བསྐྱེད་རིམ་ལ་སྐུ་མདོག་ཕྱག་མཚན་ངེས་ཅན་གསལ་དགོས་མི་དགོས་སོགས་ཀྱི་དྲིས་ལན་སྐོར།
ཐུགས་དམ་སྐྱབས་ཡུལ་དང་བླ་མའི་རྣལ་འབྱོར་བསྐྱེད་རིམ་སོགས་ལ་སྐུ་མདོག་ཕྱག་མཚན་ངེས་ངེས་དག་དག་ཅན་གསལ་དགོས་མི་དགོས་དྲི་བ་མཛད་པའི་ལན་དུ་ཕུལ་བ། དེ་ཡང་སྤྱི་ཁྱབ་ལྟར་ན་དམིགས་པ་རྣོན་པོ་ནི་རྣལ་འབྱོར་བའི་མཚོན་ཆ་ཡིན་པས་ཇི་ལྟར་གསལ་བཞིན་བཟང་བར་བཞེད་པ་དང་། བྱེ་བྲག་ཏུ་ནི་བཀའ་གསར་རྙིང་གཉིས་ཀྱང་བཞེད་ཚུལ་ཅུང་མི་མཐུན་པར་ཡོད་དེ་གསར་མའི་ལུགས་ལ་ནི། དམིགས་པའི་རིགས་གང་ཡང་ཤིན་ཏུ་གསལ་བ་སྤྱན་གྱི་དཀར་ནག་དང་སྐུའི་བ་སྤུ་ཚུན་ཆད་གསལ་བ་ཞིག་མེད་ན་བསྐྱེད་རིམ་གྱི་གོ་མི་ཆོད་པར་འདོད། རྙིང་མའི་ལུགས་ལ་ནི་ལྷ་སྒོམ་པ་དང་རང་སེམས་མ་བཅོས་གནས་ལུགས་སྐྱོང་བ་གཉིས་ཀ་ཁྱད་མེད་པའི་ངང་ནས། ལྷ་སྒོམ་མཁན་སེམས་ཡིན། བསྒོམ་རྒྱུའི་ལྷ་ཡང་སེམས་ཀྱི་རང་མདངས་ཡིན། ལྷའི་དབྱིབས་མ་བསྒོམས་པར་སེམས་རང་བབས་སུ་རང་ངོ་ཤེས་ཐོག་ཏུ་འཇོག་པ་ཡང་ལྷ་ཡེ་ཤེས་སེམས་དཔའ་ཡང་དག་པ་ཆོས་སྐུའི་ངོ་བོ་ཡིན། དེའི་ཕྱིར་ཐ་མལ་རྣམ་རྟོག་འཁྲུལ་རྗེས་འབྲངས་ན་ནི་བསྐྱེད་རྫོགས་གང་གི་ཡང་གོ་མི་ཆོད། འཁྲུལ་བ་ཨ་འཐས་ཀྱི་དབང་དུ་མ་ཤོར་བ་རིག་པ་ངོས་ཟིན་ན་ལྷ་གསལ་ཀྱང་ཆོག་ལ་མ་གསལ་ཀྱང་ཆོག་སྟེ། གནས་ལུགས་ཀྱི་རང་ངོ་ལ་བསྐྱེད་རྫོགས་གཉིས་ཀ་ཡེ་ནས་ཟུང་འཇུག་ཏུ་ལྷུན་གྱིས་གྲུབ་པ་ཡིན། ལར་ཡང་འགྲོ་བ་ཀུན་གྱི་ལུས་ངག་ཡིད་གསུམ་དང་ཕུང་པོ་ཁམས་དང་སྐྱེ་མཆེད་མཐའ་དག་ལྷ་དང་སྔགས་ཀྱི་རང་བཞིན་དུ་གདོད་མ་ནས་ཡིན་པའི་ཡིན་ལུགས་མ་ཤེས་པས་འཁྲུལ་ཞིང་འཁོར་བར་འཁྱམས་པ་ཡིན་ལ། དེ་ཡིན་པའི་ཡིན་ཚུལ་ངོ་ཤེས་པར་བྱ་བའི་ཐབས་སུ་སྨིན་བྱེད་ཀྱི་དབང་བསྐུར། གྲོལ་བྱེད་ཀྱི་བསྐྱེད་རྫོགས་སྒོམ་པ་ཡིན་མོད་ཀྱི། ཡེ་ནས་ཡིན་པ་ལ་ཡིན་པར་ངོ་ཤེས་ནས་བསྐྱེད་པ་དེ་ལ་བསྐྱེད་རིམ་ཟེར་བ་ཡིན་གྱི། མ་ཡིན་པ་ལ་ཡིན་པར་བསྒོམས་ཀྱང་དོན་མི་འགྲུབ་སྟེ། དཔེར་ན་དངུལ་ལ་དངུལ་དུ་ཤེས་ན་དངུལ་གྱི་དོན་འགྲུབ་ལ། སོལ་ནག་ཞིག་ལ་དངུལ་དུ་བསྒོམས་ན་དོན་མི་འགྲུབ་པ་དང་། ཡིད་བཞིན་ནོར་ལ་ནོར་བུར་ཤེས་ནས་གསོལ་བ་བཏབ་ན་དངོས་གྲུབ་འབྱུང་གི། རྡོ་ཕལ་བ་ཞིག་ལ་ནོར་བུར་བསྒོམ་ཞིང་གསོལ་བ་བཏབ་ཀྱང་དངོས་གྲུབ་མི་འབྱུང་བ་དང་མཚུངས་སོ། །དཔེར་ན་བསྐྱེད་རིམ་དང་ཁ་ཏོན་ཆོས་སྤྱོད་སོགས་གང་ལ་ཡང་ལྷ་ཡི་དབྱིབས་དང་རྣམ་འགྱུར་ཡིད་ལ་ཤར་ཐོག་ཏུ་སེམས་མ་ཡེངས་ཙམ་གྱི་ངང་ནས་ཁ་ཏོན་བཟླས་བརྗོད་བྱ། ལྷ་སྐུ་མ་གསལ་ན་ཡང་ཅིས་ཀྱང་གསལ་དགོས་སྙམ་པའི་ཞེ་འདོད་དང་འཛིན་རྟོག་བསྐྱེད་མི་དགོས་ཏེ། དོན་རིག་པ་མ་ཡེངས་པའི་ངང་ནས་དགེ་སྦྱོར་གང་ཡང་བྱས་པས་ཆོག །དོན་དམ་པར་ལྷ་དམ་ཚིག་ཡེ་ཤེས་སམ་ཆོས་སྐུ་དང་གཟུགས་སྐུ་ཞེས་མིང་ཅི་བཏགས་ཀྱང་དོན་གྱི་ངོ་བོ་རང་རིག་འདི་ལས་གཞན་མེད་དེ། ཨོ་རྒྱན་ཆེན་པོས། རྟགས་ཀྱི་སངས་རྒྱས་ལོངས་སྤྱོད་རྫོགས་སྐུ་དང་། །དོན་གྱི་སངས་རྒྱས་ཆོས་སྐུ་གང་ཡིན་པ། །ཆོས་ཉིད་རིག་པ་མངོན་སུམ་འདི་ཡིན་པས། །སངས་རྒྱས་གཞན་ནས་མ་འཚོལ་རྗེ་འབངས་རྣམས། །ཞེས་གསུངས་སོ། །དེ་བཞིན་དུ་བླ་མའི་རྣལ་འབྱོར་ཡང་། ཕྱི་རོལ་གྱི་བླ་མ་གཟུགས་དབྱིབས་སུ་སྣང་བ་ནི་མཚོན་བྱེད་དཔེའི་བླ་མ་ཙམ་ཡིན་མོད་ཀྱི། རང་རིག་རང་ངོ་ཤེས་པ་ནི་མཚོན་བྱ་དོན་གྱི་བླ་མ་ཆོས་སྐུ་དངོས་ཡིན་པས། གཙོ་བོ་རང་རིག་མ་ཡེངས་ན་བླ་མ་དང་འདུ་འབྲལ་མེད་པ་ཡིན་ཏེ། གླིང་རས་ཀྱི་ཞལ་ནས། བླ་མ་རང་སེམས་དབྱེར་མེད་ལ། །གཟུགས་སྐུར་འཛིན་པ་སྟོར་ནས་ཐལ། །ཞེས་གསུངས་པ་ལྟར་ཡིན་ཞིང་། སྐུ་མདོག་ཕྱག་མཚན་མ་བསྒོམས་ཀྱང་བླ་མ་ཡིད་ལ་དྲན་ཙམ་ནས་རང་སེམས་བླ་མ་དང་མཇལ་ཚར་བ་ཡིན། སླར་བཟོ་བཅོས་མི་དགོས། ཡང་བླ་མ་སངས་རྒྱས་ཆོས་སྐུ་ཡེ་ནས་ཡིན་པར་ཐག་མི་ཆོད་པར་གདོས་བཅས་ཤ་ཁྲག་གི་སྐུར་བསྒོམས་ན་ལོག་རྟོག་ཡིན། བྱིན་རླབས་མི་འབྱུང་། དེང་སང་གི་གང་ཟག་རྣམས་བླ་མ་ལ་སངས་རྒྱས་སུ་མ་མཐོང་བར་མིའི་འདུ་ཤེས་བྱས་པའི་སྐྱོན་གྱིས་བྱིན་རླབས་མི་འཇུགབྱིན་རླབས་མ་ཞུགས་པས་ཉམས་ལེན་རྒྱུད་ལ་མི་སྐྱེ། དེ་མ་སྐྱེས་པས་གྲུབ་པ་ཐོབ་དུས་མེད་པ་ཡིན་ཏེ། འབྲི་གུང་སྐྱོབ་པ་རིན་པོ་ཆེས། བླ་མའི་བྱིན་རླབས་མ་ཞུགས་ན། །ཇི་ལྟར་བྱས་ཀྱང་བློས་བྱས་ཡིན། །ཞེས་གསུངས་པ་ལྟར། བླ་མ་མི་ཐ་མལ་གྱི་འདུ་ཤེས་མ་ཡིན་པར་སངས་རྒྱས་སུ་ཐག་ཆོད་དགོས་པས། དེའི་ཕྱིར་བླ་སྒྲུབ་ཐམས་ཅད་དུ་བླ་མ་རྡོ་རྗེ་འཆང་ངམ་པདྨ་འབྱུང་གནས་སོགས་སུ་བསྒོམ་ཚུལ་གསུངས་པ་དེ་ཡང་ཐ་མལ་གྱི་འདུ་ཤེས་སྤང་ཕྱིར་ཡིན་མོད་ཀྱི། དོན་ལ་རྡོ་རྗེ་འཆང་ངམ་པདྨ་འབྱུང་གནས་སོགས་སངས་རྒྱས་ཀྱི་མཚན་དང་ཆ་ལུགས་ཅི་ལྟ་བུར་བསྟན་ཀྱང་རང་གི་ངོ་བོ་རྩ་བའི་བླ་མ་ཉིད་ལས་གཞན་མ་ཡིན་པར་གོ་དགོས་པ་ལགས། མིག་ཡུལ་དུ་འཆར་བའི་ཐིག་ལེའི་རྣམ་པ་གྱ་གྱུར་འཆར་བ་དེ་ལ་ཆོས་ལུགས་གཞན་དང་ཕྱག་ཆེན་སོགས་ལས་ནི་མ་གསུང་ལ། དུས་འཁོར་སྦྱོར་དྲུག་པ་རྣམས་སྟོང་གཟུགས་ཀྱི་རེ་ཁ་ནག་པོ་ཞེས་ཟེར། རྫོགས་པ་ཆེན་པོའི་སྙིང་ཐིག་རྣམས་སུ་ནི་འདི་ཡི་དོན་དང་ཉམས་སུ་ལེན་ཐབས་ཁོ་ན་ཡིན་པ་སྟེ། འདི་ཡི་མིང་རིག་གདངས་རྡོ་རྗེ་ལུ་གུ་རྒྱུད་ཅེས་བྱ་ཞིང་། རང་གི་རིག་པའི་གདངས་དབང་པོའི་ཡུལ་དུ་འཆར་བ་ཡིན་ཏེ། དཔེར་ན་ཉི་མ་ཡོད་སར་ཆུ་ཕོར་བ་གང་བཞག་ན་དེའི་འོད་གདངས་ཐོག་གི་གདུང་མཚམས་ལ་སྐྱ་འཁྱིལ་ལེ་འཆར་ཞིང་། ཆུ་ཕོར་བསྒུལ་ན་དེ་ཡང་འགུལ། ཆུ་མ་འགུལ་ན་དེ་ཡང་མི་འགུལ་བ་དང་མཚུངས། རྒྱུད་ལས། རིག་པ་རྡོ་རྗེ་ལུ་གུ་རྒྱུད། །ཕྲ་ཞིང་རྟ་རྔའི་མདུད་པ་འདྲ། །བར་བར་ཐིག་ལེ་ཡུངས་འབྲུ་ཙམ། །དེ་ཡང་འགྲོ་འོང་དག་དང་བཅས། །ལུ་གུ་རྒྱུད་ཀྱི་མཚན་ཉིད་དོ། །ཞེས་གསུངས། རྫོགས་ཆེན་འོད་གསལ་ཐོད་རྒལ་གྱི་ཉམས་ལེན་ཀུན་ཀྱང་གཙོ་བོ་འདི་བརྟན་དགོས། འདིས་ནི་རང་རིག་འདི་ཡེངས་ཤོར་མ་ཤོར་གྱི་ཚོད་བཟུང་བ་ཡིན་ཏེ། སེམས་མ་ཡེངས་ན་ཁོ་ཡང་ལྷམ་མེར་སྡོད་ཅིང་སེམས་འགྱུ་ན་ཁོ་རང་ཡང་འགྲོ་བས་ཁོ་འགྲོ་བའི་རྗེས་སུ་མ་འབྲང་བར། མིག་དང་སེམས་གཉིས་ཀ་རང་ཚོད་བཟུང་དགོས་པ་ཡིན། རྒྱུད་སེང་གེ་རྩལ་རྫོགས་ལས། སངས་རྒྱས་ཐམས་ཅད་ཀྱི་སྐུ་མཐོང་བར་འདོད་ན་རིག་པ་རྡོ་རྗེ་ལུ་གུ་རྒྱུད་ལ་ལྟོས་ཤིགསངས་རྒྱས་ཐམས་ཅད་ཀྱི་ཐུགས་དང་དབྱེར་མེད་པར་འདོད་ན་རིག་པ་རྡོ་རྗེ་ལུ་གུ་རྒྱུད་དང་མ་བྲལ་བར་གྱིས་ཤིགཅེས་སོགས་རྒྱས་པར་གསུངས་ཡོད་པས་འགྲོ་འདུག་སྤྱོད་ལམ་ཅི་བྱེད་ཀྱང་རང་ཚོད་ཟིན་ཙམ་ལ་རྒྱུན་དུ་འབད་པ་ནི་ཉམས་ལེན་ཐམས་ཅད་ཀྱི་སྙིང་པོ་ཡིན་པས་ཐུགས་ལ་བཞགས་པར་ཞུ། ཐུགས་དམ་སྐོར་གྱི་ཆར་སྤྱིར་ནི། སྒོམ་ཕྱོགས་ཀྱི་ཉམས་ལེན་འདི་ལ་ལན་གཅིག་བོགས་བསྐྱེད་ཐོན་ཐུབ་པ་ཞིག་དང་། མཚན་མོའི་རྨི་ལམ་དང་འོད་གསལ་སོགས་ཟིན་ཐུབ་པ་ཞིག་བྱེད་རྒྱུ་ཡིན་ན། གནས་སྐབས་ཚེ་འདིའི་བྱ་བྱེད་དང་གཏན་ནས་འདྲེས་མི་དགོས་པར་མི་མེད་ལུང་སྟོང་ཁོ་ན་འགྲིམ་ཞིང་དཀའ་སྤྱད་དང་སྨྲ་བཅད། འདག་སྦྱར་སོགས་ལ་མི་ཚེ་གཅིག་དྲིལ་ཞིག་ཐུབ་ན། བོགས་སྐྱེད་མེད་ཐབས་མེད་ལ། ངེད་རང་རྣམས་ལྟོ་གོས་དང་བྱ་བྱེད་གཞན་དང་བསྒྲགས་ཤིང་མིའི་ཁ་ཡ་བྱེད་དགོས་མཁན་ལ་ཐུགས་དམ་ཀྱི་བོགས་དང་རྩལ་ཐོན་པ་ནམ་ཡང་དཀའ་ལ། འོན་ཀྱང་དུས་དང་རྣམ་པ་ཀུན་ཏུ། འགྲོ་འདུག་ཟ་ཉལ་སྨྲ་བརྗོད་སོགས་དང་ཕྱག་བསྐོར་ཁ་ཏོན་བཟླས་བརྗོད་ཅི་དང་ཅི་བྱེད་པའི་སྐབས་ཐམས་ཅད་དུ། རིག་པའི་རང་ངོ་དེ་ཉིད་རྗེན་ཅེར་རེ་བར་ངོས་ཟིན་པ་ཞིག་ལ་གཅིག་ཏུ་དྲིལ་ཞིང་། གནས་སམ། འགྱུའམ། བདེ་སྡུག་བཟང་ངན་ལ་སོགས་གང་དང་གང་ལྟར་འཆར་ཡང་། དེ་ཚེ་དེ་ལ་བརྟགས་དཔྱད་དང་རྗེས་འབྲང་དགག་སྒྲུབ་སོགས་གཏན་ནས་མི་བྱ་བར། དེ་དག་ངོས་ཟིན་མཁན་གྱི་རིག་པ་རྗེན་པ་ཁོ་རང་ལ་སྒོམ་གྱི་སྙིང་པོ་བྱ་ཞིང་གལ་ཏེ་རྣམ་རྟོག་འོག་འགྱུ་ལ་འབྱམས་སོང་ནའང་། སླར་ངོས་ཟིན་ཙ་ན། ཟིན་པ་དེ་ཀའི་ཐོག་ཏུ་རང་སར་བཞག་པ་ལས། དགག་སྒྲུབ་གཞན་མི་དགོས། ཡེངས་སོང་བ་མ་ཚོར་བ་ལྟ་བུ་བྱུང་ན་བྱིང་སྐྱོན་ཡིན་པས་རིག་པ་གསལ་ངར་བཏོན། ཡང་གཞན་གྱི་ལབ་བརྗོད་སོགས་ཀྱི་རྐྱེན་གྱིས་ཡེངས་སོང་ན་དྲན་རིག་ཤུགས་ཆེ་རུ་བཏང་ནས་རང་ཚོད་ཐུབ་པར་བྱ། མདོར་ན་རིག་པ་རང་ངོ་ཤེས་རུང་གི་ངང་ལས་བྱ་བྱེད་ཐམས་ཅད་མ་བརྗེད་མ་འཁྲུལ་བ་ཞིག་དགོས། དེ་མ་ཡིན་པར་བྱ་བྱེད་དང་སྨྲ་བརྗོད་ཀྱི་སྐབས་སུ་དྲན་རིག་བསྐུར། དྲན་རིག་སྐྱོང་དུས་བྱ་བྱེད་གཞན་མི་ལྕོགས་ན་སྒོམ་དེ་ནམ་ཡང་ལྷག་མཐོང་དངོས་ཀྱི་རང་ངོ་མ་མཐོང་བར་ཞི་གནས་ལ་སོང་བའི་རྟགས་ཡིན་ལ། ལར་ཕྱག་ཆེན་ལ་སྒོམ་གྱི་དངོས་གཞི་དྲན་པ་ཁོ་ན་ལ་མཛད་པ་དང་། རྫོགས་ཆེན་ལ་རིག་མ་རིག་ཁོ་ན་ལ་སྒོམ་ཡིན་མིན་གྱི་སོ་མཚམས་ཕྱེ་བ་སྟེ། དེ་གཉིས་ཀྱི་ཁྱད་པར་ནི་དྲན་པ་སྐྱོང་བ་དེ་ལ་བཅོས་མའི་ཅུང་ཟད་གྲིམ་ཉམས་གཅིག་དགོས་ཤིང་ཡེངས་ཀྱི་དོགས་པས་སེམས་ཁྲལ་ལྟ་བུ་བྱེད་མཁན་དེ་ཀ་རྣམ་རྟོག་ཡིན། རྫོགས་ཆེན་ལུགས་ཀྱི་གང་སྣང་ཐམས་ཅད་ལ་དགག་སྒྲུབ་མེད་པའི་ངང་ལས་ཤར་བ་ངོ་ཤེས་མཁན་དེ་ལ་རང་རིག་ཟེར་བ་ཡིན། རང་རིག་དེ་དང་མ་བྲལ་བ་གཅིག་པུས་ཆོག་པ་མ་གཏོགས་ཡེངས་ཀྱི་དོགས་པའམ། དྲན་པ་ཆེད་དུ་བཟུང་མི་དགོས་པར་རང་ངོ་རིག་ན་རྣམ་རྟོག་ཐམས་ཅད་སྒོམ་ཡིན། རང་ངོ་མ་རིག་ན་གནས་པ་བརྟན་པོ་འཁོར་ཡུག་ཏུ་སོང་ཡང་སྒོམ་མིན་ཏེ། ཉམས་ཀྱི་བྱེ་བྲག་ཙམ་ཡིན་ནོ། །དེས་ན་ཐུགས་དམ་གྱི་སྙིང་པོ་ནི་རང་རིག་རང་ངོ་ཤེས་པ་གཅིག་པུ་ལ་འབད་འཚལ་ཞིང་། བཟླས་བརྗོད་ནི་དེ་སྔ་ཕན་ཆད་གང་མཛད་ཡོད་ན་ད་རུང་ཡང་དེ་ཀ་ལ་དྲིལ་བ་ལེགས་ཏེ། ཡེ་ཤེས་ལྷ་ཐམས་ཅད་དོན་ལ་དབྱེར་མེད་ཡིན་ཚེ། སྤང་ལེན་འདམ་ཁ་མང་པོ་གཏན་ནས་མི་དགོས། ལྷ་གཅིག་འགྲུབ་ན་ཀུན་འགྲུབ་པར་མདོ་རྒྱུད་ཐམས་ཅད་མཐུན་པར་གསུངས་སོ། །སླད་དུའང་རང་གི་གེགས་སོགས་ལ་སླེབས་ཚེ་ཡང་། འཇིག་རྟེན་པ་ཞིག་ཡིན་ན་རིམ་གྲོ་དང་ཚེ་སྒྲུབ་སོགས་ཐབས་གཞན་དགོས་མོད་ཀྱང་། སྤྱིར་ཆོས་པ་དང་ཁྱད་པར་སྒོམ་ཅན་ལ་གེགས་དང་སྲི་ངན་སོགས་ཀྱིས་གཟབ་ཆའི་རྣམ་རྟོག་ལར་ནས་མི་སྐྱེ་སྟེ། ནམ་ཡང་འཆི་བ་མ་གཏོགས་འགྲོ་ས་མེད་པ་ཐག་ཆོད། འཆི་བར་ལོ་ཟླ་ཞག་རེ་སོང་བཞིན་ཐག་ཉེ་རུ་འགྲོ་བར་ནི་ཤེས། ཤི་བ་ནི་གེགས་ཆུང་སྟེ། འཁོར་བར་གཏན་འཁྱམས་སུ་གྱུར་པ་འདི་ལ་ཕན་ཐབས་དང་ཐར་ཐབས་ནི། དགེ་སྦྱོར་ལས་ལྷག་པ་གང་ཡང་མ་མཆིས་པ་ལ་བསམས་ནས། དོ་ནུབ་རང་འཆི་ནད་ཕོག་བྱུང་ནའང་། ཐུགས་དམ་བྱེད་པའི་འཕྲོ་ལ་འཆི་ཐུབ་ན་དེ་ཀ་ཡིན། གེགས་དང་ལོ་ཚད་སོགས་ལ་མ་ལྟོས་པར་ན་སོ་རྒན་དུ་སོང་བཞིན་དགེ་སྦྱོར་ལ་བརྩོན་འགྲུས་ཆེ་རུ་བཏང་བ་ལ་མི་ཚེ་འཁྱོལ་དགོས་པ་མ་གཏོགས། སྐུ་རིམ་དང་ཐབས་ལ་རེ་མི་དགོས་པས་དེ་ལྟར་ཐུགས་ལ་བཞག་པར་ཞུ་ཞིང་། སྤྱིར་ཡང་དེང་སང་གི་ཆོས་པ་དང་བླ་མའི་རིགས་བན་བཙུན་རྟོགས་ལྡན་སོགས་ལས་ཕལ་ཆེར་ཞིག་ཚེ་སྟོད་ལ་དཀའ་སྤྱད་དང་སྙིང་རུས་མཚམས་སྒྲུབ་བཅད་རྒྱ། དགེ་སྦྱོར་དམ་བཅའ་སོགས་དགའ་རབ་བྱས་ཀྱང་། ཚེ་སྨད་རྒས་ཁ་ཤི་ཁར་སོང་བཞིན་ཏུ་དེ་བསྐྱུར། བསྐྱར་ནས་གྲོང་ཆོག་དང་གཞན་གྱི་མགོ་དཔོན་བྱེད་ཅིང་། དཀོར་ཟས་ལ་བག་མེད་དུ་སྤྱོད་པ་དང་། ཁ་ནས་བདག་དང་པོ་དེ་འདྲ་བྱས་པ་ཡིན་ཏེ། ད་ནི་རྒས་ནས་ལུས་གནད་མི་ཁྱག་འདུག་ཟེར་བ་ཚོ་རང་གིས་རང་བསླུས་པ་ཡིན་མོད་ཚེ་ཕྱི་མའི་དོན་བསྒྲུབ་པ་ལ་གནད་མ་ཁྱག་ཟེར་བ་དེ་ནི་སེམས་གནད་མ་ཁྱག་པ་ལོས་ཡིན། ཆོས་ཀྱི་དཀའ་བ་སྤྱད་ནས་ཤི་ནུས་ན། ཚེ་རབས་ཐམས་ཅད་ཀྱི་སྡིག་སྒྲིབ་དག་འགྲོ་བས་འགྱོད་རྒྱུ་ཅི་ཡོད། དེ་ལྟ་བུའི་གནད་གོ་མཁན་དེང་སང་གར་ཡང་དཀོན་པར་སྣང་བས་དེས་ན་རྒྱུ་མཚན་འདི་རྣམས་སྙིང་གཏམ་གྱི་གདམས་ངག་ཟབ་ཤོས་ཡིན་པས་དགོངས་པའི་དབྱིངས་སུ་ནན་འཇོག་མཁྱེན་མཁྱེན། གཞན་ཡང་འདུས་བྱས་ཀྱི་དགེ་རྩར་འཇུག་པ་ཐམས་ཅད་ཀྱང་རྒྱུ་བསོད་ནམས་ཀྱི་ཚོགས་རྫོགས་པ་ཁམས་ཆེ་མོད་ཀྱང་། དེང་སང་གི་ཆོས་པ་ཐམས་ཅད་ཤ་ཆང་ལ་མི་བརྟེན་མཁན་མེད་ཚུལ་དང་། ཁྱད་པར་ཤི་གསོན་ཀུན་གྱི་དགེ་རྩ་ཅི་བྱེད་ཀྱང་སྲོག་གཅོད་ཁོ་ན་བྱེད་དགོས་པ་འདི་འདྲ་དང་། ཆང་ཚོང་ལ་འཇུག་པ་སོགས་དར་བ་འདི་འདྲ་མདོ་རྒྱུད་ཐམས་ཅད་ནས་བཟང་པོར་མ་གསུངས་ཏེ། བཅོམ་ལྡན་འདས་ཀྱིས་མཆོད་སྦྱིན་བྱེད་པ་རྣམས་ཀྱི་ནང་ནས་ཆང་གི་སྦྱིན་པ་དང་། ཤའི་སྦྱིན་པ་དང་། མཚོན་ཆའི་སྦྱིན་པ་དང་། དུག་གི་སྦྱིན་པ་དང་། གཞན་གྱི་ནོར་ལ་རྐུ་ཕྲོག་བྱས་ནས་སྦྱིན་པ་བྱས་པ་རྣམས་ནི་དམྱལ་བར་སྐྱེ་བའི་རྒྱུ་ཁོ་ནར་གསུངས་པས། དེས་ན་དགེ་རྩ་ཆེ་ཆུང་ཅི་བྱེད་ཀྱང་སྲོག་གཅོད་ལ་སོགས་སྡིག་པ་དང་འདྲེས་མི་དགོས་པ་ཞིག་རང་གལ་ཆེ་བ་ཡིན། དེ་འདྲར་ཐུགས་ལ་འཇོག་པར་ཞུ། ཐུགས་དམ་གྱི་ཆ་ཐམས་ཅད་ལ་གཞན་ཐ་མལ་གྱི་ཤེས་པ་རྗེན་པ་རང་བབས་ཀྱི་ངང་ནས། གང་ཤར་ཐམས་ཅད་རང་ངོ་རིག་པར་བྱ་བ་འདི་ཁོ་ན་ལ་གཅིག་དྲིལ་མཛད་པ་དང་། མཚན་མོའི་སྐབས་སོགས་སུ་རྨི་ལམ་ཟིན་ཞིང་རང་དབང་འདུག་པར་བྱུང་ན་ནི་དེ་ཡང་རང་རིག་གིས་སླེབས་པ་ཞིག་གལ་ཆེ་ཞིང་། རྨི་ལམ་མ་ཟིན་ན་ཡང་གཉིད་དུ་འགྲོ་ཁར་རྟོག་པ་གཞན་གྱིས་བར་མ་ཆོད་པར་རང་ངོ་རིག་ལ་གཉིད་དུ་ལོགནམ་སད་སད་ལ་རང་རིག་དེ་ཉིད་རང་འཕྲོ་མཐུད། ནངས་པར་ལངས་པའི་དུས་སུ་ཐོག་མར་ཡང་རྣམ་རྟོག་ཕལ་བའི་མདུན་མི་བསུ་བར་རིག་པ་ངོ་ཤེས་པ་རང་ལ་འབུང་བར་བྱ། འདི་ལྟ་བུ་ལ་རྒྱུན་དུ་འབད་ན་འཆི་ཁར་ཡང་བར་དོའི་གདམས་པའི་གནད་ཀྱང་འདི་ལ་འདུས་ཤིང་། གཉིད་དང་འཆི་བ་གཉིས་ཐིམ་ཚན་ཆེ་ཆུང་མ་གཏོགས་གཞན་གཅིག་སྟེ། དེས་ན་རྣམ་རྟོག་ན་ཚ་སྡུག་བསྔལ་འཆི་བ་སོགས་ཐམས་ཅད་རིག་པས་སླེབ་པ་རང་མཛད་པར་ཞུ། ཤ་ཆང་སོགས་སྤང་བ་ནི་གལ་ཤིན་ཏུ་ཆེ། སྤྱིར་གསང་སྔགས་ལ་ཤ་ཆང་འདོད་ཡོན་སོགས་མི་སྤང་བར་བཤད་པ་དེ་ནི་རྣལ་འབྱོར་བ་རྟོགས་པ་མངོན་དུ་གྱུར་པ་ཕྱོགས་ལས་རྣམ་རྒྱལ་གྱི་སྤྱོད་པ་ལམ་དུ་ལྷོང་ཐུབ་པ་རྣམས་ལ་དགོངས་པ་ཡིན་ཏེ། སློབ་དཔོན་པདྨ། ཏེ་ལོ་པ་དང་། བིཪྺ་པ་སོགས་ཉིན་གཅིག་ལ་ཆང་ཚོང་ལྔ་བརྒྱའི་ཆང་ཐམས་ཅད་བཞེས་ནས་ཆང་རིན་ལ་ཉི་མ་བཙོན་དུ་བཟུང་སྟེ་བསྲིང་དུ་བཅུག་པའི་ལོ་རྒྱུས་འདྲ་བར་ཆང་གིས་བཟི་བ་ལ་སོགས་ནུས་པའི་སྐྱོན་ཐམས་ཅད་ཟིལ་གྱིས་གནོན་ཐུབ་པའི་གྲུབ་ཐོབ་རྣམས་མ་གཏོག་གང་ཟག་ལས་དང་པོ་བས་ཤ་ཆང་ལ་བག་མེད་དུ་སྤྱོད་པ་ནི་སྔགས་ཀྱི་ལྟུང་བ་ཕོག་པར་གསུངས་ལ། ཚོགས་ཀྱི་འཁོར་ལོ་ཡང་དངོས་གཙང་ཚུལ་ལྡན་ཞིག་བྱེད་པ་པོ་ཡང་རྣལ་འབྱོར་ཕོ་མོ་གྲུབ་པ་ཐོབ་པ་ཤ་སྟག་མ་གཏོགས་ཕལ་བས་མི་འོང་ཞིང་། ཚོགས་ཀྱི་ཡོ་བྱད་ཀྱང་གསེར་སྲང་བཅོ་བརྒྱད་ཀྱི་རིན་ཐང་ཡན་ཆད་མ་གཏོགས་དེ་ལས་ཞན་པས་ནི་ཚོགས་འཁོར་མི་རུང་བར་གསུངས་ཀྱང་། དེང་སང་འོ་སྐོལ་རྣམས་ཀྱིས་འགྲུབ་པའི་ཡུལ་མ་ཡིན་ཏེ། ད་ལྟ་ཆོ་ག་དང་དབང་སྐུར་ལ་སོགས་པའི་སྐབས་སུ་བརྡ་ཙམ་བྱེད་པ་འདི་ལ་ནི་ཚོགས་ཀྱི་མཆོད་པ་ཞེས་བྱ་བ་ཡིན་པས་དཀྱིལ་འཁོར་གྱི་ལྷ་ལ་ཕུལ་བའི་ལྷག་མ་སྒྲུབ་པ་པོ་རྣམས་ཀྱིས་དངོས་གྲུབ་ཀྱི་རྫས་ཙམ་དུ་བླང་བ་ཡིན་ཏེ། དེས་ན་དེང་སང་གི་ཆོས་པ་རྣམས་ཀྱི་སྤྱོད་འགྲོས་དང་བྱ་བྱེད་གང་ས་ཅི་ཐད་ནས་མདོ་