྱི་ལ་འཇུག་ཀྱང་། འདིར་དེ་གཉིས་རིམ་པ་ལྟར་ཆད་པ་དང་རྟག་པར་སྨྲ་བའི་ཕྱི་རོལ་པ་སྤྱི་མིང་དུ་སྦྱར་བར་བྱས་ན་སྒྲ་དོན་ལེགས་པར་འཕྲོད་ཅིང་གཞུང་འདིའི་དགོངས་པ་ཡིན་ནོ། །རྟག་ཆད་ཀྱི་ལྟ་བ་དེ་གཉིས་ཀྱི་ཁོངས་སུ་ཕྱི་རོལ་བའི་འདོད་པའི་རྟག་ཆད་ཀྱི་རྣམ་པ་མ་ལུས་པ་ཟད་པར་འདུའོ། །ཟག་མེད་ཀྱི་ལམ་དང་རྗེས་སུ་འབྲེལ་བ་འཇིག་རྟེན་ལས་འདས་པའི་ལམ་ལའང་དབྱེ་ན་རྣམ་པ་གཉིས་ཏེ། ཆོས་རྣམས་ཀྱི་རང་སྤྱི་དང་། ཀུན་བྱང་གི་མཚན་ཉིད་རྣམས་སོ་སོར་མ་འདྲེས་པར་སྟོན་ཅིང་དེ་ལ་སྤང་བླང་དུ་སྟོན་པ་མཚན་ཉིད་ཀྱི་ཐེག་པ་དང་ཀུན་བྱང་གཉིས་ངོ་བོ་དབྱེར་མེད་སྐུ་གསུང་ཐུགས་ཀྱི་དཀྱིལ་འཁོར་དུ་མི་ཕྱེད་པར་སྟོན་པ་རྡོ་རྗེའི་ཐེག་པའོ། །མཚན་ཉིད་ཀྱི་ཐེག་པ་ལའང་སྐལ་བ་དང་མོས་པ་དབང་པོའི་བྱེ་བྲག་གིས་མཚན་ཉིད་དེ་ལ་མངོན་པར་ཞེན་མ་ཞེན་གྱི་དབང་གིས་རྣམ་པ་གསུམ་སྟེ། རང་ཉིད་ཀྱི་གདམས་ངག་གཞན་ལས་ཉན་ཞིང་གཞན་ལ་ཐོས་པར་བྱེད་པ་ཉན་ཐོས་ཀྱི་ཐེག་པ་དང་། སྲིད་པ་ཐ་མའི་དུས་སུ་རང་ཉིད་ཀྱི་བདེན་པའི་འབྲས་བུ་ཁོང་དུ་ཆུད་པ་རང་སངས་རྒྱས་ཀྱི་ཐེག་པ་དང་། བྱང་ཆུབ་ཀྱི་ཕྱིར་བསམ་པ་བརྟན་པའམ་བྱང་ཆུབ་དང་སེམས་ཅན་ལ་དམིགས་པ་ཡོད་པས་བྱང་ཆུབ་སེམས་དཔའི་ཐེག་པའོ། །རྡོ་རྗེ་ཐེག་པ་དེ་ལའང་དབྱེ་ན་རྣམ་པ་གསུམ་སྟེ། ནང་གི་ཏིང་ངེ་འཛིན་རྒྱུའི་གཙོ་བོ་ཡིན་མོད་ཀྱི་ཕྱིའི་གཙང་སྦྲ་དང་དཀའ་ཐུབ་སོགས་ཀྱི་བྱ་བ་ལ་མ་ལྟོས་པར་དངོས་གྲུབ་མི་ཐོབ་པར་འདོད་པ་བྱ་བའི་རྒྱུད་ཀྱི་ཐེག་པ་དང་། ཕྱིའི་བྱ་བ་དང་ནང་གི་ཏིང་ངེ་འཛིན་གཉིས་ཀས་གྲུབ་པར་འདོད་པ་གཉིས་ཀའི་རྒྱུད་ཀྱི་ཐེག་པ་དང་། ཕྱིའི་བྱ་བ་ལ་མ་ལྟོས་ཀྱང་ནང་གི་ཏིང་ངེ་འཛིན་འབའ་ཞིག་གིས་གྲུབ་པར་འདོད་པ་རྣལ་འབྱོར་རྒྱུད་ཀྱི་ཐེག་པའོ། །རྣལ་འབྱོར་ནང་པ་ཐབས་ཀྱི་རྒྱུད་ཀྱི་ཐེག་པ་ལ་ཞུགས་པ་རྣམས་ཀྱི་ལྟ་བ་ནི་རྣམ་པ་གསུམ་སྟེ། ཐབས་བསྐྱེད་པ་གཙོ་བོར་སྟོན་པ་བསྐྱེད་པའི་ཚུལ་མ་ཧཱ་ཡོ་ག་དང་། ཤེས་རབ་རྫོགས་རིམ་ཤས་ཆེར་སྟོན་པ་རྫོགས་པའི་ཚུལ་ཨ་ནུ་ཡོ་ག་དང་། གཉིས་མེད་ཟུང་འཇུག་གཙོ་བོར་སྟོན་པ་ཨ་ཏི་རྫོགས་པ་ཆེན་པོའི་ཚུལ་ལོ། །

༈ ཕྱོགས་བཅུའི་མུན་སེལ་ལས། སེམས་ལ་དབང་མ་ཐོབ་ཀྱི་བར་དུ་ནི་རྐྱེན་དང་ལས་ཀྱི་རྗེས་སུ་བྱེད་ལ། དེ་ཕན་ཆད་ནི་དུས་ཀྱང་ཅི་དགར་སྣང་སྟེ་རིང་བ་ཐུང་བར་བསྒྱུར་ཅིང་ཐུང་བ་རིང་བར་འཕྲུལ་བ་ལ་སོགས་པ་ཡོད་དེ། དུས་ཀྱང་སེམས་ཀྱི་སྣང་བ་ཙམ་ཡིན་པའི་ཕྱིར་རོ། །དེ་སྐད་དུའང་དྲི་མ་མེད་པར་གྲགས་པས་བསྟན་པའི་མདོ་ལས། དུས་ཐུང་བར་འདོད་པ་རྣམས་ལ་བསྐལ་པ་མང་པོ་ཞག་བདུན་གྱིས་འདའ་བར་བྱིན་གྱིས་རློབས་སོ། །ཞེས་པ་ལ་སོགས་པ་གསུངས་སོ། །དེའི་ཕྱིར་འཕགས་པའི་གོ་འཕང་ཐོབ་པ་ཚུན་ཆད་ལ་ལམ་ཟབ་པའི་ཟབ་ལ་སོགས་པ་ཉེ་རིང་དུ་སྣང་ཡང་། དེ་ཕན་ཆད་སེམས་ལ་དབང་ཐོབ་པས་ཇི་ཙམ་གྱིས་གྲོལ་བར་རང་དབང་ཡོད་དེ། ཡུམ་བར་མ་ལས། རབ་འབྱོར་གང་གི་ཚེ་ཆོས་རྣམས་ལ་ཆོས་ཀྱི་མིག་དྲི་མ་མེད་པ་ཐོབ་པ་དེའི་ཚེ་འདོད་ན་ཞག་བདུན་གྱིས་བླ་ན་མེད་པའི་བྱང་ཆུབ་ཏུ་འཚང་རྒྱ་ལ། འདོད་ན་བསྐལ་པ་བྱེ་བ་ཁྲག་ཁྲིག་རབ་ཏུ་མང་པོས་ཀྱང་བླ་ན་མེད་པའི་བྱང་ཆུབ་ཏུ་འཚང་རྒྱ་སྟེ། འདི་ཡང་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱིས་ཐབས་ལ་མཁས་པའི་ཁྱད་པར་དང་པོའོ། །ཞེས་གསུངས། །

༈ ཆོས་ཐམས་ཅད་གདོད་ནས་རྣམ་པར་དག་པ་དང་། རང་བཞིན་གྱིས་མྱ་ངན་ལས་འདས་པ་དང་། མངོན་པར་རྫོགས་པར་སངས་རྒྱས་པ་དང་། རང་བཞིན་གྱིས་འོད་གསལ་བ་དང་། ཡེ་ནས་མ་སྐྱེས་མ་འགགས་པའི་མཉམ་པ་ཉིད་ཀྱི་ངོ་བོས་ཐམས་ཅད་ཐིག་ལེ་ཉག་གཅིག་ཆོས་དབྱིངས་འོད་གསལ་སྒྲིབ་བྲལ་ཆེན་པོར་རོ་མཉམ་དུ་སྒོམ་པ་ནི་མཉམ་བཞག་ཡེ་ཤེས་ཀྱི་ངོ་བོའོ། །དེའི་ཚུལ་ཇི་ལྟ་བུ་ཞེ་ན། འདི་ལྟར་གཟུགས་ཀྱི་དག་པ་ཞེས་པས་མཚོན་ཏེ་ཤེས་བྱའི་ཡུལ་གཟུགས་ནས་རྣམ་མཁྱེན་གྱི་བར་གྱི་ཆོས་ཐམས་ཅད་ནི་ཡེ་ནས་གཟུང་བ་དང་འཛིན་པ་ཀུན་ཉོན་དང་རྣམ་བྱང་བདག་དང་གཞན་དངོས་དང་དངོས་མེད་ལ་སོགས་པའི་གཉིས་ཆོས་ཀྱི་རང་བཞིན་གང་དུའང་མ་གྲུབ་པ་ཆོས་དབྱིངས་ཐིག་ལེ་ཉག་གཅིག་གདོད་ནས་སྐྱེ་འགག་དང་བྲལ་བའི་མཉམ་པ་ཉིད་རང་བཞིན་རྣམ་དག་སྒྲིབ་བྲལ་ཆེན་པོར་གནས་སུ་ཟིན་ཀྱང་། དེ་ལྟར་མ་རྟོགས་པའི་འཁྲུལ་བ་གློ་བུར་བ་སྐྱེས་པའི་ཚེ་ན་བདག་དང་ཆོས་སུ་སྒྲོ་འདོགས་པའི་བློ་དྲི་མ་ཅན་གྱི་ངོར་ཡུལ་ཀྱང་མ་དག་པ་ལྟར་སྣང་ལ་བློས་ཀྱང་དེ་ལྟར་བཟུང་བས་ཀུན་ནས་ཉོན་མོངས་པའི་ཕྱོགས་ཀྱི་དྲི་མ་དང་སྒྲིབ་པ་ཡོད་པ་ལ་མ་དག་པའི་སེམས་ཅན་ཞེས་བྱའོ། །གློ་བུར་གྱི་དྲི་མ་དེ་བསལ་བའི་ཕྱིར་ཐེག་པ་གསུམ་གྱི་ལམ་བསྟན་པ་དེ་ལ་ཞུགས་པས་ཆོས་ཉིད་ཀྱི་གནས་ལུགས་རང་བཞིན་རྣམ་དག་དེ་ཇེ་གསལ་དུ་མཐོང་བའི་ཚུལ་ལས་འདི་ལྟར་ཉན་ཐོས་ཀྱི་འབྲས་བུ་བཞི་དང་རང་རྒྱལ་བའི་འབྲས་བུ་དང་བྱང་ཆུབ་སེམས་དཔའི་མཐོང་ལམ་དང་སྒོམ་ལམ་ས་དགུའི་རྟོགས་པ་སྐྱེས་ཏེ་སྤང་བྱའི་དྲི་མ་རྣམས་སྤང་བའི་ཆ་ནས་དག་པ་ཆུང་འབྲིང་ཆེན་པོ་ཞེས་སུ་བརྗོད་དེ་དེ་དག་ནི་དྲི་མ་ཅི་རིགས་པར་དག་པའི་སེམས་ཅན་ཞེས་བྱའོ། །དེ་ཡང་ཡུལ་གཟུགས་སོགས་ཀྱི་རང་བཞིན་ལ་ཡེ་ནས་མ་དག་པ་མེད་ཀྱང་། ཕྱིན་ཅི་ལོག་ཏུ་བཟུང་བའི་དྲི་མ་གློ་བུར་བ་རྣམས་དག་པའི་རིམ་པ་དང་མཚུངས་པར་མིག་སྐྱོན་དག་པས་ཡུལ་ཇེ་གསལ་དུ་མཐོང་བ་ལྟར་ཡུལ་ཅན་དེས་ཡུལ་གྱི་དག་པ་མཐོང་ལ་དེ་མཐོང་བའི་དབང་གིས་ཡུལ་ཅན་དེའང་དག་པ་ཞེས་བརྗོད་པ་ལས་ཐ་དད་དུ་དག་ཚུལ་གཞན་མེད་དེ། འདི་ལྟར་སྣང་ཚུལ་ལ་ནི་ཡུལ་ཅན་ཇེ་དག་ཏུ་སོང་བ་དང་ཡུལ་ཀྱང་གསར་དུ་དག་པར་སྣང་བ་ལྟར་ཡོད་ཀྱང་། གནས་ཚུལ་ལ་ནི་ཡུལ་གཟུ༵གས་སོགས་ཀྱི་༵རང་བཞིན་ཡེ་ནས་དག༵་པ༵་མཐོང་བ་དེ་ཉིད་ཡུལ་ཅན་གློ་བུར་གྱི་དྲི་མ་ལས་གྲོལ་བ་འབྲས༵་བུ༵་ཡི་དག༵་པ་ཉིད་ཡིན་པར༵་ཤེས༵་པར༵་བྱ༵་སྟེ། དེ་གཉིས་ཡེ་ནས་ཡུལ་ཡུལ་ཅན་གཉིས་སུ་མེད་པར་དག་པ་ཆེན་པོར་གནས་པའི་གནད་ལ་དོན་གཅིག་པས་དག་པ་དེ་གཉིས་ངོ་བོ་ཐ་མི་དད་དུ་ཤེས་པར་བྱའོ། །དེ་བཞིན་དུ་འབྲས༵་བུ༵་དག་པ་དང་གཟུགས༵་སོགས་ཀྱི་དག༵་པ་དེ་ཉིད་གློ་བུར་བྲལ་དག་གི་མཐར་ཐུག་པ་སྒྲིབ་གཉིས་ཡོངས་སུ་སྤང་བའི་ཤིན་ཏུ་རྣམ་པར་དག་པ་ཐམས༵་ཅད༵་མཁྱེན༵་པའི་ཡེ་ཤེས་ཉིད༵་ཀྱི་དག༵་པར༵་འགྱུར༵་ཏེ་དག་པ་དེ་ཐམས་ཅད་རྩ་བ་རང་བཞིན་རྣམ་དག་གི་དོན་ལ་གནད་གཅིག་པ་བཤད་མ་ཐག་པ་བཞིན་ནོ། །དེ་ལྟར་དག་པ་མཐར་ཐུག་པ་ཐམས༵་ཅད༵་མཁྱེན༵་པ་ཉིད༵་གྱི་དག་པ་དང་། གནས་སྐབས་ཀྱི་ལམ་སོ་སོའི་འབྲས་བུ་ཐོབ་པའི་དག༵་པ༵་དང༵་། གཞི་གཟུགས༵་སོགས་ཕུང་ཁམས་སྐྱེ་མཆེད་ཀྱི་ཆོས་རྣམས་ཀྱི་དག་༵པ༵་གསུམ་པོ་འདི་ནི་སྣང་ཚུལ་ལ་ཐ་དད་དུ་བཞག་ཀྱང་། གནས་ཚུལ་ལ་ནམ༵་མཁའི༵་ཁམས༵་ལ་ཐ་དད་མེད་པ་དང༵་མཚུངས་༵ཏེ༵་ཆོས་དབྱིངས་རང་བཞིན་གྱིས་རྣམ་པར་དག་པ་གཅིག་གི་ངོ་བོར་དབྱེར༵་མེད༵་ལ་བློས་ཀྱང་ཐ་དད་དུ་གཅད༵་དུ༵་མེད༵་དེ། ཆོས་ཉིད་རྣམ་དག་དེའི་རང་བཞིན་ཇི་ལྟ་བ་བཞིན་དུ་མངོན་སུམ་གཟིགས་པ་སངས་རྒྱས་ཀྱི་ཡེ་ཤེས་ངོར། ཆོས་ཐམས་ཅད་མངོན་པར་སངས་རྒྱས་པའམ་གདོད་ནས་མྱ་ངན་ལས་འདས་པའི་རང་བཞིན་དུ་གཟིགས་པས་མ་དག་པ་མེད་ལ། དེ་ལྟར་རྟོགས་པའི་ཡེ་ཤེས་དེའང་གློ་བུར་གྱི་དྲི་མ་བག་ཆགས་དང་བཅས་པའི་སྒྲིབ་པ་མཐའ་དག་གཏན་ནས་སྤངས་པའི་དག་པ་མཐར་ཐུག་པ་ཡིན་པས། དེས་ཇི་ལྟར་གཟིགས་པ་ལྟར་ཆོས་ཐམས་ཅད་ཡུལ་དང་ཡུལ་ཅན་ལ་སོགས་པའི་གཉིས་ཆོས་ཀྱི་རང་བཞིན་དུ་མེད་པར་གཉིས་མེད་མཉམ་པ་ཆེན་པོར་ཡེ་ནས་དག་ཅིང་སངས་རྒྱས་པ་ཉིད་དུ་དབྱེ་བ་མེད་པར་རོ་གཅིག་ཏུ་ཤེས་པ་ནི་ཤེས་རབ་ཀྱི་ཕ་རོལ་ཏུ་ཕྱིན་པའི་དགོངས་པ་མཐར་ཐུག་པ་ཡིན་ལ། གཤིས་རྣལ་མ་དེའི་དོན་བབ་ཀྱིས་ཅོག་བཞག་ཏུ་སྐྱོང་བའི་ཚུལ་ཡང་། འདི་ལ་བསལ་བྱ་ཅི་ཡང་མེད། །གཞག་པར་བྱ་བ་གང་ཡང་མེད། །ཡང་དག་ཉིད་ལ་ཡང་དག་བལྟ། །ཡང་དག་མཐོང་ནས་རྣམ་པར་གྲོལ། །ཞེས་པ་བཞིན་དུ་ཤེས་པར་བྱའོ། །རྒྱུད་བླ་མ་ལས། མ་དག་མ་དག་དག་པ་དང་། །ཤིན་ཏུ་རྣམ་དག་གོ་རིམ་བཞིན། །སེམས་ཅན་བྱང་ཆུབ་སེམས་དཔའ་དང་། །དེ་བཞིན་གཤེགས་ཞེས་མཚན་གསོལ་ཏོ། །ཞེས་པ། མི་ཕམ་རིན་པོ་ཆེའི་རྒྱུད་བླའི་ཕྱག་མཆན་ལས། གློ་བུར་གྱི་དྲི་མ་ལ་ལྟོས་ནས་ཁམས་དེ་དྲི་མས་མ༵་དག༵་པའི་སྐབས་དང་། མ༵་དག༵་དག༵་པ༵་གཉིས་ལྡན་གྱི་སྐབས་དང༵་། ཤིན༵་ཏུ༵་རྣམ༵་པར་དག༵་པའི་གནས་སྐབས་ན་གོ༵་རིམ༵་བཞིན༵་དུ་སེམས༵་ཅན༵་དང་། བྱང༵་ཆུབ༵་སེམས༵་དཔའ༵་དང་༵། དེ་༵བཞིན༵་གཤེགས༵་པ༵་ཞེས༵་པའི་མིང་གསུམ་གྱིས་བརྗོད༵་ཅིང་བསྟན་ཏོ༵། ཞེས་གསུངས། །

༈ དོན་རྣམ་པར་ངེས་པ་ཤེས་རབ་རལ་གྲི་ལས། དངོས་པོར་དམིགས་དང་དངོས་མེད་དམིགས། །གཉིས་སུ་དམིགས་དང་གཉིས་མིན་དམིགས། །ཇི་ལྟར་དམིགས་ཀྱང་དམིགས་པ་སྟེ། །དམིགས་པས་གང་བཟུང་བདུད་ཀྱི་ནི། །སྤྱོད་ཡུལ་ཡིན་ཞེས་མདོ་ལས་གསུངས། །ཞེས་དངོས་པོར་དམིགས་པ་དང་། དེ་བཀག་པའི་དངོས་མེད་དུ་དམིགས་པ་དང་། གཉིས་ཀ་མིན་པར་དམིགས་པ་སོགས་ཇི་ལྟར་དམིགས་ཀྱང་སེམས་ཀྱི་གཡོ་བ་ཡོད་པས་དམིགས་པ་སྟེ། དམིགས་པ་དངོས་མེད་དང་དངོས་པོ་སོགས་གང་ཞིག་བཟུང་ཡང་བདུད་ཀྱི་ནི་སྤྱོད་ཡུལ་ཡིན་ཞེས་འཇམ་དཔལ་རྣམ་པར་རོལ་བའི་མདོ་དང་། ལང་ཀར་གཤེགས་པའི་མདོ་སོགས་ལས་གསུངས་སོ། །གློག་སྒྲོན་ལས། རྟེན་ཅིང་འབྲེལ་བར་འབྱུང་བའི་དབང་གིས་བྱུང་བའི་ཀུན་བྱང་གི་ཆོས་ཐམས་ཅད་མ་བརྟག་ཉམས་དགའ་ཙམ་དུ་སྣང་ཡང་། དོན་དམ་པར་རང་བཞིན་གྱི་གྲུབ་པ་མེད་པས། གང་སྣང་བའི་གཟུགས་སོགས་ཆོས་ཐམས་ཅད་རང་བཞིན་གྱིས་སྟོང་པས་གཟུགས་སྟོང་པ་དང་། གནས་སྐབས་རྟེན་འབྲེལ་གྱི་སྣང་བ་མ་འགགས་པར་ཤར་བས་སྟོང་པ་ཉིད་གཟུགས་དང་། སྣང་ཙམ་ཉིད་ན་ངོ་བོ་སྟོང་ཉིད་ལས་མ་གཡོས་པས་གཟུགས་ལས་ཀྱང་སྟོང་པ་ཉིད་གཞན་མ་ཡིན་པ་དང་། ངོ་བོ་སྟོང་ཉིད་ལས་མ་གཡོས་པར་གཟུགས་སོགས་སུ་སྣང་བས་སྟོང་པ་ཉིད་ལས་ཀྱང་གཟུགས་གཞན་མ་ཡིན་པ་སྟེ་སྟོང་ཉིད་བཞི་སྦྱོར་གྱི་དགོངས་པ། འཕགས་པ་ཀླུས། ཀུན་རྫོབ་དང་ནི་དོན་དམ་དག །སོ་སོའི་ཆར་ནི་ཤེས་གྱུར་ཏེ། །གང་དུ་ཡང་དག་འདྲེས་གྱུར་པ། །ཟུང་དུ་འཇུག་པར་དེ་བཤད་དོ། །ཞེས་གསུངས། མི་ཕམ་རིན་པོ་ཆེས། མཉམ་པ་ཉིད་ལ་ངེས་པ་རིམ་གྱིས་སྐྱེ་བའི་དབང་དུ་ན། ལས་དང་པོ་བས༴སོགས།

༈ རྒྱུ་གང་གིས་འབྲས་བུ་གང་བསྐྱེད་པའི་བྱ་བ་བྱེད་པ་ཐམས་ཅད་ལ་ནི་བྱ་བ་བྱེད་པའི་རིག་པ་ཞེས་བྱ་ཞིང་། མྱུ་གུ་ལ་སོགས་པ་འབྲས་བུར་གྱུར་པ་ཐམས་ཅད་ནི་རང་རང་གི་རྒྱུ་རྣམས་ལ་ངེས་པར་ལྟོས་པ་ཅན་ཡིན་པ་ནི་ལྟོས་པའི་རིགས་པའོ། །དེ་ལྟར་རྒྱུ་གང་གིས་འབྲས་བུ་གང་བསྐྱེད་པའི་བྱ་བ་བྱེད་པར་གྱུར་པ་དང་འབྲས་བུ་དེ་རྒྱུ་དེ་ལ་ལྟོས་པ་རྣམས་ནི་ཕན་ཚུན་རྒྱུ་འབྲས་སུ་རུང་བའི་གནས་ཡིན་པ་སྟེ། དགེ་བའི་ལས་ཀྱིས་བདེ་འབྲས་དང་། མི་དགེ་བས་སྡུག་བསྔལ་བསྐྱེད་པའམ། འབྲས་ཀྱི་ས་བོན་ལས་འབྲས་ཀྱི་མྱུ་གུ་སྐྱེ་བ་ལ་སོགས་པ་ལྟ་བུའོ། །དེ་ལས་ལྡོག་པ་སྐྱེད་པར་མི་བྱེད་པ། དགེ་བས་སྡུག་བསྔལ་དང་། མི་དགེ་བས་བདེ་བ། ནས་ཀྱི་ས་བོན་ལས་འབྲས་ཀྱི་མྱུ་གུ་སྐྱེ་བ་ལྟ་བུ་གནས་མ་ཡིན་ནོ། །རིགས་པ་དང་པོ་འདི་གཉིས་ཀྱིས་ཆོས་ཐམས་ཅད་ལ་གནས་དང་གནས་མིན་ཤེས་པའི་སྒོ་ནས་དགག་སྒྲུབ་དང་འཇུག་ལྡོག་བྱེད་པ་ཡིན་པའི་ཕྱིར། བཟོ་ཡི་གནས་སོགས་རིག་བྱེད་ཐམས་ཅད་དང་། འཇིག་རྟེན་དང་འཇིག་རྟེན་ལས་འདས་པའི་གྲུབ་མཐའ་ཐམས་ཅད་ཀྱང་ཚུལ་འདི་གཉིས་གྱིས་སྒོ་ནས་རྣམ་པར་དཔྱོད་པའི་རྩ་བ་ཅན་ནོ། །དེས་ན་གནས་དང་གནས་མིན་ཤེས་པ་ལ་ཇི་ཙམ་མཁས་པ་དེ་ཙམ་དུ་རིག་བྱེད་དང་གྲུབ་མཐའི་ཚུལ་རྣམ་པར་དག་ཅིང་བཟང་བར་འགྱུར་རོ། །ཆོས་ཉིད་ཀྱི་རིགས་པ་ནི། ཐ་སྙད་དུ་ཆོས་རྣམས་རང་རང་གི་ངོ་བོ་ཉིད་ཀྱིས། ས་སྲ་བ་དང་ཆུ་གཤེར་བ་དང་ནམ་མཁའ་མི་སྒྲིབ་པ་སོགས་སུ་གནས་པ་སྟེ། དེ་ཡང་བུམ་པ་ལྟ་བུའི་ཆོས་གཅིག་ལ་ཡང་། མི་རྟག་པ་ཡིན་པ། བེམ་པོ་ཡིན་པ་སོགས་སྒྲུབ་པའི་རྣམ་བཞག་དུ་མ་དང་། ཤེས་པ་མ་ཡིན་པ་རྟག་པ་མ་ཡིན་པ་སོགས་སེལ་བའམ་དགག་པའི་ཆ་ནས་བཞག་པའི་རྣམ་བཞག་དུ་མའི་ཆོས་ཡོད་ཀྱང་མདོར་བསྡུ་ན་མངོན་སུམ་གྱི་ཡུལ་དུ་གྱུར་པའི་རང་མཚན་རྫས་ཡོད་བུམ་པ་ལྟ་བུ་ལ། གཞན་བསལ་བའི་སྒོ་ནས་བཏགས་པའི་བྱས་མི་རྟག་སོགས་ཀྱི་ལྡོག་པ་ཐ་དད་པའི་རྣམ་བཞག་སྣ་ཚོགས་པར་རྟོག་པ་དང་བཅས་པའི་ཡིད་ཀྱིས་སྦྱོར་བར་བྱེད་པ་ཡིན་པས་རྫས་བཏགས་ཀྱི་ཚུལ་གཉིས་སུ་འདུ་ཞིང་དེ་ལས་རང་མཚན་དང་སྤྱི་མཚན། སྤྱི་དང་བྱེ་བྲག །འགལ་འབྲེལ་དང་། མཚན་མཚོན་ལ་སོགས་པའི་ཐ་སྙད་དོན་མཐུན་གྱི་རྣམ་བཞག་སྣ་ཚོགས་བྱས་པ་ལ་བརྟེན་ནས་དོན་མཐའ་དག་ལ་མི་རྨོངས་པར་འགྱུར་རོ། །དེ་ལྟར་རྒྱུ་འབྲས་ངོ་བོ་ཉིད་གསུམ་དུ་བཞག་པ་དེ་ནི་ཐ་སྙད་དཔྱོད་པའི་སྐབས་ཀྱི་རིགས་པ་གསུམ་ཡིན་ལ། དོན་དམ་པར་ནི་རྡོ་རྗེ་གཟེག་མའི་གཏན་ཚིགས་ཀྱིས་དཔྱད་ན་རྒྱུ་གང་གིས་འབྲས་བུ་གང་བསྐྱེད་པ་མི་དམིགས་ལ། ཡོད་མེད་སྐྱེ་འགོག་གིས་དཔྱད་ན་འབྲས་བུ་རྣམས་རྒྱུ་ལ་ལྟོས་ཏེ་སྐྱེ་བ་ཡང་མེད་ཅིང་། གཅིག་དུ་བྲལ་སོགས་ཀྱི་རིགས་པས་དཔྱད་ན། སྲ་བ་ལ་སོགས་པའི་ངོ་བོ་ཉིད་གང་ཡང་མི་འགྲུབ་པས། རྒྱུ་མཚན་མ་མེད་པ། འབྲས་བུ་སྨོན་པ་མེད་པ། ངོ་བོ་སྟོང་པ་ཉིད་དེ་རྣམ་ཐར་སྒོ་གསུམ་གྱི་རང་བཞིན་དུ་གནས་པ་ནི་དོན་དམ་པའི་ཆོས་ཉིད་དོ། །བྱ་བྱེད་ལྟོས་པ་གཉིས་ཀྱང་ཐ་སྙད་ཀྱི་དངོས་པོའི་ཆོས་ཉིད་དུ་འདུ་སྟེ་མེ་ཚ་བ་དང་མེ་སྲེག་པར་བྱེད་པ་དང་། མེ་བུད་ཤིང་ལ་ལྟོས་པ་ཆོས་ཉིད་ཡིན་པ་ལྟ་བུའོ། །དེའི་ཕྱིར་རིགས་པའི་མཐའ་ཐམས་ཅད་ཆོས་ཉིད་ཀྱི་རིགས་པ་ལ་ཐུག་ནས་རྒྱུ་མཚན་གཞན་ཚོལ་དུ་མེད་དེ། དངོས་པོའི་ཆོས་ཉིད་མེའི་ཚ་བ་ལྟ་བུ་ལ་སུས་ཀྱང་གཞན་དུ་བསྙོན་མི་ནུས་པ་བཞིན་ནོ། །དེ་ལྟར་རིགས་པ་སྔ་མ་གསུམ་གྱི་དོན་བསྡུས་ནས་ཐ་སྙད་དུ་ཆོས་རྣམས་ཀྱི་རྒྱུ་འབྲས་ངོ་བོ་ཉིད་གསུམ་ཇི་ལྟ་བུར་གནས་པའི་དོན་ནི་ཐ་སྙད་ཀྱི་གནས་ཚུལ་ལམ་ཆོས་ཉིད་དང་། རྒྱུ་འབྲས་ངོ་བོ་ཉིད་གསུམ་རང་བཞིན་མེད་པ་ནི་དོན་དམ་པའི་གནས་ལུགས་སམ་ཆོས་ཉིད་དེ། མདོར་ན་བདེན་པ་གཉིས་ཀྱི་དོན་ནི་གཏན་ལ་དབབ་པར་བྱ་བ་ཡིན་པའི་ཆ་ནས་རིགས་པ་སྔ་མ་གསུམ་གསུངས་ཏེ། ཆོས་རྣམས་ཀྱི་རང་བཞིན་དེ་ལྟ་བུར་གནས་པ་ནི་འོས་ཤིང་རིགས་པ་ཉིད་ཀྱི་ཕྱིར་རིགས་པ་ཞེས་བརྗོད་པའམ་དེ་དང་མཐུན་པར་གཞལ་བ་ལ་རིགས་པ་ཞེས་བརྗོད་པའང་ཡིན་ནོ། །དེ་ལྟར་གཞལ་བྱ་བདེན་པ་གཉིས་ཀྱི་དོན་ཇི་བཞིན་མ་ནོར་བར་རྗེས་སུ་གཞལ་བ་ནི་དངོས་པོའི་སྟོབས་ཀྱིས་གྲུབ་པ་ཡིན་པས་དེ་ལ་འཐད་པ་སྒྲུབ་པའི་རིགས་པ་ཞེས་བྱ་སྟེ། སྒྲུབ་བྱེད་གང་ཞིག་ཡང་དག་པའི་འཐད་པ་དང་བཅས་པ་ཡིན་པའི་ཕྱིར་རོ། །འཐད་པ་དེ་གང་གི་སྒོ་ནས་སྒྲུབ་ཅེ་ན། ཇི་ལྟར་སྣང་བ་ཐ་སྙད་ཀྱི་དོན་དང་ཇི་ལྟར་གནས་པ་དོན་དམ་པའི་དོན་གཉིས་པོ་དེ་མངོན་དུ་གྱུར་པ་ལ་མངོན་སུམ་ཚད་མ་དང་། ལྐོག་ཏུ་གྱུར་པ་ལ་དེ་དཔོག་ནུས་ཀྱི་རྟགས་མངོན་པར་སྣང་བ་ལས་མི་བསླུ་བ་གཞན་རྗེས་སུ་དཔག་པའི་ཚད་མ་གཉིས་ཀྱི་སྒོ་ནས་སོ། །དེ་ཡང་ཀུན་རྫོབ་པའི་ངོ་བོ་མངོན་སུམ་གྱུར་པ་ནི་མིག་ཤེས་མ་འཁྲུལ་བས་ཨུཏྤལ་སྔོན་པོ་མངོན་སུམ་མཐོང་བ་ལྟ་བུའོ། །དོན་དམ་པའི་ངོ་བོ་མངོན་སུམ་དུ་དམིགས་པ་ནི་འཕགས་པ་རྣམས་ཀྱི་མཉམ་བཞག་གི་ཡེ་ཤེས་ལྟ་བུའོ། །ཐ་སྙད་པའི་དོན་རྗེས་སུ་དཔག་པ་ནི་དུ་བ་ལས་མེ་དང་བྱས་པ་ལས་མི་རྟག་པར་དཔོག་པ་ལྟ་བུའོ། །དོན་དམ་པ་རྗེས་སུ་དཔག་པ་ནི། གཅིག་དུ་བྲལ་ལ་སོགས་པའི་གཏན་ཚིགས་ཀྱིས་སྟོང་པ་ཉིད་རྗེས་སུ་དཔག་པ་ལྟ་བུའོ། །

