ཉག་བླའི་ལྕེ་བཙུན་ཁྲིད་ཡིག་ཡེ་ཤེས་ཐིག་ལེའི་ཟིན་བྲིས།
ཆོས་སྐུ་ཀུན་ཏུ་བཟང་པོ་ནས་རྩ་བའི་བླ་མའི་བར་དུ་བརྒྱུད་པ་གསེར་གྱི་ཉག་ཐག་གི་ཟམ་མ་ཆད། དམ་ཉམས་འདྲེ་ཡིས་མ་ཁྱེར་བའི་གྲུབ་ཐོབ་ཤ་སྟག་བྱོན་ཏེ། འོད་གསལ་སྤྲུལ་པའི་རྡོ་རྗེ། བློ་གྲོས་མཐའ་ཡས། དེ་ནས་བླ་མ་འབྲུག་པ། ཉག་བླ། དེ་གཉིས་ཀྱིས་ཁོ་བོ་ལ་སྨིན་གྲོལ་གྱི་གདམས་པ་གནང་སྟེ་གླེགས་བམ་དབུ་ཐོག་ཏུ་བཞག་ནས་བཀའ་དགོངས་ཀྱི་གཉེར་གཏད་སྨོན་ལམ་དང་བཅས་པ་མཛད་པས་ཞལ་རེ་ཕྱེ་ཆོག་ངེས་ཡིན། ཞེས་བཀའ་དྲིན་ཅན་གྱིས་ཐུགས་དགྱེས་ཚུལ་བསྟན་ནས་གནང་བ་ལ། འོད༵་གསལ་རྫོ༵གས་པ༵་ཆེ༵ན་པོ་སེ༵མས་ཀློ༵ང་མ༵ན་ངག་གི་སྡེ༵་གསུམ་ཞེས་པའི་སྐབས་སུ། སེམས་སྡེ་བས་འཁོར་འདས་ལམ་གསུམ་གྱིས་བསྡུས་པའི་ཆོས་དག་དང་མ་དག་གི་སྣང་བ་ཐམས་ཅད་བྱང་ཆུབ་སེམས་ཀྱི་ངོ་བོ་རྩལ་རོལ་པ་གསུམ་དུ་བསྟན་ཏེ། ངོ་བོ་ནི་སེམས་རིག་གི་ལ་ཤན་ལེགས་པར་ཕྱེ་ནས། ངོ་སྤྲོད་ཚུལ་གསུམ་གང་རུང་གི་སྒོ་ནས། གཉུག་སེམས་སམ་འཆར་གཞི་ལྟ་བུ་སྐུ་གསུམ་འདུ་འབྲལ་མེད་པའི་ཡེ་ཤེས་ལྟ་བ་ངོ་སྤྲོད་ཚིག་གསུམ་གནད་བརྡེག་ལྟ་བུས་ངོ་སྤྲད་པ་དེ་རྒྱས་པར་ཆོས་དབྱིངས་མཛོད་ཀྱི་ལེའུ་ལྔ་པར། འདིར་ནི་གདོད་ནས་དག་པའི་བྱང་ཆུབ་སེམས། །དོན་ནམ་དབྱིངས་ཀྱི་ཆོས་ཉིད་བདེན་པ་ནི་སོགས་ལྟར་རེད། རྩལ་ནི་བཞི་ཆ་གསུམ་བྲལ་ལྟ་བུའི་དབང་དུ་བྱས་ནས་རང་གི་ཤེས་རྒྱུད་དེ་ཆ་བཞིར་ཕྱེས་ཏེ་རྟོག་བཅས་ཡིད་ཀྱི་ཤེས་པས། འདས་པ་རྗེས་གཅོད། མ་འོངས་སྔོན་བསུ། ད་ལྟ་མཚན་འཛིན་རྣམས་འཆར་བཅུག་ཏེ་བཤིགས་པས་རོལ་པ་ཤར་གྲོལ་དུ་བཏང་། ཉམས་ཞེན་གྱི་ཤུན་པ་གཏོར། བྱིང་རྨུག་གཉིད་གསུམ་དང་བཅས་པ་ལ་ཁའི་ན་བུན་བཞིན་དུ་དབྱིངས་སུ་དེངས་རྗེས་འཆར་གཞི་གཉུག་མའི་སེམས་འོད་གསལ་བའི་ཡེ་ཤེས་དེ་ཉིད་ལྷང་སེ་ཤར་ཡོད་དུས་སྒོ་ལྔ་ཆ་མཉམ། ཡུལ་ལྔ་འགགས་མེད་དུ་ཚུར་མེ་ལོང་ལ་གཟུགས་བརྙན་དང་རྒྱ་མཚོར་གཟའ་སྐར་འཆར་བ་བཞིན་དུ་སྣང་བའི་ཡུལ་གྱིས་མ་གོས། འཛིན་པའི་སེམས་ཀྱིས་མ་བསླད། སྣང་ཤེས་ཀྱི་འབྲེལ་ཐག་ཆད་ཡོད་དེ། དེ་ཉིད་ལས། དེ་ཡི་རྩལ་ནི་འཆར་ཚུལ་མ་འགགས་པའི་སོགས། ཁྱད་པར་འཆར་གཞིའི་འོད་གསལ། སད་པའི་ངོར་ཡིན་ན་ནི་ཤིན་ཏུ་ཕྲ་བ་ཀུན་གཞིའི་རྣམ་ཤེས་དང་བཅས་པའི་གོལ་ས་ལྔ་པོ་དེ་ཆ་མཉམས་གཅིག་པུས་ཆོད་ཚུལ་རྡོ་གྲུབ་རིན་པོ་ཆེས་གསུངས། བཞག་ཐབས་བཞི་པའི་རྒྱ་མཚོ་ཅོག་བཞག་གི་མན་ངག་ཡང་འདི་ལས་ལྷག་པ་ཞིག་སྟོན་རྒྱུ་མེད་པར། རིགས་པས་གྲུབ་ཚུལ་དང་། སྒྲ་ཐལ་འགྱུར་རྩ་བའི་རྒྱུད་སོགས་ལུང་གིས་གྲུབ་ཚུལ་དང་། མཁས་གྲུབ་མང་པོའི་ཞལ་མཐུན་ཚུལ་ཁྱད་ཆོས་མང་པོ་གསུངས། ཡེ༵་ནས་༵གན༵ས་པ༵་གཞི་ཞེས་པའི་སྐབས། སྒྲིབ་པ་དང་བཅས་པའི་དུས་ན་གཞི། དེ་ཉིད་བླ་མའི་མན་ངག་གིས་སད་པ་ལམ། ལམ་དེའི་ཤེས་ཐོབ་ཀྱི་བྱ་བྱེད་འབྲེལ་བ་ན། དྲི་མ་མཐའ་དག་བྲལ་བ་འབྲས་བུའོ། དེ་ཡང་སྒྲིབ་པ་ནི་ཤ་ཁྲག་ལུས་རྒྱ། བག་ཆགས་སེམས་རྒྱ། ཀུན་གཞི་ལུང་མ་བསྟན་གྱི་རྒྱ་གསུམ་གྱིས་སྒྲིབ་ཡོད་ཀྱང་རང་བཞིན་རྣམ་དག་ཡིན་ཚུལ་གྱི་དཔེ་ནོར་བུ་འདམ། མེ་ལོང་སྒྲོམ། རལ་གྲི་ཤུབས་ལྟ་བུ་དང་མདོ་ལུང་མང་པོ་ལྟར་རོ། མདོ་ན་བདེ་གཤེགས་སྙིང་པོ་བསྟན་པ་ལ་བཞེད་ཚུལ་མི་འདྲ་སྟེ། ཕྱི་རབས་པས། འཁོར་ལོ་བར་མ་ངེས་དོན་ཡིན། ཐ་མའི་གཤེགས་སྙིང་དྲང་དོན་ཡིན་པར་བཞེད་ནི་རེད། གཞན་སྟོང་བས་ཐ་མའི་བསྟན་དོན་ངེས་དོན་ཡིན་པར་ཡང་། རྒྱུད་བླ་མ་ལས་རྣམ་དབྱེར་བཅས་པའི་མཚན་ཉིད་ཅན། གློ་བུར་དག་གིས་ཁམས་སྟོང་གི། །རྣམ་དབྱེར་མེད་པའི་མཚན་ཉིད་ཅན། །བླ་མེད་ཆོས་ཀྱིས་སྟོང་མ་ཡིན་ཞེས་བཞེད། རྙིང་མའི་རང་ལུགས་ནི་བར་ཐ་གཉིས་ལྟོ་སྦྱར་ཏེ་དབྱིངས་ཡེ་ཟུང་འཇུག་གི་དོན་དེ་མདོ་ནས་སྔགས་ཀྱི་བར་དུ་བཟུང་ནས་འགྲོ་ནི་རེད། དེ་མ་ཟད་བླ་མེད་ཀྱི་སྐབས་སུ། འཁོར་ལོ་དང་པོ་འཁོར་བའི་ཕྱོགས་ཀྱི་བདེན་གཉིས། ཉོན་མོངས་ཤར་གྲོལ་དུ་བཏང་བས་ཀུན་འབྱུང་ལམ་བདེན་དང་། སྡུག་བདེན་འཁོར་བའི་སྣོད་བཅུད་འགོག་བདེན་སྐུ་དང་ཡེ་ཤེས་སུ་ལམ་དུ་བྱེད་པ་ཡིན། དེས་ན་ལམ་གཞན་གྱིས་བསླད་པ་བྱས་ན་ཕན་བཏགས་ནི་མ་ཟད་གནོད་ཆེན་པོ་བྱེད་པ་ཕྱུག་པོའི་མཁོང་༼ལྷས་ར་མཆན་༽དུ་གོད་འགོ་སོང་ནི་ལྟ་བུ་རེད། དེ་གཉིས་ཡ་བྲལ་ནས་བཟུང་བ་ནི་ཆད་རྟག་གི་མཐའ་ལ་ལྷུང་ཚུལ་མི་ཕམ་རིན་པོ་ཆེས་གསུངས་གསུངས། ཡང་སངས་རྒྱས་ཀྱི་གནས་ཡོངས་སུ་གྱུར་པའི་ངོར་རྣམ་མཁྱེན་ཡེ་ཤེས་རྟག་པ་ཡིན་ཚུལ་གསུངས་པ་ལྟར། རྙིང་མའི་རིང་ལུགས་མདོ་ནས་སྔགས་ཀྱི་བར་དུ་ཡེ་ཤེས་རྟག་པ་ཡིན་ཚུལ་དེ་འཛིན་ནི་རེད། བཀའ་བར་ཐ་ན་དབྱིངས་དང་ཡེ་ཤེས་བསྟན་པའི་དོན་དེ་རང་གི་ཤེས་རྒྱུད་ན་དབྱིངས་ཡེ་ཟུང་འཇུག་གི་ཚུལ་དུ་བཞུགས་པ་དེ་ཉིད་མངོན་དུ་བྱེད་ཐབས་རེད། སྔགས་བླ་མེད་ཀྱི་ཡང་རྩེའི་འོད་གསལ་རྫོགས་པ་ཆེན་པོ་སེམས་ཀློང་མན་ངག་གསུམ་པོའི་དོན་དེས་ཀྱང་རང་རྒྱུད་ཀྱི་གནས་ལུགས་དབྱིངས་ཡེ་ཟུང་འཇུག་གསུམ་གྱི་བདག་ཉིད་དེ་གཏན་ལ་དབབ་བྱེད་རེད། དེས་ན་སློབ་དཔོན་གང་ཡིན་ཀྱང་། ཐོག་མར་རྣམ་རྟོག་ངོས་བཟུང་ནས་ངང་ལ་མ་བཅོས་པར་ཤེས་མཁན་གོ་མཁན་རིག་མཁན་དེར་ཞོག་གསུངས་པ་ངེད་སྣང་ཕྱོགས་གཙོ་བོར་སྟོན་པ་སེམས་སྡེ་བའི་ཕྱོགས་རེད། དམ་པས་མང་པོའི་གསེབ་ཏུ་འགྲོ་ཙ་ན། །གང་ཤར་ངོ་བོ་ལྟ་བ་ཡིན། །གཅིག་པུར་ལྐོག་ཏུ་ཉལ་ཙ་ན། །རིག་པ་རྗེན་པར་སྐྱོང་བ་ཡིན། ཅེས་སོ། ཡང་གང་ཤར་ཐམས་ཅད་སྟོང་པ་ཡིན། ལྟ་རྒྱུ་སྒོམ་རྒྱུ་ཅི་ཡང་མེད་ཟེར་ནས་སྟོང་པ་དེར་ཕུག་གཏད་ནི་ཚང་སྟོང་ཕྱོགས་གཙོ་བོར་སྟོན་པ་ཀློང་སྡེ་བའི་ཕྱོགས་རེད། མདོ་ནས་སྔགས་ཀྱི་བར་དུ་ཟུང་འཇུག་ཁོ་ན་རྩལ་དུ་འདོན་པ་ནི་ཟུང་འཇུག་གཙོ་བོར་སྟོན་པ་མན་ངག་སྡེ་ཡིན་གསུངས། དེ་འདྲའི་གནད་ཐམས་ཅད་ཚིག་གཅིག་གི་སྟེང་ནས་སྒྲོག་མདུད་བཀྲོལ་ཐུབ་ན་ས་ཁུག་རེ་བརྒལ་འགྲོ་ཐུབ་ནི་རེད་ཞབས་དྲུང་རིན་པོ་ཆེས་གསུངས་གསུངས། ༈ དབྱིངས་ཀྱི་རྣམ་དབྱེ་མཛད་པ་ནི་ཡེ་ཤེས་ལྔ་པོ་འཆར་གཞིའི་གདངས་མ་འགགས་པའི་སྟེང་ནས་བཞགདེའི་ཡི་གེ་ནི་ཕྱོགས་དུས་ཀྱི་རྒྱལ་བ་ཐམས་ཅད་ཀྱི་དགོངས་པ་ཡེ་ཤེས་ལྔར་འདུ་བ་ཡིན་ལ། ཡེ་ཤེས་ལྔ་པོའི་རང་གདངས་སམ་རང་གཟུགས་ཡིག་འབྲུའི་རྣམ་པར་ཤར་བ་ཡིན་གསུངས། ༈ མོས་གུས་ཕྱག་གི་དོན་ནི་ཁམས་གསུམ་སྲིད་གསུམ་གྱིས་བསྡུས་པའི་སེམས་ཅན་ཐམས་ཅད་ཀྱི་རྒྱུད་ན་བདེ་གཤེགས་སྙིང་པོ་དབྱིངས་ཡེ་ཟུང་འཇུག་གི་ཚུལ་དུ་བཞུགས་པ་དེ། ཕྱོགས་དུས་ཀྱི་རྒྱལ་བ་ཐམས་ཅད་ཀྱི་ཐུགས་རྣམ་མཁྱེན་གྱི་ཡེ་ཤེས་དང་དབྱེར་མེད་རོ་གཅིག་གི་ཚུལ་དུ་ཡེ་ནས་འདྲེས་ནས་ཡོད་པར་གཟིགས་པའམ་རྟོགས་པ་ནི། རྟོགས་པ་དོན་གྱི་ཕྱག་གམ་ལྟ་བ་མཇལ་བའི་ཕྱག་རེད། ཐུགས་ཡིད་དབྱེར་མེད་མཐར་ཐུག་པ་ཡང་དེ་ལྟར་རེད་གསུངས། ༈ སྣ༷ང་སེ༷མས་འདི༷་ད༷ག་ཞེས་པའི་སྐབས། མ་དག་པའི་འཁྲུལ་སྣང་འདི་ཐོག་མའི་གཞི་དུས་དང་མཐར་ཕྱིན་འབྲས་དུས་ན་མེད་གསུངས་པ་དེ་འདི་འདྲ་བ་ཞིག་ཡིན་ལ་བྱུང་གནས་འགྲོ་གསུམ་གྱི་ཕུག་གཏུགས་ས་དང་པོ་བྱུང་པའི་རྒྱུ་མེད་ཚུལ། བར་དུ་གནས་པའི་རྟེན་མེད་ཚུལ། ཐ་མ་འགྲོ་བའི་ཡུལ་མེད་ཚུལ་འདི་རེད། འཁྲུལ་སྣང་ཀ་ནས་དག་ཚུལ་ཡང་འདི་རེད། མཐོང་དཔེ་སྙོགས་ས་ཡང་འདི་ཡིན་པས་གནད་འདིའི་སྟེང་ནས་ཟླ་རེ་ཙམ་ལ་འདང་རྒྱབ་དགོས་ནི་རེད་གསུངས། ༈ དབང་རྣོན་ཞེས་པ་དེ་སྤྱིར་རྣམ་བྱང་བསྐྱེད་པའི་དབང་པོ་ལྔ་བོ་ལོས་དགོས། བྱེ་བྲག་ཏུ་ཤེས་རབ་ཀྱི་དབང་པོ་རྣོ་བ་ལ་མྱུར་བ་ཟབ་པ་རྒྱ་ཆེ་བས་གནད་འདི་ཉིད་རྟོགས་ནུས་ན། དད་པའི་དབང་པོས་ཐུགས་རྒྱུད་ཀྱི་བྱིན་རླབས་བསྐུལ་ནུས་པ། བརྩོན་འགྲུས་ཀྱི་དབང་པོས་ཉིན་མཚན་ཐང་ལྷོད་མེད་ནས་གདོད་མའི་དབྱིངས་སུ་སྐྱེལ་ནུས་པའོ། ༈ དབང་གི་སྐབས་སུ། འཇུག་པའིི་དཀྱིལ་འཁོར་བཞི། རྟོགས་པའི་ལྟ་བ་བཞི། བསྲུང་བའི་དམ་ཚིག་བཞི་རེ་ཡོད། དང་པོ་བུམ་པ་དང་རྡུལ་ཚོན་གྱི་དཀྱིལ་འཁོར་ལ་བརྟེན་ནས། ལྟ་བ་སྣོད་བཅུད་དག་མཉམ། གཉིས་པ་རྡོ་རྗེ་ཕུང་པོའི་གྲོང་ཁྱེར་རྩ་རླུང་ཐིག་ལེའི་དཀྱིལ་འཁོར་སྔར་གྲུབ་ཆེན་རྣམས་ཀྱི་བྱང་སེམས་དངོས་དང་། དེང་སང་བདུད་རྩི་ཆོས་སྨན་རྣམ་དག་ལ་གུ་རུ་རིན་པོ་ཆེ་ཡབ་ཡུམ་གྱི་བྱང་སེམས་འདྲེས་པའི་བདུད་རྩི་བླུད། གསུམ་པ་ཡུམ་གྱི་མཁའ་དཀྱིལ་དེ་གཉིས་སྔོན་འགྲོ་དང་དངོས་གཞི་ལྟ་བུ་ཡིན་པས་སྔ་མས་ལས་རུང་དང་ཕྱི་མས་དངོས་ལ་སྦྱོར་བས་ལྟ་བ་ནི་ཚོར་བ་བདེ་སྡུག་བར་མ་གསུམ་པོ་བདེ་བ་ཆེན་པོ་ཡེ་ཤེས་གཅིག་གི་ཉམས་ཅན་དུ་འཆར་བ་ཡིན། བདེ་བ་ཆེན་པོ་ནི། བདེ་བ་ཆེན་པོ་རྟག་ཏུ་རྟགཟུག་རྔུ་ཀུན་བྲལ་འཕོ་འགྱུར་མེད་ཅེས་སོ། བཞི་པ་འཇུག་ཡུལ་ནི། སྙིང་ག་ཆོས་ཀྱི་ཕོོ་བྲང་ནས་སེམས་ཉིད་རང་བྱུང་ཡེ་ཤེས་ཀྱི་སྒོ་ཤགས་སེ་ཕྱེ་ནས་གནས་ལུགས་མི་ཤིགས་པ་གཞིའི་དཀྱིལ་འཁོར་ལ་བརྟེན་ནས། ལྟ་བ་རང་སྣང་ཡེ་ཤེས་ཀྱི་དཀྱིལ་འཁོར་ཆེན་པོར་རྟོགས་པ་ཡིན། འོད་གསལ་སད་ནས་བཟུང་བདེ་གསལ་མི་རྟོགས་གསུམ་སྐུ་གསུམ་གྱི་ཉམས་ཡིན། ༈ ངག་རླུང་འབྱུང་འཇུག་དལ་བའི་སྐབས། བཞུགས་སྟང་གང་རུང་འགྲོ་འོང་ལས་ཀྱི་རླུང་རང་སོར་བཞག་ན། རྐྱེན་ཁར་ཤོར་བའི་རྟོག་ཚོགས་ཉོན་རླུང་བག་ལ་ཞ་ནས། ཡེ་ཤེས་ཀྱི་རླུང་སད་ནས་དབྱིངས་སུ་འཁྱིལ་དགོས་ནི་རེད། ༈ སྔགས་མཚན་བཅས་དང་མཚན་མེད་རྫོགས་རིམ་གཉིས་ཡོད་ལ། མཚན་བཅས་ཙམ་པོ་བ་ནི། བསྐྱེད་རིམ་ཐུགས་སྲོག་ན་དཱའི་བར་དུ་བསྡུས་ནས་དམིགས་མེད་དུ་བཞག་པ་ཚོགས་ལམ། དང་པོ་ནི་སྟོང་བཞིས་དྲངས་པའི་འོད་གསལ་དང་། དགའ་བཞིས་དྲངས་པའི་ཡེ་ཤེས། དཔེ་ཡི་འོད་གསལ་འདྲེན་པ་སྦྱོར་ལམ། མཚན་མེད་འོད་གསལ་རྫོགས་ཆེན་གྱི་ལུགས་འདིར་རྣམ་པར་ཤེས་པའི་ཚོགས་བརྒྱད་པོ་མ་འགགགས་བཞིན་དུ་འཆར་གཞི་འོད་གསལ་སད་པའི་སྟོབས་ཀྱིས་རྣམ་ཤེས་ཐམས་ཅད་རིག་པའི་རྣམ་ལྡན་དུ་ཤར་བ་ནི་རྫོགས་ཆེན་ཁོ་ནའི་ཁྱད་ཆོས་རེད། སྒྱུ་འཕྲུལ་གྲོལ་ལམ་པ་དང་། ཕྱག་ཆེན་སྙིང་པོའི་ལུགས་སུ་ཁྲིད་པ་གཉིས་ཀྱང་འདིའི་ཕྱོགས་སུ་བསྡུ་དགོས། ཁྲེགས་ཆོད་ཀྱིས་ད་ལྟ་ནས་བླ་མའི་མན་ངག་ལ་བརྟེན་ནས་གཞིའི་འོད་གསལ་དེ་ལམ་དུ་བྱེད་པ་ཨེ་ཐུབ་བལྟ་ནི་རེད། ཐོད་རྒལ་གྱིས་གཞི་སྣང་ལམ་དུ་བྱེད་པ་ཡིན་ཏེ། ཐོད་རྒལ་ཞེས་པའི་ངེས་ཚིག་ཡང་ད་ལྟ་ནས་ཆོས་ཉིད་བར་དོའི་སྣང་ཆ་ཚུར་ལེན་ནས་ཉམས་སུ་བླང་ཟེར་ནི་རེད་གསུངས། ༈ མི་རྟག་པའི་སྐབས། སྔ་མོར་དོ་དགོང་གི་སྣང་བ་དང་ཕྱི་མའི་སྣང་བ་ཤར་བ་གཉིས་གང་སྔ་བསམ། ནུབ་མོར་སང་གི་ཉི་མ་ཤར་བ་དང་འཇིག་རྟེན་ཕྱི་མའི་སྣང་བ་ཤར་བ་གཉིས་གང་སྔ་བསམ། དེ་བས་ཀྱང་རླུང་ཕྱིར་ལན་གསུམ་འཕང་ནས་ཚུར་ཡོང་རོགས་མ་བྱས་ན་༼མ་འོང་ན་༽ཤི་བ་ཡིན་པའི་ཚུལ་ལ་བསམ་ན་དེ་ཚོའི་ཨི་མི་དགའ་གསུངས། ༈ ཐར་བའི་མཆོག་བླ་ན་མེད་པའི་སྐབས། བཟང་ང་བོའི་འདུས་མདོ་དེ་ཟིན་ཡོད་ན། རྗེས་ཐོབ་ཏུ་ལྡང་ཚེ་ཡང་དག་པའི་ལམ་དུ་འགྲོ་བའི་འབྲས་རྟགས་ཤེས་རབ་སྙིང་རྗེ་སོགས་དང་པོའི་དུས་སུ་དྲན་ག་བཅུག་ན་དེ་ནས་རྩོལ་མེད་ཤུགས་འབྱུང་དུ་འབུད་ནི་རེད་འབུད་རྒྱུ་མེད་ན། མི་ཕམ་རིན་པོ་ཆེས་དེ་ཕྱིར་འདི་གཉིས་ཁྱད་པར་ཡང་། །དུ་བའི་རྟགས་ལས་མེ་བཞིན་དུ། །སྤང་རྟོགས་བོགས་སྐྱེད་ཚུལ་ལས་ཤེས། །སོགས་གསུངས་པ་ལྟར་དེའི་ཡག་ཟིག་མེད་ནི་གཅིག་བསྐྱལ་ན་ཕེར་གི་༼མནའ་ཞིག་བསྐྱལ་ན་ཆོག་ཞེས་པའི་དོན་༽གསུངས། དེས་ན་རང་གི་ཤེས་རྒྱུད་སྟེང་ན་འཁོར་འདས་གཉིས་བཞག་སྟེ། གཞི་གཏན་ལ་ཕབ་ནས་སྐུ་གསུམ་འདུ་ུའབྲལ་མེད་པའི་རིག་ཐོག་ན་ཡོད་དུས་འདས་པའི་ཕྱོགས་རེད། དེ་ལས་ཤེས་བཞིན་མ་ཡིན་པ་ལུང་མ་བསྟན་དེ་ཏིང་འཛིན་ཉམས་པའི་རྒྱུ་དྲུག་དེའི་སྟེང་ན་ཡོད་པས་འཁོར་བའི་ཕྱོགས་སམ་རྒྱུ་དེ་ནས་བཞག་པ་ཡིན། རང་ལུགས་འདིར་བདེ་གཤེགས་སྙིང་པོ་རྟོགས་བྱེད་སོ་སྐྱེས་ཚུར་མཐོང་གི་ངོར་ཚད་མ་གཉིས། ཕ་རོལ་འཕགས་པའི་གཟིགས་ངོར་ཚད་མ་གཉིས་རེ་ཡོད་དེ། ཐ་སྙད་ལ་ཡང་གནས་སྣང་དག ། མི་མཐུན་སྣང་བ་ཡོད་པའི་ཕྱིར། སོགས་མདོ་ན་བདེ་གཤེགས་སྙིང་པོ་དེ་བྱང་སེམས་དབང་རྣོན་ཞིག་གིས་ཚོགས་མཐའ་ཡས་པས་བརྒྱན་ཏེ་ཚུར་མཐོང་གི་ཚད་མ་གཉིས་ཀྱིས་བསྐལ་ཆེན་གྲངས་མེད་གཅིག་གི་མཐར་འཕགས་པའི་མཉམ་བཞག་ཡེ་ཤེས་དེ་ཚད་མ་གཉིས་ཀྱིས་འདྲེན་ནུས་ཀྱང་། དེ་ཡན་ཆད་འདུག་ལོང་མེད་དེ་དགག་རྟོག་སྒྲུབ་རྟོག་ཡིན་པའི་ཕྱིར། ཕྱི་རབས་པས་སྔགས་ལ་མ་བསྟེན་པར་མདོ་རང་ལམ་ནས་སངས་རྒྱས་རྒྱུ་མེད་ཟེར་དོན་བདེ་གཤེགས་སྙིང་པོ་དྲང་དོན་དུ་བཞེད་པའི་དམ་བཅའ་དེ་བསྒྲུབ་པའི་ཆེད་དུ་ཡིད་ཤེས་གཅིག་པོ་ས་བཅུའི་རྒྱུན་མཐའི་བར་དུ་མིང་ལ་རྣམ་མཁྱེན་ཡེ་ཤེས་གང་བཏགས་ཀྱང་དོན་ཡིད་ཀྱི་ཤེས་པ་ཞིག་ཡིན་པར་བཞེད་ནི་རེད། སྔགས་བླ་མེད་ཉམས་སུ་བླང་སྐབས་ཡང་དབུ་མའི་སྟོང་ཉིད་སྔོན་དུ་འགྲོ་དགོས་ཟེར་དོན་ཡང་སྟོང་གཞི་ཕུང་སོགས་ཀྱི་ངོ་བོས་མི་སྟོང་ཞེས་པའི་དམ་བཅའ་བསྒྲུབ་པའི་ཆེད་རེད། རང་ཤར་མཁན་པོ་ནས་ཉག་བླ་ལ་གསང་གཏམ་དུ་གསུངས་ནི་རེད། ༈ ལམ་པའི་རྒྱུད་ན་ཕུང་པོ་ལྔ་ཡོད་དེ། དེའི་ནང་གི་རྣམ་པར་ཤེས་པའི་ཕུང་པོ་ལ་བརྒྱད། དེའི་ནང་གི་ཆོས་འཇིག་རྟེན་གཉིས་ཤེས་མཁན་ཡིད་ཤེས་གཅིག་པུ་རེད། དེ་ཡང་ཀུན་གཞི་དང་ཆོས་སྐུ་དང་། སེམས་དང་རིག་པ། ཡིད་དང་ཤེས་རབ་ཀྱི་རྣམ་དབྱེ་ཕྱེད་སྐབས་ན། ཡིད་ཀྱི་ཤེས་པ་འཁོར་ཤེས་རབ་དང་མཚུངས་ལྡན་ཅན་དེ་རྐྱེན་བཞི་ལས་སྐྱེས་པ་ཡིན་ཏེ། ཡུལ་དམིགས་གཏད་ཀྱི་མཚན་མའི་རྐྱེན་ཡུལ། རང་གི་ཉེར་ལེན་དུ་གྱུར་པའི་དེ་མ་ཐག་རྐྱེན། སྐལ་མཉམ་སོགས་རྒྱུའི་རྐྱེན། བྱེད་རྒྱུ་བདག་པོའི་རྐྱེན་དང་བཞི། རྫོགས་ཆེན་གྱི་རིག་པ་མངོན་སུམ་དུ་རྟོགས་པ་དང་འཕགས་པའི་མཉམ་བཞག་ཡེ་ཤེས་ཤར་བའི་སྐབས་ཀུན་གཞི་སོགས་རྒྱུའི་རྐྱེན་དང་སེམས་སྔ་མའི་དེ་མ་ཐག་རྐྱེན་དང་། དམིགས་པ་ཐམས་ཅད་དང་བྲལ་བའི་དམིགས་སྐྱེན་དང་། དབང་སོགས་ཀྱི་བདག་རྐྱེན་ལས་མ་སྐྱེས་པས་སེམས་མིན་ལ། ཡུལ་ཆོས་ཉིད་ལས་ཐ་དད་པའི་བློ་མེད་པས་དམིགས་རྐྱེན་མེད་ལ། དེ་མེད་པས་རྒྱུ་རྐྱེན་སོགས་ཚོགས་བརྒྱད་མེད་དེ་ཤེས་བརྗོད་འཇུག་གསུམ་གྱི་ཡུལ་ལས་འདས་པ་ཡིན་ལ། རྗེས་ཐོབ་དུ་ལྡང་ཚེ་ངེས་ཤེས་ལྷག་པར་འབར་བ་ནི། རྒྱུད་གཅིག་གིས་བསྡུས་པའི་མཉམ་བཞག་གི་ཡེ་ཤེས་དེ་ཡིད་ཤེས་དེའི་སྲོག་དུ་ཞུགས། དབུས་ན་གནས་པས་ན་ལྟ་བ་མཚན་ཉིད་པ་རྗེས་ཐོབ་ཀྱི་ངེས་ཤེས་སྟེང་ནས་བཞག་པ་ཡིན་གསུངས། ༈ ཡང་ལྷ་མཐོང་འདྲེ་མཐོང་བཤད་གི་བསྡད་ན། ཞེན་པའི་གཟུང་འཛིན་ནི་གདོན་བགེགས་ལྷ་འདྲེའི་འཁྲི་ཤིང་ཡིན་པས་གང་ལ་ཞེན་པ་དེ་ལ་ལྷ་འདྲེ་གནས་ནི་རེད། གྲུབ་ཐོབ་དང་རྟོགས་ལྡན་རྣམས་ལ་ལྷ་འདྲེའི་གླགས་མི་རྙེད་པ་ནི་གཟུང་འཛིན་རང་གྲོལ་དུ་གཏོང་བས་འཁྲི་ཤིང་མི་རྙེད་ནི་རེད། དེས་ན་བཟང་ངན་གྱི་སྣང་བ་གང་ལ་ཡང་ཞེན་པ་མེད་པར་རང་བབས་སུ་བཞག་པ་གལ་ཆེ། ཐེག་བརྒྱད་ལས་འདས་པའི་འོད་གསལ་རྫོགས་པ་ཆེན་པོའི་ཁྱད་ཆོས་ནི་རྣམ་པར་ཤེས་པའི་ཚོགས་མ་འགགས་བཞིན་དུ་དཔེ་དོན་གྱི་འོད་གསལ་ངོ་སྤྲད་དུ་ཡོད་གསུངས་ནི་རེད། སེམས་ཉོན་མོངས་པ་བཞིན་དུ་ཡེ་ཤེས་ཡིན་ཟེར་ནི་མ་རེད། སེམས་གྱི་འཆར་གཞི་འོད་གསལ་ཡིན་པས། སེམས་དང་འོད་གསལ་བའི་ཡེ་ཤེས་གཉིས་གཅིག་ཐ་དད་གང་གི་ཚུལ་དུའང་རང་ལུགས་ལ་ཁས་ལེན་ནི་མ་རེད། སད་མ་སད་ཀྱི་ཁྱད་ཙམ་མམ་འཁྲུལ་མ་འཁྲུལ་ཙམ་དང་། སྣང་ཚུལ་དང་གནས་ཚུལ་ཙམ་མོ། ༈ ཚོགས་ལམ་དུ་བསྐྱེད་རྫོགས་ཟུང་འཇུག་གམ། གོ་བའི་འོད་གསལ་དང་མོས་པའི་ལྷ་སྐུ་ཟུང་འཇུགསྦྱོར་ལམ་དུ་སྒྱུ་འོད་ཟུང་འཇུགམཐོང་ལམ་དོན་འོད་ཟུང་འཇུག་རེད། སྟོང་པའི་འོད་གསལ་ཀ་དག་ཁྲེགས་ཆོད་ཀྱིས་ལམ་དུ་བྱེད། སྣང་བའི་འོད་གསལ་ལྷུན་གྲུབ་ཐོད་རྒལ་གྱིས་ལམ་དུ་བྱེད་ནི་རེད། ཐབས་ལམ་བདེ་བའི་འོད་གསལ་ཡང་གོང་གི་ཨ་ཧཾ་འབར་འཛག་གི་དམིགས་པའི་སྐབས་སུ་བཞག་པ་གསང་ཤེར་དམ་ཚིག་རེད། རྫོགས་ཆེན་གྱི་མཉམ་བཞག་ཡེ་ཤེས་དེ་ལ་དགག་རྟོག་སྒྲུབ་རྟོག་གང་ཡང་མེད་པས་རྗེས་དཔག་མ་རེད་མངོན་སུམ་རེད། མངོན་སུམ་ཡིན་ན་མཐོང་ལམ་ཡིན་པར་འགྱུར་བས་ཡོན་ཏན་བརྒྱ་ཕྲག་བཅུ་གཉིས་སོགས་མེད་པ་ཅི་རེད་ཟེར་ན། ལུང་རྣམ་དག་གིས་རྣལ་འབྱོར་ལུས་རྒྱ་སོགས་ཀྱིས་ཡིན་ཚུལ་གསུངས་ཡོད། འོན་ཀྱང་མི་ཕམ་རིན་པོ་ཆེས་མཐོང་བ་མངོན་སུམ་ཡིན་ཀྱང་དཔེ་ཡི་འོད་གསལ་དུ་བཞེད། བར་དོར་དོན་གྱི་འོད་གསལ་ལ་འཕོ་ནུས་ཚུལ་གསུངས། ༈ དབང་བསྒྱུར་བའི་སྤྱོད་པ་ནི། ཁམས་གསུམ་དུ་འཕེན་པའི་སྣང་བ་བཟང་ངན་བར་མའི་རྟོག་པ་ཐམས་ཅད་གདོད་མའི་དབྱིངས་སུ་གྲོལ་བའོ། ༈ འབྲིང་བར་དོར་གྲོལ་ཚུལ་ལ། ད་ལྟ་གསོན་ལུས་འདིར་ཐར་པ་འདོད་པ་ལ་ཐབས་གང་ཟབ། གནད་གང་ཆེ་བརྟགས་ནས་རང་ཡིད་ཆེས་པའི་ཆོས་དེ་ཡང་མཐའ་མ་ཆོད་པ་དང་། ཐེ་ཚོམ་འཇུག་པ་དང་། ཐོག་ཏུ་མ་ཕེབ་པ་གསུམ་སྤོང་བ་ལ་དང་པོར་ཐོས་པས་བློ་སྦྱོང་། བར་དུ་བསམ་པས་ཐག་བཅད། ཐ་མར་བསྒོམ་པས་ལ་བཟླ་བའོ། ཐོས་བསམ་གྱིས་སྒྲོ་འདོགས་གཅོད་པ་ཐི་བྱ་ལྟ་བུ། ཐི་བྱའམ་ཆར་སྡོད་བྱེའུ་ཁུག་རྟ་ཞེས་པ་དེ་དངོས་རྒྱ་གར་ན་ཡོད། དེས་རྡོ་འདམ་གྱིས་ཚང་བཅའ་ཚེ་ཤིང་ཙི་ཏྲ་པ་དང་པུ་ཏྲ་པ་གཉིས་ལ་མཆུ་བརྡར་ཏེ་ཚང་བཅའ་བ་ཡིན་གསུངས། འཆི་ཁའི་བར་དོར་སྔ་འདྲེས་ཀྱི་མི་ལྟ་བུའི་གདམས་པ་དང་། ཆོས་ཉིད་བར་དོར་སྒེགས་མོ་ལ་མེ་ལོང་བསྟན་པ་ལྟ་བུའི་གདམས་པ་གཉིས་པོའི་དོན་ནི་རང་གི་མན་ངག་ལ་མཉམ་པར་བཞག་པའི་དུས་སུ། དུས་གསུམ་འཁྲུལ་རྟོག་བྲལ་བ། ཉམས་ཞེན་གྱི་ཤུན་པ་བྲལ་བ། བྱིང་རྨུགས་ཀྱི་སྒྲིབ་པ་བྲལ་བའི་གཞིའི་འོད་གསལ་སད་དེ་རླུང་སེམས་ཕྱི་མ་མ་ལང་གི་བར་དེ་ཡུན་རིང་ཐུང་ཅི་ཙམ་ཡོད་པ་དེ་ཙམ་ལྔ་འཆི་ཁར་དང་ཆོས་ཉིད་བར་དོར་འཆར་ནི་རེད། ཤར་ནས་བརྩི་བར་མི་བྱའོ་གསུངས། དེས་ན་ཁྲེགས་ཆོད་གསང་བའི་མཛོད་ཆེན་གྱི་སྒོ་བླ་མའི་མན་ངག་གི་ལྡེའུ་མིག་གིས་ཕྱེས་ནས་རིག་སྟོང་ཟུང་འཇུག་ངོ་འཕྲོད་པ་གཞི་ལམ་བྱེད་དང་། ཐོད་རྒལ་གཞི་སྣང་ལམ་བྱེད་ཡིན་པས་ཆོས་ཉིད་བར་དོར་གྲོལ་ས་བཞི་པོ་འདིའི་འཕྲོ་ན་འདི་ཡོད་བསམ་ནས་ཉམས་འོག་ཏུ་་ཆུད་དགོས། ༈ ཐ་མ་རང་བཞིན་སྤྲུལ་པའི་ཞིང་ཁམས་ལམ་ཁྱེར་ལ། ད་ལྟ་སྙིང་གར་བསྒོམ་པ་དང་། སྤྱི་བོར་བསྒོམ་ནས་འཕོ་ཚུལ་གཉིས་ལས། དང་པོ་ནི་སྙིང་གའི་དབུས་ན་རིག་པ་ཡེ་ཤེས་ལྔ་ལྡན་གྱི་གདངས་ཕྱོགས་བཞི་དབུས་དང་ལྔར་རྣམ་གྲོལ་དབུགས་ཆེན་འབྱིན་པའི་ཞིང་ཁམས་ལྔ་ཡོད། དེ་ལ་གནས་པའི་རང་བཞིན་སྤྲུལ་པ་ཟེར། ཕྱི་མ་ནི་སྤྲུལ་སྐུ་རིགས་ལྔའི་ཞིང་ཁམས་རྣམས་ཡིན། འདི་དབྱེ་བའི་གྲངས་ཙམ་བགྲངས་པའི་རང་བཞིན་སྤྲུལ་པའོ། ༈ སྔོན་འགྲོས་འཁྲུལ་གཞི་རྩད་ནས་གཅོད་ཐབས་ཁྲེགས་ཐོད་གཉིས་ཀྱི་སྔོན་འགྲོས་ཆོས་དང་གང་ཟག་གི་བདག་འཛིན་འཁྲུལ་པ་འཁྲུལ་སྣང་དང་བཅས་པ་བཤིགདངོས་གཞི་འཁྲུལ་བ་རང་གྲོལ་དུ་འགྲོ་ཚུལ། དང་པོ་མ་རིག་བདེན་འཛིན་གྱིས་དྲངས་བའི་དུས་གསུམ་ཡིད་ཀྱི་འཁྲུལ་བ་ཐམས་ཅད་འཆར་གཞིའི་ཀློང་དུ་དེངས། སླར་ཡང་ཡེ་ཤེས་ཀྱི་རླུང་གིས་བསྐྱོད་ནས་རྣམ་པར་ཤེས་པའི་ཚོགས་ཐམས་ཅད་ཡེ་ཤེས་ཀྱི་རྣམ་ལྡན་དུ་འཆར་བ་ཡིན། དེ་ཡང་ཉོན་མོངས་སྤོང་ཚུལ། ཀལྤོ་ལས། གཞི་ལ་སྤོང་བར་བྱེད་པ་ནི། །སྐྱེས་བུ་ལྡུམ་རའི་དུག་སྡོང་འདྲ། །སྦྱང་བར་བྱེད་པའི་ལམ་པས་ནི། །འཚོ་བྱེད་མཁས་པས་མཐོང་བ་འདྲ། །བསྒྱུར་བར་བྱེད་པའི་གསང་སྔགས་པ། །བྲམ་ཟེས་རིགས་སྔགས་གྲུབ་པ་འདྲ། །ལམ་དུ་བྱེད་པ་སྔགས་ནང་པས། རྨ་བྱས་ཟས་སུ་མཐོང་བ་འདྲ། །རང་སར་འཇོག་པའི་རྫོགས་ཆེན་པ། །འབྱུང་ཆེན་ལྟོས་ཀྱི་ས་གཞི་འདྲ། ཞེས་གསུངས། ༈ ཕྱག་རྫོགས་ཀྱི་ལྟ་བ་རྟོགས་པ་རྒྱལ་བ་དགྱེས་པའི་ཚུལ་ཁྲིམས་དང་། སྡོམ་གསུམ་ཁྱད་ཆོས་དྲུག་པོ་བཞགམདོར་ན་རང་ལ་ཉག་༼མཁོ་༽ངེས་པ་འདི་ཡིན་པས་ཚུར་མཐོང་གི་རྒྱུད་ཀྱི་རྣམ་ཤེས་ཀྱི་སྤྱོད་ཡུལ་དུ་གྱུར་པ་ཐམས་ཅད་འཕགས་པའི་མཉམ་བཞག་ཡེ་ཤེས་ཀྱི་སྔ་ལོག་དཔེ་ཡི་འོད་གསལ་ཤར་བའི་སྐབས་ནས་དག་འགྲོ་ནི་རེད། དེས་ན་རང་ཉིད་མཉམ་པར་དག་པའི་རང་དུས་དེ་ན། སྤྲོས་པ་མཐའ་དག་དགག་པའི་བློ་དགག་རྟོག་ཨི་ཡོད་གི། དེའི་ཤུལ་ན་སྤྲོས་བྲལ་སྒྲུབ་པའི་བློ་སྒྲུབ་རྟོག་ཨི་ཡོད་གི་བརྟགས་ན་ལོས་གོ །ཡོད་ན་རྗེས་དཔག་རེད། མངོན་སུམ་མ་རེད། དབང་བཞི་པའི་དོན་གྱི་ཡེ་ཤེས་འབྲས་བུ་ལམ་བྱེད་ནི། སྙིང་དབུས་མི་ཤིག་པའི་འོད་གསལ་སད་ནས་དབང་ཤེས་རྟོག་མེད་ཐམས་ཅད་ཡེ་ཤེས་སུ་ཤར། རྟོག་བཅས་ཤར་གྲོལ་དུ་སོང་ནས་ཡེ་ཤེས་འབའ་ཞིག་གི་སྤྱོད་ཡུལ་དུ་གྱུར་པ་འབྲས་བུ་ལམ་བྱེད་རེད། འདི་ནི་ཀུན་མཁྱེན་དང་མི་ཕམ་རིན་པོ་ཆེས། ཤར་བ་མངོན་སུམ་ཡིན། རྩལ་གྱི་ཡོན་ཏན་མ་རྫོགས་པའི་ཆ་ནས་དཔེ་ཡི་འོད་གསལ་དུ་བཞེད། ༈ སྔ་འགྱུར་བས་ལྟ་བ་ལ་གསུམ། ཆོས་ཅན་ཆོས་ཉིད་རང་རིག་གོ །ས་པཎ་དང་དཔལ་སྤྲུལ་ཚོས་ཆོས་ཉིད་ཀྱི་ལྟ་བ་མདོ་སྔགས་ཁྱད་མེད་ཚུལ་བཞེད་པ་བཞིན་མི་ཕམ་པས་ཀྱང་། ཆོས་ཉིད་ཀྱི་ལྟ་བ་ལ་ཁྱད་པར་མི་ཕྱེ། ཆོས་ཅན་དང་རང་རིག་ལྟ་བ་ལས་ཁྱད་པར་འཕགས་ཚུལ་གསུངས། དེ་ཡང་གདོད་མའི་སྟོང་ཆེན་དབྱིངས་ཀྱི་སྣང་ཆ་སྐུ་དང་ཡེ་ཤེས་ཀྱི་དཀྱིལ་འཁོར་དུ་རྟོགས་བྱེད་ལ་ཆོས་ཅན་ལྟ་བའི་ལྟ་བ་དང་། སྐུ་དང་ཡེ་ཤེས་ཀྱི་སྣང་ཆའི་ངོ་བོ་གདོད་མའི་སྟོང་ཆེན་གྱི་དབྱིངས་དེ་རྟོགས་བྱེད་ཆོས་ཉིད་ལྟ་བའི་ལྟ་བ་དང་། དེ་གཉིས་ཟུང་འཇུག་ཆེན་པོ་མེ་དང་ཚ་བ། ཆུ་དང་རླན་བཞིན་དུ་རྟོགས་པ་ནི་ཟུང་འཇུག་རང་རིག་ལྟ་བའི་ལྟ་བའོ། དེ་ཡང་ལྟ་བ་ཡེ་གྲོལ་དུ་རྟོགས་ཀྱང་བསྒོམ་པ་ཡིན་ཐོག་ཏུ་མ་བཞག་ན་འཁོར་བའི་འཁྲུལ་སྣང་མི་ཟློག་པས་རིག་པ་གཤིས་ཐོག་ཏུ་གོམས་པ་གནད་དུ་ཆེ་གསུངས། ལྟ་བས་ཇི་ལྟར་བཅད་པ་བཞིན་བསྒོམ་པས་ཉམས་སུ་ལེན་དགོས་ཏེ། ལྟ་བའི་སྟེང་དུ་མྱོང་བས་མ་སླེབ་ན། །གོ་ཡུལ་ཙམ་གྱིས་ཕན་པར་མི་འགྱུར་རོ། །ཞེས་གསུངས། ༈ སྒོམ་པས་ཉམས་སུ་ལེན་སྐབས་གཞུང་རྩ་བར། ལུས་མི་འགྱུར་བ་རི་བོ་ཅོག་བཞག་གི་གཞི་བཟུང་སོགས། སེམས་མི་གཡེངས་པ་རིག་པ་ཅོག་བཞག་གི་སྟེང་ནས་ལྟ་བསྒོམ་སྤྱོད་གསུམ་བཤད་དོ། ཕན་པའི་རྒྱས་འདེབས་ནས་ངོ་ཤེས་སོགས་བཤད། དེ་ཡང་དཀོར་ཁ་སོགས་འགྱུར་ལྡོག་མི་བྱེད་པར་མལ་ས་དེར་ལུས་གནས་པར་བྱེད་ནས་འདུག་ཚུགས་བརྟན་པོ་དགོས། ༈ སྔོན་འགྲོ་རྣམ་པ་གཉིས་ཀྱིས་འཁྲུལ་གཞི་རྩད་ནས་བཅད། ཁྲེགས་ཆོད་ཀྱིས་འཁྲུལ་བ་རང་གྲོལ་དུ་གཏོང་བའི་ལམ་ཤར་གྲོལ་རེད། གྲོལ་ཚུལ་ལྔའམ་གསུམ་གྱི་སྒོ་ནས་གཙོ་བོ་ཡུལ་ཅན་འཁྲུལ་བ་གྲོལ་ནི་རེད། ཐོད་རྒལ་གྱིས་ཡུལ་འཁྲུལ་སྣང་དེ་རང་སྣང་ཡེ་ཤེས་ཀྱི་དཀྱིལ་འཁོར་ཆེན་པོ་ལམ་དུ་བྱེད་པ་ཡིན། དེ་ཡང་བྱང་ཁོག་སྟོད་ན་སྨུག་པོ་མཆོང་གུར་ཕུབ་པ་ལྟ་བུ་རིག་པའི་རྟེན་ཙིཏྟ་ཤ་སྒྲོན། དེ་ལ་བརྟེན་པ་དྭངས་མ་ལྔ་འདུས་ཀྱི་འོད་རྩ་ངོ་བོ་རང་བཞིན་ཐུགས་རྗེ་གསུམ་གྱི་བདག་ཉིད་གནས་ལུགས་གཞིའི་སྒྲོན་མ། དེ་ལས་ལམ་དཀར་འཇམ་རྩ་ཡི་སྒྲོན་མ། རྒྱང་ཞགས་ཀྱི་སྒོ་ཡེ་ཤེས་འདུས་པའི་རྒྱང་ཞགས་ཆུའི་སྒྲོན་མ། དེ་ལས་ཕྱིར་དབྱིངས་དང་ཐིག་ལེའི་སྒྲོན་མ་གཉིས་སྟེ་དྲུག་གོ །ཡང་ཤེས་རབ་རང་བྱུང་གི་སྒྲོན་མ་དང་བར་དོ་དུས་ཀྱི་སྒྲོན་མ་དང་བརྒྱད། གཞི་ལ་བཞུགས་པའི་ཆ་ནས་གནས་ལུགས་གཞིའི་སྒྲོན་མ། དེ་ཉིད་ལམ་དུས་སུ་སད་པའི་ཆ་ནས་ཤེས་རབ་རང་བྱུང་གི་སྒྲོན་མ་ཞེས་བཞགཤེར་སྒྲོན་ཀྱི་ངོ་བོ་གདོད་མའི་སྟོང་ཆེན་གྱི་དབྱིངས་དེའི་རྩལ་ཤེས་རབ་རྣམ་པ་བཞི་འཆར་བ་ཡིན་ལ། དེ་ཡང་ཤེས་རབ་རང་བྱུང་སྒྲོན་མའི་ངོ་བོ་སྒྲོན་མ་ལ་གཏད་དུས་ནང་གི་རིག་པ་དྭངས་སངས་རང་གསལ་དུ་མྱོང་བའོ། རྩལ་ལས་ཕྱིར་གསལ་ཡུལ་ཤེས་ཀྱི་ཤེས་རབ་རྣོ་ལ་མྱུར་བ་ཚིག་དོན་ཀློང་རྡོལ་དུ་འཆར་བ་རྣམས་སོ། གདངས་ནི་ལུ་གུ་རྒྱུད་ཀྱི་སྣང་བའོ། ངོ་བོ་ཤེས་རབ་རང་བྱུང་གི་སྒྲོན་མ་དངས་ལ་ཡུལ་མེད་དུ་འཆར་བ་རིག་པའི་ངོ་བོ་ལྷག་མཐོང་ནི་གནས་ལུགས་མ་ནོར་བ་ཡིན་ཏེ། དེ་ཡང་གཞི་གནས་རང་བྱུང་ཤེས་རབ་ནི་ངོ་བོ་སྟོང་པའི་ཡེ་ཤེས། རང་བཞིན་གསལ་བའི་ཡེ་ཤེས། ཐུགས་རྗེའི་རིག་པའི་ཡེ་ཤེས་ཀྱི་བདག་ཉིད་ཅན་ཡིན། ཁྲེགས་ཆོད་ཀྱི་རིག་པ་རེད། ༈ སྣང་བ་ཅེར་འཛིན་གྱི་ཤེས་རབ་ནི། ཐོད་རྒལ་ཕྱི་ནང་གི་དབྱིངས་རིག་འདྲེས་པའི་འོད་སྣང་མངོན་དུ་གྱུར་བ་ཡིན། དྲན་པ་འགགས་མེད་ཤེས་རབ་ནི། གང་ཤར་ཐམས་ཅད་ཡེ་ཤེས་ཀྱི་ཀློང་དུ་གྲོལ་ནས་མཉམ་བཞག་གསལ་དྭངས་བྱེད་པ་ཡིན། སོ་སོར་རྟོགས་པའི་ཤེས་རབ་ནི། སེམས་དང་རིག་པ་ཀུན་གཞི་སོགས་ཀྱི་རྣམ་དབྱེ་བྱེད་པ་ཡིན། སེམས་བྱུང་ཤེས་རབ་མིན། འདི་དག་རང་བྱུང་ཡེ་ཤེས་ལ་ལྡན་པ་དང་ལྡན་ཆོས་སུ་ངོ་བོ་གཅིག་པར་བསྟན་པ་སྟེ་རང་གནས་ཀྱི་ཤེས་རབ་ཡེ་ཤེས་ཀྱི་ཆ་ཡིན་པས་རྟོག་དཔྱོད་དང་གཟུང་འཛིན་ཅན་སེམས་གྱི་བསྡུས་པ་མིན་པར་ཀུན་མཁྱེན་ཆེན་པོས་གསུངས། གདངས་ལུག་རྒྱུད་འཆར་བ་ཡིན་ནོ། ལུག་རྒྱུད་དེ་འགྲོ་འོང་གི་ཆ་ནས་གསུང་། ཁ་ཏོག་ཆ་ནས་སྐུ། ཤིན་ཏུ་དག་པའི་རྩ་ཐིག་རླུང་གསུམ་ལམ་དུ་བྱེད་པ་འདིའི་ཁྱད་ཆོས་རེད། ཉམས་སུ་ལེན་དུས་རླུང་སེམས་དང་བཅས་པས་གཏད་ན་ཐོད་རྒལ་གཟུང་འཛིན་དུ་གོལ་བས་སྣང་ཆ་གདོན་གཟུགས་སུ་ཤར་ཡོང་ཚུལ་གསུངས་པས། སེམས་ཀྱིས་བསྒོམ་ན་ཇེ་ངན་དུ་འགྲོ་བས་བསྒོམ་མི་རུང་ཚུལ་གསུངས། དེས་ན་སེམས་རིག་གི་ལ་ཤན་ལེགས་པར་ཕྱེས་ནས། ཡེ་ཤེས་ཀྱི་རླུང་གིས་བསྐྱོད་པའི་འོད་གསལ་གྱི་རིག་པ་རྗེན་པ་དེས་དབྱིངས་ཐིག་རིག་གསུམ་ཉམས་སུ་ལེན་དགོས། མི་ཕམ་རིན་པོ་ཆེས་ཡིད་ནི་གཟུང་འཛིན་ལས་མི་འདའ། གཟུང་འཛིན་ནི་གདོན་བགེགས་ཀྱི་འཁྲི་ཤིང་རྒྱབ་རྟེན་ཡིན་ལ་མངོན་སུམ་ལམ་བྱེད་ནི་ཡིད་ལས་འདས་པའི་ཤེས་རབ་ཀྱི་སྤྱོད་ཡུལ་ཡིན་ཏེ། ཡིད་དཔྱོད་ཀྱི་ཤེས་རབ་ཀྱིས་གང་དུ་བཙལ་ཡང་རྙེད་པའི་དུས་མེད་དོ། ཚོལ་མཁན་མིག་ཅན་མ་ཡིན། འོད་གསལ་གཟུགས་ཅན་མ་ཡིན་པའི་ཕྱིར་རོ། འོད་གསལ་གྱི་སྣང་ཆ་འདི་ཐ་སྙད་ལ་གྲགས་པའི་གཟུགས་ཅན་མ་ཡིན་ཏེ། ཕྲ་བ་རྡུལ་ཕྲན་དང་རགས་པ་དངོས་པོ་རང་མཚན་དུ་འདི་མེད་པའི་ཕྱིར་འབྱུང་བཞིའི་གནོད་པས་གཞིག་ཅིང་གཞོམ་དུ་མི་རུང་བའི་ཕྱིར་རོ། དེས་ན་འོད་གསལ་གྱི་རིག་པ་དེ་ལུག་རྒྱུད་ལ་གཏད་དེ་དབྱིངས་ཐིག་རིག་གསུམ་བདག་པོ་རང་ཁྱིམ་དུ་སླེབ་པ་ལྟ་བུ་ཉམས་སུ་ལེན་པ་གལ་ཆེ། རྒྱལ་བ་ཐམས་ཅད་ཀྱི་ཐུགས་འཁྲུལ་བ་མེད་པའི་ངོ་བོ་ལྷག་མཐོང་ཐམས་ཅད་ཀྱི་རྒྱལ་པོ་རིག་གདངས་རྡོ་རྗེ་ལུ་གུ་རྒྱུད་ཡིན་གསུངས། ༈ ཡེ་ཤེས་ཐིམ་ལ་མ་རྨུགས་པ་ནི། གཉིད་དང་བརྒྱལ་བ་སྙོམ་འཇུག་ལྟ་བུ་མིན་ཏེ། གསལ་མདངས་མ་འགགས་པ་མཁྱེན་ཆ་ལ་སྒྲིབ་པ་ཡིན་ནོ། ༈ ཆོས་ཉིད་མངོན་སུམ་སྐབས། ཆོ༷ས་ཞེས་པ་ཆོས་ཀྱི་དབྱིངས། ཉི༷ད་ཞེས་པ་རང་གདངས་ཡེ་ཤེས་རེད། རྫོགས་ཆེན་རང་ལུགས་ན་གདོད་མའི་སྟོང་ཆེན་གྱི་དབྱིངས་སྐུ་དང་ཡེ་ཤེས་ཀྱི་འཆར་གཞིར་གསུངས་པ་དེ་ཉིད་ཡིན། མངོ༷ན་ཞེས་པ་རང་རྒྱུད་ཀྱི་གཞི་སྐུ་གསུམ་འདུ་འབྲལ་མེད་པའི་དབྱིངས་ཡེ་ཟུང་འཇུག་དེ་སུས་ངོར་མངོན་ན་རང་བྱུང་གི་ཤེས་རབ་དེའི་ངོར་མངོན། གང་མངོན་ན་ངོ་བོ་སྟོང་གདངས། རང་བཞིན་གསལ་གདངས། ཐུགས་རྗེ་རིག་གདངས་གསུམ་རྒྱུ་རྐྱེན་ལས་འདས་པའི་འོད་རྩ་དྭངས་པའི་ལམ་ནས་དབྱིངས་ཐིག་རིག་གསུམ་ཞིང་སྐུ་ཕོ་བྲང་གསུམ་གྱི་ངོ་བོར་ཕྱི་ནང་ཡེ་ཤེས་ཟང་ཐལ་གྱི་དབང་པོའི་ངོར་དངོས་སུ་མངོན་པ་ཡིན་ནོ། །སུ༷མ་ཞེས་པ། ཐབས་ཀྱི་མན་ངག་གིས་ཕྱིར་ལུས་ངག་ཡིད་གསུམ་གྱི་གཞི་བཅའ་བ། ནང་དུ་གནད་གསུམ་གྱི་ལམ་གསལ་བ་དང་། གསང་བར་སྒོམ་པ་ཚད་ཀྱི་རིམ་པ། སྨིན་པར་རྟགས་ཀྱི་རིམ་པ། མཐར་ཐུག་ཟད་པའི་རིམ་པ་དང་གསུམ་གྱི་ཚད་བཟུང་བ་དང་། བླ་ན་མེད་པར་སྣང་བ་འོད། སྨིན་པ་ཐིག་ལེ། རྫོགས་པ་སྐུ་དང་གསུམ་གྱིས་འབྲས་བུ་རྫོགས་པའི་ཕྱིར། གསུམ་ཚན་བཞིར་ངེས་པས་གསུ༷མ་ཞེས་བྱའོ། །སྣང་བ་ནི་གང་སྣང་ན་ཆོས་ཉིད་སྣང་ལ། ཡུལ་གང་ལ་སྣང་ན་དབྱིངས་ལ་སྣང་། ཚུལ་ཇི་ལྟར་སྣང་ན་འོད་དང་འོད་ཁྱིམ་རིག་པ་ལུ་གུ་རྒྱུད་དང་བཅས་པ་སྣང་། སྣང་བ་དེ་ཉམས་སུ་བླང་བ་ལས་འབྲས་བུ་གདོས་བཅས་མི་སྣང་བར་སངས་རྒྱ་བའོ། །དེ་དུས་ནང་གི་དབྱིངས་རིག་ཡང་རིག་ཐོག་ཏུ་ནམ་བཞག་བཞག་ཏུ་ཐད་ཀར་འཆར་བ་ཡིན་གསུངས། དེ་ནས་ཆོས་ཉིད་མངོན་སུམ་གྱི་མཇུག་རྫོགས་མཚམས་ཉམས་གོང་འཕེལ་མགོར་སླེབ་མཚམས་ན་དབྱིངས་རིག་སྨིན་མཚམས་ནས་བྲལ་ཞེས་པ་ཕར་སོར་བཞི་དང་གྱེན་དུ་སོར་བཞི་འཕགས་པ་ལ་སྨིན་འཚམས་ནས་བྲལ། ཞེས་གསུངས། ༈ ཁྲེགས་ཆོད་ཀྱི་སྐབས་རྨི་ལམ་གྱི་ཁྲིད་ཆེན་བརྒྱད་ཡོད་པ་ཉམས་སུ་བླང་ཚུལ་ཚིག་དོན་མཛོད་ལྟར་ཤེས། སྦྱང་དུས་ཉིན་མཚན་གྱི་སྣང་བ་གོ་བཟློག་ནས་གཟུགས་སྒྲ་སོགས་གང་སྣང་གི་བྱ་བྱེད་ཐམས་ཅད་རྨི་ལམ་གྱི་སྣང་བ་ཡིན། རྨི་ལམ་འཁྲུལ་བའི་དབང་དུ་མི་བཏང་བར་ཉམས་ལེན་དྲན་པར་བྱའོ་སྙམ་དུ་ཉིན་པར་འཁྲུལ་སྣང་འདི་གཏན་ནས་འོངས་མི་འཇུག་སྟེ་ཕག་སྣ་གཏུན་བརྡུང་ལྟ་བུ་བྱས་ལ་རྨི་ལམ་ཡིན་པར་རྒྱུན་ཆགས་སུ་བརྩོན་ནུས་ན། དང་པོ་རྨི་ལམ་རྩུབ་ཉམས་དང་། དེ་ནས་འཇམ་ཉམས་ཟིན་ཚེ་གཟོད་སྤྲུལ་བརྒྱུར་བྱེད་པ་ཡིན་ལ། དེ་ཡང་ཕོ་མོ་ལ་བསྒྱུར་བ་མོ་ཕོ་ལ་བསྒྱུར་བ་ཆུ་མེ་ལ་བསྒྱུར་བ་སོགས་བྱེད་པ་ཡིན་ནོ། ༈ །སྤྱི༷་གཞི༷་ལུ༷ང་མ༷་བསྟ༷ན་སྐབས་ཡེ་ཐོག་གཞིའི་སྐབས་སུ་གཞི་སྣང་མ་ཤར་བའི་དུས་ན་རྟོགས་ཏེ་སངས་རྒྱས་མ་བྱུང་། རང་ངོ་རང་གིས་མ་ཤེས། ཡེ་ཤེས་དང་ཡོན་ཏན་གྱི་རྩལ་མ་རྒྱས། སྐུ་གསུམ་སྟོན་པའི་སྐུར་བཞེངས་པས་སངས་རྒྱས་མིན། མ་རྟོགས་དེ་སེམས་ཅན་མ་བྱུང་བས། མ་དག་པའི་རླུང་སེམས་མ་མཆེད་དེ་ལ་བརྟེན་ནས་ལས་ཉོན་བག་ཆགས་ཀྱི་སྣང་བ་མ་རྒྱས་པས་སེམས་ཅན་མིན་ཏེ། གཞི་རང་གི་ངོ་བོའི་ཆ་ནས་གྲོལ་ཟིན་འཁྲུལ་ཟིན་གང་ཡང་མིན་པས། གཞི་ཆོས་ཉིད་གྲོལ་འཁྲུལ་ལས་འདས་པ་ཞེས་བྱ་སྟེ། འདི་གདོད་མ་ཁུངས་ཐུབ་གཉུག་མའི་ཆོས་ཉིད་ཡིན་པའི་ཕྱིར་རོ། །གཞི་དེ་ལྟ་བུ་ལས་འཆར་རུང་གི་ཆོས་རྣམས་མ་བྱུང་། བྱུང་ནས་སྣང་བའི་གཞི་སྣང་བཀོད་པ་ན་གཞི་དེ་ལ་རྟོགས་པ་པོ་ཡིན། ཐ་སྙད་ཀྱང་འབྱུང་བས་གཞི་དེ་ཡི་རང་བཞིན་རྟོགས་ན་གྲོལ་མ་རྟོགས་ན་འཁྲུལ་བའི་ཕྱིར་ཆོས་དབྱིངས་འདི་ནི་ཕུང་པོ་བདེན་གྲུབ་ཀྱིས་སྟོང་པའི་སྟོང་ཉིད་ཕར་ཞོགཚུར་མཐོང་གི་ཚད་མའི་ངོར་འཆར་བའི་རང་སྟོང་གི་སྟོང་ཉིད་ཉི་ཚེ་བའམ་རེས་འགའ་བའི་སྟོང་ཉིད་ཡང་དེར་མི་འགྲོ་ཚུལ་སྔར་བཤད་པ་ལྟར་རེད། རྒྱུད་ལུང་མན་ངག་གསུམ་དང་རྫོགས་ཆེན་སྟེ་གསུམ་ན་བདེན་གྲུབ་སྦྱར་བའི་སྟོང་ཉིད་ཞིག་རྙིང་མའི་ལུགས་ལ་མི་སྲིད། ཚིག་ཟུར་ཙམ་ཡང་མེད་པས་འདོད་པ་བསྒྲུབ་པའི་ཕྱོགས་བཟུང་བས་འགྲོ་བ་ལྟ་ཅི་སྨོས། དེས་ན་གཞན་ལུགས་དུའང་མི་བསྲེ་ནས་ཁ་བཙུམ་ཏེ་རང་ལུགས་འཛིན་ཤེས་དགོས། ༈ སྔགས་བླ་མེད་སྤྱི་ན་རྣམ་ཀུན་མཆོག་ལྡན་གྱི་སྟོང་ཉིད་དང་སངས་རྒྱས་དང་སེམས་ཅན་གཉིས་སུ་འབྱུང་སྟེ་གཞི་གཅིག་ལམ་གཉིས་ཞེས་བྱ། རང་ངོ་མ་ཤེས་པས་གཞི་བཅས། འཆར་ཚུལ་གྱི་རིག་པ་རང་གི་ཉམས་སམ་འཆར་ཚུལ་ལ། རྩལ་སེམས་ཀྱི་འཛིན་པ་ཞུགས་ནས་འཁྲུལ་བ་ཡིན་ནོ། སེམས་ཅན་རྣམས་ཀྱིས་ཀ་དག་གི་རང་ངོ་མ་ཤེས་པས་རྒྱུ་བདག་ཉིད་གཅིག་པའི་མ་རིག་པ་བྱུང་། ལྷུན་གྲུབ་ཀྱི་སྣང་བ་རང་སྣང་ཡིན་པར་མ་ཤེས་པས་ལྷན་ཅིག་སྐྱེས་པའི་མ་རིག་པ་བྱུང་། དེ་ཇེ་རགས་སུ་སོང་ནས་ང་ལས་ཕ་གི་བྱུང་ངམ། ཕ་གི་ལས་ང་བྱུང་ངམ་དཔྱོད་པའི་ཚེ། དཔྱོད་བྱེད་དུ་ཤར། འཛིན་བྱེད་དུ་མ་ཤར་བའི་ཀུན་གཞི་དང་ཀུན་གཞིའི་རྣམ་ཤེས། དེའི་ངང་ནས་ཀུན་ཏུ་བརྟགས་པའི་མ་རིག་པ་ལྡང་། ཡུལ་སྣང་སེམས་ལ་སྣང་བའི་བག་ཆགས་བཞག་པས་སྐད་ཅིག་ངོར་ཡུལ་སྣང་ཤེས་པ་བྱུང་། སེམས་ཀྱིས་ཡུལ་ལ་དཔྱོད་པའི་བག་ཆགས་བཞག་པའི་སྐད་ཅིག་གཉིས་པར་ཡུལ་འཛིན་ཤེས་པ་བྱུང་ངོ་། རྐྱེན་བཞིས་དབང་གིས་འཁྲུལ་ཏེ། རང་སྣང་དུ་མ་ཤེས་པ་ལྷའི་བུའི་བདུད། ཟག་བཅས་ཀྱི་ཕུང་པོ་བླང་བ་ཕུང་པོའི་བདུད། ཟག་བཅས་ཀྱི་ཕུང་པོ་ལ་ཉོན་མོངས་ཡོད་པ་ཉོན་མོངས་བའི་བདུད། ཟག་བཅས་ཀྱི་ཕུང་པོ་ལ་སྐྱེ་འཆི་ཡོད་པས་འཆི་བདག་གི་བདུད་བྱུང་བའོ། ༈ གཞི་དེ་ལ་ཡེ་ཤེས་ཀྱི་རླུང་ཞེས་བྱ་བ་ཉིན་མཚན་ལ་སྤུ་འགུལ་བ་ཙམ་ཞིག་ལས་རིག་པ་གཡོས་སོ། གདངས་ཕྱིར་ཤར་བ་རྐྱེན་བཞིས་ཡར་གྲོལ་ཏེ་རྒྱུའི་རྐྱེན། དངོས་པོའི་གནས་ལུགས། བདག་པོའི་རྐྱེན། རང་རིག་པའི་ཡེ་ཤེས་དམིགས་པའི་རྐྱེན། རང་སྣང་དུ་ཤེས་པ་མཚུངས་པ་དེ་མ་ཐག་གི་རྐྱེན་དེ་རྣམས་དུས་མཚུངས་པའི་སྐད་ཅིག་མ་ལ་ལོངས་སྐུ་བཞི་བཅུ་རྩ་གཉིས་སུ་སངས་རྒྱས་པའོ། དེ་ནས་བདུད་བཞི་རང་བཞིན་དུ་བཅོམ་སྟེ་རང་སྣང་དུ་ཤེས་པས་ལྷའི་བུའི་བདུད་བཅོམ། ཡེ་ཤེས་ཀྱི་རང་ལུས་ཟིན་པས་ཕུང་པོའི་བདུད་བཅོམ། ཡེ་ཤེས་ཀྱི་ལུས་ལ་ཉོན་མོངས་པ་མེད་པས་ཉོན་མོངས་པའི་བདུད་བཅོམ། ཡེ་ཤེས་ཀྱི་ལུས་ལ་སྐྱེ་འཆི་མེད་པས་འཆི་བདག་གི་བདུད་བཅོམ་པས་མྱ་ངན་ལས་འདས་པའོ། ལོངས་སྐུ་ནས་ལྷུན་གྲུབ་རིན་པོ་ཆེའི་གསང་བའི་སྦུབས་སུ་གྲོལ་ཏེ་ལེགས་པར་མྱ་ངན་ལས་འདའ་བའོ། ༈ སྤྱིར་བར་དོའི་ཉམས་ལེན་ལ་རང་བཞིན་སྐྱེས་གནས་ཀྱི་བར་དོར་ཐོས་བསམ་ལ་སྒྲོ་འདོགས་ཆོད་པ་སྔར་འདྲེས་ཀྱི་མི་དང་འཕྲད་པ་ལྟ་བུའི་གདམས་ངག་དང་། འཆི་ཁ་བར་དོར་མི་གསལ་བ་གསལ་འདེབས་སྒེགས་མོ་ལ་མེ་ལོང་བསྟན་པ་ལྟ་བུའི་གདམས་ངག་དང་། ཆོས་ཉིད་བར་དོའི་རང་སྣང་དུ་ངོ་ཤེས་པ་མ་པང་དུ་བུ་འཇུག་པ་ལྟ་བུའི་གདམས་ངག་དང་། སྲིད་པ་བར་དོར་ལམ་གྱི་འཕྲོ་མཐུད་པ་ཡུར་བ་རྐང་ཆད་པ་ལ་ཝ་འཛུག་པ་ལྟ་བུའི་གདམས་ངག་དང་བཞི་ཡོད་པ་ལ། དང་པོ་ནི་སྤྱོད་པ་བདུན་པོ། ཉག་གཏེར་རིན་པོ་ཆེས་མཉམ་བཞག་གཅིག་གི་སྟེང་དུ་ཚང་སྟེ་བླ་མའི་གདམས་ངག་རྣམས་དྲན་པ་བུང་བ་ལྟ་བུའི་སྤྱོད་པ། སྔོན་ནས་སྒྲོ་འདོགས་ཆོད་པས་མཉམ་བཞག་གི་དུས་ཐེ་ཚོམ་མེད་པ་ཐི་བྱ་ལྟ་བུའི་སྤྱོད་པ། གང་ཤར་གྱི་སྣང་བ་མི་བསྐྱིལ་བར་ཤར་གྲོལ་དུ་གཏོང་བ་སྨྱོན་པ་ལྟ་བུའི་སྤྱོད་པ། གཙང་དམེ་གཉིས་འཛིན་དང་བྲལ་བ་ཁྱི་ཕག་ལྟ་བུའི་སྤྱོད་པ། མཉམ་བཞག་གི་ཡེ་ཤེས་དེ་མི་འཇིགས་པའི་གདེངས་དང་ལྡན་པ་ནི་སེང་གེ་ལྟ་བུ་སྤྱོད་པ་ཡིན་གསུངས། ༈ ཡང་ཁྱད་ཆོས་དྲུག་ད་ལྟའི་རིག་པ་ཀ་དག་དང་སྦྱར་ན། རང་ངོ་ཐོལ་གྱིས་རིག་པས་ལུང་མ་བསྟན་གྱི་ཀུན་གཞི་ལས་འཕགས་པ། རིག་ཙམ་དུ་ཡོད་པས་རང་ངོར་སྣང་བ་མ་འགགས་པ། ས་ལེར་གསལ་བས་བྱེ་བྲག་ཕྱེེད་པ། ཝལ་གྱིས་བྱུང་བས་བྱེ་བྲག་ཕྱེད་པའི་ཐོག་ཏུ་གྲོལ་བ། ཡོད་མེད་ལས་འདས་པས་རྐྱེན་གཞན་ལས་མ་བྱུང་བ། ངོ་བོ་ཡང་འགྱུར་བ་མེད་པས་རང་སར་གནས་པ་ལ་ད་ལྟའི་རིག་པ་ཀུན་ཏུ་བཟང་པོ་གདོད་མའི་སངས་རྒྱས་ཀྱི་རང་ཞལ་མཇལ་བ་ཡིན་ནོ་ཞེས་གསུངས། ༈ ཆོས་ཉིད་བར་དོར་གྲོལ་བ་གནད་ཀྱི་མན་ངག་གསུམ་ནི། ཆོས་ཉིད་ཀྱི་སྣང་བ་རང་སྣང་དུ་ངོ་ཤེས་པ་མ་པང་བུ་འཇུག་ལྟ་བུའི་མན་ངགཤེས་ཐོག་དེར་དལ་ཅིག་རང་བཞིན་གྱི་བསམ་གཏན་ལས་མི་གཡོ་བ་གསེར་གྱི་ཐུར་མ་ལྟ་བུའི་མན་ངགགནས་ཐོག་གི་ངང་རང་ས་ཀ་དག་ལ་གྲོལ་ནས་ཕྱིར་མི་ལྡོག་པ་དཔག་ཆེན་གྱི་མདའ་ལྟ་བུའི་མན་ངག་དྲན་པའོ། །དེ་ཡང་ད་ལྟ་འོད་གསལ་གྱི་སྣང་བ་ལུག་རྒྱུད་དང་བཅས་པའི་གདངས་ངོས་ཟིན་ཞིང་དེ་ལ་གོམ་ནས། འདི་ལས་ཕྱིར་ཐ་མལ་དུ་མི་ལྡོག་པ་ཐོད་རྒལ་གོམ་པ་ལས་ཡིན་པས་འདི་གཅེས་སོ་གསུངས། ད་ལྟ་ཉིད་ནས་འཆི་ཁ་དང་བར་དོ་སྦྱོང་བའི་ལམ་ཁྱེར་ནི། ད་ནི་ང་འཆི་བའི་དུས་ལ་བབ་པ་ཡིན་པས་གནས་གྲོགས་དང་ལོངས་སྤྱོད་སོགས་ཆགས་ཡུལ་ཐམས་ཅད་ལ་ཆགས་ཞེན་མེད་པར་བློ་ཐག་རྦད་ཀྱིས་བཅད་ལ། ལུས་ལོངས་སྤྱོད་དགེ་རྩ་དང་བཅས་པ་བླ་མའི་ཕྱོགས་སུ་ཕུལ་ཏེ། སྐྱེ་བ་ནས་ཚེ་རབས་ཀྱི་ཕྲེང་བ་ཐམས་ཅད་དུ་ཐེག་པ་ཆེན་པོའི་ཆོས་དང་གདམས་ངག་སྟོན་པའི་བླ་མ་དང་རྡོ་རྗེའི་མཆེད་གྲོགས་རྣམས་མི་འབྲལ་བར་སྨོན་ལམ་བཏབ་ནས་དབྱིངས་རིག་དབྱེར་མེད་ཀྱི་དོན་ལ་མཉམ་པར་བཞགདེ་ནས་གཟུགས་སྣང་སྒྲ་གྲགས་དྲན་རྟོག་ཐམས་ཅད་བར་དོའི་སྣང་བ་ཡིན་བསམ་ཏེ་བླ་མ་དང་གདམས་ངག་དྲན་ནས་ཐུགས་ཡིད་བསྲེ་བ་སོགས་བྱ། ༈ འཆི་དུས་འཕོ་ལུགས་གྲོང་འཕོ་གྲོང་འཇུག་དང་སྐུ་དང་ཡེ་ཤེས་ལ་འཇུག་ལུགས་རྣམ་པ་གཉིས་ཡོད་པས་དང་པོ་ཁྲེགས་ཆོད། གཉིས་པ་ཐོད་རྒལ་གྱི་ཉམས་ལེན་ནོ། །དེ་ལ་ལུས་རྟེན་འདིའི་སྤྱི་གཙུག་ཚང་པའི་བུ་ག་ནས་སོར་བཞིའི་མཚམས་སུ་རིན་ཆེན་གཙུག་ཏོར་གྱི་ཞིང་ཡོད་པས་དེར་སྙིང་ནས་རིག་པ་བླ་མའི་སྐུ་ཚོན་གང་བ་འོད་ཟེར་ལྔ་ལྡན་ཞིག་གསལ་ལ་དབུ་མ་ནས་རྒྱངས་སེ་འཕོ་བ་ནི་ཁྲེགས་ཆོད་ཀྱི་འཕོ་ལུགས་ཡིན། ཐོད་རྒལ་གྱིས་གསང་ལམ་ཤེས་ནས་སྐུ་དང་ཡེ་ཤེས་ལ་འཕོ་བ་ཡིན་རིན་པོ་ཆེས་གསུངས། སྐུ་དང་ཡེ་ཤེས་ལ་འཇུག་ལུགས་ནི། བསྒོམ་ཕྱོགས་དྲིས་ལན་ལས། ཁྱེད་རང་གིས་ཐོད་རྒལ་ཉམས་ལ་ལྷ་༼ཞལ་རྒྱུན་ལ་དབྱིངས་ཐིག་གི་དབུས་སུ་ལུག་རྒྱུད་ལ་འཕོས་ཀྱང་འདྲ་གསུངས་མཆན། ༽སྐུ་འཆར་གྱིན་འདུག་གསུངས་པ་དེ་ཉིད་མང་ཉུང་ཇི་ལྟར་འདུག་ཀྱང་མངོན་དགའ་ལ་སོགས་རང་བཞིན་སྤྲུལ་སྐུའི་ཞིང་ཁམས་སུ་ཐག་རྦད་ཀྱིས་བཅད་ལ་རང་གི་རིག་པ་འོད་གོང་གི་རྣམ་པར་སྙིང་དབུས་ནས་ཐོན་རྒྱངས་ཞག་ཆུའི་སྒྲོོན་མ་མིག་གི་སྒོ་ནས་ཐོན་ཏེ་ལྷ་སྐུའི་ཐུགས་ཀར་འཕོས་ལ་ལྷ་དང་རང་སེམས་གཉིས་སུ་མེད་པའི་ངང་ལ་མཐོང་བྱ་མཐོང་བྱེད་ཀྱི་གཉིས་འཛིན་དང་བྲལ་ནས་རང་བབས་སུ་བསྒོམ་པར་ཞུ། ཞེས་གསུངས། རྡོ་གྲུབ་ཆེན་གྱིས་ཉེ་གནས་ལ་ཁྱེད་ཀྱི་དབུ་གཙུག་ན་རིག་འཛིན་འཇིགས་མེད་གླིང་པ་བཞུགས་ཡོད་གི་དེའི་ཐུགས་ཀར་གཏོད་ཟེར་དགོས་གསུངས་ཚུལ་དང་། འོད་གསལ་སྙིང་པོས། ཉེ་གནས་ཤེར་བཟང་ལ་ཁོང་གི་དབུ་གཙུག་ཏུ་དབྱུགས་པས་བསྣུན་ལ་སྣང་ཞེན་ལྷ་སྐུ་སོགས་ཟེར་དགོས་གསུངས་ཚུལ་དང་དེ་འདྲའི་རྒྱུ་མཚན་མང་པོས་དེ་དུས་ཤིན་ཏུ་གལ་ཆེ་ཚུལ་གསུངས། རླུང་རླུང་ལ་ཐིམ་ནས་རླུང་རྣམ་ཤེས་ལ་ཐིམ་དུས་ཕྱི་དབུགས་ཆད། རྣམ་ཤེས་ནམ་མཁར་ཐིམ་ཚེ་ནང་དབུགས་ཆད་པ་ཡིན། རྣམ་ཤེས་ནི་ཀུན་གཞིའི་རྣམ་ཤེས། ནམ་མཁའ་འོད་གསལ་ལ་ཐིམ་པའི་སྐབས། སྒྲ་འོད་ཟེར་གསུམ་དང་། ཁྲོ་བོའི་སྐུ་སོགས་ཚོམ་བུའི་སྣང་བ་དང་། རྡོ་རྗེ་སེམས་དཔའི་སྣ་ཐག་ཞེས་འོད་ཀྱི་སྣམ་ཕྲན་སོགས་འཆར་ཚུལ་མང་པོ་ཡོད་པས་མཐའ་གཅིག་ཏུ་མ་ངེས། མདོར་ན་ཆོས་ཉིད་བར་དོར་འཆར་ཚུལ་ལྔ་ཡོད་ལ། དེ་ཡང་གཅིག་པོ་ཁྲེགས་ཆོད་དང་། བཞི་པོ་ལྷུན་གྲུབ་ཐོད་རྒལ་གྱི་འཆར་ལུགས་དང་གྲོལ་ལུགས་ཡིན་ནོ། ༈ །གཞི་སྣང་གི་ཆ་འོད་གསལ་དུ་ཤར་ནས། ལྷུན་གྲུབ་ཀྱི་སྣང་བ་ལ་སྐུ་ཤར་བ་ཚོམ་བུ། ཡེ་ཤེས་དང་བཞི་སྦྱོར། ལྷུན་གྲུབ་རིན་པོ་ཆེའི་སྣང་བ་ལ། དག་མ་དག་གཉིས་ཀྱི་སྒོ་རང་ངོ་ཤེས་དུས། ཐུགས་རྗེ་དང་གཉིས་མེད་མཐའ་གྲོལ་ལྟར་ཤར་ནས་རྩལ་གཞི་ལ་ཐིམ་མོ། ༈ །རང་བཞིན་སྤྲུལ་སྐུའི་ཞིང་གི་ཉམས་ལེན་ལ་ཞིང་སྦྱོང་དང་འཕོ་བ་དང་རྗེས་དྲན་དང་གསུམ་ཡོད། རྗེས་དྲན་དྲུག་ད་ལྟའི་མཉམ་བཞག་གཅིག་ལ་སྦྱར་ན། ལྷ་དང་བླ་མ་གཉིས་སུ་མེད་པའི་སྐྱབས་གནས་རྒྱ་མཚོའི་ངོ་བོ་བླ་མ་ལ་གསོལ་བ་བཏབ་ནས་ཐུགས་ཡིད་བསྲེ་བ་ལྷ༷་རྗེ༷ས་སུ་དྲ༷ན། དེའི་ཚེ་ཁྲེགས་ཆོད་ཀྱིས་དྲན་སྣང་ཡེ་ཤེས་ཀྱི་འཁོར་ལོ་ངོ་སྤྲད། ཐོད་རྒལ་གྱིས་རང་སྣང་ཡེ་ཤེས་ཀྱི་དཀྱིལ་འཁོར་ཆེན་པོ་ངོ་སྤྲད་པ་གདམས་ངག་རྗེས་སུ༷་དྲ༷ན་པ༷། ལྟ༷་བ༷་རིག་སྟོང་ཟང་ཐལ་རྗེན་པ་དེ་ཉིད་བསྒོམ་པ་ལ༷མ་རྗེ༷ས་སུ་དྲ༷ན་པ༷། མཉམ་པར་བཞག་ནས་རང་གནས་ཀྱི་བས༷མ་གཏན་རྗེ༷ས་སུ་དྲ༷ན་པ༷འི་ངང་ལ་སྒོ་གསུམ་གྱི་བྱ་བ་བཏང་ནས། དུས་གསུམ་གྱི་འཁྲུལ༴ ཉམས་ཞེན་གྱི་ཤུན་པ་འཐོར་ནས་རིག་སྟོང་ཆོས་སྐུའི་ཀློང་ལས་མི་གཡོ་བ་དེ་སྐྱེ༷་གན༷ས་རྗེ༷ས་དྲ༷ན་ནོ། །རྒྱུད་ལས་མངོན་ཤེས་ཀྱི་རྗེས་ལ་གསུང་ཀྱང་། འདིར་སྐྱེ་ཚུལ་གྱི་དབང་དུ་རྗེས་དྲན་སྔོན་ལ་གསུངས། རྗེས་དྲན་ཁ་ཅིག་དེ་ཉིད་དུ་གྲོལ་བ་ནི་ལྷུན་གྲུབ་ལོངས་སྐུའི་ཞིང་ངོ་། །ཁ་ཅིག་རང་བཞིན་སྤྲུལ་སྐུའི་ཞིང་ངོ་། །ཞེས་གྲོལ་ཚུལ་གཉིས་ཡོད། ༈ ནམ་མཁའ་སུམ་ཕྲུག་སྐབས། ཁྲེགས་ཐོད་གང་ཡིན་ཡང་ཕྱིའི་ནམ་མཁའ་བེམ་ཤེས་གཉིས་དང་བྲལ་བ་བར་སྣང་སྟོང་པའི་རྣམ་པའམ་རྒྱན་གྱི་ནམ་མཁའ་སྟོང་པ་ལ་རིག་པ་གཏད་དེ། །དེ་ལས་གཞན་དུ་མི་ཡེང་བས། ནང་གི་ནམ་མཁའ་སེམས་ཉིད་སྟོང་གསལ་སྤྲོས་པ་དང་བྲལ་བའི་ཉམས་འཆར། དེར་མི་ཞེན་པར་ཅུང་ཟད་ལྷོད་ལ་བཞག་པས། ཟང་ཐལ་གསང་བའི་ནམ་མཁའ་རིག་སྟོང་ཟུང་འཇུག་མངོན་དུ་གྱུར་དུས་ནམ་མཁའ་གསུམ་མངོན་དུ་གྱུར་ཏེ། ནམ་འཛིན་གྱི་བློ་དབྱིངས་སུ་དག་གཏེར་སྟོན་ཚང་གསུངས་པས། འདིར་རིག་པའོ་སྙམ་བྱེད་ཀྱང་དག་པས་ན་ཕྱི་མ་གཉིས་དབྱིངས་སུ་ལོས་དགཐོད་རྒལ་གྱི་ཕྱི་དབྱིངས་དེ་སེམས་ཉིད་སྟོང་གསལ་སྤྲོས་པ་དང་བྲལ་བར་བཞག་དུས་ཀྱང་ཡོད། དེ་ལས་མཆེད་པའི་ཚུལ་དུའམ། དེའི་ཀློང་དེར་འོད་ཀྱི་སྣང་བ་ཤར་བ་ནི་དབྱིངས། དེས་ན་ཞལ་རྒྱུན་ལ་འདི་ཉིད་བར་དོའི་སྐབས་ཆོས་ཉིད་ཡུལ་གྱི་འཁྲུལ་གཞི་ཡིན་གསུངས། ནམ་མཁའ་གསུམ་བསྒྲིལ་ལ་གཅིག་ཏུ་བསྒོམ་པ་ནི་ཕྱིའི་ནམ་མཁའ་སྟོང་པ་ལ་གཏད་པའི་འབེན་བཅས་བསྒོམ་པ། གསང་བའི་ནམ་མཁའ་སྙིང་ནས་རིག་པ་ལུ་གུ་རྒྱུད་དེ་ནང་གིི་ནམ་མཁའི་ལམ་ལ་བརྒྱུད་དེ་ཕྱི་རོལ་གྱི་ནམ་མཁའ་ལ་མངོན་སུམ་དུ་མཐོང་བར་འགྱུར་ལ། དེ་ལ་རིག་པ་གཅིག་ཏུ་དྲིལ་དེ་ཉམས་སུ་ལེན་པ་ནི་ནམ་མཁའ་གསུམ་འབྲེལ་བའི་ཉམས་ལེན་ནོ། ༈ །སྣང་སྲིད་དག་པ་རབ་འབྱམས་སུ་བསྒྲུབ་པ་དེ་ལ། རྒྱུད་མ་ཧཱ་ཡོ་གས་གནས་སྣང་ཕྱེ་ནས་གནས་ཚུལ་དག་མཉམས་བདེན་པ་དབྱེར་མེད་དུ་བསྒྲུབ་པ་ཡིན། ལུང་ཨ་ནུ་ཡོ་གས། སྣང་གནས་མི་ཕྱེ་ནས། སྣང་ཆ་ཡབ་ཀུན་ཏུ་བཟང་པོའི་དཀྱིལ་འཁོར། སྟོང་ཆ་ཡུམ་ཀུན་ཏུ་བཟང་མོའི་དཀྱིལ་འཁོར། ཟུང་འཇུག་སྲས་བདེ་བ་ཆེན་པོའི་དཀྱིལ་འཁོར་གསུམ་དུ་བསྒྲུབ་པ་ཡིན། མན་ངག་ཨ་ཏི་ཡོ་ཀས་རང་སྣང་ཡེ་ཤེས་ཀྱི་དཀྱིལ་འཁོར་ཆེན་པོར་བསྒྲུབ་པ་ཡིན་གསུངས། རིག་པ་ངོ་འཕྲོད་ནས་ངང་བསྐྱང་བའི་ཚེ། ཡུལ་གང་སྣང་རྟོག་པ་གང་ཤར་ལ་དགག་སྒྲུབ་བླང་དོར་མེད་པར་བསྐྱང་བས་མ་བཀག་པའི་སྣང་རིག་འགགས་མེད་ལ་སྤྱོད་པས་བསོད་ནམས་ཀྱི་ཚོགས་རྫོགས་ནིི་རེད། མ་ཞེན་པའི་གཟུང་འཛིན་དང་བྲལ་བ་ནི་རིག་པ་ཟང་ཐལ་དུ་སྐྱོང་བས་ཡེ་ཤེས་ཀྱི་ཚོགས་རྫོགས་ནི་རེད། གསུངས།