བསྔོ་བ།
༄༅། །བསྔོ་བ་ནི། འོ། མཐོ་སྲིད་པའི་རྩེ་མོ་མན་ཆད། དམའ་ན་རཀ་དམྱལ་བའི་གནས་ཡན་ཆད་ཀྱི་སེམས་ཅན་བར་མ་དོ་ན་གནས་པ་རྣམས་ཀྱིས་ཐོག་མ་མེད་པའི་དུས་ནས་ལས་ངན་གྱི་རྒྱུ་བྱས། རྐྱེན་ངན་གྱི་རླུང་གིས་དེད། འཁྲུལ་སྣང་དང་སྡུག་བསྔལ་ཁོ་ན་ལ་ཁོར་མོ་ཡུག་ཏུ་སྤྱོད་པའི་སྙིང་རྗེའི་མགྲོན་དུ་གྱུར་པ་རྣམས་ཀྱིས་སྔ་མའི་ལུས་རྟེན་བོར། ཕྱི་མའི་ལུས་རྟེན་མ་རྙེད། སྲིད་པ་བར་མ་དོ་ན་ཉམ་ང་བའི་འཕྲང་ལ་སྐྱབས་དང་སྐྱོབས་པ་མེད་པ། མགོན་དང་དཔུང་གཉེན་མེད་པ། ཆོས་སྔོན་དུ་སོང་བ་མེད་པ། རྒྱབ་ཏུ་འོང་བ་མེད་པ། ཆོས་ཀྱི་ར་མདའ་ཉུང་བ། དགེ་བའི་བསྐུལ་མ་མེད་པ། མིང་བཞི་འདུས་པའི་ཕུང་པོ། ཚོར་བ་སྡུག་བསྔལ་གྱི་རང་བཞིན། འཇིགས་སྐྲག་འཁྲུལ་སྣང་གིས་མནར་བ། འཁྱག་ལྟོགས་སྐོམ་གསུམ་གྱིས་གདུང་བ། ཚེ་ཚད་ལ་ངེས་པ་མེད་པ། བྱ་སྒྲོ་རླུང་གིས་ཁྱེར་བ་བཞིན་གར་འགྲོ་རང་དབང་དང་བྲལ་བའི་བར་དོའི་སེམས་ཅན་རྣམས་ལ་བདག་གིས་དུས་གསུམ་དུ་བསགས་པའི་དགེ་བའི་རྩ་བ་རྣམས་བསྔོའོ། བསྔོས་པ་བཞིན་ཏུ་ཐོབ་ནས་བར་དོ་ན་གནས་པའི་སེམས་ཅན་ཐམས་ཅད་ཀྱི་ལུས་ཀྱི་ན་ཚ། སེམས་ཀྱི་སྡུག་བསྔལ། སྒྲིབ་གཉིས་བག་ཆགས་དང་བཅས་པ་ཐམས་ཅད་བྱང་ཞིང་དག་ནས་རྣམ་མཁྱེན་རྫོགས་པའི་སངས་རྒྱས་ཀྱི་གོ་འཕང་རིན་པོ་ཆེ་ཐོབ་པར་གྱུར་ཅིགདེ་མ་ཐོབ་ཀྱི་བར་དུ་སྐྱེ་བ་ནས་སྐྱེ་བ་ཚེ་རབས་ནས་ཚེ་རབས་ཐམས་ཅད་དུ་དཀོན་མཆོག་གསུམ་གྱི་སྐྱབས་འོག་ཏུ་ཚུད་ནས་རྒྱུད་ལ་བྱང་ཆུབ་ཀྱི་སེམས་རིན་པོ་ཆེ་སྐྱེས་ནས་དམ་པའི་ཆོས་ཀྱི་སྣང་བ་དང་མི་འབྲལ་བར་ཤོག་ཅིག །
ཅེས་འབྲུག་པ་རྡོ་རྗེ་འཆང་གི་ཞབས་རྡུལ་སྤྱི་བོར་འཛིན་པ་ཆོས་དབྱིངས་རང་གྲོལ་གྱིས་བྲིས་པའོ། །