ཕྱག་རྒྱ་ཆེན་པོ་ཡི་གེ་བཞི་པ།
༈ ཕྱག་རྒྱ་ཆེན་པོ་ཡི་གེ་བཞི་པ་ཞེས་བྱ་བ་ནི། སེམས་ཀྱི་གཞི་རྩ་བཅད་པ་དང་གཅིགབཞག་ཐབས་བསྟན་པ་དང་གཉིས། གོལ་ས་བཅད་པ་དང་གསུམ། ལམ་དུ་ཁྱེར་བ་དང་བཞིའོ། གཞི་རྩ་བཅད་པ་ནི། སེམས་འདི་བྱུང་གནས་འགྲོ་གསུམ་བརྟགས་པས། བྱུང་བ་མེད་དེ། རྒྱུ་དང་རྐྱེན་རེ་རེའམ་ཚོགས་པ་ལས་མ་བྱུང་བས་གཞི་རྩ་ཐམས་ཅད་དང་ཡེ་ནས་བྲལ། གནས་པ་མེད་དེ། འདི་ལ་དབྱིབས་དང་ཁ་དོག་མ་གྲུབ། ཤར་ཆ་དང་སྣང་ཆ་ཐམས་ཅད་མ་འགགས་ཙམ་འདི་འབྱུང་ཚད་སྟོང་འབྱུང་དང་སྣང་ཚད་སྟོང་སྣང་ཁོ་ནར་འདུག་པས་གང་ཡང་མ་གྲུབ་པར་ཁོ་ཐག་ཆོད། འགྲོ་ས་མེད་དེ་འདིར་སོང་གི་ཡུལ་མེད། སོང་ཤུལ་གྱི་རྗེས་སྣེ་ཙམ་ཡང་མེད། ཡོད་མི་སྲིད་པ་ཡིན་གྱི་མ་རྙེད་ཀྱང་ག་ཤེད་ན་ཡོད་པ་གཏན་ནས་མིན། དེ་ལྟར་སྣང་བ་ཐམས་ཅད་རང་སངས། འགྱུ་བ་ཐམས་ཅད་རང་གྲོལ་ཡེ་ནས་ཡིན་པ་མ་གཏོགས། གྲོལ་བ་འདི་ནི་དང་པོ་རྒྱུས་མ་བསྐྱེད་པས། བར་དུ་རྐྱེན་བཟང་ངན་གྱིས་འཕེལ་འགྲིབ་མི་སྲིད། མཐར་རྐྱེན་གྱིས་ནམ་ཡང་མི་འཇིགདཔེར་ན་ནམ་མཁའ་ལྟར་ཕྱོགས་རིས་མེད་པས་སྣང་སྲིད་ཀུན་ཁྱབ་ཕྱམ་བརྡལ་དུ་ཡེ་རེ། དངོས་མཚན་ཡོད་མ་མྱོང་བའི་ཁོ་ཐག་རང་ཐོག་ཏུ་ཆོད་ཚེ་མཐའ་བྲལ་ཀྱི་སངས་རྒྱས་ཡིན་ཞེས་ཡང་ཡང་གསུངས་མོད། དེ་འདི་འདྲའོ་ཞེས་གང་ཡང་མི་གནས་པའི་རང་གནས་ཆེན་པོ་འདི་སེམས་ཉིད་ཆོས་སྐུའོ། །བཞག་ཐབས་བསྟན་པ་ལ་དྲུག་ཡོད། ཁྱུང་ཆེན་མཁའ་ལྡིང་ལྟར་རྟེན་མེད་གཏད་མེད་མ་བཅོས་གཉུག་མའི་ངང་དུ་རིག་པ་རྩོལ་སྒྲུབ་མེད་པར་མཉམ་པར་འཇོག་པ་དང་གཅིགརྒྱ་མཚོ་རླབ་བྲལ་ལྟར་རིག་པ་གཡོ་འགུལ་མེད་པར་མཉམ་པར་འཇོག་པ་དང་གཉིས། ཉི་ཟླ་སྤྲིན་བྲལ་ལྟར་རིག་པ་ཀུན་གསལ་རང་མདངས་དང་ལྡན་པར་འཇོག་པ་དང་གསུམ། བུ་ཆུང་ལྷ་ཁང་དུ་བཞག་པ་ལྟར་གསལ་ཆ་གང་ཡང་མ་འགགས་ལ་འཛིན་ཆ་དང་གཏད་ཞེན་གང་ཡང་མེད་པར་འཇོག་པ་དང་བཞི། ཆུ་རླབ་ཆུར་ཐིམ་པ་ལྟར་བྱུང་ཚོར་གྱི་འགྱུ་བ་ཐམས་ཅད་རིག་ཆའི་འཕྲོ་འདུ་ཙམ་ལས་གཞན་གང་ཡང་མ་གྲུབ་པར་ཤེས་པ་དགག་སྒྲུབ་མེད་པར་འཇོག་པ་དང་ལྔ། ནམ་མཁའ་ལ་བྱ་རྗེས་དོད་མི་སྲིད་པ་ལྟར་བདེ་སྡུག་སོགས་རྐྱེན་བཟང་ངན་གང་གིས་ཀྱང་རིག་པ་ལ་ཕན་གནོད་ཅུང་ཟད་ཀྱང་མེད་པར་ཐག་ཆོད་པའི་ངང་དུ་ཁོང་ལྷོད་དེ་འཇོག་པ་དང་དྲུག་པོ་འདི་ཡིན་ལ་རེ་རེས་ཀྱང་ཆོགགོལ་ས་བཅད་པ་ལ་ལྔ་ཡོད། དོན་དམ་སྤྲོས་བྲལ་རིག་པ་དང་རྣལ་འབྱོར་བའི་ལྟ་བསྒོམ་མཐའ་གྲོལ་ཆེན་པོ་འདི་རྒྱུ་མཚན་དུ་བྱས་དེ་ལས་འབྲས་བསླུ་མེད་ཁྱད་དུ་བསད་ན་ཐར་ལམ་འཇུག་སྒོ་དང་བཅས་པ་རང་འགགས་སུ་འགྲོ་བས་དེ་ནི་ཤིན་ཏུ་མི་རུང་བ་ཡིན། རྒྱལ་བ་གོང་མའི་རྣམ་ཐར་ལ་བསམ་ཏེ་སྡིག་པའི་བློ་ཕྲ་མོ་ཙམ་ཁྱད་དུ་མི་གསོད་པར་བླང་དོར་ཚུལ་བཞིན་དུ་བྱ་བ་དང་གཅིགཕྱི་སྣང་བ་འདི་དག་གང་ལའང་བདེན་གྲུབ་རྡུལ་ཙམ་མི་སྲིད་པ་རྨི་ལམ་དང་སྒྱུ་མའི་སྣང་བ་ལྟ་བུར་ཁོ་ཐག་བཅད་དེ་ཡུལ་སྣང་ལ་ཞེན་འཁྲིས་ཀྱི་བླང་དོར་མེད་པར་ཚོར་བ་བདེ་སྡུག་གི་ཡུལ་རྐྱེན་བཟང་ངན་ཐམས་ཅད་སེམས་ཐོག་ཏུ་རོ་སྙོམ་བྱ་བ་དང་གཉིས། ནང་རྣལ་འབྱོར་པའི་ཉམས་མྱོང་དང་ཡོན་ཏན་ཅི་ཙམ་བཟང་ཡང་དོན་ལ་ཡོད་མ་མྱོང་ཞིང་། སྒྱུ་མའི་ཉམས་མཚར་ཙམ་ལ་མཁས་པ་སུ་ཞིག་གིསབློ་གཏད་འཆའ། བྱིས་པ་འཇའ་ཚོན་རྗེས་འདེད། བློ་ཆུང་རང་མཐོང་ཅན་ཏུ་མ་སོང་བར་ཞེན་མེད་འཛིན་མེད་ཡིན་ལ་བྱར་མེད་དུ་ཁྲོལ་ཁྲོལ་བཏང་བ་དང་གསུམ། དམྱལ་བ་དང་བཅས་དེ་ངན་པ་དང་ངན་རྐྱེན་ལ་དོག་ཅི་དགོས་དེ། མ་རིག་པ་ལས་གུད་ན་ངན་ངན་པ་ཞིག་སུ་ཡང་མེད། ཕྱག་རྒྱ་ཆེན་པོ་རང་རིག་པའི་ངང་འདིར་མ་རིག་པ་བཙལ་ཀྱང་མི་རྙེད་ན་དོག་པ་སྐྱེ་ཡུལ་གཞི་རྩ་དང་བྲལ་བའི་ངང་དུ་འཇོག་པ་དང་བཞི། སངས་རྒྱས་དང་བཅས་ཏེ་བཟང་པོ་དང་བཟང་རྐྱེན་ལ་རེ་བ་ཅི་དགོས་ཏེ། རང་རིག་པ་ཆོས་སྐུ་ལས་གུད་ན་བཟང་བཟང་པོ་ཞིག་གང་ཡང་མེད། སྐུ་གསུམ་སྐུ་བཞི་ཞེས། དངོས་མཚན་གཏད་སོ་ཅན་ཞིག་རིག་ངོར་གྲུབ་གཏན་ནས་མི་སྲིད་པས་སེམས་བྱུང་རེ་འདོད་ཀྱི་ཞགས་པས་རང་རྒྱུད་མི་བཅིང་བར་རང་སོར་འཇོག་པ་དང་ལྔ་པོ་འདི་གོལ་ས་གཅོད་ཐབས་ཟབ་མོའོ། ལམ་དུ་ཁྱེར་ལུགས་ལ་དྲུག་ཡོད། དབང་ཤེས་ཀྱི་ཡུལ་དུ་བཟང་ངན