༈ སྒྱུ་འཕྲུལ་གསང་སྙིང་གི་རྒྱུད་འཆད་པའི་སྐབས་འདིར་བསྟན་གྱི་གཏན་ཚིགས་ཐུན་མིན་ལ་གསུམ། ཚད་མ་བཀའ་གཞུང་། སྒྲ་མཐུན་དོན་འཕགས། ཚིག་དོན་མི་མཐུན་པའི་གཏན་ཚིགས་སོ། །དང་པོ་ཚད་མ་བཀའ་གཞུང་གི་གཏན་ཚིགས་ལ་བཞི། རྟོགས་པ་བཞི། དག་པ་གསུམ། མཉམ་པ་བཞི། བདག་ཉིད་ཆེན་པོའི་གཏན་ཚིགས་རྣམས་སོ། །དང་པོ་ལའང་བཞི། རྒྱུ་གཅིག་པ། ཡིག་འབྲུའི་ཚུལ། བྱིན་གྱིས་བརླབས་པ། མངོན་སུམ་པའི་གཏན་ཚིགས་སོ། །དང་པོ་ནི། སྣང་སྲིད་ཀྱི་ཆོས་རྣམས་ཆོས་ཅན། དོན་དམ་དབྱིངས་ཡེ་ཟུང་འཇུག་རང་བྱུང་གི་ཡེ་ཤེས་སུ་རྒྱུའམ་ཚུལ་གཅིག་པ་ཡིན་ཏེ། ཆོས་ཐམས་ཅད་དེའི་ངང་ཚུལ་ལས་མ་འདས་པའི་ཕྱིར། གཉིས་པ་ནི། དབྱིངས་ལས་ཤར་བའི་སྣང་བ་རྣམས་ཆོས་ཅན། དཔེ་ཡིག་འབྲུའི་ཚུལ་གྱིས་ཀུན་རྫོབ་སྐུ་དང་ཡེ་ཤེས་སུ་སྣང་བ་ཡིན་ཏེ། དབྱིངས་ཀྱི་རང་བཞིན་ལས་མ་འདས་པའི་སྣང་བ་ཡིན་པའི་ཕྱིར། གསུམ་པ་ནི་ཀུན་རྫོབ་དང་དོན་དམ་གཉིས་ཆོས་ཅན། ཕན་ཚུན་གཅིག་གིས་གཅིག་བྱིན་གྱིས་བརླབས་ཤིང་དབྱེར་མེད་པ་ཡིན་ཏེ། ངོ་བོ་ཐ་དད་དུ་མ་གྲུབ་པའི་ཕྱིར། བཞི་པ་ནི། དབྱེར་མེད་པའི་གནས་ལུགས་ཆོས་ཅན། བློའི་སྤྱོད་ཡུལ་ཐམས་ཅད་དང་བྲལ་བ་ཡིན་ཏེ། ཐ་སྙད་ཀྱི་བློས་བསམ་གྱིས་མི་ཁྱབ་པ་སོ་སོ་རང་རིག་པའི་ཡེ་ཤེས་ཀྱི་སྤྱོད་ཡུལ་ཡིན་པའི་ཕྱིར་རོ། །གཉིས་པ་ནི། འབྱུང་ལྔ། ཕུང་ལྔ། རྣམ་ཤེས་ཚོགས་བརྒྱད་རྣམས་ཆོས་ཅན། དག་པ་གསུམ་གྱི་བདག་ཉིད་དུ་གནས་ཏེ། ཡུམ་ལྔ། རིགས་ལྔ། ཡེ་ཤེས་ལྔའི་རང་བཞིན་དུ་གནས་པའི་ཕྱིར་རོ། །གསུམ་པ་ནི། སྤྲོས་པ་ཕྱོགས་རེ་ཆོད་པའི་རྣམ་གྲངས་པའི་དོན་དམ་དང་། སྤྲོས་པ་མཐའ་དག་ཆོད་པའི་རྣམ་གྲངས་མ་ཡིན་པའི་དོན་དམ་གཉིས་ཆོས་ཅན། དོན་དམ་ཙམ་དུ་མཉམ་པ་ཡིན་ཏེ། རང་བཞིན་མ་གྲུབ་པ་ཙམ་གྱིས་རབ་ཏུ་ཕྱེ་བའི་ཕྱིར། སྣང་ལ་དོན་བྱེད་ནུས་པ་ཡང་དག་ཀུན་རྫོབ་དང་། སྣང་ཡང་དོན་བྱེད་མི་ནུས་པ་ལོག་པའི་ཀུན་རྫོབ་གཉིས་ཆོས་ཅན། ཀུན་རྫོབ་ཙམ་དུ་མཉམ་པ་ཡིན་ཏེ། རང་ངོའི་སྣང་བ་དང་ལྡན་ཞིང་བརྟགས་ན་དབེན་པའི་ཕྱིར། རྣམ་གྲངས་དང་རྣམ་གྲངས་མ་ཡིན་པའི་དོན་དམ་གཉིས་ཆོས་ཅན། ལྷག་པའི་དོན་དམ་དཀོར་བདུན་ངོ་བོ་ཉིད་དུ་ལྷུན་གྱིས་གྲུབ་པར་མཉམ་སྟེ། དབྱིངས་དེ་ནི་ཡེ་ནས་ཡེ་ཤེས་དང་གཉིས་སུ་མེད་པའི་གནས་ལུགས་ཡིན་པའི་ཕྱིར། ཡང་ལོག་གི་ཀུན་རྫོབ་གཉིས་ཆོས་ཅན། སྐུ་དང་ཡེ་ཤེས་ཀྱི་དཀྱིལ་འཁོར་དུ་མཉམ་སྟེ། སྣང་བའི་གནས་ཚུལ་ཡེ་ནས་དག་པའི་བདག་ཉིད་ཡིན་པའི་ཕྱིར་རོ། །བཞི་པ་ནི། སྣང་ལུགས་དུ་མར་སྣང་བའི་འཁོར་འདས་ཀྱི་ཆོས་རྣམས་ཆོས་ཅན། གནས་ལུགས་བདག་ཉིད་ཆེན་པོ་རང་བྱུང་གི་ཡེ་ཤེས་གཅིག་ཏུ་ངེས་པ་ཡིན་ཏེ། གནས་ལུགས་མཐར་ཐུག་དཔྱོད་པའི་རིགས་ཤེས་ཀྱིས་དེ་ལྟར་གྲུབ་པའི་ཕྱིར་རོ། །གཉིས་པ་སྒྲ་མཐུན་དོན་འཕགས་ཀྱི་གཏན་ཚིགས་ནི། སྔགས་ན་མི་སྤོང་བར་བསྟན་པའི་དུག་ལྔ་ཆོས་ཅན། སྒྲ་མཐུན་ཀྱང་དོན་འཕགས་པ་ཡིན་ཏེ། གཉེན་པོས་སྤང་བ་མ་ཡིན་ལ། དེ་ཉིད་རྟོགས་པའི་ཐབས་ཀྱིས་ཡེ་ཤེས་ལྔར་ཤར་བའི་ཕྱིར་རོ། །གསུམ་པ་ཚིག་དོན་མི་མཐུན་པའི་གཏན་ཚིགས་ནི། ཆོས་རྣམས་ཀྱི་ཆོས་ཉིད་ཆོས་ཅན། སྤྲོས་པའི་རང་བཞིན་ཅིར་ཡང་མཐའ་གཅིག་ཏུ་གྲུབ་པ་མ་ཡིན་ཏེ། འཁོར་འདས་ཀྱི་སྣང་བ་སྣ་ཚོགས་པ་ཅིར་ཡང་འཆར་བ་ཡིན་པའི་ཕྱིིར། ཀུན་རྫོབ་ཀྱི་སྣང་བ་འདི་ཆོས་ཅན། མཐའ་གཅིག་ཏུ་ངེས་པ་མེད་པར་ཅིར་ཡང་འཆར་བ་ཡིན་ཏེ། རང་གི་རང་བཞིན་ཅིར་ཡང་མ་གྲུབ་པ་ཡིན་པའི་ཕྱིར་རོ། །འདི་རྣམས་ནི་རྒྱུ་གཅིག་པ་ལ་སོགས་པར་རིགས་པས་བསྒྲུབ་པའི་གཏན་ཚིགས་འགོད་ཚུལ་ཡིན་ལ། རྒྱུ་གཅིག་པ་ལ་སོགས་པར་གསུངས་པའི་ལུང་ཉིད་གཏན་ཚིགས་སུ་འགོད་པ་ནི་འགྲེལ་བ་སྔ་མ་རྣམས་ལས་ཤེས་པར་བྱའོ། །དགེའོ། ༈ །རྒྱུ་གཅིག་པར་རྟོགས་པ་དང་། ཡིག་འབྲུའི་ཚུལ་གྱིས་རྟོགས་པ་དང་། བྱིན་གྱིས་བརླབས་ཀྱིས་རྟོགས་པ་དང་། མངོན་སུམ་པར་རྟོགས་པ་དང་། དེ་ཡང་རྟོགས་པ་བཞི་འདི་ལ་རིམ་ཅིག་ཆར་གཉིས་ཀྱི་བཤད་པ་འབྱུང་ཡང་འདིར་རྫོགས་པ་ཆེན་པོ་རང་བྱུང་གི་ཡེ་ཤེས་ཐིག་ལེ་ཉག་གཅིག་ཏུ་གཏན་ལ་ཕེབས་པས་ཅིག་ཆར་བ་ལྟར་དུ་བཤད་དེ། དེ་ལ་རྒྱུ་སྟེ་རང་བཞིན་ནམ་གཞི་གཅིག་པར་རྟོགས་པ་ཡིན་ལ། མདོར་ན་རང་བྱུང་ཡེ་ཤེས་བྱང་ཆུབ་སེམས་ཀྱི་ངོ་བོ་ནི་སྣང་སྟོང་དབྱེར་མི་ཕྱེད་པའི་རང་བཞིན་ཡིན་ལ། འཁོར་འདས་ཐམས་ཅད་དེའི་ཚུལ་གཅིག་ལས་མི་འདའ་བ་ནི་རྒྱུ་གཅིག་པའོ། །ཡིག་འབྲུའི་ཚུལ་གྱི་རྟོགས་པ་ནི། དེ་ལྟ་བུའི་སྣང་སྟོང་དབྱེར་མེད་ཀྱི་རང་བཞིན་དེ་ཉིད་ཀྱང་གདོད་མ་ནས་སྐུ་གསུང་ཐུགས་འབྲས་བུའི་ཆོས་སུ་སངས་རྒྱས་པར་བསྟན་པ་སྟེ། དེ་ལ་ཆོས་ཐམས་ཅད་མ་སྐྱེས་པ་ནི་ཨ་ཡིས་མཚོན་ཏེ་གསུང་གི་རང་བཞིན། མ་སྐྱེས་པ་ཉིད་སྒྱུ་མར་སྣང་ཞིང་བྱ་བ་བྱེད་ནུས་པ་ནི་ཨོ་ཡིས་མཚོན་ཏེ་སྐུའི་རང་བཞིན། དེ་ལྟར་རྟོགས་པའི་རིག་པ་སྒྱུ་མའི་ཡེ་ཤེས་མཐའ་དབུས་མེད་པ་ནི་ༀ་གྱིས་མཚོན་ཏེ་ཐུགས་ཀྱི་རང་བཞིན་དུ་རྟོགས་པའོ། །དེ་ཡང་གདོད་ནས་སྣང་སྟོང་ཟུང་འཇུག་གི་ཡེ་ཤེས་དེ་ལ་བསལ་བཞག་གི་བྲི་གང་ནམ་ཡང་མེད་ཅིང་། དེ་ཉིད་རང་བཞིན་རྣམ་པར་དག་པས་འཁོར་བ་ཡེ་སངས་ཆེན་པོ་ཡིན་ལ། དེ་ཉིད་ཀྱི་རོལ་པ་ནི་གདོད་ནས་དཀྱིལ་འཁོར་གསུམ་དུ་གནས་པ་ཡིན་པར་ནི་ཡིག་འབྲུའི་ཚུལ་གྱིས་རྟོགས་པའོ། །བྱིན་གྱིས་བརླབས་ཀྱིས་རྟོགས་པ་ནི། རྟོགས་པ་རྣམ་པ་གཉིས་པོ་དེའི་མཐུ་དང་བྱིན་རླབས་ཤེས་པ་སྟེ། དཔེར་ན་རས་དཀར་པོ་དམར་པོར་བྱིན་གྱིས་བརླབས་པའི་མཐུ་བཙོད་ལ་ཡོད་པ་བཞིན་དུ། ཆོས་ཐམས་ཅད་གདོད་མ་ནས་སངས་རྒྱས་པར་བྱིན་གྱིས་བརླབས་པའི་མཐུ་ཡང་རྒྱུ་གཅིག་པ་དང་ཡིག་འབྲུའི་ཚུལ་གྱི་མཐུས་བྱིན་གྱིས་བརླབས་པར་ཤེས་ཤིང་རྟོགས་པའོ། །དེ་ལ་ཆོས་ཐམས་ཅད་ཡེ་ནས་སངས་རྒྱས་པ་ཡིན་མོད་ཀྱི་རྟོགས་པ་གཉིས་དང་མི་ལྡན་པ་རྣམས་ལ། དེས་ཕན་འདོགས་པར་མི་འགྱུར་ལ། དེ་གཉིས་དང་ལྡན་ན་ནི་ཕན་ཐོགས་པར་སྣང་བར་འགྱུར་བས། རྟོགས་པ་གཉིས་ཀྱི་མཐུས་ཆོས་ཐམས་ཅད་ཡེ་ནས་སངས་རྒྱས་པར་བྱིན་གྱིས་བརླབས་པ་ལྟར་སྣང་བར་འགྱུར་བས་བྱིན་གྱིས་བརླབས་པར་རྟོགས་པ་ཞེས་བྱའོ། །མངོན་སུམ་པར་རྟོགས་པ་ནི། སྤྱིར་དབང་པོའི་མངོན་སུམ་སོགས་ཡོད་ཀྱང་འདིར་ཤེས་རབ་ཀྱི་དབང་པོའི་མངོན་སུམ་སྟེ། དེ་ཡང་སོ་སོར་རྟོག་པའི་ཤེས་རབ་ཉིད་ལ་གོ་བར་བྱ་སྟེ། ཆོས་ཐམས་ཅད་ཡེ་ནས་སངས་རྒྱས་པར་གནས་པ་དེ་ཡང་ཡིན་ཞེས་པའི་ལུང་དང་བླ་མ་བརྒྱུད་པའི་མན་ངག་དང་འགལ་བའང་མ་ཡིན་པ་སྟེ། དཔེར་ན་བསྲེག་བཅད་བརྡར་བས་གསེར་ཡིན་མིན་སྐྱོན་ཡོད་མེད་གསེར་བཟང་ངན་ཤེས་པ་བཞིན་དུ། ལུང་གིས་སྤྱི་ལ་མི་འཁྲུལ། ལུང་ལ་དྲང་ངེས་ལྡེམ་དགོངས་སྣ་ཚོགས་པ་ལ་མན་ངག་གིས་དེའི་སྐྱོན་བསལ་བས་ཡིད་ཆེས། ལུང་དང་མན་ངག་ཡོད་ཀྱང་ཚིག་ཙམ་གྱི་སྒྲ་ཕྱིར་འབྲངས་བས་བློའི་གཏིང་དུ་ཉམས་སུ་མ་ལོན་པ་ཡང་ཡོད་པས། ལུང་དང་མན་ངག་གི་ཚིག་ཙམ་ལ་བརྟེན་པའང་མ་ཡིན་པར་སོ་སོར་རྟོག་པའི་ཤེས་རབ་བམ་རང་གི་རིག་པས་བློའི་གཏིང་དུ་ཡིད་ཆེས་པས་མངོན་སུམ་དུ་རྟོགས་པའོ། །ཞེས་འདིས་ནི་ལུང་གིས་དོན་སྤྱི་ཕྱིན་ཅི་མ་ལོག་པ་ཤེས་པར་འགྱུར་ལ། མན་ངག་གིས་ལུང་གི་དགོངས་པ་གཞན་དུ་འདྲེན་པ་གཅོད་ཅིང་། ཤེས་རབ་ཀྱིས་མངོན་སུམ་དུ་རྟོགས་པས་ཐོས་པ་ཙམ་ལ་སོགས་པ་ཉིད་དུ་ཞེན་པ་སེལ་ཞིང་གཅོད་པར་བྱེད་པ་ཡིན་ནོ། །དེ་ལྟར་ལམ་གྱིས་ཡིད་ཆེས་པ་ནི། རྟོགས་པ་རྣམ་བཞིའི་དོན་དེ་ཉིད་ཤེས་ཤིང་རིག་པ་ཉིད་རྣལ་འབྱོར་པའི་ལམ་སྟེ། དེའང་མཚན་ཉིད་ཐེག་པར་རྒྱུ་སྔོན་དུ་བསྒྲུབས་པའི་འབྲས་བུ་སངས་རྒྱས་ཉིད་ཕྱིས་ནམ་ཞིག་ན་འབྱུང་བའི་དུས་ལ་ལྟོས་པ་ལྟ་བུ་མ་ཡིན་གྱི། ད་ལྟ་ཉིད་དུ་ཤེས་རབ་ཀྱི་དབང་པོས་རང་གིས་མངོན་སུམ་དུ་རྟོགས་ཤིང་ཡིད་ཆེས་པའོ། ༈ །ཤན་འབྱེད་ལས། མ་ཧཱ་ཡོ་གས་དཀོར་བདུན་ངོ་བོ་ཉིད་ལྷུན་གྲུབ་ཏུ་ཁས་ལེན་པ་ནི། རྫོགས་ཆེན་གྱི་གཞི་སྣང་མ་ཤར་བའི་ཡེ་ཐོག་མའི་གཞི་བཞག་ལུགས་ལྟར་མིན་ཏེ། གཞི་སྣང་ཤར་ཟིན་གྱི་དུས་འདིར། རང་བཞིན་མཉམ་པ་ཇི་ལྟ་བའི་དབྱིངས་ལས་མ་གཡོས་པའི་ཆོས་ཉིད་དང་། དེའི་ངང་ལས་སྣང་བའི་ཆོས་ཇི་སྙེད་པ་ཐམས་ཅད་རང་བཞིན་གྱིས་དག་པའི་དག་པ་ཆེན་པོར་གཏན་ལ་ཕབ་པའི་གཞི་དེ། གློ་བུར་དྲི་མ་བྲལ་སྟོབས་ཀྱིས་དག་པ་གཉིས་ལྡན་གྱི་དུས་ནའང་། སྔར་གྱི་དག་མཉམ་ཆེན་པོར་གཏན་ལ་ཕབ་པ་དེ་མངོན་དུ་གྱུར་པ་ལས་ལྷག་པའི་འབྲས་བུ་མེད་པའི་གནས་ཚུལ་གྱི་དབང་དུ་བྱས་པའོ། །སྣང་ཚུལ་གྱི་དབང་དུ་བྱས་ན། རང་བཞིན་རྣམ་དག་གཞི་དང་། གློ་བུར་བྲལ་དག་གི་ཁྱད་པར་དུ་བྱས་པའི་དབྱིངས་འབྲས་བུར་འདོད་པས་ཁྱད་མེད་པ་མིན་ཡང་། ལ་ཟློའི་ཚེ་གནས་ཚུལ་ལྟར་གཏན་ལ་འབེབས་དགོས་ཀྱི། དེ་མ་ཕེབས་ན་འཁོར་བ་ཉིད་མྱང་འདས་སུ་མི་རྟོགས་སོ། །ཤན་འབྱེད་པའི་ཚེ་སྣང་ཚུལ་ལྟར་ཡིན་ཡང་། དེས་གནས་ལུགས་ལ་འཁོར་འདས་མཉམ་ཉིད་ཡིན་པའང་མི་ཁེགས་ཏེ། གནས་ཚུལ་ལ་མ་དག་པ་མེད་པས་སོ། །ཞེས་གསུངས། ༈ ངོ་བོ་ཉིད་ཡེ་མེད་ན་ཆོས་ཐམས་ཅད་ཇི་ལྟར་སྣང་ཞེ་ན། མིང་ཙམ་གྱིས་བཞག་པས་ན་ཡི་གེའི་རྣམ་འཕྲུལ་ཙམ་མོ། །ཡི་གེ་དེའང་གནས་སྣང་མི་མཐུན་པའི་འཁྲུལ་བ་ཕྱིན་ཅི་ལོག་གི་བསླད་པ་གཏན་མ་ཞུགས་ན། དེས་གང་བཏགས་དང་ཅིར་སྤྲུལ་གྱི་སྣང་བ་ཐམས་ཅད་ཀྱང་སྣང་ཚུལ་ཕྱིན་ཅི་ལོག་ལས་འདས་པའི་ཤིན་ཏུ་རྣམ་དག་གི་སྣང་བ་འབའ་ཞིག་ཏུ་ཟད་པས། སྣང་སྲིད་ཐམས་ཅད་གདོད་མའི་སྡོད་ཚུལ་ལ་གསུངས་གསང་སྔགས་ཀྱི་སྒྱུ་འཕྲུལ་ཁོ་ནར་གནས་ཏེ། གསུང་གསང་སྔགས་ཀྱི་ཡི་གེ་བྱ་བ་ཕྱིན་ལོག་གི་བསླད་པ་དང་བྲལ་བའི་དག་པའི་ཡི་གེ། དག་པ་རབ་འབྱམས་ཀྱི་རྣམ་འཕྲུལ་དང་བྱེད་ལས་ཅན་དེ་ལས་བྱེད་པས་སོ། །སྣང་ཚུལ་སེམས་རང་སྣང་གི་ཡི་གེ་ལ་འཕྲུལ་བའི་མིང་ཚིག་མཐའ་མེད་སྲིད་ཀྱང་། གནས་ཚུལ་ཡེ་ཤེས་རང་སྣང་གི་མིང་ཚིག་ལ་གསང་སྔགས་ཀྱི་ཡི་གེ་སྤྲིན་མིན་པ་མེད་པའོ། །འདི་ལེའུ་བཞི་པ་དང་། ཡིག་འབྲུའི་གཏན་ཚིགས་སྐབས་མཁོ་མིན་དཔྱོད། ༈ ཡོངས་སུ་དག་པའི་ལྷ་སྐུ་ཐམས་ཅད་བསྐྱེད་པའི་ས་བོན་ནི་གསུང་སྔགས་ཀྱི་ཡི་གེ་སྟེ། སངས་རྒྱས་ཐམས་ཅད་མིང་ཙམ་ལ་གནས་པ་ལ་གཏུག་ནས་ལེའུ་བཞི་པར་རྒྱས་བཤད་མཛད། ཕུང་སོགས་ཅིར་སྣང་ཐམས་ཅད་བསྐྱེད་པའི་ས་བོན་ནི་ཆོས་ཀྱི་དབྱིངས་སམ་སེམས་ཀྱི་གཉུག་མའི་ཁམས་ཏེ་འདིར་འོད་གསལ་གྱི་བསམ་མི་ཁྱབ་པ་མི་རྟོག་པའམ་སྤྲོས་པ་མེད་པའི་བཞུགས་ཚུལ་གྱི་ཆའོ། །དེ་ཉིད་ནི་ཡིད་སྐྱོབ་པའི་མནྟྲ་ཐམས་ཅད་ཀྱི་མཐར་ཐུག་པ་སྟེ། ཕྱག་རྡོར་དབང་བསྐུར་དུ། ཆོས་ཀྱི་དབྱིངས་ལ་ལྷ་སྔགས་ཕྱག་རྒྱ་སོགས་མིང་མང་པོར་བརྟགས་ནས་དངོས་གྲུབ་ཀྱི་དོན་བྱེད་པར་གསུངས་པ་ལྟ་བུ། དེ་གློ་བུར་བའི་སྤྲོས་པས་སྟོང་པའམ་དག་པ་ཡིན་ཅིང་། གང་སྣང་ཐམས་ཅད་ནི་དེའི་ངང་ལས་མཆེད་པ་ནི་སྣང་བ་ཐམས་ཅད་ཀ་ནས་དག་པའམ་མཆེད་གཞིའི་ས་བོན་མཐར་ཐུག་ནས་དག་པ་དང་གདོད་ནས་དག་པའོ། །དེའི་ཕྱིར་དབྱིངས་དེ་ནི་ས་བོན་གྱི་སྔགས་ཏེ་ཨ། དེ་རྣམ་འགྱུར་རང་སྣང་རིས་མེད་སྔགས་ཀྱི་མིག་བསྒྱུར་བའི་རང་སྣང་གི་སྒྱུ་མ་ལྟ་བུར་མཆེད་པ་ནི་ལྷའི་སྐུ་སྟེ་ཨོས་མཚོན། དེ་ལྟར་དབྱིངས་དང་། དེ་ཉིད་སྣང་བ་སྣ་ཚོགས་སུ་ཤར་བ་ཐམས་ཅད་སྔགས་བླ་མེད་ཀྱི་རང་ལུགས་ཐུན་མོང་མ་ཡིན་པའི་རང་བཞིན་རྣམ་དག་གི་སྐུ་གསུམ་ལྷ་སྔགས་ཀྱི་ཡོ་ལང་ཁོ་ནར་གནས་པ་དེ་རྟོགས་བྱེད་ཀྱི་ཐུགས་ནི་འོད་གསལ་རང་གི་མཁྱེན་ཆའམ་རིག་པའི་ཆ་སྟེ། དེས་རྟོགས་ཚུལ་ཡང་དབྱིངས་དང་ཡུལ་སྣང་གཉིས་ཆར་རིག་ཆ་ཉིད་ལས་མི་གཞན་པར་མངོན་དུ་གྱུར་ནས་རྟོགས་བྱ་གཉིས་ཀ་རྟོགས་བྱེད་ཀྱི་ཀློང་དུ་རྫོགས་པ་ཨ་ཨོ་གཉིས་ཆར་ༀ་ལ་རྫོགས་པ་ལྟ་བུའོ། །ༀ་གྱི་དོན་ནི། གཟུང་འཛིན་བྲལ་བའི་སེམས་ལ་ལྟོས། །སྣང་བ་ཐམས་ཅད་རང་སྣང་ཡིན། །ཡེ་ཤེས་རིག་པ་ངོ་མཚར་ཆེ། །ཞེས་པ་དང་གཅིག་རེད། རྟོགས་དུས་སྣང་རིག་དབྱིངས་གསུམ་ཁྱབ་བརྡལ་དུ་འདྲེས་ནས་མཐའ་དབུས་མེད་པའི་འོད་གསལ་དུ་འགྱུར་བར་མ་ཟད། དབྱིངས་མ་རྟོགས་པར་རང་སྣང་སྣོད་བཅུད་རྒྱུད་གསུམ་རང་རྒྱུད་པར་ཞེན་པའི་དུས་ཉིད་ནས་ཤེས་པས་གར་ཁྱབ་རིག་པའི་བདག་ཉིད་གཅིག་པའི་ཚུལ་གྱིས་ཁྱབ་ཅིང་། རིག་པ་རང་གི་ངོ་བོ་བཟང་ངན་དུ་མི་འགྱུར་བར་མཐའ་དང་དབུས་མེད་པ་སྟེ་ཟབ་ཅིང་རྒྱ་ཆེ་རྒྱ་ཆད་ཕྱོགས་ལྷུང་མེད་པར་གདལ་བ་སྟེ། སེམས་རང་སྣང་རྣམས་སེམས་དང་ཡེ་ཤེས་རང་སྣང་གཉིས་ཀྱི་ཟླས་ཕྱེ་བའི་ཡེ་ཤེས་རང་སྣང་མིན་ཡང་མཐར་གཏུགས་ན་ཡེ་ཤེས་ཀྱི་རང་སྣང་ཡིན་དགོས། རང་སྣང་ཞེས་པའི་སྐོར་ཐམས་ཅད་སྣང་བ་སྣང་ཡུལ་གཉིས་ཀྱི་ཟླས་ཕྱེ་བའི་སྔ་མ་རང་ལ་སྦྱར་ན་འགྲིགས་ཆེ། ཀུན་མཁྱེན་ཆེན་པོས་སྣང་བ་འདི་རྣམས་བག་ཆགས་སྨིན་པའི་སྣང་ཆར་བཤད་པའང་དེ་ལྟར་གོ་དགོས། སྣང་ཡུལ་དག་མ་དག་གམ་ཕྱིན་ཅི་ལོག་ཡིན་མིན་སྣང་བ་དག་མིན་གྱིས་ཕྱེ་བ་ཐལ་འགྱུར་བའི་ཡང་ལོག་གི་རྣམ་བཞག་དང་ཀུན་རྫོབ་བདེན་པ་གནས་སྣང་མི་མཐུན་པའི་སྟེང་ནས་བཤད་ལུགས་ལྟ་བུ་སྟེ་ཞར་བྱུང་ངོ་། །རང་སྣང་ཐམས་ཅད་དག་པའི་ལྷའི་རང་བཞིན་ནམ་ངོ་བོ་ཉིད་ཡིན་ལུགས་ནི། དག་པའི་དུས་སུ་རྣམ་སྣང་དུ་འོང་རྒྱུ་དེ། མ་རིག་པའི་བག་ཆགས་ཀྱིས་བསླད་ཚེ་ཐ་མལ་པའི་གཟུགས་ཕུང་དུ་འཆར་བ་སོགས་སོ། །རྫོགས་པ་ཆེན་པོའི་ཚུལ་ལ་རྟོགས་པ་བཞིས་ཡིད་ཆེས་ཚུལ་ཡང་གཙོ་བོར་འདི་དང་རྒྱུ་གཅིག་པ་གཉིས་སུ་སྣང་། རྒྱུ་གཅིག་པར་ཆོས་ཐམས་ཅད་ཅེས་པ་ནི་གོང་དུ་འཇིག་རྟེན་དང་འཇིག་རྟེན་ལས་འདས་པའི་ཆོས་ཐམས་ཅད་ཅེས་པ་དང་གཅིག་རེད། དོན་དམ་འོད་གསལ་གྱི་དབྱིངས་ལ་འཇིག་འདས་ཀྱི་མཚན་མའམ་སྤྲོས་པ་གཉིས་ཆར་མི་དམིགས་ཀུན་རྫོབ་རང་སྣང་གི་ངོར་དེ་གཉིས་སོ་སོའི་བྱ་བ་བྱེད་ནུས་སུ་ཤར་བའི་རྟེན་འབྲེལ་དུ་མཉམ། དེ་གཉིས་དབྱེར་མེད་དུ་མཉམ་པ་རྣམས་རེད་པས་འདིས་མཉམ་པ་དང་། ཡིག་འབྲུས་དག་པར་རྟོགས་པ་བསྟན་འདྲ། འདིའི་སྟོང་མཉམ་སྣང་མཉམ་གཉིས་ཀ་དབུ་མ་ལྟར་མི་འཇོག་པར་བླ་མེད་ལུགས་ཁོ་ན་ལྟར་འཆད་པ་འདི་གཙང་ཊིཀ་ན་གསལ། མཉམ་ལུགས་སྔ་མ་གཉིས་ཐུན་མོང་པ་དང་། ཕྱི་མ་གཅིག་ཐུན་མིན་དུ་རོང་འགྲེལ་གཉིས་ན་སྣང་བ་ནི། སྲིད་ཞི་གཉིས་བདེན་མཉམ་རྫུན་མཉམ་ཙམ་ཐུན་མོང་ཐེག་པར་ཡང་བཞེད་ཀྱང་། དེ་གཉིས་བདེན་པ་གཉིས་ཀར་འོད་གསལ་ལས་ཕྱི་རོལ་དུ་མ་གྱུར་བར་གཅིག་པའམ་དབྱེར་མེད་པས་བཟང་ངན་མེད་པར་མཉམ་པ་འདི་བླ་མེད་ཀྱི་ཐུན་མིན་ཡིན་ཟེར་རམ་སྙམ་སྟེ། ཀུན་རྫོབ་ཏུའང་དབྱེར་མེད་དེ། །ལྟ་བ་མཐོ་དམན་དེ་ཙམ་མོ། །ཞེས་པ་ལྟ་བུ་རེད་དམ་བརྟགདོན་དམ་མ་སྐྱེས་པ་ཨ་དང་། ཀུན་རྫོབ་སྒྱུ་མ་ཨོ་གཉིས་རིག་པ་འོད་གསལ་གཅིག་པུར་རྫོགས་པའི་ༀ་འདི་བདེན་གཉིས་དབྱེར་མེད་ལྷག་པའི་ཆོས་སྐུ་ཆེན་པོ་ཟེར་རྒྱུ་དེ་ཡིན་པ་འདྲ། བྱིན་གྱིས་བརླབས་པར་རྟོགས་པའི་ཐད། དཔེ་ལ་ལར། ཡེ་ནས་སངས་རྒྱས་པར་བྱིན་གྱིས་བརླབས་པའི་ཞེས་སྣང་ཡང་ཡེ་ནས་ཞེས་པ་མེད་པའི་དཔེ་དག་པར་སྣང་། དེའང་རྟོགས་པ་སྔ་མ་གཉིས་ཀྱིས་ཕུང་སོགས་ཆོས་ཐམས་ཅད་དག་པ་རབ་འབྱམས་སུ་རྟོགས་པ་ན་རྟོགས་པ་བཞིན་དུ་ཕུང་སོགས་བྱིན་གྱིས་བརླབས་ནུས་པ་སྟེ། རྟོགས་པ་དེ་དག་གི་སྟོབས་ཀྱིས་རྟོགས་བྱའི་དོན་དེ་དག་མངོན་དུ་གྱུར་འོང་བའོ། །དེའང་རྟོགས་པ་གཉིས་པའི་སྟོབས་ཀྱིས་མ་དག་པའི་འམ་ཐ་མལ་བའི་སྣང་ཞེན་གློ་བུར་བ་གཉིས་ཀ་ནུབ་ནས་གཞི་དུས་སུ་གཟུགས་ཚོར་སོགས་ཐ་མལ་བའི་སྣང་བར་འོང་རྒྱུ་དེ་རྣམ་སྣང་རིན་འབྱུང་སོགས་ཀྱི་སྣང་ཞེན་དུ་གོ་འཕོ་བ་སྐྱེ་ཤི་བར་དོ་སྐུ་གསུམ་དུ་སྒྱུར་ཞིང་རློབ་པ་ལྟ་བུ། དེའང་རས་དཀར་པོ་ལྟ་བུ་ནི་ཕུང་སོགས་རང་བཞིན་རྣམ་དགདམར་པོ་ནི་གློ་བུར་རྣམ་དག་གམ་རྟོགས་པ་མངོན་གྱུར། བཙོད་ནི་རྟོགས་པ་གཉིས་རེད། རས་ནག་པོ་སོགས་ལ་ཚོས་ཁ་གཞན་དུ་སྒྱུར་མི་བཏུབ། དཀར་པོ་ཁོ་ན་གང་འདོད་དུ་བཏུབ། དེ་བཞིན་དུ་གང་སྣང་ཐམས་ཅད་རང་སྣང་རིས་མེད་ཡིན་པའི་གནད་ཀྱིས་ཡོངས་སུ་དག་པའི་ལྷར་སྒྱུར་ནུས་པ་སྣ་ཚོགས་ནོར་བུ་ལྟ་བུ་རེད། དེའང་རང་སྣང་ཡིན་ཚད་མཐར་གཏུག་ན་ཡེ་ཤེས་རང་སྣང་ཁོ་ནར་ངེས་པ་ལ་ཐུགལར་སྐྱེ་འཆི་བར་དོའང་ཐབས་མཁས་ཀྱིས་ཟིན་ན་སྐུ་གསུམ་དུ་འོང་ཞེས་པ་ཙམ་གྱིས་འདིའི་ལུགས་ཀྱི་ལྷར་སྒྲུབ་ལ་དྲན་པ་རྙེད་དཀའ། དེའི་ཁ་སྐོར་ཕྱོགས་བསྒྱུར་ནས་གདོད་ནས་སྐུ་གསུམ་དངོས་སུ་འོང་རྒྱུ་དེ་འཁྲུལ་རྒྱུས་རྙོག་ནས་ཐ་མལ་བའི་སྐྱེ་ཤི་བར་དོར་འཆར་ཞེས་པའི་སྟེང་ནས་འགྲོ་དགོས། འདིར་སྒྱུ་མ་ངལ་གསོའི་ལེའུ་དང་པོར་མ་དག་གཞན་དབང་ནུབ་སྟེ་དག་པའི་གཞན་དབང་འོང་ཚུལ་གསུངས་པའང་དྲན་པར་བྱ། དེ་ལྟ་བུའི་རྟོགས་པ་གསུམ་པོའང་ཐོས་བསམ་རྐྱང་བའི་གོ་ཡུལ་ཙམ་གྱིས་ནི་གོང་དུ་རྫོགས་པ་ཆེན་པོའི་ཚུལ་ལ་རྟོགས་པ་བཞིའི་ལམ་གྱིས་ཡིད་ཆེས་ཞེས་གསུངས་པའི་ཡིད་ཆེས་མཚན་ཉིད་རྫོགས་པར་མི་འགྱུར་གྱི་རྟོགས་པ་དེ་གསུམ་གྱི་དོན་ཐོས་ཤིང་བསམ་པས་འདི་ཅིག་ཆར་བ་རེད་པས་རྟོགས་པ་མྱུར་བའི་རྒྱུ་མཚན་གྱིས་མེ་དང་སྤྲ་བ་ཕྲད་པ་ལྟར་སྣང་སེམས་རང་རྒྱུད་པར་འཛིན་པའི་སྒྲོ་འདོགས་རང་ཞིག་སྟེ་རིག་པ་ཡུལ་མེད་རང་གསལ་དུ་བུད་པའི་སྟེང་ནས་དག་མཉམ་ཆེན་པོའི་བཞུགས་ཚུལ་ལ་མྱོང་སྟོབས་ཀྱིས་གཏིང་སླེབ་པ་ལས་ཡིད་ཆེས་རྙེད་པ་ཤེས་ནས་དད་པ་ཐོབ་པ་ཞེས་པ་ལྟ་བུར་གྱུར་དུས་ལྟ་བའི་ལག་རྗེས་འཇོག་ཐུབ་པ་རེད་པས་ཤེས་པའི་མཚན་ཉིད་ཀྱི་ལམ་དངོས་ལ་སླེབ་པའོ། །འདི་ནི་མངོན་སུམ་པར་རྟོགས་པ་སྟེ། རྫོགས་པ་ཆེན་པོའི་ཚུལ་ལ་ཡིད་ཆེས་པ་ཞེས་པའི་རྟོགས་པར་འཇོག་པ་ལ་རྟོགས་པ་སྔ་མ་གསུམ་པོའི་ཁྱད་པར་འདི་ལྟ་བུ་དགོས་ཞེས་བྱེ་བྲག་ཏུ་ཕྱེ་ནས་བསྟན་པའོ། །རོང་ཟོམ་པས་སོ་སོར་རྟོག་པའི་དུས་ན་ཡིན་གྱི་རྣལ་འབྱོར་གྱི་དུས་ན་མིན་གསུངས་པ་དང་། གཡུང་གིས། སྔ་མ་སྔ་མའི་རྒྱུ་མཚན་གྱིས་ཕྱི་མ་ཕྱི་མ་བསྟན་ཡོད་སྣང་ཤར་བས་དཔྱོད། ༈ སྣང་སྤྱོད་ཐམས་ཅད་སྐུ་དང་ཡེ་ཤེས་ཆེན་པོར་གཏན་ལ་འབེབས་བྱེད་རྒྱུ་གཅིག་པ་དང་། ཡིག་འབྲུའི་ཚུལ་དང་། བྱིན་གྱིས་བརླབས་དང་། མངོན་སུམ་པའི་གཏན་ཚིགས་ཀྱིས། ཆོས་ཉིད་སྐྱེ་མེད། རོལ་པ་འགགས་མེད། ངོ་བོ་དབྱེར་མེད། མཚན་ཉིད་བློ་བྲལ། ཡུལ་མེད་རང་གསལ་དུ་རང་རིག་པའི་མངོན་སུམ་གྱི་ཚད་མས་གཏན་ལ་ཕབ་ནས་སྣང་སྲིད་ཡེ་སངས་རྒྱས་པའི་རང་བཞིན་དུ་མི་ཕྱེད་རྡོ་རྗེའི་གྲུབ་པའི་མཐའ་ཆེན་པོ་འཆར་བ་སྟེ། སྤྱིར་རྟོགས་པ་བཞིའི་གཏན་ཚིགས་འདི་ལ་སྦྱོར་ཚུལ་མང་སྟེ། ཐུན་མོང་པ་གྲུབ་མཐའ་བཞི་དང་སྦྱོར་ན། ཆོས་ཐམས་ཅད་སེམས་དང་ཡེ་ཤེས་ཀྱི་རང་སྣང་དུ་རྒྱུ་གཅིག་པས་ཕྱི་དོན་གྱི་བདེན་ཞེན་འགོག་པ་སེམས་ཙམ། སེམས་ཉིད་ཡིག་འབྲུ་ལས་མཚོན་ཏེ་ཆོས་ཐམས་ཅད་སྐྱེ་མེད་སྤྲོས་བྲལ་དུ་གཏན་ལ་འབེབས་པ་དབུ་མ། སེམས་ཉིད་དག་པ་མཐའ་བཞིར་རྟོགས་པའི་བྱིན་རླབས་ཀྱིས་ཀུན་རྫོབ་རྡོ་རྗེ་དབྱིངས་ཀྱི་དཀྱིལ་འཁོར་སོགས་སུ་སྣང་བ་སྔགས་ཕྱི་རྒྱུད། ཆོས་ཐམས་ཅད་བདག་ཉིད་ཆེན་པོ་རང་བྱུང་གི་ཡེ་ཤེས་སུ་མངོན་སུམ་པར་རྟོགས་པ་སྔགས་ནང་རྒྱུད་བླ་མེད་ཀྱི་དགོངས་པའོ། །ཐུན་མིན་རང་གི་ལྟ་བ་གཏན་ལ་འབེབས་བྱེད་ལ་གཉིས་ཀྱི་ཅིག་ཆར་བ་ལྟར་ན་ཆོས་ཀུན་བདེན་གཉིས་དབྱེར་མེད་ལྷག་པའི་ཆོས་སྐུ་ཆེན་པོར་རྟོགས་པའི་སྐད་ཅིག་མ་གཅིག་ལ་ལྡོག་ཆས་དབྱེ་བ་ཙམ་ཡིན་ལ། རིམ་གྱིས་པ་ལྟར་ན། སྔ་མ་སྔ་མས་གཞལ་འབྲས་ཕྱི་མ་ཕྱི་མས་གཞལ་བྱར་བྱས་ཏེ་རིམ་གྱིས་མངོན་སུམ་པར་གཏན་ལ་འབེབས་པའོ། །ལམ་དང་སྦྱར་ན། བསྐྱེད་རིམ་པས། དེ་ཏིང་སྟོང་ཆེན། ཀུན་སྣང་སྒྱུ་མ། ཟུང་འཇུག་གཅིག་སྤྲོས་རྣམས་ལ་བརྟན་པ་ཐོབ་ནས། ཚོགས་སྒྲུབ་ཀྱིས་ཟག་མེད་ཉིད་མངོན་དུ་བྱེད་པའོ། །རྫོགས་རིམ་ལ། སྟེང་སྒོ་ལྟར་ན། སྙིང་དབུས་མི་ཤིགས་པའི་ཐིག་ལེ་ནི་ཆོས་ཀུན་འབྱུང་བའི་གཞིར་གྱུར་པས་རྒྱུ་གཅིག་པ། དེ་ཉིད་གདངས་རྩ་ཁམས་ཡི་གེ་སྤྲིན་དུ་གནས་པ་ནི་ཡིག་འབྲུའི་ཚུལ། དེ་ལ་གནད་དུ་བསྣུན་པས་རྟོག་ཚོགས་སྐུ་དང་ཡེ་ཤེས་སུ་འཆར་བ་ནི་བྱིན་གྱིས་རླབས་དང་། མཐར་བདེན་གཉིས་དབྱེར་མེད་ཀྱི་དོན་མངོན་སུམ་ཡུལ་མེད་དུ་རྟོགས་པར་བྱེད་པ་ནི་མངོན་སུམ་པའོ། །འོག་སྒོ་དང་སྦྱར་ན། ཡུམ་མཁའ་ཆོས་འབྱུང་རྡོ་རྗེ་བཙུན་མོའི་བྷ་ག་ནི་ཆོས་ཀུན་འབྱུང་བའི་དབྱིངས་ཡིན་པས་རྒྱུ་གཅིག་པ་དང་། ཐབས་བདེ་བ་ཆེན་པོ་ཡབ་ཀྱི་བྱང་སེམས་ཝཾ་ཡིག་གི་རྣམ་པར་གནས་པ་ནི་ཡིག་འབྲུའི་ཚུལ། དེ་གཉིས་མཉམ་པར་སྦྱོར་བའི་ཐབས་མཁས་ཀྱིས་བདེ་བ་ཆེན་པོའི་ཡེ་ཤེས་རང་ལ་གསལ་བ་ནི་བྱིན་གྱིས་རླབས་དང་། ཡས་བབས་མས་བརྟན་གྱི་དགའ་བཞི་ལུགས་འབྱུང་ལྡོག་གི་མཐར་མ་དག་སྙིགས་མའི་རླུང་སེམས་འགགས་ནས་དཔེ་དང་དོན་གྱི་ཡེ་ཤེས་མངོན་དུ་བྱེད་པ་ནི་མངོན་སུམ་པའི་གཏན་ཚིགས་སོ། །གཞན་ཡང་ཨ་ནུའི་དབྱིངས་ཡེ་དབྱེར་མེད་སྲས་བདེ་བ་ཆེན་པོ་བྱང་ཆུབ་སེམས་ཀྱི་དཀྱིལ་འཁོར་དུ་མངོན་སུམ་པར་རྟོགས་པ་དང་། ཨ་ཏིའི་ངོ་བོ་རང་བཞིན་ཐུགས་རྗེ་གསུམ་དབྱེར་མེད་པའི་ཆོས་ཉིད་བྱང་ཆུབ་སེམས་སུ་ཡེ་ནས་སངས་རྒྱས་པའི་རང་བཞིན་དུ་རྟོགས་པ་རྣམས་ཀྱང་དོན་གྱི་གནད་གཅིག་གོ །རྟོགས་པ་བཞི་འདི། འཁོར་འདས་ཀྱི་ཆོས་ཐམས་ཅད་སེམས་དང་ཡེ་ཤེས་ཀྱི་རང་སྣང་ཙམ་སྟེ་དོན་དམ་པར་རྩ་བ་རང་བྱུང་གི་ཡེ་ཤེས་སུ་རྒྱུ་གཅིག་པ་དང་། དེ་ལས་ཤར་བའི་ཀུན་རྫོབ་ཀྱི་ཆོས་རྣམས་ཀྱང་དེའི་ངང་ཚུལ་ལས་མ་འདས་པས་དཔེ་ཡིག་འབྲུའི་ཚུལ་གྱིས་སྐུ་དང་ཡེ་ཤེས་སུ་སྣང་བ་དང་། བདེན་པ་དེ་གཉིས་ངོ་བོ་དབྱེར་མེད་པར་ཕན་ཚུན་གཅིག་གིས་གཅིག་བྱིན་གྱིས་བརླབས་ཏེ་ངོ་བོ་ཐ་མི་དད་པར་གནས་པ་དང་། དེ་ལྟའི་གནས་ལུགས་ཟབ་མོ་དེ་ཐ་སྙད་ཀྱི་བློའི་སྤྱོད་ཡུལ་དང་བྲལ་བར་རང་རིག་པའི་ཡེ་ཤེས་ཀྱིས་མངོན་དུ་བྱེད་པའོ། །དག་པ་གསུམ་ནི། སྣོད་འབྱུང་བ་ལྔ་ཡུམ་ལྔ། བཅུད་ཕུང་པོ་ལྔ་བདེ་གཤེགས་རིགས་ལྔ། རྒྱུད་རྣམ་ཤེས་ཚོགས་བརྒྱད་ཡེ་ཤེས་ལྔར་ཡེ་ནས་རྣམ་པར་དག་པ་ཡིན་ནོ། །མཉམ་པ་བཞི་ནི། སྤྲོས་པ་ཕྱོགས་རེ་ཆོད་པ་རྣམ་གྲངས་པ་དང་། མཐའ་དག་ཆོད་པ་རྣམ་གྲངས་མ་ཡིན་པའི་དོན་དམ་གཉིས་ཀ་རང་བཞིན་མ་གྲུབ་ཙམ་གྱིས་ཕྱེ་བས་དོན་དམ་ཙམ་དུ་མཉམ་པ་དང་། སྣང་ལ་དོན་བྱེད་ནུས་པ་ཡང་དག་དང་། དོན་བྱེད་མི་ནུས་པ་ལོག་པའི་ཀུན་རྫོབ་གཉིས་ཀ་ངོ་བོ་སྣང་ཙམ་ལས་བརྟགས་ན་དབེན་པའི་ཕྱིར་ཀུན་རྫོབ་ཏུ་མཉམ་པ་ནི་ཐུན་མོང་གི་མཉམ་པ་གཉིས་དང་། ཡེ་ནས་དབྱིངས་དང་ཡེ་ཤེས་གཉིས་སུ་མེད་པའི་གནས་ལུགས་ཡིན་པའི་ཕྱིར། རྣམ་གྲངས་པ་དང་རྣམ་གྲངས་མ་ཡིན་པའི་དོན་དམ་གཉིས་ཀའང་ལྷག་པའི་དོན་དམ་དཀོར་བདུན་ངོ་བོ་ཉིད་དུ་ལྷུན་གྱིས་གྲུབ་པར་མཉམ་པ་དང་། ཡང་དག་དང་ལོག་པའི་ཀུན་རྫོབ་གཉིས་ཀའང་གནས་ཚུལ་དུ་ཡེ་ནས་དག་པའི་ཕྱིར་ལྷག་པའི་ཀུན་རྫོབ་སྐུ་དང་ཡེ་ཤེས་ཀྱི་ངོ་བོར་མཉམ་པ་ནི་ལྷག་པའི་མཉམ་པ་གཉིས་བཅས་བཞིའོ། །བདག་ཉིད་ཆེན་པོ་ནི། འཁོར་འདས་ཀྱི་ཆོས་རྣམས་སྣང་ལུགས་ནས་དུ་མར་སྣང་ཡང་། གནས་ལུགས་བདག་ཉིད་ཆེན་པོ་རང་བྱུང་གི་ཡེ་ཤེས་ཉག་གཅིག་ཏུ་ངེས་ཏེ་མཐར་ཐུག་དཔྱོད་རིགས་ཀྱིས་དེ་ལྟར་གྲུབ་པའི་ཕྱིར་རོ། །

