རང་བཞིན་རྫོགས་པ་ཆེན་པོའི་མྱོང་ཁྲིད་གནང་སྐབས་ཀྱི་དཔལ་ལྡན་བླ་མའི་ཞལ་རྒྱུན།

༈ བླ་མ་ལ་ཕྱག་འཚལ་ལོ། །འདིར་རང་བཞིན་རྫོགས་པ་ཆེན་པོའི་མྱོང་ཁྲིད་གནང་སྐབས་ཀྱི་དཔལ་ལྡན་བླ་མའི་ཞལ་རྒྱུན་ནི། དེ་ལ་འདིར་ཡ་གི་ཀུན་ཏུ་བཟང་པོ་ནས་མ་གི་འཇག་མའི་སྲིན་བུའི་རྒྱུད་ཡན་ཆད་དུ་རིག་པ་བདེ་གཤེགས་སྙིང་པོ་ཁྱབ་མཉམ་དུ་བཞུགས་པ་ཡིན་པས། དེ་ཇི་བཞིན་པར་ངོ་ཤེས་པ་ལྟ་བ། དེའི་ཚུགས་མ་ཤོར་བསྐྱང་བྱ་སྐྱོང་བྱེད་གཉིས་སུ་མེད་པར་བསྐྱང་བ་སྒོམ་པ། དེ་རྐྱེན་དང་བསྲེ་བ་སྤྱོད་པ་ཡིན་ལ། དེ་ཡང་གསེར་དང་གསེར་ཞུན་མའི་རྒྱུན་ལྟ་བུ་ལ། སངས་རྒྱས་ནས་སེམས་ཅན་གྱི་བར་ངོ་བོ་ལ་བྲི་གང་འཕོ་འགྱུར་མེད་པ་དེ་གཞིའི་རིག་པ། དེའི་ཡིན་ལུགས་ཅི་བཞིན་པ་ངོ་འཕྲོད་པ་ལམ་གྱི་རིག་པ། དེ་སྒྲིབ་བྱེད་ཀྱི་དག་བྱ་གློ་བུར་བའི་སྒྲིབ་པའི་ལྷད་དང་བྲལ་བ་འབྲས་བུའི་རིག་པ་ཟེར་བ་ཡིན་ལ། འབྲས་བུའི་རིག་པ་དེ་ཡང་དག་པ་གསུམ་ལྡན་གྱི་བདག་ཉིད་ཅན་དེ་ངོ་བོ་ཡེ་ནས་སྒྲིབ་གཉིས་ཀྱིས་འཆིང་མ་མྱོང་བས་ན་ཡེ་དགདེ་ལྟ་བུའི་རིག་པ་དེ་ཡང་སྐུ་དང་ཡེ་ཤེས་རྒྱ་མཚོའི་ངོ་བོར་གདོད་ནས་དག་པའི་ངོ་བོར་གནས་པས་རང་བཞིན་རྣམ་དགདེའི་སྒྲིབ་བྱེད་ཀྱི་ལྷད་ཐམས་ཅད་ལམ་བསྒོམ་པའི་མཐུས་དག་པར་བྱས་པའི་ཆ་ནས་གློ་བུར་བྲལ་དག་གི་བདག་ཉིད་ཅན་ཏེ་དག་པ་གསུམ་ལྡན་གྱི་བདག་ཉིད་ཅན་ཡིན་ལ་དེ་མངོན་དུ་བྱ་བའི་ཐབས་ལ། ངོ་རང་ཐོག་ཏུ་སྤྲད་པ། ཐག་གཅིག་ཐོག་ཏུ་བཅད་པ། གདེངས་གྲོལ་ཐོག་ཏུ་འཆའ་བ་དང་གསུམ་ལས། དང་པོ་དེ་ལ་གྲུབ་དབང་ཐམས་ཅད་མཁྱེན་པའི་གསུང་སྒྲོས་ལྟར་ན། རྫོགས་པ་ཆ ེན་པོའི་རིག་པ་དེ་ངོ་མངོན་སུམ་དུ་མཐོང་བ་ལ་ད་ལྟའི་ཀུན་རྟོག་གི་སྤྲོས་པ་འདི་ཆོད་དགོས། དེ་མ་ཆོད་ན་རིག་ངོ་ཇིི་བཞིན་པ་མི་མཐོང་བས། ཀུན་རྟོག་གི་སྤྲོས་པ་ཆོད་པའི་ཐབས་ལ་རྫོགས་ཆེན་རང་ལུགས་ཐུན་མོང་མ་ཡིན་པའི་དབང་དུ་བཏང་ན་བྱུང་གནས་འགྲོ་གསུམ་བརྟགས་པས་ཆོད་དགོས་པ་ཡིན་ལ། དེ་ཡང་དང་པོ་བྱུང་ས་ཕྱིའི་ཡུལ་བུམ་པ་ལྟ་བུ་ལས་བྱུང་སྙམ་ན། བུམ་པའི་མཆུ་བུམ་པ་མིན། དེ་བཞིན་ལྟོ་བ་ཞབས་སོགས་བུམ་པ་མིན་པའི་ཚུལ་བློ་རང་མོས་བརྟགས་པའི་ཡུལ་བུམ་པ་སྟོང་པའི་ཚེ་ན། བུམ་འཛིན་རྟོག་པ་འགགས་ནས་ཧ་ཕྱད་དེ་སོང་པའི་ཚེ་ན། དེ་མ་ཐག་ཏུ་མ་བཅོས་གདངས་གསལ་གྱི་ཤེས་པ་རྟེན་མེད་པར་དཔེར་ན་སྤྲིན་བྲལ་ནམ་མཁའ་ལྟ་བུ་སྟོང་པའི་ངང་ནས་འགགས་མེད་ཤུགས་འབྱུང་དུ་ཤར་བའི་ཡུལ་མེད་ཟང་ཐལ་གྱི་ཤེས་པ་ཞིག་འཆར་བ་དེ་ཡང་རིག་པ་ཡིན། ཡང་ན་དེ་བཞིན་དུ་བྱུང་མཁན་ལ་བརྟགས་ཏེ། མ་འོངས་པའི་རྟོག་པ་མ་སྐྱེས། འདས་པ་འགགས་ཟིན། ད་ལྟ་བའི་སེམས་ལ་སེམས་ཀྱིས་བརྟགས་ཚེ་རང་འགགས་སུ་སོང་ཚེ་གསལ་སང་ངེ་བ་དང་། སྟོང་ཧད་དེ་བར་ཕར་མཉམ་པར་བཞག་པ་མིན་པར། ཡུལ་ཅི་ཡང་མི་འཛིན་པའི་ཤེས་པ་ཟང་ཐལ་དེ་ལ་རིག་པ་ཟེར་བ་ཡིན་ལ། ཡང་བར་དུ་གནས་ས་གནས་མཁན་མཐར་འགྲོ་ས་འགྲོ་མཁན་བརྟགས་ནས་རིག་པ་ངོ་སྤྲད་ཚུལ་ཡང་སྔར་བཞིན་ནོ། །དེ་ལ་དགེ་མི་དགེ་ལུང་མ་བསྟན་གྱི་རྟོག་པ་སོགས་རྟོག་པ་ཕྲ་རགས་ཐམས་ཅད་དང་བྲལ་བའི་རྟོག་མེད་སྟོང་པ་ཡིན་པའི་ཆ་ནས་དབྱིངས་དང་། དེ་ངེས་མཁན་གོ་མཁན་ངོ་རང་ཤེས་སུ་འདུག་པའི་རིག་ཆའམ་ཤེས་ཆ་དེ་ལ་རིག་པ་ཟེར་བ་ཡིན། དབྱིངས་རང་གི་ལྡོག་པ་དེ་རིག་པ་མིན་པར་སེམས་ཉིད་ཀྱི་སྟོང་པ་ཡིན་པས། དབྱིངས་ལ་རིག་པ་མི་སྣང་། རིག་པས་དབྱིངས་ཡང་ཡུལ་དུ་མི་བྱེད། བྱེད་ན་གཏད་སོ་ཅན་གྱི་སེམས་སུ་འགྱུར་བས། མདོར་བསྡུས་ན། སེམས་རིག་གི་དབྱེ་བའི་དཀའ་གནད་མཐར་ཐུག་པ་དེ་གཏད་སོ་ཡོད་མེད་ལས་གོ་དགོས། རྟོག་མེད་ཡིན་པ་ཙམ་གྱིས་རྫོགས་ཆེན་གྱི་གཞུང་ནས་རིག་པ་ཞེས་