སྔགས་ཀྱི་ཆོས་ལུགས་གང་དང་ཡང་མཐུན་པ་ཞིག་བཀའ་གསར་རྙིང་སུ་ལའང་མི་རྙེད་པར་འདུག་ཀྱང་གོ་མཁན་དཀོན་པ་དང་། དགེ་བ་ཅི་དང་ཅི་བྱེད་ཀྱང་སྲོག་བཅད་སོགས་སྡིག་པ་ཁོ་ན་ལ་བརྟེན་དགོས་པ་འདི་ལྟ་བུ་དང་། གསང་སྔགས་ལ་ཁག་བཀལ་ནས་རྩིང་སྤྱོད་དང་འཆོལ་སྤྱོད་དང་ཆོས་མིན་འབའ་ཞིག་དར་བ་འདིས་འཕྲལ་ཕུག་རང་གཞན་གཉིས་ཀ་ཕུང་བའི་རྒྱུ་ཁོ་ནར་འདུག་པས། དེས་ན་རང་ཉིད་ཀྱི་ཆོས་ཁྲིམས་རང་གིས་བྱས་ནས་རང་རྒྱུད་འདུལ་བ་ཁོ་ན་གལ་ཆེ་ཚུལ་དགོངས་པར་བཅག་པར་ཞུ། བྱ་བ་ཐམས་ཅད་ལྷ་འདྲེའི་ཆོ་འཕྲུལ་ལྟ་བུ་བྱུང་དུས་ཉམས་ལེན་བོགས་འདོན་ལ་གང་ཁེབ་ཆེ་གསུངས་པ་དེ་ལ། སྤྱིར་འཇིག་རྟེན་ཕལ་བ་དང་གང་ཟག་ཐུན་མོང་ཀུན་གྱི་སྣང་ངོར་ནི་སྣང་སྲིད་ཀྱི་ལྷ་འདྲེ་ཕན་གནོད་བཟང་ངན་ཐམས་ཅད་ཀུན་རྫོབ་རྒྱུ་འབྲས་རྟེན་འབྲེལ་བསླུ་མེད་ཡིན་པས་རྒྱུ་འབྲས་ཁྱད་དུ་གསད་མི་རུང་། སྤྱིར་ལྷ་འདྲེ་གདོན་བགེགས་ཐམས་ཅད་ཕ་མར་ཤེས་པའི་བྱམས་སྙིང་རྗེ་བསྒོམ་ཞིང་། གསུར་བསྔོ་དང་སྒྱུ་ལུས་མཆོད་སྦྱིན་སོགས་ཀྱིས་ཚིམ་པར་བྱས་ལ་གནས་སྐབས་མཐར་ཐུག་ཕན་བདེའི་གོ་འཕང་ཐོབ་ཕྱིར་སྨོན་ལམ་བཟང་པོ་བཏབ་པ་འདི་ནི་ཤིན་ཏུ་ཟབ་ཅིང་དགེ་ཚོགས་ཆེ་བ་ལགས། ཡང་དོན་དམ་པའི་ངོ་བོར་ནི། ལྷ་འདྲེའི་ཆོ་འཕྲུལ་ཙམ་དུ་མ་ཟད་སྣང་སྲིད་འཁོར་འདས་ཐམས་ཅད་རང་སེམས་ཁོ་ནའི་ཆོ་འཕྲུལ་ལས་མ་འདས་པས་སེམས་ཀྱི་འཁྲུལ་སྣང་ལས་གཞན་པའི་འདྲེ་གདོན་ནི་གང་དུའང་མ་གྲུབ། མེད་པ་ལ་ཡོད་པར་མཐོང་བའི་མཐོང་མཁན་དང་ཚོར་མཁན་ནི་རང་སེམས་འདི་ཉིད་ཡིན་ཏེ། དཔེར་ན་རྨི་ལམ་གྱི་སྣང་བ་ལ་སྐྱིད་སྡུག་ལེགས་ཉེས་ཅི་ཙམ་མཐོང་ཡང་སེམས་ཀྱི་སྣང་བ་ཙམ་ལས་མངོན་སུམ་དུ་མ་གྲུབ་པ་དང་མཚུངས་སོ། །དེའི་ཕྱིར་ཆོ་འཕྲུལ་དང་འཇིགས་སྐྲག་གི་རྣམ་པ་དེ་ཡང་རང་གིས་ཉམ་ལེན་སྙིང་པོར་གང་ལ་དྲིལ་བ་དེ་གས་བོགས་འདོན་ཞིང་ལམ་དུ་འཁྱེར་དགོས་ཏེ། རང་ཉིད་བླ་མའི་རྣལ་འབྱོར་ལ་ཐག་ཆོད་མཁན་ཞིག་ཡིན་ཕྱིན་ལྷ་འདྲེ་ཡང་བླ་མའི་རྣམ་རོལ་ཡིན་པའི་མོས་གུས་བྱ། རང་ཉིད་ཡི་དམ་ལྷའི་བསྐྱེད་རིམ་ལ་བློ་འགེལ་མཁན་ཞིག་ཡིན་ན་སྣང་གྲགས་ཐམས་ཅད་ལྷ་དང་སྔགས་ཀྱི་རང་བཞིན་ཡིན་པས་ལྷ་འདྲེ་ཡང་ཡི་དམ་གྱི་ལྷ་ལོས་ཡིན་སྙམ་པས་དག་སྣང་སྦྱང་། རང་ཉིད་ཕྱག་རྫོགས་ཀྱི་ལྟ་སྒོམ་ཁོ་ནའི་ཉམས་ལེན་གང་ལ་བློ་ཁེལ་བ་དེ་དག་བསྲེས་ནས་ལམ་དུ་འཁྱེར་བ་མ་གཏོགས་ཐབས་གཞན་འཚོལ་མི་དགོས་པས་ཐུགས་ལ་བཞག་པར་ཞུ། དཔོན་དྲུང་ཉིད་ཐུགས་དམ་ལ་ནན་ཏན་མཛད་པ་ཤིན་ཏུ་རྗེས་སུ་ཡི་རང་ཞིང་། བསམ་གཏན་གྱི་ངང་ལ་གནས་བཞིན་ཏུ་འདུག་བསམ་མཁན་དེ་དྲན་རིག་གི་ངོ་བོ་ཡིན་ལ། གནས་མཁན་དང་གནས་ལུག་བསམ་མཁན་དེ་གཉིས་མིན་པས་གཅིག་རང་ཡིན་ཀྱང་། རེ་ཞིག་དབྱེ་ན་གནས་པ་དེ་ཉམས་ཀྱི་བྱེ་བྲག་ཡིན་ཞིང་གནས་འདུག་བསམ་མཁན་དེ་སེམས་ཀྱི་ངོ་བོ་དངོས་ཡིན་པས་གཙོ་བོ་དེ་རང་དགོས་རྒྱུ་ཡིན། དེ་བཞིན་དུ་འགྱུ་དུས་ཀྱང་འགྱུ་བ་དེ་རྣམ་རྟོག་ཡིན། འགྱུ་འདུག་སྙམ་མཁན་དེ་དྲན་པ་སེམས་ཀྱི་ངོ་བོ་ཡིན་པས་དེ་དགོས་རྒྱུ་ཡིན། དྲན་པའི་རིག་པ་ཐུགས་༼འཐུག་ཡིན་ནམ་དཔྱད་༽ཆུང་སྐྱོན་གྱིས་འགྱུས་པ་མ་གཏོགས་དྲན་ཐུགས་༼འཐུག་༽ཆེ་དུས་འགྱུ་རྒྱུ་མེད། དོན་ལ་ཁོ་རང་གཅིག་པུ་མ་གཏོགས་འགྱུ་མཁན་དྲན་མཁན་ཐ་དད་གཉིས་མེད་པའི་གནད་ཀྱིས་ཡིན། ལབ་པ་དང་ལས་ཀ་བྱེད་དུས་དྲན་རིག་ཧྲིག་གེར་ཡོད་ཐོག་ནས་བྱེད་རྒྱུ་འམ། ལབ་རྒྱུ་དེ་ཡང་མ་འཆུག་ཙམ་དང་། དེ་ལ་ཧ་ཅང་གི་འཛིན་པ་མ་ཞུགས་པར་དྲན་རིག་སོ་མས་ཚི་ཟིན་ཙམ་གྱི་ངང་ནས་སྨྲ་བརྗོད་དང་ཁ་ཏོན་བཟླས་བརྗོད་སོགས་དང་འགྲོ་འདུག་ཟ་འཐུང་ཐམས་ཅད་བསྲེ་ཐུབ་པར་བྱེད་པ་དེ་ལ་སྒྱུ་མ་ལྟ་བུའི་ཏིང་འཛིན་ཟེར་ཏེ། བྱ་བྱེད་ཐམས་ཅད་ལ་དེ་