༈ ཐོག་མར་བསྐྱེད་རིམ་ལ་འཇུག་པའི་སྒོ་མ་ནོར་བ་ཏིང་ངེ་འཛིན་གསུམ་གྱི་ཡིན་ལུགས་ལ་སློབ་པ་ཡང་། གཞི་དེ་བཞིན་ཉིད་ཀྱི་ཏིང་ངེ་འཛིན། ལམ་ཀུན་ཏུ་སྣང་བའི་ཏིང་ངེ་འཛིན། འབྲས་བུ་རྒྱུ་ཡི་ཏིང་ངེ་འཛིན་དང་གསུམ་ལས། དང་པོ་ནི་རྟག་པའི་མཐའ་བསལ་ཞིང་གཟུགས་མེད་ཁམས་ཀྱི་བག་ཆགས་དང་འཆི་བའི་སྲིད་པ་བཅས་ཆོས་ཀྱི་སྐུ་རུ་སྦྱངས་ཤིང་དག་པར་བྱེད་པས་ན་དེ་བཞིན་ཉིད་ཀྱི་ཏིང་ངེ་འཛིན་ཞེས་རིག་པའི་ངོ་བོ་བསམ་གྱིས་མི་ཁྱབ་པའི་ཆ་ནས་བཞག་གོ །གཉིས་པ་ནི། ཆད་པའི་མུའམ་མཐའ་བསལ་ཞིང་གཟུགས་ཁམས་ཀྱི་བག་ཆགས་དང་བར་དོའི་སྲིད་པ་བཅས་གནས་འགྱུར་ལོངས་སྐུ་རུ་རྫོགས་པར་བྱེད་པས་ན་ཀུན་ཏུ་སྣང་བའི་ཏིང་ངེ་འཛིན་ཞེས་རིག་གདངས་ཐུགས་རྗེའི་རང་བཞིན་གོ་མ་འགགས་པའི་ཆ་ནས་བཞག་གོ །གསུམ་པ་ནི། བདག་ལྟ་མཚན་འཛིན་གྱི་དྲི་མ་དང་འདོད་ཁམས་ཀྱི་བག་ཆགས་སྦྱངས་ཤིང་སྐྱེ་བ་སྤྲུལ་པའི་ལྷ་སྐུར་སྨིན་པར་བྱེད་པས་རྒྱུ་ཡི་ཏིང་ངེ་འཛིན་ཞེས་རིག་རྩལ་ཡུལ་ལ་ཤར་བའི་ཆ་ནས་བཞག་པ་སྟེ། བསྐྱེད་རིམ་རྒྱས་པ་སོགས་ཀྱི་སྐབས་སུ་རྒྱུ་ཡི་རིག་པ་ཧཱུྃཿཧྲཱིཿལ་སོགས་པའི་སྒྲ་དོན་གྱིས་གོ་སླ། དེ་ལྟ་བུའི་ཏིང་ངེ་འཛིན་རྣམ་པ་གསུམ་གྱིས་བསྐྱེད་གཞིའི་ཁོག་ཕུབ་ནས། སྐྱེ་གནས་བཞིའི་བག་ཆགས་སྦྱོང་ཞིང་གང་ཟག་གི་བློ་ལ་བརྟན་པ་རིམ་གྱིས་ཐོབ་ཕྱིར་བསྐྱེད་རིམ་རྣམ་པ་བཞིའི་ལམ་ལ་འཇུག་པ་ཡང་སྒོང་སྐྱེས། མངལ་སྐྱེས། དྲོད་གཤེར་སྐྱེས། རྫུས་སྐྱེས་དང་བཞི་ལས། སྒོང་སྐྱེས་ཀྱི་བག་ཆགས་སྦྱོང་བ་རྒྱས་པ་ཆེན་པོའི་བསྐྱེད་རིམ་ནི་བདག་སྲས་དང་གཞན་སྲས་གཉིས་ལས། དང་པོ་བདག་གི་སྲས་སུ་གཞན་བྱ་བ་ལྔ་ནི། རྒྱུའི་ས་བོན་ལས་གཙོ་བོ་ཡབ་ཡུམ་བསྐྱེད་པ་དང་གཅིག །ཕྱོགས་བཅུའི་སངས་རྒྱས་སྲས་བཅས་ཡུམ་མཁར་བཀུག་པ་དང་གཉིས། སེམས་ཅན་བཀུག་ནས་སྒྲིབ་པ་སྦྱངས་པ་དང་གསུམ། འཁོར་འདས་གཉིས་སུ་མེད་པ་ལ་ཆེ་བ་བསྐྱེད་པ་དང་བཞི། དཀྱིལ་འཁོར་གྱི་ལྷ་ཚོགས་མཁའ་ནས་བཏོན་ཏེ་གདན་ལ་འཁོད་པ་དང་ལྔའོ། །གཉིས་པ་གཞན་གྱི་སྲས་སུ་བདག་བྱ་བ་བརྒྱད་ནི། གཙོ་བོ་ཡབ་ཡུམ་འོད་དུ་ཞུ་བ་ས་བོན་དུ་གྱུར་པ་དང་གཅིག །དེ་ཉིད་འབྲས་བུའི་རྡོ་རྗེ་འཛིན་པ་ཡབ་ཡུམ་གྱི་སྐུར་བཞེངས་པ་དང་གཉིས། ཡབ་ཀྱི་རྟོགས་པའི་ཚོགས་ཡི་གེའི་རྣམ་པར་འགོད་པ་དང་གསུམ། ཡུམ་གྱིས་ཡབ་ལ་ཐུགས་རྗེའི་དཀྱིལ་འཁོར་སྤྲོ་བར་གསོལ་བ་གདབ་པ་དང་བཞི། སྔ་མ་དཀྱིལ་འཁོར་གྱི་འཁོར་ལོ་བསྒོམས་པ་རྣམས་སྐབས་འདིར་རང་ལ་བསྟིམ་ཞིང་གཉིས་སུ་མེད་པའི་ཡེ་ཤེས་ང་རྒྱལ་ལ་གནས་པ་དང་ལྔ། དེ་མ་ཐག་ཡབ་ཡུམ་བདེ་སྟོང་གཉིས་སུ་མེད་པར་སྦྱོར་བའི་ཡུམ་མཁར་དཀྱིལ་འཁོར་གསལ་བ་དང་དྲུགརྟོགས་ཚོགས་ལྷར་གྱུར་པ་ཡུམ་མཁའ་ནས་ཕྱིར་འདོན་ཞིང་ཕྱི་རོལ་གྱི་གདན་ལ་འཁོད་པ་དང་བདུན། ཡེ་ཤེས་པ་སྤྱན་དྲངས་ཤིང་དབང་བསྐུར་རྒྱས་གདབ་པ་དང་བརྒྱད་དོ། །དེ་ལྟར་བདག་སྲས་ལྔ་དང་གཞན་སྲས་བརྒྱད་དེ་བཅུ་གསུམ་གྱིས་དཀྱིལ་འཁོར་ལྷའི་ཕྱག་རྒྱར་རྫོགས་པ་ནི་སྒོང་སྐྱེས་ཀྱི་བག་ཆགས་སྦྱོང་པའོ། །མངལ་སྐྱེས་ཀྱི་བག་ཆགས་སྦྱོང་པའི་མངོན་བྱང་ལྔ་བསྐྱེད་ནི། རྒྱུད་འགྲེལ་ཉི་སེང་ལྟར་ན། ཐོག་མར་སེམས་བསྐྱེད་དེ། ཡུད་ཙམ་གྱིས་ཀུན་ཏུ་བཟང་པོར་བསྒོམས་ནས་འོག་གི་ཕྱོགས་སུ་ཡེ་ཤེས་ཀྱི་ས་གཞི་ནས་བཟུང་གཞལ་ཡས་ཁང་གདན་དང་བཅས་པ་བསྐྱེད། དེ་ནས་ཉི་ཟླའི་གདན་ལ་སེམས་སྐྱིལ་ཀྱིས་འདུག་པར་མོས་ལ་བྱང་ཆུབ་ཀྱི་སེམས་ཡེ་ཤེས་སུ་བསྐྱེད་པའི་དོན་གྱིས་༼དེ་བཞིན་ཉིད་དང་ཀུན་སྣང་གི་མཆན་༽སྟོང་ཉིད་ཡེ་ཤེས། དེའི་ངང་ལས་རང་སེམས་ཨའི་ངོ་བོར་བསྒོམས་ནས་སྤྲོ་བསྡུ་ཨ་ལས་ཟླ་དཀྱིལ་གྱི་སྟེང་དུ་མཚན་གྱི་ས་བོན་ཨ་ལི་ཉིས་འགྱུར་དང་། ཨཱ་རིང་ལས་ཉི་དཀྱིལ་གྱི་སྟེང་དུ་དཔེ་བྱད་ཀྱི་ས་བོན་ཀ་ལི་ཉིས་རིམ་དུ་འགོད་པ་མེ་ལོང་ཡེ་ཤེས། དེ་དག་འོད་ཀྱི་གོང་བུ་གཅིག་ཏུ་འདྲིལ་བ་མཉམ་ཉིད་ཡེ་ཤེས། འོད་ཀྱི་གོང་བུ་དེ་ལས་ཧཱུྃ་དུ་གྱུར་ནས་དེའི་རྒྱུ་མཐུན་པའི་འབྲས་བུ་རྡོ་རྗེར་བྱིན་གྱིས་རློབ་པ་སོར་རྟོག་ཡེ་ཤེས། དེ་ཡོངས་སུ་གྱུར་པ་ལས་ཀུན་ཏུ་བཟང་པོའི་སྐུར་བསྐྱེད་པ་བྱ་གྲུབ་ཡེ་ཤེས་ཏེ་ཆོ་ག་ལྔའོ། །དེ་ནས་ཡུམ་བསྐྱེད་དེ་བྱང་ཆུབ་སེམས་སྤྲིན་ལས་ལྷ་སོ་སོའི་སྐུར་བསྐྱེད་པ་རང་རང་གི་སྔགས་ཀྱིས་ཕྱིར་ཕྱུང་ནས་དཀྱིལ་འཁོར་དུ་འགོད་པར་མཛད་དོ། །དཔེ་བྱད་ཀྱི་མཚོན་བྱེད་ཀ་ལི་བཞི་བཅུ་བརྩི་སྐབས་སུ་གསལ་བྱེད་སོ་བཞི་ལ་ཡི་གེ་ལྷག་པོ་དྲུག་སྣོན་ཚུལ་ལ། སློབ་དཔོན་སྐལ་ལྡན་རྡོ་རྗེའི་སྒྲུབ་ཐབས་གཙུག་ནོར་ལས། ཊ་ཌྷ་ད་དྷ་ལ་ཡ་དང་དྲུག་བསྣན། ཨ་བྷྱ་ཀ་རའི་མན་ངག་སྙེ་མ་ལས། ཊ་དྷ་ཡ་ར་ལ་ཝ་དང་དྲུག་བསྣན་པའོ། །ཀུན་མཁྱེན་ཆེན་པོས་གསལ་བྱེད་སོ་བཞིའི་སྟེང་། ཡ་ར་ལ་ཝ་སོགས་དྲུག་བསྣན་པའི་ཉིས་རིམ་དུ་གསུངས། གཞན་ཡང་བར་དོའི་རྣམ་ཤེས་དང་གཅིག །མངལ་དུ་འཇུག་ཁ་མ་དང་གཉིས། མངལ་དུ་ཞུགས་པ་དང་གསུམ། ཞུགས་ནས་ཟླ་བཅུར་རྫོགས་པ་དང་བཞི། ལུས་ཡོངས་སུ་རྫོགས་ནས་ཕྱི་རོལ་དུ་བཙའ་བ་དང་ལྔའོ། །ཆོ་ག་བཞི་བསྐྱེད་ནི། དེ་ཡང་མངལ་དུ་ཐིག་ལེ་དཀར་དམར་འདུས་པར་རྣམ་ཤེས་ཞུགས་པ་ལྟར་ལྷའི་ས་བོན་ཧཱུྃ་ལྟ་བུ་དང་། མེར་མེར་པོ་དང་ནུར་ནུར་པོ་ལྟར་ཧཱུྃ་ལས་རྡོ་རྗེ་དང་། ལྟར་ལྟར་པོ་དང་མཁྲང་གྱུར་ལྟར་རྡོ་རྗེ་ལས་སྐུ་དེའི་རྒྱུ་འོད་ལྔའི་གོང་བུ་དང་། ཁྱབ་འཇུག་ཉ་དང་རུས་སྦལ་ནས་ལུས་ཡོངས་སུ་རྫོགས་པ་ལྟར་འོད་ལྔའི་གོང་བུ་ལས་སྐུར་གྱུར་པ་ནས་བསྐྱེད་པའི་རིམ་པ་རྫོགས་པར་བསྒོམ་པའོ། །འབྲིང་པོ་རྡོ་རྗེའི་ཆོ་ག་གསུམ་བསྐྱེད་ནི། བར་དོའི་རླུང་སེམས་ཕ་མའི་ཁུ་རྡུལ་གྱི་དབུས་སུ་དང་པོར་ཞུགས་པ་ལྟར་གསུང་ཡིག་འབྲུ། མེར་ནུར་ལྟར་མཁྲང་གི་གནས་སྐབས་ལྟར་ཐུགས་ཕྱག་མཚན་དང་། གོར་ཉ་རུས་སྦལ་ནས་ལུས་རྫོགས་ཏེ་བཙས་པ་ལྟར་སྐུ་ཡོངས་སུ་རྫོགས་པའོ། །གཞན་ཡང་བར་སྲིད་དང་གཅིགམངལ་གནས་དང་གཉིས། ཕྱི་རོལ་དུ་བཙའ་བ་དང་གསུམ་མོ། །དྲོད་གཤེར་སྐྱེས་ཀྱི་བག་ཆགས་སྦྱོང་བ་བསྡུས་པའི་བསྐྱེད་རིམ་ནི། ས་བོན་བཀོད་པའམ་རྩ་བའི་སྔགས་བརྗོད་པ་ཙམ་གྱིས་དཀྱིལ་འཁོར་གྱི་ཕྱག་རྒྱ་ཚང་ལ་མ་འཁྲུལ་བར་གསལ་བ་སྟེ་གང་ཟག་དབང་པོ་རབ་ལ་འདི་ཙམ་གྱིས་ཆོག་པ་ཡིན་ནོ། །འདིར་གདན་གྱི་ཉི་མ་དྲོད། ཟླ་བ་གཤེར། ས་བོན་ཕྱག་མཚན་ནི་བར་དོའི་རླུང་སེམས། འོད་ཟེར་སྤྲོ་བསྡུ་དང་སྐུ་ཡོངས་སུ་རྫོགས་པས་དེ་གསུམ་འདུས་པ་ལས་དྲོད་གཤེར་གྱི་དབུས་ནས་ལུས་གྲུབ་པ་དེ་སྦྱོང་། བརྫུས་སྐྱེས་ཀྱི་བག་ཆགས་སྦྱོང་པ་ཤིན་ཏུ་བསྡུས་པའི་བསྐྱེད་རིམ་ནི། རིག་པ་ཆོས་ཉིད་ཀྱི་རང་གདངས་སྐད་ཅིག་ལ་ཆུ་ལས་ཉ་ལྡང་བ་ལྟར་ལྷར་སྣང་དུ་ཤར་བ་སྟེ། བསྐྱེད་རྫོགས་གདེངས་དུ་ཚུད་པའི་དབང་པོ་ཡང་རབ་ཀྱི་རྣལ་འབྱོར་པ་ལ་འདི་ཉིད་ཤིན་ཏུ་བདེ་ཞིང་འཐད་པ་དང་བཅས་པའོ། །འདི་ལ་ལྷའི་གདན་ནི་སྐྱེ་གནས། ས་བོན་ཕྱག་མཚན་ནི་བར་དོའི་རླུང་སེམས། འོད་ཟེར་སྤྲོ་བསྡུ་ནི་གནས་ལུས་ལ་སྲེད་པ་དང་ལེན་པའི་མཐུས་གསོས་བཏབ་པ། སྐུ་ཡོངས་སུ་རྫོགས་པ་ནི་ལུས་སྐད་ཅིག་ཏུ་འགྲུབ་པ་དེ་སྦྱོང་བར་བྱེད་པའོ། །དེ་ཡང་སྔ་འགྱུར་གཏེར་མའི་ཕྱོགས་འདིར་རྡོ་རྗེའི་ཆོ་ག་གསུམ་བསྐྱེད་ཉིད་མང་ཞིང་བསྐྱེད་ཚུལ་འདིས་སྐྱེ་གནས་བཞི་གའི་བག་ཆགས་སྦྱོང་བར་ནུས་ཏེ། སྐྱེ་གནས་གཞན་གསུམ་ནི་གོང་དུ་བཤད་པ་ལྟར་ཡིན་ལ། སྒོང་སྐྱེས་ལ་ཡང་ལྷའི་ས་བོན་ནི་དྲི་ཟའི་སེམས། ས་བོན་ཕྱག་མཚན་དུ་བསྒྱུར་བ་ནི་མངལ་དུ་ཁུ་ཁྲག་གི་དབུས་སུ་ཞུགས་པ། འོད་ཟེར་སྤྲོ་བསྡུའི་མཐར་ཕྱག་མཚན་དེ་ཉིད་འོད་དུ་ཞུ་བའི་གོང་བུས་སྒོ་ངར་གྱུར་པའི་བག་ཆགས་སྦྱོང་བར་བྱེད་པའོ། །འདིར་སྒྲུབ་སྡེའི་ལུགས་བཀའ་བརྒྱད་གསང་རྫོགས་ནས་གསུངས་པ་ལྟར་ན། སྤྱིར་བདག་སྲས་གཞན་སྲས་ཞེས་པའི་དོན། བདག་སྲས་ཞེས་པ་རང་སེམས་བདེ་བར་གཤེགས་པའི་སྙིང་པོ་ནི་འཁོར་འདས་ཀྱི་ཆོས་ཐམས་ཅད་ཀྱི་འཆར་གཞིར་གནས་པས་ན་རིག་པའི་ངོ་བོ་དེ་གཙོ་བོ་ཡབ་ཡུམ་དུ་བསྐྱེད་ནས་དེའི་སྲས་སུ་གཞན་དེ་བཞིན་གཤེགས་པ་རྣམས་བསྐྲུན་ཏེ་འཁོར་དུ་བཀོད་པའི་དོན་ཡིན་ལ། གཞན་སྲས་ནི་བདག་སྲས་ཀྱི་སྐབས་སུ་གཞན་དེ་བཞིན་གཤེགས་པ་ཐམས་ཅད་རང་ལ་བསྟིམས་ནས་མངལ་འབྱིན་གྱི་སྒོ་ནས་སྲས་ཀྱི་རྣམ་པར་འཁོར་དུ་བཀོད་པ་དེ་རྣམས་གཙོ་བོའི་ཐུགས་སུ་གྱུར་ནས་བདག་གི་རྟོག་ཚོགས་ཡི་གེའི་རྣམ་པར་ཡོད་པ་མཁའ་རུ་ཕབ་སྟེ་སྲས་སུ་བསྐྲུན་ནས་འཁོར་དུ་བཀོད་པའི་དོན་ནོ། །དེ་ཡང་བདག་གི་སྲས་སུ་གཞན་བྱ་བ་ལ་ལྔ་སྟེ། རྒྱུའི་ས་བོན་གྱི་ཡི་གེ་གདན་སྟེང་དུ་བབ་པ་སྤྲོ་བསྡུས་ཡོངས་སུ་གྱུར་པ་ལས་རྒྱུའི་ཧེ་རུ་ཀ་གཙོ་བོ་ཡབ་ཡུམ་དུ་བསྐྱེད་པ་དང་། ཡབ་ཡུམ་མཁའ་གསང་མཉམ་པར་སྦྱོར་བའི་བདེ་བའི་འོད་ཟེར་གྱིས་ཕྱོགས་བཅུའི་སངས་རྒྱས་ཐམས་ཅད་བཀུག་ནས་ཡབ་ཀྱི་སྤྱི་བོ་ནས་ཞུགས་ཏེ་ཡུམ་མཁར་བསྟིམ་པ་དང་། ཡང་འོད་ཟེར་འཕྲོས་པས་སེམས་ཅན་རྣམས་བཀུག་ལ་སྒྲིབ་པ་སྦྱངས་ཏེ་ཡུམ་མཁར་བསྟིམ་པ་དང་། འཁོར་འདས་ཀུན་གྱི་སྤྱི་དཔལ་ཆེན་པོ་ནི་ངའོ་ཞེས་འཁོར་འདས་གཉིས་སུ་མེད་པའི་བདག་ཉིད་ལ་ཆེ་བའི་ང་རྒྱལ་བསྐྱེད་པ་དང་། ལྷ་ཚོགས་རྣམས་མཁའ་གསང་ནས་བཏོན་ཏེ་སོ་སོའི་གདན་ལ་འགོད་པར་བྱེད་པའོ། །གཞན་སྲས་བརྒྱད་དེ། དཔེར་ན་སྒོང་སྐྱེས་རྣམས་དང་པོ་སྒོ་ང་སྨིན་པ་དང་། དེ་ནས་སྒོང་ཁྱིམ་བརྡོལ་ནས་དབང་པོ་དང་ཡན་ལག་རྫོགས་པ་དེ་བཞིན་ཏུ་གཙོ་བོ་ཡབ་ཡུམ་འོད་དུ་ཞུ་ནས་འོད་ཀྱི་གོང་བུ་ས་བོན་ཕྱག་མཚན་དང་བཅས་པར་གྱུར་པ་དང་། དེ་ཡོངས་སུ་གྱུར་པ་ལས་འབྲས་བུའི་ཧེ་རུ་ཀ་ཡབ་ཡུམ་དུ་བསྐྱེད་པ་དང་། དེའི་ཚེ་ཡབ་ཀྱི་རྟོག་པ་ཐམས་ཅད་ཡི་གེའི་ངོ་བོར་གྱུར་ནས་སྲས་འདོན་གྱི་ནུས་པ་ཡོད་པར་བསམ་པ་དང་། ཡུམ་ལས་འོད་ཟེར་འཕྲོས་པས་བསྐུལ་ཏེ་འཁོར་གྱི་ལྷ་རྣམས་ལ་སྲས་བསྐྱེད་པའི་དོན་དུ་གསོལ་བ་གདབ་པ་དང་། འཁོར་གྱི་ལྷ་རྣམས་དགྱེས་པས་འོད་དུ་ཞུ་ནས་གཙོ་བོ་ཡབ་ཡུམ་གྱི་ཐུགས་ཀར་བསྟིམས་ཏེ་གཙོ་བོའི་ཐུགས་སུ་གྱུར་ནས་དཀྱིལ་འཁོར་ཀུན་གྱི་ཁྱབ་བདག་ཡེ་ཤེས་ཆེན་པོའི་བདག་ཉིད་ངའོ་ཞེས་ང་རྒྱལ་བཟུང་བ་དང་། ཡབ་ཡུམ་མཁའ་གསང་བྱིན་གྱིས་བརླབ་ཅིང་མཉམ་པར་སྦྱོར་བའི་ཡུམ་གྱི་མཁར་དཀྱིལ་འཁོར་གཞལ་ཡས་ཁང་གདན་དང་བཅས་པ་བསྐྱེད་པ་དང་། བདག་གི་རྟོག་པ་ཞེ་གཉིས་ཡི་གེའི་ངོ་བོར་གནས་པ་ཡོངས་སུ་གྱུར་པ་ལས་གཙོ་འཁོར་གྱི་ལྷ་ཚོགས་ཡོངས་རྫོགས་སུ་གསལ་བཏབ་སྟེ་ཡུམ་མཁའ་ནས་ཕྱིར་གདོན་པ་དང་། དབྱིངས་ནས་ཡེ་ཤེས་པ་སྤྱན་དྲངས་ཤིང་བསྟིམས་ལ་གནས་གསུམ་རྡོ་རྗེ་གསུམ་གྱིས་རྒྱབ་བཏབ་སྟེ་འཁོར་རྣམས་གདན་ལ་བཀོད། གཙོ་བོ་འབྲས་བུའི་ཧེ་རུ་ཀ་ལ་བསྟིམས། གཞལ་ཡས་ཁང་དང་། གདན་རྣམས་ཀྱང་རང་རང་ལ་བསྟིམ་པའོ། །མངལ་སྐྱེས་སྦྱོང་བྱེད་ལ་གསུམ་ལས་དང་པོ་མངོན་བྱང་ལྔ་བསྐྱེད་ནི། དེ་ཡང་གཞི་དུས་སུ་དཀར་དམར་རླུང་སེམས་ཚོགས་པ་དང་བཅས་པ་ཡེ་ནས་ཡེ་ཤེས་ལྔའི་ངོ་བོར་སངས་རྒྱས་པ་གཞིའི་མངོན་བྱང་། ༼གང་དུ་སྐྱེས་འགྱུར་གྱི་གནས་ལ་སྲེད་པ་ནི། བརྫུས་ཏེ་སྐྱེ་ན་གནས་ལ། དྲོད་གཤེར་ལས་སྐྱེ་ན་དྲི་རོ་ལ། སྒོ་ང་དང་མངལ་ལས་སྐྱེ་ན་ཕ་མའི་འདུ་འཕྲོད་ལ་སྲེད་པ་ཡིན་ནོ། །༽ལམ་དུས་སུ་ཚོགས་སྦྱོར་དུ་དཔེ་ཡི་ཡེ་ཤེས་དང་། མཐོང་ལམ་དུ་དོན་གྱི་འོད་གསལ་མངོན་དུ་བྱས་པའི་སྟོང་བཞི་ཟུང་འཇུག་དང་བཅས་པ་ལམ་གྱི་མངོན་བྱང་ཡིན་པས། དེ་རྒྱུད་ལ་སྐྱེད་བྱེད་བསྐྱེད་རིམ་གྱི་དུས་སུ་ཟླ་ཉི་ཕྱག་མཚན་སོགས་བསྒོམ་པའོ། །འབྲས་དུས་སུ་སྐུ་ལྔ་ཡེ་ཤེས་ལྔ་མི་སློབ་ཟུང་འཇུག་གི་ཡོན་ཏན་ཐམས་ཅད་ནི་འབྲས་བུའི་མངོན་བྱང་ངོ་། །དེ་ལྟར་གཞི་ལམ་འབྲས་གསུམ་དུ་སྦྱོར་ཚུལ་ངེས་པར་བྱས་ནས། བྱེ་བྲག་ལམ་གྱི་མངོན་བྱང་ལྔ་བསྒོམ་ཚུལ་ནི་སྦྱང་གཞི་གཟུགས་ཀྱི་ཕུང་པོ་དང་། ནམ་མཁའི་ཁམས། ལུས། ཀུན་གཞིའི་རྣམ་ཤེས། ཉོན་མོངས་པ་གཏི་མུག །མངལ་སྐྱེས་ཀྱི་ཕའི་ཁམས། དྲོད་གཤེར་སྐྱེས་ཀྱི་གཤེར། སྒོང་སྐྱེས་ཀྱི་ཕ། རྫུས་སྐྱེས་ཀྱི་སྟོང་པའི་ཆ་སོགས། སྦྱོང་བྱེད་མངོན་བྱང་དང་པོ་མེ་ལོང་ཡེ་ཤེས་དང་། རྣམ་སྣང་གི་ངོ་བོ་ཨཱཿལི་ལས་བྱུང་བའི་ཟླ་བའི་དཀྱིལ་འཁོར་བསྒོམ་པ་དང་། དེ་བཞིན་དུ་ཚོར་ཕུང་། ས་ཁམས། ཉོན་ཡིད། སེར་སྣ། ང་རྒྱལ། མངལ་སྐྱེས་ཀྱི་མའི་ཁམས་དམར་ཆ། སྒོང་སྐྱེས་ཀྱི་མའི་ཆ། དྲོད་གཤེར་སྐྱེས་ཀྱི་དྲོད། རྫུས་སྐྱེས་ཀྱི་གསལ་བའི་ཆ་རྣམས་སྦྱོང་བྱེད་མངོན་བྱང་གཉིས་པ་མཉམ་ཉིད་དང་རིན་འབྱུང་གི་ངོ་བོ་ཀཱ་ལི་ལས་བྱུང་བའི་ཉི་མའི་དཀྱིལ་འཁོར་བསྒོམ་པ་དང་། ཁུ་རྡུལ་གཉིས་ཀྱི་བར་དུ་དྲི་ཟ་ཉེ་བར་ལེན་པའི་སེམས་བར་དོའི་རྣམ་ཤེས་ཞུགས་པ་དང་། འདུ་ཤེས་ཀྱི་ཕུང་པོ། མེ་ཡི་ཁམས། ངགཡིད་ཀྱི་རྣམ་པར་ཤེས་པ། ཉོན་མོངས་པ་འདོད་ཆགས། སྐྱེ་གནས་བཞིར་འཇུག་པའི་བར་དོའི་རྣམ་ཤེས་རྣམས་སྦྱོང་བྱེད་མངོན་བྱང་གསུམ་པ་སོར་རྟོག་དང་འོད་དཔག་མེད་ཀྱི་ངོ་བོ་ས་བོན་ཕྱག་མཚན་དང་བཅས་པར་བསྒོམ་པ་དང་། ཁུ་རྡུལ་སེམས་གསུམ་རོ་གཅིག་ཏུ་འདྲེས་པ། འདུ་བྱེད་ཀྱི་ཕུང་པོ། རླུང་ཁམས། སྒོ་གསུམ་གྱི་བྱ་བ་དང་། སྒོ་ལྔའི་རྣམ་ཤེས། ཉོན་མོངས་ཕྲག་དོགསྐྱེ་གནས་བཞིའི་མངལ་སྒོང་གཉིས་ཀྱི་བར་དོའི་རྣམ་ཤེས་དང་ཁུ་ཁྲག་འདྲེས་པ། དྲོད་སྐྱེས་ཀྱི་རྣམ་ཤེས་དང་དྲོད་གཤེར་འདྲེས་པ། རྫུས་སྐྱེས་ཀྱི་གསལ་ལ་སྟོང་པ་ཙམ་དང་བར་སྲིད་ཀྱི་རྣམ་ཤེས་འདྲེས་པའི་ཆ་རྣམས་སྦྱོང་བྱེད་མངོན་བྱང་བཞི་པ་བྱ་གྲུབ་དང་དོན་གྲུབ་ཀྱི་ངོ་བོ་ཟླ་ཉི་ཕྱག་མཚན་ས་བོན་དང་བཅས་པ་རོ་གཅིག་ཏུ་འདྲེས་པའི་ཐིག་ལེ་གོང་བུའི་རྣམ་པ་ཅན་དུ་བསྒོམ་པ་དང་། མངལ་གྱི་གནས་སྐབས་ཡོངས་སུ་རྫོགས་ནས་ཕྱིར་བཙས་པ་དང་། རྣམ་ཤེས་ཀྱི་ཕུང་པོ། ཆུའི་ཁམས། ཡིད་ཀྱི་རྣམ་ཤེས་ཚོགས་བརྒྱད་ཀྱི་ཆོས་ཉིད་དུ་འཛིན་པའི་ཆ། ཉོན་མོངས་པ་ཞེ་སྡང་། སྐྱེ་གནས་བཞིར་སྐྱེ་བ་ལེན་པའི་སྐྱེ་མཆེད་རྫོགས་པའི་གནས་སྐབས་རྣམས་སྦྱོང་བྱེད་མངོན་བྱང་ལྔ་པ་ཆོས་དབྱིངས་ཡེ་ཤེས་དང་མི་སྐྱོད་པའི་ངོ་བོ་སྐུ་ཡོངས་རྫོགས་སུ་བསྒོམ་པ་རྣམས་སོ། །འདིའི་དག་རྫོགས་སྨིན་གསུམ་ནི། འགྲོ་བའི་ལུས་རྟེན་ཁྱད་པར་ཅན་ཁམས་དྲུག་ལྡན་གྱི་མི་ལྟ་བུ་ལ་ཁམས་ཀྱི་སྦྱང་གཞི་རྩ་ཐིག་རླུང་སེམས་རགས་པའི་ཆ་མངོན་གྱུར་དུ་ཡོད་པ་ཐབས་ཀྱིས་ཟིན་པས་གྲོལ་བར་འགྱུར་ཏེ། དང་པོར་དབང་གིས་སྨིན་པར་བྱས་ནས། རྟོག་བཅས་ཀྱི་ལམ་བསྐྱེད་རིམ་གྱི་དུས་སུ་མངོན་བྱང་ལྔ་བསྒོམ་པའི་ཚེ་ནའང་གནད་དུ་བསྣུན་བྱའི་གཙོ་བོ་དཀར་དམར་སེམས་གསུམ་ཡིན་པའི་ཕྱིར་འཁོར་བ་དང་མཐུན་པའི་རྣམ་པ་ལམ་བྱེད་ཀྱིས་སྦྱང་བྱ་སྲིད་པའི་རང་བཞིན་ཁུ་རྡུལ་རླུང་གསུམ་སེམས་དང་བཅས་པའི་ཆ་ཐམས་ཅད་རྣམ་པར་དག་པ་རྒྱལ་བའི་བཞུགས་ཚུལ་དང་མཐུན་པར་མོས་པ་ལམ་བྱེད་བསྒོམས་པས་འབྲས་ཆོས་ལྔ་དང་ཡེ་ཤེས་ལྔའི་ཡོན་ཏན་ཐམས་ཅད་གཞི་ལ་རྫོགས། དེ་གཉིས་ཀ་སྣང་བ་དང་། མཆེད་པ་དང་། ཉེར་ཐོབ་དང་། འོད་གསལ་དང་། ཟུང་འཇུག་ལ་སོགས་པའི་རྫོགས་རིམ་གྱི་སྨིན་བྱེད་དུ་འགྱུར་བ་ཡིན་ནོ། །གཉིས་པ་མངོན་བྱང་བཞི་བསྐྱེད་ལ། དང་པོ་ལ་སྤྲོས་བྲལ་རྣམ་པར་མི་རྟོག་པའི་ཏིང་ངེ་འཛིན་ལ་མཉམ་པར་བཞག་ནས། དེའི་ངང་ལས་དེ་ལྟར་མ་རྟོགས་པའི་སེམས་ཅན་རྣམས་ལ་ཞེན་མེད་སྒྱུ་མ་ལྟ་བུའི་སྙིང་རྗེ་བྱང་ཆུབ་ཀྱི་སེམས་བསྒོམ་པ་སྟེ། འདིས་མར་སྦྱང་བྱ་རང་བཞིན་བརྒྱད་ཅུའི་རྟོག་ཚོགས་ཐམས་ཅད་འཁྲུལ་སྟོབས་ཀྱིས་ནུབ་པའི་འཆི་སྲིད་དང་། སླར་ཡང་ལས་རླུང་མཆེད་པའི་སྟོབས་ཀྱིས་བར་དོའི་སྣང་བ་ཡད་ཡུད་དུ་འབྱུང་བ་བཅས་དགཡར་ཆོས་སྐུ་དང་ལོངས་སྐུ་གཉིས་གཞི་ལ་རྫོགས་པར་བྱེད། བར་དུ་འོད་གསལ་དང་སྒྱུ་ལུས་གཉིས་ཀྱི་སྨིན་བྱེད་དུ་འགྱུར་རོ། །གཉིས་པ་ནི། ངོ་བོ་སྟོང་ཉིད་སྙིང་རྗེ་ཟུང་དུ་འཇུག་པའི་ཡེ་ཤེས་རྣམ་པ་ལྷའི་ས་བོན་གྱི་རྣམ་པར་བསྒོམ་པ་སྟེ། འདིས་དྲི་ཟ་ཉེ་བར་ལེན་པ་བར་དོའི་རྣམ་ཤེས་དེ་ཕ་མའི་ཁུ་ཁྲག་གི་དབུས་སུ་ཞུགས་ཤིང་འདྲེས་པའི་ཆ་སྦྱོང་ཞིང་དགསྤྲུལ་སྐུ་གཞི་ལ་རྫོགས། དཔེའི་འོད་གསལ་ལས་སྒྱུ་ལུས་ཀྱི་ལྷ་སྐུར་ལྡང་བའི་སྨིན་བྱེད་དུ་འགྱུར་རོ། །གསུམ་པ་ནི་ས་བོན་གྱི་ཡི་གེ་ཉིད་ཐུགས་རྡོ་རྗེ་ཕྱག་མཚན་གྱི་རྣམ་པར་གྱུར་ཞིང་དེ་ལས་སྐུ་ཡོངས་རྫོགས་སུ་བསྐྱེད་པ་སྟེ། འདིས་ཁུ་རྡུལ་རླུང་སེམས་ཀྱི་ཆ་འདྲེས་པ་དེ་རླུང་གི་བྱེད་ལས་ཀྱིས་མེར་ནུར་ལྟར་གོར་མཁྲང་གྱུར་ཁྱབ་འཇུག་ཉ་དང་རུས་སྦལ་གྱི་རྣམ་པ་དང་མིག་སོགས་དབང་པོ་དང་ཡན་ལག་ཡོངས་སུ་རྫོགས་པ་དེ་བྱང་ཞིང་དགཟུང་འཇུག་ངོ་བོ་ཉིད་སྐུ་གཞི་ལ་རྫོགས། དོན་གྱི་འོད་གསལ་ཟུང་འཇུག་གི་ལྷ་སྐུར་ལྡང་བའི་སྨིན་བྱེད་དུ་འགྱུར་རོ། །བཞི་པ་ནི། ལྷ་མངལ་འབྱིན་གྱི་ས་བོན་སྤྲོ་བའམ། མིན་ཀྱང་གནས་གསུམ་ལ་ཡི་གེ་བཀོད་དེ་རྒྱས་གདབ་པ་སྟེ། འདིས་བྱིས་པ་དེ་བཙས་ནས་དབང་པོ་ཡུལ་ལ་སད་དེ་སྣ་ཚོགས་པའི་དངོས་པོ་སྤྱོད་པའི་ཞེན་པ་དགསངས་རྒྱས་ཀྱི་ལྷུན་གྱིས་གྲུབ་པའི་འབྲས་བུ་གཞི་ལ་རྫོགས། རྫོགས་རིམ་པ་སློབ་པའི་ཟུང་འཇུག་གི་ལྷ་སྐུར་ལྡང་ནས་འདོད་ཡོན་གྱི་སྣང་བ་ལ་ཞེན་མེད་དུ་རོལ་བས་རིག་པའི་རྒྱན་དུ་འཆར་བའི་སྨིན་བྱེད་དུ་འགྱུར་རོ། །གསུམ་པ་རྡོ་རྗེའི་ཆོ་ག་གསུམ་བསྐྱེད་ནི། སྔ་འགྱུར་གཏེར་མའི་ཕྱོགས་འདིར་མངལ་སྐྱེས་སྦྱོང་བྱེད་བསྡུས་པ་འདི་ཉིད་མང་ཞིང་དེ་ལྟ་ན། འདིའི་སྦྱང་བྱ་བར་དོའི་རྣམ་ཤེས་དེ་ཕ་མའི་ཁུ་ཁྲག་གི་དབུས་སུ་ཞུགས་ནས་རིམ་གྱིས་ལུས་རྫོགས་པ་དང་མཐུན་པར། སྦྱོང་བྱེད་གཞལ་མེད་ཁང་གི་དབུས་སུ་པདྨ་དམར་པོའི་གདན། དེའི་སྟེང་དུ་ཉི་མའི་དཀྱིལ་འཁོར་དམར་པོ་དང་ཟླ་བའི་དཀྱིལ་འཁོར་ཉ་གང་བ་གཉིས་བརྩེགས་པ། པདྨའི་ལྟེ་བ་དང་མཉམ་པའི་གདན་ལ་ས་བོན་རྒྱུའི་ཏིང་ངེ་འཛིན་གྱི་ཡི་གེ་བབ་པ་བར་དོའི་རྣམ་ཤེས་མའི་མངལ་དུ་དཀར་དམར་ཚོགས་པ་ལ་འཇུག་མ་རག་གི་གནས་སྐབས་དེ་ཡིན། ས་བོན་ལྷ་གང་ཡིན་གྱི་ཕྱག་མཚན་དུ་བསྒྱུར་བ་ནི་ཁམས་དཀར་དམར་གྱི་དབུས་སུ་རྣམ་ཤེས་ཞུགས་ནས་ཁུ་རྡུལ་སེམས་གསུམ་གཅིག་ཏུ་འདྲེས་པ་དེ་སྦྱོང་། དེ་ལས་འོད་ཟེར་སྤྲོ་བསྡུ་ནི་མངལ་གྱི་ལུས་དེ་ཉིད་འབྱུང་བ་བཞིའི་བྱེད་ལས་ཀྱིས་ཕུང་ཁམས་སྐྱེ་མཆེད་རིམ་གྱིས་གྲུབ་པ་དང་། ཕྱག་མཚན་དེ་ཡོངས་སུ་གྱུར་པ་ལས་སྐུ་ཡོངས་སུ་རྫོགས་པ་ནི་མངལ་གྱི་སེམས་ཅན་དེ་རྣམས་ལུས་རྫོགས་ནས་བཙས་པའི་བར་གྱི་བག་ཆགས་རྣམས་སྦྱོང་བར་བྱེད་པ་ཡིན་ལ། དེ་ལྟར་བསྐྱེད་ཚུལ་འདིས་སྐྱེ་གནས་གཞན་གྱི་བག་ཆགས་ཀྱང་ཞར་ལ་སྦྱོང་བར་ནུས་སོ། །མདོར་ན་རྡོ་རྗེའི་ཆོ་ག་དང་པོས་བར་དོའི་རླུང་སེམས་ཕ་མའི་ཁུ་རྡུལ་གྱི་དབུས་སུ་དང་པོར་ཞུགས་པ་ལྟར་གསུང་ཡིག་འབྲུ། གཉིས་པ་མེར་ནུར་ལྟར་མཁྲང་གི་གནས་སྐབས་ལྟར་ཐུགས་ཕྱག་མཚན། གསུམ་པ་གོར་ཉ་རུས་སྦལ་ནས་ལུས་རྫོགས་ཏེ་བཙས་པ་ལྟར་སྐུ་ཡོངས་སུ་རྫོགས་པའོ། །དྲོད་གཤེར་སྐྱེས་སྦྱོང་བྱེད་ཨ་ནུ་ཡོ་གའི་དགོངས་པ་སྤྲོས་མེད་ཀྱི་བསྐྱེད་རིམ་ནི། སེམས་ཅན་དྲོད་གཤེར་ལས་སྐྱེས་པ་རྣམས་ནི་མངལ་སྐྱེས་ལྟར་ཡུན་རིང་དུ་སྨིན་མི་དགོས་པར། དྲོད་གཤེར་གཉིས་ལྷན་དུ་འདུས་པར་རྣམ་ཤེས་ཞུགས་པས་དེའི་མོད་ལ་གཟུགས་ཀྱི་དངོས་པོ་ཡོངས་སུ་རྫོགས་པར་འགྲུབ་པ་བཞིན། དབྱིངས་དང་ཡེ་ཤེས་གཉིས་སུ་མེད་པའི་སྲས་བདེ་བ་ཆེན་པོ་རྩ་བ་བྱང་ཆུབ་སེམས་ཀྱི་དཀྱིལ་འཁོར་དུ་ཆོས་ཐམས་ཅད་ཡེ་ནས་སངས་རྒྱས་པའི་རང་བཞིན་དུ་ཤེས་པ་ལུང་ཆེན་ཨ་ནུའི་ལྟ་བ་ལས་མ་གཡོས་བཞིན་དུ། རྩལ་སྣང་སྙིང་རྗེའི་འཕེན་པ་གཏད་པས་དྲོད་གཤེར་སྐྱེས་རྣམས་གནས་ལུས་ལ་སྲེད་པའི་བག་ཆགས་སྦྱང་བའི་ཕྱིར། གང་བསྐྱེད་བྱའི་ལྷའི་སྙིང་པོ་བརྗོད་པ་ཙམ་གྱིས། དོན་དམ་ཤེས་རབ་ཀྱི་དབྱིངས་སྟོང་ཉིད་ཀུན་ཏུ་བཟང་མོའི་ཀློང་ནས་ཀུན་རྫོབ་བདེན་པའི་སྣང་ཆ་རྟེན་དང་བརྟེན་པའི་ལྷའི་ཕྱག་རྒྱ་ཡོངས་སུ་བསྒོམ་ཞིང་བདེ་སྟོང་དབྱེར་མེད་ཀྱི་ལམ་ལ་སློབ་པ་སྟེ་འདི་ལ་ཡུལ་སྣང་བདེན་མེད་དུ་ཤེས་པ་སྒྱུ་མའི་བསྐྱེད་རིམ་ཞེས་བྱའོ། །རྫུས་སྐྱེས་སྦྱོང་བྱེད་མན་ངག་ཨ་ཏི་ཡོ་གའི་དགོངས་པ་དང་མཐུན་པར་ཤིན་ཏུ་སྤྲོས་མེད་ཀྱི་བསྐྱེད་རིམ་ནི། སེམས་ཅན་རྫུས་ཏེ་སྐྱེ་བ་རྣམས་གསལ་སྟོང་གི་ཆ་ལ་རྣམ་ཤེས་ཞུགས་པ་ཙམ་གྱིས་ལུས་ཡོངས་སུ་རྫོགས་པར་གྲུབ་པ་ནི་དྲོད་གཤེར་སྐྱེས་ལས་ཀྱང་མྱུར་བ་ལྟར་དེ་སྦྱོང་བྱེད་ཀྱི་ལམ་ཡང་། རྡོ་རྗེ་དྲིལ་བུ་ལས། སེམས་ཅན་རྫུས་ཏེ་སྐྱེ་བ་བཞིན། །ས་བོན་མེད་པར་རྣམ་པར་བསྒོམ། །ཞེས་གསུངས་པ་ལྟར། འདི་ལྟར་སྣང་གྲགས་རྟོག་ཚོགས་ཀྱིས་བསྡུས་པའི་ཆོས་ཐམས་ཅད་ཡེ་ནས་རྒྱལ་བའི་སྐུ་གསུང་ཐུགས་རྡོ་རྗེའི་ངོ་བོར་སངས་རྒྱས་པས་མ་བསྐྱེད་ལྷུན་གྱིས་རྫོགས་པའི་དཀྱིལ་འཁོར་རྩོལ་བྲལ་འབྲས་བུའི་ས་ལ་ད་ལྟ་ནས་གནས་པ་མན་ངག་ཨ་ཏི་ཡོ་གའི་ལྟ་བའི་ངང་ལས་རྟེན་དང་བརྟེན་པའི་དཀྱིལ་འཁོར་ཡོངས་སུ་རྫོགས་པ་ཆུ་ལས་ཉ་འཕར་བའི་ཚུལ་དུ་སྐད་ཅིག་གིས་གསལ་འདེབས་པའོ། །

༈ དཀོན་མཆོག་འགྲེལ་ལས། འདི་ལྟར་རྣམ་པར་སྣང་མཛད་སྒྱུ་འཕྲུལ་དྲྭ་བ་ལས། དང་པོ་དམ་ཚིག་བྱིན་བརླབ་པ། །བརྟགས་པ་རྣལ་འབྱོར་སྤྱོད་པའོ། །དབུ་མ་རྫོགས་པར་བྱ་བ་དག །འདི་ནི་རྣལ་འབྱོར་ཆོ་གར་བཤད། །ཅེས་གསུངས་སོ། །དེ་ལ་དང་པོའི་ཚིག་ནི་གཞུང་ལུགས་ལ་འཇུག་པས་གཞུང་ལུགས་དང་པོ་སྟེ། ཉན་ཐོས་པའི་གཞུང་ངོ་། །དེ་དང་མཐུན་པ་བྱིན་གྱིས་བརླབ་པའི་རྣལ་འབྱོར་ཏེ། ཇི་ལྟར་ཞེ་ན། འདིར་བདག་གི་དེ་ཁོ་ན་ཉིད་ལ་བདག་གི་ནི་ཕུང་པོ་ལྔ་བློས་རྣམ་པར་མ་ཕྱེ་བའོ། །དེ་ཁོ་ན་ཉིད་ནི་མུ་སྟེགས་ཅན་གྱིས་བདག་དང་བདག་གི་ལ་སོགས་པ་ཀུན་ཏུ་བརྟགས་པས་སྟོང་པ། ཕུང་པོ་ཁམས་དང་སྐྱེ་མཆེད་ཀྱི་ཆོས་ཙམ་མེད་པར་སྐུར་བ་གདབ་ཏུ་མི་རུང་བ་འདི་ནི་བདག་གི་དེ་ཁོ་ན་ཉིད་དོ། །དེ་ནི་བྱིན་གྱིས་བརླབ་ཏུ་རུང་བའི་གཞི་སྟེ། དེ་ལ་བྱིན་གྱིས་རློབ་པར་བྱེད་པ་ནི་ལྷའི་དངོས་པོའོ། །དེ་ཡང་ཆོས་ཉིད་དག་པ་དང་། རྣམ་པར་མི་རྟོག་པའི་ཡེ་ཤེས་དང་། རྣམ་པར་རྟོག་པ་དང་བཅས་པའི་ཡེ་ཤེས་དང་། སྒྲ་དང་ཡི་གེ་དང་། གཟུགས་ལ་སོགས་པའི་ལྷར་རྟོག་པ་རྣམས་སོ། །འདིར་ཕྱི་རོལ་གྱི་གཟུགས་གྱི་བློ་མི་གཏོང་བས་གཞུང་ལུགས་དང་པོ་ཉན་ཐོས་དང་མཐུན་པ་ཡིན་ཏེ། དེ་ལྟ་བུས་འདུལ་བའི་གང་ཟག་གི་དབང་དུ་གསུངས་པའི་ལྷའི་རྣལ་འབྱོར་སྒོམ་པའི་ཐབས་ཡིན་ནོ། །ཡོངས་སུ་བརྟགས་པའི་རྣལ་འབྱོར་ནི་རྣལ་འབྱོར་སྤྱོད་པ་པ་དང་སྒོ་མཐུན་པ་ཡིན་ཏེ། འདི་ལྟར་བདག་གི་དེ་ཁོ་ན་ཉིད་ཀྱང་གཟུང་བ་དང་འཛིན་པར་ཀུན་ཏུ་བརྟགས་པས་སྟོང་པ་སེམས་དང་སེམས་ལས་བྱུང་བ་རང་རིག་པ་གང་གིས་ཀྱང་གཟུང་བར་བྱ་བ་མ་ཡིན་པ་གང་ལ་ཡང་འཛིན་པར་བྱེད་པ་མ་ཡིན་པ། སྐད་ཅིག་མ་རྒྱུན་འབྲེལ་བར་གནས་པ་འདི་ཙམ་མེད་པར་སྐུར་བ་གདབ་ཏུ་མི་རུང་སྟེ། དེ་ཡང་འདི་ལྟར་གྱུར་ན་ནི་འཕགས་པ་ཉིད་དང་ཁྱད་མེད་པ་ཡིན་མོད་ཀྱི། འོན་ཀྱང་སོ་སོའི་སྐྱེ་བོའི་སྐབས་སུ་ཡང་འདི་ལྟར་རྟོགས་ཤིང་གོམས་པ་ལས་རིམ་གྱིས་ལྷའི་སྐུར་བསྐྱེད་པར་བྱའོ། །འདི་ནི་སེམས་དང་ཡེ་ཤེས་རང་སྣང་མ་གཏོགས་པར་ཡུལ་གུད་དུ་མི་དམིགས་པས་རྣལ་འབྱོར་སྤྱོད་པ་དང་མཐུན་པ་སྟེ། འདི་ལྟར་འདུལ་བའི་དབང་དུ་གསུངས་པ་ནི་སྔ་མ་བཞིན་ནོ། །རྫོགས་པའི་རྣལ་འབྱོར་ནི་དབུ་མ་དང་སྒོ་མཐུན་པ་སྟེ། བདག་གི་དེ་ཁོ་ན་ཉིད་ཀྱང་བཏགས་པ་ཙམ་སྟེ། དེ་ལ་བདག་ནི་ཕུང་པོ་ལྔ་ལ་བློས་མ་ཕྱེ་བ་ཙམ་མོ། །དེའི་དེ་ཁོ་ན་ཉིད་ནི་སྤྲོས་པ་ཐམས་ཅད་ཡོངས་སུ་ཞི་བ་ཙམ་སྟེ། འདི་ལྟར་རྟེན་གང་ཡང་དམིགས་པ་མེད་དོ། །དེ་ལས་སྐུ་དང་ཡེ་ཤེས་ཀྱི་དཀྱིལ་འཁོར་སྣ་ཚོགས་སུ་འཕྲུལ་ཡང་རྟེན་མེད་ཅིང་ངོ་བོ་ཉིད་མེད་པའོ། །ཞེས་གསུངས་སོ། །

༈ གྲོལ་ལམ་རིམ་གྱིས་པའི་སྤྱོད་པ་ལ་བདུན་ལས། དང་པོ་དད་བརྩོན་གྱི་སྤྱོད་པ་འདི་ལ་གསང་སྔགས་ཀྱིས་བསླབ་པའི་མཐའ་བཅུ་འདུ་བ་ཡིན་ཏེ། དང་པོ་རྒྱུད་ཐོས་པས་གྲོལ་བ་ནི་ཐོག་མར་རྒྱུད་ལུང་མན་ངག་གི་དོན་ཟབ་མོ་མ་ཐོས་ན་བླང་དོར་གྱི་མིག་མི་འབྱེད་པས་རྒྱུད་ཐོས་པས་གྲོལ་བ་རྟ་ཕོ་སྒྲོག་བཀྲོལ་བ་ལྟ་བུར་གཞིར་བཞག་དང་། གཉིས་པ་སྒོ་ཀུན་ནས་སྡུད་པ་ནི། དེ་ཡང་ཐོས་པ་ཉུང་ངུས་ཤེས་རབ་རྒྱ་ཆེན་པོ་གྲོལ་བར་མི་ནུས་པས་ཐོས་པའི་སྒོ་མང་པོ་བཙལ་ཏེ་སྒོ་ཀུན་ནས་སྡུད་པ་བུང་བ་ཚང་ཚོལ་བ་ལྟ་བུའི་མང་དུ་ཐོས་པར་བྱ་བ་དང་། གསུམ་པ་མདོ་གཅིག་ཏུ་བསྡུས་པ་ནི། མང་དུ་ཐོས་ཀྱང་ལག་ལེན་གནད་དུ་མ་ཁེལ་ན་རང་རྒྱུད་མི་གྲོལ་བས་མཐར་ཐུག་པའི་མན་ངག་གིས་གནད་ཟབ་མོ་ཉམས་འོག་ཏུ་ཚུད་པར་བྱས་ནས་མདོ་གཅིག་ཏུ་སྡུད་པ་ཚོང་པ་ཁེ་ཚོལ་བ་ལྟ་བུའི་དོན་གནད་དུ་ཕོག་པར་བྱ་བ་དང་། བཞི་པ་མཁས་པ་ཕུལ་དུ་ཕྱིན་པ་ནི། དེ་ལྟར་བྱས་ནས་ཐོས་པས་རྒྱུད་ཀྱི་དོན་ཤེས། ལུང་གིས་རྒྱུད་དོན་ཉམས་སུ་བླངས། མན་ངག་གིས་ཡིད་ཆེས་ནས་ཐེ་ཚོམ་མེད་པའི་གདེངས་དང་ལྡན་པར་བསླབ་པའི་སྒོ་ནས་མཁས་པ་ཕུལ་དུ་ཕྱིན་པ་རི་མཐོན་པོའི་རྩེར་ཕྱིན་པ་ལྟ་བུ་ཞེས་བྱ་སྟེ། དེ་བཞི་ནི་གསང་སྔགས་ལ་བསླབ་པའི་ཚུལ་ལོ། །ལྔ་པ་རིམ་པ་དབང་གིས་བསྒྲོད་པ་ནི། གསང་སྔགས་ཀྱི་དབང་ཐོབ་པ་དང་གསང་བའི་དབང་ཐོབ་ནས་ཉོན་མོངས་པས་མི་བརྫི་བའི་ལས་ཅན་དུ་གྱུར་པ་རྒྱལ་བུ་རྒྱལ་ས་ཟིན་པ་ལྟ་བུའོ། །དྲུག་པ་གཞི་དམ་ཚིག་གིས་བཟུང་བ་ནི། བླ་མ་མཉེས་པར་བྱས་ལ་ཇི་སྐད་གསུངས་པའི་དམ་ཚིག་ལས་མི་འདའ་བ་ཞིང་ས་གཤིན་པོ་ལྟ་བུ་དངོས་གྲུབ་ཀྱི་ལོ་ཏོག་སྐྱེ་རུང་བའི་ལས་ཅན་ནོ། །བདུན་པ་ཐག་ལྟ་བས་བཅད་པ་ནི། འཁོར་འདས་ཀྱི་ཆོས་ཐམས་ཅད་རང་གི་སེམས་སུ་འདུ་ལ་སེམས་ཡེ་ནས་སངས་རྒྱས་པ་རང་བྱུང་གི་ཡེ་ཤེས་སུ་རྟོགས་ནས་བྱ་རྩོལ་རེ་དོགས་དང་བྲལ་ཏེ་བག་ཡངས་སུ་རྒྱུ་བ་ཁྱུང་ནམ་མཁའ་ལ་ལྡིང་བ་ལྟ་བུའོ། །བརྒྱད་པ་ཉམས་སུ་ཏིང་ངེ་འཛིན་གྱིས་བླང་བ་ནི། ཤེས་རབ་ཀྱིས་དམིགས་པའི་དོན་ལ་ཏིང་ངེ་འཛིན་གྱིས་གཡེང་བ་མེད་པར་རྩེ་གཅིག་ཏུ་བྱས་པ་ནོར་བུ་རིན་པོ་ཆེ་ལེན་པ་ལྟ་བུའོ། །དགུ་པ་ལ་སྤྱོད་པས་དོར་བ་ནི། མཉམ་བཞག་ཏུ་བྱ་བའི་ལས་ཐམས་ཅད་སྤངས་ནས་སྒོམ་པའི་ལས་ལ་འཇུག་པ་དང་། རྗེས་ཐོབ་ཏུ་བླང་དོར་མེད་པ་མཉམ་པ་ཉིད་ཀྱི་ལྟ་བ་ཟབ་མོ་དང་མཐུན་པར་འཇིགས་མེད་དུ་རྒྱུ་ཞིང་ཕྲིན་ལས་སྣ་ཚོགས་ལ་ཇི་ལྟར་འདོད་པ་བཞིན་འཇུག་པ་གླང་པོ་ཆེ་ཆུར་འཇུག་པ་ལྟ་བུའོ། །བཅུ་པ་དོན་མན་ངག་གིས་བསྒྲུབ་པ་ནི། གང་ཆེད་དུ་སྒྲུབ་པའི་དོན་ལ་གནད་དུ་འབྱོར་བའི་མན་ངག་གིས་ཐེ་ཚོམ་མེད་པའི་གདེངས་དང་ལྡན་པར་སྒྲུབ་པས་ཉམས་སུ་ལོན་ན་ཏིང་འཛིན་ཐོབ་པའི་དུས་ནས་བདུད་བཞི་ཆོམ་ནས་སྐུ་གསུམ་ཐོབ་པ་རིན་པོ་ཆེ་ཉོས་པ་ལྟ་བུ་སྟེ་བསླབ་པའི་མཐའ་དྲུག་གོ །གཉིས་པ་ཤེས་རབ་དང་མཐུན་པ་ཞེས་སྟོང་ཆེན་གྱི་དུས་སུ་ཐུན་མཚམས་ཀྱི་བྱ་བ་ཐམས་ཅད་མི་དམིགས་པའི་ཤེས་རབ་ཀྱི་རྩལ་སྦྱང་དུ་འཁྱེར་བ་དང་། གསུམ་པ་ཐབས་དང་མཐུན་པ་ཞེས་སྙིང་རྗེ་སྒྱུ་མའི་སྐབས་སུ་སྣང་སྤྱོད་ཡེ་ཤེས་སྒྱུ་མའི་ཡོ་ལང་དུ་བལྟ་བ་དང་། བཞི་པ་ཕྱོགས་གཅིག་པ་ནི་ཕྱག་རྒྱ་གཅིག་པའི་སྟེ། མཉམ་བཞག་ཏུ་ཟུང་འཇུག་ཕྱག་རྒྱ་གཅིག་པ་བསྒོམ་ཞིང་། རྗེས་ཐོབ་ཏུའང་དེའི་ཡུན་བསྲིང་བའོ། །ལྔ་པ་སྤྲོས་བཅས་ཀྱི་སྤྱོད་པ་ཞེས་མཉམ་བཞག་ཏུ་གང་བསྒོམ་གྱི་ལྷའི་ཏིང་ངེ་འཛིན་དེས་སྣང་བ་ཐམས་ཅད་ལ་རྒྱས་བཏབ་སྟེ་ལོག་རྟོག་འཁྲུལ་བའི་སྣང་བ་ཟིལ་གྱིས་གནོན་པ་དང་། དྲུག་པ་ཚོགས་ཀྱི་སྤྱོད་པ་ཞེས་ཚོགས་སྒྲུབ་ཀྱི་དུས་སུ་དག་མཉམ་བདེ་བ་ཆེན་པོའི་རྣལ་འབྱོར་ཁོར་ཡུག་ཏུ་སྐྱོང་བ་དང་། བདུན་པ་ཟག་མེད་རིག་འཛིན་ཐོབ་ནས་རྫུ་འཕྲུལ་གྱི་སྤྱོད་པ་ཞེས་ནུས་མཐུ་ཐོགས་པ་མེད་པའི་ཕྲིན་ལས་ཀྱིས་གཞན་དོན་རླབས་པོ་ཆེ་སྤྱོད་ཅིང་རང་རྒྱུད་ཀྱི་རྟོགས་པ་གོང་དུ་སྤོར་བའོ། །སྤྲོས་བཅས་ཚོགས་སྒྲུབ། སྤྲོས་མེད་རྣལ་འབྱོར་ཕོ་མོ་གཙོ་བོ་ཡབ་ཡུམ་ཙམ་ཚོགས་པ་ལ་བརྟེན་པ། ཤིན་ཏུ་སྤྲོས་མེད་ནི་ཡབ་མི་འགྱུར་བའི་བདེ་ཆེན་ཉིད་ཡུམ་རྣམ་ཀུན་མཆོག་ལྡན་གྱི་སྟོང་ཉིད་དང་། ཁ་སྦྱོར་སྤྱོད་པས་ཟག་མེད་ཀྱི་ལམ་ལ་སྦྱོར་བར་བྱེད་དོ། །ཆོ་གའི་བྱ་བ་ལ་ལྟོས་པའི་སྤྱོད་པ་གསུམ་ནི། སྤྲོས་ལ་ཤིན་ཏུ་དགའ་བ་ན་ཚོད་གཞོན་པ། ཡོ་བྱད་མང་བ་སོགས་སྤྲོས་བཅས། དེ་དག་འབྲིང་ལ་སྤྲོས་མེད། ཆུང་བ་ལ་ཤིན་ཏུ་སྤྲོས་མེད། སྒོམ་བསམ་ལ་ལྟོས་པའི་སྤྱོད་པ་གསུམ་ནི། བསྐྱེད་རིམ་དང་། རྫོགས་རིམ། ཟུང་འཇུག་གསུམ་གྱི་སྐབས་སོ། །དུས་ལ་ལྟོས་པའི་ཚོགས་སྤྱོད་གསུམ་ནི། སངས་རྒྱས་མཉམ་སྦྱོར་ལས། ཉིན་རེའམ་ཟླ་བ་རེ་རེའམ། །དེ་བཞིན་ལོ་ནི་རེ་རེར་ཡང་། །ཞེས་སོ། །གནས་ཀྱི་སྒོ་ནས་དབྱེ་བ་སྡོམ་འབྱུང་ལས། རང་གི་ཁྱིམ་དུ་སྤྱོད་པ་དང་དུར་ཁྲོད་དུ་སྤྱོད་པ་དང་ཞིང་རྣམས་སུ་རྒྱུ་བ། ཞེས་སོ། །ལས་དང་པོ་བའི་དུས་སུ་ཏིང་ངེ་འཛིན་ལ་བརྟན་པ་མ་ཐོབ་པའི་བག་དང་ལྡན་པའི་གཟོབ་པ་ལྷུར་ལེན་པ་དགེ་སྦྱོང་གཞོན་ནུའི་སྤྱོད་པ་ལྟ་བུ། མཉམ་རྗེས་བསྲེ་བར་ནུས་པ་ན་རྟོགས་པ་རྐྱེན་ཐུབ་ཏུ་བྱེད་པ་སྨྱོན་པ་བརྟུལ་ཞུགས་ཀྱི་སྤྱོད་པ་དང་། ཏིང་ངེ་འཛིན་ལ་བརྟན་པ་ཆེར་ཐོབ་ནས་རྟོགས་པ་ལ་བྲི་གང་མེད་པ་ན་གཞན་ཕན་ཁོ་ན་ལ་བསླབ་པ་རྒྱལ་པོ་ས་འཛིན་གྱི་སྤྱོད་པ་ལྟ་བུའོ། །ཨ་བ་དྷུ་ཏི་སྟེ་ཀུན་འདར་གྱི་སྤྱོད་པ་ནི། གཉིས་སྣང་གི་རྣམ་རྟོག་འཇོམས་པར་བྱེད་པ་དང་། བདེན་འཛིན་གཡོ་ཞིང་འདར་བ་དང་སྐྲོད་པར་བྱེད་པ་ཡིན་ཏེ། ས་པཎ་གྱིས། རྒྱ་སྐད་ཨ་བ་དྷཱུ་ཏིའི་སྒྲ། །གཉིས་སྤངས་སམ་ནི་ཀུན་འདར་ཡིན། །ཞེས་སོ། །ཀུན་བཟང་གི་སྤྱོད་པ་ནི། དེས་བྱ་བ་ཅི་བྱེད་ཐམས་ཅད་བཟང་ངན་གང་དུ་སྣང་ཡང་དུས་ཀུན་ཏུ་ངོ་བོ་བཟང་པོ་འབའ་ཞིག་ཡིན་པའོ། །ཕྱོགས་ལས་རྣམ་རྒྱལ་གྱི་སྤྱོད་པ་ནི། ཉོན་མོངས་ལས་དངོས་སུ་རྒྱལ་ཞིང་བདུད་བཞི་པོ་རྣམས་བཏུལ་བ་དང་། སེམས་ཅན་གྱི་དོན་ལ་སྟོབས་དང་ལྡན་པ་དང་། ཤེས་བྱའི་སྒྲིབ་པའང་འཇོམས་བཞིན་པ་ཡིན་པས་སོ། །ཨ་ཝ་དྷཱུ་ཏི་སྟེ་ཀུན་འདར་གྱི་སྤྱོད་པའམ་གསང་བའི་སྤྱོད་པ་ལ་སྤྲོས་མེད་ཤས་ཆེ། ཀུན་བཟང་གི་སྤྱོད་པ་ལ་སྤྲོས་བཅས་སྤྲོས་མེད་ཆ་མཉམ། ཕྱོགས་ལས་རྣམ་རྒྱལ་ལ་སྤྲོས་བཅས་གཙོ་བོར་སྤྱོད་པ་ཡིན་ནོ། །དེ་ལ་ཨ་ཝ་དྷཱུ་ཏིའི་དོན། ཨ་ཝ་དྷུ་ནོ་ཏི་སྟེ་སྡིག་པ་སྐྲོད་པ་ཞེས་ཀྱང་འགྱུར། གཉིས་སྤངས་དང་ཀུན་འདར་ཞེས་སུའང་འགྱུར་ཏེ། སམ་བུ་ཊི་ལས། སྡིག་བཅོམ་བྱེད་པ་འདི་མྱུར་ཐོབ། །ཅེས་དང་། བསམ་གྱིས་མི་ཁྱབ་པ་ཡི་གནས། །རྣལ་འབྱོར་པས་ནི་སྒོམ་བྱེད་པ། །ཨ་བ་དྷཱུ་ཏིའི་སྤྱོད་པ་བཤད། །རྟོག་པ་ཐམས་ཅད་རྣམ་སྤངས་པ། །ཞེས་གསུངས་པས་སྡིག་པ་དག་པ་དང་གཉིས་སྣང་གི་རྣམ་རྟོག་དང་པོར་འཇོམས་བྱེད་ཡིན་པ་དང་། མཚན་འཛིན་ནམ་བདེན་འཛིན་གཡོ་ཞིང་འདར་བ་དང་སྐྲོད་པར་བྱེད་པའི་དོན་ནོ། །ཀུན་བཟང་གི་དོན་ནི། དེས་བྱ་བ་ཅི་བྱེད་ཐམས་ཅད་བཟང་ངན་གང་དུ་སྣང་ཡང་དུས་ཀུན་ཏུ་ངོ་བོ་བཟང་པོ་འབའ་ཞིག་ཡིན་པའོ། །ཕྱོགས་ལས་རྣམ་རྒྱལ་ནི་ཉོན་མོངས་ལས་དངོས་སུ་རྒྱལ་ཞིང་བདུད་བཞི་པོ་རྣམས་བཏུལ་བ་དང་། སེམས་ཅན་གྱི་དོན་ལ་སྟོབས་དང་ལྡན་པ་དང་། ཤེས་བྱའི་སྒྲིབ་པའང་འཇོམས་བཞིན་པ་ཡིན་པས་སོ། །འདི་དག་དང་པོ་གཉིས་གཙོ་བོར་སྦྱོར་ལམ་སྐབས་དང་ཕྱི་མ་གཙོ་བོར་འཕགས་ལམ་ལ་སྦྱོར་མོད། གསུམ་ཆར་ལ་སྐྱེ་འཕགས་གཉིས་ཀ་ཡོད་དོ། །

༈ ཡབ་ཡུམ་ལྷར་བསྐྱེད་པ་ལྷའི་འདུ་ཤེས། མཁའ་གསང་རྡོ་རྗེ་དང་པདྨར་རློབ་པ་སྔགས་ཀྱི་འདུ་ཤེས། ཐབས་འདི་ལ་བརྟེན་ནས་ལྷན་སྐྱེས་ཀྱི་ཡེ་ཤེས་བསྒྲུབ་པར་བྱའོ་སྙམ་པ་ཆོས་ཀྱི་འདུ་ཤེས་ཏེ་གསུམ་ལྡན་གྱིས་བརྡ་བཞིའི་བསྣོལ་མར་བསྐུལ་བ་ནི། ས་མ་ཡ་སྟྭཾ་ཞེས་ཆགས་པའི་བརྡས་བསྐུལ་བར། ས་མ་ཡ་ཧོ། ཞེས་ལན་གདབ། སླར་ཡང་རཱ་ག་ཡ་ཧོ། ཞེས་སྦྱོར་བའི་བརྡས་བསྐུལ་བར། རཱ་ག་ཡ་མི། ཞེས་ལན་བཏབ་སོ། ཕྱག་རྒྱ་བཞིས་སྙོམས་པར་ཞུགས་པ་ནི། ཛཿཞེས་པས་ལུས་ཀྱི་ཆ་ཤས་རྣམས་རེག །ཧཱུྃ་ཞེས་པས་ལག་པ་དང་བརླ་འཁྱུད། བཾ་ཞེས་པས་མཁའ་གསང་དམ་དུ་སྤྲད། ཧོ་ཞེས་ཡབ་ཀྱིས་གསོར་ཡུམ་གྱིས་བསྐྱོད་པས་དགའ་བཞིའི་རོས་རྒྱུད་ཡོངས་སུ་གང་ཞིང་ཚིམ་པར་བསམ་མོ། །དེ་ལྟ་བུ་ཡུན་རིང་དུ་གོམས་པས་སྣང་བ་ཐམས་ཅད་བདེ་བར་འཆར། རྩོལ་མེད་ཀྱི་བདེ་བ། འཛག་མེད་ཀྱི་ཚུལ་ཁྲིམས། ཟག་མེད་ཀྱི་ཉམས་མྱོང་ཁྱད་པར་ཅན་རྒྱུད་ལ་སྐྱེས་པ་ན་དེའི་བོགས་དབྱུང་བ་ལ་བརྟེན་ནས་དཔེའི་ཡེ་ཤེས་མངོན་དུ་བྱ་བའི་ཕྱིར་ལས་ཀྱི་ཕྱག་རྒྱ་ལ་བསླབ་པར་བྱ་སྟེ། བཤད་རྒྱུད་ཐལ་བ་ལས། སྤངས་ནས་རྡོ་རྗེ་དབྱིངས་ཕྱུག་རྩ། །དགུག་དང་བསྡམ་པ་མ་ཤེས་ན། །རྡོ་རྗེའི་བསྐལ་བ་མཐའ་ཡས་པར། །ཆོས་སྐུ་ཐོབ་པར་མི་འགྱུར་རོ། །ཞེས་མཚན་འཛིན་གྱི་རྟོག་པ་སྤངས་པ་དང་། རྡོ་རྗེ་ཞེས་པ་སྐྱིལ་ཀྲུང་སྟེ། དེ་ལ་ལུས་རྡོ་རྗེ་སྐྱིལ་ཀྲུང་ནི་ཡབ་ཡུམ་མཉམ་པར་སྦྱོར་བའོ། །རྩ་རྡོ་རྗེ་སྐྱིལ་ཀྲུང་ནི་ཡུམ་གྱི་དབུ་མའི་མར་སྣ་ཡབ་ཀྱི་དབུ་མར་དྲངས་ཏེ་སད་པར་བྱས་པའོ། །རླུང་རྡོ་རྗེ་སྐྱིལ་ཀྲུང་ནི་ཡུམ་གྱི་དབུ་མའི་རླུང་ཡབ་ཀྱི་དབུ་མར་དྲངས་བ་དང་། ཁམས་རྡོ་རྗེ་སྐྱིལ་ཀྲུང་ནི་ཐིག་ལེ་དཀར་དམར་འདྲེས་པའོ། །རགས་པའི་ཕྱག་རྒྱ་བཞི་ནི། ཕྱག་རྒྱ་མཚན་ཉིད་དང་ལྡན་པ་དགུག་པ། ཡབ་ཡུམ་མཉམ་པར་སྦྱོར་བ་འཆིང་བ། ཡན་ལག་ཕན་ཚུན་སྡོམ་པ་བསྡམས་པ། ཡབ་ཡུམ་བདེ་བས་ཚིམ་པ་མྱོས་པའོ། །ཕྲ་བའི་ཕྱག་རྒྱ་བཞི་ནི། དམར་ཆ་གྱེན་དུ་དྲངས་པ་དགུག་པ། རླུང་གིས་བྱེད་བཅིང་གི་སྟོབས་ཀྱིས་གཅུན་པ་འཆིང་བ། ཐིག་ལེ་ཕྱིར་མི་ལྡོག་པ་བསྡོམས་པ། ཡབ་ཡུམ་གྱི་གསང་བའི་རྣམ་ཤེས་བདེ་བས་ཚིམ་པ་མྱོས་པའོ། །

