ཆེད་དུ་བརྗོད་པའི་འཕྲིན་ཐུང་། མཁན་ཤེས་བྱ་ཀུན་གཟིགས།
དེ་ཡང་འཛམ་གླིང་ནོར་འཛིན་གྱི་ཏོག་ལྟར་གནས་པའི་བསིལ་ལྡན་ཁ་བའི་ལྗོངས་འདིར་ཆོས་རྒྱལ་མེས་དབོན་རྣམ་གསུམ་གྱིས་སྐྱེ་དགུའི་ཕན་བདེའི་གཞི་རྩ་ཉག་གཅིག་རྒྱལ་བསྟན་རིན་པོ་ཆེ་སྤེལ་བར་མཛད་པ་དང་། ལྷག་པར་སྔོན་སྨོན་ཐུགས་བསྐྱེད་དུས་སུ་སད་པའི་ཉེར་ལེན་ལས། མཁན་སློབ་ཆོས་གསུམ་གདན་འཛོམས་པས་དམ་ཆོས་མདོ་སྔགས་ཀྱི་ཐེག་པ་ཚང་ལ་མ་ནོར་བ་དར་ཞིང་རྒྱས་པར་མཛད། ཁྱད་པར་དུ། གངས་ལྗོངས་ས་གཞི་རྟ་རྨིག་གང་ཙམ་ཡང༔ ཞབས་ཀྱིས་མ་བཅག་མེད་པའི་བྱིན་རླབས་མཛད༔ ཅེས་པ་ལྟར་གུ་རུ་ཡབ་ཡུམ་དང་། ཐུགས་སྲས་རྗེ་འབངས་རྣམས་ཀྱིས་བོད་ཡུལ་སྤྱི་དང་ཁྱད་པར་གྱི་གནས་དང་། རི་མཚོ་གངས་བྲག་ཐམས་ཅད་དུ་ངོ་མཚར་གཏེར་ཁ་སྦས་པ་དང་། སྒྲུབ་པའི་གནས་མཆོག་ཁྱད་འཕགས་སུ་བྱིན་གྱིས་བརླབས་པས། དེང་གི་དུས་སུ་ཡང་གནས་ཀྱིས་གང་ཟག་བྱིན་གྱིས་རློབ་པའི་ཡ་མཚན་གྱི་ལོ་རྒྱུས་སྐྱེ་དགུའི་དཔལ་དུ་ཆེ།
དེ་ལས་མདོ་སྨད་ས་ཡི་ཐིག་ལེ། གཡུ་ལྗོངས་ལྷ་ཡི་ལུང་པར་ཡང་གུ་རུ་པདྨ་འབྱུང་གནས། མཁའ་འགྲོ་ཡེ་ཤེས་མཚོ་རྒྱལ། ལོ་ཆེན་བཻ་རོ་ཙ་ན། རྒྱལ་མོ་གཡུ་སྒྲ་སྙིང་པོ། གྲུབ་ཐོབ་སྐྱེས་བུ་རྒ་ལོ། ལྷ་ལུང་དཔལ་གྱི་རྡོ་རྗེ། གླིང་རྗེ་གེ་སར་ལྷ་འཁོར་སོགས་ཀྱི་དངོས་དང་རྫུ་འཕྲུལ་གྱིས་ཞབས་ཀྱིས་བཅགས་ཤིང་བྱིན་གྱིས་བརླབས་ནས་གནས་རི་ངོ་མཚར་ཅན་དུ་མ་བྱིན་ཅན་དུ་བསྒྱུར་བར་མཛད་ཅིང་། དེ་དག་གི་རྣམ་པར་འཕྲུལ་བའི་སྐྱེས་ཆེན་སྤྲུལ་པའི་སྐུ་རྣམས་ཀྱིས་སྔོན་གནས་རྗེས་དྲན་གྱི་དག་པའི་སྣང་བ་འབྱམས་སུ་ཀླས་པས་ངོས་འཛིན་དང་གནས་ཡིག་ཕབས་པ་སོགས་ཀྱིས་ལས་ཅན་སྐལ་བཟང་གི་སྐྱེ་བོ་དུ་མ་ལ་ཐར་ལམ་གྱི་སྣང་བ་བསྐྲུན།
ད་ལམ་ཆོས་ཀྱི་མཆེད་པོ་ཡི་དམ་རྡོ་རྗེས་ངོ་མཚར་ཁྱད་ཡོན་ལྡན་པའི་གནས་དེ་དག་གི་ལོ་རྒྱུས་དང་གནས་ཡིག་ཕྱོགས་དུ་མ་ནས་དཀའ་ཚེགས་ཆེན་པོས་འཚོལ་སྡུད་ཕྱོགས་བསྒྲིགས་ཀྱིས་དེབ་ཆུང་འདི་ཉིད་དད་ལྡན་རྣམས་ཀྱི་སྤྱན་ལམ་དུ་བསྟར་བ་ལ། གུས་པས་རྒྱང་རིང་ནས་རྗེས་སུ་ཡི་རང་དང་ལེགས་སོའི་མེ་ཏོག་ཆབས་གཅིག་ཏུ་འཐོར་བ་དང་། བཀའ་དྲིན་ཆེ་ཞུ་རྒྱུ་ཡིན།
སླད་མར་གནས་ཡིག་འདི་སྐྱེ་དགུ་ཀུན་ལ་ཐར་ལམ་གྱི་སྣང་བ་དཀར་པོ་འདྲེན་པའི་དེད་དཔོན་དུ་འགྱུར་བར་སྨོན་ཅེས།
ལྟེ་བའི་མཚལ་ཐིགས་གཡུ་ལྗོངས་འཛིན་མར་འཕོས་ཀྱང་། ལས་ཀྱི་བསྐོས་ཐང་ས་མཐར་འཁྱམས་པ་ལ་དབང་བ། མཁན་པོའི་མིང་གིས་བརྗིད་པ་ཤེས་བྱ་ཀུན་གཟིགས་དེས།
ཡུལ་དབུས་གཙང་གཡོ་རུ་གྲྭ་ཕྱི་འོག་མིན་ཨོ་རྒྱན་སྨིན་གྲོལ་གླིང་གི་བཤད་གྲྭ་ནས།
རབ་གནས་ལྕགས་སྟག་ལོའི་ས་ཟླའི་ཚེས་བཅུ་བཟང་པོར་འཕྲལ་དུ་ཕུལ་བ་དགེ།