ཀློག་པ་པོར་ཞུ་བའི་གཏམ། ཡི་དམ་རྡོ་རྗེ།
བརྩེ་ལྡན་གྱི་ཀློག་པ་པོ་ལགས།
འུ་ཅག་གི་ཕ་ས་སྨུག་པོ་སྟེ་རི་མཐོ་ས་གཙང་གི་ཞིང་ཁམས། བསིལ་ལྡན་ཁ་བའི་ཡུལ་གྲུ་ཆེན་པོ་འདི་ནི་འཕགས་མཆོག་ཕྱག་ན་པདྨོའི་གདུལ་ཞིང་ཡིན་ཕྱིར་རིགས་གསུམ་སྤྲུལ་པའི་མི་རྗེ་ཆོས་རྒྱལ་མེས་དབོན་རྣམ་གསུམ་སོགས་ཀྱིས་ལུགས་གཉིས་ཀྱི་ཕ་ཆུས་བཟུང་། །
རྒྱལ་དབང་པདྨ་ཀཱ་རས་ཞབས་ཀྱིས་མ་བཅགས་པ་མེད་པར་གཏེར་སྦས་བྱིན་གྱིས་བརླབས་པའི་གནས་མཆོག་ཞིག་ཡིན་པ་གཞིར་བཅས། ཁྱད་པར་མདོ་ཁམས་གཡུ་མཁར་བདེ་སྐྱིད་ནོར་བུའི་ར་བ་འདིར་ཡང་འཕགས་བོད་ཀྱི་ཆེ་དགུའི་གཙུག་རྒྱན་དུ་གྱུར་པ་དུ་མས་ཞབས་ཀྱིས་བཅགས་ཤིང་གཏེར་ཁ་སྦས། སྒྲུབ་གནས་དབེན་རིར་བྱིན་གྱིས་བརླབས་པ་དང་། ཡུལ་འདིར་བྱོན་པའི་སྐྱེས་ཆེན་དུ་མས་གནས་སྒོ་ཕྱེས་པའི་འབྲེལ་ཚད་དོན་ལྡན་གྱི་གནས་མཆོག་དུ་མ་ཞིག་བཞུགས་པའི་གནས་ཡིག་དང་ལོ་རྒྱུས་ཕལ་མོ་ཆེ་དུས་འགྱུར་ཁྲོད་གཏོར་བརླགས་སུ་གྱུར་པ་དང་།
ཁ་ཤས་ཡོད་པ་དག་ཀྱང་རྡོ་དང་ཤིང་ངོས་སུ་བརྐོས་བྲིས་བྱས་པ་དང་། རྒན་རབས་རེ་ཟུང་གི་བློ་ལ་ཐར་ཐོར་བཞུགས་པ་ཁ་ཤས་ལས་དཔེ་རྒྱུན་ཆེས་དཀོན་པར་གྱུར་པ་ཉམས་སུ་ཕངས་ནས་ཆེད་དུ་གནས་ཡིག་རྣམས་འཚོལ་སྡུད་དཔེ་བཤུ་བྱེད་པར་གང་སར་ཕྱིན་པ་དང་།
གནས་ཁ་ཤས་ཀྱི་གནས་ཡིག་གཏན་བརླགས་སུ་གྱུར་པ་གནས་བསང་དང་། རྒན་རབས་དག་གི་ངག་སྒྲོས་ཁུང་ལྡན་ལ་གཞི་བཅོལ་ནས་ཁོ་བོས་བསྟོད་ཚིག་གསར་དུ་བྲིས་པ་ཁ་ཤས་ཀྱང་བཅུག་པ་དང་། ཁྱད་པར་གཏོང་ཕོད་ཀྱི་ཕྱག་ཟུང་རིང་དུ་རྐྱོང་བའི་སྤུན་མཆོག་ཚེ་དབང་ནོར་བུས་དཔར་སྐྲུན་གྱི་མཐུན་རྐྱེན་ཡོངས་རྫོགས་སྦྱར་བའིི་བཀའ་དྲིན་སོགས་ལ་བརྟེན་ནས་མདོ་ཁམས་གཡུ་ཁོག་ཡུལ་གྱི་གནས་ཡིག་ཕྱོགས་བསྒྲིགས་དགེ་མཚན་བྱེ་བའི་འོད་སྣང་ཞེས་པའི་དེབ་ཆུང་འདིའི་ལང་ཚོའི་འདབ་བརྒྱ་བཞད་པའི་གོ་སྐབས་བྱུང་བ་ཡིན། དེས་ན་དེབ་ཆུང་འདིའི་ལྷད་མེད་དྭངས་གཙང་གི་འཛུམ་དཀར་ཁྱེད་ལ་འཁོར་བ་རྩིས་མེད་དུ་མི་གཏོང་བར་གཞན་ཕན་ལྷག་བསམ་དག་པས་གནས་སོ་སོར་མཇལ་སྐོར་རེ་བྱེད་རྒྱུ་དང་། མི་རབས་རྒྱུད་འཛིན་གྱི་གཞོན་སྐྱེས་དག་ལ་གནས་བཤད་རེ་བྱེད་རྒྱུ་ཐུགས་དབུས་སུ་འཆང་འཚལ། གནས་ཡིག་སྒྲིག་སྤེལ་གྱི་ཐད་ནོར་འཁྲུལ་གང་མང་ཞིག་ཤོར་ཡོད་ངེས་པས་དེ་དག་མཁའ་ལྟར་ཡངས་པའི་ཐུགས་ཀློང་དུ་བཟོད་པར་གསོལ་ཞེས།
རྩོམ་སྒྲིག་པས། །