ཐུན་མོང་དང་ཐུན་མིན་གྱི་སྔོན་འགྲོའི་གནད་བསྡུས།
དལ་འབྱོར་རྙེད་པར་དཀའ་བ་ལ། དང་པོའི་དུས་རྙེད་དཀའ་ཚུལ་རྣམས་ཞིབ་ཏུ་ཤེས་དགོས། རིག་སྟོང་ཟུང་འཇུག་གི་ལྟ་བ་ངོ་འཕྲོད་པའི་ཚེ་རྙེད་པར་དཀའ་བའང་དེ་ཡིན། དལ་འབྱོར་གྱི་སྙིང་པོ་ལོན་པར་བྱིན་གྱིས་རློབས་ཞེས་པའི་སྙིང་པོའང་རིག་སྟོང་གི་ལྟ་བ་ཡིན་གསུངས། ༈ འཆི་བ་མི་རྟག་ལའང་། དང་པོའི་དུས་སུ་ཕྱི་སྣོད་འཇིག་རྟེན། ནང་བཅུད་སེམས་ཅན་རྣམས་མི་རྟག་ཚུལ་དུ་བསྒོམ། དེ་ནས་དུས་ཉིན་ཞག་གཅིག་ལའང་མི་རྟག་པའི་ཚུལ་དུ་བསྒོམ། དེ་ནས་དེ་རིང་འདི་ལའང་མི་འཆི་བའི་ངེས་པ་མེད་པས་མི་རྟག་པ་བསྒོམ། དེ་ནས་དབུགས་ཀྱི་འགྲོ་འོང་ལའང་མི་རྟག་པ་བསྒོམ། རིག་སྟོང་གི་ལྟ་བ་རྟོགས་པའི་ཚེ་སྐྱེ་འཆིས་གོས་མ་མྱོང་བ་ཡིན་པས། བྱང་ཆུབ་ཀྱི་སེམས་ལ་སྐྱེ་འཆི་ཡེ་ནས་མེད་ཞེས་གསུངས་པ་ལྟ་བུ། ༈ ལས་རྒྱུ་འབྲས་ལའང་རྒྱུ་དགེ་བ་ལས་འབྲས་བུ་བདེ་བ་འབྱུང་། རྒྱུ་སྡིག་པ་ལས་འབྲས་བུ་སྡུག་བསྔལ་འབྱུང་། རྒྱུ་དགེ་སྡིག་འདྲེས་མའི་ལས་ཀྱིས་འབྲས་བུ་བདེ་སྡིག་འདྲེས་མ་འབྱུང་བ་བསླུ་མེད་ཡིན་པ་རྒྱལ་བས་ཀྱང་ཕྱག་གིས་མི་ཁེབས་གསུངས་སོ། །རིག་སྟོང་ཟུང་འཇུག་གི་ལྟ་བ་རྟོགས་པའི་ཚེ་རིག་སྟོང་ཟུང་འཇུག་གི་ཀློང་དེ་ནས་རིག་རྩལ་ཇི་ལྟར་གཡོས་ཀྱང་བག་ཆགས་བསོགས་ལོང་མེད་པར་གྲོལ་བའི་རང་བཞིན་ནོ། ༈ །འཁོར་བའི་ཉེས་དམིགས་ཀྱང་། རང་བྱུང་གདོད་མའི་ཡེ་གཞི་འོད་གསལ་འདུས་མ་བྱས་པ་དེ་ལ་ནི་འཁོར་བ་མིང་མེད། འདས་པ་གཞི་མེད། འཁོར་འདས་གཉིས་ཀྱི་རི་མོ་དོད་མ་མྱོང་བ་ཡིན་གསུངས་སོ། ༈ །ཐར་པའི་ཕན་ཡོན་དེའང་། ཁམས་འདུས་མ་བྱས་པའི་སྙིང་པོ་རིག་སྟོང་ཟུང་འཇུག་གི་ལྟ་བ་ངོ་འཕྲོད་པའི་ཚེ་ཐར་པའི་ལམ་སྣེ་ཟིན་པ་ཡིན། ནང་གསལ་ཕྲ་བའི་ཡེ་ཤེས་ལ་དབང་འབྱོར་བའི་ཐར་བ་དང་དེ་ལས་སྐུ་གསུམ་སྟོན་པའི་སྐུར་བཞེངས་པའི་ཚེ་ཐམས་ཅད་མཁྱེན་པ་ཡིན་གསུངས་སོ། །བཤེས་གཉེན་བསྟེན་པའང་། དགེ་བའི་བཤེས་གཉེན་ཡང་དག་པ་ཞིག་གི་ཅི་གསུངས་གི་བཀའ་བསྒྲུབ་ནས། མཐར་རིག་སྟོང་གི་ལྟ་བ་རྟོགས་པའི་ཚེ་དགེ་བའི་བཤེས་གཉེན་ཡང་ཡིན། སྒོམ་བདག་པོའི་ལག་ཏུ་གཏད་པ་ཡིན་གསུངས་སོ། ༈ །སྐྱབས་འགྲོ་ནི། རྒྱུའི་སྐྱབས་འགྲོ་དང་འབྲས་བུའི་སྐྱབས་འགྲོ་གཉིས། འབྲས་བུའི་སྐྱབས་འགྲོ་ནི། གནས་ལུགས་རྡོ་རྗེའི་སྐྱབས་འགྲོ་ཞེས་པ་རིག་སྟོང་ཟུང་འཇུག་གི་ལྟ་བ་རྟོགས་པ་འདི་ཡིན་གསུངས་སོ། ༈ །སེམས་བསྐྱེད་ལའང་ཀུན་རྫོབ་བྱང་ཆུབ་ཀྱི་སེམས། དོན་དམ་བྱང་ཆུབ་གྱི་སེམས་དང་གཉིས། དོན་དམ་བྱང་ཆུབ་ཀྱི་སེམས་བསྐྱེད་ནི། དོན་དམ་ནི་ཆོས་ཀྱི་དབྱིངས་དང་སེམས་བསྐྱེད་པ་ན་ཆོས་ཀྱི་དབྱིངས་དེ་ཉིད་མངོན་སུམ་དུ་རྟོགས་པའི་རིག་པའི་ཡེ་ཤེས་ལ་བཞེད་པ་ཡིན་གསུངས་སོ། ༈ །རྡོ་རྗེ་སེམས་དཔའི་བསྒོམ་བཟླས་ཡང་། སྐྱབས་ཡུལ་ཐམས་ཅད་ཀྱི་བདག་ཉིད་རིགས་གཅིག་རྡོ་རྗེ་སེམས་དཔའ་རྩ་བའི་བླ་མ་ཡིན་པར་ཤེས་ནས་བླ་མའི་ཐུགས་དང་རང་གི་རིག་པ་གཉིས་དབྱེར་མེད་དུ་བསྲེ་བ་ནི་ཀུན་འདུས་ནོར་བུའི་ལུགས་ཞེས། ངོ་བོ་ཡེ་སྟོང་སྤྲོས་པ་དང་བྲལ་བའི་ཆ་རྫོགས་རིམ་གྱི་དཀྱིལ་འཁོར་དེའི་གདངས་མ་འགགས་པའི་ཆ་ལྷ་ཡི་དཀྱིལ་འཁོར་ཡིན་པས་བསྐྱེད་རྫོགས་གཉིས་ཡེ་ནས་ཟུང་འཇུག་ཏུ་འདུག་པས་ཞལ་ཕྱག་གི་རྣམ་པ་ཡང་སྤྲོ་བསྡུ་མི་དགོས་གསུངས་སོ། ༈ །མཎྚལ་ལའང་། ཀ་དག་སྤྲོས་པ་དང་བྲལ་བའི་ཆ་གཞི་མཎྚལ་གྱི་ཚུལ་དུ་ཡོད། དེའི་རང་གདངས་འགགས་པ་མེད་པའི་ཡེ་ཤེས་རིག་རྩལ་གྱི་ཆ་ཚོམ་བུའི་ཚུལ་དུ་ཡོད་པས་དེ་གཉིས་དབྱེར་མེད་ཟུང་འཇུག་ཏུ་ཡེ་གདོད་མ་ནས་བཞུགས་པ་དེ་མཎྚལ་ཡིན་གསུངས་སོ། ༈ །གཅོད་ཀྱང་། བྱང་ཆུབ་སེམས་ཀྱིས་རང་འདོད་ཡིད་བྱེད་གཅོད། །སྟོང་ཉིད་ལྟ་བས་འཁོར་བའི་འཁྲུལ་རྟོག་གཅོད། །ཞེས་པས་རིག་སྟོང་ཟུང་འཇུག་གི་ཀློང་དུ་གཟུང་འཛིན་ཕྲ་རགས་ཐམས་ཅད་རང་དྭངས་རང་ཡལ་དུ་འགྲོ་བ་ལ་གཅོད་ཅེས་པ་ཡིན། ༈ བླ་རྣམ་ཀྱང་། རྩ་བའི་བླ་མ་དེ་ཉིད་སྐྱབས་གནས་ཀུན་འདུས་ཡིན་པས། རྡོ་རྗེ་སྤུན་སྲིང་རྣམས་དང་དུས་གསུམ་ཀྱི་སངས་རྒྱས་ཐམས་ཅད་ཀྱི་བདག་ཉིད་གཅིག་པུ་འདི་རྩ་བའི་བླ་མ་དེ་ཉིད་ཀུན་མཁྱེན་ཡེ་ཤེས་ཀྱི་ཕུང་པོ་ཅན་གཅིག་ཏུ་གྱུར་པ་དེ་མདུན་གྱི་ནམ་མཁར་བསྒོམ། གཟུགས་སུ་སྣང་བ་བླ་མའི་སྐུ། སྒྲ་རུ་གྲགས་པ་གསུང་། དྲན་རྟོག་ཐམས་ཅད་ཐུགས་ཀྱི་རྣམ་རོལ་དུ་གསལ་བ་ནི་ཅི་སྣང་བླ་མར་ཤར་བའི་བསྐྱེད་རིམ་ཡིན། བླ་མར་གསལ་བ་ཉིད་ནས་བླ་མའི་ཐུགས་དང་རང་གི་རིག་པ་གཉིས་དབྱེར་མེད་པ་རིག་སྟོང་ཟུང་འཇུག་གི་ངང་དུ་འཇོག་པ་ནི་ཐུགས་ཡིད་དབྱེར་མེད་འདྲེས་པའི་རྫོགས་རིམ་ཡིན་གསུངས། རྐྱེན་ངན་དང་ཆགས་སོགས་ཉོན་མོངས་པ་རྣམས་ཤར་བའི་ཚེ་བླ་མ་མཁྱེན་ཟེར་བ་དེ་ཡིན་གསུངས། ༈ འཕོ་བ་ནི། བླ་མའི་ཐུགས་དང་རང་གི་རིག་པ་དབྱེར་མེད་དུ་བསྲེ་ནས་རིག་སྟོང་ཟུང་འཇུག་གི་ཀློང་དུ་འཇོག་པ་ནི་འཕོ་བ་ཡིན་གསུངས། ༈ བསྔོ་བ་ནི། འཁོར་གསུམ་བདེན་པར་མ་གྲུབ་པའམ། རིག་སྟོང་གི་ཀློང་དེ་ན་གྲུབ་པ་མེད་པས་ལྟ་བའི་ངང་མདངས་དང་མ་བྲལ་བའི་ངང་ནས་བསྔོ་བ་ནི་བསྔོ་བ་ཡིན་གསུངས།