བསྔགས་པ་མིན། རྟེན་དང་བྲལ་བའམ་ཡུལ་མེད་པའི་ཆ་ནས་རིག་པ་ཞེས་བསྔགས་པ་ཡིན་པས་ན། དམིགས་གཏད་ཅན་མདའ་འབེན་ལྟ་བུ་མིན་པར་རིག་ཆ་ཟང་ཐལ་ལེ་བ་དེ་མ་བོར་ཙམ་དུ་སྐྱོང་བ་ཡིན། དེ་ཡང་བློས་སྤུ་རིས་ཀྱི་དབྱིངས་རིག་སོ་སོར་དབྱེ་བའི་དབྱིངས་དེ་རྩལ་འདོན་བྱས་ནས་བསྒོམ་ན་བྱིང་བའི་སྐྱོན་འབྱུང་ཉེན་དང་། ཀུན་རྟོག་བག་ལ་ཞ་དཀའ་བས་ན་རིག་ཆ་དེ་གཙོ་བོར་སྐྱོང་བ་ཡིན། དེ་བསྐྱང་བས་རིག་རྩལ་སོ་སོར་རྟོག་པའི་རྩལ་འབར་ནས་རྒྱལ་བའི་གསུང་རབ་མཐའ་དག་འགྲེལ་ནུས་པའི་ཤེས་རབ་ཀྱི་རྩལ་ཏེ། དཔེར་ན་ས་ཐོབ་པའི་གང་ཟག་གིས་སྐད་ཅིག་མའི་ཡུན་ལ་ཡོན་ཏན་མང་པོ་ལ་མངའ་དབང་བསྒྱུར་བ་དེ། ད་ལྟའི་རྣམ་རྟོག་འདི་དག་གི་སྟེང་ནས་མི་ནུས་པས། ཏིང་འཛིན་ཁྱད་པར་ཅན་གྱི་སྟེང་ནས་བྱེད་པ་བཞིན་འབྱུང་བར་འགྱུར་བ་དང་ཀུན་རྟོག་མཐའ་དག་མྱུར་དུ་འགགས་པའི་དགོས་པ་ཡོད་པས་ན་རིག་ཆ་ལ་ཆིག་སྒྲིལ་བྱེད་པ་ཡིན། ད་ལྟ་མཉམ་པར་བཞག་པའི་མཐུས་རིག་པ་ཡུལ་ལ་གཡོ་བའི་ཆ་རྣམས་དབྱིངས་མི་རྟོག་པའི་ངོ་བོར་གྱུར་ནས་ནང་གསལ་གྱི་དབྱིངས་ནས་མ་གཡོས་བཞིན་དུ་གཟུགས་ཀྱི་སྐུར་བཞེངས་ཏེ་འཚང་རྒྱ་བ་ཡིན། མཉམ་གཞག་དུས་དབྱིངས་རིག་འདྲེས་པ་བྱང་སེམས་འཕགས་པ་རིག་པ་འཛིན་པ་རྣམས་ལ་ཡོད་ལ། རྒྱུན་དུ་འདྲེས་པ་སངས་རྒྱས་པ་མ་གཏོགས་མེད་གསུངས། འབྲུག་པ་རིན་པོ་ཆེས། ལུས་གནད་དྲང་བོར་བསྲིང་བ་དང་། ངག་གི་གནད་སོ་མཆུ་མ་རེག་པའི་བར་ནས་རླུང་རྒྱུ་བར་བྱེད་པས། རོ་རྐྱང་གི་ལས་རླུང་བག་ལ་ཞ་ཞིང་རིག་པ་མངོན་གྱུར་དུ་སད་པའི་གནད་ཡོད་པས་ན། དེ་ལྟར་བྱ་ཞིང་། སེམས་ཀྱི་གནད་འདས་པའི་རྟོག་པའི་རྗེས་མི་དཔྱོད། མ་འོངས་པའི་མདུན་མི་བསུ། ད་ལྟའི་ཤེས་པ་ལ་མཚན་འཛིན་མི་བྱེད་པའམ་བཟོ་མི་འཆོས་པར་རང་བབས་སུ་བཞག་ཏུ་བཅུག་ལ། དང་པོ་ངོ་གསར་དུ་སྤྲད་པའི་ཚེ་ན་གཟུགས་སྒྲ་དྲི་རོ་རེག་བྱ་ལྔ་ཉམས་སུ་མྱོང་བར་བྱས་ནས་ངོ་སྤྲད་ཀྱི་ཚིག་འདི་ལྟར། འོ་མ་རིག་བདེན་འཛིན་གྱིས་དྲངས་པའི་དུས་གསུམ་ཡིད་ཀྱི་འཁྲུལ་རྟོག་ཐམས་ཅད་སེ་ལོང་ལྕགས་ཀྱི་རྒྱ་མདུད་ཞིག་པ་བཞིན་དུ་ཞིགཉམས་བདེ་གསལ་མི་རྟོག་གསུམ་པོའང་སྤྲིན་ཡེ་ཟད་ཀྱི་ནམ་མཁའ་ལྟ་བུར་སོང་བའི་རྗེས་ལ་ངོ་བོ་ཡེ་སྟོང་སྤྲོས་པའི་མཐའ་ཐམས་ཅད་དང་བྲལ་བ་ནམ་མཁའ་ལྟ་བུའི་སྟོང་པ་དང་། དེའི་གདངས་མ་འགགས་པའི་ཤེས་པ་ཟང་ཐལ་གཉིས་དབྱེར་མེད་ཟུང་འཇུག་ཏུ་གནས་པ་དེ་དབྱིངས་རིག་ཟུང་འཇུག་གི་ལྟ་བ་ཡིན། དེ་དུས་སུ་འདོད་ཡོན་ལྔ་འགགས་མེད་སྣང་ཞིང་། ཞེན་མེད་དུ་རོལ་བ་རིག་པའི་ཁྱད་ཆོས་ཡིན་གསུངས། སེམས་ཀྱིས་ཡུལ་ལྔ་པོ་གཏན་ནས་དུས་མཉམ་དུ་མྱོང་མི་ནུས་གསུངས། ཡང་ངོ་སྤྲད་ལུགས་གཞན་ལ། བྱིན་རླབས་འཕོ་བའི་སྟོབས་ཀྱིས་ངོ་སྤྲོད། གནས་ལུགས་ལྟ་བའི་ཐོག་ཏུ་ངོ་སྤྲོད་པ། ཉམས་མྱོང་སྒོམ་པའ་ིཐོག་ཏུ་ངོ་སྤྲོད་པ་དང་གསུམ་ལས། དང་པོ་ནི་སྣང་སྲིད་ཐམས་ཅད་བླ་མའི་རོལ་བར་ངོ་སྤྲོད་པ་དེ། བླ་མའི་ཐུགས་རིག་སྟོང་དབྱེར་མེད་པའི་ཡེ་ཤེས་དེ་དང་དུས་གསུམ་རྒྱལ་བའི་ཐུགས་གཉིས་དབྱེར་མེད་པའི་བདག་ཉིད་ཅན་ཏེ། སྒྲིབ་པ་ཐམས་ཅད་བྲལ་བའི་ཆ་ནས་སངས་རྒྱས་དང་། ཡེ་ཤེས་དེ་རྟོགས་པའི་ཆོས་མཐར་ཐུག་པ་ཡིན་པས་དཀོན་མཆོགབླ་མའི་ཐུགས་མི་རྟོག་པའི་དབྱིངས་དེ་ཐུགས་རྗེའི་རིག་པ་ཟུང་འཇུག་ཏུ་ཡོད་པ་ལས་མཁའ་འགྲོའི་ཚོགས་རྣམས་ཤར་བས་མཁའ་འགྲོ་མཐར་ཐུག་ཀྱང་དེ་ཡིན་པས་དེ་ལྟ་བུའི་འོད་གསལ་དེ་མངོན་སུམ་ངོ་སྤྲད་པས་ཇི་བཞིན་པ་མཐོང་ཚེ་བླ་མ་ཆོས་སྐུའི་ཞལ་རས་མཐོང་བ་ཡིན་པས། དེའི་གདངས་ལས་རིག་པ་སྐུ་ལྟར་ཤར་བ་ལུས། སྒྲ་ལྟར་ཤར་བ་ཤེས་རྒྱུད་ཀྱིས་ཟིན་པའི་སྒྲ་ཐམས་ཅད་ཨ་ཨུའི་དབྱིངས་ལས་འབྱུང་བ་ཡིན་པས། ད་ལྟའི་ཡི་གེ་ཐམས་ཅད་དེའི་གཟུགས་བརྙན་ཡིན་ཞིང་། དེ་ལྟར་ཤེས་རྒྱུད་ཀྱིས་ཟིན་མ་ཟིན་གྱི་སྒྲ་ཐམས་ཅད་འོད་གསལ་བའི་ཡེ་ཤེས་སྒྲར་ཤར་བ་དང་། རྣམ་རྟོག་ཐམས་ཅད་ཀྱི་འཆར་གཞི་རིག་པ་ཡིན་པས་རིག་ཆ་ཟང་ཐལ་དེའི་ཀློང་དུ་བག་ཆགས་གསོག་ལོང་མེད་པར་གྲོལ་བས་རིག་པའི་ཆ་ཐུགས་ལྟར་ཤར་བ་ཡིན་པས་དེ་ལ་ངེས་ཤེས་འདྲོང་བའི་ངང་དུ་གོམས་མཐར་ཉམས་དང་མ་འདྲེས་པའི་རིག་པ་ངོ་སྤྲད་པ་དེའོ། །གཉིས་པ་གློ་བུར་ཕཊ་བརྗོད་པས་རྟོག་པ་འགགས་པའི་མཐུས་འོད་གསལ་ངོས་ཟིན་པ་ལྟ་བུ་དེ་ཡིན། གསུམ་པ་གནས་འགྱུ་རིག་གསུམ་ལ་གོམས་རྗེས་གཟོད་དེ་དང་མ་འདྲེས་པའི་རིག་པ་ངོ་སྤྲད་པ་ཡིན་གསུངས། གཞན་ཡང་དམིགས་གཏད་ཅན་གྱི་ཞི་གནས་སྨིན་མཚམས་སུ་ཡི་གེ་ཧཱུྃ་གསལ་ནས་དབུགས་ཕར་འཕང་ཚེ་ཕྱིར་བཀྱེད། དབུགས་ཚུར་རྔུབ་ཚེ་ཧཱུྃ་ཡིག་སྨིན་མཚམས་སུ་གནས་པ་ལ་སེམས་བཟུང་བའི་ཞི་གནས་འགྲུབ་ཚེ་ཉམས་དང་མ་འདྲེས་པའི་འོད་གསལ་ངོ་སྤྲད་ཚུལ་སོགས་མང་ངོ་། ༈ །བླ་མ་ཆོས་དབྱིངས་རང་གྲོལ་གསུང་རྒྱུན་ལྟར་ན་དབྱིངས་རིག་འདྲེས་ཟེར་བ་དེ། རིག་པའི་ངོ་བོ་ཡེ་སྟོང་སྤྲོས་པའི་མཐའ་ཐམས་ཅད་དང་བྲལ་བའི་ནམ་མཁའ་ལྟ་བུའི་ཕ་མཐའ་ཡས་པ་དེ་དབྱིངས། དེ་ངེས་མཁན་གྱི་རིག་པ་དེ་ཡེ་ནས་ཟུང་འཇུག་ཡིན་པས་དེ་ངོ་འཕྲོད་ནས་གོམས་པའི་ཀུན་རྟོག་རང་ཞིག་ཏུ་སོང་བའི་ཐ་མལ་སྣང་ཞེན་ཐམས་ཅད་སྟོང་དབྱིངས་ཀྱི་ཀློང་དུ་རང་ཞིག་ནས་གང་ཡང་མི་སྣང་བར་མཁྱེན་ཆ་ནང་གསལ་དུ་གྱུར་ཚེ་དབྱིངས་རིག་འདྲེས་པ་ཡིན་གསུངས། གཉིས་པ་ཐག་གཅིག་ཐོག་ཏུ་བཅད་པ་ནི། གོང་དུ་བཤད་པ་ལྟར་བཞག་ཐབས་སོགས་ཀྱི་ཐབས་བྱུང་དུ་རིག་པ་ངོ་འཕྲོད་རྗེས་སུ་དེ་དང་ཡེ་ནས་དབྱེར་མེད་པའི་སྐྱོན་ཡོན་གང་གིས་མ་བསླད་པའི་ད་ལྟའི་ཤེས་པ་ཟང་ཐལ་འདི་ཆོས་ཕུང་བརྒྱད་ཁྲི་བཞི་སྟོང་གི་བརྗོད་བྱ་མཐར་ཐུག་པ་འདི་ལས་ལྷག་པ་མེད་པ་དང་འཁྲུལ་མ་མྱོང་བའི་སངས་རྒྱས་སུ་ཐག་བཅད་པའོ། །གདེངས་གྲོལ་ཐོག་ཏུ་འཆའ་བ་མེད་ན་ལམ་འོག་མ་ཞི་གནས་སུ་འགྱུར་བས། ལམ་འོག་མར་འདོད་ཆགས་ཀྱི་གཉེན་པོ་མི་སྡུག་སོགས་བསྒོམ་ཡང་ལམ་འདིའི་དག་བྱ་ཡིན་པས། གཉེན་པོའི་སྟོབས་ཀྱིས་གྲོལ་བ་སྐབས་འདིར་གཏན་ནས་མིན་ཏེ། རིག་པ་ཟང་ཐལ་དེ་བག་ཆགས་ཀྱིས་ཡེ་ནས་བཅིང་མ་མྱོང་བས་ན་གཉེན་པོ་བརྟེན་མི་དགོས་པའི་གནད་ནི་དེ་ཡིན་ནོ། །དེ་ཡང་གྲོལ་བ་དེ་ལ་བཞི་ལས་ཡེ་གྲོལ་ནམ་མཁའ་ལྟ་བུ་ནི། རིག་པ་ཡེ་ནས་བག་ཆགས་ཀྱིས་མ་བཅིང་འཆིང་གྲོལ་ལས་འདས་པའི་རིག་པ་བྱང་ཆུབ་སེམས་དེ་གང་མ་བཅིང་བས་ན་གྲོལ་རྒྱུ་མེད་པར་ཡེ་ནས་ནམ་མཁའི་གཤིས་སུ་སྤྲིན་མ་ཞུགས་པ་ལྟ་བུ་ཡིན་པས་ན་ཡེ་གྲོལ་ནམ་མཁའ་ལྟ་བུ། རང་གྲོལ་སྦྲུལ་མདུད་བཤིག་པ་ལྟ་བུ་ནི། ད་ལྟའི་ཐ་མལ་གྱི་ཤེས་པ་མ་བཅོས་པའི་ཡེ་ཤེས་དེའི་རང་ས་ཟིན་པས་དུས་གསུམ་གྱི་རྟོག་པས་རང་ཚུགས་མི་ཐུབ་པར་རང་ཞིག་པ་སྟེ། དཔེར་ན་སྦྲུལ་མདུད་བཤིག་པ་ལ་རང་ལས་གཞན་ལ་ལྟོས་མི་དགོས་པ་བཞིན་ནོ། །ཅེར་གྲོལ་ཆུ་ཟླ་དང་ཐ་དད་དུ་སྣང་ཡང་། དོན་ལ་ཆུ་ཟླ་ཆུ་དང་དབྱེར་མེད་པ་བཞིན་དུ་རིག་པས་རང་ས་བཟུང་ནས་རྟོག་པའི་རྗེས་སུ་མི་འབྲང་བར་བྱེད་པས་ཤར་ཆའི་རྟོག་པ་རྣམས་ཤར་གཞིའི་རིག་པ་དང་གཉིས་སུ་མེད་པར་རང་གྲོལ་བའོ། །ཤར་གྲོལ་རྦ་རླབས་ལྟ་བུ་ནི། ཆུ་རླབས་དང་པོ་ཆུ་ལས་བྱུང་། བར་དུ་ཆུ་ལ་གནས། ཐ་མ་ཆུ་ལ་ཐིམ་པ་བཞིན། དང་པོ་རྟོག་ཚོགས་རིག་པ་ལས་ཤར། བར་དུ་འོད་གསལ་རང་ལ་ཐིམ་པའི་གནད་ཀྱིས། མཐར་རྟོག་ཚོགས་ཐམས་ཅད་རིག་པར་གྲོལ་བའོ། །དེ་ལྟར་གྲོལ་ཚུལ་བཞིའི་སྒོ་ནས་རྟོག་ཚོགས་ཐམས་ཅད་བག་ཆག་བསོགས་ལོང་མེད་པར་གྲོལ་བའོ། །སྣང་སྲིད་བླ་མར་འཆར་བའི་དག་སྣང་ནི། ད་ལྟའི་འོད་གསལ་བའི