འདྲ་མ་ཐུབ་པར་ལབ་བརྗོད་དང་ལག་ལས་སོགས་གང་ཡིན་དེ་ལ་སེམས་འཛིན་ཆེར་བྱས་ནས་དྲན་རིག་དེ་མི་ཡོང་ཚེ་འཇིག་རྟེན་ཐ་མལ་པ་དང་ཁྱད་མི་འོང་བས་སྒོམ་གྱི་མིང་མེད། དྲན་རིག་གསལ་རུང་གི་ངང་ནས་ལབ་ཆོག་པ་དེ་ལ་སླར་ད་དུང་དྲན་པ་འདུག་གོ་སྙམ་མཁན་ཞིག་མི་དགོས་ཏེ་དྲན་པ་ཁོ་རང་གིས་ཁོ་རང་ངོས་ཟིན་ཤུགས་ལ་ཡོད་པ་ཡིན། ལར་འཁོར་འདས་གཉིས་ཀྱི་སོ་མཚམས་དེ། རང་ལ་རང་གིས་རིག་མ་རིག་འདི་ཙམ་གཅིག་པུས་ཡིན་པས། རང་ངོ་མ་རིག་པ་ཡེངས་སོང་བ་དེ་ནི་འཁྲུལ་བ་ཡིན་མོད། རང་ངོ་ནམ་རིག་དུས་ཀྱི་སེམས་དེ་ལས་ལྷག་པ་ཞིག་གང་ཡང་མི་དགོས་པས། གནས་ཆའམ་བདེ་གསལ་མི་རྟོག་སོགས་ཅི་དང་ཅི་བྱེད་ཀྱང་ཉམས་ཀྱི་བྱེ་བྲག་ཙམ་མ་གཏོགས་སེམས་ངོ་དངོས་མཐོང་བ་མིན་པས། ཉམས་སུ་ལེན་རྒྱུའི་སྙིང་པོ་ནི་རང་རིག་རྗེན་པ་ཁོ་རང་མ་བརྗེད་ཙམ་བསྐྱང་བ་དེ་ཡིན་ནོ། །གཉིད་དུ་འགྲོ་ཁར་ཁྱོད་རང་ལ་བྱུང་ལུགས་དེ་ཚོ་འབྱུང་བ་ཐིམ་རིམ་གྱི་འཆར་ཚུལ་སྣང་ཞིང་། ཤི་ཁ་དང་གཉིད་དུ་འགྲོ་ཁ་གཉིས་ཐིམ་ཚད་ཆེ་ཆུང་མ་གཏོགས་ཕྱོགས་འདྲ་ཙམ་འོང་བ་ཡིན་འདུག །གང་ལྟར་ཡང་གཉིད་འོད་གསལ་དུ་འགྲོ་ཐབས་ཀྱི་གདམས་ངག་རིགས་མི་འདྲ་བ་གསར་རྙིང་གི་བཀའ་སོ་སོར་མང་མོད་ཀྱང་གནད་བསྣུན་བྱེད་པར་ཐུབ་དཀའ་བས། དེ་བས་ད་ལྟའི་དྲན་རིག་འདི་རང་ལ་གོམས་བཅུག་པ་དགའ་ཆེ་བས་ན། གཉིད་འགྲོ་ཁར་དྲན་པ་ཤུགས་ཧ་ཅང་ཆེ་ན་གཉིད་མི་འོང་། ཤུགས་ཆུང་ན་ཟིན་ཐུབ་དཀའ་བས། གཉིད་དུ་འགྲོ་ཁར་བསམ་བློ་གཞན་མི་གཏང་བར་དྲན་རིག་མ་ཡེངས་ཙམ་ལ་བཞག །གཉིད་ནམ་སད་ལ་དྲན་པ་འཕྲོ་མཐུད་དེ་འབད་ན། གཉིད་ལ་མ་ཟིན་ཡང་སད་པའི་འཕྲོ་ལ་དྲན་པ་སླེབས་ན་རེ་ཞིག་དེས་ཆོག །འོད་གསལ་ཐོད་རྒལ་གྱི་ཉམས་ལེན་ཚུལ་ལྡན་བྱེད་ན་ལག་ཁྲིད་ཞིབ་ནན་ཞིག་མེད་ཐབས་མ་མཆིས་ལགས། གཙོ་བོ་ནི་འཇའ་འོད་ཐིག་ལེ་ཅི་དང་ཅི་ལྟར་ཤར་བ་ཐམས་ཅད་རང་རིག་པའི་རང་མདངས་ཁོ་ན་མ་གཏོགས་ཕྱི་ནས་ཚུར་བྱུང་བ་མ་ཡིན་པར་ཐག་ཆོད་དགོས། དེ་ལྟར་ཤར་བ་ལ་དགའ་བྲོད་དང་ཞེན་འཛིན་སྐྱེ་ན་གོ་མི་ཆོད། དེ་ཡང་ཟླ་འོད་དང་མར་མེ་སོགས་ལ་བལྟ་ཚུལ་བཤད་ཀྱང་། གཙོ་བོ་ཉི་མ་ཤར་མ་ཐག་དང་ནུབ་ཁ་གཉིས་ཀྱི་དུས་ལ་བལྟ་བ་རང་འཕེལ་སྐྱེད་ཆེ་ཞིང་། ཉི་མ་ཚ་དུས་ནི་མིག་ལ་གཟེན་ཏེ། ཅིས་ཀྱང་བལྟ་ན་སྣམ་བུ་རྒྱ་ཚོས་མ་དང་དམར་པོ་གང་རུང་མིག་ལ་བཀབ་ནས་བལྟ་དགོས། འོད་གསལ་གྱི་སྣང་བ་ལ་ནམ་བལྟས་ཀྱང་ཐུགས་དམ་དྲན་རིག་ངོས་ཟིན་ཐོག་དང་མ་བྲལ་བ་གལ་ཆེ་ཞིང་། འཇའ་འོད་ལྔ་ལྡན་དབྱིབས་མ་ངེས་པར་གྱེན་ཐུར་འཕྲེད་སོགས་གར་ཡང་འཆར་བ་དང་། འོད་ལྔའི་ཐིག་ལེ་སྦྲེལ་མ་ཆེ་ཆུང་སྣ་ཚོགས་སུ་ཤར་བ་དེ་དགདབྱིངས་རྣམ་དག་གི་སྒྲོན་མ་དང་། ཐིག་ལེ་སྟོང་པའི་སྒྲོན་མ་ཡིན་ལ། དེའི་ནང་དང་བར་མཚམས་གང་དུ་ཡང་ངེས་མེད་དུ་ཐིག་ལེ་ཉ་མིག་འདྲ་བ་མང་པོ་དང་། མུ་ཏིག་གི་ཕྲེང་བ་ཐག་པ་ཆད་པ་ལྟ་བུ་གྱ་གྱུར་འགྲོ་འོང་བྱེད་པ་དེ་ཐམས་ཅད་ནི་ཤེས་རབ་རང་བྱུང་གི་སྒྲོན་མ་རིག་པ་ཁོ་རང་གི་མདངས་འཆར་བ་རྡོ་རྗེ་ལུ་གུ་རྒྱུད་ཡིན་པས་ན། མིག་དང་སེམས་གཉིས་ཀ་དེ་ལ་གཏད་ཅིང་ཡེངས་མེད་འཛིན་མེད་དུ་ཉམས་སུ་བླང་བར་བྱ། འདིའི་སྐབས་སུ་གསར་མ་བ་ཐམས་ཅད་ཀྱིས་འཇའ་འོད་ཀྱི་ཐིག་ལེ་དེ་འདྲ་ལ་རིག་པ་གཏད་པ་དང་ཕྱི་རོལ་ས་རྡོ་རི་བྲག་སོགས་ལ་གཏད་པ་དང་ཁྱད་པར་མི་འོང་སྟེ། འཁྲུལ་ན་འཁྲུལ་མཉམ་དང་། གྲོལ་ན་གྲོལ་མཉམ་ཡིན་ཟེར་མོད་ཀྱང་། དེ་གཉིས་མི་འདྲ་སྟེ་ཕྱི་ཡི་སྣང་ཡུལ་འདི་ནི་བག་ཆགས་འཁྲུལ་བའི་ལས་སྣང་ཡིན་ཞིང་། འོད་གསལ་གྱི་འཆར་སྒོ་འདི་ཀ་རང་རིག་པ་ཡེ་ཤེས་ཀྱི་འཆར་སྒོའི་རང་མདངས་ཡིན་པས་གཏན་ནས་མི་མཚུངས་པའི་རྒྱུ་མཚན་རྒྱས་པ་རྫོགས་ཆེན་རྣམས་སུ་འབྱུང་བ་ལྟར་རོ། །མདོར་ན་ཉམས་