དུས་བཞི་སངས་རྒྱས་མཉམ་སྦྱོར་དང་དམ་པ་གསུམ་གྱི་གདམས་ཁྲིད།
༈ དུས་བཞི་སངས་རྒྱས་མཉམ་སྦྱོར་ཉམས་སུ་ལེན་པ་ལ་དངོས་གཞི་དང་སྔོན་འགྲོ་གཉིས་ལས་དང་པོ་དངོས་གཞིའི་སྐབས་ཉིན་པར་སྣང་བ་རྒྱ་ཡིས་གདབ་པ་ནི། ཚིག་དབང་གི་ལམ་ཁྲེགས་ཆོད་ཐོད་རྒལ་གཉིས་ལྟ་སྒོམ་སྤྱོད་འབྲས་བཞིས་དམ་ཚིག་གི་ཆིངས་སུ་བཅིང་ནས་ཉམས་སུ་ལེན་པ་སོགས་དང་། སྲོད་ལ་དབང་པོ་གནད་དུ་བསྡུ་བ་ནི། གསང་ཤེར་གྱི་ལམ་ཉམས་སུ་ལེན་པ་དང་། གུང་ལ་ཤེས་བྱ་བུམ་པར་དྲིལ་བ་ནི། ཤེས་བྱ་ཞེས་པ་སྒོ་ལྔ་ཚོགས་དྲུག་ཡུལ་ཡུལ་ཅན་དབྱིངས་སུ་བསྡུས་ནས་རྨི་ལམ་འོད་གསལ་མངོན་དུ་བྱེད་པ་སོགས་དང་། ཐོ་རངས་ཡེ་ཤེས་གསལ་བར་བྱེད་པ་ནི། འབྱུང་ཁམས། དག་སྦྱོར་ཉམས་སུ་ལེན་པ་སོགས་ཡིན་གསུངས། སྔོན་འགྲོའི་སྐབས་ཉིན་པར་སྣང་བ་རྒྱ་ཡིས་གདབ་པ་ནི། ཕྱི་སྣོད་ཟངས་མདོག་དཔལ་གྱི་རི་བོ་སོགས་གསུངས། ཐོ་རངས་རང་གི་སྤྱི་བོར་བླ་མའི་སྐུ་ལས་འོད་དཀར་པོ་འཕྲོས་གཟུགས་སུ་སྣང་བ་ཐམས་ཅད་ལ་ཕོགསྐུའི་དཀྱིལ་འཁོར་དུ་སད། གསུང་ལས་འོད་དམར་པོ་འཕྲོས། སྒྲ་སྐད་བཟང་ངན་བར་མ་ཐམས་ཅད་ལ་ཕོགགསུང་གི་དཀྱིལ་འཁོར་དུ་སད། ཐུགས་ལས་འོད་མཐིང་ག་འཕྲོས་སེམས་ཅན་ཐམས་ཅད་ཀྱི་འཁྲུལ་རྟོག་སེམས་ལ་ཕོགཐུགས་ཀྱི་དཀྱིལ་འཁོར་དུ་སད་དོ། ཡང་ན་བླ་མའི་གནས་གསུམ་དུ་ༀ་ཨཱཿཧཱུྃ་གསུམ་གསལ་ནས་དེ་ལས་རང་མདོག་གི་འོད་ཟེར་འཕྲོས་ནས་ཐ་མལ་མ་དག་པའི་སྣང་གྲགས་རིགས་གསུམ་གྱི་སྣང་ཞེན་སྦྱངས་ནས་གནས་ཚུལ་ལྟར་བླ་མའི་སྐུ་གསུང་ཐུགས་ཀྱི་དཀྱིལ་འཁོར་གསུམ་དུ་སད་པའམ་མངོན་དུ་གྱུར་བར་མོས་ན་ཡང་ཆོག་གསུངས། འདི་ཞབས་དྲུང་རིན་པོ་ཆེའི་ཞལ་རྒྱུན་རེད་གསུངས། འདས་པ་རྗེས་གཅོད་སོགས་བྱས་ནས་འཁྲུལ་གི་འདུག་ནི་བོ་འདི་ཡིད་ཤེས་རེད། དེ་ཡིན་ན་ཡིད་ཤེས་འདི་མེད་པ་བྱེད་དགོས་ནི་ཨེ་ཡིན་བསམ་ན་དེ་མིན་ཏེ། སོ་སྐྱེས་སྐབས་ཡེ་ཤེས་ནི་མ་ཤར་བས། ཡིད་ཤེས་འདིས་དགེ་སྡིག་བླང་དོར་སོགས་ཆོས་ཐམས་ཅད་སྤང་བླང་བྱེད་དགོས་ན། རྣམ་མཁྱེན་ལས་ཀྱང་ཡིད་ཤེས་གཙོ་སྟེ། ཡིད་འགྲོ་ཡིད་འགྲོ་ཡིད་ནི་རབ་ཏུ་འགྲོ། །ཆོས་རྣམས་ཀུན་གྱི་སྣ་ལ་ཡིད་འགྲོའོ། །ཞེས་པ་ལྟ་བུ་རེད། ཁ་ནང་དུ་བལྟས་ཏེ་ངར་འཛིན་པ་ཉོན་ཡིད་རེད། འདི་གཉིས་མཉམ་བཞག་ལྟ་བའི་ཀློང་དུ་བག་ཆགས་གསོག་ལོངས་མེད་པར་གྲོལ་དགོས་ནི་རེད་གསུངས། ཉིན་པར་སྣང་བ་རྒྱ་ཡིས་གདབ་པ་ཁྲེགས་ཐོད་བསྒོམ་པའི་མན་ངག་ཡིན་ཀྱང་བླ་རྣམ་སྐབས་སུ་དེའི་དོད་ཐུབ་ནི་སེམས་རྣམ་ཤེས་ཚོགས་བརྒྱད་ཡུལ་ཅན་གྱི་འཁྲུལ་སྣང་འགོག་པ་དང་། དངོས་གཞིའི་ཡེ་ཤེས་རྟོགས་པའི་ཆེད་དུ་ཕྱི་སྣོད་ཟངས་མདོག་དཔལ་གྱི་རི་བོ། ནང་བཅུད་དཔའ་བོ་མཁའ་འགྲོའི་ཚོམ་བུ། སྒྲ་གྲགས་ཐམས་ཅད་གྲགས་སྟོང་སྔགས་ཀྱི་རང་སྒྲ། དྲན་རྟོག་ཐམས་ཅད་འོད་གསལ་ཡེ་ཤེས་ཀྱི་རོལ་བར་བལྟ་བ་སོགས་ཡིན་གསུངས། སྲོད་ལ་དབང་པོ་གནད་དུ་བསྡུ་བའི་དོད་ཐུབ་ནི་སྲོད་ལ་སངས་རྒྱས་ཀྱིས་བདུད་བཏུལ་བ་བཞིན་རང་གིས་ཀྱང་སྲོད་ལ་ཡི་དམ་ལྷག་པའི་ལྷ་སྲུང་འཁོར་མེ་རི་དང་བཅས་པ་བསྒོམ། ཡེ་ཤེས་ཀྱི་མེས་ནང་ལྟར་ན་རང་རྒྱུད་ཀྱི་ལས་ཉོན་སྡིག་སྒྲིབ་སོགས་བསྲེག་སྦྱང་བྱས། ཕྱི་ལྟར་ན་ཚོགས་བརྒྱད་འཁྲུལ་བ་གདོན་གཟུགས་སུ་ཤར་བའི་གདོན་བགེགས་སོགས་རྒྱུད་ཀྱི་ལས་ཉོན་རྒྱུ་འབྲས་དང་བཅས་པ་བསྲེག་སྦྱང་བྱས། གནོད་འཚེ་གདུག་རྩུབ་སོགས་ཞི། ༼ལུས་སྣང་སྟོང་སྐུ་རྡོ་རྗེ། ངག་གྲགས་སྟོང་གསུང་རྡོ་རྗ། ཡིད་དྲན་སྟོང་ཐུགས་རྡོ་རྗེའི་རང་བཞིན་དུ་བསམ་༽བྱམས་སྙིང་རྗེ་བྱང་ཆུབ་ཀྱི་རྒྱུད་ལ་སྐྱེས། དཀོན་མཆོག་གསུམ་གྱི་སྐྱབས་འོག་ཏུ་ཚུད་པར་བསམ་དགོས་ཀྱི་དེ་རྣམས་བསད་བརྡུང་མནན་པ་སོགས་བྱེད་ནི་མ་རེད་གསུངས། གུང་ལ་ཤེས་བྱ་བུམ་པར་དྲིལ་བའི་དོད་ཐུབ་ནི། དེ་ལ་ཤེས་བྱ་ནི་ཚོགས་བརྒྱད་ཡུལ་ཅན་དང་བཅས་པ་གཉིད་༼གཉིད་ཀྱི་ངོ་ལུང་མ་བསྟན་ཡིན་པས་དེ་འདུན་པའི་སྟོབས་ཀྱིས་དགེ་བར་བསྒྱུར་ན་བུམ་བཟང་ལས་དགོས་འདོད་འབྱུང་བ་ལྟར་ཡིན་ལ་༽དུས་ནང་དུ་བསྡུ་དགོས་༼ནུབ་མོ་ཉལ་བའི་ཚེ་མགོ་བྱང་དང་ཁ་ནུབ་ཏུ་བསྟན་ཏེ་གློ་གཡས་ས་ལ་ཕབ་བོ། ༽སེང་གེ་ཉལ་སྟབས་བྱས་ནས་དེའི་ཚུལ་འཁོར་བའི་རང་བཞིན་རྣམ་ཤེས་ཚོགས་བརྒྱད་ཡེ་ནས་དག་པའི་བརྡར་སྙིང་པདྨ་དམར་པོ་འདབ་བརྒྱད་ཟེའུ་འབྲུས་སྟེང་དུ་ཁམས་རྣམ་པར་དག་པའི་བརྡར་ཉི་ཟླའི་གདན་ལ་འཇའ་འོད་ཀྱི་དཀྱིལ་དུ་བླ་མའི་སྐུ་ཚོན་གང་གསལ་བ་སོགས་ཡིན་གསུངས། ཐོ་རངས་ཡེ་ཤེས་གསལ་བར་བྱེད་པའི་དོད་ཐུབ་ནི། ཐོ་རངས་གཉིད་སད་ཏེ་སྙིང་གའི་བླ་མ་དབུ་མའི་ལམ་བརྒྱུད་དེ་རང་གི་སྤྱི་བོར་པདྨ་འབུམ་བརྡལ་དང་ཉི་ཟླའི་གདན་སུམ་བརྩེགས་ལ་བཞུགས་པར་མོས་པ་སོགས་ཡིན་གསུངས། ངག་བྱིན་རླབས་སྐབས། ངག་གི་མི་དགེ་བ་བཞི་སོགས་ལྕེའི་དབང་པོ་ཟླ་བ་བཀས་པ་ལྟ་བུ་ལ་བརྟེན་ནས་འབྱུང་། དེ་དག་གི་ཆེད་དུ། རྒྱལ་བ་སྐུ་གསུམ་གྱིས་ས་བོན་ༀ་ཨཱཿཧཱུྃ་གསུམ་གྱི་བྱིན་རླབས་དང་། ཕྱོགས་བཅུའི་རྒྱལ་བ་སྲས་དང་བཅས་པའི་ཡེ་ཤེས་ཀྱི་རང་གཟུགས་ཡི་གེ་རཾ་དམར་པོ་ལྕེའི་དབང་པོར་གསལ། དེ་ལས་ཡེ་ཤེས་ཀྱི་མེ་འབར་བས་ངག་གི་སྡིག་སྒྲིབ་སོགས་ཐམས་ཅད་བསྲེགས་ཏེ་སྟོང་པར་སྦྱང་། དེའི་ངང་ལས་རང་གི་ལྐོག་མར་རྒྱལ་བ་ཐམས་ཅད་ཀྱི་གསུང་སོ་སོར་རྟོག་པའི་ཡེ་ཤེས་ཀྱི་རང་གཟུགས་ཧྲཱིཿདམར་པོ་ལས་མེ་ཏོག་པདྨ་དམར་པོ་འདབ་མ་བརྒྱད་པ་ཡུ་བ་མགྲིན་པར་ཟུག་པ་མདུན་གྱི་པད་འདབ་འོད་དམར་གྱི་རྣམ་པས་དབྱིངས་ཡེ་ཟུང་འཇུག་གསུམ་མཚོན་པའི་རྡོ་རྗེའི་རྩེ་གསུམ་ཉལ་སྟབས་སུ་གནས་པའི་ལྟོ་བར་བདེ་གཤེགས་སྙིང་པོ་ངོ་བོ་གདོད་མའི་སྟོང་ཆེན་གྱི་དབྱིངས་ཀྱི་རང་གཟུགས་ཤེས་རབ་ཀྱི་ཡི་གེ་ཨ་ལི་དམར་པོ་གཡོན་བསྐོར་ཕྲེང་གཅིགདེའི་མཐར་དབྱིངས་ཀྱི་རང་གདངས་འོད་གསལ་བའི་ཡེ་ཤེས་ཀྱི་རང་གཟུགས་ཐབས་ཀྱི་ཡི་གེ་ཀ་ལི་དཀར་པོ་གཡས་སྐོར་ཕྲེང་གཅིགདེའི་མཐའ་སྐོར་དབྱིངས་ཡེ་ཟུང་འཇུག་མཚོན་པའི་བརྡར་ཐབས་ཤེས་གཉིས་མེད་ཀྱི་ཡི་གེ་རྟེན་སྙིང་མཐིང་གས་བསྐོར་བ་སྦྲུལ་འཁྱིལ་བ་ལྟ་བུ། ཡི་གེ་རྣམས་དབྱིངས་མཚོན་པའི་ནང་ཁོང་སྟོང་། ཡེ་ཤེས་མཚོན་པའི་གཞི་ཡི་གེ་གཟུགས་རང་འོད་འཕྲོ་བ། དཔེར་ན་ཞིང་གི་མུ་ཏིག་རིན་པོ་ཆེ་ལྟ་བུ་དེ་རྣམས་ལས་རང་མདོག་གི་འོད་ཟེར་གྱིས་རྒྱལ་བ་སྲས་དང་བཅས་པ་མཆོད་པས་ཐུགས་ཀྱི་དགྱེས་པ་བསྐྱེད་སོང་བར་བསམ་དགོས། རང་གཞན་གྱི་ངག་གི་སྡིག་སྒྲིབ་ཐམས་ཅད་དག༼རྒྱལ་བ་ཐམས་ཅད་ཀྱི་གསུང་གསང་བ་གསུམ་དང་གསུང་ཚངས་དབྱངས་ཡན་ལག་དྲུག་ཅུ་ཡང་ན་ཨ་ལི་ཀཱ་ལི་རྟེན་སྙིང་གི་རྣམ་པས་ཚུར་འདུས་༽འོད་ཟེར་དམར་པོའི་རྣམ་པས་ཚུར་འདུས་རང་གི་ལྕེ་ལ་ཐིམ་པས་མཆོག་གི་དངོས་གྲུབ་ཆོས་ཉིད་འགྱུར་བ་མེད་པའི་ལྟ་བ་རྟོགས་པ་ཐུན་མོང་གི་དངོས་གྲུབ་གྲུབ་པ་བརྒྱད་དང་རྒྱལ་བ་ཐམས་ཅད་ཀྱི་གསུང་རྡོ་རྗེ་ཚངས་དབྱངས་ཡན་ལག་དྲུག་ཅུ་སོགས་ཐོབ་པར་བསམ་དགོས། དེ་ལྟར་ངག་བྱིན་རླབས་བྱས་ན་རང་གནས་ཀྱི་ཡེ་ཤེས་སད་པར་བྱེད། བཞད་པར་བྱེད། དགོད་པར་བྱེད། རྟོགས་པར་བྱེད་པའི་ཟབ་མོའི་མན་ངག་ཡིན་གསུངས། ༈ ནང་སྙིང་ག་ཆོས་ཀྱི་འཁོར་ལོ་ན་གཏེར་གནས་ཞེ་སྡང་གི་བྲག་རི་དམར་ནགའདོད་ཆགས་གཡང་ཞག་གི་རྒྱ་མཚོ་གཏིང་ཟབ་པ། གཏི་མུག་གི་ནམ་མཁའ་མི་འགྱུར་བ་སོགས་གཏོར་ནས་རང་བྱུང་ཡེ་ཤེས་ཀྱི་གཏེར་ལེན་དགོས་གསུངས། མལ་ནས་ལྡང་སྐབས་གཏི་མུག་གཉིད་སྐྲོག་གི་མན་ངགརྔ་ཡབ་དཔལ་རི་ཟངས་མདོག་དཔལ་གྱི་རི་བོ་པདྨ་འོད་ཀྱི་ཕོ་བྲང་ནས་གུ་རུ་རིན་པོ་ཆེ་འཁོར་དཔའ་བོ་མཁའ་འགྲོ་སོགས་རྟེན་བརྟེན་པའི་དཀྱིལ་འཁོར་ཡོངས་རྫོགས་དེ་ཉིད་འཇའ་འོད་དར་ཁྱིམ་གྱི་ལམ་ནས་རང་གི་མདུན་གྱི་ནམ་མཁར་བྱོན། ལྷ་ཡེ་ཤེས་པ་རྟེན་བརྟེན་པ་དེ་རང་གི་སྤྱི་བོའི་བླ་མ་དང་རྟེན་བརྟེན་པའི་སྣོད་བཅུད་ལ་སོ་སོར་ཐིམ་པས་བྱིན་རླབས་ཀྱིས་རང་གནས་ཀྱི་ཐ་མལ་མ་དག་པའི་སྣོད་བཅུད་ཀྱི་འཁྲུལ་སྣང་ཐམས་ཅད་དབྱིངས་སུ་དེངས་ཏེ་གནས་ཚུལ་དག་པ་རབ་འབྱམས་སྐུ་གསུང་ཐུགས་མི་ཟད་པ་རྒྱན་གྱིས་འཁོར་ལོའི་གཟུགས་སུ་སྣང་བ་ཐམས་ཅད་སྐུའི་དཀྱིལ་འཁོར། སྒྲ་རུ་གྲགས་པ་ཐམས་ཅད་གསུང་གི་དཀྱིལ་འཁོར། དྲན་རྟོག་ཐམས་ཅད་ཐུགས་ཀྱི་དཀྱིལ་འཁོར་ཏེ་སྒོ་གསུམ་གསང་བ་གསུམ་གྱི་རྣམ་རོལ་མངོན་སུམ་དུ་སད་པར་བསམ། དེ་ནི་སྣང་སྲིད་རྣམ་དག་གི་དག་སྣང་རེད་གསུངས། འདི་སྐབས་ཨེ་ཝཾ་སྐུ་ཟུང་འཇུག་གི་ལྟ་བ་དང་སྔགས་སྡོམ་སོགས་གསུངས། ལས་དང་པོ་བས། སྐད་ཅིག་དང་པོ་ཀ་བའོ་སྙམ་དུ་འཛིན་ཡང་། སྐད་ཅིག་གཉིས་པར་གཟུགས་སྣང་སྐུའི་རང་བཞིན་དུ་བལྟ། སྐད་ཅིག་གསུམ་པར་དག་པའི་མཚན་འཛིན་དེ་ཐུགས་རྗེའི་སྤྲུལ་སྐུའི་དབྱིངས་སུ་དེངས། སྐད་ཅིག་དང་པོ་སྒྲ་རུ་སྣང་ཡང་སྐད་ཅིག་གཉིས་པར་གསུང་གི་རང་བཞིན་དུ་བལྟ། སྐད་ཅིག་གསུམ་པར་དག་པའི་མཚན་འཛིན་དེ་རང་བཞིན་ལོངས་སྐུའི་དབྱིངས་སུ་དེངས། སྐད་ཅིག་དང་པོ་ཐ་མལ་བའི་རྟོག་པར་ཤར་ཡང་། སྐད་ཅིག་གཉིས་པར་ཐུགས་ཀྱི་རང་བཞིན་དུ་བལྟ། སྐད་ཅིག་གསུམ་པར་དག་པའི་མཚན་འཛིན་དེ་ཉིད་རིག་སྟོང་ཆོས་སྐུའི་དབྱིངས་སུ་དེངས་ག་བཅུག་ནི་རེད་གསུངས། གནས་ཚུལ་ལྟར་ན་ཡེ་ནས་སྣང་སྲིད་དག་པ་རབ་འབྱམས་སྣོད་དག་པ་ཟངས་མདོག་དཔལ་རིའི་ཞིང་དང་གཞལ་ཡས་ཁང་། བཅུད་དག་པ་ཡེ་ཤེས་ཀྱི་དཔའ་བོ་མཁའ་འགྲོའི་གྲོང་ཁྱེར། རྒྱུད་དག་པ་སེམས་དང་སེམས་བྱུང་ཐམས་ཅད་ཡེ་ཤེས་ཀྱི་རོལ་བ་སྟེ། གཟུགས་སྣང་སྟོང་སྐུ་རྡོ་རྗེ། སྒྲ་གྲགས་སྟོང་གསུང་རྡོ་རྗེ། སེམས་དྲན་སྟོང་ཐུགས་རྡོ་རྗེ། སྒོ་གསུམ་ཆ་མཉམ་ཡེ་ཤེས་རྡོ་རྗེ་སྟེ་སྣང་སྲིད་བླ་མར་ཤར་བའི་བསྐྱེད་རིམ་དང་ཐུགས་ཡིད་དབྱེར་མེད་འདྲེས་པའི་རྫོགས་རིམ་སྟེ་བསྐྱེད་རྫོགས་ཟུང་འཇུག་གི་གནད་ཐུན་མོང་མ་ཡིན་པ་བླ་རྣམ་འདི་ལ་ཚང་ནི་རེད། དེ་ནི་བཤད་དུ་ཕང་བའི་མན་ངག་དུམ་འབའ་༼མནའ་བསྐྱལ་བའི་དོན་༽མིན་ན་གསུངས། ༈ མ་བསྒོམ་ཆོས་ལྔ་ནི། མཐོང་གྲོལ་ཙཀྲ། ཐོས་གྲོལ་གཟུངས་སྔགས། མྱོང་གྲོལ་དམ་རྫས། རེག་གྲོལ་མུ་ཏྲ། འཕྲད་ཅིང་དྲན་པ་ཙམ་གྱིས་གྲོལ་བ་འཕོ་བ་སྟེ་ལྔ་གསུངས། ༈ དབང་བཞིའི་བུམ་དབང་གི་ལྟ་བ་ནི་དག་མཉམ་སྣང་སྟོང་ཟུང་འཇུགགསང་དབང་གི་ལྟ་བ་ནི་གསལ་སྟོང་ཟུང་འཇུགཤེར་དབང་གི་ལྟ་བ་ནི་བདེ་སྟོང་མཉམ་ཉིད་ཟུང་འཇུགཚིག་དབང་གི་ལྟ་བ་ནི་རིག་སྟོང་ཟུང་འཇུག་རེད་གསུངས། ༈ གཟུགས་སུ་སྣང་བ་ཐམས་ཅད་རིག་འཛིན་གྱི་ལྷ་ཚོགས། སྒྲ་རུ་གྲགས་པ་ཐམས་ཅད་བཛྲ་གུ་རུའི་རང་སྒྲ། དྲན་རྟོག་ཐམས་ཅད་ཐུགས་ཡེ་ཤེས་ཆེན་པོའི་རྣམ་རོལ། ཡང་ན་གཟུགས་སྣང་སྟོང་སྐུ་ཡི་རྡོ་རྗེ། སྒྲ་གྲགས་སྟོང་གསུང་གི་རྡོ་རྗེ། སེམས་དྲན་སྟོང་ཐུགས་ཀྱི་རྡོ་རྗེ། སྒོ་གསུམ་མཉམ་ཉིད་ཡེ་ཤེས་རྡོ་རྗེ་ཏེ་གནས་ཚུལ་ལ་སྣང་སྲིད་རྡོ་རྗེ་བཞིའི་དཀྱིལ་འཁོར་རེད་གསུངས། ༈ རང་གི་ཁང་རྒན་ཞིག་དུས་ལྟ་བའི་གདེངས་ཤིག་ཡོད་ན་གུ་རུ་རིན་པོ་ཆེ་འོད་ཞུ་བྱས་ནས་བསམ་རྒྱུ་མི་མང་བར་ཐུགས་ཡིད་དབྱེར་མེད་དུ་མཉམ་པར་བཞག་ཀྱི་རེད། གདེངས་མེད་ན་བླ་མའི་ཐུགས་གར་ཡར་འཕོས་ནས་ཐུགས་ཡིད་དབྱེར་མེད་དུ་མཉམ་པར་བཞག་དགོས་ཀྱི་རེད། ད་ལྟ་རང་གི་བླ་མའི་ཐུགས་དང་རང་སེམས་དབྱེར་མེད་དུ་བསྲེས་ནས་མཉམ་པར་བཞག་པ་འོད་གསལ་གཉུག་མའི་སེམས་དེ་སྐྱེ་མེད་དོན་གྱི་བླ་མ་རེད་དེ་ལྟ་བུའི་གཞིའི་གནས་ལུགས་སྣང་སྟོང་ཟུང་འཇུག་དེ། སྣང་ཆ་གུ་རུ་རིན་པོ་ཆེ་ཡབ། སྟོང་ཆ་ཡེ་ཤེས་མཚོ་རྒྱལ་ཡུམ། ཟུང་འཇུག་གུ་རུ་ཡབ་ཡུམ་འཁྲིལ་སྦྱོར་དུ་བཞུགས་ནི་རེད། དེ་ཉིད་ནང་དོན་དམ་ཡེ་ཤེས་ཀྱི་བླ་མ་རེད། དེ་དུས་གསུམ་འཕོ་འགྱུར་མེད་པར་རྟག་པར་རང་ངོར་བཞུགས་པར་ཤེས་བདག་ཞིག་གི་བླ་མ་འདས་ནས་གཟུགས་སྐུའི་བཀོད་པ་དབྱིངས་སུ་བསྡུས་ཀྱང་། ཧ་བོ་བྲང་བརྡུང་སོགས་བྱེད་ནི་མ་རེད། རང་སྣང་དོན་གྱི་བླ་མ་ལ་འདས་གྲོངས་མེད་པར་ཤེས་ནས་ཐུགས་ཡིད་དབྱེར་མེད་དུ་བསྒོམ་པ་ཉམས་དང་རྨི་ལམ་སོགས་བླ་མ་མཇལ་ནི་རེད། དེ་ནི་གནས་ཚུལ་ལ་རང་སྣང་ཡིན་པའི་གནད་ཀྱིས་རེད་གསུངས། ཚེ་གཅིག་ཏུ་རང་སྣང་ཟངས་མདོག་དཔལ་རིའི་དག་སྣང་དང་མ་བྲལ་བའི་ངང་ནས་གུ་རུ་རིན་པོ་ཆེ་བསྒྲུབ་ན་འཆི་ཁར་དབུག་ཆད་མ་ཐག་ཏུ་ཟངས་མདོག་དཔལ་རིར་སྐྱེས་ནི་རེད། འཆི་ཁར་གྲིབ་་སོགས་འཆི་རྐྱེན་ངན་པའི་དབང་གིས་ཟངས་མདོག་དཔལ་རིའི་ཞིང་སྟོན་འཁོར་སོགས་དྲན་མ་ཐུབ་པར་ཤི་ཡང་། བར་སྲིད་སྐབས་ཞག་མ་བདུན་སོང་རྗེས་སུ་རང་ཉིད་འཆི་བ་ཡིན་པར་ཤེས་དུས། སྔར་གོམས་སྟོབས་ཀྱིས་ཟངས་མདོག་དཔལ་རིའི་ཞིང་སྟོན་འཁོར་དང་བཅས་པ་དྲན་ནས་ཞིང་དེར་སྐྱེས་ནི་རེད་གསུངས། སྣང་བ་སྐུ་ཡི་ཁྱེར་སོ་དེ་གསལ་ན་མཚམས་མ་ཐོན་ཀྱང་བཟོད། མཚམས་དུས་ཕན་ཚུན་ངོ་མཐོང་བ་སོགས་ལ་ཡང་མཚམས་བུག་རལ་སྐྱོན་མི་འབྱུང་བའི་གདམས་ངག་ཡིན། གྲགས་པ་གསུང་གི་ཁྱེར་སོ་དེ་གསལ་ན་སྐད་གཅིག་ལ་ཡང་དུང་ཕྱུར་མང་པོ་འགྲོ་བས། སྔགས་བརྒྱ་རྩས་འཕགས་པ་འགྲུབ་པའི་གདམས་ངགངག་བཅད་མ་གྲུབ་ཀྱང་བཟོད། མཚམས་དུས་ངག་བསྲེས་ཀྱང་མི་དོ་སྟེ། སྒྲ་སྐད་ཐམས་ཅད་སྔགས་ཡིན། ཕྲེང་བ་ལ་རློབ་སོང་ཀྱང་ཆད་ལྷག་ཁ་བསྐང་དེས་འོང་བར་གསུངས། དེ་ཉམས་ལེན་བཟང་ངན་དམིགས་པ་དགེ་སེམས་མ་ཡེངས་པའི་ངང་ནས་བསྒོམ་ན་བསྐྱེད་རྫོགས་ཟུང་འཇུག་མཆོག་ཡིན་ཅེས་ཆགས་མེད་རིན་པོ་ཆེས་གསུངས།
༈ སྤྱིར་ཆོས་རྣམས་ཀྱི་དུས་བཞི་མཉམ་སྦྱོར་ཞེས། ཐོ་རངས་ཡེ་ཤེས་གསལ་བར་བྱེད་པའི་མན་ངགཉིན་པར་སྣང་བ་རྒྱ་ཡིས་འདེབས་པའི་མན་ངགསྲོད་ལ་དབང་པོ་གནད་དུ་བསྡུ་བའི་མན་ངགགུང་ལ་ཤེས་བྱ་བུམ་པར་དྲིལ་བའི་མན་ངག་སྟེ། ཉིན་མཚན་ཁ་སྦྱོར་གྱི་དགོངས་པས་འདི་ཕྱི་བར་དོ་གསུམ་ལམ་དུ་འཁྱེར་བ་དངོས་སམ་མིན་ཀྱང་དོད་ཐུབ་ཙམ་ལ་ཉམས་ལེན་བྱེད་དགོས་པ་ནི་སྤྱིར་བཏང་ཡིན་ཀྱང་། སྐབས་འདིར་ལས་དང་པོ་པ་རྣམས་ཀྱིས་ལུས་གནད་ལེགས་པར་བཅོས་ཏེ་ཐོག་མར་རླུང་རོ་བསལ་བ་ནི། ལག་གཉིས་རྡོ་རྗེ་ཁུ་ཚུར་གྱིས་བརླའི་རྩ་ཆེན་གཉིས་མནན། ཁམས་གསུམ་སེམས་ཅན་རྣམས་ཀྱི་ལས་ཉོན་བག་ཆགསདང་བཅས་པ་ལྟེ་འོག་ཏུ་དལ་བུས་རྔུབ་ཏེ། ལག་གཡས་རྡོ་རྗེ་རྩེ་གསུམ་པའི་ཕྱག་རྒྱས་སྣ་བུག་གཡས་པ་བཀག་སྟེ་གཡོན་ནས་ལན་གསུམ་དང་། དེ་ལྟར་གཡོན་ནས་སྣ་བུག་གཡོན་བཀག་སྟེ་གཡས་ནས་ལན་གསུམ་དང་། ལག་གཉིས་ཀྱིས་བརླ་རྩ་མནན་ཏེ་སྣ་བུག་གཉིས་ནས་མཉམ་དུ་ལན་གསུམ་འབུད། དེ་ཡང་སྣ་བུག་གཡས་ནས་ཞེ་སྡང་གི་རྟོག་ཚོགས་རླུང་དཀར་ནག་དང་། གཡོན་ནས་འདོད་ཆགས་ཀྱི་རྟོག་ཚོགས་རླུང་དམར་ནགམཉམ་དུ་གཏི་མུག་གི་རྟོག་ཚོགས་རླུང་ནག་དུད་ཀྱི་རྣམ་པ་ཅན་སངས་ཀྱིས་བསལ་ཏེ། འབྲུ་གསུམ་རྡོར་བཟླས་ཀྱི་ངང་ནས་རླུང་གནད་དལ་བུས་བསླབ། དེ་ནས་དང་པོ་ཀུན་སློང་བཅོས་མ་ཤེས་ན་གཤིན་རྗེའི་འཇིག་རྟེན་དུ་འགྲོ་བའི་རྒྱུ་སྒྲུབ་པ་ཡིན་པས། རྒྱལ་སྲས་ཆེན་པོ་ཞི་བ་ལྷས། དང་པོ་རང་གི་སེམས་བརྟགས་ནས། བརྟན་པས་རིགས་པ་ལྡན་པར་བྱ། ཞེས་གསུངས་པ་ལྟར་དམ་པའི་ཆོས་ཡང་དག་པ་ཞིག་སྒྲུབ་པར་བྱེད་པ་ལ། ཐོག་མར་རང་གི་ཀུན་སློང་བརྟགས་པ་ནི་ཤིན་ཏུ་གལ་ཆེ་སྟེ། མཉམ་མེད་དྭགས་པོ་རིན་པོ་ཆེས་ཀྱང་། ཆོས་ཆོས་བཞིན་དུ་མ་སྤྱད་ན། ཆོས་ཀྱིས་སླར་ངན་སོང་དུ་འགྲོ་བའི་རྒྱུ་བྱེད། ཞེས་གསུངས་པས་ཀུན་སློང་ལ་དབྱེ་ན་གསུམ་སྟེ། དང་པོ་ལུང་མ་བསྟན་པའི་ཀུན་སློང་ནི། དད་པ་དང་དག་སྣང་སོགས་དགེ་སེམས་དང་ཆགས་སྡང་རྨོང་གསུམ་སོགས་སྡིག་སེམས་གང་གིས་ཀྱང་མ་བསྒྱུར་བར་སྒྲུབ་བྱའི་ཆོས་ཤིག་ཡིན་པར་ཤེས་པ་ཙམ་གྱིས་ཆོས་དེ་བསྒྲུབ་པ་ལ་ཐར་པའི་ས་བོན་ཙམ་ཡང་མེད་ཅེས་དཔལ་སྤྲུལ་རིན་པོ་ཆེས་གསུངས་པས། དཔེར་ན་མིའི་ལད་མོ་མི་དྲེད་ཀྱིས་བྱེད་པ་དང་། མི་རྗེས་སུ་ཁྱི་ཞེན་པ་དང་། བྱིས་པས་མེ་ཏོག་འཐུ་བ་དང་། མདའ་སྟོང་འཕེན་བྱེད་པ་དང་། ལད་མོ་རྗེས་ཟློས་བྱེད་པ་ལྟ་བུ་ཞིག་རྒྱུ་མཚན་བྱས་ནས་ཆོས་བསྒྲུབ་པ་ལ་བཟང་ངན་གཉིས་ཀྱི་འབྲས་བུ་མེད་པས་ལུང་མ་བསྟན་གྱི་ཀུན་སློང་དེ་བཅོས་དགོས་སོ། །གཉིས་པ་མི་དགེ་བའི་ཀུན་སློང་ནི། རང་ཕྱོགས་ལ་ཆགས། གཞན་ཕྱོགས་ལ་སྡང་། བར་མ་ལ་གཏི་མུགམཐོ་བ་ལ་ཕྲག་ཏོགདམན་པ་ལ་ང་རྒྱལ་སོགས་དང་། འཇིག་རྟེན་ཆོས་བརྒྱད་ཀྱིས་ཀུན་ནས་བསླང་བ་དང་། ནད་གདོན་རྐྱེན་བགེགས་ལ་སོགས་མི་འདོད་པའི་འཇིགས་པ་སྐྱོབས་པའི་ཆེད་དུ་དང་། ཐོབ་གོ་ས། མཚན་སྙན་གྲགས། སྟོབས་མངའ་ཐང་། རྙེད་བཀུར་སྟི་སོགས་ཐོབ་འདོད་ལ་སྨོན་པའི་དགེ་བ་ནི། དཔེར་ན་དུག་དང་འདྲེས་པའི་ཁ་ཟས་ལྟ་བུ་ལྟར་སྣང་དུ་དགེ་བ་ཙམ་ཡིན་ཀྱང་དོན་ལ་ནི་ཚེ་འདི་ལ་ཞེན་ན་ཆོས་པ་མིན། ཞེས་གསུངས་པ་ལྟར་ཆོས་མིན་གྱི་ཕྱོགས་སུ་སོང་བ་ཡིན་པས། དེས་ན་མི་དགེ་བའི་ཀུན་སློང་དེ་སྤངས་བྱར་བསྟན་ནོ། །གསུམ་པ་དགེ་བའི་ཀུན་སློང་ལ་གཉིས། རང་དོན་སྒྲུབ་པའི་དགེ་བའི་ཀུན་སློང་ནི། རང་གཅིག་པུ་ངན་སོང་གསུམ་གྱི་སྡུག་བསྔལ་ལ་སྐྲག་ནས་མཐོ་རིས་ཀྱི་བདེ་བ་དོན་དུ་གཉེར་བ་ལ་ནི་འབྲས་བུ་གནས་སྐབས་ཀྱི་བདེ་བ་ཙམ་ལས་མེད་པས་ན། འཁོར་བར་ཞེན་ན་ངེས་འབྱུང་མིན། ཞེས་པ་དང་། ཡང་ན་འཁོར་བ་མཐོ་དམན་གང་དུ་སྐྱེས་ཀྱང་སྡུག་བསྔལ་གྱི་རང་བཞིན་ལས་མེད་པར་ཤེས་ནས་ཞི་བ་མྱང་འདས་ཀྱི་གོ་འཕང་ཐོབ་འདོད་ཙམ་ལ་ཡང་། བདག་དོན་ལ་ཞེན་ན་སེམས་བསྐྱེད་མིན། ཞེས་པ་ལྟར། སེམས་ཅན་བློས་དོར་གྱི་རྩ་ལྟུང་འབྱུང་བ་དང་། འབྲས་བུ་ཡང་ཞི་བདེ་ཙམ་ལས་མེད་པས། དེས་ན་རང་དོན་ཡིད་བྱེད་ཀྱི་ཀུན་སློང་དེ་ཡང་རེ་ཞིག་བཞག་ན་ལེགས། གཉིས་པ་གཞན་དོན་སྒྲུབ་པའི་དགེ་བའི་ཀུན་སློང་ནི། འདི་ལྟར་ནམ་མཁས་གར་ཁྱབ་ཀྱི་སེམས་ཅན་རྣམས་དམིགས་ཡུལ་དུ་བྱས་ནས། རྣམ་པ་ཐམས་ཅད་མཁྱེན་པ་རྫོགས་པའི་སངས་རྒྱས་ཀྱི་གོ་འཕང་ཐོབ་པའི་ཆེད་དུ་བསམ་པ་རྣམ་དག་གིས་ཟིན་པ་ནི་གལ་ཤིན་ཏུ་ཆེ་སྟེ། ཡོན་མཛོད་ལས། བསམ་པ་དགེ་དང་མི་དགེའི་བྱེ་བྲག་ལས། །དགེ་སྡིིག་གཟུགས་བརྙན་ཆེ་ཆུང་རྗེས་མི་འགྲོ། །ཞེས་གསུངས་པ་བཞིན་ནོ། །དམ་པའི་ཆོས་སྒྲུབ་པའི་གྲོགས་བློ་ལྡོག་རྣམ་བཞི་ཡིན་པས། དེ་ལ་དང་པོ་བླ་མ་མཁྱེན་གསུམ་ནི། སྐུ་གསུམ་དང་། ལྟ་སྒོམ་སྤྱོད་གསུམ་སོགས་སུ་སྦྱར་ནས་བཤད་ཚུལ་མང་ཡང་། འདིར་སོ་བྱང་སྔགས་ཀྱི་སྡོམ་པའི་ངོ་བོ་དང་སྦྱར་ནས་གསུངས་པ་ལ། བླ་མ་མཁྱེན་དང་པོས་ནི། ཁམས་གསུམ་འཁོར་བའི་གནས་འདི་སྡུག་བསྔལ་གྱི་རང་བཞིན། སྡུག་བསྔལ་གྱི་འཁྲུལ་འཁོར། སྡུག་བསྔལ་གྱི་རྒྱ་མཚོ་ཆེན་པོ་ཡེ་ནས་ཡིན་པ་ལ་རང་གཞན་སེམས་ཅན་རྣམས་ཀྱིས་དེ་ལྟར་ཡིན་པར་ཤེས་པ་ཞིག་བླ༷་མ༷་མཁྱེན༷་སྙམ་པས་འཁོར་བ་ཞེན་ལོག་གི་ངེས་འབྱུང་རང་གཞན་སེམས་ཅན་རྣམས་ཀྱི་རྒྱུད་ལ་སྐྱེ་བའི་ཕྱིར་དུ་གསོལ་བ་བཏབ་པ་དང་། གཉིས་པ་ནི། འཁོར་བའི་གནས་དེར་སྐྱེས་པའི་ཕ་མ་སེམས་ཅན་ཐམས་ཅད་རྨོངས་པ་མ་རིག་པའི་དབང་གིས་སྡུག་བསྔལ་བཟོད་བླག་མེད་པར་ཁོར་མོ་ཡུག་ཏུ་སྤྱོད་པ་སྙིང་རེ་རྗེ། སེམས་ཅན་དེ་རྣམས་ཀྱི་སྡུག་བསྔལ་རྒྱུ་འབྲས་བུ་དང་བཅས་པ་བྲལ་ནས་རྣམ་གྲོལ་གཏན་བདེ་ཐོབ་པ་ཞིག་བླ༷་མ༷་མཁྱེན༷་སྙམ་པའི་གཞན་ཕན་དོན་གཉེར་གྱི་བྱང་སེམས་རང་གཞན་སེམས་ཅན་རྣམས་ཀྱི་རྒྱུད་ལ་སྐྱེ་བའི་ཕྱིར་དུ་གསོལ་བ་བཏབ་པ་དང་། གསུམ་པ་ནི། ཕྱི་ནང་སྣོད་བཅུད་ཀྱི་ཆོས་འདི་དག་ཐམས་ཅད་གནས་ཚུལ་དོན་དམ་པ་ན་རྒྱལ་བའི་སྐུ་གསུང་ཐུགས་མི་ཟད་པ་རྒྱན་གྱི་འཁོར་ལོ་ལྷ་སྔགས་ཆོས་ཉིད་ཀྱི་རང་བཞིན་ལས་འདའ་མ་མྱོང་ཡང་། སྣང་ཚུལ་ཀུན་རྫོབ་དུ་སེམས་ཅན་རྣམས་འཁྲུལ་བ་གློ་བུར་བའི་དབང་གིས་ཐ་མལ་མ་དག་ལྟར་དུ་སྣང་། སྣང་བ་ལྟར་དུ་ཞེན། ཞེན་པ་ལྟར་དུ་འཐས་ཡོད་པས་ཡུལ་སྣང་འདི་དག་དག་པ་སྐུ་དང་ཡེ་ཤེས་སུ་ཤར་བ་ཞིག་བླ༷་མ༷་དཀོ༷ན་མཆོ༷ག་གསུ༷མ་པོ༷་ཁྱེ༷ད་མཁྱེ༷ན་ནོ༷་སྙམ་པས་སྣང་སྲིད་རྣམ་དག་གི་དག་སྣང་རང་གཞན་སེམས་ཅན་རྣམས་ཀྱི་རྒྱུད་ལ་སྐྱེ་བའི་ཕྱིར་དུ་གསོལ་བ་བཏབ་པ་དང་། ཡང་ན་ངེས་འབྱུང་། བྱང་སེམས། དག་སྣང་གསུམ་རང་གཞན་སེམས་ཅན་རྣམས་ཀྱི་རྒྱུད་ལ་སྐྱེ་བར་བྱིན་གྱིས་རློབས་ཤིག་བསམ་ཀྱང་ཆོག་གོ །བློ་ལྡོག་རྣམ་བཞི་དངོས་ལ་ནི། བློ་ལྡོག་བྱ་བཞི། བློ་ལྡོག་བྱེད་ཀྱི་གཉེན་པོ་བཞི་སྟེ། དང་པོ་བཞི་ནི། དོན་ཆེན་གཏན་གྱི་འདུན་མ་མི་བསྒྲུབ་པར་དལ་འབྱོར་གྱི་མི་ལུས་རིན་པོ་ཆེ་འདི་དོན་མེད་ཆུད་ཟོས་སུ་བཏང་ནས་སྙིང་པོ་ལེན་འདོད་མེད་པའི་བློ་ངན་དེ་དང་། ཐམས་ཅད་འཆི་བར་ཤེས་ཀྱང་རང་མི་འཆི་བསམ་པའི་རྟག་འཛིན་ཨ་འཐས་ཀྱིས་ཤི་སྙམ་པ་སྐད་ཅིག་ཙམ་ཡང་མེད་པའི་བློ་ངན་དེ་དང་། སྲིད་རྩེ་ནས་མནར་མེད་བར་གྱི་སྡུག་བསྔལ་ལ་སྐྱོ་བ་དང་སུན་པ་མེད་པར་གནས་སྐབས་ཀྱི་བདེ་བ་ཕྲན་བུ་ཙམ་འདི་ལ་ཆགས་ཤིང་ཞེན་པའི་བློ་ངན་དེ་དང་། ལས་རྒྱུ་འབྲས་གཏན་ནས་མི་ཤེས་པའམ་ཤེས་ཀྱང་ཐེ་ཚོམ་གྱིས་ཚུལ་བཞིན་དུ་འཇུག་ལྡོག་གི་གནས་ལ་སྤྱོད་མི་ནུས་པའི་བློ་ངན་དེ་རྣམས་ནི་ཆོས་ཀྱི་བར་ཆད་བདུད་ཀྱི་རྩ་བ་ཡིན་པར་ཤེས་དགོས། གཉིས་པ་གཉེན་པོ་བཞི་ནི། ད༷ལ་བརྒྱད་འབྱོ༷ར་བཅུ་ཚང་བའི་མི་ལུས་རིན་པོ་ཆེ་འདི་རྒྱུ་དཔེ་གྲངས་གསུམ་གྱི་སྒོ་ནས་རྙེ༷ད་དཀ༷འ་ཚུལ་ལ་བསམ་ན་འདི་ལྟ་བུའི་ལུས་ཐོ༷བ་པ༷་ད༷་རེ༷ས་ཙ༷མ་ཡིན་པས། དེས་ན་དོན་ཆེན་གཏན་གྱི་འདུན་མ་ལེན་པ་ཞིག་ལ་འབད་སྙམ་པའི་བློ་ཡང་ཡང་སྦྱང་བ་དང་། ཕྱི་ནང་སྣོད་བཅུད་ཀྱི་ཆོས་འདི་དག་ཐམས་ཅད་མི༷་རྟ༷ག་པའི་ཚུལ་ལ་བསམ་ན་འཆི༷་བ༷་ཞེས་པ་དེ་ན༷མ་འོ༷ང་ཆ་མ༷་མཆི༷ས་ཏེ། འཆི་རྐྱེན་ལ་ནི་ངེས་པ་མེད། དབུགས་འགྲོ་འོང་ཙམ་གྱི་བར་ལའང་འདི་ཕྱི་གཉིས་གང་སྔ་མི་ཤེས་པས་དེས་ན་ཕྱི་མའི་ཆུས་ཞིག་ལ་འབད་སྙམ་པའི་བློ་སྣ་བསྟུང་བ་དང་། ཁམས་གསུམ་འཁོ༷ར་བ༷འི་གནས་ག༷ང་དུ༷་སྐྱེས༷་ཀྱ༷ང་ཚ་གྲང་བཀྲེས་སྐོམ་བཅད་གཏུབ་ལ་སོགས་པ་སེམས་ཅན་གྱི་ལས་སྣང་མི་འདྲ་བ་སྣ་ཚོགས་མྱོང་བ་ལ་བློས་དཔག་ཏུ་མེད་ཀྱང་། མཐོང་ཐོས་ཀྱི་ཡུལ་དུ་གྱུར་པའི་འཁོར་བའི་སྡུག༷་བསྔལ༷་རྒྱུ་འབྲས་བུ་དང་བཅས་པ་རང་གིི་བློ་ཐོག་ཏུ་བླངས་ནས་སྐྱོ་བ་ཡང་ཡང་བསྐྱེད་པ་དང་། རྒྱུ་དགེ༷་སྡིག༷་གང་བསྒྲུབ་པ་ལ༷ས་འབྲ༷ས་བུ་བདེ་སྡུག་དེ་ལྟར་དུ་འབྱུང་བ་ནི་ནམ་ཡང་བསླུ༷་བ༷་མེ༷ད་པ་ཡིན་པས། མདོ་དྲན་པ་ཉེར་བཞག་ལས། མེ་ནི་གྲང་བར་འགྱུར་ཡང་སྲིད། །རླུང་ནི་ཞགས་པས་ཟིན་ཡང་སྲིད། །ཉི་ཟླ་ཐང་ལ་ལྷུང་ཡང་སྲིད། །ལས་ཀྱི་འབྲས་བུ་བསླུ་མི་སྲིད། །གསུངས་པ་ལྟར་རྒྱུ་འབྲས་ལ་ཡིད་ཆེས་བསྐྱེད་དེ་འཇུག་ལྡོག་གི་གནས་ལ་མ་རྨོངས་པར་བླང་དོར་ཚུལ་བཞིན་དུ་བསྒྲུབ་པར་བྱ་བ་ནི་ནམ་ཡང་བརྗེད་མི་ཉན་པའི་ཆོས་ཡིན་ནོ། །མཐར་ཐུག་གི་འབྲས་བུ་ཐ༷ར་བ་དང་ཐམས་ཅད་མཁྱེན་པའི་གོ་འཕང་ནི་ལ༷མ་ཚོགས་གཉིས་བསགས་པའི་འབྲས་བུ། སྤང་རྟོགས་མཐར་ཕྱིན་པ་ལས་ཐོ༷བ་དགོས་པ༷་ཡིན་པས་ན་བློ་ལོག་ལམ་ལ་མ་སོང་བས་བླ༷་མ༷་དམ་པ་མཉེས་པ་གསུམ་གྱི་སྒོ་ནས་ལེགས་པར་བརྟེན་ནས་ཐུག༷ས་རྗེ༷འི་ལྕགས་ཀྱུས་རྗེས་སུ་བཟུ༷ང་བའི་སྨིན་གྲོལ་གྱི་མན་ངག་ཟབ་མོ་རང་རྒྱུད་ལ་ལོན་པའི་གསོལ་བ་ཡང་ཡང་འདེབས་པ་ནི་གལ་ཆེའོ། །དེ་ལྟ་བུའི་བློ་ལྡོག་རྣམ་པ་བཞི་པོ་འདི་སྡུག་བསྔལ་འགོག་བདེན་དུ་ཤར། ཀུན་འབྱུང་ལམ་བདེན་དུ་ཤར། སྐྱེ་འཆིའི་བར་ལག་འགྱེལ་ཏེ་འཆི་མེད་གཉུག་མའི་བཙན་ས་མ་ཟིན་གྱི་བར་དུ་བསྒོམ་དགོས་པ་ནི་ཐུན་མོང་མ་ཡིན་པའི་བློ་ལྡོག་རྣམ་བཞི་སྦྱངས་པའི་ཚད་ཡིན་ནོ། ༈ །དམ་པའི་ཆོས་སྒྲུབ་པའི་འཇུག་སྒོ་སྐྱབས་འགྲོ་དང་སེམས་བསྐྱེད་ཡིན་ཀྱང་། དང་པོ་དད་པ་དང་དག་སྣང་གིས་ཆོས་སྒོ་མ་དབྱེ་ན། ཇི་སྐད་དུ། དད་པ་མེད་པའི་མི་རྣམས་ལ། །དཀར་པོའི་ཆོས་ནི་མི་འབྱུང་ངོ། །ཞེས་གསུངས་པས་དད་པ་ལ་དབྱེ་ན་གསུམ་སྟེ། དང་པོ་དངས་བའི་དད་པ་ནི། བུ་ཕྲུག་གིས་མ་མཐོང་བ་ལྟ་བུ་ཡུལ་མཆོག་གསུམ་གྱིི་ཡོན་ཏན་མཐོང་བའི་ཚེ་ཡུལ་དེའི་སྟོབས་ཀྱིས་སྐད་ཅིག་ཞིག་ལ་སེམས་ཀྱི་དྭངས་ཆ་འདྲེན་པ་དེ་ཡིན་ནོ། །གཉིས་པ་འདོད་པའི་དད་པ་ནི། བཀྲེས་པས་ཟས་སྐོམ་མཐོང་བ་ལྟ་བུ་གནས་སྐབས་དང་མཐར་ཐུག་གི་བདེ་བ་གང་ཡིན་ཀྱང་དེ་ཐོབ་པའི་ཆེད་དུ་ལམ་ལ་འཇུག་པར་འདོད་པ་དེ་ཡིན་ནོ། །གསུམ་པ་ཡིད་ཆེས་པའི་དད་པ་ནི། སྐྱེས་བུ་རྩལ་ཅན་གྱིས་མདའ་འཕང་བ་ལྟ་བུ་ཁམས་གསུམ་འཁོར་བའི་སྡུག་བསྔལ་འདི་ལས་སྐྱོབས་པ་པོ་བླ་མ་དཀོན་མཆོག་གསུམ་མ་གཏོགས་གཞན་སུ་ཡང་མེད་པར་ཤེས་ནས་བློ་བླ་མ་དཀོན་མཆོག་གསུམ་ལ་གཏད་པ་ནི། ཤེས་ལས་བྱུང་བའི་དད་པ་ནི། །ཐམས་ཅད་མཁྱེན་པ་ཉིད་ཀྱིས་བཞེད། །ཞེས་གསུངས་པ་ལྟར་ཡིན་པས། དེས་ན་དད་པ་ཁྱད་པར་བ་འདི་དང་མ་འབྲལ་ན། དད་པ་ཅན་ལ་པད་འབྱུང་སྒོ་ཉལ་ཡོད། །ཞེས་རྒྱལ་བའི་ཐུགས་རྗེ་བྱིན་རླབས་ཐམས་ཅད་གང་ཟག་དེ་ལ་འཇུག་ངེས་པ་ཡིན་ནོ། །ཡིད་ཁྱེད་ཤེས་ཀྱི་དད་པ་འདི་མེད་ན། དད་མེད་ཆུ་དཀྱིལ་རྡོ་རིལ་དེ། །ཐུགས་རྗེའི་ལྕགས་ཀྱུས་ཟིན་དུས་མེད། ཞེས་པ་ལྟར། ཆོས་ཅི་ཙམ་བསྒྲུབ་ཀྱང་བྱིན་རླབས་ཀྱི་འཇུག་སྒོ་འགག་ཡོད་པས། དེས་ན་དང་པོ་དད་པ་དག་སྣང་ལ་བློ་སྦྱངས་ནས་སྐྱབས་སེམས་དངོས་ནི། ཕྱི་པ་ནང་པ་སྐྱབས་འགྲོའི་ཁྱད། །ཐེག་པ་ཆེ་ཆུང་སེམས་བསྐྱེད་ཁྱད། ཞེས་པས། དང་པོ་སྐྱབས་འགྲོ་ལ། རྒྱུ་སྐྱབས་དང་འབྲས་སྐྱབས་ཀྱི་ཁྱད་པར་ནི། མདོ་ཕར་ཕྱིན་ནམ་རྒྱུ་མཚན་ཉིད་ཐེག་པས་ནམ་ཞིག་རང་རྒྱུད་ལ་ཇི་ལྟ་ཇི་སྙེད་མཁྱེན་པའི་ཡེ་ཤེས་ཆོས་སྐུ་ཐོབ་པར་འདོད་པ་ནི་འབྲས་སྐྱབས་དང་། དེ་མ་ཐོབ་གྱི་བར་དུ་དཀོན་མཆོག་གསུམ་ལ་སྟོན་པ་ལམ་གྲོགས་ཀྱི་ཚུལ་དུ་སྐྱབས་སུ་འགྲོ་བ་ནི་རྒྱུ་སྐྱབས་ཡིན་ནོ། །གསང་སྔགས་སམ་འབྲས་བུ་རྡོ་རྗེ་ཐེག་པས། རང་ལ་ཡོད་པའི་སེམས་ཉིད་སངས་རྒྱས་སུ་ཡེ་ནས་གནས་པ་དེ་མཐོང་བར་འདོད་ནས། ཕྱི་ནང་གི་དཀོན་མཆོག་གསུམ་ལ་སྐྱབས་སུ་འགྲོ་བ་ནི་རྒྱུ་སྐྱབས་དང་། རང་གི་སེམས་ཉིད་རང་བྱུང་གི་ཡེ་ཤེས་དེའི་རང་མདངས་བསྐྱངས་ནས་རྩེ་གཅིག་ཏུ་མཉམ་པར་འཇོག་པ་ནི་འབྲས་བུའི་སྐྱབས་འགྲོའོ། །དེ་ནས་སྐྱབས་སུ་འགྲོ་ཚུལ་ནི། ཚོགས་ཞིང་ཁྲོམ་ཚོགས་ལྟར་བསྒོམ་པ་དང་། ཀུན་འདུས་ནོར་ནོར་བུའི་ལུགས་སུ་བསྒོམ་པ་གཉིས་ལས། འདི་ཕྱི་མ་ལྟར་ཨོ་རྒྱན་པདྨས། སྐྱབས་གནས་རེ་ལྟོས་ཐམས་ཅད་ནི། །ཨོ་རྒྱན་བདག་ལ་འདུས་པར་སོམས། །གསུངས་པ་ལྟར་ར༷ང་གི༷་སྤྱི༷་བོ༷ར་སྐྱབ༷ས་གན༷ས་དགུའི་བདག་ཉིད་ཀུ༷ན་འདུ༷ས་ནོར་བུའི་ལུགས་ཀྱི༷་ངོ༷་བོ་རྩ་བའི་བླ་མ་ལ་རྣམ་པ་གུ༷་རུ༷་རི༷ན་པོ༷་ཆེ༷འི་ཞལ་ཕྱག་རྒྱན་ཆ་ལུགས་སོགས་གས༷ལ་བཏ༷བ་པ་དེ་ལ༷། ཆོས་སྐུ་རྡོ་རྗེ་འཆང་ཆེན་པོ་ནས་བརྒྱུད་གསུམ་གྱི་བླ་མ་རང་ལ་ཀ་ཁ་སློབ་པའི་སློབ་དཔོན་ཡན་ཆད་དང་། དམ་ཚིག་གཅིག་པའི་རྡོ་རྗེ་སྤུན་གྲོགས་ལྕིའུ་སེར་བཅིང་ཡན་ཆད་དང་། རྒྱུད་སྡེ་དྲུག་གི་ཡི་དམ། གནས་ཡུལ་དུར་ཁྲོད་ཀྱི་དཔའ་བོ་མཁའ་འགྲོ། དེར་མ་ཟད་ཇོ་བོ་བཀའ་གདམས་པའི་ཕྱག་བཞེས་ལ་རང་རྒྱུད་དུ་དཀར་པོ་དགེ་སེམས་སྐྱེ་བའི་རྐྱེན་དགྲ་བགེགས་ནད་གདོན་འདྲེ་སྲིན་འབྱུང་པོ་མི་མ་ཡིན་དང་། སེམས་མེད་བེམ་པོ་འབྱུང་བ་བཞིའི་རང་གཟུགས་ཀྱིས་དགེ་སེམས་བསྐྱེད་ཀྱང་། སྣང་བ་བརྡ་ཡི་བླ་མ་ཡིན་པས་དེ་ཡང་བླ་མའི་ཁོངས་སུ་བསྡུས་ཏེ་ཡེ་ཤེས་ཀྱི་ཕུང་པོ་གཅིག་གི་རྣམ་རོལ་དུ་བསྒོམ་པ་ནི་གནད་ཡིན་ནོ། ཞབས་དྲུང་རིན་པོ་ཆེ་ཡིས་བླ་མ་དང་མཆེད་ལྕམ་གྱི་བརྩེ་གདུང་མ་དྲན་པར་ཐུན་མཚམས་འདས་ན་སྔགས་ཀྱི་རྩ་ལྟུང་འབྱུང་བ་ཡིན་ཀྱང་། འདི་ལྟར་བསྒོམ་པས་དེའི་ཉེས་པའང་ཁེགས་གསུངས། བསྐྱེད་རིམ་ལ་གསལ་སྣང་མ་ཐོབ་པའི་ལས་དང་པོ་པས་མོས་བསྒོམ་བྱས་ཀྱང་ཆོག་སྟེ། གང་ཞིག་མོས་པ་ཡིད་བྱེད་པ། །དེ་ཡི་མདུན་ན་ཐུབ་པ་བཞུགས། །གསུངས་ཡོད་པ་དང་། གུ་རུ་ཉིད་ཀྱི་ཞལ་སྔ་ནས་ཀྱང་། ང་ཉིད་གང་ཟག་སུས་དྲན་ན། །ལས་ལ་བཟང་ངན་མེད། །ན་སོ་ལ་རྒན་གཞོན་མེད། ལུས་ལ་ཕོ་མོ་མེད། །སྐྱེ་བ་ལ་མཐོ་དམན་མེད། མོས་གུས་སུ་ལ་ཡོད་ན་ཁོང་དེའི་དྲན་པའི་མཁར་སྒོ་ན་བཞུགས་ཡོད་གསུངས་ནས་དབུ་བསྙུང་མཛད་ཡོད་པས་རང་ལ་དད་པ་ཡོད་ན་གང་ལྟར་བྱས་ཀྱང་ཆོག་པར་འདུགགྲུབ་ཆེན་རིན་པོ་ཆེས་བླ་མ་རིགས་བདག་གི་ཚུལ་དུ་སྤྱི་བོར་བསྒོམ་པ་དང་། མདུན་གྱི་ནམ་མཁར་བསྒོམ་པ་ལ་ཁྱད་མེད་གསུངས། སྐྱབས་སུ་འགྲོ་བའི་གང་ཟག་ནི། ར༷ང་གཞ༷ན་སེམས་ཅན་ཐ༷མས་ཅ༷ད་ཡིན་ལ། དུས༷་ནི་འདི༷་ན༷ས་བཟུང་སྟེ་ཕྱི་ལྟར་ན་བྱང༷་ཆུབ༷་ཀྱི་ཤིང་དྲུང་དུ་མཉམ་པར་བཞག་ནས་སངས་རྒྱས་པའི་བར་དང་། ནང་ལྟར་ན་ཁམས་བདེ་བར་གཤེགས་པའི་སྙི༷ང་པོ༷་མངོན་དུ་མ་གྱུར་གྱི་བ༷ར་དུ༷འོ། །ཆེད་དུ་བྱ་བ་ནི་སྤྱིར་ཁམས་གསུམ་འཁོར་བའི་སྡུག་བསྔལ། དགོས་རང་དོན་ཡིད་བྱེད་ཀྱི་བློ་ངན། ཡང་དགོས་མ་དག་ཐ་མལ་གྱི་སྣང་ཞེན་འདི་ལས་སྐྱོབས་པ་པོ་ནི་བླ་མ་དཀོན་མཆོག་གསུམ་ཁྱེད་མ་གཏོགས། བརྩེ་བའི་ཕ། བྱམས་པའི་མ། གཅེས་པའི་བུ། མཛའ་བའི་གྲོགས། འཇིག་རྟེན་ན་ཆེ་བ་ཚངས་དབང་བདེ་འབྱུང་སོགས་སུས་ཀྱང་སྐྱོབས་པར་མི་ནུས། སྐྱབ༷ས་གན༷ས་ཀུན༷་འདུས༷་ཀྱི༷་ངོ༷་བོ༷་བླ་མ་དང་དབྱེར་མེད་པའི་གུ༷་རུ༷་རི༷ན་པོ༷་ཆེ༷་ཁྱེད༷་ལ༷་ནི་མཁྱེན་པའི་ཡེ་ཤེས། བརྩེ་བའི་ཐུགས་རྗེ། མཛད་པའི་ཕྲིན་ལས། སྐྱོབས་པའི་ནུས་མཐུ་མངའ་བས་ཁྱེད་ལ་སྐྱབས་སུ་འགྲོ་བའམ་སྐྱབ༷ས་སུ༷་མཆི༷ས་པ་ཡིན་པས། གནས་གང་དུ་བསྡད། གྲོགས་སུ་དང་འགྲོགས། སྐྱིད་སྡུག་ལེགས་ཉེས་ཅི་བྱུང་ཡང་ཁྱེད་ལས་རེ་ས་གཞན་སུ་ཡང་མེད་སྙ༷མ་པ༷ས་མོ༷ས་གུ༷ས་གདུང༷་ཤུག༷ས་དྲ༷ག་པོ༷ས་གསོ༷ལ་བ༷་སྙི༷ང་ཁུ༷ང་རུ༷ས་པ༷འི་གཏི༷ང་ན༷ས་བཏ༷བ་པ་ནི། ཀུན་མཁྱེན་གཉིས་པས། བློ་བླ་མར་གཏོད་པ་སྐྱབས་འགྲོ་ཡི་མཐར་ཐུགགསུངས་པས། །གང་སྣང་བླ་མར་མ་ཤར་བར་དུ་བླ་མའི་སྣང་བ་མ་བྲལ་བའི་ངང་ནས་ཕྱི་རོལ་རྟགས་ཀྱི་བླ་མའམ། མཚོན་བྱེད་དཔེ་ཡི་བླ་མ་དེ་ཕྱི་སྤྲུལ་སྐུ་ལྟར་བསྒྲུབ་པ། ནང་ལོངས་སྐུ་ལྟར་བསྒྲུབ་པ། གསང་བ་ཆོས་སྐུ་ལྟར་བསྒྲུབ་པ། ཡང་གསང་ཡེ་ཤེས་ལྟར་བསྒྲུབ་པ། ནམ་ཞིག་རང་རྒྱུད་ན་མཁྱེན་བརྩེ་ནུས་གསུམ་མངའ་བའི་མཚོན་བྱ་དོན་གྱི་བླ་མ་གཉུག་མའི་ཡེ་ཤེས་དེ་ཉིད་སད་པའི་བྱ་བ་བྱེད་པ་ཡིན་ནོ། །སྐྱབས་འགྲོ་དང་གསོལ་འདེབས་ལ་ནི་དུས་སུ་དམ་བཅའ་མི་བཅའ་མ་གཏོགས་ཁྱད་མེད་གསུངས།
གཉིས་པ་སེམས་བསྐྱེད་པ་ནི། ཐེག་པ་ཆེན་པོའི་ལམ་ནོར་བ་ཡིན་པས། དེ་ལ་བཞེད་པ་མི་འདྲ་བ་མང་ན་ཡང་དོན་ལ་རང་དོན་དང་མ་འདྲེས་ན་སེམས་བསྐྱེད་ཀྱི་མཆོག་ཡིན། དེ༷་ན༷ས་སེམས་བསྐྱེད་ཚུལ་ནི། སྐྱབས་ཡུལ་གྱི་ཚོགས་ཞིང་གསལ་བཞིན་པའི་ངང་ནས་འདི་ལྟར་ནམ་མཁས་གར་ཁྱབ་ཀྱི་སེ༷མས་ཅ༷ན་ཐ༷མས་ཅ༷ད་ཡེ་ཐོག་མ་མེད་པའི་དུས་ནས་དྲིན་ཆེན་གྱི་ཕ་མར་གྱུར་པ་ཤ་སྟག་ཡིན་པ་ལ། ཞེ་འདོད་དང་ ལག་ལེན་ཕྱིན་ཅི་ལོག་ཏུ་སོང་ནས ་སྔོན་བསགས་ལས་ཀྱི་དབང་གིས་ཁམས་གསུམ་འཁོར་བའི་གནས་འདིར་ལས་སྣང་སྣ་ཚོགས་ལ་སྤྱོད་ནས་ངལ་ཞིང་དུབ་པའི་སྡུག་བསྔལ་རྒྱུ་འབྲས་བུ་དང་བཅས་པ་བྲལ་བར་འདོད་པའི་སྙིང་རྗེ་དང་། དེ་ལ་ཡང་བློ་ཉེ་རིང་ཆགས་སྡང་དང་བྲལ་བའི་བཏང་སྙོམ་གཉིས་ནི་སྙིང་རྗེས་གཞན་དོན་ལ་དམིགས་པའི་ཟུར་དང་། དེ་ལྟ་བུའི་སྡུག་བསྔལ་ལས་རྣ༷མ་པར་གྲོ༷ལ་ཏེ་མཐར་ཐུག་གཏ༷ན་གྱི༷་བདེ༷་བ༷་ལ༷་འགོ༷ད་པ༷འི་སླ༷ད་དུ༷་བད༷ག་གི༷ས་རྫོ༷གས་པ༷འི་ས༷ངས་རྒྱས༷་ཀྱི༷་གོ༷་འཕ༷ང་རི༷ན་པོ༷་ཆེ༷་ཐོ༷བ་པ༷ར་བྱ༷་སྙམ་པའི་བདེ་བ་ལྡན་འདོད་ཀྱི་བྱམས་པ་དང་། བདེ་བ་དེ་ཐོབ་ནས་མ་འབྲལ་ན་སྙམ་པའི་དགའ་བ་གཉིས་ནི་ཤེས་རབ་རྫོགས་བྱང་ལ་དམིགས་པའི་ཟུར་སྟེ། ཟུར་གཉིས་དང་ལྡན་པའི་སེམས་བསྐྱེད་འདི་ནི་སྐྱེས་བུ་གསུམ་གྱི་ལམ་སྨོན་སེམས་ཁྱད་པར་བ་ཡིན་ནོ། དེ༷འི་ཆེ༷ད་དུ༷་ལ༷མ་བསྐྱེད་རྫོགས་ཟ༷བ་མོ༷འི་རི༷མ་པ༷་བསྒོ༷མ་ནས་སྤང་རྟོགས་མཐར་ཕྱིན་པའི་འབྲས་བུ་སྐུ་གཉིས་མངོན་དུ་བྱས་ནས་འཁོར་བ་ན་སེམས་ཅན་གཅིག་ཀྱང་མི་གནས་པའི་བར་དུ་བརྩོན་འགྲུས་བརྩམ་པ༷ར་བྱ༷འོ༷་སྙ༷མ་དུ༷་སེ༷མས་བསྐྱེད༷་པ་ནི་འཇུག་པ་ལ་དམ་བཅའ་བ་དང་། དངོས་སུ་འཇུག་བཞིན་པ་གཉིས་ཡིན་པས་འཇུག་པའི་སེམས་བསྐྱེད་སྟེ། ཀུན་རྫོབ་ཀྱི་སེམས་བསྐྱེད་འདི་གཉིས་ལ་བློ་སྦྱངས་ནས་མཐར་རང་རྒྱུད་ཀྱི་དོན་དམ་བྱང་ཆུབ་ཀྱི་སེམས་དེ་སད་དགོས། དོན་དམ་ཞེས་པ་ཆོས་ཀྱི་དབྱིངས་དང་། བྱང་ཞེས་པ་སྤང་བྱའི་དྲི་མ་གཤིས་ལ་མ་ཞུགས་པའི་དབྱིངས་དང་། ཆུབ་ཅེས་པ་རྟོགས་བྱའི་སྐུ་དང་ཡེ་ཤེས་མངོན་དུ་གྱུར་པ་དང་། སེམས་ཞེས་པ་འོད་གསལ་བའི་རིག་པ་དབྱིངས་ཡེ་ཟུང་དུ་འཇུག་པ་དེ་ཡིན་ནོ། །ཐུན་མོང་མ་ཡིན་པ་འབྲས་བུ་རྡོ་རྗེའི་ཐེག་པས་ནི་བདག་དང་མཐའ་ཡས་པའི་སེམས་ཅན་ཐམས་ཅད་ཡེ་ནས་སངས་རྒྱས་པའི་རང་བཞིན་ཡིན་པ་ལ་ཡིན་པར་ཤེས་ཏེ། རྒྱུད་བརྟགས་གཉིས་ལས། སེམས་ཅན་རྣམས་ནི་སངས་རྒྱས་ཉིད། །འོན་ཀྱང་གློ་བུར་དྲི་མས་བསྒྲིབས། །དྲི་མ་དེ་བསལ་སངས་རྒྱས་དངོས། །ཞེས་གསུངས་པ་ལྟར་རང་ངོ་མ་ཤེས་པར་འཁོར་བའི་འཁྲུལ་སྣང་གློ་བུར་བ་ལ་སྤྱོད་ཅིང་ཉམས་ཐག་པའི་འགྲོ་བ་རྣམས་ལ་རང་གནས་ཀྱི་ཡེ་ཤེས་སྐུ་གསུམ་འདུ་འབྲལ་མེད་པ་དེ་ངོ་སྤྲད་ནས། ད་ལྟ་ཉིད་དུ་དག་པ་གཉིས་ལྡན་གྱི་སངས་རྒྱས་སམ་ཁྱབ་བདག་རྡོ་རྗེ་འཆང་གི་གོ་འཕང་མངོན་དུ་བྱ་བ་ཞིག་བསྒྲུབ་སྙམ་པ་ཡིན་ནོ། །དེ་ལྟ་བུའི་ཐོག་མར་དགེ་བ་སྐྱབས་འགྲོ་སེམས་བསྐྱེད་འདི་མེད་ན་ཆོས་གང་བསྒྲུབ་ཀྱང་རྩ་བ་རུལ་ནས་ཆོས་ཀྱི་རྐང་མི་ཚུགས་པ་ཡིན་པས་འདི་ལ་ནན་ཏན་བྱའོ། །
༈ དམ་པའི་ཆོས་སྒྲུབ་པའི་དངོས་གཞི་དམིགས་མེད་མཚན་ཉིད་པ་ནི་རྒྱལ་སྲས་སར་གནས་མཐོང་ལམ་པ་མ་གཏོགས། རང་ཅག་ལྟ་བུའི་གང་ཟག་སོ་སྐྱེས་བའམ། ཚོགས་སྦྱོར་གྱི་ལམ་པ་ཞིག་གིས་མི་འོང་། དེས་ན་དངོས་གཞི་དམིགས་མེད་ཀྱི་དོད་ཐུབ་ཙམ་ནི། ཀརྨ་གླིང་པས། ཤེས་བྱ་སྒྱུ་མའི་དཔེ་བཅུ་དེ་བཞིན་དུ། །འཁོར་འདས་ཆོས་རྣམས་ཁྱེད་ཀྱིས་ཤེས་པར་གྱིས། །ཞེས་གསུངས་པ་ལྟར་ཡུལ་ཡུལ་ཅན་གྱི་ཆོས་ཐམས་ཅད་ལ་བདེན་ཞེན་སྤུའི་རྩེ་མོ་ལན་བརྒྱར་བགོས་པའི་ཆ་ཙམ་ཡང་མི་དམིགས་པར་སྣང་སྟོང་སྒྱུ་མའི་དཔེ་བརྒྱད་ལྟ་བུའི་ངང་ནས་སེམས་ཚོགས་དྲུག་གི་ཡུལ་དུ་མ་ཞེན་པར་རང་ལ་བླ་མའི་མན་ངག་ཅི་ཙམ་ཡོད་པ་དེའི་སྟེང་ནས་འདོན་བསྒོམ་བྱས་ན། ཇི་སྐད་དུ། ཤེས་རབ་ཆུང་ངུས་ཆོས་འདི་ལ། །ཐེ་ཚོམ་ཙམ་ཞིག་སྐྱེས་མི་འགྱུར། །ཐེ་ཚོམ་ཙམ་ཞིག་སྐྱེས་བྱས་ན། །སྲིད་པ་ཧྲུལ་པོ་བྱེད་པར་འགྱུར། །ཞེས་གསུངས་པས་སྤྱིར་བཏང་ཙམ་ལ་དེ་ལྟར་ཡིན་ཀྱང་། སྐབས་འདིར་རང་གི་རྩ་ཐིག་རླུང་གསུམ་བག་ཆགས་དང་བཅས་པ་དག་ནས་སྐུ་བཞི་ཡེ་ཤེས་ལྔའི་ངོ་བོར་གྱུར་པའི་ཆེད་དུ། སྟོབས་བཞིའི་སྒོ་ནས་སྐྱབས་ཡུལ་གྱི་ཚོགས་ཞིང་ལས་ལམ་དབང་བླངས་ནས་རྒྱུད་སྣོད་རུང་དུ་བྱས་མཐར་བླ་མ་ཡང་འོད་ལྔའི་གོང་བུའམ། ཡང་ན་འོད་དམར་པོར་གྱུར་ནས་རང་ལ་བསྟིམ་ཏེ་ཐུགས་ཡིད་དབྱེར་མེད་དུ་བསྲེས་ནས། ཕར་བློ་ཡིས་མ་བསྒོམ། ཚུར་དྲན་པས་མ་བཅིང་། ཐོལ་སྐྱེས་རྦད་ཆོད། དྲན་པས་རྗེས་སླེབས། གཉེན་པོས་འབུར་འཇོམས། གནས་པའི་ངང་སྐྱོང་གང་ཡང་མི་བྱེད་པར་སྒོ་ལྔ་ཆ་མཉམ་གྱི་ངང་དུ་རང་བབས་སུ་བཞག་ཚེ། འགགས་མེད་དུ་སྣང་། ཞེན་མེད་དུ་རོལ། རྟེན་མེད་དུ་གྲོལ་ན། རྫོགས་ཆེན་ལས། སྒོ་ལྔའི་རྣམ་པར་ཤེས་པ་ལ། །ཡིད་ཀྱིས་ཞེན་རྟོག་མ་ཞུགས་ན། །རྒྱལ་བའི་དགོངས་པ་དེ་ག་རང་། །ཞེས་གསུངས་པ་ལྟར་དུས་གསུམ་ཡིད་ཀྱི་འཁྲུལ་རྟོག་ཐམས་ཅད་སེ་ལོང་ལྕགས་ཀྱི་རྒྱ་མདུད་འཐོར་བའམ་སོག་མའི་ཕོན་ཐག་ཆད་པ་བཞིན་དུ་སོང་ནས་བྱིང་རྨུག་གཉིད་གསུམ་དང་བྲལ། ཉམས་ཞེན་གྱི་ཤུན་པ་དྭངས། གཟུང་འཛིན་གྱི་དྲི་མ་དགཕྱི་ནང་གི་གཏད་སོ་ཞིག་ཏེ། དཔེར་ན་སྣང་བའི་མདུན་ན་མུན་པ་མི་གནས་པ་བཞིན་དུ་དག་པ་ནམ་མཁའ་ལྟ་བུ། སངས་བ་མེ་ཏོག་ལྟ་བུ། དྭངས་པ་རྒྱ་མཚོ་ལྟ་བུ། རང་བབ་བསམ་གཏན་ལྟ་བུའི་ཉམས་ཆགས་ནས། ལྟ་བས་ཡན་ཐུབ། སྒོམ་པས་ཡེངས་ཐུབ། སྤྱོད་པས་རྐྱེན་ཐུབ། འབྲས་བུས་གོལ་ས་ཐུབ་པའི་གནད་ཀྱང་འདི་ལས་བྱུང་འདུགའདི་ཡི་དུས་རིག་པའི་རང་ངོ་འཕྲོད་ན་སྲིད་གསུམ་ཀ་དག་གི་ལྟ་བ། ཁམས་གསུམ་ཡོངས་གྲོལ་གྱི་སྒོམ་པ། ཕྱོགས་ལས་རྣམ་རྒྱལ་གྱི་སྤྱོད་པ། སྐུ་གསུམ་ལྷུན་གྲུབ་ཀྱི་འབྲས་བུ། དེ་ལས་མི་འདའ་བའི་དམ་ཚིག་ཅེས་འདི་ཡི་དུས། ལྟ་བའི་གནས་དགསྒོམ་པའི་རྨང་ཞིགསྤྱོད་པའི་ལ་དོར་ནས་གང་སྣང་ཅི་སྤྱོད་ཐམས་ཅད་ཡེ་ཤེས་ཀྱི་རོལ་པའམ་ཆོས་ཉིད་རོལ་བས་རྐང་རྗེས་རྡུལ་ཚོན་གྱི་དཀྱིལ་འཁོར། འགུལ་སྤྱོད་ཡེ་ཤེས་ཀྱི་ཕྱག་རྒྱ། བཟའ་བཏུང་ཚོགས་འཁོར་གྱི་རང་བཞིན། ཚོགས་ཆེན་ཡེ་རྫོགས་ཀྱི་དགོངས་པ་ཡིན་པས། བཟང་རྟོག་ཤར་ཡང་མཐའ་གྲོལ་ཀློང་ཡངས། ངན་རྟོག་ཤར་ཡང་རང་ཤར་རང་གྲོལ། ཕྱིའི་སྣང་བ་མ་སྤང་སྣང་ཐོག་ནས་གྲོལ་བ་བྱེའུ་ཁྲས་ཁྱེར་བ་ལྟ་བུ། ནང་འགྱུ་བ་མ་སྤང་འགྱུ་ཐོག་ནས་གྲོལ་བ་ཆུ་ལ་རི་མོ་བྲིས་པ་ལྟ་བུ་ནི། ཇི་སྐད་དུ། གང་ཤར་བསྒོམ་དུ་མ་ཤེས་ན། །གང་བསྒོམ་སྡུག་གི་སྣོན་པ་ཡིན། །གསུངས་པའི་གནད་ཡིན་ནོ། །དེས་ན་ངོ་བོ་སྟོང་ཉམས་ངར་ཆ་དང་ལྡན་པ། རང་བཞིན་གསལ་ཉམས་སངས་ཆ་དང་ལྡན་པ། ཐུགས་རྗེའི་རིག་ཉམས་གྲོལ་ཆ་དང་ལྡན་ན་ངོ་བོ་མི་རྟོག་ཀྱང་གསལ་ཆ་མ་འགག་པས་གཟུགས་མེད་ཁམས་ལས་གྲོལ། ཐུགས་རྗེས་རིག་ཀྱང་མི་འཕྲོ་བས་འདོད་ཁམས་ལས་གྲོལ་ཡོད་པས། གནད་འདི་ལ་གོ་མྱོང་རྟོགས་གསུམ་རེ་ཤིན་ཏུ་གལ་ཆེ་བ་མ་གཏོགས། གནས་ན་དྭངས་ཆ་མེད་ན་ཞི་གནས་ཀྱི་སྙིགས་མ། གསལ་ན་ལྷོད་ཆ་མེད་ན་གསལ་འཛིན་གྱི་འཆིང་བ། འགྱུ་ན་གྲོལ་ཆ་མེད་ན་འཁྲུལ་བའི་རྗེས་སྙོགས་ཡིན་པས་ཀུན་གཞི་དང་ཆོས་སྐུ། སེམས་དང་རིག་པའི་ལ་ཤན་ལེགས་པར་ཕྱེས་ཏེ་གོ་ལོ་ཐོས་ལོ་མང་པོ་ཞིག་མི་བྱེད་པར་གནད་ནས་ཟིན་ངེས་རེ་བྱེད་ནས་ཉམས་སུ་ལེན་དགོས་མ་གཏོགས་བར་དུ་དགེ་བ་དངོས་གཞི་དམིགས་མེད་འདི་ཤན་འབྱེད་ཀྱི་མན་ངག་དང་མི་ལྡན་པར་ཉམས་སུ་ལེན་འདོད་པ་ནི་འཁྲུལ་བ་ལས་ཀྱང་ཉིང་འཁྲུལ་བྱེད་པ་ཡིན་པས་གཟབ་འཚལ། ༈ དམ་པའི་ཆོས་སྒྲུབ་པའི་མཇུག་སྡུད་ནི་བསྔོ་བ་དང་སྨོན་ལམ་ཡིན་ཏེ། བློ་གྲོས་རྒྱ་མཚོས་ཞུས་པའི་མདོ་ལས། ཇི་ལྟར་ཆུ་ཐིགས་རྒྱ་མཚོ་ཆེ་ནང་ལྷུང་། །རྒྱ་མཚོ་མ་ཟད་བར་དུ་དེ་མི་འཛད། །དེ་བཞིན་བྱང་ཆུབ་ཡོངས་བསྔོས་དགེ་བ་ཡང་། །བྱང་ཆུབ་མ་ཐོབ་བར་དུ་དེ་མི་འཛད། །ཞེས་གསུངས་པས། དང་པོ་བསྔོ་བ་ནི་འཁོར་གསུམ་ལ་བདེན་ཞེན་གྱི་དམིགས་པ་མེད་པའི་ངང་ནས་བསྔོ་དགོས་ཀྱང་། དེ་མཚན་ཉིད་པ་ནི་ས་ཐོབ་ཀྱི་སེམས་དཔའ་མ་གཏོགས་རང་ཅག་ལྟ་བུའི་སོ་སྐྱེས་བའམ་ཚོགས་སྦྱོར་གྱི་ལམ་པའི་ཡུལ་མ་ཡིན། དེས་ན་རྗེས་མཐུན་ལྟར་བསྔོས་ན་འཁོར་གསུམ་དམིགས་མེད་ཀྱི་བསྔོ་བ་དང་མཉམ་པ་ཡིན་པས། དངོས་གཞིའི་ཏིང་ངེ་འཛིན་གྱི་ངར་ཤུགས་སམ་རྒྱ་མ་རལ་གོང་དུ་མདུན་གྱི་ནམ་མཁར་བསྔོ་བའི་དཔང་པོར་ཕྱོགས་བཅུའི་རྒྱལ་བ་སྲས་དང་བཅས་པ་ཚོགས་ཞིང་ལྟར་གསལ་བའམ། ཡང་ན་སྐབས་འདིར་གུ་རུ་རིན་པོ་ཆེ་ཀུན་འདུས་ནོར་བུའི་ལུགས་སུ་སྔར་ལྟར་གསལ་བཏབ་པའི་མདུན་དུ་སྡུག་བསྔལ་གཏོང་ལེན་ནི། གླང་ཐང་པས། མདོར་ན་དངོས་སམ་བརྒྱུད་པ་ཡིས། །ཕན་བདེ་མ་རྣམས་ཀུན་ལ་འབུལ། །མ་ཡི་གནོད་དང་སྡུག་བསྔལ་ཀུན། །གསང་བས་བདག་ལ་ལེན་པར་ཤོག ། གསུངས་པ་ལྟར་རྒྱལ་བ་སྲས་དང་བཅས་པའི་ཐུགས་རྗེ་བྱིན་རླབས་དང་། བདག་གིས་དཀར་པོ་དགེ་བའི་ལས་བསགས་པའི་བསོད་ནམས་ཀྱི་སྟོབས་ཀྱིས་བདག་གི་བདེ་སྐྱིད་བདེ་བའི་དངོས་པོ་དགེ་རྩ་རྒྱུ་འབྲས་དང་བཅས་པ། ཅིག་བགོ་བཤའ་བྱེད་པ་ལྟ་བུ་མ་ཡིན་པར་འོད་དཀར་པོའི་རྣམ་པས་སེམས་ཅན་ཐམས་ཅད་ལ་ཐིམ་པར་བསམ། སེམས་ཅན་དེ་རྣམས་ཀྱི་སྡུག་བསྔལ་རྒྱུ་འབྲས་བག་ཆགས་དང་བཅས་པ་འོད་ནག་པོའི་རྣམ་པས་རང་གི་སྙིང་ནང་དུ་བདག་འཛིན་གྱི་ངོ་བོ་ཐིག་ལེ་དུད་ཁའི་མདོག་ཅན་གསལ་བ་ལ་ཐིམ་ནས། སླར་ཐིག་ལེ་དང་བཅས་པ་བདག་མེད་ཆོས་ཀྱི་དབྱིངས་སུ་དྭངས་པར་བསམ་ནས་དལ་ཅིག་མཉམ་པར་བཞགདེ་ནས་མདོ་སྡུད་པ་ལས། སྟོང་གསུམ་རི་རབ་སྲང་ལ་གཞལ་བས་ཚད་བཟུང་རུང་། །རྗེས་སུ་ཡི་རང་དགེ་བ་དེ་ནི་དེ་ལྟ་མིན། །ཞེས་གསུངས་པས། ཡ་གི་སོ་སྐྱེས་ཉན་རང་ནས་སློབ་མི་སློབ་ཀྱི་ལམ་ལ་གནས་པའི་རང་གཞན་རྣམས་ཀྱིས་དུས་གསུམ་དུ་བསགས་པའི་དགེ་བ་ལ་རྗེས་སུ་ཡི་རང་བྱས་ནས། ད་ནི་དགེ་རྩ་གཞན་དོན་དུ་བསྔོ་རན་པ་ཡིན་ཞེས་ཚོགས་ཞིང་ལ་དགོངས་གསོལ་ལམ་སྙན་གསན་དབབ་པ་སྔོན་དུ་བཏང་ནས། ད་རེས་ཐུན་གཅིག་གི་དགེ་བ་འདིས་མཚོན་རང་གཞན་རྣམས་ཀྱིས་དུས་གསུམ་དུ་བསགས་པ་དང་། བསགས་པ་ལ་རྗེས་སུ་ཡི་རང་བའི་དགེ་རྩ་རྒྱུ་འབྲས་བུ་དང་བཅས་པ་གཅིག་ཏུ་བསྡུས་ཏེ་ཡར་བླ་མ་དཀོན་མཆོག་གསུམ་ལ་མཆོད་པ་ཕུལ། དེ་ནས་ཡར་མཆོད་པ་ཕུལ་བའི་བསོད་ནམས་དང་བཅས་པ། སུ་ཡི་ཆེད་དུ་བསྔོ་ན་ནམ་མཁའི་མཐའ་དང་མཉམ་པའི་སེམས་ཅན་ཐམས་ཅད་བླ་མེད་ཡེ་ཤེས་ཀྱི་འབྲས་བུ་ཐོབ་པར་བྱ་བའི་ཕྱིར་དང་། ཡུལ་གང་དུ་བསྔོ་ན་མཐའ་གཉིས་ལ་མི་གནས་པའི་ཆོས་དབྱིངས་བསམ་གྱིས་མི་ཁྱབ་པའི་གནས་དང་། ཚུལ་ཇི་ལྟར་བསྔོ་ན། འཁོར་གསུམ་ལ་བདེན་ཞེན་གྱི་དྲི་མས་མ་བསླད་པར་སངས་རྒྱས་དང་བྱང་ཆུབ་སེམས་དཔའ་གང་རུང་ངམ། ཡང་ན་དུས་གསུམ་གྱི་རྒྱལ་བ་སྲས་དང་བཅས་པའི་རྗེས་སུ་བསྙེགས་ཏེ་ཁྱེད་རྣམས་ཀྱིས་དགེ་རྩ་བླ་ན་མེད་པའི་བྱང་ཆུབ་ཏུ་ཇི་ལྟར་བསྔོས་པ་དེ་བཞིན་དུ་བདག་གིས་ཀྱང་བསྔོའོ་སྙམ་པ་ནི་བསྔོ་བ་མཚན་ཉིད་པ་དང་རྗེས་སུ་མཐུན་པ་ཡིན། གཉིས་པ་སྨོན་ལམ་ནི། ཁམས་པ་ལུང་པས། འདུས་བྱས་ཀྱི་དགེ་བ་ཐམས་ཅད་ལུང་མ་བསྟན་ཡིན་པས། སེམས་ཅན་གྱི་དོན་དུ་སྨོན་ལམ་རྒྱ་ཆེན་པོ་ཐོབ། གསུངས་པ་ལྟར་སྨོན་ལམ་གྱིས་མཚམས་མ་སྦྱར་ན་བསྔོ་བ་མི་འགྲུབ་པས། དེས་ན་བླ་མ་དཀོན་མཆོག་གསུམ་གྱི་ཐུགས་རྗེ་བྱིན་རླབས་ནུས་མཐུས་བདག་གི་དགེ་རྩ་ཇི་ལྟར་བསྔོས་པ་དེ་བཞིན་དུའགྲུབ་པར་ཤོག་ཅིག་སྙམ་པ་བསྔོ་བའི་མཐུན་འགྱུར་སྨོན་ལམ་གྱིས་མཛད་པ་ཡིན་པས། དེས་ན་ཐ་མར་དགེ་བ་བསྔོ་བ་སྨོན་ལམ་འདི་ཤིན་ཏུ་གལ་ཆེ་སྟེ། འདི་མེད་ན། བསྐལ་པ་སྟོང་གི་ཚོགས་བསགས་ཀྱང་། །ཁོང་ཁྲོ་གཅིག་གིས་འཇོམ་པར་བྱེད། ཞེས་པ་ལྟར་ལོག་ལྟ་སོགས་རྟོག་པ་ངན་པ་གཅིག་བྱུང་ན་ཡང་དགེ་རྩ་དེ་འཇོམ་པར་བྱེད་དོ། དེ་ལྟ་བུའི་དམ་པ་གསུམ་གྱིས་རྩིས་མ་ཟིན་པའི་དགེ་བ་ནི་ཟག་བཅས་བསོད་ནམས་ཆ་མཐུན་ཙམ་དང་། དམ་པ་གསུམ་གྱིས་རྩིས་ཟིན་པའི་དགེ་བ་ནི་ཟག་མེད་ཐར་པ་ཆ་མཐུན་གྱི་ལམ་ཡིན་པས་རྐྱེན་ཁོང་ཁྲོས་མི་ཚིགལོག་ལྟས་མི་གཅོད། མདོ་སྔགས་གཉིས་ཀྱི་ལམ་གནད་མཐའ་དག་འདིར་འདུས་ཏེ། མདོ་ལྟར་ན། སྦྱོར་རྗེས་གཉིས་ཀྱིས་སྣང་བཅས་དང་། །དངོས་གཞིས་སྣང་མེད་ཀྱི་ཚོགས་རྫོགས་པ་དང་། སྔགས་ལྟར་ན། སྦྱོར་རྗེས་གཉིས་ཀྱིས་བསྐྱེད་རིམ་དང་། དངོས་གཞི་རྫོགས་རིམ་མཐར་ཐུག་པ་ཡིན་པས་འདི་ལྟ་བུའི་ལམ་གནད་མི་ལྡན་པའི་གང་ཟག་དེ་མཁས་པ་པཎྚི་ཏ་ཞིག་ཡིན་ཀྱང་བློ་གྲུབ་མཐས་བསྒྱུར་བ་ཙམ་མ་གཏོགས་ལམ་ཞུགས་ཀྱི་གང་ཟག་མིན་གསུངས་སོ། །དེས་ན་པདྨ་ཅན་གྱི་མཚོ་ལ་ངང་པ་ཞུགས་པ་དང་། པདྨའི་ཚལ་དུ་བུང་བ་རྒྱུ་བ་བཞིན་དགའ་སྤྲོ་དང་བཅས་ཏེ་བྱིན་རླབས་བླ་མའི་ལམ་ཁྱེར་འདི་མཐོ་ལ་ཁ། དམའ་ལུང་ཁུང་། ཉི་མ་ཉིན་ཕྱེད། ཟླ་བ་མཚན་ཕྱེད། གནས་གང་དུ་བསྡད། གྲོགས་སུ་དང་འགྲོགས་ཀྱང་བླ་མ་སྤྱི་བོའི་གཙུག་ཏུ་བསྒོམ་ནས་དབང་བཞི་བླངས། སྙིང་གི་དབུས་སུ་བསྒོམ་ནས་ཐུགས་ཡིད་བསྲེས། །བསམ་རྒྱུ་བླ་མ་ལས་མེད་པ། བློ་སྣ་བླ་མས་འཕྲོག་པ། གང་སྣང་བླ་མར་ཤར་བ་ཞིག་མ་བྱུང་བར་དུ་མིག་གི་འབྱེད་འཛུམ། ཡན་ལག་གི་བརྐྱང་བསྐུམ། གོམ་པའི་འདེགས་འཇོག་གི་བར་ལ་ཡང་བླ་མའི་སྣང་བ་དང་མ་བྲལ་བར་ཉམས་སུ་བླངས་ན་རབ་ཚེ་འདིར་གྲོལ། མིན་ཀྱང་བར་དོའི་སྐབས་སུ་བླ་མ་བྱོན་ནས་དབང་བསྐུར་གདམས་ངག་ནོད་དེ་གྲོལ་ངེས་པ་ཡིན་གསུངས། ལས་དང་པོ་བས་དངོས་གཞི་ཐུགས་ཡིད་བསྲེས་པའི་དུས་སུ། ཡང་ཏི་ནག་པོ་གསེར་གྱི་འབྲུ་གཅིག་པའི་རྒྱུད་ལས། ཉིན་གཅིག་ཐུན་བཞིར་བགོས་པའི་ཐུན་རེ་རེ་སྦྱོར་དངོས་རྗེས་གསུམ་ཚང་བའི་མཉམ་བཞག་ལན་གྲངས་ཉེར་ལྔའམ་ཉེར་དྲུག་ཏུ་བྱ་གསུངས། བཀའ་ཐང་ལས་ཀྱང་། ཡུན་ཐུང་གྲངས་མང་ཁང་སྟོང་ཐིགས་པ་བཞིན། ཞེས་གསུངས་པས་ཐུན་ཉུང་ངུ་ལ་བསླབ་པ་གནད་ཡིན་ནོ། ཞེས་རང་བློར་ཅུང་ཟད་ཡོད་པ་རྣམས་ཟིན་ཐོར་བཀོད་པ་ཡིན་ཀྱང་བློ་ལོག་ལམ་དུ་སོང་བ་རྣམས་ལ་བསྟན་རྒྱུ་མིན་ལགས། དགེའོ། །
༈ དང་པོ་སྦྱོར་བ་སེམས་བསྐྱེད་ནི། དགེ་སྦྱོར་ཆེ་ཕྲ་གང་བསྒྲུབ་ཀྱང་། ཕ་མ་དང་དགྲ་བགེགས་གཙོར་བྱས་པའི་མར་གྱུར་སེམས་ཅན་ཐམས་ཅད་སྲིད་པ་རིགས་དྲུག་གི་སྡུག་བསྔལ་རྒྱུ་འབྲས་ལས་སྣང་བག་ཆགས་ཐམས་ཅད་དང་བྲལ་ནས་མཐའ་གཉིས་ལ་མི་གནས་པ་རྣམ་མཁྱེན་རྫོགས་པའི་སངས་རྒྱས་ཀྱི་གོ་འཕང་མྱུར་དུ་ཐོབ་པ་ཞིག་བྱེད། དེའི་ཆེད་དུ་དམ་པའི་ཆོས་ཟབ་མོ་བསྒྲུབ་པར་བྱའོ། །བར་དུ་དངོས་གཞི་ནི། དམིགས་མེད་དམ་མིན་ཀྱང་དགེ་བ་གང་བསྒྲུབ་ཀྱང་དྲན་པས་ཟིན་བཞིན་ལ་མ་ཡེངས་བར་སེམས་གཏད་ནས་བྱ་བ་ནི་གནད་གལ་པོ་ཆེ་ཡིན་པའོ། །ཐུན་མཐར་བསྔོ་བ་ནི། ཐུན་མཐར་ཐུན་གྱི་དགེ་རྩ་དེས་མཚོན་དུས་གསུམ་བསགས་ཡོད་ཀྱི་དགེ་ཚོགས། ལུས་ལོངས་སྤྱོད་དང་བཅས་པ་ཐམས་ཅད་ཕ་མ་དང་དགྲ་བགེགས་གཙོར་བྱས་པའི་མཁའ་ཁྱབ་སེམས་ཅན་ཐམས་ཅད་སྲིད་པ་རིགས་དྲུག་གི་སྡུག་བསྔལ། དེའི་རྒྱུ་སྒྲིབ་གཉིས་བག་ཆགས་དང་བཅས་པ་ཡོངས་སུ་དག་ནས་རྫོགས་པའི་སངས་རྒྱས་མྱུར་དུ་ཐོབ་པའི་རྒྱུ་རུ་དམིགས་ཏེ། དུས་གསུམ་གྱི་རྒྱལ་བ་སྲས་བཅས་ཀྱིས་ཅི་ལྟར་བསྔོས་པ་དེ་བཞིན་དུ་བདག་གིས་ཀྱང་ཡོངས་སུ་བསྔོའོ་ཞེས་པའི་བསྔོ་ཚིག་འདོན་ལ་དགེ་བསྔོ་བྱས། ཐུན་མཚམས་ཀྱི་བྱ་བ་ཡང་བྱའོ། །སྐྱབས་གཅིག་བླ་མ་བསོད་རྒྱལ་གྱིས་གསུངས་སོ། །