༈ བསྒྲལ་བའི་སྐབས། ཐོག་མར་རྫོང་འཕྲང་སྲོག་གསུམ་གྱི་དགོངས་སྤྱོད་ཟབ་མོའི་སྒོ་ནས་རྟོགས་པས་བདག་བསྒྲལ་བར་བྱས་ནས། དེའི་འོག་ཏུ་ལས་ངན་གྱི་གདུལ་བྱ་ལ་སྙིང་རྗེ་ཆེན་པོ་མཚུངས་པ་མེད་པ་དང་། མཉམ་ཉིད་དུ་རྟོགས་པའི་ཤེས་རབ་ཆེན་པོ་ཕུལ་དུ་བྱུང་བའི་སྟོབས་ཀྱིས་ཐུགས་རྗེའི་གཞན་སྒྲོལ་བ་དང་དུ་ལེན་པ་ཡིན་ལ། དེ་ཡང་ཐུན་མིན་གྱི་ཚད་མེད་བཞི་ནི། སྙིང་རྗེ་ཁྲོས་པའི་ཚུལ་གྱིས་གདུག་པ་ཅན་རྗེས་སུ་འཛིན་པ་བྱམས་པ། ཤིན་ཏུ་བརྩེ་བ་ཆེན་པོས་མྱུར་དུ་སྒྲོལ་བའི་སྙིང་རྗེ། ཤེས་པ་གནས་སུ་སྤར་ཞིང་ཕུང་པོ་ཚོགས་སུ་སྟོབ་པ་དགའ་བ། གདུལ་བྱ་ཡལ་བར་མི་འདོར་བའི་བཏང་སྙོམས་སོ། །གསལ་བ་གསུམ་ནི། མི་ལྡོག་པའི་ཕྱིར་དུ་སྒྲོལ་མཁན་གྱི་རྣལ་འབྱོར་པ་ལྷར་གསལ་པ། མི་རྡུག་པའི་ཕྱིར་དུ་སྒྲོལ་བྱེད་ཀྱི་ཕུར་པ་ཡཀྴ་ཀཱི་ལར་གསལ་བ། མི་འབྱམས་པའི་ཕྱིར་དུ་བསྒྲལ་བྱའི་རཱུ་ཏྲ་དངོས་སུ་གསལ་གདབ་པའོ། །ལྷ་གསུམ་ནི། ལྟ་བའི་གདེངས་ཀྱིས་ཟིན་པ་སྟོང་ཉིད་གྱད་ཀྱི་ལྷ། བསྐྱེད་རིམ་གྱི་ངར་དང་ལྡན་གཉེན་པོ་ཡེ་ཤེས་ཀྱི་ལྷ། ཟུང་འཇུག་ལས་ཕོ་ཉ་འགྱེད་པ་སྤྱོད་པ་ལས་ཀྱི་ལྷའོ། །ལྟ་སྒོམ་སྤྱོད་གསུམ་ནི། རང་བཞིན་གྱིས་སྒྲོལ་བའི་ལྟ་བ། སྙིང་རྗེས་སྒྲོལ་བའི་སྒོམ་པ། དབང་པོ་ཡུལ་དུས་ཀྱིས་སྒྲོལ་བའི་སྤྱོད་པའོ། །རང་བཞིན་གྱིས་སྦྱོར་སྒྲོལ་ཞེས་པ་ནི། ཆོས་ཐམས་ཅད་ཀྱི་རང་བཞིན་གཉིས་སུ་མེད་པར་རྟོགས་པ་ནི་སྦྱོར་བ། དེས་གཉིས་འཛིན་གྱི་རྟོག་པ་ལས་སྒྲོལ་བ་ནི་སྒྲོལ་བ་སྟེ། ལམ་རིམ་ལས། གཉིས་མེད་དབྱིངས་སུ་སྦྱོར་བ་ཡིན། །ཞེས་སོ། །དེ་ཡང་སློབ་དཔོན་ནི་མཁས་ཚུལ་ལྔ་དང་ལྡན་དགོས་ཏེ། རང་བཞིན་གྱིས་སྒྲོལ་བའི་ལྟ་བ་ལ་མཁས་པ། ཏིང་ངེ་འཛིན་གྱིས་སྒྲོལ་བའི་སྒོམ་པ་ལ་མཁས་པ། དབང་པོ་ཡུལ་དུས་ཀྱིས་སྒྲོལ་བའི་སྤྱོད་པ་ལ་མཁས་པ། ཐབས་ཆེན་གསང་བས་སྒྲོལ་བའི་གདམས་ངག་ལ་མཁས་པ། མངོན་སྤྱོད་ཟབ་མོས་སྒྲོལ་བའི་མཛད་སྤྱོད་ལ་མཁས་པའོ། །དབང་པོ་ཡུལ་དུས་ཀྱིས་སྦྱོར་སྒྲོལ་ཞེས་པ་ནི། ཡུལ་ཕྱིར་སྣང་ཡུམ་དང་། དབང་པོ་ནང་ནས་འཆར་བ་ཡབ་སྟེ། ལྷ་ཡབ་ཡུམ་གཉིས་མེད་དུ་སྦྱོར་བ་ནི་སྦྱོར་བ། དེས་ཐ་མལ་གྱི་རྟོག་ཚོགས་རང་སར་དག་པས་སྒྲོལ་བ་སྟེ། དེ་ཉིད་ལས། དབང་པོ་ཡུལ་དུས་རིག་པ་རྣམས། །བྱང་ཆུབ་སེམས་ནི་རྡོ་རྗེས་ཚོགས། །ཞེས་སོ། །རྫོང་འཕྲང་སྲོག་གསུམ་ནི། ལྟ་བ་བློ་འདས་ཀྱི་རྫོང་། སྒོམ་པ་ཡེང་མེད་ཀྱི་འཕྲང་། སྤྱོད་པ་ངེས་མེད་ཀྱི་སྲོག་གོ །དགོངས་པ་གསུམ་ནི། ལས་ངན་གྱི་བག་ཆགས་ཐམས་ཅད་ཡེ་ཤེས་ཀྱི་འོད་ཀྱིས་སྦྱོང་བར་བསམ་པའི་ཁྲུས་ལུང་། ཕ་རོལ་པོའི་ཚེ་བསོད་བདག་གི་ཚེ་ཡི་གསོས་སུ་བསྟིམས་པ་ཚེ་ལུང་། དགྲ་བགེགས་ཀྱི་རྣམ་ཤེས་འོག་མིན་དུ་རྒྱལ་བ་ཡབ་ཡུམ་གྱི་སྦྱོར་འཚམས་སུ་འཕངས་ཏེ་རིགས་ཀྱི་སྲས་སུ་བསྒྱུར་བ་གནས་ལུང་ངོ་། །འཚེངས་པ་གསུམ་ནི། ཕ་རོལ་གྱི་ཚེ་བསོད་རང་ལ་ཁུག་པས་བདག་རྣལ་འབྱོར་པ་འཚེངས་པ། དགྲ་བགེགས་ཀྱི་ཤ་ཁྲག་ཡེ་ཤེས་ཀྱི་བདུད་རྩིར་གྱུར་པས་བཀའ་སྡོད་དང་བཅས་པའི་དཀྱིལ་འཁོར་གྱི་ལྷ་རྣམས་འཚེངས་པ། ཕ་རོལ་དགྲ་བགེགས་ཀྱི་ལས་ངན་རྒྱུན་ཆོད་ནས་བདེ་བར་གཤེགས་པའི་སྲས་སུ་གྱུར་པས་གཟས་པོ་འཚེངས་བའོ། །འཚེངས་པ་རྣམ་པ་ལྔ་ཞེས་པ་ནི། ཚེ་ལུང་གི་དགོངས་པས་སྒྲོལ་མཁན་གྱི་རྣལ་འབྱོར་པ་འཚེངས་པ། ཁྲུས་ལུང་གི་དགོངས་པས་བསྒྲལ་བྱའི་གཟས་པ་པོ་འཚེངས་པ། གནས་ལུང་གི་དགོངས་པས་འོག་མིན་དུ་སྦྱོར་མཆོད་ཀྱིས་འཚེངས་པ། སྙིགས་མའི་ཤ་ཁྲག་གིས་དཀྱིལ་འཁོར་པའི་ལྷ་ཚོགས་འཚེངས་པ། གནོད་བྱེད་དང་བྲལ་བས་བསྟན་པ་རིན་པོ་ཆེ་འཚེངས་པའོ། །

༈ ས་བསླང་བ་ལ། སྣང་བ་མི་ལས་བསླང་བ་དང་། མི་སྣང་བ་ལྷ་ལས་བསླང་བའོ། །དང་པོ་ནི། ས་དེའི་བདག་པོར་གྱུར་པའི་རྒྱལ་པོ་སོགས་ལ་རིན་གཞལ་ཏེ་བསླང་བའོ། །གཉིས་པ་ནི་བདེ་བར་གཤེགས་པ་དང་སའི་ལྷ་མོ་འཁོར་བཅས་ལ་བསླང་བའོ། །དབང་དུ་བྱ་བ་ནི། ཟངས་ཕུར་པདྨ་ཧེ་རུ་ཀ་དམར་པོ་ཞལ་གཅིག་ཕྱག་བཞི་པ་དང་པོ་གཉིས་ཀྱིས་པདྨ་དང་ཞགས་པ། འོག་མ་གཉིས་ཕུར་བུ་བསྒྲིལ་བ་དབལ་ཟླ་གམ་ཅན་དུ་བསྐྱེད་དོ། །གནས་གསུམ་བྱིན་གྱིས་བརླབས་ནས་དཀྱིལ་འཁོར་གྱི་གཞི་ལ་བཏབ་པས་ཕུར་བུ་ལས་བྱུང་བའི་འོད་ཀྱིས་ས་གཞི་ཐམས་ཅད་ཁྱབ་ཅིང་བདག་གི་དབང་དུ་གྱུར་བར་བསམ་མོ། །སྦྱང་བ་ནི་ལས་རིམ་ལས། སྦྱང་བ་ལས་མེ་སྔགས་ཕྱག་རྒྱ། །ཏིང་ངེ་འཛིན་གྱིས་དག་པར་བྱ། །ཞེས་པ་ལྟར། ལས་དང་བྱ་བས་སྦྱང་པ་ལ་ལྟོ་འཕྱེ་བརྟག་པ་དང་། གཏེར་སྦ་བ་དང་། འབྲུ་ལྔ་སྤོས་སོགས་ལྔ་ཚན་དྲུག་གི་ལྡེ་གུས་བྱུག་པའོ། །མེས་སྦྱང་པ་ནི། མཚན་མ་རྣམས་ཤིན་ཏུ་ངན་པར་མཐོང་ན་གཞན་དུ་སྤོ་བའམ། ཡང་ན་ཞི་བའི་སྦྱིན་སྲེག་ཚུལ་བཞིན་དུ་བྱའོ། །སྔགས་དང་ཕྱག་རྒྱས་སྦྱང་པ་ནི། རང་གི་ལག་པ་གཡས་ཀྱི་སོར་མོ་ལྔ་ལ་ཉི་མའི་དཀྱིལ་འཁོར་རེ་རེའི་སྟེང་དུ་ཧཱུྃ་མཐིང་ག་རེ་རེས་མཚན་པ་ཡོངས་སུ་གྱུར་པ་ལས་རྡོ་རྗེ་རྩེ་ལྔ་པ་ཧཱུྃ་གིས་མཚན་པར་བསམ་ལ། ༀ་བཛྲ་ཧ་ན་ཧ་ན་ཀྲོ་དྷ་ཧཱུྃ་ཕཊ་ཞེས་བརྗོད་ཅིང་ས་ལ་ལན་གསུམ་བསྣུན་པས་རྡོ་རྗེ་དང་ཧཱུྃ་གི་འོད་ཀྱིས་སའི་ཉེས་སྐྱོན་ཐམས་ཅད་སྦྱངས་ནས་ཡེ་ཤེས་རང་སྣང་གི་གཞིར་གྱུར་བར་བསམ་མོ། །ཏིང་ངེ་འཛིན་གྱིས་སྦྱང་པ་ལ། མཚན་མེད་ནི། ཤུ་ནྱ་ཏའི་སྔགས་ཀྱིས་ས་དང་སར་འཛིན་པའི་འཁྲུལ་རྟོག་ཐམས་ཅད་སྟོང་ཉིད་དེ་བཞིན་ཉིད་ཀྱི་དབྱིངས་སུ་རྣམ་པར་དག་པར་བསམ་ལ། མཚན་བཅས་ནི། ཧཱུྃ་གི་སྒྲ་རིང་པོར་བརྗོད་པས་རང་རིག་ཧཱུྃ་ལས་རྡོ་རྗེ་སྔོན་པོ་ཧཱུྃ་ཡིག་མཐིང་ནག་གིས་མཚན་པ་ལས་ས་བོན་སྤྲོས་ཏེ། འབྱུང་ལྔ་རིམ་བརྩེགས་ཀྱི་སྟེང་དུ། ཞི་ཁྲོ་གཉིས་ཀྱི་དཀྱིལ་འཁོར་རྒྱས་བསྡུས་གང་བྱེད་ཀྱི་གཞལ་ཡས་ཁང་གདན་དང་བཅས་པ་བསྐྱེད་པའོ། །བསྲུང་བ་ནི། ཧཱུྃ་ལས་འོད་འཕྲོས། རྡོ་རྗེའི་ས་གཞི་ར་བ་དྲ་བ་གུར་བླ་བྲེ། ཕྱི་རོལ་བསྐལ་བའི་མེ་དཔུང་རབ་ཏུ་འབར་བའི་དབུས་སུ་བྷྲུཾ་ལས་བྱུང་བའི་འཁོར་ལོ་སེར་པོ་རྩིབ་བརྒྱད་ལ་སོགས་དང་བཅས་པ་གསལ། ཕྱོགས་བཅུའི་བགེགས་རྣམས་བཀུག་ནས་ཁྲོ་བཅུའི་ཕུར་པ་གདབ་པ་དང་མཚོན་ཆ་ལྔའི་རྭ་བས་བསྲུང་བར་བྱའོ། །བཟུང་བ་ནི་ལྷ་ཚོགས་ཡབ་ཡུམ་རྣམས་རོལ་པས་འོད་ས་གཞི་ལ་ཐིམ་པས། ས་ཉིད་དཀྱིལ་འཁོར་ཀྱི་རང་བཞིན་དུ་གསལ་བར་བསམ་པའོ། །དཀྱིལ་འཁོར་གྱི་ཚད་ལ་གསུམ་ལས། བསྡུས་པའི་ཚད་ནི་ཁྲུ་གང་པ་དང་། བཞི་པའོ། །འབྲིང་པོ་ནི་ཁྲུ་བཅུ་གཉིས་པ་དང་བཅུ་དྲུག་པའོ། །རྒྱས་པ་ནི་ཉི་ཤུ་པ་དང་། ཉི་ཤུ་རྩ་ལྔ་པའོ། །ཐིག་གི་སྐབས་སུ། དེ་ཡང་སྤྱིར་ཐིག་ཞེས་པ་མི་འགྱུར་བའི་དོན་ཏེ། དེའི་རྒྱུ་འགྱིང་ཕུར་དང་། བསྐོར་ཕུར་ཏེ་ཕུར་བུ་གཉིས་དང་། སྲད་བུ་ཡང་གཉིས་ལས། ཡེ་ཐིག་གི་རྒྱུ། ཞི་བ་ལ་པདྨའི་རྩ་བའི་པད་སྐུད་པདྨའི་རྒྱུས་པ་དང་ཁྲོ་བོ་ལ་རྒྱུས་ཆེན་ཏེ། གཉིས་ཀའི་དམ་ཐིག་གི་རྒྱུ་རས་བལ་གཙང་མ་དཔའ་བོའི་རིན་གྱིས་ཉོས་པ་ཞེས་དང་པོར་བཙལ་བའི་དུས་ན་བདག་པོའི་ལན་གཅིག་ཅི་སྨྲས་པ་ལྟར་རིན་བྱིན་པ་ནི། རིན་ལ་མ་གཙེགས་པར་བྱས་པས་དཔའ་བོའི་རིན་གྱིས་ཉོས་པ་ཞེས་བྱའོ། །དེ་ཡང་ཡེ་ཤེས་ཀྱི་སྐུད་པ་ཉི་ཤུ་རྩ་ལྔའམ་ལྔ་སྒྲིལ་དང་། དམ་ཚིག་གི་སྐུད་པ་དགུ་སྒྲིལ་ལམ་སུམ་སྒྲིལ་དུ་བྱ་བའོ། །གདབ་ཚུལ་ཀྱང་ཐིག་གཡོག་རིག་མ་དངོས་སམ་དེར་མོས་པ་ལ་ཐིག་སྣ་གཏད་དེ་ཡབ་ཡུམ་ལྷར་གསལ་བར་བྱས་པས་དམ་ཐིག་སྐུ་གསུང་ཐུགས་ཀྱི་རང་བཞིན་དུ་ས་ལ་བཏབ་ནས། སྐུ་གསུང་ཐུགས་རེ་རེའང་ཡེ་ཤེས་ལྔ་དང་ལྡན་པར་བྱ་བའི་ཕྱིར། ཡེ་ཐིག་དཀྱིལ་འཁོར་གྱི་གཞིའི་སྟེང་གི་ནམ་མཁའ་ལ་གདབ་པའོ། །༼སྐད་གཉིས་ཤན་སྦྱར་ལས། བི་ཤཾ་པདྨའི་རྩ་བའམ་པད་སྐུད། ཤཱ་ལུ་ཀཾ་ཨུཏྤལའི་རྩ་བ། བྲྀནྟཾ་རྩ་བའམ་ཐག་པ། མྲྀ་ཎཱ་ལཾ་པདྨའི་རྩ་ལག་གམ་པད་སྣལ་པད་སྐུད་ཅེས་སོ། ༽ཚོན་གྱི་རྒྱུ་ནི། རབ་ཀྱིས་རིན་ཆེན་སྣ་ལྔ་དང་། འབྲིང་གིས་འབྲུ་སྨན་ཁ་དོག་བསྒྱུར་བ་དང་། ཐ་མས་དྲི་མ་མེད་པའི་རྡུལ་ཚོན་ཁ་དོག་ལྔ་ལ་བྱ་བའོ། །གྲངས་ནི་ཁ་དོག་ཉི་ཤུ་རྩ་ལྔའམ། །ལྔ་ཡི་ཚོན་གྱིས་བྲི་བར་བྱ། །ཞེས་སོ། །ཚོན་དགྱེ་ལུགས་ནི། འདུལ་བའི་ཆོ་ག་བཞིན་དུ་དགྱེ། །ཞེས་སོ། །དགོས་ཆེད་ནི། ལས་རིམ་ལས། མ་མཐོང་རྨོང་ལ་ཡེ་ཤེས་སོགས། །བསྟན་ཕྱིར་ཚོན་ལྔ་དགྱེ་བར་བྱ། །ཞེས་སོ། །མཚན་མ་འགོད་པ་ནི། སྐུ་གསུང་ཐུགས་ལྡན་གཟུགས་ཀྱིས་འགོད། །ཅེས་དང་། ཡང་ན་རྔམ་གློག་ལས། གཙོ་བོ་གཟུགས་སུ་རྫོགས་པར་བྲི། །འཁོར་རྣམས་ཕྱག་རྒྱ་དག་ཏུ་བྱ། །ཕལ་བ་ལ་ནི་ཡིག་འབྲུའོ། །ཞེས་སོ། །རབ་གནས་ལ་གསུམ་ལས། ཡན་ལག་གི་རབ་གནས་ནི། ལས་བུམ། རྡོར་དྲིལ། ཐོད་ཆུ། ཐིག་ཆེན་རྣམས་དང་། ཡན་ལག་ཅན་གྱི་རབ་གནས་ནི། བུམ་པ། སློབ་མ། ལྷ་སྟ་གོན་གསུམ་གྱིས་བསྙེན་ནོ། །དཀྱིལ་འཁོར་རབ་གནས་ནི། ལས་ཁྲིགས་རྣམ་པ་དགུ་ལ་སོགས་པའི་སྒོ་ནས་སོ། །སྦྱིན་སྲེག་ནི་ས་ཆོག་གི་ཚེ་མཚན་མ་ངན་ན་ཞི་བ། རབ་གནས་ཀྱི་ཚེ་རྒྱས་པ། དབང་བསྐུར་བའི་གོང་དུ་དབང་། སློབ་མ་སྟ་གོན་གྱི་ཚེ་ཀུན་རྨི་ལྟས་ངན་ན་དྲག་པོ་བྱའོ། །དཀྱིལ་འཁོར་དུ་འཇུག་པའི་ཆོ་ག་ནི། རྡོ་རྗེ་ལས་རིམ་ལས། དབང་ཕྱུག་འཇུག་དང་བཟོད་གསོལ་དང་། །ཁྲུས་གདབ་དྲི་དང་ལུས་དབུལ་དང་། །བགེགས་བསྐྲད་ལྷར་སློབ་དམ་ཚིག་སྦྱིན། །དེ་ཉིད་དབབ་དང་ཆུ་ནན་དང་། །བསྒྲག་དང་རིན་ཆེན་དོར་བ་དང་། །ལྷ་དབབ་པ་དང་ནན་ཏན་དང་། །མིག་དབྱེ་དཀྱིལ་འཁོར་ལེགས་བསྟན་དང་། །ཚོགས་མཆོད་ཡོན་དང་རྣམ་བཅོ་བརྒྱད། །འདི་ཡི་ཡན་ལག་རྫོགས་པར་འགྱུར། །ཞེས་ཆོས་བཅོ་བརྒྱད་པོ་རིགས་བསྡུས་ན་གཉིས་ཏེ། སློབ་དཔོན་འཇུག་པའི་ཆོས་གཉིས་དང་། སློབ་མ་འཇུག་པའི་ཆོས་བཅུ་དྲུག་གོ །དང་པོ། སློབ་དཔོན་རང་ཉིད་སློབ་མ་འཇུག་པ་ལྟར་དཀྱིལ་འཁོར་དུ་ཞུགས་པའམ། ཡང་ན་རིགས་པའི་མེ་ཏོག་དོར་བའོ། །གཉིས་པ་གང་ལྟར་ཡང་སློབ་མ་འཇུག་པར་གསོལ་བ་གདབ་པ་དང་བཟོད་པར་གསོལ་བས་དེ་བཞིན་གཤེགས་པ་རྣམས་དགྱེས་ནས་གནང་བ་སྦྱིན་པར་བསམ་པའོ། །གཉིས་པ་ལས་རིམ་བཅུ་དྲུག་ལས། དང་པོ་ཕྱི་རོལ་དུ་སློབ་མ་ལ་ཁྲུས་བྱ། གཉིས་པ་གདོང་གཡོགས་བཅིངས་ཏེ་སྙིམ་པ་མེ་ཏོག་གིས་བཀང་ལ་གསོལ་བ་གདབ། གསུམ་པ་འདོད་དོན་དྲི་ལན་བྱས་ནས་སློབ་དཔོན་གྱི་དྲུང་དུ་དྲངས། བཞི་པ་དུས་གསུམ་ཀྱི་རྒྱལ་བ་ལ་ལུས་དབུལ། ལྔ་པ་སློབ་བུའི་ཚེ་བསྲུང་ལ་བགེགས་བསྐྲད། དྲུག་པ་སྒྲིབ་པ་བྲལ་ནས་ལྷར་བསྐྱེད་དེ་གོ་བསྒོ་ལུས་སྲུང་བྱ། བདུན་པ་རྡོ་རྗེ་གསུམ་གྱི་དམ་ཚིག་སྦྱིན། བརྒྱད་པ་དམ་ཚིག་དེ་ཉིད་ཚིག་གིས་དབབ། དགུ་པ་ཁེ་ཉེན་གྱི་སྒོ་ནས་ཆུ་ནན་བྱ། བཅུ་པ་སྐྲག་པ་དང་དོགས་པ་མེད་པའི་བརྟུལ་ཞུགས་ཀྱིས་རྨད་དུ་བྱུང་བའི་དམ་ཚིག་གཞུང་བཞིན་སྤྱོད་ཅིག་པར་བསྒྲག །བཅུ་གཅིག་པ་ལྷ་དང་ལས་འབྲེལ་བརྟག་ཕྱིར་མེ་ཏོག་དོར། བཅུ་གཉིས་པ་མེ་ཏོག་དེ་སྤྱི་བོར་བཅིང་པ་ལ་འོག་མིན་ནས་ཡི་དམ་གྱི་ལྷ་བཀུག་པ་སྔར་ཆུ་ནན་གྱི་ལྷ་དང་གཉིས་མེད་དུ་བསྟིམ་པ་ཕྱིའི་ལྷ་དབབ། གསང་མཚན་འདོགས་ཤིང་ལྷའི་སྒོམ་ཐབས་སྟོན་པ་ནང་གི་ལྷ་དབབ། བཅུ་གསུམ་པ་ལྷ་སྒོམ་པ་ལ་ནན་ཏན་བྱེད་པར་གདམས་པ་ནི། དེ་ལྟར་དཀྱིལ་འཁོར་དུ་ཞུགས་ཕྱིན་ཆད་སྒོ་གསུམ་རྡོ་རྗེ་གསུམ་དུ་བྱིན་གྱིས་བརླབས་པས་ཡི་དམ་གྱི་ལྷ་དང་སྐལ་པ་མཉམ་པའི་ཕྱིར། ཡེ་ཤེས་དེ་ཉིད་དོན་དུ་གཉེར་ནས་བསྒྲུབས་ན་ཚེ་འདིར་མཆོག་ཐུན་གྱི་དངོས་གྲུབ་ཐོབ་པའོ། །བཅུ་བཞི་པ་མིག་དབྱེ་བ་ནི་མ་རིག་པའི་ལིང་ཏོག་བསལ་ཏེ་ཡེ་ཤེས་ཀྱི་དཀྱིལ་འཁོར་མཐོང་བར་བསམ་ལ་མིག་ཕྱེ་ཞིང་གདོང་གཡོག་པ་དགྲོལ་བའོ། །བཅོ་ལྔ་པ་དཀྱིལ་འཁོར་གྱི་དོན་རྟགས་བཤད་ཅིང་ལྷ་ངོ་བསྟན་པའོ། །བཅུ་དྲུག་པ་སློབ་མས་ཡོན་དབུལ་ཏེ། དེ་དག་ནི་སློབ་བུ་འཇུག་པའི་ཆོས་སོ། །

༈ ༡རྡོ་རྗེ་སློབ་དཔོན་གྱི་སྐུ་ལ་མི་འཚེ་ཞིང་བཀའ་མི་གཅོག་པ་དང་། ༢བླ་མའི་ཡུམ་ལ་མི་སྤྱོད་པ་དང་། ༣དད་པ་ཅན་གྱི་ཚོགས་མི་བཅག་པ་དང་། ༤དཀོན་མཆོག་དང་མཁས་པའི་དཀོར་ལ་མི་འབག་ཅིང་ཆང་མྱོས་པར་མི་བཏུང་བ་དང་། ༥རྡོ་རྗེ་མཆེད་ཀྱི་ཡུམ་ལ་མི་སྤྱོད་པ་དང་། ༦མཚན་ངན་གྱི་རིག་མ་མི་བསྟེན་པ་དང་། ༧མཚན་ཉིད་མི་ལྡན་པའི་དམ་རྫས་མི་བསྟེན་པ་དང་། ༨མཁས་པའི་ཡོན་ཏན་ལ་མི་སྨོད་པ་དང་། ༩སྣོད་མིན་ལ་གསང་ཆོས་མི་སྟོན་པ་དང་། ༡༠མཚན་ལྡན་གྱི་གཟུངས་མ་དང་སྣོད་ལྡན་གྱི་སློབ་མ་མི་སྤང་པ་དང་། ༡༡དོན་བདེ་སྟོང་དང་རྟགས་ཡབ་ཡུམ་མི་འབྲལ་བ་དང་། ༡༢མཆེད་ལ་ཀྱལ་ཀ་ཙམ་དུ་ཡང་ནང་འཐབ་མི་བྱེད་པ་དང་། ༡༣གཞན་གྱིས་སྤྱད་པའི་ལྷག་མི་སྤྱད་པ་དང་། ༡༤བླ་མའི་གདན་ས་མི་རློམས་པ་དང་། ༡༥རང་གཞན་གྱིས་མཚམས་མི་འབྲལ་བ་དང་། ༡༦ཏིང་ངེ་འཛིན་བྱིང་རྒོད་ཀྱི་དབང་དུ་མི་གཏང་བ་དང་། ༡༧བཟླས་པ་དང་ཆོ་ག་མི་ཚིག་གིས་བར་མི་གཅོད་པ་དང་། ༡༨དབང་རྟགས་ཀྱི་ཕྱག་རྒྱ་ལས་མི་འདའ་ཞིང་བརྡ་མི་བརྗེད་པར་བྱ་བ་དང་། ༡༩རྣལ་འབྱོར་བའི་དཀྱིལ་འཁོར་མི་དཀྲུགས་ཤིང་སྐྱེ་བོའི་མཐུ་བཟློག་མི་བྱེད་པ་དང་། ༢༠སློབ་དཔོན་གཙུག་ཏུ་བཀུར་བ་ལས་ཉམས་པར་མི་བྱ་བ་རྣམས་སོ། །

༈ རྩ་ལྟུང་བཅུ་བཞི་ལས་དང་པོ་ནི། སློབ་དཔོན་ལ་ཡང་དང་ཡང་དུ་སྨོད་པར་བྱེད་པ། དེས་ཀྱང་དགའ་བར་བྱེད་པ། འགྱོད་པར་མི་བྱེད་པ། ཕྱིར་འཆོས་པར་མི་བྱེད་པའོ། །གཉིས་པ་ནི། སངས་རྒྱས་ཀྱིས་གསུངས་པའི་བཀའ་སྡོམ་གསུམ་གང་རུང་གི་བཅས་པ་ཡིན་པ། དེ་ལ་ཤེས་བཞིན་དུ་འགལ་བར་བྱས་པ། ཁྱད་དུ་གསོད་འདོད་ཀྱི་ཀུན་སློང་ཡོད་པའོ། །གསུམ་པ་ནི། དབང་བསྐུར་ཐོབ་པའི་རྡོ་རྗེའི་སྤུན་ཡིན་པ། སྔགས་ཀྱི་སྡོམ་པ་དང་ལྡན་པ། དེར་འདུ་ཤེས་པ། ཞེ་སྡང་གིས་ཀུན་ནས་བསླངས་ནས་དེའི་སྐྱོན་བརྗོད་པ། བརྗོད་པ་དེ་ཐོས་ནས་དོན་གོ་བའོ། །བཞི་པ་ནི། སེམས་ཅན་གང་ཡང་རུང་བ་ཞིག་ལ་དམིགས་ནས་འདི་བདེ་བ་ཐམས་ཅད་དང་བྲལ་ན་སྙམ་པའི་སེམས་བསྐྱེད་ནས་བྱམས་པ་བཏང་བའོ། །ལྔ་པ་ནི། བདག་གིས་སེམས་ཅན་མཐའ་ཡས་པའི་དོན་དུ་བྱང་ཆུབ་བསྒྲུབ་པར་མི་ནུས་སྙམ་ནས་སྨོན་སེམས་སྤོང་བའོ། །དྲུག་པ་ནི། རང་གི་གྲུབ་པའི་མཐའ་གསང་སྔགས་དང་གཞན་གྱི་གྲུབ་པའི་མཐའ་ཕར་ཕྱིན་ཐེག་པ་སྟེ་བཀའ་དེ་གཉིས་ལ་སྨོད་པའམ་སུན་འབྱིན་པ་བྱས་ནའོ། །བདུན་པ་ནི། མ་སྨིན་པའི་སེམས་ཅན་ནི་དབང་གིས་རྒྱུད་རུང་བར་མ་བྱས་པ་སྟེ་སྐལ་མེད་ཅེས་ཀྱང་གསུངས། འདི་ལ་ནག་པོ་པས། སྣོད་ཀྱིས་མ་སྨིན་པ་ནི་ལོག་སྲེད་ཅན་ནོ། །ཆོ་གས་མ་སྨིན་པ་ནི་བུམ་དབང་མ་ཐོབ་པའོ། །ཆོ་ག་རྫོགས་པས་མ་སྨིན་པ་ནི་གསང་བ་དང་ཤེས་རབ་ཡེ་ཤེས་མ་ཐོབ་པའོ། །ཉམས་པས་མ་སྨིན་པ་ནི་རྩ་ལྟུང་སོགས་བྱུང་བ་ཕྱིར་མ་བཅོས་པའོ། །ཟབ་མོས་འཇིགས་པས་མ་སྨིན་པ་ནི་དབང་བཞི་པའི་དེ་ཉིད་མ་ཐོབ་པ་སྟེ་མ་སྨིན་པ་ལྔར་བཤད་དོ། །དེ་ལ་གསང་བ་སྒྲོགས་པར་བྱེད་ནའོ། །བརྒྱད་པ་ནི། ཕུང་པོ་སངས་རྒྱས་ལྔའི་བདག་ཉིད་དུ་གསུངས་པ་ལ་རང་གི་ཕུང་པོ་ལ་རྒུད་པར་བྱ་བའི་བསམ་པས་གདུང་བའི་ཐབས་གང་ཡང་རུང་བའི་སྒོ་ནས་གདུང་བར་བྱས་པས་སྡུག་བསྔལ་བར་གྱུར་པའོ། །དགུ་པ་ནི། སྟོང་ཉིད་ཟབ་མོ་ལ་སོམ་ཉི་ཟ་བ་སྟེ་ཡིད་མ་ཆེས་ནས་སྤངས་པའོ། །བཅུ་པ་ནི། གདུག་པ་ཅན་དེ་ལ་མཛའ་བོར་བྱས་ནས་ལུས་ངག་གིས་བྱམས་པར་བྱེད་ནའོ། །འདི་ནི་དེ་ལ་མཛའ་བར་བྱས་པའི་ལྟུང་བ་ཡིན་གྱི་སྒྲོལ་ནུས་མེད་པས་མངོན་སྤྱོད་མ་བྱས་ན་རྩ་ལྟུང་དུ་སྟོན་པ་མིན་ནོ། །བཅུ་གཅིག་པ་ནི། དོན་དམ་པར་མིང་སོགས་སྤྲོས་པ་ཐམས་ཅད་དང་བྲལ་བའི་ཆོས་རྣམས་སྟོང་པ་ཉིད་ལ་མིང་སོགས་ཀྱི་མཚན་མ་དེར་རྟོག་པ་བྱས་ནའོ། །འདི་ལ་ནག་པོ་པས། དོན་རང་གི་མཚན་ཉིད་རིག་པའི་རྟོགས་པའི་ཆོས་མིང་ཚིག་ཡི་གེ་དང་བརྡ་དང་བརྗོད་པ་ཐམས་ཅད་དང་བྲལ་བའི་ཡེ་ཤེས་ལ་ཡིན་མིན་རྩོད་པ་དང་ཡོད་མེད་དུ་རྟོག་པ་དང་གཞན་ལུང་རིགས་ཀྱིས་བྲིད་ནས་ཐེ་ཚོམ་ཟ་བར་འཇུག་པ་ལ་འཆད་དོ། །དངོས་གྲུབ་སྙེ་མ་ལས། ཆོས་བདག་མེད་པའི་ལྟ་བ་ཡོད་བཞིན་དུ་མ་བསྐྱངས་པར་ཞག་གཅིག་འདས་ན་རྩ་ལྟུང་བཅུ་གཅིག་པའོ། །བཅུ་གཉིས་པ་ནི། རང་གི་བླ་མས་སློབ་མ་ལ་བགོ་བཤའ་བྱས་པའི་གདམས་པ་ལ་རབ་ཏུ་དད་པ་ཅན་ལ་འདུན་པ་བཟློག་འདོད་ཀྱི་བསམ་པས་དེའི་སུན་འབྱིན་པ་བྱས་ནའོ། །བཅུ་གསུམ་པ་ནི། ཚོགས་འཁོར་རམ་དཔའ་བོའི་སྟོན་མོའམ་དཔའ་མོའི་སྟོན་མོའི་ཆོ་ག་ཚུལ་བཞིན་དུ་བྱེད་པའི་ཚེ་དམ་རྫས་བཟའ་བཏུང་ཤ་ལྔ་ལ་སོགས་པས་བསྟབས་པའི་ཚེ་མི་གཙང་བའི་བསམ་པའམ་ཐེ་ཚོམ་ཟོས་ནས་དང་དུ་མི་ལེན་པའོ། །བཅུ་བཞི་པ་ནི། བུད་མེད་ཀྱི་ཚུལ་འཛིན་པའི་རྡོ་རྗེ་ཕག་མོ་སོགས་འཇིག་རྟེན་ལས་འདས་པ་རྣམས་དང་བུད་མེད་མཚན་ཉིད་པ་གང་ཡང་རུང་བ་ཞིག་གོ །ཤེས་རབ་ནི་བདེ་བ་ཆེན་པོའི་ཡེ་ཤེས་ཡིན་ལ། རང་བཞིན་ནི་འདིར་འབྱུང་བའི་དོན་ཏེ་རྣལ་འབྱོར་པ་ལ་དེ་སྐྱེད་པར་བྱེད་པའི་བྱེད་པ་པོར་གསུངས་པས་སོ། །ཡུལ་དེ་ལ་སྨོད་པར་བྱེད་ནའོ། །