སུ་ལེན་རྒྱུའི་ཆོས་ཐམས་ཅད་ཀྱི་སྙིང་པོ་ནི་ཁྲེགས་ཆོད་རང་རིག་ཁོ་ན་ལ་དྲིལ་བ་མཛད་པར་ཞུ། ཐུགས་དམ་གྱི་ངོ་བོ་ལ། བཀའ་གསར་རྙིང་དང་ཕྱག་རྫོགས་སོགས་མིང་བཟང་བཟང་མང་པོ་དང་ཟབ་ཟབ་ཡིན་ཡིན་ཅི་ཙམ་བརྗོད་ཀྱང་དོན་དམ་པའི་སྙིང་པོ་ལ་ད་ལྟའི་སེམས་མི་བྱེད་དགུ་བྱེད་འདི་ཁོ་རང་གང་དྲན་གང་ཤར་ལ་རིག་པ་ངོས་ཟིན་ཙམ་བྱེད་པ་ལས་ལྷག་པ་གང་ཡང་བྱ་རྒྱུ་མེད། གནས་པ་སྐྱོང་མི་སྐྱོང་ཞེས་ཟེར་སྲོལ་འདུག་ཀྱང་དེ་ནི་དང་པོ་ཞི་གནས་སྦྱང་དུས་ཀྱི་སྐད་ཆ་ཡིན། སྒོམ་དངོས་གཞི་ལ་གནས་པ་གཅིག་པུ་དགོས་པ་མ་ཡིན་ཏེ། གནས་འགྱུ་གང་བྱུང་ཐམས་ཅད་ལ་དྲན་རིག་ངོས་ཟིན་ན་ཐམས་ཅད་སྒོམ་ཡིན། མཉམ་བཞག་ཡིན། རིག་པ་རང་ངོ་མ་ཤེས་ན་ནི། གནས་ཀྱང་སྒོམ་མིན་ལ། འགྱུ་ཡང་སྒོམ་མིན། མདོར་ན་སྒོམ་ཞེས་བྱ་བ་ནི་ད་ལྟའི་རང་སེམས་ཧྲིག་གེ་བ་འདི་ངོས་ཟིན་པ་དེ་ལ་སྒོམ་གྱི་ངོ་བོ་ཡང་ཟེར། མཉམ་བཞག་ཀྱང་ཟེར། ལྟ་བ་སྒོམ་པ་སྤྱོད་པ་ལ་སོགས་མིང་ཅི་བཏགས་ཀྱང་འདི་ལས་གཞན་མེད། སེམས་འཕྲོ་མ་བཅུག་པར་གནས་པ་ཁོ་ན་ལ་སྒོམ་དུ་ཞེན་ན་བློས་བྱས་ཀྱི་སྒོམ་ཡིན། རང་ངོ་མ་རིག་པར་སེམས་ཡུན་རིང་པོར་མི་འཕྲོ་བར་གནས་ཀྱང་ཉམས་ཙམ་ཡིན། འཕྲོ་བ་རྣམ་རྟོག་ཡིན། དེ་གཉིས་ཀས་སྒོམ་གྱི་གོ་མི་ཆོད། འགག་དོན་ལ་རྣམ་རྟོག་དུག་ལྔ་འཁྲུལ་བའི་བྱེ་བྲག་ཅི་དང་ཅི་ཤར་བྱུང་ཡང་། དེ་སྤང་བ་དང་བཀག་པའི་རྩོལ་བ་ཡང་མི་བྱ། དེའི་རོ་མྱངས་བའི་རྗེས་ལ་ཕར་ཡང་མི་འབྲང་། ཁོ་རང་བདག་མེད་དུ་བསྐྱུར་བ་གཅིག་པུས་ཆོག །རང་རིག་རྗེན་པ་ཧྲིག་གེ་བ་འདི་འགྲོ་འདུག་ཟ་ཉལ་ཐམས་ཅད་དུ་མ་བརྗེད་ན་གཞན་པའི་སྒོམ་རྒྱུ་གང་ཡང་མི་དགོས། ཡི་དམ་གྱི་ལྷ་དངོས་སུ་བཀྲ་ལམ་མེར་མཇལ་ཡང་རང་སེམས་ཀྱི་འཆར་སྣང་ཙམ་ཡིན། དེ་ལ་ཕར་སྐྱབས་མཆི་མི་དགོས་རང་རིག་པས་ཆོག །བདུད་བགེགས་བྱེ་བ་དུང་ཕྱུར་གྱི་དམག་བྱུང་ནས་རང་ཉིད་ཤ་དུམ་ཁྲག་འཐོར་དུ་བཏང་བྱུང་ཡང་རང་སྣང་ཡིན་པས་ཞེད་མི་དགོས། དོན་དམ་པ་ལ། འཁོར་འདས་ཐམས་ཅད་སེམས་ཀྱི་སྣང་བ་མིན་པ་ནི་གང་ཡང་མེད་པས་གང་ལའང་བདེན་འཛིན་མེད་པ་གལ་ཆེ། དེའི་ངང་ནས་སེམས་ཀྱི་རྩལ་མདངས་འགག་མེད་ཀྱི་འཆར་སྒོ་ཀུན་རྫོབ་ཀྱི་རང་གཟུགས་རྨི་ལམ་ལྟ་བུ་འདི་ཁྱད་དུ་མི་གསད་པར་ལས་རྒྱུ་འབྲས་ཀྱི་ཞིབ་ཆ། སྤྲོས་བཅས་ཀྱི་དགེ་སྦྱོར། ཚོགས་བསགས་སྒྲིབ་སྦྱང་། ཡུལ་གོང་མ་ལ་མོས་གུས། འོག་མ་ལ་སྙིང་རྗེ། བར་མ་ལ་དག་སྣང་སོགས་མི་སྤང་། སྒོ་གསུམ་ཆོས་དང་མཐུན་པར་བྱ། སེམས་སྟོང་པ་ཉིད་ཀྱི་གནས་ཚུལ་གོ་ཡང་འཁྲུལ་བའི་བག་ཆགས་མ་ཟད་བར་ལ་ཚིག་ལེགས་ཉེས་ཀྱི་གཏམ་ཙམ་ཡང་མི་ཁྱག་ཅིང་། ཚེར་མ་ཟུག་པའམ་མེ་སྟག་ཕོག་པ་ཙམ་ཡང་མི་བཟོད་པ་ལགས། སྟོང་སྐད་ཐོ་ཅོ་བྱེད་པ་མ་ཡིན་པར། རང་རྒྱུད་རང་གིས་བཏུལ། སྐྱིད་སྡུག་ཅི་བྱུང་ཡང་བླ་མ་དཀོན་མཆོག་གསུམ་ལ་བློ་ལིང་བསྐྱུར་བྱ། རྟག་ཏུ་དམན་ས་བཟུང་ཞིང་དག་སྣང་སྦྱང་། ཚེ་འདི་བློས་བཏང་ནས་རི་ཁྲོད་དུ་མི་ཚེ་འཁྱོལ་བས་བླ་མའི་སྐུ་དྲིན་དང་མཁའ་མཉམ་གྱི་ཕ་མའི་དྲིན་ཆོས་ཀྱིས་འཁོར་བ་ཡིན་པས་ཐུགས་བཞག་ཞུ། བདག་རྒན་པོའི་ཁ་ཆེམས་སྙིང་གཏམ་ཡིན་ནོ་ཐུགས་ལ་སྟིམས། ཐུགས་དམ་གྱི་ཆ་ཐམས་ཅད་ལ་སྔར་ཞུས་པ་ལྟར་ལས་ལྷག་པ་མེད་ཀྱང་གཙོ་བོར་ཕྱག་རྫོགས་གང་ལའང་ཉིན་སྣང་གི་རང་རིག་བཅོས་མིན་འདི་ག་ཡེངས་མེད་འཛིན་མེད་དུ་སྐྱོང་བ་ཁོ་ན་གཅིག་དྲིལ་མཛད་པ་དང་། གཉིད་དང་འཆི་ཁ་བར་དོ་སོགས་ནམ་གྱི་ཚེ་ཡང་གདམས་པ་སྣ་ཁ་མང་པོ་མི་དགོས་པར་མ་བཅོས་ཆོས་སྐུ་འདི་ག་རང་གིས་ཆོག་ཅིང་ཟབ་པར་འདུག་པས། འགྲོ་འདུག་ཟ་ཉལ་གཉིད་སོགས་ཀུན་ལ་འདི་དམར་འཇུས་གནང་ན་ལེགས་སམ་སྙམ་འདུག་པས་དགོངས་འཇགས་འཚལ། དལ་འབྱོར་དོན་ཡོད་འདོད་པ་རྣམས་ནས་དམ་པའི་ཆོས་ཁོ་ན་ལ་བརྩོན་ཞིང་སྐྱིད་སྡུག་ལེགས་ཉེས་ན་ཚ་སྡུག་བསྔལ་རྐྱེན་ངན་གང་བྱུང་ཡང་སྒྲིབ་སྦྱང་དང་བྱིན་རླབས་སུ་ཤེས་ནས་གསོལ་འདེབས་ལ་འབད་ཅིང་བླ་མ་རང་སེམས་དབྱེར་མེད་སྐུ་གསུམ་གདོད་ནས་ལྷུན་གྲུབ་ཡེ་ནས་ཡིན་པར་ཤེས་པས་མ་ཡེངས་ཙམ་དུ་མ་འཁྲུལ་ཙམ་གསལ་ལེ་ཧྲིག་གེ་གུ་ཡངས་ཁྲོལ་ལེ་བའི་ངང་ནས་དགེ་སྦྱོར་རྣམས་དང་ཟུང་འཇུག་མཛད་པར་ཞུ།