་ཡེ་ཤེས་འདི་བླ་མ་ཆོས་སྐུ་དངོས་ཡིན་པས། དེའི་རང་རྩལ་ལས་འཁོར་བར་སྣང་བ་ཀུན་བྱུང་བའི། གཟུགས་སྣང་ཡང་དེ་རྗེས་སུ་མ་འབྲང་བའི་སྣང་ཙམ་དེ་མདོག་མ་རྗེས་སྤུ་མ་བསྒྱུར་བ་འདི་བླ་མའི་སྐུ་ཡིན་པས། ལེའུ་བདུན་མ་ནས་འདི་ལྟར་མིག་གི་ཡུལ་དུ་སྣང་བ་སོགས་གསུངས་པ་ལྟར་སྣང་གྲགས་རིག་གསུམ་བླ་མའི་རོལ་བར་ཤེས་པ་དེ། མདོར་ན་སྔར་བྱིན་རླབས་འཕོ་སྟོབས་ཀྱི་ངོ་སྤྲོད་དུས་ཀྱི་གོ་བ་དེ་འདིར་དྲང་པ་ལས་གཞན་མི་དགོས་གསུངས། བླ་མ་འཇིགས་འོད་ཞལ་རྒྱུན་ལྟར་ན་རིག་པས་དབྱིངས་མཐོང་བས་རིག་པ་བརྗོད་ཀྱི། རིག་པའི་ལྡོག་པ་དེ་རང་གིས་རང་མཐོང་མི་སྲིད་གསུངས། ཀུན་གཞི་སེམས་མེད་གནས་སྐབས་ལྔ་ན་ཡོད་ཅིང་། ངོ་བོ་རྟོག་མེད་ལུང་མ་བསྟན། ཀུན་གཞིའི་རྣམ་ཤེས་དེའི་རང་བཞིན་གསལ་རིག་གི་ཆའམ་རྟོག་པ་འཕྲོ་ལ་ཁད་པའི་གསལ་ཆ་ཅན་དེ་ཡིན་ནོ། །ཡང་བག་ཆགས་ཀྱི་རྟེན་བྱེད་མི་བྱེད་ཀྱི་སྒོ་ནས་ཀུན་གཞི་དང་ཆོས་སྐུའི་ཤན་ཕྱེ་བ་ཡིན་གསུངས། འདི་ཤ་ཟིན་སྤུ་ཟིན་མགོ་མཇུག་མེད་པར་བྲིས་པས་གཞན་མཁས་པས་མཐོང་ན་ཁྲེལ་བའི་རྒྱུ་དང་གསང་བསྒྲགས་སུ་འདུག་པས་གཞན་ལ་མི་སྟོན་པར་གྱིས་ཤིག

༈ ཁྱབ་བདག་བླ་མ་རིན་པོ་ཆེ་ལ་སྐྱབས་སུ་མཆིའོ། །གསང་ཆེན་ཁྲེགས་ཆོད་ཀྱི་ཉམས་ལེན་ལ། ཐོག་མར་རྡོ་རྗེ་སློབ་དཔོན་མཚན་ཉིད་དང་ལྡན་པས་ཐུན་མོང་གི་ལམ་གྱིས་རྒྱུད་སྨིན་པར་བྱས་པའི་སྣོད་ལྡན་ལ། དབང་བཞི་སྤྱི་དང་ཁྱད་པར་དབང་བཞི་པའི་ངོ་སྤྲོད་ཀྱིས་སློབ་མ་ལ་ཆོས་ཐམས་ཅད་ཀྱི་གནས་ལུགས་རིག་པ་རྗེན་པར་ངོ་འཕྲོད་ངེས་སུ་བྱེད་པ་ནི་ཐོག་མར་ལྗོན་ཤིང་གི་རྩ་བ་འཛུག་པ་ལྟར་གལ་ཆེའོ། །དེ་ཡང་བློ་སྦྱོང་གིས་རྒྱུད་སྨིན་པ་གཞིར་བཞག་ལ། དབང་པོ་རྣོ་ན་རིག་པ་མངོན་སུམ་ཅར་ཕོག་དུ་ངོ་འཕྲོད་པ་དང་། དེ་ལས་གཞན་ལ་གོ་བས་ངོ་སྤྲོད་ཚུལ་གཉིས་ཡོད་གསུངས། གང་ལྟར་ཡང་སློབ་མའི་དབང་པོ་ལ་རག་ལས་པ་ཡིན་ནོ། །དངོས་དོན་གནད་བསྡུ་ན། བདག་ཅག་གི་སྟོན་པ་ཐུགས་རྗེ་ཅན་གྱི་གསུང་རབ་ཐམས་ཅད་ལམ་དུ་བྱ་གཞིའི་སྒོ་ནས་བསྡུ་ན། སེམས་ལམ་བྱེད་ཀྱི་སྟེང་ནས་ཟབ་རྒྱ་ཆེའི་ཕྱོགས་ལམ་དུ་བྱེད་ཚུལ་གསུངས་པ་མདོ་ཕར་ཕྱིན་ཐེག་པ་དང་། སྔགས་རྒྱུད་སྡེ་བཞིའི་ནང་གིབྱ་རྒྱུད། སྤྱོད་རྒྱུད། རྣལ་འབྱོར་གྱི་རྒྱུད་གསུམ་ཡིན་ལ། སེམས་རགས་པ་ལམ་བྱེད་ཀྱང་ཡོད་མོད་ཀྱང་གཙོ་བོར་ཕྲ་བ་གཉུག་མའི་སེམས་ཀྱི་སྟེང་ནས་ཟབ་རྒྱ་ཆེའི་ལམ་བསྒོམ་པ་ནི་སྔགས་བླ་མེད་ཀྱི་རྒྱུད་སྡེ་ཡིན་ནོ། །དེ་ལ་མ་ཧཱ། ཨ་ནུ། ཨ་ཏི་ཡོ་ག་སྟེ་ཡོ་ག་གསུམ་དང་། ཨ་ཏི་ཡོ་ག་ལ་ཡང་། ཕྱི་སྐོར། ནང་སྐོར། གསང་སྐོར། བླ་ན་མེད་པའི་སྐོར་དང་བཞི་ལས། མན་ངག་སྙིང་ཐིག་གི་ཆོས་སྡེ་བཀའ་གཏེར་རྣམས་ནི་སྐོར་ཚོ་ཕྱི་མར་གཏོགས་སོ། །འདིའི་ལུགས་ལ་ནི། སྤྱིར་སངས་རྒྱས་མ་ཐོབ་བར་དུ་སེམས་ཀྱི་ཆ་གཏན་བྲལ་མེད་ལ། སེམས་ལམ་བྱེད་ཀྱི་སྐབས་ཡོད་པ་ཡིན་ཀྱང་། ཐུན་མོང་དང་ཁྱད་པར་གྱི་སྔོན་འགྲོའི་སྐབས་སོགས་མ་གཏོགས། གཙོ་བོར་གཉུག་མའི་སེམས་སམ་ཡེ་ཤེས་ལམ་བྱེད་ཁོ་ནའི་སྟེང་ནས་ས་ལམ་ཐམས་ཅད་བགྲོད་ཚུལ་གསུངས་སོ། །དེ་ལྟར་ན་སྤྱིར་སྔགས་བླ་མེད་ཀྱི་ཐུན་མིན་གྱི་གནད་གསང་གཙོ་བོ་སེམས་ཕྲ་རགས་ཕྱེ་བ་ཉིད་ལ་གོ་བ་ཆགས་པ་གལ་ཆེ་བས། ཅུང་ཟད་བཤད་ན་ད་ལྟ་རང་རེ་གཉིད་དང་བརྒྱལ་བ་ནམ་ཞིག་འཆི་བ་སོགས་ཀྱི་སྐབས་སུ་སེམས་རགས་པ་འདི་ནི་ཆུའི་ལྦུ་བ་ཡལ་བ་ལྟར་འགགས་པས། དེའི་ཤུལ་ན་ཤེས་པ་ཞིག་གཏན་མེད་ན། དེའི་ཚེ་གང་ཟག་དེ་སེམས་ཅན་མ་ཡིན་པར་འགྱུར་བ་དང་། སླར་དེས་སྐྱེ་བ་བླང་བའི་ཚེ་སོགས་སུ་དེའི་རྣམ་ཤེས་གློ་བུར་འབྱུང་བ་སོགས་དང་། ད་ལྟའི་སེམས་རགས་པ་འདི་ནི་ཡུལ་རྐྱེན་སོགས་ཀྱིས་དགེ་