༈ བདག་གི་དེ་ཁོ་ན་ཉིད་ནི། མཐར་ཐུག་གི་ལྷ་དང་སྔགས་ཡེ་ཤེས་འགྲུབ་པའི་རྒྱུ་འདུ་འབྲལ་མེད་པར་རྒྱུད་ལ་གནས་པ་དེ་ཡིན་ལ། དེ་ཐོག་མེད་ཀྱི་དུས་ནས་འཁྲུལ་སྣང་གི་བག་ཆགས་མཐུ་བརྟས་པས། མ་དག་པའི་ཕུང་ཁམས་སྐྱེ་མཆེད་ཀྱི་སྣང་བ་འདིས་བསྒྲིབ་ཡོད་པ་ལ་ལྷའི་དེ་ཁོ་ན་ཉིད་ཀྱི་བྱིན་གྱིས་བརླབས་པའི་ཚེ། ཐོག་མར་སྟོང་ཆེན་དེ་བཞིན་ཉིད་ཀྱི་རྣལ་འབྱོར་གྱིས་སྟོང་པར་སྦྱངས་ནས། དེའི་རང་རྩལ་སྙིང་རྗེ་སྒྱུ་མ་ལྟ་བུ་མཁའ་ཁྱབ་ཏུ་སད་པའི་སྟོང་ཉིད་སྙིང་རྗེ་ཟུང་འཇུག་གི་རྩལ་ལས། རང་གི་རིག་པ་དེ་རྒྱུའི་ཧཱུྃ་ཡིག་དང་ཧེ་རུ་ཀ་ལ་སོགས་པའི་རྣམ་པར་ཤར་བ་ལས། འབྱུང་བ་རིམ་བརྩེགས་ནས་དཀྱིལ་འཁོར་གྱི་འཁོར་ལོ་ཡོངས་སུ་རྫོགས་པའི་བར་བཀྲ་ལམ་གྱིས་གསལ་བ་དེ་སྣང་ངོས་ནས་གསལ་བརྟན་གྱི་ཚད་བརྒྱད་དང་ལྡན་པས་ཡུལ་གསུམ་གྱད་དུ་གྱུར་པ་ལྟ་བུ་ལ། དབྱིངས་ཡེ་ཟུང་འཇུག་གི་ལྟ་བ་ལྷའི་ཕྱག་རྒྱར་ཤར་བ་ཁོ་ན་ཡིན་པ་ལ་གསུངས། གསང་སྔགས་ཀྱི་དེ་ཁོ་ན་ཉིད་ནི། མནྟྲ་ཞེས་པའི་སྒྲས་ཡིད་ཤེས་བདེ་མྱུར་དུ་སྐྱོབ་པའི་དོན་དུ་གསུངས་པས། གང་སྐྱོབ་ན་ཡིད་ཤེས། གང་ལས་སྐྱོབ་ན་མཚན་འཛིན་གྱི་རྟོག་པ་ལས། ཚུལ་ཇི་ལྟར་སྐྱོབ་ན་བདེ་ཞིང་མྱུར་བར་སྐྱོབ། ཐབས་གང་གིས་ན་དབྱིངས་ཡེ་ཟུང་འཇུག་ཆོས་ཉིད་དོན་གྱི་ལྷ་དེ་འདུ་འབྲལ་མེད་པ་ལ་གསུངས། ༼སྔགས་ཀྱི་མཚན་ཉིད་ནི། ངོ་བོ་བདེ་བར་གཤེགས་པའི་ཐུགས་ཡིག་འབྲུར་སྣང་བ། ངེས་ཚིག་ནི། བྱིན་རླབས་མངོན་དུ་འབྱིན་པས་སྔགས་༽བཟླས་བརྗོད་ཀྱི་དེ་ཁོ་ན་ཉིད་ནི། འབྱུང་འཇུག་གནས་གསུམ་གཞོམ་མེད་རྡོ་རྗེའི་བཟླས་པས། བཟླ་བྱའི་སྔགས་ཀྱི་རང་སྒྲར་སྦྱངས་པས་དེ་ཁོ་ན་ཉིད་དུ་སྨིན་པའི་ཚེ། ཕྱི་ནང་གི་སྒྲ་རུ་སྣང་བ་སྔགས་སུ་གྲོལ། སྔགས་གྲགས་སྟོང་དུ་སྨིན་པའི་འབྲས་བུ་ལ་བྱ། འཕྲོ་འདུས་དེ་ཁོ་ན་ཉིད་ནི། ཐུགས་སྲོག་ལས་འོད་ཟེར་མཁའ་ཁྱབ་ཏུ་འཕྲོས་པས་དོན་གཉིས་བྱས་ཏེ་སྐུ་གཉིས་བསྒྲུབ་པའོ། ༈ །བླ་མེད་ཀྱི་རྒྱུད་འདིར་རང་གི་ལྟ་བའི་ངང་དུ་འཇོག་པ་ནི་བདག་གི་དེ་ཁོ་ན་ཉིད། རྫོགས་རིམ་ངང་དབྱེར་མེད་པར་ལྷར་བསྒོམ་པ་ནི་ལྷའི་དེ་ཁོ་ན་ཉིད། རྩ་བ་བསྐྱེད་དང་ལས་སྔགས་དང་། །ཞེས་གསང་སྔགས་ཀྱི་དེ་ཁོ་ན་ཉིད། ཀྲི་ཡ་ལྟར་ན་གཞི་ལ་གཞོལ་བ་བདག་མདུན་ལྷར་གསལ་བ། སེམས་ལ་གཞོལ་བ་ལྷའི་ཐུགས་ཀར་ཟླ་དཀྱིལ་སྒོམ་པ། སྒྲ་ལ་གཞོལ་བ་ཟླ་དཀྱིལ་གྱི་སྟེང་དུ་སྔགས་ཕྲེང་རང་སྒྲ་དང་བཅས་པའོ། །གསལ་བ་གསུམ་དང་། ཞལ་ནས་ཞལ་དུ་ཞུགས་པ་སོགས་ཕྱི་ནང་གསང་གསུམ་གྱི་སྤྲོ་བསྡུ་སོགས་ནི་འཕྲོ་འདུའི་དེ་ཁོ་ན་ཉིད་དོ། །འདི་གཉིས་ནི་ར་རྩང་མཁན་པོ་གཉིས་ཀྱིས་གསུངས་པ་ལགས། ༈ ཟླ་གསང་ཐིག་ལེ་ལས། བདག་གི་དེ་ཉིད་མཉམ་བཞག་དང་། །དེ་བཞིན་ལྷ་ཡི་དེ་ཉིད་དང་། །སྔགས་དང་ཕྱག་རྒྱའི་དེ་ཉིད་ནི། །དེ་ཡི་དཀྱིལ་འཁོར་མཆོག་ཏུ་འགྱུར། །ཞེས་སོ། ༈ །དང་པོ་བདག་གི་དེ་ཁོ་ན་ཉིད་ནི། ལྷག་པའི་བདེན་གཉིས་ཟུང་འཇུག་རྟོགས་པའི་ལྟ་བ། གཉིས་པ་ལྷའི་དེ་ཁོ་ན་ཉིད་ནི། རྟེན་བརྟེན་པའི་དཀྱིལ་འཁོར་གྱི་འཁོར་ལོ་ཡོངས་སུ་རྫོགས་པ་གསལ་བ། གསུམ་པ་གསང་སྔགས་ཀྱི་དེ་ཁོ་ན་ཉིད་ནི། ལྷའི་སྙིང་པོ་སྲོག་ལྟ་བུ་ནི་གསང་སྔགས་ཡིན་ལ་སྔགས་དེ་ཡང་བསྒོམ་པ་དང་བཟླས་པ་གཉིས་ཀྱི་ཚུལ་གྱིས་བསྒྲུབ་པ་སྟེ་ས་བོན་དང་སྔགས་ཕྲེང་བཀོད་པ་སོགས་དང་། བཞི་པ་བཟླས་བརྗོད་ཀྱི་དེ་ཁོ་ན་ཉིད་ནི། རྡོར་བཟླས་ལ་སོགས་པ། ལྔ་པ་འཕྲོ་འདུའི་དེ་ཁོ་ན་ཉིད་ནི། ཐུགས་སྲོག་ལས་འོད་ཟེར་སྤྲོ་བསྡུའོ། ༈ །བདག་གི་དེ་ཁོ་ན་ཉིད་ནི་དག་མཉམ་བདེན་པ་དབྱེར་མེད། ལྷའི༴སྟོང་པ་ཆེན་པོ་ནས་རྗེས་ཐོབ་སྒྱུ་མའི་ལྷ་སྐུ་ཤར་བའི་བར་རོ། །གསང་སྔགས༴ལྷའི་སྙིང་པོའི་སྲོག་ནི་སྔགས་ཡིན་པས་ཐུགས་སྲོག་གི་ཡིག་འབྲུ་ལ་སྔགས་ཕྲེང་གིས་བསྐོར་བ་དེ་ལ་རང་མིང་གི་རང་གདངས་སྒྲོགས་པ་ལ་སེམས་བཟུང་བའོ། །བཟླས་བརྗོད༴རྩ་བསྐྱེད་ལས་གསུམ་གྱིས་ནང་ཆུན་གཅིག་དྲིལ་དུ་བཟླས་པའི་ཚེ་སྐྱོན་བཅུ་སྤོང་བ་དང་། དབྱིངས་དྲུག་པོ་གང་རུང་སྐབས་དང་བསྟུན་ནས་བཟླ་བའོ། །འཕྲོ༴ཕྱག་རྒྱ་གཅིག་པུའི་འོད་ཟེར་འཕྲོ་འདུ་ལས་ཚོགས་སྒྲུབ་ཀྱི་དངོས་གྲུབ་ལེན་དུས་ཀྱི་བར་འཕྲོ་འདུ་ཡོད་ཚད་རྣམས་ཡིན་གསུངས། སྔགས་ཀྱི་ཡན་ལག་ནི། འགྲེལ་ཆུང་ལས། སྙིང་གར་ཡེ་ཤེས་སེམས་དཔའ་བསྒོམས་པའི་སྙིང་གར་ཉི་ཟླའི་དཀྱིལ་དམ་ཚིག་ཕྱག་རྒྱ་བཞག་སྟེ་དེ་སྟེང་ཡིག་འབྲུ་བཞག །ཟློས་ཚེ་སྤྲོ་བསྡུས་བཟླས་པ་སྔགས་ཀྱི་ཡན་ལག་ཡིན་ཞེས་སོ། །སྔགས་གསུམ་ནི། རྒྱུ་མ་ནོར་བ་རྩ་བའི་སྔགས་ས་བོན་གྱི་ཡི་གེ། བསྐྱེད་པ་རྐྱེན་གྱི་སྔགས་བསྐྱེད་རིམ་གསལ་འདེབས་དུས་བརྗོད་རྒྱུ། བཟླས་པ་ལས་ཀྱི་སྔགས་བཟླ་བྱ་ཡིན། ཕྱག་རྒྱ་ནི་རང་ལུས་ལྷར་བསྒོམ་པ་ཕྱག་རྒྱ་ཆེན་པོ། ཐུགས་ཀར་ཡེ་ཤེས་སེམས་དཔའ་དང་ཏིང་འཛིན་སེམས་དཔའ་ཕྱག་མཚན་སྒོམ་པ་ལ་སེམས་གཏད་པ་དམ་རྒྱ། སྔགས་ཕྲེང་བཀོད་པ་སོགས་དང་སྔགས་བཟླ་བ་ཆོས་རྒྱ། མཆོད་བསྟོད་སོགས་བྱ་བ་ལས་རྒྱ་སྟེ་བཞིའོ། །

༈ སྐྱེད་ལུང་གི་ཡང་ཁྱེད་བླ་མ་རལ་གྲིའི་སྟོང་ཐུན་སྦྱོར། ཆུ་བར་གྱི་གླན་ཤཱཀྱ་བཟང་པོ་སྦྲུལ་ནག་གི་སྟོང་ཐུན་སྦྱོར། ནག་མོ་རིའི་མདའ་ཏིག་ཆོས་ཤཱཀ་དུག་སྡོང་གི་སྟོང་ཐུན་སྦྱོར་བ་ལས། རྗེ་སྒྲོ་ཕུག་པ་ཕྱི་མ་ལྟར་བཞེད་དོ། །དེ་ཡང་ཇི་སྐད་དུ། གཞི་ལ་སྤོང་བར་བྱེད་པ་ནི། །སྐྱེ་བོའི་ལྡུམ་རའི་དུག་སྡོང་འདྲ། །སྦྱོང་བར་བྱེད་པའི་ལམ་པ་ནི། །འཚོ་བྱེད་མཁས་པས་མཐོང་བ་འདྲ། །བསྒྱུར་བར་བྱེད་པས་གསང་སྔགས་པ། །བྲམ་ཟེ་རིགས་སྔགས་གྲུབ་པ་འདྲ། །དབང་དུ་བྱེད་པའི་ནང་པ་ནི། །རྨ་བྱས་ཟས་སུ་མཐོང་བ་འདྲ། །རང་སར་འཇོགས་པའི་རྫོགས་ཆེན་པ། །འབྱུང་ཆེན་ལྟོས་ཀྱི་ས་གཞི་འདྲ། །ཞེས། དཔེར་ན་རྒྱལ་པོའི་བཟའ་ཤིང་གི་ར་བར་དུག་གི་སྡོང་པོ་སྐྱེས་པ་ལ། འབངས་བླུན་པོ་ཁ་ཅིགདུག་ཤིང་གི་རོ་མངར་ལ་ཆགས་ཏེ་བཟའ་ཤིང་སྤངས་ནས་དུག་ཤིང་ལ་ལོངས་སྤྱོད་པས་ནད་གྱིས་མནར་ཞིང་སྲོག་འཚོ་བའི་སྐབས་མེད་པ་ལྟར་དགེ་བཅུ་སྤངས་ཏེ་དུག་ལྔ་རང་རྒྱུད་པར་སྤྱད་པས་ཐར་པའི་སྲོག་འཆད་པར་བྱེད་དོ། །འབངས་དེ་རྣམས་ཀྱི་ནང་ནས་ཁ་ཅིག་གིས། དུག་ཤིང་དང་བཟའ་ཤིང་གི་ཁེ་ཉེན་ཤེས་ནས་བཟའ་ཤིང་ལ་སྤྱོད་ནའང་། དུག་ཤིང་གི་ཁྲོད་ནས་འཕགས་པར་མ་ནུས་པ་ལྟར། དཀར་པོའི་ལས་སད་པ་ཁ་ཅིག་དགེ་འབྲས་མཐོ་རིས་དང་། སྡིག་འབྲས་ངན་སོང་ལས་མི་འདའ་བར་ཡིད་ཆེས་པས་མི་དགེ་བཅུ་སྤངས་ནས་དགེ་བཅུ་སྤྱད་ཀྱང་འཁོར་བ་ལས་ངེས་པར་འབྱུང་མི་ནུས་པ་ནི་ལྷ་མིའི་ཐེག་པ། ལས་དང་ལས་ཀྱི་འབྲས་བུ་ཆུད་མི་ཟ་བ་དང་ཞེས་གསུངས། ཡང་འབངས་ཁ་ཅིག་གིས། དུག་ཤིང་གི་སྡོང་པོ་འདི་རྩ་བ་ནས་བཏོན་ཏེ་རྒྱང་རིང་པོར་དོར་ཟེར། དཔེ་དེ་བཞིན་དུ་ཕུང་ལྔ་དུ་མ་དང་སྐད་ཅིག་མར་རྟོགས་པས་འཁོར་བ་ལས་ངེས་པར་འབྱུང་ཡང་། གཟུང་ཡུལ་རྡུལ་ཕྲན་འཛིན་སེམས་སྐད་ཅིག་མ་དོན་དམ་དུ་འདོད་པ་ཉན་ཐོས་ཀྱི་ཐེག་པ་ལ་ཉོན་མོངས་པ་སྤོང་བའི་ཐབས་སོ། །ཡང་འབངས་ཁ་ཅིག་དུག་སྡོང་རྩ་བ་ནས་འདོན་མི་དགོས་ཏེ། བཅད་མཚམས་ལ་ཁྲོ་ཆུ་ཁོལ་མ་བླུག་པས་སླར་སྐྱེ་བར་མི་འགྱུར་ཟེར་རོ། །དེ་བཞིན་དུ་གཟུང་བ་རང་བཞིན་མེད་པར་རྟོགས་ཀྱང་འཛིན་རིག་སྐད་ཅིག་མ་དོན་དམ་དུ་འདོད་པ་རང་རྒྱལ་གྱི་ཐེག་པ་ལ་ཉོན་མོངས་པ་འགོགས་པའི་ཐབས་སོ། །ཡང་འབངས་དེ་རྣམས་ཀྱི་ནང་ནས་སྨན་པ་ཞིག་ན་རེ། དུག་ཤིང་རྩ་བ་ནས་འདོན་པ་དང་སྡོང་པོ་གཅོད་པ་གཉིས་ཀ་བླུན་པ་སྟེ། འདི་ནི་སྨན་མར་གྱི་རྒྱུར་རྙེད་དཀའ་བ་ཞིག་གོ་ཟེར་ནས་དུག་ཤིང་ལ་སྨན་སྦྱོར་བྱས་པས་ནད་སེལ་ཞིང་རོ་ཙའི་མཆོག་ཏུ་འགྱུར་རོ་ཟེར། དོན་དམ་དུ་བདག་མེད་གཉིས་རྟོགས་པས་ངེས་པར་འབྱུང་བ་བྱང་སེམས་ཀྱི་ཐེག་པ་ལ། ཉོན་མོངས་པ་དང་རྣམ་རྟོག་ཆོས་ཉིད་དུ་སྦྱོང་བའི་ཐབས་སོ། །ཡང་འབངས་རྣམས་ཀྱི་ནང་ནས་སྔགས་མཁན་ཞིག་བྱུང་ནས་དུག་ཤིང་འདུལ་བ་ལ་སྨན་གྱི་འདུལ་སྦྱོང་འདི་ཙམ་བྱེད་ཅི་ཞིག་དགོས་ཟེར་ནས། སྔགས་བཏབ་པ་ཙམ་གྱིས་སྔར་གྱི་སྨན་མར་ལས་ཀྱང་མཆོག་ཏུ་གྱུར་པ་ཞིག་བྱུང་ལ། དཔེ་དེ་བཞིན་དུ་སྔགས་དང་ཕྱག་རྒྱ་ཏིང་ངེ་འཛིན་གྱི་ཆོ་འཕྲུལ་གྱི་སྒོ་ནས། ཉོན་མོངས་དང་རྣམ་རྟོག་ལྷའི་རང་བཞིན་དུ་དབང་བསྒྱུར་བས་དགེ་སྡིག་གི་ལས་ཀྱི་འབྲས་བུ་མི་གོས་པ་ཀྲི་ཡོག་སྡེ་གསུམ་གྱི་ཐེག་པ་ལ། ཉོན་མོངས་པ་དང་རྣམ་རྟོག་ལྷ་དང་ཡེ་ཤེས་སུ་བསྒྱུར་བའི་ཐབས་སོ། །ཡང་རྨ་བྱ་ཞིག་བྱུང་ནས་དུག་ཤིང་གི་སྡོང་པོ་མཐོང་བས། ཤིན་ཏུ་དགའ་ཞིང་ཟོས་པས་ལང་ཚོ་རྒྱས་ཤིང་སྤུ་སྡུག་མདངས་དང་ལྡན་པར་གྱུར་ལ། དཔེ་དེ་བཞིན་དུ་ཉོན་མོངས་པ་སྤྱད་ཀྱང་མི་འཆིང་ཞིང་ཡེ་ཤེས་ལྔར་གསལ་བས་ན་གོས་པར་མི་འགྱུར་བ་སྔགས་ནང་པ་གཉིས་ཀྱི་ཐེག་པ་ལ་ཉོན་མོངས་པ་དབང་དུ་བྱེད་པའི་ཐབས་སོ། །དེ་ལྟར་ལྡུམ་རའི་ས་གཞི་དེ་ལ་དུག་སྐྱེས་པ། བཅད་པ། སྨན་གྱིས་སྦྱངས་པ། སྔགས་ཀྱིས་བསྒྱུར་བ། རྨ་བྱས་ཟོས་པ་སོགས་གང་ལའང་དགའ་མི་དགའི་རྟོག་པ་མེད་ཅིང་དུག་མ་སྐྱེས་ཀྱང་དགག་སྒྲུབ་མེད་པ་བཞིན་དུ། ཆོས་ཀྱི་དབྱིངས་རང་བཞིན་གྱིས་རྣམ་པར་དག་པ་རང་བྱུང་གི་ཡེ་ཤེས་རང་ཤར་བ་ལ་ལས་དང་ལས་ཀྱི་འབྲས་བུས་གོས་སུ་མེད་པ་ལ་ཨ་ཏི་རང་ལུགས་ཀྱི་ཐེག་པ་སྟེ། སྤང་གཉེན་གྱི་ཐ་སྙད་ལས་འདས་པ་ནི་སྟོན་པ་དྲུག་པའི་ཐུགས་ཀྱི་དགོངས་པའི་མཐར་ཐུག་གོ །

༈ བྱང་སེམས་རྣམས་སྐྱེ་བ་བཞེས་པའི་རྒྱུ་བཞི་ནི། མོས་སྤྱོད་ཀྱི་ས་ལ་གནས་པའི་བྱང་སེམས་ཀྱི་སྐྱེ་བ་ཕལ་ཆེར་ལས་ཀྱི་རྒྱུ་ལས་སྐྱེ་སྟེ། དེ་དག་སེམས་ལ་དབང་མ་ཐོབ་པས་གང་དུ་བསམ་ཤིང་སྨོན་ལམ་བཏབ་པ་དེར་གདོན་མི་ཟ་བར་སྐྱེ་ངེས་པ་མེད་ལ། རེ་འགའ་སྨོན་པ་ལྟར་སྐྱེ་བའང་ཡོད་མོད་ཀྱི། གཙོ་ཆེར་བསོད་ནམས་ཀྱིས་ཚོགས་བསགས་པའི་ལས་ཀྱིས་བདག་གཞན་ལ་ཕན་པར་འགྱུར་པའི་གནས་སུ་སྐྱེ་བ་དང་། ས་དང་པོ་དང་གཉིས་པ་ལ་ཞུགས་པའི་བྱང་ཆུབ་སེམས་དཔའ་རྣམས་ནི་སྨོན་ལམ་གྱི་དབང་གིས་ལྷ་མི་བྱོལ་སོང་ཡི་དྭགས་དམྱལ་བའི་གནས་གང་དང་གང་དུ་སེམས་ཅན་གྱི་དོན་བྱེད་པ་དེར་སྨོན་ལམ་བཏབ་པ་བཞིན་སྐྱེ་སྟེ། ལོ་ཉེས་ཆེན་པོ་བྱུང་བའི་དུས་སུ་ཉ་དང་གླང་ཆེན་སོགས་ཀྱི་ལུས་བླངས་ནས་རང་གི་ཤས་སེམས་ཅན་ཚིམ་པར་བྱེད། ནད་ཀྱི་བསྐལ་པ་བར་མ་སོགས་ཀྱི་ཚེ་ནད་སེལ་བའི་སེམས་ཅན་དང་རིགས་སྔགས་གྲུབ་པ་དང་། སྨན་པ་ཆེན་པོའི་ལུས་བླངས་ནས་ནད་སྣ་ཚོགས་ཞི་བར་བྱེད། ས་གསུམ་པ་ནས་བདུན་པའི་བར་གྱི་བྱང་སེམས་རྣམས་ཏིང་ངེ་འཛིན་གྱི་སྐྱེ་བ་འཛིན་པ་སྟེ། དེ་དག་སེམས་ཀྱི་ཏིང་ངེ་འཛིན་ལས་སུ་རུང་བའི་བསམ་གཏན་བཞི་ཐོབ་ཀྱང་དེས་འབྲས་བུ་གཟུགས་ཁམས་སུ་མི་སྐྱེ་བར་འདོད་ཁམས་སུ་སྐྱེ་བ་དང་། གང་དང་གང་དུ་བསམ་པར་ཏིང་ངེ་འཛིན་གྱིས་སྐྱེ་བ་འཛིན་ཏོ། །དག་ས་གསུམ་ལ་གནས་པའི་བྱང་སེམས་རྣམས་ནི་གནས་གང་དང་གང་དུ་སྐྱེ་བ་ཅི་དང་ཅི་ལྟ་བུ་སྟོན་པ་ལ་རང་དབང་ཡོད་པ་ཡིན་པས་དབང་འབྱོར་བའི་དབང་གིས་སྐྱེ་བར་འདོད་པ་ཡིན་ཏེ། དེ་དག་གིས་སྤྲུལ་པའི་སྐུ་དགའ་ལྡན་ནས་ལྷུམས་སུ་གཤེགས་པ་ལ་སོགས་པ་ཡང་སྟོན་ཅིང་སྐྱེ་བ་སྣ་ཚོགས་སུ་སྟོན་ཏོ། །བྱང་སེམས་མོས་སྤྱོད་པ་སྨོན་ལམ་གྱིས་སྐྱེ་བའང་ཡོད་མོད་ཕལ་ཆེར་ལས་དབང་གིས་སྐྱེ། ས་དང་པོ་དང་གཉིས་པ་ཏིང་ངེ་འཛིན་གྱི་སྐྱེ་བའང་ཡོད་མོད་ཕལ་ཆེར་སྨོན་ལམ་གྱིས་སྐྱེ། ས་གསུམ་པ་ནས་བདུན་པའི་བར་ཏིང་ངེ་འཛིན་དང་། དག་ས་པ་རྣམས་དབང་བཅུ་ཐོབ་པས་དབང་འབྱོར་བའི་དབང་གིས་སྐྱེ་བ་ཡིན་ནོ། །ཉན་ཐོས་ཀྱི་རིགས་མ་ངེས་པ་ཐེག་ཆེན་ལ་ཞུགས་ནས་འཚང་རྒྱ་བར་འགྱུར་བ་ལ་གཉིས་ཡོད་དེ། རང་གི་ཐེག་པའི་དོན་བདེན་པ་མཐོང་བ་རྒྱུན་ཞུགས་ཕྱིར་འོང་ཕྱིར་མི་འོང་གསུམ་དང་། བདེན་པ་མ་མཐོང་བ་སོ་སྐྱེས་མོས་སྤྱོད་པའི་གང་ཟག་གང་ཡིན་པའོ། །བདེན་དོན་མཐོང་བ་ལ་ཡང་འདོད་པའི་འདོད་ཆགས་དང་བྲལ་བ་ཕྱིར་མི་འོང་དང་། འདོད་ཁམས་ལ་འདོད་ཆགས་དང་བྲལ་བ་མིན་པར་རྒྱུན་ཞུགས་དང་ཕྱིར་འོང་བ་རྣམས་སོ། །ཉན་ཐོས་འཕགས་པ་སྲིད་པ་ལ་རྒྱབ་ཀྱི་ཕྱོགས་ནས་སྲིད་པར་མི་སྐྱེ་བར་བྱེད་པ་འཕགས་ལམ་ཐོབ་པ་ཐེག་ཆེན་ལ་ཞུགས་ན་འཁོར་བར་སྐྱེ་ནས་རྫོགས་སྨིན་སྦྱང་བ་སྐལ་བ་གྲངས་མེད་གསུམ་གྱི་བར་དུ་སྒྲུབ་དགོས་ན་སྲིད་པ་ཟད་བྱེད་ཀྱི་ལམ་ཐོབ་པ་དེ་དག་འཁོར་བར་ཇི་ལྟར་སྐྱེ་ཞེ་ན། འདོད་པའི་འདོད་ཆགས་དང་མ་བྲལ་བ་རྒྱུན་ཞུགས་དང་ཕྱིར་འོང་གཉིས་ནི་ཐེག་ཆེན་ལ་ཞུགས་ཚེ་སྐྱེ་བ་འཛིན་པའི་ཚུལ་སེམས་ཅན་སྡུག་བསྔལ་བ་ལ་སྙིང་རྗེའི་དབང་གིས་གང་དང་གང་དུ་སེམས་ཅན་གྱི་དོན་བྱ་བར་འདོད་པ་དེ་དང་དེ་དག་དུ་སྐྱེ་བར་གྱུར་ཅིག་ཅེས་སྨོན་ལམ་གྱི་དབང་གིས་དེ་དང་དེར་སྐྱེ་བ་མཚན་ཉིད་པ་རབ་ཏུ་སྒྲུབ་པར་བྱེད་དེ་སྐྱེས་ནས་སེམས་ཅན་ལ་ཕན་པ་དང་བདེ་བ་བྱས་ནས་ཚོགས་གཉིས་བསགས་ཤིང་མཐར་འཚང་རྒྱ་བར་བྱེད་དོ། །འདོད་པའི་འདོད་ཆགས་དང་བྲལ་བ་ནི་འདོད་ཁམས་སུ་ཕྱིར་མི་འོང་བ་དང་ལྡན་པའི་ཕྱིར་རང་ཉིད་འདོད་ཁམས་སུ་མི་སྐྱེ་ཡང་ཏིང་ངེ་འཛིན་གྱི་སྤྲུལ་པས་འཁོར་བར་སྐྱེ་བ་བསྟན་ནས་ཚོགས་བསགས་པ་སྒྲུབ་པར་བྱེད་ཅིང་འཚང་རྒྱའོ། །ཉན་ཐོས་ཐེག་ཆེན་ལ་ཞུགས་པ་དེ་ནི་སོ་སྐྱེ་ཐེག་ཆེན་ལ་ཞུགས་པ་ལས་དམན་ཞིང་། སྔར་རང་དོན་ལ་གོམས་པའི་སེམས་དང་ལྡན་ཞིང་མྱང་འདས་ལའང་དགའ་བས་ཐེག་ཆེན་གྱི་འབྲས་བུ་ལ་རྟོགས་པ་བུལ་བ་ཡིན་པར་འདོད་དོ། ༈ །དྲི་མ་མེད་པར་གྲགས་པས་བསྟན་པ་ལས། འཇམ་དཔལ་གཞོན་ནུར་གྱུར་པས་དྲི་མ་མེད་པར་གྲགས་པ་ལ་སྨྲས་པ། རིགས་ཀྱི་བུ་འདི་ལྟ་སྟེ་དཔེར་ན་དགོན་དུང་གི་ཕྱོགས་སུ་མེ་ཏོག་ཨུཏྤལ་དང་། པདྨ་དང་། ཀུ་མུ་ད་དང་། པདྨ་དཀར་པོ་དང་། དྲི་མཆོག་རྣམས་མི་སྐྱེ་སྟེ། འདམ་དང་ཆུ་གླིང་དུ་བསྐྱེད་ན་མེ་ཏོག་ཨུཏྤལ་དང་། པདྨ་དང་། ཀུ་མུ་ད་དང་། པདྨ་དཀར་པོ་དང་། དྲི་མཆོག་རྣམས་སྐྱེའོ། །རིགས་ཀྱི་བུ་དེ་བཞིན་དུ་འདུ་མ་བྱས་ངེས་པ་ཐོབ་པའི་སེམས་ཅན་རྣམས་ལ་ནི་སངས་རྒྱས་ཀྱི་ཆོས་རྣམས་མི་སྐྱེའོ། །ཉོན་མོངས་པའི་འདམ་དང་ཆུ་གླིང་དུ་གྱུར་པའི་སེམས་ཅན་རྣམས་ལ་སངས་རྒྱས་ཀྱི་ཆོས་རྣམས་སྐྱེའོ། །ཞེས་སོ། ༈ །སྐད་གཉིས་ཤན་སྦྱར་ལས། མ་རུཿམྱ་ངམ་ཐང་སྟེ། ཆུ་མེད་པའི་ས་ཐང་གི་མིང་། དྷ་ནྭཱ་དགོན་དུང་། དྷ་ནྭ་ནི་སྐམ་ལའམ་ཐང་གི་ལ། །

༈ གནས་ལུགས་མཛོད་འགྲེལ་ལས། དེ་ཡང་ཆོས་ཐམས་ཅད་རང་བཞིན་མེད་པ་དང་ཡེ་ནས་ལྷུན་གྱིས་གྲུབ་པ་དང་། རྒྱ་ཆད་ཕྱོགས་ལྷུང་མེད་པས་ཕྱལ་བ་དང་། རང་བྱུང་གི་ཡེ་ཤེས་གཅིག་པུའི་ངང་དུ་བསྡུ་བ་དང་བཞི། ཞེས་དང་། ཐེག་མཆོག་མཛོད་ལས། དེ་ཡང་ངོ་བོ་ཀ་དག་ལ་ལྟོས་ནས་ཁྲེགས་ཆོད་ཀྱི་དམ་ཚིག་ཏུ་འཁོར་བའི་ཆོས་སུ་སྣང་ངོ་ཅོག་སྣང་སྲིད་སྣོད་བཅུད་ཕྱི་ནང་ཐམས་ཅད་ཡེ་ནས་མེད་པ་སྨིག་སྒྱུའི་ཆུ་ལ་སོགས་པ་སྒྱུ་མའི་དཔེ་བརྒྱད་དུ་ཤེས་པས་སྣང་བ་ལ་བདེན་ཞེན་གྲོལ་བའི་དགོས་པ་ཡོད་དོ། །ཕྱི་ནང་ཡུལ་མེད་དུ་རྟོགས་པའི་ངང་ལ་སེམས་འཛིན་གྱི་འཇུར་བུས་མ་བཅིངས་བའི་རིག་པ་ཕྱལ་བ་བར་མེད་ཆེན་པོར་སྐྱོང་ཞིང་། ཞེན་འཛིན་གང་ཡང་མི་བྱ་བར་སྒོ་ལྔ་ཧར་སངས་ཡུལ་མེད་ཀྱི་རིག་པ་རྟེན་མེད་དུ་རྗེན་ལ་ཕུད་ནས་ཕྱལ་ཕྱལ་གཏོང་བ་ནི་ཕྱལ་བ་ཞེས་བྱ་སྟེ། སྣང་བཏགས་ཆོས་ཉིད་དུ་གྲོལ་བའི་དགོས་པ་ཡོད་དོ། །རང་བཞིན་ལྷུན་གྲུབ་ལ་ལྟོས་ནས་ཐོད་རྒལ་གྱི་དམ་ཚིག་ཏུ། རང་བྱུང་གི་ཡེ་ཤེས་ལ་ཡོན་ཏན་ལྷུན་གྱིས་གྲུབ་པས་ཚོགས་ལ་མ་ལྟོས་པར་རང་ངོ་ཤེས་པས་འགྲུབ་པར་ཐག་བཅད་ནས། འོད་ལྔ་རང་གསལ་ལྷུན་གྲུབ་ཀྱི་ངོ་བོ་སྣང་བ་བཞིའི་ཉམས་ལེན་དང་མི་འབྲལ་བར་བྱས་པས། སངས་རྒྱས་རང་ཆོས་སུ་གྲུབ་སྟེ། གཞན་ནས་འཚོལ་མི་དགོས་པའི་དགོས་པ་ཡོད་དོ། །རྐྱེན་སྣང་དང་བདེ་སྡུག་བྱུང་ཚོར་དང་རྣམ་རྟོགསྣང་བ་དང་རིག་པ། ཅི་ཤར། ཅི་སྣང་། ཅི་རིག་ཀྱང་རང་བྱུང་གི་ཡེ་ཤེས་གཅིག་པུར་ཐག་ཆོད་པས། ཐམས་ཅད་རང་གྲོལ་ལྷུན་མཉམ་ཆེན་པོའི་དགོངས་པ་ལས་མི་འདའ་ཞིང་། ངོ་བོ་ཆོས་ཀྱི་སྐུ་ཀ་དག་དང་ལྷུན་གྲུབ་ཁྲེགས་ཆོད་དང་ཐོད་རྒལ་གཉིས་སུ་མེད་པར། ཆོས་ཉིད་ཟད་པ་ལ་ཤ་ར་ར་འོལ་ལ་ལ། ཡེ་རེ་རེ་སངས་སངས་སངས་གཏན་སྲིད་ཟིན་པའི་དགོས་པ་ཡོད་དོ། །

༈ རླུང་སེམས་དབུ་མར་ཐིམ་པས་སྣང་བ་གསུམ་ལུགས་ལྡོག་ཏུ་ཤར་ཏེ་དེའི་རིམ་པ་དང་མཐུན་པར་རང་བཞིན་བརྒྱད་ཅུའི་ཀུན་རྟོག་འགགས་ནས་སློང་བྱེད་རྐྱེན་གསུམ་དང་བྲལ་བའི་ནམ་མཁའ་ལྟ་བུ་ཤིན་ཏུ་མཚོན་པར་དཀའ་བའི་འོད་གསལ་གྱི་གནས་ལུགས་དེའི་ངང་དུ་མཉམ་པར་འཇོག་པ་དང་། དེའི་ངང་ལས་ཆུ་ལས་ཉ་ལྡང་བ་ལྟར་སྣང་བ་གསུམ་ལུགས་འབྱུང་དུ་ཤར་བས་ཉེར་ལེན་གྱིས་རྒྱུ་བྱས། རླུང་འོད་ཟེར་ལྔ་པས་ལྷན་ཅིག་བྱེད་པའི་རྐྱེན་བྱས་ནས་སྒྱུ་མའི་དཔེ་བཅུ་གཉིས་ཀྱིས་མཚོན་པའི་ལྷའི་སྐུར་ལྡང་བ་ཡིན་ནོ། །རླུང་སེམས་ཙམ་ལས་གྲུབ་པའི་ལྷ་སྐུ་དེ་ཉིད་མཚོན་བྱེད་ཀྱི་དཔེ་བཅུ་གཉིས་ནི། ཡེ་ཤེས་རྡོ་རྗེ་ཀུན་ལས་བཏུས་པའི་ལུང་ལྟར་ན། ངོ་བོས་མ་གྲུབ་ཀྱང་རྒྱུ་རྐྱེན་ཚོགས་པ་ལྟར་ལས་སྣང་བས་སྒྱུ་མ་ལྟ་བུ་དང་། གར་ཡང་ཁྱབ་པ་ཆུ་ཟླ་ལྟ་བུ་དང་། ཤ་རུས་སོགས་བྲལ་ཡང་ལུས་སུ་སྣང་བའི་གཟུགས་བརྙན་མིག་ཡོར་རམ་གྲིབ་མ་ལྟ་བུ་དང་། སྤྲུལ་པ་སྤྲོ་བསྡུ་མང་པོ་བྱེད་པ་སྨིག་རྒྱུ་ལྟ་བུ་དང་། རླུང་སེམས་ཙམ་ལས་གྲུབ་པ་རྨི་ལམ་ལྟ་བུ་དང་། རྣམ་སྨིན་གྱི་ལུས་དང་རྒྱུད་གཅིག་ཀྱང་ཐ་དད་ལྟར་སྣང་བ་བྲག་ཆ་ལྟ་བུ་དང་། རྟེན་བརྟེན་པའི་དཀྱིལ་འཁོར་དུ་སྣང་བ་དྲི་ཟའི་གྲོང་ཁྱེར་ལྟ་བུ་དང་། གཅིག་ཡིན་ཀྱང་དུ་མར་སྟོན་པ་མིག་འཕྲུལ་ལྟ་བུ་དང་། ཁམས་ལྔའི་དྭངས་མ་ལས་གྲུབ་པའམ་ཁ་དོག་གསལ་ལ་མ་འདྲེས་པ་འཇའ་ཚོན་ལྟ་བུ་དང་། རགས་པའི་ལུས་སྤྲིན་དང་འདྲ་བའི་གསེབ་ན་ཞིང་ཁམས་སྣང་བར་བྱེད་པས་འོད་གློག་འགྱུ་བ་དང་འདྲ་བའི་གློག་ལྟ་བུ་དང་། སྟོང་པའི་ངང་ལས་རྣམ་རྟོག་མེད་བཞིན་ཐོལ་གྱིས་རང་ཤར་དུ་བསྐྱེད་པ་ཆུ་ལས་ཆུ་བུར་རྡོལ་བ་ལྟ་བུ་དང་། ཡན་ལག་དང་ཉིང་ལག་ཅིག་ཆར་རྫོགས་པ་མེ་ལོང་གི་གཟུགས་བརྙན་ལྟ་བུའོ། ༈ །ཀུན་རྫོབ་སྒྱུ་ལུས་ལ་མཚོན་ན་དེ་ལས་ཀྱང་ཆོས་ཐམས་ཅད་སྒྱུ་མ་ལྟ་བུར་གསུངས་པས། ཚིག་ཙམ་གྱི་དོན་ཕ་རོལ་དུ་ཕྱིན་པ་དང་མཐུན་ཞིང་། ལྷ་སྐུ་སྒྱུ་མ་ལྟ་བུ་སོགས་བསྐྱེད་པ་དང་། རླུང་སེམས་ཀྱི་ལྷ་སྐུ་སྒྱུ་མ་ལྟ་བུ་སོགས་རྫོགས་པ་དང་། ལྷུན་གྲུབ་ཀྱི་རིག་གདངས་ལྟ་བུ་རྫོགས་པ་ཆེན་པོ་དང་མཐུན་པའི་ཚུལ་དུ་གོ་རིམ་བཞིན་ཚིག་དོན་དང་། སྤྱི་དོན་དང་། སྦས་དོན་དང་། མཐར་ཐུག་གི་དོན་གྱི་གནད་ལ་འཇུག་པ་དང་། དོན་དམ་འོད་གསལ་ལ་མཚོན་ན། སེམས་ཀྱི་རང་བཞིན་ནི་འོད་གསལ་བའོ། །ཞེས་པ་ལ་སོགས་པ་འོད་གསལ་ཙམ་ཕར་ཕྱིན་ལས་ཀྱང་བསྟན་པས་ཕར་ཕྱིན་དང་མཐུན་པའི་ཚིག་དོན། བསྐྱེད་རིམ་འོད་གསལ་དུ་ཞུགས་པ་ལྟ་བུ་བསྐྱེད་པ་དང་མཐུན་པའི་སྤྱི་དོན། རྫོགས་རིམ་གྱི་སྟོང་བཞིའི་དྲངས་པའི་འོད་གསལ་ལྟ་བུ་རྫོགས་པ་དང་མཐུན་པའི་སྦས་དོན། རིམ་པ་གཉིས་པའི་གཉིས་པ་ཆོས་ཐམས་ཅད་ཡེ་ནས་སྟོང་པའི་གདོད་མའི་གནས་ལུགས་རྟོགས་པ་དབང་བཞི་པའི་ཡེ་ཤེས་ཀ་དག་གི་རྟོགས་པ་རྫོགས་པ་ཆེན་པོ་དང་མཐུན་པའི་མཐར་ཐུག་གི་དོན་གྱི་གནད་ལ་འཇུག་པ་སྟེ། དེ་བཞིན་དུ་ཟུང་འཇུག་ཀྱང་སོ་སོའི་སྐབས་ཀྱིས་ཤེས་པར་བྱ་བ་གནད་ཀྱི་དོན་ཡིན་ལ། གཞན་དུ་ཚིག་ཙམ་གྱི་དོན་དང་། མདོ་སྔགས་ཐུན་མོང་གི་སྤྱི་དོན་དང་། རྫོགས་རིམ་སྦས་དོན་དང་། མཐར་ཐུག་གི་འབྲས་བུའི་དོན་གྱི་ཚུལ་བཞིར་བཤད་པ་ནི་ཡོངས་སུ་གྲགས་པ་བཞིན་ནོ། །ཞེས་གསུངས། ༈ ཚུལ་བཞི་ལས། ཚིག་གི་ཚུལ། འོད་གསལ་ཙམ་ཕར་ཕྱིན་ལས་ཀྱང་བསྟན་པས་ཕར་ཕྱིན་དང་མཐུན་པའོ། །སྤྱིའི་ཚུལ་ནི། ཕར་ཕྱིན་ཐེག་པའི་ས་ལམ་སྔགས་ཀྱིས་ཀྱང་བརྗོད་བྱར་བསྟན་པས་ཐུན་མོང་ཡིན་པའོ། །སྦས་པའི་ཚུལ་ནི། གོང་མའི་ཡུལ་དུ་གྱུར་པ་འོག་མའི་ཡུལ་དུ་མ་གྱུར་པའོ། །མཐར་ཐུག་གི་ཚུལ་ནི། དེ་ལས་གོང་དུ་བོག་དབྱུང་དུ་མེད་པ་སངས་རྒྱས་ཀྱི་ཡེ་ཤེས་སོ། །

༈ ཕྱི་མཆོད་ནི། དངས་བསིལ་མངར་བའི་ཞལ་སྐྱེམས་མཆོད་ཡོན། ཕྱག་ཞབས་བསིལ་བྱེད་རྙོག་བྲལ་གྱི་ཞབས་བསིལ། རྣམ་བཀྲའི་མེ་ཏོག་སྤྱན། དྲི་ཞིམ་བདུག་སྤོས་ཤངས། སྣང་གསལ་མར་མེ་སྤྱན། དྲི་ལྡན་མའི་ཆབ་ཐུགས་ཀ། བཅུད་ལྡན་ཞལ་ཟས་ལྗགས། སྙན་པའི་རོལ་མོ་སྙན་དབང་རྣམ་ལ་མཆོད་པ་སྟེ། དེ་དག་གི་མཚོན་དོན་ཀྱང་རིག་པའི་ཡེ་ཤེས་ཉིད་རྣམ་པར་བཀྲ་བས་མེ་ཏོགདམིགས་མེད་ཀྱི་སྙིང་རྗེའི་རྟོག་པ་བསྲེག་པས་སྤོས། ལྷན་སྐྱེས་འོད་གསལ་གྱིས་མ་རིག་པའི་མུན་པ་སེལ་བས་མར་མེ། ཤིན་ཏུ་ཟབ་པའི་དོན་དབྱིངས་རིག་སྤྲོས་བྲལ་གྱི་ཡེ་ཤེས་སུ་ཤར་བས་ཆོས་ཐམས་ཅད་ལ་ཁྱབ་པས་བྱུག་པ། དེས་ཀུན་རྟོག་གི་དྲི་མ་འཁྲུད་པས་ཞབས་བསིལ། ཏིང་འཛིན་ཟག་མེད་ཀྱི་རོ་མྱོང་བ་ནི་ཞལ་ཟས་དང་མཆོད་ཡོན། གྲགས་སྟོང་གཞོམ་མེད་ཀྱི་སྔགས་སྒྲ་ནི་རོལ་མོའོ། །ནང་མཆོད་ཐུན་མོང་བ་ནི། མཚོན་བྱེད་བམ་གཙང་མ་ལ་རང་བྱུང་དུ་གནས་པའི་དམ་རྫས་མིག་ལྕེ་རྣ་བ་སྣ་སྙིང་སྟེ་དབང་ལྔའི་མེ་ཏོགཚིལ་ཆེན་བསྲེག་གསུར་གྱི་བདུག་སྤོས། ཞུན་ཆེན་སྐྲ་ལ་སྦར་བའི་མར་མེ། མཁྲིས་པའི་དྲི་ཆབ། ཤ་ཆེན་གྱི་ཞལ་ཟས་སོགས་ཏེ་དེ་དག་གི་མཚོན་དོན་ལུས་ཅན་རྣམས་ལ་རང་བྱུང་དུ་གྲུབ་པའི་རྫས་སྒོ་ལྔའི་རྣམ་ཤེས་ཀྱི་རྟེན་གཟུགས་ཅན་དྭངས་མའི་དབང་པོ་ལྔ་ནི་རང་ཡུལ་ལ་མ་འདྲེས་པར་དབང་བྱེད་པས་རྣམ་བཀྲའི་མེ་ཏོགཚིལ་ཆེན་གྱི་རྒྱུ་ཤ་སྟེ་དེ་ཉིད་ཀྱི་སྙིགས་མ་དྲིར་འགྱུར་བས་ཚིལ་གསུར་གྱི་སྤོས། ཞུན་ཆེན་གྱི་འབྲས་བུ་ཁུ་བ་ལས་ལུས་ཀྱི་བཀྲག་མདངས་སུ་འགྱུར་བས་ཞུན་མེ། མཁྲིས་པ་ནི་དྲི་མཛོད་ཡིན་པས་བྱུག་པ། བཟའ་བཏུང་སོགས་འཇུ་བའི་དངས་མ་ཁྲག་དང་ཤར་སྨིན་ཏེ་ཕུང་ཁམས་སྐྱེ་མཆེད་ཀྱི་ལྷ་རྣམས་གསོ་བར་བྱེད་པའི་ཕྱིར་ཞལ་ཟས་སོ། །ནང་མཆོད་ཁྱད་པར་བ་ལ་སྨན་གཏོར་རཀྟ་གསུམ་ལས། སྨན་མཆོད་ནི། འཁོར་འདས་ཀྱི་ཆོས་ཐམས་ཅད་མ་བཅོས་རང་བྱུང་གི་བདུད་རྩིར་གནས་པའི་ཕྱིར་རྩ་བརྒྱད་ཡན་ལག་སྟོང་སྦྱར་ཚུལ་བཞིན་གྲུབ་པའི་དམ་རྫས། ཆོས་ཉིད་མཉམ་པའི་ངང་ལས་བྱུང་ཞིང་གཉིས་འཛིན་གྱི་རྟོག་པ་སེལ་བའི་བདུད་རྩི་སྨན་གྱི་བཅུད་ལེན་རིགས་ལྔ་ཡེ་ཤེས་ལྔ་ཡི་ངོ་བོར་གྲུབ་པ་ཉིད་མཐེབ་སྲིན་ཉི་ཟླའི་གའུས་བཅུས་ཏེ་ཕུལ་བས་ལྷ་རྣམས་མཉེས་པར་མོས་པ་དང་། ལྷ་རྣམས་ཀྱི་གནས་གསུམ་ནས་སྐུ་གསུང་ཐུགས་ཀྱི་བྱིན་རླབས་དང་དངོས་གྲུབ་ཐམས་ཅད་ཡི་གེ་འབྲུ་གསུམ་གྱི་རྣམ་པར་འཕྲོས་ནས་བདུད་རྩིའི་སྟེང་དུ་གནས་པ་མཐེབ་སྲིན་གྱིས་བླངས་ཏེ་རང་གི་གནས་གསུམ་དང་ལྕེ་ལ་བཞག་པས་རྡོ་རྗེ་གསུམ་གྱི་དངོས་གྲུབ་ཐོབ་པར་མོས་པ་སྟེ། སྦས་དོན་གྱི་དབང་དུ་བྱས་ན་བདུད་རྩི་ལྔ་ནི་ཕུང་ལྔའི་དྭངས་མ། ཤ་ལྔ་ནི་དབང་ལྔའི་དྭངས་མ་སྟེ། དེ་དག་འཛག་མེད་དུ་བཅིངས་པ་ལས་འཆི་མེད་གྲུབ་པས་ན་བདུད་རྩིའོ། །གཏོར་མའི་མཆོད་པ་ནི། ཕྱི་མཆོད་རྣམ་དག་དབྱིངས་ཀྱི་གཏོར་གཞོང་དུ། ནང་བཅུད་གཏོར་རྫས་བཟའ་བཏུང་གི་དངོས་པོ་མཁོ་དགུའི་ལོངས་སྤྱོད་འདོད་ཡོན་ལྔའི་སྤྲིན་ཆེན་པོར་སྤྲོས་ཏེ་ཕུལ་བས། ལྷ་རྣམས་ཀྱི་ལྗགས་རྡོ་རྗེའི་རྣམ་པ་ཅན་ལས་བྱུང་བའི་འོད་ཀྱི་སྦུ་གུས་བཅུད་དྲངས་ཤིང་གསོལ་བས་ཐུགས་དམ་བསྐང་བར་མོས་ཏེ། ངེས་དོན་དུ་ཡུལ་ལྔའི་བཟའ་བ་དང་། རྣམ་ཤེས་ཀྱི་བཏུང་བ་རྣམས་འོད་གསལ་གྱི་ཀློང་དུ་གསོལ་ཞིང་ཐིམ་པར་མོས་པའོ། །རཀྟའི་མཆོད་པ་ནི། ཉོན་མོངས་པའི་རྩ་བ་ནི་ཁམས་གསུམ་དུ་ཆགས་ཤིང་ཞེན་པའི་ཀུན་རྟོག་སྟེ། དེས་འཁོར་བ་འགྲུབ་པར་བྱེད་པས་ན་འཁོར་བ་རྩད་ནས་གཅོད་པའི་ཕྱིར་ཆགས་རྟོག་ཐམས་ཅད་ཁྲག་གི་རྣམ་པར་བསྡུས་ནས་ཆགས་མེད་བདེ་ཆེན་གྱི་ངང་དུ་བཅོམ་སྟེ་དྭངས་མའི་རྒྱ་མཚོར་འཁྱིལ་བ་འཁོར་བ་སྐྱེ་མེད་ཀྱི་དབྱིངས་སུ་སྒྲོལ་བའི་དམ་རྫས་ཉིད་འཁོར་འདས་མཉམ་ཉིད་ཀྱི་དབྱིངས་སུ་འབུལ་བ་སྟེ། ངེས་དོན་དུ་མཁའ་གསང་གི་རྩེར་ཉི་ཟླའི་འགྲོས་བཅིངས་པས་འཁོར་བའི་རྒྱུན་གཅོད་པར་བྱེད་པའོ། །དེ་ལྟར་ཕུལ་བས་འཁོར་བ་ཁྲག་གི་རྒྱ་མཚོ་ལྷག་མེད་དུ་གསོལ་བས་འཁོར་བའི་གནས་སྟོང་པར་མོས་པའོ། །གསང་མཆོད་ལ་གཉིས་ལས་སྦྱོར་མཆོད་ནི། སྣང་བ་ཐམས་ཅད་ཐབས་ཡབ་ཀྱི་རང་བཞིན། སྟོང་པ་ཐམས་ཅད་ཤེས་རབ་ཡུམ་གྱི་ཕྱག་རྒྱར་གནས་པས། དེ་གཉིས་ངོ་བོ་དབྱེར་མི་ཕྱེད་པར་གནས་པ་ནི་ཆོས་ཐམས་ཅད་རང་བཞིན་གཉིས་སུ་མེད་པར་སྦྱོར་བ་སྟེ་སྣང་སྲིད་ཡེ་སྦྱོར་གྱི་དགོངས་པ་ཡིན་ལ། དེའི་རྩལ་སྣང་རང་ཉིད་ལྷ་ཡབ་ཡུམ་དུ་གསལ་ཏེ་འདུ་ཤེས་གསུམ་ལྡན་གྱིས་མཉམ་པར་སྦྱོར་བས་ཡས་བབས་དང་མས་བརྟན་གྱི་དགའ་བ་བཞི་ལུགས་འབྱུང་ལྡོག་གི་སྦྱོར་བས་བདེ་སྟོང་གཉིས་སུ་མེད་པའི་མཆོད་སྤྲིན་ཟག་བྲལ་སྒྱུ་མའི་བཀོད་པས་ཕུང་ཁམས་སྐྱེ་མཆེད་གདོད་ནས་དག་པའི་ལྷ་ཡི་འཁོར་ལོར་རྫོགས་པ་རྣམས་མཉེས་པར་བྱེད་པའོ། །སྒྲོལ་མཆོད་ནི། བསྒྲལ་བྱ་བདག་ཏུ་ལྟ་བའི་དབང་གིས་གཟུང་འཛིན་ལ་མངོན་པར་ཞེན་པའི་རྒྱུ་ལས་བྱུང་བའི་ཉོན་མོངས་པའི་དགྲ་བོ་ཐར་བ་ལ་བར་དུ་གཅོད་ཅིང་འབྲས་བུ་ཁམས་གསུམ་གྱི་འཁོར་བར་འཆིང་བྱེད་ཡིན་པས། དེ་ཐམས་ཅད་སྒྲོལ་བྱེད་གཉིས་སུ་མེད་པའི་ཡེ་ཤེས་རང་རིག་པའི་ངོ་བོར་རྫོགས་པའི་མཚོན་ཆ་ཆེན་པོས། རིག་སྟོང་སྐྱེ་མེད་གདོད་ནས་དག་པའི་ཆོས་དབྱིངས་མཉམ་པ་ཆེན་པོའི་ཀློང་དུ་བསྒྲལ་བ་ནི་སྲིད་གསུམ་ཡེ་གྲོལ་གྱི་དགོངས་པ་ཡིན་ལ། དེའི་རྩལ་སྣང་དེ་ལྟར་མ་རྟོགས་པའི་འགྲོ་བ་རྣམ་སྨིན་རྩུབ་མོས་འཕངས་བའི་བདུད་དང་རུ་ཏྲ་མ་རུང་ཞིང་བཅུའི་ཚོགས་རྣམས་ཀུན་སློང་སྙིང་རྗེ་ཆེན་པོའི་རྣམ་པ་སྒྱུ་མ་ལྟ་བུའི་ཚུལ་གྱིས་དབྱིངས་སུ་བསྒྲལ་ཞིང་རྣམ་ཤེས་བདེ་བ་ཆེན་པོའི་འཁོར་ལོར་སྦྱར་ཏེ་དུག་གསུམ་སྙིགས་མ་ཤ་ཁྲག་རུས་པའི་ཕུང་པོ་རྣམས་ལྷ་རྣམས་ཀྱི་ཞལ་དུ་ཕུལ་བས་དགྱེས་པར་མོས་པའོ། །དེ་ཁོ་ན་ཉིད་ཀྱི་མཆོད་པ་ནི། སྣང་སྲིད་འཁོར་འདས་ཀྱིས་བསྡུས་པའི་ཆོས་ཐམས་ཅད་ཡེ་ནས་སངས་རྒྱས་པའི་རང་བཞིན་མཉམ་པ་ཉིད་སྤྲོས་བྲལ་ཐིག་ལེ་ཉག་གཅིག་གི་ངང་དུ་རྫོགས་པས། གང་ལ་མཆོད་པར་བྱ་བའི་ཡུལ་དང་། གང་གིས་མཆོད་པར་བྱེད་པའི་གང་ཟག་དང་། ཇི་ལྟར་མཆོད་པའི་ཚུལ་གསུམ་གཉིས་མེད་བྱང་ཆུབ་སེམས་ཀྱི་དཀྱིལ་འཁོར་དུ་དབྱེར་མེད་པར་རོ་མཉམ་པས་ཅིར་སྣང་ཀུན་བཟང་སྤྱོད་པའི་ཕྱག་རྒྱ་ཟུང་འཇུག་བདེ་བ་ཆེན་པོར་འབུལ་བ་སྟེ་མཆོད་པ་ཀུན་གྱི་ནང་ནས་བླ་ན་མེད་པའོ། །

༈ དང་པོ་ཕྱག་ནི། ཕྱག་འཚལ་བའི་ཡུལ་རྟེན་གཉིས་སུ་མི་དམིགས་པར་རྟོགས་པ་དོན་གྱི་ཕྱག་དང་། ལྷ་རྣམས་ཀྱི་ཡོན་ཏན་དྲན་ནས་གུས་པས་འདུད་པ་བརྡའི་ཕྱག་གཉིས་ཟུང་འབྲེལ་དུ་འཚལ་ཞིང་། ལྷ་ཚོགས་རྣམས་ཀྱིས་ལན་གནང་བར་བསམ་པའོ། །གཉིས་པ་ཕྱག་རྒྱ་ནི་འཆད་པར་འགྱུར་བ་ལྟར་རོ། །གསུམ་པ་ཀུན་བཟང་ནི། ཆོས་ཐམས་ཅད་རིག་པ་རང་སྣང་དུ་མཉམ་པ་ལ་བཟང་ངན་དང་བླང་དོར་མ་གྲུབ་པས་མཆོད་པར་མ་གྱུར་པའི་དངོས་པོ་རྡུལ་ཙམ་ཡང་མེད་དེ་སྤྱོད་ཡུལ་ཡོངས་སུ་དག་པ་ཀུན་དུ་བཟང་པོའི་མཆོད་པའོ། །འདི་དང་འོག་མ་རྣམས་ཀྱི་སྔགས་རྒྱ་སོགས་སྒྲུབ་ཐབས་ལྟར་རོ། །བཞི་པ་ཞབས་བསིལ་ནི། བསིལ་ཆབ་ཐོགས་པའི་ལྷ་མོས་ལན་གསུམ་དུ་ཕུལ་བས་ཕྱག་དང་ཞབས་བསིལ་བར་བསམ་མོ། །ལྔ་པ་བཞི་བསྣོལ་ནི། རྡོ་རྗེ་སྤོས་མ་སོགས་ལྷ་མོ་དཔག་མེད་སྤྲོས་ཏེ། ཤངས་ལ་བདུག་སྤོས། དབུ་ལ་མེ་ཏོག །སྤྱན་ལ་མར་མེ། ཐུགས་ཀར་བྱུག་པ་རྣམས་ཀྱིས་མཆོད་དེ། མཐར་ལྷ་མོ་རྣམས་ཀྱང་གནས་དེ་དང་དེར་ཐིམ་པ་དང་། སྐྱེས་ལན་གྱི་ཚུལ་དུ་ལྷ་རྣམས་ཀྱི་གནས་དེ་དག་ལས་ལྷ་མོ་བཞི་སླར་བྱུང་ནས་ལས་སེམས་ཀྱི་ཤངས་སོགས་གནས་བཞིར་ཐིམ་པས་དངོས་གྲུབ་ཐོབ་པར་བསམ་པ་སྟེ། དེ་ལྟར་སྐྱེས་དང་སྐྱེས་ལན་གྱི་ཚུལ་གཉིས་བསྣོལ་མར་བྱེད་པས་ན་བཞི་བསྣོལ་ཞེས་བརྗོད་གསུངས་སོ། །དྲུག་པ་སྨན་མཆོད་ནི། བདུད་རྩིའི་ཆེ་བ་བརྗོད་པ་སྔོན་ཏུ་བཏང་སྟེ། མཐེབ་སྲིན་ཉི་ཟླ་ཁ་སྦྱོར་གྱི་ཕྱག་རྒྱས་གཏོར་བས་བདུད་རྩིའི་ཟེགས་མ་ནམ་མཁའ་ལ་སྤྲིན་ལྟར་ཆགས་པ་ལས་ར་ས་ཡ་ནའི་ཆར་བབ་པས་ལྷ་རྣམས་གཟི་བརྗིད་བསྐྱེད་ཅིང་། དེ་ནས་རང་གི་ལྕེ་ལ་ཧཱུྃ་དང་སྨན་ལ་འབྲུ་གསུམ་བཀོད་ལ་མཐེབ་སྲིན་གྱིས་བླངས་ནས་ལྕེར་བཞག་པས་གནས་གསུམ་དུ་ཆགས་ཏེ་འཕྲོ་འདུས་སྐུ་གསུང་ཐུགས་ཀྱི་དངོས་གྲུབ་ཐོབ་པར་བསམ་པའོ། །བདུན་པ་གཏོར་མ་ནི་གཏོར་མ་འདོད་ཡོན་གྱི་ལྷ་མོ་དྲུག་གི་རྣམ་པར་ཕུལ་བས་གཟུགས་རྡོ་རྗེ་མ་དང་མེ་ལོང་སྤྱན་ལ་དང་། སྒྲ་རྡོ་རྗེ་མ་དང་རྒྱུད་མང་སྙན་ལ་སོགས་དབང་པོ་སོ་སོ་ལ་ཐིམ་ནས་མཉེས་པར་བསམ་པའོ། །བརྒྱད་པ་བདུད་རྩི་གསང་ནན་ནི། གསང་ནན་ནམ་རྩད་ནན་ཞེས་པ་སྐྱེམས་ཀྱི་བརྡ་སྟེ། བདུད་རྩིའི་རྒྱུན་གཏོར་མར་ལན་གསུམ་སྦྲེང་བས་དང་པོས་ལྷ་རྣམས་དགྱེས་པ་བསྐྱེད། གཉིས་པས་ཉན་ཐོས་རྣམས་འགོག་པ་ལས་བསླང་། གསུམ་པས་རྒྱལ་བ་རྣམས་གཞན་དོན་ལ་བསྐུལ་བའོ། །དགུ་པ་ལྷག་པ་ཏིང་ངེ་འཛིན་གྱི་མཆོད་པ་ནི། སྤྲུལ་པ་དང་བསྒྱུར་པ་གཉིས་ལས་འདིར་ཕྱི་མ་ལྟར་བྱེད་དོ། །བདག་ཉིད་ལས་ཀྱི་སེམས་དཔའི་ཐུགས་ཀ་ནས་བྷྲུཾ་ཡིག་སྤྲོས་པས་ས་གཞི་དང་ཁང་ཁྱིམ་སོགས་དག་པའི་ཞིང་དང་གཞལ་མེད་ཁང་དུ་བྱིན་གྱིས་རློབ་པ་དང་། ཚུལ་དེ་བཞིན་དུ་ཏྲཾ་ལས་རྒྱན་དང་ནགས་ཚལ། ཧྲཱིཿལས་གླུ་དབྱངས། ཨ་ལས་ཁྲུས་རྫིང་། ༀ་ལས་ཞལ་ཟས། མྃ་ལས་གོས་དར། ཧཱུྃ་ལས་བྲོ་གར་སོགས་རེ་རེ་འང་མཐའ་ཡས་པ་སྤྲོས་ཏེ་མཆོད་པའོ། །བཅུ་པ་སྒྲོལ་མཆོད་ནི་རྒྱུད་ཉིད་ལས། བློ་ངན་འཇིག་རྟེན་སྙིང་རེ་རྗེ། །ཞེས་པ་ལྟར་འཁྲུལ་བའི་གཞན་དབང་དུ་སོང་བའི་སེམས་ཅན་རྣམས་ལ་སྙིང་རྗེ་བསྐྱེད་དེ་རང་གི་ཐུགས་ཀ་ནས་སྤྲོས་པའི་རཾ་ཡིག་ལས་ཡེ་ཤེས་ཀྱི་མེ་འབར་བས་བསྒྲལ་བྱའི་སྙིང་ནང་གི་ས་བོན་དྲུག་བག་ཆགས་དང་བཅས་པ་བསྲེགས་ནས་རྣམ་ཤེས་འོད་གསལ་གྱི་དགོངས་དབྱིངས་སུ་བསྟིམ་པའོ། །བཅུ་གཅིག་པ་སྦྱོར་མཆོད་ནི། ལྷ་ཚོགས་རྣམས་རྗེས་ཆགས་ཀྱིས་སྙོམ་པར་ཞུགས་པས་བདེ་བའི་འོད་ཟེར་སྤྲོ་བསྡུས་རྒྱལ་བ་ཐམས་ཅད་མཆོད་ཅིང་གསང་བའི་དབང་ཐོབ་པར་བསམ་པ་ཨ་ནུ་རཱ་གའི་སྔགས་ཀྱིས་ང་རྒྱལ་བཟུང་བའོ། །བཅུ་གཉིས་པ་འདོད་ཡོན་རོ་མཉམ་པ་ནི། སྣང་སྲིད་ཐམས་ཅད་འདོད་ཡོན་གྱི་ལྷ་མོར་དག་པས་ལྷ་ལ་ལྷ་དང་ཆོས་ཉིད་ལ་ཆོས་ཉིད་རོལ་པའི་ཚུལ་གྱིས་མཆོད་པའོ། །བཅུ་གསུམ་པ་རོལ་མོ་ཡེ་ཤེས་ནི། མཆོད་པའི་ཡོ་བྱད་ཇི་སྙེད་པ་སེམས་ཉིད་ཀྱི་རོལ་པར་སྡུད་པ་སྟེ། དེ་རྣམས་བསྒྲིགས་ན། དང་པོ་ཀུན་བཟང་གིས་འདོད་པའི་ཡོན་ཏན་གྱི་རྣམ་པ་ཡིན་མིན་གྱི་རྣམ་དབྱེ་མེད་པར་ཡེ་ཤེས་ཀྱི་རང་སྣང་ཁོ་ནར་བལྟས་ཏེ་མཆོད་པ་དང་། དེ་ནས་དགུས་དག་པའི་འདོད་ཡོན་གྱི་བྱེ་བྲག་སོ་སོར་སྤྲུལ་ཏེ་མཆོད་པ་དང་། ཕྱི་མ་འདིས་དེ་དག་ཐམས་ཅད་ཡེ་ཤེས་ཀྱི་དབྱིངས་སུ་རོ་གཅིག་པར་བསྡུས་ནས་མདོར་ན་སྣང་སྤྱོད་མ་ལུས་པ་དགྱེས་མཉམ་ཆེན་པོའི་ཡེ་ཤེས་རྩལ་འབར་བའི་གྲོགས་སུ་འཁྱེར་བ་ཉིད་མཆོད་པའི་ལམ་གྱི་གནད་ཡིན་པས། རོལ་མོ་ཡེ་ཤེས་ཀྱི་མཐར་མ་ཧཱ་པུ་ཛ་བཛྲ་ཞེས་སོགས་དེ་བཞིན་གཤེགས་པ་ཐམས་ཅད་ཀྱི་མཆོད་པའི་རྡོ་རྗེར་ང་རྒྱལ་བཟུང་བ་གསུངས་ཏེ་མཆོད་པར་མ་ཟད་བླ་མེད་ཀྱི་རྒྱུད་ལས་འདོད་ཡོན་ལམ་འཁྱེར་གྱི་ཐབས་མཁས་ཇི་སྙེད་བསྟན་པ་རྣམས་ཀྱི་གནད་གཟེར་ཡང་འདི་ཉིད་དོ། །བཅུ་བཞི་པ་གླུ་ཡེ་ཤེས་ནི། དཀྱིལ་འཁོར་གྱི་ལྷ་རྣམས་ལ་ཆེ་བའི་ཡོན་ཏན་གྱི་སྒོ་ནས་བསྟོད་པའི་གླུ་ཆོས་ཉིད་ཀྱི་རང་སྒྲའི་དབྱངས་སུ་གྲགས་པར་མོས་ལ་བསྟོད་པ་གླུ་དྲུག་བླང་པའོ། །ཁྲོ་བོ་ལའང་ཕལ་ཆེར་དེ་དང་འདྲ་བ་ལས། དགུ་པའི་གནས་སུ་རཀྟ་ཚར་གསུམ་སྟེ་ལྷ་ཚོགས་རྣམས་མཉེས་པར་བྱ་བའི་ཕྱིར་དང་། ཞིང་བཅུ་སོགས་གདུག་ཅན་རྣམས་བརླག་པའི་ཕྱིར་དང་། ཁམས་གསུམ་གྱི་གདུལ་དཀའི་འགྲོ་བ་རྣམས་ཐུགས་རྗེས་སྒྲོལ་བའི་ཕྱིར་གོ་རིམ་བཞིན་དུ་རཀྟའི་དྭངས་མ་ཡེ་ཤེས་ཀྱི་བདུད་རྩི་དང་། ཁུ་བ་བསྒྲལ་བྱར་དང་། རྩིགས་མ་དུག་གསུམ་ཤ་རུས་ཀྱི་རྣམ་པར་བྱས་ཏེ་འབུལ་བའི་ཆེད་དུ་རཀྟ་ལན་གསུམ་སྦྲེང་བའོ། ༈ །ཚོགས་ཀྱི་སྐབས་སུ། ཕུར་པ་བཀའ་མའི་འགྲེལ་ཆེན་ལས་གསུངས་པ་ལྟར། ཚོགས་པ་གསུམ་ནི། དགའ་ལྡན་ལྷ་ཡི་ཚོགས་གསང་སྔགས་ནང་གི་ལྷ་མཐུན་པ། དགྱེས་ལྡན་མི་ཡི་ཚོགས་དམ་ཚིག་རྩ་བ་གཅིག་པ། འབྱོར་ལྡན་ཡོ་བྱད་ཀྱི་ཚོགས་བཟང་ལ་གྱ་ནོམ་པའོ། །གསོག་པ་གསུམ་ནི། གནས་དུར་ཁྲོད་ལྟ་བུའི་ཚོགས་ཁང་དུ། གྲུབ་པ་ཐོབ་པའི་བླ་མ། ལྷ་གྲངས་མཉམ་པའི་རྣལ་འབྱོར་ཕོ་མོ། འདོད་ཡོན་ལྔའི་ལོངས་སྤྱོད་ཚང་བར་གསོག་པའོ། །བསང་བ་གསུམ་ནི། བདག་ཉིད་ཀྱི་ཉེས་སྐྱོན། མཆེད་ལྕམ་གྱི་ཉམས་གྲིབ། ཚོགས་ཀྱི་མ་དག་པ་བསང་བའོ། །སྦྱང་བ་གསུམ་ནི། རཾ་ཡཾ་ཁཾ་ལས་མེ་ཆུ་རླུང་བྱུང་སྟེ་སྨེ་བཙོག་སྦྱང་བའོ། །བརླབ་པ་གསུམ་ནི། འབྲུ་གསུམ་གྱིས་བདུད་རྩིའི་རང་བཞིན་དུ་བརླབ་པའོ། །བསྐྱེད་པ་གསུམ་ནི། མཆོད་པའི་དུས་སུ་འདོད་ཡོན་ལྔ། བཤགས་པའི་དུས་སུ་ཡེ་ཤེས་ལྔ། བསྟབ་པའི་དུས་སུ་དགྲ་བགེགས་ཀྱི་ཤ་ཁྲག་ཏུ་བསྐྱེད་པའོ། །ཡུལ་གསུམ་ནི་བླ་མ་ཡི་དམ་མཁའ་འགྲོ་ལ་འབུལ་བའོ། །དམ་ཚིག་གསུམ་ལ་གསུམ་ཚན་བཞི་ལས། མི་བྱ་བ་གསུམ་ནི་རང་སེམས་འཁྲུགས་པའི་རྩོད་པ། གཟུང་འཛིན་སྐྱེ་བའི་འཁྲུལ་གཏམ། ཐེག་པ་འོག་མའི་འབག་རྩོག་གི་རྟོག་པ་མི་བྱའོ། མི་སྨྲ་བ་གསུམ་ནི། ཚོགས་རྫས་གཞན་ལ་ཆེ་སྟེ་བདག་ལ་ཆུང་། ན་ནིང་བཟང་སྟེ་ད་ལོ་ངན། ཁར་སང་མང་སྟེ་དེ་རང་ཉུང་ཞེས་མི་སྨྲ་བའོ། །མི་བསམ་པ་གསུམ་ནི། ཚོགས་རྫས་ཀྱི་དངོས་པོ་མཐོང་བའི་ཚེ་བཟའ་སྙམ་བཏུང་སྙམ་ཞིམ་སྙམ་དུ་མི་བསམ་པའོ། །མི་འབྲལ་བ་གསུམ་ནི། ལུས་ལྷ། ངག་སྔགས། སེམས་ཏིང་ངེ་འཛིན་དང་མི་འབྲལ་བར་བྱའོ། །ཞེས་སོ། །ཚིམ་པ་དྲུག་ལྡན་ནི། ཚོགས་ཞིང་རྣམས་མཆོད་པས་ཚིམ་པ། རྣལ་འབྱོར་པ་རྣམས་རྡོ་རྗེའི་བཟའ་བཏུང་གིས་ཚིམ་པ། ཡེ་ཤེས་ཀྱི་འཁོར་ལོ་བདུད་རྩིའི་དྭངས་མས་ཚིམ་པ། ལུས་དཀྱིལ་གྱི་ལྷ་རྣམས་བདེ་སྟོང་ཡེ་ཤེས་ཀྱིས་ཚིམ་པ། ཕྱིི་ནང་གི་མཁའ་འགྲོ་མ་རྣམས་གླུ་དབྱངས་ཀྱིས་ཚིམ་པ། དྲེག་པ་ལས་བྱེད་ཀྱི་འབྱུང་པོ་རྣམས་གཏོར་མས་ཚིམས་པའོ། ༈ །སྔགས་མཚན་བཅས་ཐུན་མོང་པའི་ལམ་གྱིས་དབུ་མར་གཞུག་པའི་ཐབས་ལས་དཔེ་དོན་གྱི་ཡེ་ཤེས་འདྲེན་པར་བྱེད་པ་ལའང་། གྲོལ་ལམ་བླ་མའི་མན་ངག་རྫོགས་པ་ཆེན་པོའི་ངོ་སྤྲོད་ལ་བརྟེན་དགོས་ཏེ། དེ་ལས་གཞན་དུ་རླུང་དབུ་མར་ཞུགས་ཀྱང་ཡེ་ཤེས་ངོས་མི་ཟིན། དེ་མ་ཟིན་ན་རླུང་དབུ་མར་ཞུགས་ཀྱང་ཅི་ཞིག་ཕན། དོན་འོད་མཚོན་པའི་སྒོར་མ་གྱུར་ན་རྩ་རླུང་ཐིག་ལེ་སོགས་ཟག་བཅས་འཇིག་རྟེན་པའི་ལམ་གྱི་རོལ་པ་སོགས་དང་ཁྱད་མེད་པར་རྒྱ་གར་གྱི་སློབ་དཔོན་ཨིནྟྲ་བོ་དྷི་དང་བོད་ཀྱི་རོག་བདེ་གཤེགས་ཆེན་པོ་སོགས་གསུངས། དེས་ན་ཐབས་ལམ་པ་དག་གིས་མི་ཤེས་སུ་མི་རུང་བའི་གནད་ནི། སློབ་དཔོན་ཤྲཱི་སེང་ཧ་ནས་བཻ་རོ་ལ་བརྒྱུད་པའི་གཤིན་རྗེའི་རྫོགས་རིམ་མཐར་ཐུག་ཐབས་ལམ་གནད་ཀྱི་ལྡེའུ་མིག་ལས། རྟེན་གཞལ་ཡས་ཁང་ལུས་གནས་རྩ་ཡི་ཕོ་བྲང་ན། ནང་གི་མཁའ་འགྲོ་རྩ་ཡི་གེ་ཚུལ་དུ་བཞུགས། རྩ་གནས་ཡི་གེའི་ཕོ་བྲང་ན་དེ་ཁོ་ན་ཉིད་སྟོང་ཉིད་ཡེ་ཤེས་ཀྱི་མཁའ་འགྲོ་བདེ་སྟོང་གཉིས་མེད་ཀྱི་ཡེ་ཤེས་སྲོག་མི་ཤིགས་པའི་ཐིག་ལེ་བཞུགས་སོ། །དེ་ཡང་ལུས་གང་ན་གནས་པ་ན་རྩ་གནས། རྩ་གང་ན་གནས་པ་ན་རླུང་གནས། རླུང་གང་དུ་གནས་པ་ན་ཐིག་ལེ་གནས། ཐིག་ལེ་གང་དུ་གནས་པ་ན་སྤྲོས་མེད་ལྷན་ཅིག་སྐྱེས་པའི་ཡེ་ཤེས་གནས་སོ། །ཞེས་སོགས་ལུས་གནས་རྩ་ཡི་ཆགས་ཚུལ། རྩ་གནས་ཡི་གེ་སྤྲིན་གྱི་འཁོར་ལོ། དེ་ན་ལྷ་གཙོ་འཁོར་སོགས་ཇི་ལྟར་གནས་པའི་ཚུལ་རྣམས་གསལ་བར་གསུངས་ཤིང་། དེ་ལས་རྩ་ཐམས་ཅད་སྲོག་ཤིང་གི་རྩ་གསུམ་ལ་འདུས་ཤིང་། དེ་ཡང་རང་བཞིན་གཉུག་མའི་ཨ་བ་དྷུ་ཏི་གཉིས་མེད་སྟོང་པའི་རྩ་ཡིན་ཏེ་ཅིར་ཡང་མ་གྲུབ་པ་སྤྲོས་བྲལ་ཆོས་ཀྱི་སྐུ། བཤད་ཚོད་ཀྱི་ཨ་བ་དྷུ་ཏི་ལུས་དཀྱིལ་སྒལ་ཚིགས་མདུན་སྲོག་ཤིང་ཀ་བ་ལྟར་གནས་ཏེ་དབྱིབས་དཀར་འཚེར་རླུང་དང་ཐིག་ལེ་གང་གིས་ཀྱང་དབེན་པ། དེའི་གཡས་སུ་རོ་མ་དམར་མོ་རྡུལ་དང་། གཡོན་རྐྱང་མ་དཀར་མོ་ཁུ་བས་གང་བ། རྩ་གསུམ་པོ་དེའང་སྐུ་གསུང་ཐུགས་རྡོ་རྗེ་སྟེ། རྐྱང་མ་སྐུ། རོ་མ་གསུང་། ཀུན་འདར་མ་ཐུགས་རྡོ་རྗེར་གསུངས་པ་དང་། སྐུ་སོགས་དེ་ཐམས་ཅད་གཞི་དངོས་པོ་གཤིས་ཀྱི་གནས་ལུགས་རང་བྱུང་གི་ཡེ་ཤེས་ཕྱོགས་གཅིག་ཏུ་མ་ངེས་ཏེ། རྒྱ་གར་ཡང་མ་ཆད། ཕྱོགས་གང་དུའང་མ་ལྷུང་བའི་གནད་ཀྱི་སྣང་ཚུལ་ཡང་ངེས་མེད་དུ་ཤར་བའི་ཕྱོགས་གཅིག་ཏུ་ཆད་པ་མེད་པ་དང་། རྩ་ཡིག་དེ་རྣམས་ཀྱང་རང་རང་གི་བག་ཆགས་དང་མཐུན་པར་ཤར་ཏེ། རྒྱ་གར་ལ་རྒྱ་ཡིག་བོད་ལ་བོད་ཡིག་ལྷ་ལ་ལྷའི་ཡི་གེ་སོགས་སུ་གནས་པར་བཤད། གཞན་ཡང་རླུང་དང་ཐིག་ལེའི་རྣམ་བཞག་རྒྱས་པར་གསུངས་ཤིང་། དེ་ཁོ་ན་ཉིད་སྟོང་ཉིད་ཡེ་ཤེས་ཀྱི་མཁའ་འགྲོའི་བཞུགས་ཚུལ་ཡང་། རྩ་སྟོང་ཕྲག་བདུན་ཅུ་རྩ་གཉིས་ནི་རྟེན་བྱེད་པས་སྐུ་རྡོ་རྗེ། རྩ་ལ་གནས་པའི་ཡི་གེ་རྣམས་ནི་བརྡ་སྤྲོད་པས་གསུང་། ཡི་གེའི་ཕོ་བྲང་ན་རླུང་དང་ཐིག་ལེ་དཀར་དམར་ཐམས་ཅད་རང་གསལ་བར་བྱེད་པས་ཐུགས་རྡོ་རྗེ། དེས་ན་སྣང་སྲིད་འཁོར་འདས་ཀྱིས་བསྡུས་པའི་ཆོས་ཐམས་ཅད་རང་གི་ལུས་ལ་རྫོགས་པར་གནས་པ་ལས་གཞན་གུད་ན་མེད་དོ། །ཞེས་དང་། དེ་ལས་རླུང་ལ། འཕེན་པ་ལས་ཀྱི་རླུང་ནི་དྭངས་མ་ཕྲ་བའི་སྲོག་འཛིན་གྱི་རླུང་གིས་ཡིད་ཀྱི་རྣམ་ཤེས་ཀྱི་རླུང་བསྐྱེད། ཁ་ནང་དུ་བལྟས་ནས་རང་རྒྱུད་ཀྱི་རྩ་ལ་རྒྱུས་པས་ང་བདག་ཏུ་འཛིན་པ་སྐྱེ། ཉོན་མོངས་པའི་འཚུབ་མང་། ཁ་ཕྱིར་བལྟས་ཏེ་རྟོག་ངན་སྣ་ཚོགས་འགྱུས་ནས་ལས་སྣ་ཚོགས་བསགས་པས་འཁོར་བར་འཕེན་པར་བྱེད། གསལ་བ་ཡེ་ཤེས་ཀྱི་རླུང་ནི་རིག་པའི་རླུང་ཡིན་ཏེ། རིག་པ་གསལ་བ་ཅིར་ཡང་མ་འགགས་པར་གསལ་ལ་གང་གིས་ཀྱང་སྒྲིབ་པ་མེད་པར་གསལ་བ་སྟེ། གནས་ནི་ཀུན་འདར་མ་ན་གནས་ཏེ་མཉམ་རྒྱུའི་སྐབས་རིག་པ་རྟོག་མེད་དྭངས་ཆ་དང་བཅས་ཏེ་འགྱུ་བ་ཡིན། དེ་ངོས་བཟུང་བ་ལ་འབྱུང་བ་མཉམ་པར་གནས་པ་གཅིག་ལ། རླུང་ཕྱིར་འགྲོ་ནང་འགྲོའི་ཁུག་པ་གཅིག་ལ་གཅིག་ཏུ་བགྲང་བའི་ཉིན་ཞག་ཕྲུགས་གཅིག་ལ་ཉི་ཁྲི་ཆིག་སྟོང་དྲུག་དང་བཅུ་རྒྱུ་བ་ལས། གཡས་ནས་གཡོན་དུ་འཕོ་བ་ལ་དང་། གཡོན་ནས་གཡས་སུ་འཕོ་བའི་སྐབས་འཕོ་མཚམས་བཅུ་གཉིས་པོ་མཉམ་གནས་ཀྱི་རླུང་རྒྱུ་བས་བཅུ་གཉིས་པོ་སྙིགས་མའི་རླུང་ཡིན། བཅུ་གསུམ་པ་མཉམ་གནས་ཡེ་ཤེས་ཀྱི་རླུང་དབུས་ཀུན་འདར་མ་ན་རྒྱུ་བ་ཡིན་ནོ། །རིག་པའི་རླུང་ལ་དྭངས་སྙིགས་གཉིས་ལས། དྭངས་མའི་རླུང་ནི། གནས་དྭངས་མ་ལྔ་འདུས་ཀྱི་དབུས། ངོ་བོ་སྲོག་མི་ཤིགས་པའི་ཐིག་ལེ། བྱང་ཆུབ་ཀྱི་སེམས་སྤྲོས་བྲལ་ཆོས་ཀྱི་སྐུ། ལམ་ཀུན་འདར་མ་ནས་རྒྱུ་དུས་འཕོ་མཚམས་བཅུ་གསུམ་པ་ལའོ། །སྙིགས་མའི་རླུང་གནས་གསང་འཁོར། ངོ་བོ་རྣམ་ཤེས་ཚོགས་བརྒྱད། ལམ་རྩ་འདབས་བརྒྱད། འཁོར་བརྒྱད་ཁྲི་བཞི་སྟོང་དུ་གསུངས། དེ་ལས་དྭངས་མའི་རླུང་འཕོ་མཚམས་བཅུ་གསུམ་པ་ངོས་བཟུང་བ་ནི་རླུང་གཡས་གཡོན་གཉིས་ནས་མཉམ་དུ་ཤ་ར་ར་རྒྱུ་དུས། རིག་པ་གསལ་སྟོང་རྟོག་པ་མེད་པ། ངོས་བཟུང་ཞེས་ཀྱང་སྟོང་པ་སྤྲོས་མེད་ནམ་མཁའ་ལྟ་བུའི་ཉམས་སྔར་བས་ལྷག་པའི་ཤེས་པ་གཅིག་ཤར་བ་དེ་ནི་ནང་གི་སྒྲ་གཅན་འཛིན་རྩ་དབུ་མའི་ནང་དུ་ཉི་ཟླ་རོ་རྐྱང་གཉིས་ཀྱི་རླུང་ཚུད་ནས་རྒྱུ་བའི་རྟགས་ཡིན། དེ་ནི་སངས་རྒྱས་ཀྱི་དགོངས་པ་དངོས་སུ་ཤར་བ་ཡིན། སེམས་ཅན་ཐམས་ཅད་ལ་ཉིན་ཞག་ཕྲུགས་གཅིག་ལ་ཐེབས་རེ་མི་འཆར་མི་སྲིད་ཀྱང་བླ་མའི་མན་ངག་མེད་པས་ངོས་མི་ཟིན། ཡུན་ཀྱང་འགའ་ཞིག་ལ་སེ་གོལ་བདུན་གྱི་ཡུན་ཙམ་ལས་མི་འཆར་བའང་ཡོད། བསོད་ནམས་བསགས་པ་འགའ་ཞིག་ལ་ཟན་རེ་ཟ་ཡུན་ཙམ་ལ་འཆར། སྲོག་རྩོལ་ལ་གནད་དུ་བསྣུན་པའི་རྣལ་འབྱོར་པ་ལ་ཉི་མ་ཕྱེད་དང་ཟླ་བ་དང་ལོ་ལ་སོགས་པར་མི་གཡོ་བའི་ཉམས་ཤར་ནས་བརྟན་པ་ཐོབ་པ་ཡོད། རླུང་སྒོམ་པ་དང་། བདེ་བ་སྒོམ་པ་དང་། དེ་བཞིན་དུ་སྒྱུ་ལུས། ཞི་གནས། འོད་གསལ་སྒོམ་པ་སོགས་ཐམས་ཅད་འདི་ངོས་ཟིན་ཅིང་རྟོགས་པར་བྱ་བ་ལས་མེད། འདི་ངོས་ཟིན་ཞིང་རྟོགས་པའི་དུས་རླུང་ཨ་བ་དྷཱུ་ཏིར་ཚུད་པ་ཡིན། འདི་ནི་གསང་བའི་ངེས་པའོ། །ནང་གི་ངེས་པ་ནི་རླུང་གཡས་གཡོན་གཉིས་ནས་མཉམ་དུ་རྒྱུ་བའི་དུས་སོ། །ཕྱིའི་ངེས་པ་ནི། ཟླ་བ་གཟས་ཟིན་དུས་དྭངས་མ་ཀུན་འདར་གྱི་རླུང་རྒྱུ་བའོ། །དེ་ལྟར་ཕྱི་ནང་གསང་བའི་རྟགས་གསུམ་གྱི་ཡེ་ཤེས་ཀྱི་རླུང་ངོས་བཟུང་ནས། ལུས་གནད་བསྲང་། མ་ནིང་གི་རླུང་དལ་ལ་འཇམ་པར་བཟུང་། མ་བསྒོམ་པའི་མངོན་སུམ་གསལ་བའི་ཡེ་ཤེས་ཀྱི་རླུང་ཐུག་ཕྲད་གསུམ་དུ་ཤར་བ་དེ། སྒོམ་པའི་མངོན་སུམ་བཞག་ཕབ་གསུམ་གྱི་ཀློད་ལ་བཞག་གོ །འདིའི་གནད་ངོས་ཟིན་ན་བསྐལ་པར་བསགས་པའི་སྒྲིབ་པའང་སྐད་ཅིག་གཅིག་གིས་འདག་ལ། སངས་རྒྱས་ཀྱི་དགོངས་པ་ཡང་འདིས་མངོན་སུམ་དུ་གཏན་ལ་ཕེབས་པ་ཡིན་ནོ། །གསུངས། དེས་ན་གནད་འདི་ངོས་ཟིན་ན་རིག་པ་རང་བབས་སུ་བཞག་པས་རླུང་དབུ་མར་མི་ཞུགས་པ་མ་ཡིན་ཏེ། དུས་འཁོར་གྱི་སོར་བསམ་དང་རྫོགས་ཆེན་གྱི་བཞག་ཐབས་རྣམས་བཞིན་ནོ། །དེ་བཞིན་ཐབས་ལམ་དངོས་གཞིའི་ཉམས་ལེན་སྐབས་མེད་དུ་མི་རུང་བའི་མན་ངག་གི་ངོ་སྤྲོད་དྲུག་གསུངས་ཏེ། དང་པོ་མི་བཏང་བ་གསུམ་གྱི་སྲོག་བཟུང་བ་ནི། ཐིག་ལེ་རྡོ་རྗེའི་ཁ་ནས་མི་བཏང་། ཡིད་ཆགས་པའི་དབང་དུ་མི་བཏང་། ལྟ་སྒོམ་བློ་ཡུལ་དུ་མི་བཏང་བའོ། །གཉིས་པ་བཅད་པ་གསུམ་གྱི་འཁོར་བའི་རྒྱུན་ལམ་བཅད་པ་ནི། འཇིག་རྟེན་པའི་རིགས་རྒྱུད་བཅད། འདོད་ཆགས་ཀྱི་གཞི་རྩ་བཅད། འཁོར་བའི་རྒྱུན་ལམ་བཅད་པ་སྟེ། དེ་གསུམ་རིམ་པར་ཐིག་ལེ་མ་ཤོར་ན། ཆགས་རྟོག་རང་སར་གྲོལ་བ། རང་བྱུང་གི་ཡེ་ཤེས་མངོན་དུ་རྟོགས་པས་སྐྱེ་ཤི་འཁོར་བ་ལས་གྲོལ་བའོ། །གསུམ་པ་དགའ་བཞི་ངོས་བཟུང་བ་ལ་དབྱེ་བ་བཅུ་དྲུག་ལས། གོ་རིམ་ལ་ལྟོས་པའི་དགའ་བ་བཞི་ནི། ཐབས་ཤེས་ཀྱི་འདོད་ཡོན་ལྔ་ལ་སློབ་པའི་དུས་སུ་གཟུགས་ནས་རེག་བྱའི་བར་གྱི་བདེ་ཉམས་ཅི་སྐྱེས་ཐམས་ཅད་དགའ་བ། མཁའ་གསང་རྩ་སྤྲད་དུས་ཀྱི་བདེ་བ་ཆེར་འབར་བ་མཆོག་དགའ། ནང་སྤྲད་གྲུབ་པའི་དུས་ཀྱི་བདེ་བ་ལྷན་ཅིག་སྐྱེས་དགའ། ཁ་སྦྱོར་བཞི་འཛོམས་པའི་དུས་བདེ་བ་ལ་མི་རྟོག་པ་དང་ལྡན་པ་དགའ་བྲལ་གྱི་ཡེ་ཤེས་སོ། །གནས་ལ་ལྟོས་ནས་བཞག་པའི་དགའ་བཞི་ལའང་གཉིས། ༡ཕྱིའི་གནས་ལ་ལྟོས་པ། ལུས་ཁོལ་བུར་བདེ་བ་སྐྱེ་བ་དགའ་བ། ལུས་ཕལ་ཆེར་ལ་ཁྱབ་སྙམ་བྱེད་པ་མཆོག་དགའ། ལུས་ཐམས་ཅད་ལ་བདེ་བ་སྐྱེས་པ་དགའ་བྲལ། ཕྱི་ནང་གི་དངོས་པོ་གར་བལྟས་ཀྱང་བདེ་ཉམས་འབའ་ཞིག་སྐྱེས་པ་ལྷན་ཅིག་སྐྱེས་དགའི་ཡེ་ཤེས་སོ། ༢། ནང་གི་དགའ་བ་ལ་ལྟོས་ནས། ཡབ་ཡུམ་སྙོམ་པར་ཞུགས་པའི་སྐབས་ཐིག་ལེ་སྤྱི་བོ་ནས་མགྲིན་པར་བབ་དུས་ཀྱི་བདེ་བ་ཅི་སྐྱེས་དགའ་བ། དེ་བཞིན་སྙིང་ཁར་བབ་པ་མཆོག་དགའ། ལྟེ་བར་དགའ་བྲལ། གསང་བར་ལྷན་ཅིག་སྐྱེས་དགའ་འོ། ༣། སྤང་བྱ་ལ་ལྟོས་ནས་བཞག་པའི་དགའ་བཞི་བདེ་བ་ལ་སེམས་ཟིན་ཏེ་གཟུང་འཛིན་གྱི་རྟོག་པ་རགས་རིམ་འགག་པ་དགའ་བ། དེ་བཞིན་བདག་འཛིན་གྱི་རྟོག་པ་རགས་རིམ་འགག་པ་མཆོག་དགའ། རང་དང་ཕྱག་རྒྱར་འཛིན་པའི་རྣམ་རྟོག་འགག་པ་དགའ་བྲལ། ཉམས་ཐམས་ཅད་རང་སྣང་རང་སྟོང་རང་རིག་ཏུ་རྟོགས་ཏེ་ཟག་བཅས་ཀྱི་དགའ་བདེ་རང་ཁ་མའི་འཛིན་རྟོགས་འགགས་པ་ལྷན་ཅིག་སྐྱེས་དགའི་ཡེ་ཤེས་སོ། ༤། རང་རང་གི་ངོ་བོའི་སྒོ་ནས་བཞག་པ་ནི། བདེ་ཉམས་ཆུང་བ་དགའ་བ། ཆེར་འཕེལ་བ་མཆོག་དགའ། བདེ་བ་ལ་མི་རྟོག་པ་དགའ་བྲལ། བདེ་སྟོང་གཉིས་མེད་རང་རིག་ཡེ་ཤེས་སུ་རྟོགས་པ་ལྷན་ཅིག་སྐྱེས་དགའི་ཡེ་ཤེས་སོ། །