སྐྱབས་གནས་དཀོན་མཆོག་གསུམ་དང་རྩ་བ་དང་བརྒྱུད་པའི་བླ་མ་ཡི་དམ་ལྷ་ཚོགས་མཁའ་འགྲོ་ཆོས་སྲུང་ཐམས་ཅད་ཀྱི་ཐུགས་རྗེ་ནུས་སྟོབས་དང་། ཆོས་ཉིད་རྣམ་པར་དག་པའི་རྟེན་འབྲེལ་གྱི་འཇུག་སྒོ་མཐའ་ཡས་པའི་བདེན་པ་དང་། ནུས་པའི་སྟོབས་ཀྱིས་ཟབ་ཆོས་འདིའི་བཀའ་ལུང་གཏད་ཡོངས་སུ་རྫོགས་པ་དུས་འདིར་ཐོབ་པར་གྱུར་ཅིགའདིའི་ཚིག་དོན་མ་ལུས་པ་ཡོངས་སུ་རྫོགས་པ་རྒྱུད་ལ་འདྲེས་ཤིང་ཉམས་ལེན་མངོན་དུ་གྱུར་ནས་ཚེ་འདི་ཉིད་ལ་རང་གཞན་གྱི་དོན་གཉིས་ལྷུན་གྱིས་གྲུབ་ཅིང་ནམ་མཁས་གར་ཁྱབ་ཀྱི་སེམས་ཅན་ཐམས་ཅད་སངས་རྒྱས་ཀྱི་ས་ལ་འགོད་ནུས་པར་ཤོག་ཅིགཀཱ་ཡ་སིདྡྷི་ཨཱོཾཿཝཀྐ་སིདྡྷི་ཨཱཿཙིཏྟ་སིདྡྷི་ཧཱུྃཿསརྦ་སིདྡྷི་ཧྲཱིཿའགག་དོན་ལ་ད་ལྟའི་རྣམ་རྟོག་འགྱུ་དྲན་འདི་ཀ་ལ་གསལ་བ་ཟེར་བ་ཡིན། འདི་ག་རང་གིས་རིག་ཙམ་དྲན་ཙམ་བྱེད་མཁན་དེ་ལ་དྲན་པ་ཡང་ཟེར། རང་རིག་ཀྱང་ཟེར། མཉམ་བཞག་ཀྱང་ཟེར། ལྷག་མཐོང་ཡང་ཟེར་བ་སྟེ་ཆོས་ལུགས་ཐམས་ཅད་ཀྱི་དགོངས་པ་མཐུན་པར་སྒོམ་ཉམས་སུ་ལེན་རྒྱུ་འདི་རང་གིས་ཆོག་པ་ཡིན་པས། འདི་ལས་ལྷག་པའི་སྒོམ་གནས་ཆའི་བདེ་གསལ་མི་རྟོག་སོགས་ཅི་ལྟ་བུ་བསྒྲུབས་ཀྱང་བཅོས་མ་ཁོ་ན་ཡིན་པས་མ་བཅོས་ཐ་མལ་གྱི་ཤེས་པ་བཟོ་མེད་དུ་མི་འགྲོ་ཞིང་། སྒོམ་སྐྱོན་མེད་དུ་མི་འགྱུར་བས་དེས་ན་གནད་གཅིག་པུ་ལ་ངེས་ཤེས་འདྲོང་ཐག་ཆོད་ཞིག་དགོས་ལགས་པས་དགོངས་འཚལ། ལྷ་དང་དཀྱིལ་འཁོར་སྔགས་དང་འོད་ཟེར་སྤྲོ་བསྡུ་སོགས་མཐའ་དག་ཀྱང་དོན་དེ་ཉིད་སྒོམ་མཁན་བསྒོམ་རྒྱུ་སྒོམ་པ་སོགས་སེམས་ལས་གཞན་མེད་པས་སེམས་ཀྱི་ངོ་བོ་སྟོང་པ་རྫོགས་རིམ། གསལ་ཆ་ལྷར་སྣང་བ་བསྐྱེད་རིམ། དེ་གཉིས་སེམས་གཅིག་པུར་ཚང་ཕྱིར་བསྐྱེད་རྫོགས་དབྱེར་མེད་ཡིན་ཏེ། འདི་སྐབས་ཀྱི་གོ་དོན་གསལ་བར་ཤེས་དགོས་སོ། །དེང་སང་བསྐྱེད་རིམ་པ་ཕལ་མོ་ཆེ་རྣམས་ནི་ཀུན་རྟོག་བློས་བྱས་ཀྱི་བསྐྱེད་རིམ་མ་གཏོགས། བསྐྱེད་རྫོགས་དབྱེར་མེད་ལ་བློ་ཁེལ་མཁན་ཆེར་མ་མཐོང་། ཡང་ཀུན་གྱི་སེམས་དང་རང་སེམས་བསྲེ་བ་གང་ཡིན་སྙམ་ན། སྤྱིར་ཡང་། བདེ་གཤེགས་སྙིང་པོས་འགྲོ་བ་ཡོངས་ལ་ཁྱབ། །གསུངས་པ་དེ་ཡང་མི་རེ་རེ་ལ་དུམ་བུ་བགོས་ནས་ཡོད་པ་ལྟ་བུ་མ་ཡིན་ཏེ། སངས་རྒྱས་ཐམས་ཅད་ཀྱི་ཐུགས། སེམས་ཅན་ཐམས་ཅད་ཀྱི་སེམས། སྣང་གྲགས་ཐམས་ཅད་ཀྱི་རང་ཚུལ་མཐའ་དག་རྒྱར་མ་ཆད་ཕྱོགས་སུ་མ་ལྷུང་པ། ཡེ་གདོད་མ་ནས་རང་བཞིན་ཆོས་ཀྱི་སྐུར་ཀུན་ལ་རྟག་ཁྱབ་ལྷུན་གྲུབ་ཕྱོགས་རིས་བྲལ་བའི་ཐིག་ལེ་ཉག་གཅིག་ཡིན་ཀྱང་རིག་མ་རིག་དང་། རྟོགས་མ་རྟོགས། འཁྲུལ་མ་འཁྲུལ་ཁོ་ནའི་ཁྱད་པར་དུ་གྱུར་པ་ཡིན་ལ། ད་ལྟ་ལམ་ཉམས་ལེན་གྱི་སྐབས་སུ་ཡང་གོང་མ་ཚོར་ཡང་བཤད་པ་ལྟར་བདག་དང་སེམས་ཅན་ཐ་དད་དུ་མ་གྲུབ་ཀྱང་སྣང་ཚུལ་ཐ་དད་ལྟར་སྣང་བ་ཙམ་ཡིན་པའི་ཚུལ་རྟོགས་ན་སེམས་ཅན་གྱི་སེམས་དང་རང་གི་སེམས་སླར་བསྲེ་རྒྱུ་ཞིག་མ་གྲུབ་སྟེ། ཡེ་ནས་འདྲེས་པ་ཡིན་ལ། འོན་ཀྱང་ལས་དང་པོ་པའི་རྣལ་འབྱོར་དག་གིས་ནི། སེམས་ཀྱི་རྩལ་སྦྱོང་ངམ་འགག་མེད་ཀྱི་རོལ་རྩལ་སྒྱུ་འཕྲུལ་ཙམ་དུ་བླ་མའི་རྣལ་འབྱོར་བསྒོམ་པ་དང་། སེམས་ཅན་ཐམས་ཅད་ལ་བྱམས་སྙིང་རྗེ་སེམས་བསྐྱེད་དང་། ལས་འབྲས་བསླུ་མེད་ལ་ཡིད་ཆེས་སོགས་བསྐྱེད་པ་གལ་ཆེ། དཔལ་སྤྲུལ་རིན་པོ་ཆེའི་ཞལ་རྒྱུན་ནོ།། །།