མི་དགེ་ལུང་མ་བསྟན་དང་། དེ་ལའང་ནང་གསེས་སྣ་ཚོགས་པའི་རྣམ་པར་འགྱུར་ཞིང་འཆར་བ་མཚོ་ལས་རླབས་ཆེ་ཆུང་སོགས་འཆར་བ་ལྟ་བུ་འདི་ལ། གང་ལས་མཆེད་ཅིང་འཆར་གཞི་ཞིག་ཡོད་དགོས་ཏེ། དེ་མེད་ན་རྐྱེན་གྱི་དབང་གིས་སྣ་ཚོགས་པ་འཆར་བར་མི་འགྱུར་རོ། །དཔེར་ན་གཟུགས་བརྙན་སྣ་ཚོགས་འཆར་བ་ལ་གཞི་མེ་ལོང་དྭངས་གསལ་དགོས་པ་བཞིན། དེས་ན་ད་ལྟའི་སེམས་རགས་པ་འདིའི་འཆར་གཞི་གཉུག་སེམས་ཡོད་པ་ཡིན་ནོ། །དེ་ལྟར་སེམས་རགས་པ་འདི་གང་ལས་འཆར་བའི་གཞི་གཉུག་སེམས་ཕྲ་བ་ཡིན་པར་ནི་གསར་རྙིང་གི་བླ་མེད་ཀྱི་རྒྱུད་སྡེ་དུ་མ་ལས་གསུངས་སོ། །ཁྱད་པར་སྔ་འགྱུར་རྙིང་མའི་ནང་རྒྱུད་གསུམ་ལས་གཙོ་བོར་བཤད་ཚུལ་ཞལ་མཐུན་པར་གཉུག་མའི་ཡེ་ཤེས་དེ་དང་། དེའི་སྣང་བས་ཏིལ་ལ་སྣུམ་ཁྱབ་པ་ལྟར་འཁོར་འདས་ཐམས་ཅད་ལ་ཁྱབ་པར་གསུངས་སོ། །ཁྱད་པར་རྫོགས་པ་ཆེན་པོ་མན་ངག་སྡེ་བའི་ལུགས་འདིར་འཁོར་འདས་ཐམས་ཅད་ཀྱི་ཡིན་ལུགས་རིག་པ་སྐུ་གསུམ་གྱི་བདག་ཉིད་དུ་བཞུགས་པར་གསུངས་ཏེ། ངོ་བོ་སྟོང་པའི་རིག་པ་ཆོས་སྐུ། རང་བཞིན་གསལ་བའི་རིག་པ་ལོངས་སྐུ། ཐུགས་རྗེ་ཀུན་ཁྱབ་ཀྱི་རིག་པ་སྤྲུལ་སྐུ་སྟེ་འདི་ལ་གཞིའི་སྐུ་གསུམ་ཞེས་བྱའོ། །དེ་ལ་ད་ལྟ་སེམས་ཅན་རང་ག་མ་བདག་ལྟ་བུ་ཡང་དབྱིངས་ནང་གསལ་གྱི་སྐུ་གསུམ་དེ་ལས་མ་གཡོས། མི་གཡོ། གཡོ་བར་མི་འགྱུར་བར་ཡོད་པར་གསུངས་ཏེ། འདི་ནི་འདིའི་ཐུན་མོང་མིན་པའི་བཤད་སྲོལ་ཡིན་ནོ། །འདིའི་གནད་དོན་རྒྱས་པར་བྱས་ན་རྒྱ་ཆེ་བ་ནམ་མཁའ་ལྟ་བུ། གཏིང་ཟབ་པ་རྒྱ་མཚོ་ལྟ་བུ་ས་བཅུའི་བྱང་སེམས་ཀྱིས་ཀྱང་ཇི་ལྟ་བ་བཞིན་བརྗོད་མི་ནུས་པར་གསུངས་ན། བདག་འདྲ་བ་བྱིས་པ་ཐ་མལ་ལས་ཀྱང་ཐ་ཤལ་ཞིག་གིས་གོ་ལོ་ཐོས་ལོ་ཙམ་གྱིས་ཕྱོགས་ཙམ་ཡང་མཐོང་བར་མི་ནུས་མོད། འོན་ཀྱང་ཀུན་མཁྱེན་སྔ་ཕྱི་དང་བླ་མའི་གསུངས་ལ་བརྟེན་ཏེ་ཤ་ཟིན་སྤུ་ཟིན་ཙམ་བཀོད་ན། འཁོར་འདས་ཐམས་ཅད་གང་ལས་འཆར་བའི་གཞི་མཐར་ཐུག་ནི་འཁོར་འདས་གང་དུའང་མ་གྲུབ་ཅིང་བརྗོད་དུ་མེད་པའི་འོད་གསལ་རྣམ་པར་མི་རྟོགས་པའི་དབྱིངས་ལས་ཤར་བ་ཡིན་ཏེ། དཔེར་ན་སྣོད་བཅུད་ཐམས་ཅད་ནམ་མཁའི་ཀློང་ལས་འཆར་བ་བཞིན་ནོ། །དབྱིངས་དེ་ལས་འཁོར་འདས་དེ་དག་འཆར་བའི་ཕྱིར་འཆར་གཞིའི་དབྱིངས་ཁོ་རང་ནི་གང་དུ་ཡང་མ་གྲུབ་པ་ཞིག་དགོས་ཏེ། དེ་འཁོར་བ་དང་མྱང་འདས་གང་རུང་དུ་གྲུབ་ན་དེ་གཉིས་ཀྱི་གང་གྲུབ་ཀྱང་ཅིག་ཤོས་འཆར་མི་རུང་བ་མེ་ལོང་ལ་གཡའ་དཀར་ནག་གང་གིས་གོས་ཀྱང་དེར་གཟུགས་བརྙན་འཆར་མི་རུང་བ་དང་འདྲའོ། །དེས་ན་ཅིར་ཡང་མ་གྲུབ་ཅིང་བརྗོད་དུ་མེད་པའི་དབྱིངས་འདིར་ནི་འཁོར་འདས་ཐམས་ཅད་ཀྱི་ཐུག་ས། དང་པོའི་འབྱུང་ཁུང་། མཐར་ཟད་ས། གནས་ལུགས་ཀ་དག་རང་བཞིན་སྟོང་ཉིད་སོགས་མང་དུ་བརྗོད་དེ། དོན་ལ་ངོ་བོ་སྟོང་པའི་ཡེ་ཤེས་གཞི་ནང་གསལ་གྱི་ཆོས་སྐུའོ། །དབྱིངས་དེ་ལ་གསལ་བ་ཡེ་ཤེས་ཀྱི་ཆ་ཐིམ་ལ་མ་རྨུག་པ་བུམ་ནང་གི་མར་མེ་བཞིན་ཕྱིར་མ་འཕྲོས་པའི་ནང་གསལ་ཕྲ་བའི་ཡེ་ཤེས་ཏེ། འཇའ་ཤེལ་ཉི་འོད་དང་མ་འཕྲད་པ་འོད་ལྔ་ནང་གསལ་གྱི་ཚུལ་དུ་ཡོད་པ་ལྟ་བུའོ། །འདི་ནི་ལྷུན་གྲུབ་སྣང་བ་རང་བཞིན་གསལ་བའི་ཡེ་ཤེས་གཞིའི་ལོངས་སྐུ་ཞེས་བྱའོ། །དེ་འདྲའི་དབྱིངས་དང་ཡེ་ཤེས་སམ་ཀ་དག་དང་ལྷུན་གྲུབ། སྟོང་གསལ་གྱི་ཆ་དེ་གཉིས་ཀྱང་ཐ་གུ་སྐྱ་བསྒྲིལ་བ་ལྟ་བུ་མིན་པར་རང་རེས་གོ་བ་བླང་དུས་སེམས་ལ་སྟོང་པ་དབྱིངས་ཀྱི་ཆ་དང་སྣང་བ་ཡེ་ཤེས་གསལ་བའི་ཆ་གཉིས་གོ་རྒྱུ་སོ་སོར་འཆར་བ་ཙམ་ཡོད་ཀྱང་ཁོ་རང་གི་ངོས་ནས་དབྱིངས་གསལ་བ་ཡེ་ཤེས་ཀྱི་བདག་ཉིད། གསལ་ཆ་དབྱིངས་ཀྱི་རང་བཞིན་དུ་དབྱེར་མེད་རོ་གཅིག་ཏུ་བཞུགས་སོ། །གཞི་ལམ་འབྲས་གསུམ་གྱི་གཞི་དེ་ཡང་བཤད་མ་ཐག་པ་འདིའོ། །གཞི་དེ་རྟོགས་མ་རྟོགས་སམ། ཤེས་རབ་དང་མ་རིག་པའི་རྐྱེན་གཉིས་ལས་གཞི་དེའི་རྩལ་ལས་འཁོར་འདས་གཉིས་སུ་འཆར་རུང་བ་ཙམ་ལ་ཟུང་འཇུག་ཐུགས་རྗེ་ཀུན་ཁྱབ་ཀྱི་ཡེ་ཤེས་གཞིའི་སྤྲུལ་སྐུ་ཞེས་བྱའོ། །འདི་ནི་སྔ་མ་གཉིས་ལས་ལོགས་སུ་མེད་དོ། །འོན་ཀྱང་གཞི་ལས་འཁོར་འདས་མཆེད་རུང་གི་ཆ་ལ་བཏགས་པར་ཟད་དོ། །དེ་ཡང་བླ་མེད་ཀྱི་རྒྱུད་སྡེ་གཞན་ནས་བཤད་པའི་གཉུག་སེམས་འོད་གསལ་ཞེས་གསུངས་པ་དེ་ནི་གཙོ་བོར་རྫོགས་ཆེན་གྱི་གཞུང་དུ་ངོ་བོའི་རིག་པའམ་དབྱིངས་ཀྱི་ཆ་ལ་སྔར་བཤད་པ་དེ་ལ་གོ་དགོས་ཏེ། འདི་འཆི་དུས་སོགས་སུ་ཤར་རྒྱུ་འཆི་བ་འོད་གསལ་ཟེར་བའི་གྲགས་ཆེན་དེ་ཡིན། འདི་ཇི་ལྟ་བ་བཞིན་ཤར་བ་ལ་ད་ལྟའི་རླུང་ཕྲ་རགས་ཐམས་ཅད་སྙིང་དབུས་ཀྱི་དབུ་མའི་ནང་གི་ཤིན་ཏུ་ཕྲ་བའི་ཐིག་ལེ་དངས་མ་ལྔ་འདུས་སམ་རྫོགས་ཆེན་ཆོས་སྐད་ལ་ལྷུན་གྲུབ་གཞིའི་ཐིག་ལེར་གྲགས་པ་དེར་ཐིམ་པའི་སྐབས་མ་གཏོགས་ཇི་བཞིན་འཆར་བ་མེད་དོ། །རྫོགས་ཆེན་མན་ངག་སྡེ་བའི་ལུགས་འདིར་ངོ་སྤྲོད་རྒྱུ་དང་། ངོ་འཕྲོད་རྗེས་བརྐྱང་རྒྱུའི་རིག་པ་ནི་གོང་དུ་བཤད་མ་ཐག་པའི་འོད་གསལ་དེ་དང་ངོ་བོ་གཅིག་ཅིང་མཐར་དེ་ལ་འབབ་པ་ཡིན་ཀྱང་ཁྱད་པར་ཡོད་དེ། ད་ལྟ་རྣམ་རྟོག་མེ་ལྕེ་མཆེད་པ་ལྟར་འཕྲོ་བའི་སྐབས་འདིར་ལས་རླུང་ཕར་ཐིམ་པ་མིན་པར་ཚུར་བོར་བཞིན་པ་ཡིན་ཀྱང་། རྣམ་རྟོག་བཟང་ངན་བར་མ་ཐམས་ཅད་ལ་ཁྱབ་པ། རྣམ་རྟོག་གི་སྲོག་དང་། བཅུད་ལྟ་བུའི་རྣམ་རྟོག་གི་རང་བཞིན་དུ་ཡོད་པའི་ཅིར་ཡང་འཛིན་པ་མེད་པའི་ཧྲིག་གེརྗེན་ནེ། འདི་ཡིན་དང་འདི་མིན་གྱི་ངོས་བཟུང་དང་བྲལ་བ་དུས་གསུམ་གྱི་ཡུལ་ལ་འཕྲོ་བའི་རྣམ་རྟོག་གིས་མ་གོས་པ། ནམ་མཁའ་རྟེན་མེད་ལ་སྤྲིན་དཀར་ལིང་ངེར་གནས་པ་ལྟ་བུ་ཞིག་ཡོད་པ་དེ་ཡིན་ཏེ། འདི་ལ་ཐུགས་རྗེའི་རིག་པ་ཟེར། དབྱིངས་ངོ་བོའི་རིག་པ་དང་། ཐུགས་རྗེའི་རིག་པ་གཉིས་སྔར་བཤད་པ་ལྟར་ངོ་བོ་གཅིག་ཀྱང་། དབྱིངས་རིག་གཉིས་ལས་འདིར་རིག་པའི་ཆ་ནས་ངོ་འཕྲོད་པ་དང་ངང་བརྐྱང་བ་དགོས་ལ། འདི་ལ་ཐོག་མར་དབུ་མར་རླུང་ཐིམ་པ་སོགས་ཀྱང་མི་དགོས་པར་གཉུག་སེམས་མངོན་དུ་བྱེད་ནུས་པ་ཡིན་ནོ། །ཐུགས་རྗེའི་རིག་པའམ་རྩལ་གྱི་རིག་པ་འདི་ནི་རྒྱལ་པོ་གདན་དང་མ་བྲལ་བ་ཟེར་བ་ལྟར་དབྱིངས་སྤྲོས་བྲལ་གྱི་ངང་ལས་གཡོ་མ་མྱོང་ཞིང་རང་ཉིད་སྤྲོས་པའི་མཚན་མ་གང་གི་ངོ་བོར་ཡང་མ་སྐྱེས་པ་དངུལ་ཆུ་རྡུལ་ཁྲོད་ལྷུང་བ་ལ་རྡུལ་གྱིས་གོས་པ་མེད་པ་ལྟར་རིག་པ་འདི་ཡང་ཆགས་སོགས་ཉོན་མོངས་པ་དང་། དད་སོགས་དགེ་བའི་རྟོག་པ་ཐམས་ཅད་དང་། ལུང་མ་བསྟན་གྱི་རྣམ་རྟོག་ཐམས་ཅད་ཀྱི་རང་བཞིན་དུ་གནས་ཀྱང་རྟོག་པ་དེ་དང་དེར་གྱུར་མ་མྱོང་བ་ཡིན་ནོ། །དེས་ན་ཆོས་ཐམས་ཅད་ཀྱི་གཤིས་ལུགས་ཅིར་ཡང་མ་གྲུབ་པའི་རྣམ་པར་མི་རྟོག་པའི་དབྱིངས་ཀྱི་རྒྱལ་ཁབ་ལས་གཡོ་མ་མྱོང་བའི་ཤེས་རབ་ཡིན་ལ། འདི་ལམ་དུ་བྱེད་ཚུལ་ལེགས་པར་ཐོན་ན། ཆོས་ཐམས་ཅད་ཀྱི་གནས་ལུགས་མཐར་ཐུག་གི་དབྱིངས་ལ་རེག་སླ་ཞིང་གནས་ལུགས་ཀྱི་གཏིང་ལ་སླེབ་ནུས་པའི་ཤེས་རབ་བམ། སོ་སོར་རྟོག་པའི་ཡེ་ཤེས་སམ། ལྷག་མཐོང་གི་རྒྱལ་པོ་ཡིན་ཏེ། དེ་ན་རྒྱལ་པོ་ཆེན་པོའི་མཛོད་ཀྱི་བྱན་པོ་ལ་འདྲིས་ཆ་བཏང་ནས་གྲོགས་སུ་ཁུག་ན་རྒྱལ་པོའི་བང་མཛོད་ཀྱང་བརྡོལ་ནུས་པ་ལྟ་བུའོ། །རྫོགས་ཆེན་སྐབས་སུ་རིག་པ་ཞེས་ཡོད་ན་དེས་ཆོགམེད་ན་ཐབས་ཆགས་ཤིག་གསུང་རྒྱུ་དེ་ལྟར་ཡིན་ནོ། །དེས་ན་བླ་མེད་ཀྱི་རྒྱུད་སྡེ་ཕལ་མོ་ཆེར་རྟོགས་བྱ་ངོ་བོའི་རིག་པའམ་དབྱིངས་ཀྱི་ཆའི་ངོ་སྤྲོད་གསུངས་པ་ཡོད་ཀྱང་། རྟོགས་བྱེད་ཤེས་རབ་ཀྱི་རིག་ཆ་ཐུགས་རྗེ་ཀུན་ཁྱབ་ཀྱི་རྩལ་རིག་འདི་རྗེན་པར་ཕུད་ནས་བསྐྱངས་པས་འཁྲུལ་བའི་སྦུབས་ལས་འཐོན་ཏེ། མ་འཁྲུལ་གཉུག་མའི་རྒྱལ་སར་འཁོད་ལུགས་འདི་རྫོགས་ཆེན་མན་ངག་སྡེ་བའི་ཁྱད་ཆོས་ཀྱི་རྩ་བ་ཡིན་ཏེ་གོ་བ་ཉུང་དོན་འདིར་དབྱིངས་རིག་གི་ཆ་གཉིས་སུ་ཕྱེ་བའི་རིག་པའི་ངོ་སྤྲོད་གཙོ་ཆེ་ཡང་དེར་དབྱིངས་ཀྱི་ངོ་སྤྲོད་འདུས་པ་ཡིན་ཏེ། འདི་ཐོག་མར་ངོ་སྤྲོད་དུས་ནས་ད་ལྟ་ཐ་མལ་རང་བབ་ཀྱི་རིག་པ་ཅིར་ཡང་བརྗོད་དུ་མེད་པ་འདི་ཀ་འཁོར་འདས་ཐམས་ཅད་གནས་ལུགས་སུ་ངོ་སྤྲད་པ་ཡིན་པའི་ཕྱིར་རོ། །དེས་ན་རྫོགས་ཆེན་རིག་པ་ངོ་འཕྲོད་ཟེར་བ་དེ། དཔེར་ན་འཕགས་པའི་མཉམ་གཞག་ཡེ་ཤེས་བཤད་པ་ལྟ་བུ་སྟེ། གཉུག་མའི་རིག་པ་དེའི་སྟེང་དུ་སླེབས་པ་ན་དེའི་ངོར་སྤང་བྱ་འཁོར་བ་དང་། བླང་བྱ་མྱང་འདས་ཀྱི་སྣང་བ་ཅིར་ཡང་མེད་པ་གཏད་སོ་ཀུན་བྲལ་བ་ནམ་མཁའ་ལ་མདུང་བསྐོར་བ་ལྟ་བུ་དེ་ཆོས་དབྱིངས་སུ་ངོ་འཕྲོད་ན་རིག་པ་ངོ་སྤྲོད་ཐེབས་པ་ཡིན་གྱི། སེམས་ཙམ་འཇོག་ཙམ་གྱི་མི་རྟོག་པ་ལ་རིག་པར་འཁྲུལ་བ་དང་། དེ་ལ་གསལ་ཆ་བཏོན་ནས་ཀུན་གཞི་མིན་ཟེར་བ་སོགས་ནི་རིག་པ་ངོ་འཕྲོད་པ་མིན་ནོ། །འདི་འདྲ་བ་ནི་སེམས་གནས་དགུ་བ་འདོད་སེམས་རྩེ་གཅིག་པ་དང་། ཞི་གནས་ལའང་ཡོད་ལ། ཁྱད་པར་བསམ་གཏན་བཞི་པའི་ཏིང་ངེ་འཛིན་ལ་གསལ་བ་དང་མི་རྟོག་པའི་ཉམས་ཆ་མཉམ་ལ་ཤིན་ཏུ་ལས་སུ་རུང་བ་ངོ་མཚར་བ་ཡོད་པ་ཡིན་ཀྱང་རིག་པ་ཡེ་ཤེས་ཀྱི་ཕྱོགས་ལ་ཉེ་བ་མིན་ནོ། །དེས་ན་ཆོས་ཐམས་ཅད་ཀྱི་གནས་ལུགས་དེ་ཇི་ལྟ་བ་བཞིན་དུ་རྟོགས་པ་ནི་གྲོལ་བ་འདོད་པ་རྣམས་ལ་མེད་དུ་མི་རུང་བ་མདོ་སྔགས་གཉིས་ཀའི་ལུགས་ཡིན་པས། རྫོགས་པ་ཆེན་པོ་ལ་གནས་ལུགས་རྟོགས་པའི་ལྟ་བ་སྨོས་ཅི་དགོས། དེར་མ་ཟད་གནས་ལུགས་རྟོག་པའི་ལྟ་བ་བདེ་བླག་ཏུ་རྙེད་ཅིང་། ཆོས་ཀྱི་དབྱིངས་ཀྱི་གཏིང་དུ་སླེབ་མྱུར་བ་ལ་ལམ་འདི་འདྲ་བ་མེད་ཚུལ་ལ་གོ་ན་བཙལ་བ་ཤིན་ཏུ་གལ་ཆེ་ཞིང་མདོ་ཙམ་སྔར་སྨོས་ཟིན་ཏོ། །རིག་པའི་ངོ་སྤྲོད་མ་ནོར་བར་ཐེབས་ན་མིག་ཡོད་ན་གཟུགས་མཐོང་བ་རང་ཆས་སུ་ཡོད་པ་ལྟར་ཆོས་ཉིད་སྟོང་པ་ཉིད་མཐོང་བ་རིག་ཐོག་ཏུ་ཐོན་པ་དེ་ཀ་ལས་ལོགས་སུ་ཚོལ་མི་དགོས་སོ། །དེས་ན་མཉམ་གཞག་ཏུ་རིག་པ་རྗེན་པར་ཕྱུང་སྟེ་དེ་ལ་མཉམ་པར་བཞག་ནུས་ན་དེའི་ཚེ་ཚོགས་དྲུག་གི་ཡུལ་སྣང་གང་ཡང་མི་འཆར་བར་རིག་པ་ཉག་གཅིག་ཏུ་གྱུར་སོང་བ་ལྟ་བུ་དང་། རིག་ཐོག་ནས་གཟུགས་སྒྲ་སོགས་ལ་གཏད་ན་དེ་དག་རིག་པ་ལ་འཆར་ཡང་གཏད་ས་ཞེན་པ་ཅན་གྱི་ཐ་མལ་བ་ལ་འཆར་བ་ལྟ་བུ་མིན་པར་སྣང་ཙམ་དང་། མིང་ཙམ་ལས་ཡུལ་སྟེང་ནས་ཚུར་གྲུབ་པ་མེད་པར་འཆར་ནུས་པར་གསུངས་སོ། །མདོར་ན་སྔགས་བླ་མེད་ཀྱི་རྫོགས་རིམ་གཞན་གྱི་སྐབས་སུ་ངོ་བོའམ་རིག་པའི་འོད་གསལ་འཆི་དུས་སུ་ཤར་བ་དེ་འདྲ་བ་ཞིག་བསྐྱེད་པའི་ཆེད་དུ་རྩ་རླུང་ཐིག་ལེ་ལ་སེམས་གནད་དུ་བསྣུན་པས་འཆི་དུས་བཞིན་དུ་རླུང་སེམས་ཐམས་ཅད་སྙིང་དབུས་མི་ཤིག་པའི་ཐིག་ལེར་སྡུད་པའི་ཐབས་ལས་གལ་ཆེ་བ་གཞན་མེད་ལ། འདིར་ནི་རིག་པ་ངོ་སྤྲད་ནས་སྐྱོང་བ་ཉིད་རྩ་རླུང་ཐིག་ལེར་གནད་དུ་བསྣུན་པའི་དོད་དང་། དེ་ཉིད་ངོ་སྤྲོད་ཚུལ་གྱི་མན་ངག་གི་གནད་ཀྱིས་གནས་ལུགས་རྟོགས་པའི་ལྟ་བའང་དེ་ཉིད་ཡིན་པས་འདི་ཁོ་ན་ལ་ཀུན་མཁྱེན་ཆེན་པོའི་མན་ངག་དང་། བརྒྱུད་ལྡན་བླ་མའི་གསུང་དང་། རང་གི་དད་པ་དང་བརྩོན་འགྲུས་གང་ཡོད་ཆིག་དྲིལ་གྱིས་གོ་མྱོང་རྟོགས་གསུམ་འཚོལ་བ་ལ་འབད་དགོས་པར་གསུངས་སོ། །དེ་ལྟར་ངོ་འཕྲོད་པའི་རྗེས་དེའི་ངང་བསྐྱང་བ་ལ་སྒོམ་ཟེར། དེ་ཡང་སེམས་ལམ་བྱེད་སྐབས་ལྟར་བསྒོམ་བྱ་དང་། སྒོམ་བྱེད་གཉིས་སུ་བྱས་ནས་བློས་འཛིན་ཚུལ་འདི་ལྟར་བྱེད་པའི་ཚུལ་གྱིས་དམིགས་པ་བརྐྱང་ཟེར་བ་འདིར་མེད་ཀྱང་། ལས་དང་པོ་བས་བྱུང་གནས་འགྲོ་གསུམ་བཙལ་བ་ལྟ་བུ་དང་། ཅུང་ཟད་གོམས་ནས་སེམས་དུས་གསུམ་གྱི་ཡུལ་གྱི་རྗེས་སུ་འབྲང་བ་རང་བབས་སུ་བཞག་པའི་ཐབས་ཀྱིས་དྭངས་སུ་བཅུག་ནས་རང་གི་ཤེས་པ་ཕྱི་ཡུལ་རྐྱེན་གྱི་ཚོས་མ་བསྒྱུར། ནང་རྣམ་རྟོག་ཕྲ་རགས་ཀྱི་གཡས་མ་གོས་པ། དྲན་མེད་ཀྱི་ཧར་པོར་མ་སོང་། རྟོག་དཔྱོད་ཀྱི་རྩོལ་བས་མ་བསླད་པ་རིག་གེ་རྗེན་ནེ་བ་དེ་ཀའི་ངང་དུ་རྒྱ་མཚོ་ཆེན་པོ་རླུང་གིས་མ་བསྐྱོད་པ་ལྟར་མེར་རེ་ཀྱི་ལེར་བཞག་གོའདིའི་དུས་སུ་རྣམ་རྟོག་སྤངས་བླང་གི་རྩོལ་བས་གཡོས་ན་ཅོག་བཞག་གི་བཞག་ཐབས་དང་བྲལ་བས། རིག་པ་ཟང་ཐལ་གྱི་དབྱིངས་ལ་གནས་མི་ནུས་པས་མ་བཅོས་ཅོག་བཞག་གི་བཞག་ཐབས་ལ་མཁས་པར་བྱ་དགོས་གསུངས་སོ། །དེ་ཡང་ཐུན་ཆུང་ལ་གྲངས་མང་བ་རྒྱུན་མི་ཆད་པ་ཁང་རྒན་གྱི་ཐིགས་ཆུ་ལྟར་སོས་བརྡལ་ནས་བསླབ། ལས་དང་པོ་པས་ནི་ཆོས་ཉིད་ཀྱི་དྲན་པ་དགོས་ཟེར་བས་མཐོ་བརྙབ་མི་བྱེད་པར་ཉམས་ལེན་སྟེང་དུ་བཞག་དགོས་པ་བར་སྐབས་དྲན་དུ་བཅུག་པ་དང་། རང་སེམས་ཇི་ལྟར་གནས་ལ་བརྟགས་པ་བྱ་བ་ཤེས་བཞིན་གྱི་བྱ་ར་ཡང་གལ་ཆེ། དེ་ལྟར་རིམ་གྱིས་བསླབ་པས་དང་པོ་རྣམ་རྟོག་ངོ་ཤེས་པས་གྲོལ་བ་ངོ་ཤེས་ཀྱི་མི་དང་འཕྲད་པ་ལྟ་བུ། དེ་ནས་རྣམ་རྟོག་རང་གིས་རང་གྲོལ་བ་སྦྲུལ་གྱི་མདུད་པ་རང་ཞིག་པ་ལྟ་བུ། དེ་ནས་རྣམ་རྟོག་ཕན་མེད་གནོད་མེད་དུ་གྲོལ་བ་ཁང་སྟོང་དུ་རྐུན་མ་ཞུགས་པ་ལྟ་བུའི་ཉམས་ཏེ། དེ་གསུམ་གྱི་ཕྱི་མ་འདིའི་དུས་སུ་རིག་པ་དངོས་ལ་རེག་པ་ཡིན་པར་རིག་འཛིན་འཇིགས་མེད་གླིང་པས་གསུང་ཡོད་ཚོད་ཡིན། འདི་དག་གི་དུས་སུ་རྣམ་རྟོག་ཕྲ་རགས་དང་། དེ་ཡང་དགེ་མི་དགེ་ལུང་མ་བསྟན་གང་སྐྱེས་ཀྱང་རྗེས་སུ་མི་འབྲང་། གཉེན་པོ་ལོགས་ནས་འཚོལ་བས་མི་སྤང་བར་རྣམ་རྟོག་ཤར་བ་ངོ་ཤེས་ཚེ་གང་ཤར་དེ་ཀའི་ངོ་ལ་བལྟས་པས། རྣམ་རྟོག་དེའི་ཕྱི་ཡུལ་ལ་འཕྲོ་བའི་ཆ་ཆད། ནང་འཛིན་པས་བཅིངས་བ་ཡང་ཞིག་ནས་གཏད་ཞེན་གང་ཡང་མེད་པ་ཡངས་ཁྲོལ་ལེ། རྗེན་ནེ་བ་དེ་ཀའི་སྟེང་དུ་བྱ་བ་གྲུབ་ཟིན་གྱི་སྐྱེས་བུ་ལྟར་བཞག་གོདེ་ལྟར་མཉམ་བཞག་ཏུ་རིག་པ་ལ་རྟོག་པའི་གཡའི་གོས་བཤུས་ནས་བཞག་པ་རྩལ་དུ་བཏོན། རྗེས་ཐོབ་ཏུ་ལས་དང་པོ་བས་ནི། ཡུལ་ཡིད་དུ་འོང་མི་འོང་གང་མཐོང་ཐོས་ཀྱི་ཡུལ་དུ་གྱུར་ཀྱང་དེ་ལ་ཐབས་སྣ་ཚོགས་ཀྱིས་ཆགས་སྡང་བསྐྱེད་པ་འགོག་ཅི་ནུས་སུ་བྱ། རིག་པའི་ཉམས་ལེན་ཅུང་ཟད་བརྟན་པ་ན། མཉམ་གཞག་གི་རིག་པ་དྲན་ནས་མེ་ལོང་ལ་གཟུགས་བརྙན་ཤར་བ་མེ་ལོང་ལས་ལོགས་སུ་མེད་པ་ལྟར་ཚོགས་དྲུག་གི་སྣང་བ་ཡང་རང་གི་རིག་པའི་མེ་ལོང་ལ་རྐྱེན་འཚོགས་པའི་དབང་གིས་འཆར་བ་ཙམ་མ་གཏོགས་མེད་སྙམ་ནས་མེད་སྣང་དུ་མཐོང་བ་ལ་རྩལ་སྦྱངས་པས། ནམ་ཞིག་བདེ་རྐྱེན། སྡུག་རྐྱེན། རྙེད་མ་རྙེད། སྙན་མི་སྙན། བསྟོད་སྨད་སོགས་གང་དང་ཕྲད་ཀྱང་། གཟུགས་སྣང་བཟང་ངན་ཐམས་ཅད་གཟུགས་བརྙན་ལྟ་བུ། སྒྲ་སྙན་མི་སྙན་ཐམས་ཅད་བྲག་ཆ་ལྟར་དུ་མཐོང་ནས་ཆགས་སྡང་གི་རྟོག་པའི་མགོ་བརྩམ་པ་ཙམ་ནས་གཏད་མེད་དུ་ཡལ་འགྲོ་བའི་མྱོང་བ་སྐྱེས་ཏེ། ཡུལ་སྣང་དེ་དག་གིས་རིག་པའམ་ལྟ་བའི་ཉམས་ལེན་ཕར་ཕྲོག་མི་ནུས་པར། ལན་ཚྭ་ཆུར་ཞུ་བ་ལྟར་ཚུར་རིག་དབྱིངས་སྟོང་ཆེན་ནམ་མཁའ་ལྟ་བུའི་ཀློང་དུ་ཡལ་འགྲོ་བ་ཞིག་ཡོད་གསུངས། འདིའི་དུས་སུ་རང་སྣང་དབང་དུ་འདུ་ཟེར་བ་དེའི་མགོ་རྩོམ་པ་ཡིན་ནི་རེད། སྤྱིར་ཞི་གནས་བརྟན་པ་གྲུབ་པས་ཀྱང་དེ་ལ་མཉམ་པར་བཞག་པ་དང་། རྗེས་ཐོབ་དུ་རྩི་མ་ཡལ་བར་གནས་པའི་སྐབས་སུ་ཆགས་སོགས་འཆར་བའི་གོ་བཀག་པ་ཙམ་དང་གཏན་མི་འདྲ་བར་ཉོན་མོངས་པའི་རྩ་བ་མ་རིག་པའི་གཉེན་པོ་ཆོས་ཉིད་རྟོགས་པའི་ཡེ་ཤེས་ཀྱིས་བདེན་འཛིན་གྱི་གཏིང་འབྱིན་པ་ལ་ཕྱོགས་པ་ཡིན་པར་ཤེས་པར་བྱའོ། །སརྦ་མངྒ་ལཾ།། །།