༈ ཇི་ལྟར་བཟླ་བའི་ཚུལ་ནི། ངག་བཟླས་སྐད་གསང་མཐོན་པོར་བཟླ་བ་དང་། མཆུ་དང་ལྕེ་རྩེ་འགུལ་ཙམ་གྱིས་ཤུབ་བུར་བཟླ་བ་དང་། རླུང་བཟུང་སྟེ་སྔགས་ཀྱི་གཟུགས་དང་སྒྲ་ལ་སེམས་གཏད་པ་འགོག་བཟླས་དང་། རླུང་འཛིན་པ་ཙམ་ཡང་མི་བྱ་བར་ཡིད་ཁོ་ནས་སྔགས་ཀྱི་གཟུགས་སམ་སྒྲ་གདངས་དྲན་པ་ཡིད་བཟླས་དང་། ས་བོན་གྱི་ནཱ་ད་ལས་དབུགས་ཕྱིར་དབྱུང་བ་དང་ལྷན་ཅིག་ཧཱུྃ་གི་སྒྲས་སྐུའམ་འོད་ཟེར་འཕྲོས་ཏེ་དོན་གཉིས་བསྒྲུབ། ནང་དུ་འཇུག་པའི་ཚེ་ༀ་གྱི་སྒྲས་ཚུར་བསྡུ། གནས་པའི་ཚེ་ཨཱཿའི་སྒྲས་ནཱ་ད་ལ་ཐིམ་པའམ། ཡང་ན་རང་སྔགས་དང་སྦྱར་ཏེ་རྡོ་རྗེའི་བཟླས་པ་བྱ་བ་སོགས་ཀྱང་ཡོད་དོ། །བཟླ་ཚུལ་དངོས་ནི། ཤེས་ན་ཡི་གེའི་སྐྱེ་གནས་སྒྲའི་འབྱིན་ཚུལ་ལྕེ་མཆུའི་བྱེད་རྩོལ་སོགས་མ་འཁྲུགས་པར། ཡི་གེ་རེ་རེ་ནས་ཤིན་ཏུ་མྱུར་བ་དང་ཧ་ཅང་བུལ་བ་མ་ཡིན་པ་དང་། ཡི་གེ་རིང་པོ་རྣམས་ཐུང་བ་དང་། ཐུང་ངུ་རྣམས་རིང་བ་མ་ཡིན་པ་དང་། ཡི་གེ་གཞན་ལྷག་པའམ། ཡི་གེ་དེ་ཉིད་ཆད་པ་མ་ཡིན་པ་དང་། གཞན་ཡང་སྒྲ་ཧ་ཅང་ཆེ་བ་དང་། ཆུང་བ་ལ་སོགས་པའི་སྐྱོན་རྣམས་སྤངས་ལ་ཐུན་ནང་དུ་གཞན་དུ་གཏམ་སྨྲ་བ་དང་གླལ་བ་དང་ལུ་བ་སོགས་གཞན་གྱིས་བར་མ་ཆད་པར་བཟླ་བར་བྱ་སྟེ། རྔམ་གློག་ལས། སྒྲ་ཆེན་མ་ཡིན་ཆུང་བ་མིན། །མགྱོགས་པར་མ་ཡིན་བུལ་བར་མིན། །དྲག་པོར་མ་ཡིན་ཞན་པར་མིན། །ཡིག་འབྲུ་ཡན་ལག་ཉམས་པས་མིན། །ཡེངས་བ་མ་ཡིན་སྨྲ་བཞིན་མིན། །གླལ་སོགས་བར་དུ་ཆོད་པས་མིན། །ཞེས་གསུངས། དེ་ཡང་སྔགས་ཀྱི་སྒྲ་དོན་ཤན་སྦྱར་བ་ཤེས་ན་དོན་གྱི་གཟུངས་འགྲུབ་པ་སོགས་ཀྱི་དགོས་པ་ཡོད་དེ། རྒྱུད་ལས། དོན་ལ་ཐེ་ཚོམ་མེད་པ་ཡི། །མཁས་པ་ལ་ནི་དངོས་གྲུབ་ཉེ། །ཞེས་གསུངས། དེ་ལྟར་སྦྱར་མ་ཤེས་ཀྱང་དད་མོས་རྩེ་གཅིག་པས་བཟླས་ན་དངོས་གྲུབ་ཆེན་པོ་ཇི་ལྟ་བ་བཞིན་འབྱུང་སྟེ། ཡང་ན་བླུན་པོ་དད་པ་ཅན། །དེ་ལ་སྦྱོར་བའི་དངོས་གྲུབ་ཉེ། །ཞེས་གསུངས་ཤིང་། སྔོན་གྱི་གྲུབ་ཐོབ་འདར་ཕྱར་བ་དང་ས་པཎ་གྱིས་འཕྲོག་བྱེད་བཏུལ་བའི་ལོ་རྒྱུས་ཀྱིས་ཀྱང་ཤེས་སོ། །གལ་ཏེ་སྔགས་རྒྱ་སྐད་དུ་ཡོད་པ་བོད་སྐད་དུ་བསྒྱུར་བ་དང་། རྒྱ་བོད་འདྲེས་པར་ཡོད་པའི་བོད་སྐད་རྣམས་རྒྱ་སྐད་དུ་བསྒྱུར་བ་དང་། མཁའ་འགྲོའི་བརྡ་སྐད་སོགས་གཞན་གྱི་སྐད་དུ་ཡོད་པ་བརྡ་སྤྲོད་པའི་ལུགས་དང་བསྟུན་ནས་གསར་དུ་བཅས་ཏེ་བཟླས་ན་ནི་དངོས་གྲུབ་མེད་དོ། །ཅིའི་ཕྱིར་ན་སྔོན་གྱི་གསང་སྔགས་གསུངས་པ་པོ་ཉིད་ཀྱིས་སྐད་དེ་དང་དེར་བྱིན་གྱིས་བརླབས་ཀྱིས། གསར་དུ་བཅོས་ཤིང་བསྒྱུར་བ་དེར་མ་ཡིན་པའི་ཕྱིར་གང་གསུང་པ་པོ་དེའི་བདེན་ཚིག་འགྲུབ་པར་མི་འགྱུར་བའི་ཕྱིར་རོ། །སྤྱིར་ཡང་གསང་སྔགས་ཀྱི་ཆོ་ག་སོགས་ལ་དཔྱད་པས་དངོས་གྲུབ་རིང་བར་བཤད་དེ། རྟོག་ཅིང་དཔྱོད་པའི་རྟོག་གེ་མཁན། །དེ་ལ་དངོས་གྲུབ་ཤིན་ཏུ་རིང་། ཞེས་དང་། རྫས་དང་སྔགས་ཀྱི་སྦྱོར་བ་ལ། །དཔྱད་ན་དངོས་གྲུབ་མི་འབྱུང་སྟེ། །གལ་ཏེ་ཡིད་གཉིས་ཟ་གྱུར་རམ། །བསམ་པ་འགྱུར་རམ་དད་པ་ཉམས། །དེ་ཚེ་དངོས་གྲུབ་ཉེ་བ་ཡང་། །ཕྱིར་ལྡོག་འགྱུར་བ་གདོན་མི་ཟ། །ཞེས་གསུངས། དེས་ན་དད་མོས་རྩེ་གཅིག་པས་བཟླ་བར་གཅེས་སོ། །སྔགས་ཕྲེང་བཀོད་ཚུལ། དེ་ཡང་སངས་རྒྱས་ཀྱི་ཡེ་ཤེས་དང་རྣམ་འཕྲུལ་ཚད་མེད་པའི་གསང་བ་ཟབ་མོ་གདུལ་བྱའི་ཡུལ་ལ་མཉམ་པོར་འཇུག་པ་ལས་རྒྱ་བོད་ཀྱི་ཡིག་གཟུགས་ཀྱི་ཁྱད་པར་ཙམ་ལ་བྱིན་གྱིས་རློབ་པར་ནུས་མི་ནུས་སོགས་ཀྱི་དབྱེ་བསལ་མ་དམིགས་པའི་ཕྱིར་གཤར་གཟབ་གང་རུང་གི་བློ་ལ་འཆར་བ་གང་བདེར་བྱ་བ་ལས་གཞན་དུ་བསྒྱུར་མི་དགོས་གསུངས། རྩ་བའི་ཐུགས་སྲོག་ས་བོན་གྱི་ཡི་གེ་དེའི་མདུན་ནས་བརྩམས་ཏེ་བཟླས་བྱའི་སྔགས་ཀྱི་ཡིག་འབྲུ་རྣམས་ཤིན་ཏུ་ཕྲ་བ་སྤུས་བྲིས་པ་བཞིན་གསལ་ཞིང་འབར་བའི་ཕྲེང་བས་བསྐོར་བ་སྟེ། དེ་ཡང་རང་གཞུང་དང་བསྟུན་སྔགས་ཕྲེང་གཡས་སུ་འཁོར་དགོས་པ་རྣམས་སྔགས་ངོ་ཕྱིར་བསྟན་པ་དང་། ཕྱི་ནས་བཀླག་ཕྱོགས་ལྟར་ཡིག་འབྲུ་རྣམས་ལངས་ཐབས་སུ་གཡོན་དུ་བཀོད་པ་ཕྲེང་བ་ལྟར་འཁོར་བའི་མགོ་འདྲེན་ༀ་ལྟ་བུ་དང་ཧཱུྃ་ཧྲཱིཿསོགས་མཇུག་གི་སྔགས་འབྲུ་ཐུག་པ། དེ་ཡང་རིང་བའི་རིགས་ལ་མདུན་ནས་ཡིག་མགོ་བརྩམ་པའི་སྔགས་མགོ་ནང་བསྟན་དང་སྔགས་མཇུག་ཕྱི་རོལ་དུ་ཐད་ཀར་འགྲིགས་པའི་རིམ་པ་གཉིས་གསུམ་སྦྲུལ་འཁྱིལ་བ་ལྟར་བསྒོམས་ལ་བཟླས་པའི་དུས་གཡས་སུ་བཀླགས་ཐབས་སུ་འཁོར་དགོས་པ་ཡིན། སྔགས་ཕྲེང་གཡོན་དུ་འཁོར་དགོས་པ་རྣམས་ཐུགས་སྲོག་གི་མདུན་ནས་སྔ་མ་ལྟར་ཡིག་འབྲུ་རྣམས་ལངས་སྟབས་སུ་སྔགས་ངོ་ནང་བསྟན། ནང་ནས་བཀླགས་ཕྱོགས་སུ་གཡས་བསྐོར་དུ་བཀོད། སྔགས་རིང་རྣམས་ཕྱི་ནང་བསྐོར་ལུགས་སྔ་མ་ལྟར་བྱ། བཟླ་བའི་སྐབས་གཡོན་དུ་འཁོར་དགོས་པ་ཡིན། སྔགས་ཕྲེང་གཡས་གཡོན་དུ་འཁོར་ཚུལ། སྤྱིར་བཏང་ལྷ་ཡབ་ཀྱི་རིགས་རྣམས་གཡས་འཁོར་དང་ཡུམ་རྣམས་ལ་གཡོན་འཁོར་ལྟ་བུར་འདུག་ཀྱང་མཐའ་གཅིག་ཏུ་ངེས་པ་མེད་པས་རང་གཞུང་དང་བསྟུན། ཡང་སྔགས་ཕྲེང་དངོས་འཁོར་མི་དགོས་པར་དེ་ལས་འོད་ཟེར་སྤྲོ་བསྡུ་སོགས་བྱེད་པའི་རིགས་ལ་སྔགས་ངོ་བསྟན་ཕྱོགས་གོང་ལས་བཟློག་ཏེ་བཀོད་ལུགས་ཀྱིས་གཡས་གཡོན་བསྐོར་ཕྱོགས་ཉིད་གཙོ་ཆེ་བས་དེ་ལྟར་སྐབས་དང་སྦྱར་ཤེས་པར་བྱའོ། །ཛབ་དགོངས་བཞི་ལས། དང་པོ་བསྙེན་པའི་ཡན་ལག་བཀོད་པའི་བཟླས་པའམ་ཟླ་བ་སྐར་ཕྲེང་ལྟ་བུ་ནི། ས་བོན་དང་སྔགས་ཕྲེང་འོད་ཟེར་འཕྲོ་བ་ལ་ཡང་ཡང་སེམས་བཟུང་། དེ་ནས་རིམ་པར་ལྷ་ཐམས་ཅད་ཀྱི་ཞལ་ནས་སྔགས་སྒྲ་སྒྲོགས་པ་དང་སྔགས་འབྲུ་རྣམས་ཀྱང་རང་སྒྲ་དང་བཅས་གདན་ལས་ཅུང་ཟད་འཕར་ཏེ་ཐོག་མར་འོད་ཟེར་འཁོར། དེ་ནས་སྔགས་ཕྲེང་ཉིད་རིམ་གྱིས་ཇེ་མགྱོགས་སུ་འཁོར་བ་ལས་འོད་ཟེར་འཕྲོས། ལུས་ཀྱི་ནང་ཐམས་ཅད་གང་། ནད་གདོན་སྡིག་སྒྲིབ་བག་ཆགས་དང་བཅས་སངས་ཀྱིས་བསལ་བར་མོས་པའོ། །གཉིས་པ་ཉེ་བར་བསྙེན་པ་འགལ་མེ་འཁོར་བ་ལྟ་བུའམ། ཁྱོགས་ཀྱི་བཟླས་པ་ནི། ཐུགས་ཀའི་སྔགས་ཕྲེང་ལས་སྔགས་ཕྲེང་གཉིས་པ་ཞིག་འཕྲོས་པ་ཡིག་འབྲུ་རྣམས་གཅིག་རྗེས་གཅིག་ནོན་རེག་ལ་མ་འབྱར་ཞིང་བར་མ་ཆད་པའི་ཕྲེང་བ་སྔགས་ཀྱི་རང་སྒྲ་དང་བཅས་པ་འགལ་མེ་འཁོར་ལོ་བསྐོར་བ་བཞིན་ཡེ་ཤེས་པ་དང་དམ་ཚིག་སེམས་དཔའི་ཞལ་ནས་རིམ་པར་ཐོན་པ་ཡུམ་གྱི་ཞལ་དུ་ཞུགས་ཐུགས་རྒྱུད་བསྐུལ། སྐུའི་ནང་བརྒྱུད་པདྨ་ནས་བྱུང་སྟེ་ཡབ་དང་ཡེ་ཤེས་སེམས་དཔའ་གཉིས་ཀྱི་རྡོ་རྗེའི་ལམ་ནས་སྟེང་དུ་བྱང་ཆུབ་ཀྱི་སེམས་བདེ་བ་ཆེན་པོའི་ངོ་བོར་བདེ་ཕྲིལ་ཕྲིལ་བྱུང་བ་ཐུགས་ཀའི་ས་བོན་ལ་ཐིམ་པས་མཆོག་གི་དངོས་གྲུབ་ཐོབ་པར་མོས་པ་ནི་ཡེ་ཤེས་ཀྱི་བཟླས་པའོ། །གསུམ་པ་བསྒྲུབ་པའི་ཡན་ལག་རྒྱལ་པོའི་ཕོ་ཉ་ལྟ་བུའམ་སྤྲོ་བསྡུའི་བཟླས་པ་ནི་སྔགས་བཟླས་པའི་རྐྱེན་གྱིས་ཐུགས་སྲོག་སྔགས་ཕྲེང་དང་བཅས་པ་ལས་འོད་ཟེར་ཁ་དོག་ལྔ་ལྡན་ནམ་མཁའ་གང་བར་འཕྲོས་པའི་རྩེ་ལས་མཆོད་པའི་ལྷ་མོ་མཆོད་རྫས་ཐོག་པ་དཔག་ཏུ་མེད་པ་འཕྲོས། མཁའ་ཁྱབ་ཀྱི་རྒྱལ་བ་སྲས་དང་བཅས་པ་ལ་ཐུགས་མཉེས་པའི་མཆོད་པ་བསམ་གྱིས་མི་ཁྱབ་པ་ཕུལ། ལྷ་རྣམས་ཟག་མེད་ཀྱི་བདེ་བ་ཆེན་པོས་ཐུགས་མཉེས་པར་བྱས། སྐུ་གསུང་ཐུགས་ཀྱི་བྱིན་རླབས་དང་དངོས་གྲུབ་ཐམས་ཅད་སྐུ་ཕྱག་རྒྱ་གསུང་ཡིག་འབྲུ་ཐུགས་ཕྱག་མཚན་གྱི་རྣམ་པར་རམ། འོད་ཟེར་དཀར་དམར་མཐིང་གསུམ་གྱི་རྣམ་པར་ཆར་བབས་པ་ལྟར་བྱོན་ནས་རང་གི་སྒོ་གསུམ་ལ་ཐིམ་པས་སྒྲིབ་གཉིས་བག་ཆགས་དང་བཅས་པ་དགཚོགས་གཉིས་ཡོངས་སུ་རྫོགས། དབང་བཞི་ཆིག་རྫོགས་སུ་ཐོབ་པར་བསམ་པ་ནི་བདག་དོན་བྱིན་རླབས་བསྡུ་བའི་དམིགས་པའོ། །ཡང་འོད་ཟེར་འཕྲོས་ཏེ་ཁམས་གསུམ་རིགས་དྲུག་གི་སེམས་ཅན་རྣམས་ལ་ཕོག་པས་ལས་ཉོན་སྡིག་སྒྲིབ་དང་སོ་སོའི་སྡུག་བསྔལ་ཐམས་ཅད་སྐད་ཅིག་ལ་སྦྱངས། ཉན་རང་བྱང་སེམས་རྣམས་ཀྱང་ཤེས་སྒྲིབ་ལས་གྲོལ་བར་བྱས། ཐམས་ཅད་ཀྱི་ལུས་ངག་ཡིད་གསུམ་རྡོ་རྗེ་གསུམ་གྱི་ངོ་བོར་གནས་གྱུར་བར་བསམ་པ་ནི་གཞན་དོན་ཕྲིན་ལས་ཀྱི་བཟླས་པ་སྟེ་འདིའི་སྐབས་སུ་ལས་བཞི་གང་འདོད་ཀྱི་དམིགས་པའང་འཕྲུལ་ཤེས་པར་བྱའོ། །བཞི་པ་སྒྲུབ་པ་ཆེན་པོའི་ཡན་ལག་བུང་བ་ཚང་ཞིག་པ་ལྟ་བུ་ནི། ལྷ་སྔགས་ལས་སྤྲོས་པའི་འོད་ཟེར་གྱིས་སྣོད་གཞལ་ཡས་ཁང་། བཅུད་ལྷའི་འཁོར་ལོ། སྒྲ་གྲགས་སྔགས་ཀྱི་རང་བཞིན། དྲན་རྟོག་ཡེ་ཤེས་ཀྱི་རོལ་པར་བསྒྱུར་བར་མོས་ལ་འཛིན་མེད་ཀྱི་ངང་ནས་བཟླ་བ་ནི་བདག་གཞན་གཉིས་མེད་ཀྱི་བཟླས་པའོ། །

༈ དབྱངས་དང་གསལ་བྱེད་སོགས་ཡི་གེ་ལྔ་བཅུ་རྩ་གསུམ་བརྩི་སྐབས། དབྱངས་ཡིག་བཅུ་དྲུག །གསལ་བྱེད་སོ་བཞི་མགོ་ཏིག་ཤད་གསུམ་རྣམས་སོ། །དེ་ཡང་མགོ་ཏིག་ཤད་གསུམ་ནི། རྩ་རྒྱུད་ལས། མགོ་ནི་མ་ནོར་ལམ་ཡིན་ཏེ། །ཏིག་ནི་ཤེས་རབ་མིང་དུ་སྨྲ། །ཤད་ནི་ཐབས་ཆེན་ཚིགས་སུ་གཅོད། །ཅེས་པ་ལྟར། མགོ་ནི་གླང་པོ་ཆེའི་སྣ་འདྲ་བའོ། །ཏིག་ནི་ཨཱཿདབང་ཕྱུག་ཆེན་པོའི་མིག་འདྲ་བའོ། །ཤད་ནི་ཨཱ་རིང་པོ་མདའ་ལྟ་བུའོ། །ས་པཎ་གྱིས། ཨ་དེ་ལ་གསུམ། སེང་གེ་ལྟ་བུའི་ཨ། གླང་པོ་ཆེའི་སྣ་ལྟ་བུའི་ཨ། མཚམས་རྣམ་པར་གཅོད་པའི་ཨ་དང་གསུམ་ཞེས་གསུངས། དཔེ་བྱད་ཀྱི་མཚོན་བྱེད་ཀ་ལི་བཞི་བཅུ་བརྩི་སྐབས་སུ་གསལ་བྱེད་སོ་བཞི་ལ་ཡི་གེ་ལྷག་པོ་དྲུག་སྣོན་ཚུལ་ལ། སློབ་དཔོན་སྐལ་ལྡན་རྡོ་རྗེའི་སྒྲུབ་ཐབས་གཙུག་ནོར་ལས། ཌ་ཌྷ་ད་དྷ་ལ་ཡ་དང་དྲུག་བསྣན། ཨ་བྷྱ་ཀ་རའི་མན་ངག་སྙེ་མ་ལས། ཌ་ཌྷ་ཡ་ར་ལ་ཝ་དང་དྲུག་བསྣན་པའོ། ༈ །བཟོད་པ་ཐོབ་པ་སྒོའི་གཟུངས། ཚིག་གི་གཟུངས། དོན་གྱི་གཟུངས། སྔགས་བྱིན་གྱིས་རློབ་པར་ནུས་པའི་གཟུངས་སྟེ་གཟུངས་ཀྱི་སྒོ་བཞིའོ། ༈ །སྔགས་བཟླ་བའི་ཚེ་སྐྱོན་དྲུག་སྤོང་དགོས་ཏེ། སྒྲ་མྱུར་ཆེས་ན་འབྲུ་འདྲེས་པའི་སྐྱོན། བུལ་ཆེ་ན་སྦྱོར་བའི་སྐྱོན། སྒྲ་དྲག་ཆེས་ན་ཕོག་ཐུག་འོང་ཞིང་བྱིན་རླབས་འགྱང་། སྒྲ་ཞན་ཆེ་ན་ནུས་པ་མི་ཐོན། བྱིང་རྨུགས་སུ་སོང་ན་སྒྲ་མི་དགརྒོད་ན་གཡེངས་ཤིང་སེམས་འཕྲོས་པས་ཏིང་ངེ་འཛིན་མི་གསལ་བའི་སྐྱོན་འབྱུང་། གཞན་ཡང་མི་ཚིག་གིས་བར་མ་ཆོད་པར་བྱ། ཇི་ལྟར་བཟླ་ན། གསལ་བར་བཟླ་སྟེ། སྒྲ་མ་འདྲེས། མ་ཕྲལ། བར་མ་ཆད་པར་བཟླ། དག་པར་བཟླ་སྟེ། སྔགས་ཆད་ལྷག་མེད་པར་ཟུར་ཕྱིན་པར་བཟླ། བརྩོན་པར་བཟླ་སྟེ་རྒྱུན་མི་ཆད་པར་ཆུ་བོའི་གཞུང་བཞིན་དུ་བཟླའོ། །

༈ སངས་རྒྱས་རྣམས་ཀྱི་ཐུགས་རྗེ་སྐྱེ་ཚུལ་ནི་བཞི་སྟེ། ལུང་ལས། རྟག་རྒྱུན་རང་བཞིན་ཤུགས་སྐྱེ་དང་། །ཡུལ་དང་གསོལ་བ་བཏབ་པས་སྐྱེ། །ཞེས་པ་ནི། རྟག་པ་རྒྱུན་དུ་ཐུགས་རྗེ་སྐྱེ་ཚུལ་དང་། རང་བཞིན་ཤུགས་ཀྱིས་ཐུགས་རྗེ་སྐྱེ་ཚུལ་དང་། ཡུལ་དང་འཕྲད་ནས་ཐུགས་རྗེ་སྐྱེ་ཚུལ་དང་། བསྐུལ་ཞིང་གསོལ་བ་བཏབ་པའི་ཐུགས་རྗེ་སྐྱེ་ཚུལ་ལོ། །དང་པོ་རྟག་པར་རྒྱུན་དུ་ཐུགས་རྗེ་སྐྱེ་ཚུལ་ལ་ཡང་བཞི་ལས། དེ་ཡང་རང་བཞིན་ཐུགས་རྗེའི་རྒྱུན་ནི། བདེ་བར་གཤེགས་པའི་སྙིང་པོ་རྒྱུན་ཆད་མེད་པར་ཆོས་ཐམས་ཅད་ཀྱི་རང་བཞིན་འཛད་པ་མེད་པའི་མཛད་པ་འགྲོ་བའི་དོན་དུ་གྱུར་པ་རྒྱུན་ཆད་མེད་པར་འབྱུང་བ་ལ་བྱའོ། །འབྱུང་བ་ཐུགས་རྗེའི་རྒྱུན་ནི། འབྱུང་བ་སྤྱིའི་དབང་བཙན་ཙམ་དུ་སོ་སོའི་ནུས་པས་འགྲོ་བའི་དོན་བྱེད་པའོ། །དེ་རྟག་པ་རྒྱུན་གྱི་འཁོར་ལོར་འབྱུང་བ་ལ་བྱའོ། །སྤྲུལ་པ་ཐུགས་རྗེའི་རྒྱུན་ནི། གསང་སྙིང་ལས། འཇིག་རྟེན་དྲུག་གི་ཕྱོགས་བཅུ་མཐའ་ཡས་མུ་མེད་པའི་སྟོང་གསུམ་གྱི་སྟོང་ཆེན་པོ་རེ་རེར། ཐུབ་པ་ཆེན་པོ་བཅོམ་ལྡན་འདས་རེ་རེས། འདུལ་བ་རྣམས་བཞིས་འགྲོ་བ་ལྔའི་དོན་མཛད་པ་གསུངས་པ་ལྟར་རོ། །ཡེ་ཤེས་སྤྱན་གྱི་ཐུགས་རྗེའི་རྒྱུན་ནི། ཐམས་ཅད་མཁྱེན་པའི་ཡེ་ཤེས་ཀྱི་སྤྱན་གྱིས་དུས་ཐོག་མཐའ་མེད་པར་འཁོར་བའི་ཁམས་ཇི་སྲིད་གཟིགས་པ་དེ་སྲིད་དུ་ཐུགས་རྗེ་རྒྱུན་དང་བཅས་པའོ། །གཉིས་པ་རང་བཞིན་ཤུགས་ཀྱིས་ཐུགས་རྗེ་སྐྱེ་ཚུལ་ནི། རང་བྱུང་ཡེ་ཤེས་ཆེན་པོ་ནི་ཐུགས་རྗེའི་བདག་ཉིད་མ་རིག་པའི་མུན་པ་སེལ་བའི་ཡེ་ཤེས་ཀྱི་རང་བཞིན་ཡིན་ཏེ། དཔེ་ཉི་མའི་འོད་རང་ཚུགས་ཙམ་རྩོལ་བ་མེད་པར་འཇིག་རྟེན་དུ་སྣང་བ་ལྟ་བུའོ། །གསུམ་པ་ཡུལ་དང་འཕྲད་ནས་ཐུགས་རྗེ་སྐྱེ་ཚུལ་ནི། ཐུས་རྗེའི་ཡུལ་རུ་ཏྲ་ལྟ་བུ་དང་། གཞན་ཡང་སྡུག་བསྔལ་ཅན་དང་འཕྲད་པས། ཐམས་ཅད་མཁྱེན་པའི་ཐུགས་གདུང་བ་སྐྱེ་བ་ལྟ་བུའོ། །དེ་ལྟར་ནི་ཁམས་གསུམ་གྱི་སེམས་ཅན་སྡུག་ཕོངས་ཅན་རྒྱུན་མི་ཆད་པ་ཐུགས་རྗེ་སྐྱེ་བ་རྒྱུན་མི་ཆད་ཞེས་བྱའོ། །བཞི་པ་བསྐུལ་ཞིང་གསོལ་བ་བཏབ་པས་ཐུགས་རྗེ་སྐྱེ་ཚུལ་ལ་གཉིས་ཏེ། རང་དོན་དུ་བསྐུལ་ཞིང་གསོལ་བ་བཏབ་པ་ནི། སྡུག་བསྔལ་ཅན་སྨྲེ་སྔགས་བཏོན་པས་ཐུགས་རྗེ་སྐྱེ་བ་ནི་སྔོན་བྱུང་རུ་ཏྲའི་གདུང་ཚིག་བཞིན་ནོ། །གཞན་དོན་དུ་བསྐུལ་བ་ནི། ལེའུ་གསུམ་པར་དམ་པའི་རིགས་ཅན་ལྔས་བསྐུལ་ཞིང་གསོལ་བ་བཏབ་པའོ། །ལེའུ་ལྔ་པར་གདུང་བ་སེལ་བར་ཞལ་གྱིས་བཞེས་པའོ། །ཞེས་དང་། རྡོ་གྲུབ་རིན་པོ་ཆེས། དེ་ཡང་རྟག་པ་རྒྱུན་གྱི་ཐུགས་རྗེ་ནི་ཆུ་བོའི་རྒྱུན་ལྟ་བུ། རང་བཞིན་ཤུགས་ཀྱི་ཐུགས་རྗེ་ནི་ཉི་མའི་འོད་ཟེར་ལྟ་བུ། བསྐུལ་ཞིང་གསོལ་བ་འདེབས་པའི་ཐུགས་རྗེ་ནི་གཏོང་ཕོད་ཅན་ལ་སློང་མོ་བྱེད་པ་ལྟ་བུ། ཡུལ་དང་འཕྲད་པའི་ཐུགས་རྗེ་ནི་གདོན་གྱིས་བཏབ་པའི་བུ་ལ་མས་བརྩེ་བ་ལྟ་བུའོ། །ཞེས་གསུངས།། །།