བྱ་བྲལ་རིན་པོ་ཆེའི་ཞལ་རྒྱུན་སྔོན་འགྲོའི་གནད་བསྡུས།

༈ བྱ་བྲལ་རིན་པོ་ཆེའི་ཞལ་རྒྱུན་སྔོན་འགྲོའི་གནད་བསྡུས་བཞུགས་སོ། །

བླ་མ་དང་འཇམ་པའི་དབྱངས་ལ་ཕྱག་འཚལ་ལོ། །བློ་ཆོས་སུ་འགྲོ་བའི་མན་ངག་བཞི། ཆོས་ལམ་དུ་འགྲོ་བའི་མན་ངགལམ་དེས་འཁྲུལ་བ་བཤིག་པའི་མན་ངག ། འཁྲུལ་སྣང་ཡེ་ཤེས་སུ་འཆར་བའི་མན་ངགདེ་རྣམས་ལ་གཞུང་ཡོངས་རྫོགས་སུ་འདུས་གསུངས། དང་པོ། བློ་ཆོས་སུ་འགྲོ་བའི་མན་ངག་བཞི་སྟེ། དལ་བའི་ལུས་རྟེན་རྙེད་པར་དཀའ་བས་འདི་སྣང་གི་བྱ་བ་བསྒྲུབ་པ་ལ་བློ་ལྡོག་དགོས་པ་དང་གཅིགརྙེད་པར་དཀའ་བ་རྙེད་ཀྱང་འཇིག་སླ་བས་མི་འཆི་སྙམ་པ་ལ་སོགས་རྟག་འཛིན་ལས་བློ་ལྡོག་དགོས་པ་དང་གཉིས། ཤི་ན་ཅང་མེད་དུ་མི་འགྲོ་བས་ལས་འབྲས་ཀྱི་རྗེས་སུ་འབྲང་བ་ཡིན་པས་སྡིག་པ་མི་དགེ་བ་ལས་བློ་ལྡོག་དགོས་པ་དང་གསུམ། འཁོར་བའི་གནས་མཐོ་དམན་གང་དུ་སྐྱེས་ཀྱང་སྡུག་བསྔལ་གྱི་རང་བཞིན་ཡིན་པས་མཐོ་རིས་ཐོབ་འདོད་ལས་ཀྱང་བློ་ལྡོག་དགོས་པ་དང་བཞི། མཐོ་རིས་ཐོབ་འདོད་ལས་བློ་ལྡོག་པར་དཀའ་བས་འཁོར་ལོས་བསྒྱུར་བའི་རྒྱལ་པོ་རྩིབས་ཀྱི་མུ་ཁྱུད་ཀྱི་ལོ་རྒྱུས་ལྟ་བུ་ཡིན། དེ་ཡང་བློ་ལྡོག་པའི་ཡུལ་བཞི་ཡོད། ལྡོག་བྱེད་ཀྱི་བློ་བཞི་ཡོད། ཇི་ལྟར་ལྡོག་པའི་ཚུལ་བཞི་ཡོད་གསུངས། རིག་སྟོང་གི་ལྟ་བ་ནོར་འཁྲུལ་མེད་པ་ཞིག་ངོ་འཕྲོད་ནས། དེ་ཡི་ངང་ལ་མཉམ་པར་བཞག་པའི་ཚེ། འཇིག་རྟེན་ཚེ་འདིའི་བྱ་བ་སྒྲུབ་པ་རྣམས་ཆམས་སེ་བཞག་ནས་སྟོང་ཉིད་ཀྱི་དོན་བསྒོམ་དགོས་པ་ཡིན་པས་ན། ཚེ་འདིར་སྣང་གི་བྱ་བ་བསྒྲུབ་པ་ལས་བློ་ལྡོག་ཡོད། དལ་འབྱོར་ཆུད་ཟོས་སུ་མ་སོང་བས་དལ་འབྱོར་ཀྱི་སྙིང་པོ་ལོན་པ་ཡིན་པས་རྙེད་པར་དཀའ་བའི་ཁྲིད་བསྒོམ་ཡོད། དེ་ལྟ་བུའི་རིག་སྟོང་ཆོས་ཉིད་ཀྱི་ཀློང་ན་ཆོས་ཅན་གྱི་སྣང་ཆ་ཐམས་ཅད་རྩལ་གདངས་མ་འགགས་པར་བདེན་མེད་དུ་ཡངས་ཁྲོལ་ལེ་གཟིགས་པས་རྟག་འཛིན་ལས་བློ་ལྡོག་ཡོད། འཆི་བ་མི་རྟག་པའི་སྒོམ་ཁྲིད་ཀྱང་ཡིན་པས་འཆི་མེད་གཉུག་མའི་བཙན་ས་ཟིན། བྱང་ཆུབ་ཀྱི་སེམས་ལ་སྐྱེ་འཆི་ཡེ་ནས་མེད་གསུངས། རང་བྱུང་ཡེ་ཤེས་ཀྱི་རྩལ་ལས་ཇི་ལྟར་ཤར་ཡང་བག་ཆགས་བསོག་ལོངས་མེད་པས་སྡིག་པ་མི་དགེ་བའི་ཆ་ལས་བློ་ལྡོག་ཡོད། ལས་རྒྱུ་འབྲས་ཀྱི་ཚོགས་པ་མི་ཚང་བས་ལས་རྒྱུ་འབྲས་མིག་བཞིན་དུ་བསྲུང་བ་ནི་དེ་ལ་ཟེར་རོ། །ཕྱི་ནང་སྣོད་བཅུད་ཐམས་ཅད་ཀྱི་གནས་ཚུལ་སྐུ་དང་ཞིང་ཁམས་ཀྱི་རང་བཞིན་དུ་ཤེས་པས་མཐོ་རིས་ཐོབ་འདོད་ལས་བློ་ལྡོག་པ་ཡིན་གསུངས་སོ། །འཁོར་བའི་ཉེས་དམིགས་ཀྱང་དེ་ལྟར་དུ་རྟོགས་སོ། སྟོན་པས། ཁམས་འདུས་མ་བྱས་པ་ནི། གཞི་བདེ་གཤེགས་སྙིང་པོའོ་གསུངས། །ཁམས་འདུས་མ་བྱས་པ་མངོན་དུ་གྱུར་པས་ཐར་པའི་ལམ་སྣ་ཟིན་པ་ཡིན། སྔགས་ཐུན་མོང་བས་རང་བཞིན་གཞིའི་གཞི་རྒྱུད་ཟེར། ཐུན་མོང་མ་ཡིན་པའི་རྒྱུད་སྡེ་རྣམས་ནས་རང་བྱུང་གི་ཡེ་ཤེས་ཟེར། རང་བྱུང་གདོད་མའི་ཡེ་གཞི་ལ་དབང་འབྱོར་བ་ནི་ཐར་བ་ཐོབ་པ་ཡིན་པས་ཉོན་མོངས་པའི་ཚ་གདུང་ལས་ཞི་བ་བསིལ་བ་ཡིན། ཐར་པའི་ཕན་ཡོན་ནོ། དགེ་བའི་བཤེས་གཉེན་ཡང་སྔར་གྱི་དགེ་འབྲས་ཞིག་གིས་ད་ལྟའི་རྩ་བའི་བླ་མར་སྣང་བ་ཡིན། རྨི་ལམ་དུ་བླ་མ་སྣང་བ་ལྟ་བུ་རང་སྣང་ཡིན་གསུངས་སོ། །བླ་མ་དགེ་བའི་བཤེས་གཉེན་དེ་ཡང་བསམ་པའི་སྒོ་ནས་ཅི་མཛད་ཆོས་སུ་མཐོང་བ། སྦྱོར་བའི་སྒོ་ནས་ཅི་གསུང་གི་བཀའ་སྒྲུབ་དགོས་པ་ཡིན་གསུངས། བླ་མ་ལ་རབ་བསྒྲུབ་པའི་མཆོད་པ། འབྲིང་ལུས་ངག་བྲན་དུ་བཀོལ་བ། ཐ་མ་འཁོར་གསུམ་ཡོངས་དག་གི་མཆོད་པ། རང་གི་ཡོ་བྱད་ལྷག་ལུས་མེད་པར། ཙིའུའི་ཚང་སྟན་དང་བཅས་པ། གཏོར་མ་སྡེར་དང་བཅས་པ་འབུལ་དགོས་གསུངས། བླ་མ་ཡང་རང་བྱུང་གི་ཡེ་ཤེས་ཀྱི་རྩལ་ལས་ཤར་བ་ཡིན་པས་རིག་སྟོང་གི་ལྟ་བ་རྟོགས་དུས་དགེ་བའི་བཤེས་གཉེན་ཆེན་པོ་ཡིན་གསུངས་སོ། །བདེན་གཉིས་ནི་དོན་དམ་ཀུན་རྫོབ་གཉིས་ཏེ། རྟོགས་བྱ་དང་རྟོགས་བྱེད་ཀྱི་ཁྱད་པར་ནི། རྟོགས་བྱ་དོན་དམ་གྱི་བདེན་པ་ནི། རྟོགས་བྱེད་སོ་སོ་རང་རིག་པའི་ཡེ་ཤེས་ཀྱིས་རྟོགས་སོ། །རྟོགས་བྱ་ཀུན་རྫོབ་ཀྱི་བདེན་པ་ནི། རྟོགས་བྱེད་རྣམ་པར་ཤེས་པའི་སྤྱོད་ཡུལ་ལས། དཔེར་སྣང་མུན་ལྟ་བུའོ། །དོན་དམ་བྱང་ཆུབ་ཀྱི་སེམས་ནི་ཆོས་ཀྱི་དབྱིངས་སྤྲོས་པ་དང་བྲལ་བའི་བརྗོད་བྱ་ལས་འདས་པའི་ཆ་དོན་དམ་དང་དེ་ཉིད་སོ་སོར་རང་རིག་པའི་ཡེ་ཤེས་ཀྱིས་ཡུལ་ཡུལ་ཅན་གྱི་རྣམ་པ་མ་ཡིན་པར་དམིགས་མེད་ཀྱི་ཚུལ་དུ་གཞི་དབྱིངས་གཅིག་གི་ཀློང་ན་དངོས་པོ་སྣང་བའི་ཆོས་ཐམས་ཅད་མ་འདྲེས་པར་འབྱམས་ཀླས་པར་གཟིགས་པ་ནི་བྱང་ཆུབ་ཀྱི་སེམས་ཡིན་གསུངས་སོ། །མཉམ་བཞག་ཏུ་དེ་ལྟར་རླུང་སེམས་རིག་པ་དངས་བའི་ཆའོ། །དེ་ལས་ལྡང་བའི་ཚེ་བརྩེ་བའི་སྙིང་རྗེ་ཆེན་པོས་དེ་ལྟར་མ་རྟོགས་པའི་མཁའ་ཁྱབ་ཀྱི་སེམས་ཅན་རྣམས་ལ་དམིགས་པ་དང་། ཤེས་རབ་སྟོབས་ཀྱིས་རྫོགས་པའི་བྱང་ཆུབ་ལ་དམིགས་པས། ཟུར་གཉིས་སམ་དོན་གཉིས་དང་ལྡན་པ་ཡིན་པས་སེམས་བསྐྱེད་གཅིག་ལྟར་སྟོང་ཉིད་སྙིང་རྗེའི་སྙིང་པོ་ཅན་ཡིན་གསུངས་སོ། །ལྟ་བ་ཚོགས་གཉིས་དང་འབྲེལ་ན། དམིགས་མེད་ཡེ་ཤེས་ཀྱི་ཚོགས་རིག་སྟོང་གི་ཡེ་ཤེས་དེ་ཉིད་ཡེ་ཤེས་ཀྱི་ཚོགས། རིག་སྟོང་ཟུང་འཇུག་གི་ཀློང་ན་རྟོགས་ཚོགས་ཐམས་ཅད་གྲོལ་བའི་རང་བཞིན་དུ་ཤེས་པའི་བསོད་ནམས་ཀྱི་ཚོགས་ཞོར་དུ་རྫོགས་པས་དམིགས་བཅས་བསོད་ནམས་ཀྱི་ཚོགས་ཡིན་ནོ། །ཚོགས་ཆེན་ཡེ་རྫོགས་ཡིན། ཡང་ན་སྨོན་འཇུག་གཉིས་དང་འབྲེལ་ན་དེ་ལྟར་དུ་བསྒྲུབ་པར་བྱ་དགོས་བསམ་པའི་སྨོན་སེམས། དེ་ལ་འཇུག་ནས་ཚུལ་བཞིན་དུ་བྱེད་པ་འཇུག་སེམས། གསུམ་ལྟར་བསླབ་པ་གསུམ་དང་འབྲེལ་ན། རིག་སྟོང་ཟུང་འཇུག་གི་ཀློང་ན་དགེ་དང་མི་དགེ་བའི་རྟོག་ཚོགས་ཐམས་ཅད་བསོགས་ལོངས་མེད་པར་དག་གྲོལ་དུ་སོང་བས་སྤང་གཉེན་ལས་འདས་པ་ཡིན་པས་ཚུལ་ཁྲིམས་ཀྱི་བསླབ་པ། དེའི་ངང་དུ་ཡུན་ཅི་ཙམ་དུ་གནས་ན་ལྷག་པ་ཏིང་ངེ་འཛིན་གྱི་བསླབ་པ། དེ་ཡང་སོ་སོ་རང་རིག་གི་ཡེ་ཤེས་ཀྱིས་དམིགས་མེད་དུ་ཆོས་ཅན་ཐམས་ཅད་མ་འགགས་པར་མཁྱེན་པ་ཤེས་རབ་ཀྱི་བསླབ་པའོ། །ཡང་ན་ཚུལ་ཁྲིམས་གསུམ་དང་འབྲེལ་ན། ཉེས་སྤྱོད་མཐའ་དག་ལས་འདས་པ་ཡིན་པས་ཉེས་སྤྱོད་སྡོམ་པའི་ཚུལ་ཁྲིམས། དགེ་ཆོས་མཐའ་དག་གོས་ཀྱི་སྐ་རགས་ལྟ་བུར་རང་རྒྱུད་ལ་ངེས་པས་དགེ་བ་ཆོས་སྡུད། དེ་ལྟ་བུ་རྟོགས་པའི་ཚེ་སེམས་ཅན་དོན་བྱེད་ཡིན་གསུངས་སོ། །ཚད་མེད་རྣམ་པ་བཞི་དང་འབྲེལ་ན། ཡིད་དུ་མི་འོང་བའི་ཆ་བཏང་ནས། ཡིད་འོང་གི་བྱམས་པས་དྲངས་ཏེ་དེ་ལྟར་མ་རྟོགས་པའི་མཁའ་ཁྱབ་ཀྱི་སེམས་ཅན་རྣམས་ལ་བརྩེ་བའི་སྙིང་རྗེ། དུས་རེ་འགའ་བ་མ་ཡིན། ཡུལ་ཕྱོགས་རེ་ཙམ་མ་ཡིན་མཁའ་ཁྱབ་ཏུ་དམིགས་པས་བཏང་སྙོམས། དེ་བཞིན་ཏུ་བསྒྲུབ་པ་ལ་རྗེས་སུ་ཡི་རང་གི་དགའ་བའོ། །ཡང་ན་འཁོར་ལོ་བཞི་དང་འབྲེལ་ན། དང་པོ་བཀའ་བདེན་བཞི་ནི། སྡུག་བསྔལ་བདེན་པ། ཀུན་འབྱུང་བདེན་པ། ལམ་གྱི་བདེན་པ། འགོག་པའི་བདེན་པ་དང་བཞི་སྟེ། འཁོར་བའི་རྒྱུ་དང་འབྲས་བུ་གཉིས། མྱང་འདས་ཀྱི་རྒྱུ་དང་འབྲས་བུ་གཉིས་ཡོད། འཁོར་བའི་རྒྱུ་ཀུན་འབྱུང་ལས་དང་ཉོན་མོངས་པ། འབྲས་བུ་ནི་སྣོད་བཅུད་འདི་ཡིན། མྱང་འདས་རྒྱུ་ལམ་གྱི་བདེན་པ་ཡིན། འབྲས་བུ་ནི་འགོག་བདེན་མངོན་དུ་གྱུར་པ་ཡིན། འཁོར་བའི་རྒྱུ་དང་འབྲས་བུ་འདི་ནི། རྒྱུ་དགེ་བ་ལས་འབྲས་བུ་བདེ་བ་འབྱུང་། རྒྱུ་སྡིག་པ་ལས་འབྲས་བུ་སྡུག་བསྔལ་འབྱུང་ངེས་བསླུ་མེད་ཡིན་པས། དགེ་སྒྲུབ་སྡིག་སྤང་