་བར་མ་གང་སྣང་ཚད་སྣང་ལ་རང་བཞིན་མེད་པར་སྒྱུ་མ་དང་རྨི་ལམ་ལྟ་བུར་ཁོ་ཐག་བཅད་དེ། གང་སྣང་ཚད་སྐྱེ་བ་མེད་པ་ཁོ་ནར་ལམ་དུ་ཁྱེར་བ་ལ། ཉིན་མོ་སྣང་བ་རྒྱས་འདེབས་ཞེས་གྲགས་པ་དང་གཅིགགཉིད་འགྲོ་ཁར་སྙིང་ནང་དུ་རྩ་བའི་བླ་མ་དང་རང་སེམས་དབྱེར་མེད་ཀྱི་ངོ་བོ་ཨཱཿདཀར་པོ་ལ་རིག་པ་མ་ཡེང་པར་གཅུན་ན། འོད་གསལ་ཟིན་ཐབས་ཡིན་པས། དེ་ལ་ཤེས་པ་བུམ་འཇུག་ཅེས་གྲགས་པ་དང་གཉིས། ཐོ་རེངས་སོགས་ཐུན་མཚམས་སུ་དགེ་བའི་བཤེས་གཉེན་གྱི་ཞལ་རྒྱུན་དང་གསུང་རབ་དགོངས་འགྲེལ་དང་བཅས་པའི་བསྟན་དོན་ལྟར་ཆོས་སྤྱི་དང་རང་གི་མཚན་ཉིད་སོགས་ལ་རྟོག་དཔྱོད་ཞིབ་མོ་ཅི་ནུས་རེས་སེམས་ཀྱི་རྩལ་སྦྱང་བ་ལ་རིག་པ་རང་གསལ་གདབ་ཞེས་གྲགས་པ་དང་གསུམ་ཉམས་ལེན་གྱི་ཐུན་དང་། དུས་རྒྱུན་དུ་རྣམ་རྟོག་གང་ཤར་གྱི་རྗེས་སུ་ཕར་མི་འབྲང་བར་རྣམ་རྟོག་ཐམས་ཅད་ཚུར་སེམས་ཉིད་སྟོང་པའི་ངང་དུ་བསྡུས་དེ་རང་ཐིམ་རང་རང་གི་ཚུལ་དུ་འཇོག་པ་ལ་དབང་ཤེས་གཞི་ལ་བསྡུ་བ་ཞེས་གྲགས་པ་དང་བཞི། ཟས་གོས་སོགས་འདོད་ཡོན་གྱི་རྣམ་པ་གང་དང་གང་སྤྱད་ཅིང་ཉམས་སུ་མྱོང་ཚད་ཆོས་ཉིད་ལ་ཆོས་ཉིད་ཐིམ། ཡེ་ཤེས་ལ་ཡེ་ཤེས་ཐིམ་པའི་ཚུལ་དུ་ལོངས་སྤྱོད་པ་དང་། ཐ་ནའང་བླ་མ་དང་ཡི་དམ་མཆོད་སྙམས་པ་རེ་མི་བརྗེད་པར་བྱ་བ་ལ་འདོད་ཡོན་ལམ་གྲོགས་སུ་འཁྱེར་བ་ཞེས་གྲགས་པ་དང་ལྔ། རང་འཆི་ཁའི་དུས་སུ་གཉེན་གྲོགས་ཡོ་བྱད་སོགས་ཚེ་འདིའི་མཐུན་འཇུག་བློས་བཏང་སྟེ་སེམས་ཉིད་སྐྱེ་འཆི་མེད་པར་ནམ་མཁའ་ལྟ་བུར་ཁོ་ཐག་བཅད་ཅིང་གཏད་མེད་སྒོམ་མེད་ཀྱི་ངང་དུ་བཞག་པས་ཆོག་པ་ལ་འཆི་ཁར་ཡེ་ཤེས་ཟང་ཐལ་དུ་བརྟགས་པའི་རྣལ་འབྱོར་དུ་གྲགས་པ་དང་དྲུག་པོ་འདི་ལམ་ཁྱེར་གྱི་རིམ་པའོ། འདིའི་སྒོ་ནས་རྒྱ་གར་གྱི་གྲུབ་ཐོབ་བརྒྱད་སྐུ་རྩ་བཞི་སོགས་གྲུབ་བརྙེས་ན་རོ་མར་བ་མི་ལ་སོགས་ནས་བརྒྱུད་ཏེ་བོད་དུ་དར། བློ་གྲོས་མཐའ་ཡས་ཀྱི་གདམས་ངག་མཛོད་ནས་མི་ཉག་དགེ་བཤེས་ཀུན་བཟང་བསོད་ནམས་ཀྱིས་བསྡུས་ཏེ་བསོད་རྒྱལ་ལ་གནང་། དེས་ཆོས་དབྱིངས་རང་གྲོལ་ལ་གདམས་པའོ།། །།