བྱེད་པ་གལ་ཆེ་གསུངས། དེ་ལྟར་གནད་དང་ལྡན་ན་ལམ་བདེན་ཡིན་ནོ། །མྱང་འདས་རྒྱུ་ལམ་བདེན་དེ་ཉིད་ཀྱང་དངོས་རྒྱུ་ཡིས་རང་འབྲས་བསྐྱེད་པ་ལྟ་བུ་མ་ཡིན་མོད། ལམ་དེ་ལ་མ་བརྟེན་པར་སངས་རྒྱས་ཀྱི་གོ་འཕང་མི་ཐོབ་པའི་ཕྱིར་ན། རྒྱུ་རུ་འདོད་པ་ཡིན་གསུངས་སོ། །གསང་སྔགས་རྡོ་རྗེ་ཐེག་པའི་ལུགས་ལ། ཀུན་འབྱུང་ལས་ཉོན་གྱི་རྟོག་ཚོགས་རྣམས་བག་ཆགས་བསོགས་ལོངས་མེད་པར་ཤེས་པས་ལམ་བདེན་དང་། ཕྱི་སྣོད་ཀྱི་འཇིག་རྟེན་འབྱུང་བ་ལྔ་འདི་ཡུམ་ཆེན་ལྔའི་རང་བཞིན། ཕུང་ལྔ་རིགས་ལྔའི་རང་བཞིན་གནས་ཚུལ་དུ་རྟོགས་པས་འགོག་བདེན་ཡིན་གསུངས། འཁོར་བའི་རྒྱུ་ཀུན་འབྱུང་གི་རྟོག་ཚོགས་རྣམས་རང་གྲོལ་དུ་རྟོགས་པས་རྒྱུ་རྐྱེན་གྱི་ཚོགས་པ་མི་ཚང་བས་འབྲས་བུ་བསྐྱེད་པའི་བྱ་བ་མི་བྱེད། སྣོད་བཅུད་འདི་སྐུ་དང་ཡེ་ཤེས་ཀྱི་རང་བཞིན་དུ་རྟོགས་པའོ། །འཁོར་ལོ་བར་བའི་བསྟན་དོན་ནི། དབྱིངས་སྤྲོས་པ་དང་བྲལ་བ་དེ་ཡིན། འཁོར་ལོ་ཐ་མའི་བསྟན་དོན་ནི། སྐུ་དང་ཡེ་ཤེས་ཀྱི་རང་བཞིན་དབྱིངས་རིག་ཟུང་འཇུག་ཡིན་ནོ། །ལམ་ལྔ་དང་འབྲེལ་ན། ཉམས་ལེན་བྱས་པའི་ཚེ་ལུས་ངག་ཡིད་གསུམ་ཚོགས་པ་ཚང་དགོས་པས་ཚོགས་ལམ། མ་རིག་པའི་དབང་དུ་སོང་ཚེ། དྲན་པ་དེ་ཡིས་རིག་སྟོང་ཟུང་འཇུག་གི་ལྟ་བ་དེ་ཉིད་ལ་སྦྱོར་བར་བྱེད་པས་སྦྱོར་ལམ། རིག་སྟོང་གི་ཡེ་ཤེས་མངོན་སུམ་དུ་མཐོང་བས་མཐོང་ལམ་ཡིན་ནོ། །དེ་ཉིད་ལ་ཡང་ཡང་གོམ་པར་བྱེད་པས་སྒོམ་ལམ། མི་སློབ་པ་སངས་རྒྱས་ས་ཡིན་ནོ། ཕར་ཕྱིན་དྲུག་དང་འབྲེལ་ལུགས་ཡོད། སེམས་བསྐྱེད་ཉི་ཤུ་རྩ་གཉིས་དང་འབྲེལ་ནའང་། གཞི་ལྟ་བ་ལ་དེ་ལྟར་དུ་ཚང་ངོ་། །དེ་ལྟ་བུའི་དོན་དམ་བྱང་ཆུབ་ཀྱི་སེམས་མཉམ་བཞག་གི་སྐབས་སུ་དཔེར་ན་མཐའི་རྒྱ་མཚོའི་ཀློང་དེར་ཆུ་ཕྲན་ཐམས་ཅད་ཐིམ་པ་བཞིན་དུ། རིག་སྟོང་གི་ཀློང་དུ་ཆོས་ཅན་གྱི་སྣང་བ་ཐམས་ཅད་མ་སྤང་ཡེ་གྲོལ་དུ་གཟིགས་པ་ཡིན། གནད་དེ་ལྟར་རྟོགས་ན་ཆུ་བརྒྱ་ཟམ་འོག་ཏུ་འདུས་པ་ལྟ་བུ་ཡིན་གསུངས་སོ། །མཉམ་བཞག་ལས་ལྡང་བའི་ཚེ་དཔེར་ན་མཐའི་རྒྱ་མཚོའི་ནང་ནས་ཆུ་ཕྲན་ཐམས་ཅད་མཆེད་པ་བཞིན་དུ་རིག་སྟོང་ཟུང་འཇུག་གི་ངང་ནས་རིག་རྩལ་ལམ། བདག་མེད་རྟོགས་པའི་ཤེས་རབ་ཀྱིས་ཆོས་ཅན་དངོས་པོ་སྣང་བ་ཐམས་ཅད་ཀྱི་མཚངས་མཚན་ཉིད་ཤེས་ནས་གནས་ལུགས་དེ་རྟོག་པ་ཡིན་གསུངས་སོ། །དཔེར་ན་རང་བྱུང་གི་ཡེ་ཤེས་དེ་ཉིད་ནམ་མཁའ་ལྟ་བུ་དང་ཀུན་འབྱུང་ལས་ཉོན་གྱི་རྟོག་ཚོགས་རྣམས་སྤྲིན་ལྟ་བུ། རང་བྱུང་གི་ཡེ་ཤེས་དེ་ཉིད་ཉི་མ་ལྟ་བུ་དང་། ཀུན་འབྱུང་གི་རྟོག་ཚོགས་ཐམས་ཅད་ཉི་མའི་ཟེར་ལྟ་བུ། རང་བྱུང་གི་ཡེ་ཤེས་རི་བོ་ལྟ་བུ་དང་། ཀུན་འབྱུང་གི་རྟོག་ཚོགས་རྣམས་རྩི་ཤིང་ལྟ་བུ། རང་བྱུང་གི་ཡེ་ཤེས་དེ་ཉིད་རྒྱ་མཚོ་ཁ་གཏིང་དང་བྲལ་བ་ལྟ་བུ། ཀུན་འབྱུང་ལས་ཉོན་ཐམས་ཅད་ཆུའི་རླབས་ལྟ་བུ་ཡིན་ནོ། །རང་བྱུང་གི་ཡེ་ཤེས་མེ་ལོང་ལྟ་བུ་དང་། ཀུན་འབྱུང་ལས་ཉོན་རྣམས་གཟུགས་བརྙན་ལྟ་བུ། རྟོན་པ་བཞི་ནི། རྣམ་ཤེས་ལ་མི་རྟོན་ཡེ་ཤེས་ལ་རྟོན་པ། དྲང་རྟོན་ལ་མི་རྟོན་ངེས་དོན་ལ་རྟོན་པ། ཀུན་རྫོབ་ལ་མི་རྟོན་དོན་དམ་ལ་རྟོན་པ། གང་ཟག་ལ་མི་རྟོན་ཆོས་ལ་རྟོན་པ། དབང་རྣོན་ཆོས་ཀྱི་རྗེས་སུ་འབྲང་། དབང་རྟུལ་གང་ཟག་གི་རྗེས་སུ་འབྲང་ཟེར་བ་ལྟ་བུ། གང་ཟག་རྒྱུ་མཚན་དུ་མི་བྱེད་པར་ཆོས་རྒྱུ་མཚན་དུ་བྱེད་དགོས། དེ་ནི་སྔོན་ཁྲོ་སྐྱབས་རྒྱལ་པོའི་གདན་ས་རུ། རྫོགས་ཆེན་དགེ་མང་དང་། མདོ་ཡི་མཁྱེན་བརྩེ་གཉིས་ཞལ་འཕྲད་པའི་ཚེ་རྫོགས་ཆེན་དགེ་མང་གིས། མདོའི་མཁྱེན་བརྩེ་ལ་ཁྱེད་ཀྱི་རྟེན་ཅི་ཡིན་གསུངས་ཚེ། ཁོང་གི་རྟེན་རབ་བྱུང་ཡིན་གསུངས། ཁྱེད་ལྟ་བུ་གང་ཟག་བཞི་སྡེའི་མདུན་ནས་བརྗོད་པ་གསུམ་གྱི་མཐར་ཐུག་རབ་ཏུ་བྱུང་བ་མིན། ཁོང་ནི་རང་བྱུང་གི་ཡེ་ཤེས་རྟོགས་ནས་རབ་ཏུ་བྱུང་བ་ཡིན་གསུངས་ཚེ། དེ་མ་ཐག་ཏུ་རྫོགས་ཆེན་དགེ་མང་གིས་ཕྱག་འཚལ་བ་ཡིན། དེ་ནི་ཆོས་རྒྱུ་མཚན་དུ་བྱས་ནས་གང་ཟག་གི་རྗེས་སུ་ཞུགས་པ་ཡིན། མདོ་མཁྱེན་བརྩེ་དེ་ཡང་སྤྱོད་པ་ནི་ཁྱིམ་པ་ཆགས་ཅན་ལྟ་བུའོ། །དད་པ་ཡང་། གཞི་ལྟ་བ་ལ་ཚང་། སེམས་རྟོག་ཕྲ་རགས་དང་ཉམས་བདེ་གསལ་མི་རྟོག་པའི་ཆ་ཐམས་ཅད་གཞི་ཐོག་ཏུ་དྭངས་བས་དྭངས་བའི་དད་པ། སྤྲོ་བཞིན་དུ་འཇུག་པར་མོས་པ་མོས་པའི་དད་པ། དེ་ཉིད་ཡིན་མིན་གྱི་ཐེ་ཚོམ་དང་བྲལ་ནས་ཡིད་ཆེས་པ་ཡིད་ཆེས་པའི་དད་པ། དེ་དགའ་བཞིན་ཏུ་སྒྲུབ་པར་འདོད་པ་འདོད་པའི་དད་པ། དེ་ལྟར་དུ་རང་གིས་ངེས་པ་རྙེད་པས་ངེས་པའི་དད་པ། རང་བྱུང་གི་ཡེ་ཤེས་དེ་ཉིད་ཡེ་ནས་འབྲལ་མེད་དུ་ཤེས་པ་དེ་ལ་མི་ཕྱེད་པའི་འདུན་པ་དང་བཅས་པས་དེ་ལས་གཞན་དུ་མི་ལྡོག་པར་རྟོགས་པའི་ཕྱིར་མི་ལྡོག་པའི་དད་པའོ། །དཀོན་མཆོག་གསུམ་གྱི་ཡོན་ཏན་དེ་དྲན་པས་དེ་ལ་བརྟེན་ནས་དད་པ་སྐྱེས་དགོས་པ་ཡིན། དེ་གསུམ་ཡང་སངས་རྒྱས་དང་དགེ་འདུན་གཉིས་ཁྱད་པར་ཅན་བྱེད་མཁན་དེ་ཆོས་ཡིན་པར་ཤེས་དགོས་གསུངས། མོས་གུས་དེ་ཡང་བཀའ་དྲིན་གསུམ་ལྡན་གྱི་རྩ་བའི་བླ་མ་དེ་ལ་བྱས་པ་ཡིན། དེ་མིན་གང་རུང་རུང་གི་བན་རྒན་ཞིག་ལ་ནི་ཟེར་བ་མིན་ཞེས་དཔལ་སྤྲུལ་རིན་པོ་ཆེས་གསུངས། དབང་བསྐུར་བས་སྒོ་གསུམ་རྡོ་རྗེ་གསུམ་དུ་སྨིན་པར་བྱས། མན་ངག་གནང་བས་དུས་གསུམ་ཡིད་ཀྱི་འཁྲུལ་བ་ཐམས་ཅད་སོག་མའི་ཕོན་ཐག་ཆད་པ་བཞིན་དུ་ཆད་པ་ཡིན། མཐའ་རྟེན་ལུང་གི་རིམ་པ་དང་བཅས་པ་གནང་བས་རྡོ་རྗེ་རྒྱལ་པོའི་གོ་ས་ལ་བཀོད། དེ་ཡིས་རྒྱལ་བའི་གདུང་འཚོབ། མཛོད་ཀྱི་ལྡེའུ་མིག་འཛིན་པ། འཁོར་གདུལ་བྱའི་ལྷག་མ་སྐྱོང་བ་ཡིན། ཞབས་དྲུང་རིན་པོ་ཆེས། ར་ཤེལ་ཀུན་བཟང་བསོད་ནམས་ལ་ངུར་སྨྲིག་བསྟན་པའི་རྒྱལ་མཚན་འཛིན་པའི་བརྡ་རྟགས་སྣམ་སྦྱར་ཞིག་གནང་། ཐེག་གསུམ་ཆོས་འཁོར་བསྐོར་བའི་བརྡ་རྟགས་དུང་དཀར་ཞིག་གནང་། འཁོར་གདུལ་བྱའི་ལྷག་མ་སྐྱོང་བའི་བརྡ་རྟགས་ཇ་འབྲུ་བར་ཁག་ཞིག་གནང་བ་ཡིན་གསུངས་སོ། །ཇོ་བོ་རྗེ་ཡིན་ཀྱང་རྩ་བའི་བླ་མ་གཞན་རྣམས་ཀྱི་མཚན་བརྗོད་ཚེ་ཐལ་མོ་སྦྱར་དུས་སྙིང་ཀར་བཞགཇོ་བོ་གསེར་གླིང་པའི་མཚན་བརྗོད་ཚེ་ཐལ་མོ་སྤྱི་བོར་སྦྱར་བ་ཡིན་པས། དེའི་རྒྱུ་མཚན་ཞུས་ཚེ་ཁོང་ལ་བྱང་ཆུབ་ཀྱི་སེམས་ཉག་མ་གཅིག་སྐྱེས་པ་དེ། ཇོ་བོ་གསེར་གླིང་པའི་བཀའ་དྲིན་ཡིན། རྩ་བའི་བླ་མ་གཞན་རྣམས་དང་ཡོན་ཏན་གྱི་ངོས་ནས་ཁྱད་མེད་ཀྱང་བཀའ་དྲིན་གྱི་ཁྱད་པར་ཡིན་གསུངས། ༈ ཆོས་ལམ་དུ་འགྲོ་བའི་མན་ངག་ལས། སྐྱབས་འགྲོའི་སྡོམ་པ་ནི། སྡོམ་པ་ཐམས་ཅད་ཀྱི་རྟེན་གཞི་སྐྱབས་འགྲོའི་སྡོམ་པ་འདི་ཡིན། དཔེར་ན་ས་གཞི་ལྟ་བུ་ཡིན་པས། སྐྱབས་འགྲོའི་སྡོམ་པ་ཐོབ་ལ་མ་ཉམས་པའི་གང་ཟག་དེ་ལ་སོར་བྱང་སྔགས་གསུམ་གྱི་སྡོམ་པ་རྣམས་ཚུལ་བཞིན་མ་ཉམས་པར་བསྲུང་ཡོད་པ་ཡིན་གསུངས་སོ། །སྡོམ་པ་ཀུན་ལ་ཡོད་མོད་ཀྱང་། །སྐྱབས་སུ་མ་སོང་བ་ལ་མེད་ཅེས་གསུངས་པ་ལྟར། སྐྱབས་སྡོམ་མ་ཐོབ་པ་དང་ཐོབ་ནས་ཉམས་པར་བྱས་ན་གང་ཟག་དེ་ལ་སོར་བྱང་སྔགས་གསུམ་གྱི་སྡོམ་པ་རྣམས་གཏན་མེད་དུ་འགྱུར་བ་ཡིན་གསུངས་སོ། །ཕྱི་པ་ནང་པ་སྐྱབས་འགྲོའི་ཁྱད་ཟེར་བ་ཡིན། གནས་སྐབས་དཀོན་མཆོག་གསུམ་ལ་རྟེན་གྱི་ཚུལ་དུ་སྐྱབས་སུ་འགྲོ་བ་ཡིན་གསུངས། མཐར་ཐུག་གནས་ལུགས་རྡོ་རྗེའི་སྐྱབས་འགྲོ་ཞེས་སྐུ་གསུམ་འདུ་འབྲལ་མེད་པའི་རིག་པ་མངོན་དུ་གྱུར་བས་དེ་ལ་སྐྱབས་སུ་འགྲོ་བ་ཡིན། དེ་གང་ཡིན་ཞེ་ན། རང་བྱུང་གི་ཡེ་ཤེས་དེ་ཉིད་ལ་མ་རིག་པའི་ཆ་སྒྲིབ་པ་གཉིས་བག་ཆགས་དང་བཅས་པ་སངས། ཡེ་ཤེས་ཡོན་ཏན་ཐམས་ཅད་འབད་མེད་ལྷུན་གྲུབ་ཏུ་རྒྱས་པས་ན་སངས་རྒྱས་ལ་སྐྱབས་སུ་འགྲོ་བ་ཡིན། དབྱིངས་སྤྲོས་བྲལ་བརྗོད་པ་དང་བྲལ་བ་དེ་ནི་རྒྱུད་ཐམས་ཅད་ཀྱི་རྒྱལ་པོ་གསུང་རྒྱུད་རྒྱ་མཚོ་ལྟ་བུ་དེ་ཆོས་མཐར་ཐུག་པ་ཡིན་པས་ཆོས་ལ་སྐྱབས་སུ་འགྲོ་བ་ཡིན། རིག་སྟོང་ཟུང་འཇུག་དེ་ཉིད་དུས་གསུམ་དུ་འཕོ་འགྱུར་དང་བྲལ་བས་ན་སྙིང་པོ་དོན་གྱི་དགེ་འདུན་ཡིན་པས་དགེ་འདུན་ལ་སྐྱབས་སུ་འགྲོ་བ་ཡིན་གསུངས། ཟག་མེད་ཀྱི་དགེ་འདུན་ནོ། །ཀ་དག་ཡེ་སྟོང་སྤྲོས་པ་དང་བྲལ་བའི་ཆ་ཆོས་སྐུ། ཡེ་ཤེས་ཀྱི་གདངས་མ་འགགས་པ་ལོངས་སྐུ། རིག་རྩལ་འགགས་མེད་དུ་འཕྲོ་བ་སྤྲུལ་སྐུའོ། །དེ་གསུམ་ལ་སྐྱབས་སུ་འགྲོ་བ་ཡིན། ངོ་བོ་སྟོང་པ་བླ་མ། རང་བཞིན་གསལ་བ་ཡི་དམ། ཐུགས་རྗེའི་འདུ་འཕྲོ་ཉི་མའི་ཟེར་བཞིན་དུ་འཕྲོ་བ་མཁའ་འགྲོ། དེ་གསུམ་ལ་སྐྱབས་སུ་འགྲོ་བ་ཡིན། སྐྱབས་འགྲོ་དགུའི་བདག་ཉིད་ཅན་ནོ། མཁའ་འགྲོ་ནི། མཁའ་ཞེས་པ་ཆོས་ཀྱི་དབྱིངས། འགྲོ་ཞེས་པ་རྟོག་ཚོགས་རྣམས་ཤར་གྲོལ་སོང་བ་དེ་ཡིན་ནོ། །མཎྚལ་ནི། གཞི་ཀ་དག་སྤྲོས་བྲལ་ཆོས་སྐུའི་མཎྚལ། རང་གདངས་འགགས་པ་མེད་པ་ལོངས་སྐུའི་མཎྚལ། ཐུགས་རྗེའི་རིག་གདངས་ཀྱི་ཤར་ཆ་རྣམས་གྲོལ་བའི་རང་བཞིན་ཡིན་པས་སྤྲུལ་སྐུའི་མཎྚལ་ཡིན་གསུངས། དེ་མིན་ཡང་ན་སྟོང་གསུམ་རི་རབ་གླིང་བཞི་ལྷ་གནས་དང་བཅས་རྣམས་བློས་བླང་ནས་རང་ལ་འབུལ་བའི་ནུས་པ་ཡོད་ན། བླ་མ་དཀོན་མཆོག་གསུམ་ལ་བཞེས་པའི་ནུས་པ་ནི་ཡོད་པས་དེ་ལྟར་དུ་འབུལ་དགོས་གསུངས་སོ། །འགལ་རྐྱེན་སྡིག་སྒྲིབ་སྦྱོང་བ་རྡོ་རྗེ་སེམས་དཔའ་ནི་རིགས་ཐམས་ཅད་ཀྱི་བདག་ཉིད་རིགས་གཅིག་རྡོ་རྗེ་སེམས་དཔའ་ཡིན་པས་ཐབས་ཀྱི་སྒོ་ནས་གཉེན་པོ་སྟོབས་བཞིའི་སྒོ་ནས་བཤགས་པ། ཤེས་རབ་ཀྱི་སྒོ་ནས་སྡིག་སྟོང་དབྱིངས་སུ་འཇོག་པ་ཡིན་གསུངས་སོ། །དབྱིངས་སྤྲོས་པ་དང་བྲལ་བ་ཡུམ་སྙེམ་མ་དཀར་མོ་ཡིན། ཡེ་ཤེས་ཀྱིས་རྩལ་གདངས་མ་འགགས་པ་ཁྱབ་བརྡལ་གྱི་རིག་པ་དེ་ནི་བླ་མ་རྡོ་རྗེ་སེམས་དཔའ་ཡིན་གསུངས་སོ། །གཅོད་ནི་སྤྱིར་རྒྱ་གཅོད་དང་བོད་གཅོད་མང་དུ་ཡོད་པས། བོད་གཅོད་ནི། རྒྱ་གར་གྱི་པཎྜི་ཏ་དོན་གྲུབ་བཟང་པོའམ་སྨོན་ལམ་དོན་གྲུབ་ཞེས་པ་དེ། མཁའ་འགྲོ་མས་ལུང་བསྟན་ནས་ཁྱེད་ཀྱི་གདུལ་བྱ་བོད་ཡུལ་ཡིན་གསུངས། གྲི་གུག་གིས་སྐུ་བཀྲོངས་བའི་ཚུལ་བསྟན་ནས་སྐུ་གདུང་ནམ་མཁར་བཞུགས། དེ་ནས་བོད་ཡུལ་དུ་དེ་ཡི་སྤྲུལ་པ་མ་ཅིག་ལབ་སྒྲོན་དེ་འཁྲུངས། མ་ཅིག་དེ་ལ་ཐོད་པ་བྷ་ཏྲའི་སྲས་གཉིས་འཁྲུངས། སྲས་ཆེ་བ་དེ་རྒོད་ལ་ཤོར་བས་ཡུལ་མི་རྣམས་ཀྱི་ར་རྐུ་ར་དགྲ་བཏགས། དེ་ཉིད་དགུང་ལོ་བཞི་བཅུ་ཞེ་བཞིའི་དུས་སུ་མ་ཡི་ཆོས་སྒོར་ཞུགས་ནས་སློབ་མ་དང་། སྲས་གཞན་ལས་ལྷག་པར་གྱུར་པ་ཡིན། མས་སྲས་ཆུང་བ་བྲག་བར་ཞིག་ཏུ་བཅུག་ནས་རྟོགས་པ་སྦྱོངས་ཤིག་གསུངས་པ་ཡིན། ཟབ་མོ་གཅོད་ཀྱི་བསྟན་པ་དར་བའི་ཚེ། རྒྱ་གར་གྱི་པཎྜི་ཏ་རྣམས་ཀྱིས་ཕྲག་དོག་བྱས་ནས་ཆོས་རྣམས་ཀྱི་འབྱུང་ཁུངས་ནི་རྒྱ་གར་ཡིན། བོད་ཡུལ་ན་ཆོས་ཀྱི་འབྱུང་ཁུངས་མེད་ཆོས་ལོག་བདུད་ཀྱི་བསྟན་པ་དར་འདུག་ཟེར་བས། རྒྱ་གར་གྱི་པཎྜི་ཏ་གཉིས་བོད་ཡུལ་དུ་ཕེབས་ནས་མ་ཅིག་དང་གསུང་བསྒྲོས་བྱས་པའི་ཚེ་མ་ཅིག་གིས་སྔར་གྱི་རྒྱུ་མཚན་ཞིབ་ཏུ་གསུངས། སྔར་ཁོང་བཞུགས་པའི་གཟིམས་ཁང་གི་ནང་ན་གཅོད་ཀྱི་ཆོས་སྐོར་ཡོད་དང་། སྐུ་གདུང་དེ་ཁོང་བཞུགས་པའི་ནམ་མཁར་ཡོད་པས་དེ་མེ་ལ་བསྲེགས་ན་སྐུ་རྟེན་དང་གསུང་རྟེན་རྣམ་དག་འབྱུང་གསུངས་ཚེ། པཎྜི་ཏ་དེ་གཉིས་དང་དམ་པ་རྒྱ་གར་གསུམ་རྒྱ་གར་དུ་བྱོན་ནས་མ་ཅིག་གི་གསུང་བཞིན་བསྒྲུབ་ཚེ། དེ་ལྟར་དུ་རིང་བསྲེལ་སྐུ་རྟེན་དང་གསུང་རྟེན་སོགས་བྱུང་ནས་པཎྜི་ཏ་རྣམས་ཀྱིས་ཡིད་ཆེས་པས་ཟབ་མོ་གཅོད་ཀྱི་སྐོར་ཕལ་ཆེར་རྒྱ་གར་དུ་བོད་ནས་ཡར་དར་བ་ཡིན་གསུངས། དེ་ལ་སོགས་པ་གཅོད་མང་དུ་ཡོད་ཀྱང་གང་ཟག་དབང་པོའི་ཁམས་དང་བྱེ་བྲག་གི་ཁྱད་པར་མ་གཏོགས་དེ་དག་གི་བསྟན་དོན་ནི། མདོར་ན་དུས་གསུམ་ཡིད་ཀྱི་རྟོག་པ། ཉམས་བདེ་གསལ་མི་རྟོག་གསུམ་ཉམས་གྱི་རྟོག་པ་དང་བཅས་པ་རྣམས་ཆོས་ཀྱིས་དབྱིངས་སུ་དྭངས་བའི་ཚེ་གཅོད་ཟེར་བ་ཡིན་གསུངས་སོ། ༈ །ལམ་དུས་འཁྲུལ་བ་བཤིགས་པའི་མན་ངགཐུན་མོངས་མ་ཡིན་པའི་སྔོན་འགྲོ་ནི། ལུས་རུ་ཤན་དབྱེ་བ། །ངག་རུ་ཤན་དབྱེ་བ། ཡིད་རུ་ཤན་དབྱེ་བ་དང་གསུམ། རུ་ནི་གཉིས་ལ་འཇུག་སྟེ། འཁོར་འདས་གཉིས་ཤན་དབྱེ་བ་དེ་ཡིན། མ་དག་རྒྱུད་ལྔའི་ས་བོན་རྡོ་རྗེ་གསུམ་གྱི་མེ་ཡིས་བསྲེགས་ནས་ལུས་དང་སྣོད་སྤྲུལ་སྐུར་དགངག་ཧཱུྃ་སྦྱོང་དང་འཕྲོ་འདུ་རྣམ་པ་བཞི་ལ་བརྟེན་ནས་གསུང་ལོངས་སྤྱོད་རྫོགས་སྐུ་ཐོབ། གྲོལ་བ་བཞིའི་རང་བཞིན་དུ་རྟོགས་པས་ཐུགས་ཆོས་ཀྱི་སྐུ་ཐོབ་པ་ཡིན་གསུངས་སོ། །ལམ་དུས་འཁྲུལ་བ་བཤིགས་ཟིན་ཀྱང་སྟོང་པ་ཅང་མེད་མ་ཡིན་པར་འཁྲུལ་སྣང་ཡེ་ཤེས་འཆར་དགོས། གང་ལྟར་ཡིན་ན་ཁྲེགས་ཆོད་ཀྱིས་སྣོད་བཅུད་འདི་རང་སྣང་ཡེ་ཤེས་ཀྱི་དཀྱིལ་འཁོར་དུ་གཟིགས། ཐོད་རྒལ་བས་སྣོད་བཅུད་འདི་སྐུ་དང་འོད་ཡེ་ཤེས་ཀྱི་རང་བཞིན་དུ་གཟིགས་པ་ཡིན་གསུངས་སོ། །ཐུན་མོང་མ་ཡིན་པའི་སྔོན་འགྲོ་ལ་རྫོགས་ཆེན་རིང་ལུགས་ཀྱི་ཁྲིད་ལྟར་མཁན་ཆེན་པད་རྡོར་དང་། སྨིན་གླིང་གཏེར་ཆེན་གཉིས་ཀྱིས་གསུངས་པ་ནི། སྔོན་འགྲོ་སེམས་ཀྱི་ཁང་བུ་བཤིགས་པ། དངོས་གཞི་རིག་པའི་རང་ངོ་སྤྲད་པ། རྗེས་ཉམས་ལེན་གྱིས་སྐྱོང་ཚུལ་དང་ས་བཅད་གསུམ་གྱི་ཁོངས་སུ་འདུས། སྔོན་འགྲོ་སེམས་ཀྱི་ཁང་བུ་བཤིགས་སྐབས་ལ། འདས་རྗེས་དོན་ཁྲིད་ལས། དང་པོ་རྟོག་པ་རྩད་བཅད། དེ་ནས་སེམས་ཀྱི་མཚང་བཙལ། དེ་ནས་བྱུང་གནས་འགྲོ་གསུམ་བརྟགས། ཅེས་གསུངས་པ་ལྟར་རྟོག་པ་རྩད་མ་ཆོད་ན་ཁམས་གསུམ་འཁོར་བའི་རྒྱུ་ངོས་མི་ཟིན། དེ་མ་ཟིན་ན་འཁོར་བ་ལས་མི་ཐར། མཚང་མ་བཙལ་ན་ཆོས་རྣམས་ཀྱི་གནས་ལུགས་མི་ཤེས། དེ་མ་ཤེས་ན་གནས་ལུགས་ངོ་སྤྲད་རྒྱུ་མེད། དང་པོ་རྩད་བཅད་པ་ནི། ཁམས་གསུམ་འཁོར་བར་འཁྱམས་པ་ལུས་ངག་ཡིད་གསུམ་ལ་རགས་ལས་པ་ཡིན། ལུས་ངག་ཡིད་གསུམ་གྱི་ནང་ནས་ཀྱང་གཙོ་གང་ཆེ་བར་འདུག་སྙམས་པས་ལུས་ཀྱི་བདེ་སྡུག་དྲོ་གྲང་བརྒྱག་ལྟོག་ལ་སོགས་དང་། ངག་གི་སྨྲ་བརྗོད་ཐམས་ཅད་དང་། སེམས་ཀྱི་སྒོ་ལྔའི་རྗེས་སུ་འབྲང་བའི་ཤེས་པ་རྣམས་དང་། གཞན་སངས་རྒྱས་པ་པོ་དེ་གང་། འཁོར་བར་འཁྱམས་མཁན་དེ་གང་ཡིན་བརྟགས་དཔྱད་བྱས་ནས་ཐམས་ཅད་ཀྱི་རྩ་བ་འདི་སེམས་ཡིན་པར་ཐག་ཆོད་པ་ནི་རྐུན་པོ་ངོས་ཟིན་པ་ལྟ་བུའོ། །དགག་བྱ་སྣང་ཚུལ་ངེས་པ་ཡིན་གསུངས། གཉིས་པ་མཚང་བཙལ་བ་ནི་སེམས་དེའི་ཁ་དོག་དབྱིབས་དང་མཚན་མའི་སྒོ་ནས་བརྟགས་པ་ལ། དབྱིབས་ཟླུམ་པོ། གྲུ་བཞི། ཟླ་གམ། གྲུ་གསུམ་ལ་སོགས་པ་དང་ཁ་དོག་དཀར་པོ། སེར་པོ། དམར་པོ། ལྗང་གུམཐིང་ག་ལ་སོགས་པ་དང་། ཡོད་པ་དང་མེད་པ་སྣང་བ་དང་སྟོང་པ། རྟག་པ་དང་ཆད་པ། གཅིག་པུ་དང་ཐ་དད་པ་གང་ཡང་མ་ཡིན་པར་ཐག་ཆོད་ནས་ལུས་སྣང་སྟོང་མེ་ལོང་ནང་གི་གཟུགས་བརྙན། ངག་གྲགས་སྟོང་བྲག་ཆ། ཡིད་རིག་སྟོང་ནམ་མཁའི་བྱ་རྗེས་ལྟ་བུ་ཡིན་པར་ཤེས་ནས་ཀུན་རྫོབ་ཀྱི་ཆ་ཐམས་ཅད་སྟོང་ཉིད་དུ་ཤེས། སྟོང་པ་ཉིད་ཕྱང་ཆད་དུ་མ་སོང་བར་རྒྱུ་འབྲས་བུ་ཤར་བའོ། །གསུམ་པ་བྱུང་གནས་འགྲོ་གསུམ་ལ་ནི། ད་ལྟར་གྱི་ཤེས་པ་རིག་རིག་པོ་འདི་ཕྱི་སྣོད་ཀྱི་འཇིག་རྟེན་ལས་བྱུང་ངམ་ནང་བཅུད་ཀྱི་འགྲོ་བ་ལས་བྱུང་ངམ། རང་གི་ལུས་ཀྱི་ཆ་ཤས་སོགས་མགོ་དང་ཡན་ལག་གང་ནས་བྱུང་བརྟགས། དེ་ཐམས་ཅད་རྡུལ་ཕྲན་ཆ་མེད་བྱེད་དགོས། དེ་ལྟར་དུ་གནས་པ་ཡང་ཕྱི་ནང་སྣོད་བཅུད་རང་ལུས་གང་ལ་གནས་བརྟགས། དེ་ནས་འགྲོ་ས་ཡང་ཕྱི་རང་ལུས་ནས་གང་ལ་འགྲོ་བརྟགས། འགྲོ་མཁན་གྱི་སེམས་ལ་བརྟགས་པས་རང་བཞིན་མ་གྲུབ་པ་ཡིན་ནོ། །དེ་ཡང་ཡུལ་གང་ལས་བྱུང་བ། །དངོས་པོ་དེ་ཡི་ཁོངས་སུ་གནས། གཟོད་དེ་ལས་བྱུང་དགོས་པ་ཡིན། ཡུལ་དངོས་པོ་དེ་ལ་ཐོག་མར་མ་གནས་པར་བྱུང་ལུགས་མེད་པ་ཡིན་གསུངས་སོ། ༈ །དངོས་གཞིའི་རིག་པ་རང་ངོ་སྤྲད་པ་ལས། བྱིན་རླབས་འཕོ་བའི་སྟོབས་ཀྱི་སྒོ་ནས་ངོ་སྤྲད་ཚུལ་ནི། བླ་རྣམ་ཁོ་ན་བསྒོམ་པར་བྱ་བ་ཡིན་པས། སེམས་བསྐྱེད་ནི། ཁམས་གསུམ་སེམས་ཅན་ཐམས་ཅད་དཔལ་མགོན་བླ་མའི་གོ་འཕང་ཐོབ་པར་བྱ་སྙམས་པ་དེ་ཡིན། བསྔོ་བ་ནི། ཁམས་གསུམ་སེམས་ཅན་ཐམས་ཅད་དཔལ་མགོན་བླ་མའི་གོ་འཕང་ཐོབ་པར་ཤོག་ཅིག་སྙམས་པ་དེ་ཡིན། སྙམས་པའི་བློ་དེ་གང་ལ་ངོས་འཛིན་ན་རྩ་བའི་བླ་མ་པདྨ་འབྱུང་གནས་ཡིན། ཡི་དམ་རྟ་མགྲིན། མཁའ་འགྲོ་རྡོ་རྗེ་ཕག་མོ། དེ་གསུམ་རྩ་གསུམ་ཡིན་གསུངས། བླ་རྣམ་རང་གཞུང་ལྟར་དུ་ཕྱི་སྣོད་འཇིག་རྟེན་འདི་ཟངས་མདོག་དཔལ་རིར་གསལ། ནང་བཅུད་ཀྱི་སེམས་ཅན་རྣམས་དཔའ་བོ་མཁའ་འགྲོའི་ཚོམ་བུ། སྒྲ་གྲགས་ཚད་ཐམས་ཅད་བཛྲ་གུ་རུའི་རང་སྒྲ་རུ་གསལ། དེ་དུས་ཀུན་འབྱུང་ལས་ཉོན་གྱི་རྟོག་ཚོགས་རྣམས་མོས་གུས་སུ་ཤར། མོས་གུས་རང་གྲོལ་དུ་སོང་བས་ལམ་བདེན་དང་སྡུག་བསྔལ་བདེན་པ་སྣོད་བཅུད་ཀྱང་ཡེ་གདོད་མ་ནས་གནས་ཚུལ་དུ་འབྱུང་ལྔ་ཡུམ་ལྔའི་རང་བཞིན། ཕུང་ལྔ་རིགས་ལྔའི་རང་བཞིན་སོགས་ཡིན། སྣང་གྲགས་རིག་གསུམ་ལྷ་སྔགས་ཆོས་སྐུའི་རང་བཞིན་དུ་གནས་པས་འགོག་བདེན་དང་མོས་གུས་བསྐྱེད་པའི་རྟེན་ཡིན། དེ་ལྟ་བུའི་ལྷ་སྔགས་ཆོས་སྐུའི་རང་བཞིན་དུ་རྟོགས་པ་དེ་སྣང་སྲིད་བླ་མར་ཤར་བའི་བསྐྱེད་རིམ་ཡིན། ཐ་མལ་མ་དག་པའི་སྣང་བ་རང་འགགས་སུ་སོང་། ལྷ་སྔགས་ཆོས་ཉིད་དུ་བསམ་པའི་ཡུལ་དང་བསམ་མཁན་ཡུལ་ཅན་གྱི་རྟོག་ཚོག་ཐམས་ཅད་ཆོས་སྐུ་ཐིག་ལེ་ཉག་གཅིག་གི་ཀློང་ཆོས་ཉིད་ཀྱི་གཤིས་སུ་རང་དངས་སུ་སོང་བའི་དུས་ན། སྣང་བ་ཕར་བཅད་རྒྱུ་མེད་པ་ཡེ་ཤེས་ཀྱི་རང་གདངས་ཡིན། རིག་པ་ཚུར་བཅད་རྒྱུ་མེད་པ་ཆོས་ཉིད་ཀྱི་རང་བཞིན་ཡིན། དེ་ཚེ་གར་གཏད་དང་འདིར་གཏད་མེད་པ། གར་འཇོག་དང་འདིར་འཇོག་མེད་པས་ཕྱི་ནང་མེད་པ་ཟང་ཐལ་གྱི་དཀྱིལ་འཁོར། སྣང་བས་རིག་པ་ལ་མ་གོས། རིག་པ་ཡུལ་གྱི་རྗེས་སུ་མི་འབྲང་། བསམ་གྱིས་མི་ཁྱབ་པའི་གནས་དེ་ནི། རང་རིག་བླ་མའི་རང་ཞལ་མཇལ་བ་ཡིན། ཐུགས་ཡིད་དབྱེར་མེད་འདྲེས་པའི་རྫོགས་རིམ་ཡིན་གསུངས། དེ་ལྟ་བུར་རྟོགས་ཚེ་བྱིན་རླབས་ཡིན་པས་བྱིན་རླབས་འཕོ་བ་དེ་ལ་ཟེར། དེ་ཡང་ལ་བཟླ་སྐོར་གསུམ་གྱིས་ངོ་སྤྲད་དགོས་གསུངས། རླུང་སེམས་རགས་པ་དངས་བའི་ཆ། དེ་ལྟ་བུའི་རིག་སྟོང་ཟུང་འཇུག་གི་ངང་དེར་གནས་པ་དེ་མཉམ་བཞག་གི་ལྟ་བ་ཡིན། དེ་ལས་ལྡང་བའི་ཚེ་སྣང་སྲིད་བླ་མའི་རྣམ་རོལ་དུ་གསལ་གདབ་ནས་དངོས་པོ་སྣང་བའི་ཆོས་རྣམས་ཐམས་ཅད། བདག་མེད་རྟོགས་པའི་ཤེས་རབ་ཀྱིས་བརྟགས་ཤིང་དཔྱད་པའི་ཚེ། སྣང་ལ་རང་བཞིན་མེད་པ། གསལ་ལ་དེར་འཛིན་མེད་པའི་སྣང་སྟོང་ཆུ་ཟླ། གྲགས་སྟོང་བྲག་ཆ། དྲན་སྟོང་བྱ་ལམ་རྗེས་མེད་ཀྱིས་རང་བཞིན་དང་། སྣང་སྟོང་སྐུ། གྲགས་སྟོང་གསུང་། དྲན་སྟོང་ཐུགས་ཀྱི་རང་བཞིན་སྒོ་གསུམ་གྱི་མཚངས་རིག་ནས་སྤྱོད་ལམ་དང་བསྲེ་བ་རྗེས་ཐོབ་ཀྱི་ལྟ་བ་ཡིན། དེའི་ངང་ལ་གནས་པ་སྒོམ་པ། རྐྱེན་དང་བསྲེ་བ་སྤྱོད་པ། དེ་ལས་མི་འདའ་བ་དམ་ཚིག་ཡིན་གསུངས་སོ། །རྗེས་ཐོབ་ཀྱི་ལྟ་བ་འདི་མེད་ན་ཐ་མལ་དུ་གོལ་བའོ། །

གནས་ལུགས་ལྟ་བའི་ཐོག་ཏུ་ངོ་སྤྲད་ཚུལ་ནི། སྣང་བ་སྟོང་པ་སོགས་དང་། དུག་ལྔ་རང་གྲོལ་དང་། ཚོགས་དྲུག་རང་གྲོལ་ལ་སོགས་པ་ཡོད་ཀྱང་། སྒྲ་ལྟ་བུ་ལ་མཚོན་ན། ཡུལ་སྒྲ་དེ་ལའང་སྒྲ་བཟང་ངན་བར་མ་གསུམ་སྣང་། ཡུལ་ཅན་གྱི་ཤེས་པས་ཚོར་བ་བདེ་སྡུག་བར་མ་གསུམ་མྱོང་ནས་ཐ་དད་དུ་སོང་བ་ཡིན། ཡུལ་སྒྲ་དེ་ཡང་དཔལ་ལྡན་རང་བྱུང་གི་རྒྱུད་ཆེན་པོར། གསུང་རྒྱུད་རྒྱ་མཚོ་ལྟ་བུ་བརྗོད་པ་དང་བྲལ་བའི་ཆ། སྐྱེེ་མེད་ཀྱི་ཀློང་ནས་གྲགས་པ་ཡིན་པས། གང་གྲགས་པ་ཐམས་ཅད་དབྱངས་དང་གསལ་བྱེད་ཀྱིས་མ་དྲངས་པའི་སྒྲ་གཅིག་མེད། སྒྲ་དེ་ཡང་རྟག་ཆད་གཉིས་ཀྱི་ཕ་མཐའ་ལས་འདས་པས་སྣང་བས་ཆད་མཐའ་བསལ་བ་དང་། སྟོང་པས་རྟག་མཐའ་བསལ་བ་ཡིན། གང་གྲགས་པ་ཐམས་ཅད་སྔགས་ཀྱི་རང་བཞིན། གདངས་སྔགས་ཡིན་པ་དེ་ཉིད་གྲགས་སྟོང་གི་རང་བཞིན། གྲགས་སྟོང་སྐྱེ་བ་མེད་པ་རྒྱལ་བའི་གསུང་གི་རང་བཞིན་ཡིན། སྒྲ་འཛིན་གྱི་ཤེས་པས་དེ་ལྟར་ཤེས་དགོས། སྒྲ་བཟང་ངན་བར་གསུམ་པོ་ཕན་གནོད་ལས་འདས་པར་ཤེས། ཤེས་མཁན་གྱི་རྟོག་པ་ཡང་གཞི་རྒྱུད་རང་བྱུང་གི་ཡེ་ཤེས་ལས་རང་བྱུང་རང་ཤར་རང་གྲོལ་དུ་སོང་ཚེ་ཚོར་བ་རང་གྲོལ་ཞེས་བདེ་སྡུག་བར་མ་གསུམ་པོ་གྲོལ་བའི་རང་བཞིན་ཡིན་པས། ཡུལ་ཡུལ་ཅན་དྲུག་པོ་མཉམ་ཉིད་དུ་རྟོགས་པ་ཆོས་རང་གི་གནས་ལུགས་ཡིན་པས་གནས་ལུགས་ལྟ་བའི་ཐོག་ཏུ་ངོ་སྤྲད་པ་ཟེར། དེ་ལྟར་དུ་ཡུལ་ཡུལ་ཅན་རྣམས་ཀྱི་མཚངས་དང་མཚན་འཛིན་ཤེས་པར་བྱེད་པ་ནི་བུང་བ་ཚང་ཚོལ་གྱི་སྤྱོད་པ། མཚངས་དང་མཚན་ཉིད་ཤེས་ཚེ་གཅིག་པུར་མི་སྡོད་པར་ཚོང་དུས་ཀྱི་མགྲོན་ཁང་ལ་སོགས་པ་ལ་རིག་པའི་སྣ་མི་བསྐྱིལ་བར་ཕག་སྣ་གཏུན་བུས་མི་བརྡུང་བ་བཞིན་དུ་རང་དང་གཞན་རྣམས་ཀྱིས་བཤད་ནས་ལམ་དུ་བསླང་ན་མཚངས་རིག་ནས་སྨྱོན་པ་འུར་ལངས་པ་ཡིན། མཆོད་པ་ལྟ་བུ་ཞིག་བྱེད་པ་ནི་སྨྱོན་པ་ལྟ་བུའི་སྤྱོད་པ་ཡིན། ཡུལ་ཡུལ་ཅན་ཐམས་ཅད་རིག་སྟོང་ཟུང་འཇུག་གི་ཀློང་ནས་ཤར་བ་ཡིན་པས་བྱ་བྱེད་རྩོལ་སྒྲུབ་ལས་འདས་པ་རང་གི་གནས་ལུགས་ཡིན། དེ་ལྟར་དུ་མཉམ་པར་བཞག་པ་ནི་རྒྱལ་པོ་ས་འཛིན་ལྟ་བུ་ཡིན། མཚངས་མཚན་ཉིད་རིག་ནས་ཡིན་མིན་གྱི་ཐེ་ཚོམ་མེད་པར་ཐག་ཆོད། ཡིད་ཆེས་པ་ནི་ཐི་བྱ་ཚང་ཞུགས་གི་སྤྱོད་པ། དེ་ལྟར་དུས་རྟག་ཏུ་དབེན་པའི་གནས་སུ་རང་གཅིག་པུར་འདུག་ནས་ཉམས་ལེན་བྱེད་པ་ནི་རི་དྭགས་རྨས་མ་ལྟ་བུའི་སྤྱོད་པ། རིག་སྟོང་ཆོས་ཉིད་ཀྱི་ཡེ་ཤེས་དེ་ནི་སྨྲ་བརྗོད་གྱི་མཐའ་ལས་འདས་པས་ན་ལྐུགས་པ་ལྟ་བུའི་སྤྱོད་པ་ཟེར་གསུངས་སོ། །ཚོགས་དྲུག་པོ་ལ་དེ་ལྟར་དུ་སྦྱར་ཤེས་དགོས་སོ། །ཞེས་གསུངས་སོ། །བླ་རྣམ་འདོན་མ་ཐུབ་ན་ནི། དུས་གསུམ་སངས་རྒྱས་ཐམས་ཅད་ཀྱི་ངོ་བོ་མཚུངས་མེད་དྲིན་ཆེན་རྩ་བའི་བླ་མ་མཁྱེན་ནོ། །བདག་གི་རྒྱུད་བྱིན་གྱིས་བརླབས་ཏུ་གསོལ། །ཟེར་ནས་ཀུན་འབྱུང་ལས་ཉོན་གྱི་རྟོག་ཚོགས་རྣམས་རང་གྲོལ་དུ་ཤེས་པར་བྱས། དུས་གསུམ་སངས་རྒྱས་ཐམས་ཅད་ཀྱི་ངོ་བོ་མཚུངས་མེད་དྲིན་ཆེན་རྩ་བའི་བླ་མ་མཁྱེན་ནོ། བདག་གི་སྣང་བ་བྱིན་གྱིས་རླབས་ཏུ་གསོལ། །ཞེས་སྣོད་བཅུད་འདི་ཞིང་ཁམས་དང་གཞལ་ཡས་ཁང་། སྐུ་དང་ཡེ་ཤེས་ཀྱི་རང་བཞིན་དུ་ཤེས་པར་བྱ་བ་ནི་བླ་རྣམ་ཡིན་གསུངས་སོ། །

༈ ཆོས་ཉན་པའི་དུས་སུ། ཆོས་འཆད་པ་པོ་གདོད་མའི་མགོན་པོ་ཆོས་སྐུ་ཀུན་ཏུ་བཟང་པོ་རུ་གསལ། ཉན་པ་པོ་འཁོར་རྣམས། ཕོ་ཐམས་ཅད་རྗེ་བཙུན་འཇམ་པའི་དབྱངས་དང་། མོ་ཐམས་ཅད་རྗེ་བཙུན་འཕགས་མ་སྒྲོལ་མར་གསལ་ནས། རང་གི་སྙིང་གི་མེ་ཏོག་པདྨ་འདབ་བརྒྱད་སྙན་གྱི་ཐད་ཀར་ཁ་གྱེས་པ་དང་། རྣམ་པར་ཤེས་པ་འདི་ཉིད་རྐང་དྲུག་སྦྲང་མ་ལྟ་བུ། མེ་ཏོག་གི་རྩི་བཅུད་དེ་གང་གསུང་པའི་ཆོས་ལྟ་བུ་ལ་སོགས་པ་མི་ཕམ་རིན་པོ་ཆེས་ཉན་ཚུལ་མང་དུ་གསུང་ཡོད་བླ་མས་གསུངས་སོ། །དགེ་ཞིང་བཀྲ་ཤིས་དོན་ལྡན་ཤོག །